Thempu Dan

Thupat na

Leviticus kiti Thempu Dan a hi khanglui lai Israelte lah a Pathen houdol le houkinbolje chule hiche houkin dola kisalel Thempuho toh ding kindol jouse kisun ahi.

Thempu Dan akidoipen chu Pathen Thenje le amiten ahou ding dol’u, chule Pathen to kiloikhoma hin jing theina, hiche “Israel Pathen Theng” to kikhen kang lou ding hi ahi.

Hiche lekhabua kihahet pen lai chu 19:18 Lai, Jesun thupeh nina ahisah: “Nang naki-ngailut bangin naheng nakom ngailun,” kiti hi ahi.
Asung thu hop khen

Kilhaina le thilto ding Dan ho 1:1-7:38
Aaron le achapate Thempu dia thensona 8:1-10:20
Housan athenle thenlou dol 11:1-15:33
Thoidam nikho 16:1-34
Hinkho sungle Pathen houpet’a thenje 17:1-27:34

Thempu Dan Bung 1

Pumgo thilto

1 Pakai chenna ponbuh a konin Pakaiyin Mose akouvin, aban a kisei ding Dan chengse hi
2 Israelte din apen, kilhaina abol tengu ajui diuvin aseiye. Khattouvin kilhaina abolnom le bong ham, kelcha ham ato thei ahi.
3 Pumgo thilto dia bong ato dingle, nolnabei bongchal ato ding ahi. Bongchal chuPakai chenna ponbuh kotphunga, Pakai santhei dol’a akailut ding ahi.
4 Kilhaina bolpan bongchal chunga khut ngamin tin, chonset pomang dia kilhaina kisanpeh ding ahi.
5 Kotphunga chu akilhaipan bong atha ding, Aaron chate Thempuhon thisan chu dom’un tin, ponbuh kotbul’a kikoi maicham kimvel’a athethang diu ahi.
6 Chujou teng bongvun lip’in tin, asemtel ding,
7 Thempuhon maicham chunga thing koiyun tin, mei ahal diu ahi.
8 Mei chunga sahal le aluchang chule athaoho geiya agovam diu ahi.
9 Akilhaipan sungsa ho le anungkengte ni asop thenga, Themput kinbol pan kilhaina sapum chu maicham phunga agovam ding ahi. Hiche sa kilhut gimnamtui hi Pakaiyin adeiye.
10 Kelngoi ham kelcha ham atojong le, nolnabei, achal hi ding ahi.
11 Maicham sahlam a atha ding, Thempupan thisan chu maicham kimvel’a athe thangsoh ding ahi.
12 Kilhaina bolpa sa asempan soh teng, Thempupan asa pumpi, alu le athao jouse geiya meiya agovam ding ahi.
13 Akilhaipan sungsa ho le anungkengte ni asop theng ding, Thempupan kilhaina sa chu Pakaiya ato ding, apumpia maichama agovam ding ahi. Hiche sa kilhut gimnamtui hi Pakaiyin adeiye.
14 Pumgo thilto dia vacha toh nomin vang, vakhu ham vapal ham to angaiye.
15 Thempupan maichama agatoa, lol ahetanpeh ding, alu maicham a agovam ding ahi. Athisan jouse maicham maiya kilhoh ding ahi.
16 Achang-oi chu asunga neh khol ho pumin khoh lhantin, maicham nisolam, vutvam sunlhahnaa chu apai ding ahi.
17 Alhate nit uh-in tin, atahsa abokeh ding, alha bot lha louva, maicham chunga apumpia agovam ding ahi. Hiche sa kilhut gimnamtui hi Pakaiyin adeiye.

Thempu Dan Bung 2

Chang thilto dol

1 Khattouvin Pakaiya chang ato dingle, amasa agoibong masah ding ahi. Olive thao le gimnamtui to ahal’a,
2 Aaron Thempute henga ahinchoi ding ahi. Thempu kinbolpan changbong khut dim le thao to chule gimnamtui abonchan lan tin, Pakaiya aboncha kikatdoh vetsahna maicham a agovam ding ahi. Hiche thilto kilhut namtui hi Pakaiyin adeiye.
3 Chang thilto amoh chengse vang Thempuho chang ding ahi; Pakaiya tosa kiladoh, thil theng pen khat ahi.
4 Lhumphunga kansa changlhah thilto ding ahile, cholsolou hiding ahi. Changbong neldi le olive thao to kihal, changlhah pheng paset hithei, ahiloule olive thao to halsa changlhah bempel a kimehchahsa hithei ahi.
5 Khangbel’a kansa ahidingle, olive thao to halsa changbong, cholsolou hiding ahi.
6 Pathen henga thilto dia napeh teng hehbal bal’un thaotwi chap khum’uvin.
7 Thilto ding chu khangbel akan ding ahile, changbong le olive thaotwi meh hai ding ahi.
8 Pakaiya thilto din choiyin Thempupa pele chun, aman maicham phunga gakoitante.
9 Aboncha Pakai dia kitohdoh dol’a Thempupan them khat ahamdoh a, maicham phunga alhutvam ding ahi. Hiche neh le chah thilto gimnamtui hi Pakaiyin adeiye.
10 Govam mohse vang Thempuho chan ding ahitai. Pakai dia todohsa lah a kilahdoh ahijeh-in thil thengpen khat ahitai.
11 Pakai dia natodoh chang thilto khat cha jong cholsolou ding ahi. Pakai henga neh le chah thilto khat cha jong chol le khoiju to nahal lou ding ahi.
12 Kumseh a nalhosoh lhung masa thilto ding chu Pakai heng lhut masah ding, maicham phunga govam louding ahi.
13 Chang thilto pou pou chi naso ding, chi hin nang le Pathen kah akitepna umdol avetsah ahi. Nathilto jouse chi naso cheh ding ahi.
14 Lhosoh lhung masa Pakai henga nato teng, changkung thah, changvuiya kivo-lha tilcha, kihulgo hi ding ahi.
15 Olive thaotwi chap khumin lang, gimnamtui the khumin.
16 Milmo dia Thempun hiche neh le chah chule thaotwi chu agovam ding, gimnamtui puma chu dol’a agovam ding ahi.

Thempu Dan Bung 3

Kiloikhomna thilto

1 Khattouvin bong khat ham kiloikhomna dia thilto apeh agot le, nolnabei bongchal ha bongpi ham hiding ahi.
2 Atohdoh pan bong chunga khut a-ngap’a, Pakai chenna ponbuh kotphunga atha ding ahi. Aaron Themputen thisan chu maicham kimvel a athe chansoh diu,
3 chule Pakai henga atodoh diu sakin chengse chu: sasung thao jous,
4 akalte ni, akalte ni thao pum, athin laigil to hiding ahi.
5 Hicheng hi Thempuhon pumgo thilto puma maichama agovam diu ahi. Hiche neh le chah thilto gimnamtui hi Pakaiyin adeiye.
6 Kelngoi ha kelcha ham kiloikhomna thiltoa peh ding ahile, anu hihen achal hile akhohpoi, amavang nolnabei hi ding ahi.
7 Khattouvin kelngoi ato le,
8aluchunga khat ngamin tin, ponbuh maiya atha ding ahi. Thempuhon thisan chu maicham kimvel’a athe chansoh diu,
9 chule Pakai henga ato diu sakin chengse chu: sathao chengse, ameikung geiya ahtaosa se, asung thao chengse,
10 akalte ni le athaose se, athin hoilai tah to hitha ding ahi.
11 Kinbol Thempun aboncha hi maicham chunga neh le chah thilto dia Pakai dia agovam ding ahi.
12 Khattouvin kelcha ato le,
13 aluchunga khut a-ngap’a ponbuh maiya atha ding ahi. Thempuhon thisan chu maicham kimvel’a athe chansoh diu,
14 chule Pakai ding neh leh chah thiltoa pehding sakin chu: asung thao jouse,
15 akalte ni le athao, athin hoilai tah to hiding ahi.
16 Thempun hichengse hi neh le chah thilto, Pakai deiya, maicham chunga agovam ding ahi.
17 Israel mi koiman sathao le sathi aneh thei lou ding ahi. Achenna chan’uva, akhang khanga hiche Dan hi anit jing jeng diu ahi.

Genesisi Bung 4

Tosoi chonset jal’a thilto

1Pakaiyin Mose aseipeh-in,
2 Israel mi koi hile lung tup neilou, tosoiya Pakai thupeh ho palkeh a chonse jousen aban a kisei chondan ho hi anit diuvin ahil’e.
3 Thempu chungnung tosoiya achonset a mipi chunga themmona alhut khum khah le, nolnabei, bongchalgol khat atoa, Pakaiya chonset lhaina anei ding ahi.
4 Bongchalgol chu ponbuh kotphunga ahinkailut ding, aluchunga khut a-ngap’a, Pakai chenna muna chu athaden ding ahi.
5 Thempu chungnungin bongchalgol thisan phabep pohbuh sunga adoplut ding ahi.
6 Thisan chu khut junga akhoiya, pondal theng maiya sagi vei athe thang ding ahi.
7 Chutengle pponbuh sunga gimnamtui lhutna maicham selki dunga thisan phabep bep aloinat ding ahi. Aval thisan chengse chu, ponbuh kotphunga kitung, kilhaina jouse govamna maicham bul’a asun lhah ding ahitai.
8 Hiche bongchalgol thao jouse alah a, asung thao ho,
9 akalte ni le athao ho, athin hoilai tah to alah ding ahi.
10 Kiloikhomna thilto sathao kibolna bang banga, Thempun athao jouse chu lantin, pumgo thilto kivogamna maicham a chu agovam ding ahi.
11 Amavang avun le aphe jouse, aluchang, akeng jouse le agil pumpuma asungsa jouse
12 ngahmun polam, muntheng lai, vutouva, thing atia ahalvam ding ahi.
13 Israel pumpin lungtup beiya, tosoiya Pakai thupeh ho sukeh a themmo changkha ahiule,
14 chonset kihetdoh doh a chu Israel pumpin chonset lhaina dia bongchalgol khat ato diu ahi. Bongchalgol chu Pakai chenna ponbuh a akailut diu;
15 japi lamkai chengsen bongchalgol luchunga khut a-ngap’uva hikoma chu athaden diu ahi.
16 Thempu chungnungin thisan them khat ponbuh sunga adop lut ding,
17 khutjunga akhoiya, pondal maiya sagi vei jen athe thang ding ahi.
18 Chutengle ponbuh sunga gimnamtui lhutna maicham selki dunga thisan phabep bep aloinat ding, aval chengse vang ponbuh kotphunga kitung, kilhaina jouse govamna maicham bul’a asun lhah ding ahi.
19 Chujoule sathao jouse maicham chunga agovam ding ahi.
20 Chonset lhaina bongchal kibolna bang banga hiche bongchalgol jong hi abol’a, mipi chonset lhaina hita hi abol ding, chuting japi ngaidam chang diu ahi.
21 Chule bongchalgol chu ngahmun pam a apohdoh a, ama chonset lhaina kibolna bang banga, agovam ding ahi. Hiche hi japi chonset lhaina kitoh thilto ahi.
22 Lungtup louva, tosoiya vaihom khattou, Pakai thupeh ho palkeh a themmo chang kha aum le,
23 achonset akihetsah sah a kon a, nolnabei kelchal khat thilto dia ahinkai jeng ding ahi.
24 Kelchal luchunga khut a-ngap’a, pumgo thilto gancha kithana ji, maicham sah lam a chu atha ding ahi. Hiche hi chongset suh beina ding thilto ahi.
25 Thempupan kelchal thisan chu khoiyin tin, maicham ninga selkil hoa aloinat ding, aval chengse vang maicham bul a asun lhah ding ahi.
26 Chutengle kiloikhomna thilto gantha sathao jouse kigovam banga, athao lai jouse maicham chunga agovam ding ahi. Hitia hi Thempun vaihom chonsepa chonset lhaina abol ding chuteng ngaidam chang ding ahi.
27 Lungtup beiya, tosoiya Pakai thupeh khattou palkeh a themmo changkha chu milham khat ahikhah le,
28 achonset akihetsah sah a chu nolnabei kelchal khat thilto dia ahinkai jeng ding ahi.
29 Kelchal luchunga khut a-ngap’a, pumgo thilto gancha kithana, maicham sahlam a chu atha ding ahi.
30 Thempupan kelchal thisan chu khoinat’in tin, maicham ning selki dunga aloinat’a, aval chengse maicham bul’a asun lhah ding ahi.
31 Kiloikhomna thilto gantha thao jouse akhodoh bang banga, athao jouse akhodoh a, agimnamtui Pakai lung dei dia, sathao ho chu maicham chunga agovam ding ahi. Hitobanga hi Thempupan chonsepa chonset alhai ding, chule ama ngaidam chang ding ahi.
32 Khattouvin chonset thilto dia kelngoi atonom le, nolnebei kelngoi pi hi ding ahi.
33 Kelngoipi luchunga khut ngamin tin, pumgo thilto ganthana mun, maicham sah lam a chu atha ding ahi.
34 Thempupan kelngoipi thisan chu khoiyintin, maicham ning selki hao aloinat ding, aval chengse maicham bul a sun lhah ding ahi.
35 Kiloikhomna dia kithat kelngoi thao jouse kikhodoh bang banga, athao jouse akhodoh, Pakai dia thilto chengse chutoh, maicham chunga agovam ding ahi. Hitia hi Thempun chonsepa chonset lhaina gan atha ding, chuting ngaidam chang ding ahi.

Thempu Dan Bung 5

Chonset thilto chunga thutan

1 Chonset thilto jouse thu anoiya kisei banga hi tan ding ahi. Koi tobang khat amusa le ajahsa chunga thutanna phunga hettohsah bol dingin kikou hen, imacha seidoh da le, thoh dia lom jouse athoh tei ding ahi.
2 Koi tobang khat’in hou thudol’a thilboh, gan thikam ham khat hetoh louvin tongkha le, ahetdoh doh a chub oh a themmo chang ahitai.
3 Koi tobang khat’in jong mihem a kipan athenglou thilboh khattou tongkha teleh, ipi hijongle atoh khah chu ahetdoh a kona boh a themmo chang ahitai.
4 Ipi pi thua hijongle geltoh det det louva kihahsel chun athilbol ahetdoh doh a chu themmo chang ahitai.
5 Mihem khat themmo achan teng, chonset aphondoh tei ding,
6 achonset man dia kelngoipi ham kelpi ham Pakai henga ahinkai ding ahi.Chonset man dia Thempupan kilhaina gan atha ding ahi.
7 Koi tobangin kelngoi ham kelcha ham ato lel le, achonset man dia vakhu ni, ahiloule vapal ni, khat chonset thiltoa ding, khatjoh pumgo thilto a pang dia ato ding ahi.
8 Vachate ni chu Thempupa henga achoi ding, aman amasa chonset jeh a kitoh vacha chu atodoh ding ahi. Alol aheboh a, aluchang ahelhah pai lou ding,
9 athisan phabep maicham bangmaiya athekhum ding ahi. Athisan dang vang maicham bul a kilhoh lha ding ahi. Hiche hi chonset suhbeina thilto ahi.
10 Chutengle Dan kisem dungjuiya vacha khat chu pumgo thilto dia to ding ahi. Hitia hi Thempupan achonsepa dia kilhaina thilto abol ding, chuting ngaidam chang ding ahi.
11 Vakhu ni hehen vapal ni hijongle toh lel hel chun, chonset man thilto dia changbong neldisel kilogram khat ato ding ahi. Changbong chu olive thao hihen, gimnamtui hile ahal louhel ding ahi, hiche hi chonset jal a kitoh ahin, chang thilto dol’a kipe ahipoi.
12 Changbong neldisel chuThempupa koma achoi ding, Thempun aboncha Pakaiya kitohdoh lim a khutdim khat ahamdoh a, neh le chah thilto banga maicham chunga agovam ding ahi. Hiche thilto hin chonset asuhmang ding ahi.
13 Hitia chu Thempupan chonset jal’a kilhaina thilto abol ding, chuting chonsepa ngaidam chang ding ahi. Changbong neldisel amoh chengse vang, chang thilto kibolna bang banga, Thempupa chang ding ahi.

