EZRA LEKHABU

Thupatna

Ezra lekhabu hi Thusimbu ho banjop, Babylon gama sohchang Judah mi hung kile kit ho thu le, hinkho manchah semthah le Jerusalem a Pathen houdol semphat thu kisun ahi. Athusoh dungjuiyin anoiya bang hin akihomkhen’e:

(1) Persia gam kumpipa thusah a, Babylon gama sohchang Judah mi hung kile masa loi.

(2) Houin kisah phat le thenso kin kibol, Jerusalem a Pathen houdol kisemphat.

(3) Kum phabep nunga, Pathen Danthu them, Israelte lhagao gouthil chin vettupna ding le japi kiloikhomna semphat’a, hou umdol semthah kitna dinga hung lamkai Ezra toh hung kilhon kit Judah ho thusim ahi.

Asung thu hopkhen
Sohchanna kona hung kile masa ho 1:1-2:70
Houin sah phat’a thenso 3:1-6:22
Sohchang dangto Ezra hung kile 7:1-10:44

EZRA LEKHABU BUNG 1

Cyrus-in Judahte kile kit dia asol
1 Cyrus Persia gam kumpipa ahina kum masapenin, Jeremiah Themgao kam a aseisa chu, Pakaiyin agulhunsah tai. Aban a kisun thupeh chengse hi jihdoh a muntin a simdoh a sapphongna din Pakaiyin Cyrus atildoh tai. Hijeh chun agamsung pumpia sim din:
2 “Persia gam kumpipa Cyrus thupeh chu hiche hi ahi. Van Pakai Pathenin vannoi pumpi vaipon eitungin, Judah gam, Jerusalem a Houin khat tungdoh din eingansetai.
3 Amite chengse nabonchauvin Pathenin umpiuvin. Jerusalema nacheuva, Jerusalema chibai kiboh jingsa Pathen, Israel Pakai Pathen Houin nagasah phat diu ahi.
4 Pathen mite sohchangho kile kit khattouvin panpi angai le, achenpi aheng akom hon napanpi diu ahi. Dangka sana le neh le chah, ganchate, chule Jerusalem Pathen Houin katdoh ding thilto geiya napeh diu ahi,” ati.
5 Hichun koi hijongle, Judah le Benjamin phunga phung upa cheng, Thempuho le Levite, Pakaiyin atildoh chengse chu chea, Jerusalema Pakai Houin sapha din akigotauve.
6 Achenpiu hengle kom chengin apanpiuvin; dangka, thille lo, sana, thilkeo lokeo, gancha ahon hon, adang dang thil manlu tah tah le Houin a katdoh thei thilto ding apeuvin ahi.
7 Nebuchadnezzar lengpan Jerusalem Houin a kona apohdoh a, ama pathente houin a akoisa, khon ho le lheng ho chu Cyrus hin Judahte apekit tai.
8 Cyrus hin athilkeo jouse hi leng inpia gouching pipu Mithredath apedohin, aman Judah gam vaipo Sheshbazzar khut’a apedohtai.
9 Athilpeh chengse chu: sanaa kisem, thilto dopna ding kong sang khat, dangkaa kisem kong sang khatma to, gimnamtui halna lheng som ni le ko,
10 thilto dopna ding sana khon som thum, dangkaa kisem khon sangni le ja li le som khat, chule adang dang umle bel sang khat jen to ahi.
11 Abon bonin sana le dangkaa kisem umle bel, khon chengse chu sang nga le ja li alhinge. Babylon gama konin Jerusalem jon din thilkeo hijatpi hile mipi chu Shehshbazzarin ahintol thai.

