NEHEMIAH LEKHABU

Thuphatna

Nehemiah lekhabu hi thumin akihom khen theiye: (1) Japi hinkhomna le Hou thudol tampi semphaa, Persia kumpipan Judah gam vaipo dia ahinsol, Nehemiah lamkaina noiya Jerusalem kulpi pal kikai phat thusim. (2) Ezran giltah a Pathen Danthu asimphong, japan chonsetna aphondoh cheh-u. (3) Judah gam vaipo ahinaa Nehemiah natoh dang ho.
Melchih theipen khat chu-Nehemiah giltah a Pathen chunga akingai dol le ahenga atao jing jeng thusim kijihdoh hi ahi.

Asung thu hopkhen
Nehemiah Jerusalem a ahung kile kit 1:1-2:20
Jerusalem kulpi kikaiphat 3:1-7:73
Danthu kisimdoh Kitepna kisemthah 8:1-10:39
Nehemiah natoh dang ho 11:1-13:31

NEHEMIAH LEKHABU BUNG 1

1 Hacaliah chapa Nehemiah tohdoh chengse chu hicheng hi ahi.

Nehemiah-in Jerusalem akhohsah
Artaxerxes Persia lengvaipoa apan kal kum som ni lhin kum Kislev lhan, Keima Nehemiah hi gamsung khopi lenpen, Susa a kanaum’e.
2 Kasopite lah a Hanani chu, mi phabep to Judah gama konin kahenga ahungui. Amaho hi Jerusalem kho chendol le Babylon gamsunga sohchang kile kit ho umchan dol kadonge.
3 Amahon athimoh cheng agamluiyuva kile kit ho hahsatna, anaivel’a cheng namdangten anoise thudol’u eiseipeh-uve. Avohchim niuva pat, Jerusalem kulpi pal jouse le kelkot phung jouse semphat louva kijam a, meiyin akahvam thudol eiseipeh-ui.
4 Hicheng kajah phat’in touvin kakap jah jenge. Nikho tamtah sung lunghem gim thoh-in, nelou don louvin ka-umloi. Pathen henga kataovin,
5 “Vo Pakai, van Pathen! Naloupin, Nang gin nan kading den jengui. Na-ngailua nathupeh nit ho din Nakitepna kitah tah-in najui bukim soh keiye.
6 Vo Pakai, neiven, sun le jan a nalhacha, Israelte dia katao hi ngaiyin! Israelte kachonsetnau kaphongdoh-e. Keijong, kapu kapateu jong kachonseuve.
7 Nang dou nan thilse bol’in, neithupeh-u kabol pouve. Nalhacha Mose khut’a neipeh-u Danthu ho jong kanit pouve.
8 Tun Mose naseipeh chu geldohtan, ‘Israelte Kei dia nakitahlouvu le, namtin vaipi lah a kathecheh ding nahiuve.
9 Amavang Kahenga nahung kile kit’uva, Kathupeh nanit’ule, leiset kolkimvel a thechehsa hijongleu chun, Neihouna diuva kalhendoh mun a kahin nungpui kit ding nahiuve,’ nati chu.
10 “Vo Pakai hiche ho hi nalhacha jeng, namite ahiuve. Naban-gol thahat’a nahuhdohsa ahiuve.
11 Kataona ngaiyin, Nangma jabol nom jing nalhacha dang ho taona jong ngaiyin. Lolhinna neipen lang, kumpipa neikhotosah-in,” kati. Hiche lai hin Kumpipa juhaidomin kapange.

