GENESIS KITI SEMTIL BU

MOSE LEKHABU MASA GENESIS KITI SEMTIL BU

Thupatna

Genesis kiti hi akipatna, abul kiti ahi. Hiche lekhabu hin leiset kipatna, mihem namkim konna le vannoiya  chonset kipatdoh le genthei hesoh umdoh thu, chule Pathenin mihem namkim aboldan aseiye. Semtil Bu hi hopnia khen thei ahi.

  1. Bung 1-11 hin vannoi kisem le mihem chi le nam kipatna aseiyin, Adam le Evi, Cain le Abel, Noah le twisanglet chule Babylon insang kisah thusim aseiye.
  2. Bung 12-50 hin Israelte penna pului thusim aseiyin-amasapen Abraham ahin, Pathen tahsan le athu nunjeh a minthangtah ahi. Abanin achapa Isaac le atupa Jacob (Israel min changpa) thusim le Jacob chapa Joseph thusim hi atumbeh-in akiseiyin, aman Jacob le a-insung mite Egypt’a cheng dia apuilut thudol akiseiye.

Semtil Bu hin mihem thusim asei vangin, athupipen Pathen thilbol thusim ahibouve. Pathenin vannoi asemdol’a pat asemsa mihemte akhohsa jing ding thun akichaiye. Alekhabu pumpia hin athupipen Pathen ahi jenge. Aman chonsete thu atanin, thilse bol ho talen apei. Amite apuilen, akithopin, athusimu asemtoh-in ahi. Hiche lekhabu hi mihem nam masate tahsan melchihna ding le tahsan na chu umsah jing ding deinaa kijih ahi.

Asung thu kaigop

Vannoi le mihem namkim kisemdol    1:1-2:25

Chonset le gim genthei kipat                  3:1-24

Adam a pat Noah gei                               4:1-5:32

Noah chule twisanglet                            6:1-10:32

Babylon insang                                       11:1-9

Shem a pat Abraham gei                      11:10-32

Puluite: Abraham, Isaac, Jacob           12:1-35:29

Esau chilhah ho                                      36:1-43

Joseph le asopite                                    37:1-45:28

Egypt gama Israelte                              46:1-50:26

SEMTIL BU BUNG 1

Pathen thilsem thusim

Ni Khat                                                                                                                           1 Semtil’ in Pathenin van le leiset ahinsemtai.
2 Ahin leiset chu alim le agong bei, twipi thuh tah a ki khang chule achunga thim pi jing ahin, twipi chu Pathen Lhagaovin a-opkhum’e.
3 Pathenin, “Kho hungvah hen,” atile, ahungvahtai.
4 Pathenin khovah chu avetle apha lheh jengin, muthim le khovah asep khentai.
5 Pathenin khovah chu “Sun” asah-in, muthimchu “Jan” asah-e. Jan akichaijin jingkah ahitan, nikhat alhingtai.

Ni Ni
6 Pathenin, Twipi lah a chun vanthamjol hung kidal hen, twipi chu alang langa dalten hen,” atin;
7 vanthamjol ajamdoh-in, twipichu chung le noiya adaltanin asepkhentai.
8 Twipi daltenna chu Pathenin “Vanthamjol” asah-e. Jan akichaiyin jingkah ahitan, ni ni alhingtai.

Ni Thum
9 Pathenin, “Vanthamjol noiya twipi mun khat’a veikhom hen, tolgo hung doh hen,” atileh, aseibangin aumtai.
10 Tolgo lai chu Pathenin, “Leiset” asah-in, twipi veikhom chengse chu “Twikhanglen” asahtai. Aphatdan chu Pathenin amudohtai.
11 Pathenin, “Leiset’in hampa, amunei hamphung, agathei thing, achi ding amunei cheh, ama amachi dungjui cheh-in hinsepdohhen, leiset chunga kehdohhen,” atileh ahung kehdoh tauve.
12 Leiset’in hampa ahinsep doh tan, hamphung ama ama chi dungjuiyin akehdoh-in, agathei amunei thingphung achi dungjuiyin ahung kehdoh tauve. Ahoidanchu Pathenin amudoh tai.
13 Jan akichaiyin jingkah ahitan, nithum alhingtai.

Ni Li
14 Pathenin, “Sun le jan sepkhendin vanthamjol’a avah thei vahho hung kigol’u hen, kum kiheichin melchihna le kum simtoh nan jong panguhen;
15 vanthamjol’a konin leiset hinsalvah-u hen,” atileh, aseibang in aumtauve.
16 Pathenin vah len cheh ni asemin, nichang chu sun laiyin avahsah-in, lhachang chu jan laiyin avahsah-e. Hiti hin ahsi ho jong asemdoh tai.
17 Pathenin, vah chengse chu leiset salvah ding le
18 sun lai le jan laiya vah ding, muthim le khovah sepkhen din vanthamjol’a agoldohtai. Aphatje chu Pathenin amudoh tan ahi.
19 Jan akichaiyin jingkah ahitan, nili alhingtai.

Ni Nga
20 Pathenin, “Twi lah a ahon hona kijot le ding ganhing hungdimset hen,” atin;
21 Pathenin twi lah acheng din ganhing lentah tah ho le adang dang ganhing tamtah asemin, akijot le nauva twi akidil chet chut jin, chule alha lengthei vachate aloi loiyin asemdoh-e. Aphat dan Pathenin amudoh tai.
22 Abonchauvin Pathenin phatthei aboh-in, “Hinphauvin, pungun, Twikhanglen le twi lah jouse dimset’uvin, chule vachate jong leiset’a pungu hen,” ati.
23 Hichun jan akichaiyin jingkah ahitan, ni-nga alhingtai.

Ni Gup
24 Pathenin, “Leiset’in ganhinglen le neo, ina vahthei le gamlah a lha ding hinsep doh hen,” atileh, asei bangin aumtauve.
25 Pathenin leiset’a ganhing le sa jouse chule tol’a kithol ganhing jouse aloiloiyin asemdoh-in, avet le apha lheh jenge.
26 Chujouvin Pathenin, “Eiho lim le mel pun mihem semu hitin, ama ho twi lah a nga jouse le chunga vachate, leiset’a ganhing namkim, ina kivah le gamlah a lha ho, alen aneo jouse chunga thunei vaihomin panguhen,” atin;
27 Ama lim le mel tobangin Pathenin mihem asemin, numei le pasal asemdohtai.
28 Pathenin ama ni chu phatthei aboh-in, “Chiphan pung lhonin, nason napah lhon leiset hung dimhen, twilah a nga, ju le vachate, leiset chunga ganhing namkim chunga hung vaihomu hen,” ati.
29 Pathenin, “Ven, leiset’a muchi chivo, thingphung gathei jouse naneh lhon din kapen,
30 leiset’a sa jouse le vachate, tol’a kithol ganhing ho le adang ho nehdin hamhing kapetai,” atin, hiti chun aumtai.
31 Hichun Pathenin athilsemsa chengse avet le ahoi behseh jengin pha asai. Hiti hin jan akichaiyin jingkah ahitan, nigup alhing tai.

SEMTIL BU BUNG 2

Ni Sagi

1 Hiti hin thilsem pumpi akijousoh tai.
2 Ni sagi lhinnin Pathenin Athilsem ajousoh-in anatoh acholdotan ahi.
3 Athilsem aboncha ajosoh a, ni sagi lhinnia acholdo jeh-in hiche nikhohi Pathenin Phatthei aboh-in asuthengtai.
4 Hitia hi thilsem pumpi hung kisemdoh ahi.

Eden hon

Pakai Pathenin thilsem pumpi ahinsemdoh chun
5 Leiset chunga hampa louhing akeh hih laiyin, muchijong adondoh hih laiye. Ajeh chu Pakai Pathenin go ajuh sah hih laiyin, loubol ding mihem jong aum hih laiye.
6 Leiset’a konjoh chun meijun ajamdoh jin, chutengle leichung ahinle chapkotjie.
7 Pakai Pathenin leiset alan mihem asemin, anahhom sunga hintheina hu ahailut peh le, mihem chu mihing asohdoh paiten ahi.
8 Chujouvin Pakai Pathenin niso lam Eden mun’a chun hon khat asemin, hikomma hin amihem sempa chu akoitai.
9 Honsunga hin vetnomnom thingphung gapha tahtah Pakai Pathenin akesah-in, alailungtah a chun hintheina thingphung le se le pha hetna thingphung jong akeh-e.
10 Eden honlei chap nou din honleiya konin vadung khat ahung lhongin, honkal’a lhalka lin alongkhenin, vadung li asohdoh paitai.
11 Vadung masapen chu Pishon ahin, Havilah gamkol vel’in alongin,
12 hiche gama hin sana theng atamin, samphai chang le songval chang jong akimui.
13 Vadung nina chu Gihon ahin, Cush gamkol vel’a alongin ahi.
14 Vadung thumna chu Tigris ahin, Assyria niso lama alongin, chule vadung li lhinna chu Euphrates ahi.
15 Pakai Pathenin mihempa chu aleibol ding le angah din Eden honsunga akoitai.
16 Pakai Pathenin mihempa jah a, “Honsunga thingga jouse naneh thei ahinan,
17 Se le pha hetna thingga vang khu naneh thei louhel dingahi; naneh ni ni le nathi tei tei ding ahi,” ati.
18 Pakai Pathenin, “Mihempa achangseh a aum hi anompoi, aki- thopi ding aki- angtopi thei khatsempeh inge,” atin;
19 leiset alan Pakai Pathenin sa namkim le vacha jouse asemin, ipi asah ding vetnan mihempa henga abonchan ahin hoiluttai. Hichea hi mihempan aminsah pen pen chu aminu hijeng ahitai.
20 Hiti hin mihempan vacha jouse le sa namkim aminvo chehtan, ahinla khat cha beh jong ama kithopi thei le aki-angtopi thei aumtapoi.
21 HIjeh chun Pakai Pathenin mihempa chu a-imut milsah-in, a-ihmut lanin anahgu khat aheh lhan, anung chu aphen atomjol’in,
22 Anahgua kon chun numei khat asemdoh-in, mihempa henga ahinpuilut tai.
23 Hichun mihempan: “Hiche hi kagu kachanga kon, Kaphe kavouva kiladoh ahijeh a Pasal’a kona kiladoh ahijeh a ‘Numei’ kiti ding ahi,” ati.
24 Hijeh a chu Pasal’in anu le apa alhakanga aji akol chah joh a, chule ama ni phe khat vou khat hilhonahi.
25 Hichepet chun mihempa le ajinu asagohkeo ahilhonin, ahivangin akijapi lhonpoi.

SEMTIL BU BUNG 3

Mihemin Pathen Thupeh apelkeh

1 Pakai Pathen thilsem ganhinglah a doha thuh pen chu gul ahi. Gul hin numei nu jah a, “Honsunga theiga ho khu naneh lhon louhel dia Pathenin akha mongham?” atile;
2 numei nun, “Theiga dang vang kinetheiye;
3 honlai lunga vang khu neh jong kaneh thei lhon lou ding, katoh khah lhon jongle kathi tei tei lhondin Pathenin eiseipeh lhon nai,” ati.
4 Hichun gul’in numei nu jah a, “Thi lhon hih hel’in nate.
5 Naneh lhon teng namitlam lhon kikeodoh a Pathen masap’a thilpha thilse nahetdoh lhonding jeh a Pathenin akha ahibouve,” ati.
6 Thingphung chu numei nu mitvet’in ahoi lheh jengin, akineh le mi achihsah ding jeh-in jong aducha cheh jenge. Hijeh chun numei nun theiga chu akilon anen, ajipa jong apen, aman jong anetai.
7 Chutah-in amitlamlhon akikeodoh paiyin, asagohkeo ahi ahedoh lhonin, theichang na akilmat mat lhonin kaipelengin akikai lhontai.
8 Nisa dailhah lamin honlei laiya Pakai Pathen va le husa aja lhonin, mihempa le ajinu honsung thing lah a akisel lhontai.
9 Ahivangin Pakai Pathenin, “Vo Adam, hoiya um nahim?” tin ahinkouve.
10 Mihempan, “Honsunga nahusa kajah le, sagohkeo kahijeh a kichaa kisel kahi,” ati.
11 Pakai Pathenin, “Kon sagohkeo nahi atim? Neh lou dia kisei thingga chu naneh hitante ong?” ati.
12 Mihempan, “Eilenkhompi dia neipeh numei nu hin thingga chu eipeh a kaneh ahitai,” tin aseiye.
13 “Ibol’a hitabangpi chu nabol ham?” tia Pakai Pathenin numei nu adoh le, amanun, “Gul chun eidoha bol’a kaneh hichu me,” ati.

Pathen Thutan

14 Chuphat’in Pakai Pathenin gul jah a, “Nathilbol jeh a hi gaosap nachan a, ganhing jouse lah a talen namat ding, nahinkho lhumkeiya na-op’a kithol’a leivui naneh ding ahi.
15 Numei nu to kakidousah a, ama chilhah le nang chilhah kigal to ding ahi. Ama chilhah pan nalu avoh chip’a, nangin akhotaljum nachuhpeh ding ahi,” ati.
16 Pakai Pathenin numei nu jah a, “Na-naovop teng gim gentheiya naum a, nat hahsa thot a cha nahinding ahi. Hijongle najipa jeng lhangaiya nahin’a aman nachunga vai ahom ding ahi,” ati.
17 Mihempa jah a Pakai Pathenin, “Naji nu thua nanun a neh lou dia kaseipeh theiga na neh jeh a leiset jeng jong hi gaosap chang ahitai. Nahinkho lhumkeiya tohgim genthei puma tol natuh a neh ding nakihol ding ahi.
18 Nakidoupi din leiset’a theimi ling le meithai seltho ling hung keh-in tin, chule tollhanga anche louhing naneh ding ahi.
19 Nakisemdohna leiset’a nakile kit kah a, namaiya ulsa long longa na natohgim a neh le chah nakihol ding ahi. Leivuiya kisemdoh nahin, Leivui nalesokit ding ahi,” ati.
20 Mihem nankim penna nu ahiphat’in Adamin ajinu chu amin Eve asah-e.
21 Pakai Pathenin mihempa le ajinu din savun ponsil asemin asilpehtai.

Eden hon’a Pathenin Adam le Eve asoldoh

22 Pakai Pathenin, “Mihemhi ilah-uva khat bangin thilpha thilse hetheiyin aumtan, hichea hi hinna theiga khu neh khahsah a tonsot’a hinsah louhel ding ahi,” ati.
23 Hijeh chun akisemdohna leiset loubol’a kivah din mihempa chu Pakai Pathenin Eden honna konin asoldoh tai.
24 Hinna thingphung lampi ngah din hon niso lama Vantil lhanei chu akoiyin, chemjam deuje ju chu akipei kimvelsah tai.

SEMTIL BU BUNG 4

Cain le Abel

1 Adamin ajinu Eve akitimatpin, amanu agaiyin chapa khat ahinge; “Pakai panpi jal’a chapa kahin,” tin amin Cain asah-e.
2 Chujouvin asopipa Abel ahing kit’in ahi. Abel chu kelngoi chingin apangin, Cain chu loubol’in apange.
3 Khongnungin Cain chun alhosoh gan Pakaiya kilhaina abol’in,
4 Abel’ in jong akelngoi peng masapen, athaopen khat athat’in, kilhai nananeiye. Hichea hin Abel kilhaina chunga Pakai alung lhaiyin, athilbol asanpeh tai.
5 Cain thilto vangchu asangpon, ama jong akhohsahtapoi. Cain alunghang behseh-in akaiku jenge.
6 Pakaiyin Cain jaha, “Ibol’a lunghanga kaiku jeng nahim?
7 Thildih bol le chun kipah ding nahin, thilse nabol jeh-in chonsetnan kotphunga nachang lhi jinge; jotho dia nagot vangin, nangin najotei ding ahinai,” ati.
8 Cain chun asopipa Abel jah a, “Gamlah a che hite,” atin; gamlah agei lhon phat’in Cain asopipa chunga achun athattai.
9 Hichejeh hin, “Nasopipa Abel la em?” tin Pakaiyin Cain ahindongtai. Aman, “Kei kasopipa ching gun set ka hi ong?” ati.
10 Pakaiyin, “Ibol’a nahim? Tol’a kona nasopipa thisanin eihinsap sap khu me!
11 Hiche leiset hi pohkhia nasopipa thisan achop lut tah jeh hin, nang jong gaosap chang nahitan, leiset jeng jong hi lou va na bol thei lou ding ahitai.
12 Muchi tujongle chun hung kehdoh louhelding, chen mun det beiya leiset chunga vah thai ding nahitai” ati.
13 Chuphat’in Cain chun Pakai jah a, “Neipeh talen hi alen behseh tan kapoh jouhoi ahitapoi.
14 Na-angsunga kona neisoldoh a, chenmun det beiya leiset’a kavathai le ding, eitoh khapen penin eitha ding ahitai,” ati.
15 Ahinla Pakaiyin, “Chutiponte, Cain hinthat pen pen chunga sagi vei phuki la ding ahi,” atin; atoh kha khan atha louhel na din Cain chalpanga melchihna khat akoi-peh e.
16 Pakai angsunga konin Cain apotdoh-in, Eden solam gamkai, “Vahthai gam” sunga achengtai.

Cain chilhah ho
17 Cain ajinu akitimatpi le agaiyin, chapa khat ahingin, Enoch asah-e. Cain chun khopi khat asemdoh-in achapamin aputsah-in, Enoch asah-in ahi.
18 Enoch chun Irad ahingin, Irad-in Mahuja-el ahingin, Mahuja-el chun Methusha-el ahingin, Methusha-el ‘in Lemech ahinge.
19 Lemech chun ji ni akop,in khatnu Adah ahin, khatjonu Zillah ahi.
20 Adah hin Jabal ahingin, Jabal hi ponbuh achengte le gancha ching miho penna pa ahunghi.
21 Jabal sopipa chu Jubal ahin, semjang saite le theile mutte chengse penna pa ahung hikhai.
22 Zillah hin Tubal Cain ahingin, amahin sum-eng manchah ding alhan, thih khengin apange; Tubal Cain sopinu chu Naamah ahi.
23 Lamech chun ajite nijah a, “Adah le Zillah kasei ngai lhonin, Vo Lamech jite ni kasei hi melchih lhontan; Gollhang khat’in eiden jeh-in kathat tai.
24 Cain tha jeh a sagi vei phu aki lah ding le Lamech tha jeh a som sagi le sagi vei phukila ding ahi,” ati.

Seth le Enosh

25 Adamin ajinu akitimatpi kit le chapa khat ahing kit’in, “Cain thapa Abel khel’a chi khai din Pathenin chapa khat eipekit tai,” tin anun amin Seth asah-e.
26 Seth-in chapa khat ahingin Enoch asah-e. Ama khanglaiya pat hin min ‘Pakai’ minin chibai ahinboh pantai.

SEMTIL BU BUNG 5

Adam chilhah ho

1 Pathenin Ama lim ma bang banga asem mihem- Adam khanggui thusim chu hiti ahi.
2 Numei le pasal asemin, phatthei aboh-in, amin jong ‘Mihem’ asah tai.
3 Adam kum ja khat le somthum alhinin ama lim le melto kilo tah chapa khat ahingin, Seth asah-e.
4 Seth pen nungin Adam kum jaget ahinben, chanu chapa tampi ahingin,
5 Kum jako le somthum lhin kumin athitai.
6 Seth kum jakhat le nga ahin Enosh ahingin,
7 Enosh pen nungin Seth kum jaget le sagi ahinben, chanu chapa tampi ahingin,
8 Kum jako le som le ni alhin kumin athitai.
9 Enosh kum somko ahin Kenan ahingin,
10 Kenan pen nungin Enosh kum jaget le som le nga ahinben chanu chapa tam pi ahingin,
11 Kum jako le nga lhin kumin athi.
12 Kenan kum som sagi ahin Mahalalel ahingin,
13 Mahalalel pen nungin Kenan kum jaget le som li ahinben, chanu chapa tampi ahingin,
14 Kumjako le som khat lhin kumin athi.
15 Mahalalel kum somgup le nga ahin Jared ahingin,
16 Jared pen nungin kum jaget kum jaget le somthum ahinben, chanu chapa tampi ahingin,
17 Kum jaget le somko le nga lhin kumin athi.
18 Jared kum jakhat le somgup le ni ahin Enoch ahingin,
19 Enoch pen nungin Jared kum jaget ahinben, chanu chapa tampi ahingin,
20 Kum jako le somgup le ni lhin kumin athitai.
21 Enoch kum som gup le nga ahin Methuselah ahingin,
22 Methuselah pen nungin kum jathum jen Pathen to akivop jingin, chanu chapa tampi ahinben,
23 Kum jathum le somgup le nga lhingin ahinge.
24 Enoch ahinkho lhumkeiyin Pathento akivop jingin, Pathenin ahing laiya alah phat’in akiholmotai.
25 Methuselah kum jakhat le somget le sagi ahin Lamech ahingin,
26 Lamech pennungin Methuselah kum ja sagi le somget le ni ahinben, chanu chapa tampi ahingin,
27 Kum jako le somgup leko lhin kumin athi.
28 Lamech kum jakhat le somget le ni ahin chapa khat ahingin,
29 “Pathen gaosapsa, ikhut’uva itoh gim nau hiche leiset’a kona hi hiche naosen hin eitha-ol sah diu ahi,” tinan amin Noah asah-e.
30 Noah pen nungin Lamech kum janga le somko le nga ahinben, cha tampi ahingin,
31 Kum ja sagi le som sagi le sagi lhin kumin athitai.
32 Noah kum janga ahin chapa thum ahingin; Sem, Ham chule Japheth ahiuve.

SEMTIL BU BUNG 6

Namtin vaipi gitlouna

1 Leiset chunga mihem hapunin apungin, cha le nao tampi ahing tauve.
2 Van miten mihem chanu hoitah tah ho amudoh phat’un adei dei ji din akipuiyui.
3 Ahivangin Pakaiyin, “Kalhagao mihem sunga tonsot’ in chengden deh ponte; mihem hi tahsaphe bou ahin, ahinkho jong kum jakhat le som ni bou hiding ahi,”ati.
4 Mihem chanu ho le van mite chihlhah ho hi chulai le khonung geiya leiset’a mihatte chu ahiuvin,khanglui laiya mihat minthang ho chu amaho ahiuve.
5 Leiset’a cheng mitin gitlu le niseh a thilse jeng agel’u Pakaiyin amudoh tan,
6 Mihem asem’a leiset’a achensah akisih-in, alung na behseh tai; hijeh chun kasemsa jouse, mihem geiyin leiset’a konin sugam tange,: tin Pakaiyin aseitai.
7 Noah chunga vang Pakai alung lhainai.

Noah

9 Noah hinkho chu hiti ahi: midih, akhang sunga nolnabei, Pathen to kivop jing mihem ahi.
10 Noah chun chapa thum ahingin, Shem, Ham, chule Japheth ahiuve.
11 Pathen mitmun leiset mihem abonchan aphamon, asegamtan, muntin’a pumhat jengin akinotauve.
12 Leiset’a cheng mihemte lam hilouva akihei gamtauvin, Pathenin avet le leiset asetsoh hel chu amudohtai.
13 Pathenin Noah jah a, “Leiset pumpi hi mihemte thilse bol dimsoh ahitan, hijeh a chu abonchauva kasuhgam’a, chitin namtin leiset puma kasuhgam ding ahitai.
14 Gopher thingin kong innei khat kisuiyin, kong sunga chu adan danin khah tanin, asung le apo begon loijol’in.
15 Kong innei chu adung tong jathu, avai tong som nga chule atun tong somthuma nasem ding.
16 kong innei chu inchung nakhua, alhung khu tongkhat bou len ding, kong kotpi asih lama nahon a, lhong danthuma nadoa, achungnungpen, aban’a chule anoinungpen nado ding;
17 leiset chunga haitheiya hing jose sumang dia keiman twiksang kaletsah ding, leiset’a ganhing namkim thisoh hel ding ahi.
18 Nangto vang kitepna khat kaphudoh a, naji le nachapte chule namoute chengtoh kong innei sunga nalut diu ahi.
19 Chule achikhai dinga ganhing namkim- anu khat le achal khat-kop khat cheh kong sunga napui lut ding ahi.
20 Vacha hihen ganhing dang hileh, tol’a kithol ho geiya ama ama jat dungjuiya chikhai dia nakoma hung kitol lut diu ahi.
21 Neh thei jouse nalo khoma, nang ho le ganhing namkim neh dia nakhol khom ding ahi,” ati.
22 Pathenin aseipeh bang bangin Noah-in aboltai.

SEMTIL BU BUNG 7

Twisang let

1 Pakaiyin Noah jah a, “Hiche khanga midih nang bou kamui, na-insung mite toh kong sunga luttan.
2 Satheng jat khat’a konin kop sagi-anu khat le achal khat cheh to, saboh jat khat’a konin vang kop khat bou-anu khat achal khat cheh lan,
3 Vacha jat a konin kop sagi cheh leiset’a achikhai din kong sunga kai lut’in.
4 Ni sagi lhinteng nisom le jan som li sunga go kajuh sah-a, kasemsa ahing thei jouse kasuh mang hel ding ahitai,” ati.
5 Pakaiyin aseipeh chan abang bangin Noah-in aboltai.
6 Leiset chunga twisanglet chun Noah kum jagup alhingtai.
7 Twisanglet’a hoidoh na din Noah le ajinu, achapte le ajiteu kong sunga alut tauve.
8 Pathen thupeh bangin satheng le sangboh kop khat che-anu khat le achal khat cheh toh, vachate le tol’a kithol ho geiyin,
9 ni nin Noah to kong sunga akijot lut tauve.
10 Ni sagi jouvin leiset’a twisang alentai.
11 Noah kum jagup lhin kum, lha ni na, nisom le sagi lhin nin twinah jouse ajal tan, van a gokot jouse jong akihong tai.
12 Chutah-in ni som li jan som li sung in go aju ju jenge.
13 Hiche nikho le lea chu Naoh le ajinu, achapate-Shem, Ham chule Japheth le ajiteu kong sunga lut ahiuve.
14 Ganhing namkim, insa le gamsa, alen aneo, vacha namkim,
15 Akop kop’in kong sunga alut’un,
16 Anu khat achal khat cheh, Pathenin Noah to akijot lut tauve. Noah alut phat’in Pakaiyin kongkot akhah tai.
17 nisom li le jan som li sungin leiset’a go ajun,twi apomtou tel tul’in Leiset sanga sang jon kong alet doh tai.
18 Leiset chung twi adimtel tul jengin, along matsoh tan, kong jong twi chunga akitol le lei.
19 Twi atamval’in van noiya molsang jouse geiyin achupsoh tai.
20 Twi chu akhang tou tou nalaiyin, molsang jouse sangin tongsom le ngan asangjoi.
21 Hijeh chun leiset ganhing namkim-ju le va, ahon honin, mihem geiyin athisoh heltauve.
22 Tolgoa cheng ganhing nah hai thei jouse athisoh tauve.
23 Leiset’a hing thei mihem le ganhing namkim, ju le va, tol’a kithol ho le chunga leng jouse Pakaiyin asugamin, Noah le kong sunga aumpi chengse chubou asoh chauve.
24 Ni jakhat le som nga sung geiyin twi akemsuh hih laiye.

SEMTIL BU BUNG 8

Twisanglet kichai

1 Noah le kong sunga aumpi ganhing chengse Pathenin agel khoh jingin, Leiset chunga hui anun sah le twi akemsuh pantai.
2 Twinah jouse le van’a go-kot chengse akikhah-in, go ahaiyin kho aphan,
3 Ni jakhat le som nga sungin leiset’a twi akang hei hoitai.
4 Lha sagi lhin na, nisom le ni sagi lhin nin Ararat lhanga molvum khat’a kong aki-ngamtai.
5 Twi vang akemsuh jing jengin, lha som lhinna, ni masapen nin molvum jouse akimu theitai.
6 Nisom li lhin nin Noah- in kong bangkot khat ahongin,
7 va-ah khat alha leh,leiset’a twi akanloulai jeh-in adung avaiyin alenglenahung kile kit tai.
8 Twi kan le kan lou hetnan Noah-in vakhu khat alha kit leh,
9 Leiset pumpi twiyin achup nah laijeh-in vakhu chun touna ding aholmon kong lama ahung kile kit;in, Noah-in agahsang lhan kong sunga achoilut tai.
10 Noah ni sagi akho ngaiyin, vakhu chu alha kit leh,
11 Nilhah lamin vakhuchun amuh a olive thing nathah khat ahinpon, ahenga ahung kile kit’e. Hichea hin Noah-in leiset’a twi kan ahe-tai.
12 Noah-in ni sagi ma a-ngah -in vakhu chu alhadoh kit leh, hichea vang hin vakhu chu ahenga ahung kile kit tapoi.
13 Noah kum jagup le khat (601) lhin kum, lha masapen, ni masa nin leiset’a twi akangsoh-in, Noah-inkong in chung khu ahodoh aavet leh, leiset chung twi akangsoh heltai.
14 Lha ni na nisom ni le sagi lhin nin leiset chung twi akang goheltan ahi.
15 Pathenin Noah jah a,
16 “Najinu le nachapate chule ajiteu toh kong sunga konin potdoh tauvin.
17 Naumpi ganhing namkim-ju le va, tol’a vah tahsaa hing jouse, apunjal’uva leiset adimsetna diuvin hinkai doh tan,” ati.
18 Hijeh chun konga konin Noah le ajinu, achapate le ajiteu apotdoh tauve.
19 Ganhing ho jong, tol’a kithol ho le vachate, leiset’a lhale jouse kong sunga konin akop kop’in ahung potdoh tauve.

