DANIEL THEMGAO LEKHABU

Thupatna

Daniel Themgao lekhabu hi Israelten namdang leng khat noiya genthei hesoh nasa tah athoh laiyuva kijih ahi. Lekha jih pan ama khanga amite tilkhounan tekah thusim le Themgao thilmua mu kinei ho mang chan asunin, namdang lengpa hunei tah vaihomna Pathenin asuhbeiya amite vai neina atundoh ding atilkhouvin ahi.

Daniel Themgao lekhabu hi nin akikhen theiye;

• Daniel le asoh chanpi aloi ho, Pathen tahsan le athu nit jal’a amelmateu ajosah diuva kinem ho thusim. Athusim ho hi Babylon gam le Persia gam lengvai nei laiya kisun ahi.
• Daniel’in Themgao thilmua amu ho aban ban a, athilmu hon mit mu theiya vannoi leng vai neina ho mangsuh ding, Babylon lenggam a pat, namdang lengvai po misugentheipa bei ding le akhonna Pathen mite galjo ding thu akiseiye.

Asung thu hopkhen

Daniel le aloite 1:1-6:28

• Sahem li 7:1-28
• Kelngoichal le kelchal 8:1-9:27
• Van a kon thangkou 10:1-11:45

12:1-13

DANIEL BUNG 1

DANIEL LE ALOITE THUSIM

(1:1-6:28)

Nebuchadnezzar inpia gollhang ho

1 Judah lengpa Jehoiakim lengvaipoh kal kum thum nan Babylon lengpa Nebuchadnezzarin Jerusalem khopi ahindel khumin, aumchahsoh tai.

2 Ama hi Pakaiyin Jehoiakim lengpa amatsah-in, Houin gou kikhol phabep apoh mangsah tai. Nebuchadnezzarin Judah mi phabep Babylon gam doi Houin lhacha din gal-hingin akaiye. Chule Houin gou achomdoh ho chu ama doiphung houina akoiyin ahi.

3 Nebuchadnezzar lengpan avaibol pipu, nukiso Ashpenaz hi sohchang Israel leng insung mite le mi haosate insung mite lah a kona gollhang phabep lhengdoh din ahil’e.

4 Gollhang ho chu mel-hoi tah, chihna nei, kichuhna neisa, ima kihil themloi thei mi, tahsa nolnabei, leng inpia lhacha pang thei hi diu ahi. Amaho hi Ashpenaz hin Babylon pao sim thei le jih theiya ahil diu ahi.

5 Lhendoh miho hin niseh le leng inkote neh tobang nea don dinga lengpan thu apeh ahi. Hitia hi kumthum akichuh joutengu le lengpa angsunga ding cheh ding ahiuve.

6 Lhendoh lah a hin Daniel, Hananiah, Mishael chule Azariah apangun, abonchauvin Judah phunga mi jeng ahiuve.

7 Vaibol pipu pan amaho hi minthah avon-Belteshazzar, Shadrach, Meshach chule Abednego asah-e.

8 Daniel hin lengpa neh le chah tuitah tah neh a don a kisuh boh louna ding angaiton, Ashpenaz hin apanpi din ajol’in,

9 apanpi theina din Pathen in Ashpenaz lunga Daniel voujang natpehna apei.

10 Ahivangin Ashpenaz hin lengpa akichan Daniel jah a, “Lengpan naneh diu, nadon diu gongtohsoh ta, gollhang dang bangin thao da le chun eitha lo ding ahi,” ati.

11 Daniel jong Ashpenazin amaho vengtup dia akoipa le aloite thum ho koma achen,

12 “Keiho me din anche louhing mai mai neipeuvin, nisom sungin neiveuvin.

13 Chutah le leng inpia neh le chah nea jutui tui don ho-gollhang ho khutoh nei vetkah-un, dih nasah bangin neibol jengun,” ati.

14 Avetup’uva pangpa jong anomin, nisom sunga vet din aumsah tai.

15 Nisom lhin phat’in amaho chu leng inpia neh le chah nea don ho sangin hoijo damjon akimu’ve.

16 Hichea pat hin avetup pauvin lengpa peh neh le chah sangin anche louhing mai mai amesah tai.

17 Gollhang li chu Pathenin hetna le lekha themna chule chihgilna apei. Achung chonin Daniel chu Themgao thilmu ledoh theina le mang letheina apen ahi.

18 Lengpa teppeh kum thum lhin phat’in, Ashpenazin gollhang ho chu Nebuchadnezzar angsunga apui luttai.

19 Lengpan gollhang ho akihoupi soh keile Daniel le Hananiah, Mishael chule Azariah adeipentai. Hiti hin amaho li hi leng inpi sunga mi khat’in asimtan ahi.

20 Lengpan itobang thil hahsa le thudoh dong jongle, alenggam pumpia phunsan jouse le mitpheldoi them jouse sangin, hiche gollhang li ho hin ajat som chenga themjon aseipeh theiyui.

21 Persia lengpa Cyrus-in Babylon gam alah chan geiyin Daniel hi Babylon leng inpia aum jing tai.

DANIEL BUNG 2

Nebuchadnezzar mang

1 Leng achan kal kum ni nan Nebuchadnezzarin mang aneiyin, alung gimpi behseh jal’in ihmu mon aumlo tai.

2 Hijeh chun amang ledoh peh din phunsan themho, mitpheldoi themho, ailhim themho chule ahsi umdol hethem ho kou din mi asoltai. Ahung phat’un amaho hi lengpa anga adingtauve.

3 Ajah-uva lengpan, “Mang khat kaneiyin, kalung gimpi lheh tai; ipi kiseina ahiding kahetdoh nom lheh jenge,” ati.

4 Amahon Aramea paovin, “Lengpa hingsot’in! Namang neihil’un keihon hilchen nauvinge,” atiuve.

5 Lengpan ajah-uva, “Kasei hi thon ngailou ahi-kamang hi abang banga naseidoh-uva chule ipi kiseina ahijong naledoh tha diu ahi. Hiche hi nabol thei louvu le natel nadah a kajen’uva, na-in jouseu acheng bei in-gem a kijam ding ahi.

6 Kamang naseidoh theiyuva ipi kiseina ahijong naledoh theiyuva ipi kiseina ahijong nalehdoh thei vangule thepman tampi peuving ting, ginle japen a kakoi ding nahiuve. Tun kamang chu itobang hiya, ipi kiseina ham seidoh-un hilchen loiyun!” ati.

7 Amahon lengpa jah a, “Lengpan mang chu neiseipeh pou pou leu chun ipi kiseina keihon hilchen tauving,” ati kit’ui.

8 Hichun lengpa a-eojah jengin, “Kagel bangbep nahiuve ong! Kaseisa khel ngailou kahi nahet jeh-uva phat sot sotna ding nagel’u hiya hime!

9 Mang hi naseidoh dauva ipi kiseina ahi naledoh thei lou pou pouvu le kibang cheh a talen kapeh ding nahiuve. Phatsot sot teng kalung kakhel ding kineppia kihoutoh a jouthu jenga neikihoupiu ahi. Kamang chu ipi ahi seidoh tang um! Chutile nale thei diu jong kahet ding ahi!” ati.

10 Thumop a pang hon lengpa jah a, “Lengpan nahetnom seidoh chu leiset pumpi chunga hin koima cha umponte. Leng itobang hihen, thahat tah, leng loupipenin jong hitobang thil hi aphunsan ho hihen, mitpheldoi themho hihen, ahsi umdol hethemho hileh-koima adong ngapoi.

11 Lengpan nadoh hi ahahsa behseh jengin, mihem lah a cheng lou pathente ahi-ngal loule, koiman boldoh theiponte,” atiuve.

12 Hitah chun lengpa alung hang behseh jengtan, Babylon gamsunga leng inpi thumop them jouse thagam din aseitai.

13 Hiti hin thumo them jouse tha din thu alhutan, hiche lah a hin Daniel le aloite jong apangtauve.

Lengpa mang ipi ahi Pathenin Daniel ahil

14 Mithat dia anganse, lengpa ventup sepai lamkaipa Arioch koma hin Daniel achen, sei ding thu kigel toh dim demin agalut’e.

15 Aman hitobanga lengpan thu hahsa tah alhuhsah jeng thudol chu Arioch hi agadongtai. Arioch hin thilsoh umchan abonchan Daniei aseipeh-in ahi.

16 Daniel jong achepai jengin, phat chom khat angauva aman lengpa mang chu ipi kiseina ahi ahil chet din leng inpia konin phalna agaladoh tai.

17 Hichun Daniel a-in lama achen, aloite-Hananiah, Mishael, chule Azariah chu thilsoh chengse agaseipeh tai.

18 Ajah-uva van Pathenin selguh mang chu ipi hiya ipi kiseina ahi ahilchet’uva, Babylon gamsunga mithem miching ho to akitha tha louna diuva tao jing din aseiye.

19 Hiche janle le hin mang selguh chu Daniel koma gaochanna konin akiseidoh tan, hijeh chun aman jong Pathen vahchoi nan la asan:

20 “Pathen ching le thanei tah, tonsot tonsot’in vahchoiyin um hen!

21 Pathenin phat le nikho, kum le lha akhel’in, Leng le lal pansah le haisah Ama ahi! Chihna le hetna jong Ama a hung kon ma ahi.