NEHEMIAH LEKHABU BUNG 2

Nehemiah Jerusalem jot
1 Lha li nung, nikhat kumpipa Artaxerxes jan an neh pet’in juhai kaga thah-e. Lung himoa eimu khah louhel anahin,
2 hijeh chun, “I-bol’a lung himo nahim? Dammo la nahipon, lung nomlou hiteiyin nate,” eiti. Kakinlap jengin,
3 kenjong, “Hingsot’in lengpa! Kapu kapate lupna khopi khogem a kijam a kelkot jouse meiyin kavamsoh ta, itiba lungnom a kaum thei ding ham?” kati.
4 Kumpipan eidongin, “Ahile ipi nadei ham?” ati. Van Pathen henga kataovin
5 chuin kumpipa jah a, “Lengpa lung alhai dia, ka-ngeh neiphal peh thei le, Judah gam, kapu kapateu lupna khopia neisol’in, khopi chu gasa phange,” kati.
6 Kumpinu asih a atoupet tah-in, kumpipan kathum chu eiphalpeh tai. Itih chan kagatham a, itih tah le kahung kile kit ding eidongin, kenjong kaseipeh-e.
7 Kenjong ahenga ka-ngehbe kit’in, Euphrates lhumlam gamkai gamvaipote lekha athot’a, Judah gamsunga eijinsah diuvin hilchahna seisah din kathumin ahi.
8 Lengpa gamsung gammang vetup a pang Asaph jong lekha athot’a, Houin kulpi kimvel kelkot ho manchah ding thing eipeh a, khopi kulpi pal dia thing eipeh ding, chule kachenna ding inthing eipeh dia hilchah din kathum’e. Pathenin eiumpi jeh-in kathum chan chu Kumpipan eiphal pehsoh hel’e.
9 Kumpipan sepai lamkai phabep le sakol sepai lamkai phabep le sakol sepai hon khat to eisol than, Euphrates lhumlam gamkai kajontai. Kumpipa lekha thot chu Euphrates lhumlam gamkai gamvaipote kapei.
10 Hichea hin Beth-horon khoa Sanballat le Ammon gamkaiya vaipo khat-Tobiah hin Israelte dia thipha bol ding mi khat hung chu ajahdoh lhon phat’in alung hang lheh lhon’e.
11 Jerusalem kajon paiyin, nithum sungin
12 Jerusalem khopi dia Pathen eibolsah nom thil chu koimacha kaseipeh poi. Jan khangkimin kathouvin kaloi kagol phabep puiyin kapotdoh-e. Kei touna sangan tilou, gancha dang him him kapui pouve.
13 Khopi kadalhah geiyin jan ahinalaiyin, phaicham kelkot kahopan, lhumlam kajonin, lhanglam ngan kakiheiyin, Dragon twisamphung hopan thilnen pohdohna kelkot phung geiyin kachei. Kache pum pumpkin khopi kulpi pal chimsa ho kakholpan, mei kahvamsa kelkot ho kavetoh-e.
14 Khopi nisolam a pat sahlam kajonin, twisamphung, lengpa twikul lama kachei. Katouna sangan chu inthil gemsa lah a achethei tapon,
15 hijeh chun Kidron phai lang kajotsuh-in, pal ho kavesuh suh-e. Chuin kachena lampi ma ma kahinho kit’in, phaicham kelkot jotpan khopi sung kahung lut kittai.
16 Hoiya chea ipi kabol khosung vaipote ahepha aumpouve. Hichan gei hin kajat chanpi Judah mi koima-Thempuho hihen, lamkai ho hile, vaipote geiya, natonga pang ding koi koi ahiuva-imacha kaseipeh loulai ahiuve.
17 Tunvang kaseipeh-in, “Veuvin, Jerusalem khopi gemsa kijam a, kelkot jouse meiyin kavamsoh ta-iti igimu hitam! Vetset ichan louna diuvin khopi kulpi pal jouse kaiphaute,” kati.
18 Pathenin eiumpia eipanpi thu le kumpipan eihilna chengse jong ajah-uva kaseiye. Amahon “Khopi sapha pantaute!” atiuvin, toh pan din akigotauve.
19 Natoh pat kagot’u hi Sanballat le Tobiah, chule Arab mi Geshemin ajahdoh phat’un einuisat’n kajah-uva, “I-bol’a kigel nahiuvam? Kumpipa dougo nahiuvam?” eitiuve.
20 Kenjong, “Van Pathenin eilo lhinsah tei diu ahi. Alhacha kahiuvin, khopi kasah pat jeng diu ahi. Jerusalem khopi sunga thilkeo imacha nachan diu jong aumpon, umchan khanchan najop theivu jong aumpoi,” kati.

