NUMBERS KITI MINBU

Thupatna

Numbers kiti Minbu hin Israelte thusim, Sinai molsang adalhah-uva pat kum somli tobang hel sung, Pathenin peh dia ateppeh gam, nisolam gamgi aphah geiyu aseiye. Alekhabua kon hin melchih theitah thusim, Sinai molsang adalhah masanguva Mose’n Israelte mihing jat asimtoh le, khang khat jouva Jordan luidung niso lam, Moab gama min kisim kit thusim ahi.
Hiche mihing jat simtohte ni kah hin, Israelte Canaan gam lhanglam gamgi chin, Kadesh Barnea a acheuvin, ahivangin tepna gam chu alut thei deh pouve. Chukom gamsunga sotpi atham jouvun, Jordan luipi solam gam ajon’uvin, hikoma hin konkhatse achengden tauvin, adangsen Jordan lui gal kaiya Canaan gam lut agouve.
Minbu a kisun thusim hi, hahsa to teng kicha a lung lha jeng jeng mite um chan, Pathen le Mose douva pang, alamkai diuva Pathenin alhenpeh pau nahsah loute thusim ahi. Athusim lang khat’a sei din, amiten itobangin thu ngaidau hen, lhahsamna nei jongleu, Pathenin kitah tah le khohsah tah a abolje, chule abang kom le lung lhaso deh jeng jongle, Mose’n Pathen a kiphaldoh jenga japi kin abol thusim jong ahi.

Asung thu hopkhen
Israelte Sinai molsang dalhah got 1:1-9:33
Min kisim masah 1:1-4:49
Danthu chom chom le chonchan ho 5:1-8:26
Kalchuh kut ni na 9:1-23
Sinai molsanga pat Moab gei 10:1-21:35
Moab gamsunga thilsoh ho 22:1-32:42
Egypt a pat Moab gei kholjin thusim lahgom 33:1-49
Jordan galkai masanga hilchahna 33:50-36-32

MINBU BUNG 1

Israel mi kisim masah

1 Israelten Egypt adalhah kal kum ni na, lha ni lhin, nikho masa nin, Sinai gamthip noi, achenna ponbuh a konin, Pakaiyin Mose jah a,
2 “Nangle Aaronin Israelte hi aphung khai khai le insung dungjuiyin min simtoh lhonin. Pasal jouse chu
3 kum somni a lhah chunglamse sepai pang thei cheh ahiuvin, min jihdohsoh kei lhonin.
4 Mi sumna napanhu lhon din aphung phunga phung upa pen chu pansah lhonin.
5 Nakithopi lhon ding miho chu: Ruben phunga Elizur, Shedeur chapa,
6 Simeon phunga Zurishaddai chapa, Shelumiel,
7 Judah phunga Amminadab chapa, Nahshon,
8 Issachar phunga Zuar chapa, Nethanel,
9 Zebulun phunga Helon chapa, Eliab,
10 Joseph chapate ni: Ephraim phunga Ammihud chapa Elishama, Manasseh phunga Pedahzur chapa, Gamaliel,
11 Benjamin phunga Gideoni chapa, Abidan,
12 Dan phunga Ammishaddai chapa, Ahiezer,
13 Asher phunga Ochran chapa, Pagiel,
14 Gad phunga Deuel chapa Eliasaph,
15 Naphtali phunga Enan chapa Ahira hi diu ahi,” ati.
16 Amaho hi khangguiya phung upa cheh, Israel sepai lamkai dia khoppi lah a kilhengdoh ahiuve.
17 Hicheng mihem som le ni hitoh kithon, Mose le Aaronin,
18 lha ni na, nikho masapen nin japi pumpi akoukhom’un, mipi abonchan phung dungjuile insung dungjui cheh-in min ajih lutsoh tauve. Pasal kum somni lhingsa le achung lames min ajih lut’in, asimtoh soh keiyui.
19 Pakai thupeh bangin aboltauve. Sinai gamthip a Mose’n mipi asimin ajih lutsoh tai.
20 Jacob chapa tahpen Reuben phunga pat asim’un, aphung khai le insung dungjuiya, sepai pang thei pasal, kum som nia lhah chung lames min ajihsoh keiyule,
21 sang somli le sang gup to ja nga alhinguve.
22 Simeon phung sunga, akhai khai le insung dungjuiya sepai pang thei cheh, kum som nia lhah chung lam pasal jouse min ajihdoh soh keiyule,
23 abonchauvin sang som nga le sangko to, jathum alhinguve.
24 Gad phung sung, akhai khai le insung dungjuiya, sepai pang thei cheh, pasal kum som nia lhah chung lames min ajihdoh soh keiyule,
25 abonchan sang somli le sang nga to, jagup le som nga alhinguve.
26 Judah phungsung, akhai khai le insung dungjuiya, sepai pang thei cheh, pasal kum som nia lhah chung lames min ajih doh soh keiyule,
27 abonchan sang som sagi le sangli to, jagup alhinguve.
28 Issachar phung sung, akhai khai le insung dungjuiya, sepai pang thei cheh, pasal kum som nia lhah chung lames min ajihdoh soh keiyule,
29 abonchauvin sang som nga le sang li to, ja li alhinguve.
30 Zebulun phung sung, akhai khaile insung dungjuiya, sepai pang thei cheh, pasal kum som nia lhah chung lames min ajihdoh soh keiyule,
31 abonchan sang som nga le sang sagi to, ja li alhinguve.
32 Joseph phung sung, akhai khaile insung dungjuiya, sepai pang thei cheh, pasal kum som nia lhah chung lames min ajihdoh soh keiyule,
33 Ephrain phunga kisimdoh jat sang somli le ja nga alhinguve.
34 Manasseh phung sung, akhai khaile insung dungjuiya, sepai pang thei, pasal kum som nia lhah chung lamse min ajihdoh soh keiyule,
35 abonchauvin sang somthum le sangni le ja ni alhinguve.
36 Benjamin phung sung, akhai khaile insung dungjuiya, sepai pang thei cheh, pasal kum som nia lhah chung lames min ajihdoh soh keiyule,
37 abonchauvin sang somthum le sang nga to, ja li alhinguve.
38 Dan phung sung, akhai khaile insung dungjuiya, sepai pang thei cheh, pasal kum som nia lhah chung lamse min ajihdoh soh keiyule,
39 abonchan sang somgup le sang ni to, ja sagi alhinguve.
40 Asher phung sung, akhai khaile insung dungjuiya, sepai pang thei cheh, pasal kum som nia lhah chung lamse min ajihdoh soh keiyule,
41 abonchauvin sang somli le sang khat to, ja nga alhinguve.
42 Naphtali phung sung, akhai khaile insung dungjuiya, sepai pang thei cheh, pasal kum som nia lhah chung lamse min ajihdoh soh keiyule,
43 abonchan sang som nga le sang thum to, ja li alhinguve.
44 Hiche hi Mose le Aaron chule Israelte phungkhaiya kilhengdoh, lamkai som le nin asimdoh-u mijat ahin,
45 Israelte kum som nia lhah chung, galkon thei cheh chu
46 abonchauvin mihing sang jagup le sangthum to, ja nga le som nga alhinguve.
47 Levite chu phung dangto akisimtha pouve,
48 ajeh chu Pakaiyin a jah a,
49 “Sepai pang thei hihem nasimdoh tengle Levi phung simtha dan.
50 Hisang chun kachenna bonpuh le amanchah jouse vetup din Levite ngansen. Ponbuh le amanchah chengse aput le diu, asunga lhacha panguva, akimvel’a ngahmun akisem diu ahi.
51 Ngahmun nachon tih tih-u, Leviten ponbuh phe lhauvin tin, ngahmun thah a asondoh kit diu ahi. Midang ponbuh nailut pen pen tha jeng ding ahi.
52Israel dang ho vang aloi loiya ngahmun akisem’uva, amite lah, ponlap noi cheh a pansa diu ahi.
53 Levite vang ponbuh kimvel’a ngahmun akisem diu, angauva, koima dang nailutsah louva, Israel pumpi chunga eilunghansah da diu ahi,” ati.
54 Hiti hin Pakaiyin Mose aseipeh chengse abonchan Israelten abolsoh keiyui.

MINBU BUNG 2

Ngahmun a phungkhai kigoltoh

1 Pakaiyin Mose le Aaron jah a,
2 “Israelten ngahmun asat tengu, ama ama phungkhai cheh le aloite ponlap noiya ki-nga cheh diu ahi. Chule ngahmun chu kikhopna ponbuh kimvel’a akison cheh diu ahi,” ati.
3 Niso lam a ngahmun semding chu Judah phugn lamkai ho ahiuvin, alamkai diu, Judah phunga Amminadab chapa Nahshon ahin,
4 aseipai jat simdohsa sang som sagi le sangli to, jagup ahiuve.
5 Nahshon ban a ngahmun sem ding chu Issachar phung ahiuvin, lamkai ding Zuar chapa Nethanel ahi.
6 Asepai ding simdohsa chu sang som nga le sangli to, ja li ahiuve.
7 Abanin Zebulun phung ahin, lamkai ding Helon chapa Eliab ahi.
8 Asepaite simdohsa chu sang som nga le sang sagi to, ja li alhinguvin ahi.
9 Judah phung lamkaina kiloikhom chengse sepai sang ja khat le sang som get le sang gup to, ja li alhinguve. Judah phung pui loi hi masapen diu ahi.
10 Lhanglam a ngahmun sem ding chu Reuben phung puiloi ahiuvin, alamkai diu chu, Reuben phunga Shedeur chapa Elizur ahin,
11 asepai simdohsa sang somli le sang gup to, ja nga ahiuve.
12 Elizur ban a ngahmun semding Simeon phung ahiuvin, lamkai ding Zurishaddai chapa Shelumiel ahin,
13 asepai simdohsa sang som ngah le sang ko to, jathum ahi.
14 Abanin Gad phung ahin, lamkai ding Deuel chapa Eliasaph ahi.
15 Asepai simdohsa sang somli le sang nga to, jagup le som nga ahiuve.
16 Reuben phung lamkaina kiloikhom chengse sepai sang ja khat le sang som nga le sang khat to, ja li le som nga alhinguve. Reuben phung pui loi hi anina che diu ahi.
17 Ache masa loini le anukhah loi ni kah a levite kijot’uva, kikhopna ponbuh aput diu ahi. Aloi loiya, ngahmun kigol banga kijot’uva aponlap noi cheh a che diu ahi.
18 Nilhum lam a ngahmun sem ding chu Ephraim phung pui loi ahiuvin, Ephraim phung lamkai ding chu Ammihud chapa Elishama ahin,
19 simdohsa asepai sang som lito, ja nga ahiuve.

20 Elishama ban a ngahmun sem ding chu Manasseh phung ahin, lamkai ding Pedahzur chapa Gamaliel ahi.
21 Asepai simdohsa sang somthum le sang ni to, ja ni ahiuve.
22 Aban a ngahmun sem ding chu Benjamin phung ahin, lamkai ding Gideoni chapa Abidan ahin,
23 asepai simdohsa sang somthum le sang nga to, ja li alhinguve.
24 Ephraim phung lamkaina kiloikhom chengse sepai sang ja khat le sang get to, ja khat alhinguvin ahi. Ephraim phung pui loi hi athumnaa che diu ahi.
25 Sahlam a ngahmun sem ding chu Dan phung pui loi ahiuvin, Dan phung lamkai ding chu Ammishaddai chapa Ahiezer ahin,
26 simdohsa sepai sang som gup le sang ni to, ja sagi som gup le sang ni to, ja sagi aneiye.
27 Ahiezar ban a Asher phung ahin, lamkai ding Ochran chapa Pagiel ahin,
28 sepai simdohsa sang som li le sang khat to, ja nga aneiye.
29 Abanin Naphtali phung ahin, lamkai ding Enan chapa Ahira ahin,
30 simdohsa sepai sang som nga le sangthum to, ja li aneiye.
31 Dan phung lam kaina kiloikhom chengse sepai sang ja khat le sang som nga le sang sagi to, jagup alhinguve. Dan phung pui loise chu nukhah pen a kitol diu ahi.
32 Israelte aloi loiya kisimdoh chengse akigop khomle abonchauvin sang jagup le sangthum to, ja nga le som nga alhinguve.
33 Pakaiyin Mose aseipeh bangin, Levite chu Israel dangto akisimtha tapouve.
34 Hiti hin Pakaiyin Mose athupeh chan Israelten aboltauve. Ama ama loi ponlap noiya ngahmun asem’un, aphung phungin akitol’uve.

MINBU BUNG 3

Aaron chapate
1 Sinai molvum a Pakaiyin Mose akihoupi pet’a Aaron le Mose insung chu hitobang ahi:
2 Aaronin chapa li aneiyin, a-upa pen Nadab ahin, Abihu, Eleazar, chule Ithamar ahiuve.
3 Abonchauvin thao anu’vin Thempua pang din athensouvin,
4 ahinvangin Sinai gamthip laiya Nadab le Abihun Pakai henga dan dih louva gimnamtui ahalnam lhon jeh-in athilo lhontai. Chi khai louvin aum lhontan, Aaron damlai sungin, Eleazar le Ithamar bou Thempun apang lhon’e.

Thempu dia Levite alhendoh-u

5 Pakaiyin Mose jah a,
6 “Levite hinpuiyin, Thempu Aaron lhacha din pansah-in
7 Kachenna ponbun kin bol’untin, Thempuho toh ding tongun tin, Houbung pumpi kin jong bol’u hen.
8 Ponbuh manchah jouse vetup’un tin, Israelite dinga jong toh ding chan atoh diu ahi.
9 Levite toh ding khoh pen chu Aaron le achapate lacha pang ding ahiuve.
10 Aaron le achapate Themput kinbol’a napansah ding; midang Themput kin bol ding goa aumle thadoh ding ahi,” ati.
11 Pakaiyin Mose jah a,
12 “Tua pat Levite hi Kei ding ahiuve. Egypt chapa peng masa ho
Kathagam chun, Israel insung chapa le gancha pen masa jouse Kei din kalhengdoh-in kathensohtai.
13 Tun Israelte chapa peng masa jouse sangin Levite kalhengdoh-e; Keiya hi diu ahitai. Kei hi Pakai chu kahi,” ati.

Leviho min kisimtoh

14 Sinai gamthip noiya Pakaiyin Mose jah a
15 Levite chu phungkhai cheh le insung dol a simtoh a, pasal jouse lha khat a lhah chung lamse simtoh din aseiyin,
16 Mose’n jong asimtai.
17 Levin chapa thum aneiyin: Gershon, Kohath chue Merari,
18 atu achateuvin aminu apusoh keiyui. Gershonin chapa Libni le Shimei aneiye.
19 Kohath-in chapa li, Amram le Izhar, Hebron, chule Uzziel aneiye.
20 Merarin chapa ni, Mahli le Mushi aneiye. Hicheng min pu jouse chu a-insung kon cheh ahiuve.
21 Gershon phung hi Libni le Shimei insung kigom ahiuve.
22 Pasal lha khat a lhah chung lamse kisimdoh chu sang sagi le ja nga alhinguve.
23 Hiche phung hi ponbuh nung, lhum lam a ngahmun sem ding ahiuvin,
24 phung sunga lamkai ding Lael chapa Eliasaph ahi.
25 Amaho toh ding chu ponbuh vettup a, asunglam pondal, polam tomna, kotphunga pondal,
26 ponbuh kimvel a kidah pondal le maicham, munpi sung lutna kotphunga pondal, hicheng hi avet tup diu ahi. Hicheng kindol’a toh ding pou pou atoh diu ahijenge.
27 Kohath phung hi Amram le Izhar, Hebron, chule Uzziel insung kigom ahiuve.
28 Pasal lha khat a lhah chung lamse kisimdoh chu sang get le jagup alhinguve.
29 Hiche phung hi ponbuh lhanglam a ki-ngauva,
30 Phung lamkaiya Uzziel chapa Elizaphan pang ding ahi.
31 Amahon kitepna thingkong le dokhang, thaomeikhom, maicham ho, munthenga Thempuho manchah chengse, muntheng chungnunga lutna kotphuna kidah pondal avet tup diu ahi. Hichen thudol’a toh ding chan atoh diu ahi.
32 Levite lamkai pipu chu Themou Aaron chapa Eleazar ahi. Muntheng phunga toh kinbol’a pang ho avet tup ding ahi.
33 Merari phung hi Mahli le Mushi insung kigom ahi.
34 Pasal lha khat a lhah chung lamse kisimdoh chu sang gup le ja ni alhinguve.
35 Hiche phung hi ponbuh sah lama ki-ngaiva, phung lamkaiya Abihail chapa Zuriel pang ding ahi.
36 Ponbuh thingjolse se le golvai ho, khomho, khomko ho, chule akitopi chengse amahom avet tup diu ahi. Hicheng thudol’a bol ding toh ding jouse apoh diu ahi.
37 Khomho le khomko ho, pon khaina ho le polam a pang ding ahenna khao jouse jong amaho poh tha ding ahi.
38 Mose le Aaron chule Aaron chapate chengse ponbuh mai, niso lam a kinga diu ahi. Israelte dia muntheng phunga kinbol ding jouse phatea tohdohna dia amaho mopo diu ahi. Midang chutia bol go chan tha ding ahi.
39 Pakai thupeh a Mose’n lha khat a lhah chung lam, pasal ho phungkhai dungjuiya asimdoh chu abonchan sang som ni le sang ni alhinguve.

Chapa peng masaho mun Leviten alo

40 Pakaiyin Mose jah a, “Israelte chapa peng masa ho chu Kei ding ahi. Hijeh chun Israelte chapa peng masa ho chu Kei ding ahi. Hijeh chun Israelte chapa, lha khat a lhah chung lamse, amin cheh-in jihdoh soh keiyin.
41 Amavang amaho khel’a Levite hi kachujoh ahitai. Kei hi Pakai chu kahi! Israelite gancha peng masa khel’a jong Levite gancha pen masa ho joh ka-ngeh ahi,” ati.
42 Hijeh chun Mose’n pasal peng masa,
43 lha khat a lhah chung lamse asimdoh soh kei le sang som ni le sang ni to, ja ni le som sagi le thum alhinguve
44 Pakaiyin Mose jah a,
45 “Israelte chapa peng masa jouse khel’in Levite hi Kei din katdoh tan, chujongle Israelte gancha peng masa ho khel’in Levite gancha jouse katdoh jengin.
46 Israelte chapa peng masa ho hi Levite sanga ja ni le som sagi le thum a tamjoh jeh-un, aval chengse hi nale chohdoh ding ahi.
47 Kivaipohna kimang dungjuiya mi khat man dia dangka cheng nga nga bou hi ding,
48 sum chu Aaron le achapate napeh ding ahi,” ati.
49 Pakai sei banga Mose’n abolle,
50 dangka sang khat le jathum le som gup le nga alhingin,
51 abonchan Aaron le achapate apetai.

MINBU BUNG 4

Kohath sunga Levi phungkhai toh ding kin
1 Pakaiyin Mose jah a
2 Kohath sunga Levi phungkhai, phungbah ho le insung dol chech a mihem
3 pasal kum somthum a lhah som nga gei, Pakai chenna ponbuh a natong thei jouse simtoh din aseipeh-e.
4 Amaho kin hi thil theng chungnung ho atoh diu ahi.
5 Ngahmun chon ding teng, Aaronle achapate ponbuh sunga lut’a, kitepna thingkong maiya kidal pondal loi lhauvintin, akhuna aman diu ahi.
6 Chule savun nem khat’a akhu’va, achungvum a pondum khat akhu diu chuteng aputna ding moljol te ni athil lut diu ahi.
7 Pakai dia kitohdoh changlhah koina dia dokhang chunga pondum khat apha diu, kong jouse akoiyuva, gimnamtui khon ho, thiltona khonjom ho, chule lengpitwi bel jong akoitha diu ahi. Dokhang chunga changlhah akoi jing diu ahi.
8 Ponsan khat akhu khum’uva, savun nemsel khat akhuson kit diu, chuteng aputna ding moljol te ni athil lut diu ahi.
9 Thaomeikhom chu, thaomei pum, chaiche le dopna kong chule olive thaotei koina chengse chu pondum a akhu khum diu ahi.
10 Amachah jouse pum a savun nemsel khat’a atom diu, aputna ding golvai chunga akoi diu ahi.
11 Sana maicham chu pondum a akhu’uva, savun nemsel a akhu khum diu, chuteng aputna ding moljolte ni athil lut dingu ahi.
12 Munthenga kimang manchah jouse chom khom’untin, pondum a achun diu, savun nemsel’a atomson kit’uva, aputna ding golva chunga akoi diu ahi.
13 Maicham phunga vutdi jouse lohdo-untin, ponsan dup akhu khum diu ahi.
14 Achunga hi maicham a manchah chengse akoiyuva, khangbel le chaichekon, vutlona, chule kisilna kong akoisoh diu ahi. Chuteng savun nemsel khat akhu khum’uva, aputna moljolte ni athil lut diu ahi.
15 Ngahmun chon ding teng, thil theng ho le amanchah jouse Aaron le achapaten akhujolsoh kei tengule, Kohath phung mihon ahung put diu ahibouve. Kohath phungin thil theng ho chu atoh khah lou diu ahi, ajo thi lo get’unte. Ponbuh chon ding teng hicheng hi Kohath phugin atoh ding dol’u kin ahi.
16 Aaron Thempu chapa Eleazar chu ponbuh pumpi le thaomeiya ding thaotwi, gimnamtui, lhosoh thilto, nu ding thao, ponbuh sunga um, Pakaiya katdohsa thi jouse chunga mopo ding ahi.
17 Pakaiyin Mos le Aaon jah a,
18 “Kohath phung mite chu
19 hiche thil theng ho nailut’in thisah lo hih-un. Athilo louna diuva, Aaron le achapate lut’uva miho atoh ding cheh le aput diu aseipeh diu ahi.
20 Kohath phung mite ponbuh sunga lut hen, putdoh dia Thempuhon thil theng ho agonpet gamu jongleu thilo ding ahiuve,” ati.

Gershon phunga Levi phung toh ding
21 Pakaiyin Mose jah a
22 Gershon sunga Levite phung, phungkhai cheh le insung dol’a simtoh a,
23 pasal kum somthum a pat som nga gei, Pakai chenna ponbuh a natong thei cheh jihdoh din aseipeh-e.
24 Amaho toh ding le poh ding dol kin chu:
25 ponbuh le asunga pondal ho, polam pondal ho, achunga kikhu savun nemsel, kotphunga kidal pondal,
26 ponbuh kimvel leitol a kidah pondal le maicham, leitol’a lutna kotphunga pondal, chule thil hijat sondohna dinga manchah jouse avet diu ahi. Hicheng thudol’a toh ding chan atoh diu ahi.
27 Aaron le achapate nganse dungjuiya Gershon mihon toh ding bol ding dol kin jouse molso le molso lou chu Mose le Aaronin avet lhon ding ahi.
28 Ponbuh chung changa Gershon miho toh ding chu, Aaron Thempupa chapa Ithamar thusah dungjuiya toh amolso diu ahi.