22 Giltah a kisei thilguh aphongdoh-in, Muthima kisel geiyin ahen, Ama vang khovah a um ahi.

23 Vo kapu kapate Pathen, Nang kavahchoiyin kathangvah-e! Chihna le thahat neipen, Kataona ngaiyin-lengpa kaseipeh ding neihil tai,” ati.

Lengpa mang Daniel’in aseidoh a ahilchet

24 Leng inpia thumo themho that dia lengpan anganse Arioch henga chun Daniel achen, ajah a, “Thumop themho chu that hih laiyin, lengpa koma neipuijon, ken amang chu seidoh ing ting ipi kiseina ahijong hilchen inge,” agate.

25 Arioch chun Daniel hi Nebuchadnezzar lengpa angsunga apuilut pai jengin, ajah a, “Vo lengpa, Judah mi sohchang khat kagamudoh-in, hichepa hin namang chu seidoh-in tin hilchen theiyinte,” ati.

26 Hichun lengpan, Belteshazzar jong kiti ji, Daniel jah a hin, “Ipi mang kaneiya ipi kiseina ahi neiseipeh thei mong ding ham?” ati.

27 Daniel’in, “Vo lengpa, ahsi umdol hetthem ho hihen mitpheldoi them ho hile, phunsan them ho jong chule ailhim themho geiyin jong hiche mang hi naseipeh thei louvu ahitai.

28 Amavang Pathen khatseh van a aumin, selguh thil jouse aphongdohjie. Hiche Pathen hin lengpa hi khonung thilsoh ding navetsah ahi. Tun na-ihmut pet’a mang nanei chu seipeh inge.

29 “Vo lengpa, na-ihmut chun khonung thilsoh ding namang mat’in, selguh thil jouse phongdohji Pathen khonung thilsoh ding navetsah tai.

30 Tun hiche selguh thil hi kei koma aphongdoh tai; midang sanga kachihjoh man vang ahipon, lengpan naming chu ipi kiseina ahi nahetdoha, nahenga kisei lunggel chu nahet khenna dia aboljoh ahibouve.

31 “Vo lengpa, namang chun namasanga milim lentah khat ding namui, avah pempum jengin, vetngam ngam jong ahipoi.

32 Aluchang sana thengsel ahin, a-omlhangle abanjangte ni dangka ahin, akongjang le atobuh chengse sum-eng,

33 akengte ni thih, chule akengphangte ni thih le tong akengphangte ni thih le tong kihal ahi.

34 Navet pet tah chun mihem bol hilouvin songkol’a konin songtum lentah khat ahung kikal lhan, milim kengphangte ni, thih le tong kihal laitah chu aseleh, milim chu akithecheh hel jenge.

35 Chutah chun thih jong, tong jong, sum-eng jong, dangka jong, chule sana geiyin achip lhasoh hel tan, nipi lai changphol’a leivui kithe bang bep ahin, huiyin alhoh mangin, ahalsi cha jong akimudoh jou tapoi. Songtum vang chu akhang khangin molvum tejen ahin, leiset pumpi achutai.

36 “Namang chu hiti ahin, tun ipi kiseina ahi lengpa naseipeh inge.

37 Vo lengpa, leng jouse sanga loupi pen nahin, van Pathenin kumpipaa nasem a, thahat thuseina jouse le jabolna napeh ahitai.

38 Aman vannoi leiset namtin chunga vaihoma napansah a, ju le va ganhing namkim chunga thuneiya nakoi ahi. Milim luchang sana lai chu nang nahi.

39 Nang jou teng lenggam khat hung umkit’in tin, nang lenggam te vang hiponte, aban a lenggam thum chan hintin, alenggam chu sum-eng to tekah hintin, leiset pumpi vaihoma pang ding ahi.

40 Chujou teng lenggam li lhin na hintin, thih lhouva lhou ding, thih-in asuh khah khah akejeng jung bang, hiche lenggam hin lenggam masa chengse chu keh jeng junga ahalsi sia alensah ding ahi.

41 Milim kengphangte ni thih le tong kihal jong namun, hiche hin lenggam nukhah kipun khom mohel ding aseina ahi. Thih lhouva jong lhou mai ding ahi, ajeh chu thih le tong kihal ahi.

42 Akeng jung ho thih le tong kihal hin chuche lenggam abang bang kom hat’a, abang kom lhasam ding thu aseidoh ahi.

43 Thih le tong kihal jong namui. Hiche hin avaihompan namchom chom insung chom kichensah a kipum khatsah ding agot ding dol asei ahin, hinla thih le tong kihal lhop mohel banga, amaho ong kipum khat thei deh lou diu ahi.

44 Hiche vaihomho khanga hi van Pathenin beitih neilou hel ding Lenggam khat aphudoh ding ahi. Koiman gal’a ajo jou louhel ding, amajoh hin lenggam dang jouse asuhgam hel’a atonsot’a umden jing ding ahitai.

45 Mihem bol louhel’a songkol’a kona songtum hung kitang lha thih le sum-eng, tong le dangka chule sana kihal milim asejal jeng chu namui. Hichea hi Pathen loupi tah chun khonung thilsoh ding lengpa naseipeh ahi. Namang banga kaseidoh a, ipi kiseina jong kihilchet ahitai,” ati.

Lengpan Daniel kipaman apeh

46 Chutah chun lengpa abohkhup jengin, Daniel houna dia kilhaina ho le thilto tampi bol ding thu apetai.

47 Lengpan Daniel jah a, “Nang Pathen hi pathente Pathen, leng jouse Pakai, selguh thil jouse phongdoh thei ahi. HIche selguh thil naledoh thei jal’a kahetdoh ahi,” ati.

48 Chule lengpan Daniel chu panmun lentah apansah-in, thilpeh jong tampi apen, Babylon gam pumpi apohsah-in, leng inpia thumop chengse lamkaiyin akoitai.

49 Daniel ngehna jal’in Shadrach, Meshach chule Abednego chu lengpan Babylon gam thudol pou pouva thu neiyin apansah tai; Daniel vang leng inpia aumdentan ahi.

DANIEL BUNG 3

Nebuchadnezzarin sana milimdoi miho housah agot

1 Nebuchadnezzar lengpan sana milim, adung metre som ni le sagai, avai metre thum lhingdeh khat asemsah-in, Babylon gamsung Dura phaiya atunge.

2 Nebuchadnezzar lengpan mi asol’in, amilim tuhdoh thensona pang din gamsung vaihom thunei ho, miching mithemte, lamkaiho, gamvaipo ho, leng thumop ho, neiching ho, thutan vaihomte, thutana pang ho, abonchauvin agakhopsah soh keiyin ahi.

3 Vaihom thunei ho le adang dang akimsoh phat’un, Nebuchadnezzar milim tundoh katdohna din milim maiya ading tauve.

4 Hichun mi khat’in lhang asamin, “He namtin vaipi, chitin namtin, paotin paotanga kon!

5 Saki kimut gin le theile gin, semjang kisai le gosem gin, selangdah le baja chule tumging thei dang dang gin najah tengule hiche sana milim, Nebuchadnezzar lengpa tundoh hi chibai naboh soh kei diu ahi.

6 Bohkhup a chibai boh lou chengse vang chu apet pet’a meilhum deoje ju sunga kileh lut jeng ding ahi,” ai.

7 Hiti chun tumgin thei ho gin ajah phat’un namtin vaipio, chitin namtin, paotin tanga kon miten bohkhup’in, Nebuchadnezzar tundoh sana milimdoi chu chibai aboh tauve.

Daniel loite thum mo apeh-u

8 Hiche phat kitup laicha hi mang chan Babylon miten Judah miho aheh setauve.

9 Amahon lengpa Nebuchadnezzar jah a, “Vo lengpa hingsot’in!

10 Tumging ho kisuh ging ging le mitin bohkhup’a milimdoi hou cheh dia langpan thu napeh ahin,

11 chutia bohkhup’a chibai boh louse se chu meilhum deoje ju sunga lelut jeng dia nasei ahi.

12 Babylon gamsung potup dia lengpan nakoi Judah mi-Shadrach, Meshach chule Abednegon vang sei ngai louvin nathupeh apalkeh tauve. Napathen la ahoupouvin, namilim tundoh jong chibai boh din abohkhup pouve,” tin ahehsetauvin ahi.

13 Chutah chun lengpa alung hang behseh jengin, mi thum ho gakailut loi din mi asoltai.

14 Ahung phat’un ajah-uva, “Shadrach, Meschach, chule Abednego, ka-pathen nahou dauva, katundohsa sana milimdoi maasnga bohkhup lou mong nahiuvem?

15 Tua hi saki kimutgin le theile gin, semjang kisai gin, selangdah gin, baja gin, gosem gin chule tumging thei dang dang gin najah tengule bohkhup’a milimdoi khu chibai naboh diu ahi. Chibai naboh louvu le apet pet’a meilhum deuje ju sunga nakileh lut jeng diu ahi. Nahuhdoh jou diu itobang Pathem um am?” ati.