NEHEMIAH LEKHABU BUNG 3

Jerusalem kulpi pal akaiphat’u
1 Khopi asapha pantauvin: Thempu chungnung Eliashib le athemput chanpi hon kelngoi hongkot asemphauvin, athenso jou phat’un kelkot chengse alumna ding dol cheh a ahongui. Jakhat insang le Hananel insang geiyin athenso soh keiyui.
2 Aban chu Jericho miten asauve. Imri chapa Zaccur chun aban kit asaphai.
3 Hassenaah insung min nga-kelkot asemphauve. Kelkot jolpi chengse ajam’un, kelkot atouvin, akotkil ho asutouvin, akha-na din golvai chengse agolsoh tauve.
4 Aban chu Hakkoz tupa, Uriah chapa Meremoth hin asaphai. Ama sah ban chu Meshezabel tupa, Berechiah chapa Meshullamin asaphai. Aban kit chu Baana chapa Zadok-in asaphai.
5 Aban ma chu Tekoa kho miten asaphauvin, ahinla khosung lamkai hon atoh diuva, toh vetup hon anganse nau chu toh ding anom pouve.
6 Paseah chapa Joiada le Besodeiah chapa Meshullamin Jeshanah kelkot asapha lhon’e. Kelkot jolpi ajam lhonin, kelkot khom ato lhonin, akha-na din kotkil ato jou lhonin golvai chengse atosoh lhontai.
7 Gibeon a kon Melatia, Meronoth a kon Jadon, chule Gibeon miho le Mizpah mihon aban asauvin, Euphrates lhumlam gamkai gamvaipo chenna geiyin asaphauvin ahi.
8 Harhaiah chapa Uzziel, sana khengthempan aban chu asai. Gimnamtui semthempa, Hananiah chun aban chu asan, Kulpi pallen geiyin asaphan ahi.
9 Hur chapa Rephaiah, Jerusalem kho keh khat chunga vaihompan aban chu asai.
10 Harumaph chapa Jedaiah chun, a-in to kinai, asah ban’u chu asai. Aban chu Hasahbneiah chapa Hattush chun asai.
11 Harim chapa Malchijah le Pahath-Moab chapa Hasshub chun miho sah ban le meikhulong kitundohna insang jong asapha lhon’e.
12 Jerusalem keh khat chunga vaihom, Shallum, Hallochesh chapan aban kit chu asemphan, achanuten akithopiuve.
13 Hanun le Zanoah kho miten phaicham kelkot chu asemphauve. kelkot ho chu atosoh-un, akha-na kotkil atouvin, golvai chengse agolsoh-un, chule pal jong metre jali le som li gei jen asemphauvin, thilnen paina kelkot geiyin asem lhungui.
14 Rechab chapa, Beth-Haccherem gamkai vaipo-Malchijah chun thilnen paina kelkot asemphai. Kelkot chengse agoltoh-in, akha-na kotkil ho aton, golvai chengse agoltoh-in ahi.
15 Colhozeh chapa, Mizpah gamkai vaipo-Shallumin twisamphung kelkot chu asemphai. Kelkot lampi buh asah khumin, kelkot ho agoltoh-in, kotkil ho aton, golvai chengse agolsohtai. Shelah twikul mun a pat lengpa honlei ban tah chu asemphan, David khopia kumsuhna kalbi geiyin asemsoh keiye.
16 Azbuk chapa, Bethzur gamkai keh khat vaipoa pang-Nehemiah chun aban a pat David lhankhuh gei, twikul chan, mihat gal-hang ho veng geiyin asemphan ahi.

