NANGHO PATHEN HING IN-THENG NAHIUVE

NANGHO PATHEN HING IN-THENG NAHIUVE

Pathen In-theng kiti hi Church Building kiseina ahipoi mihem tahsa joh aseina ahijoi. Solchah Paul in Christa tahsan Houbung mithengte kom’a “Pathen hing Intheng nahiuva nasunguva Pathen Lhagao achenchu nahet louvu ham? Pathen Intheng sumanga chu Pathenin ama chu asuhmang ding ahi.” tin asei jin ahi. (1 Cor 3:16-17) Hinla,Church Building angaipoi kitina jong ahideh sampoi. Ajehchu, Church Building chu lhagao lam’a ikiloikhomna diu, Pathen ihoukhomna diu ahilouleh Pathen thupha kihilna mun dinga ngai khoh khat ahi. Hijongleh Christian te dia Pathen In-theng kiti hi ipi hija, ipi tabanga gelkhoh ngai ham tihi hetchet angai ma man ahi.

PATHEN HING IN-THENG HETKHEL BAILAM:

Pathen hing In-theng hetkhel abailamin ahi. Vet sahnan Hou-In (Church Building) itipenu sunga iumteng ipi iti kium ji em? Hou-In thenna (sanctity) pa hi amitakip in theitopson akinit jinai. Hou-In sungchu jana/ginna lentah akineijin; koiman chonset lunggel anei nompoi. Koiman thuphalou a seinompoi, thilphalou abolnom pon ahi. Khamna thei ne/don lamlendunga onleho jeng jong Hou-In sunga umdan phatah in umjiuve. Chep leh mom bolhon jong Hou-In sunga abolpouve. Ahitheichan a lungthimpha leh lunggelpha gelpum in Pathen vahchoina leh Pathen thungaina akinei jin ahi. Ipi jeh ahi dem? Ajeh pentah chu hiche Hou-In sung (Building sung) a hi Pathen cheng ahilouleh Pathen um ahi itinao khat ahi. Hijeh a chu Hou-In sung hi atheng (holy) a kigela, Hou Inn sung idalhah teng idei dei kibolkit, inop nop kiseikit, idu du kinekit, ivet nom nom kivekit ji ahi tai. Ahileh, Pathen chu hiche Hou Inn sunga chu cheng mong hi nan tem?

Ahipoi! I Bible un ipi iti eihil um? Acts 17:24, “Vanoi leisetle asunga thil’um jouse sema Pathen chu vanle lei Pakai ahin, mihem khutna kisa In Hou-In (building) ah acheng poi” tin aseijin ahi. Chusang chun, “Nangho Pathen Inn theng nahiu ve” (1Cor 3:16) tin aseijon ahi. Chonset kisihna neija ahinkho Pakai kom’a kipelutho, Christa nungjui tahsanho sunga chu Pathen hing lhagao chenga hoilai munleh aphat jouse’a thenna hinkho leh Pathen deibanga umding hi Christian te ichonna diu doljoh ahi. Nang leh kei tahsa hi Pathen chenna In-theng ahi joi.

Pathen hing In-theng hetkhel abailame! akitilona jehchu Pathen In-theng kiti hi “Church Building” pa hai? Or “Mihem tahsa” (Body) kiseina ham ti ihetkhenlou jeh’u ahi penne. Mitamtah in hichehi akihe dohji pon, Pathen loupina eiho akonin akimudoh ji lou ahi. Hijeh a chu Pakai amatah in Hougut/Houlamkai (religious leaders) hokoma ana sei chu, “Hiche Temple hi suseuvin nithum kah’a katundoh kitding ahi.” (John 2:21) Hichu Jesun amatahsa (BODY) anaseina ahi. Atahbeh in Jesu chu amanun, Cross ah akhenbeh un, athat un, chuleh lhan’ah avuijun; hinla nithumnin athilah a konin ahung thoudoh kittai. Solchah Paul’in hiche thudol kichenin anahen, Corinth Houbung (Christians) ho kom’a anasei chu: “Pathen hing In-theng nahiuva nasunguva Pathen Lhagao achen chu nahet louvu ham? Pathen Intheng sumanga chu Pathenin ama chu asuhmang ding ahi.” tin ana hilchah in ahi. (1 Corinthians 3:16,17) Chubanna, “ Ahiloujongle Pathen a kona naneiyu Lhagao theng nalung sunguva chenga chu natahsau hi a In-theng ahi ti nahetlouvu ham? Nangho nanghoa tum nahi pouve; nangho mankipea kichosa nahi tauve, hijehchun natahsa chunguvah Pathen choianun”.(1 Corinthians 6:19-20) Hichun avetsah chu mihem tahsa hi Pathen In-theng jana neitah leh kituptah a manna Pathen loupinna pejing hinkho man angaidan eihet sah un ahi.