16 Shadrach le Meschah chule Abednegon adonbut’un, “Vo lengpa kaki hon na kasei louvu akhohpoi.

17 Alhacha kapanu Pathen chun meilhum deije jua kon le nang lunghanna eihuhdoh nomu le eihuh nauvinte.

18 Amavang eihuhdoh hih-u jongle na-pathen jong kahou lou diu, sana milimdoi natundoh masanga jong kabohkhup deh lou diu ahi lengpan neihet peh-uvin,” atiuve.

Daniel loite thum thi dia thu atan’u

19 Nebuchadnezzar chu alunghang behseh jengin amai thilhang sanin asanin, Shadrach le Meshach chule Abednego chu ave changmel’e. Hijeh chun amiten meilhum chu angaiya kito-al sang a ajat sangi jen a hu neiya ato-am diuvin thu apetai.

20 Chuin asepaite lah a ahatpen loi chun amaho thum chu akanchah-uva meilhum deije ju sunga alelut diuvin aseitai.

21 Mihatten Shadrach le Meshach chule Abednego chu akan’un, aponsil, asangkhol, alukhuh chule avon dang jouse lhingin avonpeh-un meilhum deoje ju sunga aleh luttauve.

22 Meilhum sung chu hasat tah a satsah dinga lengpan thu apeh jeh-in, amaho leh lut dia nganse sepai ho geiyin meiyin asang gep dentai.

23 Shadrach le Meshach chule Abednego chu akikan chah pumin meilhum deoje ju lailung tah a alha lut tauvin ahi.

24 Ahinla Nebuchadnezzar lengpa akinlih leo jengin akipatdoh-in avaibolte adongin, “Mi thum ho chu isom tum’uva meilhum deoje ju sunga ilelut’u hilou ham?” ati. Vaibolten, “Chutia ibol’u ahinai, Lengpa,” atiuve.

25 “Itia ba meilhum sunga khu mi li theinop a vah le kamu ham? Amaho khula kanlou ahiuvin, chuma le meisahul danin jong aumpouvin, alah-uva ali channa pa ma khu Pathen lim danin akimu,” ati.

Mi thumho lhadoh a panmu kalsah

26 Nebuchadnezzar chu meilhum deoje ju kotpi phung lama alhai touvin, “Shadrach! Meschach! Abednego! Pathen chungnungpen lhacha ho! Hungdoh loiyun!” tin asamtai. Amaho jong ahungdoh pai jengui.

27 Hichun vaihom thunei ho lemiching mithemte, lamkaiho, gamvaipo ho, chule lengpa thumop a pang ho le adang dang ahung kikhom’un, meikouvin a-imacha jong aleopop lou mi thum ho chu aveuve. Asamjangu la aleogep pon, aponsil’u jong a kapon, achunguva meivui gim nam jong akijapoi.

28 Lengpan la, “Shadrach le Meshach chule Abednego Pathen chu vahchoiyin um jing hen! Ama tahsan a akinbol hicheng mi thum ho hi Avantil sol’in ahung huhdoh tai. A-Pathenu bou houva pathen dang hou louna din kei thupeh thin gam hel’in anapal keh jengui.

29 “Tua vang hitia thu kapeh ahitai-koi itobang nam a kon itobang chilhah, chule ipi pao tho mihem lah a kon hileh, Shadrach le Meshach chule Abednego Pathen nahsahmoa bol jouse chu atel adah a kijan a a-in alou kksumang ding ahi. Hitobanga mi huhdoh thei ding pathen dang aumpoi,” ati.

30 Chuin lengpan Shadrach le Meshach chule Abednego chu apanmun jong akalsah-in Babylon gampon akoitai.

DANIEL BUNG 4

Nebuchadnezzar mang nina

1 Nebuchadnezzar lengpan vannoi leiset chitin namtin le paotin tanga mite henga thu athot’in: “Japi salam!

2 Loupipen Pathen in eivetsah datmo thil kidang thusim hi ngaiyuvin.

3 “Pathenin eivetsah-u thil kidang ho hi, Itobanga loupi hi tam! Thil kidang aboldoh ho huneije akidange! Pathen chu tonsot leng hintin, Akhang khanga vaihom jing ding ahi.

4 “Kaleng inpia lung mongtah-in kachengin, nei le gou kahaovin nom kasai.

5 Ahivangin ka-ihmut lanin tijat umtah mang kaneiyin, kichat chat um mu kaneiye.

6 Hiche mang chu ipi kiseina ahi ding hilchen din Babylon gama thumop them jouse kakoma hinpuikhom din thu kapei.

7 Hijeh chun phunsan themho le mitpheldoi them ho, ailhim themho le ahsi umdol hethemho ahinpuikhom’un, kamang kasei vangin ahilchen theipouve.

8 Hichun ka-pathen min kiputsah a Belteshazzar kiti Daniel chu ahung lut’e. Amahi pathen theng ho lhagaovin aumpin, kenjong kamang chu kaseipeh tai. Ajah a kaseiyin,

9 Phunsan lamkaipu Belteshazzar, pathen theng ho lhagaovin naumpi kahei, nangin selguh thil jouse nahekhen theiye. Kamang chu hiche hi ahi, ipi kiseina ham hilchenin.

10 “Ka-ihmut le mu kaneiyin, leiset lailung a thingphung lentah khat kamui.

11 Thingphung chu akhang khang jengin, vanthamjol anol’a, vannoi pumpia mitinin amu thei geiyin akhang’e.

12 Athingna jong ahoiyin, agan aloi nem jeng, vannoi kivahna khopset ahi. Alim noiya gamsate ageh-in, abah dung jouse a vachaten bu asan, ganhing namkimin aga chengse kivahnan aneiyui.

13 “Mu kanei hi kagel pettah-in van a konin Vantil khat ahung leng lhan, alip’in atangsa geh-e.

14 Vantil hin osangtah-in asamin, ‘Thingphung hi phuh lhu’vin, abah chengse lham’un, ana jouse le aga chengse lou lhauvin. Alim noiya gamsa jouse nodoh-un, abah dunga vachate deljam’un.

15 Akungbul vang hoiyun, thih khaovin hen’un, sum-engin tom’un. Hiti chun hampa jing lah a dalhatauvin. ” ‘Mipa chu daitwiyin chap hen lang, hampa louhing lah a gamsate to chengkhom hen.

16 Kum sagi lhung keiya mihem lungput aput lou ding, sahem lungthim bou anei ding ahi.

17 Lip tah a tangsa geh Vantil chun hitia agel ahi. Hiti ahijeh hin muntin a cheng mitinin heu hen, mihem lenggam jouse chunga thanei chu Hatchungnung Pathen ahin, lenggam ho chu adei dei apeh thei ahi, ima cha loupa jeng jong apehtheiye,’ tin aseiye.

18 “Kei Nebuchadnezzar lengpa mang chu hiche chu ahi. Vo Belteshazzar, ipi kiseina ahi neihil chenin; ajeh chu leng inpia thumop koima ahilchen theiya aumlou ahitan, Pathen theng ho lhagaovin naumpi jal’a nangin vang nahilchet tei ding ahi,” ati.

Daniel’in mang ahilchet

19 Hiche phat hin Belteshazzar jong kitiji, Daniel chu atija jah jengin imacha jong asei ngam tapoi. Ahivangin lengpan ajah a, “Belteshazzar, hiche mang hi nang thudol hilouva namelmate thudol hile kati lhehjenge!

20 Thingphung sangtah, vanthamjol nol leo jeng, vannoi mitin muthei,

21 athingna jong hoitah, aga jeng jong vannoi vah khopsetna ahi. Anoiya gamsate ageh-un, abah dunga vacha ageh-uvin ahi.

22 “Vo lengpa, hiche thingphung sangtah le hunei tah chu nang nahi. Nakhangtou behseh jengin vanthamjol naphatan, nathahat vannoi khokhongsoh ahitai.

23 Lengpan navet vet pet tah chun van a konin Vantil khat ahung kum lhan, ‘Thingphung hi phuh lhu’vin sumanguvin, tol’a akungbul vang hoiyun. Thih khaovin, chule hampa hing lah a hoiden tauvin. Mipa hi go le daitwi douvin, kum sagi sungin gamsa lah a chengden hen,’ tia asei najai.

24 “Vo lengpa, hiche manga hi Hatchungnung Pathenin nachunga thilsoh ding jouse aphondoh ahitai.

25 Mihem lah a konin kino mangin natin, gamsate to nachenkhom ding ahi. Kum sagi sunga bongchal banga hampa louhing nea, tollhanga nage ding, go le daitwi douva um ding nahi. Hichea hi mihem lenggam jouse Hatchungnung Pathen thusah a um ahidol hen natin, alung dei dei apeh theidol jong hedoh tan nate.

26 Vantilten kungbul chu tol’a hoiden din aseiyun; hiche hin aseidoh chu-vannoi pumpi Pathenin athu thua aaumsah nahetdoh teng leng nahi kit ding aseina ahi.

27 Hiti ahijeh chun kathumop ngaiyin lengpa! Chonset boldan, thildih boljon, vaicha gentheite khoton. Chutile naphat thei joh ding ahi,” ati.

28 Abonchan Nebuchadnezzar lengpa chunga ahung lhungsoh keiye.

29 Lha som le lha ni nungin, Babylon gam leng inpi chunga avah len,

30 “Veuvin Babylon khopi loupi dan! Kathahat kathuneina, kaleng loupina phondoh khopi len ahi!” ati.