Merari sunga Levite kin
29 Pakaiyin Mose jah a Merari phunga Levite phungkhat cheh le insung dungjuiya min simtoh ding,
30 chule Pakai chenna ponbuh a natong theina lai, pasal kum somthum a lhah chung lamse jihdoh soh hel din aseiye.
31 Thingjol jouse le golvaiho, khomho, ponbuh khomko ho
32 khomho le khomko chengse, thil khaina ho, ponbuh kemvel’a kilhung khaoho le ponbuh sondoh teng akitona chengse geiya aput diu ahi. Pasal khat cheh-in nganse dungjuiya aput ding dol aput diu ahi.
33 Merari phung sung mite toh ding chu: Aaron Thempupa chapa Ithamar hil bang banga na atoh diu ahi.

Levite min kisimtoh
34 Mose le Aaron chule Houbung lamkai chengse Levite phung thum Gershon phung, Kohath phung chule Merari phung mijat asim’uve. Amisimu chu khat lhah dungjuile insung dungjuiyin,
35 pasal kum somthum a lhah som nga gei, Pakai chenna ponbuh a natong theina lai ho ajihdoh soh keiyui.
36 Amisimdoh jat’u chu, Kohath phunga pasal kum somthum a pa som nga gei,
37 kikhopna ponbuh a natong theina lai sang ni le ja sagi le som nga alhinguve.
38 Gershon phung mi
39 pasal kum somthum a lhah chung lam, ponbuh a natong theina lai, ponbuh a natong theina lai,
40 sang ni to jagup le somthum alhinguve.
41 Abonchauva Gershon phung mi jeng ahiuve.
42 Merari phung mi,
43 pasal kum somthum a lhah chung lam, ponbuh a natong theina lai,
44 sang thum to, ja ni alhinguve.
45 Mihem hijat hi Merari son ahiuve.
46 Levite, Pakai thupeh dungjuiya Mose le Aaronin
47 Kohath le Gershon chule Merari phung miho asimdoh lhon,
48 mihem sang get to, ja nga le som get alhinguve.
49 Mose athupeh banga kisim ahiuvin; Pakaiyin Mose athupeh dungjuiyin amichang cheh put ding dol hihen poh ding dol hijongle, atoh ding kin cheh ngansena akineitai.

MINBU BUNG 5

Mihem abohho
1 Pakaiyin Mose jah a,
2 “Mihem aphah ham, hinpia thilong ham, thilong tongkha kusboh ham, hitobang ho chu ngahmun a kona kaidoh din Israelte seipeh-in.
3 Kamite lah a kachenna ngahmun suhboh louna din, hitobang hou thudol a boh mihem ho chu soldoh jengin,” ati.
4 Israelten Pakai sei angaiyun, hitobangse se chu ngahmun a konin akaidohsoh tauve.

Toh kheljal’a leona
5 Pakaiyin Mose
6 Israelte hilchahna ding thudol aseipeh-e. Pakai dia lepchea midang dih louva bol aumle,
7 achonset aphondoh a, lhingkeiya leo ding, thil asuhmangpeh pa neijat chunga ja khat lah a som ni ni abepeh kit nah lai ding ahi.
8 Aleona thil kisandingpa athi tah a, akinaipi, agamlo ding jong aneiloule, aleona jouse chu Thempu chan dia Pakai min a pehdoh ding ahi. Hiche thilpeh hi athemmopa them channa dia kikatdoh kelngoichal chungvuma kipeh be ahi.
9 Israelten deichoma thilto Pakai apeh chengseu jong thilto sanga Thempupa chang ding ahi.
10 Thilto kichoilut kisan Thempu chu akisan san chang den ding ahi.

Jinu ginmo bolna ding
11 Pakaiyin Mose aseipeh-in,
12 hitia hi Israelte ahilchah din aseiye. Pasal khattouvin ajinu pasal dangto kitimat kha banga aginmo thei ahi.
13 Ahivanga ajipa kihahsel ngam lou mai thei, ajinun a-im manga, akitimat pet lhon akimatdoh loujeh a sel agot thei ahi.
14 Ajinu mito jong hih jongle, ajipan aginmo thei jong ahi.
15 Hoijoh chu hile ajipan ajinu Thempu koma akailut ding ahi.
Pasal chun angaichat dungjuiya thilto, sakolchang kilogran khat, thaotwi chap lou, gimnamtui hal lou achoi ding, niche hi mi gingmo pasal thilto ahin, hitches kona thudih kihedoh ding ahi.
16 Thempupan numei nu chu apuiya maichan maiya adinsah ding ahi.
17 Thempupa leikhon sunga twitheng asun a, Pakai chenna ponbuh lhong leiset phabep akhodoh ding, twi chu akhat cheh chuh na dia ahal tha ding ahi.
18 Chuteng numei nu sam alhap a, changbong thilto chu akhut’a akoipeh ding; Thempupan akhut’a gaosapna thikha khon chu adop ding ahi.
19 Chutah le Thempupan numeinu jah a, “Mito najon khah loule hiche gaosapna twikha hin nasuhset da hen.
20 Mito jong nahivangle,
21 Pakaiyin namite lah a gaosap changnu hisah hen. Nahinpigui gop hen, nagilpi pom hen,
22 Hiche twikha hin nagilpi semsal hen lang, chule nahinpigui gop jeng hen,” ati ding ahi. Chutah le numeinun, “Ka-ngap’e nasei banging Pakaiyin guilhunsah hen,” ati ding ahi.
23 Thempupan hiche gaosapna thu cheng ho hi ajihdoh a lekhajem jihsa chu leikhon a twiya silngim a, khon a asunlut ding ahi.
24 Adip alai hinleh jeng thei hiche twi chu numeinu adonsah masanga,
25 Thempupan numeinu khut’a changbong thilto chu athin lhah a Pakaiya thilto dia akatdoh ding, chule maicham phunga atodoh ding ahi.
26 Chuteng deichom thilto dia khut dim ahamdoh a maicham phunga agovam ding ahi. Achainaa numeinu chu twikha adonsah ding ahitai.
27 Numeinu hi mito jongkha ahile, adip alai leh-intin, ahilpi pom a ahinpi gop ding ahi. Niche nu min chu amite lah a gaosap chang min hi ding ahi.
28 Mito jongkha lou ahivangle, imacha tilouva, chale nao ahin thei thou ding ahi.
29 Ajinu gingmoa tomna nei pasal manchah ding niche Dan hi ahi.
30 Hitobang numei hi maicham maiya dinsah ding, Thempun gaosap kin abol ding ahi.
31 Ajinu mito jonglou hijongle asal themmo lou ding, numei amo bangle athohlo tei ding ahi.

MINBU BUNG 6

Nazir a pangnom ho ding Chondan
1 Pakaiyin Mose aseipeh-in,
2 aban a kiseiho hi Israelte hil din aseiye. Numei hihen pasal hile Nazir a pan nom a kitepna giltah bolnom an Pakaiya kikatdohna aneiya,
3 ju le khamna thei jouse adon lou ding ahi. Lengpiga kisem ju pou pou adondaa, lengpiga le lengpithei changlhah a kisem aneh louhel ding ahi.
4 Nazir a apan sungsea lengpiguiya kon pou pou ajung hihen ahoh hijongle, aneh thei louhel ding ahi.
5 Nazir kihahselna dan sunga aum laisea, sam avotol da a chule khamul nemul avo louhel ding ahi. Pakaiya akikatdoh melchihna nan a-itih a akan jing ahin, asam le akhamul anemul avochai thei lou ding ahi.
6 Asam chu Pathen a akikatdoh melchihna ahin, thichenga touva kisuboh lou ding,
7 anu apa, asopi numei pasal geiyin thi jongle a-op lou ding ahi.
8 Nazir a aum sungsea, Pakai dia katdohsa ahitai.
9 Photlot louva min athiden a Nazir sam thensosa chu akisuhboh jeng tah le, ni sagi kho ngaiya, ajou teng asam le akhamul animal avochai ding, chutengle hou thudol’a theng ding ahi.
10 Niget lhin ni le, Pakai chenna ponbuh kotphung, Thempupa koma vakhu ni ham vapal ni ham ahinchoi ding ahi.
11 Thilong toh khah jeh a, Thempupan hou thudol a suh thengna dia, vacha khat chu chonset thilto dia apeh a, chule khatma chu pumgo thilto dia apeh ding ahi. Hiche nikhole lea chu aman asam akikatdoh kit ding,
12 aphat neisun chu Pakaiya Nazir panna dia akatdoh thah kit ding ahi. Nazir ahi masahna phat chu simlou ahitai, ajeh chu akatdohsa sam chu kisuboh ahitai. Thil ledoh thilto dinga kum khat lhingsa kelngoi khat ato ding ahi.
13 Nazir a pang chun akitepna phat abulhit teng, hou thudol’a bol ngai chu abol ding ahi. Ponbuh kotphonga chu
14 nolnabei cheh gancha thum: pumgo thilto dia kum khat lhingsa kelngochal khat, kum khat lhingsa kelngoi pi khat chonset jeh a thilto ding, chule kiloikhom thilto ding, chule kiloikhom thilto dia kelngoi pi khat ato ding ahi.
15 Cholsolou changlhah pocha khat dim to ato ding, changbong le olive thao to kihal changlhah lentah le olive thao to kimeh hal tha changlhah pheng neocha cha, chule chang le lengpitwi thilto jong pang ding ahinalaiye.
16 Thilto hicheng hi Thempupan Pakai agapeh ding, chonset thilto le pumgo thilto agapeh ding ahi.
17 Kelngoichal vang chu kiloikhom thilto dia Pakai koma agato ding, changlhah pocha khat ato tha ding, chang le lengpitwi thilto jong apeh tha ding ahi.
18 Ponbuh kotphunga chu Nazir chun sam akivochai ding, kiloikhom thilto kigovamna meiya chu sam ahalvam tha ding ahi.
19 Kelngoichal dah khat akihon min teng, changlhah len pheng khat le pheng neocha pocha kikoi to Thempupan Nazir pa khut a apehdoh ding ahi.
20 Chuban a Thempupan thilto hicheng hi deichom tah a Pakaiya apeh ding ahi; Dan dungjuiya Thempu chan ding themsa kelngoichal om le amal pum a thilto hicheng hi athens ahi. Chujou teng Nazir chun lengpitwi dno theitante.
21 Hicheng chu Nazir ho chondan ding dol ahi; hichea hi Nazir khat’in kihahselna kalval’a thilto ding kitepna anei khah le, akitepna bang banga abol bulhingtei tei ding ahi.

Thempu mi phitna

22 Pakaiyin Mose aseipeh-in
23 Israelte phattheina dia aphit tengu, Aaron le achapate asei diu thu phabep ahil’e.
24 Pakaiyin ching jing hen, vang boh jing hen;
25 Pakaiyin hepi hen khoto jing hen;
26 Pakaiyin lungset’in chamna pe hen.
27 Pakaiyin, “Israelte vangboh dia kamin apat’ule, phattei kaboh ding ahi,” ati.

Minbu Bung 7
Lamkaite thilto

1 Mose’n Pakai chenna ponbuh asondoh chun, ponbuh le amanchah jouse, maicham le amanchah jouse pumpkin, thao anun athenso soh tai.
2 Hichun Israel phung upa cheng, min simtohna pang ho ma ma chun
3 Pakaiya thilto ding ahinchoiyun, athiltou chu: bongchal khat cheh lamkai khat cheh to kitoh-in, bongkang khat chu lamkai ni din, bongkang gup, bongchal som le ni kaikhop set, dimset’in ahintol’uve. Hicheng ahung todoh nungun,
4 Pakaiyin Mose jah a,
5 “Ponbuh sunga natohna din thilto hicheng hi lan; atoh dungjui cheh-un, hicheng hi Levite pen,” ati.
6 Hijeh chun Mose’n bongkang ho le bongchalse se chu Levite apetai.
7 Bongkang ni le bongchal li Gershon chate apen,
8 bongkang li le bongchal get Merari chapa Ithamar sei banga abol diu ahi. Atoh ding jouseu, Aaron chapa Ithamar sei banga abol diu ahi.
9 Thil theng lengkouva put tho ding jeng ahijeh-in, Kohath chate vang Mose’n ima apepoi.
10 Lamkaiten maicham thensona thilto ding jong ahinchoiyui. Maicham a thil to ding akigot toh phat’un,
11 Pakaiyin Mose jah a, “Nisom le ni ni sunga, niseh le lamkai khat khat’in maicham thensona thil ato diu chu to din seipeh-in,” ati.
12 Nikho masapen nia thiltoh chu Judah phunga mi Amminadab chapa Nahshon ahin,
13 athilto jat dangka kong khat, shekel ja khat le somthum chule dangkaa kisem kisilna kong khat, shekel som sagi, muntheng thiltena dungjuiya kite cheh le changbong thaoto halsa cheh, changbong thilto ding dimset cheh to,
14 gimnamtui dimset sana kong, shekel som,
15 bongchalgol khat, kelngoichal khat, kum khat lhingsa kelngoichal khat, hicheng hi pumgo thiltoa to ding;
16 chonset jeh a thilto dia kelchal khat,
17 chule chamna thilto kilhaina dia bongchal ni, kelngoichal nga, kelchal nga, kum khat lhingsa kelngoichal nga alhinge. Hicheng hi Amminadab chapa Nahshon thilto jat ahi.
18 Nikho ni lhin nin Issachar phung lamkai, Zuar chapa Nethanel’in thil atoh-in,
19 athilto jat chu dangka kong khat, muntheng thiltena dungjuiya shekel ja khat le somthum gih, dangkaa kisem kisilna kong khat, shekel som sagi gih, changbong thilto dia, thao to halsa changbong dimset cheh ahin;
20 gimnamtui dimset, shekel som gih, sana kong khat;
21 bongchalgoh khat, kelngoichal khat, kum khat lhingsa kelngoichal khat, pumgo thiltoa pang ding ahin;
22 chonset jeh a thilto dia kelchal khat,
23 chamna thilto kilhaina dia bongchal ni, kelngoichal nga, kelchal nga, chule kum khat lhingsa kelngoichal nga to ahi. Hichen hi Zuar chapa Nethanel thilto jat ahi.
24 Nithum lhin nin Zebulun phung lamkai, Helon chapa Eliab’in thil atoh-in,
25 athilto jat chu dangka kong khat, shekel som sagi gih, changbong thilto dia thaoto halsa changbong dimset cheh ahin;
26 himnamtui dimset, shekel som gih, sana kong khat,
27 pumgo thilto dia bongchalgol khat, kelngoichal khat, kum khat lhingsa kelngoichal khat;
28 chonset jeh a thilto dia kelchal khat,
29 chule chamna kilhaina thilto dia bongchal ni, kelngoichal nga, kelchal nga, kum khat lhingsa kelngoichal nga to ahi. Hicheng hi Helon chapa Eliab thilto jat ahi.
30 Ni li lhin nin Reuben phung lamkai, Shedeur chapa Elizurin thil atoh-in,
31 athilto jat chu dangka kong khat, muntheng thiltena dungjuiya shekel ja khat le somthum gih, dangkaa kisem kisilna kong khat, shekel som sagi gih, changbong thilto ding thaoto halsa changbong dimset cheh ahin,
32 Gimnamtui dimset, shekel som gih, sana kong khat,
33 pumgo thilto ding bongchalgol khat, kelngoichal khat, kum khat lhingsa kelngoichal khat;
34 chonset jeh a thilto ding kelchal khat,
35 chamna kilhaina thilto dia bongchal ni, kelngoichal nga, kelchal nga, kumkhat lhingsa kelngoichal nga toh ahi. Hichen hi Shedeur chapa Elizur thilto jat ahi.
36 Ni nga lhin nin Simeon phung lamkai, Zurishaddai chapa Shelumiel’in thil atoh-in,
37 athilto jat chu, muntheng thiltena dungjuiya shekel ja khat le somthum gih dangka kong, dangkaa kisem shekel som sagi gih kisil na kong khat, changbong thilto dia thaoto halsa changbong dimset cheh ahin;
38 gimnamtui dimset, shekel som gih, sana kong khat,
39 pumgo thilto dia bongchalgol khat, kelngoichal khat, kum khat lhingsa kelngoichal khat;
40 chonset jeh a thilto dia kelchal khat,
41 chamna kilhaina thilto dia bongchal ni, kelngoichal nga, kelchal nga, kum khat lhingsa kelngoichal nga ato ahi. Hicheng hi Zurishaddai chapa Shelumiel thilto jat ahi.
42 Nigup lhin nin Gad phung lamkai Deuel chapa Eliasaph-in thil atoh-in,
43 athilto jat chu, muntheng thiltena dungjuiya shekel ja khat le somthum gih dangka kong khat, dangkaa kisem shekel som sagi gih, kisil na kong khat, changbong thilto dia thaoto halsa changbong dimset cheh ahin;
44 gimnamtui dimset, shekel som gih, sana kong khat,
45 pumgo thilto dia bongchalgol khat, kelngoichal khat, kelchal khat, kum khat lhingsa kelngoichal khat,
46 chonset jeh a thilto dia kelchal khat,
47 chamna kilhaina thilto dia bongchal ni, kelngoichal nga, kelchal nga, kum khat lhingsa kelngoichal nga to ahi. Hichen hi Deuel chapa Eliasaph thilto jat ahi.
48 Ni sagi lhin nin Ephraim phung lamkai, Ammihud chapa Elishaman thil atoh-in,
49 athilto jat chu, muntheng thiltena dungjuiya shekel ja khat le somthum gih, dangka kong khat, dangkaa kisem, shekel som sagi gih, kisilna kong khat, changbong thilto dia thaoto halsa changbong dimset cheh ahin;
50 gimnamtui dimset, shekel som gih, sana kong khat,
51 pumgo thilto dia bongchalgol khat, kelngoichal khat, kum khat lhingsa kelngoichal khat,
52 chonset jeh a thilto dia kelchal khat,
53 chamna kilhaina thilto dia bongchal ni, kelngoichal nga, kelchal nga, kum khat lhingsa kelngoichal nga to ahi. Hicheng hi Ammihud chapa Elishama thilto jat ahi.
54 Niget lhin nin Manasseh phung lamkai, Pedahzur chapa Gamaliel’in thil atoh-in,
55 athilto jat chu, muntheng thiltena dungjuiya shekel ja khat le somthum gih, dangka kong khat, dangkaa kisem, shekel som sagi gih, kisilna kong khat, changbong thilto dia thaoto halsa changbong dimset cheh ahin;
56 gimnamtui dimset, shekel som gih, sana kong khat,
57 pumgo thilto ding, bongchalgol khat, kelngoichal khat, kum khat lhingsa kelngoichal khat,
58 chonset jeh a thilto ding, kelchal khat,
59 chamna kilhaina thilto ding bongchal ni, kelngoichal nga, kelchal nga, kum khat lhingsa kelngoichal nga to ahi. Hicheng hi Pedahzur chapa Gamaliel thilto jat ahi.
60 Niko lhin nin Benjamin phung lamkai, Gideoni chapa Abidanin thil atoh-in,
61 athilto jat chu muntheng thiltena dunjuiya shekel ja khat le somthum gih, dangka kong khat, dangkaa kisem, shekel som sagi gih, kisilna kong khat, changbong thilto dia thaoto halsa changbong dimset cheh ahin;
62 gimnamtui dimset, shekel som gih, sana kong khat,
63 pumgo thilto dia bongchalgol khat, kelngoichal khat, kum khat lhingsa kelngoichal,
64 chonset jeh a thilto dia kelchal khat,
65 chamna kilhaina thilto dia bongchal ni, kelngoichal nga, kelchal nga, kum khat lhingsa kelngoichal nga to ahi. Hicheng hi Gideoni chapa Abidan thilto jat ahi.
66 Nisom lhin nin, Dan phung lamkai, Ammishaddai chapa Ahiezerin thil atoh-in,
67 athilto jat chu, muntheng thiltena dungjuiya shekel ja khat le somthum gih, dangka kong khat, dangkaa kisem, shekel som sagi gih, kisilna kong khat, changbong thilto dia thaoto halsa changbong dimset cheh ahin;
68 gimnamtui dimset, shekel som gih, sana kong khat,
69 pumgo thilto dia bongchalgol khat, kelngoichal khat, kum khat lhingsa kelngoichal khat,
70 chonset jeh a thilto dia kelchal khat,
71 chamna kilhaina thilto dia bongchal ni, kelngoichal nga, kelchal nga, kum khat lhingsa kelngoichal nga to ahi. Hicheng hi Ammishaddai chapa Ahiezer thilto jat ahi.
72 Nisom le khat nin Asher phung lamkai, Ochran chapa Pagiel’in thil atoh-in,
73 athilto jat chu, muntheng thiltena dungjuiya shekel ja khat le somthum gih, dangka kong khat, dangkaa kisem shekel som sagi gih, kisilna kong khat, changbong thilto dia thaoto halsa changbong dimset cheh ahin;
74 gimnamtui dimset shekel som gih, sana kong khat,
75 pumgo thilto dia bongchalgol khat, kelngoichal khat, kum khat lhingsa kelngoichal khat,
76 chonset jeh a thilto dia kelchal khat,
77 chamna kilhaina thilto dia bongchal ni, kelngoichal nga, kelchal nga, kum khat lhingsa kelngoichal nga ahi. Hicheng hi Ochran chapa Pagiel thilto jat ahi.
78 Nisom le ni nin Naphtali phung lamkai, Enan chapa Ahiran thil atoh-in,
79 athilto jat chu, muntheng thiltena dungjuiya shekel ja khat le somthum gih, dangka kong khat, dangkaa kisem, shekel som sagi gih, kisilna kong khat, changbong thilto dia thaoto halsa changbong dimset cheh ahin;
80 gimnamtui dimset, shekel som gih, sana kong khat,
81 pumgo thilto dia bongchalgol khat, kelngoichal khat, kum khat lhingsa kelngoichal khat,
82 chonset jeh a thilto ding kelchal khat,
83 chamna kilhaina thilto ding, bongchal ni, kelngoichal nga, kelchal nga, kum khat lhingsa kelngoichal nga to ahi. Hicheng hi Enan chapa Ahira thilto jat ahi.
84 Maicham thao niu nia Israel phumg lamkaihoa kona kitohdoh maicham thensona hung lut chengse chu: dangka kong som le ni, dangkaa kisem, kisilna kong som le ni, sana kong som le ni,
85 muntheng thiltena dungjuiyin dangka kong khat cheh chu shekel ja khat le somthum thum ahin, dangkaa kisem kisilna kong khat cheh chu shekel som sagi cheh ahin, abonin dangka kong jouse chu shekel sangni le ja li alhinge:
86 gimnamtui dimset, sana kong som le ni chu khat gih shekel som som ahin, sana kong chengse shekel ja khat le som ni alhinguve.
87 Pumgo thiltoa kitohdoh gancha chu: bongchal som le ni, kelngoichal som le ni, kum khat lhingsa kelngoichal som le ni, changbong thilto chengse to, chonset thilto dia kelchal som le ni,
88 chamna kilhaina thilto dia kiton gancha chu: bongchal somni le li, kelngoichal somgup, kelchal somgup, kum khat lhingsa kelngoichal somgup ahin; hicheng hi thao akinu jouva maicham thensona kitohdoh thilto jat ahi.
89 Ponbuh sunga Pakai to kihou dia Mose alut chun, Kitepna thingkong husin, Vantil lhaneite ni lim kisem kah a konin Pakai thusei ajai.