Noah Kilhaina

20 Noah-in Pakai din maicham khat asemin, gancha theng le vacha theng lah akonin khat cheh adongkhomin, maichamphunga pumgo thilton agouvamtai.
21 Amuinam chun Pakai alung lhiayin alung sunga, “Aneocha pat mihem lungthim hi asesa kahet jeh-in, mihem thilse bol man a tukal leiset hi kagaosap kit lou hel ding ahitai. Tua kasuhgam banghin ganhing ho jong sumang ta ponge.
22 Leiset aum laisea muchi tuphat, lho lhun phat, gamsat le gamdap phat, nipi laile phalbi lai chule sun le jan um jing ding ahi,” ati.

SEMTIL BU BUNG 9

11 Itih hijongle ganhing namkim twiya kisumang talouding, a-itih geiya jong twisanglenin leiset asuhmang lou ding ahitai.
12 Nangho le ganhing namkim dinga mantih neilou kitepna kaphudoh het jingnan,
13 Meilhang lah a kathalpi kakoiye; hiche hi vannoito kakitep het jingna hiding ahi.
14Vanthamjol’a meilhang kajinsah teng thalpi chu kimudoh ding,
15 Chule ganhing namkim-ahing jouse twilenin asuhmang louna dia nahenguva kakitepna kageldohji dingahi.
16 Hitia chu meilhang lah athalpi ahung kilah teng, leiset chunga ganhing jouse le kei kah a mantin neilou kitepna chu kageldoh ding ahi.
17 Thalpi hi ganhing namkim to kakitepna malchihna ahi,” ati.
Noah le achapate
18 Kong sunga hung potdoh Noah chapate chu Shem,Ham chule Japheth ahiuvin, Ham hi Canaan pa ahi.
19 Hiche Noah chapa thum ho hi leiset chung cheng mihem chitin namtin penna pului ahitauve.
20 Noah hi loubol mi ahin, leiset’a lengpilei bol masapenin apange.
21 Noah-in lengpitwi adon le akhamin, aponbuh sunga del cheng louvin alumtai.
22 Canaan pa Hamin apa Noah del cheng louva lum amun, polama asopite ni agaseipeh-e.
23 Shem le Japhet-in ponsilchol khat ala lhonin, alengkouva akhai lhonin, apa del chenglouva um chu mu lounadin akihei mangin, anunglam ngan pnonbuh sunga atoi lut lhonin, apa lhon chu agakhu khum lhone.
24 Noah lengpitwi kham alimdoh phat’in achapa neopenin abolna chu ahedoh-in,
25Hijeh chun, “Canaan hi gaosap chang hen, Asopite nin soh-in nei lhon hen.
26 Pakai, Shem Pathen vang vahchoiyin umhen, Shemin Canaan hi soh-in hinneihen.
27 Pathenin Japheth punsah hen, Achilhahte Shem chilhahto hung chengkhomu hen; Canaan vang Japheth soh-in hung pang hen,” ati.
28 Twisanglet nungin Noah kum jathum le som nga ahing nalaiyin,
29 Kum jako le som nga lhin kumin athi.

SEMTIL BU BUNG 10

Noah chate sonle pah

1 Noah chapate Shem, Ham chule Japheth chilhah ho khanggui thusim chu, twisanglet nungin athum’uvin chapa tampi ahing cheh-ui.
2 Japheth chapate chu Gomer, Magog, Madai, Javan,Tubal, Meshech chule Tiras ahiuve.
3 Gomer chapate chu Ashkenaz, Riphath chule Togarmah ahiuve.
4 Javan chapate chu Elishah, Spain, Cyprus chule Rhodes ahiuvin;
5 Twikhanglen pang dunga hung cheng ho penna pului ahiuve. Hicheng hi Japheth chilhah ahiuvin, aphung phungin agamkai sung cheh a akichen’uvin, ama pao cheh akithouve.
6 Ham chapate chu Cush, Egypt, Libya chule Canaan ahiuve.
7 Cush chapate chu Seba, Havilah, Sabtah, Raamah chule Sabteca ahiiuve. Raamah chapate ni chu Sheba le Dedan ahi.
8 Cush-in Nimrod kiti chapa khat ahingin, leiset’a gal-hat masapenin apange.
9 Pakai panpi jal’in Nimrod hi sathat thei tah ahin, hijeh chun mihon, “Nimrod bangin Pakaiyin sathat thei nahisah hen,” akitijiuve.
10 Nimrod lenggam chun Babylon, Erech chule Accad, Babylon gamsunga um chengse ahopsoh keiye.
11 Hiche gama kon hin Nimrod Assyria gama achen, Nineveh khopi, Rehoboth Ir khopi, Calah khopi,
12 chule Nineveh khopi le khopi minthang tah Calah kikah a Resen khopi aphutdoh-e.
13 Egypt chapate chu Lydi, Anam, Lehab, Naphtuh,
14 Pathrus, Casluh chule Caphtor ahin, Caphtor hi Philistine mite penna pului ahi.
15 Canaan chapate chu amasan apeng masapen Sidon le Heth ahi lhonin,
16 chule Canaan chilhah chu Jebus mite, Amor mite, Girgash mite,
17 Hiv mite, Ark mite, Sin mite,
18 Arvad mite, Zemar mite le Hamath mite ahiuve. Khonung in Canaan insung kon chengse gamtin’a akithe chan soh keiyun,
19 agamgiu Sidon a pat Gerar lang jonin Gaza geiyin akilhung lut peh-in, Sodom lang jonin akilhungin, Gomorrah aphan, Admah ahinphan, chuin Zeboiim ahopan Lasha geiyin akilhung lut peh-e.
20 Hicheng hi Ham chihlhah ahiuvin, aphung phungin agamkai sung cheh a achengun, ama pao cheh akithouve.
21 Japheth upa Shem chu Hebrew mite penna pului ahi.
22 Shem chapate chu Elam, Asshur, Arpachshad, Lud chule Aram ahiuve.
23 Aram chapate chu Uz, Hul, Gether chule Meshkek ahiuve.
24 Arpachshad chapa chu Shelah ahin, Shelah chapa Eber ahi.
25 Eber hin chapa ni ahingin, khatpa khanga hi leiset mite paocheh jeh a akikhen jeh-un amin Peleg akitin, khatjo pa chu Jokatan ahi.
26 Joktan chapate chu Almodad, Shelph, Hazarmaveth, Jerah,
27 Hardoram, Uzal, Diklah,
28 Obal, Abimael, Sheba,
29 Ophir, Havilah, chule Jobab ahiuvin, abonchauva Joktan chapa jeng ahiuve.
30 Joktan chapate gamgi chu Mesha a pat Sephar lang jonin solam thing lhang gamsung geiyin akilhung lutpeh-e.
31 Hicheng hi Shem chilhah ahiuvin, aphung phungin agakai sung cheh a achengun, apao cheh akithouve.
32 Hiche miho hi ama ama jat dungjui le akondoh nau insung dungjuiya kisimtoh Noah insung kon cheh ahivin, twisanglet nunga leiset chung mihem hijat hi amahoa kondoh jeng ahiuve.

SEMTIL BU BUNG 11

Babylon Insung

1 Hiche laichun leiset miten paokhat seh athon, thu cheng jong tha khat amanguve.
2 Mihemte chu niso lama akitol leu leh Babylon gama phaicham khat’a ahung lut’uvin, hikoma chun achengtauve.
3 Amaho khat le khat akihouvun, ” Hungun, cheh dengu hitin goutah lhengu hite,” atiuvin; song panna pangdin cheh adenguvin, song lou din leingan amangui.
4 Mihon, ” khopi khat semu hitin, insang, atingvum vanto kibang khat sau hitin imin kithansah-u hite, achutiloule leiset chunga ikimoh thethang gam diu ahi,” atiuve.
5 Mihemte khopi sem le insang sah chu vedin Pakai ahung kum lhai.
6 Hichea hin Pakaiyin, “Mihemte hijat khat bou ahin, pao khatseh bou athouve; athilbol’u hi tua bana aboldiu apatna bou ahinalaiyin, tukal abolnom nom abol jeng diu dol ahitai’
7 Kum lhau hitin apaovu gasucheh leu hen khat le khat kihou mon um’uvin tin atohban haitauvinte,” ati.
8 Hitia hi Pakaiyin miho chu leiset chunga ahtecheh soh phat’in akhopi sah ban ahaitauve.
9 Hikoma kona hi Pakaiyin mihemte pao asuh cheh a, leiset chunga athe chehsoh hel jeh-in akhopi min Babylon akisah lot tai.

Shem chilhah ho

10 Shem chilhah ho thusim hiti ahi. Twisanglet nung kum ni lhin kum, Shem kum jakhat ahin achapa Arpachshad ahinge.
11 Arpachshad pen nungin Shem kum ja nga ahingin, chadang tampi ahinbei.
12 Arpachshad kum somthum le nga alhinin achapa Shelah ahingin,
13 Shelah pen nungin Arpachshad kum ja li le thum ahingin, chadang tampi ahinbei.
14 Shelah kum somthum alhinin achapa Eber ahingin,
15 Eber pen nungin Shelah kum ja li le thum ahing nalaiyin, chadang tampi ahinbei.
16 Eber kum somthum le li alhinin achapa Peleg ahingin,
17 Peleg pen nungin Eber kum ja li le somthum ahing nalaiyin, chadang tampi jong ahinbei.
18 Peleg kum somthum alhinin achapa Reu ahingin,
19 Reu pen nungin Peleg kum ja ni le ko ahing nalaiyin, chadang tampi jong ahinbei.
20 Reu kum somthum le ni alhinin achapa Serug ahingin,
21 Serug pen nungin Reu kum ja ni le sagi ahing nalaiyin, chadang tampi jong ahinbei.
22 Serug kum somthum alhinin achapa Nahor ahingin,
23 Nahor pen nungin Serug kum ja ni ahing nalaiyin, cha dang tampi jong ahinbei.
24 Nahor kum som ni le ko alhinin achapa Terah ahingin,
25 Terah pen nungin Nahor kum jakhat le som le ko ahing nalaiyin, chadang tampi jong ahinbei.
26 Terah kum som sagi alhinin Abram le Nahor chule Haran ahinge.

Terah chilhah ho

27 Terah chilhah ho khanggui chu hiti ahi; Terah-in Abram le Nhor chule Haran ahingin ahi. Haran hin Lot ahinjou,
28 Apa Terah hinpet’ in Babylon gamsung achena khopi Ur a athitai.
29 Abramin Sarai akichenpin. Nahorin Haran chunu Milcah akichenpi: Haran hin Iscah jong ahingin ahi.
30 Sarai achingin cha neilouvin aumtai.
31 Terah hin achapa Abram le amou nu Sarai-Abram jinu, atupa Lot-Hanran chapa akipuiyin, Babylon gama Ur khopi dalhan Canaan gam jonin achetauve. Amahon Haran ahinphauvin,hikoma chun achengtauve.
32 Haran a chun Terah kum ja ni le nga alhinin athitai.

SEMTIL BU BUNG 12

Pathenin Abram akou

1Pathenin Abram jah a, “Nagam leiset le na phung na chang, na- insung mite dalhan, keiman kavetsah got gam jonin chen.
2 Keiman nachilhah tampi kahisah a, nam lentah kaso ding, phatthei kaboh a min thang tah a ka koi ding, chu teng nangma phatthei bom nihi ding ahi.
3 Nangma phatthei na boh te phatthei kaboh a, Nagaosap jouse kagaosap thuh ding; Nang jeh achitin namtin phatthei kaboh ding ahi,” ati.
4 Abram kum som sagi le nga ahin, Pakaiyin aseipeh bangin, Haran akonin akipatdoh- in, Lot chun akilhonpi.
5 Abramin ajinu Sarai le asopipa cha Lot akipuiyin, Haran a alamdoh goujouse pon, soh chengse to kilhonin Canaan gam jonin achatauve. Canaan gam ahung lhun phat’ un,
6 Shechem muntheng lai, Moreh muna gangpi theng phung ahinphah kahsen Abramin gamsung chu akhol khol jenge. Hichepet hin gamsunga Canaan miho anachenguve.
7 Abram henga Pakai ahungkilah-in ajaha, ” Nason nachilhahte kapehgot gam chu hiche hi ahi,” ati. Hichun ahenga hung kilah Pakai din Abramin maicham phung khat hikoma chun asemdoh tai.
8 Chujouvin Bethel khopi nisolam, lhanglam thinglhang gam manon Abram achen, nilhum lama Bethel le niso lama Ai kikah a ngahmun akisemtai. Hikoma jong hin maicham khat asemin Pakai minin ataove.
9 Hiti hin Abram muntin’a avah len, Canaan gamsung lhanglam gamkai sung ajontai.

Eygpt gama Abram

10 Canaan gamsunga kel lhah jeh a ahhsat behseh phat’ in Abram puhsuiya khopem din Egypt gam jonin achesuh-e.
11 Egypt gamsung alut ding konin Abramin ajinu Sarai jah a, ” Veteh, mitvet’a numei mel-hoi tah nahi kahei.
12 Egypt miten namu tengu keiji nahi heuvintin, kei eithauva, nang nakihoi diu ahi.
13 Nang jeh a eihing hoijuva eibol phatna diuvin kei naovin kiseiyin,” ati.
14 Abram Egypt gamsung alut phat’ in Egypt mite mitvet’ in jong ajinu chu numei mel- hoitah ahi nget’e.
15 Pharaoh leng chapaten amudoh-un, Sarai mel- hoi dan lengpa jah a aseiyui; hijeh chun Sarai chu leng inpia apuilut tauve.
16 Sarai jal’ in lengpan Abram abol phan, kelngoi hon, kelchate, bong hon, sa-ngante, soh le kol chule sangonsao tampi apei.
17 Ahinla lengpan Abram jinu Sarai akipuijeh-in, Pakaiyin lengpa chung le a-insung mite chunga nat khoh tah alansah tai.
18 Hichun Pharoah- in Abram agakousah-in ajah a, “Idia hita neibol ham? Hiche nu naji hitaa idia naseida ham?
19 Ibol’ a nanao ahi na tia, jia naipuisah mongham? Hin hin naji hi, kipuiyin potdoh loiyin.” tin anotai.
20 Pharaoh-in amite aseipeh-in, amahon Abram le ajinu chule athil keo alokeo pumin gamsunga konin akaidoh tauve.

SEMTIL BU BUNG 13

Abram le Lot kikhen

1 Abramin ajinu akipuiyin,anei jouse apon, Lot to kilhonin, Egypt’ a konin Canaan lhanglam jonin achetai.
2 Abramin kelngoi le kelcha, bong chule sana dangka tampi aneiyinmihao tah ahitan ahi.
3 Canaan lhanglam gamkaiya konin akholjin len, muntin achonin, Bethel lang ahinjon’e. Masanga ngahmun asemna Bethel le Ai kikah ahinphan,
4 Masanga maicham asemna muna chun Pakai min ataove.
5 Lot’ in jong atumtah-in kelngoi le kelcha chule bong tampi le soh tampi aneiyin, a-insung mite toh ahiuve.
6 Abram le Lot’ in gancha tamtah gel anei lhon phat’in, ganchate neh ding gam aneo behseh tan acheng khom thei lhon tapoi.
7 Abram gancha ching ho le Lot gancha ching ho akinahso tauvin, akitohmo tauve. hichepet hin Canaan gamsunga Canaan mite le Periz mite acheng nalaiyui.
8 Abramin Lot jah a, “Insung khat kihi, namite le kamite kina thei pouvinte.
9 Kikhenta hite. Na- angsunga gam ongmo ngap lou, nadei dei lai kilhenin; jetlam nalhen le veilama cheng ting, veilam nalhen le kei jetlama chenge,” ati.
10 Lot akhodaa avet leh, Jordan phaicham pumpi, Zoar geiyin agah mun, twi atha lhingin, Pakai honsung le Egypt gamsung abang jengin ahi. Hichepet”a chu Pakaiyin Sodom le Gomorrah asuhmang loulai ahi.
11 Hi jeh chun Lot’ in Jordan phaicham pumpi akilhenin, nisolam jonin akitoldoh tai. Hitia cuh Abram le Lot kikhen ahilhon’e.
12 Abram Canaan gama acheng denin, Lot chu Jordan phaichama khopi ho lah a chun apansan, Sodom koma ngahmun asem’e;
13 Sodom kho mite chu a- engseuvin, Pakai dounan achonseuve.

Abram Hebrona achaolut

14 Lot’in adalhah nungin Pakaiyin Abram jah a, ” Nadin mun laitah akonin najet navei, sah le lhang vegolsoh keiyin;
15 Gam hitepi nang le nason napah kapeh ding, tonsot’a nagamu hiding ahi.
16 Nason nachilhah hapuna kapunsah ding, tam behseh jenguva leivui jat pha diu koman asim jou lou ding ahi.’
17 Keiman agam pumpia kapeh tah ding jeh-in,kipatdoh-in abonchan gakholsoh keiyin,” ati.
18 Chuphat’in Abram jong achen, Hebron a Mamre thingphung theng ho koma chun apansan, hikoma chun Pakai din maicham khat asemtai.

SEMTIL BU BUNG 14

Abramin Lot ahuhdoh

1 Hiche lai hin Babylon lengpa Amraphel le Ellasar lengpa Arioch, Elam lengpa Chaedorlaomer le Goiim lengpa Tidal
2 Akon’ uvin Sodom leng pa Bera le Gomorrah lengpa Birsha, Admah lengpa Shinah le Zeboiim lengpa Shemeber chule Bela ahiloule Boar lengpa chunga gal agabol tauve.
3 Tulaiya Twikhanglen thisa, Siddim phaichama hiche leng nga ho hi anapangkhom’ uve.
4 Kum somle ni sungin leng nga h hi Chedorlaomer lengpa noiya alut lo tauvin, nah nha- in kum som le thum kumin ahindou pan thie bep’ ui.
5 Ahin la kum som le li lhin kumin Chedorlaomer le apanpi leng ho ahung kon’ uvin, Ashteroth Karnaim a Rephaim mite ajouvun, Ham mun’ a Zuzim mite ajouvun,
6 Edom molsang lhanga Hor mite ajouvun, nelgam pamchim a Elparan geiyin agadel jampeh-uve.
7 Chua konin ahung kile kit’ uvin, masanga ‘Enmishpat kiti, tulai Kadesh mun akhun ahunguve. Hikoma hin Hazazon Tamar a cheng, Amor mite le Amalek mite ajouvun agam pumpi alauve.
8 Hichun Sodom le Gomorrah, Admah, Zeboiim chule Bela leng ho akikhom’ un Siddim phaiya galbol din akigotauve.
9 Leng nga hin Elam le Goiim, Babylon, Ellasal- leng li dou din agouve.
10 Siddim phai hi bon- ngan bol adimset’ in, Sodom le Gomorrah lengpa galmun’ a kona ajam lhon le bolsunga alha lut lhontan, leng dang thum vang chu molsang lama ajamdoh tauve.
11 Leng li honSodom le Gomorrah khopi sunga thilkeo ijakai, anneh geiyin akichom’ un achetauve.
12 Amahon Sodom khoa cheng, Abram sopipa chapa, Lot jong gal- hingin akaiyui, athilkeo jouse jong akipoh thauve.
13 Gal’ a hung jamdoh mi khat’ in thilsoh chengse hi Hebrew mi Abram jah a ahung seitai. Hichepet hin Abram hi Amor mi Mamre thingphung theng ho koma anachenge. Mamre’n sopi Eshcol le Aner aneiyin- Abram to pangkhom cheh ahiuve.
14 Asopipa chapa min gal- hinga akaimang jeng ajah phat’ in Abramin ainsung mi galbol thei cheh akhop le, jathum le som le get alhingun, ama lamkai nan leng li ho chu Dan geiyin agadel peh-ui.
15 Abramin asepaite chu aloi loiyin ahomkhenin, agalte chu janlaiyin anokhumin ajoutai, chu leDamascus sah lam, Hobah geiyin agadel jampeh-uve.
16 Abramin asopipa chapa Lot le numei chapang joouse ahin puiyin, athilkeo anei agou chengse le athil chomdoh-u abonchan ahin nungpoh kit’e,

Melchizedek-in Abram phatthei aboh

17 Chedorlaomer le leng dang ho agajao ahung kile kit chun ‘ lengpa phaicham’ kisah Shaveh phaiya Sodom lengpan Abram analamtoi.
18 Chu le Pathen Chungnungpen Thempupa, Salem lengpa Melchizedek chun Abram din changlhah le lengpitwi ahinchoipeh- in,
19 Phatthei boh nan ajah a, “van le leiset sem, Chungnungpen Pathenin Abram phatthei boh hen’
20 Nagalte josah Chungnungpen Pathen chu vahchoiyin um hen.'” ati. Abramin athil chomdoh jat hopsom a hop khat cheh Melchizedek apei.
21 Sodom lengpan Abram henga, “Nathil chomdoh chengse chang denin lang, kamite vang neipen,” tin athum’e.
22 Sodom lengpan jah a Abramin, “Van le leiset sem, Chungnungpen Pathen, Pakai angsunga khut tunga kihahselsa kahi,
23 ‘Abram kahaosah-e,’ nati louna din, patse jang cha hihen, kengchot khao jang cha hijongle, nang thil pou pou laponge.
24 Golhang ho nehdoh le kalhonpi ho lahdoh tilou adangima ding katipoi; kapanpi Aner le Eshcol chu le Mamre’ n vang achan ding dol kilah cheh-u hen,’ ati.

SEMTIL BU BUNG 15

Pathenin Abram to Kitepna asem

1 Hicheng nung hin Abramin mu anei pet’in Pakaiyin ajah a, “Kicha hih-in Abram, nang dial um a kisung kahin, kipaman tampi namu tei ding ahi,” ati.
2 Abramin, “Thaneitah Pakai, cha le nao neilou kei tobang dinga kipamaan chu ijajong phachom ding ham? Kagou jeng jong hi Damascus khoa Eliezerin alo ding dan ahibouve.
3Cha la neihinsah pon, kasohte khat hin kanei le kagou jouse alo ding ahitai,” ati.
4 Hichun Pakaiyin ajah a, “Hiche soh Eliezer khun nanei nagou alo louhel ding, nachapa mong mongin nagou alo ding ahinai,”ati.
5 Pakaiyin inpo lama apuidoh-in, “Van a ahsite khu gahsim gotemin; nason nachilhah jong hijat khu hung pha diu ahi,;ati.
6 hichea khen beihel’a Abramin Pakai atahsan jeh chun, Pakai alung lhaiyin, them achansah tai.
7 Pakaiyin Abram jah a, “Babylon gam Ur khopia pat hinpuiya hiche gam nape goa Pakai chu Keima kahi,” ati.
8 Abramin, “Thaneitah Pakai, hiche gam keiya ahiding chu iti kahet ding ham?” tin adonge.
9 Adonbut nan Pakaiyin, “kumthum lhingsa cheh bongla khat le kel la khat chule kelngoi chal khat hinkaiyin, chule vakhu khat le vapal khat hinchoiyin hungin,” ati.
10 Abramin gancha ho chu Pathen henga din ahinkaikhomin, athat’in ahapsat cheh-in, ahap Langton ajamin, vachate ni vang chu asemkeh poi.
11 Sa ho chu muthongten ahinvel tengu Abramin adeldohjie.
12 Nisa lhumsuh lamin Abram nguijen juntah-in a-ihmutsoh tan, chule tijat umtah muthim lhangkhal’in ahinjin khumtai.
13 chutah-in Pakaiyin Abram jah a, “Nason nachilhahte gam hi loubeh, kholgam khat’a khopem diu, gasoh changuva kum ja li sunga min genthei hesoh tah a abolgim diu ahi.
14 Nachilhah ho soh a vul nam mite chu ken talen kapah a, nachilhah hon nei le gou tampi kipoh a migam chu adalhah diu ahi.
15 Nangin hinkho nomtah naman’a, nateh thia kivui ding, napu napate heng najot ding ahi.
16 Nachilhahte hi khangli channa a hikoma hung kile kit diu ahi; ajeh chu tu chan geiyin Amor mite gitlouna akichai hih laiye,” ati.
Hiche chu photlot louvin sahap kisat ho kah a chun ahung lengjap jengin ahi.
18 Hiche nikho hin hikoma chun Pakaiyin Abram to kitepna asemin,”Keiman nason nachoilhahte chu hiche gam, Egypt gamgia pat Euphrates luipi dung gei,
19 Ken mite gam jouse pum, keniz mite gam gei ;e Kadmon mite gam puma,
20 Hit mite gam jong, Periz te gam, Rephaimite gam,
21Amor mite gam gei, Canaan mite gam, Girgash mite gam le Jebus mite gam jouse puma kapeh dia kitep kahitai,” ati.

SEMTIL BU BUNG 16

Hagar le Ishmael

1 Abram jinu Saraiyin cha ahinpeh tapon, ahin Sarai hin Egypte numei Hagar chu soh-in anavul’e.
2 Hijeh chun Abram jah a, “Keila Pakaiyin cha neilouvin eikoitan, cha eihinpeh khat leh, kasoh nu-nugah khutoh galumkhomin,” ati. Sarai sei chu Abram anomtai.
3 Hiti hin Saraiyin asohnu Hagar chu Abram thaikem din apetai. Hiche hi Abram kum som jen Canaan gama achen nunga thilsoh ahi.
4 Abramin Hagar agaluppi le amanu agaitai. Hagarin agai akihet phat’in akiletsah-in Sarai anoise boltan ahi.
5 Chuphat’in Saraiyin Abram jah a, “Hibanga eikinoisena gu hi nachunga chuhen! Kenba nakikoipi din kasohnu kapen, aman agai akihet phat’in eihiti noisetai. Koijoh moa dih am Pakaiyin ikah lhona thu hintan jeng hen!” ati.
6 Abramin la Sarai jah a, “Nakhut’a um nasohnu chu me, nadei deiyin bol jeng tang-em,” atipeh-e. Hijeh chun Saraiyin Hagar chu thohda daa abolgim leh, ajammang lo tai.
7 Shur jotna lampia twisam phung khat’a Pakaiya kon Vantil khat’in Hagar akimupin,
8 ajah a, “Sarai sohnu Hagar, hoiya kona hoilam jon ding nahim?” tin adong e. Hagarin, “Kapi Sarai dalha hung jam kahi,” ati.
9 Vantil chun, “Napi henga kile kit’in asoh-in gapang kittah,” ati.
10 Pakaiya kon Vantil’in Hagar jah a hitin jong aseiye, “Keiman koima cha simsen lou son le pah kapeh ding na hi.
11 Chapa khat nahin ding ahin, hesoh a nataona Pakaiyin asanjeh a amin Ishamael nasah ding ahi.
12 Nachapa vang chug am sa-ngan ngol’a ngol ding, mitin adouva, mijousen ama aledou diu; ainsung mite to kikhena chang chen ding ahi,” ati.
13 Hagarin ajah a thusei Pakai chu aminin akouvin, “Mi mudoh thei Pathen nahi,” ati. Ajeh chu, “Tahbeh monga ken Pathen kamua ahivanga hing nalai kahim?” ati.
14 Hijeh a hi mihon Kadesh le Bered kikah a twikul chu, “Eimudoh a Hing jing Pa twikul,” atiu ahi.
15 Hagarin Abram chapa khat ahinpeh-in, Ishmael asah-e.
16 Hichepet hin Abram kum somget le gup alhing tai.