Pal genpha Levite
17 Abanse se chu Leviten asemphauvin: Abantah chu Bani chapa Rehumin asemphan; Keilah gamkai keh khat chunga vaipo Hashabiah chun aban kit chu agamsung thalhengin asemphai.
18 Keileh gamkai keh lang khat chunga vaipo, Henadad chapa-Bavvai chun aban ma chu asemphai.
19 Mizpah gam vaipo, Jeshua chapa Ezer chun aban, gal manchah koina maiya pat pal kiget-konna geiyin asemphan ahi.
20 Zabbai chapa Baruch chun aban chu, Thempu chungnung in jotna lampi geiyin asemphai.
21 Hakkoz tupa, Uriah chapa Meremoth chun aban chu Eliashib in pam geiyin asemphan ahi.

Pal kaiya pang Thempuho
22 Aban chengse hi Thempuhon aban banin asemphauve: Jerusalem kimvel’a hungkon Thempuhon aban asemphauve.
23 Benjamin le Hasshub-in jong aban, amani in mai chu asempha lhon’e. Ananiah tupa, Maaseiah chapa Azariah hin aban, ama in mai don asemphai.
24 Henadad chapa Binnui chun aban, Azariah in a pat pal ningkoi geiyin asemphai.
25 Uzai chapa Palal’in aban, pal ningkoi le in-ngah ho panmun, leng inpi insang laiya pat asemphai.
26 Parosh chapa Pedaiah chun aban chu niso lam twikul kelkot, Houin ngahho panmun geiyin asemphai. Hikom hi khopi sunga Ophel kiti lai, Houin lhacha ho chenna ahi.

Khopi sapha midang ho
27 Aban chu Tekoa kho miten, anivei nan asemphauvin, Houin ngahho panmun insang lenpa to kigalsai laiya pat Ophel pal kom geiyin asemphauve.
28 Thempu phabep’in jong aban chu, sakol hongkot’a pat sah lamse se, a-in mai cheh asemphauve.
29 Immer chapa Zadok-in jong aban, ama in mai chu asemphai. Nisolam kelkot ngah a pang, Shecaniah chapa Shemaiah-in aban asemphai.
30 Shelemiah chapa Hananiah le Zalapha chapa gup lhinna Hanun chun anivei nan aban chu asempha lhon’e. Berechiah chapa Meshullamin aban, a-in mai laitah chu asemphai.
31 Aban, sah-nisolam pal ningkoi vum a indan kom, Miphkad kelkot komcha, Houin lhacha ho le kivei mite pansatna lai geiyin sana khengthem, Malchijah-in asemphai.
32 Aban achaina gei, pal ningkoiya indan a pat kelngoi hongkot geiyin sana khengthemho le kivei mihon asemphauve.

