Israel Gamsunga Pathen um lou ham?

Israel Gamsunga Pathen um lou ham?

“Isreal gamsunga Pathen um lou ham” (2 Lengte 1:3,6) ti thudoh hi Pathen mipa Elijah in Israel lengpa Ahaziah lhacha ho henga athu doh ahi.

Nikhat Isreal lengpa Ahaziah hi Samaria kho a aleng inpi, inden chung nunga kon in akhe lhan nasatah in aki tong khan ahi. Akitoh khah na akona dam doh dinga ki ging cha jou lou ahi tai. Alhacha ho chu Ekron mun a, mi hon ahou u Baal-zebud pathen henga chun asol in, adam leh dam lou ding chu aga doh sah e.

Vantil in Tishbe a cheng Elijah chu asol in, Ahaziah lengpa soh ho henga “Israel gamsunga Pathen um lou ham?” tin agasei sah e. Israel te Lengpa Ahaziah in ahou u Pathen chu gel doh louva pathen dang agel doh chu Pathen mitmua dih loutah ahi.

Pathen lung han na achunga achun, “Lup muna kon a thoudoh jou lou va, thi den ding na hi” tin Elijah henga thu aki phong in ahi. Hiche thukiphon bang chun Lengpa Ahaziah chunga achun alei hinkho ana bei tai.

Christian ten jong hahsat genthei ito teng u leh ihou u Pathen geldoh ji louvin, thilchom chom chung joh a iki ngam kha ji uvin, hiche chu Pathen lung han na tah ahi ji e. Hinkho a hahsat genthei leh kitoh khahna ito teng leh Pathen gel doh masat ding hi Pathen lungdei leh lung lhaina ahi. Pathen a kon a lung ol na leh damtheina um ahi ti su mil pou te.

Nehkholal

November 13, 2010