31 Athusei achaisoh masangin van a konin o khat’in, “Kasei ngaiyin Nebuchadnezzar lengpa! Naleng thahat akilamangtai.

32 Mihem lah a konin kino mang-in natin, kum sagi sunga gamsate lah a nachen a, bongchal banga hampa lou hing naneh ding ahi. Chutah le Hatchungnung Pathen hin mihem lenggam jouse chunga thu aneiya, Aman apeh nom chu lenggam chu apeh thei hedoh tan nate,” ati.

33 Thu kisei chu aguilhung pai jengin, Nebuchadnezzar chu mihem lah a konin ano mangtauvin, bongchal bangin hampa louhing bou anetai. Go le daitwi douvin aumin, asam la muvanlai lhaving chan aphan, atin ho jong mutin chan cheng aphai.

Nebuchadnezzarin Pathen avahchoi

34 “Kum sagi nungin van lam kavet le kalimdoh tan, Hatchungnung Pathen vahchoi le choi-at thon, tonsot’a abang hijing chu jabolna le loupina pen kaseiye. Aman tonsot’in vaihomin tin, Alenggam beitih neilou ding ahi.

35 Leiset mihemte thupin agelpon, Van a Vantilte le leiset mihemte athu noiya um ahiuve. Alungdei sutanga Athilbol phoh tang ding aumpoi.

36 “Kalimdoh phat hin jabolna le kalalna, kalenggam loupina kachang kittai. Kavibolte le kamilen kamilalten eina lamtouvin, kaleng thaneina eipe kit’un, masanga sanga loupijon eibol’uve.

37 “Tun kei Nebuchanezzar hin Van Pathen chu vahchoi le choi-at thon, loupi tah-in kaboltai. Abolchan adih cheh-in, kiletsah jouse asunem theiye,” tin kaseiye.

DANIEL BUNG 5

Belshazzar golvah

1 Jan khat hi Belshazzar lengpan milen milal sang khat jen golvah abolpin, ju adonkhom’uve.

2 Ajudon laiyun Belshazzar lengpan jong, Jersalem Houin a kona apa Nebuchadnezzarin ahinpoh mang sana le dangka khon agalahsah-e. Hiche khonho hi amilen amilalte le ajite chule athaikem ho to judonna nei dia lengpan agalahsah ahi.

3 Apet pet hin sana khon le dangka khon ho hi ahinchoi lut’un, amahon judon nan amangun,

4 Sana le dangka, sum-eng, thih, thing chule songa kisem milimdoi ho thang-atnan aneipantauve.

5 Phot lot louvin mihem khutphang khat ahung kilah-in, leng inpi bang kiloijol, thaomei vah-in ahasal laitah a chun lekhajem ahinjih-in  ajih chu lengpan jong amutai.

6 Lengpa la amai dup lha tan, akicha behseh jengin akhupbuh teni geiyin akithing thing jengtai.

7 Apengjah jengin, mitpheldoi them ho, chule ahsi umdol hethemho kou din mi asoltai. Ahung lut phat’un lengpan ajah-uva, “Koi hijongle hiche lekhajem kisun simtheiya, ipi kiseina ahi ledoh theipen pen chu leng ponsandup loupi kisilpeh a, jabolna sana khivui ki-o peh ding, lenggam sunga thaneipen thum lhinna pang ding ahi,” ati.

8 Chutah chun leng inpia thumop them chengsen ahin nailut’un, ahivanginasim theiya la aumpouvin, ipi kiseina ahi lengpa seipeh thei jong aumpouve.

9 Alung gim behseh phat’in amai adup cheh tan, amilen amilalten la ibolje isahje jong ahetapouve.

10 Lengpa le amilen amilalte eolei loi chu lengpa nun ajah doh phat’in golvahna indan sunga ahung luttai. Aman, “Vo lengpa hingsot’in! Hibanga maidup leo hin lung gim bol hih beh-in!

11 Nalenggam sunga hin pathen thengte lhagao vop mi khat aumin, napa leng khang laiyin jong amahin lungthim pha le hetna, pathente chihna tobang ana neiye. Napa Nebuchadnezzar lengpan ama hi phunsan ho le mipheldoi them ho, ailhim them ho le ahsi umdol hethemho lamkai pipua anatun ahi.

12 Amahin chihna lamdangtah aneiyin, mang lethemna, thu tekah suhtoje themna, selguh thil hilchet themna aneiye; hiche Daniel, lengpan Belteshazzar asah pa chu gakousah-in, aman hicheng hi ipi kiseina ahi hilchen nante,” ati.

Banga lekha kisun Daniel’in ahilchet

13 Apettah-in Daniel chu lengpa masanga agapuilut’un, lengpan ajah a, “Judah gama kapan Judah mi sohchanga ahinkailut Daniel kit chu nang nahim?

14 Pathen thengte lhagaovin naumpia nathilbol theije le ima nahetthem dol chule nachihna kisei kanajai.

15 Thumop themho le mitpheldoi themho, hiche lekha kisun hi sim a ipi kiseina ahi hilchen din ahinpuiyun, amahon ipi kiseina ahiding akholdoh joupouve.

16 Kajah dol’in nang hin thil ki-im ho le selguh thil ho nahilchen theiye. Hiche lekha kisun hi nasim theiya, ipi kiseina ahi naseidoh thei le, leng ponsan loupi nakisilpeh a, jabolna sana khivui naki-o ding, lenggam sunga thaneipen lah a thum lhina napan ding ahi,” ati.

17 Daniel chun adonbut’in, “Neipeh nom thil chu kikoitan, ahiloule adang khattou petan. Lekha kisun chu lengpa din simpeh ing ting, ipi kiseina ahijong seipeh nange.

18 “Hatchungnung Pathenin napa Nebuchadnezzar chu leng loupi tah ahisah-in, gunchena le leng loupina apei.

19 Aloupi lheh jengin, namtin vaipi, chitin namtin, paotin paotang min agingin akihot lhul’ui. Athanom nom athat’in ahinghoi nom chan ahinghoiye. Ajabolnompa ajabol’a avettom nompa avet tom ahi.

20 Ama vang ahung kiletsah a lungtah le gitlou atho phat’in alaltouna konin aloi lhan, mi noisen aumdoh tai.

21 Mihem lah a konin anomangin, alungput jong sahem lungthim asohtai. Sa-ngante lah a aumin, bongchal bangin hampa louhing anen, lim belding neilouvin tollhanga gotwi daitwi douvin alumjin ahi. Akhonna kheh-in Hatchungnung Pathenin mihem lenggam jouse athu thua aheiya, apehnom nom apeh ahedohtai.

22 “Ahinla nang achapan thil hijat hi nahet vangin nakineosah nompoi.

23 Van Pakai dounan nachonin, Houin a kichomdoh khonho chu nagalahsah-in, nangle namilen namilalte, najite le nathaikem hon judon nan namangun, kho helou, kho jalou, kho mulou-sana le dangka, sum-eng, thih, thing le song a kisemthu doi ho vahchoi nan naneiyui. Hiti hin nahinsah nathisah thei, thil ijakai athu thua hei thei Pathen joh nagingpoi.

24 Hijeh a chu hiche thucheng ho sun dinga hi Pathenin hiche khut hi ahinsol ahi.

25 “Akisunsa hi hiche ahi: ‘Kisim, kisim, kitetoh, kihomkhen,’ kiti ahi.

26 Aledohna chu: Akisim kiti hin-Pathenin nalenggam beina ding nikho simtohsan akoi tan,

27 tetohsa kiti hin-thiltena nakilep leh najang valtai,

28 kihomkhen kiti hin-nalenggam hi kihomkhen a Mede mite leh Persia mite kipedoh ahitai, tina ahi,” ati.

29 Apettah hin Belshazzarin Daniel chu leng ponsandup loupi tah silpeh a, jabolna sana khivui opeh loi din asohte asoltai. Hiti hin alenggam sunga thaneipen thum lhin nan akoitai.

30 Hiche janle le hin Babylon lengpa Belshazzar chu min athat’in,

31 Mede mi Darius chun kum somgup le ni alhinin leng thaneina alai.

DANIEL BUNG 6

Sakei kokhuh a Daniel

1 Darius hin agamsung pumpia vaihom din gamvaipo jakhat le som ni pansah agoi.

2 Hicheng chunga hin gamvaipote tohje hil ding chule lengpa dei bol din Daniel le midang ni alhenge.

3 Natohje hiltoh a pang ni le gamvaipo ho sanga Daniel thil bol themjohna akilange. Tohje athep behseh jeh hin lengpan lenggam pumpia natohdol vetup dia koi din ageltai.

4 Chuphat’in tohje hiltoh dang te ni le gamvaipohon gamsunga Daniel vaihomna athepmona khat holdoh ago’uvin, mu la amudoh joupouve; ajeh chu Daniel hi son umtah, thil dihmo bol lou, lepche lou ahi.