Hijehchun sopiteho, eiho Pathen Inntheng ihiuleh, akisuthengsa (SANCTIFIED), atheng (HOLY) ihi taove. Ajeh chu Pathen theng lhagao chu isunguva cheng a, hichun i-nitin hinkhou hi apuijing ding ahi. Hijeh chun, Pathen In-theng ihinau photchetsahna lampi anoijakipe hobanga ichon hinam ti kikholphau hite:-

1. UMNA MUN JOUSE A THENNA HINKHO MAN DING:-
 In umna mun’a jong then ding.
 Bazaar ikaina mun a jong then ding.
 Ikholche namunho a then ding.
 School/college ikaina muna jong then ding.
 Inatohna muna jong then ding.
 Hou-in ikaiteng jongleh then ding.

2. PHAT JOUSE A THENNA HINKHO MAN DING.
 Phatjouse a Christian hi angai je.
 Inun ikhan ikhosah dan (lifestyle) Christa kipana thupha toh kitoh hinam?
 Sunday Christian, Christmas Christian, Good Friday Christian atihou, nikho poimo kimanna ho a Christian hija; anikho akichai teng ageina lam kihekit talou mi akitam nom in ahi.

3. HINKHO KICHEH MAN DING.
 Pathencha ihitahleh kichehtaha Pathencha hi angaijin ahi. Phatlhem nahinkhohi kichat um tah ahi.
 Bible in Lumla lumlou votla votlou ati ho chu adinmun u kichat umtah ahi. “Keiman nathilbol kahenai, Nangma votla navotpon, sa la nasapoi; navotle votngalin, nasatle sangal le chun pha kasha ahi.(Rev 3:15)
 Bible in miphalhem (HYPOCRISY) ati hotoh bahlou ding ahi. Miphalhem hon vang leisetna mihem pachatna/seiphat kilo na bouva umjiu ahi. (Matthew 6:5; 6:16, etc.).
 Hitabang miphalhem hochun midangjong damun/gotna mun’lama apuilut thajiuve. (Mat 23:15; 24:51)

4. NATAHSA VENGTUP MIN.
 Christa thisan lutaha lhatdoh ihitah jehun eiho eima’a dia hing hitalouva Christa dia hing joh ihiu taove (1 Corinthians 6:19,20). Pakai Christa chu Lengleh lamkai pipupenna ineijing uva, eima lungdei hilouva ama lungdei bang a hinkho iman johdiu tina ahi.
 Pathen Inntheng subohthei jatchom chom Jachep, Khamnathei louho’a lop leh, Juneh motchon ho ibol loudiu tihi Pathen In-theng ijanau dihtah photchenna ahijoi. Hitabang bolho chu lhagaulam damtheina keu hilouva tahsa damtheina jong ahi. Medical leh scientific fact hojeng injong Ju (Alcohol) hin, Thin (Liver) leh Kal (Kidney) asuhset thei ahi ti eihilun ahia.
 Na tahsa Pathen Inntheng ahi nahetleh phatecha naventupma najabol angaijin ahi. Khutileh damjong nadamsot ding; nom nasaha Pathen umpina nachan jing ding ahi.
 Pathen In-theng chu nahi tah leh natahsachu Pathen minloupi nading a namanchah ding angai jin ahi.

5. BOLDING A PHA
 Hou-In sunga naboldia nadeilou thilphalou ho mundang a jong boldan.
 Hou-In sunga naboldia nadeiho thiphaho chu mundang a jong bol go jingin.
 Hou-In sunga naseidia nadeilou thilphalou ho mundang a jong seidan.
 Hou-In sunga naseidia nadeiho thilphaho chu mundang a jong seijin.
 Hou-In sunga nageldia nadeilou thilphalou ho mundang a jong geldan.
 Hou-In sunga nageldia nadeiho thilphaho chu mundang a jong gel jingin.
 Hou-In sunga navetdia nadeilou thilphalou ho mundang a jong vetdan.
 Hou-In sunga navetdia nadeiho thilphaho chu mundang a jong ve jingin.

“Chuti ahijehchun, sopite, Pathen lungset vanghin natipumpiu chu longlhen thengtah gan kihinglhaa bangin Pathen lahthei doltahin Pathenah kipeuvin, tia kahil nahiuve. Hichu nalunguva nahounau ahi. Chuleh nangho tulai vannoi leiset chonhin chon hihun; Pathen lungdeilam, hichu apha, lahtheile phat chamkim hi ipi ahi, nahetdoh theina dingun, Lungthah kengunlang Limchom pu’vin” (Romans 12:1,2). Pastor, Missionary, Evangelist, Houbung lamkai, Christian Office worker, Christian Nurse, Christian Doctor akoihijongleh itahsauhi longlhen thengtah gan kihinglha banga Pathen lahtheidol tahleh thengtah a Pathen angsung a ikipehlut thah kit uva Pathen In-theng ihinau kithah vetphat kit angai jin ahi.

Pathen Hou-In theng ihinau athaha semphakit dingleh ama deilama hinkhotheng jong mangtheidin Pathenin Houbung mithengte thenna hinkho leh Pathen loupina phongdoh theidin vang eiboh jomjing taohen Amen.

REV JANGKHOMANG DOUNGEL, GUWAHATI