Thil ledohna thilto
14 Aban a kisei Dan ho hi Pakaiyin Mose apei.
15 Khattouvin Pakaiya ato ding thil theng hetoh louva apehda khah le, thil ledohman Pakaiya thilto dia nolnabei kelngoichal ham, kelcha ham ahinkai ding ahi. Aman jat vang aphat pet’a kivaipohna dungjuiya teptoh ding ahi.
16 Peh dia lom apeh loujet apeh lhinga, achung chon a ja khat lah a somni ni apeh be ding ahi. Apeh ding dol chu Thempupa apeh ding, Thempun kilhaina gancha chu mipi chonset man a ato ding, chuting ama ngaidam chnang ding ahi.
17 Khattouvin hetoh louva Pakai thupeh ho apalkeh le, themmo chang ahitan, leo tei ding ahi.
18 Thil ledohman thilto dia nolnabei kelngoichal ham kelchal ham Thempupa koma ahinkailut ding ahi. Aman jat vang aphat pet’a kivaipohna dungjuiya teptoh ding ahi. Thempupan mipa chonset man aledohman thilto ding atoa, amipa ngaidam chang ding ahi.
19 Hiche thilto hi aman Pakai douna chonset abol khah jeh a thil ledohman thilto ahi.

Thempu Dan Bung 6

1 Pakaiyin anoiya kisei cheng Dan ho hi Mose apei.
2 Khattouvin Israel chanpi sum akoipeh lepeh ding da ham, anei agou aguh ham, lepthol’a abol ham,
3 thil mansah mua mulou banga kihahsel jeng mi chun-Pakai douna hicheng aboljeh a hi chonset man thilto abol ding ahi.
4 Hitobang gou neiya chun alepeh tei tei ding ahi.
5 Athenmo akimatdoh ni nia, aneipa chu lhingset’a adit ding, ja khat a somni to alepeh tha ding ahi.
6 Chule Pakai henga thil ledoh thilto dia kelngoichal ham, kelchal ham, nolnabei khat, Thempupa henga ahinkai ding ahi. Aman ding vang aphat pet’a chena dungjuiya tep toh ding ahi.
7 Chonsetpa chonset lhauna Thempupan kilhaina chu abol’a, chuting ngaidam chang ding ahi.

Pumgo thilto kilhaina ho

8 Pakaiyin Mose chu
9 Aaron le achapate aseipeh din aban a kisei pumgo thilto ding dol kisemho hi ahil’e. Pungo thilto chu jan khovah a maicham chunga kikoiya, mei kilhut khovah den ding ahi.
10 Thempupan tupat ponnem a kikhui poncho le toka thoa, maicham chunga meivam jouse, maicham sih a ahui lhah ding ahi.
11 chuteng von kikhel’intin, vutvam chengse chu ngahmun polam, muntheng lai khat’a alhoh doh ding ahi.
12 Maicham phunga mei kou jing jeng ding, misah lou ding ahi. Jingkah she le Thempupan thing atibe jinga, thing chunga pumgo thilto ajam ding, kiloikhom thilto sathao jouse alhutvam ding ahi.
13 A-itih a maicham phunga mei kou jing ding, misah louhel ding ahi.

Lhosoh thilto Dan

14 Lhosoh thilto dan chu hiti ding ahi. Aaron chilhah Thempu khat’in maicham masang, Pakai angsunga lhosoh thilto ato ding ahi.
15 Changbong khutdim khat le thaotwi hal’in tin, gimnamtui asun khum ding, aboncha Pakai ngailutna kitohdoh banga maicham phunga agovam ding ahi.
16 Avaldohse Thempupan nentin, neh dia akisem teng, cholsoluva changlhah a sem ding, Pakai chenna ponbuh hongcha, muntheng laiya aneh ding ahi.
17 Hicheng hi Thempuho chan dia Pakaiyin apehsau ahitai. Thilto thengpen ahin, chonset thoina thilto le thil ledoh thilto tobang ahi.
18 Akhang khanga Aaron chilhah koi hile-Pakaiya todohsa, achan diuva lom neh le chah a aneh thei jing diu ahi. Midang hiche neh le chah thilto tongkhapen pen vang thil theng thanei nan asuh khah lo ding ahi.
19 Aban a kisei chengse hi Pakaiyin Mose jah a asei,
20 Aaron chilhah Thempute katdohna dol dan ahi. Mi khat Thempu dia thenso akibol ni le Pakai henga dia thilto anei ding, lhosoh thilto jat banga, changbong neldisel kilogram khat, akeh jingkah a, akeh nilhah a ato ding ahi.
21 Changbong neldisel chu thaotwi to hal’a khangbel’a kan ding, chujou teng hebal bal a, lhosoh thilto bolna banga, gimnam Pakai deiya bol ding ahi.
22 Akhang khanga, Aaron chilhah Thempu chungnung pang koi hile, hiche thilto hi abol jing diu ahi. Akitoh pen pen chu Pakai dia kilhaina neiya pumgoa govam ding ahi.
23 Thempu kilhaina lhosoh thilto khen beihel’a govam ding, koiman nethei lou hel ding ahi.

Chonset jal’a thilto

24Pakaiyin Mose aseipeh-in
25 chonset thilto dia aban a kisei chengse dan ho hi Aaron le achapate ahil din aseiye. Chonset jal a kithat gancha chu, pumgo thilto kitha jina mun, maicham sahlam a tha ding, hiche thilto hi thil thengtah hi ding ahi.
26 Hiche gancha that a pang Thempupan Pakai chenna ponbuh hongcha, muntheng laiya aneh ding ahi.
27 Mihem koi hihen, thil itobang hijongle hiche gancha sa tongkhapen pen chu, athen nah asuh khahlo leu ding ahi. Hiche gancha thisan chu ponsil’a anat khah le, muntheng lai khat’a sop lhah ding ahi.
28 Akihonna bel, leibel ahile vohkeh jeng ding, thihbel ahivangle khot thengsel’a, twiya silngim ding ahi.
29 Asa hi Thempu insunga peng pasal koi hile neitheiyinte; satheng pen khat ahi.
30 Amavang ponbuh sunga kisomlut thisan, chonset suh thengna dia kimangsa ahile-asa kinethei ponte; govam tho ding ahibouve.

Thempu Dan Bung 7

Thil ledohna thilto

1 Aban akisei ding ho hi thilto theng pen, thil ledohna thilto ding dan ho ahi.
2 Hichea thilto dang gancha chu, pumgo thilto gancha kithana mun, maicham sahlam a khu tha ding, thisan chu maicham kimvel chansoh a the thang ding ahi.
3 Athao lai jouse kho-lhah a, maicham chunga todoh ding; amei thao le asunggil thao jouse,
4 akalteni le athao atomjolse se, athin hoilai tah puma pantha ding ahi.
5 Sathao chengse hi Thempupan Pakai henga dia maicham chunga atodoh ding ahi. Hiche hi thil ledohna thilto kiti ding ahi.
6 Asa hi Thempu insunga peng pasal jousen netheiyinte, amavang muntheng laiya aneh diu dol ahi; ajeh chu thilto thengpen khat ahi.
7 Chonset jal’a thilto dan le thil ledohna thilto dan kibang khat aum’e: asa chu kilhaina Thempupa chang ding ahi.
8 Pumgo thiltoa kithat gancha vun chu kilhaina Thempupa chang ding ahi.
9 Lhosoh chang thilto, khangbel’a kihon ham, kikanggo ham, khangbel’a kihulgo ham-Pathen a kilhaina kinbol’a pang Thempupa chang ding ahi.
10 Lhosoh thilto, asel, hon minlou ho vang chu, thaotwi halsa hihen, hal lou hile, Aaron themputnaa pang jouse chan ahitan, kibanga kihom cheh diu ahi.

Kiloikhomna thilto

11 Kiloikhomna thilto, Pakaiya kikatdoh jouse bolna ding dan ho hiti ding ahi.
12 Khattouvin Pathen thangvahna ato ahile, athilto chu kilhaina dia gancha to ato tha ding, cholsolou changlhah jong pang, changlhah sat ah a kisem hihen, changbong neldi, olive thao twi to halsa hihen, changlhah pheng neocha cha, olive thaotwito halsa hijongle-pangthei ahi.
13 Abelap a changlhah lhon ham changlhah mai mai, hijongle cholsolou hi ding ahi.
14 Changlhah hal khat chu deichom beh a Pakai dia atodoh ding ahi; hichu gancha thisan maicham kimvel’a thethangpa chu chang ding ahi.
15 Asa chu kilhai nikho ma maa neh joutei ding, ahalsi cha jong khovah densah lou ding ahi.
16 Khattouvin kitepna suh bulhitna ding ham, deichom ham a kiloikhomna thilto ding ahinchoile, atodoh nikhoa neh jouhel ding angaipoi; neh mohse chu jing teng jongle neh thei ahinai.
17 Nithum geiya moh nalai vang govam ding ahitai.
18 Thilto halsi khattou nithum nin kinekha tale, Pathenin thilto chu sang taponte. Thil chu atohpa dia simpeh malah a, aboh a kigel’a anekhapen penin athoh lo ding ahi.
19 Sa chun thilboh khattou atoh khah le neh tah lou ding, govam tho ding ahitai. Koi hile kisuh bohna neilou jousen netheiyinte,
20 atheng louvin aneh khah vangle Pathen mite lah a kisimtha lou ding ahitai.
21 Chujongle khattouvin thilboh tohkhah nunga aneh khah le, atoh khah thilboh chu mihem hihen gancha hile- atongkhaa chu Pathen mia kisim theilou ding ahitai.
22 Pakaiyin aban a kisei chengse hi Mose kom a
23 Israelte din aseipeh-e. Itobang gancha, bong hihen kelngoi hile, kelcha hihen ipi hile athao kine thei louhel ding ahi.
24 Moh thi hihen sahang tha hile, gancha thao pou pou neh lou ding ahi, thilchom danga vang manthei ahinai.
25 Pakaiya neh le chah thiltoa kitoh gancha thao nekha pen pen chu Pathen mi khat’a kisimtha thei lou ding ahi.
26 Hoikoma cheng jongleur, Israelten vacha hihen gancha hileh, athisan aneh thei lou diu ahi.
27 Hiche dan sukeh pen pen chu Pathen mite lah a kisimtha theiponte.
28 Pakaiyin aban a kisei Dan ho hi Mose kom a
29 Israelte din aseipeh-e. kiloikhomna thilto pe chanin atumbeh a Pakai dia hal khat achoi ding,
30 akhut tah a neh le chah thilto dia achoilut ding ahi. Sathao chengse le aomlhang chu atumbeh a Pakaiya peh ding ahi.
31 Thempupan athao chengse maicham chunga agovam ding, a-omlang vang Thempupa chang ding ahi.
32 Aungkeng jetlam chu thilto ding atumbeh a peh a,
33 kiloikhomna thilto thisan le sathao katdoh a pang Thempupa apeh ding ahi.
34 Gancha omlhang hi deichom thilpeh ahin, anungkeng jetlam hi Pakaiyin Israelte lah a akilahji thilpeh deichom ahin, Thempupa peh ding ahi. Hiche hi a-itih geiya Israelten Thempuho apeh jing diu ahi.
35 Thempu dia akithenso nikhouva Aaron le achapate chu hiche Pakaiya kitohdoh nehle chah hi achan diuva kikoisa ahitai.
36 Hiche nikhoa chu hiche thilto jat chu Pakaiyin Israelten apeh diuva aseisa ahitai. Akhang khanga Israelten ajui tei diu dan a kisemdoh ahi.
37 Hichengse hi pumgo thilto dan, lhosoh thilto dan, chonset jal’a thilto dan, thil ledohna thilto dan, thensona thilto dan, chule kiloikhomna thilto dan ahi.
38 Gamthip noi, Sinai molsanga thilto ding dol Israelte aseipeh nikhoa Pakaiyin thupeh ho changes hi Mose aseipeh ahi.

Thempu Dan Bung 8

Aaron le achapate thensona

1 Pakaiyin Mose jah a,
2 “Aaron le achapate chu kachenna pohbuh kotbul’a hinpuiyin, Thempuvon hinchoiyin, kinu ding thao hin domin, chonset thilto din bongchalgol hinkaiyin, kelngoichalte ni to hinkaiyin, cholsolou changlhah pocha chutoh hindomin.
3 Chuteng Houbung pumpi koukhomin,” ati.
4 Pakai thupeh bangin Mose’n abol’in, Houbung pumpi ahung kikhomtauve,
5 chule Mose’n ajah-uva, “Tua bol kagot hi Pakaiyin bol dia eiseipehsa ahi,” ati.
6 Mose’n japi masanga Aaron le achapate ahin puidoh-in Hou thudol’a kisil theng din aseipeh-e.
7 Mose’in Aaron sangkhol a-ah peh-in, konggah achenpeh-in, poncho asilpeh-in, lengban akhaiyin akil chahpeh tai.
8 chuin ompho akhaipeh-in, asunga Urim le Thumin akhumpeh tai.
9 Del akop peh-in, delkop meiya sana akhaipeh-in, Pakai thupeh dungjuiya hiche sana hi thenso kintheng kibol melchihna ahi.
10 Mose’n kinu ding thao alan, Pakai chenna ponbuh chunga akoiyin, asunga thil um chengse to akoithan, hitobang hin Pakaiya athensoh tai.
11 Chuin thao them khat ahamdoh-in, maicham le amanchah chengse, kisilna kongle akitunna, sagi vei cheh athe khumin, Pakaiya katdohna aneitai.
12 Aaron luchunga thao asungin thensona aneitai.
13 Abanin Mose’n Aaron chapate ahin puiyin, sangkhol a-ahpeh-in, konggah agah peh cheh-in, lukhuh akhuhpeh-in, Pakai thupeh bang bangin aboltai.
14 Chuin Mose’n chonset thilto din bongchalgol ahinkaiyin, Aaron le achapaten achunga khut angamtauve.
15 Mose’n bongchalgol chu athat’in, athisan phabep ahamdoh-in, maicham ningkoiya khutjungin aloinat cheh-in thensonan aboltai. Chuin thisan moh chengse chu maicham kitunna phunga asung lhatai.Hiti hin athenson asuthengtai.
16 Mose’n sasung thao jouse le athin hoilai tah alan, akateni le athao pumin maicham a agouvamtai.
17 Bongsa amoh chengse, avun pum le aphe chengse, agil ho pumin, Pakai thupeh dungjuiyin ngahmun polam a agouvamtai.
18 Abanin Mose’n pumgo thilto ding kelngoichal chu ahinkai lut’in, Aaron le achapaten achunga khut angamtauve.
19 Mose’n athat’in, athisan chu maicham kimvel’a athe thangsoh tai.
20 Pakai thupeh dungjuiyin, kelngoichal chu asempanin, asunga jouse aso thengin, anungkengte ni jong asop’in,
21 aluchang le athao, chule asa dang jouse maicham phunga agouvamtai. Hiche pumgo thilto hi neh le chah thilto dol’a kibol, gimnamtui Pakai deiya kibol ahi.
22 Chuin Mose’n kelngoichal ni na ahinkaiyin, hiche hi Thempuho thensona dia kibol ahin, Aaron le achapaten achunga khut angmtauve.
23 Mose’n kelngoichal chu athat’in, athisan phabep ahamdoh-in, Aaron bikol jetlam gei le akhut jetlam khutpi, chule akeng jetlam khopi muh a aloinatpeh-e.
24 Chuin Aaron chapate ahinpuidoh-in, abilkol’u jetlam gei le akhut’u jetlam khutpi muh, chule akengu jetlam khutpi muh a loinatpeh soh keiye. Chuin thisan moh chengse maicham kemvel’a athe thangsoh tai.
25Chuin sathaose se, asung thao le athin hoilai tah, akalteni le athao, chule amungkeng jetlam aladoh tai.
26 Chuin Pakaiya katdohsa, cholsolou changlhah koina pocha sunga changlhah lhon khat alan; thaoto halsa changlhah lhonkhat le changlhah hal khat, abonchan satha le jetlam anungkeng chunga chun akoitai.
27 Mose’n Aaron le achapate khut’a neh le chah hicheng hi akoiyin, amahon tauve.
28 Amaho khut’a konin Mose’n alasonin, maicham chunga alhut vamin, thensona kinbola din, pumgo thilto chunga agothai. Hiche hi neh le chah thilto, gimnamtui Pakai lungdei ahi.
29 Mose’n a-onlhang achoiyin, Pakaiya deichom thilpeh din agatoh-e. Hiche hi Mose chanlom kelngoichal sa, thendona kimang ahi. Pakai seipeh bang bangin Mose’n abolsoh tai.
30 Mose’n kinu ding thao phabep le maicham chunga thisan phabep ahamdoh-in, Aaron le achapate, aponsil’u chunga athe khum’e. Hiti hin amaho le avon jouseu Pakaiya athensosoh tai.
31 Aaron le achapate jah a Mose’n, “Sa hi Pakai chenna ponbuh kotphung geiyin kihon’un, thensona thilto pocha sunga kikoi changlhah to game tauvin.
32 Neh moh sa le changlhahse se vang gouvam jengun.
33 Thensona kin kinchai kah, ni sagi sunga kotphung chu nadalhah lou diu ahi.
34 Nachonset’u suhbeina dia tunia ibol’u hi Pakaiyin bol dia eihil’u ahi.
35 Ni sagi sung, sun le jan a ponbuh kotphunga na-um jing diu, Pakai sei sei nabol diu ahi. Naboldau le nathi diu ahi. Hiche hi Pakaiyin eithupeh ahi,” ati.
36 Pakaiyin Mose ahil chengse Aaron le achapaten abolsoh keiyuve.

