EXODUS KITI POTDOH BU

MOSE LEKHABU NINA EXODUS KITI POTDOHBU

Thupatna

Hiche lekhabu hi Exodus akitin, hichun potdoh, kitoldoh ati ahin, Israelte thusima thupi pen khat- Egypt gamsung sohchanna mun a kon a Israelte hung kitoldoh, potdoh thusim kisun ahi. Lekhabu hi alhongpia li a hopkhen thei ahi: (1) Hebrew miho sohchan kilhadoh, (2) Sinai molsang jon a akitol’u, (3) hinkhoa chonchan lhongpi, chonchan, kivaipoh, hou thudol ijakai Sinai molsanga Pathen in apeh-uva kitepna asempi chule (4) Houbuh asahdoh-uva, Israelte lah a Pathen houdol le Thempute umchan ding dol’a Danthu apeh-hicheng hi ahi.
Athupipen a hiche lekhabu hin sohchang Israelte Pathen in alhadoh a, nam thupi khat’a asemdoh, chule khonung dia kinepna lentah akoipeh thu aseiye.

Athusim a mi thupi pen akimudoh hi Mose ahi, ama hi Egypt a kona amite puidoh dia Pathenin alhendoh ahi. Alekhabu sunga akihahetpen hi Bung 20, thupeh som kisutna ahi.

http://www.google.com/imgres?hl=en&biw=1600&bih=775&gbv=2&tbm=isch&tbnid=xcU2VJEzF2Z0xM:&imgrefurl=http://www.aeragon.com/itz/01-introduction.html&docid=B2WBseIrFrJzTM&imgurl=http://www.aeragon.com/00/zzz-01/wander-01.jpg&w=585&h=585&ei=P9l6T5vWConqrAecmbWRAg&zoom=1&iact=hc&vpx=514&vpy=30&dur=47&hovh=225&hovw=225&tx=99&ty=128&sig=102346232337894374359&page=1&tbnh=134&tbnw=134&start=0&ndsp=32&ved=1t:429,r:18,s:0

 

Asung thu hopkhen

Egypt a kon a Israelte kilhadoh 1:1-15:21
a. Egypt a sohchang ho 1:1-22
b. Mose pen, aneolai thusim 2:1-4:31
c. Mose le Aaronin Egypt lengpa adelkhum 5:1-11:10
d. Kalchuhkut, Egypt adalhah 12:1-15:21
Twisan a pat Sinai molsang gei 15:22-18:27
Danthu le kitepna 19:1-24:18
Kitepna ponbuh le Pathen houdol kihilna 25:1-40:38

Exodus Bung 1

Egypt a Israelte kibol genthei

1 Egypt jon a Jacob to kilhon achate chu, ainsung cheh to lhon a che
2 Reuben, Simeon, Levi, Judah,
3 Issachar, Zebulun, Benjamin,
4 Dan, Naphtali, Gad, chule Asher ahiuve.
5 Jacob inkonse se abonchauvin som sagi alhingui. Achapa Joseph vang Egypt lhungsa ahitai.
6 Phat chom khat nungin Joseph le asopite, chule hiche khanga mite chu athisoh taove;
7 hijongle achilhah-u Israelte chun cha le nao tampi ahingun, apung lheh jenguvin, Egypt gamsung dimset’in ahunei lhehtauve.
8 Egypt a Joseph phatna hephalou lengthah khat ahung laltai.
9 Amahin amite jah a, “Hiche Israelte hi atamval’un ahunei behseh jeh-un eiho din kihol lel aumtai.
10 Galbolna khat um kha le melmate ajop’uva eisat’uva pang thei, gamsunga kona jamdoh diu ahi. Apunbe be louna diuva alonaje khat het ding ahi,” ati.
11 Hijeh chun Egypt miten Israelte na hahsa tohsah a suhgepsit set din ahunguva toh vaipo akoiyun, lengpa thil kholna munpi din Pithom le Rameses khopi asah sah ui.
12 Ahivangin Egyptten Israelte ahabol hesoh cheh-ule ahapun cheh-un, akithejao cheh jengun, gamsung alobe be jengui. Hiti hin Egypt ten Israelte akicha tauvin,
13gim genthei thoh-in natongin agoiyun,
14 ada acham louvin soh goiyin agoiyun, voujang nalouhel’in insa loubol’in agoiyuve.
15 Egypt lengpan Hebrew numeite naodoma pang numei ni Shiphrah le Puah akihoupin,
16 “Hebrew numei ho nao nadop teng, pasal cha cha that’in, numei ho hinghoi lhonin,” ati.
17 Ahinla naodom ten in Pathen agin lhon jeh-in lengpa thu anit lhonpoi, pasal ho geiyin ahinghoi lhontai.
18 Lengpan naodomte ni agakousah-in, “Idia kasei ngai louva Hebrewte cha pasal ho nathada lhon ham? tin adonge.
19 Naodomte nin, “Hebrew numei ho hi Egypt numeiho tobang ahipouve, anaopen’u abaiyin, khatjoh sang kalhun masang lhonle aping lhaji tauve,” ati lhon’e.
20 Pathenin naodomte ni akhoton, Israelte apunbe be jengun, ahat lheh tauve.
21 Naodomte nin Pathen agin lhonjeh-in Pathenin ainsung lhon phattheina apei.
22 Akhonnan Pharaoh-in amite jah a, “Hebrewte cha naosen pasal peng jouse man khom’un Nile luidunga sep lut’un, naosen numei ho vang hung hoi peh-un,” tin thu apei.

Exodus Bung 2

Mose pen

1 Hiche lai hin Levi pasal khat’in Levi chanu khatma akichenpi.
2 Ajinu hin cha pasal khat aneiyin, mel-hoi tah ahijeh-in ait behseh-in lha thum jen aseltai.
3 Asel lel hel phat’in, pumping nanga kisa pocha khat’a naosen chu akoiyin, twi lut thei louna din gom aloiyin, luipang pumping lah a chun akitolsah tai.
4 Naosen u-nun gal’a pangin ave vei.
5 Lengpa chanu luidunga kisil din ahungin, vapanga achele len, pumping lah a pocha amudoh phat’in, nu-ngah khat agalahsah-e.
6 Lengpa chanun pocha ahondoh le naosen pasal hoitah chu amun, ahung ka phat’in avoujang anan, “Hebrewte cha hitei ding ahi,” ati.
7 Hichun naosen u-nun lengpa chanu jah a, “Naosen hi navahpeh dia Hebrew numei ho khat kagakoupeh ding ham?” ati.
8 Aman jong, “Neigakoupeh nget-o,” ati. Naosen u-nun anu ma ma chu agakoutai.
9 Hichenu jah a chun lengpa chanun, “Naosen hi neivah peh-in, nachol man penange,” ati. Aman jong akilah-in avah-in apangtai.
10 Naosen chu akikhan lhit phat’in lengpa chanu henga apuile, aman chapan akisimtai. Lengpa chanun, “Twi lah a kalahdoh jeh-in amin Moses ah ing’e,” ati.

Mose Midian gam a ajamlut

11 Mose akhanlhit phat’a amite vea ache le, gim hesoh thoh a na hahsa atoh-u agamui. Egypt mi khat hin Hebrew mi khat atha geiyin agamudoh-in, athapa chu Mose insung mite khat ahikhai.
12 Mose’n jet le vei, sah le lhang avegol’in, koima amu lou phat’in Egypt mipa chu athah’in nellei lah a avuilut tai.
13 Ajinga ache kit le Hebrew mi ni kina kibon agatoh khai. Athemmo jep pa jah a chun Mose’n, “I-bol’a na-Hebrew mi hipi chu navoh ham?” tin aphoh-e.
14 Aman ahin donbut’in, “Kon nang vaipo le thutan a natun em? Egypt mipa natha banga tha neigot ham?” ati. Hichun Mose jong akichan, “Kamitha hi mihon ahetdoh ahitai,” ati.
15 Pharoah-in ajahdoh phat’in Mose chu tha din aholtai. Mose ajamin Midian gamsugna cheng din achetai. Nikhat Mose chu twikul panga atoupet’in
16 Midian Thempupa Jethro chanu sagi jen chu apa kelngoite le kelcha te don ding twi thal’in ahungui.
17 Ahin kelngoiching midang phabep’in Jethro Chanute chu anodoh-un, hichea hin Mose’in akithopin, nu-ngahho ganchate chu twi achipsahsoh keiye.
18 Nu-ngah ho apa henga ahung lhun phat’un, apauvin, “I-atile tunia matah a hung nahiuvam?” tin anadonge.
19 Nu-ngahhon jong, “Egypt mi pasal khat’in kelngoi chingho eideljam peh-un, ganchate don ding twi geiyin eithalpeh-un ahi,” atiuve.
20 Apauvin, “Hoiya umtam? I-bol’a nahin dalhah-u ham? Gakouvun an beh nekho’u hite,” ati.
21 Mose chengden din akigon, Jethron jong achanu Zipporah to akichensah-in,
22 Zipporah hin chapa khat ahinpeh-e,. Mose’n jong, “Hiche gam a khopem kahin, amin Gershom kiti ding ahi,” ati.
23 Kum phabep nungin Egypt lengpa athitan, ahivangin Israelte sohchang hesoh genthei thoh-in, panpi ngaichan apeng peng jengui. Aka apen’u Pathen kom alhungin,
24 Pathenin Abraham, Issac chule Jacob to akitepna chu ageldoh-e.
25 Pathenin Israelte sohchan, gim hesoh thoh amun athoh lel pi.