EZRA LEKHABU BUNG 2

Sohchanna kona hung kile kit ho
(Neh 7:4-73)
1 Sohchang tampin Babylon gam dalhan, Jerusalem le Judah gam, ama ama khopi cheh jon din ahung kitol tauve. Nebuchadnezzar lengpan sohchang dia akaimanguva pat Babylon gama a-inko kouva chengdu anahiuve.
2 Alamkaiyu chu-Zerubbabel, Joshua, Nehemiah, Seraiah, Reelaiah, Mordecai, Bilshan, Mispar, Bigvai, Rehum chule Baanah ahiuve. Sohchanna kona hung kile kit, Israel phung jat mong le mijat chu phungkhai khaiya akisem le:
3 Parosh chilhah mihem sang ni le ja khat le som sagi le ni ahiuvin,
4 Shephatiah chilhah jathum le som sagi le ni,
5 Arah chilhah ja sagi le som sagi le nga,
6 Pahath-Moab chilhah, Jeshua le Joab chilhah chengse sang ni le jaget to som le ni,
7 Elam chilhah sang khat le ja ni to som nga le li,
8 Zattu chilhah jako le somli le nga,
9 Zaccai chilhah ja sagi le somgup,
10 Bani chilhah jagup le somli le ni,
11 Bebai chilhah jagup le som ni le thum,
12 Azgad chilhah sang khat le ja ni to som ni le ni,
13 Adonikam chilhah jagup le somgup le gup
14 Bigvai chilhah sang ni le som nga le gup,
15 Adin chilhah jali le som nga le li,
16 Hezekiah jong kiti Ater chilhah somko le get,
17 Bezai chilhah jathum le somni le thum,
18 Jorah chilhah ja khat le somle ni,
19 Hashum chilhah ja ni le som ni le thum,
20 Gibbar chilhah somko le nga ahiuve.
21 Bethlehem kho mi ja khat le som le thum,
22 Netophah kho mi som nga le gup,
23 Anathoth kho mi ja khat le som ni le get,
24 Azmaveth kho mi som li le ni,
25 Kiriath-Jearim kho le Chephirah kho, chule Beeroth kho mi chu ja sagi som li le thum,
26 Ramah le Geba kho mi jagup le som ni le khat,
27 Michmash kho mi ja khat le som ni le ni,
28 Bethel le Ai kho mi ja ni le som ni le thum,
29 Nebo kho mi som nga le ni,
30 Magbish kho mi ja khat le som nga le gup,
31 Elam chom khat kho mi sang khat le ja ni le som nga le li,
32 Harim kho mi jathum le som ni,
33 Lod le Hadid chule Ono kho mi ja sagi le som ni le nga,
34 Jericho kho mi jathum le som li le nga,
35 Senaah kho mi sangthum le jagup to somthum ahiuve.
36 Thempu phung sunga hung kile kit chengse chu: Jedaiah chilhah, Jeshua son chengse chu jako le som sagi le thum,
37 Immer chilhah sang khat le som nga le ni,
38 Pashhur chilhah sang khat le ja ni to som li le sagi,
39 Harim chilhah sang khat le som le sagi ahiuve.
40 Levite chu: Jeshua le Kadmiel chilhah, Hodaviah son chengse som sagi le li,
41 Houin a lathem, Asaph chilhah ja khat le som ni le get,
42 Houin kelkot ngah ho -Shallum, Ater, Talmon, Akkub, Hatita chule Shobai chilhah ja khat le somthum le ko ahiuve.
43 Houin lhacha sohchang hung kile kit ho: Ziho chilhah, Hasupha chilhah, Tabbaoth chillhah,
44 Keros chilhah, Siaha chilhah, Padon chilhah,
45 Lebanah chilhah, Hagabah chilhah, Akkub chilhah,
46 Hagab chilhah, Shamlai chilhah, Hanan chilhah,
47 Giddel chilhah, Gahar chilhah, Reaiah chilhah,
48 Rezin chilhah, Nekoda chilhah, Gazzam chilhah,
49 Uzza chilhah, Paseah chilhah, Besai chilhah,
50 Asnah chilhah, Meunim chilhah, Nephisim chilhah,
51 Bakbuk chilhah, Hakupha chilhah, Harhur chilhah,
52 Bazluth chilhah, Mehida chilhah, Harsha chilhah,
53 Barkos chilhah, Sisera chilhah, Temah chilhah,
54 Neziah chilhah, Hatipha chilhah ahiuve.
55 Solomon lhacha sohchang hung kile kit chu: Sotai chilhah, Hassophereth chilhah, Peruda chilhah,
56 Jaalah chilhah, Darkon chilhah, Giddel chilhah,
57 Shephatiah chilhah, Hattil chilhah, Pochereth-hezzebaim chilhah, chule Ami chilhah ahiuve.
58 Houin lhachate chilhah le Solomon lhachate chilhah, sohchang hung kile kit mijat jathum le somko le ni alhingui.
59 Israel chilhah mong ahiule ahilouvu seichen thei hih-u jongle Tel Melah le Tel Harsha, Cherub, Addan chule Immer khopi chengsea kona sohchang hung kile kit
60 Delaiah le Tobiah chule Nekoda chilhah mihing jong jagup le som nga le ni ahiuve.
61 Thempu phunga Habaiah le Hakkoz chule Barzillai chilhah chengse hi-apuluiyun Gilead khoa Barzillai chanu akichenpia, anupapa phungmin aputsah jal’in aphungguiyu akisut thei tapoi.
62 Chutia apuluiteu chu koipen hiding seichetna anei thei lou phat’un amaho hi Thempu din akisang theitapoi.
63 Judahte gamvaipopan Thempu khattouvin Urim le Thummim asantoh masangsea, amaho hin Pathen koma katdohsa thil theng ho aneh lou diuvin aseipehtai.
64 Sohchang hung kile kit mipi abonchauvin sang somli le sang ni to jathum le somgup alhinguve.
65 Asohteu numei pasal sang sagi le jathumle somthumto sagi ahi. Hicheng lah a hin lathem cheh numei pasal ja ni apang’e.
66 Sakol ja sagi le somthum le gup ahin, sakolpol ja ni le somli le nga ahi.
67 Sa-ngongsaote ja li le somthum le nga ahin, sangante sang gup le ja sagi le som ni ahi.
68 Sohchang ho Jerusalem Pakai Houin mun ahung lhun phat’un, Houin chu amunlui ma ma sahdoh kit ding dei nan phung upa phabep’in deichom thilto abol’ui.
69 Hiche natohna ding hin ajokham cheh-in atoh-un, atodoh-u chu sana kilogram ja nga le dangka kilogram sang ni le ja get, chule Thempuho von ding ponsil ja khat alhing’e.
70 Thempuho le Levi ho, chule mipi phabep chu Jerusalem naivel’a apansauvin, tumging theme le Houin ngah a pang ho, Houin lhacha chengse chu Jerusalem naivel khopi dunga apansauvin, Israel mi adangse se vang apu apateu chenna kholui cheh a achengtauve.

EZRA LEKHABU BUNG 3

Pathen houdan kipat kit
1 Lha sagi sungin Israelte chu akho mun cheh a achengsoh tauve. Hichun Jerusalema ahung kikhom’un,
2 Pathen mipa Mose Danthu dungjuiya kilhaina gantha govam theina din, Jehozadak chapa Joshua le athemputpi Shealtiel chapa Zerubbabel chun aphunggol chanpi chengse to Israel Pathen maicham asemphauve.
3 Sohchang hung kile kit hon agamsunga chengte agin vangun, maicham chu amunlui ma maa asemphauve. Hiti hin angaidol’in jingkah nilhah seh le maicham phunga kilhaina gantha sa agou pankit tauve.
4 Abol ding dol danthu kisun bangin, lhambuh kut abol’un, niseh le anikho dia ngaicha dol kilhaina abol’uve.
5 Hicheng kalval jong hin pumgo thilto aphatcha to ding lhathah seh a to ding lom, Pakai hou nikhoa mipi khoppi angaidol’a kibol nikho jongle, chule Pakai dia deichom thilto jong akitoh jing jengtai.
6 Japin Houin sah phat apat lou lai vangin, lha sagi lhin na lhathah ni masapen nin Pakai henga kilhaina govam apantauve.