Thempu Dan Bung 9

Aaronnin kilhaina abol

1 Thenso kin kichai ni jingin, Mose’n Aaron le achapate, chule Israel lamkai jouse akouve.
2 Aaron jah a, “Nolnabei bongchalgol khat le kelngoichal khat gakaiyin, bongchalgol chu chonset thilto ding chule kelngoichal chu pumgo thilto din, Pakai henga gatoh tan.
3 Chutengle Israelten chonset thilto dia kelchal khat, kum khat lhingsa bongnou khat le pumgo thilto dia nolnabei, kum khat lhingsa kelngoi khat agakai diuvin seipeh-in,
4 kiloikhom thilto din bongchal khat le kelngoichal khat kai din seipeh-in, Hicheng hi lhosoh thilto, thao to halsa chutoh Pakaiya ato diu ahi. Tunia Pakai ahenguva hung kilah tei ding ahijeh a hiche hi abol tei tei diu ahi,” ati.
5 Mose sei jouse chu Israelten ponbuh mai ahinlhutsoh tauve, chujongle Houbung pumpi Pakai hou din akikhomsoh tauvin ahi.
6 Hichun Mose’n “Pakai vah chu emlai laiya naheng nabol diu hi Pakai thupeh ahi,” ati.
7 Hichun Aaron jah a, “Nangma chonset jouse le mipi chonset jouse suh beina din chonset thilto le pumgo thilto chu maicham phunga gatoh tan, Pakai sei bang bangin,” ati.
8 Aaronin amatah chonset suhbeina din, maicham phunga bongchalgol chu agathat tai.
9 Achapaten thisan chu ahin dom’un, aman akhoiyin, maicham ning selki dunga aloinat’in, amoh chengse maicham phungbul’a asung lhai.
10 Hichun Pakaiyin Mose ahil bang bangin, athao chengse le akaltenim athin hoilai tah, hicheng hi maicham chunga alhutvam tai.
11 Asa le avun vang ngahmun polama agouvam’e.
12 Chuin ama dia pumgo thilto ding gancha athat tai. Achapaten thisan ahindom’un, aman maicham kimvel’a athe thangsoh hel’e.
13 Aluchang le asadangse se apeuvin, aman maicham phunga agouvamtai.
14 Asunga jouse le anungkengte ni asop thengsel’in, maicham chung, pumgo thilto kikoina chunga chun agovamthai.
15 Hiche nung hin japi thilto ding atopeh-e. Mipi chonset suhbeina to ding kelchal chu akaiyin, athat’in, ama chonset suhbeina dia abol bang chun, atohdoh-e.
16 Pumgo thilto ding gancha jong akaiyin, Dan kisem bangin atohdoh tai.
17 Lhosoh thilto jong alan, atodoh nungin maicham chunga konin changbong neldisel chu khat dim ahamdoh-e. Hiche hi niseh a pumgo thilto chungvuma kibol ahi.
18 Japi kiloikhomna din bongchal le kelngoichal chu kiloikhom thilto din athat tai. Achapaten thisan chu ahindom’un, aman maicham kimvel’a athe thangsoh hel’e.
19 Bongchal thao jouse le kelngoichal thao jouse chu Aaronin
20 gancha omlhang chunga akoiyin, maicham phung geiyin apolut tai. Maicham chunga athao jouse
21 agouvin, Mose thupeh bangin a-omlhang le anungkeng jetlam chu Pakaiya deichom thilto din apetai.
22 Aaronon kilhaina chengse achaisoh phat’in, mipi chungvuma khut ajah-in, vang aboh jouvin ahung kumlhai.
23 Mose le Aaronin Pakai chenna pohbuh dung ajon lhonin, ahung potdoh lhon phat’in japi phatthei aboh lhon le, japi henga Pakai vah emlai laiyin ahung kilah jenge.
24 Hetman louvin Pakaiyin mei akonsah-in, pumgo thilto le sathao kai chet chut maicham bang jouse aleochai hel’e. Japin amusoh tah-un, a-asot jengun, tol’a mai sulut’in chibai aboh tauve.

Thempu Dan Bung 10

Nadab le Abihu chonset

1 Aaron chapate ni Nadab le Abihu’n meilheng kipat’in, asunga song meihol koiyin, gimnamtui lhut naming Pakaiya achoi lut lhontai. Pakai thupeh beiya bola hi lhonjeh-in mei alhut nam lhon hi athengpoi.
2 Hijeh chun Pakaiyin hetman louvin mei akousah-in, a-angsung laitah a amani geiyin aleolih jenge.
3 Hichun Mose’n Aron jah a, “Pakaiyin, ‘Kakinbol jousen kathenna ajabol cheh diu, chuting kamite henga kaloupina phongdoh ding kahi,’tia asei chu hiche hi ahi,” ati. Aaron chu thip beh chan aumloi.
4 Mose’n Aaron gangpa Uzziel chapate ni, Mishael le Elazaphan akouvin ajah lhon a, “Ponbuh theng sunga nasopite niu thilong khu gapodoh lhonin, ngahmun polam a gakoi lhontan,” ati.
5 Hijeh chun Mose thupeh bang bangin, athilongte ni chu aponsil’in aman lhonin, ngahmun polam a akaidoh lhontai.
6 Mose’n Aaron le chapate ni Eleazar le Ithamar jah a, “Lunghem vetsah nan sampot loule ponsil botkeh-in umdau vin. Nabol ule nathi lo diu ahi, chujongle Houbung pumpi chunga Pakai lung hang ding ahi. Israel dangse vang Pakaiyin ahallih te ni hi lunghempi dia phal ahinauve
7 Ponbuh kotphung dalha hih-un, nathi lo diu ahi; ajeh chu Pakai thanu, thensosa nahiuve,” ati. Amahon Mose sei bangin abol tauve.

Thempuho chondan ding

8 Pakaiyin Aaron jah a,
9 “Nangle nachapate kachena ponbuh a hi ju don kham a nahung lut thei louhel diu, akham puma nahung lut’ule nathi den diu ahi. Hiche chondan hi nason nalhah a namanchah jing diu ahi.
10 Pathen thil le tanggol a kimang, athengle aboh, nasekhen jing diu, nagop thei lou diu ahi.
11 Mose khut’a nangho kapehsau Danthuho chu Israel mite nahil diu ahi,” ati.
12 Mose’n Aaron le ahing nalai achapate ni, Eleazar le Ithamar jah a, “Pakaiya neh le chah thilto valdo, lhosoh thilto khu lauvin lang, cholsolou changlhah-in sem’un, maicham koma khun nauvin, ajeh chu hiche thilto hi thengtah ahi.
13 Muntheng lai khat’a neuvin; Pakaiya tosa, nangle nachapate chan ding lom ahi. Hiti dia chu Pakaiyin thu eihilsa ahi.
14 Nangle na-insung min vang sa-omlhang le anungkeng, deichom tah a Pakaiya kitoh, Thempu chan ding dol chu, nethei nauvin nate. Hoi kom hile muntheng laiya netheiyun nate. Israelte kiloikhom thilto lah a hiche lai thilto hi nang le nachate chan ding loma umdoh ahi.
15 Pakiya neh le chah thilto kibol teng, sathao kitodoh pet’a anung keng le a-omlhang chu ahin choi diu ahi. Paki thupeh dungjuiya, hicheng hi nang le nachate dia itih geiya nachan ding dol’u ahi,” ati.
16 Mose’n chonset jal’a thilto ding kelcha ahol chun anagouvam tauve. Hijeh chun Eleazar le Ithamar chunga alung hangin,
17 “Idia hiche chonset jal’a thilto chu muntheng lai khat a anneh da lhon ham? Thilto theng, japi chonset suhbeina dia Pakaiyin napehsau hichu me.
18 Ponbuh theng sunga thisan choilut lou ahijeh a, hikoma chun kilhaina sa chu kahil banga naneh theiyu ahi,” ati.
19 Aaronin, “Tunin hiche chonset jal a athilto chu neleng itin tem? Hichun Pakai akipasah ding hinam? Tunin jong mipin Pakaiya chonset jal’a thilto ahinchoiyun, pumgo thilto jong ahinchoiyun, ahivangin hitobang tijatna thil ho pi kachunga asoh thouve,” ati.
20 Mose’n ajahdoh phat’in alung nachim jenge.

Thempu Dan Bung 11

Neh thei ganhing ho

1 Aban a kisei dan ho hi Pakaiyin Mose le Aaron kom a
2 Israelte dia aseipeh ahi. Gamlah a gamsa
3 tin kika,nehsa indoh kit’a nuloh lhai jouse naneh thei diu,
4 sangongsao le jupi, chule talep hi naneh thei lou diu ahi.
5 Hicheng hi aboh a gel ding ahi;
6 nehsa ihdoh a alhai nah vangun tin kika lou ahiuve.
7 Vocha neh dauvin. Satheng lou ahiuve. Tin kika anei vangun, nehsa ihdoh a lhailou ahiuve.
8 Hiche sa ho hi aboh ahiuvin, athilong geiyuva natoh khah lou diu ahi.
9 Itobang nga hile ving le lip nei jouse netheiyun nate;
10 twiya cheng ving le lip bei vang naneh thei louhel diu ahi.
11 Hitobang hose chu aboh a gel ding ahi. Neh jong naneh dauva, athilongu jong natoh khah thei lou diu ahi.
12 Ipi pi hijongle twiya cheng ving le lip neilou jouse naneh louhel diu ahi.
13 Lhaving nei ho lah a naneh thei louhel diu chu: muvanlai, simbuchanglit,
14 muthong, va-ah,
16 va-ngong sang, vabah, twivakhu,
17 muvanlai lhem ho,
18 twi-ah, vatotkamkabah,
19 twilungva, twivakang ahiloule bah, hicheng hi ahiuve.
20 Lhaving nei ganhing jouse aboh ahiuve,
21 lhaving nei jongle achop tho thei ho vang atheng nai.
22 Khaokhopi le khaokho, chule khongbai ho vang naneh thei diu ahi.
23 Ganhing neocha, lhaving neiya kithol tho ho vang aboh ahiuve.
24 Toh khah a nilhah geiya boh theina gan thikam ho chu ganhing tin neiya kika lou, nehsa ihdoh a lhai lou,
25 kengli neiya ahivanga mi khot theina tin nei,
26 hiche ho thilong tongkha chanin von akisop theng ding,
27 hijongle nilhah geiya
28 aboh a um ding ahiuve.
29 Tol’a vah ho lah a khoili, juhei, juchou, jucha jouse,
30 thangkip chule tang hiche tobang jouse hi aboh ahiuve.
31 Hiche ho tongkha ham ahiloule athikam jeng hijongle tongkha jouse chu nilhah geiya boh diu ahi.
32 Athikamin atoh khah thil jong boh den ding ahi. Thil le lo, thingle song, ponsil, savun,dip ho hihen ipi hile, atoh khah pen pen boh ding ahijenge. Atoh khah pen pen sop theng ding, hijongle nilhah geiya boh ding ahi.
33 Leibel sunga alhah lut khah le, bel sunga kikoi jouse boh ding, abel chu vohkeh ding ahitai.
34 Neh thei ipi hile, hitobang bel sunga twi kisunkhum khah chu boh ding, donthei twi kikoi kha jongle twi chub oh ding ahitai.
ham , thuh khuh ham, vohkeh ding ahijenge.
36 Thil dang atohkhah boh jongle, twisam phung le twinah phung vang tongkha jongle boh thei ponte.
37 Tulut loulai muchi chunga chukha jong vang tongkha jongle bohthei ponte.
38 Muchi chu twiya dekotsa ahiya, gan thikam chun alhah khum vang le hiche muchi chub oh ding ahi.
39 Neh thei gancha ham ganhing ham thikam hen, thilong chu khattouvin tongkha le, nilhah geiya atongkhapa chu boh ding ahi.
40 Gan thikam sa nekha pen pen chun von akisop theng ding, hijongle nilhah geiya aboh a um ding ahi; thilong polea jong chun von akisop thenga, hijongle nilhah geiya aboh a um ding ahi.
41 Tol’a kithol tho ganhing khatcha naneh thei lou diu ahi,
42 kithol tho hihen, kenglia kithol hile, keng tampi nei hijongle naneh thei lou diu ahi.
43 Hiche ho nen kisuboh hih hel’uvin.
44 Kei Pakai na-Pathenu kahin, Keima kathen banga nangho jong nathen diu ahi.
45 Na-Pathenu kahina dia Egypt a kona hinpuidoh a Pakai chu kahi. Kei kathen jeh a nathen tei tei diu ahi.
46 Hicheng hi ganhing ho le vachate, twiya cheng le tol a vah ho thudol’a kisem Dan chu ahi.
47 Houthu dol’a theng le boh, neh thei le neh mo ganhing ho nadat khen jing diu ahi.

Thempu Dan Bung 12

Nao pen nunga numei thensona

1Pakaiyin Mose chu
2 Israelte din Dan hicheng hi apei. Numeiyin chapa ahinle, lhaseh thi nei pet banga, nao pen nung ni sagi lhin kah a boh aum ding ahi.
3 Niget lhin ni le naosen chepten ding ahi.
4 Chujou jongle nisom thum le nithum sung ma, thisan potdoh jal’a jechang nalai ding, boh a um ding ahi.Kisuh thengna ding phat lhin kah anumei hin thil theng khatcha atham lou ding, ponbuh theng sunga jong lut lou ding ahi.
5 Numeiyin chanu ahinle, lhaseh thi neipet banga, nao pen nung nisom le ni li sunga boh ding ahi. Chujou jongle thisan potdoh jal’a nisom gup le nigup jechang nalai ding ahi.
6 Numei chu suh thengna ding phat lhin teng, chapa chung hihen chanu chung hile, pumgo thilto dia kum khat lhingsa kelngoi ahinkaiya, chonset jal’a thilto dia vapal ham vakhu ham khat ahinchoi ding, Pakai chenna ponbuh kotphungbul’a Thempupa henga hung ding ahi.
7 Athil choi chu Thempupan Pakai anga tohdoh intin, amanu suh thengna abol ding, chuting houthu dol’a theng ding ahi. Hitia hi nao pen nungle numeiyin abol tei tei ding ahi.
8 Numei chun kelngoi atojou loule, vakhu ham vapal ham kop’a achoiya, khat chu pumgo thiltoa man ding, khatjoh chu chonset jal’a thiltoa man ding, Thempupan asuh thengna kin abol’a, chuting amanu houthu dol’a theng ding ahi.