Minbu Bung 8
Thaomei ho kitundoh

1 Pakaiyin Mose jah a,
2 “Aaronin thaomeikhom ho’a thaomei atun lut teng, masang lam asalvah theina dia tun din seipeh-in,” ati.
3 Aaronin asei angaiyin, thaomei ho chu thaomeikhom mai lam ngan atunge.
4 Thaomeikhom chu Pakaiyin Mose avetsah bang banga, atoa pat alu geiya sehcha kikhengjol sel ahi.

Levite suhthenga katdoh

5 Pakaiyin Mose jah a,
6 “Israelte lah a konin Levite lhengdoh-in lang suthengin,
7 hitin bol’in: kisuh thengna twi thin khumin, atimul jouseu votol din seipeh-in, chule ponsil akisop diuvin hil’in. Chuteng hou thudol a theng diu ahitai.
8 Chuteng bongchalgol khat akaiyuva, olive thao to halsa chang thilto angaichat jat achoi diu; chule chonset jeh a thilto dia bonghal khat nakailut be ding ahi.
9 Chutah le Israel khoppi pumpi khomin lang, Levite chu kachenna ponbuh maiya dinsah-in.
10 Israel mipin Levite lubuh a khut angap diu,
11 Leviten kana atoh theina diuva, Aaronin Israeltea kon deichom thilto banga Leviho katdoh a athens ding ahi.
12 Leviten bongchalte ni lubuh a khut angap diu, bongchal khat chu chonsrt thiltoa kitoh a, khatjoh chu pumgo thilto dia kitoh ding, Levite suh thengna kinbolna kinei ding ahi.
13 “Levite chu deichom thilto bangin neipen, chule Aaronle achapate vettupsah-in.
14 Hitobang hin Israelte lah a konin Levite lhengdoh in chuteng keiya hi diu ahitai.
15 Levite nasuh thenga nakatdoh teng, ponbuh sung natonga pang thei diu ahitai.
16 Amaho hi Israelte peng masa pasal ho khel’a kachu lhah ahintan, Kei chan mong mong ahitauve.
17 Egypt gama amite peng masa kathagam chun, Israel insunga chapa peng masa jouse le gancha peng masa jouse kasithengsoh-in kaki lhentai.
18 Tua hi Israelte peng masa ho khel’a Levite kalah ahi,
19 chule Israelte dia ponbuh a natong ding le, muntheng phung nailut’ule athigamlo na diuva kona vetup dinga, Israelite deichom thilto banga kalah Levite vetup dia Aaronle achapate ka-nganse ahi,” ati.
20 Pakaiyin Mose thu apeh dungjuiyin, Mose le Aaron chule Israel mipin Levite chu athensotauve.
21 Levite jong amaho akisuthengun, ponsil jouse akisop thengun, chule Aaronin deichom thilto bangin Pakaiya akatdoh tai. Hou thudol’a suh thengna kin jouse Aaronin abolpeh-in ahi.
22 Levite chung changa Pakaiyin bol dia Mose aseipeh jouse mipin abolsoh keiyui. Hijeh chun Aaron le achapate lamkaina ponbuh sunga kinbol ding Levite jong alo lhingtauve.
23 Pakaiyin Mose jah a,
24 “Levite kum som nia lhah chung lamse, kachenna ponbuh sunga toh kin bol’a pang cheh diu,
25 kum som nga lhin teng vangle toh bang ding ahitauve.
26 Toh aban nungle ponbuh a natong asop Leviho kitopi thei nantin, amatah vang kinbol’a pan lou ding ahi. Hitobanga hi Levite toh ding nasemtoh ding dol ahi,” ati.

Minbu Bung 9
Kalchuhkut niveina

1 Israelten Egypt adalhah kal’u kum ni na, lha masa sungin Sinai gamthip laiya Pakaiyin Mose jah a,
2 “Aman ding dan kisem dungjuiya Israelten kalchuhkut,
3 tu lha nisom le ni li ni, nilhah lam a pat aman diu ahi,” ati.
4 Mose’n jong kalchuhkut mang din mipi aseipeh-in,
5 lha masa, nisom le ni li, nilhah lam a pat, Sinai gamthip laiya kalchuhkut aboltauve. Ijaikai Pakaiyin Mose aseipeh bang bangin abol’uve.
6 Alah-uve thilong tongkha, hou thudol’a boh, miphabep ana-um’un, niche nikho hin kalchuhkut mang thei louvin aumtauve. Mose le Aaron henga acheuvin,
7 “Keiho thilong tongkhan kaboh tauve, hijongle Pakai koma thilto bol’a iti Israelte lah a kapanda thei diu ham?” agatiuvin ahi.
8 Mose’n, “Pakai thupeh kajah kahsen kho ngaita diuvin,” ati.
9 Pakaiyin Mose Jah a
10 Israelte seipeh din ahil’in, “Koipen hiuvin, natu nachate hile thilong tongkhaa boh ham, ahiloule khol tham jeh a mang thei louvan, kalchuhkut aman nom nah lai le,
11 lha khat nung, lha ni na, nisom le ni li, nilhah lam a pat aman thei ahi. Kalchuhkut chu cholsolou changlhah le anche kha manga naman diu ahi.
12 Neh moh themcha khovahsah dauvin, kalchuhkut sa agu khat cha heh bong hih-un. Adan kisem dungjuiyin kalchuhkut manguvin.
13 Bohna jong bei, khol tham jong hilou, ahivanga kalchuhkut mang lou chu kamite lah a simtha lou ding ahi; ajeh chu aphat chan kahenga thilto ahinchoipoi. Achonset chu athoh lo tei ding ahi.
14 “Nalah-uva kholjin min kalchuhkut aman noble, adan kisem bang banga aman thei ahi. Gamsung mi hehn, kholjin hile, man ding dan chu tha khat cheh ahi,” ati.

Meikou tobang meilom
(Ex 40:34-38)

15 Pakai chenna ponbuh kisondoh nikhoa pat meilom khat’in ahung tomin,
16 jan theng meilom chu meikou bangin akimui.
17 Meilom kitoldoh tih tih Israelten ngahmun achon’un, meilom hung kitol lhahna pen pen a asongdoh kit jiuve.
18 Pakai thupeh-in japin ngahmun achon’un, Ama thupeh ma man ngahmun asongdoh jiuve. Meilomin ponbuh atom laisen ngahmun a chun aum’uve.
19 Ponbuh chunga meilom akidal sot jep teng, Pakai thu nit’in, akitoldoh deh pouve.
20 Abangkom le meilom chu nikho chomcha bou ponbuh chunga akidaljie; a-i a-i chu hitale, Pakai thupeh dungjuiyin bou ngahmuna um le kichonle abol’uve.
21 Abang le meilom chu nilhah a pat jingkah geiyin bou aum jin, meilom kitoldoh tih tih japi akitoldoh paiji tauve. Meilom kihodoh doh le mipi kitolji ahiuve.
22 Ni ni ham, lha khat ham, kum khat ham, asot jep hijongle, ponbuh chunga meilom kidal laisen mipi akitolpon, meilom kihodoh teng bangle akitolhi tauve.
23 Pakaiyin Mose thu apeh bulhit nan japi ngahmun chon le tundoh abol’uve.

Minbu Bung 10
Dangka summon ni

1 Pakaiyin Mose jah,
2 “Japi koukhomna le ngahmun chonna mut ging din dangka summon khengin.
3 Sumkon ni akimut huilhum jen jun teng, kachenna ponbuh kotphung, nang koma Houbung pumpi hung kikhom diu ahi.
4 Sumlon khatseh kimut tengle vang, phung lamkai chengse nahenga hung kikhom diu ahi.
5 Sumkon gin akimut tongtet le, ngahmun niso lama kigol phungse se kipatdoh ding ahiuve.
6 Niveinaa summon gin tongtet a akimut kit le, lhanglam a kigol phungse se kipatdoh diu ahi. Hita hi ngahmun chonna dia tongtet tet a sumkon mut ding ahin;
7 Houbung pumpi koukhomna dia vang sumkon huilhumjen jun a mut ding ahi.
8 Sumkonte ni chu Aaron chapati, Thempuhon amut diu ahi. “A-itih geiya dia sumkon mut ging dan hiti ding ahi.
9 Nagam sunga gal’in nadel khum’uve, kihuhhingna dia pang nahiule, galsatna din sumkon mut gingun. Kei, Pakai na-Pathen’un pan ping ting namelmateuva kon a khuhhing ding nahiuve.
10 Kipa thanop ni, lhathah kut ham, adang dang hou thudol kut ham teng, pumgo thilto le kiloikhom thilto napeh tengu sumkonte ni namut ging diu ahi. Chutah le kapanpi ding nahiuve. Kei, Pakai na-Pathenu kahi,” ati.

Israelte ngahmun chon

11 Israelten Egypt adalhah kal kum ni na, lha ni lhin, nisom ni lhin nin, Pakai chenna ponbuh chunga meilom akitoldoh-in,
12 Israelte jong Sinai gamthip dalhan kholjin ban akitol kit tauve. Paran gammanga meilom chu aki-ngai.
13 Pakaiyin Mose aseipeh bangin Israelte akitol’un,
14 akitol phatseh-ule, akijot ngai bangin akigol jiuve. Judah phung ponlap noiya kijot ngai loise chu amasan aloi loiyin akitol’un, Amminadab chapa Nahshon alamkaiye.
15 Issachar phunga Zuar chapa Nethanel alamkaiyin,
16 Zebulun phunga Helon chapa Eliab alamkaiye.
17 Chuteng ponbuh phet lhah a, ponbuh pu ngai, Gershon le Merari phungin aput’uva kijot pai diu ahi. Phungin aput’uva kijot pai diu ahi.
18 Aban a Reuben phung ponlap noiya kijot ngai loise, aloi loiya kitol’uva, Shedeur chapa Elizur lamkai ding ahi.
19 Simeon phunga dia Zurishaddar chapa Shelumiel lamkai ding,
20 Gad phunga dia Deuel chapa Aliasaph lamkai ding ahi.
21 Chuteng Kohath phunga Levite thil theng chengse pua kitol diu ahi. Ngahmun kit ding alhun tengule, ponbuh chu asondoh kit diu ahi.
22 Aban a Ephraim phung ponlap noiya kijot ngai loise, aloi loiya kitol’uva, Ammihud chapa Elishama lamkai ding ahi.
23 Manasseh phung dia Pedahzur chapa Gamaliel lamkai ding,
24 Benjamin phunga dia Gideoni chapa Abidan lamkai ding ahi.
25 Achaina keiya Dan phung noiya kijot ngai loise, sepai pumpi nunglam ngah chengse, aloi loya kitol diu, Ammishaddai chapa Ahiezer lamkai ding ahi.
26 Asher phunga dia Ochran chapa Pagiel lamkai ding,
27 Naphtali phunga dia Enan chapa Ahira lamkai ding ahi.
28 Hitobanga hi Israelten ngahmun chon a akitoldoh tengu, aloi loiya kijot diu ahi.
29 Anupa pa, Midian mi Jethro chapa Hobab jah a Mose’n, “Pakaiyin peh dia eiseipeh-u mun jon a kitol ding kahitauve. Pakaiyin Israel phattheisah dia atepsa ahi, kilhon’u hitin, gou kihoppi nauvinge,” ati.
30 Hobab’in, “Kanompoi, kagam a kile kit tange,” ati.
31 Mose’n, “Neidalha hih-un, ngahmun samna thei mun jong hea nahin, neilamkai theiyu ahi.
32 Kilhon leu hen, Pakaiyin eipeh-u vangboh chengse kihom ding ihiuve,” ati.

Israelite kitoldoh

33 Israelten lhang theng Sinai mol dalhan nithum jen akitol tauve. Pakai Kitepna thingkong amasanguva apu masa jingun, ngahmun sem thei mun aholpeh jinge.
34 Ngahmun tin a akitoldoh tih tih-ule, Pakaiya kon melom chu sun teng achunguva akidal jinge.
35 Kitepna thingkong aputdoh tengu Mose’n, “Kipatdoh-in Pakai, namelmate nocheh-in, deilouva noble deljamin!” atijie.
36 Thingkong angah tengu Mose’n, “Vo Pakai, Israel insung mi asang sang henga hung kile kit tan,” tin akoujie.

Minbu Bung 11
Taberah kiti mun

1 Gim hesoh athoh nau jeh-in Pakaiya japi akiphintauve. Pakaiyin ajahdoh phat’in alung hangin, mipi chunga mei-am asung lhai. Meiyin ngahmun lang khat khon geiyin akachai jenge.
2 Panpi ngaichan japi Mose henga aka jengule, ama Pakaiya ataovin, hichun mei amittai.
3 Hijeh chun niche lai mun chu Taberah asah lo’uve. Ajeh chu hikoma hi alah-uva Pakai meikou hung deojah jeng anahi.

Mose’n lamkai som sagi alhendoh

4 Gamchom mi phabep Israelte to akilhon khauve. Hiche ho hin sa aducha behseh jengun, Israelite geiyin akiphin pan’un, “Sa them khat beh kinei tave leh!
5 Egypt a nga idu du kinea, man beiya kimu jinga! Changmai ho le donkho ho, louthul ho, louthul tilneo tillet ijat jat kinei hitam?
6 Tua vang kel lih ding kahitauve. Neh ding chah ding la aumpon, niseh le manna jeng manna jeng!” atiuve.
7 Manna hi pathikhom mu tobang, alimso twikepchang lheh lheh ahi.
8 Manna chu jan teng ngahmun a chu daitwi to hung lhah tha, ajing jingkah teng mipin akilokhom’uva, agot’uva, agoi bongu,
9 ahon min tengule changlhah a jong akisemjiu ahin, olive thaova kikang changlhah tuiyin atuiye.
10 Japi ponbuh kotphung cheh a, ahon hon a ding, kiphin ho thusei ajan, achunguva Pakai lung phatmo jeh-in Mose alung na lheh jengin,
11 Pakai henge, “Idia hibanga melsea neibol? Ibol’a kei dia lung himo nahim? Ipi dinga hiche mihem hijat pi neichinsah khoh ham?
12 Kasema le kahinsa la ahipouvin! Ipi ding pen a naosen don a don a, kaban a kadop’a apu apateu nateppeh gamsung gei lhut dinga nei-ngase ham?
13 Mihem hijat vahna kham sa hoilama kalah ding ham? Amaho hi la sa duchan apengjeng jun’uve.
14 Kachangseh-in mihem hijat mo pothei ponge. Keidin ahahsa valtai!
15 Hita neibol dingle, neibolgimna thilse kathoh kit louna dingin, lungset’in neithat jengin,” ati.
16 Pakaiyin Mose jah a, “Japi lamkai themsa pasal som sagi koukhomin, kachenna ponbuh a Kei henga hinpuiyin, nakom a dinsah-in.
17 Hikoma chu hung kumlha kakihoupi ding, nang kapehsa lhagao phabep ladoh ing ting, amaho kahoppeh ding ahi. Chuteng amahom hiche mite kinbolna nakithopi thei diu, nachangseh a natoh lou ding ahitai.
18 Tun mipi jah a chun, ‘Jing nikhoa din kisuthengun, neh ding sa namu diu ahitai. Sa ducha napenjen jun’uva, Egypt gamsunga nom nasahjoh thu naseiyu chu Pakaiyin ajatai. Tua Pakaiyin sa napeh-uva neh ding nanei diu ahi.
19 Nikhat ni ni, ni nga, nisom, ahiloule nisom ni mai tobang naneh diu ahipon,
20 lha lhumkei, nanh hom a lotdoh gei, chim behseh a nanat lo geiyuva naneh diu ahi. Nalah-uva cheng Pakai don louva, Egypt dalha louhel’a um phajoa seiya nakiphin jal’uva hitobang chu soh ding ahi,’ tin seipeh-in,” ati.
21 Mose’n Pakai jah a, “Mihem sang jagup jen kipuiya, lha khat jen neh khop ding sa peh dia nasei mong ham?
22 Bonghon le kelngoihon thagam ding hijongle aneh khop diu hinam? Twikhanglen a nga jouse jong nekhop nauvin tem?” ati.
23 Pakaiyin, “Kathahat akhon um am? Kasei hi agui lhun le guilhun lou muvah tan nate!” ati.
24 Chuphat’in Mose apotdoh-in Pakai thusei chu japi agaseipeh-e. Lamkai som sagi akhomin, ponbuh kimvel’a aumsah-e.
25 Hichun Pakai meilomin ahung kitol khan Mose akihoupi. Mose apeh sa lhagao phabep aladoh-in, lamkai som sagi chu ahoppeh-e. Achunguva lhagao achuh hin Themgaote bangin a-aojah jengun, sotpi vang abol pouve.
26 Lamkai som sagi lah a ni: Eldad le Medad chu ngahmun a aumden lhonin, ponbuh a ache lhonpoi. Ahivangin alumna lhon ngahmun a jong chun achung lhona lhagao ahung chun, amani jong Themgao thusei bangin a-aojah lhon’e.
27 Gollhang khat apotdoh-in Eldad le Medad umchan chu mi agahil’e.
28 Aneo laiya pat Mose kithopi jing Nun chapa Joshuan aseiyin, Mose jah a, “Amani khu phoh tangin kapu!” ati.
29 Mose’n jong, “Kei toh ding chu nakin ham? Pakaiyin amite jouse lhagao pe hen, Themgao thusei bangin aojah jeng leu katiset chutoh!” ati.
30 Chujouvin Mose le Israel lamkai som sagin ngah mun cheh ajon kit tauve.

Pakaiyin vamim alha

31 Photlot louvin Twikhanglen lama pat Pakaiyin hui ahin nunsah-in, huiyin vamimte ahin lhoh lhoh jengin, tol tongkha deh deh, metre khattou sangin tol chunga alenguve. Vamimte chu ngahmun chung dungle kimvel dunga achu’vin, akimvel lhunghel’in kilometre phachom thim thim a akithe chansoh keiyuve.
32 Chuche nilhumhel, jan khovah, ajing nilhum hel’in mipin vamin aman’un, kilogram sang khat sanga lhomjo lohdoh aumpouve. Ngahmun kimvel’a vamimte chu akiphou got’uve.
33 Neh ding muinam nengtah a anei vangun, achunguva Pakai alung hangin, alah-uva natset alansah tai.
34 Hikoma chu sa ducha gongsan jal’a thilo ho avuijeh-un, “Milopte lhankhuh,” tin akiminvotai.
35 Chukoma konin japi akitol’un, Hazeroth a ngahmun asemtauve.

Minbu Bung 12
Miriam talen mat

1 Mose’n Cush mi numei khat akichenpi jeh-in, Miriam le Aaronin adem lhontai.
2 Miram le Aaronin, “Pakaiyin Mose hengseh a thu asei ham? Eiho koma jong asei mo ham,” ati lhon’e. Athusei lhon Pakaiyin ajahdoh tai.
3 Mose hi mi num nem, leiset’a mi nun nempen khat ahi.
4 Photlot louvin Pakaiyin Mose le Aaron chule Miriam jah a, “Nathum’un kachenna ponbuh a khun hung potdoh ta diuvin,” ati. Achuele
5 Pakai jong meilom khat’in ahung kitol lhan, ponbuh kotphunga adingin, “Aaron! Miriam!” tin ahinkoutai. Ani lhon a amazon cheh lhonle,
6 Pakaiyin, “Kasei ding hi ngaipha lhonin, nalah-uva Themgaote um laiyin ahenguva kilah-in mu neisah-in chule mangin jong kakihoupiji’e.
7 Kalhacha Mose kakihoupi vang chutimai mai ahipon, kamite Israel pumpi po dia ka-nganse khum jeng ahibouve.
8 Hijeh chun kimaiton kakihoupin, thulem mang louvin, kichentah-in kaseiji’e. Aman jong kamel geiya amudoh ahitai! Iti kalhacha Mose douna thu nasei ngam jeng lhon ham?” ati.
9 Achung lhona Pakai alung hangtan, akitoldoh doh-in
10 ponbuh kimvel’a meilom akihoh doh tan, Miriam vun jouse photlot louvin natsen atomjol’in, buhbang bangin abangtai. Miriam punchanga phahsoh jeng amudoh hin Aaronin
11 Mose jah a, “Vo kapu, kho pholouva kachonset lhon vangin hibangin talen neimatsah lhon hih-in.
12 Miriam hi athisa peng, tahsa lang beisa bangin umrah hih beh-in,” ati.
13 Mose Pakai anga apengjah jengin, “Vo Pathen, Miriam damsah-in!” tin asam tai.
14 Hichun Pakaiyin, “Miriam hi apan maiya chil phi khum le ni sagi jumle ja athoh tei ding ahi. Hijeh chun hapta khat sunga din ngahmun polam a thah doh-un lang, hapta kichai teng hinpuilut kit tauvin,” ati.
15 Miriam chu ni sagi sunga din ngahmun polama athahdoh-un, ahung nunglut phat lhin kahsen mipin ngahmun achontapouve.
16 Chujouvin Hazeroth dalhan Paran gamthip noiya ngahmun asemtauve.

