Lamentations kiti Kala ho

Thupatna
Hiche Ka La hi maona thuchih nga, 586 B.C. kum a Jerusalem kisuhmang, khogem nung lunghel leh sohchan lai genthei, kachamna jeng ahi. Alekhabua hi lunghemna jeng akisei vangin, Pathen tahsanna le khonunga kinepna thu jong akisimdoh-e. Hichea La ho hi Judaten kumseh a 586 B.C. kuma nampi hamsetna geldohna an angol tenguleh Pathen houna aneijiu ahi.

Asung thu hopkhen
Jerusalem thohgimna 1:1-22
Jerusalem talen kimatsah 2:1-22
Talen mat le kinepna 3:1-66
Jerusalem khogem 4:1-22
Hepina ngaiya taona 5:1-22

Lamentations kiti Kala Bung 1
Jerusalem thohgimna
1 Ohe, mipi dimset Jerusalem khopi chu, Iti ahomkeova kijam hitam! Khopi minthang tah chu Meithai bangin aumtan; Khopi hoipen chu Sohchangin achetai!
2 Jan khovah vah-in akap’in, Amit-lhi twilong abangin; Angailuho jeng jong Alhembi thei aumtapouve! Akihou theipi chengsen Alhem lhauvin adoutauve!
3 Judate panpi beiyin asohchangun, Inluma konin min akaimang tauve; Migamsunga apem’uvin, Gam neilou asoh tauve! Agalten aumkimsoh tauvin, Jamdohna ding kot aneipouve!
4 Phat tepsa khut nikho dungin jong, Pathen houdin koima Houin a ahungpoi. Labung saji nu-ngah ho min akaimangtan, Thempute gim genthei thoh-in aum’ui! Zion lhang ahomkeovin akijamin, Kulpi kelkot jouse akeotai!
5 Jerusalem nokhumten ajoutauvin, Atouphauvin achunga avaihomtauve! Achonset simsen loujeh a Pakaiyin khopi hi abolgim ahi! Akhosung mite galte amatsah a Akaimangsah ahitai!
6 Jerusalem loupina abeisoh tan, Asunga lamkaite sakhi gilkel abangui! Ahindelteu masanga ajam jam nauvin Thabeiya lha lhop pai diu ahitai!
7 Tua khogema kijam Jerusalemin Masanga aloupina ageldoh-e! Galmite khut’a alut phat’in, Panpi ding koima aneipoi! Khopi kisuhmang jeng hi Agalten anuisat’uve!
8 Jerusalem loupina abeitan, Ahomkeovin alumin mit-thip’in aumdoh tai! Lung gimle jachat thoh-in Dahdoh ngamlouvin mai akisip’e! Jerusalem khopi achonse behseh tan, Aboh-in kidah dah aumtai.
9 Athanhoina akita langsoh tan, Akhopinla ima khohsah louvin agel’e! Amansuh dan amelse behseh-in, Alhamon dingla koima aumpoi! Agalten ajothosoh tauve, Pakai hepi lha-ngaiyin khopi akaptai!
10 Agalten anei agou abonchan Achom thengsoh tauvin; Pakaiyin chidang namdang lutna dia Aphal louna Houin sunga galte aluttauve!
11 Jerusalem kho mite neh le chah hol’in Kap’in apengjen jun’uve! Anei agou jouseu thi-lhoa neh ding beh tin Neh le chah to akilheh tauve! “Pakai ven, gim hesoh thoh kahitauve,” Tin khopi sung miten asam’ui!
12 “Palama hinjotpa jouse jah a khosung miten, “Alung hang lheh jongle Pakaiyin Hitobang thoh gim gentheina hi Koima chunga alhut kha hih laiye.
13 “Chunga konin Pakaiyin Sung le lai leusave vu thei meikou ahin-lhan, Thang eikampeh-un Tolvoh nan eineiyun; Itih a gam hesoh thoh din Donlou dailouvin eikoitauve!
14 “Kachonsetnau amelchih cheh-in, Abonchan akankhomsoh keiyin; Ka-ngongchanga akhaiyin, Agih behseh tan eidel-on leuvui! Pakaiyin kagalteu eijosah-un, Panpi beiyin kadoulel tauve!
15 “Kasepai hat lai jouse Pakaiyin kichepnan aneitan; Kakhangdong ho sumang din Sapai hon jamah asol’e! Lengpiga chilna lengpiga kichil bangin, Kamite achilgep soh tai!
16 “Hijeh a chu kamit-lhi Twisuh long banga; Koimanla eilhamon joupon, Koimachan jong eilung ngamsah theipoi! Kamelmaten eijo thotan; Kamiten imacha aneitapouve!