Houin sahphat kipat
7 Mipin song khengthemho le thingthembolte thalahna sum apepan’un, neh le chah olive thao jong, Tyre le Sidon khopi dunga cedar thing to lhet a Joppa geiya Twikhanglena hintol din apeuvin. Hichengse hi Persia gam kumpipa Cyrus phalpeh jal’a kiboldoh ahi.
8 Hiti hin ahung kile kit’uva Jerusalem Houin munlui ahinphah kal’u kum ni nan na atong pantauve. Zerubbabel, Joshua, agamsung miteu abonchan-Thempuho, Levite, Jerusalem a hung kile kit sohchang jousen atoh husoh keiyui. Levi mi kum som ni lhingsa chengse chu Houin sapha din anganseuve.
9 Levi mi Jeshua le achate aphunggol pi chengse to, Kadmiel le achilhah, Hodaviah phung sung mite chengse Houin sa phan apanguve. Henadad phunga Levite se sen jong apanhu’ve.
10 Mipin Houin mun aset pan phat’un, Thempuhon poncho sil’in sumkon akichoi cheh-un, Asaph phunga Levite se khutbeh choiyin ading cheh-ui. David lengpa khanga pat pehson chonna ngai dungjuiyin Pakai avahchoiyuve.
11 Pakai vahchoi la asauvin, avel vel’in aseiyun: “Pakai nun nem ahin, Israel angailutna tonsot’a um jing ahi,” atiuve. Houin mun aset pan phat’un, mitinin okhop khop’in asam’un Pakai avahchoi tauve.
12 Houin masa musa-Thempu tehse ho le phung upate, Levite chun Houin mun kisetdoh amu phat’un kap le maovin apeng lholje ju jengui. Adangsen vang kipah-in kho asam sam jengui.
13 Ahusa akithong behseh tan, gamtin gam tanga akithonjeh-in, kagin le kipa ogin akihe khen theitapoi.

EZRA LEKHABU BUNG 4

Houin sah phat ding douho
1 Judah le Benjamin melmaten, sohchang hung kile kit hon, Pakai Israel Pathen Houin asah phat’u ajadoh tauve.
2 Hijeh chun Zerubbabel le phung upa cheng to kihou din acheuvin, “Keihon jong Houin nasahhu’vinge. Assyria gam kumpipa Esarhaddonin hikoma cheng dia eisol’uva pat nangho hou Pathen chu kahouvun, akoma kihaina kabol jing jengu ahi,” atiuve.
3 Zerubbabel le Joshua chule phung upa chengin ajah-uva, “Pakai ka-Pathenu Houin sahna a neihu datauvin, Persia gam kumpipa Cyrus thupeh bangin, keihon kisah nauvinge,” tin adonbut’ui.
4 Gamsunga anacheng mihon Judahte chu kichatsah a suh lungdoi din abol’un, sah jomsah lou din agouve.
5 Persia gam vaipote ma nehguh apeuvin, atoh banu dou din asemdoh tauve. Hiti hin Cyrus lal laiya pat Darius lal lai geiyin hiti hin abol’uvin ahi.

Jerusalem semphat ding douho
6 Kumpipa Xerxes vaipoh til chun Jerusalem le Judah gama cheng, mipi douva pang hon adounau thudol jih thon apetauve.
7 Artaxerxes, Persia kumpipa lal laiyin jong Bishlam le Mithredath, Tabeel chule aloi agolteuvin kumpipa henga lekha athot’ui. Alekha chu Aramaea pavlova kijih ahin, simdoh ding teng ledoh thu ding ahi.
8 Gamvaipo Rehum le gamkai lekhasun Shimshai in jong Jerusalem thudol’a aban a kisei chengse hi Artaxerxes henga athot lhon’e.
9 “Gamvaipo Rehum le gamkai lekhasun Shimshai chule aloi agolte lhon: thutan ho le vaibol dang ho, masanga Erech le Babylon, chule Elam gam Susa khoa anacheng hoa kon,
10 chujongle thahat thunei tah Ashurbanipal’in a-in’uva kona atolmanga, Samaria khopi le Euphrates lhumlam gamkaiya achensah mihoa kon,” atiuvin ahi.
11 Alekhasut’uva aseiyu chu hiti ahi: “Kumpipa Artaxerxes henga Euphrates lhumlam gamkaiya cheng alhachate thulhut.
12 “Vo Lal chungnung, navai neina gamdanga hungkon, Jerusalema hung cheng Judahte hin hiche khopi giloutah asah phat kit’u nahet ding kadeiyui. Khopi pal asapha pan tauvin, ajoloi diu ahitai.
13 Lal chungnung, hiche khopi hi akisah phat a apal ho akikaiphatsoh teng mihon kai napeh da diu, navai neina kai hung lhasam ding ahi.
14 Nang kin a kisalel kahijeh-un hitobang aso ding kadeipouve, hijeh chun kagel dol’un
15 napu napate jihsa lekhabu kikoi jouse kholtoh dia thu nalhuhsah din kadeiyui. Kholsah le chun akhang khanga hiche khopi hin gamsung vaipo jouse le leng jouse adouva asuh lung jing mudoh-in nate. Akho mite jong hi a-itih a pat vaipoh hahsa jing ahiuve. Hijeh a chu khopi anasuhmangu ahi.
16 Kageldol’un hiche khopi hi kisapha hen, apal jouse kikaisoh le, lengpan Euphrates lhumlam gamkai sung hi nahutuh jou lou din akimui,” atiuvin ahi.
17 Kumpipan adonbut’in hitin athot’e: Gamvaipo Rehum le lekhasun Shimshai, chule Samaria khopi le Euphrates lhumlam a cheng aloi agolte jouse henga salam.
18 “Neithot’u lekha chu aledoh-un eisimpeh tauve.
19 Lekhabu lui jouse kakholsah-in, khanglui laiya pat Jerusalem khopi hi leng thunei jouse douva pang jing, akhosunga thunoh baotam bolte cheng dim jing ahina akimudoh tai.
20 Jerusalema chun leng hunei tah tah anachengin, Euphrates lhumlam gamkai sungsea vai apo jiuvin, se le kai jong anadongui.
21 Hijeh chun thupeh kanei kit kahsea hiche khopi sapha ho chu nasuh tang loi diu ahi.
22 Hiche hi bol loiyun, kalung ngaito ima sunset be aum louna din,” ati.
23 Artaxerxes lekha thot hi Rehum le Shimshai chule aloi agolte asimpeh jou jouvun, Jerusalem lam adel jel’un, Judahte khopi sahphat chu avotang tauve.