Minbu Bung 13
Canaan gam ve-lhi ho
(Duet 1:19-33)
1 Pakaiyin Mose jah a,
2 “Israelte kapeh got Canaan gam ve-lhi din phung somle nia lamkai khat cheh sol’in,” ati.
3 Pakai thupeh bangin Paran gamthip noiya pat, Mose’n Israelte lamkai somle ni asoltai.
4 Amisol ho chu: Reuben phunga Zaccur chapa Shammua,
5 Samien phunga Hori chapa Shaphat,
6 Judah phunga Jephunneh chapa Caleb,
7 Issachar phunga Joseph chapa Igal,
8 Ephraim phunga Nun chupa Hoshea,
9 Benjamin phunga Raphu chapa Palti,
10 Zebulun phunga Sodi chapa Gaddiel,
11 Joseph phunga Manasseh son a kon Susi chapa Gaddi,
12 Dan phunga Gemalli chapa Ammiel,
13 Asher phunga Michael chapa Sethur,
14 Naphtali phunga Vophsi chapa Nahbi,
15 Gad phunga Machi chapa Geuel: hicheng hi ahiuve.
16 Amaho hi Mose’n gam ve-lhi dia asol ahin, Nun chapa Hoshea hi amin Joshua asahtai.
17 Gam ve-lhi ding ho asoldoh chun Mose’n ajah-uva, “Hikoma kon kitol touvin, Canaan gamsung lhanglam se se jotpauvin, chujou teng thinglhang gamsung gakhol’uvin.
18 Itobang gam, mihem ijat cheng, iti hat hiuvam gaveuvin.
19 Gampha ha gamse ham, miho kholen mai maiya cheng ha, kulpi kaisa khopi jenga cheng ham phochensoh keiyun.
20 Gamsung chu leipha hina, thinggam jeng ham vechen’uvin. Gamsunga gamga phabep beh hinpo lut teiyuvin,” ati. Achy hi lengpithei ga min kipatdon ahitai.
21 Gam ve-lhi ding ho akitol touvin, lhanglam gamsung, Zin gamthip lai, Rehob gei, sahlam a Hamath lamlen gei akholsoh tauve.
22 Gamsung lhanglam gamkai akhol’un, Hebron ahinphauvin, hikoma hin Anak son milente: Ahiman, Sheshai, chule Talmai chilhah ho agamudoh-uve. Hebron kho hi Egypt gamsunga oan kho sanga kum sagi masanga kiphutdoh ahi.
23 Gam ve-lhi hon Eshcol phai ahin jot pauvin, hikoma hi lengpiga boh khat asat’ule, agih behseh-in, mi nin moljol’in ajonguve. Kolbuthei phabep le theichang phabep jong ahinpouve.
24 Israel lamkaiten lengpiga boh asatnau ahijeh-in, hikom mun chu Eshcol phai tin akihe dentai.
25 Nisom li sung gam akhol jou phat’un, gam ve-lhiho ahung kile kit’un,
26 Paran gamthip lai, Kadesh mun, Mose le Aaron chule Israel khoppi pumpi heng ahun lhungtauve. Agam vet’u aseiyun, gamga ahinpoh jong mipi avetsah tauve.
27 Gam vehon Mose jah a, “Gamsung kagakhol’un, gampha le leipha ta ahi; agamga jong niche ho hi ahi.
28 Gamsung miho vang ahat theiyun, khopi tentah tah aneiyun, phatah a kulpi kaikhumsa jenga achenguve. Tijat umcheh-in, gamsunga chun milen, gin umrah tah Anak chilhahte kamudoh-ui.
29 Gamsung lhang lam se sea Amalekte achengun, thinglhang gamsunga Hit miho le Jebus mite, chule Amor mite achengui; Canaan mite vang Mediterranea Twikhanglen pang dongle Jordan vadung panga achenguve,” atiuvin ahi.
30 Mose henga kiphinho chu Caleb’in aphoh thip’in, “Tutah a gamsung chu delkhuma lah jeng ding ahi; jo na khamset tha inei nauve,” ati.
31 Ahivangin Caleb to lhon hon, “Khuche gamsung mite sat jou dan ihi naisai pouve; eiho sanga gamchenga hatjo ahibouvui,” atiuve.
32 Hiti hin agamvet’u chu dih lou tah-in Israelte koma thu athe thangsoh tauve. Amahon, “Agamsunga chengte neh khop jong aputpot. Mihem kami chan’u asan a sang thei,
33 milen tah tah, Anak son ho jong kamu’ve.
Akom’uva keiho khaokhopi te cheng bep bouvin eigel teiyunte,” atiuve.

Minbu Bung 14
Israelte kiphin
1 Jan khovah hel’in japi lunghemin akaptauve.
2 Mose le Aaron koma akiphin’un, “Egypt gam ham hikom gamthip lai ham a kithiden jengle phajo ngap dinga!
3 I-khoh a Pakaiyin chuche gama khu eipui mongu ham? Pasal jouse galmuna min eithatsoh-untin, iji ichateu gal-hinga akaibep diu ahitai. Egypt a kile kitjo leu hen phalou ham?” atiuve.
4 Hiti hin, “Lamkai khat kilhen u hitin, Egypt a kile kit taute!” atiuvin ahi.
5 Hichun Mose le Aaron, japi angsung laitah a abohkhup lhontai.
6 Chutah chun Nun chapa Joshua le Jephunneh chapa Caleb, gam ve-lhia pangte nin lung nat jal’in aponsil abottel lhonin,
7 mipi jah a chun, “Kagavet’u chu gampha chungnung ahi.
8 I-chunguva Pakai alung lhaisel le eipuiyuntin chuche gampha tah le leipha tah khu eipeh jengdiu ahi.
9 Pakai doumah bol hih beh-un, chule agamsunga chengte jong kicha hih hel’un. Baitah a ijo diu ahibouve. Pakaiyin eilhonpiuva agam mite panpi doile kao jouse eijosah diu, nakichat lou diu ahi,” ati lhontai.
10 Ahinla khoppi pumpi amani chu songa selih jeng din ago’uvin, ahivangin photlot louvin ponbuh chunga Pakai vah email laiya hung kilah amu tauve.

Mose’n mipi ataopeh

11 Pakaiyin Mose jah a, “Hiche miten itih chan geiya eidonda diu ham? Alah-uva thil kidang datmo hijat kabol nung geiya jong itih chang geiya eitahsanda diu ham?
12 Natgol kalhut khuma kathagam ding, hijongle nang vang amaho sanga tamjo le hatjo nam khat bulpia kasemdoh ding nahinai,” ati.
13 Ahivangin Mose’n Pakai koma, “Nathahatsan a niche mite hi Egypt a kona nahinpuidoh ahi. Egypt miten chutia nabol jeng chu jadoh leu,
14 agamsunga chengte hi seipeh paiyunte. Pakai, nangin neilhonpiu la hiche miten ajatauvin, kachunguva nakison jeng jong kichentah a kimu ahin, sun teng meilhanga, jan teng meikouva neilhonpiu jong min amu cheh ahitai.
15 Tun namite thatgam jengle chun, naminthan jasa namtin vaipin,
16 peh dia natepsa gamsung nalhut jou loujeh a gamthip laiya nathagama asei diu ahi.
17 Hijeh chun kataove Pakai, nathahat jedoh-in lang, neitepnauva,
18 ‘Lung hangvah Pakai kahipoi, giltah a mi ngailua kitah jing, doumah bolle chonset ngaidam kahi. Hijongle mipate chonsetna chu atu acha, khangthum khangli geiya talen matsah tei kahi,’ nati chu bolsoh jon.
19 Hijeh chun Pakai, Egypt gamsung adalhah-uva pat ngaidam jing nahin, nalungset kikhel lou dungjuiya hiche mite hi na-ngaidam dia taova kahi,” ati.
20 Pakaiyin, “Ahile nasei bangin ngaidam tange.
21 Hijongle hing jinga leiset dim jing kahijeh-in kitep a kasei ahi,
22 hiche ho khat cha jong Canaan gamsung lut lou diu ahi. Vah email laiya kahung kilah mu ta, Egypt gamle gamthip laiya datmo kidang hijat kabol mu’uva, eiphin phin jengun, kasei ngai louhel’in aum’ui.
23 Apu apateu kateppeh gamsunga lut louhel ding ahiuve. Eidonda ho khat chabeh Canaan gamsung lut lou diu ahi.
24 Kalhacha Caleb’in lung chomel pua Kadia kitah jing jeng ahijeh-in, agavettohsa gamsunga pui lut ing ting, ason apah-in gamsung alo diu,
25 tulai Amalekte le Canaan mite banga phaicham jouse achenpha diu ahi. Jing teng kilekit’un, Aqaba twikol lam ngan, gamthip lam jontauvin,” ati.

Akiphin jal’uva Pakaiyin mipi talen apeh

26 Pakaiyin Mose le Aaron jah a,
27 “Ichan geiya hiche migiloute hi kahenga kiphin phin diu ham? Akiphinu ka-ngai chimtai!
28 Hitin seipeh-in, ‘Hing jing Pakai kitep kahi, nataopeh bangin bol nange. Kei-Pakaiyin kaseidoh ahitai.
29 Nathiuva hiche gamthip noi nalongu kithe thangsoh ding ahi. Kakoma nakiphin jeh-uva, kum somnia lhah chunglam koimacha khuche gamsung nalut louhel diu ahi.
30 Hiche gama khu cheng dia katepsa nahiuvin, hijongle nang ho vang, Caleb le Joshua tilou, khat cha lut pouvin nate.
31 Nachateu gal’in amat din naseiyun, amaho chu nadeimosau gamsunga kapuilut ding inmun a anei diu ahi.
32 Nang ho vang hiche gamthip laiya thigam ding nahiuve.
33 Nathigamhel kahseuva, kum somli sung, natu nachateu gamthip laiya vah thai leuva, nakitah lou jeh-uva gim hesoh athoh diu ahi.
34 Kum somali sunga gim hesoh nathoh diu, kum khat chu nagamchotnau nisomli sunga nikhat to kikot a kisimpeh ding ahi. Chuteng Kei dou hahsatje hedoh tauvin nate.
35 Vo Kei dou dia kikhom migiloute, hitia kabol diuva kitep kahi. Hiche gamthip noiya hi khat khat’a nathisoh hel diu ahi. Kei-Pakaiyin kaseidoh ahitai,’ tin aseiye, tin,” ati.
36 Mose’n gam khol’a anasol mi phabep chun thuse ahin lhut jeh-un Pakai dounan mipi akiphin lotauve.
37 Pakaiyin natset alhut khumin athigamlo tauvin ahi.
38 Gam ve-lhi mi somle ni lah a Joshua le Caleb bou ahingdoh-e.

Israelte galkon masah
(Deut 1:41-46)

39 Pakaiyin ahou nau Mose’n mipi aseipeh phat’in, chase tah-in akaptauve.
40 Ahingvagin jingpi tah-in athouvun, thinglhang gamsung delkhum gon, “Pakaiyin eisol nau mun a gal kon goa kahiuve. Kachonset’u kaheuve,” atiuve.
41 Ahinla Mose’n, “Achutile tua ida Pakai sei ngai lou nahiuvam? Gal jou pouvin nate.
42 Kon hih-un Pakaiyin napanpi pouve. Namelmateuvin najo diu ahibouve.
43 Amalekte le Canaan miho to nakisat tengu, galmun a thiden ding nahiuve; Pakai najui nom loujeh-uva napanpi lou diu ahi,” ati.
44 Ahivangin Pakai kitepna thingkong le Mose’n ngahmun dalha hih jongle mipi akontei teiyun, thinglhang gam anotou tauve.
45 Hiti hin chugama cheng Amalekte le Canaan miten ahindel khum’un, Israelte ajo’uvun, Hormah geiyin ahindel peh tauve.

Minbu Bung 15
Thilto danje

1 Pakaiyin Mose chu
2 apeh diu gamsunga amanchah diuvin dan phabep apei.
3 Pakai lung deiya neh le chah gimnamtui thilto hihen, hou thudol’a thilto hile, deichom thilto hihen, kitepna molsona thilto hile, pumgo thilto dinga jong bongchal jong, kelngoichal jong, kelngoi jong kelcha jong Pakaiya nato thei cheh-u ahi.
4 Koi hile pumgo thilto dia kelngoi ham, kelcha ham Pakai dia hinkaipen penin,
5 gancha khat to to tha dia, olive thao litre khat to halsa changbong neldisel kilogram khat cheh le lengpitwi litre khat to ato tha ding ahi.
6 Kelngoichal akito teng, lhosoh thilto dinga olive thao litre khat le akeh to halsa changbong neldisel kilogram ni to hitha ding ahin,
7 lengpitwi litre khat le akeh jong hitha ding ahi. Hitobang thilto gimvui nam hi Pakaiyin ajahnom lheh ahi.
8 Pumgo thilto ding hihen kiloikhom thilto dia kitepna bulhit ding thilto ding hile, bongchal khat Pakai henga akitodoh teng,
9 lhosoh thilto dia changbong neldisel kilogram thum le olive thao litre ni to hitha ding,
10 lengpitwi litre ni jong hi ding ahi. Hitobang thilto gimvui nam hi Pakaiyin ajah nom lheh ahi.
11 Hitobang cheh a hi bongchal hihen kelngoichal hile, kelngoi ahiya kelcha ahiya, totha cheh ding ahi.
12 Gancha khat val akitodoh dingle akitothapi ding thil dang jong akitoh dia tamsah ding ahi.
13 Pakai ngai nom gimnamtui thil to, lhosoh thilto chan le Israel pou pouvin hitia hi bol cheh ding ahi.
14 Itih phat hijongle, chom khat ding ham, khanga ding ham, gamchom mi nalah-uva chengin Pakai ngai nom dia neh le chah thilto abol teng, semsa dan dungjuiya abol ding ahi.
15 Hitobang dan semsa hi akhanga nanit diu, nalah-uva cheng gamchom min jong anit ding ahi. Nangho le amaho Pakai mitmua tha khat cheh nahiuve;
16 nangho chena dan le chondan jouse amahom jong aman diu ahi.
17 Pakaiyin Mose chu
18 Israelte apeh got gamsunga aman diuvin hitobang dan ho hi anapei.
19 Lhosoh ga neh le cheh thei chan a phabep bep deichom thilto dia Pakai min a koidoh ding ahi.
20 Changlhah nakan tengu, changthah kilam, changlhah kikang masapen lhon khat chu Pakai dia deichom thiltoa peh ding ahi. Changphol soh masapen jong hitobanga hi deichom thilto dia peh ding ahi.
21 A-itih a jong hiche deichom thilpeh hi Pakai dia napeh jing diu ahi.
22 Pakaiyin Mose apeh hiche chondan ho khat tou hi hetoh louvin khat’in bolda hen,
23 Israel khoppi pumpkin jong Pakaiyin Mose apeh dan ho hi bolda kha taleh,
24 khoppin hetoh louva bolda anei khah jeh-uva, pumgo thilto, Pakai lung lhaina dia, bongchal khat le akitothapi ding lhosoh thilto le lengpitwi thilto atotha diu ahi. Hiche kalval’a jong chonset thilto dia kelchal khat atobe diu ahi.
25 Khoppi pumpi dia Thempun thensona abol ding, hetoh louva thil bol khel jeh a, Pakai koma chonset thilto le neh le chah thilto ahinchoi tah jeh-uva, ngaidam chang diu ahi.
26 Thil bol khelna koi hile apan cheh jeh-uva, Israel khoppi pumpi le alah-uva cheng gamchom miho geiya ngaidam chang diu ahi.
27 Mihem khatseh hetoh louva chonset bolaumle, chonset thilto dia kum khat lhingsa kella khat ato ding ahi.
28 Maicham phunga Thempun thensona kin abol ding, chonsepa chu ngaidam chang ding ahi.
29 Israel mi hihen gamchom mi hijongle, hetoh louva chonse jouse hitobang dan dunjuiya hi kibol cheh diu ahi.
30 Amavang koi hile, Israel mijong, gamchom mijong, henasa saa chonse vang chu, Pakai noise bol’a kila ding, thadoh ding ahi;
31 ajeh chu henasa san Pakai seisa apaiyin, lungtup mongin Pakai thupeh khat apalkeh tai. Ama le ama kithat ahibouve.

Choldo nikho palkeh mi

32 Israelte gamthip laiya atham sungun pasal khat Choldo nikho palkeh a thingchom amandoh-ui.
33 Hichepa hi Mose le Aaron chule Israel khoppi angsunga akalut’un
34 i-lo ding hettoh kah din mi angasah-uve.
35 Hichun Pakaiyin Mose jah a, “Hichepa chu tha tei tei ding; ngahmun pam a khoppi pumpi songa selih ding ahi,” ati.
36 Pakai thupeh dungjuiyin ama chu ngahmun pama akaidoh-un khoppi pumpi songin asep lih tauve.

Ponjen badol

37 Pakaiyin Mose jah a,
38 “Israelte seipeh-in, ‘Naponsil ningkoiyuva tuhpah bat’un lang, tuhpah a chun pondum khaiyuvin. A-itih geiya hitia nabol jing diu ahi.
39 Tuhpahho chu melchihna panga, namudoh chan’uva kathupeh chengse nageldohsah diu, nanit jing diu, Kei dalhaa naning nop’a anaconda dingu ahi.
40 Hiche tuhpah jemho hin kathupeh chengse nanitsah theiyuva, Keiya nahi jing thei diu ahi.
41 Pakai na-Pathenu kahin; na-Pathenu hina dia Egypt a kona kahinpuidoh nahiuve. Kei Pakai chu kahi,’ tin aseiye, tipeh-in,” ati.

Minbu Bung 16
Korah, Dathan chule Abiram doumah bol

1 Levi phunga Kohath chilah Izhar chapa Korah hinMose douna aboltai. Reuben phung mi thum, Eliab chapate ni Dathan le Abiram, chule Paleth chapa On chun ahu’vin,
2 khoppi het cheh, khoppi lhendohsa, Israel lamkai mi ja ni le som ngan ma abetauve.
3 Mi hijat hi Mose le Aaron henga ahung kikhom’un a-angsun lhona, “Naval behseh lhontai! Khoppi sung mi aboncha Pakaiyin ahin, Pakaiyin eiumpi jingui. I-bol’a Pakai khoppi mipi chunga Mose kivaipohsah nahim?” atiuve.
4 Aseiyu Mose’n ajah jah-in tolse nan akineiyin ataotai.
5 Korah le anungjuite jah a, “Jing jingkah teng koipen Pakaiya ihiu aman eivetsah nauvinte; alhensa ami, maicham phung lut thei ding eihetsah diu ahinai.
6 Jing teng nangle nanung jui chengsen gimnamtui halnamna lheng kichoiyuvin asunga meihol le gimnamtui koiyun, maicham phunga domlut cheh-uvin.
7 Chutah le eiho koipeh hi Pakai lhensa ihiu kiveute. Aval thanghoi chu Levite nangho joh nahiuve!” ati.
8 Mose’n Korah jah a aseiben, “Ngaiyuvin Levite!
9 Maicham phung kom nailut’a, Pakai ponbuh sunga kinbol ding le japi lhacha kinbol’a pang dia, khoppi lah a kona atumbeh a, Israel Pathenin nalhendoh-u hi thil neocha gel nahiuvam?
10 Nangle Levite jouse hiche gunchena hi napeh-u ahin, tun Themputna geiya lah din nago’uve ong!
11 Aaron koma nakiphin’u hi, tahbeh monga nangle nanung juiten Pakai doumah nabol’u ahibouve,” ati.
12 Mose’n Dathan le Abiram agakousah vangin, amanin, “Hung lhon hih veh tang!
13 Gampha chubang, Egypt a kona hikoma gamthip laiya thisah gam dia neipuidoh-u jong chimlou nahim? Kachunguva vaihom ding jong kigo nalai nahi-ong?
14 Gampha laiya la neipuilut pouvin, lho ding loule lengpilei jong neipepouve; tu geiya lhep lhah neigot nah laiyu ham! Kahung lou diu ahi!” ati lhontai
15 Mose alung hangtan Pakai koma, “Hiche miho thilto khatcha sanpeh hih-in. Khatcha kajoubol aumpouvin, asa-ngan’u khat jeng cha jong kala khapoi,” tin aseiye.
16 Mose’n Korah jah a, “Jing teng nangle nanung jui mi ja ni le som nga chu Pakai chenna ponbuh a nahungtei tei diu; Aaron jong hung ding ahi.
17 Gimnamtui lhutnamna lheng nakipat cheh-uva, asunga gimnamtui nakoi diu, maicham phung nahin lhut cheh diu ahi,” ati.
18 Hijeh chun amichan cheh-in gimnamtui lheng akipat’un, asunga meihol le gimnamtui akoiyun, ponbuh kelkot phunga Mose le Aaron to adingkhom’ui.
19 Hichun Korah hin khoppi pumpi akhomsoh keiyin, mipi jong ponbuh kelkot phunga chun Mose le Aaron lam ngan ading’ui. Photlot louvin Pakai vah emlai laiyin khoppi pumpi henga ahung kilah-in,
20 chule Pakaiyin Mose le Aaron henga,
21 “Hiche mipi chu hinda lha loi lhonin, tutah a kasuhgam jeng ding ahiuve,” atitai.
22 Ahivangin Mose le Aaron, tol a mai sulut leuvin ataovin, “Vo hinna Bulpi Pathen! Mi khat chonset vanga idia khoppi pumpi chunga lung nahim?” ati lhon’e.
23 Pakaiyin Mose jah a,
24 “Mipi hin Korah le Dathan chule Abiram ponbuh a-otdoh loi diuvin seipeh-in,” ati.
25 Hichun Mose le Israel lamkaise se Dathan le Abiram henga acheuvin.
26 Mose’n mipi jah a, “Hiche migilouho hi dalhauvin, anei agouvu khat cha jong thamkha hih hel’un. Achutiloule amaho chonset jeh a namnathat tha diu ahi,” ato.
27 Hijeh chun mihon Korah le Dathan chule Abiram ponbuh chu ajamsan tauve. Dathan le Abiram ahung potdoh lhonin, ajite achateu to ponbuh kotbul’a adinguve.
28 Mose’n mipi jah a, “Kacham cham a thilbol hilouva, hichengse bol dia Pakai sol kahi hitia hi nahetdoh diu ahi.
29 Amaho hi mithi ngaiyin thiuhen Pathen talen peh jeh hida le, Pakai sol hiponge.
30 Amavang Pakaiyin jah khah lou khat abol’a, leiset apokeh jenga, amaho le thil alo jouse val lhum jenga ahin laiya noimigam ajotsuh jengu vangle, hiche hon Pakai donda aneiyu nahetdoh mong mong diu ahi,” ati
31 Mose thusei jou jouvin, Dathan le Abiram dinna leiset apohkeh paiyin,
32 amani le a-insung mi jouse, Korah nunjui se se le anei agouvu abonchan aval lhumsoh heltai.
33 Hiti hin ahing laiyin mithigam ajonsuh tauvin, anei agou jouse jong akitolsuh tauve. Leiset akichin, alim amel’u akimukit tapoi.
34 Akaginu ajah phat’un, chukoma um Israelte ajammangsoh tauve. Kho asam’uvin, “Jamloiyun! Leiset hin eiho geiya eival lhum theiyu ahi!” atiuve.
35 Chujongle Pakaiyin meikou deoje jun ahinlansah-in, himnamtui choiya mi ja ni le som nga chu aleogamhel tai.

Gimnamtui lheng

36 Hichun Pakaiyin Mose jah a,
37 “Aaron chapa Eleazar chun mei leolih miho gimnamtui lheng ho khu gapaidoh, gimnamtui lhenga meihol chengse mundang khat’a gasung lha hen ajeh chu gimnamtui lheng ho khu atheng ahi.
38 Pakai maicham a akichoilut jeh a thengsoh ahitauve. Achonset jeh a kithatgam miho gimnamtui lheng ho lakhomin lang, kong bangin khengpeh dengin, maicham khu nan mangin. Hiche hi Israelte gihsalna hijing nante,” ati.
39 Hijeh chun Elazar Thempun gimnamtui lheng jouse achom khomin, kongpeh bangin akhengpeh-in, maicham khu nan asemtai.
40 Aaron chilhah hilou koiman maicham nailut’a Pakai dia gimnamtui lhut nam louna din hiche hi Israelte gihsaln ahitai. Abol’a umle Korah le aloite banga asuhgam ding ahi. Hicheng hi Pakaiyin Eleazar bolsah dia Mose athupeh banga kibol ahi.

Aaronin japi ahuhdoh

41 Ajing nikhon khoppi pumpi Mose le Aaron chunga kiphinin, “Pakai mite phabep nathat lhontai,” atiuve.
42 Mose le Aaron koma baotam bol dia akikhop kim phat’un, ponbuh lam avet’ule, meilomin atom’a, Pakai vah emali laiya hung kilah amu’ve.
43 Mose le Aaron ponbuh maiya aga ding lhon’e,
44 chule Pakaiyin Mose jah a,
45 “Hiche mite chu hin otdoh lhonin, amun laitah a kathaden ding ahiuve!” ati. Mose le Aaron bohkhup’in tol’a mai sulut’in atao lhinin,
46 Mose’n Aaron jah a, “Gimnamtui lheng kilah loiyin, maicham phunga mei-al galoh-in, mei-al chunga gimnamtui phabep sung lut’in. Kinloitah-in mipi henga choiyin, amaho suh thengna kin gabol’i. Kin loiyin! Pakai alung hangtan, natgol hung langpan ahitai,” ati.
47 Mose sei bangin Aaronin gimnamtui lheng kilah-in, japi kikhom lailung tah a alhai luttai. Natgol hung lang amudoh chun, mei-al chunga gimnamtui asung loiyin, mipi suh theng kin abol paitai.
48 Gimnamtui kilhut chun natgol ahaiyin, Aaron chu mithi le mihin ho kah tah a adinge.
49 Mithi jat sangson le sang li to ja sagi alhinguve. Hiche ho le Korah to thitha ho chu kisimkhom lou ahiuve.
50 Natgol ahai phat’in, ponbuh kotbul’a Mose koma Aaron ahung kittai.

