Joujang leh Layshi lamka soma lamdotna ahiye
Layshi Township sung’a, Tuikol kiti Joujang kho mun tah a, April 5-7, 2016 sung in, Mapgam lhun kal kum (150) leh Tuikol kho chen kum (100) lhina Jubilee loupi tahin akimang khomin ahi.
Jubilee Committee hon Jubilee thupisei ding in eihin them un, mipite ho khan kho gelkhohna jal leh ngailutna jal in akikal song in, KCCM gam sunga General Secretary Pastor Thenkhomang chule Homalin gamkai sunga KCCM lamkai Rev Ngam Hao toh akikal song khom in ahi.
April 5, 2016 ni sun lam in Joujang kho mun aki lhung in, khosung lutna khomol muna, mipin Pengkul le jatlam in eina lamto uve. Jin-gun ja-na le ngailut phondohnan meithal kapna jong abol uvin, lamdot thuseina leh taona akimang in ahi.
Jubilee Lamdotna Kotpi ahiye
Kho mite ho hi lhomcha ahiuvin, Pathen song in nasa tah in pan ala un, mipi kikhopna hall jong len tah ana sauvin ahi. Gin chat khal lam in mipi 500 val jen akikhom doh in ahi. Pathen leh muntina Kuki te hon gam le nam i-chan a ingailut’u phon dohna khat jong ahi.
Mapgam thusim hi Kuki te thusim leh Myanmar te thusim keo hilouva Vannoi thusim a jong melchih a um ahi. Burmese te ho koima ana chen lou na gam ahin, acheng Kuki te gam ahi. British te thusim a jong um ahi.
Hijeha hi Mapgam thusim hi Kuki te dia manlu tah ahin, aman lut jeh aki het hih’a, aman chah je akithep lou leh, 
hiche kalval’a pansah na ding mu doh jou ahi poi. Gamsung kivaipohna hohi achesa phat sunga thilsoh ho’a kon kingam ji ahi.
Tudin mun hin Kuki te laha pawl (denomination) kiloikhomna let ding delna leh jatmin thua boina jeh in, Thugil thumang seitheina aum thei pon akhoh lheh tai. Amitin, thu helou hon jong thu asei nom un, hiche hi nampi dia manthahna tah ahi.
Pathen in Israel miteho chunga thil lhung ding ho Themgao ho ana sei peha, Themgao hon mipi te ho henga anasei son jiu ahi. Hiche khang lai jong chun themgao lhem jong tampi ana um e. I-lahuva, Pathen in eiho dia aman chah Themgao ho thusei ho ngai joh aphai.
Thuchih 29:18 sung’a “Pathen gaothu sei lounaa nampi amangthah jin, Pathen Danthu nit thempa vang anun nom’e†aki tin ahi. Hiche Bible chang in asei nom pen chu Pathen henga tao angai yin, Pathen ipi eisei peh ngai lhih angaiyin, Ama kilampui sah ding ti na ahi.
Kukite hi Myanmar gamsunga suh mang thei lou jat le nam khat ahi. Ha-lhang sap jeha um’a, lhangsap lou jeha bei ding ahi poi. Ana umsa khat ahin, hichu i-ki chintup leh suhmang thei lou ahi tai.
Chamlhat na gamsunga namkhat chu kimoh suh mang thei ahipoi. Ahin amite (Kuki) hon anahsah moa, aman lutje akithei lou le mang thah ding ahi.
Min ahung kondohna phung le chang anahsah mo leh asuh mil’a, kho nung teng ahung kondohna kihe lou ahi tai. Hiche bang’a chu Kuki ten Mapgam thusim akichin them lou leh mite chotpha le namchavai hung hi ding ahi. Vaigei nung’a geldoh sangin, ma geldoh aphai.
Mapgam kum 150 thusim akisei tan, mailam a thusim i-ti jop ding dan mipi te leh lamkai ho kihil angai tan ahi. Mipi te ding thu hi mipiten ahet lou leh mipite dia manthahna hi ding ahi. Mipi ten thusim umdol leh gamsung kikheldol ho khol gil’a gelkhoh angai tai.
Pakai Lhacha
Dr Nehkholal
Leave a Reply