ISRAEL TE THUSIM (OUTLINE)

Bible’a Israel te thusim chom cha (outline) English paova kon’a, hung kiledoh ahiye.

A. Lengkhang masang thusim

1. Khangmasa thu: Adam leh Eve, Noah leh tuisang let (hiche nikho ho hi kicheh tah in aki he joupon ahi.
2. Khanglui ho: Abraham leh Sarah, Issac leh Rebekah, Jacob leh Rachel-Leah (2000 pan 1300 B.C.E sung hi dia tahsan ahi.
3. Canaan pan Egypt lhun: Jacob kiti Israel insung mite ho agam sung uva kel lhah jeha Egypt gam Goshen mun’a gacheng lut’u ahi. Egypt gam’a achen sung u hi, Hykosos khang, 1750-1570 B.C.E sung hidia tahsan ahi.
4. Egypt pan potdohna: Mose leh Aaron lamkai na’a Israelten Egypt a kon Canaan gam ahin jot u ahi. Hiche phat hi Egypt gam’a Rameses II vaipoh lai 1290-1226 B.C.E sung hidia tahsan ahi.
5. Canaan gamsung chenna: Joshua, Merneptah Stele, tuipanga cheng mite ho, Philitines te ho. Hiche khang hi 1250–1100 B.C.E sung hidia tahsan ahi.
6. Thutan vaihom ho: Ehud, Deborah, Gideon, Jephthah, Samson ho khang ahi. Hiche khang hi 1200-1020 B.C.E sung hidia tahsan ahi.

B. Lengkhang thusim

1. Lengkhang kipat til: Samuel leh leng masapen Saul. Hiche khang hi 1020-1000 B.C.E sung hidia tahsan ahi.

2. Lengkhang kituplai: David leh Solomon leng vaipoh sung hin Israel te aleng gamu, akipotup chet uve. Hiche khang hi 1000–922 B.C.E vel sung ahi.

3. Lenggam kikhen: Israel te lenggam kikhen hi leng Rehoboam vaipoh pat til, 922 B.C.E vela kipan ahi. Israel leh Judah tin gamnin akikhen uve. Sahlam Israel gam chu 721 B.C in Assyria ten ala un, 720 B.C.E chun gamsung mi phachompi Assyria gamlang’a akai doh un ahi. Lhanglam Judah gam chu 586 B.C.E chun Babylon ten ala un, mi phachompi Babylon gam lang akai doh un ahi.

Israel te thusim’a thupi ho

Israel te Leng: Jeroboam hi Sahlam Israel gam mite dia leng masa pen ahi. Israel gam langa, leng thupi dom ho chu ahi le Jeroboam (922-901 B.C.E), Omri (875-69 B.C.E), chule Ahab leh ajinu Jezebel (869-50 B.C.E) ahiuve.
Prophet ho: Elijah, Elisha, Amos, Hosea ho ahiuve.
Khopi: Israel gam dia khopi chu Samaria khopi ahin, 721 B.C.E kum in Assyria leng Shalmaneser in, alo khum in ahi. 720 B.C.E kum in Sargon II in Israel te mi phachompi akai mang in ahi.

Judah te thusim’a thupi ho

Judah te Leng: Rehoboam hi Lhang lam Judah gam mite dia leng masa pen ahi. Judah gam langa, leng thupi dom ho chu ahi le, Rehoboam (822-15 B.C.E), Jehoshaphat (913-873 B.C.E), Hezekiah (715– 687/6 B.C.E), chule Josiah (640-609 B.C.E) ahiuve.
Prophet ho: Isaiah, Micah, Jeremiah ho ahiuve.
Khopi: Judah gam dia khopi chu Jerusalem khopi ahin, 597 B.C.E kum in Babylon leng Nebuchadnezzar in, alo khum in ahi. 586 B.C.E kum in apum pin alo khum in, Juda gamsung mite Babylon gamlanga ani vei channa’a akai mang u ahi.

C. Sohkhang leh Persia te khang

1. Sohkhang (Exile): Babylonte khutnoiya 596-539 B.C.E sung in Judah te asoh chang uve. Ezekiel leh themgao Isiah jong ana jao lhon e.

2. Persia te khang: Persia te ten Babylon te ahin jou kit un, Persia ten 539-332 B.C.E sung vai apouve. Vaipo ho chu Syrus, Darius, Xerxes, Artaxerxes: Babylon te suhchim Jerusalem houin chu akisa pha kit in (515 B.C.E), Zerubbabel, Haggai hon Jerusalem kulpi akai pha kit un (445 B.C.E), Nehemiah leh Ezara lamkai nan Pathen toh akitepna houthu lam athahsem doh kit uve (400 B.C.E).

D. Hellenistic (Greek) leh Rome te khang

1. Hellenistic (Greek) te khang: Mocedonia gam’a kon Alexander (336-323 B.C.E) in Persia te gal ahin jou kit in, Judah gam sunga Persia te thaneina jong abei tan ahi. Palestine gamsung sese chu Greek te (Hellenistic) thaneina sunga aum tauve.

Palestine gam hi amasa pen in Ptolemies in ana pon, 198 B.C.E jouvin Seleucids in ana po kit e. 168 B.C.E kum in Seleucids leng Antiouchus IV demnan Maccabean ten gal ahin bol un, ahin jou un, Jews te (Hasmoneans te) vaipohna khang ahung hi kitan ahi. Hasmonean vaipoh sung in, Pathen agin lou jeh u leh gamvai po ho kito mo na ana um e.

2. Rome te khang: Hasmonean khang sung in, gamsunga kito mona ana um jeh in Rome te ho ahung lut khau uvin, Rome te douna Jews te hon (66-73 C.E) gal abol un, ahin, ana jou pouve. Rome te General Pompey in 63 B.C.E kum in Jerusalem alo khum in ahi. Hiche jouvin Bar Kochba 132-135 C.E sung in gal bolna ana um e.
Reference: Matthews, Victor H. and James C. Moyer. 2005. 2nd Edt. The Old Testament: Text and Context. Peabody: Hendrickson Publishers, Inc. p. 8-10.

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>