Thempupa Dan Bung 13

Tiphah chunga Dan kisem

1 Pakaiyin Mose le Aaron chu Dan hicheng hi aseipeh-e.
2 Tipat ham, uilut vei ham, tipom ham a kon tichung patna melse tah aum khah le Aaron chihlhah Thempuho henga hinpui lut ding ahi.
3 Thempun tipat lai chu vechenin tin, apat laiya timul chu akan a, chule apat lai chu tiding sanga athuh joh le, tiphah phalou tah, tijat um ahin, atipat a chub oh a um dia Thempun aphondoh ding ahi.
4 Atipat lai chu akan a chule atidang sanga athujoh deh louva, atimul jong akanchom loule, Thempun anapa chu ni sagi sunga achom koi ding ahi.
5 Ni sagi lhin ni le Thempun vechen kit’intin, amudol’a atinalai chu abang bang hiyam achalbe chomdeh loule, nisagi sungma achomkoi ding ahi.
6 Ni sagi lhin ni le Thempun avet chil kit’a, tina chalbe louva, aphatdom tah le, anapa chu houthu dol’a thenga aphondoh ding ahi, ajeh chu tina mai mai ahibouve. Anapan von akisop thenga, houthu dol’a theng ding ahitai.
7 Avetchil’a chu thenga aphondohsa hijongle, tina athah nat kit le, Thempu akivetsah kit ding ahi.
8 Thempun avet kit’a, atina amachalbe be le, anapa chu aboh a aphondoh ding ahi;tiphah tijat um tah veisetna ahibouve.
9 Tiphah kichat umtah a dammo chu Thempu koma puitei ding,
10Thempun phate cha avet chil ding ahi. Atipat lai chu adul heo houva, timul geiya akansah a, chule nai dimset ahile,
11 tipat luisa ahitai. Thempun ama chu aboh a aphongdoh ding ahi.Kichentah a boh ah ahitan, vettoh dia chomkoi koi angaipoi.
12 Tipat chu machal a, luchanga pat kengto geiya patsoh jeng ahile,
13 Thempun avet phat kit ding ahi. Tipat chu atahsa pumpi dimsoh ahitah lem Thempun anapa chu houthu dol’a thenga aphondoh ngai ahi. Ativun kangsoh ahitah le, athengsoh ahitai.
14 Amavang atichung dul nalai aumle, aboh ahinalaiye.
15 Thempun avetchil kit’a, tichung dul lai amudoh le athenglouva aphondoh ding ahi. Tuchung dul hi tijat umtah tipat ahin, apat’a chu aboh ahitai.
16 Adul lai vang chu aphatdom a akankit le, adammo pan Thempu akivetsah ding,
17 Thempun avet phat kit ding ahi. Atipat lai akan leh, anapa chu thenga ahitai, Thempun athenga aphondoh ding ahi.
18 Uilut vei auma, damdohsa ahile,
19 khonung teng uilut nunga hi kanglih leh ahung kilang auma, ahiloule sakanglih leh a akimu le,
20 Thempun avetchil’a, tina lai chu athuhjoha, timul geiya akan le, Thempun aboh a phondoh ding ahi. Uilut mahaa hung kipan tiphah kichat umtah ahi.
21 Thempun avetchil’a chu timul kang mulou, chule atichung jong mundang sanga thuh chom lou, atijong adup loule, anapa chu nisagi sunga achomkoi ding ahi.
22 Tina chu amachalbe le Thempun atheng louva aphondoh ding ahi, ama chu aphah ahitai.
23 Kikhel chomlou, machalbe lou ahivangle, uilut mapon ahin, atheng dia Thempun aphondoh ding ahi.
24 Meikahna lai chu avouthah ahung kan a chule sankanglih leh a akimu le,
25 Thempun avetchil ding ahi. Tina laiya timul akan a atichung dang sanga athuhjoh le, tiphah kichat umtah, meikahna maha hung kipan ahi, Thempun aboh a aphondoh ding ahi.
26 Tina laiya timul kang chomlou, tichung dang sanga jong thuh chom lou, dup jong dup lou ahile, Thempun ni sagi sunga achomkoi ding ahi.
27 Ni sagi lhin ni le Thempun avet kit’a, amachalbe tah le, kichat umtah tiphah ahin, Thempun aboh a aphondoh ding ahi.
28 Tina lai kikhel chomlou, machalbe lou, dup louva aumle, tiphah dan ahipoi. Meikah maha hung patdoh mai mai ahin, Thempun athenga aphondoh ding ahi.
29 Pasal hihen numei hile, luchang ha khalhang ham a tipat aumle,
30 Thempun avetchil ding ahi. Tipat lai chu tichung dang sanga athuhjoh a, timul jong neojoa adum thim le, tipat kichat umtah ahin, Thempun aboh dia phondohna anei ding ahi.
31 Thempun avetchil’a chu atipat chu atichung dang sanga thuh chom lou, timul jong imatilou ahile, Thempun ni sagi sunga achomkoi ngai ahi.
32 Ni sagi ni le Thempun avet path kit’a, machalbe chom lou, timul jong kikhel lou, tic hung dang sanga jong thuh chom lou ahile,
33 anapan atina vel dung timul avochai ding ahi. Chule Thempun ni sagi sunga achomkoidoh ding ahi.
34 Ni sagi lhin teng tipat lai chu Thempun avet kit ding, machalbe chom lou, tic hung dang sanga jong thuh chom lou ahile, Thempun atheng dia aphondoh ding ahi. Tina pan von akisop thenga athenga um ding ahitai.
35 Athenga phondoh nunga tina machalbena aumle,
36 Thempun avet phat kit ding ahi. Tipat lai machalbe aumle, timul vetchil angaipoi, anapa chu kichentah a boh a ahitai.
37 Thempupa gel dol’a tina machalbe lou, timul jong ima tilou, tina jong damdom ahitah le, ama chu atheng dia Thempun aphondoh ding ahi.
38 Pasal ham numei ham tichung kangdoh aum khah le,
39 ama chu Thempun avetchil ding ahi. Tina lai chu akan dulset sut le, avun sunga thagui tan dammo ahin, anapa chu theng ahinai.
40 Chalsam ham tuhkhuh sam ham
41 pul vangin koima aboh theipoi.
42 Amavang sampulna muna hi sankang lih leh ahung kilah doh le, tipat kichat umtah ahi.
43 Thempun avetchil’a, tidul sankanglih leh aumle,
44 aluchanga tijat umtah tiphah hung kipan ahijeh a, Thempun aboh a aphondoh ding ahi.
45 Tiphah vei chun ponse bou avon ding, sam pot louva um a, amai noilamse pon akhua, “Aboh kahi, aboh kahi!” tia asap ding ahi.
46 Atinat damdoh kahsea boh jing ding, midang to kitong kha louva, ngahmun polam acheng ding ahi.

Tiphah nat bol dan

47 Tiphah natpi bena pen pen ponsil chu, samul hihen tupat ponnem hile,
48 itobang tupat ponnem hal le samulpon hihen, savun le savun a kisem von hijongle,
49 achuh na chu dup deh duh ham, san ham, tiphahpi chu machal jing ahile, Thempu vetsah ding ahi.
50 Thempun vechil’intin, ni sagi sunga akoidoh ding.
51 Ni sagi jou teng avet phah kit’a, tiphah natpi chu amachalbe leh, abena thil pen pen chu aboh a um ding ahi.
52 Thempun agovam ding, ajeh chu tiphah natpi chu kithe thang ahitan, meiya halvam tei ding ahi.
53 Thempun avet’a chu abena chunga hi tiphahpi amachalbe loule,
54 abena pon chu sop theng dia aseipeh a, chuting ni sagi sunga akoidoh ding ahi.
55 Chuteng avet phat kit’a, tiphahpi chu jem kikhel lou, machalbe lou hijongle govam jeng ding ahi.
56 Thempun avet’a chu tiphahpi abeitah le, abe masahna lai chu ponsil hihen savun hile, abo-lhah ding ahi.
57 Tiphahpi ahung kilah kit’a, amachalbe le, aneipan agovam jeng ding ahi.
58 Asop a chu tiphahpi abei thei le, asop phat kit ding, athenga um ding ahi.
59 Nichen ponsil chunga tiphahpi bena bol ding dan hiti chu ahi. Samulpon hihen, tupat ponnem hihen, tupat le samul, ipi hijongle, thil le savun chunga beh hijongle, hitobanga chu bol ding ahi.

Thempu Dan Bung 14

Tiphah dam nunga kisuh theng dol

1 Pakaiyin Mose chu
2 aban a kisei dan ho hi tiphah dam nunga suh thengna dia apeh ahi. Adamdoh pen pen athenga phondoh ni ding le, Thempu henga hinpuiya,
3 Thempun ngahmun polama puidoh-intin, avetchil ding ahi. Atina damtheng ahitah le,
4 Thempun vacha theng ni le cedar thing hal phabep, ponsan ao thim le hyssop pon athum ding ahi.
5 Thempupan vacha khat chu twinah phunga kithaldoh tilcha twi dimset leibel chung khat’a athasah ding ahi.
6 Vacha khatma chu twi lah a adelut ding, ceder thing le ponsan ao thim, chule hyssop chutoh, thasa vacha thisan a chu adelut ding ahi.
7 Tiphah damdoh, suh theng dingpen chunga vacha thisan chu sagi vei athekhum ding, chuting athenga aphondoh ding ahi. Chutengle vacha hing nalai chu gamlah a alen mangsah ding ahitai.
8 Adamdoh pen pen chun von kisop thengin tin, sam akivochai ding, kisil thenga chuting houthu dol’a theng ding ahi. Ngahmun a hung lut theiyintin, amavang ni sagi chunga aponbuh polama pansa ding ahi.
9 Ni sagi lhin teng sam kivontin, khamul akivoa, mitmul jouse avaochai ding, atimul chengse jong avotol’a, ponsil sop thenga amatah jong kisil theng ding, chutah le houthu dol’a theng ding ahi.
10 Niget lhin ni le kelngoi chal ni- nolnabei, kum khat lhingsa kelngoinu khat suhthengna kibolpeh pan ahinkai ding, olive thao halsa chang bong neldi kilogram thum le olive thao litre khat hop them a hop khat to ahinchoi tha ding ahi.
11 Thempupan suthenga umpa ke thilto hicheng hi Pakai chenna ponbuh kotphungbul alhut ding ahi.
12 Thempupan kelngoichal khat kaiyin tin, thao litre khat hop thum a hop khat chutoh, thil ledohna thilto dinga atodoh ding ahi. Hicheng hi Thempupan deichoma Pakaiya kitoh Thempuho chan dia abol ding ahi.
13 Chuteng chonset jal’a thilto le pumgo thilto gancha ho kithanaji muntheng laiya kelngoi chu atha ding ahi. Hiche abol tei ding ahi, ajeh chu chonset thilto banga thil ledohna thilto jong athen a theng ahin, Thempu chan ding ahi.
14 Thempupan kelngoi thisan phabep lamdoh-intin, athenga phondoh dingpa bilkol jetlam gei le, khut jetlam khopi, chule keng jetlam khopi muh a aloinat peh ding ahi.
15 Thepupan olive thao phabep ama khut veilam khutphang kom sunga sung lhan tin,
16 akhut jetlam khutjunga akhoiya, Pakai angsunga sagi vei athe thang ding ahi.
17 Akhut a thao phabep le kelngoi thisan phabep hamdoh-intin, athenga phondoh dingpa bilkol jetlam gei le khut jetlam khopi muh a aloinat peh ding ahi.
18 Chuteng akhutphang kumsunga um nalai thao chengse chu mipa luchunga asunkhum ding ahi. Hitia hi suh thengna kin abol ding ahi.
19 Hitobanga chu Thempupan chonset thilto kin abol’a, suh theng kin achaisoh ding ahi. Hiche jou teng pumgo thilto gancha atha ding,
20 chule lhosoh thilto to maicham phunga atodoh tha ding ahi. Hitia hi Thempupan duh theng kin abol’a, mipa chu athenga kiphongdoh ding ahi.
21 Amihem chu vaicha tah, aval tohlel ahile, akisuh thengna dia thil ledohna thilto dia kelngoichal khat bou ahin kaiya, deichom a Pakai dia todoh, Thempu chan ding ahi. Lhosoh thilto dia olive thao to halsa, changbong neldi kilogram khat le olive thao hop thuma hop khat bou ahinchoi ding ahi.
22 Chule chonset jal’a thilto ding le pumgo thilto dia vakhu ni ham, vapal ni ham ahinchoi ding ahi.
23 Akisuh theng nikho get lhin ni le hicheng hi ponbuh kotphungbul, Thempupa koma ahinchoi ding ahi.
24 Thempupan kelngoi chu kaiyin tin, olive thao alah a, aboncha chu Pakaiya deichom thilto, Thempu chan dia agapeh ding ahi.
25 Kelngoi chu atha ding, thisan phabep ahamdoh a, mipa bilkol jetlam gei le khut jetlam khutpi muh chule keng jetlam khutpi muh a aloinat peh ding ahi.
26 Thempupan ama khut veilam khutphang komsunga thaotwi phabep sung lhan tin,
27 chule khut jetlam khutjunga akhoi nat a, chukom Pakai angsunga sagi vei athekhum ding ahi.
28 Thisan akoina maa chu thaotwi phabep jong akoiya, mipa bilkol jetlam gei le, khut jetlam khutpi muh, chule keng jetlam khopi muh a aloinat peh ding ahi.
29 Akhutphang sunga um nalai thaotwi chengse chu mipa luchunga athekhum ding, hitia chu suh theng kin abol ding ahi.
30 Chuteng vakhu ham vapal ham khat chu
31 chonset jal’a thilto dia atodoh ding, khatjoh ma chu pumgo thilto ding dol’a lhosoh thilto ding chutoh atotha ding ahi. Hitobanga hi Thempupan suh theng kin chu abol ding ahi.
32 Hiche Dan hi tiphah nat damdohpa, suh theng kinbolna dia bol ding lom toh jou lou mi dinga kisem ahi.
In a tiphahpi umdol

33 Pakaiyin Mose le Aaron chu
34 aban a kisei chondan ho hi in dunga thiphahpi kithethang thudol a apeh ahi. Hiche dan ho hi Pakaiyin alo diuva peh agot Canaan gamsung alhun tenguva Israel manchah dia apeh ahi.
35 A-insunga tiphahpi mudoh chanin Thempupa jah a asei tei tei ding ahi.
36 Tiphahpi avetchil masanga Thempupan insunga thilkeo jouse pohdoh dia aseipeh ding; achutiloule thilkeo jouse geiya aboh a kisimtha jeng ding ahi. Chuteng insunga lut ding,
37 tiphahpi avetchil ding ahi. Inbang dunga adumjil jel le asanpih peh tobang phol chip chep aumle,
38 in chu ni sagi honlou dia chabi akamden ding ahi.
39 Ni sagi lhin nia ahung vetchil kit ding, tiphahpi ho akithe thang le,
40 tiphahpi umna dong ho chu kaldoh a khopi polam munboh lai khat a paidoh dia aseipeh ding ahi.
41 Chujou teng insung bang jouse chu akiloinalna jouse khodoh a khopi polam munboh lai khat’a boh lhah dia aseipeh ding ahi.
42 Song kikhoh doh ho khel’a song chombeh man ding, bang chu lei loithah ding ahi.
43 Songho khodoh nung, bang kho-lhah a loithah nunga jong tiphahpi insunga akithe thang kit le,
44 Thempupan in chu chabi akamkhum ding ahi. Tiphahpi kithe thang ahile, in chu aboh ahitai.
45 In chu phet lhahsoh hel’a, song jouse, thing ho, bang loina jouse geiya poh manga, khopi polam munboh lai khat a paidoh ding ahi.
46 Chabi kamkhumpet’a insunga lut kha chu nilhah geiya boh ding ahi.
47 Insunga neh le chah bol, ihmu pen penin avon jouse akisop theng ding ahi.
48 In chu Thempun ahung vet teng, inbang kitoithah nung geiya jong tiphahpi akithe thang kit loule, tiphahpi chu kisugam ahitan, in chu athenga phondoh ding ahitai.
49 In suh thengna dia vacha ni, cedar thing phabep, ponsan ao thim to, hyssop pon to mantha ding ahi.
50 Vacha khat chu twinah phunga kithal tilcha twitheng kitunna leibel chunga tha ding ahi.
51 Chuteng Thempupan cedar thing le hyssop, ponsan ao thim le vacha hing chu achoiya, thasa vacha thisan le twi lah a chu adekot ding, in chu sagi vei jen athekhum ding ahi.
52 Hitobanga hi in chu vacha thisan le twi theng, vacha hing, cedar thing, hyssop chule ponsan ao thim a asuh theng ding ahi.
53 Chutengle khopi pam lam gamlah a vacha hing chu agalha mang ding ahi. Hitia hi in suh theng kin abol’a, in chu thenga um ding ahi.
54 Hicheng hi tiphahpi bolna dan ho ahi;
55 tipat, uilut, tipom nat ho,
56 chule sille chen to in dunga tiphahpi bolna dan ahi.
57 Hiche dan ho hin thil khat then le boh aphondoh ahi.