SEMTIL BU BUNG 17

Kitepna hetna Cheptan

1 Abram kum somko le ko alhinin ahenga Pakai ahung kilah-in ajah a, “Keima Hatchungnung Pathen kahi, kathunnungin thildih bol’in.
2 Nangto Kitepna kasema, nachilhah hapuna kapunsah ding ahi,” ati.
3 Hichun Abram tol’a abohkhup jengle, Pathenin ahenga,
4 “Hiche hi nahenga kakitepna ahi: Chitin namtin penna pa nahi ding;
5 namin jeng jong Abram hitalouva Abram* hiding ahi, ajeh chu chitin namtin penna paa kasem nahi.
6Nachilhah mihem hapuna kapunsah a,abang bang jong leng le lal hung chang diu, nason napah tam behseh jenga nam lentah tah hungsoh diu ahi.
7 “Nang le khonung geiya nachilhahte, akhang khanga, tonsot teiya kakitepna chu kanit jing ding ahi. Nang Pathen jong kahiya, nachihlhahte Pathen jong kahi ding ahi.
8 Tua nakhopemna gamsung hi nang le nachilhahte kapeh ding; Canaan gam pumpi hi chilhah mite changuva, tonsot geiya apua pang diu, chu le Keima a-pathenu kahi ding ahi,”ati.
9 Abram jah a Pathenin, “Nahenga kakitepna hi nang nahin, khonunga nachilhah ho hijongle nanit soh kei diu ahi.
10 Nang le na chilhah ten na lah-uva pasal jouse chep natan cheh diu ahi.
11 I-kah lhon a kitepna het jingna dia nangin chep natan ding,
12 nakhang lhumkeiyuva, nachilhah insunga pengden mong hihen, suma kicho soh-midang hijongle, pasal jouse chu niget lhin nia chep natan cheh diu ahi.
13 Insung pengden hihen soh a kicho hijongle pasal jouse chap natan diu ahi. Hitia hi kakitepna chu natahsa vuna naput’uva, tonsot’a um jing jeng ding ahi.
14 Keito kitepna suhkeh a chep tanlou pasal koi hileh kamite lah a kisimtha louhel ding ahi,” ati.
15 Abraham jah a Pathenin, “Najinu min Sarai tilouva, tukal Sarah natijohding ahitai.
16 ama hi ken phatthei kaboh teng, chitin namtin penna nu hung hi ding, chule achilhahte lah a leng le lal jong hung pengdoh ding ahi,” ati.
17 Abraham tol’a aboh khup’in, “Kum jakhat lhingsa pasal’in cha anei mong ding hiya, kum somko nunga Sarah-in cha anei thei mong ding ham?” tia agel le, amoh nuijat lo tai.
18 Abrahamin Pathen koma, “Ishameal chu kagou nalosah jengle iti-am?” ati.
19 Ahinla Pathenin, “Ahipoi. Najinu Sarah hin chapa khat nahinpeh tei tei ding, amin Issac nasah ding ahi. Kakitepna chu ama le achilhahte dinga, tonsot geiya kanit jing ding ahi. Hichu kitepna guitan mo ahi.
20 Ishamael ding nasei jong kahenai, phatthei kaboh a cha le nao son leh pah tampi kapeh ding, lengvai pothei cheh pasal som le ni ahin ding, achilhah mite nam lentah kaso ding ahi.
21 Ahinla khovei tulai phat’a Sarah-in ahinding nachapa Issace chunga bou kakitepna kaphudoh ding ahi,” ati.
22 Abraham jah a thu aseisoh phat’in Pathen chu akaltoutai.
23 Abrahamin Pathen thusei anit’in achapa Ishmael leh a-insung mi pasal jouse, a-insunga pengden hihen suma achoh ho hijongle, soh pasal geiyin, hiche nikho le le chun chep atanpeh soh keiye.
24 Chep akitan chun Abraham kum somko le ko alhingtai,
25 achapa Ishmael kumsom le thum alhinge.
26 Anilhonin nikhat’in chep akitan lhonin,
27 Abraham soh pasal jouse jong ahiuve.

SEMTIL BU BUNG 18

Abraham chapa neiding Kiteppeh

1 Mamre thingphung theng mun achenna a, nisa hahsat jeh a ponbuh kotphungbul’a atoupet’in Abraham henga Pakai ahung kilah-in,
2 Abramham akhodaa agahvet leh,pasal thum anadinguve. Amu mun alamdot din alhaidoh paiye. Tol’a aboh khup’in,
3 “Kapu, nang jen dia hikoma ki-uma, ka-in hopa louvin neijot pai hih beh-in.
4 Nakeng dopna diu twi hindom ing ting, hikom thingphung noiya hin kicholdo’uvin.
5 Ka-in hinhopa ngal tauva, ikhat beh jong bolpeh ung ting, najin nauva natha nei theina diuvin na kamkhat beh jong nehsah unge,” ati. Miho chun, “Kipa aume, naseibangin hinboltan,” atiuve.
6 Lungkin tah-in Abraham ponbuh sunga alut’in Sarah jah a, “Nachangbonh neldi phapen dip’a konin atena thum tedoh-in, changlhah phabep hinkang loi temin,” agatin;
7 chuin bonghon lah a alut’in bongnou hoisel athao khat amanin, sohpa khat apen, aman jong athat’in ahon min loutai.
8 Abrahamin bongnoi le theilhum kihal, bongnoi twi chule bongnousa minsa chutoh ahindomin, miho angsunga aluiyin, thingphung noiya chun aneh laiseuvin amatah ajenlen apange.
9 Amahon Abraham jah a, “Najinu Sarah la?” atiuleh; aman, “Ponbuh sunga khun aum nai,” ati.
10 Jinpan, “Khovei tulai phat, nahenga kahung kit teng le najinu Sarah-in chapa khat ahinding ahi,” ati. Anung, ponbuh kotpunga chu Sarah uma angai lhih ahi.
11 Abraham le Sarah ateh lheh lhontan, Sarah chu athinei jong atangtai.
12 Hichun Sarah-in Alungthimin, “The nung voi nunga kitimatna ki nei jongle anopje jong imlou ding, kajipa jong tehse voisa hilou haimo?”ati.
13 Hichun Pakaiyin Abraham jah a, “I-bol’a Sarah nuiya,’The nung voi nunga cha kaneibeh ding hinam?’ati ham?
14 Pakai dia ipi ahah sa um am? Kaseisa banga khovei tulai phat le ka hung teng Sarah-in chapa khat ahin ding ahi,” ati.
15 Chuphat’in Sarah akichan akilep’in, “Nuibon kinui louva,” ati. Ahinla Pakaiyin, “Ahinpoi,nanui nai,” ati.
Sodom khopi dia Abraham taona
16 Amaho akipatdoh-un Sodom khopi gah vetsah theina mun khat ajon’uve; Abraham jong alhadoh diuvin amaho akilhonpi.
17 Pakaiyin, “Kathil bolgot hi Abraham impehda tange.
18 Ajeh chu ason achilhah mite nam hattah le nasatah hung hiya, amajeh a chitin namtin ken phatthei boh ngal ding chu.
19 Acha anao, ason achilhah miten kathu angaiyuva thildih le akitoh abol theina diuva hil dinga ama kilhengta. Achilhahten kathu angaivu le ken kathutep aboncha kabolpeh ding ahi,” ati.
20 Hiti chun Abraham jah a Pakaiyin, “Sodom le Gomorrah dounan thuse akihasei behseh tan, achonset nau jong aval thanghoitai.
21 Chesuh ing ting asset nau kisei chengse atah ajou gapho chen tange,” ati.
22 Mi nin chukom adalhan Sodom lang ajon lhontai; Pakaiyin vang Abraham aumpi.
23 Hichun Abrahamin Pakai anailut’in ajah a,”Mona beiho chu chonsete toh nasuhgam tha tahbeh ding ham?
24 Ijemtia khopia khun themmona bei mihem som nga um jongle akho pumpin nasugam nah nah dem? Mihem som nga um jongle akho pumpin nasugam nah nah dem? Mihem som nga huhdohna khopi chu na hinghoi lou ding ham?
25 Nangin midih le migilou kibanga nabol’a nathagel ding, akikhetna beiya nabol ding vang bolda hel le chun kadeiye! Leiset pumpi thutan Pan adih a atan lou ding ham?” ati.
26 Pakaiyin, “Sodom khopia themmona bei mihem som nga bang kamudoh joule, amaho jal’a kho pumpi kahinghoi ding ahi,” ati.
27 Abrahamin asei kit’in “Pakai, imacha lou, leivui le meivam bep ken ngamtah a na henga thu kaseijom kit ding jeh-in nei-ngaidamin.
28 Khosunga chun themmona bei mihem som nga lhing lel hen som li le nga she umta leh, midih nga lhahsam jeh chun kho pumpi nasugam jeng dem?” ati. Pakaiyin, “Midih som li le nga ka mudoh le khopi chu sugam ponge,”tin adonbut’e.
29 Abraham, “Ijemtin somli she hile la?” tin adonge. Pakaiyin, “Som li she um jongle khopi chu sumang ponge,” ati.
30 Abraham, “Pakai, lung himo hih beh-in, kasei kit nom’e. Ijemtin somthum sehseh umta leh?” ati. Pakaiyin, “Somthum jeng kamu jongle bolda tange,”ati.
31 Abrahamin, “Pakai, imacha lou, leivui le meivam bep ken ngamtah a nahenga thu kaseijom kit ding jeh-in nei-ngaidamin. Ijemtin midih som ni seh bou umta leh?” tin adong kitleuve. Pakaiyin, “Som ni she kamudoh jongle khopi chu sumang ponge,” ati.
32 Abrahamin, “Lung hang hih beh-in Pakai, khatvei seh bou gah sei kit tading’e. Midih som khatseh bou kimudoh le la?” ati. Pakaiyin, “Midih som khatseh um jongle sumang ponge,” ati.
33 Abraham to akihou jouvin Pakai chu achemangtai, chule Abraham jong in lama ahung kile tan ahi.

SEMTIL BU BUNG 19

Sodom khopi chonsetna

1 Vantil te ni chu Sodom khopia ahung lhun lhon le lot chu khopi kelkot phunga anatouve. Amani amu phat’in Lot chun agalamtoi. A-ang sung lhona aboh khup’in,
2 “Pu te ni, hikoma nangni kinbol dia umah kahi; ka-in a hung lhung lhonin. Keng kisil lhonin natin nage khovah thei lhon ahi. Jingpi tah-in thou lhonin natin chepai lhon nan nate,” ati.Amani adan, “Ahipoi, kholai dunga geh khovah lhon tange,”ati lhontai.
3 Lot ín amani chu ahajolten phat’in anom lhonin, Lot in lam ajontauve. Maljin te ni dinga changlhah kanpeh a anneh tuitah sempeh din Lot’in alhacha ho asol’in ahi. Lhachahon neh asem jou phat’uvin an anetauve.
4 Maljin ten in lupna ajot masangin, khopi sung mihon in chu ahin-umtauve, In umho lah a khosung gollhang upa apang soh keiyuve.
5 Amahon Lot ahinkouvun, “Tujan na-in a geh dia hung te ni chu hoiya um lhon tam? Hinpuidoh loiyin, numei bol’a kabol diu ahi!” tin asamtauve.
6 Lot apotdoh-in kotpi anungkhan,
7 miho jah a, “Golle paite, hitobang lom hin khang gilou hih beh-uvin!
8 Veuvin, pasalto kitimat louhel lai chanu nu kaneiyin, anin hinpuidoh peh-uving ting nanop nop’in bol jengun, maljin te ni vang imacha lodauvin, ka-in a hung lhung kamaljin ahilhon bouve,” ati.
9 Ahinla amahon ahoh lhauvin, “nei ot’un khopempa! I-tobang mi nahiya keiho toh ding neihil leu ham? Nei ot’uvin, ajo le amani sanga melse cheh a nang kabol lo diu ahi,” ati tauve. Hiti hin Lot chu anung sot’un, kotpi phung phujal ding akigotauve.
10 Chuphat’in insunga um ten in Lot chu akailut loi lhonin, kotpi akhah lhontai.
11Kotphunga um mi alen aneo abonchauva Vantil ten in amit’u achotsah lhon leh, suhna ding helouvin akimaitho gamtauvin ahi.

Lot’in Sodom kho adalhah

12 Mi ten in Lot jah a, “Hiche khosunga hi heng le kom-chanu chapa, tu le cha-adang koi koi nanei nah laiyam? Abonchauvin puidoh loidoh loiyin;
13 ajeh chu hiche mun hi kasuh mang lhon ding a hitai. Hiche miho dounaa thuse melse tah kisei chengse chu Pakaiyin ajadoh tan, hijeh a chu Sodom sumang dia eihinsol lhon ahi,” ati lhone.
14 Chuphat’in achanu te nit oh kitepsa pasalte henga Lot achen, “Kapat’un hikoma konin jamdoh loiyun; mun hi Pakaiyin asuhmang ding ahitai,” agate. Ahinla amanin atot danin anagel lhon’e.
15Jingkah khovah lhah-in Vantil te nin Lot anoloi lhonin, “Khopi hitoh nakisuh mang tha louna diuvin, nachanu te ni le najinu kipuiyin jamdoh loiyun,” ati lhon’e.
16 Lot akinomsot nah lai vangin, Pakaiyin akhohsah jeh-in, Vantil te nin akhut’in akai lhonin, ajinu le achanu te ni pumin khopi pamlama alhoh doh lhontai.
17 Hichun Vantil khat chun, “Nathi louna diuvin jamdoh loiyun! Kinung hei hih-un, phaicham dunga jong kibangpa hih hel’uvin, thinglhang gam a jamlut’uvin,” ati.
18 Lot’in adonbut’in, Ahipoi kapu, thing lhang lama neisol dauvin.
19 Khohsah tah a kahinkho bon huhhing ta, thing lhang lam agamla behseh-in, kalhun masanga manthah nan eihin lap den’a kathi den ding ahibouve.
20 Ven hiche khopi khu, naicha bou ahi, hikoma khun neijamlut sah-in,khopi neocha ahivanga hoidohna thei ahinai,” ati.
21 Vantil chun, “Aphai, hiche khopi khu suhmangda tange.
22 Man-gangin! Lhaiyin! Khukom nalhun ma imacha kabol thei l ou ding ahi,” atipeh-e. Khopi neo tinaa amin Zoar kisah ahitai.

Sodom le Gomorrah kisuhmang

23 Lot Zoar kho alhunin nisa ahung soh tai.
24 Phot lot louvin van a Pakaiya konin, Sodom le Gomorrah chunga Pakaiyin Kath le meikong goju bangin ajuhsah-in,
25 phaicham pumpi le khopi te ni, asunga cheng mihem jouse le tol’a keh thingna louna jouse geiyin asugamhel tai.
26 Hichun Lot jinu agah kinunghei leh, chilhang asoh-in, songkhom bangin akitungdentai.
27 jingkah matah-in Abraham alhaijel’in, Pakai masanga anadin na muna chun agadingin,
28 Sodom le Gomorrah gamkaise se agah vetsuh patep leh, hol kilhut khu bangin meikhu ahung kitungdoh jen jun jengtai.
29 Pathenin Lot chenna, phaicham akhopi te ni asuhmang jeng vangin Abraham agel khoh jeh-in Lot chu ahindohna thei muna ajamdohsah nai.

Moab mite le Ammon mite penna

30 Zoar khoa chenden ding akichan, achanu te nit oh Lot thing lhang gama acheuvin songko sung khat’a achengtauve.
31 Lot cha au-nun anao nu jah a, “I-pa la atehtan, hiche gamsunga eini kichenpi ding pasal dang jong aumpon,
32 i-pa hi ju donkhamsah hitin, luppia chi khaipeh din bol hite,” atin;
33 hiche jan chun ju adonkhamsah lhonin, au-nun apa akitimetpi leh, ju akham behseh jeh-in apan ima abollam ahephapoi.
34 Ajingin au-nun anaonu jah a, “Jan nilhah-in i-pa to kalumkhomtan, tujan jong ju donkhamsah hitin, nangin galuppin; chute leh i-pa to cha inei cheh lhon ding ahi,”ati.
35 Hijeh chun chuche janin jong apa ju adonkhamsah kit lhonin, acha neojo nun apa aluppin akitimatpi tai. Apa ju akham behseh jeh-in ima abollam ahephapoi.
36 Hiti hin Lot chanu ten in apaa konin nao avop gel lhontai.
37 Au-nun chapa khat ahingin amin Moab* asah-e. Moab hi tulai Moab mite penna pului anahi.
38 Anao nun jong chapa khat ahingin amin Benammin* asah-e. Ama hi tulaiya Ammon mite penna pului anahi.

SEMTIL BU BUNG 20

Abraham le Abimelech

1 Hichea kon hin Abrahamin Canaan lhanglam gam ajonsuh-in, Kadesh le Shur kikah a chengtai. Khonunga Gerar a achenlaiyin,
2 Abrahamin ajinu Sarah chu anao nun alep’in, hijeh chun Gerar lengpa Abimelech chun Sarah hi aji din anapui man’e.
3 Jan khat Abimelech mangin Pathen ahung kilah-in, “Nangin mi jisa hiche numei hi nakipui jeh a nathi tei tei ding ahi,” ati.
4 Abimelech vang chu Sarah koma analut kha loulai ahinai; hijeh chun aman, “Pakai, nangin themmona bei miho jong natha jeng ding ham?
5 Abraham jengin jong anaonua aseiya chule aman jong chutimaa asei ahi. Hijeh a chu lung thengsel’a kabol’a, thil dihmo kabol loulai ahi,”ati.
6 Amangin Abimelech chu Pathenin adonbut’in,”Adih-e, lung thengsel’a nabol ahi kahenai;hijeh achu kadoumah ten chonsetna chu bolsah louva, tugeiya hiche nu hi tongkha louva kakoi nahi.
7 Tun vang ama hi ajipa nungpeh tan. Hichepa khu Themgao ahin, aman nataopeh teng thi tapon nate. Nanungpeh lou vangle, kagih dim demsa nahi, nang jong namiten jong nathilo tei tei diu ahi,” ati.
8 Ajing jingkah matah-in Abimelech chun alhacha chengse akoukhomin thilsoh jouse abonchan aseipeh leh, akinlih leu jengui.
9 Hijeh chun Abimelech-in Abraham akouvin, “I-neilou ham? Ipi adih louva kabolpeh khah a kei le kalenggam chunga hitobang manthahna hi nahinpoh lut jeng ham? Eikibolna louhel ding khat’a neibol ahi.
10 Idinga hita chu neibol mong mong ham?” tin adongtai.
11 Abrahamin adonbut’in, “Hikoms Pathen tahsan mi aum dingla kagel loujeh a kajinu deichatnan eitha louvinte kati ahi.
12 Atah beh a jong ama hi kasopi ahinai. Kanu hin mong ahilou vangin kappa chanu ahin, jia kanei jeng ahibouve.
13 Hijeh a chu Pathenin kappa insung dalhaa gam choma eihinsoldoh a pat,’Nei ngailut phot chetnan mijouse henga nasopin neiseiyin’tia kahilsa mong jong anahi,”ati.
14 Abimelech-in Sarah chu Abraham anungpeh-in, kelngoi le gancha dang chule soh te jong apeh thai.
15 Abraham jah a, “Ven, namuphah chan hi kei gamsung ahi, nadei lai laiya chengin,”ati.
16 Sarah jah a Abimelech chun, “Ven, nasopipa dangka sang khat kapen,hiche hi nakoma um chengse mitmua jum ong huhna kapeh ahin, japi angsunga them nakichan ahitai,” ati.
17 Chuphat’in Abrahamin pathen henga ataopeh le, Abimelech le ajinu adamsah-in, soh numei ho geiyin adamsah-in amahon cha ahingtauve.
18 Ijeh-inem itile Abraham jinu Sarah jal’a abimelech insung numei jouse chu Pathenin chahingmoa anakoi ahi.

SEMTIL BU BUNG 21

Isaac Pen

1 Sarah chu ateppehsa bangin Pakaiyin phatthei ahungboh-in,
2 Abraham ateh nungin Sarah agaiyin chapa khat ahinpeh tai. Achapa chu Pathenin ateppeh dontah a chu hung peng ahi.
3 Abrahamin amin Isaac asah-in,
4 Pathen seibangin apenjou niget lhin nin Abrahamin achapa Isaac chu chep atanpeh-e.
5 Isaac pen chun Abraham kum jakhat alhingtai.
6 Sarah-in, “Pathenin eikipehsah a einuisah ahitan, ajapha chan nuiya eikipapi ding ahitai,” ati.
7 Aman, “Sarah hin cha le nao hinga nao noi chepsah dia koipenin Abraham anaseipeh ngam dem? Ahin la atehset nungin keiman Abraham chapa khat kahinpeh tai,” tin jong aseiye.
8 Isaac akhondoh a noichep aban phat’in Abrahamin naolop golvah loupi tah abol’e.

Hagar le Ishmael Abrahamin asolmang

9 Nikhat Egypt numei Hagar chapa Ishmael le Sarah chapa Isaac akichem lhon’e.
10 Akichep lhon aven Sarah-in Abraham jah a,” Sohnu le achapa hi solmang tan. Sohnu chapa hi kachapa Isaac chan ding nagou halcha jong chang theiponte,” ati.
11 Ishmael jong achapa ahijeh-in Abraham din Sarah thusei hi anommo lheh-e.
12 Ahin la Pathenin Abraham jah a, “Sohnu le chapa din lung gimdan. Sarah sei sei chu boltan, Isaac a kona nachilhah kisimjo ding ahibouve.
13 Nacha ahijeh chun sohnu chapa konin jong nam khat semdoh nange,”ati.
14 Jingpi tah-in Abraham athouvin changlhah alan, twipaiya twi akhumin Hagar apen, achapa akipohsaah-in asolmangtai. Hagar achen Beersheba gamthip laiya avah le lei.
15 Twipaiya twi adon jou lhon phat’in Hagarin Ishmael chu hampa nang noiya aleh lut’in,
16 meer jakhat jen gamlan ache paiyin, atouvin,”Kanao thi ding kave ngampoi!” ati. Hichepet
tah chun anao chu ahung kaptai.
17 Nao kagin chu Pathenin ajan, Pathena kon Vantil’in Hagar jah a, “Hagar, i-bol’a lung gim
nahim? Kicha hih-in, nao kagin chu Pathenin ajatai.
18 Chen lang nao khu gadomin, kipomin, lhembi loiyin, keiman ama chilhah akona nam lentah
kasemdoh ding ahi,” ati.
19 Pathenin Hagar mit ahasah leh, aman twikul khat amudoh paiyin, achen savun twipai dimin
twi agathal’in, nao chu themkhat adonsah tai.
20 Nao chu akhangtou touvin, Pathenin akivoppi jinge, Paran gamthip noi jenga apansan, sadel
themtah ahin,
21 anun Egypt numei khat jin apuipehtai.

Abraham le Abimelech kinoptona

22 Hichelai hin Abimelech asepai lamkaipa phicol toh Abraham henga achen, “Nang hi natohna
chan a Pathenin napanpi.
23 Khopema nahung chenna hiche gamsunga kei le kachate, kason kalhah chengse chunga
hepina neiya naum’a, ken kabolna bang banga nabol’a neijou bol louhelna din Pathen maiya
kitep masan,” ati.
24 Abrahamin, “Kakitep’e,”ati.
25 Twikhuh khat asohten alahpeh jeh-un Abimelech henga Abraham akiphin le,
26 Abimelech-in, “Twikhuh lahpeh a chu koipen hiuvam kahe hih beh-e. Seila neiseipeh pon, tua
chu bou kajah ahi nalaiye,” ati.
27 Hichea hin Abrahamin kelngoi phabep le bongchal phabep Abimelech apen, kinoptona
asemdoh lhontai.
28 Abrahamin akelngoi lah a konin kelngoi sagi agahoidoh leh,
29 Abimelech chun, “Idia nagahoi khen ham?” tin adonge.
30 Abrahamin, “Hiche twikhuh hi kei semsa ahi nanop phot chet nan hiche kelngoi sagi hi kilah-
in,” ati.
31 Hikoma chu ama nin kitepna anasem lhonjeh a Beersheba kisah ahi.
32 Hitobang kihoutohna asem chai phat’un Abimelech le Phicol Philistine gama akilekit lhontai.
33 Beersheba muna chun Abrahamin chah thing khat aphut’in, Pakai tonsot Pathen henga
ataove.
34 Philistine gamsunga sottah Abraham akhopem dentai.

SEMTIL BU BUNG 22

Isaac kilhaina aneidia Pathenin Abraham thu apeh

1 Phat chom khat nungin Pathenn Abraham apatep’in ajah a, “Abraham!” tin akouve. Aman,
“Hikoma ka-um’e!” tin ahouve.
2 Pathenin, “Na-ngailut tah nachapa chang khat seh Isaac chu Moriah gama puiyin, kahinko peh
ding molsang khatpen pen chunga pumgo thilto kilhai nan ganeitan,” ati.
3 Ajing jingpi tah-in Abraham athouvin, pugo thiltoa manchah din thing achomin sangan
apohsah-in,alhacha mi nit oh Isaac apuiyun, Pathenin aseipehna mun jonin achetauve.
4 Nithumjen ajot nungun Abrahamin ajot nau mun chu gamla tah-in agah mupha bep nalaiye.
5 Lhachate ni jah a Abrahamin, kei le boipu hilampeh a khun gatao lhon ing ting, nahenguva
hung kit lhon nange,” ati.
6 Pumgo thiltoa tiding thinglom chu Abrahamin Isaac aputsah-in, meicho na ding song meihol le
chemcha aman achoiye. Achepet lhon hin
7 Isaac-in, “Hepa!” atileh; aman, “I-ham kanao?” ati. Isaac-in, “Hepa, meicho na ding song
meihol le tiding thinglomla aumtan, kilhaina ding kelngoi hoiba ham?” ati.
8 Abrahamin, “Pathenin kelngoi hin ki-ngaito nante,” atin, akijotpai lhontai.
9 Pathenin akipehna mun alhun lhon phat’in, Abrahamin maicham khat asemin, maicham chunga
thinglom agolchan akoiyin, Isaac akantumin, maicham chunga thinglom chunga chun alupsah-e.
10 Hichun chemcha asatdoh-in achapa tha din agotai.
11 Vana Pakaiya hungkon Vantil chun, “Abraham, Abraham!” tin ahinsamtai. Abrahamin,
“Hikoma ka-um’e!” tin ahouve.
12 Vantil chun, “Chapang chu ima lodan, supop hih beh-in, Pathen nagin jeh a nachapa chang
khatseh tha na dia jong khut kih louva napan kahetai,” ati.
13 Abraham akiheile leh, kelngoichal khat hampa nangtom lah a kit e nia kihen amudoh-in,
agakailut’in achapa khel’in pumgo thilto kilhai nan aneitai.
14 Hichelai mun chu Abrahamin, “Pakaiyin thilto aki-ngaitona mun,” asah-in, hijeh chun tuni
geiyin mihon,”Pakai molvuma aman thilto aki-ngaitona mun,” ati jingui.
15 Vana Pakaiya hungkon Vantil chun anivei nan Abraham ahinkou kit’in,
16 Pakai amatah kihahsel’a asei chu, “Neigin jeh a nachapa chang khatseh chunga jong khut kih
louva napan hin kei kitep’ah kahitai.
17 Nangman phatthei kaboh a,nason nachilhah van a ahsite jat le Twikhanglen panga neldi jat
hungpha ding, namelmate ahinjosoh hel diu ahi.
18 Kasei nanit jeh a nason nachilhah phatthei kaboh banga hi phatthei kaboh ding deiya chitin
namtin kahenga hung tao diu ahi,” ati.
19 Alhachate ni henga Abraham ahung kile kit’in, Beersheba geiyin ahung kilhon’un,hikoma
chun Abraham achengtai.

Nahor chilhah ho

20 Phat chom khat nungin Milcah-in asopipa Nahor chapa get jen ahinpeh thu mihon Abraham
ahung seipeh tauve.
21 Nahor chate aping masapen pa Uz ahin, anaote chu Buz, Aram pa kemuel,
22 Chesed,Hazo, pildash, Jidlaph chule Bethuel-
23 Rebecca pa ahiuvin, abonchan Abraham sopipa Nahor chapate,Milcah hin chengse get
ahiuve.
24 Nahor thaikem nu Reumah-in jong Tebah ke Gaham, Tahash le Maacah ahinge.

SEMTIL BU BUNG 23

Sarah thi, Abraham lhanmol choh

1 Sarah chu kum jakhat le som ni to sagi ahingin,
2 Canaan gamsung, Kir-iath-arba kiti, Hebron khoa athin,Abrahamin ajinu pul adouve.
3 Ajinu thilong phung dalhan Abraham achen Hit mite jah a,
4 “Keima maljin, nahenguva hung khopem kahin, kajinu long kavuina din gam leiset mun khat
neichohsah-uvin,” agate.
5 Hit miten Abraham jah a,
6 “Ngaitemin kapu, kalah-uva nangma Pathen tun lamkai lentah hiya,kalhan semsau phapen
khat’a khun najilong vui jengin; koi hijongle naji vuina din kipah tah-in lhan khat pejeng ung
kate,” atiuve.
7 Hit mite masang tol’a Abraham abohkhup’in,
8 “Hikoma kaji neivuisah nomu ahinah leh, Zohar chapa Ephron henga khun,
9 aloupam chin a Machpelah songko khu neithumpeh-uvin. Hiche khu lhanmol’a kanei den din,
nang ho maiya leiman lhingset’a eichohsahna din neiseipeh-uvin, “tin angeh-e.
10 Kelkot phung, mipi kikhopnaa hi Hit midang ho chutoh Ephron jong toukhom ahiuvin; mi
jouse jah din ahindonbut’in,
11 “Kapu ngaitemin, lou pumpi le asunga songko pumin napenge. Najilong navuina din loumun
le songko chu kamite angsung laitah a pejeng ing’e,” ati.
12 Ahivang in Hit mite angsunga Abraham akunin,
13 Ephron jah a chun mipi jah thei din, “Nei ngai themin ikhat dong inge. Loumun pumpin
chotange, aman alhingin kilah-in, chule kajilong jong vui inge,”ati.
14 Ephronin Abraham jah a,
15 “Koi-ngaiyin kapu, dangka shekel ja li man bep leimun chu nang le kei kah a ipi tahpi ham?
Najilong chu kivuina jengin,” ati.
16 Abraham anomin, Hit mite jah changtah a Ephronin aseidohsa dangka shekel ja li chu, kivei
miho thiltena dungjuiyin atedoh peh tai.
17 Hitobanga hi Mamre niso lam Machpeleh mun a Ephron loumun le asunga songko lhan toh,
loupam ching geiya keh, loulai thing jouse jong Abraham changkha ahitai.
18 Kikhopna hung pang Hit mi jousen jong loumun Abraham kipehdoh chu ahetpehsoh keiyui.
19 Canaan gamsung, chulai songko lhan sunga chun Abrahamin ajinu Sarah avuitai.
20 Hiti hin Hit mipa loumun le asunga songko pumin lhan din Abraham achan thatai.