Houin sah kipat kit
24 Persia gam kumpipa Darius lengvaipoh kal kum ni chan geiyin Houin sah ban chu ahaiyin atangdel jenge.

EZRA LEKHABU BUNG 5

1 Hichepet hin Haggai le Iddo chapa Zechariah Themgaote nin Israel Pathen min panin, Judah gam le Jerusalema cheng Judahte henga thu aseipan lhontai.
2 Shealtiel chapa Zerubbabel le Jehozadak chapa Joshuan Themgaote ni thusei ajah lhon phat’in Jerusalem a Houin sah phat ajop kit’un, Themgaote nin jong akithopi.
3 Apet pet tobangin Euphrates lhumlam gamkai vaipo Tattenai le Shethar Bozenai chule aloi agolte toh Jerusalema ahungun, “Hiche Houin saa semphat ding thu napeuvah koiham?” tin ahung holtauve.
4 Houin sahna a apanhu’va miho min jong adongun ahi.
5 Ahivangin Pathenin Judahte lamkaiho aching jingin, hijeh chun Persia gamvaipo loiyin jong Darius doh toh a ipi asei het kahsea ima bolda din akoitauve.
6 Darius henga agah thot’u thu ho chu anoiya bang hi ahi:
7 “Vo kumpipa Darius, navaipohna cham leng hen.
8 “Vo lal chungnung, nahet tei dia lom chu-Judah gamsung kaga khol’un, loupipen Pathen Houin kisah phat le kulpi pal’a songtum lentah tah le inkam lentah tah pal kigen kamu’ve. Na kitong hi chingthei tah-in abol’un, aban chan achal jinge.
9 “Keihon hiche Houin sah phat a semtupna thei thuneina pea chu koi ahi-mipi lamkaiho kadonguve.
10 Hiche natoh lamkaiho chu nang kahetsah theina diuvin aminu jong kadongui.
11 “Amahon eidonbut’un, ‘Keiho hi van le leiset Pathen lhacha kahiuvin, kum tamtah masanga Israel leng thanei tah tah ho sahsa le semtupsa Houin chu kasah phat’u ahibouve.
12 Kapu kapateuvin van Pathen aphin lung hang jeh-un, Aman Babylon lengpa Nebuchadnezzar, Chaldea mite lengpa ajosah-e. Houin asusen, mipi Babylon gama gal-hingin akaitai.
13 Cyrus lengpa, Babylon gam kumpipa ahina kum masapen kumin, Cyrus hin Houin sah phatna din thu alhuhsah tai.
14 Nebuchadnezzar lengpan Jerusalem Houin a kona alah a Babylon Houin a akoi sana le dangka, chule Houin manchah jouse chu Cyrus hin alepeh soh tai. Hichengse hi Judah gam vaipoa alhendoh Sheshbazzar khut’a apedohtan ahi.
15 Kumpipan hichengse chu Jerusalem Houin anung lhut kit’a, chule Houin jong amunlui ma maa asahdoh kit din aseipeh-e.
16 Hijeh a chu Sheshbazzarin Houin mun ahung setdoh a, tuni geiya hichu kisajom jing ahin, Houin vang akijou hih laiye,’ atiuvin ahi.
17 “Hijeh chun nadeile-Babylon leng inpi lekhabu lui jouse chu, Cyrus hin Jerusalem Houin sah phat dia asei sei lou phot chetnan, kholsah-in, chuteng ilo dia pha nasah neihin hetsah tauvin,” atiuve.

EZRA LEKHABU BUNG 6

Cyrus thupeh amudoh-u
1 Hijeh chun kumpipa Darius chun Babylon gamsunga leng inpi lekhabu lui jouse khol chet din thu apetai.
2 Hichea hin Media gamkai sung Ecbatana khopia lekhajol khat amudoh-un, asunga kisun chengse chu hiti ahi:
3 “Alengvaipohna kum masapen kumin kumpipa Cyrus chun thu apen, kilhaina thilto tona dingle pumgo thilto govamna dia Jerusalem a Houin chu sah phat din aseiye. Houin chu metre som ni le sagi sanga metre som ni le sagi ma len ding ahi.
4 Houin songtum gol thum akiset jouseh le thing gol khat pansah ji ding ahi. Sum lut chu lengpa sum a peh ding ahi.
5 Chule Nebuchadnezzar lengpan Jerusalem Houin ajonia Babylon a ahinpoh lut, sana le dangka manchah jouse chu, akikoina ngai, Jerusalem Houin ma maa nungkoi kit ding ahi,” tin akisimdoh-e.

Natoh banjop dia Darius-in asei
6 Hichun Darius-in anoiya kijih bang hin adonbut’e: “Euphrates lhumlam gamkai vaipo Tattenai le Shethar Bozenai chule Euphrates lhum lam gamsunga avaipoh khompi chengse lhon henga, “Houin chu dondauvin,
7 asah ban’u jong sutang hih-un. Judah gam vaipopa le Judahte lamkaihon Pathen Houin chu masanga akisahna ngaiya satauvinte.
8 Houin sah phatna a napanhu joh diuva thu kapeh nahiuve. Natoh bangkhai louna dinga sum lut jat chengse Euphrates lhumlam gamsunga kidongdoh kai suma kona peh thu thu ding ahi.
9 Niseh le thon louhel’a, Jerusalem Thempuhon angaichat jouseu napeh jing diu ahi: bongchalgol ho hihen, kelngoite hihen, kelngoi golpai hileh, van Pathen koma pumgo thilto dia-suhlou chang le chi, ahiloule olive thao geiya napeh diu ahi.
10 Hitia hi abol’uva van Pathen santhei dol ahiya, kei le kachate chunga vangboh thumna ataona diuva kilhaina anei diuva napeh diu ahi.
11 Avaljel’a thu kapehbe nahiuve, hiche thupeh nit lou mi chu a-inkam nadodoh-uva, najumhem diu, atahsa nasutpai jeng diu ahi. Chule ain jeng jong in gemsa nakoi diu ahi.
12 Koi leng hihen, koi name hile-hiche thupeh sumoa ahiloule Houin suhmang go chan chu-Ama kihouna ding mun dia Jerusalem kilhen Pathen chun akhup athal’in leh jeng hen. Kei, Darius-in hiche thu hi kapeh ahi. Nitsoh kei ding ahi,” ati.

