VANNOI GALLEN 2NA

Thupatna

1939 kum September ni 1 nin German sepai hon Poland gamsung anolut un ahi. September ni 3 nin, Britain leh France te ni pang khom in German te gal ahin bol pan’uve. German gamsunga Nazi Party lamkai Adolf Hitler hin 1933 kuma pat in, mipi chunga tha ahin neiyin, mitampi songkul a ana khum in chule mitampi lungsetna beihel in ana that in ahi. Aman ana tuppi pen chu Europe gamsung pumpia German thaneipen ahi theina ding ana hi.

German sepai ding mitampi guhthim in ana khol in, galsat ding dan jat chom chom ana hil them e. 1938 kum in akimvel gam ho gal ahin bol khum in, Czechosovakia gamkim khat ana lan, chuban’a, Austria gamsung pum pi jong ana lokhum tan ahi.

Britain leh France te nin jong German te gal ana ting lhon in, German te toh kisat ding kigo sa dem in aum lhon in ahi. Ahin German lamkai Adolf Hitler in agal boljom talou dia kitepna anei jeh in Britain leh France tenin jong atahsan lhon in, galkisat to ding chu akho ngai un ahi. Adolf Hitler din kamtep ho hi athupi pon ahi.

Czechoslovakia gam leh Poland gam teni hi Germany gam solam a um ahin, Britain leh France hi German gam lhumlama um ahi. Poland gam sunga gal ahung lhun khat leh Britain leh France gamte nin panhu dia kitepna anei u ahi.

1939 kum in Adolf Hitler in German sepai te asol in, Poland gam chu aga lo khum sah in agamsung pum pi German te khut sunga aum sah in ahi. Adolf Hitler in galbol angah lou jeh in Britain leh France in jong German te toh galkisat to din thulhuh anei pan tau vin ahi.

German leh Russia kinoptona

German ten Poland te gal abol ma un, German lamkai Adolf Hitler in Poland gamkal solama gamlen pen leh galhat Russia te lamkai Joseph Stalin toh kinoptona khat ana bol e. German leh Russia hi Poland gam ana kichu jing lhon ahi.

Poland gam hi kichu ta louva, aki banga kihop joh din kithukimna abol lhon e. German seipai mi 5 in hutkhat in Poland gam ano khum uvin, ni 18 sung in Poland gampum pi chu bai chakhen in gal ajo un ahi.

Lhumlama jong German seipai hon Britain leh France te gal abol jom jing un ahi. Galbol sung hi lha 8 leh hapta khat (October 1939-April 1940) sung asot in, ima ana hi behseh pon, hiche sung hi “sitzkrieg” tin ana minvo uve.

1940 kum April lha ni 9 nin, German ten hut khat in agamsah lamuva um Denmark leh Norway gam sung ahinlo khum un ahi. British leh France gamte nin jong tuilam a kon in seipai ho gangtah in asol un, ahin German ten British leh France sepai ho chu ana ting jou un ahi. German te din France leh Britain douna din lamkot ahung kihon doh be cheh tan ahi.

German in France te akisatpi

German te hon koima mahetsah louvin phu lou he louvin Holland leh Belgium gamteni gal aga bol khum un ahi. German ten galsatna Huikong “Luftwaffe” mang chan lamlen ho leh lei ho tin tan theina din bomb ho aga kheh un ahi.

German ten gangtah’a ahin lou khum u ahi jeh in, Dutch leh Belgians hon German te ahin le dou kit vang un, ima ahi doh jou poi. German ten gal abol khum sung’u ni 4 sung in German ten angah mun uva kon in galma ban alah be be jeng uve.

Britain leh France gamte ni hi tuiyin akhen ahi. German seipai hon khat in Britain te leh France te kikah tuilam chu ahin lo khum jeng tauve. Hiche Britain leh France pankhomna atha lhom sah doh in ahi.

German ten France gam, sah lam leh solam tuikol mun jouse atou pha un, hia kon chun France te hin pan hu ding Britain te leh galsatna Tuikhong ho jong ana ting jou un ahi. Achainan German ten France te chu 1940 kum June lhan, ala doh un ahi.

German in Britain akisat pi

German ten June 1940’a France te gal ajo nunguva, maban’a galsat be ding gam chu ahi leh Britain te ahiuve. Britain te bou um ahi tauve. German lamkai Adolf Hitler in Britain te galsatna din galmin “Operation Sealion” tin amin vo in ahi.

Adolf Hitler in British te galsatna vanleng “Royal Air Force” kapset masat pen din agong in ahi. German te galsatna huikong “Luftwaffe” in British te leh gamdang kah’a tuilam hopjouse (English Channel) chu bomb akheh kheh jeng in ahi.

Chuban in British te galsatna Huikong “Royal Air Force” (RAF) chu ahin sat pan kit e. August 14 ni hi Adolf Hitler in Muvanlai Nikho “Eagle Day” tin asah e. Hiche nia hi German ten Britain gamsung, lhang lam’a pat, ahin doupat u ahi. Hiche lang a hi German te leh British te ahung kisat to pan un ahi.

Adolf Hitler in Britain te khopi “London” khopi dou be kit din agong in ahi. German ten London khopi ahin dou’u hi London khomite dia vang set um tah khat ana hi. Ahin Britain ten galmanchah ho leh galsatna huikong (RAF) ho ana kisemphat man un, ana ki ging man un ahi.

September 15 nin German ten agal doi tup’u nu nung pen, Britain te galsatna vanleng (RAF) dou din, German galsatna van leng 1000 asol un ahi. Hiche kidou tona’a hin, German ten British te galsatna vanleng 26 akapse un, British ten German te galsatna vanleng 60 jen akap set peh uve.

German lamkai Adolf Hitler in Britain te a pum jolou ding ahet phat in, agalkon ho “Operation Sealion” ho chu ale kou doh in ahi. German ten gal ahin sat uva pat, British te alel nao hi, gal alelnao masa pen ahi. Britain vanleng,a galsat them phabep khat hon agam u ana huh doh u ahi.

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>