Thempu Dan Bung 15

Hinpia thilong misuboh

1Pakaiyin Mose le Aaron aban a kisei Dan ho hi
2 Israelte din apei. Pasal hinpia thilongdoh chu aboh ahi.
3 Hitobang thilongsa chu, londohsah hen, imkit jongle boh thou thou ahi.
4 Hinpia thilongpa lupna le touna jouse boh ding ahi.
5 Thinlongpa lupna tongkhale,
6 atouna toukha chanin kisil lha a, von akisop theng ding, nilhah geiya boh ding ahi.
7 Thilongpa tongkha chanin jong von asop thenga kisil ding, nilhah geiya boh ding ahi.
8 Athenga umna pet jong chu thilong pan chil asset khum khah le, kisil thenga von akisop theng ding, chujongle nilhah geiya boh ding ahi.
9 Sakol chung toupha hihen, touna dang dang hijongle thilongpa toukhah chan boh ding ahi.
10 Thilongpa toupha thil tongkha chan jong nilhah geiya boh ding ahi. Thilongpa touna thil ipi hijongle polea chun von akisop thenga kisil lha ding, nilhah geiya boh ding ahi.
11 Thilongpan khut sil theng louva atoh khah chanin von sop thenga kisil ngim ding, nilhah geiya boh ding ahi.
12 Thilongpa toh khah leibel tapou voh keh ding thingkhon atoh khah pen pen jong sop thengsel ding ahi.
13 Thilongpa damdoh teng jong le, ni sagi sunga kho ngaiya, chuting von akisop theng ding, twinah phung twithengsel’a kisilngim ding, chuting hou thudol’a theng ding ahibep’e.
14 Niget lhin ni le vakhu ni ham, vapal ni ham choiya, Pakai chenna ponbuh kotphunga Thempupa agapeh ding ahi.
15 Thempupan vachate ni chu, khat chonset thilto dia atoa chule khatjoh pumgo thilto dia ato ding ahi. Hitia hi thilong damdohpa hou thudol’a suh thengna abolpeh ding ahi.
16 Pasal khattouvin botwi achedoh khah tah le, tahsa pumpi kisil theg ding, hijongle nilhah geiya boh ding ahi.
17 Ponsil hihen savun hile, botwi chuhna pen pen sop thengsel ding, hijongle nilhah geiya boh ding ahi.
18 Numei le pasal kitimat jou teng kisil theng cheh lhon ding, hijongle nilhah geiya boh lhon ding ahi.
19 Numei lhaseh thi anei teng, ni sagi sunga boh ding ahi. Aboh pet’a khoi kha thamkha chan jong nilhah geiya boh ding ahi.
20 Lhaseh a thi nei teng numei touna le lupna jouse boh jeng ding ahi.
21 Numeinu jalkhun tongkha ham, atouna thamkha ham jong chun
22 pon akisop thenga, kisil theng ding,
23 hijongle nilhah geiya boh ding ahi.
24 Pasal khattouvin numei thi neipet’a akitimatpi khah le, numei nu thenlouna kisuboh ahitan, ni sagi boh ding, alupna chan jong boh tha ding ahitai.
25 Lhaseh thinei phat kalval’a numei thilong ham ahiloule, tang louhel’a hinpia thilong ham aumle, lhaseh thi neipet le boh a aum bang banga, thilon tankah sea boh a um ding ahi.
26 Thilon kahsea alupna touna jouse jong boh tha ding ahi.
27 Numei thilong lupna le touna tongkha jousen von sop thenga, kisilngim ding, hijongle nilhah geiya boh ding ahi.
28 Thilon kan nung jongle, ni sagi kho ngai nalai ding, chutengle bou hou thudol’a theng thei ding ahi.
29 Niget lhin ni le vakhu ni ham ahiloule vapal hi ham choiya, Pakai chenna ponbuh kotphunga, Thempupa agapeh ding ahi.
30 Thempupan khat chu chonset thilto dia atoa, chule khat joh chu pumgo thilto dia ato ding, hitobanga chu thilongnu suh thengna kin abolpeh ding ahi.
31 Ngahmun lailunga Pakai chenna ponbuh suhboh louna din, Pakaiyin Mose chu Israelte thenlouna hilchah din ahil’e. Ponbuh asuh boh khah-ile thilto tei diuvin aseipeh-e.
32 Hichengse hi hinpia thilong ahiloule botwi chedoh pasal le
33 lhaseh a numei thinei pet’a um ding dol, chujongle numei thinei, boh a umpet, kitimatpi pasal chung change manchah ding dan kisemho ahi.

Thempu Dan Bung 16

Thoidam nikho

1 Dih loutah a Pakaiya thilto abol lhonjeh a thilo, Aaron chapate ni nungin Pakaiyin Mose jah a thu aseiyin,
2 “Kitepna thingkong sin chung, meiloma kahung kilahna mun, pondal, muntheng chungnung sunga, aphat cha hung lut din, nasopipa Aaron seipeh-in. Hitia chu abol loule thilo tei ding ahi.
3 Chonset thilto dia bongchalgol, chule pumgo thilto dia kelngoichal khat ahinkai lut tengle bou muntheng chungnung sunga lut thei bep ding ahi,” ati.
4 Abanin hitin ahil bei: Muntheng chungnung sung alut masangle Aaron kisil ding, Thempuvon akivon ding, tupat poncho le sangkhol, konggah, chule delkop, hicheng hi atho din aseipeh-e.
5 Chonset thilto ding le pumgo thilto dia Israelten Aaron chu kelchal ni le kelngoichal khat apeh diu ahi.
6 Aaronin ama chonset le a-insung mite chonset thensona dia bongchal khat a kilhai ding ahi.
7 Chuteng Pakai chenna ponbuh kotphunga kelchal ni chu akailut ding ahi.
8 Kotphunga hi phun asan ding, songchang ni, khat chu “Pakai ding,” tia, chule khatjoh chu, “Azazel ding,” ati ding ahi.
9 Phunsanna a Pakai dinga umdoh kelcha chu Aaronin chonset jal’a thilto dia ato ding ahi.
10 Chule Azazel dinga phun phatna pen pen chu Pakai min atodoh a, chuting Azazel dia gamthip noiya ahinga lhadoh ding, hichun mipi chonset apoh mang ding ahi.
11 Aaronin amale a-insung mite chonset thoina bongchal a akilhai teng,
12 maicham phunga meiam chu meilhutna khangbel khat’a ahamdoh a, chule gimnamtuisel khut dim khat muntheng chungnunga achoilut ding ahi.
13 Chukom Pakai chenna a chu gimnamtui ahalnam ding, maicham selki amua thilo louna dia selmang dinga, gimnamtui meikhun kitepna thingkong sin chu akhujolsel ding ahi.
14 Aaronin bongchal thisan chu hamdoh-intin, khutjunga akhoinat ding, kitepna
Thingkong sin maiya sagi vei jen athe thang ding ahi.
15 Chujou tengle japi chonset jal’a kelcha chu that’intin, muntheng chungnung phunga thisan adop lut ding, bongchal thisan abolna banga, kitepna thingkong maiya pansa a thingkong sin chu thisan athekhum ding ahi.
16 Hitobanga hi Israelte thenlouna jouse le achonset jouseuva muntheng chungnung suh thengna abol ding ahi. Hitobang teng hile ngahmun lailunga um ponbuh chub oh a um ahitan, suh thengna abol tei ding ahi.
17 Muntheng chungnung sutheng dia Aaron alut’a ahungdoh kahsea hi ponbuh sunga koima um thei lou ding ahi. Ama changseh le a-insung mite, chule Houbung pumpi dia thensona abol teng,
18 maicham phunga pumgo thilto abol’a asuh theng ding ahi. Bongchal thisan phabep le kelcha thisan phabep lantin, maicham selki dunga aloinatsoh hel ding ahi.
19 Thisan chu khutjunga khoiya, maicham chunga sagi vei athin khum ding ahi. Hitia hi maicham chu Israelte chonset jal’a asuh thenga athenso ding ahi.

Kel-hing kilha
20 Aaronin muntheng chungnung suh thengna kin jouse le Pakai chenna ponbuh suh theng kin chule maicham suh theng achaisoh teng, Azazel dia phun phatna kelcha chu Pakaiya atodoh ding ahi.
21 Aaronin akhutte ni kelcha chunga ngamin tin, chonset thil ho le gitlouna jouse, Israelten doumah abol chengseu aphondoh a, kelcha chunga akhuh peh banga abol ding ahi. Chuteng nganse pen mi khat’in kelcha chu gammang noiya adel lut ding ahi.
22 Hitia chu kelcha hin achonset jouseu, mihem chenna lou gamsunga apohmang ding ahi.
23 Chujou teng muntheng chungnung sung alut masanga Thempuvon akivon chengse chu, Ponbuh a lut a Aaronin agakoi ding, hikoma chu adalhah den ding ahi.
24 Muntheng lai khat’a kisil lhantin, avon ngai akivon ding, chuting potdoh a ama chonset le mipi chonset thensona pumgo thilto ding chu agato ding ahi.
25 Chonset thensona dia sathao jouse maicham phunga agovam ding ahi.
26 Gammang noiya Azazel dia kelcha delmangpan ngahmun ahung lut masanga von jouse sop lhaa, ama jong kisil theng ding ahi.
27 Chonset thensona dia kithat bongchal le kelcha, athisan jong chonset suh beina dia muntheng chungnung sunga choilutsa chu ngahmun polam a pohdoh a govam ding ahi. Avun, asa chule agil jouse govam ding ahi.
28 Agouvampen pen chun ngahmun alut masanga ponsil jouse sop’a ama jong kisil theng ding ahi.

Thoidam Nikho nit ding

29 Aban a kisei dan jouse hi akhang a nit jing ding ahi. Lha sagi, nisom lhin ni le Israelte le alah-uva cheng gamchom miten an ngol’a na atoh louhel diu ahi.
30 Hou thudol’a athen theina diuva, hiche nikho tengle achonset’u thensona bol ding ahi.
31 Hiche nikho hi nitheng tah hiya, an ngol’a na tohda ding ahi.Hiche dan jouse hi akhang khanga nit jing ding ahi.
32 Apa khel’a pang dia dandih a kithenso, katdohsa Thempu chungnungin suhthengna kin abol ding ahi. Thempuvon akivon ding,
33 muntheng chungnung le Pakai chenna ponbuh chengse, maicham phung le Thempuho, chule Houbung mipi suh thengna kin abol ding ahi.
34 Dan hicheng hi akhang khanga nit ding ahi. Israelte achonset chengseuva suh thengna dia hiche thenso kin hi kum khat le khatvei bol jing ding ahi. Pakai thupeh bang bangin Mose’n aboltai.

Thempu Dan Bung 17

Thisan thenje

1Pakaiyin Mose chu
2 Aaron le achapate chule Israel pumpi seipeh din aban a kisei dan ho hi apei.
3 Israel mi koi hile, Pakai chenna ponbuh kotphung tilouva Pakaiya kilhaina bong ham, kelngoi ham, kelcha ham that pen pen chun Danthu apalkeh ahi.
4 Thisan asojeh a Pathen mite lah asimtha lou ding ahitai.
5 Hiche thupeh-in adei chu, gamlah thollhanga gan kithat jouse chu Israelten Pakai angsunga ahinkai lut diuva kisei ahi. Kotphunga Thempupa koma akailut’uva, kiloikhomna thilto dia tha ding ahi.
6 Thempupan thisan chu ponbuh kotphunga maicham kimvel’a athe thang ding, Pakai lung lhaina dia athose se chu agovam ding ahi.
7 Israelten Pakai lepbolna kelcha limsemthu doi houna dia gamlah a gancha atha kit louhel diu ahi. Hiche dan hi Israelten tonsot’a anit diu ahi.
8 Israel mi hihen Israelte lah a cheng gamchom mi hile, pumgo thilto ha, kilhaina dang dang ham,
9 Ponbuh kotphung tilouva Pakaiya kilhaina bol jouse chu Pathen mite lah a, simtha lou ding ahitai.
10 Israel hihen gamchom mi, Israel lah a cheng hile, thisan lhoh theng louva sa to neh tha chu Pakai to kidou ding, mite lah a asimtha lou ding ahi.
11 Ganhing jouse hinna hi thisan ahi, hijeh a hi Pakaiyin mipi chonset suhmangna dia thisan jouse maicham phunga sun lhah dia asei ahi.
12 Hitia hi Pakaiyin Israelte le alah-uva cheng gamchom miho, sa chu thisan puma neh lou dia aseipeh ahi.
13 Israel hihen gamcho mi alah-uva cheng hile, gamlenga sa ham vacha ham, hou thudol’a theng, that a chun tol a thisan lhoh lhantin, leiset avuh ding ahi.
14 Ganhing hinna hi thisan ahin, hijeh a chu sa chu thisan puma neh lou dia Pakaiyin Israelte aseipeh ahi, aneh thaa chu amite lah a simtha ponte.
15 Koi hile, Israel hihen gamchom mi hile, gan thikam ham, sahang tha ham nekhan, von jouse akisop thenga, kisilngim ding, nilhah geiya boh ding ahi.
16 Abolda le themmona chengse akipoh ding ahi.

Thempu Dan Bung 18

Phal louva kitimat bol

1 Pakaiyin Mose jah a
2 Israelte jah a seipeh din ahil’in, “Kei, Pakai na-Pathenu kahi.
3 Masanga nachen nau Egypt mite chonna le tua kapuilut nau Canaan mite chonna jui dauvin.
4 Kadanthu nit’un lang, kathupeh yuiyun, Kei, Pakai na-Pathenu kahi.
5 kapehsau Danthu dol’a chonna chengse le Danthu jouse chu jui leu chun kihin so ding nahiuve. Kei, Pakai chu kahi,” ati.
6 Pakayin aban a kisei dan ho hi aseiye. Nakinaipi behseh inko chu kichenpin kitimatpi dauvin.
7 Nanu luppia kitimatpin napa jumso dauvin. Nanu nasuh thang lou diu ahi.
8 Napa ji pou pou kitimatpin napa jumso dauvin.
9 Napenpi hihen nanu ho cha hijongle, nachenpi hihen mun dang a seilen hile, kitimatpi thei pouvin nate.
10 Natunu kitimatpi dauvin, hamset lentah ding ahi.
11 Napa- ngah chanu koi hile, nasopi ahin, kitimatpi dauvin.
12 Nanu sopi ham napa sopi ham, nani ham
13 nakitimatpi thei lou diu ahi.
14 Nagang ji nakitimatpi lou ding ahi, ama jong nani ahibouve.
15 Namou nu nakitimatpi lou diu ahi,
16 nasopipa jinu jong nakitimatpi thei lou diu ahi.
17 Luppia nakitimatpisa numei chanu ham tunu ham to nakitimat thei lou diu ahi, nakinaipisa ahitan, dih lou ahi.
18 Najinu damlai sungin asopinu kichenpi thei pouvin nate.
19 Numei thi neipet, hou thudol’a boh a aumpet’in kitimatpi dauvin.
20 Midang jikitimatpi dauvin, hou thudol’a boh lo ding nahiuve.
21 Nachate khat cha jong milimdoi semthu Molech houna din peh dauvin, peleu chun Pakai Pathen min nasuh thang diu ahi.
22 Pasal le pasal numei to kitimat banga kibol thei lhon lou ding ahi, Pathen ngaidan ahi.
23 Pasa hihen numei hile gancha to kitimat abol thei louhel ding ahi; hitobang chin chatvai hin hou thudol’a mi asuh thang ahi.
24 Nang ho chentheina dia Pakaiyin anodoh, gamsunga anachengsa, doihou ho amaho chama akisuh boh lo bangun, chunga kiseiho bol’in nang ho kisuboh hih hel’un.
25 Achon nauvin gamsung asuh thang phat’a, Pakaiyin gamsung talen matsah a, achengte apailo ahi.
26 Hitobang kidah dah um thil ho aboljeh-uva gamsung asuhboh-u ahin, nanghon nabol louhel diu ahi.
27 Nabon chan, Israel hiuvin, nalah-uva cheng gamchom mi hile, Pakai Danthu ho le thupeh chengse nanit diu,
28 chutile gamsungin napaidoh lou diu, namasanguva chengte abolna banga nabol lou diu ahi.
29 Hitobang thil thenglou bol’a khat cha jong Pathen mite to simtha lou ding naheuve.
30 Chuin Pakaiyin, “Kathupeh chengse nit’un lang, namasanguva cheng mite chonchan khat cha juidauvin, hitobang thil ho bol’a nakisuh boh thei lou diu ahi. Kei, Pakai na-Pathenu chu kahi,” ati.