Houin thenso kit
13 Gamvaipo Tattenai le Shethar-Bozenai chule avaipohpi chengse lhonin kumpipa thupeh bang bangin atongdoh tauve.
14 Themgaote ni Haggai le Zechariah tilkhou jal’in Judahte lamkaihon Houin sah amachalsah lheh jengui. Israel Pathenin Persia gamvaipo-Cyrus le Darius chule Artaxerxes chengsea athupeh bangin Houin chu asajou tauve.
15 Kumpipa Darius vaipoh kal kum gupna Adar lha nithum lhin nin Houin asajouvun ahi.
16 Israelte-Thempuho, Levite chule sohchang hung kile kit chengsen kipah tah-in Houin katdohna aneitauve.
17 Houin katdohna din bongchal ja khat le kelngoi chal ja ni to kelngoi ja lin akilhaiyun. Israel phung khat cheh chonset thensona din kelchal som le nin akithoiyui.
18 Chuin Mose Danthua kisunsa bangin, Jerusalem Houin kinbol din Thempuho le Levite asemtoh-ui.

Kalchuh Kut
19 Akum kit lha masapen nisom le ni li nin sohchang hung kile kit chengsen kalchuh kut amanguve.
20 Thempuho le Leviten jong kithensona abol’un, hou thudol’a athengin aumdoh tauve. Hiti hin Leviten sohchang hung kile kit mipi le Thempuho chule amaho dingin kalchuh kut’a kilhaina ding gancha ho chu athat’uvin ahi.
21 Kilhaina sa chu sohchang hung kile kit Israelte le kho pholoute hou dalha a, Israel Pakai Pathen hou dia hung, gamsunga cheng jousen aneuve.
22 Ni sagi sungin kipah tah-in cholsolou changlhah kut amangui. Assyria kumpipa alungset sah a, Israel Pathen Houin sah phatna akithopisah abonchauvin Pakai chunga akipah soh keiyui.

EZRA LEKHABU BUNG 7

Ezra Jerusalem hung lhun
1 Kum phabeppi nung, Artaxerxes Persia gam kumpipa ahilaiyin, Ezra kiti mi khat anaum’e. Ama hi Thempu chungnung Aaron chilhah-in akiseiyin, hiti hin aphunggui asuitoh-e. Ezra hi Seraiah chapa ahin, Seraiah chu Azariah chapa ahin, Azariah chu Hilkiah chapa ahin,
2 Hilkiah chu Shallum chapa ahin, Shallum chu Zadok chapa ahin, Zadok chu Ahitub chapa ahin,
3 Ahitub chu Amariah chapa ahin, Amariah chu Azariah chapa ahin, Azariah chu Meraioth chapa ahin,
4 Meraioth chu Zerahiah chapa ahin, Zeraiah chu Uzzi chapa ahin, Uzzi chu Bukki chapa ahin,
5 Bukki chu Abishua chapa ahin, Abishua chu Phinehas chapa ahin, Abishua chu Phinehas chapa ahin, Phinehas chu Eleazar chapa ahin, Eleazar chu Aaron chapa ahi.
6 Ezra hi Pakai Israel Pathenin Mose apehsa Danthu kihil themsa, Danthu them mi ahi. Pakai Pathen vangboh achan jal’in Ezran athum chan chu ipi hile kumpipan it aneipoi.
7 Artaxerxes lengvaipoh kal kum sagi lhin kumin Israel loi khat-Thempuho le Levite, Houin a tumging thei them ho le Houin ngah ho chule natong lhacha to lhonin, Ezran Babylon a pat Jerusalem jon din ahin kipatdoh pi tai.
8 Artaxerxes lengvaipoh kal kum sagi na, lha nga nan Jerusalem ahung lhungtai.
9 Pathenin lungset’a akai hoile jal’un, lha masa nikho masapen a Babylon dalha hung ahiuvin, lha nga lhin nikho masapen hin Jerusalem ahung lhungtauve.
10 Ezran ahinkho lhumkeiyin Pakai Danthu asimin, amangchan, Danthu ho le chonchan jouse chu Israelte ahil jinge.

Artaxerxes chun Ezra apeh Lekha
11 Pakaiyin Israel apeh thupeh chengse le Danthu hechen a Danthu themtah Ezra chu Artaxerxes-in anoiya kisun chengse hi apei:
12 “Van Pathen Danthu them, Ezra Thempu henga Kumpipa Artaxerxes-in:
13 “Kalenggam pumpia Israel cha, Thempu hihen Levi mi hile ache nom chan nang to lhon a Jerusalem a che ding phalpeh ahi.
14 Kei le thumop them mi sagin, naki-nganse Pathen Danthu chu Judah gam le Jerusalem a kinitsoh hinam ti ve dia kasol’u nahi.
15 A-Houin Jerusalem a um Israel Pathen peh dia katdohsa sana le dangka thilto ho hi napoh din kei le thumop them chengsen kadeiyui.
16 Babylon gam pumpia nadondohsa sana le dangk chengse le Israelte le Thempuhon, Jerusalema a-Pathenu Houin a dia atodoh-u thilto chengse napoh ding ahi.
17 “Hiche sum ho hi chingthei tah a namanchah a-bongchal ho le kelngoichalte, kelngoite, chang le lengpitwi nachoh a, Jerusalem Houin maicham a nato ding ahi.
18 Sana le dangka valdoh chengse chu Pathen lungdei dol’a, nangle namiten namanchah theiyu ahi.
19 Houin kinbolna manchah dia nakipe thilkeo manchah chengse hi Jerusalem a Pathen henga natodoh ding ahi.
20 Houin a manchah dia nadeibe aumle-leng thil kholnaa kona nalah be thei ahi.
21 “Euphrates lhumlam gamkaiya vaipo chengse chu, ipi hijongle van Pathen Danthu them, Thempu Ezra-in athum chu thil kholnaa kona apeh diuva kaseipeh ahitan,
22 dangka kilogram sangthum le ja li, suhlou chang kilogram sang som, lengpitwi litre sang ni, olive thao litre sang ni gei le chi angaijat jat apeh diuva kaseipeh ahitai.
23 Van Pathenin a-Houin dia angaichat chan peh bukim din ching theiyin, kei le kanunga lengvaipo dingte chunga alhunghan louna ding bol’in.
24 Hiche Houin to kitimatna nei, Thempuho, Leviho, Lathem ho, kotngah ho, lhacha ho-koi hile kai nadon louhel ding ahi.
25 “Vo Ezra, Pathen peh chihna mang chan, Na-Pathen Danthu juiya chon, Euphrates lhumlam gamkai sunga chengte chunga vaihom ding le thutan din pansah-in. Aheloute chu hiche Danthu hi nahil ding ahi.
26 Na-Pathen Danthu hihen gamsung danthu hijongle anit lou tapou matzah ding: tha ding ha, sohchanga kaimang ding ha, anei agou lahpeh ding ham ahiloule songkul’a hen ding ham-khatjoh sang bolkhum ding ahi,” ati.

