Myanmar Danpi leh Houthu dol

KCBA Thusimbu (1997:16) sunga “Denomination kikhenna hi Kuki chate ding’a gal lenpen khat le jendamloi ding’a vat natna khohtah khat ahitai” tin aki sun e.

Ecumenical Movement che pi hon “Unity in Diversity” ti hi ache piu ahi. Hichen asei nom chu “Pawl chom chom a um jong leu hen, khat le khat ki het thema, pan khom toh khom ding” ti ahi.

Hiche pom dan hi gam len chom chom (UK, USA, Italy ti ho) ho chule jat le nam len chom chom (English, American, Romans ti ho) ho, chule ham le pao ki bang lou chom chom a ding apha nai.

Kho neo, in 20, 30, 100, 200 vel a cheng, in sung khat, phung le chang ki bang, kho neo vel a cheng ho ding in, pawl chom choma um a kihet them ding “Unity in Diversity” ti sang hin KHAT a um joh chu avat jon ahi.

Christian lamkai kim khat hon Tahsan pom dan (Doctrine) gah tah a nei adei un, ama ho pawl leh mi dang pawl kibah lou dan pha te chan aki sem un, hichu mi dang toh kibah lou na dinga ki sem ahi jeh in, mi dang toh aki loi khom thei pon ahi.

Christian khat hi na a chu Pathen itahsan nao chu kichehtah, dettah leh kituptaha nei ding chu athu pi nai. Ahin Christian dang ho toh kivop thei lou na khopa chena lhong pi kisem chu Pathen dei hi nan tem?

Chule Myanmar gamsunga houthua kiloikhomna hon Registrar nei leh nei lou iki ha doh un ahi. Hiche hi lamkai ho leh mipi hon Myanmar gam chena lhongpi (constitution) um dol ihet doh jou lou jeh u ahi.

CCM Thusimbu (2000:7) sunga CCM Registration lopnia Tamu khopia Sorkal lamkai U Kyaw Aung houlimna akisut na a “Christian Church kiti hi min dih tah ahi…. Hou kiti hi Registration bol angai pon, Dan na jong aum poi. Ahin pawl tam tah in register abol tah jeh abou na bol u ahi tin patchatna nasatah in apen ahi” tin aki sun e.

Myanmar Sorkal Danthah Kisem (1988:28) sunga kiloikhomna nei ho dinga kisem dan No 4/b sunga “Houthu lam kiloi khomna hon register bol angai poi” tin aki sun e.

Myanmar Constitution (2008:34: Page 9) sunga “Hiche danbulpi toh aki kal na aum lou leh, gamsung mite koi hi leh ama tahsan dung juiya ama hou chu chamlhat taha aki hou thei ahi” tin aki phong doh e.

Dr Nehkholal

March 10, 2013