5 Adangho khat le khat akihouvun, “Ahou thudol tilouvin, thildang imachaa Daniel themmona kiholdoh ponte,” akitiuve.

6 Hiti hin lengpa kimutopin acheuvin ajah a, “Vo lengpa Darius, hingsot’in lengpa!

7 Nalenggam sunga vaibol keiho kabonchauvin-natohje hilte ni ahin, gamvaipo ho kahiuvin, chule gamvaipo ho thumop ho geiyin, lengpan Dan khat nasemdoh a khoh tah a neijuisah diuvin kakinopto tauve. Lengpa kom tilouva, nisom thum sunga koiman pathente kom hihen mihem kom hijongle thum le ngeh aneilou hel na din Dan semin. Hiche Dan sukeh pen pen chu sakei dimset khuh a kileh lut jeng hen.

8 Hijeh chun lengpan hiche Dan hi semin lang kikhut-henna bol khumin, kimang jing hen, Mede mite le Persia mite Dan khel theilouvin umdoh le, katiuve,” tin aseiyui.

9 Adan sem’un Darius lengpan kikhut-henna abol khumtai.

10 Hiche Dan chu lengpan kikhut-henna abol khum ahet phat’in Daniel inlama achen, a-indan chungnunga chun Jerusalem lam bangkot phabep akihonge. Hiche bangkot khat koma hin, abolngai bang bangin, ahongdoh-in, abohkhup’in, nikhat sungin Pathen henga thumvei ataove.

11 Pathen henga atao hi Daniel melmaten aching lhiuvin,

12 Daniel hehse din lengpa henga achetauve. Lengpa jah a, “Vo lengpa, nisom thum sunga hi nang kom tilouva, pathente kom hihen mihem kom hijongle koiman taona anei thei lou ding, abolpen pen sakei dimset khuh sunga lelut dinga thupeh khat kikhut-henna nabol khumsa ahitai,” atiuve. Lengpan jong, “Ahinai, Dan khoh tah, khelmo hel, Mede mite le Persia mite Dan a kisemdoh ahi,” ati.

13 Chuphat’in amahon lengpa jah a, “Judah gama hungkon sohchang Daniel khun lengpa nanahsah pon, nadan semsa jong ajuipoi. Niseh-in thumvei vei atao jing bouve,” atiuve.

14 Hiche hi ajah phat’in lengpa alung gim lheh jengin, Daniel huhdohna ding lampi hahol’in aholtai. Nilhum hel’in angaitoi.

15 Miho chu lengpa henga ahung kit’un ajah a, “Vo lengpa, nahet bangin lengpa kihut-hennasa Mede mite le Persia mite dan khat cha jong kikhel ngailou ahi,” atiuve.

16 Hijeh chun Daniel mat’a sakei dimset khuh sunga lelut din lengpan thu atantai. Aman Daniel jah a, “Kitah tah a akin nabol jing Pathen in nahuhdoh tei tei hen!” ati.

17 Koiman Daniel ahuhdoh thei louhelna din khuh kot chu songtumin asingun, lengpan aleng mohor anam khumin, amilen amilalten jong mohor anam khum’ui.

18 Lengpa leng inpia ahung kilen, neh le chah imacha tep louhel, jan khovah a ihmu mon aum tai.

19 Jingkah khovah lhah lhah-in lengpan kokhuh lam adel jel’in,

20 kokhuh aphah phat-in, ngaikham louvin, “Vo Daniel, hing jing Pathen lhacha! Kitah tah a akin nabol jing Pathen chun sakeihoa kona nahuhdoh hi nam?” ati.

21Daniel’in agah houvin, “Vo lengpa hingsot’in!

22 Pathenin Avantilte sakeite kam ahung sip sah-in eisuse pouve. Nang adih louva kabol loujeh a themmona bei kahi ahet jal’a Pathenin hitia chu abol ahi-lengpa!” ati.

23 Lengpa akipah behseh jengin, kokhuh sunga kona Daniel kaidoh loi din thu apetai. Akaidoh-un Pathen atahsan jal’a Daniel imacha atilou amudoh tauve.

24 Hichun Daniel hehse chengse mat din lengpan thu apen, amatdoh phat’un ajite achate chengseu pumin sakei dimset kokhuh sunga aleh lutsoh tauve. Kokhuh to agei masanguvin sakeiten aman tan’un agu achang achipgoi jenguve.

25 Chuphat’in Darius lengpan mitin vaipi le chitin namtin, paotin paotanga lekha athot’in: “Salam!

26 Kalenggam sunga chengsen Daniel Pathen nagin’uva najabol cheh diu ahi. Ama hi Pathen hing jing ahin, Tonsot’a vaihom ding ahi. Alenggam kisubei louhel ding Athahat beitih nei lou ding ahi.

27 Mi ahuhdoh jin ahuhhinge, Vanle leiya datmo thil kidang abol’e! Sakeiten athana diuva Daniel ahuhhing tai!” ati.

28 Darius le Cyrus lengvaipoh laisen Daniel akhangtou lheh jenge.

DANIEL BUNG 7 (BC 553?)

MU ANEI DANIEL’IN ASEI

(7:1-12:13)

Daniel’in sahem li amu

1 Babylon gama Belshazzar lengchan kal kum masapen kumin mang khat kaneiyin, janlai chun mu kaneiye. Kamang chu kajihdoh-in, chuche jan a kamu chu

2 hiche hi ahi: Jet le vei sah le lhanga konin hui anungin, Twikhanglen twi mai asem ling ling jenge.

3 Sahem lentah tah li Twikhanglena konin ahung potdoh-un, aliuvin achom cheh, kilo lou ahiuve.

4 Ahungdoh masa sahem chu sakei bahkai tobang muvanlai lhaving tobang nei ahi. Kamu pettah chun alhaving apul lhan, sahem chu adom’un mihem din bangin adinsah-ui. Chuin mihem lungthim tobang aputsah tauve.

5 Sahem nina chu savom tobang ahin, anungkengte nin adinge. Sa-nahgu thumjen apet’in, ogin khat hin, “Sa nadu jat jat nejengin!” ati.

6 Kavet pettah hin sahem chom khatam ahung kilah paiyin, lutnu tobang ahin, ahinla atungtun a vacha lhaving bangin lhaving li jen aneiye, chule lubuh li aneiyin ahi. Lengvai neina ama apetauve.

7 Kavet vet le sahem li channa ahung kilah kit’in, kidang tah le tijat kichat umtah ahi. Aha thih chalset sot chun ajo-tho cheng achipngem jengin, chule achil thangtai. Sahem dang tobang hilouvin ki som jen aneiye.

8 Datmo tah a aki ho kavet vet le, aki dang lah a chun ki neocha khat ahung dondoh kit’in ahi. Aki neocha hin aki luisa thum aheh lhai. Hiche ki hin mihem mit aneiyin, kiletsah tah kamsung aneiye.

Tonsot’a hing jing Pa kimudoh

9 Kamu pettah-in laltouna ho akido toh-in, tonsot’a hing jing Pa chu hiche laltouna ho khat’a hin atouve. Aponsil chu buhbang banin abangin, asam samul thengsel tobang ahin, alaltouna chu velkol lhehlah lah a kijem, meikou banga vahchansel sul jeng ahi.

10 Laltouna phunga konin meikou twilonin ahung longdoh-e. Akinbol lhachaa pang din mihem asang sang aum’un, samgsom sangja amasanga adinguve. Thupi tan akipantan, lekhabu ho aphongdoh tauve.

11 Kavet pettah hin hiche saki neocha hin kiletsah hoitho tah a thu asei kajan, kavet le sahem li lhinna chu athat tauve. Atahsa chu meilhuma aleh lut’un, akavamtai.

12 Sahem dang ho jong athahat asubei soh-un, ahivangin phat chom khat kah a hing din aphalpeh-ui.

13 Jan a hiche mu kanei pet hin Mihem tobang khat kamun, eihinjonin, meilhangin atomjol’in, tonsot’a hing jing Pa chu ajonin, akoma apuilut tauve.

14 Namtin vaipi, chitin namtin paotin paotangin ama kin abol chehna din thunei le jabolna chule leng thahat apetauve. Tonsot kumkhoa thanei ding ahitan, alenggam jong bei louhel ding ahitai.

Mu kinei ho hilchetna

15 Kathilmu ho hi katimul athou leuvin, kalung gimpi lheh-e.

6 Chukoma ding ho khat kajontouvin, eihilchet din ka-ngeh-e. Hijeh chun aman eihilchenin,

17 “Hiche sahem lentah tah li ho hi tu nung teng leiset chunga hung umdoh ding lenggam ahiuve.

18 Hatchungnung Pathen miten vang leng thaneina kisan’un tin, tonsot tonsot’a achin jing diu ahi,” ati.

19 Abanin, achom hel, tijat umtah sahem, atin sum-enga ajo-tho khotchen jenga, aha thih a chipngem jeng chu le kengtoa chilthang jeng thei, hiche sahem li lhinna thudol chu kahetbe nom in ahi.

20 Chule alukhuh a ki som jen aneiya, khonunga ki khat hung keh doh kit’a aki dang thum heh lha-hiche ho thudol jong chu kahetnomin ahi. Mit aneiyin, kiletsah hoithona kam aneiye. Hiche sahem hi adang ho sanga tijat kichat umtah ahi.

21 Kavet pettah hin hiche saki hin Pathen mite gal’in aboltan, jou jong ajoutai.

22 Chuin tonsot’a hing jing Pa chu ahungin, Hatchungnung Pathen mite chunga panpina thu aphongdoh tai! Pathen miten leng thahat akisanna diu phat ahung lhung tai.

