Atah in Jalen sahding

Bible Chang: A tah chu na het’uva, atah chun najalen sah diu ahi (John 8:32)

Muntin’a um tahsan chate nabonchauvin Pakai Christa min in, ngailut salam kahinpe e. Lhaseh a kiso Thu Lhangsam a kona Pathen thu leh thuchom chom i-sim thei jalun jong kipa aum in ahi.

Pathen thu lam dol hi hen, gamsung thu lam dol hi jong le, sum kol veina lam dol hi hen, natoh natham lam dol hi jong leh iyakai a-umdol jouse ahina banga akihet toh lou leh ei-ho dia boina soh ji ahi.

Pathen lhacha’a pang ding hon, Pathen umdol leh natohdan thusim kisutna Bible phate cha sim ngai ahi. Ahinkho’a Pathen leh houbung natong dinga kikatdoh hon kum tampi Bible asim jiu ahi.

Chuma banga gam sung kivaipoh thu (politics) lama natong nom hon jong gamsung kivaipohdol leh dan (constitution) ho phate cha ajilu angaije. Chuti lou-va misei seison leh ginchat leh hisapthua, thu akisei leh mipi kipui toh thei lou ding ahi.

Houbung sung a jong hi thuhil leh kivaipoh akitup lou leh boina aum ji-e. Insung, phung sung, leh kho le veng sung leh houbung sunga jong thu umdol aki hetchet lou leh boina aum ji e.

Hima banga chu Christian hon Christa thuhil i-hetchet u angai je. Ama thuhil chu i-hettoh lou leh Christa thuhil hetchen lou i-hi diu ahi. Athuhil hetchet’a kon in, hinkho’a chamlhatna aki nei theiye.

Hijeh chun i-pi thu, i-pi thu hi leh ahina dol tah a hetdoh ding ngaito angai je. Thukhat ahina doltah aki-het doh lou leh “hetlouna” chun eihen oh’uva ki jalen thei louva hinkho kimang ji ahi. Ami takip’in Thu ho ahina dol taha hetchet ding khohsah’u te. Hia chun lungmonna leh chamna a-ume.

Dr Nehkholal

Leave a Reply

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>