Ezran Pathen avahchoi
27 Ezran, “Pakai, kapu kapateu Pathen vahchoiyin um hen! Aman hitobang hin Jerusalem a Pakai Houin gelkhohna le jabolna chu Kumpipa geiyin aneisah theiye.
28 Pathen lungset jal’in kumpipan eilungset’in, athumop themho le avaibol thuneitah tah hon jong eijabol cheh-ui; Pakai ka-Pathenin lung ngamin eiumsah-in, Israel phung bulpi tamtah keito kile kit din kanopsah theitai,” ati.

EZRA LEKHABU BUNG 8

Sohchang hung kile kit ho
1 Artaxerxes lal laiya Babylon gam a sohchang, Ezra to Jerusalem jon a hung kile kit ho phung bulpi chengse chu hicheng ahiuve:
2 Phinehas phunga Gershom, Ithamar phunga Daniel; David phunga Shecaniah chapa Hattush,
3 Parosh phunga Zechariah le a-inkote mihem ja le som nga, Aphungguiyu kijihna lekhajol aum’e.
4 Pahath Moab phunga Serahiah chapa Eliehoenai, Alhonpi mihem ja ni ahi.
5 Zattu phunga Jahaziel chapa Shecaniah le Alhonpi mihem jathum,
6 Adin phunga Jonathan chapa Ebed le mihem som nga,
7 Elam phunga Athaliah chapa Jeshaiah le Mihem som sagi.
8 Shephatiah phunga Michael chapa Zebadiah le Mihem som get.
9 Joab phunga Jehiel chapa Obadiah le Mihem ja ni le som le get.
10 Bani phunga Josiphiah chapa Shelomith le Mihem ja le somgup.
11 Bebai phunga Bebai chapa Zechariah le Mihem som ni le get.
12 Azgad phunga Hakkatan chapa Johanan le Mihem ja khat le som khat
13 Adonikam phunga Eliphelet, Jeuel, Shemaiah le Mihem som gup-khonunga hung kile kit ho.
14 Bigvai phunga Uthai le Zaccur to Mihem som sagi ahiuve.

Ezran Houin a dia Levite aholdoh
15 Abonchauvin Ahava khopi geiya long lut twilam a chun kakhomin, nithum sung hikoma hin ngahmun kasem’uvin ka-umtauve. Mihon lah a Thempuho kamu nan, Levite kamudoh poi.
16 Lamkai cheh mi ko: Eliezar, Ariel, Shemaiah, Elnathan, Jarib, Elnathan, Nathan, Zechariah chule Meshullam le mihil them cheh Joiarib le Elnathan kalhengdoh-in,
17 Casiphia japi kititna mun lamkaipa henga chea, amale aloite koma Pathen Houin a kinbol ding eihinsol peh diuva gasei din kasoltai.
18 Pathen lungset jal’in amazon miphel tah, Levi mi, Mahli phunga kon Sherebiah chu eihinsol peh-un, amazon achate le asopite mi som le get to ahung kilhon’ui.
19 Amahon Merari phunga Hashabiah le Jeshaiah to, a-inkote lhon mihem som ni jen ahinsol thauve.
20 Apankhompi diuvin apu apateuva pat David lengpan Levite kithopi dia a-ngansesa Houin lhacha mihem ja ni le som ni jen jong aum’uve. Amaho hi amin cheh-u akijih cheh-e.

Ezran mipi an-ngol le taova alamkai
21 Ahava twilam a hin an ka-ngol cheh-uva, ki-ngaitom a Pathen angsunga tao ding, kakholjin nauva nunao chapangte le thil le lo bit keiya lhunna dia thum din mipi kaseipeh tai.
22 Kumpipa koma Pathen kisonpi chan Aman phatthei aboh a, Ama jamsan jouse lung phamoa talen amatsah thu kaseisa ahitan, kakholjin laiyuva melmatea kona eihong diuva sepaite ngeh ding hi kei dia jachat umtah ahitai.
23 Hijeh chun eihongbit diuvin Pathen kom a an ngol’in kataovun, Aman katao nau asangtai.
24 Thempuho lah a lamkaison ho lah a jong Sherebiah le Hashabiah to midang som kalhengdoh-e.
25 Chuin Kumpipa le athumop a pang ho, avaibolte le Israelten Houin a manchah dia eipeh-u, sana le dangka chu katedoh-in Thempuho kapetai.
26 Hiche katdoh a kapeh thil jat chu: dangka talent jagup le som nga alhingin, dangkaa kisem khon le lheng ho chu talent ja khat man ahin, sana talent ja khat man ahin, sana talent ja khat man ma alhinge.
27 Sanaa kisem khon som ni ahin, hiche ho chu dari sang khat man ahin, sum-eng valleuva kisem bel ni jong ahin, sana banga mantam gel ahi.
28 Ajah-uva kaseiyin, “Pakai, napu napateu Pathen dia atheng nahiuvin, Ama dia hicheng-dangka le sana thilkeo manchah hi deichom thiltoa kipeah ahi.
29 Houin naphah kahseuvin vetup jing jengun. Houin a Thempute indan sunga chun, Jerusalem a Israelte lamkaiho le Thempuho le Levite lamkai ho tetoh-un lang peuvin,” kati.
30 Hiti hin Thempuho le Leviten sana le dangka chule thilkeo chengse chu Jerusalem Houin a poh lut din alatauve.