23 Eihilchetna chu hiti hi ahi: “Sahem li lhinna hi leiset chunga lenggam li na hintin, lenggam dang jouse sanga jatchom hel ding ahi. Leiset pumpi asuhgep’a achil thang ding ahi.

24 Saki som hi hiche lenggam sunga vaihom ding leng som hi ding ahiuve. Chuteng leng chom khat hung kilah ding, ama chu leng masa ho sanga jatchom hel ding, lengthum jen ash mang ding ahi.

25 Amahin Hatchungnung Pathen douna thu aseiya, Pathen mite abolgim ding ahi. Ahou Danthuu le kut ho khel gontin, kumthum le akeh sunga Pathen mite athu noiya akoi ding ahi.

26 Chutah le van a laltouna thutanna mun a thutan ding touva, athaneina achu lhah ding, asuh beihel ding ahi.

27 Chule leiset chung lenggam thaneina le loupina jouse Hatchungnung Pathen mite kipe doh ding ahi. Aleng thanei nau beitih neita louhel ding, leiset vaihom thu neiten akin’u abol’uva athu’va nung ding ahiuve,” ati.

28 Hitia hi kichai ahitan, kakicha val tan, kamai adup’in, ijakai seidoh louvin ka-imchah tai.

DANIEL BUNG 8 (BC 551)

Daniel’in kelngoichal le kelcha amu

1 Belshazzar lengchan kal kum thum nan ani lhinna mu kaneiyin,

2 hiche mu kaneinaa hin hetman louhel’in Elam gamsunga Susa khopi kulpi sunga kana umkhai. Ulai vadung panga kana dingin,

3 vapanga hin kelngoichal, ki ni nei, aki khat saojep a thah khat kamui.

4 Kelngoichal hin aki te nia lhumlam, sahlam chule lhanglam adelkhumle kamun, asutangjou sahem khat cha le ajamdoh jouva abeihel’e. Anop peh-in achonin akithang-at lheh tai.

5 Ipi tina ahiding kalung gimpi pettah-in, lhumlama konin kelchal khat jangkhai vel’in ahung lhaiyin, akengton tol atoh khah lam kiheman lou khop’in akimui. Kelchal hin amit te ni kah a ki lentah khat bou aneiye.

6 Kelchal hin, vapanga ding jing nalai, kelgnoichal chu ajonin, athanei sunin adelkhum jenge.

7 Kelngoichal anokhum chu kavei. Alungna behseh jengin atajeng leh, aki te ni atat bongtai. Kelgnoichal hin anan lel phat’in tolsuhna aneiyin, achil thangin, agahuhdoh ding imacha aumtapoi.

8 Hichun kelchal hi akithang-at kit tan, akichoi sang laitah hin aki apul lha deltai. Aki lui ke-na mun a hin ki li jen ahung dohdoh-in, ki khat cheh-in lamchom cheh adoiye.

9 Ki li lah a hin ki neocha khat jong ahung dondoh-in, athaneina chu lhanglam le niso lam chule Tepna gam lama ajedoh-e.

10 Ahatbe cheh cheh-in, van loupina thaneina ho geiyin adoutan, ahsi phabep jong aloilhan, tol’a achil thangin ahi.

11 Vanlai sepai lamkaipa geiyin adeh-in, niseh a pumgo thilto kipe asuh tangpeh-in, Houin geiyin alekhup peh tai.

12 Niseh a mipin kilhaina thilto sangin achonsetauvin, houdih tah chu keng chotphan akineilotai. HIche saki hi abol lam lama alolhing jeng theiye.

13 Hichun Vantil khat hin Vantil chom khat adoh kajan, “Hiche mu kineiya thilsoh hijat hi itih geiya um a, niseh kilhaina thilto peh khel’a kidah umtah chonsetna kibol’a, itih geiya Vanlai sepaite le Houin kichil thang thang ding ham?” ati.

14 Vantil khatjoh chun adonbut kajan, “Hiche hi ni sang khat le ja khat le som nga (1150) geiya hiti ding, hiche sungsea hi jingkah nilhah seha kilhaina thilto kibol lou ding ahi. Chujou tah le Houin kisempha kit ding ahi,” ati.

 Mu kinei Gabriel Vantil’in ahilchet

15 Mu kinei chu ipi kiseina ahiding kagel khoh pettah-in, kamasanga hetman louvin mi khat ahung dinge.

16 ULai vapang lama konin o khat ahung gingin, “Vo Gabriel, hichepan amu chengse hi hilchenin,” ati.

17 Hichun Gabriel kakoma ahung dingin, kakicha behseh jengin, tol’a mai kasu luttai. Gabriel’in kajah a, “Thithei mihem, mu nanei hi hechenin. Nathilmu hi leiset khang bei ding thudol ahi,” ati.

18 Thu aseipet hin kho helouvin tol’a kalhutai. Ahivangin aman eikaidingin eidinsah tai.

19 Chuin aseiyin, ‘Pathen lunghan teng itobang thil soh jim navetsah inge. Hiche mu kinei hin leiset khang beina ding aseidoh ahi.

20 “Kelngoichal namu, ki ni nei hi Media le Persia lenggam te ni ahi.

21 Kelchal hi Greek lenggam ahin, amit te ni kah a aki lentah hi leng masapen ahi.

22 Saki li, ki masa lhoh nunga hung kehdoh ho hin chuche lenggam sunga lenggam li kisep doh a, anam mite kihomkhen ding, lenggam masapa sanga tha lhom ding aseina ahi.

23 “Hiche lenggam ho hi abeikon le hung engseuvin tin, talen amat tei diu, hichea hi lung khoh tah le chonthang hoitah, lep che tah leng khat hung umdoh ding ahi.

24 Hung thanei lheh ding, achamtah a thanei vang hiponte. Manthahna chim ngel ngul’a aboldoh a, abol lam lam a lolhing ding ahi. Mi thanei tah ho le Pathen mite asuhgam ding ahi.

25 Doha thuh tah ahin, lepthol jenga gol ajo ding ahi. Kiletsah hoithoa, gihsal masa louva mihem tamtah asuhgam ding ahi. Leng lenpen jong adeh a, hichea hi mihem thahat hilouva kisumang hel ding ahi.

26 Hiche mu kinei, nilhah jingkah a kilhaina thilto thudol nakiseipehsa chu hung guilhung ding ahi. Tun vang im ta din, ajeh chu ahung guilhunna ding phat sotpi aum nalaiye,” ati.

27 Hiche hin keijong kati aja behseh jengin nikho tampi kanatlo tai. Chujouvin kathouvin, lengpan toh dia einganse na kin bol din kachei; ahila mu kanei chun eisuboi lheh jeng in, kahekhen thei him him poi.

DANIEL BUNG 9 (BC 539)

Amite dia Daniel tao

1 Mede mi Darius, Xerxes chapa hin Babylon gamsung lengvai anapoi.

2 Lengvai apoh kum masapenin lekhabu theng ho kasimin, Jeremiah Themgao kama Pakaiyin aseisa kum som sagi sunga Jerusalem khogema aum ding thudol kagel’e.

3 Chuin khaodip ponsil’in, an ngol’in, leivui lah a touvin, Pakai Pathen koma lung giltah-in kataovin, kangeh-e.

4 Pakai ka-Pathen koma chu kamite chonset ho phongdoh a tao kahi. Pakai kom a, “Vo Pakai Pathen loupi pen, Nangma kaja pen’u nahi. Na-ngailua nathupeh bolte din kitah tah le long louva lungset jing nahi.

5 “Kachonseuvin, kagilouvun, thil dihlou kaboltauve. Bol dia neipeh-u don louvin, thildih neivetsah sauva konin kakihei mangsoh tauve.

6 Kanam pumpiu le kapu kapateu, kavaihomteu le kaleng teu henga namang a thuseiji nalhacha Themgaoho thusei kana ngaipouve.

7 Vo Pakai nangin itih-in jong thildih bou naboljin, keiho joh-in kadiuva vetda le musetna kakiboldoh jiu ahi. Nakoma akitah lou jal’uva muntin le gamla naiya nathe thang, Judea gam le Jerusalem a cheng Israelte chunga thilsoh hiti ho adih cheh-e.

8 O Pakai, kalengteu le kavaihomteu, kapu kapateuvin chonset abol’un nang dounan jahmo tah-in thil anabol’ui.

9 Nang kadou vangun hepitah-in kachonset nau nangaidam’e.

10 Nalhacha Themgaote khut’a napeh Nadanthu ho toh kitoh a chon dia neihil vangun ka-ngaipouve.

11 Israelten Nadanthu chengse apal keh-un, nasei ngai ding adauve. Nang douna kachonset jal’un, nalhacha Mose Danthua kisunsa sapsetna tin cheng kachunguva nalhut tai.

12 Keiho le kavaihomteu chunga bol dia nasei chu naboltai. Leiset khopi dang sangin Jerusalem melse penin talen namatsah-in,

13 Mose Danthua kiseisa talen mat ding jouse nei matsah tauve. Vo Pakai ka-Pathenu, hichan gei hinjong kachonset’u ngah a, nathudih juiya nalung lhaina ding ngaito kagopouve.