Genesis 24

Issac ji kipui

1 Abraham ateh lheh tan, atoh lam lam Pakaiyin phatthei aboh-e.

2 Agou jouse ching, lhacha upapen jah a Abrahamin, “Kakhel kah tuh-in lang,

3 kachapa Isaac ji dia Canaan gamsung mite chanu napuipeh louna din van le leiset Pakai Pathen minin kitep’in.

4 Nakile kit’a kapenna gam, kajat mite lah a kona kachapa Isaac ji naga puipeh ding ahi,” ati.

5 Lhachapan, “Nu-ngah chu hiche gama hung ding data leh, nahung kondohna gam langa nachapa kalesol ding hitam?” tin adonge.

6 Abrahamin, “Kachapa  hilama khu nalesol kit louhel ding ahi!

7 Kajat mite gam, kappa insunga kona eihinpuidoh, Pakai van Pathenin hiche gam hikason kachilhahte peh dia kihahsel’a aseisa ahi. Aman Vantil nalamkaisah intin, kachapa ji ding naholdohsah tei tei ding ahi.

8 Nu-ngah chu hung ding adahel leh, Pakai  thutep’a  kona ongthol ding nahitai.Itih itijongle kachapa vang hiche gama khu nelepui kit louhel ding ahi,” ati.

9 Apu Abraham khel kah atuh-in, Abraham khel kah atuh-in, Abraham sei jouse bol din lhachapa akiteptai.

10 Apu Sangongsao som akigot’in, Abraham gouching  lhachapan, Mesopotamia niso lam, Nahor chenna khopi ajontai.

11 Nilhangkai, numei twithal phat dontah-in lhachapa agalhungin,khopi pam, twikhuh phunga sangongsao ho akolsah-e.

12 Lhachapa ataovin, “Pakai kapu Abraham Pathen, kapu henga kakitepna nit’in lang tunin neilo lhinsah tan.

13 Khosung nu-ngah ho twithalna mun twikhuh a ka-um,e.

14 Nu-ngah khatpen pen jah a,’Natwibel hinloi kunin twi neidonsah-in,’ ting ting;’Don-o, nasangongsao ho ding jong twi gadom nange,’ tipen pen chu nalhacha Isaac ji dia  nalhensa hijeng hen. Hitia  nabol leh kapu koma nakitepna nanit kahetdoh ding ahi,” ati.

15 Lhachapa tao jou masangin alengkouvah twibel khat ahinpun Rebecca ahungtai. Rebecca hi Abraham sopipa Nahor chapa Bethuel le ajinu Milcah chanu ahi.

16 Rebecca hi nu-ngah donglai, melhoi tah, pasalto kitimat loulai hel ahi. Twikhuh a akumlhan, twibel dimin twi agathal’in ahung kaldoh-e.

17 Lhachapan agalamton ajaha, “Natwibel’a twi chuneihin donsah tem-o!” ati.

18 Rebeccan alengkouva twibel chu aloikun loiyin, “Don-o hepu,”atin, adonchim kah-in atuhpeh-e.

19 Adon chim phat’in rebeccan, “Nasangongsao ho ding jong gadoppeh ing ting aduchanin don nauvinte,” ati.

20 Gancha ho twi asung lha loiyin, lhachapa sangongsao jousen adon chimsoh kahsen twi athal be be jenge.

21 Pakaiyin alolhinsah mong ahiding tahsanin lhachapan Rebecca um chan chu ave vejenge.

22 Sangongsao ten twi adon jou phat’in lhachapan sanakol shekel keh gih alan Rebecca nahhoma akhaiyin, shekel som gih sanakol  ni jong alan akhut’a abupeh tai.

23 Lhachapan, “Kanao, koi cha nahim? Na-in’uva keiho kageh thei diuvem?” tin adong’e.

24  Rebeccan, “Kapakhu kapu Nahor le kapi Milcah cha Bethuel ahi,” atin;

25 “Gancha neh thei dang le changpol tampi kaneiyun, gena thei jong mun tampi kanei nauve,” tin jong aseiye.

26 Hichun lhachapa aboh khup’in Pakai athangvah-in,

27 “Kapu henga akitepna kitah tah a nit jing kapu Abraham Pakai Pathen chuchoi-at’in um hen! Pakaiyin kapu inkote henga jengkeiyin eilhunttai,” ati.

28 Rebecca alhaijel’in athilsoh hi abonchan anu insung mite henga agaseitai.

29 Hichun Abraham lhachapa umna twikul phung geiyin Rebecca sopipa Laban alhaipeh-e.

30 Anaonu nahhoma kikhai sanakol le abanjangte nia kibut sanakol amua, lhachapa toh akihouna thudol aseipeh phat’a Laban che-ah ahin, hiche gei chun Abraham lhachapa chusangongsao te toh twikul phunga anading nalaiyui.

31 Labanin lhachapa koma, “Pakaiyin Phatthei naboh tai, hung jengin; i-bol’a polama ding den nahim? Ka-ina nalhun na ding jong gonsa ahitan, nasangongsaote ge-na ding geiya boltohsa ahitai,” ati.

32 Abraham lhachapa insunga alut nungin Labanin apoh chengse asolhan, sangongsaote chu gancha an le changpol apei. Abraham lhachapa le aloite keng sopna din  Labanin twi ahin dom’e.

33 Bu ahindop phat’un Abraham lhachapan, “Kahung lo thu kasei masangsen anneh twidon bol ponge,” atitai. Labanin, “Gah sei jeng-o!” ati.

34 Lhachapan, “Keima Abraham lhachapa kahi,” tin asei panin;

35 “Pakaiyin kapu chu phathei aboh-in, ahaosah lheh tai. Kelngoi hon tampi le kelchate, bong hon tamtah le dangka, sana, soh numei le pasal, sangongsaote leh saangan ho alamdohsah tai.

36 Ateh nungin kapi Sarah-in kapu chu chapa khat ahinpeh-in, kapun anei jouse achapa apetai.

37 Athu kanitna tei din kapun eikitepsah-in,’Kachapa ji dia Canaan gam mi nahin puipeh louhel ding ahi.

38 Hisang chun kappa inkote, kasopi ho lah a aji ding nagapui ding ahi,’ ati.

39 Ken jong  kapu henga,’Ijemtin numei chu hiche gama hung ding data leh,’ tin kadonge.

40 Aman,’A-itih a athu kanit jing Pakaiyin A-Vantil napuisah-in tin nalolhinsah tei ding ahi. Kapa inkote, kasopite laha kachapa ji ding mudoh tei nan nate.

41 Akihahselsa nahitan, nachea ka-inkoten numei napeh dau leh, nakihahselnaa kona ongthol nahitai,’ eiti.

42 “Tunia twikul kahung lhun chun kataovin,’Kapu Abraham Pakai Pathenn, katohnaa neilo lhinsah-in.

43 Twikul’a hin ka-umin, twithal dia nu-ngah ahung teng, atwibwl’a twi don din thum ing ting;

44 twi eidondah nom’a, kasangongsaote jong twi donsah nom pen pen chu kapu chapa ji dia nalhensa hijeng hen,’ kati.

45 Kitao jou loulai, alengkouva twibel pun Rebecca ahung paiyin, twikul sunga twithal din akum lhai.

Kenjong,’Twi neidonsah tem-o!’ katileh;

46 aman gangtah-in alenga aput twibel ahin loikunin,’Don-o, nasangongsaote jong ken twi penange,’ ati.

47’Koi cha nahim kanao?’ katileh; aman,’Kapa chu kapu Nahor le kapi Milcah cha Bethuel ahi,’ ati. Chuphat’in anahhoma sanakol kakhaipeh-in, abanjangte nia sanachao kabupeh tai.

48 Chuin kaboh khup’in Pakai kathangvah-e. Kapu inkote heng jangkeiya eipuilut’a, kapu chapa dia ji eimusah, kapu Abrham Pakai Pathen chu kavahchoitai.

49 Tua hi kapu dia phatnaa nakindol chu suh bulhingpeh ding nagot nah le neiseipeh-in; nagot lou jongle neiseipeh-in, keima jong kicheh-in um inge,” ati.

50 Laban le Bethuel’in adonbut lhonin, “Athudan hi Pakaiya hung kon ahitan, keini sei ding aumchompoi.

51 Pakai amatah-in aseisa bangin Rebecca hi napu chapa ji din kipuitan,” ati lhon’e.

52 Hiche hi ajah paht’in Abraham lhachapa akunin Pakai athangvah tai.

53 Lhachapan ponsil le kijepna ding sana le dangka manlu tah tah aladoh-in, Rebecca apetai. Rebecca sopipa le anu jong kijepna thil manlu tah tah apei.

54 Hiche jan chun Abraham lhachapa le aloiten an aneuvin lengpi twi adon’uvin, chukoma ageh khovah tauve. Ajingtho thouvin lhachapa, “Kapu henga kilekit tange,” ati.

55 Ahin Rebecca sopipa le anun, “Hapta khat ham, nisom bep hamboinu hi umpiu ving ting, chujong teng che nante,” ati lhone.

56 Lhachapan, “Neilho lhoda tauvin, kahunglo na pen bon Pakaiyin lolhinsah taa, kapu henga kile kit loi tange,” ati.

57 Amanin, “Ipi aseiyem, boinu dong temu hite,” ati lhone.

58 Hijeh chun Rebecca akoudoh-un, “Hichepa hitoh nikilhon ding hitam?” ati lhon leh, aman, “Henge,”tin anomtai.

59 Chuphat’in amahon Rebecca chu alhachanu toh, Abraham lhachapa  le aloite toh asolthatauve.

60 Amahon Rebecca phatthei aboh-un”Kasopinuu hin, Mihem sangsom sangja hing hen! Nachilhah ten, Amelmateu khopi jouse lonvuh hen!” atiuve.

61 Hichun Rebecca le alhachanu sangongsaova atoudoh lhonin, Abraham lhachapa to kilhonin, akipatdoh tauve.

62 Isaac chun, “Ahing jing, eimu jing pa Twikul,” gamthip lai, lhanglam Canaan gama ahungin anachenge.

63 Nilhah matah-in Isaac apotdoh-in tollhanga gavale leh, sangongsaote hung kijot amui.

64 Isaac amu phat’in sangongsao chunga konin Rebecca akum lhan,

65 Abraham lhachapa jah a, “Tollhanga eiho lam hinjon khu koiham?” tin adonge. Lhachapan, “Kapu chu ahi,” atipeh-e. Rebeccan pon lukhuh akilah-in amai akikhutai.

66 Athilbol abonchan lhachapan Isaac henga aseiye.

67 Isaac-in Rebecca chu anu Sarah chenna ponbuh sunga apuilut’in jin aneitai. Isaac-in Rebecca angailun lung ngapna anei phat’in anu thi asumil theitai.

Genesis Bung 25

Abraham chilhah dang ho

1 Abrahamin ji khat aneiben, amin Keturrah ahi.

2 Keturah hin Zimran, Jokshan, Medan, Midian, Ishbak chule Shuah ahinpeh-e.

3 Jokshan hin Sheba le Dedan ahingin, Dedan chilhah ho chu Asshurim, Letushim chule leummim mite ahiuve.

4 Midian chapate chu Ephah, Epher, Hanoch, Abidia chule Eldaa ahiuve. Hichengse hi Keturah chilhah jeng ahiuve.

4 Midian chapate chu Ephah, Epher, Hanoch, Abida chule Eldaa ahiuve. Hichengse hi Ketueah chilhah jeng ahiuve.

5 Abrahamin anei agou abonchan Isaac apen,

6 ahinpet’in ajidang chapate jong nei ahoppehso keiyin, achapa Isaac a konin aki-inchonsah cheh-in, solam gama asoltai.

Abraham thi, avuiyu

7 Abraham hinkho kum jakhat le som sagi le nga ahin,

8 ateh kembet geiyin ahingin, athin apu apate heng ajontai.

9 Achapate ni Isaac le Ishmael in masanga Hit mi Zohar chapa Ephron loumun, Mamre niso lam, Machpelah songkoa chun Abraham avui lhontai.

10 Hiche loumun hi Hit mipaa kona Abrahamin anachoh ahin, Abraham le ajinu Sarah hikoma songkoa chun avuikhomtauve.

11Abraham thi nungin, “Ahing jing, eimu jing Pa twikul” koma cheng Abraham chapa Isaac chu Pathenin Phatthei aboh tai.

Ishmel chilhah ho

12 Sarah sohnu, Egypt mi Hagarin Abraham ahinpeh Ishmael chapate chu

13 apen dungjuiyuva kisim ahin, Nebaiboh, Kedar, Adheel, Mibsam,

14 Mishma, Dumah, Massa,

15 Hadad, Tema, Jetur, Naphish chule kedemah ahiuve.

16 Amaho hi Ishmael chapate, phung som le ni konna ahiuve, akho mun ule a-ngah mun cheh-e.

17Kum jakhat le somthum to sagi lhin kumin Ishmael athitai.

18 Ishmael chilhah chengse Assyria lampi, Egypt niso lam, Havilah le Shur kikah gamsunga achenguve. Amaho cheng hi Abraham chilhah dang ho to achengkhom pouve.

Esau le Jacob pen

19 Abraham chapa Isaac khanggui thusim hi hiti ahi:

20 Mesopotamia gama Aramea mi Bethuel chanu, Laban sopi Rebecca akichenpi chun Isaac kum som li alhingtai.

21 Rebeccan cha ahinlou phat’in Isaac-in Pakai henga ataopeh le, Pakaiyin ataona asangin, Rebeccan nao avoptai.

22 Rebeccan naokop avop’in, naote ni chu naobu sunga akinehtoji lhon leh, Rebeccan, “He kaden, hichepi hi iti kadou dou ding ham!” atin, Pakai dongtoh din achetai.

23 Pakaiyin Rebecca jah a, “Nasunga nampi ni akijil’in, Kidouto dia vaipi ni nahin ding; Khat sanga khatjoh hatjoa, A-upan anaopa kin abol ding ahi,” ati.

24 Rebecca navah phat alhingin, anavah le chapa ni ahingkop’e.

25 Apeng lha masapa chu asanin, atahsa samulpon bangin amul’in, hijeh chun amin Esau asah-uve.

26 Aban a pan Esau khotaljum atuh chah kheh jeh-in, amin Jacob asah-ui.  Esau le Jacob pen hin Isaac kum somgup alhingtai.

Esauvin a-upat akijoh

27 Chapangte ni ahung khangdoh lhonin, Esau sadel them, gamvah hat ahin, Jacob chu mimong le in um mi ahung hi.

28 Esau sathasa aneh jing jeh-in Isaac-in Esau adeijon, Rebeccan Jacob adei joi.

29 Nikhat Jacob’in bechim anahon pet’in, agam lennaa konin Esau gilkel tah-in ahung lhungin,

30 Jacob jah a, “Kakel behseh-e, na-anchim hon sanlet lut chu neihopsah temin,” ati. Hijeh a chu Esau hi Edom kisah ahi.

31 Jacob’in, “Na-upat chu neipeh ding le hopsah nange,” ati.

32 Esauvin, “Akellih pai ding kihita, hiche upat chu iding kati nah lai ding ham?” atitai.

33 Jacob’in, “Kihahsel masa tadin,” atileh; Esau akihahsel’in a-upat chu Jacob apetai.

34 Hichun Jacob’in changlhah them khat le bechim hon minsa chu Esau apen, aman aneh jou adon jou phat’in akipatdoh-in achetai. Hiti hin Esauvin a-upat chu imacha loutheh-in anageldauve.

 

Semtilbu Bung 26

Gerar a Isaac chen

1 Abraham nikho laiya kellhah masa tobang khat chu gamsunga kel ahung lha kit’e. Hijeh chun Gerar a Philistine lengpa Abimelech henga Isaac achetai.

2 Isaac henga Pakai ahung kilah-in, “Nachenna dia kaseisa hiche gamsunga hin chengin lang, Egypt langa chedan.

3 Hikoma chengin, naumping ting phatthei kaboh ding, napa Abraham henga kakitepna molsona dinga hiche gam pumpi hi nangle nachilhahte kapeh ding ahi.

4 Nason nachilhahte van a ahsite jat kaphahsah ding, hiche gam pumpi hi kapeh ding ahi. Chuteng nachilhahte phatthei kaboh banga chitin namtin phatthei kaboh dia a-ngeh diu ahi.

5 Abrahamin Kadanthu jouse le kathupeh chengse anit jeh a nang phatthei kaboh ding nahi,” ati.

6 Hijeh chun Isaac Gerar a achengtai.

7 Gerar a mihon ajinu thudol adoh-ule, asopinun bou aseiye. Rebecca chu melhoi tah ahijeh-in, ama jal’a athalo diu kichatnan Isacc-in ama chu ajin asei ngampoi.

8 Gerar a Isaac chom khatpi achen nungin, Abimelech lengpan bangkot’a kona agahvet leh Isaac le Rebecca akinupa bol lhon amudoh tai.

9 Hijeh chun Abimelech-in mi asol’in Isaac agakousah-in, “Najinu khula ahinan, i-bol’a nasopinu a nasei ham?” tia adoh leh; Isaac-in, “Kajinu ahi seidoh leng amajeh a eikithalo ding ham, tia kicha kahi,” ati.

10 Abimelech-in, “I-neilou ham? Kapasal ho’u khat’in najinu chu analuppi taleh, ilou them’a themmo neichan jeng ding chula ahin!” ati.

11 Chuphat’in Abimelech chun, “Ajinu deichat man’a hichepa hinbolse pen pen chu thadoh ding ahi,” tin miho agihsalsoh keiye.

12 Hich kum chun chuche gamsunga Isaac-in muchi atuleh, Pakaiyin phatthei aboh jeh-in, ajat jan aki-at’e.

13 Isaac ahaobe cheh cheh jengin, mi haosa tah ahitai.

14 Kelngoi hon tampi le bong hon  tamtah, soh tampi aneiphat’in philistine miten athangset peh tauve.

15 Hijeh chun Abraham hinlaiya apa Abraham sohte laisa twikul jouse chu philistine miten avuh dimpeh gam tauve.

16 Hichun Abimelech-in Isaac jah a, “Keiho sangin natha lhingjotai, kaom’uva konin chedoh tan,” ati.

17 Hijeh chun Isaac akipatdoh-in achen, Gerar phaiya ngahmun asemin, hikoma chun chom khat achenge.

18 Hikoma hin Abrahamin ahinlaiya alaisa, athinunga Phalistine ten adip kit’u, twikul ho chu Isaac-in alaikit’in, apan aminvona min ho aminvo kit’e.

19 Phaichama chun Isaac sohten twikul khat alaiyule twi alaidoh tauve.

20 Ahin Gerar a kelngoi chinghon, “Hiche twi ho keihoa ahibouve,” tin Isaac kelngoi chongho akinahpi tauve. Hijeh chun twikul min chu “Kinahna” tin Isaac-in aminvoi.

21 Isaac sohten twikul khat alaikit’uleh, hichejeh jong chun kibaona asoh kit’in, hijeh chun,  “Kidouna” tin aminvoi.

22 Hichea kon chun Isaac achebe kit’in twikul khat alaikit’e. Hiche twikul chunga vang kibaona asohdoh tapon, hijeh chun, “Chamlhat” tin aminvotai. Isaac-in, “Tunvang Pakaiyin hiche gamsunga chamlhat din eikoitauve, hikoma vang haodoh tau hite,” ati.

23 Isaac-in Beersheba ajontoutai.

24 Hiche jan chun ahenga Pakai ahung kilah-in, “Keima napa Abraham Pathen chu kahi. Kaumpi jingnai, kicha hih-in. Kalhacha Abraham koma kakitepna jeh a nangma phathei kaboh a chilhah tampi kaneisah ding nahi,” ati.

25 Hikoma chun Isaac-in maicham khat asemin, Pakaiya ataove. Hechelaiya hin ngahmun asemin, asohten twikul khat alaiyuve.

Isaac le Abimelech kinopto

26 Athumop a pang Ahuzzath le asepai lamkai Phicol toh Gerar a konin Abimelech chu Isaac henga ahunge.

27 Hichun Isaac-in,  “Masanga chubanga neivet dauva, nagamsunga kona neideldoh tauvah, tua i-bol dia kahenga hung nahiuvam?” anati.

28 Amahon, “Pakaiyin nakivoppi hi kichentah-in kamutauvin, ikah-uva lung thengsel’a kinoptona nei ding kadeiyui. Keihon kasuhset lou banguva

29 neisuhset louna diuva nakitep ding pha kasauve. Kakhoto jeh-uva lung mongtah a kasoldoh-u ahi. Hijeh a chu Pakaiyin jong Phathei naboh ahiye,” ahung tiuve.

30 Isaac-in golvah abolpeh-in, ava van aneuvin,achim chimin adontauve. 31 Jingkah matah-in athouvun, khat le khat kitoh tah-in akitep’un, akitepnau mohor anamkhumtauve. Isaac-in amaho chu agathah doh-in, amahon jong jolle gol’in adalhatauve.

32 Hiche nikho hin asohten Isaac jah a atwikul lai thuu ahung seiyun, “Keihon twi kalaidoh tauve,” atiuve.

33 Hijehchun Isaac-in twikul min chu “Kitepna” asah-e. Hichea kona hi Beersheba khopi kiminvo ahi.

Esauvin gamchom mi akichenpi

34 Kum som li alhinin Esauvin Hit nu-ngah ni, Beeri chanu Judith le Elon chanu Basemath chu akichenpi.

35 Amani hin Isaac le Rebecca abol genthei lheh jeng lhone’e.

Genesis Bung 27

Isaac-in Jacob phatthei aboh

1 Isaac atehset’a amit athim phat’in,achapa lenjo Esau jah a, “Kachapa!” ati leh, Esauvin, “Hoi,” ati.

2 Isaac-in, “Neivetan, kateh behseh tan, itih ni pen’a kathi ding kahepoi.

3 Nathalpi le nathalchang ho kigot’in, gam galengin sa neigathapeh tan.

4 Kadei bangtah-in tuisel’in hin honin lang hindomin. Kaneh jou teng,kathi masangin phatthei chaina napeng’e,” ati.

5 Esau koma Isaac thusei hi  Rebeccan angai lhi. Hijeh chun Esau gamlenga achedoh phat’in,

6 Rebeecan Jacob kama, “Tutah chun napan Esau koma asei thu kajan,

7’Sa neigakap peh-in, hin honin. Kaneh jou teng, kathi masangin Pakai angsunga phatthei boh inge,’ tin aseiye.

8 Hijeh chun phaten ngaiyin, kasei sei bol’in kanao.

9 Chen lang kel-honlh a kelnou thao cheh ni gakaiyin, that hitin, napan adu bang tah-in honpeh inge.

10 Chuteng nangin napa neh din doppeh-in natin, athi masanga phatthei naboh ding ahi,” ati.

11 Jacob’in anu Rebecca jah a, “Ven, ka-u Esau chu mi timul ahin, keima mul-bei kahi.

12 Ijemtin kapan eihinjul hen hedoh taleh, ama daithang kabah ding, phatthei eiboh malah eigaosap lo bep ding ahibouve,” ati.

13 Anu Rebeccan, “Nang kiagaosapna ding chengse chu kei chunga chujeng hen, kacha; kasei bang bangin bol jengin, chen kelnou te ni chu neigakaipeh loiyin,” ati.

14 Hijeh chun Jacob achen kelnou te ni chu anu henga ahin kailut’in, aman kelsa chu Jacob pa dubangtah-in ahonpeh tai.

15 Hichun Rebeccan in’a akoi Esau ponsil phapen ho alan Jacob asilpeh-in,

16 kelnou te ni mul chu abanjang te ni le angong mul-bei laiya chun atompeh tai..

17 Chuin asame hon tuitah le changlhah asemsa chu Jacob achoisah-e.

18 Jacob achen apa jah a, “Hepa!”agati. Apan, “Hoi kanao, kachapa te ni kah a hoijoh chu nahim?” tin adonge.

19 Jacob’in, “Nachapa lenjo Esau chu kahi; neihil bangin kabolsoh tai. Vang neiboh theina din touvin lang same them khat kahinchoipeh hi nen,” ati.

20 Isaac-in, “He katei, man gangtah-in sa nahinpolut jengin ne kachapa!” ati. Jacob’in, “Pakai na-Pathenin eipanpijeh ahiye,” ati.

21 Isaac-in Jacob jah a, “Esau nahimong nah em, najul tem inge, hung nailut  temin,” ati.

22 Jacob akikhinlut phat’in apan ajul’in, “Na-ogin la Jacob ogin ahin, nabanjangte ni la Esau banjang tobang ahinan,” ati.

23 Abanjang te ni mul’a akisemjeh-in Isaac-in Jacob chu ahedoh theipoi. Phatthei aboh ding konchan jong,

24 “Esau nahimong nah em?” tin adong kit leuve. Aman, “Kahinai,” atipeh-e.

25 Isaac-in, “Sa them khat neihin choipeh-in. Neng ting, kaneh  jou teng phatthei naboh inge,” ati. Jacob’in sa ahin choipeh-in, lengpitwi phabep jong ahindoppeh-e.

26 Hichun apan ajah a, “Hung naiyin lang neichop temin kachapa,” ati.

27 Apa chop dia ahung phat’in, Isaac-in apon nam anah-in phatthei aboh-in, “Kachapa gimnamtui chu Pakai Phatthei boh gamlah gimvui anam’e.

28Pathenin van a kon in gotwi pejingin lang,naloulai leichang leipha hisah jeng hen! Changle mim chule lengpitwi ning lhingin nape hen!

29 Chutin namtin nasoh-in pang hen, mitin mitang na-anga kun cheh hen! Naheng nakom na-insung mite chunga vaihomin lang, nasopite chengse na-angsunga kun cheh-u hen! Nangma gaosapte chu gaosap chang hen lang, phatthei naboh mite phatthei change hen!” ati.

Esaun Isaac phatthei boh a-ngeh

30 Isaac-in Jacob phatthei aboh jouva, Jacob apotdoh doh le asopipa Esau sadelna konin ahung lhung paitai.

31 Esauvin jong sa tuitah-in ahonin apa henga adoppeh-e. Aman, “Hepa, phatthei neibohna din touvin lang sa kahindoppeh hi nen,” ati.

32 Isaac-in, “Koi nahim?” atileh; aman, “Nachapa lenjo Esau kahi chume,” ati.

33 Hichun Isaac akithingjah-in, akithot set sut jengin, “Ahile sa hinthat’a eihindoppeh chu koiba ham? Nahung masangjep chun ken kane jouvin, phatthei boh chaina kapen, a-itih a ama changden ding ahitai,” ati.

34 Esauvin apa thuseiho ajah phat’in othongje jun akap jeh-in,”Hepa, napahttheina chu keijong neipe-o!” ati.

35 Isaac-in, “Nasopipan eihung lhep lhah a, nang chan ding phattheina a kilahdoh ahitai,” ati.

36 Esauvin, “Hichejeh a hi amin Jacob kisah hiteiyinte ong? Ajeh chu niveijen eilhem lhan, ka-upat einalahpeh-in, tun kachan ding phatthei boh akiguh kit’e. Hepa, kei ding phattheina nakhenlou hitam?” ati.

37 Isaac-in, “Nachunga apipun kasemin, a-insung mi aphunggol ho jong asoh-in kasemtai. Changle mim kapen, lengpitwi jong kapetai. Tua nang ding kabol thei imacha aumtapoi chapa!” ati.

38 Esau apa henga atao tao jengin, “Phattheina khat cha beh jong nakhen lou ham, hiche chun phatthei neiboh-in heap!” atin akaptai.

39 Chuphat’in Isaac-in ajah a, “Nang din van daitwi jong hung phin pontin, Leiphalai loumun jong naneilou ding;

40 Chemhem hat’a nakivah a, Nasopipaa kona nakitoldoh ding ahi,” ati.

41 Achan ding phattheina apan Jacob apehdoh jeh-in Esaun Jacob ahotbol tai. Esaun, “Kapa thia pul douna ding naitan, chujou teng Jacob katha ding ahi,” ati.

42 Esau thilgon ahetdoh phat’in Rebeccan mi asol’in Jacob akousah-in, “Nasopipa Esauvin nang hi matdoh a thatei tei din agoi.

43 Tun kanao kasei sei bol’in. Haran a kasopipa Laban henga chejengin,

44 ama koma chom khat gapemin, nasopipa lungdam kahsen ga-umtan;

45 ama nabolna asuhmil kah-in hung umtan. Iti nikhat sunga nani lhontah a kalhasoh lhon ding ham, keiman napui ding mi hinsol nange,” ati.

Isaac-n Laban henga Jacob asol

46 Rebeccan Isaac jah a, “Keiman Esau jinu Hit mi khu kachim chah behseh jengtai. Jacob’in jong Hit mi nungah ho khat hin kichenpi jeng taleh kathilo tahbah ding ahi,” ati.

Genesis 28

1 Isaac-in Jacob akouvin, phatthei aboh jouvin ajah a, “Canaan mi numei hin kichenpi hih beh-in.

2 Hisanga chun Mesopotamina gama napu Laban insung mite henga chen lang, anu-ngah ho’u khat gakichenpitan, napu Laban chanu ho khat khu.

3 Naji neina din Hat chungnung Pathenin phatthei boh hen, chitin namtin penna  pa nahina din cha le nao tampi napehen!

4 Abraham phatthei aboh bangin Pathen in Phatthei naboh hen, Abraham  a pehsa nachen pha gamsung hi Pathenin nalosah hen!” ati.