Jerusalema hung kile kit
31 Lha masapen, nisom le ni ni lhin nin Ahava twilama konin Jerusalem kajontauve. Melmaten einachan’uva eidel khumna ding jouseuva ka-Pathen’un eihong jing nauve.
32 Jerusalem kalhun phat’un nithum sungin kacholdo’uve.
33 Ni li lhin nin Houin a kacheuvin, sana le dangka chule thilkeo chengse katedoh-un, Uriah chapa Meremoth Thempupa kapedohtauve. Aumpi ho chu-Phinehas chapa Eleazar le Levi mi ni, Jeshua chapa Jozabad le Binnui chapa Noadiah ahiuve.
34 Thil ijakai atetoh cheh-un, asimtoh-un, lhingkeiyin lekhajol’a ajihdoh sohkeiyuve.
35 Sohchang hung kile chengsen, Israel Pathen henga kihaina pumgo thilto govam din thilto tampi ahinchoiyui. Athilto lah-uva bongchal som le ni, kelngoichal somko le gup, chule kelngoi som sagi le sagi Israel pumpi din atoh-un; chonset’a kisuh thengna din kelcha som le ni jong atoh-ui. Gancha hijatpi hi Pakai anga kilhaina din agouvam jengun ahi.
36 Amahon kumpipa lekhajih jong chu alauvin, Euphrates lhumlam gamsunga gamvaipote le vaihomte apeh-u le, amahon jong mipi le Houin a Pathen houdol akithopi tauve.

EZRA LEKHABU BUNG 9

Namdangto kichenlou ding Ezran asimdoh
1 Hicheng akitoh chai nung hin Israelte lamkai phabep kahenga ahungun, mipi le Thempuho, chule Levi ho kitum khen louva Ammon gam le Moab, Egypt, Canaan mite, Hit miho, Periz miho, Jebus miho chule Amor miho to alenkhomu eihung seipeh-uve. Alenkhompiu miho thilbol thet umtah tah ho amahon jong abol’uve.
2 Judah miten gamchom mi numei kitchen piuvin, hiti hin Pathen mithengte chu akisubohsoh tauve. Lamkaiho le vaibolte tah jong achavai dehset’ui.
3 Hiche hi kajahdoh phat’in, lung hangin kaponsil kabottel jengin, kajangsam le kabengmul jouse kabotchaiyin, lung himo tah-in katouve.
4 Nilhah gantha kilhai phat geiyin lung lhaimo tah-in katouvin, kavel’a mipi ahung kikhom pantauvin, sohchang hung kile kitte chonset chung thudol’a Israel Pathen thusei jeh-in mipi akicha lheh jenguve.
5 Nilhah gantha kilhai phat’in, lung himo tah-in katouna konin kakipatdoh-in, botelsa ponsil chu kasil jingin, Pakai ka-Pathen lam sangin bohkhup’in kataove.
6 Kataonaa, “Vo Pathen, kajum behseh jengin na-angsunga kadahdoh ngampoi! Kachonsetnau akisethom jengtan, eichupdel tauve; asang val’in van aphasia.
7 Kapu kapateu nikholaiya pat tuni geiyin, namite keiho hi melse sen kachonse jingui. Kachonset jeh-un keiho, kalengteu, ka-Themputeu geiyin gamchom mite lengho khut noiya kalut’un, ajochan eithatgam’un, eichom gamsih seh-un, sohchangin eikai mangtauve. Tugeiya kaum bangun mitthip vetda kachanguve.
8 Vo Pakai ka-Pathenu, tun phat chomcha hi neikhoto jal’un sohchanna gama kahung jamdoh theiyun, hiche munthenga hin lung mongin kacheng thei nah nah-ui. Kasohchan khel’un hinkhothah neipeuve.
9 Soh kahiuvin, ahivangin sohchangin neikoiden pouve. Persia lengte neikhoto sah-un, na-Houin gemsa gasaphaa cheng kit din neisol sah-un, Judah gam le Jerusalema lung olmo louva cheng dingin neiphal pehsah tauve.
10 “Vo Pathen, thil hijatpi so nunga ipi kasei thei diu ham? Thupeh chengse chu kanit kit tapouve,
11 nalhacha Themgaote khut’a neipeh chengseu thupeh ho chu. Themgaoten eihil masauvin, kachenna diu gamsung chu, asunga chengten gamsung pumpia kidah le thet um jeng thil aboljeh-un gamboh ahidol aseitauve.
12 Hiche gamsung hi lo jinga, tule cha khang geiya chenpha jing dia kadeiyule, agamsung mite kichenpi lou ding, chule akhantouna diu thil him him bolpeh lou dia eihilsau ahinai.
13 Thil hijatpi so nung jong hin kachonset jal’u le kachonkhel jal’un talen neimatsah-un, ahivangin ka-Pathenu Nangman kathoh diu lomin neithohsah pouvin, neihinghoi nalaiyui.
14 Chuti ahile nathupeh chengse iti nahsahmoa bol’a hiche migiloute hi to kakichen thei diu ham? Kichengleu veng lung hang behseh jengin natin, hinghoi beihel’a neisuh gam jeng diu dol ahi.
15 Vo Pakai Israel Pathen, nadih jal’in keiho neihinghoi nalaiyui. Nakoma kathemmo nau kaphongun; Na-angsunga hung lut thei hoi kahipouve,” kati.