Exodus Bung 3

Pathenin Mose akou

1 Nikhat Mose’n anupa pa Jethro, Midian Thempupa, kelngoite le kelchate chingin, gancha honte hoiyin, lhang theng, Sinai molsang aphatai.
2 Sinai molsanga Pakaiya kon valtil chu hamboh lah a meikouvin ahung kilah-in, hamboh meiya kouva, kavam thei louva um chu Mose’n amui.
3 Aman jong, “Akidang nah-e! Iti hamboh khu kavampai lou ham? gave tem’inge,” ati.
4 Mose’n anailut Pakaiyin amu phat’in, hamboh lah a kon chun “Mose! Mose!” tin ahinkouve. Mosen’n, “Hoi, ka-um nai,” ati.
5 Pathenin, “Hin nailutbe tahih-in. Nakengchot kisut’in, munthenga ding nahitai.
6 Kei hi napu napate-Abraham, Isaac, chule Jacob Pathen kahi,” ati. Pathen avet ngam lou phat’in Mose’n amai akitomtai.
7 Hichun Pakaiyin, “Egypt gamsunga kamite engse tah a abol’u kamun, tohvai pote bolsetnaa kon huhdoh ngaicha akau kajatai. Ahesoh genthei nao kahesoh tai.
8 Hijeh a chu Egypt mite khut’a kona amaho huhdoh dia hung kumlha kahin, mun lentah, gam phatah, Canaan mite le Hit mite, Amor mite, Periz mite, Hiv mite chule Jebus mite chenna gamsunga puilut ding kagot ahi.
9 Kamite ka le pen kaja mong mongin, Egypt miten abol hesoh nau kamudoh tai.
10 Agamsunga kona kamite puidoh dia Egypt lengpa koma kasol nahi,” ati.
11 Ahinla Mose’n Pathen kom a, “Kei bep hi iti Egypt lengpa koma chea Israelte kagapuidoh thei ding ham?” ati.
12 Ahivangin Pathenin, “Ken nalhonpi nange, Egypt a kona Israelte nahinpuidoh teng hiche molsang chunga hi neihou diu, hichu kei sol nahi phat chetna hi ding ahi,” ati.
13 Ahinla Mose’n adonbut’in, “Israelte henga cheng ting ‘Napu napateu Pathenin eihinsol ahi,’ gati jong leng, ‘Ama chu amin ipi ham?’ tin eina dongun tin, chuting ipi kaseipeh thei diing ham?” ati.
14 Pathenin, “Kei chu Kei kahijingin, naseipeh tei ding chu-‘KEIMA kiti chun nahenguva eihinsol ahi’ nati ding ahi,
15 Israelte jah a apu apateu Pathen, Abraham Pathen, Isaac Pathen, Jacob Pathen chun ahenguva nasol’a naseipeh ding ahi. Hiche hi tonsot’a kamin ahin, khang nu-nunga miten hiche a hi eikou diu ahi.
16 Israel lamkaite gakoukhomin lang, apu apateu Pathen, Abraham Pathen, Isaac Pathen chule Jacob Pathen chu nahenguva hung kilah a anseipeh ding ahi. Egypt miten abolsetnau kamu jeh a avil’uva hung kahi hi seipeh-in.
17 Egypt’a kona puidoh kagot ahitai, gim genthei thoh a aum nauva kona puidoh a gam phatah-Canaan mite, Hit mite, Amor mite, Periz mite, Hiv mite chule Jebus mite gamsunga puilut ding kagot ahi.
18 “Naseipeh chan chu kamiten angai diu ahi. Chuteng Israel lamkaite to Egypt lengpa henga nacheuva, ‘Pakai Hebrew te Pathen kahenguva ahung kilah-in, hiche Pakai ka-Pathenu koma chu kilhaina kabolna diuvin nithum sung din gamthip’a neisol’un,’ nati diu ahi.
19 Ada achamlouva akibol ngal loule Egypt lengpan nalhadoh lou diu kahenai.
20 Hijongle agama chu tijat um thil datmoa, katha hangsan a Egypt mite talen kamatsah ding ahi. Chuteng Egypt lengpan nalhadoh diu ahi.
21 “Egypt mite naginsah ungting, kamite akitoldoh tengu, khutgoh keova nalhadoh lou diu ahi.
22 Israel numei jousen achenpi le aheng akom Egypt numeiho koma nihchen ponsil le sana dangka, sanajem athum diu ahi. Athumdoh chengu chu Israelten achateu numei pasal jouse jepna aneiyuva, Egypt gamsung nei le gou apoh mang diu ahi,” ati.

Exodus Bung 4

Pathenin Mose thahat kidang apeh

1 Mose’n Pakai adonbut’in, “Israelten eitahsan dau hen kasei ngai hih leu, chule nang chu kahenga hung kilah louvin sei taleu ikati ding ham?” ati.
2 Hichea hin Pakaiyin, “Nachoi chu ipi ham?” ati. Mose’n “Kakiphu tenggol ahi,” ati.
3 Pakaiyin, “Tol’a seplha temin,” atile; Mose’n ase lhah lhah chun gul asoh paiyin, Mose’n ajamsan tai.
4 Pakaiyin Mose jah a, “Bungin lang ameiyin kimat temin,” atile; Mose jong bunga akimat le, kiphu thei tenggol asoh kittai.
5 Pakaiyin, “Pakai apu apateu Pathen, Abraham Pathen, Isacc Pathen chule Jacob Pathen nahenga hung kilah phot chetna dia hiche hi Israelte koma nabol ding ahi,” ati.
6 Pakaiyin Mose jah a asei kit’in, “Napon noiya nakhut koilut’in,” ati leh; Mose’n akoiyin, agah lah doh chun akhut josue anaphah-in, buhbang banin anabangtai.
7 Pakaiyin, “Napon noiya nakhut koilut kit’in,” atin, Mose’n jong akoiyin, agah lah doh phat’in anadamsel’in ati dang bang bang ahitai.
8 Pakaiyin, “Israelten thil kidang mai maiya natahsan dauva alung nachim louvu jongle, hiche geiya vang lung nachim tei diu ahi.
9 Hiche thil kidang te ni geiya jong natahsan dauva nasei angai dau le, Nile vadung twi phabep thaldoh-in tol’a sung lhan. Twi chu thisan soh jeng ding ahi,” ati.
10 Ahivangin Mose’n, “Ahipoi, Pakai neisol da tan. Thusei them la kahipon, neikihoupia jong hi kam kipeh lou kahi neihet hi-me. Mi paomo, pao gang thei lou, ngongkai chet chot kahi,” ati.
11 Pakaiyin ajah a, “Mihem kam sempeh koi hiya, na ngong le paomoa koiya koi ham? Kho musah le mit chotsah thei loi ham? Kei-Pakai hi kahi.
12 Tun che jengin! Thusei kithoping ting, nasei ding hil nange,” ati.
13 Ahivangin Mose’n, “Ahipoi Pakai, midang khat soljo tan,” ati.
14 Hiche hin Pakaiyin Mose alhunghan khumin, “Nasopipa, Levi chilhah Aaron chula em? Athusei themla kahenan. Nakimupi dia hungtah bah a khu, nakimupi teng kipah lheh veh ta.
15 Sei ding jouse nahil masah thei ahi. Sei ding kithpi lhon ing ting, nasei lhon ding hil nange.
16 Nakam sanga panga, nathalhenga mipi akihoupi ding ahi. Nangin Pathen banga asei ding chan nahil ding ahi.
17 Kiphuthei tenggol kichoiyin, hichea hin melchihna kidang nabol ding ahi,” ati.

Mose Egypt’a akile kit

18 Mose, anupa pa Jethro henga agache masan ajah a, “Egypt’a ka inkote dam le bit a um nauvem, gavil kit tange, neisolin,” agate. Jethron jong pha asan, lung lhaisel’in asoltai.
19 Mose chu Midian gamsunga asum nalaiyin, Pakaiyin ajah a, “Than ago jouse athisoh tai, Egypt a kile kit tan,” ati.
20 Mose’n ajinu le achapate sanga chunga atousah-in, Egypt jonin akitolpin, Pathenin ahil bangin kiphu thei tenggol chu akichoiye.
21 Pakaiyin Mose jah a aseikit’in, “Egypt gam nalejot kit ahitan, Egypt lengpa angasunga, boltheina tha kapeh banga, thil kidang chengse chu nabol tei tei ding ahi. Hijongle lengpa lung katahsa a, mipi alhadoh louhel ding ahi.
22 Chuteng kei Pakai thusei hi naseipeh a, ‘Israel hi kachapa masapen ahi.
23 Kachapa nalhadoh dia kasei ahi. Eihou dia kasol ahin, nalha doh poi. Hijeh a chu nachapa masapen khatha peh ding nahi,’ tin aseiye, tia nahil ding ahi,” ati.
24 Lampia gebuh khat’a Pakaiyin Mose akimupin tha din agotai.
25 Mose jinu Zipporah chun songhemkhat’in achapa chep atanin, Mose kengphanga aloiyin, “Cheptan chonchan dungjuiya jia kanei nahi,” ati.
26 Hijeh chun Pakaiyin Mose ahing hoiye.
27 Pakaiyin Aaron jah a, “Gamchang noiya Mose gakimupin,” tin asol’e. Aaron jong Mose kimupi din molsang theng lama achei; akimupi phat’in achop chuh chuh jengin ahi.
28 Hichun Mose’n Egypt gama kile kit dia Pakaiyin asol’a aseipeh chengse abonchan aseipehson tai; thil kidang bolsah dia ahil chengse jong aseitai.
29 Mose le Aaron chu Egypt’a ache lhonin, Israel lamkai jouse akhom lhontai.
30 Mose jah a Pakai thusei chengse Aaronin Israel lamkaite aseipeh-in, mipi angsung laitah a Mose’n thil kidang chengse chu abolsoh keiye.
31 Israelten atahsan’un, min engse tah a abolset nau amu jal’a avil’uva Pakai hung ahi ajah doh phat’un boh khup’in chibai aboh tauve.

Exodus Bung 5

Egypt lengpa angsunga Mose le Aaron

1 Mose le Aaron Egypt lengpa koma achen, “Pakai Israel Pathenin, ‘Gamchang noiya kut bola eihou theina diuvin kamite sol’in’ tin aseiye,” agate lhone.
2 Egypt lengpan, “Pakai kitipa chu koi hiya, athu kangaiya, Israelte kasoldoh ding ham? Pakai la kahepon, Israelte la soldoh ponge,” tin aseitai.
3 Mose le Aaronin adonbut’in, “Hebrewte Pathen chu kahenguva ahung kilahtai. Nithum lampi peh a Pakai ka-Pathenu gahouva, kilhaina kabolna diuvin neisolun. Kabol louvule natset ham, gal ham khat jo sanga eithagam diu ahi,” ati lhone.
4 Egypt lengpan Mose le Aaron jah a, “Mipin tohban iti ngah hen nati lhon ham? Soh ho khu na tohsahkit’un!
5 Nangho Egyptte sanga jong natamjoh tah-u khu! Aban jop’a na tohda nagot’u ahi-ong!” ati.
6 Hiche nikho chun Egypt lengpan sohte chunga tohvai pote le Israel lah a toh lamkai ho thu apen,
7 “Mipi hi cheh a sem ding changpol peh dauvin, amaho gakiholsah-uvin.
8 Chuti jongle changpol napeh pet’uva asemdoh-u cheh sanga khat cha jong lhasam deh louhel ding ahi. Toh ding aneilou phat’uva potdoh a a-Pathenu houva kilhai dinga kahenga tao tao ahiuve!
9 Na hatohsah-un, ong manlouvin lhauvin, chutile thujou kisei hoihi ngai manlouvin umtauvinte,” ati.
10 Sohte chunga tohvai pote le Israelte toh lamkaite acheuvin Israelte jah a, “Lengpan changpol napeh lou diuvin aseitai.
11 Namu thei thei nauva changpol nahol thu’uva, ahivanga niseh a nasemdoh jat’u chu lhasem thei louhel ding ahi,” atiuve.
12 Hichea hin mipi changpol holin Egypt gamsunga akithe chansoh jengui.
13 Sohte chunga tohvai poten changpol apeh laiyuva asemdoh jat’us cheh asemdoh theina diuvin ada acham louvin ano no jengui.
14 Egypt mi, sohte chunga tohvai poten Israelte toh lamkai ho chu adeng deng jengui. “I-bol’a masanga nasemdoh jat jat cheh semdoh jou louva um nahiuvem?” atiuve.
15 Israel toh lamkaite Egypt lengpa koma acheuvin, “Vo lengpa, idia hita neibol jengu hitam?
16 Changpol la eipetapouvin, cheh kasemdoh jat jat’u semdohsah eigouve! Tun eivo vo jengun, hiche hi nang thusah mong ahibouve,” atiuve.
17 Egypt lengpan adonbut’in, “Thasea natohda jal’a Pakai henga kilhaina boldia kilepdoh dia kahenga kithum thum nahiuve.
18 Na gatong loiyun! Changpol nakipe lou diu, ahivanga cheh nasemdoh jat jat lha louva nasemdoh diu ahi,” ati.
19 Israelte toh lamkaiten cheh asemdoh jat jat asemdoh diuva aseipeh phat’un abolset nom mong mongu ahedoh tauve.
20 Lengpa adalhah phat’un, amaho ngah jinga ana-um Mose le Aaron to akimutouve.
21 Mose le Aaron jah a, “Nathilbol lhon Pakaiyin amusoh tai, lengpa le avaitpote neihotsah jeh-uva Pakaiyin talen namatsah lhon ding ahi. Pansatna neiya eitha lo na diu nabol doh lhon ahitai,” atiuve.
Pakai koma Mose kiphin
22 Pakai lam ngan Mose akiphinin, “Pakai, idia namite nabolset ham? Ipi bol dia neisol ham?
23 Namina Lengpa henga thuseiya kache chea pat, Israelte engse sen aboltai. Nangin imacha kithopi din nagopon!” ati.