5 Mesopotamia gama Jacob le Esau nu Rebecca sopipa, Bethuel chapa, Aramea mi, Laban henga Isaac-in Jacob asoltai.

Esaun ji khat akipuibe

6 Isaac-in Jacob phatthei aboh a Mesopotamia gama ji kihol dia asol, Canaan numei akichenpi louhel dia ahilchahna thudol Esauvin ahetai.

7 Anu le apa thusah a Mesopotamia gama Jacob che jong chu Esauvin ahe-lhitai.

8 Apa Isaac-in Canaan numei adeimo ahet phat’in

9 Esau achen Abraham chapa Ishmael chanu, Nebaioth sopinu, Mahalath chu akichenpitai.

Bethel a Jacob mang

10 Jacob’in Beersheba dalhan Haran ajontai.

11 Gamkim lai khat’a nisan alhum khumin, ageh dentai.Janin songtum khat akikhap’in a-ihmui.

12 Amangin leiset’a kona van geiya kidolut kalbilei khat amun, leiya chun Vantilte akumsuh akaltou akijot mat jingui.

13 Leichungvuma Pakai adingin, “Keima Pakai, Abraham le Isaac Pathen kahin, naluppha gamsung hi nangle nachilhahte kapeh ding ahi.

14 Nachilhah leivui jat hung phauva, so le lhum, sah le lhang alosoh diu, nangle nachilhahte jal’a chitin namtin phatthei kaboh ding ahi.

15 Ven, nachena chan a lhon ping ting, kahuh jing ding, hiche gamsunga kahin jing ding, hiche gamsunga kahin puilut kit ding nahi. Kateppeh chengse kabolsoh masangin nadalha ponge,” ati.

16A-ihmut khah lon Jacob’in, “Hikoma hila Pakai umah ahin, kana hehih beh-in’e!”ati.

17 Jacob akicha behseh jengin, “Hiche mun hi agimnei lheh-e, Pathen inmun, van gam kelkot phung hitei ding ahi,” ati.

18 Jacob jingpitah-in athouvin, alukhap songtum chu alan, melchih nan aphutdoh-in, thenso nan alive thao asun khum’e.

19 Amun min chu bethel asahtai. (akho mun hi masangin Luz akiti.)

20 Jacob’in kigahnan, “Kakholjin na chan a neilhonpia, neihuh jinga, neh le chah, sil le chen neipeh a,

21 damsel’a kappa insung neihin lhut kit leh, Pakai nang hi ka-Pathen nahi ding ahi.

22 Chule hiche melchihna song katun na mun a hi nangma kahouva, neithilpeh chengse hopsom a khat kapeh ding ahi,” ati.

Genesis Bung 29

 Laban in’a Jacob lhun

1 Jacob ache kit leh, solam mite gamsung aphatai.

2 Tolhang laiya twikul phung khat atoh khan, twikul vel’a chun kelngoi hon thum anakol’e. Hiche twikul a hi kelngoite twi achipsah jiu ahin, twikul kotsin song chu alen lheh-e.

3 Twikul phunga kelngoite akikhopsoh teng, kelngoi ching hon twikul kotsin song chu atahdoh-uva kelngoite twi achipsah jiu, achipjou teng anung sin kit’u ahi.

4 Jacob’in kelngoi ching ho jah a, “Koi kho nahiuvam sopite?” atileh; amahon, “Haran kho kahiuve,” tin aseiyui.

5 “Nahor chapa Laban chu nahet’um?” atileh; “Kahenauve,” tin adonbut’ui.

6 Jacob’in, “Labon chu dam nam?” atileh; “Adam nai, gahve le chun, khukoma kelngoi hinhoiya khu achanu Rachel ahi,” atiuve.

7 Jacob’in, “Nisa la sang nalaiya, kelngoi hoilut phat bon hilou lai, kelngoi honte chu twi nachipsah-uva hamhing lah a nalehoi kit jenguva iti am?” ati.

8 Amahon, “Keilngoi hon ahung lhunsoh a, twikul kotsin song akitahdoh teng akichipsah loule, tun hithei ponte,” atiuve.

9Kelngoi ching ho toh akihou chai kah-in, Rachel’in kelngoi hon ahin hoiluttan,

10 Jacob’in apu Laban kelngoite  leh Rachel amu phat’in twikulsin song atangdoh-in, kelngoite chu twi achipsah tai.

11Akipah behseh-in Jacob’in Rachel achop’in othong leuvin akap’in,

12 ajah a, “Keima napa sopinu Rebecca chapa kahi,” ati. Rachel chu apa seipeh din alhaijel tai.

13 Labanin atupa Jacob hung ajahdoh phat’in alamdot din alhaijel’in, akoiyin achop’in, in lama ahinpuitai. Jacob’in thilsoh jouse apu Laban aseipeh-in,

14 Labanin jong, “Nang hila kaphe kavou mong mong nahibouvin,” ati.Jacob chu lha lhingset aumdentai.

Laban koma Jacob-in Rachel le Leah alo

15 Labanin Jacob jah a, “Katupa himan a mohseh a na neitoh peh ding aphapoi, tohman ijat kapeh ding ham?” tin adonge.

16 Labanin chanu ni aneiyin, au-nu leah ahin, anaonu Rachel ahi.

17 Leah chu amit leo thimin, Rachel amelput akitoh-in ahoi lheh-e.

18 Jacob’in Rachel adeichat jeh-in, “Rachel to neikichensah ding le kum sagi na tohpeh inge,” ati.

19 Labanin, “Rachel midang kapeh sanga nang kapeh ding chu aphajo bouve, kakoma chengtan,” ati.

20 Rachel to akichen theina din Jacob’in kum sagi na atongin, adei behseh jeh-in aphat chu chomchan bou agel’e.

21 Aphat lhinin Jacob’in Laban henga, “Aphat alhingtai, nachanu kichenpi tange,” ati.

22 Labanin moulhah golvah abol’in miho akou cheh-e.

23 Ahin jan chun Rachel khel’in Leah joh Jacob henga agathah peh-e. Jacob-in ama chu akitimatpitai.

24 Labanin asoh nu-ngah Zilpah chu achanu Leah lhacha din asolpeh-e.

25 Jingkah khovah phat’in Jacob’in avetle Leah joh ahin, hijeh chun Laban henga achen, “Idia hita neibol ham? Rachel lo naa na kitonga, I-bol’a neilhep ham?” ati.

26 Labanin, “A-unu sanga anaonu jineisah masah chu hiche gam chon ngai ahipoi.

27 Moulop golvah hapta kichai ngah-in lang, kum sagi ma kana natoh kit dingle Rachel jong penange,” ati.

28 Jacob anomin, moulop golvah hapta kichaiyin, Labanin achanu Rachel jong chu Jacob ji din apetai.

29 Labanin asoh nu-ngah Bilhah chu achanu Rachel lhacha din asolpeh-e.

30 Jacob’in Rachel akitimat pin, Leah sangin adeijoi. Laban din kum sagi na atohpeh kit’e.

Jacob chate

31 Jacob’in Leah sanga Rachel adeijoh Pakaiyin amudoh phat’in Leah chu cha le nao ahinsah nan, Rachel achinsah tai.

32 Leah agaiyin chapa khat ahinge. Leah-in, “Pakaiyin kagimna amun, tun vang kajipan eilungset tante,” atin, achapa min jong Reuben asah-e.

33 Leah agai kit’in chapa khat ahinphat’in, “Kajipan eilungset chomlou ahetjeh a Pakaiyin hiche chapa jog eipeh kit ahi,” atin amin Simeon asah-e.

34 Leah agai pai kit’in chapa khat ahinkit phat’in, “Chapa thum jen kihinpeh ta, kajipan eilhakang taponte,” tin amin Levi asah-e.

35 Leah agaiyin chapa khat ahinkit chun, “Tuchunga vang pakai kathangvah ding ahi,” tin amin Judah asah-in ahi. Chujouvin Leah-in cha abangtai.

Genesis Bung 30

1 Jacob cha ahinpeh lou phat’in Rachel chu a-unu chunga athangsen, Jacob jah a, “Cha neihinsah-in, achutiloule thi jeng inge,” ati.

2 Rachel chunga Jacob alung hangjah-in, “Pathen tohl  tongtheiya neigel ham? Cha neilouva nakoiya Pathen hichu me!” atitai.

3 Rachel’in, “Kasoh nu-ngah Bilhah hi luppin, aman cha eineipeh thei nante. Kasohnu jal’a minu kahithei ding ahi,” ati.

4 Hiti hin Bilhah chu ajipa henga asol lut’in, aman akitimatpitai.

5 Bilhah agaiyin Jacob chu chapa khat ahinpeh tai.

6 Rachel’in, “Pathenin asanjeh-in chapa khat eipei,”tin amin Dan asah-e.

7 Bilhah agai kit’in Jacob din chap khat jong ahinpeh kittai.

8 Rachel’in, “Kaunu ti kakibonin kajoutai,” tin amin Naphtali asah-e.

9 Achaban akihet phat’in Leah-in asohnu-ngah Zilpah chu Jacob jin aneisah-e.

10 Zilpah-in Jacob chu  chapa khat ahinpeh-in ahi.

11 Leah-in “Kahamphai,” tin achapa min Gad asah-e.

12 Zilpah-in Jacob chu chapa khat ahinpeh kit’in,

13 Leah-in, “Kanun nom”e, numei jousen nun nom nua eisei diu ahitai,” tin amin Asher asah-e.

14 Suhlou chang-at laiyin Reubenin loulaiya joldei-ai phabep ahinpon anu Leah apei. Rachel’in Leah jah a, “Nachapa joldei-ai poh chu them khat beh neipen,” tin athume.

15 Leah-in, “Kaji neilahpeh jong nakhop loulai ham? Kachapa joldei-ai poh geiya lahpeh  neigotpi chu?” ati.

16 Nilhah a Jacob hung vailhun chun Leah-in analamdot’in ajah a, “Kachapa joldei-aiya kachohsa nahi, tujan ilup khom ding ahi,” ati. Hijeh chun hiche jan hin Jacob’in Leah akitimatpi.

17 Pathenin Leah taona asangin, Leah agaiyin Jacob chu chapa nga lhinna ahinpeh-in,

18 “Kasohnu kajipa kapeh jeng jeh-in Pathenin katoh man eipei,”tin achapa min Issachar asah-e.

19 Leah agaikit’in Jacob chu achapa gup channa ahinpeh-in,

20 Chapa gupjen kahinpeh tan, tu vang kajipan eilungset teina din Pathenin thilpeh hoitah eipei,” ti amin Zebulun asah-e.

21 Khonungin chanu khat ahingin, amin Dinah asah-e.

22 Pathenin Rachel agelkhoh-in, ataona asangin, cha nei thei din asemtai.

23 Rachel’in agaiya chapa khat ahinphat’in, “Pathenin einun bolna asumangin chapa khat eipekit hen,” tin amin Joseph asah-in ahi.

Laban koma Jacob’in akan adel

25 Joseph pen nungin Jacob’in Laban henga, “Inlama chetange, neisol tan.

26 Tohhat’a kalodohsa kajite le kachate neipen chetange. Nakin phatah a kabol nehenai,” ati.

27 Labanin ajah a, “I-khat seiyinge: nang jeh a Pakaiyin phatthei eiboh hi phunin kasandoh tai.

28 Hijeh chun natohman ding jat seiyin napeng’e,” ati.

29 Jacob’in, “Itobanga na katoh peh a, kachinpeh kelngoite iti khantou ahi nahet chume.

30 Kahung masanga themcha nanei chule simsen louvin apungtan, kaki heina lam lama Pakaiyin phatthei naboh-e. Tua hi kenjong kading kagel phat ahitai,” ati.

31 Labanin, “Ipiba kapeh ding nahim?” tin adonge. Jacob’in, “Tohman imacha kadeipoi. Kasei nanop dingle nakelngoi honte chinpeh kit nange.

32 Tunin nakelngoi honte gakholsoh keiying ting, kelcha vom chengse le kelnou pol, ahapol deh ho galhengdoh ing ting, hicheng chu katohman hita hen.

33 Chutileh khonunga katohman kholtoh a nahung teng jongleh kakitah le kakitah lou nahetdoh thei ding ahi. Ahapol thimlou le apol lou, ahiloule kelngoi vom lou le kelcha kasei tobang ho chu kanei khah le kaguh ahi nahet jeng ding ahi,” ati.

34 Labanin, “Aphai, nasei bangin bo hite,” ati.

35 Ahin Labanin hiche nikho chun kelchal kengpol thim ho leh kelpi hapol thimle apol pheh phuh chengse, atichung kangpol poupou chule kelngoi vomse se ahoimangin, achapate achinsah-e.

36 Kelhon hijat chu apuiyin nithum lamjen’a Jacob adalhai.Laban kel-hon moh chengse chu Jacob’in aching’e.

37 Jacob’in hengthing toithah le jonmot toithah chule theiba toithah asat khomin, alai kanglai ho chu akhoh lha lhan, thing toithah kanglai jouse akhoh lhasoh keiyin,

38 ahoh akhokangsa thingtoi ho chu kelngoi honte twi chip dia ahung ji tengule amasanguva vakoma twi lonna a chun agol’in ahi. Kelngoite twi chip dia ahung tengu hikoma chu kijang metji ahijeh-un,

39 thingtoi thah ho kikoina laitah a chu akinagmatji tenguleh, akangpol le apolthim, hapola pol jong ahingdoh doh jiuve.

40 Jacob’in kelngoite chu kelchate lah a konin ahoidoh-in, Laban kelngoi hon lah a akangpol ho le avom ho lang ngan ahoidoh-e. Hiti hin ama kelngoi hon chengse chu Laban a to ahoikhenin akitum huitai.

41 Kelngoi thao chu akijangmat tengu amu theina diuvin, atwi chip nau vakoma chun Jacob’in thingtoiho a jampeh jin,

42 asapha louho kijangmat teng vangle thingtoiho agajampeh poi.Hiti hin Laban chu asaphamo chengse achang khan, Jacob asapha chengse achangtai.

43 Hichea kon hin Jacob ahaodoh tan, kelngoi hon tampi le soh tampi, sangongsao tampi le sangan tamtah avuldoh tai.

Genesis Bung 31

Laban henga Jacob jamdoh

1 “Jacob’in i-pau nei jouse akilah-in, anei anga aboncha i-pau nei le nga ahibouve,” tia Laban chapate thusei chu Jacob’in akijah tai.

2 Chule masanga alung lhaisel banga Laban lung lhai lou jong amutai.

3 Hichun Pakaiyin Jacob henga, “Napu napate gamsung, naheng nakom ho henga kile kit tan, keiman lhonpi nange,” ati.

4 Loujaova akelngoite umnaa kimupi din, Rachel le Leah kouvin Jcob’in mi asoltai.

5 Jacob’in aji te ni jah a, “Napa lhon hi masanga eilung lhai bangin kachunga alung lhai tapoi; hijongle kappa Isaac Pathenin eiumpi jing nai.

6 Katha hangsan a napa lhon na katoh nahe cheh lhone’e.

7 Ahinla aman eijoubol’in, katohman jong somvei jen akhel’e. Hijongle Pathenin kachunga khut alhahsah hih laiye.

8 Labanin, “Kelcha hapol chengse natohman hihen,’ atileh; kel-hon jousen kelnou hapol jeng ahingui.’Kelcha kangpol ho natohman hihen,’ atijongle, kel-hon jousen akangpol jeng ahing kit’-ui.

9 Pathenin napa lhon kel-honte atoldoh-in kei eipetai.

10″Gancha jangmat lai kamangin keljangmat’a kelchal ho chu akangpol ho le hapol’a pol, apolgel belbul jeng kamui.

11Kamag chun Pathena kon Vantil khat’in kajah a,’Jacob!’ eitin; kenjong,’Hoi!’ kati.

12 Aman,’Keljangmat’a pang kelchal ho akangpol ho le hapol’a pol, apolgel belbul kahisah hi, Labanin nabolsetna kahetsoh keijeh a hitia hi kabol mong ahi.

13 Melchihna song naphua, Olive thao nasun khuma nakitepna mun, Bethel a nahenga hung kilah Pathen chu keima kahi. Tun napenna gama kile kit din kigon,’ tin eiseipeh-e,” ati.

14 Rachel le Leah-in Jacob jah a, “Keini dia kappa gou lo ding imacha bon umta lou.

15 Aman la maljin bol’a eibol lhona; eikijoh lhona, Kaman lhon sumla tua kineh mangsoh ta.

16 Pathenin kappa nei ahintoldoh a eipeh-u hiche gou hi keini le kachate lhon ding ahitai.Pathenin naseipeh peh chu bol jengin,” atilhontai.

17 Jacob akipat’in achate le ajite sangongsao chunga atousah-in,

18 Mesopotamia gamsunga alamdoh agou chengse akigot’in, ahing thei gancha jouse ahoikhomsoh keiyin, Canaan gama, apa Isaac heng jon dingin aumtai.

19 Kelngoi mul vou dia Laban vaikondoh kah-in, Rachel’in apa doibom Teraphim chu  akiguhdoh tai.

20 Jacob’in Laban alhim lhah-in akichaodoh ding ahetsah poi.

21 Jacob’in anei jouse akichom khom loiyin adalhatai. Euphrates luipi dung agalkaiyin Gilead thinglhang gam ajonpantai.

Labanin Jacob nung adel

22 Jacob jamdoh chu nithum lhin nin Laban aseipeh tauve.

23 Labanin amite apuiyin, Gilead thinglhang gam geiyin, nisagi sungin, Jacob nung ahindel peh-e.

24 Jan khat hi Aramea mi Laban henga Pathen ahung kilah-in ajah a, “Jacob henga chingthei tah-in thu seiyin,” ati.

25 Labanin Jacob ahinphatan, Jacob’in molvum khat’a ngahmun asemin, Labanin Gilead thinglhang gama ngahmun asem’e.

26 Labanin Jacob jah a, “Ibol’a jeijou lhep’a, kachanu te ni gei ya gal-hing kaiya nakaimang hitam?

27 Ipi dinga neiseipeh louva, neidohabol’a kithol mangjel nahim? Neiseipeh le chun kipah thanom’a, lasah le semjang saigin to chule khongpi gin thumje jua nakilhadoh dinga!

28 Katu kachate jeng jong lhahdohna din neichop sah poi.Na-ngol chon lheh jenge!

29 Nang ho suhsetna thei jong tha kaneiye, ahivangin jan nilhah chun nang ho suhset louna din na-Pathen’uvin eihilchahtai.

30 Napa inlam na-ngai behseh a nache kahenai, ahile ibol’a ka-indoipi chu naguh mang jeng ham?” ati.

31 Jacob’in, “Nachanute ni neilahpeh jeng khat dem, tia kicha kahi.

32 Amavang koi hile na-indoi namudohna pen pen chu tha ding ahi. Hikoma kamiteu hi sakhi ahiuve, ipi hile nathil kihol’in namu mu kilah jengin,” ati.Laban doibom Rachel’in aguh lam chu Jacob’in ahetlou ahi.

33 Jacob ponbuh sunga Laban alut’in agahol’e, chuin Leah ponbuh sung ahol kit’in, soh numeite ni ponbuh sung dung jong ahol’in, indoi amudoh lou phat’in Rachel ponbuh sunga aluttai.

34 Rachel’in indoi ho chu anaguh a,sangongsao pha kah a asel’a antoupha ahi. Labanin ponbuh sung pumpi ahol vangin amupon ahi.

35 Rachel’in apa jah a, “Lung hang hih-in heap, kathi neipet ahijeh-in na-angsunga kadingdoh nompoi,” ati. Labanin ahol hol vangin a-indoi Teraphim chu amudeh tapoi.

36 Jacob alung hangjah-in, “Ipilom kabolset’a, itobang danthu kapal keh ham? Hibanga neihindel peh chu?

37 Kathikeo hijat naphet lengsoh hel’a chu nathilkeo ijat namudoh mong em? Namudoh leh hikoma kamite le namite mitmun hinpodoh-in, koijoh idih-am amahon seiyu hen.

38 Kum som ni kaumpi sunga hi nakelngoiho hihen nakelchate hijongle acha banga jong aumpon, nakelngoi hon lah a kelngoi chalk hat beh jong kakitha khah poi.

39 Kelngoi sahang tha geiyin keiman kasan, kei themmo jeh a thi ahilou photchetna nahenga kahin lhut ngaipoi. Sunkah jankah a kigu mang hijongle neiditsahji bouve.

40 Sun teng nisa hamvevu kathoh-in, janteng dap kathoh khovahjie. Hiti hin ihmu louvin ka-um jin ahi.

41I-um khomna kum som ni sunga hitabang jenga chubu um kahi. Kum som le li sungin nachanute ni kalon, kumgup sungin nakelngoi hon kaloi.Hichan geihin jong katohman somvei jen neikhel peh-e.

42 Kapu kapate Pathen, Abraham le Isaac Pathenin eipanpi lou hileh, khut goh keova neisoldoh tahbah ding ahi. Ahinla Pathenin kagentheina le katohna amujeh-in jan nilhah chun nagihsaltai,” ati.

Jacob le Laban kinopto

43 Labanin Jacob adonbut’in, “Numeiho la kachanu jeng ahin, chapang changla katute ahiuvin, kel-hon jouse  jong keiya ahi. Tahbeh-in hikoma um thil jouse hi keiya anahi. Ahivangin kachanute le katute hi kahendenthei ahitah loujeh-in,

44 nang to kihoucham ding kadeijotai. Hijeh chun akihoutoh nau melchihnan song seu hite,” ati.

45 Hijeh chun Jacob’in melchihna song khat atung’e.

46 Jacob’in song ahinset khom diuvin amite aseipeh-e. Chuin song kisethom vel’a chun neh khom abol’uvin ahi.

47 Song kisekhom chu Labanin Jegar Sahadutha asah-in, Jacob’in Galeed asah-e.

48 Labanin Jacob jah a, “Hiche song kisethom hi ikah lhon’a sakhia pang ahitai,” atin, amun chu Galeed asah-e.

49 Labanin, “Kikhen kang jongle hen Pakaiyin eivesui jing lhon hen,” ati. Hichejeh jong hin amun chu Mizpah akisah-e.

50 Labanin, “Kachanute ni nabol gentheiya numei dang jia nanei leh, ken kahet lou vangin Pathenin eivetsui jing lhon hi nageldoh ding ahi.

51 Ikah lhona sakhia dia kasongset hiche hi ahin, hiche hi melchihna song ahi.

52 Hiche song kisekhom hileh song kitung hi melchihna pang jing ding ahi. Nangma suse dia ken hiche melchihna song kahin khokal louhel ding,  kei suse dia nangin jong nahin khokal thei louhel ding ahi.

53 Abraham Pathen, Nahor Pathen chu eini kah a thutan ding ahi,” ati. Hichun apa Isaac-in ahou Pathen minin Jacob chu hiche kitepna thudol’a hin thengsel’in akihahsel tai.

54 Molvuma chun Jacob’in kilhainan gancha athat’in, amite jouse an nedin akouve. An aneh jouvun molvuma ageh khovah tauve.

55 Ajing jing kah matah-in Labanin atute jouse le achanute achop’in alhasoh keiyin, in lama akilekit tai.

Genesis Bung 32

Esau to kimudia Jacob kigot

1 Jacob achapai pail eh Pathen Vantilten analamtoi.

2 Vantilte amu Phat’in, “Hichelai hi Pathen ngahmun ahi,” tin  Mahanaim asahtai.

3 Edom gamsunga cheng a- upa Esau henga Jacob’in mi asol masai.

4 Amisol ho jah a, “Nathu ngaitah nanaopa Jacob’in ka-u Esau henga kasei nom chu: tuchan gei hin Laban henga kagakhopemin,

5 bong tampi, sangante, kelngoiho, kelchate chule doh tampi kalamdoh tai. Kachunga nalung lhai ding deina thu kahin thot ahi-he-u!” ati diuvin ahilchah-e.

6 Solchahho Jacob henga ahung kile kit’un,”Na-upa Esau henga kacheuvin, nangto kimuto din ahungtai. Pasal ja li to ahung kilhon’e,” atiuve.

7 Jacob atijan akichatai. Chuin alhonpi chengse, mihem jong kelngoi jong, kelchate le bong ho chule sangongsao ho loi ni nin akhenin ahi.

8 Jacob geldol’a,”Esauvin amasaloi ahindel khum jeng tah jongle anukhah loi jamdoh thei ahi,” ati ahiye.

9 Jacob ataovin, “Kapu Abraham Pathen, kappa Isaac Pathen! O Pakai, kagam lang, ka-inkote henga kakile kit’a, nangin ijakai aphat phat na neibolpeh din nasei me!

10 Neikhotona chengse le kitah tah a neibolna ho hi nasoh kei chan dia kilom jong ahipoi. Ajeh chu tenggol keoseh choiya Jordan galkai kahin, tun hiche loi ni nia kihomkhen jatpi hi toh kahung lhontai.

11 Ka-upa Esau koma neihuhdoh dia tao kahi. Eihin delkhum’uva, numei chapang geiya sumang dia hungkon ahiding kakichan kati ajatai!

12 Keidia thil ijakai aphat phatna neibolpeh a, kachilhahte jong Twikhanglen panga neldi jat naphahsah a koiman asim jou lou dia neitepna aumden’e. geldoh-in!” ati.

13 Hikoma chun Jacob ageh khovah-in, athil nei jousea konin a-upa Esau peh ding adongkhomin,

14 Kelpi ja ni le kelchal som ni,

15 sangongsao noukai cheh somthum le anoute, bongpi dom li le bongchal som, adong doh-e.

16 Hicheng chu Jacob’in alup lup’in ahomkhenin, lup khat cheh chu asohte khat cheh achinsah-e. Asohte jah a, “Kamasanga cheuvin, alup lup’in kijot’uvin, akah lah chu them khat cheh onghoitun,” ati.

17 Amasapen sohpa jah a Jacob’in, “Ka-u Esau to nakitoa aman,’Koi lhacha nahiya, hoilam jon nahim? Namasanga nahinhoi gancha ho hi koiya ham?’ tia nadoh teng,

18’Aboncha hi nanaopa Jacob gancha ahi. Aman aboncha hi a-upa Esau dia ahintol ahin, Jacob jong kanunguva ahung’e,’ nati ding ahi,” ati.

19 Lup ni lhinna sohpa le thum lhinna sohpa, chule gancha lup ching jouse jah a hiti chun aseipeh sohkeiye. “Esau ti nakimuto tengu hitia chu naseisoh kei diu ahi.

20 Chule,’Nanaopa Jacob jong kanung’uva ahunge,’ nati cheh diu ahi,” ati. Jacob geldan’a, “Hiche thilpeh hoa hi kasuh lung dam theilehm kakimutoh lhon teng eingaidam thei khat’inte,” ati ahi.

21 Jacob’in thilpeh ding chengse asol masan, ama ngahmin a ageh tai.

Paniel a Jacob bontol kho

22 Hiche jan chun Jacob athouvin, aji te ni le athaikem te ni, chule achate som le khat chu apuiyin Jabbok vadung agalkaitai.

23 Ajite le achate athahdoh soh a, athilkeo jouse jong athahdoh soh phat’in

24 ama anunguva achangin Pasal khat ahungin jingpi phalvah geiyin Jacob akibotpi.

25 Jacob kibotpi pan alel ding phat’in akhelbom asuhpeh le, akhelgu akipel doh tai.

26 Akibotpi pan Jacob jah a, “Neilha loiyin, kho vah lha ding ahitai,” ati. Jacob’in la, “Vang neiboh masanga kalha louhel ding nahi,” ati nalaiye.

27 Akibotpi pan Jacob jah a,”Namin ipiham?” atileh; aman, “Jacob,” ati.

28 Aman, “Namin Jacob kiti lou ding ahitai; Pathen to jong mihem to jong nakibonin najoutai; hijeh a chu naming Israel hiding ahitai,” ati.

29 Jacob’in, “Namin neiseipeh- on,” atileh; aman, “Ibol’a kamin neidoh ham?” atin, phatthei abohjo tai.

30 Jacob’in amun chu, “Pathen kimaitoa kamua kahindohna mun,” tin Paniel asah-e.

31 Jacob’in Paniel adalhah lhah-in nisa asoh paiyin, akhelgu kipel jeh chun kideopeh-in ahunge.

32 Tuni geiyin Israel chaten khelgu kisuhtona saphe hi anepouve; ajeh chu Jacob khelgu kisuhtona phe lah tah chu anasuhpeh ahi.

Genesis Bung 33

Jacob’in Esau akimupi

1 Pasal ja li to lhona Esau hung chu Jacob’in amun, chapang ho chu Leah, Rachel chule thaikemte ni ahoppeh-e.

2 Thaikemte ni le achate lhon amasat sah-in, abanin Leah le achate asol’in,ajonan Rachel le Joseph anukhahsah-e.

3 Achate le ajite masanga Jacob achen, a-upa ajot lut chun sagi vei tol’a adilsui.

4 Ahinla Esaun adel lut’in, akoichah kheh a achop leh, akikalo lhontai.

5 Esau akiheileh akimvel’a numeiho le chapang cheng amun, “Nahin lhonpi ho hi koi koi hiuvam?” tin Jacob adonge.  Jacob’in, “Pathenin lungset man’a eipeh chapang ho ahiuve he-u!” ati.