Minbu Bung 17
Aaron tenggol

1 Pakaiyin Mose jah a,
2 “Israelten, Israel phung khat cheh lamkai tenggol, tenggol som le ni nahinchoipeh diuvin seiyin. Ama ama tenggol cheh chunga amin sutpeh soh keiyin.
3 Chule Levi tenggol a chun Aaron min jih-in. Phung lamkai khat cheh tenggol khat khat chang diu ahi.
4 Ikimuto ji na mun, kitepna thingkong mai, kachenna ponbuh sunga tenggol ho chu gakoiyin.
5 Kadei lhen pen pen tenggol chu hung mum ding ahi. Nang douna Israelte kiphin phin hi hitia hi kasuh tang got ahi,” ati.
6 Mose’n Israelte aseipeh le, phunglhai lamkaise sen tenggol khat cheh apeuvin, tenggol somle ni alhingin, Aaron tenggol jong hiche ho chutoh akoithauve.
7 Tenggol chengse hi ponbuh sung, Pakai kitepna thingkong maiya chun Mose’n agakoitai.
8 Ajinga ponbuh sunga alut
Aaron tengol pah (17:8)
le, Levi phung thalhenga, Aaron tenggol koi mum chu Mose’n agamui. Ana mumin, apah lhan, jonmot pahchansel abangtai.
9 Mose’n tenggol chengse ahin choidoh-in Israelte avetsah tai. Aveuvin, lamkai hon atenggol cheh akilah kittauve.
10 Pakaiyin Mose jah a, “Aaron tenggol chu kitepna thingkong maiya gakoi kit’in. Israelte chunga kiphin hon a-ngah dau le thi tei ding ahiu gihsalna koiden ding ahi,” ati.
11 Pakai thupeh bangin Mose’n aboltai.
12 Israelten Mose jah a, “Akichaisoh kahitauve!
13 Ponbuh nailut jouse geiya thi tei ding ahile, athisa ma ma kahitauve!” atiuvin ahi.

Minbu Bung 18
Thempuho le Levite kin

1 Aaron jah a Pakaiyin, “Kachenna ponbuh sung kinbol thudol’a themmona jouse nangle nachapate chule Leviten napoh diu ahi; Themput kinbolna mo vang nangle nachapaten bou napoh diu ahi.
2 Nangle nachapaten ponbuh kin nabol tengu natohhu diuvin, na-inkote, Levi phunga mite puilut’in.
3 Leviten nang kinbolle ponbuh sung kinbol mopohna anei diu, muntheng phunga thil theng ho le maicham vang atoh khah da diu ahi. Atham khah-ule, amaho le nang nathilo dingu ahi.
4 Nakithopiuva, ponbuh sung kinbol dingdol atoh bulging diu, atong dia lom lou min vang natoh khompi lou ding ahi.
5 Israel kalunghan den kit louna dia, nangle nachapate seh seh-in Muntheng le maicham kin nabol diu ahi.
6 Nang dia thilpeh banga Israelte lah a na-inkote Leviho lhendoh peh Kei kahi. Thensosa ahitauvin, ponbuh sunga atoh diu lom amolso dingu ahi.
7 Amavang Themput kinbol, Muntheng chungnunga kikoi maicham kindol pou pou hi nangle nachapate changseh-in nabol diu ahi. Hicheng hi nangho kin ahi, hiche dinga chu Themput kinbol kapeh nahiuve. Alomlou koi hile thil theng nailut pen pen chu thadoh jeng ding ahi,” ati.

Thempuho chandol

8 Pakaiyin Aaron jah a, “Pumgo thilto hilou, deichom thilto eikipe chengse kapeh ding hi gel jingin. Nangle nachilhah ho akhanga nachan diuva kapeh ahi.
9 Maichama govamlou, thil theng chungnung kitohdoh lah a, thilsoh thilto, chonset thilto, themmo thilto, hicheng hi nachan ding ahi.
10 Hitobang thilto chengse hi, athengin gel’un lang, muntheng laiya pasal cha chan bou naneh diu ahi.
11 “Hicheng belap a, Israelten kahenga deichom thilto atodoh jouseu jong nang ding ahi. Nangle nachate numei pasal, tonsot’a nachan diuva kapeh ahi. Na-insung mi, hou thudol’a theng jousen aneh thei ding ahi.
12 “Kumseh a Israelten lhosoh ga amasa phapen eipeh chengseu: olive thao, lengpitwi, chule chang aboncha kapeh nahi.
13 Abona nang ding ahin, na-insung mi, ou thudol’a theng jousen netheiyinte.
14 “Israel lah a ajeh beiya kahenga kitoh thilto chengse aboncha nang chan ding ahi.
15 “Cha masa le gancha peng masa, Israelten eipeh jouse nang ding ahi. Amavang cha masa chu lhatdoh man kilah a nalepeh ding, chule gancha peng masa jong nolna um ho lhatdoh man lah a nanungpeh ding ahi.
16 Cha masa lhatdoh man ding, lha khat lhin teng, chena lhongpi dungjuiya man tepsa, dangka cheng nga ahi.
17 Bongle kelngoi chule kelcha nou soh masa ho vang lhatdoh lou ding ahi; aboncha Keiya ahiuvin, kilhaina neitei ding ahi. Athisanu maicham thekhum’un, athao lai jouse, neh le chah thilto, Kei dia gimnam nahnom din, gouyam jengun.
18 Deichom thilto gancha jetlam nungkeng le omlhang kibolna banga, asa jouse nang ding ahi.
19 “Israelten deichoma eipeh chengseu aboncha tonsot geiya dia, nangle nachate, numei pasal kapeh nahiuve. Hiche hi suhkeh thei louhel, nangle nachilhahte to ikitepnau ahi,” ati.
20 Pakaiyin Aaron jah a, “Mangmo gou khat cha nalo thei lou ding, Israel leiset jong nachan thei lou ding ahi. Kei-Pakai hi nanei nagou kahi,” ati.

Levite chan ding

21 Pakaiyin, “Israelten eipeh hopsom a khat hi Levite kapei. Kachenna ponbuh kinbol man a akisan’u ahi.
22 Israel dangin vang ponbuh anai lou diu, kithiso da ding ahiuve.
23 Tua pat Leviten bou Ponbuh kin bol ding jouse abol diu ahi. Hiche hi nachilhahten jong amantei diu chena dana kisemdoh ahitai. Israel sunga Leviten mangmo gou anei thei lou diu ahi;
24 ajeh chu agou diuva deichom thilto hopsom a khat, Israelten eipeh jouseu kapeh ahitai. Hijeh a chu Israel sunga mangmo gou aloda diuva kaseipeh ahitauve,” ati.

Levite hopsoma khat

25 Pakaiin Mose chu
26 Levite seipeh din aseiyin, “Pakaiyin gou dia napeh-u, Israelte hopsom a khat nalah tengu, hopsom a khat chu deichom thilto dia Pakai napeh diu ahi.
27 Hiche deichom thilto hi loubol min changthah le lengpitwi thah ato chutoh kibanga kigel ding ahi.
28 Hito banga chu Pakai dia thilto, Israeltea kona namu hopsoma khat chu nanghon jong deichoma nato diu ahi. Hiche Pakai dia deichom thilto hi Aaron Thempu napeh diu ahi.
29 Nathilmuu aphapen lai napeh diu ahi.
30 Apha liaise napeh doh teng, loubol min athilto moh abolna banga, amoh chengse nakoiden theiyu ahi.
31 Na-inkote to hoilai mun hijongle naneh theiyu ahitai, ajeh chu hichu ponbuh kinbol man a namu ahi.
32 Apha liaise Pakai napeh pouvule, adang nejongleu chun themmo chang pouvin nate. Amavang Israelte thil theng to apha laise natodoh masangun, suhboh louna ding gel’un; suboh leu chun thilo get’un nate,” ati.

Minbu Bung 19
Bongsan kigouvam vut

1 Pakaiyin Mose le Aaron aseipeh-in,
2 Israelte seipeh din chondan phabep ahil’e. Natohna khah lou, nolnabei, bongsan khat hin kaiyun,
3 Eleazar Thempu gapeuvin. Bongsan chu ngahmun pam a kaidoh a, Eleazar angsunga tha ding ahi.
4 Eleazarin thisan chu khutjungin khoinat’in tin ponbuh lang sanga sagi vei athe ding ahi.
5 Thempupa masanga sa pumpi, avun, asa, thisan chule agil jouse govam ding ahi.
6 Thempupan cedar thing phabep le hyssop pon jempol to, tupat ponsan khao to meilhum sunga salut ding ahi.
7 Chujou teng von akisop a, atahsa twi kisun khum ding, ngahmun a hung lut thei ding; amavang nilhah geiya jechang ding ahi.
8 Bong gouvam pan jong von kisop’intin, twi kisunkhum ding, nilhah geiya jechang ding ahi.
9 Hou thudol’a athengsa khat’in bong kigovamna vut loh khomintin, ngahmun pam, hou thudol’a theng lai khat’a akoiya, hou thudol’a kisuboh Israelten kisilna aman diuva koi ding ahi. Hiche doi hi chonset they ngimna man ding ahi.
10 Vut loh khompan jong von kisop’intin, nilhah geiya jechang ding ahi. Israelte hihen alah-uva cheng gamchom mi hile, a-itih geiya hiche chondan hi aman jing diu ahi.

Thilong tongkha

11 Koi hile thilong tongkha chu ni sagi sunga jechang ding ahi.
12 Nithum ni le sagi nia kisuh thengna twiya kisil ding, chutengle theng ding ahi. Nithum ni le ni sagi nia suh thengna akibol lou vangle, thengponte.
13 Koi hile thilong tonkha suh thengna kibol lou chu jechang ding ahi, suh thengna twi sunkhum lou ahin, Pakai ponbuh asuthangin, hijeh a chu Pathen mite lah a simtha lou ding ahi.
14 Insunga mithi pet’a umkha ham, thilong lupna galut kha ham chu ni sagi jechang ding ahi.
15 Insunga um le bel sin bei jouse jong boh tha ding ahi.
16 Inpo lam a thise hihen, thipha hile, thilong tongkha chan le, lhankhuh ham mihem gubuh ham tongkha jouse chu ni sagi jechang ding ahi.
17 Ponbuh thensona dia, chonset suh thengna dia kikoi bongsan kigouvam vut chu belsunga koi ding, twithengto sun tha ding ahi.
18 Amasaa thensosa khat’in hyssop ponpol khat lantin, twi lah a chu adult ding, ponbuh le asunga thilkeo le mihem jouse athekhum ding ahi. Aninaa chu thensosa khat’in, thilong ham, mihem gubuh ham ahiloule lhankhuh tongkha ham chu twi athekhum ding ahi.
19 Thensosa mihem khat chun nithum ni le ni sagi lhin nia jenchangpa chunga twi chu athekhum ding ahi. Ni sagi lhin ni le, jechangpan von akisop jou, twi akibuh khum jou teng, asuh theng ding, nilhum lhumle theng ding ahitai.
20 Hou thudol’a bohsa, kisuthenglou mi chu jechang jing ding, ajeh chu kisuh thengna twi kisunkhum loulai ahi. Pakai houbuh suboh ahin, Pathen mite khat’a simtha lou sing ahitai.
21 A-itih phat geiya hiche chondan hi najui jing diu ahi. Kisuh thengna twi kisunkhum chun von jong akisop ding ahi; hiche twi tongkhapen pen chu nilhah geiya jechang ding ahi.
22 Jenchangin atoh khah chan bohlo ding, chule abohsa tongkha chan chu nilhah geiya jechangson ding ahi.

Minbu Bung 20
Kadesh a thilsohho
(Ex 17:1-7)

1 Lha masan Israel khoppi pumpi Zin gamthip lai ahung lhungun, Kadesh a ngahmun asem’ui. Hikoma hin Miriam athidenin avuitauve.
2 Ngahmun a twi amu lel jeh-un, mipin Mose le Aaron adel khum’un,
3 kiphin nan, “Pakai ponbuh masanga isopi Israel dangho to kithi tha cheh hita leh phajo ta ding.
4 Ipi dia hikoma gamthip laiya neipuilut’u ham? Kaganchateu toh thigan tha dia neibol’u ahi-ong?
5 I-bol’a Egypt a neihin puidoh-uva, hitobang munse gamse lah, anche laughing pou louna mun hi neilhut mongu ham? Chang la akimupon, theichang ga la aumpon, lengpiga la um lou, kolbuthei jeng cha jong kimulou. Don ding twineng jeng jong akimupoi!” atiuve.
6 Mose le Aaronin mipi dalhan ponbuh kotbul’a agading lhontai. Bohkhup’a atao lhonle, aheng lhona Pakai email laiyin ahung kilah-e.
7 Pakaiyin Mose jah a,
8 “Kitepna thingkong maiya tenggol chu kilah-in, chuteng Aaronto khoppi pumpi khomlhonin. Abon piuva masang laitah a hikoma songpi jah a khun seile chun, twi hung kikhodoh jeng ding ahi. Hitia hi mipi le aganchateu don ding twi nakoudoh ding ahi,” ati.
9 Pakai thupeh bangin Mose’n tenggol akilah tai.
10 Mose le Aaronin songpi maiya khoppi pumpi akhom lhonin, Mose’n, “Doumah bolten ngaiyun! Hiche songpia kona hi twi kakoudoh peh diu ham?” ati.
11 Hichun Mose’n tenggol kipat’in songpi chu nivei ajep le, twikai lentah ahung kikhodoh jengin, mipi le aganchateuvin adontauve.
12 Pakaiyin Mose le Aaron aphoh in, “Tahsan lhasa a Israelte angsunga kathahat loupi naphondoh lel lhonjeh a, peh dia katepsa gamsunga hiche mite hi napuilut lhon lou ding ahitai,” ati.
13 Hicheng hi Pakai athenga akiphondohna, Israelte ahenga akiphin nau mun, Meribah a soh thil ahi.

Edom lengpan Israelte atinkih

14 Kadesh a konin Mose’n Edom lengpa henga mi asol’e. Amisol hon, “Hiche thu hi nasopi Israeltea kon ahi. Kahahsat nau nahen,
15 kapu kapateu Egypt a chea, kum stopi kachen’u nahei. Egypt miten kapu kapateu le keiho eibolseuvin,
16 Pakai henga kataovui. Kataonau sangin, Pakaiyin Vantil khat ahinsol’in, aman Egypt a konin eihin puidoh tauve. Tun Kadesh a kapansauve. Hiche khopi hi nagamgi chin ahin.
17 Nagamsung neijot paisah-un, lungset tah-in. Keiho le kaganchateu, lamsah lam lhang petdoh umlou ding, loulai ho lengpilei ho chonthang lou ding, twikul dung twi jeng jong don pouvinge. Nagamsung kajotdoh kahseuvin lamlen pam pot pouvinge,” atiuve.
18 Ahivangin Edom miten, “Kagamsung paltansah thei pouvinge! Paltan nagot’u le hungkitol’a kasat jeng ding nahiuve,” atiuvin ahi.
19 Israelten jong, “Lamlen laiya bou cheuvinge, keiho hiuving kaganchateu hile, twi donkha ka-umu jongle, aman pe nauving kate. Paltan a che ding chubou kadeiyu ahi,” atiuve.
20 Edom miten aseikit’un, “Kanompoi!” atiuve. Chujongle sepai tamtah ahung kon’un Israelte sat agotauve.
21 Edom miten agamsungu apaltansah da phat’un, Israelite akiheiyun lamchom ajottauve.

Aaron thi

22 Israel khoppi pumpi, Kadesh dalhan Hor molsang,
23 Edom gamgi alhung tauve. Hikoma hin Pakaiyin Mose le Aaron jah a,
24 “Israel kapeh got gamsunga Aaron lut lou ding ahi; Meribah a kathupeh nadou lhonjeh a, Aaron thi ding ahitai.
25 Aaronle achapa Eleazar hi Hor molsanga pui touvin,
26 molvuma Aaron Thempuvon poncho sut lhan Eleazar vonpeh-in. Hikoma chu Aaron thiden ding ahitai,” ati.
27 Pakai thupeh bangin Mose’n aboltai. Khoppi pumpi mitmun Hor molsanga akaltouvun,
28 Aaron Thempuvon poncho chu Mose’n asut lhan Eleazar avonpeh tai. Chukom molvuma chun Aaron athin, Mose le Eleazar vang ahung kumsuh lhontai.
29 Aaron thi khoppi pumpi ajahdoh phat’un nisom thum sungin alunghem piuve.

Minbu Bung 21
Canaan mite ajo’u

1 Atharim lampia Israelte hung kitol ajahdoh phat’in, Canaan gam, lhanglam gama Arad lengpan anokhumin, mihem phabep jong gal-hingin akaiye.
2 Chutah chun Israelte Pakaiya akihahsel’uvin, “Hiche mite hi neijosah pou pouvule, mohseh seh-in amaho le akhopi jouseu napedoh-ung ting, kasuhgam diu ahi,” ative.
3 Atao nau Pakaiyin asanpeh tan, Canaan miho ajo na diuvin akithopi. Hiti hi
Israelten ajouvun, asugam’un, galmun chu Hormah asah tauve.

Sum-enga kisem gul
4 Edom gamsung velkolna din,Israelten Hor molsang dalhan, Agaba twikol lamlen ajuitauve. Lampia japan lung alhaso’uvin,
5 Pathen le Mose douna thu aseitauve. Mihon, “I-bol’a, neh le chah, twi beina gamthip laiya thigamsah dia, Egypt a kona neiin puidoh-u ham? Hitobang neh tuimo hi kachim behseh jeng tauve!” atiuvin ahi.
6 Hijeh chun Pakaiyin alah-uva gulse hangtah tah alha lut’in. Israelte tampi achun athitauve.
7 Mipin Mose koma, “Pakai le nang douna kaseiyu themmo kahitauve. Tun hiche gulsete eidelmang peh na diuvin Pakai koma neitaopeh loiyun,” tin aseiyui. Hijeh chun Mose’n mipi ataopeh tai.
8 Mose jah a chun Pakaiyin sum-enga gulse lim asem’a moljol’a atah ding, gul chuh pen penin avet le hing doh din aseipeh tai.
9 Mose’n sum-eng gul lim khat asemin, moljol chunga atah-e. Gul chuh pen penin avet teng hingdoh din abol’e.

Hor molsanga pat Moabte phaicham gei

10 Israelte akitol’un Oboth a ngahmun asem’ui.
11 Hikoma dalhan Moab mite gam, gamthip lai, Abarim khogen lah a ngahmun asem’ui.
12 Chujouvin Zered phaiya ngahmun asem’ui.
13 Chukoma pat akitol’un, Arnon vadung sahlam, Amor mite gamsung geiya lumlut, gamthip noiya chun ngahmun asem’uve. Arnon vadung hi Moab mite le Amor mite gamgi ahi.
14 Hijeh a chu Pakai galsat lekhabun, “Suphah gamkaiya Waheb kho, aphaicham jouse, Arnon vadung,
15 phaicham kigolsuh peh a Ar kho geiya kilhung lut, Moab gamgi geiya kilhung lut,” tia asei ahi.
16 Hikoma pat twikul tampi umna khat geiyin akitol’un, hikoma chun Pakaiyin Mose jah a, “Japi koukhomin twi kapeh ding ahiuve,” ati.
17 Hichepet hin Israelten la asauvin: “Twikulten twi putsah-un, Vahchoi lan lem unge.
18 Vo twikul, leng le lalte, Japi lamkaite, leng thuneina le Thahat vanga kilai ho,” atiuve. Gamthip noiya pat Mattanah geiyin akitol’un,
19 Mattanah a kon Nahaliel gei, Naheleie a pat Bamoth gei,
20 Bamoth a pat Pisgah molsang dangnoi, nelgam kimuna, Moab mite gamsung phaicham lai ageitauve.

Leng Sihon le Og ajo’u
(Duet 2:26-3:11)

21 Amor lengpa Sihon henga thusei din Israelten mi asol’un,
22 “Nagamsung jotpai unge. Keiho jong kagancha jouseu jong lam pam pot lou, loulai dongle lengpilei dung chonpa lou, twikul dunga twi jeng jong don pou vinge; nagamsung kajot pai kahseuvin lamlen jenga kijot nauvinge,” atisah-ui.
23 Ahinla Sihon hin agamsung Israelte akisatpi.
24 Amavang Israelten galmun a agalteu tampi athat’un, agamsungu Arnon vadung, Jabbok sahlam gei, Ammon miten gamgi atindet jeh-un, hichan gei chun alatauve.
25 Hiti hin Israelten Amorte khopi jouse, Heshbon geiyin, akimvel kho jouse to alauvin achen phatauve.
26 Heshbon hi Amor mite khopi lenpen, Sihon lengpa, masanga Moab lengpa kisat pia, agam pumpi Arnon vadung geiya lahpeh pa, chenna khopi ahi.
27 Hijeh a chu jaithemten: “Sihon lengpa khopi, Heshbon a hungun! Semphat’a sah phat kadeiyui.
28 Khatvei hiche Heshbon khopia kon, Sihon sepaite meikou lengdoh abangui; Moab gamsung Ar khopi asumangun, Arnon chunglam thinglhang achon chaiyui.
29 Tijat aum lheh-e, Moab mite! Chemosh doi houte mangthah nahitauve! Nadoiyun mihem sohchangin akoiyin, Numei jouse Amor lengpan soh-in akaitai.
30 Tunvang ason apah asugam tauvin, Heshbon a pat Dihon gei, Nashim a pat Nophah gei, Medeba geiyin asugamtauve,” tin lan asauve.
31 Hiti hin Israelte Amorte gamsunga achengun,
32 Jazer khopi baikhen a lahna ding vetoh din Mose’n mi asol’e. Hiti chun Israelten Jazer khopi le akimvel jouse alauvin, achengte deljamin, atoupha tauve.
33 Israelte akiheiyun Bashan lamlen ajuiyun, ahin Bashan lengpa Og hin sepai puiyin ahung kontan, Edrei mun a Israelte asat’e.
34 Pakaiyin Mose jah a, “Og lengpa kicha hih-in. Kajosah tei ding, amite josah ing ting agamsung kalahsah ding nahi. Heshbon khopia vaipo, Amor lengpa Sihon nabolna bangin bol jengin,” ati.
35 Hiti hin Israelten Og lengpa le atu achate, amite jouse athat gam’un, chi khat louvin akoiyun, agamsung atoupha tauve.