Exodus Bung 6

1 Hichun Pakaiyin Mose jah a, “Lengpa khu i-kalom, hinmu nan nate. Tahbeh a kasei ahi-Israelte khu Egypt a kona adeldoh tho dingjoh ahibouve,” ati.

Pathenin Mose akou

2 Pathenin Mose jah a aseiyin, “Kei hi Pakai chu kahi.
3 Abraham le Isaac chule Jacob henga Hatchungnung Pathenin kakilah-in, ahivangin kamintheng, Pakai hin kakihetsah hih laiye.
4 Amaho to kitepna kaneiyin, akhopem nau gam, Canaan gamsung khu peh din kakitep’e.
5 Tun Egyptten soh a avul, Israelte ka le mao ogin kajan, kakitepna kageldoh tai.
6 Hijeh chun Israelte dia kasei hi ajah-uva seipeh-in, ‘Kei hi Pakai chu kahi, nasohchan nau Egyptte khut’a nahuhdoh ung ting kajalen sah ding nahiuve. Kaban-gol jeng ting Egyptte talen kamatsah a, nang ho kahuhdoh diu ahi.
7 Kamiten nasem ung ting, na-Pathenu kahi ding; Egypt gam sohchanna muna kona kalhadoh tengu, Pakai na-Pathen kahi hetauvin nate.
8 Abraham le Isaac chule Jacob koma giltah a kakitep’a, peh dia kakoisa gamsung kalhut diu, leiset gou dia kapeh ding nahiuve. Kei hi Pakai chu kahi,’ tin aseiye, tin,” ati.
9 Hiche hi Mose’n Israelte aseipeh-in, ahivangin angaipouve, sohchan hesoh valjeh-in lhung lhalhop’in aum gamtauve.
10 Pakaiyin Mose jah a,
11 “Chen lang Egypt lengpan Israelte khu agamsunga kona asoldoh tei tei din gaseiyin,” ati.
12 Ahinla Mose’n adonbut’in, “Israelte bon kathu ngailou, lengpan kathu iti angai ding ham? Mi paomo kei tobang hi!” ati.
13 Pakaiyin Mose le Aaron thu apen, “Israelte leh Egypt lengpa jah a chun anng hi Egypt’a kona Israelte puidoh dia kasol ahi seipeh lhonin,” ati.

Mose leh Aaron insung mite

14 Jacob chapa masa pen Ruebenin chapa li aneiyin-Hanoch, Pallu, Hezron, chule Carmi ahiuvin; Reuben chilhah phungkhaiya upa cheh ahiuve.
15 Simeonin chapa gup ahingin, Jemuel, Jamin, Ohad, Jachin, Zohar chule Canaan mi numeito ahin lhon-Shaul ahiuvin, Simeon phungkhaiya upa cheh ahiuve.
16 Levin chapa thum ahingin, Gershon, Kohath chule Merari ahiuvin; Levi phungkhaiya upa cheh ahiuve. Levi hi kum jakhat le somthum le sagi ahinge.
17 Gershon hin chapa ni ahingin, son le pah tampi anei lhone.
18 Kohath hin chapa li ahingin, Amaram, Izhar, Hebron chule Uzziel ahiuvin, Kohath hi kum jakhat le somthum le thum ahinge.
19 Mararin chapa ni ahingin, Mahli le Mushi ah. Hiche hi phung khai khaiya kisim Levi chilhah ahiuvin, achilhah chengu to ahi.
20 Amaram hin apa sopinu Jochebed akichenpin Aaron leh Mose ahinge. Amram kum jakhat le somthum le sagi ahinge.
21 Izhar hin chapa thum ahingin, Korah le Nepheg chule Zichri ahiuve.
22 Uzziel’sin chapa thum ahingin, Michael, Ezaphan chule Sithri ahiuve.
23 Aaronin Amminadab chanu, Nahshon sopinu, Elisheba akichenpin, Nadab le Abihu, Eleazar chule Ithamar ahinge.
24 Korah in chapa thum ahingin, Assir, Elkanah chuleAbiasaph ahiuve; Korah phungkhai sung kihom khenna a amaho hi phung upa cheh ahiuve.
25 Aaron chapa, Eleazar chun Putiel chanu akichenpin, Phinehas ahinge. Hichengse hi Levi phunga ama ama insung dola phungkhai upa cheh ahiuve.
26 Pakaiyin, “Egypt’a konin Israelte puidoh lhonin,” tia asol teni chu Mose le Aaron ahi lhone.
27 Mose le Aaron hin Egypt lengpa chu Israelte lhadoh dinga asollhon ahi.

Mose le Aaron dia Pakai thupeh

28 Egypt gama Pakaiyin Mose jah a thu asei chun,
29 “Kei hi Pakai chu kahi. Kasei jong Egypt lengpa seipeh-in,” ati.
30 Ahinla Mose’n adonbut’in, “Kei mi paomo kahi nahet chume, lengpan iti kathu angai ding ham?” ati.

Exodus Bung 7

1 Pakaiyin Mose jah a, “Lengpa koma chu Pathen tobang kahisah a, nasopipa Aaronin lengpa koma nathemgao tobanga thu asei ding ahi.
2 Kaseipeh chengse hi Aaron hilsoh keiyin, aman lengpa chu agamsunga kona Israelte asoldohna din seipeh nante.
3 Amavang lengpa lung kasuhtah ding ahin, Egypt gamsunga itobang tijat um thil kidang bolkhum jong leng nathu ngaiponte.
4 Chuteng Egypt gamsunga talen gihsa tah chuhsah ing ting, agamsunga kona kamite kapuidoh ding ahi.
5 Kaban-gol kajet’a agamsunguva kona Israelte kapuidoh teng, Egypt ten Pakai kahin hedoh tauvinte,” ati.
6 Msoe le Aaronin Pakai thupeh peh chu abol lhon nai.
7 Lengpa koma thu aseilai lhonin Mose kum som get alhing tan, Aaron kum som get le thum alhingtai.

Aaron tenggol

8 Pakaiyin Mose le Aaron jah a,
9 “Nathanneina lhon phot chetna dia Pharaoh-in thil kidang nabolsah got lhon le, Aaron chu atenggol lengpa angsunga selhah sah in, gul hungsoh ding ahi,” ati.
10 Pakai thupeh bangin Mose le Aaron lengpa koma chen agabol lhontai. Lengpa le avaipote angsunga Aaronin tenggol aseplhan, gul ahungsoh tai.
11 Lengpan jong miching mithemte, mitpheldoi them ho akouvin, amahon jong hitobangma chu abol theiyui.
12 Atenggol’u aselhah-ule, gul asohgamtai. Ahivangin Aaron tenggol gul chun amahoa avallhum soh keiye.
13 Ahivangin Pakai sei bangin, lengpa alungtah den nalaiyin, Mose le Aaron sei angai deh poi.
14 Pakaiyin Mose jah a aseiyin, “Lengpa alungtah cheh in, Israelte sohdoh ding adai.
15 Jingkah teng Nile vadung ajotsuh phat le gakimupin, gul soh theiji tenggol chu choiyin, luipanga ana ngah-in.
16 Ahung teng ajah a, ‘Pakai, Hebrewte Pathenin amite nalhadoh a, gamchang noiya Ama agahouna diuva seipeh dia eihinsol ahi. Ahivangin tu geiyin kasei nangaipoi.
17 Vo lengpa, tua hi Pakai chu itobang ahi athilbol’a nahetdoh ding ahi. Ven hiche tenggola hi luidung twi jouse thisan soh ding ahitai.
18 Nga jouse thisoh a, twi jouse names ding, Egypte miten adon thei louhel ding ahi,’ tin gasei peh tan,” ati.
19 Pakaiyin Mose jah a aseiyin, “Aaronin hiche tenggol chu luidung jouse le twilam jouse, Egypte gamsunga twikul jouse chunga adop sang din seipeh-in. Twi jouse thisan soh ding, gamsung pumpi thisan soh a, thinghom dungle songko dung geiya thisan veisoh ding ahi,” ati.
20 Mose leh Aaronin Pakai thupeh bangin abol lhontai. Lengpa le avaipote angsung tah a Aaronin tenggol alamin, luidung twi ajep le twi josue thisan asoh gamtai.
21 Nga jouse athigamin, Egypt miten adon thei tapouve. Egypt gamsung thisan adimsoh jenge.
22 Egypt lengpa mitpheldoi themten jong chutobangma abol thei thouvun, lengpa jong angai bep’in alung tah cheh-in, Pakai seisa bangin Mose le Aaron thu angai deh poi.
23 Lunghei tah sangin leng inpi akijot’in, thilsoh ho chu nahsah in jong aneipoi.
24 Luidung twi adon thei lou phat’un Egypt miten luipang dung twichim holnan alhaiyun don ding ahol’ui.
25 Pakaiyin Nile vadung asuh nehna ni sagi alhing tai.

