Houbung leh Thaneina

HOUBUNG LEH THANEINA

“Thaneina” hi houbung tina aum jing e. A thupi pen chu houbung in a thanei na chu iti aman chah dia pha em ti ahi. Chule houbung in hiche thaneina chu mipite ho Pathen thulam a iti apuihoijem ti jong hi ahi. Houbung sunga koi in tha anei pen em? Hiche thudoh hi houbung kivaipoh dan in apoh ding ahi. Houbung kivaipohdan ho achomchom aum in a lhangpia sei ding in houbung kivaipoh dan hung kijui jing 3 aum in ahi. Hiho chu ahi le Episcopal, Presbyterian, leh Congregation ahiuve. Hicheng 3 ho hi anoiya banga hetchetbethei ahi.

1. 1. Bishop ho Thaneina (Power of Bishops)

Episcopal houbung ho hi “chunglam” thaneina kon a kivai po ahiuve. Hobungsunga thanei na jouse Bishop hon atuh u ahi. Akivaipohdan u hi chung leh noi kivai pohdan ahin, alenaneo um chil chel ahi. Aum dan chu ahi leh Bishop hi alenpen leh thuneipen, abana Presbyters ho (Bishop ho bana thanei), chule Deacons (Presbyters ho sanga thanei lhom jep) ti ahi. Hiche kivaipohdan hi ahi leh houbungsunga thaneina jouse apumpia Bishop in atuh ahi. Hiche kivaipohna jui houbung ho chu ahi leh Methodist houbung, Orthodox houbung, Anglican houbung, Episcopal houbung, leh Roman Catholic houbung ho ahiuve.

1. 2. Upalamkai ho thaneina (Power of Elders)

Presbyterian kivaipohdan chu ahi leh “akilhengdoh houbung upa” hon houbung sunga tha anei u ahi. Hiche akilhengdoh houbung upa ho chu “Elders” akiti. Ama ho kilamkaidan chu ahi leh upa ho hi dennin akhen kit uve. Vaihomnalam a pang upa ho leh mihil-lamga pang upa ho tin akhen uve. Vaihomlama pang upa ho chu ahi leh houbung mipin houbung lamkaidinga alhendoh ho ahiuve. Mi-hil-upa ho chu ahi leh lhacha hon achunga khut angap u (ordained) Pastor (chingtup) ahilouleh minister (pan-hu) ho ahiuve.

Mi-hil-lamkai ho chun Pathen thu seiphong u, mite atilkhouvun, chule houbung kintheng ho abol un ahi. Houbung khat leh khat kivaipohdan akibang chom pouve. Konkhat houbung hochu ahi leh mihil apang Pastor/Minister khat thaneina noiya, houbung lamkai upa kiloikhom ho thaneina a kivaipo jong aum e. Hiche kivaipohdan hi Presbyterian houbung, Kithahsem (Reform) houbung, Chamlhat (Independent) houbung kimkhat leh Bible houbung hon amang cha un ahi.

1. 3. Mipithaneina (Power of the Congregation)

Houbung sunga thanei na hi mipi te lunggel thulhuh chunga kingam ahi. Hiche houbung kivaipohdan jui ho pom dan chu ahi leh houbung mipite hin “chamlhat leh kibang chet” a thu anei u ahi. Houbung sunga hi koima thanei chom a um sah lou u ahi. Hiche pondan jui ho tahsandan a hi houbung luchang chu “Christa” ahin koima dang ahi poi atiuve. Pastor leh lamkai ho mipin aki lhen un, Pastor ho chu Pathen bana houbung chunga thanei pen hilouvin, houbung mipi te hotoh kibang ahiuve. Bishop, Pastor leh Minister tihon atuma imatha anei lou u ahi. Hiche pomdan che pi ho chu ahi le; Baptist houbung ho, Christian Church, chule houbung chamlhat chomchom (Independent churches) ho jong ahiuve.

Thulahna: Hiche thuhi Dr. Aubrey Malphurs lekhabu “Being Leaders” sunga kale (translate) doh ahi.

Nehkholal

USA