17 “Mi kasanle le vangin Koiman eipanhu deh pon; Sahle lhang jet le veiya konin Eidou ding Pakaiyin melma akoukhom’e! Melmaten kidah dah um Thil tobangin eibol tauve!
18 “Hinla Pakai adih jingin, Athu ngailou kahibouve. Kasei ngaiyun muntin a min, Kathoh natna chengse veuvin. Kami khangdong numei pasal Min gal-hingin akaisoh tai!
19 “Kakiloipi cheng kakouvin, Eipanhu nom tapouve; Thempuho le lamkai chengse Khosung lamlen dunga akijamchap soh tauve. Neh le chah holna a Thigam ahitauve!
20 “O Pakai neiven Lung hesoh gentheiyin ka-um’e! Kachonset jeh chun Lung lengvaiyin ka-umtai! Kholai dunga tol-thi jeng alum, Insunga jong thilong akijam’e!
21 “Ngaiyin kap le penguin ka-umtan; Eilhamon ding koimacha aumpoi! Neibolsetna chengse hi Kamelmaten akipapiuve! Natepsa nikho hinlhunsah-in, Kamelmaten kathoh bangin genthei thoh-u hen!
22 “Thilse hijat aboljeh-un Themmo chansah jenginl Kachonset jal’a talen neipeh bangin Abonchauvin talen matsah tan; Gimle gentheiyin kakap’in, Kalung hesoh behseh jenge!” atiuve.

Lamentations kiti Kala Bung 2
Pakaiyin Jerusalem talen amatsah
1 Lung hangtah-in Pakaiyin Zion lhanga mu athimsah tai! Avan loupina mun chu Khogem asosah tai! Alunghan nikho A-Houin jeng jong Donlouvin akoiyin adalhatai!
2 Judah gamsung kho jouse khoto louvin Pakaiyin asumangsoh hel tai! Gamsung huhna kulpi jouse Aphe-lhan avo-lhusoh tai! Judah lenggam le avaihomte Avetdan asujumsoh tai!
3 Pakaiyin alunghan jeh-in Israelte thaneina asubeisoh tai! Galten einokhum phat’un Eipanpi nom tapouve! Meikou leu bangin save vun eibol’un, Thil ijakai asumangsoh hel’e!
4 Amelma bangin athalpin eidoi jingin, Eikipa thanopsah thei jouseu athatgam tai! Jerusalem khosunga hin Alungsat hamve vun kathoh-ui!
5 Melma bangin Pakaiyin Israel asumangin, Akulpi le alaltouna asuphesoh tai! Judah mite gim le hseoh A-ngahna beiyin alhatai!
6 Ama kahou nau Houin theng la avochimsoh tan, Kut nikho ho le Choldo nikho asubeitai! Leng te Thempun Pakai lunghan Atohkha soh hel tauve!
7 Pakaiyin amaicham adondan, Houin theng adalhatai! Houin le maicham bang jouse Galmite aphet lhahsah tai! Kipah thanom a ama kahou nau mun chu Melmate alahsah-in hanla asah khumsah tai!
8 Pakaiyin Zion kulpi pal jouse Suh lhuh tei din agotai! Suhmang hel dingin Atetohsah hel tai! A-intingvum jouse le apal jouse Akisekhomin ingem asoh tai!
9 Kelkot jouse insongin avuh tan, Kelkotgol jouse abong abaiyin akijam’e! Lengpa le milen milalte Asohchangsoh tauve! Danthu kihilna la abeitan, Themgaoten Pakaiya konin mu aneitapouve!
10 Jerusalem kho upate Tol’a akitung thip chal chul’ui! Aluchunga vut akiloiyun, Khoadip pon akisil’ui! Khosung nu-ngah jouse Tol’a akunsoh hel’ui!
11 Kaka nan kamit asepai tan, Kalung adong behseh tai! Kamite manthah jal’a Lung gim a thipai ding kahi! Chapangte le naosen ho Lamlen dunga akijam chap tai!
12 Chapang ho gilkel dangchah-in Anuteu henga akap kap’un; Mapu bangin kholai dunga Alhu lhamsoh tauve! Anuteu pheichung dunga Aban banin athi thu thu jengui!
13 Vo Jerusalem, ka-it tah Jerusalem! Ipi kasei ding hitam! Ipia kalhamon jou ding nahim? Nathoh tobang koiman athoh khapoi! Nathoh nasa behseh-in Twikhanglen te aphai, Kineppi thei jouse abeitai!