14 O Pakai, talen matsah dia neigot’u ahin, neimatsah tauve; ajeh chu a-itih a thildih jeng nabol ahinan keihon bou nathu ka-ngailouvu ahi.  

15 “Vo Pakai ka-Pathenu, Egypt a kona namite napuidoh chun thahat navetsah tan, nathahat chu akigeldoh jinge. Chonsen thildih lou kaboltauve.

16 Masang laiya bon neihu leh, Jerusalem chunga lung han nga tan. Nakhopi nalhang theng ahi. Kapu kapateu chonset le thilse bol jal’in jetle vei, sah le lhang mitinin isah louhel’in Jerusalem avetom tauve.

17 Vo Pathen, taova kathum hi nei-ngaipeh-in. Suhsetsa Nahouin semphan, mitinin Pathen nahi ahetna din hiche hi semphan.

18 Vo Pathen, kataonau ngaiyin; neiveuvin, naminpua khopi hesohna le kathoh-u gimna hi vetemin! Chutile mitinin Pathen nahi hedoh tante, kinomsot hih-in! Vo Pakai kataonau ngaiyin, neibolpeh jengun! Chutile mitinin Pathen nahi hedoh tante, kinomsot hih-in! Hiche khopi le amite hi Nanga ahiuve,” tin kataove.

Gaothu Gabriel’in ahilchet

20 Katao tao jengin, kamite Israel chonset kaphongin, a-Houin theng sempha din Pakai ka-Pathen ka-ngeh-e.

21 Katao tao pet hin, mu kanei masah a kamusa Gabriel chu ka-umna mun a ahung leng lhai. Hiche pet chu nilhah kilhaina gantha phat dontah ahi.

22 Gabriel hin eihil chenin, “Vo Daniel, hiche gaothu hi nahetdohna dia kithopia hung kahi.

23 Pathen henga nataova pat, Aman nahouvin, nalungset’in, hijeh a chu nadonbutna thu seipeh dinga hung kahi. Hiche thilmu kahilchetna hi phate chan ngaiphan.

24 “Namite le nakhopi theng hi chonset le thilsea kona lhadohna dia Pathenin atepsa phat chu kum ja li le somko ahi. Chuteng chonset ki-ngaidam a, tonsot’a um jing dia thudih kitungdoh ding, chuteng mu kinei hi guilhunga, Houin theng avel’a katdohna kibol ding ahi.

25 Hiche hi jihdoh-in lang hethemmin; Jerusalem sah phatna ding kiseipeh a pat Pathen lhentum lamkaipa hungdoh gei hi kum somli le ko lhing ding ahi. Jerusalem kisapha a, kholai lamlen ho le kulpi pal det tah tah a kisem ding, kum ja li le somthum le li geiya um ding ahin, hiche sungse hi gim hahsa khang hinte.

26 Hiche phat kichai teng hileh Pathen lhentum lamkaipu chu dih lout aha min atha diu ahi. Khopi le Houin jeng jong vaipo thunei thahat tah khat sepaiten asuhmang diu ahi. Phat chaina hi twidoh kitol bang ding, Pathen gonsa gal le manthahna ahinlhut ding ahi.

27 Hiche vaihompa hin kum sagi sung dia mi tamtah to kinoptona asem ding, aphat tep akeh bang ahiteng kilhaina gantha  le thilto jouse asuh tang ding ahi. Pathenin amanthahna dia agonsa phat hung lhun kah a thet um chungnung chu Houin tingvuma hung pansa, umden jing ding ahi,” ati.

DANIEL BUNG 10 (BC 536)

Tigris luipanga Daniel mu nei

1 Persia lengpa Cyrus leng chankal kum thum nan Belteshazzar kiti Daniel koma thu khat ahung kiphongdoh-e. Thu kiphongdoh chu adih lheh-in, het hahsa tah vang ahi. Hiche thu hi mu aneina a akihil chentai.

2 Kei Daniel hapta thum jen lunghem a kaum laiyin hiche mu nei thudol hi ahung lhung-e.

3 Hapta thum lhinkah chun antui la nelou, lengpitwi jong don lou, sa jong tep lou, sam jong pot lou kahi.

4 Chuche kum lha masapen, nikho som ni le li nin luipi minthang tah Tigris panga kana dingin ahi.

5 Khodah a kagah vet le tupat ponnem sil, sana konggah kigah khat kamui.

6 Atahsa chu sana pahjem vah abangin, amaisao kolphe vah abangin, amitchang teni jong meikou deojap jap abange. Abanjangte ni le akengte ni sum-eng kinotval abangin, a-ogin chu japi husa kithongje ju abange.

7 Hitabang thil mua chu keibou kahi. Kaumpi hon vang imacha amupouve, akicha behseh jengun ajam’un akisel tauve.

8 Kachangseh-in eida lhauvin, hitobang datmo thil kidang hi kavei.

9 A-ogin kajah chun kakhupbon tol senan kakineiyin kho helouvin kakijamtai.

10 Hichun khut khat’in eikai thouvin, kithing pum pumin kut le khup’in eibosah-in ahi.

11 Hichun Vantil’in kajah a, “Daniel, Pathenin nalungset’e. Dingin lang kaseigot ji phate chan ngaiphan. Nahenga eihinsol ahi,” ati. Hicheng aseijou hin kithing thingin kadingdoh tai.

12 Hichun Vantil’in kajah a, “Kicha hih-in Daniel. Ima hetkhen ding deijal’a kineosah tah a naum nikhoa pat chun Pathenin nataona asangtai. Nang taona jal’ kei hi hung kahi.

13 Persia lengam vengtup’a pang Vantil chun nisom ni le ni khat jen eidouvin, Persia gama kachangseh a eidalhah-u ahijeh-in, Vantilte lamkai pipu khat-Mechael chun eihung kithopi.

14 Khonunga namite chunga thilsoh ding seipeh dingle hetkhansah dinga hung kahi. Khonung thilsoh dia mu kinei chu hiche hi ahi,” ati.

15 Vantil’in hiche asei hin tol kaven kapaomo tai.

16 Hichun mihem tobanga kihea Vantil chun kanephute ni athamle kapao theiyin Vantil jah a chun, “Pu, hiche mu kinei hin thale jung aloinem jengin, kakithing thing jengtai.

17 Soh apu angsunga kithing kabangtai. Iti kahou jou ding nahim? Katha akisamin, kahu kahai abeitai,” kati.

18 Hichun eihin tham kit le, kahatdoh dom’e.

19 Aman, “Pathenin nalungset nai, imacha kisuh lung gim sah dan, kijong kicha hih-in,” eiti. Hiche hi asei phat’in kahat cheh kit’in ajah a, “Pu, naseigot got chu seitan. Neidamsah chom lheh tai,” kati.

20 Aman, “Ibol’a nahenga hung kahi nahet nah em? Thudih lekhabua kijihsa nakoma seidoh peh dia hung kahi. Tua hi kile kit’a Persia vengtup, Vantil giloutoh kisat ding kahi; kasat chai teng Greek vengtup Vantil chu hung ding ahitai.

21 Hichea hi eipanpi ding Israel vengtup’a pang Vantil Michael tilou koima dang aumpoi.

DANIEL BUNG 11

1 “Ama kin chu kei eipanpi ding le eihuh ding chubou ahi.

2 Tua kaseipeh got chengse hi adih jeng ahi,” ati.

Egypt le Syria lenggamte ni

Vantil chun aseiyin, “Leng thum hung vaihom ding, leng li lhinna pa vang cha dang ho sanga hao cheh ding ahi. Athahat lai tah le ahao lai tah a Greek lenggam achou ding ahi.

3 “Chutah le leng hangtah khat hungdoh ding, lenggam achou ding ahi.

4 Ahinla athahat athu nei laitah a alenggam kikhen a hop li kiso ding ahi. Ason achilhah hilou miten akhel’a lengvai apoh diu ahin, hijongle amaho hin ama thahat keng pouvinte.

5 “Egypt lengpa chu thahat tah hi ding, agal lamkai len ho lah a khat chu ama sanga jong huneijo leu ding, lenggam lenjoa vaihom ding ahi.

6 Kum phabep nung teng Egypt lengpan Syria lenpa to kihoutohna aneiya, achanu to akichen sah ding ahi. Hijongle akihoutohna chu sot louhel ding, achanu ahin, ajipa, acha chule akilhonpi alhacha asohte geiya athagam diu ahi.

7 Sot louhel’a amanu inkote khat ling changa, lenpa chun Syria sepaite akisotpia, akulpiu adelkhuma, lut ding abonchauva ajosoh ding ahi.

8 Amilimdoi jouseu, doi houna sana le dangkaa kisem thil jouse chu Egypt gamsunga alepoh lut kit ding ahi. Cham lenna kum sotpi nung le

9 Syria lengpan Egypt gam asat ding, hijongle lel a kile kit ding ahi.

10 “Syria lengpa chapaten galsat dia sepai tamtah akhop khom diu ahi. Alah-uva khatpa vang hi twisoh banga melmate kulpi khat adel khum ding ahi.