6 Hichun thaikemte ni le achate lhon ahunguvin adilsu’ve.

7 Abanin Leah le achate ahungun, achainan Joseph le Rachel ahung lhonin adisu’uve.

8 Esauvin, “Gancha alup lup’a kahintopa ho chu ipi ding ba nati ham?” atileh; Jacob’in, “Nalung lhaina dia kapeh nahi,” ati.

9 Esauvin, “Kakhop bep kanei nai kanao, nanei chu kikoi jengin,” ati.

10 Jacob’in, “Ahipoi, neilung lhaitah le kathilpeh jong neisanpeh teiyin. Deitah a neibol phat’in, namai kamu hi Pathen mai mu kabangtai.

11Pathenin eikhoton ijakai eipei; hijeh chun nang dia kahinpoh thil ho hi neisanpeh-in,” ati. Esauvin akilah kahsen Jacob’in apenah nah jenge.

12 Esauvin, “Chetaute, kei masa nange,” ati.

13 Jacob’in, “Chapangte lhahsam nahetsa ahin, kelngoipi noukai ho le bongpi noikaiho jong kagel khoh angaiye. Nikhat bang kihoibe kit le alup lup’a thigam jeng thei ahiuve.

14 Keisangin masatan, ol tah-in nahin jui nange; Edom gama kahinphah kahsen, ganchate le chapang ho hinpuiying ting, kajochanin hindel nange,” ati.

15 Esauvin, “Pasal phabep kadalhah peh ding ahi,” atileh; Jacob’in, “Angaipoi, neilung lhai ding chubou kadei ahi,” atitai.

16 Hiche nikho chun Esauvin Edom gam ahinlejot kittai.

17 Jacob’in Sukkoth ajonin, hikoma chun in khat akisah-in, ganchate ahen nai. Hijeh a chu hichelai mun hi Sukkoth kisah ahi.

18 Mesopotamia gama ahung kilekit chun, Canaan gamsunga Shechem khopia Jacob damsel’in ahung lhungin, khopi koma tollhang khat’a ngahmun asem’e.

19 Hiche gam keh khat chu, Shechem pa Hamor chatea konin Jacob’in dangka jakhat’in achoi.

20 Hikoma hin Jacob’in maicham khat asemin, Israel Pathen El min aputsah-e.

Genesis Bung 34

Shechemin Dinah asuhthang

1 Nikhat hi Jacob le Leah chanu Dinah chu Canaan numei ho henga kholai alenge.

2 Chuche gamkai haosa, Hiv mi Hamor chapa Shechemin Dinah amudoh phat’in akipuiyin asusetai.

3 Shechemin Dinah hoi asa lheh jengin, adeichan, thu nuntei din ajol jol jenge.

4 Shechemin apa jah a, “Hiche nu-ngah hi kaji din neibolpeh-in,” tin aseitai.

5 Achanu asuh thangu hi Jacob’in ajatan, achapate aboncha gamlah a bong chinga achejeh-un, ahung vailhun kahseuvin ima abolpoi.

6 Shechem pa Hamor chu Jacob to kihou toh dia apotdoh pettah-in,

7 Jacob chapate gamlah akonin ahung vailhunuve. Jacob chapaten athu ajah-uva, Shechemin Jacob chanu asuh thanga, Israel chate nahsahmoa abol chu ki dang asauvin alung hang behseh jenguve.

8 Hamorin Jacob jah a, “Kachapa Shechemin nachanu adeichai, kichenpisah teiyin,

9 Kamite le namite kah a ikijonto theina diuvin kinoptona semu hite.

10 Chuteng kagamsunguva jong ichenkhom thei diu, nadei lai laiya nachen’uva, lung mongtah a kivei nabol’uva, neile gou nakhol thei diu ahi,” ati.

11Shechemin Dinah pa le sopite jah a, “Hichea hin neilungset’un, thil nadei chanu penge.

12 Thilpeh itobang nadeiyuva, moulah man ichan sang nadeiyu hijongle sem jengun, Dinah kakichenpi ding poule na-ngeh chanu pejeng inge,” ati.

13 Shechemin asopinun asuhthangsa ahijeh chun,Jacob chapaten Shechem le apa Hamor chu dohan adonbut tauve.

14 Amahon, “Keiho dia kisuh minpoina ahisangin kasopinuu hi cheptan lou pasalto kichensah thei pouvinge.

15 Namite pasal jouse keiho banga chep natanpeh soh keivang le noppeh nauvinge.

16 Chuteng ikijonto diu jong nom ung ting, nalah-uva kachen diu, chikhat nam kaht banga i-um diu ahi.

17 Kasei banguva chep tan ding nadau vangle Dinah kipuiyung ting chet au vinge,” atiuvin ahi.

18 Hamor le Shechemte pacha din athuseiyu chu aphat toh-in,

19 Jacob chanu adei behseh jeh-in, Shechem kho ngai man louvin aseiyu chu aboltai. Shechem chu a-insunguva thunei pen ahi.

20 Hamor le Shechemte pacha, khopi kelkot phung, japi kikhopna muna ache lhonin,akhosung miteu jah a agasei lhonin,

21 “Hiche mite hi golle pao phatah ahibouvui; gamsunga chengkhomu hitin, jalen jengu hen. Gam hi amaho chenna khopset jong ahinai. Achanuteu kichenpiu tin, amaho jong ichanuteu peh hite.

22 Amavang hiche mite toh ichenkhom’uva chikhat namkhat banga i-um theina diu chu, eihon jong amaho banga pasal jouse chep itan diu aho.

23 Chutibol leu hen aganhing jouseu le anei jouseu ichen jeng lou dingu ham? Hijeh chu ichen khomna diuvin kinopto jengute,” ati lhon’e.

24 Hamor le Shechem thusei chu khosung mite anomsoh tauvin, pasal K

25 Nithum lhin nin khopi sung pasal ho cheptan nat thohgim pet’in, Jacob chapate ni, Dinah sopi, Simeon le Levin chemjam akipat lhonin, hetman louhel’in khopi adel khum lhonin, pasal jouse athatgam lhontai.

26 Hamor le Shechem geiyin athat lhon, Shechem insunga Dinah apuidoh lhonin achetauve.

27 Amitha jou lhonin Jacob chapate adang hon asopinuu kisuhthang phulah nan khopi acham theng hel’uve.

28 Kel-hon jouse,bang hon, sangan ho chule khopi sunga thil ijakai loujao dunga umho geiyin akichomdoh-uve.

29 Thil manlu jouse akilah-un, numei le chapang chengse gal-hingin akaiyun, insung dunga um thil jouse akilah-ui.

30 Jacob’in Simeon le Levi jah a, “Nangnin lung gimna neiboldoh peh lhon’e; Canaan mite le Periz mite chule hiche gamsung cheng mite jouse hot din neibol lhontai. Kenla mi tampi kaneipon, amaho kihoutoh-in eihon delkhum jengu leh, i-inkouva eisuhmang hel diu ahitai,” ati.

31 Ahinla ama nin, “Amanba kanaonuu noti bol’a abol ding hijah ong?” ati lhone.

Genesis Bung  35

Bethel’a Pathenin Jacob phatthei aboh

1 Pathenin Jacob jah a, “Bethel jontouvin gacheng tan, chule na-upa Esau dalha nahung jamdoh a nahenga hung kilah Pathen din Bethel’a maicham khat gasemin,” ati.

2 Jacob’in a-insung mite le alhonpi miho jah a, “Midang indoi nakoi chengseu chu paidoh-un, kisuthenguvin, vontheng kivon cheh-uvin.

3 Bethel ijottou diu, kagimna chan a eikithopia, kachena chan a eilhonpi jing Pathen dia maicham khat kasem ding ahi,” chengseu le abilba jouseu Jacob apeuvin, aman abonchan Shechem kho koma gangpi phung noiya avuitai.

4 Mihon midang indoi akoi chengseu le abilba jouseu Jacob apeuvin, aman abonchan Shechem kho koma gangpi phung noiya avuitai.

pkon kichatna khat ahung lhungin, hijeh hcun amahon Jacob le amite adelngam tapouve.

6 Jacob le amite abonchauvin Bethel kisah, Canaan gamsunga Luz khoa ahung tauve.

7 Hikoma chun Jacob’in maicham khat asemin, amun chu Bethel Pathen min aputsah-e. Ijem-inem itile a-upa Esau dalha ahung jama chu hikoma hi Pathen akom hung kilah ahi.

8 Rebecca lhacha nu Deborah thi chun Bethel lhang lam, gangpi phung noiya anvuiyun, hijeh chun “Lhi lonna gangpi phung” anasah-ui.

9 Mesopotamia gama kona Jacob ahung kile kit’in jong ahenga Pathen ahung kilah kit’in phatthei aboh-e.

10 Pathenin ajah a, “Namin Jacob hi, tua pat Israel hiding ahitai,” ati. Hitia hi Pathenin Israel anasah ahi.

11 Pathenin Jacob jah a, “Pathen Hatchungnung kahi, cha le nao tamtah hingin lang, chitin namtin nanga pengdoh hen, leng le la ding jong hingin.

12 Abraham le Isaac kapehsa gam chu napeng ting, nathi nung teng nachilhahte kapeh kit ding ahi,” ati.

13 Akihouna mun lhona konin Pathen akaltoutai.

14 Pathenin akihoupina laiya chin Jacob’in melchihna song khat aphut’in, lengpitwi le olive-thao asun khumin athensoi.

15 Pathento akihouna laitah chu Jacob’in Bethel asah-e.

Rachel thi

16 Jacob le a-insung miten Bethel dalhan acheu leh, Ephrath aphah ding kon’un Rachel asonat’in anat dan ahahsa lheh jenge.

17 Asonat khoh pettah-in naodom nun, “Tija hih-in Rachel, pasal khat nanei kit ding ahitai,” ati.

18 Rachel la laichat paitan, atan konin achapa min Benoni asah leh, apan la Benjamin asah-e.

19 Rachel athi phat’in, tulaiya Bethlehem kiti, Ephrath lampam a avuitauve.

20 Jacob’in hetjingna lhansong khat aphut’in, tuni geiyin Rachel lhankhuh melchihnan apange.

21 Israel achepaiyin Eder insang gal’a ngahmun asem’e.

Jacob chapate

22 Israel chuche gamsunga achen laiyin, apa thaikemte ni lah a Bilhah chu Reubenin akitimatpi. Israel’in ajahdoh phat’in alung hang behseh jenge. Jacob’in chapa som le ni aneiye.

23 Leah to ahin ho Reuben, (Jacob cha lenpen), Simeon, Levi, Judah, Issacher chule Zebulun ahiuve.

24 Rachelto ahin Joseph le Benjamin bou ahi.

25 Rachel sohnu Bilhah to ahin Dan le Naphtali ahilhon’e.

26 Leah sohnu Zilpah to ahin Gad le Asher ahi. Aboncha Mesopotamia gama peng ahiuve.

Isaac thi

27 Abraham le Isaac chennam Hebron koma, Mamre khoa apa Isaac henga Jacob achetai.

28 Isaac kum jakhat le somget ahingin,

29 ateh kambet’in athin, achapate ni Esau le Jacob’in avui lhontai.

Genesis Bung 36

Esau chilhah ho

1  Edom jong kitiji Esau chilhah chuhiti ahiuve.

2 Canaan mi Esauvin akichenpi ho chu: Hit mi Elon chanu Adah, Hit mi Zibeon chapa Anah chanu Oholibamah,

3 chule Ishmael chanu, Nebaioth sopinu, Basemath toh ahiuve.

4 Adah-in Eliphaz ahingin, Besemath-in Reuel ahingin,

5 Oholibamah chun Jeush le jamlam to Korah ahinge. Hicheng hi Esauvin Canaan gamsunga ahin achapate ahiuve.

6 Ajite le achate numei pasal, a-insung mi jouse le, Canaan gamsunga alamdoh aneiagou jouse pumin, asopipa Jacob dalhan Esauvin gamchom ajontai.

7 Jacob to Esau achenkhom thei louna chu gancha ahao thei behseh lhontan, gamsung kivahna kham ahitapoi. Hijeh a chu Esau chaodoh ahi.

8 Hiti hin Esau Edom thinglhang gamsunga achengtai.

9 edomte penna Esau chilhah chu hicheng ahi.

10-13 Esau jinu Adah-in chapa Eliphaz ahinpeh-in, Elophaz chun chapa nga ahinge: Teman, Omar, Zepho, Gatam chule Kenaz.Timna kiti jichom khat aneiben, chapa Amalek chu ahinbei. Esau jinu Basemath-in chapa Reuel ahinpeh-in, Reuel’in,Reuel’in chapa li aneiyin: Nahath, Zerah, Shammah chule Mizzah ahiuve.

14 Esau jinu, Zibeon chapa Anah chanu Oholibamah-in chapa thum ahinpeh-in: Jeush, Jalam chule Korah ahiuve.

15 Esau chapate phung upa cheng chu hicheng hi ahiuve. Esau cha a-upapen Eliphaz ahin, Eliphaz akondoh phung upa cheng chu: Teman, Omar, Zepho, Kenez,

16 Korah, Gatam chule Amalek ahiuve. Amaho hi Esau jinu Adah chilhah ahiuve.

17 Esau chapa Reuel cha, phung upa cheng chu: Nahath, Zerah, Shammah chule Mizzah ahiuve. Hicheng hi Esau jinu Basemath chilhah ahiuve.

18 Anah chanu, Esau jinu, Oholibamah lhah phung upa cheng chu: Jeush, Jalam chule Korah ahiuve.

19 Akisei cheng hi Esau chilhah phung upa jeng ahiuvin ahi.

Seir chilhah ho

20 Gamsunga cheng, Hori mi Seir chapate chu: Lotan, Shobal, aibeon, Anah,

21 Dishon, Ezer, chule Dishan ahiuvin, abonchauva Edom gama cheng Hori mi Seir chate lah a phung upa cheh ahiuve.

22 Lotan chapate ni chu Hori le Heman ahin, Lotan sopinu chu Timna ahi.

23 Shobal chapate chu: Alvan, Manahath, Ebal, shepho chu le Onam ahiuve.

24 Zibeon chapate ni chu Aiah le Anah ahi.(Anah hin apa sangam gamthip noi ya agachinna twisa putna twisam phung ahin mudoh ahi.) 25 Anah chate chu: Dishon le Anah chanu Oholibamah ahi lhone.

26 Dishon chapate chu: Hemdan, Eshban, Ithran chule Cheran ahiuve.

27 Ezer chapate chu: Bilhan, Zaavan chule Akan ahiuve.

28 Dishan chapate chu: Uz le Aran bou ahi.

29 Hori mi phung upa chengse chu: Lotan, Shobal, Zibeon, Anah,

30 Dishon, Ezer chule Dishan ahiuvin, achen nau Seir gamsunga, amaho hi Hori mi phung khai cheh a upa ahiuve.

Edom lengte

31 Israelten leng aneidoh masanguva Edom gamsunga leng vaipo ho chu anoiya ho hi ahiuve.

32 Beor chapa Belen Dinhabah khopia Edom gamlengvai apoi.

33 Bela thi phat’in akhel’in, Bozrah khoa Zerah chapa, Jobab chun lengvai apoi.

34 Jobab thi nungin, Teman mite gamsunga Hushamin ama khel’in lengvai apoi.

35 Husham thiphat’in, Moab gamsunga Midian mite gajouvah, Bedah chapa Hadah-in,  Avith khopia, ama khel’in lengvai apoi.

36 Hadad thiphat’in,Masrekah khoa Samlah-in ama khel’in lengvai apoi.

37 Samlah thi phat’in, Euphraes vadung pang, Rehoboth khoa Shaul’in ama khel’in lengvai apoi.

38 Shaul thi phat’in, Achbor chapa Baalhanan chun ama khel’in lengvai apoi.

39 Achbor chapa Baalhanan thi nungin, ama khel’in Hadarin Pau khopia lengvai apoi. Hadar jinu min chu Mehetabel ahin, Matred chanu, Mezahab tunu ahi.

40 A-insung dungjuiyule, achen naukho dungjui, amin dungjuiyuva Esau lhah phung upa chengse min chu: Timna, Alvah, Jetheth,

41 Oholibamah, Elah, Pinon,

42 Kenaz, Teman, Mibzar,

43 Magadiel chule Iram ahiuvin, abonchauva Esau chapa Edom chilhah phung upa jeng ahin, gamsunga achen mun dungjuiyuva kihe ahiuve.

Genesis Bung 37

Joseph le asopite

1 Jacob chu apa chenna, Canaan gama achengin,

2 Jacob insung thusim chu hiti ahi. Joseph kim som le sagi bep ahin, apa thaikemte ni Bilhah le Zilpah cha, a-ute chutoh kelngoite le kelcha ho aching jiuvin, a-ute thilse bol ho chu apau henga Joseph-in ahin lhut jin ahi.

3 A-upat nunga  ahin ahijeh-in achapa dang jouse sangin Jaco’in Joseph alungset’in, sangkhol chol bansao khat jong akhuipeh-e.

4 Asopi dang sanga apauvin Joseph alungset a-uten amudoh phat’un, asopipau Joseph chu avetda behseh jenguvin,odamin jong ahouthei pouve.

5 Jan khat Joseph-in mang aneiyin, asopite aseipeh leh, amahon avetda lo cheh kit tauve.

6 Joseph-in, “Kamang hi ngai tem’uvin.

7 Kamngin loulaiya changphal ikankhomu leh, kei changphal akiphongdoh-in ading jeng pet jengin, nang ho changphal chengse akimvel’a akikhom’uvin akun cheh-uve,” ati.

8 Joseph sopiten, “Kachunguva leng change vaihom dia kigel mong nahimo?” atiuvin, amang neijeh le athusei jeh chun aha hot cheh jenguve.

9 Joseph-in mang khat aneikit’in asopite jah a asei kit’in, “Mang khat kanei kit’in, kamangin nisa le lha chule ahsi som le khat, ka-anga akun-uve,” ati.

10 Joseph-in amang chu apa jong aseipeh leh, aman apho lon, “Iti hi tobang mang chu nanei ham? Nanu le nasopite to kahunguva nahenga dilsu dia neigel mongu haimo?” ati.

11 Joseph sopite chu achunga athangseuvin, apan vang athusei ho chu agel jinge.

Joseph ajoh-u, Egypt gama apuiyu

12 Nikhat hi Joseph sopite chu apau kelngoi hon ching din Shechem a achetauve.

13 Jacob’in Joseph jah a, “Na-ute kelngoi china, Shechem achele chun kadeiye,” atileh; Joseph-in, “Henge,” ati.

14 Apan, “Nasopite dam’uva, kelngoihon jong pha nam gaven, hung kit’in lang neiseipeh-in,” ati. Hiti  hin apan Hebron phaiya pat Joseph chu asoldoh tai. Joseph chu Shechem alhungtan,

15ahin gamlah a agam mangin avakoile naa pasal khat’in atoh khan, “Ipi hol le nahim?”ati.

16 Joseph-in, “Kelngoi chinga pang ka-ute kahol ahi, hoiya um’uvam, neiseipeh le iti-am?” ati.

17 Pasalpa chun, “Chetauva chula em? Dothan a che ding atiu kaja me,” ati. Hijeh chun Joseph asopite nunga achen, Dothan a agamusoh tai.

18 Joseph-in ahinphah masangin asopiten agalmu’uvin, akihousom loiyuvin, thadoh din anakoitauve.

19 “Veuvo, mang neipa ahung tai!

20 Hungun that’u hitin, twikul twibel lai khat’a along leh lut’u hitin, sahang than seitah tau hen. Chu teng amang chu ipi aso vetah tau hen,” akitiuve.

21 Akihouvu Reubenin ajan, Joseph huhdoh agon, “That poute.

22 Suhset dauvin, gamthip laiya twikul sunga khun leh lutjo taute,” ati.Hitia hi Joseph chu huhdoh a apa henga lesol kit dia agot ahi.

23 Joseph asopite heng ahung lhun phat’in, amahon asangkhol chol banaso chu asut lhauvin ahi.

24 Chuin akaiyun, twikangsa twikul sung khat’a aleh lut tauve.

25 Joseph sopiten an aneh pet’uvin, Ishmael mi, Gilead a pat Egypt lam jon, kholjin ho amu’uve. Ishmael mihon asangongsaoteu chub ego le thing thao namtui tampi apohsah-uvin ahi.

26 Judah-in asopite jah a, “Isopi ikithauva, itolthau i-im manguva ipi phacham ding ham?

27 Hiche Ismael mite henga hin kijoh taute. Isopi nahjoh, iphe ivou nahsa achunga khat lhah daute,” atileh; asopite anom’uvin,

28 Midian mi kiveiho hung phat’in, Joseph chu asopiten twikul’a konin akaidoh-un, Ishmael miho heng dangka som ni manin ajoh-uvin, Ishamel mihon Joseph chu Egypt gama apuitauve.

29 Twikul phung lama ahung kit le Joseph aum lou phat’in Reuben alung gim behseh jengin aponsil abottel’in,

30 asopite henga achen, “Boipu chu anaumtapoi, i-kati ding hitam?” ati.

31 Joseph sopiten kelcha khat athat’un, Joseph sangkhol chol chu kelcha thisan lah a adelhop’uvin,

32 sangkhol chol chu apau henga achoiyun, “Hiche hi kamu’ve. Nachapa sangkhol hilou ham?” atiuvin ahi.

33 Jacob’in ahepai jenin, “joseph sangkhol hina hi-o! Sahang khattou hin atha hita bep’a hi me! Kachapa Joseph hi atel adah a ajenthang hita hi-o!” ati.

34 Jacob alungna behseh jengin aponsil abottel’in, khaodip pon akisil’e. Phat sottah achapa Joseph pul adouvin ahi.

35 Achate numei pasal abonchan ahungun alhep lhep vangun alung mong thei deh tapoi. “kachapa pul dou pum pumin noimugama kumsuh jeng tange,” atin, achapa Joseph pul adou dou jenge.

36 Midian miten ma Egypt gama Joseph chu lengpa vaibol ho lah a inpi ngah sepia lamkai Potiphar henga anajoh tauve.

Genesis Bung 38

Judah le Tamar

1 Hiche lai hin Judah-in asopite adalhan, Adullam khoa amin Hirah kitipa chu agabeltai.

2 Hikoma hin Canaan mi Shua chanu chu Judah-in amudoh-in, akichenpi leh,

3 chapa khat ahinpeh-in, Judah-in amin Er asah-e.

4 Nao avop kit’in, chapa khat jong ahingin, amon,Onan asah-e.

5 Chapa khat jong ahinbe kit nalaiyin amin Shelah asah-in ahi. Anaoso pet hin Judah chu Achizib a anaum’e.

6 Achapa lenpen Er ji din Judah-in Tamar apuipeh-e.

7 Er akhanset jeh-in Pakai alung hangin athat tai.

8 Chuin Judah-in Er sopipa Onan jah a, “Na-upa jinu ven lang, nasopipa chi khaipeh-in,” ati.

9 Cha ahin ding chu achan lou ding akihet jeh-in, a-upa jinu to akitimat chanin Onan chun botwi tol’a ache lhajin, a-upa chi khaipeh lou din abol’e.

10 Athilbol hi Pakai alung lhaitapon, ama jong Pakaiyin athat kittai.

11 Judah-in amou nu Tamar jah a, “Kachapa Shelah kikhanlhit kah-in napa in’a chen meithaiyin ga-umtan,” ati. Asopite banga Pakaiyin Shelah jong athalo ding kicha Judah-in chutia asei ahi. Hijeh chun Tamar a-in lama achetai.

12 Chom khat nungin Judah jinu athitai. Judah-in aji pul adou chai phat’in agolpa, Adullam khoa Hirah toh Timnah a akelngoi mul vou ho henga achelhone.

13 Mi khat’in atehpu Timnah a akelngoi mul vou dia ache hi Tamar jah a agaseitai.

14 Hichun Tamarin meithaivon chu akhel loiyin, ponlu akikhun, Timnah lampia Enaim khopi kelkot phunga atouve. Shelah gollhangta a Judah-in amato akichensah lou chu phate cha ahetdoh ahitai.

15 Tamarin ponlu akhuh jeh-in Judah-in avet leh numei kijoh danin agel’e.

16 Judah-in lampam a apuidoh-in, amou nu ahilam helouvin, “Hungin lumkhom hite,” ati. Tamarin, “Neiluppi man dia ipi neipeh ding ham?” ati.

17 Judah-in, “Kel-hon lah akelnou khat hinthah peh nange,” ati. Tamarin, “Kelcha nahin thahna dia khamgahna ipi neipeh di ong?” ati.

18 Judah-in, “Khamgahna thil ipi kapeh di?” tin adonge. Tamarin, “Na-mahor le akhao chule natenggol-nachoi chu,” ati. Aseichengse apen, akitimat lhonle, Tamar anaovop paitai.

19 Tamar inlama akile kit’in, aponlukhuh ahoh lhan meithaivon akivonkit tai.

20 Kelcha gathah peh a, numei nu koma khamgahna thil adalhah chengse gala din, Judah-in agolpa Hirah asol leh, Hirah-in numei nu chu agaholmo tai.

21 Hirah-in Enaim khopia miho jah a, “Lampama tou numei kijohnu chula am?” tin adonge. Mihon, “Hikoma numei kijoh aum khapoi,” atiuve.

22 Hirah chu Judah henga ahungin, “Mithangnu kagaholmo ta-e. Amuna mihon ma numei kijoh umkha louhel’in aseiyui,” ati.

23 Judah-in, “Aman kilah paitante, min eimoh nuisat bep lhon ding ahi.Peh dia kiseita, nangin gamudoh jou talou chu,” ati.

24 Lhathum nungin mikhat’in Judah jah a, “Namou nu Tamar noti chonin achontan, tun vang agaitai,” tin aseipeh-e. Hijeh chun Judah-in, “Hikaidoh-un, kigoulih jeng hen,” atitai.

25 Ahinkaidoh phat’uvin Tamarin atehpu henga thu athot’in, “Thil hicheng neipa hin eigai ahi. Hiche mohor le akhao, chule tenggol hi koiya penham-hinven,” ati.

26 Athil ho chu Judah-in ahepaiyin “Kachapa Shelah to kakichensah loujeh-in Tamar adihjo tai,” atin, akalsen amanu to akitimat kit tahih hel’e.

27 Tamar anavah phat’in anaobu sunga apeng din naocha ni ana-ume.

28 Asonat laitah-in naocha khatjoh-in akhut ahinsodoh leh, naodom nun akhutchonga patsan jang aveipeh-in, “Hichejoh hi apeng masa ahi,” tin amelchih-e.

29 Ahin akhutchong anung loilut’in, asopipa apeng masatai. Hichun naodom nun, “Nachamtah-in nama nakihon jenge,” tin amin perez asahtai.

30 Chujouvin asopipan patsan jang akibun ahung pengin, amin Zerah asah tauve.

Genesisi Bung 39

Joseph le Potiphar jinu

1 Ishmael mihon Joseph chuEgypt gama apuisah-un, leng vaibol’a pang, leng inpi ngah sepai lamkai Potipharin Joseph chu akichoh tai.

2 Pakaiyin Joseph aumpi jingin, alolhinsah jinge. Joseph chu apu Egypt mipa ina achengin,

3 Pakaiyin joseph aumpia, atoh lam lama alolhinsah chu Joseph pupan amutai.

4 Joseph chunga Potiphar alung lhaiyin, ama jenle din apansah-e. A-insung le anei jouse chunga vaipon jong apansah tai.

5 Hichea pat chun Egypt mipa Potiphar insung, a-insung le aloulaiya aneiho abonchan Joseph jal’in Pakaiyin phatthei aboh tai.

6 Potiparin anei jouse abonchan Joseph khut’a akoiyin, aneh ding an tilou thil dang imacha adon tapoi. Joseph hi mihoi, vetnom umtah ahi.

7 Chom khat jouvin apu jinun Joseph adeichan, luppi din ajol pantai.

8 Joseph adan ajah a, “Ven, kei umjeh a kapun insung thil imacha gel khoh talouva, aboncha keima einganseta.

9 Hiche insunga hi ama bang banga thaneiya eikoi ahin, nang tilou imacha ei-itpeh louhel ahitai. Iti hitobang thilse chu kabol’a Pathen douna kachonset ding ham?” ati.

10 Niseh a ajol jol jeng vangin, joseph-in lup jong aluppi pon, tijong akitimatpi poi.

11 Nikhat hi anatoh ngai tong dia Joseph insunga agalut le, insung lhacha pasal khat beh jong ana umpouve.

12 Hichun Potiphar jinun Joseph chu asangkhol chol’in amanin, “Neiluppi-o,” ati. Joseph chun asangkhol chol akhut’a adalhan inpo lama ajamdoh tai.

13 Akhunt’a sangkhol chol dalha a inpo lama ajamdoh phat’in,

14 Potiphar jinun insung lhacha pasal ho akou loiyin, “Hiche sangkhol chol hi veuvin! Kapauvin hiche insunga ahinpuilut hiche Hebrew mipa hin eidai chavaiyin, indan sunga eipuilut’in suhset din eigoi. Hijeh a chu happen a kapen leh,

15 kapen-gin ajah phat’a, asangkhol chol kakoma adalhah a inpo lama hung jamdoh ahi,” ati.

16 Potiphar jinun Joseph sangkhol chol chu apupa hung kahsen akoiye.

17 Ahung phat’in asei bang bangin aseipeh-in, “Hiche Hebrew mi nahinpui lut dohpa khu ka-indan sunga ahungin eidaithange.