14 Nakhosung Themgaoten la sei ding beiyin Jouthu jeng bou aseitauvin; Athusei phongu jong namel-khu nau bou, Nachonset sosal ngailou ahi! Lung neheikhoh ngailouvin Nahil’un naseipeh jiuve!
15 Khopi hinjotpa jousen la Vetda le mit thip’in naneiyun! Alu avai vaiyin apeiyun, Jerusalem khogempi chu anuisat’ui! “Khopi hoitah, Vannoiyin Akithang-atpi chu hilou haimo!” atiuve.
16 Namelmaten vetda tah le hot’in, Tot chatvai le daithangin nakoiyui! Anechoi leuvin, “Isumang jengui, Hitia bol ding nikho hi i-nga lel jingu ahi,” atiuve!
17 Boldia agihsalsa chu Pakaiyin achainan aboltai! Masang igihsau banga Lainatna beiya eisuhmangu ahitai! Igalteu eijosah-uva, Imansuh-u hi akipanauva abol ahitai!
18 Vo Jerusalem kulpi, Pakai henga kap’in penguin! Sun le janin Namit-lhi twilong bang hen! Naka ka na leh namao maonan Thilo paiyin!
19 Janlai laiyin jong Pakai henga, Tao din kipatdoh lhoiyin! Pakai dingin nalungkot hongin, Nachate ahepina din thumin! Lamlen golning golkah a Chapang ho kel’in athiuve!
20 Vo Pakai, hibang banga nabolgim ho, Vetemin athoh nau khu! Numei hon a-it laitah-u Achateu tahsa anetauve! Houin sunga khun Thempuho le Themgaote athat tauve!
21 Khangdong le upa nupi dat louvin Kholai lamlen dunga akijam chap tauve! Nu-ngah gollhang jouse Galmiten chemjamin athat tauve! Nalungsat nikhon Nangin hepina beiyin nathat gamtai!
22 Kakimvel’a tijat jatna boldoh din Kamelmate nakoukhomsoh tai! Nalungsat nikhoa jamdoh ding Koima jong aumpoi! Kadeitah a kahinvah khang Kachate jouse athat tauve!