Minbu Bung 22
Moab lengpan Balaam akousah

1 Israelte akitol’un, Jericho gal, Jordan niso lam, Moab phaiya ngamun asem’ui.
2 Moab lengpa Balak, Zippor chapan Amor mite Israelten abolnau, Israelite tam thudol ajahdoh chun,
3 ama ti amite ti akicha behseh jengui.
4 Moab miten Midiante lamkaiho jah a, “Hiche mihem hon jamah khun ivel’uva ijakai asuhgam’u, bongchal hamhing neh abahsah diu ahi,” atiuve. Hijeh chun Balak lengpan
5 Amaw gamsung, Euphrates lui pang, Pethor a cheng, Beor chapa Balaam kouvin mi asoltai. Amisol hon Balak thusei ahin pouvin, Balaam jah a, “Egypt a nam pumpi khat hung kitoldoh jeng khu nahet tei ding angaiye; aleilima hung kitol, igam jouseu lah agot’u ahitai.
6 Eiho sanga gamchenga tamjo ahiuve, khohsah tah-in neihung gaosap peh tei teiyin. Chutile ijo’uva gamsunga inodoh theiyu jong bailam ahi. Miho vang naboh le vangphauva, nagaosap le gaosap achan jengu kahei,” ati.
7 Hiti hin Moab lamkaite le Midian lamkaiten gaosap man ding pon, Balaam heng ajon’un, Balak thusei aseipeh tauve.
8 Balaamin ajah-uva, “Tujan geh-unlang jing teng Pakaiyin eihil pen pen seipeh nauvinge,” ati. Hijeh chun Moab lamkaite Balaam koma ageh den tauve.
9 Pathenin Balaam ahung dongin, “Nagepi miho hi koi hiuvam?” ati.
10 Balaamin, “Moab lengpa Balak-in ahinsol,
11 Egypt a hung kitoldoh nampi mihem tamtah gamsung dimsoh hel thu seipeh dia hung ahiuve. Hiche nam mite ajo jouna dia gaosap peh dia eihung temsah ahi,” ati.
12 Balaam jah a Pathenin, “Hiche ho hi juidan, Israelte gaosap hih-in, kavangboh chang mi ahibouvui,” ati.
13 Jingkah-in Balaam thupoho henga achen, “Kile kit tauvin, ikilhon diu Pakai anompoi,” ati.
14 Thupoho Balak henga ahung kile kit’un, Balaamin akilhon pidau aseitauve.
15 Balak-in asol masah sanga thupijo le tamjo mi asol kit’e.
16 Amisol hon Balak thupeh chu Balaam aseipeh-un, “Kakoma hunga hih beh-in!
17 Gaosap man tampi peng ting, nasei chan bolpeh nange. Niche miho hi neihung gaosappeh tei teiyin,” ati.
18 Ahivangin Balaamin, “Balak-in a-leng inpia sana le dangka jouse eipeh ding hijongle, thil neocha khat’a jong Pakai ka-Pathen thupeh kapal lhah thei lou ding ahi.
19 Hijongle amasa ho bangin tujan geh-un lang, Pakaiyin thilchom dang khattou eipeh khat le kaseipeh theina diuvin umden’un,” ati.
20 Hiche jan jong chun Pathenin Balaam jah a ahung seiyin, “Hiche miho hin nahung kouvu le, kigon chen, amavang kasei sei nabol ding ahi,” ati.
21 Ajingin Balaamin sa-ngan akigot’in, Moab lamkaite to akilhontai.

Balaam le Asa-ngan

22 Balaam ache jeng chu Pathen alung hangin, Balaam sa-ngan chunga atouvin, alhachate ni to akilhonle, Pakai Vantil’in analamtin tai.
23 Vantil’in chemjam choiya alamtin amudoh phat’in, sa-ngan chun lamlen dalhan lou laiya alhai luttai. Balaamin sa-ngan chu avon, lamlen a ahin hoilut kittai.
24 Vantil chu lengpilei ni kigitna, lamjim lai, lamjet lam veiya songpi pal banga kisunna lai khat’a anading kittai.
25 Sa-nganin Vantil amu phat’in lambang suhna akinei jengle, Balaam kengphan asuh khahpeh-in, Balaamin sa-ngan chu voh-e tin avoh loi.
26 Vantil chu ana masakit’in, lamjim thet lai, otdohna ding bethel mun khat’a anadinge.
27 Hikoma hi Sa-nganin Vantil amudoh phat’in akoldentai. Balaam alung hangjah tan sa-ngan chu hajep jep’in ajeptai.
28 Hichun Pakaiyin sa-ngan apao theisah-in, Balaam jah a, “I-kalo monga, thumvei jen neiden hitam?” atisah-e.
29 Benjamin, “Nei nahsah loupi chu me! Chemjam choi leng kasat tan hih ding ham,” ati.
30 Sa-nganin, “Hitih chan neitouna sa-ngan chu kahilou ham? Nahsahmoa kabol khah mong em, hitobang hi?” ati. Balaamin, “Neibol khapoi,” ati.
31 Hichun Pakaiyin Vantil chemjam choiya ding chu Balaam amusah le, ama jong tol’a bohkhup’in alhu jenge.
32 Vantil’in, “I-bol’a thumvei jen hitia hi na sa-ngan naden ham? Nakou nauva hi chelou ding dol nahin, nahung phat’a kahung lamtin nahi.
33 Na sa-nganin eimua, thumveijen a kihei mang ahi. Eipeldoh da le nathat ing ting sa-ngan kalhadoh ding ahi,” ati.
34 Balaamin, “Chose kahitai. Neilamtim lam helou kahibouve; kache hi dih nasah loule, in lam a kile kit tange,” ati.
35 Ahinla Vantil chun, “Miho to ho kilhonin lang, amavang kahil cha chabou nasei ding ahi,” ati. Hijeh chun Balaamin akilhonpi paitai.

Balak-in Balaam alamto

36 Balak-in Balaam hung ajah phat’in, Moab gamgi, Arnon vadung pang khopi Ar a kimupi din achetai.
37 Balak-in Balaam jah a, “Kahung kousah masah a idia hungda nahim? Gaosap man tampeh lel dia neibol ham?” ati.
38 Balaamin, “Hungda neibol ham? Hijongle la ipi bol thei kaneiyam? Parthenon eihil cha cha bou kasei thei ahi,” ati.
39 Balaamin Balak hi Huzoth kho geiyin alhonpin,
40 hikoma hin Balak-in Balaam le alhonpi lamkai ho chu bong le kelngoi athapeh-e.

Balaam gao thusei masapen

41 Ajing jingkah-in, Balaamin Israelte phabep beh amudoh theina mun Bamoth Baal a Balak-in apuitoutai.

Minbu Bung 23

1 Balaamin Balak jah a, “Hikoma hin maicham sagi semin, bongchal sagi le kelngoichal sagi gakaiyin,” ati.
2 Balaam sei bangin Balak-in abol’in, maicham phunga hin bongchal khat kelngoichal khat khat’in akilhai lhon’e.
3 Hichun Balaamin Balak jah a, “Pakaiyin eikimupim eikimupi hih-em phochen a kache kah-in, napumgo thilto koma hin anading jingin. Eikimupi le eihil jouse seipeh nange,” ati. Hijeh chun molvuma achangseh-in akaltoutai.
4 Hikoma chun Pathenin akimupin, Balaamin ajah a, “Maicham sagi kasemin, niseh-in bongchal khat le kelngoichal khat khat kilhai nan kanei jinge,” ati.
5 Pakaiyin Balak seipeh ding thu Balaam ahil’in asol kittai.
6 Balaam akile kit le, Balak chu pumgo thilto koma Moab lamkaite to anading jing nalaiye.
7 Hichun Balaamin gaothu aseiyin: “Solam molsang dung, Syria gama konin Moab lengpa Balak-in eihin puiyin; ‘Hungin kihou hitin, Israelte hung gaosap’in,’ eiti.
8 Pathen gaosap lou iti kagaosap thei ding, Pakai phal louva amanthahna diu iti kasei ding ham?
9 Songpi vuma kon Israelte kamun, Molvuma konin kavei. Koima hephalou nam khat ahiuvin, Namdang sanga vangboh chang ahiu akihet’ui.
10 Israel chilhah leivuikhu kitung abangun, Simsen mihem jat ahitapouve. Pathen mi thi bangin neithisah-in, Midih bangin lung mongin neithisah tan,” ati.
11 Hichun Balak-in Balaam jah a, “I-neilo ham? Kamelmate gaosap dia nahung kipuiya, vang naboh boh jengin ahi,” ati.
12 Balaamin, “Pakaiyin eihil cha cha bou kasei thei ahi,” ati.

Balaam gao thusei nina

13 Hichun Balak-in Balaam jah a, “Hungin, Israelte them khat bou kimuna thei lai khat’a che hitin, chua konin neigaosappeh-in,” ati.
14 Balak-in Balaam apuiyin, Pisgah molvum, Zophim loulaiya ahung phone. Hikoma jong maicham sagi asemin, achan cheh lhon din, bongchal khat le kelngoichal khat kilhainan anei lhontai.
15 Balaamin Balak jah a, “Napumgo thilto koma ding jingin, hikoma khun Pathen kimupinge,” ati.
16 Pakaiyin Balaam akimupin, asei ding jouse ahil’in, Balak seipeh din asoltai.
17 Balaam akile kit le, pumgo thilto koma Balak le Moab lamkaite ding jing agatoh-e. Pakaiyin ipi aseipeh Balak-in adongin,
18 Balaamin gaothu aseipantai: “Hugin, Zippor chapa Balak, Kaseipeh ding hi ngaiphan.
19 Pathen chu mihem banga jousei ahipon, Mihem banga lung khelle ahipoi. Athutep chan amolson, Aseile kiboldoh jeng ahi.
20 Israelte phatthei boh ding eihil chah-in, Pathen vangbohsa kapailha theipoi.
21 Israel khonung ding kamun, Hamset genthei thoh ponte. Pakai a-Pathen’un aumpin, Pathen lenga aneiyu aphongdoh tauve.
22 Egypt a pat Pathen puidoh ahiuvin, Bongchal hang bangin gal asatpeh-e.
23 Israel nam dounan bumthula kisam theipon tin, Doithu jong kisapden theiponte. Israelte chung thudol’a mihon, ‘Veuvin Pathen thilbol khu!’ ati diu ahi.
24 Israel nam hi sakei bahkai tobang, Abotel a aval lhum kah a choldo lou, Asa thasa thisan achop kang kah a Kicholdo louhel ahi,” ati.
25 Hichun Balak-in Balaam jah a, “Israelte hi nagaosap nom lou ahijongle, vang beh vang boh datan!” ahi.

Balaam gaothusei thumna
27 Balak-in Balaam jah a, “Hungin munchom khat’a puiyinge. Ijem itile chukoma pansa Israelte neigaosappeh ding Pathen nom mai thei ahi,” ati.
28 Hiti hin nelgam gah kivettouna, Peor molvuma din Balak-in Balaam apuitai.
29 Hikoma hin Balaamin Balak jah a, “Maicham sagi neisempeh-in leng, bongchal sagi le kelngoichal sagi ma gakaiayin,” ati.
30 Aseipeh bangin Balak-in abol’in, maicham sagi chunga chun bongchal khat le kelngoichal khat khat kilhainan aneitai.

Minbu Bung 24
1 Tuchung vang hin Pakaiyin Israelte vang abohnom ahetan Balaamin masanga abol bangin phot chenna agahol deh tapoi.
2 Israete aphungkhai khaiya ngahmun a kigol amui. Balaam chu Pathen Lhagaovin atuh chan tan,
3 hijeh chun gaothu aseiyin: “Beor chapa Balaam thupoh,Chevenga mutheipa thusei;
4 Pathen thusei jatheipa. Kakhangnmang tobangin thil kidangtah kamun, Hatchungnung Pathena kon mu kaneiye.
5 Israelte ponbuh ahoi theiyin,
6 Lusu phung kigol abangin, Luipanga honlei tobang, Pakai phusa aloes thingle Twipanga keh cedar thing to bang ahi.
7 Gotwi neng jing diu, Twi nou jingnaa muchi atu diu ahi. Alengpau Agag sanga loupi ding,Alenggam len a jao ding ahi.
8 Egypt a kona Pathen puidoh ahiuvin; Bongchal hang bangin gal asatpeh-e. Amelmateu abahgam tauvin, Agu achang achil’un, thalchang ahehbongsoh tauve.
9 Israel nam hi sakei bahkai abangun, A-ihmut sukhang ngam aumpoi. Israel vangboh chan vangboh changa, Israel gaosap chan kigaosap ding ahi,” ati.
10 Balak alung hang behseh jengin khuttum jel’in Balaam jah a, “Kamelmate gaosap dia nakikou, thumvei jen vang nabohjo tai.
11 Na-in a quiche jengin! Tohman peh ding kati jong Pakaiyin na-itpeh ahitai,” ati.
12 Balaamin, “Eikou dia nahinsol ho jah a jong,
13 naleng inpia sana dangka jouse neipeh ding hijongle, kacham cham a ima bol’a Pakai thupeh palkeh louhel dia kiseisa kahi. Pakaiyin eihilcha cha bou kasei ding ahi,” ati.

Balaam gaothusei achaina

14 Balak jah a Balaamin, “Tua vang kamite heng kajot kit ding ahitan, hijongle kache kon a kagihsal nahi, khonung teng Israelten i-nalo diu kahilchah masah nahi,” ati.
15 Hiti hin gaothu aseiyin: “Beor chapa Balaam thupoh Chenvenga mutheipa thusei;
16 Pathen thusei jatheipa Chungnungpen Pathen hetna muthei, Khangmang tobangin thil kidang tah kamun, Hatchungnung Pathena kon mu kaneiye.
17 Khonung ding thu kavet le, Israel nam kamudoh-e. Hiche nam a kona hi Ahsi vahtah bang leng khat hung len ding ahi. Israel nam a kon molthal kikapdoh bang ding, Moab lamkaite ajepcheh ding, Seth mite ajepchap jeng ding ahi.
18 Edom a amelmate ajosoh ding, Agamsung jouseu alo ding, Hitia hi Israel’in gal ajo jo jeng ding ahi.
19 Israelten achil thangsoh diu, Thamoh chengse jong asuhgam diu ahi,” ati.
20 Mu aneinaa Balaamin Amalaek mite amun hiche gaothu hi aseiye: “Amalekte hi nam hatchungnungpen ahiuvin, Hinla akhon nileh mangthah hel diu ahi,” ati.
21 Mu aneina Balaamin Ken mite amun, niche gaothu hi aseiye: “Nachen mun adet’in, Songpivum khikah a vabu tobang ahi.
22 Hijongle Ken mite min nasuhgam diu, Assyria miten gal-hinga nakai diu,” ati.
23 Balaamin niche gaothu jong hi aseiye: “Sahlama kikhom ho koi koi ham?
24 Cyprus a gal hung kon ding; Assyria le Aber alah diu, Amaho jong vang mangthah diu ahi,” ati.
25 Balaam akigon in lam ajontan, Balak jong ajotna dia akichetai.

Minbu Bung 25
Peor a Israelte

1 Acacia phaiya Israelten ngahmun abol laiyun, chukoma cheng Moab numeiho chu Israel pasalten akitimatpiuve.
2 Moab numeihon Israel pasalte chu Moab doi houna kut a akou jiuve. Israelten
3 Peor a Baal doi houna an aneuve. Hijeh hin Pakaiyin alunghan khum’un
4 Mose jah a, “Kasei nitna mongin Israel lamkai jouse kaidoh-in, nipi noiya abonchauvin that gamin, chuteng mipi chunga lungam tange,” ati.
5 Mose’n vaipoloi jah a, “Naphungkhai cheh-uva mi, Peor mun a Baal hou ho chu nakitha cheh diu ahi,” ati.
6 Mose le khoppi pumpi mitmu changtah-in Israel pasal khat hin Midian numei khat hi, Pakai chenna ponbuh kotphunga japi lunghem pet tah-in, aponbuh a akikailut’e.
7 Athilbol hi Aaron tupa, Eleazar chapa Phinehas chun amudoh phat’in, khoppi mun dalhan, tengcha choiyin,
8 Israel pasal chule Midian numei chu ponbuh sunga ajuilut’in, ani lhonin akilmat jengle, numeinu dap kah laitah a asoh-in athi lhontai. Hiti hin Israelte lah a lang hise hi atangtai.
9 Hiche kah hin mihem sang somni le sang li jen athi mantauve.
10 Pakaiyin Mose jah a,
11 “Phinehas thilbol jal’in Israelte kalunghan tapoi. Doi dang houdaa, Kei bou hou ding adeiyin, hijeh a chu lung hanga Israelte kasuhgamda ahitai.
12 Seipeh-in a-itih geiya dia Phinehas to kitepna khat kasemdoh ding ahi.
13 Keito lhenkah ding doi dang him him adeiloujeh a japi ngaidam achansah theijeh-in, ama le ason achilhah jouse tonsot Thempu dia kiphutdet ahitauve,” ati.
14 Midian numei to kitha tha Israel pasal chu Salu chapa Zimri, Simeon phunga phung upa khat ahi.
15 Numei nu min Cozbi ahi. Apa Zur hi Midian mite lah a loi khat lamkaima ahiye.
16 Pakaiyin Mose thu apen,
17 “Midiante delkhumin, sugamtan,
18 Peor mun a nalhep lhah-uva achonset jeh-ule Peor a natset lan laiya kithat nu Cozbi jeh chun,” ati.

Minbu Bung 26
Israel misim niveina

1 Natset lan jouvin Pakaiyin Mose le Aaron chapa Eleazar jah a,
2 “Israel khoppi pumpi, a-inson cheh-in, gallon thei cheh, pasal kum somnia lhah a chunglamse simtoh-in,” ati.
3 Pakai sei bangin Mose le Eleazarin pasal kum somnia lhah chunglamse akhom lhonin,
4 Jericho a pat Jordan vadung gal, Moab phaichama chun japi akhom lhontai. Egypt a hung kitoldoh Israelte chu:
5 Jacob chapa tahpen-Reuben: Reuben phung chu, aphungkhai khaiya Hanoch, Pallu,
6 Hezron, chule Carmi ahiuvin,
7 phungkhai hijat’a mihem chu sang somli le sangthum to ja sagi le somthum alhinguve.
8 Pallu chilhahte Eliab,
9 achate Nemuel, Dathan, Abiram ahiuvin, khoppi lhendoh Dathanloi Abiram loi ahiuve. Amaho hi Mose le Aaron douva pang Korah nungjuite ajop’un, Pakai doumah anabol’un,
10 leikeh-in aval lhum’uvin meikouvin mihem ja ni le som nga akah lih pet chun Korah le anungjuite to athi thatauve. Hiti hin japi kihil chahnan apang’ui.
11 Korah chate vang athipouve.
12 Simeon phunga phungkhai ho, Nemuel, Jamin, Jachin,
13 Zerah chule Shaul ahiuvin,
14 phungkhai hichenga mihing sang somni le sangni to ja ni alhinguve.
15 Gad phunga phungkhai ho, Zephon, Haggi, Shuni,
16 Ozni, Eri,
17 Arod chule Areli ahiuvin,
18 phungkhai hichenga mihing sang somli le ja nga alhinguve.
19 Judah chapati ni Er le Onan Canaan gama athiden lhontai.
20 Chonjouva Judah phungkhai ho, Shelah, Perez, Zerah, Hezron chule Hamul ahiuvin,
21 phungkhai hichengse hi mihing abonchauvin
22 sang som sagi le sang gup to nga alhinguve.
23 Issachar phung phungkhai ho, Tola, Puah,
24 Jashub, chule Shimron ahin,
25 phungkhai hijat’a mihing chu sang somgup le sang li to, jathum alhinguve.
26 Zebulun phunga phungkhai ho, Sered, Elon, chule Jahleel ahiuvin,
27 phungkhai hicheng mihing sang somgup le ja nga alhinguve.
28 Manasseh le Ephraim pa Joseph phung ahi.
29 Manasseh phunga Manasseh chapa Machir, Machir chapa Gilead ahin, phungkhai dangse Gilead a kondoh cheh ahiuve.
30 Lezer phungkhai sunga Helek,
31 Asriel, Shechem,
32 Shemida, chule Hepher ahiuve.
33 Hepher cha Zelophehad hin chapa aneipon, chanu jeng aneiyin –Mahlah, Noah, Hoglah, Milcah chule Tirzah ahiuve.
34 Phungkhai hicheng mihing hi sang som nga le sang ni to ja sagi alhinguve.
35 Ephraim phunga phungkhai ho, Shuthelah, Becher chule Tahan ahiuve,
36 Eran phungkhai hi Shuthelah phungkhaiya lenglhan akiseiye.
37 Phungkhai hichenga mihing chu sang somthumle sang ni to ja nga alhinguve. Hicheng hi Joseph son ahi cheh-ui.
38 Benjamin phunga phungkhai ho, Bela, Ashbel, Abiram,
39 Shephupham chule Hupham ahiuvin,
40 Ard le Naaman phungkhaite ni vang Bela a kondoh-in akiseiyui.
41 Phungkhai hichenga mihing chu sang somli le sang nga to jagup alhinguve.
42 Dan phunga phungkhai chu Hushim bou ahin,
43 mihing jat hi sang somgup le sangli to, ja li alhinguve.
44 Asher phunga phungkhai ho, Imnah, Ishvi, chule Beriah ahiuvin,
45 Heber le Malchiel phungkhai vang Beriah a kondoh-in akiseiyui.
46 Asher hin chanu khat aneiyin, Serah ahi.
47 Phungkhai hijat mihing chu sang som nga le sangthum to ja li alhinguve.
48 Naphtali phunga phungkhai ho, Jahzeel, Guni,
49 Jezer chule Shillem ahiuvin,
50 phungkhai hichenga mihing jat sang somli le sang nga to ja li alhinguve.
51 Israelte abonchauvin mihing sang jagup le sang khat to, ja sagi le somthum alhinguve.
52 Pakaiyin Mose jah a,
53 “Gamsung hi phung sunga mihem tamle lhom dungjuiyin hoppeh tan.
54 Vang sanin lang gamsung hi hopper-in,
55 phung sung mi tamte gamle pen,
56 phung sunga mihing lhomte chu aneojo pen,” ati.
57 Levi phung hi akhai khaiya akisimle, Gershon, Kohath, chule Merari ahiuve.
58 Achilhahteu aphungkhai cheh a akisimle, Libni, Hebron, Mahli, Mushi chule Korah ahiuve. Kohath chapa chu Amram pa ahin,
59 Amram hi Egypt gam a peng Levi chanu, Jochebed to akicheng’e. Jochebed le Amramin chapa ni ahing lhonin, Aaronle Mose ahin, Miriam kiti chanu khat to ahing lhon’e.
60 Aaronin chapa li ahingin, Nadab, Abihu, Eleazar chule Ithamar ahiuve.
61 Nadab le Abihun dan dih louva Pakai koma gimnamtui alhutnam lhon jeh-in athi lhontai.
62 Levite pasal lha khat’a lhah chung lamse akisim le mihing sang som ni le sangthum alhinguve. Israel lah a mangmo you alo thei loujeh-un Levite hi Israelte to akisimthapoi.
63 Hikoma kijihdoh phung hijat hi, Jericho a pat Jordan gal, Moab mite phaicham a Mose le Eleazarin Israelte asimtoh lhon a ajihdoh lhon ahi.
64 Sinai nelgam a mijat kisim masah chun, Mose le Aaronin simlou khat cha anei lhonpoi.
65 Jephunneh chapa Caleb le Nun chapa Joshua tilou adangse thigam dia Pakaiyin aseisa dungjuiyin athigamtauve.

