Dear All,
I-chen nao gam ho hi gamnom leh gamhoi tah tah ngen ahi. Gamnom ka ti lo na chu i-gamsunguva hui-se, go-se, nat-se, tuisang let, leiset chim ti ho aum beh pon ahi. Gamhoi ka ti lo na chu i-chen ngao gamsung leiset aphan, thingphung jong namkim akeh theiyin, muchi chivo namkim jong ahing hoiyin, che le va le na jong anom in ahi. Hitabang gamnom leh gamhoi sung Pupa te hon ana lo khah u hi geldoh thei leu hen lung khat leh thakhat keng’a inchen kho sah i-kisem doh cheh thei tei diu ahi.
Pupa te khang chun ami kim in atoh thei cheh ana tong cheh uve. Insung khat’a natong thei mi 5 aum leh mi 5 in atoh ahi. Atam jo thinglhang lei natoh leh gamlen’a sakap natoh ana hi. Hiche chu amitakip dia ana thupi pen’u ana ahi. Thinglhang lei’a kon in nehding chang leh muchi ga chom chom ana kilam doh un, gamva, gamlen leh thangkam a kon in aneh khop set diu sa le nga ana mu-uvin ahi.
Tulai khang hin Thinglhang lei lhou ngap lou atam tan ahi. Thinglhang lei lho sanga, ni khat’a mu bang bang neh kom ding (ki-Ah vah) ti lungput nei atam jo tai. Chule natohsanga, mikom a chang le sum apa a lah le le’a kivah ding ngaito jong atam tai. Chule Insung khat’a natong thei mi 5 um jong leh 1 le 2 hambou vin, ting bongkeng’a na atoha, 2 leh 3 chu natong louva moh um’a, kho lai va le’a, mitoh kihou ni lhum ngen ta bang ahi tai. Hitabang kivaipohna insung chu i-ti ki incheng doh thei ding ham.
Kho chen leh inchen khantouna dinga amita kip in lunggel them, kithu-ngai leh pot-tho angai yin ahi. I-in sung miten i-pi thepna aneiyem, i-pi atoh theiyem ti hi geltoha i-gel phah leh i-toh thei lhena toh ding ahi. Eima hetna leh thepnan aphah jou lou, mite ho natoh o-chat le le a, i-ma tong louva um hin, inchen kho sah aman lo sah ding ahi.
Myanmar gamho sunga i-chennao hi Thangkai, Kabaw leh Homalin gamlang ahin, agamsunga cheng hon pon tho tah in, i-toh thei pen u muchi chivo tu u hi tin, khopi len leh gam chom chom a cheng hon jong gamsung leh insung mite ho natoh apansah theina diuvin, sum le pai chule hetna chomchom in pan hu leu hen, amitakip in natoh hin neiyin tin, neh le chah ning lhing in tin, inchen hin kisem doh thei yun tin, mihem khat hi lo na hung um tan te.
Gamnom leh gamhoi sunga cheng te ho:
(1) amitakipi in natoh nomna lung thim anei theina ding,
(2) kho chen, in chen kisem tuptheina ding,
(3) neh le chah ning lhin thei na ding leh
(4) lungkhat thakhat hitheina ding chule
(5) ichen khom pi jatdang namdang ho toh chamdel’a chenkhom theina ding, ti ho gelkhoh cheh u te.
I-jakaiya kemsuhna lam hi louva, khantouna lam ma-no mite i-hi theina diuvin Pathen in vang eiboh cheh tau hen!
Dr Nehkholal
Leave a Reply