Lamentations kiti Kala Bung 3
Talen, lunghei, Kinep
1 Kei hi Pathenin talen apeh lom Itobang mihem ahi hethem kai!
2 Pakaiyin muthim khojing lah a Gil cheh cheh-in eidel lut’e!
3 Khoto louhel’in Avel vel’in eijep jep jenge!
4 Pakaiyin kaphe kavou abottel’in, Kagu kachang avobongsoh tai!
5 Gim hesoh lungdon thoh-in Songkul lut eibahsah jenge!
6 Thina muthim jing lah a Cheng din eidel luttai!
7 Thihkhaovin eikanin, Jamdohmo hel sohchang kahitai!
8 Hapen a penga katao vangin Pathenin eingaipeh tapoi!
9 Kache jongleh kalonle len, Kakiheina lam lam songbang jeng ahi.
10 Savom michan bangin eichang lhin, Sakei mibokhum bangin eibokhumtai!
11 Lampama eideldoh-in, Katel kadah-in eijanin eidalhai!
12 Athalpi akamsal teh jengin, Eidoigih geh jengin ahi.
13 Athalchang chun katahsa Akap lhumjen jun jenge!
14 Nilhum lhumin min einuisat’un, Amaho kitot nopna bep kahitai!
15 Pumhat changin eibol’in, Gamsaiche khaveng vun eidonsah-e!
16 Kamaichang tolgot nan aneiyin, Kahatu jouse lhankhuh a ajeppul tai!
17 Damna le lung olna him him Kahe kha tapoi!
18 Hingsot taponge, Pakaiya kakinepna abeitai!
19 Kanat thoh lel le inbeiya ka-um kagel teng Gutwi bangin akhai!
20 Kagel gel jeng leh Lhungkhamlih pai ding kahi!
21 Hinla thil khat kageldoh teng Avel’in kakinem kit ji nai!
22 Thonlou Pakai lungset le Ahepina aum jing nai!
23 Jingkah thah lai leh Ninou soh thah abange!
24 Ken Pakai bou kaneitan, Ama jenga kinem kahi!
25 Ama jenga ki-ngaite din Pakai chu phatah ahi,
26 Eihuhhing diuva Ama bou Ngahat jing hi thilphapen ahi.
27 I-khangdon laiyuva thoh hat ngahat Kithem chuh hi thilphapen ahi.
28 Genthei hesoh ito tengu leh Thohhat tah a touthim aphai!
29 Kinepna umthei nalai ahin, Kun a touthim beh ding ahi.
30 Min eiphin hen eivo jongleu Kido ding ahimaiye!
31 Pakai chu mihepi them ahin, Tonsot’a eipai louhel diu ahi.
32 Eibolgim mongu jongleh Eingailut nau anasan alen’e!
33 Gimna le natna eitosah-u jongleh Ama jeng jong alung lhaipoi!
34 Songkul’a bulpu henlha, I-lung genthei tengu Pakaiyin ahei!
35 Aman eipeh ichandiu lom ichan lou tengu Pakaiyin hiche jong hi ahei!
36 Thutanna phunga thudih kiheimang jong Pakaiyin ahesoh keiye!
37 Pakai lungdei bou Min aboldoh cheh ahi!
38 Ama thusah a thilpha Thilse soh gel ahibouve.
39 I-chonset jeh-uva talen imat tengu I-bol’a ikiphin phin diu ham?
40 Ichon nau kivet chil’u hitin Pakai heng jonkit taute!
41 Van a um Pakai henga Lungkot hongin taovu te!
42 “Vo Pakai, nangma douvin kachonseuvin Nangin neingaidampouve!
43 “Neihin delpeh-un neithat tauve; Nalunghan chun nahepina aseltai!
44 Nalungsat meilou jing chun Katao nau akhah tantai!
45 Vannoi mite lah a hin Kahon hon’un neikhopemsah tauve!
46 “Kamelmateuvin ei-eng houvun, Eidai chavaitauve!
47 Toset le manthahna kachangun, Kichat tijat thoh-in ka-um’ui.
48 Kamite kisuhmang jal’in, Kamit-lhi twilonin alonge!
49 “Tang louva kaka kanan Kamit-lhi twisuh long abange!
50 Van a kona Pakaiyin khohsahna neiya Eihinvet masang seuva hiti ding ahi!
51 Khopi sung numeite kibolna kavet leh Kalung ana behseh jenge!
52 “Ajeh beiya eihoa melmaten Vacha thang-oh eibahsah-ui!
53 Kahing changin khuh sunga eisep lut’un, Akot songtumin asing tauve!
54 Khuh sung twiyin eichup gotan, Athipai din kakigel tai!
55 “Vo Pakai, khuhsunga konin Nahenga kahung taove!
56 Kakagin neingaipeh dia kathum teng Nei ngapeh ji nai!
57 Nangin neihouvin, Kicha loudin neilhem’e!
58 “Neihuhdoh din nahungin Neihuhhing tai!
59 Adih louva eikibolna nahenai, Them neichansah tai!
60 Kamelmaten eihotnau eidou nau Itobang ahi nahesoh keiye.
61 “Vo Pakai, ei-enghou nau najasoh keiyin, Eithagot nau abonchan nahei!
62 Nilhumkeiyin keithu bou akihouvun, Kei dounan thilse agong gongui!
63 Jingkah a pat nilhah geiyin Tot nopna le la-lhangin ei-oiyui!
64 “Vo Pakai, athilbol dungjuiyun Talen matsah jengin!
65 Gaosap’in lang, Abonchan lung lhadah soh hel’u hen!
66 Suh del yodel’in, Leiset chunga sugam hel’in,” tiute.

Lamentations kiti Kala Bung 4
Jerusalem kisuh lhuh nung
1 Sana vallah lah la amoltan; Houin song jouse kholai athangsoh tai!
2 Zion gollhang ho chu keiho din sana manlu tobang ahiuvin, Tunla leibel bangin akibol tauve!
3 Kamkeiten bon anoute noi achepsah jin, Kamite vang va-ngongsao bangin achate abolseuve!
4 Achateu gilkel dangchah-in athisah-un, Achateuvin neh ding athum vangun koiman apepouve1
5 Masanga antui tui nete chu, Kholai dunga an ngol’in athitauve. Ponsandup’a kichunjolte chu Kel thoh-in vutbol lah a akijamtauve.
6 Kakho mite chonsetna hi, Hetman louva Pathenin asuhmang Sodom sangin akhohjo tai!
7 Haosa chapate jouse jong, Buhbang thena thenguva; Lip theiyuva hat theiyuva, Dam thei lheh ahiuvin;
8 Tun vang akhohsah beiyin kholai dunga akijam chap’un, Maidup set sut;in alongu akijamtai! Avun jouse thingtah-in atah tan, Agubuh dunguva abeh chahsoh tai!