18 Kapenjah phat’in polama alhaidoh-in kakoma asangkhol chol adalhai,” ati.

19 Joseph pupa chu ajinun ajah a, “Nasohpan hitobang banga hi eibol ahi,” tia asei ajah phat’in, alung hang behseh jengin;

20 Joseph chu amanin, lengpa sohchang ho kihenna, songkul sunga akhumin, Joseph hikoma chun aumtai.

21 Ahivang Pakaiyin Joseph aumpin, phatthei aboh-in, hijeh chun songkul kotngah pan alungset paitai.

22 Songkul kot ngah pan sohchang dang jouse Joseph khut’a akoiyin, ipi kibol jongle abol jouse Joseph boldoh-in bou akithangtai.

23 Pakaiyin Joseph akilhonpia, abol jouse alolhinsah jeh-in, Joseph thilbol jouse chu songkul kot ngah pan avekhoh tapoi.

Genesis Bung 40

Joseph-in sohchang ho mang alepeh

1 Chomkhat jouvin Egypt lengpa ju vaibolpa le an vaibolpan lengpa doumah abol lhon’e.

2 Hijeh chun ju vaibolpa le an vaibolpa chung lengpa alung hangin,

3 hijeh chun leng inpi ngah sepia lamkaipa in, Joseph kihenna songkul sunga chun amani jong songkul’a ahentai.

4 songkul’a sotpi aumtauvin, inpi ngah sepia lamkaipan Joseph chu ju vaibolpa le an vaibolpa lhacha din akoiye.

5 Jan khat songkul sunga chun, ju vaibolpa le an vaibolpan mang khat gel anei lhonin, amang lhon chu aledohna chom cheh ahi.

6 Jingkah a Joseph aheng lhona ahungleh, mai ngui theh a anaum lhon amui.

7 “Tun in lungkham tah to tabang lhonin-e!” tin Joseph-in adonge.

8 Amanin, “Mang khat cheh kanei lhonin, ledoh a hilchen thei hikoma koima cha aumpoi,” ati lhon’e. Joseph-in, “Sei lhon tem-o, mang letheiya Pathen uma chu,” ati.

9 Ju vaibolpan, “Kamangin kamasanga lengpigui khat anajamin,

10 bah thumin ajamkhen’e. Ajih adot jouvin aga alit paiyin, chuin aching lhingpaitai.

11 Lengpa khon kanachoiyin, chuin lengpiga ho chu khon sunga kanoilha lhan, kadomin lengpa kagapei,” ati.

12 Joseph-in, “Namanga lengpibah thum chu nithum hiding,

13 nithum lhin ni leh lengpan nalhadoh-in tin, na-ngaidam a, napan mun a napansah kit ding ahi. Chuteng masanga ju vaibol’a napan lai banga chu jukhon nadop’a lengpa napeh ding ahi.

14 Nang dia ijakai akibol phatsoh teng neihin geldoh-in, neikithopin lang songkul’a kona eilhadoh loina din lengpa henga kathu neihin seipeh-in.

15 Adih tah a chu Hebrew mite gamsunga kona eihin lhoh mangu ahibouvin, hikoma jong songkul lut lo na thei ima kabolsepoi,” ati.

16 Ju vaibolpa mang phate cha alepeh chu an vaibol lamkaipan amudoh phat’in Joseph jah a, kamang chun changlhah pocha thum kapui.

17 Pocha chungung pen a chun lengpa dia kansa changlhah jat chom chom kapun, hiche ho chu vachaten ane nejengui,” ati.

18 Joseph-in, “Namanga pocha thum chu nithum ding ahin,

19 nithum lhin ni leh lengpan nalhadoh-in tin, nalu tantante! Chule natahsa chu khom chunga tah-in tin, vachaten nasa aneh diu ahi,” ati.

20 Nithum lhin ni, lengpa pen nikhon lengpan alhachate toh golvah abol’in, ju vaibolpa le an vaibol lamkaipa alhadoh-in, alhachate masanga ahin kailuttai.

21 Chuin ju vaibolpa chu apan mun luiya apansah kit’in,

22 an vaibol lamkaipa vang chu athat tai. Hiti hin Joseph sei bang bangin agui lhungsoh keiye.

23 Ahinla ju vaibolpan Joseph chu  ageldoh tapon, asumil del tai.

Genesis Bung 41

Joseph-in lengpa mang alepeh

1 Kum ni jouvin Egypt lengpa amangin Nile vadung panga anadingin,

2 vadunga konin bongpi jolsel, thaotah cheh sagi ahung doh-in hamhing lah a alhauve.

3 Chuin agon a gong, gudohset sot jeng bongpi sagi ma vadunga kon chun ahung kaldoh-un, vapanga bongpi thao ho koma chun adingui.

4 Chuin bongpi gongset sot ho chun bongpi thao chengse chu aval lhum tauve. Hichun lengpa a-ihmut akhangtai.

5 A-ihmut kit le amangin changpal bohlep, aminsa cheh sagi changkung khat’a anakeh-e.

6 Chule niso lam khohui mut heosa, changpal geothil thet sagi ma an-umin,

7 changpal hoitah ho chu aval lhum gamtauve. Lengpa akhah phat’in amang nei ahedoh tai.

8 Jingkah-in lengpa amangin alung theh tenin, Egypt gamsunga mitpheldoi them jouse le miching jouse agakousah-in, ajah-uva amangte ni aseipeh vangin koiman ahilchen theipouve.

9 Hichun ju vaibolpan lengpa jah a, “Tunin kathemmona khat kageldoh-e.

10 Kei le anvaibol lamkaipa chunga lung hanga, inpi ngah sepai lamkaipa in, songkul’a neinakoi lai lhonin,

11 jan khat mang kanei gel lhonin, kamang lhon chu aledohna chom cheh ahi.

12 Songkul’a chun inpi ngah sepia lamkaipa soh, Hebrew mi gollhang khat ana-ume. Ama chu kamang kaseipeh lhonle, eilepeh lhonin,

13 ijakai aseibang bangin ahung umin, keima kapanna munluiya neipansah chun, anvaibolpa vang nathattai,” ati.

14 Apettah chun lengpan mi asol’in, songkul’a konin Joseph chu agapuidoh loiyuvin, aman akhamul akivo jou phat’in avon akikhel’in lengpa angsunga ahung luttai.

15 Lengpan Joseph jah a, “Mang khat kaneiyin, ledoh a hilchen thei aumtapoi; ahin nang hin mang naledoh thei thu kajai,” ati.

16 Joseph-in, “Kei hipong ting, amavang Pathenin lengpa lungmon na thei khat’in hindonbut nante,” ati.

17 Lengpan, “Kamangin Nile vadung panga kana dingin,

18 vadunga kon chun bongpi jolsel, thaotah cheh sagi ahungdoh-un, hamhing lah a ahung lhauve.

19 Chuin agon agong, gudohset sot, bongpi sagi ma ahungdoh-uvin, hitobang bongpi gong melse chu Egypt gamsunga kamukha hih laiye.

20 Bongpi gong ho chun athaoho chu aval lhumtauve.

21 Ahivangin agon ngaiya agon jeh-uvin ipi aneh-u jong akihedoh deh poi. Hichun kahung khangdoh tai.

22 Mang khat ma kanei kit’in, changphung khat’a changpal bohlep, minsa sagi kamui.

23 Chuin niso lam hui mut geosa, changpal geothit thet, sagi ma kamun,

24 changpal geosa hon changpal pha chengse chu aval lhumtauve. Kamangte ni hi mitpheldoi them ho kaseipeh vangin koiman eiseipeh thei pouve,” ati.

25 Joseph-in lengpa jah a,”Namangte ni hi tha khat ahin, abolgot ho chu Pathenin naseipeh ahi.

26 Bongpi thao sagi hi kum sagi hiding, changphal pha sagi jong chu kum sagi ma hiding ahin, aledohna tha khat ahibouve.

27 Bongpi gong sagi hungdoh ho le niso lam khohui mutgeosa changpal sagi chu kum sagi kel lhahna ding ahi.

28 Kaseipeh banga-athilbol got chu Pathenin navetsah ahitai.

29 Kum sagi sunga Egypt gamsunga neh le chah neng jeng jung ding,

30 chujou tengle kum sagi sunga kel lha ding, gamsunga kel ahahsat behseh teng, neh le chah thalhin lai kum sagi chu kisumil hel ding ahi.

31 Kel lhah chu anatsat behseh jeh a neh le chah nen phat chu kisumil del ding ahi.

32 Mang avel’a nanei kit jeh hi-Pathenin asosah tei ding ahitan, tujou teng ahin lhunsah loi ding ahi.

33″Hijeh chun miching, ijakai hethemtah khat gamsung pumpi vaipon pahsah-in.

34 Chule vaibol dang jong pansah-in lang, amahon neh nen kum sagi sungin lhosoh jouse hopnga a khat dongkhom’u hen.

35 Vaibol ho chu ahung lhung ding kum phat sungsea neh le chah lhoh khoma, khopi jouse a khol khom’a nga tupna thei tha neisah-in.

36 Hiche neh le chah ho chu ahung lhung ding kum sagi kel lhah sunga gamsung min kel douna anei diu; hitia chu mipi kel-thi lou diu ahi,” ati.

Joseph Egypt gamvaipo apansah-u

37 Joseph thilgon chu lengpa le avaibol hon pha asauvin,

38 hijeh chun lengpan ajah-uva, “Asunga Pathen Lhagao cheng, joseph sanga phajo midang mudoh jou poute,” ati.

39 Lengpan Joseph jah a ,”Pathenin hicheng namusah jeh hin, midang jouse sanga chihna giljo le hetna phajo nanei akichen jenge.

40 Hijeh a chu kagamsung vaipoa kapansah ding, kamiten abonchauva nathupeh jouse anit diu, kei ban a tha neipen nahi ding ahi.

41 Egypt gam pumpia vaipoa kapansah nahitai,” ati.

42 Lengpan amohor khutjem chu asut lhan, Joseph abupeh-in, sanakol a-opeh tai.

43 Lengte kangtalai ni lhinna a atousah-in, amasanga Joseph jabolnan lhang akisamin, “Dilsuu vo!” akiti. Hiti hin Joseph chu Egypt gam pumpi vaipon akilhentai.

44 Lengpan Joseph jah a, “Leng kahivangin, nang thu louva,Egypt gamsung pumpin khut lha le keelson abol louhel diu ahi,” ati.

45 Lengpan Joseph min chu Zaphenath Paneah asah-in, Heliopolis khopia Thempupa Potipher chanu, Asenath to akichensah tai.

46 Egypt lengpa kinbol’a apan chun Joseph kum somthum alhingtai. Lengpa vaibolna in’a akipatdoh-in gam pumpi agakholsoh keiye.

47 Kum sagi sungin lhosoh apung lheh jengin, neh le chah alhing lheh-in ahi.

48 Joseph-in hiche ho chu adongkhom khomin khopi dunga chun akhol’e. Khopi jousea avel dunga neh le chah kimuho akhol’e.

49 Chang atam behseh-in, Joseph-in telouva amoh koijeng leh Twikhanglen panga neldi lhuh kisong abange.

50 Kel kum hung lhun masangin,  Joseph-in Asenath to chapa ni ahing lhone’e.

51 “Pathenin kagimna jouse le ka-insung mite sumil theiyin eikoitai,” tin achapa lenjo chu Manasseh asah-e.

52 “Hesoh genthei kathohna gamsunga Pathenin cha eihinsah-e,”tin, achapa nina chu Ephraim asah-e.

53 Egypt gamsunga neh le chah thalhinna kum sagi chu akichaitan,

54 Joseph sei bang chunk um sagi sunga kel lhah ding chu akipantai. Gam dnag danga kel ahahsa lheh jengin, Egypt gamsung pumpia vang neh le chah aum jinge.

55 Egypt mite jong akel pantauvin, lengpa koma neh ding athumtauve. Hichun Joseph henga acheuva, asei bang banga chon din lengpan miho chu aseipeh-e.

56 Kel akhoh cheh cheh a gam pumpi alosoh phat’in Joseph-in changsal jouse ahongin Egypt mite chu chang akichohsah-e.

57 Muntin akel ahahsat behseh phat’in, vannoi kolkim vel’a konin mihon Joseph henga chang kichoh din Egypt lam ahinjon jon jenguve.

Genesis Bung 42

Egypt a chang cho dia Joseph sopite che

1 Egypt gam a chang kimu thu ajah phat’in achapate jah a Jacob’in, “Ibol’a kiveto chel chul nahiuvam?

2 Egypt gam aneh le chah kimu thei thu kajai; ikel thipai louna diuvin, cheuvin lang chang them khat gachouvin,” ati.

3 Hijeh chun Joseph sopite pasal som chu Egypt gama chang cho din acheuvin,

4 i-khat khat ti ding gin nam, Joseph penpi mong mong Benjamin vang chu Jacob’in asopite chutoh asol thapoi.

5 Canaan gama jong kel alhah tahjeh-in, Jacob chapate jong midang ho to lhonin, Egypt gama chang chon ahunguve.

6 Egypt gam vaipoa apanjeh-in, vannoi kolkimvel’a kona hung miho henga Joseph-in chang ajoh-e. Joseph sopite jong puhsuiyin ahungun, Joseph masanga aboh khup’uvin salam abol’uve.

7 Asopite amu mun Joseph –in ahepai jenin, ahivangin helou bangin abol’in, hutot thon ajah-uva, “Hoiya hungkon nahiuvam?” atileh; amahon, Canaan gama konna puhsuiya hung kahiuve,” tin adonbut’ui.

8 Aman asopite ahet vangin, asopiten Joseph ahedoh theipouve.

9 Joseph-in asopite chung change mang anei chu ageldoh-in, “Nang ho hi guhlan gal, kagamsung lhahsam nau vetoh lea hung nahibouvui,” ati.

10 Amahon, “Kahipouve kapu, nasohte puhsuiya hung kahibouvui.

11 Nasohte hi sopi khat, mi kitah cheh kahiuvin, guhlan miho dan kahi hih hel’uve,” atiuve.

12 Joseph-in ajah-uva, “Hilouve, kagamsungu lhahsamna vetoh lea hung nahibouvu vhu,” tin anotai.

13 Amahon, “Kapu, keiho hi Canaan gama cheng pasal khatseh chate kahiuvin, kabonchauva som le ni lhingsa kahiuve. Kasopiu khat athitan, alhumpen pa kapauto aum lhon’e,” atiuve.

14 Joseph-in, “Kasei chu hiya chu, aguhlan mi nahiu chu.

15 Hitia hi nakipatep diu hichu: Nasopiu lhum penpa hikoma nahin puilut masangseuva, lengpa hinlaisea napotdoh thei louhel diu ahi.

16 Khat nacheuva nanaopau nagapui diu, nathuseiyu ajou atah akiphot chet masangsea adangse hikoma nakihen diu ahi. Achutiloule, lengpa min a kasei ahi, nang ho guhlan miho nahi mongui,” atitai.

17 Hichun abonchauvin nithum sunga din songkul’a akhumtai.

18 Nithum nin Joseph-in ajah-uva, “Pathen tahsan mi kahijeh-in nahindohna thei diu thil khat bolpeh inge.

19 Mi kitah nahiu phot chetnan, nakihen nau songkul’a hin khat kidalhauvin, adangsen kel le chah a um na-insung miteu din nachohsau chang hi pon chetauvin.

20 Chule nasopiu lhumpen chu kahenga nahin pui diu ahi. Hitia nabol’u hin nathuseiyu atahdol aphot chetsah a, kathada diu ahi,” ati. Joseph thusei chu anom cheh-un,

21 khat’in khat jah a, “Isopipau ibolgenthei jeh-uva eihon genthei ithoh-u hiya hi; chubanga agenthei pettah a kithopi dia tao tao jenga eihon ki-ngaipeh lou chu. Hijeh a chu tua hiti genthei ihiu hi me,” akitiuve.

22 Reubenin, “Boipu bolset lou dia chute kiseiya, nang hon kathu ngailouvu. Tua hi ama longman sahna genthei ihiuve hi,” ati.

23 Joseph to akah-uva paole khat apanjeh-in, Joseph-in akihouna jouseu ahetlam chu asopiten ahepouve.

24 Amahon chu adalhan Joseph agakap’e. Akajouvin ahenguva ahungin, Simeon amanin amasang laitah-uva akantai.

Joseph sopite Canaan gama kile

25 Asopite chu tumbu   athun dimpeh cheh-uva, asumu jong tumbu sunga alehet peh diu, chule lampia aneh diu neh le chah agonpeh diuvin Joseph-in lhacha ho ahilchah leh, hiti chun aboltauve.

26 Joseph sopiten chang tumbu ho chu sangante apohsah-un achetauve.

27 Ajan gepa nauva, alah-uva khat’in asangan vahna dia tumbu ahondoh leh, akama asum anaum’e.

28 Aman, “Kasum einung koipeh tauve, hikoma aum’e,” tin asopite aseipeh tai. Chutah chun alung lha lhop gamtauvin, khat le khat akivetouvin, “Pathenin i-eilo bep’u hitam?” akitiuve.

29 Canaan gam, apau Jacob heng ahung lhun phat’un achunguva thilsoh abonchan aseitauve,

30 “Egypt gam vaipo pan eihutot tho jengun, ama gamsunga guhlan midanin eiseiyui.

31 Keihon,’Mi kitah kahiuvin, guhlan mihem kahipouve.

32 Kaboncha pa khat cha jeng, sopi som le ni kahiuvin; kasopiu khat vang athitan, alhumpen pa Canaan gama kapauto aum’e,’ katiuve.

33 Hichun gam vaipo pan,’Mi kitah nahi nahilouvu phot chetna,   nalah-uva khat kakoma kidalhauvin, adangsen kel le chah thoh a um na-insung miteu chang poh peh-un lang chatauvin.

34Chule nanao lhumpen pau chu kahenga nahin pui diu ahi. Chutengle guhlan louva, mi kitah nahiu heng ting, nasopi pau lepeh ing ting, nachen den’uva sumle pai nakikhol diu ahi,’ tin aseiye,” atiuve.

35 Atumbuu alhei lhah phat’uvin,asumdip’u ana umsoh keiye; sum amudoh phat’uvin, amaho jong apau Jacob jong akichauve.

36 Apauvin ajah-uva, “Kachate jouse neichansah got’u ham? Joseph la aumtapon,Simeon ma aum kit tapon, tua Benjamin napui mang kit got’u ham? Hitia hi genthei thoh a neilhau hitam!” ati.

37 Reubenin apa jah a, “Benjamin kahinle pui kit loule kachapate ni khu that jengin.Nei ngansen, kahin lepui tei ding ahi,” ati.

38 Ahivangin Jacob-in, “Kachapa pui thei pouvin nate; asopipa la athitan, achangseh a um, lam kah aikhat tileh, katehset nunga neimoh thisah lo diu ahi.

Genesis Bung 43

Joseph sopite Egypt a akileu

1 Canaan gam kel akhoh cheh cheh jengin,

2 Jacob insung miten Egypt a ahin poh-u chang anejou kit tauve. Jacob’in achapate jah a, “Cheuvin chang them khat beh neigachoh peh kit’un,” ati.

3 Judah-in ajah a, “Gam vaipo pan kasopi pau kapui louvu leh akoma eilutsah louhel diuvin eigih bouvui.

4 Kasopi pau neisolpeh diu vang le chang gachoh peh nau vinge.

5 Neisolpeh lou diu vangle chepou vinge, min kasopi pau kapui louvu leh akoma eilutsah louhel diuva seita chu,” ati.

6 Jacob’in, “I-atileh sopi khat naneiyu chu naseikhoh khoh-uva hibanga hi neibol gentheiyu ham?” ati.

7 Amahon, “Aman keiho thudol, i-insungu umdol eidonguva,’Napau hing nalaiyem? Sopi dang nanei nah laiyum?’ tia, kadonbut tei diu ngaiya chu.Kasopi pau kapui diuva asei ding lam iti kahet masah diu ham?” atiuve.

8 Judah-in apa Isarel jah a, “Kel’a ithi louna diuvin, boipu chu keito neisol than chejeng unge.

9 Kahinkho hi ama khel’in tung jeng ing ting, mop o nange. Boipu hi dam le bit’a kahinpui kit loule kahinkhon them mong’e.

10 Neilho chon chonda leu chun tua nivei beh kakile man diu ahitai,” ati.

11 Chuphat’in apau Israel’in ajah-uva, “Chuti ding mong ahile gamsunga thilsoh phalai cheh-thingnai them khat le khoiju them khat, thil namtui phabep, theichang ga phabep le jonmot chang phabep dongkhom’uvin gam vaipo pa din pouvin.

12 Nasum tumbu sunga anakoi kit jeh-uvin, hiche pum chun sum ajat nia tamjon kipoh-un, mukhel jeh a anakhum thau jong hithei ahi.

13 Nanaopau puiyun lang hung kilejel kit’uvin.

14 Benjamin le nasopiu khat jong chu nahinpeh kit theina diuvin, Hatchungnung Pathenin gam vaipopa nalungset sah-u hen. Kenvang kachate pul kadou douna kathilo pai ding ahitai,” ati.

15 Asopi Chauvin Benjamin apuiyun,thilpeh ding chengse le sun ajat ni cheh apouvin Egypt gam ajon’un, Joseph angsunga agding tauve.

16 Benjamin amu phat’in a-insung lhachapa heng Joseph-in, “Hiche ho khu ka-in lama puiyin, sun teng an kaneh khompi ding ahi, sa that’in honsan anakoiyin,” ati.

17 Joseph-in aseipeh bangin lhachapan sopicha ho chu Joseph in lama apuitai.

18 In a apuilut phat’un kiphat lam le tijat athouvin, “Iche masah-uva tumbu sunga sum kinung khum jeh a hikoma eipuilut’uva, chutengle nokhuma isangan jouseu kilah am eiho soh a nei dia eigot’u hita hi,” tin agel’uve.

19 Hijeh chun kotphunga kotngah lhachapa jeh a,

20 “Kapu, kahung puhsui masah-u chun,

21 inlam kajot nauva ge-mun a tumbu kahondoh-uleh, kasumu alhingset cheh-in kamudoh-uvin, hichu kahinpoh peh kit’uve.

22 Chule chang chohbe na din sum phabep kahin kipoh be kit nauve. Tumbe sunga sum koiya chu koi ahiding kahepouve,” tin aseiyui.

23 Lhachapan, “Kiphat lamda, tijat dauvin. Na-Pathenu, napau Pathen chun natumbu sunguva sum chu nakoipeh-u hitei ding ahi. Nasumu hi kei chang tange,” atin; Simeon chu ahenguva ahinpuidoh tai.

24 Lhachapan sopicha ho chu Joseph insunga apuilut’in, akeng silna siu twi apen, aman asanganteu avah-e.

25 Sun teng an nehkhompi dia aseijeh chun, Joseph an nea ahung teng peh din, thilpeh ding chengse chu asopiten agonsan akoiyui.

26 Joseph in a ahung phat’in, thilpeh ding ho choiyin insunga agalut’uvin, amasanga aboh khuptauve.

27 Joseph-in damle damlou thu adongin, “Napau tehsepu naseiyu chu dam a hinam? Dam jinga hing nalaiyam?” ati.

28 Amahon, “Kapau, nalhachapa dam jingin ahing nalaiye,” atiuvin, Joseph masanga aboh khup cheh-uve.

29 Anaopa Benjamin amudoh phat’in Joseph chun, “Nanao lhumpen naseipau ama hi ahiye ong? Pathenin phatthei boh-in, chapa,” ati.

30 Joseph anaopao amudoh kipa le voujangnat thon, kap lhapai ding ahinphat’in, a-indan sunga alhai lut’in agakaptai.

31 Joseph-in mai akiphet’in, kitim nah nah-in ahung potdoh-in,ankong sem ding asomtai.

32 Joseph neh ding dokhang khat’a aluiyun, asopite ding dokhang chom’a aluiyui. Hebrewte toh neh khom chu Egypt mite dia kisuhbohna agel jeh-uvin, Egypt miten achombeh-in aneuve.

33 Sopi chaho chu aupapen apat alhumpen geiyin, Joseph lam ngan akigolsah-uve. Akitousah danu aveuvin, lung dongtah-in khat le khat akiveto to jengui.

34 Joseph dokhanga konin an ahin hom’uvin, adang  sangin Benjamin chan nga apeval’ui. Hiti hin Joseph to chim avaset’in anekhom’uve.

Genesis Bung 44

Khon kimansah

1 A-insung vaibol lhachapa miho khu apoh khopset diu tumbu dimset cheh-in chang khumpeh-in, chule atumbu kam’uva asumujong kanthan.

2 Alhumpen pa tumbu kam a aching chohna sing sum le kasana khon chu kanthan,” ati. Joseph seibangin lhachapan abol’e.

3 Jingkah khovah lhah-in asopi Chauvin, asanganteu pumin asoldoh tauve.

4 Khopi adalha gamla behseh hih laiyun, Joseph-in a in-sung lhachapa jah a, “Hiche miho khu del loiyin, naphah teng,’Ibol’a kaphatnau thilsea neilethuh jengu ham?

5 Ipi dinga kapu sanakhon naguh-u ham? Hiche hi kapun phunsan na le lengpitwi donna amanji ahi. Hiche khon naguh-u vang nathemmo lheh jenguve,’tin seiyin,” ati.

6 Amaho aphah paht’in lhachapan apu seisa chu avelseiyin ahi.

7 Amahon, “Kapu, iti hitobang thu neisei khum jengu ham? Hitobang kabol louvu hetna kihahsel jeng kahiuve.

8 Katumbu sunguva kikhodoh sum geiya, Canaan gama kona kahinle poh kit’u jong nahetsa hichu me. Napu insunga dangka ham sana ham iti kaguhdoh peh diu ham?

9 Kapu, kalah-uva khon chu guhdoh a akimandoh pen pen chu kithat hen, adangse hi nadoh-in pang tau vinge,” atiuve.

10 Lhachapan, “Aphai, amavang khon kimudohna penpa chu kasoh-in pang intin, adangse vang ongdoh tauvin,” ati.

11 Hijeh chun man gangtah-in atumbuu adom lhauvin, ama ama tumbu cheh ahongdoh-ui.

12 joseph lhachapan alenpen’a pat aneopen geiyin atumbu sunguva khon chu gen ngaitah a ahinhol le Benjamin tumbu sunga amudoh tai.

13 Chutah-in asopi Chauvin lung dimnan aponsil’u abottel’uvin, asanganteu poh agotpeh-un khopi langa ahung kile kittauve.

14 Judah le asopite Joseph ina ahungu chun, Joseph jong anaum nalaiye. Joseph masanga aboh khup’uleh,

15 Joseph-in, “Idia hiti  chon nahiuvam? Kei tobang hin phunsan a nangho mandoh modia neigel’um?” ati.

16 Chuphat’in Judah-in, “Kapu, nahenga ipi kaseiyuva, iti kakihon thei diu ham? Kathuu iti kakisei theng diu hitam? Pathenin kamo nau mandoh ta hi. Khon kimudohna pa mai hilouva, kabonchauva nasoh kahiu ahitai,” tin ataove.

17 Joseph-in, “Hithei ponte, chutia kabol louhel ding ahi! Khon choidohpa chubou soh a kanei ding, adangse vang kitup keiya napau henga nache diu ahibouve,” ati.

Benjamin dia Judah taona

18 Judah-in Joseph ajonlut’in ajah a, “Kapu, neilungset’in phongtah-in nahenga thu neiseisah ta din. Neilung phatmo pehdan, nangma lengpa masap nahijenge.

19 Nangin,, “Napau um nalaiyem, sopi dang jong nanei nah laiyum?’ tin neidongun;

20 keihon,’Kapau ateh lheh jeng tan, ateh nunga ahi kanaopau jong aum nalaiye. Kanaopauvin unsung khat apenpi asopipa vang athitan, unsung khat peng ama changseh hing ahijeh-in apan alungset behseh jengin ahi,’ katiuve.

21 Hichun kapun kanaopau namu nom jeh a hikoma kahin pui diuvin  naseiye;

22 keihon vang boipun apa adalhah thei lou thu kanaseiyui; ajeh chu hindalha jengleh apan thilo tahbeh ding ahi.

23 Ahin’Nanao lhumpen pau nahin puilouvu leh kakom nahung lut thei louhel diu ahi,’ nati.

24 “Kapau heng kaphah phat’un nasei jouse ajah a kaseiyui.

25 Kapauvin Egypt gama hung kit’a neh cho dinga eisol phat’uvin,

26 keihon,’Chepou vinge; kanao lhumpen pau kapui louvu leh gam vaipopa anga eilungsah louhel diu ahi; kanao lhumpen pau kapui diu vangle che nauvinge,’ katiuve.

27 Kapauvin kajah-uva,’Kajinu Rachel’in chapa ni seh eihinpeh naheuve.

28 Khat’in la eidalhatan, ama chu sahangin abotel lheh hitantin, hitih chan hin kamukit tapoi.

29 Kakoma konin hichepa puidoh kit’uvin ikhat khat hungti jeng taleh, katehset nunga lung gima neimoh thisah lo diu ahi,’ ati.

30 “Tun chapang pui louvin, nalhacha kapa henga che taleng, chapangpa hinkho le ama hinkho hi kijopmat tobang ahijeh-in,

31 chapangpa kapuidoh amudoh tih tih thijeng thei ahin, hitia chu nalhacha kapau tehse samkangsa chu katha lo’uva, noimigam a kalhoh lut diu ahi.