Exodus Bung 8

Egypt gamsunga thoh hahsa

Pakaiyin Mose jah a, “Egypt lengpa koma chen, Pakaiyin hintin aseiyin, ‘Eihou theina diuvin kamite sultan,
2 nada le nagamsung dimset’a uphoh kalha ding ahi.
3 Nile luidung uphoh dimset’a, na-leng inpi geiya hung kitol lut diu, nalupna indan, najalkhun, navaipote in jouse, namite in dung, nathuh phung le nakhangbel sung geiya dimset diu ahi.
4 Nang chung, navaipote chung le namite chung geiya hung chomdoh diu ahi,’ ati, tin gaseitan,” ati.
5 Pakaiyin Mose jah a, “Aaronin luidung jouse le twilam dung, twikul dung tenggol ajap a, Egypt gamsung dimset’a uphoh hungdoh din bolsah in,” ati.
6 Hiti chun Aaronin twi umna jouse tenggol ajapkhum jengle, uphohte ahungdoh-un gamsung adimset tauve.
7 Mitpheldoi themten jong chutiman abolun, gamsung uphoh adimsettai.
8 Egypt lengpan Mose le Aaron akouvin, “Uphohte asuh gamna din Pakaiya neitaopeh lhonin, Pakaiya kilhaina abol theina diuvin namite lhon solpeh tange,” ati.
9 Mose’n adonbut’in, “Kipah tah in taopeh nange, nang le navaipte, namite itih teng kataopeh ding phat chubou neiseipeh lhonin, chuting u-phoh ten dalhan natin, Nile luidung tilouva khatcha jong um taponte,” ati.
10 Egypt lengpan, “Jing teng neitaopeh-in,” ati. Mose’n, “Nasei bangin taopeh nange, chuting Pakai ka-Pathenu tobang pathen dang umlou hedoh tan nate.
11 Nang, navaipoho, chule namite u-phohten dalhauvin tin, Nile luidung tilouva u-phoh khat cha jong um lou ding ahi,” ati.
12 Mose le Aaronin lengpa adalha lhonin, lengpa chunga alonvuh sah u u-phoh te sumang din Pakaiya Mose atao tai.
13 Mose ngeh bang bangin Pakaiyin abol’in, in dung le thupi tanna in dung chule loujao dunga u-phohte athitam tauve.
14 Egypt miten u-phoh ho chu alhuh lhuh in aseuvin, gamsung khangngam leuvin alhauve.
15 U-phohte gamsoh amu phat’in lengpa angaiyin alungtah kit’in Pakaiyin asei bangin aumtai, Mose le Aaron thusei jong angaideh tapoi.
16 Pakaiyin Mosel jah a, “Aaron khu atenggol’in tol jepsah le chun, Egypt gamsung leivui jouse thousi vaibong soh diu ahi,” ati.
17 Hijeh chun Aaronin tenggol’in tol ajep le, Egypt gamsung leivui jouse thousi vaibong asoh-in, mipi le gancha jouse atomjol soh keiyui.
18 Mitpheldoi themten thousi vaibong sosah agot vangun abol thei tapouve. Muntin thousi vaibong adimsoh tai.
19 Chule mitpheldoi them hon lengpa jah a, “Hiche hi Pathen bol mong mong ahibouve,” atiuve. Ahivangin Pakai seisa bangin lengpa alungtah jingin, Mose le Aaron sei angai dehpoi.

Thoulhe ho

20 Pakaiyin Mose jah a, “Jingkah jingpi tah a lengpa luidunga ache teng gakimupin, ajah a Pakaiyin, ‘Eihou theina diuvin kamite sultan.
21 Kagih masah dim dem nahi-thu na-ngailou le nangle navaipote chule namite ka-engbol ding ahi. Egypt mite insung thoulhe dimset ding, toldung jouse dimsoh diu ahi.
22 Kamite chenna Goshen gamsung vang tongkha ponge, thoulhe khat cha lengle ponte, chuting Kei Pakai hi hiche gamsunga natong thilbol kahi hedoh tan nate.
23 Kamite le namite kah a lamdanga kabol’a hitobang thil kidang hi jing teng hungsoh ding ahi,’ tin aseiye gatin,” ati.
24 Pakaiyin thoulhe ahon honin leng inpi sungle avaipote insung dimset set’in alhalut tai. Egypt gamsung pumpi thoulhe dimset’in gamsung in amanlo tai.
25 Chuphat’in lengpan Mose le Aaron akouvin, “Cheuvin lang hiche Egypt gamsunga hin na-Pathen kom’uva gakilhai tauvin,” ati.
26 Mose’n, “Dih ponte, Pakai ka-Pathenu houna katha diu gancha ho chu Egypt miten alunghanlo diu ahi. Hiche ganchate hi Egypt miten amu phahna diuva that ung lunghanlo taleu, songa eise lih jeng diu ahi.
27 Ethupeh bang banguva nithum lam kajot’uva, gamchang noiya Pakai ka-Pathenu koma kilhai ding kahibouvui,” ati.
28 Egypt lengpan, “Nache gamlat behseh lou pouvule gamchang noiya Pakai na-Pathenu koma kilhai din sol nauvinge, neitaopeh pou pouvin,” tin angeh tai.
29 Mose’in, “Kapotdoh doh le Pakaiya taoving ting, jing teng nangle navaipote, chule namite thoulhe hon dalha taovin nate, amavang neilhep kit lou diu, Pakaiya kilhai dia mipi nasuh tang lou ding ahi,” ati.
30 Lengpa dalhan Mose Pakaiya ataovin,
31 chule Mose ngeh bangin Pakaiyin aboltai. Thoulhe ten lengpa le avaipote chule amite adalhan, khatcha jong aumtapoi.
32 Hichan gei jong hin lengpa alungtah nalaiyin, mipi soldoh deh louvin aum nalaiye.

Exodus Bung 9

Gancha pul

1 Pakaiyin Mose jah a, “Egypt lengpa koma chen Pakai, Hebrewte Pathenin, ‘Eihou din kamite soldoh-in.
2 Nasolda leh,
3 ka-engbol’a naganchate –sakolte le sa-ngan ho, sa-ngongsang ho le bong jouse, kelngoite, chule kelcha ho pul kalha khum ding ahi.
4 Israelte gancha ho le Egyptte gancha ho kasekhen a, Israelte gancha khatcha jong thi lou diu ahi.
5 Kei-Pakaiyin jing teng hiche hi abol kagot ahitai,’ tin aseiye gatin,” ati.
6 Ajingin Pakaiyin asei bangin aboltan, Egyptte gancha ho athigamin, Israelte a vang khat cha athipoi.
7 Lengpan thilsoh umchan adongtoh-in, Israelte gancha khatcha thilou aseipeh tauve. Ahivangin alungtah nalaiyin Israelte asoldehpoi.

Uilut lan

8 Pakaiyin Mose le Aaron jah a, “Thuh phunga vutvam khut dim khattou gaham lhonin, Mose’n lengpa angsunga vanlam ngan thethang hen.
9 Egypt gamsunga leivui khu banga leu ding, muntina uilut jangtea panga, mihem le gancha pomchet chut a alha ding ahi,” ati.
10 Mose le Aaronin vutvam phabep ahamdoh lhonin, lengpa angsunga adingin, Mose’n chunglama athe thangle, uilutjang asoh-in, mihem le ganchate pomchet chut in alhaitai.
11 Mitpheldoi themho geiyin, Egypt mite dang banga uilut avei jeh-in, Mose masanga ahung thei tapouve.
12 Ahivangin Pakaiyin lengpa lungthim atahsah-in, aseisa bangin lengpan Mose le Aaron sei angaidehpoi.

Gellen lhah

13 Pakaiyin Mose jah a, “Jingpi tah le lengpa kimupin, Pakai Hebrewte Pathenin, ‘Eihou din kamite sultan.
14 Tua vang navaipote le namite keo ka-engbol lou ding, vannoiya Kei tobang pathen umlou nahetna dia nang geiya ka-engbol ding nahi.
15 Nangle namite natset lhunkumsah dia khut kalapsa hile, nathigam diu ahitai.
16 Kathahat vetsahna, vannoi pumpi kaminthanna dia kahinsah nah lai nahi.
17 Hichan hin nahoithon, kamite soldoh ding nadai.
18 Jing teng tuphat don le, Egypt miten ahet khah louhellai, huise kalansah a, gellen kalhahsa ding ahi.
19 Tun ganhing jouse le tollhanga um thil jouse lim a kilhoh lutsoh loiyin. Tollhanga um ganchate le mihem ho gellenin aselih soh ding ahi,’ tin aseiye gatin,” ati.
20 Pakai thusei chu lengpa vaipote phabep’in akichan, asohteu le ganchaho in lima ahoilut’uve.
21 Adanghon Pakai migihna chu nahsah louvin, asohteu le gancha ho tollhanga amoh lhauve.
22 Hichun Pakaiyin Mose jah a, “Vanlam sangin, Egypt gam pumpia gellen hung lha ding-mihem le gancha chule loulai muchi jouse avoh lih ding ahi,” ati.
23 Mose’n tenggol’a vanlam ako le, Pakaiyin van athingin, gel alhahsah-in, tollhang dung keh-in aseptai. Pakaiyin,
24 huise hattah le gellen alhahsah-in, kol phelah lah jengin alhahsah-in, kol aphelah lah jengin ahi. Hitobang huise lang hi Egypt thusima kisei lah a akhohpen ahi.
25 Egypt gam pumpia tolhanga umtapou, mihem le ganchate geiyin, gellenin aseplih jenge. Loulai muchi jouse la avo mat tep jengin, thingphung jouse jong aseplhusoh tai.
26 Israelte chenna Goshen gamkol sung seh seh a chun gellen alhapoi.
27 Lengpan Mose le Aaron agakousah-in, “Tua vang chonse kahitai; Pakai adih-in, kei la kamite themmo kahitauve.
28 Pakaiya tao lhonin! Van kithin ka-ngai chimun, gellen kadou lel tauve! Nachetei diuva katep ahi; hi koma chenda jengun,” ati.
29 Mose’n ajah a, “Khopi kadalhah teng Pakai lam sangin tao ving ting, van ging talou ding, gellen lha lou ding ahitai. Chuteng leiset geiya Pakaiya ahi nahet ding ahi.
30 Hinla nangle navaipoten Pakai Pathen nagging hih laiyui,” ati.
31 Sakolchang minlai avoheosoh tan, patbo jouse jong avoheosoh tai.
32 Suhlou chang vang agei jep jeh in asuse behseh poi.
33 Mose’n lengpa adalhan, khopi polama achen, Pakai lam sangin ataove. vAn gin athip’in gellen atangin, go ajutapoi.
34 Thilsoh, kho phat amudoh phat’in lengpa achonse kittan, ama ti avaipote ti angai bep’in alung tah-un,
35 Pakaiyin Mose aseipeh masah bangin, lengpan Israelte asoldoh deh tapoi.