Minbu Bung 27
Zelophehad chanute

1 Joseph chapa Manasseh ahin, Manasseh chapa Machir, Machir chapa Gilead, Gilead chapa Hepher, Hepher chapa Zelophehad ahin, Zelophehad chanute chu Mahlah, Noah, Hoglah, Milcah chule Tirzah ahiuve.
2 Zelophehad chanuten Mose le Thempu Eleazar, lamkai ho le Pakai chenna ponbuh kotphunga kikhom khoppi masanga,
3 “Kapau chu chapa hin louvin gamthip laiya athidentai. Amachu Pakai douva pang Korah nungjuite to jong kiloi lou ahi; ama chonset jal’a thia bou ahi.
4 Chapa anei lou man jen a iti kapau min Israel lah a kisumang jeng thei ding ham? Kapa inkote lah a keiho chan ding jong you neipeuvin,” atiuve.
5 Athil ngeh-u hi Mose’n Pakai heng alhut’in,
6 Pakaiyin ajah a,
7 “Zelophehad chanute thil thum hi adih-e; apa inkote lah a goulo ding hoppeh-uvin. Apa you ding amaho chansah tauvin.
8 Psal chapa bei chu achanun you alo dingin Israelte seipeh-in.
9 Chanu geiya neilou ahile, asopiten you alopeh diu ahi.
10 Sopi bei ahikit nah laile apa sopiten you alopeh a ama nei banga um ding ahi. Kei-Pakaiyin kathupeh banga, niche hi Israelten chondan a amanuva anit jing diu ahi,” ati.

Mose khel’a Joshua kilhen
(Duet 31:1-8)

12 Pakaiyin Mose jah a, “Abarim molsanga kaltouvin, Israelte kapeh got gam khu gaven.
13 Gam chu navet jou teng, nasopipa Aaron banga thi ding nahitai;
14 ajeh chu Zin gamthip noiya kathupeh dounan nachon lhon’e. Meribah a khoppi pumpi kahenga akiphin chun, amasanguva kathahat thengtah naphondoh lhonpoi,” ati. Meribah kiti hi Zin gamthip noiya Kadesh mun a twisamphung chu ahi.
15 Mose ataovin,
16 “Vo hinna bulpi Pakai Pathen, nakoma kataove, kei khel ding japi lamkai thei,
17 namite khoppi hi kelngoiching bei kelngoite abah louna diuvin, galmun a thu nun thei mi khat lhenpeh-in!” ati.
18 Pakaiyin Mose jah a, “Thil bol thei tah Joshua, Nun chapa khu gapuiyin lan aluchunga khut ngamin.
19 Eleazar Thempupa le khoppi pumpi masanga dinsah-in, abonchauva angsung laitah a nang khel ahina phongdoh-in.
20 Israel khoppi pumpi thu angaina diuvin, nathaneina phabep Joshua pen.
21 Kadei le deilou hetna dia Urim le Thummin phunsanji Eleazar Thempu chunga Joshua ki-ngai jeng ding ahi. Hitia hi ima ma lam jousea Eleazarin Joshua le Israel khoppi pumpi alamkai ding ahi,” ati.
22 Pakaiyin aseipeh bangin Mose’n aboltai. Eleazar Thempu le khoppi pumpi masanga Joshua adinsah tai.
23 Pakai thupeh bangin Mose’n Joshua luchunga khut angamin, ama khel ahina aphongdo tai.

Minbu Bung 28
Aphatcha kitoh thilto
(Ex 29;38-46)

1 Pakaiyin Mose aseipeh-in,
2 Israelten Pathen lungdeiya aphat kitep phat cha neh le chah thilto apeh jingna diuva hilchah din aseiye.
3 Pakaiyin neh le chah thilto peh ding ho chu: niseh pumgo thilto, nalnabei, kum khat lhingsa, kelngoichal ni ahi.
4 Jingkah le kelngoi khat toa, nilhah teng kelngoi khat nato diu ahin,
5 kelngoi khat cheh chu olive thao phapen litre khat to halsa, lhosoh thilto dia changbong neldisel kilogram khat to hitha ding ahi.
6 Hiche hi niseh a pumgo thilto kipe, Pakai lung lhaina dia, amasaa Sinai molsanga kitoh, neh le chah thilto chu ahi.
7 Lengpitwi thilto din, kelngoi kitoh masa to lhon din, lengpitwi litre khat maicham phunga sung lhan.
8 Nilhah lam teng jongle kelngoi nina chu jingkah thilto kibolna bangin toh-in, Pakai lung lhaina din, lengpitwi thilto le neh le chah thilto chutoh kilhon tha kit ding ahi.

Choldo nikho thilto
9 Choldo nikhole kum khat lhingsa kelngoichal ni, nolnabei, neh le chah thilto dia olive thaoto halsa, changbong neldisel kilgram ni, chule lengpitwi thilto to to than.
10 Hiche pumgo thilto hi niseh thilto ngai le lengpitwi thilto val a kitohdoh ahi.

Lhathah nikho thilto

11 Lhaseh le ni masa nin Pakai henga pumgo thilto pen: bongchalgol ni, kelngoichal khat, kum khat lhingsa kelngoichal sagi, nolnabei cheh hidiu ahi.
12 Neh le chah thilto din olive thao to halsa changbong toh-in: bongchal khatto kito tha ding, changbong kilogram thum, kelngoichal to to tha ding changbong kilogram ni;
13 kelngoi khatto totha ding changbong kilogram khat hiding ahi. Hiche pumgo thilto ho hi Pakai lung lhaina neh le chah thilto ahiuve.
14 Lengpitwi kitoh bep’a toding chu bongchal khat chunga lengpitwi litre ni, kelngoichal khat chunga keh khat, kelngoi khat chunga litre khat hiding ahi. Niche chondan hi kum lhungkeiya lha kipatseh le pumgo thilto dol ahi.
15 Niseh pumgo thilto lengpitwi chungvuma chonset thilto din kelchal khat tohdoh-in.

Kalchuh kut thilto
(Lev 23:5-14)

16 Pakai jabolna lha masapen nisomle ni li nileh kalchuh kut bol ding ahi.
17 Nisom le ni nga nileh houkut kipan a, ni sagi sunga kibol ding, hiche sungsea hi cholsolou changlhah jeng neh ding ahi.
18 Kut kipatni le Pathen hou dia nikikhop diu, na toh louhel ding ahi.
19 Pakaiya neh le chah thilto din pumgo thilto toh-un: bongchalgol ni, kelngoichal khat, kum khat lhingsa cheh kelngoichal sagi, nolnabei cheh toh-un.
20 To ngaidol, lhosoh thilto, olive thao to halsa changbong neldisel: bongchal khat chunga kilogram thum, kelngoichal khat chunga kilogram ni,
21 kelngoi khat chunga kilogram khat nato tha cheh diu ahi.
22 Chule chonset thilto din kelchal khat toh-un lang, hiti hin japi suh theng kin bolsoh keiyun.
23 Angaiya jingseh a pumgo thilto chungvuma hicheng hi natobe diu ahi.
24 Hitobangma chun ni sagi sungin Pakai henga, alung lhaina din gimnamtui lhutnam din neh le chah thilto peuvin. Hicheng jong chu niseh a pumgo thilto le lengpitwi thilto chungvuma natobe diu ahi.
25 Ni sagi nile Pathen houdin kikhom’un, na toh dauvin.

Lholhun kut’a thilto
( Lev 23:15-22)
26 Lholhun kut ni masapen ni, Pakaiya lhosoh gathah napeh tengu, Pathen houdia kikhom a nadang natohda diu ahi.
27 Pakaiyin gimnamtui ajahnom din pumgo thilto din: bongchalgol ni, kelngoichal khat, kum khat lhingsa cheh, kelngoichal sagi, nolnabei cheh tohdoh-un.
28 Angaiya lhosoh thilto, olive thaoto halsa: bongchal khat chunga kilogram thum, kelngoichal khat chunga kilogram ni,
29 chule kelngoi khat chunga kilogram khat cheh nato diu ahi.
30 Chonset thilto din kelchal khat jong toh-un, hitobang hin japi suh theng kin bolsoh keiyun.
31 Hicheng le lengpitwi thilto hi niseh a pumgo thilto le lhosoh thilto chungvuma natobe diu ahi.

Minbu Bung 29
Kumthah kut nia thilto
(Lev 23:23-25)

1 Lha sagi lhinna, nikho masapen nile Pathen houdia kikhom a nadang natoh lou diu ahi. Hiche nikhoe hile sumkon kimut ging ding ahi.
2 Pakai henga pumgo thilto, gimnamtui jahnom din, bongchal khat le kelngoichal khat, chule kum khat lhingsa cheh kelngoichal sagi, nolnabei cheh nato diu ahi.
3 Angaidol’a lhosoh thilto, olive thaoto halsa, changbong neldisel, bongchal khat chunga kilogram thum, kelngoichal khat chunga kilogram ni,
4 kelngoi khat chunga kilogram khat nato diu ahi.
5 Chonset thilto din kelchal khat toh-un lang, hiti hin japi suh theng kin bolsoh keiyun.
6 Hichengse hi lha sunga ni masapen nia angaidol’a pumgo thilto le lhosoh thilto pum, chule niseh pumgo thilto le lhosoh lengpitwi thilto puma nato tha diu ahi. Hiche neh le chah thilto gimvui nam hi Pakaiyin angai nom lheh ahi.

Thoidam nikhoa thilto
(Lev 23:26-32)

7 Lha sagi lhin, nisom nin Pathen houdin kikhom’un; an ngol’un, na toh diuvin.
8 Agimvui nam ngai nom din Pakai henga bongchal khat, kelngoichal khat, kum khat lhingsa kelngoichalma sagi, nolnabei cheh tohdoh-uvin.
9 Angaiya kitoh lhosoh thilto, olive thaoto halsa, changbong neldisel, bongchal khat chunga kilogram thum, kelngoichal khat chunga kilogram ni,
10 kelngoi khat cheh chunga kilogram khat nato diu ahi.
11 Chonset thilto din kelchal khat toh-un lang, hiti hin japi suh theng kin bolsoh keiyun, niseh a pumgo thilto le lhosoh thilto chule lengpitwi thilto to todoh thauvin.

Lhambuh kut a thilto
(Lev 23:33-44)

12 Lha sagi lhin, nisom le ni nga nin Pathen houdin kikhom’uvin. Pakai ja nan hiche kut hi ni sagi sungin bol’un, na toh dauvin.
13 Kut ni masa nin, gimvui nam jah nom din Pakai henga neh le chah thilto peruvian, bongchal som le thum, kelngoichal ni, kum khat lhingsa kelngoichal som le li, nolnabei cheh nato diu ahi.
14 Angaidol’a lhosoh thilto, olive thaoto halsa, changbong neldisel, bongchal khat chunga kilogram thum, kelngoichal khat chunga kilogram ni,
15 chule kelngoi khat chunga kilogram khat le angai jat lengpitwi thilto to nato tha diu ahi.
16 Chonset thilto din kelchal khat toh-un lang; hichengse hi niseh a pumgo thilto le lhosoh thilto chule lengpitwi thilto chungvuma natobe diu ahi.
17 Nikho ni lhin nile bongchalgol somle ni, kelngoichal ni, kum khat lhingsa kelngoichalma somle li, nolnabei cheh tohdoh-un.
18 Dan kisem dungjuiya bongchalte le kelngoichalte chule kelngoite todoh tamale lhom dungjuiya lhosoh thilto le lengpitwi thilto jong nato diu ahi.
19 Chonset thilto dia kelchal khat, angaidol’a thilto jat, pumgo thilto le lhosoh thilto chule lengpitwi thilto chungvuma totha ding ahi.
20 Nithum lhin ni le nolnabei cheh, bongchalgol som le khat, kelchal ni, kum khat lhingsa kelngoichalma somle li tohdoh-un.
21 Dan kisem dungjuiya bongchal ho le kelngoichal te ni, kelngoichal dang ho to totha ding lhosoh thilto le lengpitwi thilto jong atamle alhom dungjuiya totha cheh ding ahi.
22 Angaidol’a kitoh pumgo thilto le lhosoh thilto chule lengpitwi thilto val’a jong chonset thilto dia kelchal khat to ding ahi.
23 Ni li lhin ni le bongchalgol som, kelngoichal ni, kum khat lhingsa kelngoichalma som le li, nolnabei cheh toh-uvin.
24 Dan kisem dungjuiya bongchal ho le kelngoichal te ni, chule kelngoi ho jat tamle lhom dungjuiya, lhosoh thilto le lengpitwi thilto jong hitha cheh ding ahi.
25 Angaiya kitohji pumgo thilto le lhosoh thilto chule lengpitwi thilto val’a jong chonset thilto dia kelchal khat totha ding ahi.
26 Ni nga ni le bongchalgol ko, kelngoichal ni, kum khat lhingsa kelngoichalma somle li, nolnabei cheh natodoh diu ahi.
27 Dan kisem dungjuiya bongchal ho le kelngoichal te ni, chule kelngoi ho jat tamle lhom to kitoh a lhosoh thilto le lengpitwi thilto val’a jong chonset thilto dia kelchal khat totha ding ahi.
29 Nigup ni le bongchalgol get, kelngoichal ni, kum khat lhingsa kelngoichalma som le li, nolnabei cheh nato diu ahi.
30 Dan kisem dungjuiya bongchal ho le kelngoichal te ni, chule kelngoi ho jat tam le lhom to kitoh a lhosoh thilto le lengpitwi thilto jong hitha cheh ding ahi.
31 Angaidol’a pumgo thilto le lhosoh thilto chule lengpitwi thilto val’a jong chonset thilto dia kelchal khat jong hitha ding ahi.
32 Ni sagi ni le bongchalgol sagi, kelngoichal ni, kum khat lhingsa kelngoichalma somle li, nolnabei cheh nato diu ahi.
33 Dan kisem dungjuiya bongchal ho le kelngoichal te ni, chule kelngoi ho jat tam le lhom to kitoh a lhosoh thilto le lengpitwi thilto jong hitha ding ahi.
34 Angaidol’a pumgo thilto le lhosoh thilto chule lengpitwi thilto val’a jong chonset thilto dia kelchal khat hitha ding ahi.
25 Niget ni le Pathen houdin kikhom’un, na toh dauvin.
36 Agimvui nam Pakai ngai nom din, neh le chah, pumgo thilto dingin, bongchalgol khat, kelngoichal khat, kum khat lhingsa kelngoichalma sagi, nolnabei cheh Pakai din toh-uvin.
37 Dan kisem dungjuiya bongchal ho le kelngoichal te ni, chule kelngoi ho tam le lhom to kitoh a lhosoh thilto le lengpitwi thilto jong hitha ding ahi.
38 Angaidol’a pumgo thilto le lhosoh thilto chule lengpitwi thilto val’a jong chonset thilto dia kelchal khat hitha ding aih.
39 Tepsa kut nabol tengule Pakaiya pumgo thilto, lhosoh thilto, lengpitwi thilto, kiloikhom thilto nabol diu dol’a kisem chena lhongpi ho hicheng hi ahi. Hiche Dan ho hi kitepna neiya suh bulhit teng deichome kipe thilto dan chungvuma kisembe ahi.
40 Hiti hin Pakaiyin ahil jouse Mose’n Israelte aseipeh soh keitai.

Minbu Bung 30
Kitepna Dan umdol

1 Israel phung lamkaite chu Mose’n hitin aseipeh tai.
2 Pasal’in Pakai peh dia thil khat akitep ham chun kitepsa asuhkeh louhel ding, bol dia asei sei chu aboldoh jeng ding ahi.
3 Apa in a cheng nalai nu-ngah-in Pakai peh dia thil ikhat atep ham, thil khat boldia dia atep ham chu,
4 apan ajahda loule, bol dia aseipen pen chu aboldoh tei tei ding ahi.
5 Akitepna chu bol ding apan ajahda vangle, nit khoh angai tapoi. Apan ajahda jeh chun Pakaiyin ngaidam nante.
6 Ji neilou numeiyin hetohsa hihen hetoh lou hile kitepna abol ham, thil khat bolda dia kitep ham chun, ji anei teng
7 ajipan ajahda tilouva, kitepsa chu aboldoh tei tei ding ahi.
8 Ajipan ajahda bangle nit khoh angaipoi, Pakaiyin ngaidam nante.
9 Meithai le dasa numeiyin akitepna jouse aboldoh tei ding, bolda dia akitep chan jong abol lou hel ding ahi.
10 Ji neisa numeiyin i-khat bolda dia kitepna anei khah le,
11 ajipan ajahda ngal tilouva akitepna anit tei tei ding ahi.
12 Ajipan akitepna chu ajahda bangle nit khoh angaipoi, ajipan aboldasah jeh chun, Pakaiyin ngaidam nante.
13 Numei kitepna phudet dingle sukeh ding chu ajipan tha aneiye.
14 Numei kitepni jinga jadoh ta a, da deh lou chu, akitep mun akitepsa banga aboltei tei ding ahi. Ajeh chu ajipan ajahdoh nia dana aneiloujeh chun aphudet peh lo tai.
15 Amavang khonung teng kitepnasa chu asuhmil jeng tah leh, kitepna boldoh loujal’a hamsetna jouse akipoh ding ahi.
16 Apa insunga cheng nalai ji neilou numei le ji neisa numei kitepna thudol’a Pakaiyin Mose apehsa chondan ho chu hicheng chu ahitai.

Minbu Bung 31
Midian mite Hougal kibol khum

1 Pakaiyin Mose jah a,
2 “Israelte chunga akisah gitlou jeh-un Midian mite talen matsah-in. Talen namatsah jou teng, nathi ding ahitai,” ati.
3 Hijeh hin Mose’n mipi jah a, “Pakai abolset jeh-uva Midiante delkhuma talen matsah din, gal kon dingin kigouvin.
4 Israel phung khat cheh a konin sepai sang khat cheh sol’uvin,” ati.
5 Israel phung khat cheh a konin pasal sang khat cheh alhengdoh-un, pasal sang som le sang ni gal kon ding gotsa ahitauve.
6 Abonchauvin Eleazar Thempupa chapa, thil theng ho le galbolna lhangsapna ding sumkon choiya pang, Phinehas lamkai din, Mose’n galkonin asoldoh tai.
7 Pakaiyin Mose ahil bangin, Midiante adel khum’un, pasal jouse athat gam;uvin,
8 Midian leng ho nga jen, Evi, Rekem, Zur, Hur chule Reba geiyin atha thauve. Beor chapa Balaam athat’un ahi.
9 Israelten Midian numei chapang jouse aman’uvin, bong jouse le kelngoi hon jamah akaiyun, anei agou chengseu alauvin,
10 akhopi jouseu le ngahmun ho ahalpeh tauve.
11 Athil chomdoh chengseu apo’uvin, gal-hing ho le gancha amat tha chengseu geiyin akaiyui.
12 Abonchan Mose le Eleazar, Israel khoppi pumpi kom, Jericho kona kigalmu, Jordan gal, Moab phaiya ngahmun a ahinlhutsoh hel’uve.

Israel sepai hung kile kit

13 Israel sepai vai lhung lamto din Mose le Eleazar chule khoppi lamkai chengse ngahmun dalhan akitoldoh tauve.
14 Galmun a hung kile kit sepai vaipote le asang sang lamkaiho, aja ja lamkai ho chunga Mose alung hangtai.
15 Mose’n, “Ibol’a Midian numei ho hinghoi nahiuvam?
16 Peor mun a Balaam sei juiya mipi Pakai tahsanna pul lhahsah chu numeiho ahiu geldoh tau! Hiche abol jeh-uva Pakai mite chunga natset lhunlo chu-men!
17 Chapang pasal jouse le pasalto kitimatsa numei jouse that gam’un,
18 chapang numeise le pasal sunset loulai numei ho vang kikoitauvin.
19 Koi hileu chun mithat a le tolthi long tongkha chang ni sagi sunga ngahmun polam a naumden diu ahi. Nithum ni le ni sagi lhin ni teng, nang ho le numei gal-hing nakaihou kisutheng’uvin.
20 Ponsil tapou, savun a kisem manchah le kelmul a kisem ho chule thinga kisem manchah jouse jong nasuh theng tha diu ahi,” ati.
21 Galmun a hung kile kit pasal ho jah Eleazar Thempun, “Pakaiyin Mose apeh chondan chengse chu hiche ho hi ahi.
22 Thil mei kahmo, sana dangka, sum-eng, thih, langva, hahngeh, hicheng hi meiya gotheng ding ahi.
23 Thil dang ho vang kisuh thengna twiya sil theng cheh ding ahi.
24 Ni sagi lhi nile von jouse nakisop diu, chuteng hou thudol’a nathen diu, ngahmun a lut thei bep ding nahiuve,” ati.

Chomdoh thil kihop

25 Pakaiyin Mose jah a,
26 “Nang le Eleazar, chule khoppi lamkai dang ho to, gal-thil kichomdoh ho le gal-hing kiman ho chule gancha kiman jouse nasimsoh kei diu ahi.
27 Thil kichomdohho chu hop nin hom’un lang, khat sepai ho chang ding, chule khat chu khoppi chang ding ahi.
28 Sepaite chan lah a Pakaiya kai peh din sohchang ja nga lah a khat, bong le sa-ngan, kelngoi, chule kelcha lah a jong chutima bol ding ahi.
29 Hicheng hi Pakai henga deichom thilpeh din Eleazar Thempu khut’a peuvin.
30 Japi chan ding lah a sohchang som nga lah a khat, bong le sa-ngan, kelngoi chule kelcha jong chutimaa bol ding ahi. Hicheng hi Pakai ponbuh kinbol’a pang Levite peruvian,: ati.
31 Pakai thupeh dungjuiyin Mose le Eleazarin abol lhontai.
32 Galmuna sepaite chomdoh thilkeo jat, kelngoi le keltah sang jagup le sang som sagi to sang nga,
33 bong sang som sagi le sangni,
34 sa-ngan sang somgup le sang khat,
35 pasalto kitimat loulai nu-ngah sang somthumle sangni, alhing’e.
36 Galkon sepaite chan ding jat kelngoi sang jathumle sang somthum to sang sagi le ja nga ahi.
37 Hicheng lah a Pakaiya ding kelngoi jagup le som sagi to nga alhinge.
38 Sepaite chan ding bong sang somthumle sang gup alhingin, hiche lah a Pakaiya ding chu som sagi le ni ahi.
39 Sepaite chan ding sa-ngan sang somthumle ja nga alhingin, Pakaiya ding somgup le khat ahi.
40 Sepaite chan ding nu-ngah sang som le sang gup alhingin, Pakaya ding somthumle ni ahiuve.
41 Pakaiyin thu apeh bang bangin Mose’n, Pakai dia deichom thilto din, Eleazar khut’a kai peh ding jat apeluttai.
42 Israel khoppi chan ding chu sepaite chan ding jatma ahin,
43 kelngoi sang jathumle sang somthumto sang sagi le ja nga ahin,
44 bong sang somthumle sang gup alhingin,
45 sa-ngan sang somthumle ja nga alhingin,
46 nu-ngah sang somle sanggup alhinge.
47 Hicheng lah a kon hin Pakaiyin athupeh bang bangin, sohchangle gancha som nga a konin khat cheh, Mose’n aladoh-in, Pakai ponbuh kinbol’a pang Levite apetai.
48 Hichun gal lamkai sepai vaipote Mose henga acheuvin,
49 “Pu, kapoh jat cheh sepaite kasimtoh-ule, amangthah aumpoi.
50 Hiti hin sana jempah ho le chaokol ho, chaojang ho, khivuiho, bilba ho chule khi kachomdoh chengseu kahin choiyui. Hiche ho hi kalong lhatnauva, eihuhhingna diuva, Pakai henga kapeh-u ahi,” ati.
51 Mose le Eleazar Thempun kijepna dia kisem sana jouse ala lhontai
52 Sepai lamkaiho thil todoh jat kilogram ja ni alhing deh chet’e.
53 Sepai lah a lamkai hikha louhon vang thil achomdoh jat akikoiden tauve.
54 Pakaiyin Israel mipi ahoidamna din, Mose le Eleazarin sana chengse ponbuh sunga achoilut lhontai.