11 Egypt lengpa lung hanga Syria lengpa to kisat ding, asepai hon tampi chu gal-hinga  amat ding ahi.

12 Gal ajo le sepai tampi amat chu kithang-atna aneiya, ahivanga gal ajo jing lou ding ahi.

13 “Syria langpa kile tol kit’a masanga anei sanga tam cheh sepai agakhop ding ahi. Phat lhin tengle sepai tam cheh, manchah bukimjo puiya hung kit ding ahi.

14 Chuteng mi tampin Egypt lengpa adou diu ahi. Vo Daniel nan am mite lah a pumhat mangcha phabep’in jong vaipote adou dingu ahi, ajeh chu mu aneiyu ahin, hijongle gal alel diu ahibouve.

15 Hitia hi Syria lengpan kulpi kikai khum khopi khat umintin, alah ding ahi. Chuteng Egypt sepaiten gal satjom jou tapouvinte, alah-uva gal hangpen jong pang jou lou ding ahi.

16 Syria sepai, gal hungkonten, adoudal diu beiya aning anop’a abol diu ahi. Syria gal lamkaipan tepna gam chu pansatna aneiya atoupha den ding ahi.

17 “Syria lengpa asepaite aboncha puiya hung gal kon ding ahi. Amelmapa lenggam asuhmangna dia kihoutoh pi agot’a, achanu to akichensah ding, hijongle athilgon hi lolhing lou ding ahi.

18 Hiche nung hile Twikhanglen a pansaa namtin vaipi adou ding, tamtah jong gal’a ajo ding ahi. Ahivanga gamchom lamkai khat’in su-lhantin, akithang-atna asuhbei ding ahi. Hiche lamkaipa hin Syria lengpa hoithona chu achunga akhuh khum ding ahi.

19 Syria lengpa chu agamsung, akulpia hung kile kit ding, hichea jong hi gal’in ajo ding, hiche hi ama kichaina hi ding ahitai.

20 “Ama ban a hi leng khat hung umdoh a, alenggam hao theina dia mipia kona kai peh ding punsah dia vaipo khat asol ding ahi. Phat chomkah a hiche lengpa hi min atha ding ahi, japi het vang hilou ding, galmun a kithat jong hiponte.”

Syria leng giloupa

21 “Aban a Syria leng chang ding hi migilou hi ding, leng chang lom jong hilou ding, hijongle photlot louva hung potdoh jenga, doha them a leng thahat achu lhah ding ahi.

22 Ama dou tapou, Pathen Thempu chungnung geiya twi lhoh mang bang ding ahi.

23 Namchom chom jong doha kitepna asempia, nam lhomho chunga vaipo hijongle, khattou tel tul jeng ding ahi.

24 Gihsal masa louva gamsung hao tah khat adel khuma, apu apate bol khah louhel thil abol ding ahi. Athil chomdoh chengse chu agal konpi ahoppeh ding ahi. Kulpi dang dang del khum agot ding, hijongle aphat beipai ding ahitai.

25 “Ama to kisat thuh dia kigosa jing, Egypt lengpa chu seipai tampi puiya hangtah a adel khum ding, Egypt lengpa chu lhem lhantin, pang jou ponte.

26 Athumop them pen hon alhep lhah diu, aseipai tamjo kithat a, asepai kisugam hel ding ahi.

27 Chujou teng lengte ni nekhom dia dokhang khat’a toukhom lhon ding, alungthim lhon vang agilou jeng hiya, jou jouva kihou lhon ding ahi. Phat lhin lou jeh a adei lhon amudoh lhon deh lou ding ahi.

28 Syria lengpa athilchomdoh poa in lam hung kile ding, Pathen mite chennaa lhang jouse suhgam agot ding ahi. Aning anop’a chon a chujou teng agamsunga hung kile ding ahi.

29 “Khonung teng Egypt asat kit ding, hijongle hiche teng le thil umdan lamdang ding ahitai.

30 Rome mite konga hung kitol’a adou diu, akichat ding ahi. “Lung nommo tah a hung kilea, Pathen mite chenna gam suhgam agot ding ahi. Chuche Hou donda mite thumop juiyinte.

31 Asepaiten Houin asuh boh diu, niseh a kilhaina gantha asuh tanguva, thet um tah milimdoi chu atundoh diu ahi.

32 Lep chejal’a lengpan hiche Hou dondaa dalha miho kithopi amu ding, ahivanga Pathen tahsan jingten adoudal diu ahi.

33 Mipi lamkai chingtah tah hon achih nau midangto ahop diu ahi. Chom khat kah a dia abang bang galmun a thiden a, kon khatam meiya ahal lih diu, adang jong achomgam’uva songkul’a akhum diu ahi.

34 Mi athagam gam pet’uv hi, achang chang ding gelna hijongle, Pathen miten panpi themcha amu diu ahi.

35 Lamkai miching ho phabep vang min atha diu, hijongle amaho thi chu mipi kisuh thengna soh ding ahi. Pathen tepsa, phat kichai geiya hiche hi um jing ding ahi.

36 “Syria lengpan adei deiya abol ding, pathente sanga lenjo, Hatchungnung Patheng sanga jong lenjoa kigel ding ahi. Pathenin talen amatsah kahsea hiti hi abol thei ding ahi. Pathenin agon bang banga abol tei ding ahi.

37 Apu hou apa hou geiya anahsah moa, numei ho khohsah pen doi geiya adonda peh ding ahi. Doile kao, pathente sanga lenjoa akigel jeh a hou pou pou apum donlou ding ahi.

38 Apu hou apa hou hou louhel, kulpi ngah a agel pathen khat houvintin, thil manlu lu, sana, dangka, sanapah manlu lu, thilpeh tampi apeh ding ahi.

39 Akulpi huh dia gamchom mite hou pathen oite amanchah ding ahi. Vaipo tah tah a ama gelte chubou ginle ja aneiya, panmun len len apeh ding, kipaman gam leiset apeh ding ahi.

40 “Syria lengpa kichaina ding abei koncha, Egypt lengpan ahindel khum ding, Syria lengpan atha nei chasun sun a akisat pia, kangtalai le sakolte, kong innei ho geiya amanchah a adou ding, gamchom chom asat ding, twipi soh bang ding ahi.

41 Tepna gam geiya adel khuma, mihem sangsom sangja atha gam ding, Edom gam le Moab gam chule Ammon gam amoh chengse vang hoidoh diu ahi.

42 Gamsung hijat hi adel khum teng, Egypt gam jeng jong khen ponte.

43 Aman Egypt gamsunga gou manlu tah tah kikhol, sana, dangka le adang dang achomgam ding ahi. Libya gam le Sudan gam jong ajo ding ahi.

44 Chujou teng niso lam le sah lam a thu thang ajah chun meidoi sah-in tin, kichat man a khoni khona ngailouva gal asat’a, mi tamtah athagam ding ahi.

45 Leng ponbuh loupi tah tah chu Twikhanglen le Houin molvum kah lhung hel’a songdoh a pang ding ahi. Hijongle apanpi ding beihel’a thi ding ahi.

DANIEL BUNG 12

Khang kichaina phat

1 “Hiche teng hileh namite vengtup Vantil Michael hung kilah ding, nam khat nahiuva pat hitobanga hahsa soh kha lou lai, phat hahsa tah khat hung lhung ding ahi. Hiche phat hung lhun teng namite lah a Pathen lekhabua min kisunsa chengse huhhingna chang ding ahiuve.

2 Mihem thisa tamtah thoudoh-un tin, abang tonsot kemlouva hing diu, abang tonsot vetdana chang diu ahi.

3 Miching lamkaiho chu vanthamjol vah bang ding ahiuve. Mi tampi hildoh a thildih bol chengse chu ahsite banga vah jing diu ahi,” ati.

4 Aman kajah a, “Vo Daniel, lekhajol chu jel tup’in, vannoi leiset kichai kah a din mohor nam khumtan. Akah a thilsoh ding chengse hetdoh ding ngaito na mihem tamtah hung kisa lel diu ahi,” ati.

5 Vadung pang jet le veiya pasal khat cheh ding kamui.

6 Khatpa hin luidung chung lam a ding Vantil chu adongin, “Hiche phat kidangtah tah ho hi itih le hung bei ding ham?” ati.

7 Vantil chun khut ten in van lam asangin, tonsot Pathen minin giltah-in akihahsel tai. Hiche hi kum thum le akeh lut’inte. Pathen mite bolsetna akichai teng, thil hicheng jong hi soh ding ahitai,” ati.

8 Asei kaja nan, kahekhen theipoi. Hijehchun, “Pu, iti hung kichai ding ham?” tin kadonge.

9 Aman eidonbut’in, “Tun chetan Daniel, khat kichai kahsea thu kisei chengse hi kisel a ki-im ding ahibouve.

10 Mihem tamtah kisutheng ding, migilouten vang hekhen theipon tin, gitlou abol jing diu, michingten bou hekhen theiyinte.

11 “Kilhaina gantha jouse kisuh tang phat, thet umtah thil kitundoh phat, nikho sang khat le ja ni to somko sung lut ding ahi.

12 Nikho sang khat le ja thum to som thum le nga kichai kah a tahsan a ding det jing ho chengse anun nom’ui!

13 “Vo Daniel, nang vang akhunna geiyin kitah jingin. Chujou teng thin natin, hijongle phat kichai teng kipaman sang dia nathodoh kit ding ahinai,” ati.