Exodus Bung 10

Khakhote

1 Pakaiyin Mose jah a, “Lengpa gakimupi kit’in. Lengpa le avaipote lungtah sah-a thil kidang hicheng hi bol kagot ahin,
2 nangin jong natu nachate khang geiya jong hitobang thil kidang bol’a Egypt mite lung jinga kalha hi nasei theina ding kati ahi.
3 Hiti hin Mose le Aaron Egypt lengpa koma ache lhonin, “Pakai, Hebrew mite Pathenin, ‘Itih chanpi kasei ngailouva naum ding ham? Eihou theina diuvin kamite sol tan.
4 Kasei na-ngai louhel le jing teng nagamsunga khaokhote kalhah lut ding ahi.
5 Khakho jamah hung lhaa, nagamsung atomjol diu, gellen vohlih mooh chengse, thingphung geiyha aneh chaidiu ahi.
6 Naleng inpi le navaipote, chule namite insung khaokhote dimsoh diu ahi. Napu napaten anamusah thilse josue sanga khohjo ding ahi,’ tin aseiye gati lhonin,” ati.
7 Lengpa vaipoten ajah a, “Iti hichepa hin eidolgim gim jeng diu ham? Pakai a-Pathenu akihou theina diuvin Israelte hi soldoh tan. Egypt gamsung kichai pai ding ahi helou tahbah nahim?” atiuve.
8 Mose le Aaron chu Egypt lengpa koma agapui lut kit’un ajah lhona, “Pakai na-Pathen chu gakihou thei nauvin nate, ahin ache ding pen chu koi koi ham?” atiuve.
9 Mose’n, “Kabonchauva, numei chapang, tehse geiya che ding kahiuve. Kachateu numei pasal, kelngoite le kelcha ho, bong jouse geiya kapui diu ahi, Pakai choi-atna kut lentah bol ding kahiuve,” ati.
10 Egypt lengpan, “Pakai min panna kasei ahi-itih hijong le numei chapang geiyin sol tha hih hel inge! Edou dia kigo nahiu akichentai.
11 Hithei lou hel ding ahi. Pakai hou nom mong nahiule, pasal chengse chethei ahi,” ati.
12 Hichun Pakaiyin Mose jah a, “Khakhote hung dimsetna din Egypt gamsunga nakhut jah-in, Khakhote hungun tin, Egypt gamsunga hampa louhing gellen voh lih moh geiya aneh chaisoh diu ahi,” ati.
13 Mose’n tenggol ajap khum jengle, Pakaiyin niso lama pat sun nilhum jan khovah geiyin hui anunsah-in, jingkah-in khaokhote ahung kitol tai.
14 Ahon honin ahung kitolun, gamsunga alop lop’in atolchai jengui. Khaokhote tamje chu kimu kha loulai hel, mu jong kimu kit louhel ding ahi.
15 Leiset atomjolsoh keiyun, avom leouve; gellen vohlih moh, thing na dum ho geiyin ane chai jengui Egypt gamsung pumpia thingna dum khat’a khat jong akimu tapoi.
16 Egypt lengpan Mose le Aaron agakousah loiyin, “Pakai na-Pathenu le nangni doumah bol’a chonse kahitai.
17 Tun kachonset ngaidamna din neitaopeh loi lhonin, gamlhahna hel thei talen eimatsah hi lahdoh sah din thum lhonin,” ati.
18 Lengpa dalhan Mose Pakaiya atao le,
19 Pakaiyin nisolam huipi chu lhumlam khohuiyin akhel’in, khakhote abonchan Suez twikola alhoh lutsah soh tai. Egypt gamsunga khaokhote khat cha akimudoh tapoi.
20 Pakaiyin Egypt lengpa lung atahsah-in, lengpan Israelte alhadoh kit tapoi.

Mujin lhun

21 Pakaiyin Mose jah a, “Vanlam sang le chun, Egypt gamsung tomjol khopset mujin hung lhung ding ahi,” ati.
22 Mose’n vanlam asanle, nithum sungin Egypt gamsung mu athimsoh hel’e.
23 Egypt mite khat le khat jong akimu thei tapouvin, insung dalha a potdoh jong aumtapouve. Israelte chenna sungsea vang kho avah jingnai.
24 Egypt lengpan Mose akouvin ajah a, “Pakai gakihou thei tauvin nate; numei chapang geiyin che jengun. Kelngoi le kelcha, bong ho geiyin vang pui dauvin, hikoma dalhauvin,” ati.
25 Mose’n, “Achutile Pakai ka-Pathenu houna dia pumgo thilto dia tha ding gancha neipeh diu ahi.
26 Achutilou vangle gancfha aboncha kapui diu khat cha jong kadalhah lou diu ahi. Ganchate lah a Pakai ka-Pathenu houna dia lom kalhehdoh diu ahi nalaiye. Kilhaina ding mun lhun masanga itobang gancha thapeh ding kihe thei loulai ding ahibouve,” ati.
27 Pakaiyin Egypt lengpa lung atahsah jing jeh-in, Israelte asoldoh deh tapoi.
28 Lengpan Mose jah a, “Kakoma konin potdoh loiyin! Mu jong neikimusah kit hih-in! Kamu ni ni le nathi ni kitoh ding ahi!” ati.
29 Mose’n jong, “Naseidih bouve, neimu kit louhel ding ahitai,” ati.

 

Exodus Bung 11

Cha peng masa thi ding Mose’n aphon

1 Pakaiyin Mose jah a, “Egypt lengpa le amite bolsetna ding talen khat bou kahentai. Hiche talen amat jou teng nalhadoh tauvinte. Nasol nom lot’uva nadeldoh tho diu ahi.

2 Tun Israelten aheng akomuva sana le dangka, sanajem pahvui akithum diuvin seipeh tan,” ati.

3 Pakaiyin Egyptte chu Israelte ajabolsah lheh jenge. Ahingmongin vaipote le mipin Mose chu mi nasatah a agel’u ahitai.

4 Mose’n Egypt lengpa koma, “Pakaiyin, ‘Jan khangkim teng Egypt gamsung kakholsoh ding,

5 chapa peng masa jouse, leng chang ding, lengpa chapaa pat sumheiya chang goi soh numei chapa geiya, Egypt gamsung chapa jouse thisoh diu ahi. Gancha peng masa jouse jong thigam ding ahi.

6 Egypt gamsung ka le mao ogin thongsoh ding, hitobang hi kija kha loulai, jajong kija kit lou ding ahi.

7 Israelte lah a vang uicha hamgin le ganchate uhpoh jong kija lou ding ahi. Chuteng Kei-Pakaiyin Israelte le Egyptte kadat khen dol nahetdoh ding ahi,’ ati, tin gaseiyin,” ati.

8 Achainan Mose’n, “Navaipote ka-angsunga hung bohkhup a, kamite kapuidoh dia hung tao diu ahi. Chutah le kadalhah ding ahi,” ati. Hiti hin lung hang tah-in Mose’n Egypt lengpa adalhai.

9 Pakaiyin Mose jah a, “Egypt gamsunga thil kidang hijat hi kaboldohna thei dia Egypt lengpan nasei angai deh loulai ding ahi,” ati.

10 Mose le Aaronin Egypt lengpa angsunga thil kidang hijat pi hi aboldoh lhonin, Pakaiyin Egypt lengpa lung asuh tah jeh-in Israelte Egypt gama konin asoldoh deh poi.

 

Exodus Bung 12

Kalchuh Kut

1 Egypt gama Pakaiyin Mose le Aaron jah a,

2 “Hiche lha hi kum sunga lha kipatna nasim diu ahi.

3 Israel pumpi hitin hilchah lhonin; hiche lha nisom lhin ni le a-inson a sungsa tha dia kelngoi ham kelchagol ham khat naki-ngaito cheh diu ahi.

4 Koi tobang insung chun sungsa kithat aneh lel dingle, a-inhengte to sa chu kihomuva, aneh khop bep dia chang thei ahiuve.

5 Kelngoi ham kelcha ham natha theiyu ahin, hoijoh hile kum khat lhingsa, nolnabei achal hiding ahi.

6 Hiche lha nisom le ni li lhin ni, nilhah lam teng Israel pumping an atha diu ahi.

7 Aganthau sa anehna diu in tin a, kotpi chung inkama thisan aloinat soh kei diu ahi.

8 Hiche jan hile sungsa chu ago min’uva, anche kha le cholsolou changlhah to ame diu ahi.

9 Asel’a jong, hon thota jong naneh lou diu, apumchang, alu pum, akeng pum, asungsa jouse puma gomin thoa naneh diu ahi.

10 Neh moh imacha jong jingkah khovah geiya nakoiden lou diu, neh moh pou pou nagovam jeng dingu ahi.

11 Kholjin dia gotsa, tenggol choiya, kengchot busa, chule dinmun pum le kinotah a naneh diu ahi. Hiche hi Pakai-Kei jabolna Kalchuh Kut ahi.

12 “Hiche jan hileh Egypt gamsung kakholsoh hel’a, mihem hihen gancha hile, apeng masa chengse kathagam ding, Egypt gamsung doi le kao jouse kasuhgama talen kamatsah ding ahi. Kei hi Pakai kahi.

13 Kotpi inkam chunga thisan kiloi chun nachen nau in eihetsah ding-melchihna ahi. Hiche thisanchu kamu teng kalchuh ing ting, Egypt mite talen kapehna nangho suse ponge.

14 Hiche nikho hi, Kei-Pakai thilbol geldohna, sakho kut a nanei diu ahi. Akhang khangin bol jinguvin,” ati.

Cholsolou changlhah kut

15 Pakaiyin, “Ni sagi sungin cholkiso changlhah nehhih hel’un, cholsolou changlhah bou neuvin. Kut kipatni le insunga chol kikoi chengse napai diu ahi, ajeh chu kut sung ni sagi sunga chol sa changlhah nekha chan chu kamite to kisimtha lou ding ahitai.

16 Kut kipatni le ni sagi lhin nia Pathen lhai dia nakikhop diu ahi. Hiche nikho te ni le anhon tilou thildang toh dang nabol thei lou diu ahi.

17 Hiche nikhoa hi Egypt’a kona kahin puidoh-u melchihna a hiche kut hi nabol jing diu ahi. Khonung jongle, akhang khanga hiche kut hi naman jing dingu ahi.

18 Hiche lha masa nisom le li lhin nilhah a pat, nisom ni le ni khatna nilhah geiya cholsosa changlhah naneh thei lou diu ahi.

19 Ni sagi sunga koimacha insunga cholsosa changlhah kikoi thei lou ding, cholsosa changlhah koi pen pen gamsung mi hihen, khopem hile-Israelte Houbunga kisimtha lou ding ahi.

20 Cholsosa changlhah him him naneh lou diu, na umna jouseuva cholso lou changlhah bou naneh diu ahi,” ati.

Kalchuh Kut masapen

21 Mose’n Israel lamkaite akousoh keiyin ajah-uva, “Kalchuh Kut bolna dia na-inko kouva kelngoi ham kelgol ham nakitha cheh diu ahi.

22 Naganthau thisan chu hyssop ponin deovin lang, kotpi khom le inkam jol’a loisan soh keiyun. Jingkah masanga koiman insung nakhokal thei lou diu ahi.

23 Egyptte sugam dia Pakaiyin Egypt gamsung achot teng, kot khom dungle inkam dunga thisan kiloi muntin, mi sugam Vantil na-insunguva alutsah daa, nahinghoi diu ahi.