Thempu Dan Bung 19

Thenna le thudih Dan ho

1 Pakaiyin Mose jah a
2 Israel Houbung pumpi seipeh din ahil’in, “Kei, Pakai na-Pathenu kathenjal’a nathen diu ahi.
3Nule pa najauva, kaseipehsa banga Choldo nikho nanit diu ahi. Kei, Pakai na-Pathenu kahi.
4 “Kei dondan milimdoi hou dauvin; lhahjol thei thil’in Pathen limsemthun hou dauvin, Kei, Pakai na-Pathenu chu kahi.
5 “Kiloikhom thilto dia gan natha thengule, jui dia kapehsa dan chengse nit’un, chutile nathiltou kasan ding ahi.
6 Sa chu akitha ni ahiloule akitni sunga neh jousoh hel ding ahi. Nithum geiya umna lai sa jouse gavam ding ahi.
7 Ajeh chu nithum geiya uma chu houthu dol’a boh a ahitai, anekha aumle thilto chu kasan lou ding ahi.
8 Anekha pen pen chu kahenga kitohdoh mai mai thilbol’a aboljeh a themmo chang ding, kamite lah a kisimtha lou ding ahitai.
9 “Lhosoh ga nakhop khom tengu, loupam chin gei geiyin khop dauvin, changkhati pal geiya atdoh din jong gel dauvin.
10 Khop hai lengpiga le lengpiga pulsa lhoh khom din lengpilei lai avel’in chon hih-uvin. Hicheng chu vaichate le gamchom mite din khenden tauvin. Kei, Pakai na-Pathenu chu kahi.
11 “Guchat lepthol chule jousei bol hih-un.
12 Molso ding go louvin Kei minin kitepna nei dauvin, nachutibol’u chun kamin asuthenge. Kei, Pakai na-Pathenu chu kahi.
13 “Koima jotho le chom din gel hih-un. Thalah man chu jan khat jeng cha hijongle peh louvin koi dauvin.
14 Na-ngong chu gaosap dan, kipalna din mitcho masanga ima koidauvin.Neigingun, Kei, Pakai na-Pathenu chu kahi.
15 “Thu kitah le dih-in tan’un; vaichate hebol tum dan, mihao gingdeh hih-un.
16 Koi chung hile thujou seithangin joh dauvin; khattou thina khop chung thu kikhol aumle, naseiya aphatchompi ding chan seiyun, Kei, Pakai chu kahi.
17 “Koimacha dou lungin vet dan, nakitomolona chu seitoh thon, hitia chu ama jal’a nachonset lo louna din.
18 Koima setna lethuh louvin, hot’in jong boljom dan, chute sangin nang nakingailut bangin naheng nakom nagilun, Kei Pakai chu kahi.
19 “Kathupeh chengse nit’in. Gancha chichom chom kitimatsah dan, loulaiya jong muchi chom chom tuhal dan. Patchom kihal ponsil jong sil dan.
20 “Soh numei, jalen loulai, keiman achohdoh lou, ahivanga pasal khat to kicheng dia kitepsa chu apupan huh man a akitimatpi khah le, talen matsah thoa, tha lou ding ahi. Ajeh chu asohnu hinalaiya ahi.
21 Amavang pasal pan kachenna ponbuh kotphunga thil ledoh thilto dia kelngoichal khat ahinkailut ding,
22 Thempupan hiche kelngoichal a hi suh thengna kin abolpeh a, pasak pa chonset suhmang ding agelpeh ding, chuting Pathenin angaidam ding ahi.
23 “Canaan gamsung nalut’uva, gathei thing natu tengu, kumthum sunga thingga chub oh a nagel diu ahi. Hiche sunga hi aga naneh louhel diu ahi.
24 Kum li lhin teng, Kei Pakai koma kipa vetsahna thingga jouse kilhaina nanei diu ahi.
25 Kum nga lhin tengle vang thingga chu nethei tauvin nate. Hitia nabol’u le nothing phung jouseu gabe cheh ding ahi. Kei, Pakai na-Pathenu chu kahi.
26 “Sa thisan pumin neh dauvin, itobang hijongle mitpheldoi bol dauvin.
27 Nachalsam pheh dan, nabengmul jong jel dauvin,
28 mithi ho jal’in natichung dungu jeppol le atpop bol hih hel’uvin. Kei,Pakai chu kahi.
29 “Nachate numeiho Houin a kijohsah a jumso din bol dauvin; bol pan leu chun doilim semthu nahoulo’uva, gamsung chon chatvai dimsoh ding ahi.
30 Choldo nikho nit’inlang, Kei min eihouna mun jabol’un. Kei, Pakai chu kahi.
31 “Themkate henga phun san dauvin, nasan’u le hou thudol’a boh ding nahiuve. Kei, Pakai na-Pathenu chu kahi.
32 “Tehse gingin jabol’un. Kei neigingun, Pakai chu kahi.
33 “Nagamsunga cheng khopem engbol dan.
34 Israel mi bolna bangin bol’in, nang nakingailut bangin nagilun. Phat khat’a nangho jong Egypt a khopemsa nahiu geldoh jinguvin. Kei, Pakai na-Pathenu chu kahi.
35 “Thildung le thilgih, chule thiljat ten a lhem mangin koima lhepthol dauvin.
36 Thildung thilgih chule thilvai ten a dih manguvin. Kei, Pakai na-Pathenu, Egypt a kona nahin puidoh pau chu kahi.
37 Kei Danthu jouse le thupeh chengse nit’un. Kei, Pakai chu kahi,” ati.

Thempu Dan Bung 20

Thu ngailoujeh a gentheina ho

1 Pakaiyin Mose jah a
2 Israelte seipeh ding ahil’in, “Nang ho hiuvin nalah-uva cheng khopem hile, doilim semthu Molech houna dia ache tohdoh pen pen Houbung pumpin songa selih ding ahi.
3 Doilim semthu Molech houna dia cha tohdoh a kaponbuh theng suboh, kamintheng suthang pen pen chu kadou ding, chule kamite lah a kisimtha lou ding ahi.
4 Houbung pumpin chutobanga chon mi chu nahsah louva, atha dau le,
5 Kei tah kipan a hitobang mi chuleh a-insung mi, eijoubol’a hichepa to kithoa Molech hou jouse kadou ding ahiuve. Hiche ho hi kamite lah a simtha ponge.
6 “Themkaho henga phunsan aumle, ama chu kadou ding, kamite lah a kasimtha lou ding ahi.
7 Kisuboh hih hel’un, ajeh chu Kei, Pakai na-Pathenu chu kahi.
8 Nasuthenguva na-Pakaiyu kahi, kadanthu chengse nit’uvin,” ati.
9 Aban a kisei chengse hi Pakai peh ahi. Anu ham apa ham gaosap pen pen chu tha ding ahi; aman thilona thei akiseidoh khah ahi.
10 Pasal khattouvin Israel chanpi jinu achonsetpi leh, ani lhon a selih ding ahijenge.
11 Khattouvin apa ji khat pen pen akitimatpi khah le, pa suh minset jal’a, chonset ni selih tha jeng ding ahi. Ani lhon a thilo theina akiboldoh lhon ahi.
12 Amounu kitimatpi aumle, ani lhon a tha ding ahijenge. Thildih lou boldoh,
13 Pasal le pasal numeito kitimat banga kijonbol’a chun thil kidah pen a choldoh tan, ani lhon a tha ding ahi. Amani kithiso ahi lhon bouve.
14 Pasal khat’in numei khat le anu akop jeng tah le, thil melse boldoh ahitauvin, athum’uva tha ding ahi; chule hitobang thil hi nalah-uva nasosah louhel diu ahi.
15 Gancha numeito kitimat bang a kitimatpi pasal chu gancha chutoh tha tha ding ahi.
16 Gancha to kitimat goa numei chu gancha thutoh tha tha ding ahi. Athilona thei akiboldoh lhon ahi.
17 Asopi ham, pachom le anu cha ham kichenpi pasal chu japi maiya ajinu to jumso ding, Houbung sunga kona kaidoh ding ahi. Asopi numei kichenpi jal’a athoh lo tei ding ahi.
18 Numei thi neipet kitimatpi chu numei pum a hi, ajeh chu hou thudol’a thenle thenlou Dan kisemho sukeh ahi lhon tai.
19 Pasal khattouvin ani akitimatpi khah le, chonthanghoi jal’a athoh lo tei lhon ding ahi.
20 Apa-ngah ji kitimatpi chun, pa-ngah ajumsotan, ama le numei chun athoh lo tei lhon ding; cha jong anei thei lhon lou ding ahi.
21 Asopi ji kichenpi aumle, cha neilouva tha ding ahi lhone. Hou thudol’a thil thenglou bola hi lhonin, asopipa ajumso lhon ahitai.
22 Pakaiyin, “Kapuilut nau Canaan gamsung hin nalohdoh louna diuvin kadanthu jouse le kathupeh chengse nit’uvin.
23 Agamsung chengte chonchan jop dauvin; agamsung nalo theina diuva hiche doi houte khu kanodoh peh nahiuve. Thilse abol chengseu khu kachimchah ahitai.
24 Nangho vang hiche gampha tah le hoitah hi goulo dia kateppeh-uva, kapeh ding nahitauve. Kei, Pakai na-Pathenu chu kahin, namtin vaipi lha a kalhentum nahiuve.
25 Hijeh chun gancha ho le vachate lah a atheng le aboh nakhen jing diu ahi. Gancha thenglou le vacha theng lou ne hih hel’un. Aboh a kaphondoh ahitan, neleu chun naboh lo gam diu ahi.
26 Kei, Pakai hi kathenjal’a nathen’uva, Keiya nahi jing diu ahi. Keiya bou hi dinga namtin vaipi lah a kalhendohsa nahiuve.
27 “Themka henga phunsan pen pen selih ding ahi. Hitia kisep lih pen pen hin thilo theina a kiboldoh a kithat ahi cheh-e,” ati.

Thempu Dan Bung 21

Thempuho thenje

1 Aaron themput dol’a Thempuho jah a seipeh din Pakaiyin Mose jah a, “Koi hile Thempu chu aheng akom thivuina panga, hou thudol’a kisuboh louhel ding ahi;
2 anu ham, achapa ham, achanu ham, asopi pasal ham,
3 ahiloule achenkhompi nah lai, ji neilou asopi numei mong mong ahi ngal louleh.
4 Nupat tuchat jal’a kinaipi mai mai ho thi jal’a vang kisuhboh lou ding ahi.
5 “Thijeh a lunghem vetsahna dia Thempu koi hile, sam kivo ham, bengmul kijel ham, timul kivotol ham abol thei lou ding ahi.
6 Thenga um jinga, kamin asuhboh lou ding ahi. Neh le chah thilto atoa, thenga um jing ding ahi.
7 Thempu chun numei noti ham, mi dasa ham, nu-ngah thenglou ham akichenpi lou ding, athenga um jing ding ahi.
8 Kei henga neh le chah thilto apeh jing jeh a mihon Thempu hi thenga agel jing diu ahi. Kei Pakai chu kahin, Kathengin, kamite kasuthenge.
9 Thempu chanu notia apan le, apa jumso ahin, ahing laiya govam ding ahi.
10 “Thempu chungnung chu luchunga thao kisun khumsam Thempuvon von dinga thenso ahitan, sam potnam louva umda a, chule thi-op hetna ponsil abotel lou ding ahi.
11 Thempu chu Kei dia thensosa ahitan, anu apa jeng hijongle, akpponbuh theng dalhaa,
12 thilong lupna insung lut’a, ama kisuboh louhel ding ahi.
13 Nu-ngah theng akichenpia,
14 meithai le dasa, ahiloule notia panga numei ho akichenpi lou ding ahi. Aphung sung numei, nu-ngah theng bou akichenpi ding dol ahi.
15 Achuti loule, theng dia lom achate chu hou thudol’a boh diu ahitai. Kei, Pakai kahin, ama chu Thempu chungnung dia kalhentum ahi,” ati.
16 Pakaiyin Mose jah a chun
17 Aaron jah a aseipeh din, ahil’in, “Tikimlou, nachilhah koi hile neh le chah thilto ding kahenga ahinchoi thei louhel ding ahi. Hiche hi akhang khanga manchah ding thu ahi.
18 Tikimlou koiman thilto pethei ponte; mitcho, elbai, tikimlou, ti-kisuhlou,
19 khut kon ham keng kon ham,
20 thingbong ham, dung chom ham, mitse vei le tipat ham, chule nikisosa ham, hitobang ho hin thilto tohdoh kin bol thei pouvinte.
21 Thempu Aaron chilhah tikimlou koiman kahenga neh le chah thilto hung pethei ponte.
22 Hitobang miho hin kahenga kitoh thilto, neh le chah thil theng kitoh le, thilto theng chungnung nethei nauvin tin,
23 amavang tikimlou ahijeh-in pondal theng nailut thei lou ding, maicham phung jong nailut theiponte. Hitobang thil theng ho suboh theiponte; ajeh chu Kei, Pakai chu kahin, amaho sutheng chu kahi,” ati.
24 Hiche hi Mose’n, Aaron le Aaron chapate, chule Israelte jah a anasei chu ahi.

Thempu Dan Bung 22

Thilto ho thendan

1 Pakaiyin Mose chu
2 Aaron le achapate jah a sei din ahil’in, “Kamin theng nasuhboh lou dium Israelten kahenga atou thil theng ho chu ja tah anabol diu ahi. Kei, Pakai chu kahi.
3 Nachilhahte koi hile hou thudol’a boh a aum pet’a, Israelten kahenga atou thilto theng kom ahung nailut khah le ama hi maicham kinbol’a pang thei kit lou ding ahitai. Hiche hi akhang khanga man jing ding ahi. Kei, Pakai chu kahi.
4 “Aaron chilhah koi hile tijat umtah tiphah nat nei ham, hinpia thilong ham chun hou thudol’a kisuh thengna anei masangin, thilto theng khat cha netheiponte. Thempu koi hile thilong toh khah jeh ham, ahiloule botwi chedoh jal ham aboh a um tongkha chan chu ama jong boh ding ahi,
5 gancha boh le mihem boh aumpet tongkha jong boh ding ahi.
6 Boh a um Thempu chu nilhah geiya bou boh ding, akisil theng masangsea vang thilto theng aneh thei lou ding ahi.
7 Nilhum teng vangle neh ding dol, thilto theng chu nethei tante.
8 Sa thikam le sahang thasa vang netheiponte, aboh lo ding ahi. Kei Pakai chu kahi.
9 “Thempu jousen chondan kapeh chengse ajui cheh diu ahi. Ajui daule themmo change, thilo diu ahi; ajeh chu Dantheng kipe juida jeh ahi. Kei, Pakai chu kahin, amaho thenso kahi.
10 “Thempu insung mi koi hile thilto theng ho netheiyintin, midang, Themputo chengbom ham, ahiloule Thempu thalah ham hijongle, amaho hin nethei pouvinte.
11 Thempupa soh, suma achoh ham, a-insunga pengden hamin vang Thempu kipe neh le chah nethei nante.
12 Thempu chanu, Thempu hilouto kichengin vang thilto theng ho netheiponte.
13 Meithai ham, dasa chanu ham, chabei, apa in a hung nung kit, apa ki-ngaina neiyin vang Thempu hijal’a apa thil mu chengse netheiyinte. Hitia hi Thempu insung micha chanbou hitobang thilto hi netheiyinte.
14 “Thempu insung mi hilouvin hetoh louva thilto theng ho aneh khah le, aneh jet man lhingset’a Thempupa apeh a, chule aman jat ja khat’a som ni to apeh tha ding ahi.
15 Thempuhon thilto theng ho asuh boh lou ding,
16 nehsah lom louho anehsah lou diu ahi; nehsah taleu themmona le talen mat lona aboldoh peh lo diu ahi. Kei, Pakai chu kahin, thilto chengse sutheng kahi,” ati.
17 Pakaiyin Mose ahil’in,
18 aban a kisei chondan jouse hi Aaron le achapate chule Isaelte seipeh din aseiye. Israel ham, Israel gamsunga cheng midang hamin pumgo thil ato teng, deichom thilto hihen, kitepna suh bulhitna thilto hihen, kitepna suh bulhitna thilto hile, nolnabei gancha bou ato ding ahi.
19 Santhei ding dol chu achal, nolnabei hi ding ahi.
20 Nolna nei gancha tou leu chun Pakaiyin sang ponte.
21 Kitepna bulhitna ham, deichom thua thilto ham Pakai henga kiloikhomna dia tohdoh chun, nolnabei atole bou sanpeh thei ahi.
22 Gancha mitcho ham, elbai ham, tikimlou ham, atiphah ham, tibol ham, apat ham Pakai henga nato thei lou ding ahi. Neh le chah thilto din hitobang gancha ho hi maicham phunga peh dauvin.
23 Deichom thilto din vang veise khangmo hihen tikimlou hile tothei ahinan, kitepna molsona dia vang hitobang chu santhei ahipoi.
24 Gancha tillahsa ham, attelsa ham chu Pakai koma toh hih hel’un. Hitobag hi nagamsunguva bolngai ahipoi.
25 Gamchom mi khut’a kicho gancha chu neh thei thilto dia napeh thei lou diu ahi. Gancha hitobang ho hi nolna nei, santhei lou ahibouve.
26 Bong ham kelngoi ham kelcha ham nou aso teng, ni sagi sunga api to khen louhel ding ahi;
27 ni sagi jou teng vangle neh le chah thilto dia sanpeh thei ahitai.
28 Ni khat sungin bongpi le anou, kelngoipi le anou, kelpi le anou kilhaina neikop dauvin.
29 Pakai henga thangvah thilto napeh tengu, santhei ahina din, abol ding dan kisem chengse dungjuiyin bol’uvin.
30 Natodoh nikhouvin nejouvun lang, ajing geiyin nehval sa khen hih hel’un.
31 Pakaiyin, “Kathupeh chengse nit’un, Kei, Pakai chu kahi.
32 Kamin theng suboh hih-un; Israel pumpin kathenje aseiphong diu ahi. Kei, Pakai chu kahin, kasuh theng nahiuve;
33 na-Pathenu hina dia Egypt akona kahinpuidoh nahiuve; Kei, Pakai chu kahi,” ati.