Minbu Bung 32
Jordan lui solam a chengte
(Duet 3:12-22)

1 Reuben phungle Gad phungin jong bong tampi aneiyui. Jazer gam le Gilead gam bong vahna dia aphatje amudoh phat’un,
2 Mose le Eleazar chule khoppi lamkaiho koma,
3 “Pakai lungset’a kilo hiche gamkai sung: Ataroth, Dibon, Jazer, Nimrah, Heshbon,
4 Elealeh, Sibmah, Nebo, chule Beon bong vahna dia gampha ahin, bongma kahaovun,
5 keiho din hiche gam neipetauvin lungset tah-in, Jordan gal’a cheng din neisolda tauvin,” atiuve.
6 Mose’n, “Namiteu Israel galkon dia nangho hikoma umden go nahiu ong?
7 Pakaiyin apeh sau gamsung lo dia Jordan galkai go Israelte chu iti lung thoisah goa nahiuvam?
8 Canaan gam vedia Kadesh Barnea a pat napu napateu kasol’a jong hitima chu anabol’u ahi.
9 Eshcol phai ageiyun, gamsung amu’vin, ahung kile phat’un Pakaiyin apehsau gamsung lutgo mipi lung asudoiyuve.
10 Hiche nin Pakai lung ahagin kitepna aneiyin,
11 ‘Kei dia akita loujeh-un Egypt a hung kitoldoh kum somnia lhah chunglamse se, Abraham, Isaac chule Jacob peh dia kateppeh sung lut lou dia kihahsel kahitai,’ ati.
12 Keniz mi Jephunneh chapa Caleb le Nun chapa Joshua tilou adangse se lut lou dia kisei lah a pangsoh ahiuve. Joshua le Caleb vang Pakai dia kitah jing ahi lhon nai.
13 Israel mipi chunga Pakai alung phamon, adei louva kisa chengse thigam kahsen, kum somli sungin mipi chu gamthip noiya avathaisah-e.
14 Tua jong napu napateu umchan jop’a, chonset khang thah mite, Israel chunga Pakai lunghan lhut khum ding koncha nahitauve.
15 Reubente le Gadten Pakai nung jui ding nadaule, mihem hijatpi hi gamthip laiya dondantin, amanthah tengu mo napohlo diu ahi,” ati.
16 Reubente le Gadten Mose jah a, “Ahile hikoma hin kelngoi hongkul songin neiset sah-un, kacha kanaoteu din kulpi kai tadiu vinge.
17 Chujou teng kajat chanpiu Israelte to gal konkhom ung ting, agamsung diuva kachensahsoh kahseuvin gal bol hu nauvinge. Kagalsat kah-un kacha kanaoteu hikom kulpia chun lung mongin pansauvin tin, agamsung miten asuh boida diu ahi.
18 Achan diuva kipesa gamsung alosoh hel kahseuvin Israel dang din gal sat hu’ving tin, in a hung kilekit da tauvinge.
19 Hikom Jordan luigal solam a leiset goulo changsha kahijeh-un, amaho lah a leiset goulo hih hel unge,” atiuve.
20 Mose’n, “Tah nasei mongu ahile, hikom Pakai angsunga hin gal kon din kigo jengun.
21 Namiteu gal bol thei jouse Pakai thupeh a Jordan galkai dia kigouva, Pakaiyin amelmateu ajo kahsea gal abol diu,
22 gamsung chu alo ding ahi. Chujou teng hung kile kit thei tauvin nate, ajeh chu Pakai dingle Israel nahipiu mite dia toh ding lom najo theiyu ahitai. Hiteng chule Jordan solam gamkaise hi nachan diu gam a Pakaiyin aphondoh ding ahi.
23 Nakitepnau nanit dau bangle, kagihsal masah nahiuve, Pakai douna chonse nahitauve, Pakai douna chonse nahitauve. Sukhel hih hel’un, chonset man talen mat lo’uvin nate.
24 Hiti chun khole veng kisem’un, asunga kelngoi hong ima kibol tauvin, amavang nakitepsau molsouvin!” ati.
25 Gad le Reuben phung miten, “Nasei bang bangin bol nauvinge –pu!
26 Gilead gamsung khopi le khote dunga kaji kachateule gancha jouse umden tau hen.
27 Adangse vang Pakai thupeh dungjuiya gallon dia gotsa kahitauve. Nasei bangin Jordan galkaiyung ting gal sat tauvinge,” atiuve.
28 Hichun Mose’n Eleazar le Joshua chule Israel lamkai dangho henga:
29 “Gad le Reuben phung mite Pakai thupeh banga Jordan galkaiya gal sat ding anop’uva, amaho panpi jal’a agamsung nalah jeng tah-ule, Gilead gamsung khu goulo gam din petauvin.
30 Jordan galkai daa, gal nasat khompi dau bangle, nangho banga, Canaan gamsunga bou goulo gam akilah diu ahi,” ati.
31 Gad le Reuben phung miten,”Pu, Pakai thupeh bang banga kaboltei tei diu ahinai.
32 Pakai lamkaina a Canaan gamsung kalut diu, gal kasat’uva, Jordan solam gamkai hi goulo gam a kaneiden diu ahi,” atiuve.
33 Hijeh chun Mose’n jong Gad le Reuben phung mite, Manasseh phung keh khat chu, Amor lengpa Sihon gamsungse le Bashan lengpa Og gamsung, akimvel gamsungse se le kho jouse apetai.
34 Gad phung miten kulpi kaikhumsa Dibon le Ataroth, Aroer,
35 Atroth Shophan, Jazer, Jogbehah,
36 Beth Nimrah chule Beth Haran asaphauve.
37 Reuben phung miten Heshbon, Elealeh, Kiriathaim,
38 Nebo, Baal Meon (hiche khomin hi kikhelsa ahitai), chule Sibmah asaphauve. Khothah asahdoh ho’u minthah cheh avo’uve.
39 Manasseh chapa Machir phungkhaiyin Gilead gam adelkhum’un, achengte Amor mite adeljam’uvin, agamsung alotauve.
40 Mose’n jong Gilead gamsung chu Machir phung apen, amazon achenpha tauvin ahi.
41 Manasseh phunga mi Jair chun kho phabep adelkhumin, alahsoh phat’in min akiputsah-in, “Jair kho jeng,” asah-e.
42 Naboh-in Kenath le akimvel kho phabep adelkhumin, alah phat’in minthah avon, min akiputsah-in Nobah asah-in ahi.

Minbu Bung 33
Egypt a pat Moab gei kholjin

1 Mose le Aaron lamkainaa Israelten Egypt dalha akitol’uva phungkhai cheh a kigol’a ngahmun asemji nau mun ho chu hiti ahi.
2 Pakai thusah dungjuiyin ngamun asemna jouseu mun min ho chu Mose’n ajihdoh soh keiye.
3 Kum sunga lha masapen, nisomle nga ni, kalchuhkut nikho ajingin Israelten Egypt adalhatauve. Pakai panpi jal’in Egypt mite mitmu changtah-in, Israelten Rameses khopi adalhauve;
4 hichepet hin Egypt miten Pakai thasa achapa peng masateu akivuiyui. Egyptte doihou sanga, athaneijoh vetsahna Pakaiyin hitia hi abol ahi.
5 Ramese khopi dalhan akitol’un, Israelten Sukkoth a ngahmun asem’ui.
6 Aban a ngahmun chu nelgamgi chin, Etham a abol’ui.
7 Hikoma pat akile heiyun, Baal Zephon solam, Pi Hahiroth ajon’un, chuin Migdol koma ngahmun asauve.
8 Pi Hahiroth dalhan, Twikhanglen san jotpan, Shur nelgam ajon’ui; nithum akijot nungun Marah a ngahmun asem’ui.
9 Chua konin akitol’un, Elim a twinah somle ni jen um to tumphung som sagijen akejeh-in, hikoma chun ngahmun asemtauve.
10 Elim dalhan akitol’un, Suez Twilen panga aki-ngauve.
11 Aban a ngahmun asem nau chu Sin nelgam ahitai.
12 Chuin Dophkah a aki-ngauvin,
13 chujouvin Alush a aki-ngauve.
14 Abankit’a chu, twi aholmo nau, Rephidim a chu ki-ngauva ahi.
15 Rephidim a konin Sinai gamthip a ngahmun asauve.
16 Sinai gamthip’a konin Kibroth Hattaavah a ngahmun asem’ui.
17 Kibroth Hattaavah a konin Hazeroth a ngahmun asem’uve.
18 Hazeroth a konin Rithmah a ngahmun assauve.
19 Rithmah a konin Rimmon Perez a ngahmun asem’uve.
20 Rimmon Perez a pat Libnah a ngahmun asem’ui.
21 Libnah a konin Rissah a ngamun asauve.
22 Rissah dalhan Kehelathah a ngahmun asem’uve.
23 Kehelathah dalhan Shepher molsanga ngahmun asem’ui.
24 Shepher molsanga pat Haradah a ngahmun asauve.
25 Haradah a akipatdoh-un Makheloth a ngahmun asauve.
26 Makheloth a konin Tahath a ngahmun asem’uve.
27 Tahath a pat Terah a ngahmun asem’ui.
28 Terah a pat Mithkah a ngahmun asauve.
29 Mithkah a akitpatdoh-un Hashmonah a ngahmun asem’uve.
30 Hashmonah a konin Moseroth a ngahmun asem’ui.
31 Moseroth a pat Bene Jaakan a ngahmun asauve.
32 Bene Jaakan dalhan Hor Haggidgad a ngahmun asem’uve.
33 Hor Haggidgad a pat Jotbathah a ngahmun asem’ui.
34 Jotbathah dalhan Abronah a ngahmun asauve.
35 Abronah a konin Eziongeber a ngahmun asem’uve.
36 Eziongeber a pat Kadesh kiti, Zin gamthip laiya ngahmun asem’ui.
37 Kadesh a pat Edom gamgi chin, Hor molsanga ngahmun asemtauve.
38 Pakai thusah a konin Aaron Thempu chu Hor molsanga akaltouve. Israelten Egypt adalhah kal kum somli na, lha nga lhin, ni masapen nin
39 akum jakhat le somni le thumin Aaron Thempupa Hor molsanga athidentai.
40 Israelte hung kitol thu hi, Canaan lhang lam gamkai sunga Arad lengpan ajatai.
41 Israelte chu Hor molsanga pat Zalmonah a aki-ngauvin,
42 Zalmonah a konin Punon a aki-ngauve.
43 Punon a pat Oboth a aki-ngauvin,
44 Oboth a konin Iyeabarim a aki-ngauvin, hiche kom hi Moab gamsung ahitai.
45 Iyeabarim a pat Dibongad a aki-ngauvin,
46 Dibongad a konin Almondiblathaim a aki-ngauve.
47 Almondiblathaim a pat Nebo gal, Abarim lhanga akingauve.
48 Abarim lhang dunga pat Moab phai, Jordan pang Jerichoa aki-ngauvin,
49 Jordan pang Bethjesmoth a konin Moab phai, Abelshittim geiyin ngahmun asem lhungkeiyui.

Jordan galkai masanga hilchahna

50 Jordan gal, Moab phai, Jerichoa chun Pakaiyin Mose aseipeh-in,
51 hitin ahil’e, “Jordan galkaiya Canaan gamsung nalut tengu,
52 agamsung mite nanodohsoh hel diu ahi. Molsang ho le milimdoi kisemthu jouse, chule doiphung ho geiya nasuhmang hel diu ahi.
53 Agamsung chu chenpha jengun, kapeh nahitauve.
54 Vang san’un lang gamsung chu kihom’un, aphung phungin, phung tamte gamlen, phung lhomte gamneo peuvin.
55 Gamsung mite nanodoh daule, kho nung teng mitboh bangle jet le veiya heojanga kidot tobang diu, nadouvuva hung pang ding ahiuve.
56 Deldoh louva nakoiyule, amaho suhmang kagot banga, nangho kasuhmanglo diu ahi,” ati.

Minbu Bung 34
Gamgi ho

1 Pakaiyin Mose chu
2 Israelte seipeh dingin hitobang hin ahilchah-in, “Canaan gam, kapeh got’u chu nalut tengu, gamgi chu hiti ding ahi.
3 Lhanglam gamgi chu Zin gamthip a pat Edom gamgi ajuipeh ding ahi. Twimang lhanglam niso lam a kipan ding,
4 chua kona Akrabhim lampi ajotpaa, Zin gamthip ajotpai ding, kiheisuh peh a Kadesh Barnea geiya che ding ahi. Chuchea pat sahlam ajot’a, Hazar Addar lhung ding, Azmon geiya chea,
5 Egypt gamgi lang, phaicham lang ajot ding, Mediterranea Twikhanglen a kichai ding ahi.
6 “Lhumlam gamgi chu Mediterranea Twikhanglen hi ding ahi.
7 “Sah lam gamgi chu, Mediterranea Twikhanglen kipan ding, Hor molsang ajot ding,
8 Hamath lampi geiya kilhung ding ahi. Hamath lampia kona Zedad ahopaa,
9 Ziphron ajot ding, Hazar Enan a kichai ding ahi.
10 “Niso lam gamgi chu Hazar Enan a pat Shepham gei ding ahi.
11 Hichea pat kisuh lhun a Harbel gei ding, niso lam Ain ajot a, Galilee twilen solam lhang ho alhah peh ding,
12 kisuh lhun kit’a Jordan vadung ajui ding, twimang dunga kilhung lha ding ahi. “Hicheng hi jet le vei, sahle lhang gamgi hi ding ahi,” ati.
13 Hiti hin Mose’n Israelte jah a aseiyin, “Hiche gamsung hi Pakaiyin phung ko le phungkeh khat apeh gamsung, hiche gamsungse se hi vang san a nakihop diu ahi.
14 Reuben phung, Gad phung, chule Manasseh phung keh khat’in goulo gam din, aphungkhai khaiyin akihom’un,
15 Jordan luipang, Jericho khogal chu akilah tauve,” ati.

Gam hom a lamkaiho

16 Pakaiyin Mose jah a,
17 “Thempu Eleazar le Nun chapa Joshuan gam chu mipi ahoppeh lhon ding ahi.
18 Gam hopteng amani panhu din, phungkhaiya mi khat cheh to lhengdoh-in,” ati.
19 Phungkhai cheh a kilhengdoh chu: Judah phunga Jephunneh chapa Caleb,
20 Simeon phunga Ammihud chapa Shelumiel,
21 Benjamin phunga Chislon chapa Elidad,
22 Dan phunga Jogli chapa Bukki,
23 Joseph phung, Manasseh chate lah a lamkai chu Ephod chapa Hanneil,
24 Ephraim chate lah a Shiphtan chapa Kemuel,
25 Zebulun phunga lamkai Parnach chapa Elizaphan,
26 Issachar phunga lamkai Azzan chapa Paltiel,
27 Asher phunga lamkai Shelomi chapa Ahihud,
28 Naphtali phunga lamkai Ammihud chapa Pedahel ahi.
29 Canaan gamsung Israelte goulo dia gam hom ding lamkai, Pakaiyin anganse ho chu hicheng chu ahiuve.

Minbu Bung 35
Levite kipe khopiho

1 Jordan luigal, Moab phaicham, Jericho a Pakaiyin Mose henga,
2 “Hiche akihopsau gamsunga hi Levite chenna ding khopi phabep le, akimvel’a gancha vahna ding hamhing gam phabep beh Israelten Levite apeh diuvin hil’in
3 Hiche khopiho hi Leviten chenna khopiho hi Leviten chenna aneiyuva, chang jong chang den diu ahi. Hamhing gamse se jong gancha vahna anei diu ahi.
4 Hamhing gam ding chu khopi polam a kitepan a, kulpi pal a pat metre jali le som nga cheh, jet le vei sah le lhang tedoh tha ding ahi.
5 Hitia hi alailunga khopi um ding, jet le vei sah le lhang metre jako cheh tedoh ding ahi.
6 Levite chu hoidohna khopi gup napeh diu, khutsoiya mithat aumle hiche khopihoa hi jamlut’a kisel ding ahi. Hicheng khopi gup belap hin khopi somli le ni peh beuvin,
7 ganvahna gam puma khopi somli le get lhing ding ahi.
8 Aphung phunga Levite chan ding khopi hi phungkhai gam let le neo dungjuiya tedoh peh ding ahi,” ati.

Hoidohna khopiho
(Duet 19:1-13; Josh 20:1-9)

9 Israelte henga seipeh dingin
10 Pakaiyin Mose ahil’in, “Jordan lui galkaiya, Canaan gam nalut tengu,
11 khutsoiya mithah ho jamlut’a hoidohna ding khopi phabep nalhendoh diu ahi.
12 Hiche khopia jamlut khutsoiya mithat chu phulah nomtea kona hoidoh thei ding ahi. Mithah a ki-ngoh pen pen chu japin thu kholtoh louva moh tha jeng lou ding ahi.
13 Khopi gup lhengdoh-un,
14 thum chu Jord luigal nisolam, thumma chu Canaan gamsunga hiding ahi.
15 Khopi gup hi Israelte hihen, kholgam mi, aitih a cheng ham, chom khat dia cheng ham hile, mithat ho hoidohna khopi hidiu ahi. Khutsoiya mithat pen pen hiche khopiho khatpen pen a jamlut ding ahi.
16 “Mi thina thei thih a ajep lih ahivangle tolthat ahin, tolthat chu tha ding ahi.
17 Songa asuhlih ahijogle tolthat ahin, tha ding ahi.
18 Mol a ajeplih ahijongle tolthat ahin, tolthat chu tha ding ahi.
19 Thisanphu la nompan mithat chu ato khah khahna atha thei ahi.
20 Hotman a khat’in achom khat asot lhuh ham, thil khat’a ase ham,
21 khuttuma achuplih jeng ham ahile, tolthat a kisim ding ahin, tha ding ahitai. Amithapa inkoten mithatpa chu atha diu ahijenge. Atokhah khahna atha ding ahi.
22 “Amavang khattouvin midang khat khutsoiya, asot lhuh ham, i-khat khat’a asekhah ham jeh a atha thei ahi.
23 Mu loujeh a jong min midang khat hotman le suhset nom jeh, melmadol’a hilouva, song a selih thei ahi.
24 Hitobang khutsoiya hi japin mithatpa panpi ding, athapa insung mi, phu lanompa panhu lou ding ahi.
25 Mithat a kigel’a themmo chang kihisahpa chu japin huhdoh ding, athipa inko, phu lanompa khut’a chulhah ding, ajamlutna hoidohna khopia chu alesol lut
uva, ajamlut pet a khopia Thempu chungnungpa thi kahsea chengden ding ahitai.
26 Mithajeh a themmo changpa chu ajamlutna khopia chu apotdoh a,
27 mithipa inko, phu lanompan atokhah a kisim thei lou ding ahi.
28 Ajamlutna hoidohna khopi sunga chu mithat themmo changpa hi, khopia ajmlut’a Thempu chungnungpa thi kahsea cheng den ding ahi, Thempupa thi nung vangle akhoa kilekit thei ahitai.
29 Hicheng chondan ho hi hoikoma cheng jongleu chun nangho le nason napahteu chunga kimang jing ding ahi.
30 “Tolthat a ki-ngoh pa chu hettohsah mi ni aumle bou tha ding ahin, tolthat a ginmona chu mi khatseh hettohsahna jal’a lhinglou ding ahi.
31 Tolthat tapou tha ding ahi. Sum pou peh a kilhatdoh thei louhel ding ahi.
32 Tolthat, hoidohna khopia jamlut chu, akhopi sung Thempu chungnung thi masangsea, sum pehguh a akho kile kit ding phalpeh louhel ding ahi.
34 Hiche hi phalpeh leu chun nachen nau gamsung nasuhboh lo diu ahi. Tolthat hin gam leiset asuboh-in, tolthatpa thaa suh theng tilou, tol kithana gamsung thensona ding kilhaina aumpoi.
34 Nachen nau gamsung suthang hih-un, ajeh chu Kei-hi Pakai, Israelte lah a Chengpa kahi,” ati.

Minbu Bung 36
Jineisa numei goulo

1 Joseph chapa Manasseh, Manasseh tupa Machir, Machir chapa Gilead phung upase se Mose le lamkai dang ho henga acheuvin,
2 “Vang san a gam leiset homtoh din Pakaiyin thu napeuve. Kasopipau Zelophehad chanute jong goulo ding gam napeh diuvin aseiye.
3 Hichea hin achanute hi phung dang pasalto kichengu hen, goulo gam chu changden leu, keiho phung dia kipea gamsunga kona kiladoh ding ahitai.
4 Thil lepeh kit kum, johsa thilkeo jouse aneiluipa kilepeh kit teng, Zelophehad chanute goulo gam chu ajinei nau phunga umden ding ahitan, keiho phung chan gam leiset chu beilo ding ahitai,” atiuve.
5 Pakai thusah a konin Mose’n Israelte chu hitin aseipeh-e “Manasseh phung thusei hi adih-e.
6 Hichea hin Pakaiyin Zelophehad chanute chu adei deito kicheng din asei nan, amavang aphung sunguva bou jinei din aseiye.
7 Israelte goulo gam jouse chu aphung phunga umden ding ahi.
8 Goulo gam changden numei jong hiche phung sunga chubou jinei ding ahi. Hitia hi Israelten pugou pagou alo diu ahin,
9 goulo gam chu phung khat’a kona phung choma kichondoh thei lou ding ahi, aphung phungin goulo gam chu alo jing ding ahi,” ati.
10 Pakaiyin Mose aseipeh bangin Zelophehad chanuten abol’un,
11 Zelophehad chanute–Mahlah, Tirzah, Hoglah, Milcah, chule Noah chun apau sopite chapaho akichenpi tauve.
12 Joseph chapa Manasseh phung sunga pasal jeng akichen piuvin, agam goulo’u jong apau phung sunga aumdentai.
13 Chondan le khanchan hijat hi Moab phai, Jordan pang, Jericho khoa Israelte dinga Pakaiyin Mose aseipeh ahi.