24 Nangho le natu nachateu geiyin, hiche Dan hi a-itih a jong anit jing diu ahi.

25 Pakaiyin peh dia na teppeh nau gamsung nalhun tengu jongle hiche houdan hi najui diu ahi.

26 Nachateuvin, ‘Idia hiche Houdan ho hi kijui ham,’ atiu leh;

27 ‘Egypt gamsunga Pakaiyin Israelte in josue akalchuh jeh a Pakai jabolna kimang Kalchuh kut kilhaina gantha ahi, Pakaiyin Egypt mite athaa, eiho eihing hoiyu ahi,’ tia naseipeh diu ahi,” ati. Israelte kunin Pathen alhai cheh-ui.

28 Acheuvin Mose le Aaron jah a Pakai thupeh chu aboutauve.

Cha peng masa thi

29 Jan khangkim laiyin Egypt gamsung lengpa goulo ding chapa masa pen apat kulsunga kihen sohchang chapa masapen gei Egypt gamsung chapang masa jouse gancha peng masa ho geiyin Pakaiyin athath gamtai.

30 Hiche jan hin lengpa le avaipote athouvun, chapa thi louna in khat beh jong aum tah lou phat’in, Egypt gam pumpi ka le mao o athongsoh hel tai.

31 Ajan janin lengpan Mose le Aaron agakousah-in, “Na-Israelte toh potdooh loi lhonin! Kagam sung dalhauvin, Pakai chu nadei bangin kihou tauvin.

32 Nakelngoi, nakelchau, nabong jouse kikaihyun, cheloiyun, keijong vang neithumpeh-un,” ati.

33 Egypt miten Israelte chu Egypt gam dalha loi din angeh-un, “Nachedoh vah louvule kathigam pai diu ahitai,” atiuve.

34 Israelten umle bel akigot’un, cholsolou changbong ponin achun’uvin, lengkouva pun akitol tauve.

35 Israelten Mose sei bangin abol’un, Egypt mite koma sana le dangka, sanapah jem, chule ponsil akithum’uve.

36 Pakaiyin Israelte chu Egypt mite aginsah-in, athum chan’u apehsah-e. Hiti hin Egypt mite gou jouse Israelten apodoh tauve.

 

EXODUS BUNG 13

Chapa masa katdoh

1 Pakaiyin Mose jah a,

2 “Chapa peng masa le gancha peng masa achal josue kakoma nakatdoh diu ahi, ajeh chu Israelte chapa masa achal jouse kei ding ahi,” ati.

Cholsolou changlhah kut

3 Mose’n mipi jah a, “Nasoh chan nau mun, Egypt gamsung nadalhah nikhou hiche nikho hi Pakaiyin abangol thahat’a nahin puidoh-u ahi. Cholsosa changlhah naneh htei lou hel diu ahi.

4 Lha masa, Abid, hiche nikhoa hi Egypt nadalhah-u ahi.

5 Canaan mite le Hit mite, Amor mite, Hiv mite, chule Jebus mite gamsung napeh diuva napu napateu koma Pakai giltah a kitepsa ahi. Hiche gampha sunga nahin puilut tengule, kum seh a lha masa pena hiche kalchuh kut hi naman jing diu ah.

6 Ni sagi sunga cholsolou changlhah naneh diu, ni sagi lhin ni le Pakai choi-atna kut nabol diu ahi.

7 Ni sagi sunga cholsolou changlhah naneh lou diu, nagam sunguva chol le cholsosa changlhah nakoi da diu ahi.

8 Kut kipat teng, Egypt nadalhah-uva Pakaiyin thil nabolpeh jal’uva hiche thil nabol’u chu nachateu hilchen’un.

9 Kalchuh kut kinit hi khut’a chao kibut  bang le chalpaunga sum-eng kikhai banga nanei diu, Pakaiyin ban-gol hat’a Egypt a nahin puidoh jal’uva, Pakai Danthu sim le lungchina seije nahil jing diu ahi.

10 Akitep phat chan kumseh le hiche kut hi mang jing jengun.

Cha peng masa

11 “Giltah a napu napateu koma napeh diuva akitepnasa Canaan mite gamsunga Pakaiyin nahin puilut tei diu ahi. Gam chu apeh tengu

12 cha peng masa jouse Pakai napeh diu ahi. Gancha peng masa achal jouse jong Pakai chan ding ahin,

13 sa-ngan peng masa achal chu kelngoiya nakile chohson diu ahi. Sa-ngan chal chu nalechoh nom loule, alol heh-bongun. Nachau pasal peng masa jouse nakile choh cheh diu ahi.

14 Khonung teng nachauvin ibol’a hich ekinit ahi nadoh tengu, ‘Kasohchan nau Egypt gamsunga kona Pakaiyin ban-gol hat’a eihin puidoh-u ahi.

15 Egypt lengpa alungtah a eisolda phat’uva, Pakaiyin Egypt gamsunga chapang peng masa jouse mihem hihen gancha hile athagam a, hijeh a chu gancha peng masa achal jouse Pakaiya kilhaina kithat’a, mihem peng masa ho kile chohson ahi.

16 Hiche hi chao kibut bang le chalpang a sum-eng kikhai banga milmao kinut jign ahi; Pakaiyin ban-gol hat’a Egypt a kona eihin puidoh-u geldohna kinei jing ding ahi,’ tia nahil chen ding ahi,” ati.

Meilom le meikou

17 Egypt lengpan Israelte asoldoh phat chun, lampi gompen ahivangin, Philisitia twipang lampia Pathenin apuipouve. Pathenin “Galsatpa ding amudoh tengu Israelten lung khel’a Egypt a kile kit agot diu kadei poi,” ati. Israelte chu

18 Lampi kolvel lam, Twipi san lam joh, nelgam lama apuijoi. Israelte chu galsat pa dia kigosa ahiuve.

19 Joseph-in Israelte giltah a akitepsah dungjuiyin, Mose’n Jospeh long apoi. Joseph chun “Pathenin nahuhdoh tengu hiche mun a kona kalong napoh doh tei diu ahi,” anati.

20 Israelten Sukkoth dalhan nelgam pamchin, Etham a kingauve.

21 Sun teng achunguva Pakai meilomin akisongin, alekhun, jan teng amasanguva meikouvin akidal’in asalvah-e; hijeh chun sun le janin lam ajot theiyu.

22 Sun nilhumin Israelte chunga meilom akidal’in, jan khovah vah-in meikouvin akitolpeh-e.

 

EXODUS BUNG 14

Twikhanglensan agalkaiyu

1 Pakaiyin Mose jah a,

2 “Israelte akiletol’uva, Baal Zephon kom, Migdol le Twikhanglensan kikah, Pi-Hahiroth gal a ki-nga din seipeh-in.

3 Egypt lengpan Israelte chu gamsunga vah thai leuva, nelgam hung naidol’in ngaiton tin,

4 ken alung tahsah ing ting kahin nungdel sah diu, asepaite le ama kajo teng kamin thang ding ahi. Chutah le Pakai kahi Egyptten hedoh tauvinte,” ati. Aseipeh banguvin Israelten abol tauve.

5 Israelte jamdoh thu Egypt lengpa aseipeh-u le, ama le avaipoten lung akhel’un, “I-bol kheltauve. Israelte isoldoh-u hi soh a inekhah lou diu ahitai!” atiuve.

6 Egypt lengpan agalsatna kangtalai akigot’in, asepaite jong akigotauve.

7 Lengpa kangtalaiyin akitol’in, sepai them cheh jagup le alamkaiteu to alhone.

8 Pakaiyin Egypt lengpa lung asuhtah-in, lengpan Israelte nomtah a kitol ho chu, adel del jenge.

9 Egypt sepaiten sakolte le kangtalai ho, kangtalai tolte pumin adel del jengun, Pi-Hahiroth le Baal Zephon kom, Twikhanglensan a aki-ngah nauva aphapa tauve.

10 Egypt lengpa le asepaiten ahindel khum amu phat’un, Israelte akichauvin Pakaiya panpi ngaichan ataotauve.

11 Israelten Mose jah a, “Egypt gama kivuina lhankhuh beiya nabol’a, nel gama lup kamsah dia neihin puiyu ham? I-khoh tah a Egypt a kona nei hin puidoh mongu ham!

12 Hiti dia hi ihung kipatdoh masanguva pat kasisau hilou ham? Neidon dauva Egyptte soh a pang den dia kaseipeh sau nahi. Gamchang noiya lup kam sanga Egyptte soh a pan phajo ta dinga,” atiuve.

13 Mose’n, “Kicha hih-un, pangdet’un, nahuhhingna diuva ahi. Hiche Egypt mite hi namu kit louhel diu ahi.

14 Nangho sat ngailouva Pakaiyin gal nasatpeh diu ahi,” ati.

15 Pakaiyin Mose jah a, “I-bol’a kithopi ngaiya toa nahiuvem? Mipi chu malam nodin seipeh-in.

16 Twikhanglen chunga natenggol jah-in. Twipi kikehson tin, akah tolgoa Israelte kijotdoh diu ahi.

17 Egyptte lung katahsah a Israelte adel lut diu, Egypt lengpa le asepaiteu, kangtalai ho le atolte kasuhgam a minthang ding ahi.

18 Amaho kajosoh teng Pakai kahi Egypt ten hedoh tauvinte,” ati.

19 Pathen Vantil, Israel gal lamkaipa chu anung lam’uva achen, meilom jong chu akiletol’in,

20 Egyptte le Israelte kah a akidaltai. Meilom chun Egyptte alejingin, Israelte din avah-e. Hiti hin sepaiho chu jan khovah-in akinailut thei pouve.

21 Mose’n Twikhanglen chunga akhut ajah le, Pakaiyin Twikhanglen chu niso lam khohui asemkhensah-in akiting kih tai. Hui anung khovah hel’in, Twikhanglen lai lung tolgo asoh tai. Twipi skihom khenin,

22 Israelten ajet aveiya twipi bangdan a kisung, Twikhanglen lailung tolgon ajotdoh tauve.

23 Egypt miten sakolte le kangtalai jouse chule atol ho pumin Israelte nung adel’un, Twikhanglen lailung ageitauve.

24 Khovah konchan Pakaiyin meilomle meikouva konin Egypt sepaite ahinven, ameidoisah soh hel tai.

25 Kangtalai velkol jouse a-odensah-in, atolchal tapouve. Egypt miten, “Pakaiyin Israelte panpi eikisatpi tauve. Jamdoh jengu hite!” tin aseitauve.

26 Pakaiyin Mose jah a, “Twikhanglen chunga khut jah le chun, twipi hung kichia, Egyptte le kangtalai ho chule atolte achupden ding ahitai,” ati.

27 Mose’n Twikhanglen chunga akhut ajah jengle, khovah lhah-in twipi ahung kichin, aveina ngai ngaiyin aveitan, Egyptte chu twi lah a kon jamdoh agot vangun Pakaiyin twi lailunga laeh lut soh tauve.