Thempu Dan Bung 23

Hou thudol kut ho

1 Pakaiyin Mose jah a
2 aban a kisei chondan ho hi, Pathen houkhom dia Israelte kikhop teng hou thudol kut dan a man din apei.
3 Natohna din nigup naneiyun, ni sagi lhin ni, Choldo nikho vang kicholdona ahi geldoh jingun. Hiche nikho teng na toh dauvin, Pathen houkhom din kikhom’un. Hoikoma cheng jongleu chun akhohpoi, Choldo nikho chu Pakaiya ahi.
4 Aban a kisei cheng phat tepsa kut ho hi phongjal leuvin.

Kalchuh le cholsolou changlhah kut

5 Pakai jabolna kimang kalchuh kut hi, lha masapen, nisom le ni li, nilhum lhum le kipan ahi.
6 Nisom le ni nga nia cholsolou changlhah kut kipan ahin, ni sagi sunga cholsosa changlhah naneh louhel diu ahi.
7 Nikho hijat sung, ni masapen ni le natong louva, Pathen hou dia nkikhop diu ahi.
8 Ni sagi sungin Pakaiya neh le chah thilto toh-un, ni sagi lhin ni le Pathen hou din kikhom’uvin, niseh natoh ngai khat cha tong hih-un.
9 Pakaiyin napehnau gamsung nahung lhun tengu, lhosoh khop teng
10 changvui masapen chu Thempu gapeuvin.
11 Pakaiyin nasantheina diuvin, Thempupan changvui masapen chu Pakaiya deichom thilton gapente.
12 Chang lhung masa thilto napeh niu le, nolnabei kelngoichal, kum khat lhingsa khat jong kilhainan to thauvin.
13 Hiche puma hi neh le chah thilto dia, olive thao to halsa, changbong neldisel, kilogram ni jong napeh diu ahi.Hiche thilto gimnamtui hi Pakaiyin ajah nom’e. Hiche puma lengpitwi litre khat jong nato diu ahi.
14 Pathen henga hitia natodoh masangun, changvui khat cha jong, asel ham, kan gotsa ham, changlhah a kikang ham a naneh thei louhel diu ahi. Hiche chondan ho hi nason nachilhah teuvin akhang khanga anit jing diu ahi.

Lho lhun kut

15 Changvui masapen Pakaiya natodohnau Choldo nikhoa pat hapta sagi lhingset simdoh-uvin.
16 Hapta sagi na, nisom nga lhin nin, changvui thah thilto din Pakaiya gapeuvin.
17 Deichom beh thilpeh dia, insung khat cheh chun Pakaiya changlhah phengni achoi cheh diu ahi. Changlhah pheng khat cheh chu cholsosa changbong neldisel kilogram ni, changlhah kan minsa, lhosoh masapen, changvui thilto Pakaiya peh ding ahi.
18 Hiche changlhah hi le kum khat lhingsa cheh kelngoi sagi, bongchal khat, kelcha ni, nolnabei cheh, japing atodoh diu ahi. Hicheng hile chang thilto, lengpitwi thilto chule pumgo thilto chu peh tha ding ahi. Hiche thilto gimnamtui hi Pakai ngai nom ahi.
19 Chonset thilto din kelchal khat le kum khat lhingsa kelngoichal ni chu kiloikhom thilto din peuvin.
20 Changlhah le kelngoite ni chu Thempupan Pakaiya deichom thilto din pentin, Thempuho chang diu ahi. Hitobang thilto ho hi thil theng ahi.
21 Hiche nikho le na tong louvin, Pathen hou din kikhom’uvin. Hoikom a cheng hijongleu akhoh poi, chondan hicheng hi nachilhah teuvin akhang khanga anit jing diu ahi.
22 Lhosoh ga nakhop khom tengu, loupam chin gei geiyin khop dauvin, changkhai pal geiya atdoh din jong gel dauvin; vaichate le gamchom mite din khenpeh tauvin. Pakai chu na-Pathenu ahi.

Kumkhat kut

23 Lha sagi lhinna, ni masa nin, atumbeh a choldo phat khat mangun,
24 sumkon gin tengle Pathen houkhom din hung cheh-uvin.
25 Niseh toh ngai na tong louvin, Pakai henga neh le chah thilto tohjo’uvin.

Thoidam nikho

26 Lha sagi lhinna, nisom lhin ni hi japi chonset suhbeina dia kumseh a kithoi kinbol nikho ahi.
27 Hiche nikho le neh le chah ngol’a Pathen hou dia kikhoma, Pakai henga neh le chah thilto nato diu ahi.
28 Hiche nikho hin na toh dauvin, ajeh chu chonset suhbeina dia kithoi nikho ahibouve.
29 Hiche nikhoa kamheiya i-khat khat nekhapen pen chu Pathen mite lah a simtha lou ding ahi.
30 Hiche nikhoa natong aumle, Pakaiyin atha jeng ding ahi.
31 Hoikoma chengu jongle, hiche chondan jouse hi nachilhah jouseuvin aman cheh diu ahi.
32 Chuche lha niko ni, nisa lhum a pat, nisom lhin ni, nisa lhum a pat, nisom lhon ni, nisa lhum geiya, atumbeh a Choldo nikhoa nanit diu, hiche sungsea chu imacha cha naneh lou diu ahi.

Lhambuh kut

33 Lhambuh kut hi, lha sagi lhinna,
34 nisom le nga nia pat ni sagi sunga kibol ahi.
35 Hiche sung nikho masapen ni le Pathen hou din hung kikhom’un lang, niseh tohngai kin boldauvin.
36 Ni sagi sunga niseh le neh le chah thilto nepeh jing diu ahi. Niget lhin ni le Pathen hou din hung kikhom kit’un lang, neh le chah thilto toh-uvin. Pathen houni ahin, natoh ima nabol da diu ahi.
37 Hiche kut chengse hi hou thudol’a Pakai najabolnau, Pathen hou dia kikhop khom, neh le chah thilto, pumgo thilto, chang thilto, kilhaina jouse le lengpitwi thilto, kilhaina jouse le lengpitwi thilto, niseh a peh ding lom napeh-uva nanit diu ahi.
38 Hiche kut ho hi Choldo nikho chungvuma nanit diu, thilto chengse jong hi angaiya napeh diu lom le, kitepsa thilto, deichoma natou thilto, Pakaiya napeh chengse chungvuma peh be ding ahi.
39 Lhosoh ga nakhop tengu, lha sagi lhinna, nisom le nga nia pat ni sagi sungin kut hi manguvin. Nikho masapen chu atumbeh a Choldo nikho hi ding ahi.
40 Hiche nikho hile nathinggau phapen louvun lang, lusu beh ho le thingna boh pha pha louvun, Pakai na-Pathenu jabolnan, hou thudol’a kut chu bol’uvin.
41 Ni sagi sungin kut bol’uvin.Hiche chondan hi nachilhah teuvin akhang khanga anit diu ahi.
42 Israel jouse ni sagi sunga lhambuh a cheng diu
43 hitia hi nachilhah miteuvin, Egypt a kona ahinpuidoh a Pakaiyin Israelte imacha lou lhambuh a achensah ahet diu ahi. Ama chu Pakai, na-Pathenu ahi.
44 Hiti hin Pakai jabolna dia Hou thudol a kut bol ding chondan kisem chengse Israelten anitna siuvin Mose’n aseipeh tai.

Thempu Dan Bung 24

Thaomei limbol dan

1 Pakaiyin Mose jah a
2 Israelte seipeh din aban a kisei chonna chengse hi aseipeh-e. Mei mit louhel’a vah theina din, ponbuh sunga kikoi thaonei ho ding, olive thaotwi phapen tah hinchoiyun.
3 Nilhah she le Aaronin thaomei jouse vah-intin, jingkah geiya vah dia, Pakai chenna pondal polam, Kitepna thingkong mai, muntheng chungnunga adet ding ahi. Hiche chonna hi akhang khanga nit jing ding ahi.
4 Aaronin sana thengsel’a kisem thaomei khom ho chunga kitung thaomeo jouse limbol’in tin, Pakai chenna a chu vah jing jenga akoi ding ahi.

Pathen a katdohsa changlhah

5 Changbong kilogram som le ni lan, changlhah pheng som le ni kangin.
6 Changlhah chengse chu gol nin gol’in, gol khat’a chun changlhah pheng gup gup koiyin, Pakai chenna kikoi, sana thengsel’a kisem dokhang chunga chun koiyin.
7 Changlhah khel’a, Pakai dia neh le chah thilto khohsahje vetsah nan, gol khat cheh chunga gimnamtui tah koiyin.
8 Choldo nikho she lem akhang khanga, Pakai chenna a chu changlhah koi ding ahi. Hiche hi itih a Israel toh ding kin ahi.
9 Changlhah hi Aaron le ason apah ho ding ahin, muntheng lai khat’a aneh diu ahi; ajeh chu hiche hi Pakai dia kitoh anneh thengpen ahin, Thempuho chan ding ahi.

Dihtah a talen matsah

10 Pasal khat hi apa Egypt mi, anu Israel mi, Shelomith kiti, Dan phunga Dibri chanu hi aumkhai.
11 Hichepa hi ngahmun a Israel khat to akinai. Akinah pet lhonin amahin Pathen agaosap khan, Mose henga akaitauve.
12 Amat pau hi mi a-ngasah-un, i-lo ding dol, Pakaiyin aseipeh diu angah tauve.
13 Pakaiyin Mose jah a,
14 “Hichepa chu ngahmun polam a kaidoh-uvin, Pathen agaosap japha chanin achunga khut ngam’u hen, athemmo dol hettohsah cheh-u hen, chutah le Houbung pumpin songin seplih tau hen.
15 Israel te seipeh-in, koi hile Pathen gaosap chan chun hesoh genthei athoh lo tei ding,
16 tha doh ding ahi. Israel hihen Israel lah a cheng gamchom mi hile Pakai gaosap’a mi chu khoppi pumpin songa selih ding ahijenge.
17 “Tol that chu ama jong tha ding,
18 mi nei gancha that chun akhel apeh tei tei ding ahi. Hiche chenna lhongpi hi hinkho khel a hinkho kipe ahi.
19 “Mi khat’in michom khat asuh khah le, aman abolna bang banga ama jong bol ding ahi.
20 Mi gu subong ahile, ama gu khat suhboh peh ding; mit lang khat suhchot peh ahile, ama mit lang khat suhchot peh ding, ha khat asuhpul le, ama ha khat suhpul peh ding ahi. Midang asuhsetna bang banga amaa suhset peh ding ahi.
21 Gancha that chun gancha khel apeh a, mihem that chu ama tha ding ahi.
22 Kei, Pakai na-Pathenu chu kahin, hiche Danthu hin Israel le Israel lah a cheng gamchom mi jong akan cheh-uve,” ati.
23 Mose’n Israelte jah a hicheng asei jou hin, amat pau chu ngahmun polama akaidoh-un asep lih tauve. Hitobang hin Pakaiyin Mose apeh thu chengse Israelten aboltauve.

Thempu Dan Bung 25

Kum sagi lhin kum

1 Sinai molsanga Pakaiyin Mose jah a thu aseiyin,
2 Israelte seipeh din aban a kisei chondan ho hi ahil’e. Pakaiyin napeh-u gamsung nalut tengu, Pakai jabolna akum sagi lhin she le, gamsung lou nabolda diu ahi.
3 Kumgup sunga loulaiya muchi chivo nat’uva, lengpilei nalho ngim diu, lhosoh ga nalo diu ahi.
4 Kum sagi lhin kum vang chu gamsung choldo kum ahin, Pakai dia katdohsa kum ahi. Loulaiya muchi chivo tudauvin, lengpilei bol dauvin.
5 Tu louva hamkeh muchi chivo ga jong lo dauvin, lei bol louva ga lengpiga jong lou hih-un. Gamsung dia choldo kum ahi.
6 Hiche kum hin lou bolda jongleur chun, gamsungin nang ho le nasohteu, thalah ho, nalah-uva cheng gamchom mi,
7 naganchateu le gamsunga gamsa jouse kivahna kham sodoh nante, gamga tapou neh thei cheh ahi.

Thoidam kum

8 Kum sagi chu sagi veiyin punsah-in, kum somli le ko lhinsah-in.
9 Chuche kum lha sagi lhin, nisom lhin ni, thoidam nikhon, gamsung thongsoh hel’a sumkon mut ging khat sol’in.
10 Hitobanga hi kum som nga lhin kum hi nalhendoh a, gamsung chengte jouse jalenna naphondoh diu ahi. Kum som nga kum sunga hi joh dohsa gam jouse aneiluipa, ahiloule achilhah ho lepeh kit ding, soh a joh dohsa mihem jong a-inkote henga kile kit ding ahi.
11 Lou laiya muchi chivo natu dauva, changham keh le leibol lou lengpiga na-at dauva nalo da diu ahi.
12 Kum lhungkei chu kumtheng hi ding; lousoh mai mai naneh diu ahi.
13 Hiche som nga lhin kum hile joh dohsa thilkeo jouse anei luipa lepehsoh ding ahi.
14 Hijeh chun Israel chanpi henga gam leiset joh a le choa chun dih louvin boldauvin.
15 Gam man chu thoidam kum kit ding kah a dia, kum jat to kithuh a, teppeh ding bou ahi.
16 Kum tampi aum nah laile, gam man tam a, kum lhomcha aumtah le, gam man lhom ding ahi; ajeh chu akijoh lo man hi gam chun asodoh ding jat kum man dungjuiya kiteppeh ahi.
17 Pakai na-Pathen gingun lang, Israel chanpi lepthol dauvin.
Kum sagi lhin kum bolna

18 Gamsunga mongtah a nachen theina dauvin, Pakai Danthu jouse le thupeh ho nit’uvin.
19 Chutile gamsungin ga nengtah-in semdoh-intin, du le ngai jouse nengtah a naneiyuva, lung mongsel’a nachen diu ahi.
20 Khattouvin, kum sagi lhin kum, muchi chivo tulou kum, lhosoh ga khop lou kum le ipi pen neh ding datmonte.
21 Kum gup lhin kum chu Pakaiyin phatthei boh-intin, kumni sung neh khopset asemdoh ding ahinai.
22 Kum get lhin kum, muchi chivo natu tengu jongle, kumgup lhin kum a lhosoh ga ne na laiyun nate, chujongle tua muchi at phat kum kit geiya neh ding jong nengsel’a nanei diu ahinalaiye.