EZRA LEKHABU BUNG 10

Namdang kichenpi louna dia thilgon
1 Houin maiya, kap le mao puma Ezra bohkhup’a atao pet’in, Israel mi tamtah-pasal numei, chapang akimvel’a ahung kikhom’un, lhase tah-in akap cheh-uve.
2 Hichun Elam phunga mi Jehiel chapa, Shecaniah chun Ezra jah a aseiyin, “Namdang numei kichenpin Pathen tahsanna kasukeh tauve, hitajongle Israel din kinepna aum nalaiye.
3 Tun i-Pathenu koma giltah a kitepna sem’u hitin, hiche namdang numeiho le achateu hi thah mang din seiyu hite. Pathen thupeh chengse jabol jing nang le adangsen nasei seiyu chu kabol jeng diu ahi. Pathen Danthua kisun sun chu bol jeng unge.
4 Boldoh ding hi nang kin ahitai. Keiho najapi huh cheh kahiuve, kipat’in boldoh loi jengtan,” ati.
5 Ezran jong Shecaniah sei banga abolsoh kei diuvin Thempuho lamkaite le Levi lamkaiho, chule mipi lamkai chengse kihahselna abolsah pantai.
6 Houin maiya konin Eliashib chapa Jehohanan chenna mun ajonin, sohchang hung kile kit ho kitahlouje lung gimpin ageh khovah tai. Anneh twidon bol louvin akhovah-e.
7 Sohchang hung kile kit chengse, Judah gamsung le Jerusalem a umho Jerusalem a kikhopna din kouna lekha ahomdoh-un,
8 mipi lamkaiten hiche kouna hi ahomdoh tauve. Nithum sunga hung lhung lou ho chu neile gou lahpeh a, japi lah a kisimtha lou din aseitauve.
9 Nithum sung, lha ko lhin na, nisom ni nin, Judah gamsungle Benjamin gamsunga cheng jouse Jerusalema ahungun, Houin kimvel’a akikhomsoh tauve. Go hajuh a ajuh le, adap jeh le kikhopna thukhoh jal’in, amitakip akithing thing jenguve.
10 Ezra Thempupa akipatdoh-in ajah-uva thu aseitai. Aman ajah-uva, “Kitahna beiyin namdang numei nakichenpiuvin, Israel chunga themmona nalhut khumtauve.
11 Tun Pakai, napu napateu Pathen koma nachonset chengseu phongdoh-un lang, alung lhaina bol’un. Igamsunguva cheng namdangho to kikhen’un lang, namdang numei nakichenpi chengseu chu dadoh jengun,” ati.
12 Mipin ogin sangtah-in adonbut’un, “Nasei sei kabol jeng diu ahi,” atiuve.
13 Amahon asei beuvin, “Japi katam behseh jengun, go ma ahajuh valtan, tollhanga kading jou tapouve. Kombucha chonsesoh hel kahiuvin, nikhat ni ni sunga gahjo jeng thei jong ahipoi.
14 Navaibolte Jerusalema pansau hen lang hiche thu hi bolton tau hen. Hiti hin namdang numei kichenpi jouse chu phat kitep dungjuiyin, akhopi sunga lamkaite le thutanho to lhonin hung hen. Hitin kabolle, hiche thudol’a Pathen lunghan chu kisuthip thei ding ahi,” atiuve.
15 Meshullam le Levi mi Shabbethai panhu jal’a Asahel chapa Jonathan le Tikvah chapa Jahzeiah tilou, koimacha ada aumpoi.
16 Hitobang thilgon chu sohchang hung kile kit hon pha asauvin, hijeh chun Ezra Thempupan alah-uva phung upa chengse alhengdoh-in, aminu jong ajihdoh soh keiye. Lha som lhin na, ni masapen nin kholtoh apan’un,
17 lhathum sungin namdang numei kichenpi chengse thudol akholsoh tauve.

Namdang numei kichenpi ho
18 Namdang numei kichenpi ho chu-aphung phunga akisim le-Thempuho lah a: Joshua le asopite Jehozadak chate phung sunga: Maaseiah, Eliezer, Jarib, chule Gedaliah ahiuve.
19 Amahon namdang ji aneihou da ding kitepna aneiyun, achonset’u kilhaina din kelngoichal khat atohdoh-ui.
20 Immer phunga Hanani le Zebadiah ahi.
21 Harim phunga Maaseiah le Elijah, Shemaiah, Jehiel chule Uzziah ahiuve.
22 Pashhur phunga Elioenai, Maaseiah, Ishmael, Nethanel, Jozabad, chule Elasah ahiuve.
23 Levite lah a: Jozabad, Shimei, Kelalah (Kelita jong kiti ahi), Pethahiah, Judah, chule Eliezer ahiuve.
24 Lathemho lah a: Eliashib ahi. Houin kotngahho lah a: Shallum le Telem chule Uri ahiuve.
25 Adang dang ho lah a: Parosh phung sunga Ramiah, Izziah, Machijah, Mijamin, Eleazar, Malchijah chule Benaiah ahiuve.
26 Elam phung sunga Mattaniah, Zechariah, Jehiel, Abdi, Jeremoth, chule Elijah ahiuve.
27 Zattu phung sunga Elioenai, Eliashib, Mattaniah, Jeremoth, Zabad chule Aziza ahiuve.
28 Bebai phung sunga Jehohanan, Hananiah, Zabbai chule Athlai ahiuve.
29 Bani phung sunga Meshullam, Malluch, Adaiah, Jashub, Sheal chule Jeremoth ahiuve.
30 Pahath Moab phung sunga Adna, Chelal, Benaiah, Maaseiah, Mattaniah, Bezalel, Binnui chule Manasseh ahiuve.
31 Harim phung sunga Eliezar, Isshijab, Malchijah, Shemaiah, Shimeon,
32 Benjamin, Malluch chule Shemariah ahiuve.
33 Hashum phung sunga Mattenai, Mattatah, Zabad, Eliphelet, Jeremai, Manasseh chule Shimei ahiuve.
34 Bani phung sunga Maadai, Amram, Uel,
35 Benaiah, Bedeiah, Cheluhi,
36 Vaniah, Meremoth, Eliashib,
37 Mattaniah, Mattenai, Jaasu ahiuve.
38 Binnui phung sunga Shimei,
39 Shelemiah Nathan, Adaiah,
40 Machnadebai, Shashai, Sharai,
41 Azarel, Shelemiah, Shemariah,
42 Shallum, Amariah, chule Joseph ahiuve.
43 Nebo phung sunga Jeiel, Mattithiah, Zabad, Zebina, Jaddai, Joel chule Benaiah ahiuve.
44 Pasal hijat hin namdang numei akichenpiuve. Abonchan adasoh hel’un, achateu pumin asolmang cheh tauve.