32 Achungchon hin boipu hin kho din kappa komakei hinkho hi kahin tungdoh-in, boipu hi  akoma kapuilut peh loule kahinkho lhum keiya themmo chang din kakitep’e.

33 Hijeh a chu tua hi boipu khel’a keima hikoma nasoh a pang den dia kataova, ama hi asopite toh nanungsol dia ka-ngeh ahi.

34 Boipu beiya iti kapa henga kakile kit thei ding ham? Kapa lung genthei hesoh ding chu thoh jou ponge,” ati.

Genesis Bung 45

Asopite koma Joseph kiphondoh

1 Alhachate angsunga akitim lel hel’phat’in Joseph apengjah jengin, “Midangse se potdoh loiyun!” atin, asopite koma akiseidoh chun midang koima aumtapoi.

2 Othongje jua Joseph kagin chu Egypt miten ajauvin, athu hi leng inpi sung geiyin akithang luttai.

3 Asopite jah a Joseph-in, “Keima Joseph chu kahi. Kapa hing nalai nam?” ati. Asei hi asopiten ajah vangun, adatmo behseh jengun adonbutje jang ahepouve.

4 Ajah-uva Joseph-in, “Neihin naiyun,” atileh; anaiyun, Joseph-in, “Keima nasopiu Joseph, Egypt gama najoh mangpau chu kahi.

5 Tun hikoma neijoh mangjeh-un kiphat lam dauvin, themmo jong kichan dauvin, miho kihinso theina einasol masa chu Pathen ahibouve.

6 Gamsunga kel lhahna hi kum ni bou ahinalaiyin, loulho chang-at um thei louna ding kum nga aum nalaiye.

7 Son le pah naneidoh theina diuva, datmo tah a nang ho hindohsah dia, Pathenin einasol masah mong mong ahi.

8 Hijeh chun eisol masa nang ho nahipouvin, Pathen joh ahibouve. Pathenin lengpa vaibol lengpenin eikoiyin, agamsung pumpi kaponm Egypt pumpia vaihomin kapangtai.

9 “Kapa henga cheloiyun, nachapa Joseph sei ahi tin,’Pathenin Egypt pumpi vaihomin eikoitan, kinomsot louvin hung loiyin.

10 Nang le nachate, natute, nakelngoite, nakelchate, nabonghon ho chule nanei jouse le nang ho kakom naicha, Goshen gamsunga nachen diu ahi.

11 Goshen a nachen’u leh kakithopi thei diu ahi. Ajeh chu kel lhahna ding kum nga aum nalaiye; nang le na-insung mite, nagan hing thei jouseuvin kel athoh diu kanompoi ati,’ gatiuvin.

12 “Tun nabonchauvin, Benjamin geiyin, kei hi Joseph mong mong kahi namutauve.

13 Egypt gamsunga itobang tha kaneiya, ipi pi namu’vem, abonchan kappa gaseipeh-un, hikoma hinpui lut loi jenguvin,” ati.

14Chuin Joseph chun anaopa Benjamin angongkoiyin aka jengle, Benjamin jong angongkoiyin akaptai.

15 Hiti hin akap pum pumin Joseph-in asopite akoiyin achopsoh keiye. Hiche jou hin asopiten Joseph akihoupiuve.

16 Leng inpi geiya Joseph sopite hung thu ahedoh tauvin, lengpa le avaibolte akipah-uve.

17 Lengpan Joseph jah a, “Nasopite chu aganchateu poh ding kigotsah-in, Canaan gama sol’in,

18 apau le a-insung miteu gapuisah tan. Egypt gam phalai tah peng ting, aneh valset’uva gamga alo diu ahi.

19 Apau le ajiteu chule achasen ho’u apohna diuvin Egypt gama konin kangtalai ho kitolsah-in.

20 Athil keovu dalhah ding hin itdau hen; Egypt gam pha laitah chang diu ahibouve,” ati.

21 Ahil banguvin Jacob chaten abol’un, Joseph-in amaho chu, lengpa thupeh dungjuiyin,kangtalai ho apen, alam an diuvin neh le chah jong agongpeh-e.

22 Amichan cheh-in akikhelna diu von apen, Bejamin vang chu dangka jathum le von nga jen apei.

23 Egypt gamsunga thilpha lai cheh sangan som poh khomset le suhlou change kisem changlhah sangan som jen poh khomset toh, khol lam aneh ding neh le chah Joseph-in apa din asol thai.

24  Asopite asol’a akipatdoh phat’un Joseph-in ajah-uva, “Lam dunga kinapa hih hel’uvin,” ati.

25 Joseph sopiten Egypt dalhan Canaan gama apau heng ahung lhungtauve.

26 Apau jah a, “Joseph ahing nalaiyin, Egypt pumpia vaihomin apange,” ati vangun, Jocob’in atahsan pon, imachan jong agelpeh poi.

27 Joseph-in ahil jouseu aseipeh-uva, Egypt gam jon’a ama pohna dia Joseph-in kangtalai ahinsolpeh ho chu Jocob’in amudoh phat’in ahaldoh tan,

28 “Kachapa Joseph ahin nah lai cha chu! Aval um lou ahitai! Cheloiying ting kathi masanga ama kamutei ding ahi,” ati.

Genesis Bung 46

Jacob le a-insung Egypt gam jot

1 Jacob chu anei jouse toh akitol than, Beersheba ahinphah phat’in a’a Isaac Pathen henga kilhaina abol’e.

2 Hiche jan chun Jocob’in mu aneinaa Pathenin ahenga thu aseiyin, “Jacob, Jacob,” tin akouve. Jacob’in “Hoi,” tin ahouve.

3 “Keima Pathen, napa Pathen kahi. Egypt a nachilhah nam lentah kasosah ding ahi.

4 Egypt geiyin nalhon ping ting, nachilhah jouse hiche gama kahin puidoh kit ding ahi. Nathi teng jongle Joseph-in natoupi ding ahi,” ati.

5 Jacob Beersheba a konin akipatdoh tai. Egypt lengpan apohna diuva ahinsolpeh kangtalai hao chun Jacob chaten apau le ajiteu chule achasen jouseu akhum’un atoltauve.

6 Canaan gamsunga alamdohsau ganhing jouse le agou chengseu pon Egypt tam jontauve. Jacob’in ama chilhah chengse:

7 achapate, atupase se, achanu chengse le atunu chengse apuisoh keiye.

8 Jacob sungkon Egypt’a hung chengse chu: Jacob le achapate, achapa lenpen Reuben ahin,

9 Reuben chapate: Hanoch, Pallu, Hezron chule Carmi ahiuve.

10 Simeon le achapate chu Jemuel, Jamin, Ohad, Jachin, Zohar le Canaan numeinu chapa Shaul to ahiuve.

11 Levi le achapate: Gershon le Kohath to Merari ahiuve.

12 Judah le achapate: Shelah, Perez, chule Zerah ahiuve. Canaan gama thiden Judah dang chu Er le Onan ahi. Perez chapate ni chu Hezron le Hamul ahi.

13 Issachar le achapate: Tola, Pauh, Jashub chule Shimron ahiuve.

14 Zebulun le achapate: Sered, Elon chule Jahleel ahiuve.

15 Achanu Dinah sim louva, hichengse hi Mesopotamia gama Leah-in Jacob ahinpeh achapate ahiuve. Leah hin Jacob chilhah chengse somthum le thum alhinguve.

16 Gad le achapate: Zephon, Haggi, Shuni, Ezbon, Eri, Arod chule Areli ahiuve.

17 Asher le achapate: Imnah, Ishvah, Ishvi, Beriah chule asopinuu Serah ahiuve. Beriah chapate ni Heber le Malchiel ahi.

18 Hicheng Jacob chilhah som le gup hi Labanin achanu Leah akenpeh, Soh nu-ngah Zilpah-in Jocob ahinpeh ahi.

19 Ajinu Rachel’in Jacob chu chapa ni ahinpeh-in, amani chu Joseph le Benjamin ahilhone.

20 Egypt gama Heliopolis khoa Thempupa Potiphera chanu Asenath chun Joseph, chapa ni, Manasseh le Ephriam ahinpeh-e.

21 Benjamin chapate chu Bela, Becher, Ashbel, Gera, Naaman, Ehi, Rosh, Muppim, Huppim chule Ard ahiuve.

22 Hicheng Jacob chilhah som le li hi Rachel akon ahiuve.

23 Dan le achapa Hushim ahi.

24 Naphtali le achapate: Jahzeel, Guni, Jezer chule Shillem ahiuve.

25 Hicheng Jacob chilhah mi sagi hi Labanin achanu Rachel akenpeh, sohnu- ngah Bilhah chun Jacob ahinpeh ahi.

26 Achapate ji ho simtha louvin, Egypt gam ache Jacob chilhah mihem somgup le gup alhinguve.

27 Egypt gama peng Joseph chapa te ni pumin, Jacob insung mi Egypt gam lut chengse som sagi alhinguve.

Egypt a Jacob le a in-sung mite

28 Goshen a amaho to kimuto din, Jacob’in Judah asol masan Joseph agakousah-e. Agalhun phat’un,

29 kangtalai akigot’in apa kimuto pi din Joseph Goshen a achetai. Akimuto phat’uvin Joseph-in apa ngong akoiyin phat sotpi akap’e.

30 Jacob’in Joseph jah a, “Tun vang hing le dam a namai kamu ahitan,thi jong leng aphatai,” ati.

31 Asopite le apa insung mite jah a Joseph-in, “Canaan gam a cheng kapa insung mite le kasopite chengse nahungu hi lengpa kagaseipeh loi ding ahitai.

32 Kelngoi ching mi nahiuva, gancha vulte nahiu, chule nanei jouseu le kelngoi hon, bonghon nahinpui jengu hi lengpa jah a kasei lou khoh ahi.

33 Lengpan nahin kouvuva itobang natong mi nahiu  nadoh tengule,

34 napu napauva pat gancha vul mi nahiu phate cha naseipeh diu ahi. Hichea kona chu Goshen gama nachensah diu ahi,” ati. Joseph-in hiche asei masah hi Egypt miten kelngoi ching miho athet jeh-u ahi.

Genesis Bung 47

1 Joseph-in asopite mi nga lengpa henga apuitai. Lengpa jah a Joseph-in, “Anei jouseu le bonghonte, kelngoi honte pumin kappa le kasopite Canaan gama konin ahungtauve. Tuhin Goshen gama aum’ui,” ati.

2 Joseph-in asopite lengpa henga apuilut leh,

3 Lengpan ajah-uva, “Itobang natong mi nahiuvam?” tin adonge. Amahon,”Kapu, keiho kapu kapateuva pat kelngoi ching mite kahiuve.

4Canaan gamsung kel akhoh behseh jengin, gancha vahna ding hamhing geiya abei phat’a hiche gamsunga kachen thei diu ham, tia hung kahiuve. Lungset’in Goshen lhanga khun neichensah tauvin,” atiuve.

5 Lengpan Joseph jah a, “Napa le nasopite lom nahenga hung ta,

6 Egypt gamsung jong amaho gam ahithouve. Gampha laitah, Goshen lhanga chensah-in lang, alah-uva apang thei aum diu jongle, keima ganchate ching din pansah jengin,” ati.

7 Apa jocob jong joseph-in lengpa henga ahin luilut’in, Jacob’in lengpa chu phatthei aboh-e.

8 Lengpan Jacob jah a, “Kum ijat nahitah em?” tin adonge.

9 Jacob’in, “Kakhopemle na kumjat hi jakhat le somthum alhingtan, kapu kapate khopemle na kumjat aphapon, kum lhomcha, hinkho nomlou tah kahi,” ati.

10 Jacob’in lengpa chu potdohna din phatthei aboh kit’in apotdoh paitai.

11 Lengpa thupeh dung juiyin, Remeses khopi kom, gampha laitah achen mun diuvin Joseph-in apen, apa le asopite chu Egypt gamsunga achensah tai.

12 Chapang naosen ho geiyin, apa insung mite jouse le apa le asopite chengse Joseph-in neh le chah apei.

Gamsung kel lhah

13 Kel ahahsa behseh jengin, neh le chah abeitan, Egypt gam mite le Canaan gam mite jong akigen chat pai ding ahitauve.

14 Mihon chang achoh nau sum jouse chu Joseph-in leng inpia apolut tai.

15 Egypt gam le Canaan gamsung sum amanjou hel phat’uvin, Egypt mite joseph henga ahungun, “Sum kamang joutauve! Neipan piuvin, neh le chahneipeuvin; neimoh thisah hih hel’un,” tin a-ngeh-ui.

16 joseph-in, “Sum nanei louvu ahitah le, naganchau hinkaiyun chang to kilheh-ute,” ati.

17 Hijeh chun mihon asakolteu, akelngoiteu, akelcha ho’u, bong ho, chule asangantei geiyin Joseph henga ahinkaiyun, aman din Joseph-in neh le chah apei. Hiche kum hin aganchateu man din Joseph-in neh le chah akhangtauve.

18 Kumkit’in Joseph henga ahungun, “Kapuu henga imding aumtapoi,kasumu la abeitan, kagancha jouse jong nang nachangtan, katahsau le kagam leiset’u tilou imacha dang kanei tapouve.

19 Neikithopiuvin, neithisah hih hel’un, kagamu jong alheng alhol’in kijamsah dan. Neh le chah man din keiho le kagami kilah tan. Kihinsona din chang neipeucin, gamsunga katu diu muchi neipejo’uvin,” atiuve.

20 Kel ahahsat behseh jeng phat’in Egypt miten agam ajoh joh jengun, Joseph-in abonchan lengpa din achon, hiti hin gam leiset pumpi lengpa achangtai.

21 joseph-in Egypt gam mi abonchan, gam mong lang khat’a pat alang geiyin soh-in achodoh tai.

22  Thempuho chenna gamsung vang achopoi; Thampuho hi lengpan avah tho ahijeh-in, joh ding gam jong aneipouve.

23 Mipi jah a Joseph-in, , “Nagam pumpiu le nang ho hi lengpa dia kachohsa nahisoh tauvin, muchi hi kipoh-un nalouvuva gatu’vin.

24 Chang-at teng hop nga a hop khat lengpa napeh diu ahi. Aval chengse vang chu nang ho le na-insung miteu vahna, chule changchia nanei diu ahi,” ati.

25 Amahon, “Kapu, naphatjeh a neihinsou ahitan, keiho jong lengpa soh-in pang jeng unge,” atiuvin ahi.

26 Hichea kon hin Joseph-in Egypt gamsunga lousoh chang hop nga a hop khat lengpa peh ding dan chu asemdoh tai. Hiche dan hi tuni geiyin akimang jinge. Thempuho gamsung chubou lengpan alah lou ahi.

Jacob thusei nukhahpen

27 Israelte chu Egypt gam, Goshen mun a anachengun, ahaodoh-un cha le nao tampi ahinguve.

28 Egypt gamsunga Jacob chu kum som le sagi anachengin, ahinkho kum jakhat le som li to sagi alhinge.

29 Athi ding konin Jacob’in achapa Joseph akouvin ajah a, “Egypt gamsunga neivui louna din kakhel kah tuh-in kihahsel’in.

30 Kapu kapate lupna eikivui din kadeiye; Egypt gamsunga neipodoh-in lang kapu kapate kivuinaa neivuiyin,” ati. Joseph akihahsel phat’in, Jacob akipah-in ajal  khuna Pathen athangvah-e.

Genesis Bung 48

Jacob’in Ephraim le Manasseh phatthei aboh

1 Chomkhat jouvin apa nat lel thu Joseph aseipeh tauve. Joseph-in achapate ni, Manasseh le Ephraim apuiyin apa koma achei.

2 Achapa Joseph ama vedia hung chu aseipeh phat’un, Jacob aki-engbol tenin ajalkhuna atoudoh-e.

3 Joseph jah a Jacob’in, “Canaan gam, Luz khopia Hatchungnung Pathen kahenga ahung kilah-in phatthei eiboh-e.

4 Pathenin kajah a,’Cha le nao tampi kahinsah a, nachilhah namlen tah tah hung hidiu ahi; hiche gam hi tonsot chen mun dia nachilhahte kapeh ding ahi,’ tin anaseiye.

5 “Joseph, kahung masanga Egypt gama peng nachapae ni jong keima ahilhone. Ephraim le Manasseh hi kachate ni Reuben le Simeon tobang bang ahilhon’e.

6 Tukal cha neibe jongle chun keimia kisim lou ding, Ephraim le Manasseh guiya bou gou alo diu ahi.

7 Nanu Rachel jeh a hitia hi kibol nahi. Mesopotamia kona kahung kile kit chun, Canaan gamsung, Ephrath a kona gamla behseh lou mun khat’a athin, kadou lel behseh jenge. Ephrath lampama nanu chu kavuitai,” ati. Ephrath hi tua Bethlehem kiti khu ahitai.

8 Joseph chapate ni amudoh phat’in Jacob’in, “Changpangte ni hi koi hilhon am?” tin adonge.

9 Joseph-in, “Pathenin Egypt gamsunga eihinsah kachapate ni chu ahilhone,” ati. Jacob’in, “Phatthei boh-inge, hinpui lut’in,” ati.

10 Atehset behseh tahjeh-in Jacob mit athimin kho amuchen thei tapoi. Chapangte ni chu Joseph-in ahinpuilut leh, Jacob’in akoiyin achoptai.

11 Joseph jah a Jacob’in, “Nang mai mukit ding jong kinemlou kahitan, Pathenin nachate geiyin eimusah kit’e” ati.

12 Chapangte ni chu Joseph-in Jacob pheichunga konin adom lhan, ama geiyin tola aboh khuptai.

13 Joseph-in Ephraim chu Jacob veilama aboh khupsah-in, Manasseh chu ajet lama aboh khupsah-e.

14 Ahivangin Jacob’in akhut te ni apelton, adongjo ahivangin, Ephraim luchunga akhut jetlam akoiyin, aupajo ahivangin Manasseh luchunga akhut veilam akoiye.

15Jacob’in Joseph phatthei aboh-in: “Kapu le kappa Abraham le Isaac hou, Pathenin hiche chapangte ni hi phatthei boh hen! Tuni geiya eipuile jing, Pathenin amani hi phatthei boh hen!

16 Kisuh khah theina jousea eihoidoh jing,  Vantil chun amani hi phatthei boh hen! Hiche chapangte ni jal hin, Kei le kapu Abraham kapa Isaac min loiyang thang hen! Hiche chapangte ni hin, Cha le nao, son le pah tampi hing lhon hen!” ati.

17 Apan akhut jetlam Ephraim chunga angap chu Joseph-in nommo asan, apa khut chu Ephraim luchunga kona lahdoh a Manasseh luchunga koisah din agoi.

18 Hijeh chun apa jah a, “Chuti ahipoi hepa, hiche hi a-upajo ahi, aluchunga nakhut jetlam koiyin,” ati.

19 Apa adan, “Kahenai, kacha kahenai. Menasseh chilhah jong vaipi minthang tah hung hinante; ahin anaopa hi ama sanga hung lenjo ding, achilhahte jong namlen tah hungsoh diu ahi,” ati.

20 Hiche nikhon Jacob’in Ephraim le Manasseh phatthei aboh-in, “Phatthei akiboh tengule Israelten nangni min aman’uva,’Pathenin Ephraim le Manasseh bangin nabol hen!’ kiti diu ahi,” ati. Hiti hin Jacob’in Manasseh sangin Ephraim amasat sah jotai.

21 Chuin Jacob’in Joseph jah a, “Ven, kathi ding ahitai, hijongle Pathenin naumpin tin, napu napa gamsunga napuilut kit ding ahinai.

22 Kathalpi le kachemjam hemhat’a Amor mite kalah pehsa, gampha tah Shechem khu alhang pumpia, nasopite koima dang pelouva, nang kapeh nahi,” ati.

Genesis Bung 49

Atan kona Jacob thusei

1 Jacob’in achapate akoukhomin, “Hung kibem’uvin, khonung thilsoh ding seipeh unge:

2 “Hung kikhomun, ngaiyuvin Jacob chapate. Napau Israel thusei Ngaiyuvin.

3 Reuben, kachapa tahpen, Kahin masah pen, Kathahol janga peng nahi. Kachapate lah a kichoi sangpen le ahatpen.

4  Twiaihbanga dingdet lou nahin, Thupin jong hung pandan. Ajeh chu kathaikemnu naluppin, Napa jalkhun nasuboh-e.

5 “Simeon le Levi sopi nahi lhonin, Namanchah lhon pumhat thil bolnan namang lhone.

6 Akiguh houna lhona pang ponge, Akikhopna lhona jong pandange; Ajeh chu lunghan jeh-in mihem athat lhonin, Akichep lhona bongchalte jahol asat bailhone.

7 Alunghan behseh lhon jeh-in Gaosap chang jeng lhon hen; Alunghan lhon giloutah chu Gaosap chanlo lhonta hen. Israel gamsung pumpia kathe chehsoh a Amite lah a kahopel soh ding ahi.

8 Judah, nasopiten naseiphat diu, Namelmate alol’a nakai ding ahi.Nasopite changes jong Namasanga bohkhup diu ahi.

9 Judah hi sakei bahkai tobang ahin, Sa gathat’a akosunga hung kile kit, Kitaulea kol ji, Koiman aphonkin ngam lou tobang ahi.

10 Judah-in leng tenggol achoi ding, Achilhahte vaihoma pang jing diu; Namtinin kai apeh-uva, Amasanga kuna athu angai cheh diu ahi.

11 Lengpigui jeng jong sangan nou hen nan amangin, Lengpigui phapen jong gancha hen nan aneiye. Aponsil ho sopna lengpitwi chih aman ding ahi.

12 Amit changte ni lengpitwi kham bangin asanin, Aha jouse bongnoi don bangin abangsel’e.

13 “Zebulun Twikhanglen panga cheng ding, Kong kaimuna hung pang ding; Sidon geiya agamgi hung lhung ding ahi.

14 “Issachar ni sangan hat’a hat bep, Achunga kijam thilpohna kah dunga kolle bep ahi.

15 Ahivangin choldo munpha amun, Agamsung jong deichat aum’e. Hijeh chun thilgih podin abungin, Min sohna atohsah-e.

16 “Dan hi amite chunga vaihom ding, Israel phung ho banga um diu ahi.

17 Dan hi lampama gul-ha tobang ding, Lamsih a gulse tobang ding; Sakol chung toupa kinung thol lhah ding ahi.

18 “O Pakai, nahuhhingna ka-ngah jinge.

19 “Gad hi guchaten bulun tin, Ahivanga aman ajoa adeljam ding ahi.

20 “Asher gamsunga anpha pha kon ding, Lengpa neh thei antui lai lai alhodoh ding ahi.

21 “Naphtali hi sakhi kinunkho lai, Sakhi nou hoitah tah hingdoh thei ahi.

22 “Joseph hi twisam phunga gamlah sangan tobang ahin, Lhang panga sangan nou tobang ahi.

23 Amelmaten hamve vun ahindel’un, Thalpi le thalchang thon ahindel’uve.

24 Ahinla athalpi adet jing nan, Aban tha agol jing nai. Hatchungnung Jacob Pathen thahat vang ahin, Kelngoi chin banga Israel chingpa vang ahi.

25 Napanpia hi napa Pathen ahin, Hatchungnung Pathenin phatthei naboh-e.Chung a konin phattheina gohong napen, Lei noiya twipi thuh tah nakholpeh-e. Gancha tampi le cha le naovin vang napen,

26 Changle mim, pahchan vang naboh-e. Gollui lai molsanga kon vangbohna, Tonsot lhang sanga konin kipana thilho napen; Vangbohna hijat hi Joseph chunga chu hen, Asopite lah a kiloikhenpa chunga kitahjalhen.

27 “Benjamin hi kamkei lop tah tobang ahin, Jingkah nilhah-in sa athatjin anejitai,” ati.

28 Hicheng hi Israel phung som le ni ahiuvin, achang cheh-uva akilompi cheh, apauvin kilhahna a achapate aseipeh thu chu hicheng hi

ahi.

Jacob thi chule avuiyu

29 Jacob’in achapate thu apen, “Tua kathia kamite toh kigomdia che ding kahitai. Hit mi Ephron loulaiya songko, kapu kapate kivuina,

30 Canaan gamsung, Mamre niso lam, Machpelah a chun neihin vuiyun.

31 Hikoma hi Abraham le ajinu Sarah avuiyuva, Isaac le ajinu Rebecca jong avuiyu, Leah vuina kaneina chu ahi.

32 Aloumun le asunga songko chu Hit mitea kona chohsa ahitai. Hikoma hin neihin vuiyun,” ati.

33 Jacob’in achapate ahilsoh kei phat’in, alumin athipaitai.

Genesis Bung 50

1 Joseph chu apa chung vohnan akineiyin, apeng jah jengin amai achop’e.

2 Alhachate chu apa tahsa mon mang thei louna dia limbol din Joseph-in aseipeh-e.

3 Mon thei louna dia limbolna hi nisom li lutji ahi. Egypt miten Jacob chu nisom sagi sungin pul adouvui.

4 Jacob pul douna phat akichaiyin Joseph-in leng vaibol ho jah a, “Lungset tah-in lengpa koma neiseipeh-un,

5 kapan athi konin, Canaan gama asemsa lhan sunga along kagavui teina din eikihahselsah-e.’Hijeh chun neisol’in lang kapa gavuiying ting, hung kilekit nange,’ tin aseiyeneitipeh-un,” ati.

6 Lengpan, “Nakihahselsah bang chun chen lang napa gavuitan,” tin aseipehtai.

7 Hiti chun apa vui din Joseph achetai. Lengpa vaibol ho le athupi mun a upa chengse, Egypt gamsunga lamkai hon Joseph alhon piuve.

8 Joseph insung mite le asopite apa insung mi jousen jong Joseph chu alhonpiuvin ahi. Chapang neo behseh ho le akelngoiteu, kelcha ho, chule bong hon ho chubou Goshen mun a dalhauve.

9 Mihonpi, kangtalaiya tou loi, sakol chunga touloi pumin Joseph akilhonpin ahi.

10 Jordan vadung niso lam, Atad changphol ahinphah phat’un kap le pengin phat sotpi pul adouvun, ni sagi sungin Joseph-in thi-op kin abol jing jenge.

11 Atad a apul douvu Canaan miten amudoh phat’uvin, “Egypt mite thi-op kinbol hi anasa lheh jenge,” tin aseiyui: Hijeh chun hiche mun chu Abel Mizzraim akisah dentai.

12 Apauvin ahilnau bangin Jacob chapaten abol’un,

13 Jacob long chu apouvin, Abrahamin Canaan gamsunga Hit mi Ephron henga lhanmol dia achohsa, Mamre niso lam, Loulaiya Machpelah songko sunga agvuitauve.

14 Apa avuidoh  phat’in Joseph chu asopite le thivuiya akilhonpi chengse toh Egypt gama ahung kile kittauve.

Joseph-in avel’a asopite kinepna aseipeh

15 Apau thi nungin Joseph sopiten, “Inabolsetna jouseu lethuh gon Joseph hin eihotbol jeng taleu iti ding ham?” akitiuve.

16 Hijehchun Joseph henga thu agah thot’un, “Athi masangin ipauvin

17’Nachunga nasopiten thilse abol’uva dih louva nabolnau chu ngaidamun, tin kaseiye,’ ati. Hijeh chun tun napa Pathen lhacha pang keihon nachunga thilse kabol jouseu chu nei-ngaidamun,”atiuve. Hiche thu ajahdoh chun Joseph akaptai.

18 Asopite atahsa mongin ahungun Joseph masanga aboh khuptauve. “Neiveuvin, kabonchauva nasoh kahitauve,” tin aseiyui.

19 Ahinla Joseph-in ajah-uva, “Kiphalam hih hel’un; ken Pathen pam mun kakhel theipoi.

20 Kel hibang lah a tunia kiihinso thei mihem hijat hinkho huhhingna dinga, kachunga thilse nagonu chu Pathenin thilphajoa aheidoh ahitai.

21 Nakichatna diu aumpoi. Keiman nang ho le nachateu neh le chah khang nau vinge,” ati. Hiti hin Joseph-in alungu sukha tah thu cheng jeng amangin, amaho chu avel’in akinepsah kit’e.

Joseph thi

22 Egypt gamsunga Joseph apa insung mite to achingkhomin, kum jakhat le som khat lhinin athi.

23 Ephraim chate le atute geiya mutheiyin Joseph ahinge. Insunga Manasseh chapa Machir chate ti kichem theiyin jong anahingin ahi.

24 Asopite jah a Joseph-in, “Keima thi ding kahitai, hijongle Abraham, Isaac chule Jacob henga kichentah a akitepna dungjuiyin, Pathenin apeh ding gamsunga chun nahinpui lut tei nauvinte,” ati.

25 Hichun Joseph-in amite akitepsah-in, “Pathenin nateppeh nau gamsunga napuilut ding tengu leh, kalong hi napoh lut tei diuvin kitep’uvin,” atitai.

26 Hiti hin kum jakhat le som khat lhinin Joseph chu Egypt gamsunga athidentai. Mihon along chu amon thei louna din alimbol’uvin, thikong sunga akoitauve.

Genesis kiti Semtil bu kichai ta.

 

3 comments to GENESIS KITI SEMTIL BU

Leave a Reply

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>