Gamsung lepeh kitna

23 Gam najoh pai thei lou diu ahi; ajeh chu gam neiya nangho nahipouve, Pathen gam ahin, amangcha mai mai dia phalpeh, khopem tobang nahibouvui.
24 Gam akijoh teng, alechoh kitna ding tha nei apului suhmil lou ding ahi.
25 Israel mi khattou vaichat’in atu a gam joh lou akhoh le, akinaipi pen inkon achoh ding ahi.
26 Kinaipi inko neilou jong khonung teng haodoh a alechoh kit thei ahi.
27 Hitobang ding, alechoh kit tengle, thil lepehna ding kum um nalai chengse simtoh a , hiche dungjuiya chu sum simtoh kum tamle lhom dungjuiya sum peh ding ahi.
28 Gam ledoh kitna ding kham sum anei loule, thil lepeh kitna ding kum hung lhun kahsea achopa khut’a gam chu um ding ahitai. Thil lepeh kitna ding kum lhun teng vangle gam puluipa lepeh kit ding ahi.
29 Kulpi kaikhumsa khopi sunga in joh aumle, ajoh kum masa sunga alechoh kitna ding tha aneiye.
30 Ajoh doh kum a alechoh kit jou lou vangle, in chu lechoh kitna ding tha anei lou ding, achopa le atu acha chang den ding, thil lepeh na ding kum lhin teng jongle apului kipelou ding ahitai.
31 Kulpi kaikhum lou khosunga in ho vang louman ho kibolna banga bol ding ahi, apuluiyin lechohna tha anei jingin, thil lepeh ding kum tengle lepeh kit ding ahi.
32 Leviten vang akichensah nau khopi sung dunga anei agou tapouvu lechoh kitna tha anei jinguve.
33 Hitobang khopi ho khat’a Levi khattouvin in joh a lechoh lelna anei tah le, thil lepeh ding kum teng lepeh tei ding ahi, ajeh chu achen nau khopi dunga Levite gou jouse chu Israelte lah a tonsot gouva aneiyu ahi.
34 Hichea hi Levite khopi kimvel dunga hamhing gam ho joh thei louhel ding ahi; hiche hi tonsot gouva aneiyu ahi.

Bat dia vaicha kipe thil

35 Nakom naiya cheng Israel chanpi khattou vaichat jal’a kivah lel hel aumtah le, thalah mi navah banga navah ngai ahi; chutile nakoma cheng jou ding ahi.
36 Nathilpeh chu akan lah dan, Pathen gingin, Israel chanpi chu nakom a chensah jingin.
37 Bat dia napeh sum chu akan del dan, neh le chah nepeh jongle alap ding hol hih-in.
38 Hiche hi Pakai na-Pathenu, Egypt a kona hinpuidoh a, na-Pathenu ahina dia Canaan gam napego pau thupeh ahi.

Soh lhadoh dol

39 Nakoma cheng Israel chanpi khattou vaichat jal’a nahenga soh a kitung aumtah le, soh na natohsah louhel ding ahi.
40 Thalah mi banga nachenpia, thil lepeh kitna ding kum lhin kah a nakinbol’a pang ding bou ahi.
41 Thil lepeh kitna kum lhin tengle ama hihen acha anao hile dalhan natin, a-inkote kom, apu pa goulo gama kile kit ding ahiuve.
42 Israelte hi Pakai soh ahiuvin, Egypt a ahin lhatdohsa ahiuve; hijeh a chu soh ajoh louhel ding ahiuve.
43 Israelte chu bol gilou hih-in, Pathen gingin.
44 Soh nadeole nakimvel’a cheng namtin vaipia konin kichoh theiyin nate.
45 Nalah-uva cheng gamchom mite jong nacho theiyui. Hitobang chapang nagamsunguva pengden chu nagouvu ahitan,
46 ahin khankhoa akinbol diuva natu nachate nadalhah peh thei ahiuve. Israel chanpi vang nabol genthei louhel diu ahi.
47 Nachenpiu gamchom mi khat hao hen, Israel chanpi vaicha khat ahenga soh chang hen, a-insung min kikhum ta jong le,
48 akijohdoh jeng vanga lhatdoh kitna ding tha anei jing ahi.Asopite khat pen penin
49 apa-ngah ham, asopi chanpi ham, akinaipi phunggol khat’in alechoh thei, ahilou jongle ama akiti thei dom a kilhatna kham aneidoh theile, ama le ama jong jelenna kham pea ongthol thei ahi.
50 Hiti dia hi anacholdoh pa kihoupin tin, anachohdoh nikhoa pat thil kilepeh ding kum geiya kum jat asimtoh lhon a, kilhatdohna ding man chu thalah man dol a kipe sumjat chutoh asuhtoh lhon ding ahi.
51 Thil lepeh ding phat kum lhin kah kum jat dungjuiya,
52 anachohna man sum jat keh khat apeh ding,
53 thalah dol’a kumseh a san ding jat asimpeh ding ahi. Apupan abol genthei louhel ding ahi.
54 Hitobang dol’a chamlhat amumo hel le, thil lepeh kitna ding kum lhin tengle ama le achate jouse jalensah tei ding ahi.
55 Israel mi chu itih asoh aumden thei lou ding ahi; ajeh chu Israelte hi Pakai soh ahiuve. Egypt akona ahinpuidohsa ahiuvin, ama Pakai, a-Pathenu ahi.

Thempu Dan Bung 26

Sei ngaijal’a vangboh

1 Pakaiyin, “Milimdoi sem dauvin, milim hihen doikhom song hile, jeppolsa song, hitobang ho hi hou din phadauvin, Kei, Pakai na-Pathenu chukahi.
2 Hou thudol’a kut jouse mang jingun, neihou nau mun chu jabol’un. Kei, Pakai chu kahi.
3 “Kadanthu jouse le kathupeh chengse banga nakhosah-ule,
4 aphat cha gotwi kapeh-uva, gamga pha theiya, thingga phung thei ding ahi.
5 Lhosoh ga pung behseh a lengpiga lo phat geiya chang na-at nah lai diu, chang tuphat kit geiya lengpiga nalo nah lai diu ahi. Du le ngai jouse nanei kim’uva, gamsunga mongsel’a nachen diu ahi.
6 “Nagamsunguva cham lensah ing ting, koima ging louva na-ihmut ngildel thei diu ahi. Gamsunga kichat um sahang jouse subeiying ting, gal kisat la bei tante.
7 Namelmate jouvun natin,
8 pasal nga neh-in jong melma ja khat cheng najo diu ahi.
9 Vang boh-ing ting, cha le nao tampi nahin diu, ikitepna chu kenvang nit jing nange.
10 Lhosoh ga neng behseh jenga, kum lhung hel’a naneh diu ahi; hichan geiya jong hi lhosoh gat hah koina dia, lhosoh lui naboh mang tho nah lai diu ahi.
11 Nalah-uva um kaponbuh thenga pansang ting, dalha kit tapouvinge.
12 Ka-umpi jing diu, na-Pathenu hing ting, kamite nahi diu ahi.
13 Soh chan kit louna dia Egypt a kon a hinpuidoh chu Kei, Pakai na-Pathenu hi kahi. Nakihen nau kasut lhan, navah thet’in lam kajotsah tauve,” ati.

Thu ngailou jeh a talen

14 Pakaiyin, “Kathupeh chengse nanit daule talen namat diu ahi.
15 Kadanthu jouse le kahtupeh chengse nit louva, ikitepnau nasuh keh-ule,
16 talen kamatsah ding nahiuve. Manthahna kalhut khum’uva, boldammo hel veiset le nat lhut kalhut khum diu, namit chot lo’uva, hinkho kichai hel ding nahiuve. Muchi tujongleu chun pha chom lou ding, ajeh chu melmaten najo’uva natusau aneh ding ahibouve.
17 kadou diu, chuting min najotho diu, nathet tah tah ho nachunguva vaihom ding ahi. Kicha behseh a, koiman del hih jongleur chun najam diu ahi.
18 “Hichan geiya jong sei nangai daule, talen jat sagi kabepeh diu ahi.
19 Hoi tho tah a nakiletsah nau sumang ing ting, gotwi kanga, nagamsungu thih tah a tah ding ahi.
20 Hatah-in na tong jongleun chun phachom lou ding, ajehc hu change mim la ga pontin, thing jong galou ding ahi.
21 “Neidou jinguva, sei na-ngaidan nah laiyulem talen jat sagi kabepeh diu ahi.
22 Nalah-uva sahang lhalut ing ting, nachateu that gamin tin, naganchau aneh gam ding, themcha bou um a, lampi chon jol kham jong lhing lou diu ahi.
23 “Talen hijat namat nunguva jong kasei nagi louva, neidou dal jingule,
24 kadel khum’uva, masanga sanga hahsa cheh, talen jat sagi jen kapeh be diu ahi.
25 Ikitepnaunasuhkeh jal’uva gal kalonvuh sah diu, hoidohna din khopi sunga kikhom jongleu chun, natset kalha khum’uva namelmateu khut’a kikhumlut jeng ding nahiuve.
26 Neh le chah konna sutang ing ting, numei somin thuh khuh khatseh akan kham bep changlhah anei diu ahi. Athem themin homtho’uvin, nejou hel jongleu chun va deh lou ding nahiuve.
27 “Hicheng nunga jong neidou nah laiyuva, sei na nagidaule,
28 lung hanga kadel khum diu, masanga sanga hahsa cheh talen jat sagi kapeh be kit diu ahi.
29 Nakel diu, neh ding beihel teng nachateu geiya kitha naneh diu ahi.
30 Lhangsang dunga doiphung jouse suhbei peh ing ting, gimnamtui lhutna maicham jouse kasuh mang ding, milimdoi kijamchap chunga nathilongu kasetchap ding ahi. Kadah behseh jeh a
31 nakhopi jouse kasuh chim a, doiphung jouse kasuh mang ding, nakilhainau kasanpeh da diu ahi.
32 Nagamu kasuhmang hel’a, asunga cheng melmate geiyin tijat lo na anei diu ahi.
33 Gal kalha khum’uva, mi gam a kathecheh ding nahiuve. Nagamu ahomkeova kijam a, nakhopi jouseu khogem soh ding ahi.
34 Chuteng choldomoa nalhau gamsungin lhingset’a choldona anei ding,
35 namelmateu gamsunga nasohchan kah-uva gamsung kidalha thip ding, chimset’a choldo ding ahi.
36 “Soh change um nang ho chengse kicha behseh-un natin, nathel lhah gin a jong najam diu ahi. Gal del banga najam’uva, melma bon nailou nalhuh lhamdoh diu ahi.
37 Nadel’u beiya, khat chu khat chunga kipal a, melma sat ding beihel’a naum diu ahi.
38 Sohchanna nathiden diu, namelmateu leiset’a kivuisoh ding nahiuve.
39 Namelmateu gamsunga hingdoh nang ho themcha jong nangho le napu napateu chonset ho jeh a beisoh pai ding nahiuve.
40 “Nachilhah chengseuvin vang eidouva doumah bol apu apateu chonset aphon’uva,
41 chonse ho eidousah-uva, amelmateu gamsunga sohchanga eidel lutsah diu ahi. Akhonna, nachilhahteu kineosah a, achonsetnau le doumah bolman asahdoh tengu,
42 Jacob le Isaac chule Abraham to kakitepna geldoh ing ting, kamite gamsung kakitepna kasemphat ding ahi.
43 Ihijongle gamsung hi achengte kisubeiya, kicholdo ding, amiten kadanthu chengse le kathupeh ho nahsahmo man lhingkeiya asah diu ahi.
44 Amelmateu gamsunga aumpet jenguva jong vang, dalha thip del pong ting, suhjong sugam pai ponge. Chuti bol leng kakitepna geiya beitha ding ahin, Kei, Pakai a-Pathenu kahi jingnai.
45 Kei, Pakai hi a-Pathenu kahi theina dia, Egypt a kona kamite kahinpuidoh a namtin vaipi thahat kavetsah a apu apateu to kakitepna kasemthah ding ahi,” ati.
46 Danthu hichengse le Thupeh hijatpi hi Israelte dia Pakaiyin, Sinai molsanga Mose anapeh ahi.

Thempu Dan Bung 27

Pakaiya thiltoje Dan ho

1 Pakaiyin Mose chu
2 aban a kisei chondan ho hi Israelte din apei. Kitepna jal’a mihem khat Pakaiya akipehdoh tah le, anoiya kisei sum jat hi peh a lhatdoh thei ahi:
3 Apet pet a chena lhongpi dungjuiya, pasal kum somni a pat som gup gei mi chu dangka som nga,
4 numei dangka somthum;
5 pasal khangdong kum nga pat som ni gei, dangka som ni, numei dangka som khat;
6 naosen pasal kum nga noi lames, dangka cheng nga, numei dangka chengthum;
7 pasal kum somgup chung lames, dangka som le nga, numei kum somgup chung lames chu dangka som khat alhatdoh thei cheh ahi.
8 Kitepna neipa hi vaichat behseh jal’a chena lhongpi man jat peh ding alel le, katdohsa mihem chu Thempupan man lhom dom ateppeh ding, amipa pehjou dol’a vettoh a atep ding ahi.
9 Kitepna hin gancha peh ding dol’a kitepna ahivangle, Pakaiya santhei lom a todoh thil ahin, Pakai kipesa chu ipi hile theng ahi:
10 kitepna bolpan gancha chu achom dang khat’a akheldoh thei lou ding ahi. Akhel pe-ngal jongle, ato masah le akhel dia apeh akop’a Pakai ding ahi jenge.
11 Pakai dia tothei lou, gancha boh thudol’a kitepna ahivangle, kitepna bolpan gancha chu Thempu henga akai ding ahi.
12 Aphat le aphatmo dung juiya Thempun man atep ding, aman atan dungjuiya kichai ding ahi.
13 Atohdoh pan akilechoh nom le, aman jat le ja khat lah a somni puma apeh tha ding ahi.
14 Khattouvin in Pakai dia apeh doh jeng le, in phat le set dung juiya Thempun atep ding, hichu achaina hi jeng ding ahi.
15 In tohdoh pan akilechoh nom kit le, aman jong chule ja khat lah a somni to apeh tha ding ahi.
16 Khattouvin gam keh khat Pakaiya atodoh le, gam man ding chu muchi kitulut thei jat dungjuiya tep ding, suhlou chang kilogram somni kitulut theina gam chu dangka som khat man a tep ding ahi.
17 Thil lepeh kum kichai til cha atodoh pai ahile, man lhingset’a peh ngaiyinte.
18 Khonung jep’a atodoh vangle, thil lepeh kitna ding kum um nalai dungjuiya Thempun aman ding jat sum atep ding, aman lhadoma abol ding ahi.
19 Loumun tohdoh pan akilechoh nom kit le, aman ding jat le ja khat lah a somni to apeh tha ding ahi.
20 Pakaiya kona chodoh masa louva michom dang koma loumun chu ajoh le, alechoh kit thei lou ding ahitai.
21 Thil lepeh kit ding kumlhin tengle tonsot a dia Pakai loumun a um den ding; Thempu chang den ding ahitai.
22 Khattouvin chohsa loumun khat Pakai dia atodoh le,
23 Thempun thil lepeh kitna ding kum um jat dungjuiya man atep ding, hiche nikhole lea hi atohdoh pan aman lhingkeiya apeh ding ahi, sum chu Pakaiya ahitai.
24 Thil lepeh kitna ding akum lhin teng, loumun hi aneiluipa ahiloule achilhah miho peh kit ding ahi.
25 Thilman jouse apet’a kivaipohna kimang dungjuiya tep ding ahi.
26 Gan nou soh masa jouse Pakaiya ahin, koiman deichom thilto dia hiche ho hi ato thei lou ding ahi. Bongnou hihen kelngoinou hile, kelnou ahiya, Pakaiya ahi cheh-e,
27 ahinla gan thenglou nous oh masa chu lechoh thei ahin, aman chena jat le ja khat la a somni ma peh the ding ahiye. Lechoh louva aumtah le, chena lhongpi man jat a michom dang khat henga joh thei ahi.
28 Mihem hihen, gancha hile, gam jeng jong, jeh beihel’a Pakaiya katdohsa chu koiman lechoh kit thei ponte.
29 Mihem hijongle jeh beihel’a Pakaiya todohsa chu kiledoh thei ponte; thadoh ding hijenge.
30 Chang hihen, thingga hihen, ipi hijongle, gamga hopsom a hop khat chu Pakaiya ahi.
31 Khattouvin hiche ho hi lechoh ding adeile, chena lhongpi man jat le ja khat lah a somni apeh ding ahi.
32 Gancha som khat lah a khat chu Pakaiya ahitai. Gancha sim teng, som khat lhinna jouse chu Pakaiya ahi.
33 Gan neipan som lhinna chu gan hoimo ahina dia agontoh masah lou ding ahi, chule akhel jong apeh thei lou ding ahi. Gan khat khel’a achom khat agonle, anigel’a Pakai chanlo ding, alechoh kit thei lou ding ahi.
34 Hiche thupeh ho hi Israelte dia Pakaiyin Sinai molsanga Mose apeh ahi.