David T. Haokip Hinkho Thusim

-Vicar {Senior Minister} St George’s Anglican Church of England, London

-Pastor, Kuki Worship Service, (KWS) London

Insung Thusim

Canon Dr. David T. Haokip (Tong Kho Yam) hi 1957 kumin Tuinom khopi, Homalin Township, Upper Chindwin District, Myanmar a an peng in ahi. Apa On Kho Jang ahin anu Pi Vei Hoi ahi lhon e. Pen pi numei 4 ahin, ni ahinkho abeitan, tu hin Mrs Mary Hat Kho Lhei (Tamu) leh Mrs Esther Ting Nei Lam (Imphal) ahi lhon e.

Kum 1992 nin Ngalmol, Lamka a cheng Pa Jang Kho Hen leh Nu Thong Hoi chanu Miss Tinnu Haokip toh houbung dan theng in ana ki cheng lhon in, tun , chanu ni: Miss Momica hoi Chan Kim kum 19, Miss Hoi Dei Chong kum 10, anei lhon e. Chule chapa khat jong anei lhon in amin Joshua Jang Chin Len ahin tun kum 18 apha tan ahi.

Education

Tamasan kho achanlai un, Tamaung Burmese Buddhist Monastery ah Monks (kulu) kom ah lekha kum 2 ahin sim panin, chujou vin Kat-ta Middle State School a class 4 chan ahin simjome. Class 5 a pat 7 chan Homalin State High School ah ahin sim jouin, class 8 hi Myintkyina, Kachin State ah aga sime. Class 9 leh 10 hi Mandalay No 1, State High School ah asimin ahi.

Government Service

Class 10 a pass jouvin, sumlepai hahsat jalin University kai talou vin Government school oija joh aboipai tai. 1.  Somra Tract a Layshi Myomyo State Middle School, 2. Kongkailong Village State Primary School leh 3. Joljam Village State Primary School ho ah lekha hil in pon tho tah in ana pang in aih.

Pathen a kon kouna leh Bible sim

Pathen a kon kouna a changin Government natoh adalhan in 1979 kumin Holy Cross Theological College, Yangon {Rangoon} ah akai e. Chujou 1987 kumin au teni {Mr T Jangsei leh Mrs Kimlhing Haokip, Imphal} in Madras leh Bangalore khopi ho ah Bible asim sahbe lhonin ahi hia chun Bachelor of Theology ( B Th) leh Master of Divinity (M. Div) pha te chan ahin chai je.

Pathen lhacha natohna

Burma gam Anglican Houbung {Diocese of Mandalay} ah Upper Burma Youth Director in apang in chu jouvin, Lashio leh Namtu khopi aum Anglican Houbung {St John’s, Lashio leh Namtu St Andrew’s Anglican Parish} ah Parish Priest {gambih pastor} in apang e.

Chule ama lamkai nan (president) hinan Chindwin Christian Bible Seminary {CCBS}, Tamu khopi a 1990 kumin akiphut doh in ahi. Burma gama Kukite Bible school ama sapen jong ahi. Hiche toh kilhon chun Tamu khopi a Nampalong Anglican Church jong Revd John Tongkholet leh Pu Onkhojangte toh aphut dohin, Kabaw Valley a Anglican Houbung masa penjong ahitai.

India leh Korea Gam Chenna

Pathen thilgon hi mihemte din hetphah ahipoi. Ajinei jouchun Burma gama chenthei nading chu ahasa tan, Manipur ah ahungchen un ahi. Hiche a chun Burma gam hungjam doh ho chule student ho chule business bolho kom ah Pathen na a tongin, Burmese Fellowship, Imphal leh Lamka khopi ho ah abolun ahi, chukal valin Burma Democratic movement ho aki thopin, Kuki Students Democratic Front {KSDF} jong aphut doh e.

Korea Khopi Seoul a Pathen lhacha a pan: 1995 kumin, aloipa Korean missionary Revd Kim in Seoul khopi a Burmese Community holah a Pastor dingin agon peh in, kum 2 vel Pathen lhachan aga pang e.

London Khopi a lhun

1997 kumin gel phah louvin, 1980 kum lai a ana kihet pi Anglican Minister pu, Revd Dr John Stott in London Institute for Contemporary Christianity a Bible simdin ahin kouvin, ginchat lou chun London khopi alhun tai. 1998 kumin aji Mrs Tinnu leh a chate ni Monica Hoichamkim leh Joshua Jangchinglen London ahunglhung un ahi.

Church of England a Minister apan

Pathen thilbol kidang tah khat chu Church of England, lengte houbung a minister hungpan hi ahi. 1999 kum in, Church of England a Pathen lacha a pantheina {Licence} Archbishop of Canterbury a kon amun, 2000 kumin British Government in lhacha na atoh theina {Visa} apen ahi. Tukum {2011} a hi London gama lhacha na tong a apan kum 12 ahitai.

Pakai kum 2009 chun Burma a Anglican Diocesan Bishop of Sittwe the Right Revd Dr Barnabas Thaeng Hwai in, Canon title ahinpei. Anglican Church a hin minphat na {Achievement Award} title jatchomchom aumin, hiche lah a chu Canon kiti Pathen lhacha natoh na a Pachan na lenpen khat ahi.

Doctor of Divinity (D.D)

Pakai kum 2005 chun London College of Business and Theology in Pathen lhacha na kum 20 val ahin tohjal a kon minphatna leh kipapi jalin Doctor of Divinity chu apeuvin ahi.

Kuki Worship Service (KWS)

Kum 2007 kum in KWS aphut dohun, England sung leh London a cheng Kuki holah a Hon. Pastor injong apang e.

England Lengnu in chadon dia akou

England lengnu hin kum nga {5} leh khatve agam sung a Hou lamkai ho, Parish Priest/Minister phabep a inn {Buckingham Palace} a chadon in akou jina ah, 2008 kum chun ama jong agapangin hinkho a heimil thei lou khat ahi.

Van noi gam 15 a kholjin na

Vanoi gam len ho: Asia, Europe chu America gamkai 15 sung a Holiday man leh Pathen thusei jin ana khol jin len ahi. Ama leh akhol jinna mi te ho ding in thupha tampi asei doh in ahi.

Thuchaina

Tutu hin aloinu Mrs Tinnu toh achate Monica Hoichamkim (University a Law asimlai), Joshua Jangchinglen, college kailai leh Regina Hoideichong class 4 simlai hotoh London khopi ah acheng uve. Vannoi ya Kuki chate um na ho jong akhol thei chan akhol in, chule jat le nam ngailut na jal in, hahsa genthei pan hu thei thei apan hun, tilkhou najong tam pi anei jin ahi.

London khopi sunga ain kouva aga chen lut thei juva, Pathen na toh, chate themjilsahna leh pan pi ngaiho pan pi thei ya aum jal in Ama puiya Pathen loupi jing ta hen! Ama leh a insung mite thusim a kon in mipha bep in tha hatna leh kitil na i nei diu tahsan aum e. Pathen in hiche thusim a sim jouse chunga phatthei na pen hen lang, chule Pathen min loupi tahen!

Amen.