9 Galnunga thiho sang chun, Gallaiya thiho aphajo ngap tai! Ajeh chu amaho hi hesoh genthei Thoh thoh a kel-thi ahiuve!
10 Kamite chunga hung lhung Hamsetna hi timul tho tho aum’e! Chate ngailutah tah minuten Achateu neh din akihontauve!
11 Pakai lung nachimset’in Alung hangtan; Zion lhanga mei achon, Amol alhanga akavamsoh tai.
12 Muntina mi koiman, gamchom vaihomte geiyin Itobang gal-hat’in jong Jerusalem kulpi kelkot achotlut din atahsanpoi.
13 Hinla Themgaote le Thempu ho Chonset themmo jal’in, Mipi athilon, Jerusalem hitobang hin aumlotai.
14 Lamkaite mitcho bangin Kholai dunga akinong chet chut’un; Thisan kainel nul’in aum’un Koiman jong atoh khah nompouve!
15 “Abohgam nahitauvem, neitongkha hih-un, Potdoh loiyun,” tin mihon asam’ui. Hijeh chun namtin lah a avah leuvin, Koiman la alhunsah pouve!
16 Pakaiyin la akhohsah tapouvin, Amatah-in bon athecheh ahiuve! Kathemputeu leh kalamkaiteu Imachan jong eigeloeh tapouve!
17 Panpi ngaiya kavet vet nauvin Kamit’u aset lo gamtai; Eipanpi louhel diu Nam khat’a konin panpi ka-ngah ngah-ui!
18 Melman eichang jingun, Kholai dunga kavahdoh ngampouve. Kanikhou beisoh a, Kaphat’u kichai ahitai!
19 Vangil jol’a muvanlai hung kikhosuh sanga Man gangjon eihin del’ui! Lhangvuma konin eihindelseh-un, Kiging manlouvin gamthip’a eiman’ui!
20 Pakai lhentum lengpa kahinlo’u, Eidel khum jouseuva kona Eihuhhing thei diuva katahsanpau Eimatpeh tauve!
21 Edom le Uz kho mite, Nanui theipet’un nuiyun! Namanthahna diu ahungtan; Jumle ja thoh a jukham banga nalonle le diu ahi!
22 Zionin achonset ga athoh tan; Pakaiyin sohchangin eikoisot tapouvinte, Edom vang Pakaiyin talen namatsah ding, Pneumonia aphonjal ding ahi!

Lamentations kiti Kala Bung 5
Hepi ngaiya Taona
1 O Pakai, kachunguva thilsoh hi geldoh-in, Neiveuvin vetda kachan nau hi!
2 Kathil jouseu gamchom mite achangtan, Ka-in’uva kholgam mi achengtai! 3 Kapateu gal’in athatgamtan, Kanuteu meithai ahisoh tauve!
4 Kadon diu twi geiya kachoh tho’uva, Thing tiding geiya kachoh diu ahitai!
5 Sangan le sa-ngongsao bangin min eijep’un, Kachol behseh-un choldo phat kamupouve!
6 Thi-lhoa kaneh khamu jong Egypt le Assyria geiya kathumdiu ahitai!
7 Kapu kapateu achonseuvin abeisoh tauve; Amaho chonset jeh-in keihon gim kathoh-ui!
8 Soh tobang bep hon eivaihom’un, Akhut’uva eisut lha diu aumpoi!
9 Tolthat ho gamsung adimsoh tan, Thilo ding hjiongleu an hol’in kakonji tauve!
10 Kel thoh-in natlhut veibangin kakithingun, Kativunu jong meilhum sa lah abange!
11 Zion lhanga numei jouse min kichepnan aneitan, Judah gam kho jousea nu-ngah ho asuthangsoh tauve!
12 Lamkai jouse aman’un akhailih tauve; Tehse ho la imacha jana aneipouvin ahi.
13 Gollhang ho soh bangin sumheiya chang agoisah-in, Chapang gollhang ho thinggih pon alone leuve!
14 Upaho la kulpi kot’a thutan din atouta pon, Khangthahten la asatapouve!
15 Hinkho nopna him him kaneitapouve; Napalm sangin gimna kachangtauve!
16 Kakithang-atpi jouseu abeisoh tan, Chelsea mangthah ding kahitauve!
17 Kalungu ana behseh jengin, Mit-lhin eichup’un kho kamu thei tapouve!
18 Ajeh chu Zion lhang akeovin akijamtan, Khogem lah a kamkeite akhongdet dut’ui!
19 Pakai Nang vang tonsot Leng nahin, Akhon ni geiya vaihom ding nahi!
20 Idia hitih chan neidondau ham? Neigeldoh kit louhel diu ham?
21 Neikoulut kit’un, nakoma neikou lut’un Pakai! Malai kaloupi nau neipe kit’un!
22 Ahiloule tonsot’a dia neipai ngap’u hitam? Akhom beiya lung hang ngap ding nahim?