28 Twipi akichin kangtalai ho le atolte, Egypt sepaite, Israelte nung del Twikhanglen lailunga lutsa ho chu, khat beh jong khen louvin achup lihsoh hel’e.

29 Israelte vang chu jet le veiya twipi bangin akisungin, alailung tolgoa akijotdoh soh hel’uve.

30 Hiche nikho hin Egypt mite khut’a konin Pakaiyin Israelte ahuhdoh-in, Twikhanglen pamchin a Egyptte thilong akijamchap leu chu Israelten amutauve.

31 Pakaiyin tha hangsan taha Egyptte asuhgam amudoh phat’un, Israelten Pakai aging cha tauve.

 

EXODUS BUNG 15

Mose la

1 Mose le Israelten Pakai vahchoi nan hiche la hi asauve: “Pakai vahchoi la sange, Aman gal ajoutai! Sakolte le achunga toute Twikhanglen lailunga aleh luttai.

2 Kakulpi detpen Pakai ahin, Eihuhhinga Ama ahi. Ka-Pathen ahi vahchoiyinge, Kapa Pathen loupije sachoi lenge!

3 Pakai gal-hang ahin, Amin jong Pakai ahi.

4 “Egypt sepaite le kangtalai jouse Twikhanglena alehlut soh tai. Egypt sepai vaipo them josue Twikhanglensanin achupsoh tauve.

5 Twikhanglen thuh alut lhumun, Songtum kileh lutbangin lito ageitauve.

6 “Naban thahat akidange Pakai, Melmate nabottelsoh tai.

7 Loupi chung nungin Namelmate najoutai; Nalunghan chun abonchauvin changpol meiya kileo nabahsah tai.

8 Twikhanglen namut le Twipi alhuh lhuh-in akinongin; Banglai kksung abangin, Twito thuhpen jong leitah asoh jenge.

9 Melman, ‘Kadel’a kamuat ding; Agouvu kadei dei kachom ding, chemhem hat’a anei jouse kalah ding ahi,’ ati.

10 Vo Pakai nakisem husan Egyptte twiyin ahcuptai; Twithuh lailunga ngenchang kilehlut abangui.

11 “Vo Pakai Nangto tethei pathen koi ham? Thengpentah Nang tobang koiham? Nabol tobang thil kidang datmo boldoh ding koi ham?

12 Nakhut jetlam najahle leiyin namelmate aval lhumtai.

13 Kitepna Molson nahuhdohsa mite napuidohtai. Nathahat’in puiyin nagamtheng nalhut tai.

14 Namtin vaipin ajauvin akihot lhulsoh tauve; Philistine mite kicha lih pai diu ahitai.

15 Edom mite lamkai ho atijauvin, Moab mihatte akihot hot’ui. Canaan gam mite amei doi gamtauve.

16 Tijat kichat’in adimtauvin, Vo Pakai nathahat amu soh tauve; Sohchang nalhadoh namite kitoldoh soh kahsen atinaje helouvin lungdongin adingden tauve.

17 Nahin puilut’in nagamsung Mol le lhang natomjolsah-in; Nang-Pakaiyin nalhendohsa mun, na-in Houin-nasahsa dung nalhutsohtai.

18 Vo Pakai nangma, Tonsot tonsot’a leng chang ding nahi,” atiuve.

Miriam Labol

19 Israelten Twikhanglen lailung tolgon ajotdoh tauve. Egypt mite kangtalai ho le sakolte chule kangtalai tol ho puma Twikhanglen lailung agei phat’un Pakaiyin twipi akichisah kit’in achupsah soh tai.

20 Aaron sopinu Miriamin khutbeh akipat’in, numei dang sen jong ajop’un khutbeh bengin alamtauve.

21 Numeiho lamkaiyin Miriamin la asan: “Pakai vahchoiyun, Minthangtah-in gal ajoutai. Sakolte le achunga tou mihem josue Twikhanglen a aleh luttai,” atiuve.

Twikha

22 Israelte chu Mose’n Twikhanglensan apat Shur gamthip lama apuitai. Nithum sung nelgam jeng ajot’u le, twi him him amu tapouve.

23 Marah kiti lai ahinphauvin, chukoma twi chula akhan adon theipouve. Twikhat jeh a Marah asah lo’u ahi.

24 Mipi Mose koma akiphin’un, “Ipiba kadon diu ham?” tin anotauve.

25 Mose jong lunggil tah-in Pakaiya ataovin, Pakaiyin thing hal khat avet sah-in, hichu twikha lah a lelut le donthei asohtai. Hikoma hin Pakaiyin achonna diu Danthu apen, pajong apate’e.

26 Pakaiyin, “Thildih a kagel chu thakhen louva nabol’uva, kathupeh chengse nanit jingule, Egypt mite kathagamna nat ho khatcha nachunguva chuhsah ponge. Kei hi nadamsah-uva Pakai chu kahi,” ati.

27 Abanin Elim ahung lhungun, hikoma hin twinah phung som le ni aumin, chahthing hung som sagi akeh-e; twipanga chun aki-ngauvin ahi.

 

Potdoh Bu Bung 16

Manna le Vamim

Egypt adalhah kal’u nisom le ni nga lhin nin Israelte abonchan Elim a pat akitolun, Elim le Sinai kah a Sin gamthip alhung tauve.

2 Gamthip laiya mipi chu Mose le Aaron koma akiphin’un

3 ajah lhona, “Egypt gama Pakaiyin eithatden’u hita le nom kisa jo dinga. Egypt gam a tou monga sa hihen an dang hile idujat jat beh kinethei ding. Gilkel’a thisah gam din hiche gamthip laiya neipui lut tauve,” tin aseiyui.

4 Pakaiyin Mose jah a, “Nabonchauva dia van a kona neh le chah goju kabahsah ding ahi. Niseh le nehkhop bep ding agakilo khol diu ahi. Kahil ajui ajui louvu photchetna hitia hi kabol ding ahi.

5 Nigup lhin ni le nidanga akilokhom jat’u ajat ni akilo diu ahi,” ati.

6 Mose le Aaronin jong Israel jouse jah a asei lhonin, “Eypt a kona nahin puidoh-u Pakai hi tuni lhah a nahet diu ahi.

7 Jingkah teng Pakai maivah lah lah namu diu ahi. Kei ni chunga nakiphinu chu Ama douna ahi. Ajeh chu Ama thusei bou kabol lhon ahi; nakiphin nau Pakaiyin ajatai,” tin aseilhon’e.

8 Mose’n, “Pakai chunga nakiphin jeh-un Aman ajadoh tan, nilhah a neh ding sa nadei jat jat’u le, jingkah a neh ding changlhah nadei jat jat’u napeh diu ahi. Keini chunga nakiphinu chu Pakai chunga kiphinjo nahiuve, ati.

9 Mose’n Aaron jah a, “Pakai ang a ding din Israelte abonchauvin seipeh-in, Aman akiphin nau ajadoh tai,” ati.

10 Aaronin Israel pumpi aseipeh phat’in, gamthip jonin akitolun, phulou helouvin, meilom lah a konin Pakai ahung vah lap lap jenge.

11 Pakaiyin Mose jah a,

12 “Israelte kiphin kajatai. Israelte seipeh-in nilhah teng neh ding sa amu’va, jingkah teng adei jat jat changlhah amu diu ahi. Chuteng kei-Pakai hi a-Pathenu kahi hedoh tauvinte,” ati.

13 Nilhah lamin ngahmun tomjol soh hel’in vamimte ahung kitol’un, jingkah-in ngahmun kivelsoh hel’in daibang alhai.

14 Daibang chu ajolsoh phat’in tol’a chun changlhah tobang tahchip chep tampi akiluiye. Alimso dan chu thil kidang tah ahin,

15 Israelten amudoh phat’un ahe theipouvin, “Ipi ham?” tin akidong tauve. Mose’n ajah-uva, “Naneh diuva Pakaiyin napeh-u chu ahi.

16 Amichang cheh a nadei kham bep, litre ni cheng ham, a-insunga aneh khop bep diu nakilo diuva Pakaiyin aseisa ahi,” ati.

17 Israelte abangin tampi, abangin lhomcha akilo’uve.

18 Atetoh phat’un alhom lodoh jong lhasam deh lou, atam lodoh jong val deh louvin aume. Aneh khop bep cheh bou akilodoh-ui.

19 Mose’n ajah-uva, “Koiman nehval jinga dinga nakhen lou diu ahi,” ati.

20 Kon khatsen Mose sei nit louvin phabep akhen’ui. Ahinla jingkah-in anathanin, auithe thu jengin, Mose alung han loi.

21 Jing seh le ama aman neh khop bep cheh akilo jiuve. Nisa sat teng alomdoh chengseu ajolsohji tai.

22 Nigup lhin ni le ni ni sunga neh kham din mi khat khat din litre li cheng akilokhom jiuve. Alodh jat’u chu Israel lamkaiten Mose koma ahung seijiuve.

23 Mose’n ajah-uva, “Pakaiyin jing nikho khu Ama dia kakatdohsa, choldo nitheng dia aseisa ahi tai. Ni ni sunga nehkham ding changlhah nakan nom jat’u le nahon diu andang kihon khol’un, tunia neh moh chengse chu jinga naneh diu ahi,” ati.

24 Mose sei bangin chuche nikhoa neh moh chengse jinga din akoitauve; hiche ho vang chu monjong amon pon, than jong alut poi.

25 Mose’n, “Hiche hi neuvin, tuni hi Pakaiya kikatdohsa choldo nikho ahi; ngahmun polam a neh le chah nachoidoh thei louhel diu ahi.

26 Nigup sunga neh le chah namu jing diu, ni sagi lhin na, choldo nikhovang le neh le chah kipe lou ding ahi,” ati.

27 Ni sagi lhin nin mi phabep neh ding hol’in ngahmun polam a acheuvin, themcha jong amupouve.

28 Pakaiyin Mose jah a “Iti nangho hi kathu ngailouva naum jeng diu ham?

29 Choldo nikho khat kapeh-uva, nigup lhin ni le ni ni sunga neh khop ding an kapeh jingo chu geldoh-un. Koi hile ni sagi lhin nile potdoh louva a-in cheh a ki-umthim ding ahi,” ati.

30 Hijeh chun nisagi lhin nia natong aumtapouve.

31 Aneh-u chu Israelten Manna asah-ui. Michu kang tobang ahin, khoiju to kisemtha changlhah tuiyin atuiye

32 Mose’n, “Egypt a kona eihin puidoh-uva gamthip laiya neh dia eipeh-u Manna hi itu ichateu mu dia koi din Pakaiyin aseiye,” ati.

33 Mose’n Aaron jah a, “Mana litre ni dimset bel sunga khumin, itiu ichateu mudin Pakai angsunga koiyin,” ati.

34 Pakaiyin Mose aseipeh bangin, aitih a koi jing ding, Aaronin Mana umna bel chu Kitepna Thingkong maiya atunge.

35 Achen nau gam Canaan aphah kahseu, kum somli sungin Israelten Mana aneuve.

36 Mana ate nau thiltena chu litre som ni tokibang ahi.

 

Potdoh Bu Bung 17

Songpia twi put

(Num 20:1-13)

1 Pakai thupeh dungjuiyin Sin gamthip dalhan Israelte aban banin akitol tauve. Rephidim a aki-ngah-uve, don ding twi aumtapoi.

2 Mose koma akiphin’un, “Don ding twi nei peuvin,” tin athum’ui. Mose’n, “Idia kiphin nahiuvam? I-bol’a Pakai napatep’u ham?” ati.

3 Mipi adangchah val’un Mose koma akiphin phin jengui. Amahon, “Idia Egypt a kona neihin puidoh mongu ham? Kacha kanaovule kagancha jouse to dangchah a thigamsah neigot’u ham?” atiuve.

4 Mose lunggil tah-in Pakaiya ataovin, “Mipi hijat hi i-kalo ding hi tam? Songa eiselih pai diu ahitai,” ati.

5 Pakaiyin Mose jah a, “Israel lamkai phabep puiyin mipi masanga cheuvin. Chule Nile luidung navohna tenggol chu kichoiyin.

6 Sinai molsang songpi maiya namasanga ding nange. Songpi chu vo le chun mipi don ding twi hung longdoh tante,” ati. Israel lamkaiho masanga Mose’n hiti chun aboltai.

7 Hiche mun chu Israelte akiphin’uva Pakai patepna, “Pakayin eiumpiu ha eiumpi louvu ham?” atijeh-un Massah le Meribah akisah lo ahi.

Amalek mite to kigal

8 Rephidim mun a Israelte chu Amalek miten ahindel khum tauve.

9 Mose’n Joshua jah a, “Jing teng mi phabep puiyin Amalek mite gasat tan. Molvum a ding ing ting Pakaiyin eipeh tenggol hi dom jing nange,” ati.

10 Mose sei bangin Amalekte to kisat din Joshua akontai. Mose le Aaronin jong Hur to lhang vum lang ajontauve.

11 Mose’n aban-gol ajetjang laisen Israelten gal ajouvun, ban-gol alhahsah sah teng Amalek miten anochal tel tul jiuve.

12 Mose bantha angoi phat’in, Aaron le Hurin atouna din song adopeh lhon, jet le veiya pangin, nilhum geiyin Mose banjang adom lhon’e.

13 Hiti hin Joshuan Amalek mite asugam hel’e.

14 Pakaiyin Mose jah a aseiyin, “Suhmil louna din hiche galjo thusim hi jihdoh-in koiyin. Joshua seipeh-in Amalekte kasuhgam hel ding ahi,” ati.

15 Hikoma chun Mose’n, maicham asemin, “Pakai chu kaponlap ahi,” tin aminvoi.

16 Mose’n “Pakai ponlap domsangun! A-itih a Pakaiyin Amalek mite adoudal jing ding ahi!” ati.

 

Potdoh Bu Bung 18

Jethron Mose ahungvil

1 Pathenin Mose le Israelte Egypt a kona ahinpuidoh a athilboh chengse, Mose nupapa Jethron ajatai.

2 Mose’n adalhah ajinu Zipporah chu ahinpuiyin,

3 achate Gershom le Eliezer to ahinpui thai. Mose’n, “Gamchoma khopem kahi,” tin achapa khaat chu Gershom asah-e.

4 Mose’n “Egypt lengpan eitha gotna konin ka-Pathenin eihuhhinge,” tinan achapa khat joh chu Eliezer asah-e.

5 Gamthip lai molsang theng Mose le aloite ki-ngahmun a Jethron Mose jinu le achate ahinpui lut’e.

6 Jethron ahung diu Mose thu athot masai.

7 Mose’n Jethro agakimu pin, a angsunga bohkhup’in achop’e. Dam le damlou thu akihetchet phat’un Mose ponbuh a alut tauve.

8 Israelte puidohna dia Pakayin Egypt lengpa le Egyptte abolna jouse Mose’n Jethro aseipeh soh keiye. Lampi dunga ahahsatna jouseu le Palaiyin ahuhhingnau thusim geiyin aseipeh tai.

9 Chujatpi ajah chun Jethro akipah-in,

10 “Egypt lengpa le amitea kona nahuhdoh-uva Pakai chu nun nom hen! Amite sohchang lhadoh Pakai chu vahchoiyun!

11 Egyptten Israelte noise tah a abol jeh-uva Egyptte ahitibol ahijeh-in pathen dang jouse sanga Pakai letjoh kahetai,” ati.

12 Jethron pumgo thilto dingle Pathen henga kilhaina ding thil tampi apodoh tai; Aaron le Israel lamkai chengse hiche kilhaina sa ne din achesoh keiyui.

Thutan vaihomho kilhendoh

(Deut 1:9-18)

13 Ajing nikhon jingkah a pat nilhah geiyin mipi kibao na them them thu Mose’n abol nilhum hel jenge.

14 Mose bol ding tamjeh a on man louhel amudoh chun Jethron, “Idia mipi hi kinong chet chut’a nalha a, jingkah a pat nilhum hela nakihou limpi nom mipi chu ding nilhum hel’a ki-ngasah nahim?” ati.

15 Mose’n, “Pathen lungdei henom a kakoma hunga chu ahiti loule ba.

16 Akina aum jongle hung lhon a, adih amo seipeh le Pathen thupeh ho le Danthuho kiseipeh chu,” ati.

17 Jethron, “Nabol khel’e.

18 Nang ti amaho ti chol lih pai ding nahiuve. Nachangseh a dia hahsa ahi.

19 Aphajo din hil inge, chule Pathenin napanpi tei ding ahi. Mipi khel’a Pathen angsunga ahenga akibaona lhut ding chu aphanai.

20 Pathen thupeh chengse hilchet a achon namlhah diu seipeh chu nabol ding mong ahinai.

21 Hijongle nahu ding mipi lamkai dia thilbol thei mi phabep nalhendoh ngaiya ahi: Sang khat cheng, ja khat cheng, som nga cheng, som khat chenga lamkai ding nalhendoh ding ahi. Pathen ging, tahsan the idol, nehguh a lhepkoi thei lou hidiu ahi.

22 Amaho chu a-itih a japi thutan din pansah-in. Thu hahsa behseh bou nakom hin lhut’un tin, Thubai bai bol chaisoh tauvinte. Amahon nahu chun jangkhai domtante.

23 Pathen thupeh banga hitia nabolle nang chol lou ding, mipi jong athuu chaiya in lam akijot cheh theiyu ahi,” ati.

24 Jethro hil bangin Mose’n

25 Israelte lah a thilbol them cheh phabep alhengdoh tai. Amaho chu mihem sang khat cheng, ja khat cheng, som nga cheng le som khat cheng lamkaiyin akoi tai.

26 Ama ho hi a-itih-in japi thutanin apangun, thu hahsa behseh vang Mose heng alhut nauvin, abaidom chengse vang achaipeh thu thu tauve.

27 Mose’n Jethro alhadoh tan, Jethron inlam akijot tai.

 

Potdoh Bu Bung 19

Sinai molsanga Israelte

1 Egypt adalhah kal’u lha thumna nikho masapen nin Rephidim dalhan Israelten Sinai gamthip ahinjon tauve.

2 Sinai molsang bul a akingauvin,

3 Pathento kimuto din Mose molvuma akal toutai. Molsanga konin Pakaiyin Mose akou-vin, Jacob son Israelte jah a aseidin,

4 “Kei-Pakaiyin Egypt mite kabolna le Muvanlaiyin anoute alhavinga apoh banga hikoma ka-angsunga kahin puilut namutauve.

5 Kasei nanit’uva kakitepna najuiyule, kamite nahi diu ahi, nang ho kalhentum mite nahiuva,

6 Kei dia katdohsa mite Kathempua pang ding nahiu ahi,” ati.

7 Mose akum lhan Pakai thusei abonchan mipi lamkaite aseipeh soh keiye.

8 Hichun mipin adonbut cheh-un, “Pakai sei chan chu kabol diu ahi,” atiuvin, Mose’n Pakai koma alelhut kit tai.

9 Pakaiyin Mose jah a, “Nahenga meiloma hung kilah a kakihoupi mipin ajah teng natahsan tauvinte,” ati. Mose’n mipi thusei chu Pakai koma aseiye.

10 Pakaiyin ajah a, “Kei hou din tuni le jing sung hin mipi kisil thengsah-in. Nihchen ponsil akisop thenguva,

11 thainia dia kigosa dem a um diu ahi. Thaini le Sinai molvum a hung kumlhan ting japing eimusoh diu ahi.

12 Mipi khokal lou din molbul a tho kaiyin, molbul chu anailut lou diu, phah jong aphah llouna diuvin seipeh-in. Molbul chonkhapen pen chu thilo ding ahi;

13 songa selih ham, thalpia kaplih ham khat joh hi ding ahin, koiman khut’a atha lou ding ahi. Mihem hihen gancha hile chutia bolcheh ding ahi; tha tei ding ahi. Saki kimut teng japi mol a kitol tou diu ahi,” ati.

14 Molchunga konin Mose ahung kumsuh-in Pathen hou dia kigo din mipi aseipeh tai. Mihon von akisop’un,

15 Mose’n ajah-uva “Thainia din kigouvin lang, hiche kah chun numei le pasal jong kitimat dauvin,” ati.

16 Nithum lhin ni jingkah-in van agingin, kol aphen, molvuma meilom jinglei loiyin akilomin, sumkon gin thongje ju tobang akijai. Ngahmun a mipi tija kihot lhu ding ahitauve.

19 Pathen to kimuto din Mose’n mipi apuidoh-in, molbul’a adingtauve.

18 Pakai meikouva ahung kumlhah jeh chun Sinai molsang pumpi meikhun atom nalsoh hel’e. Meikhu chu meilhum sung khu abangin, japi tijan akithing thing jengui.

19 Sumkon gin alen cheh cheh jeng tan, Mose’n thu agahsei le Pathenin van-gin chun ahinhouve. Mose akaltoule,

21 Pakaiyin ajah a, “Kumsuh loiyin, mipi khu kei ve dia hunga tho kikai hinkhel lou din gahil loiyin; hin khokhel leu japing athilo diu ahi.

22 Eihin nailut jep ding Thempuho jeng jong kisutheng masa diu ahi; achutiloule talen kamatsah diu ahi,” ati.

23 Mose’n Pakai jah a, “Japi hungkaldoh pouvinte, molsang hi atheng dia naseiya, akimvel’a tho kikaikhumsa ahitai,” ati.

24 Pakaiyin, “Kumsuh-in Aaron gapuiyin, Thempu hole mipi hon vang tho khel a eihinjot lut thei lou diu ahi, achutilou le talen kamatsah lo diu ahi,” ati.

25 Mose akumsuh-in, Pakai thusei chengse chu mipi agaseipeh tai.


Leave a Reply

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>