NEHEMIAH LEKHABU BUNG 4

Atohna doudalte Nehemiah-in ajo
1 Judahten pal akaiphat ajahdoh phat’in Sanballat alung hang behseh jengin suh chatvai din eigouve.
2 Aloi agolte angsung le Samaria sepaite angsunga, “Mi mah thah ding Judahte hi ipi bol hiuvam? Khopi hi semphat agot ngap’u ham? Kilhaina abol hat pouvu le nikhat sunga ajo jeng diuva agel mongu ham? Hiche ingem meivam lah a hi song-in asahdoh jou diu hinam?” ati.
3 Akoma Tobiah adingin asei shop thel’in, “Itobang pal aget diu ham? Se-al’in jong chonchim bep’inte!” ati.
4 Hichun kataovin, “O Pathen, ngaiyin eidaithang nau hi! Eihouthang nau amaho chunga chujo hen! Anei agou jouseu min chomgam hen, gamchom a min sohchangin kaimangu hen.
5 Thilse abol’u le achonset’u ngaidam hih hel’in, ajeh chu insapha keiho eiphin phin’uve,” kati
6 Hiti hin pal kagan jom jingun, asansol akimlai don kageitauve. Ajeh chu natong mipi athanom thei lheh jenguvin ahi.
7 Sanballat le Tobiah, chule Arabia gam le Ammon gam, Ashdod miten Jerusalem kulpi pal gen kachal jinguva, palvang lai jouse kahuhbit’u ajah phat’un alung hang lheh jenguve.
8 Pankhoma Jerusalem lonvuh den ding, thunoh baotam bol khum din agouvin,
9 ahivangin ka-Pathenu henga kataovun, sun le janin amaho nang din mi kapansah-uve.
10 Judah mihon alachoiyun hitin asauve: “Pohgih pon kachol’un, Lhohdoh ding munchu nongai atam’e. Tunia iti pal kaget jou diu ham?” atiuve.
11 Kamelmateu chun eilonvuh-uva, eithagam soh diu chule katohban’u asuh tang hel geiyuva kamudoh lou diuvin agel’ui.
12 Ahivangin phatseh-in Judate, kamelmateu kom cheng hon eidou nauva melmate thilgon jouse eihil chah-un kiging jingin eikoiyui.
13 Hijeh chun kulpi pal kiget jousoh geiyin miho chu aphung khai khaiyin chemjam le tengcha chule thalpi choiyin kapansah jinge.
14 Mipi lunggim kamudoh phat’in alamkaiteu le vaipo ho jah a, “Imelmateu kicha hih-un. Kichat tijat umtah Pakai, nagamsung mite le naji nachateu chule na-insung diuva gal satpeh jing chu geldoh jingun,” kati.
15 Kamelmateuvin athilgonu kahetdoh-u hi ahetauvin, Pathenin athil ngaitou asuhmang jong amudoh tauve. Hichun mipin tohban kulpi pal kagenpan kit tauve.
16 Hichea pat hin kamite keh khat’in na atongun, keh khatman gal manchah-lumle pho thon, tengcha le thalpi panin natong ho angah-uve. Kalamkaiteuvin pal genpha mipi chu
17 lhingkeiyin apanpiuve. Inthil pule hon jong khut lang khat’in na atongun, lang khat’in gal manchah achoiyui.
18 Pal gen jousen akonga chemjam akikosoh keiyui. Pengkul mut dingpa chu kei kom a aum’e.
19 Mipi le vaipote chule lamkaite jah a, “Pal kigen hi asao behseh-in khat le khat jong ikikhen gamla behseh-un;
20 pengkul gin najah jah-ule kahenga hung kikhom jengun, i-Pathen’un gal eisatpeh diu ahinai,” kati.
21 Hiti hin niseh le-khovah vah a pat nilhah ahsi so geiyin -keh khat sen pal kagen’un, akeh khat man tengcha choiyin gal ka-ngah-ui.
22 Hiche lai hin jan teng khopi ngah a pan a, sun teng na toh theina din natoh vaihomho le akithopiteu chu Jerusalem a jan-geh din kaseipeh-e.
23 Janteng jongle von sut louvin ka-umin, kaloi kagolte hihen, kalhachaho le eiventup a pang ho khat chan jong von asutpoi. Gal manchah lhasa louvin kapang cheh-uve.

NEHEMIAH LEKHABU BUNG 5

Vaichate kibolsetna
1 Phat chom khat nungin, numei pasal tampin ajat chanpiu Judate chunga kiphinna aneiyui.
2 Phabep’in, “Kunchate kahiuvin, kihinsona din neh ding chang tampi ka-ngaiyui,” atiuve.
3 Adanghon jong, “Kakel thilouna diuva lou, lengpilei chule in ho geiya chang chohna ding sumpa lahna katundoh diu ahitai,” atiuve.
4 Konkhatse man, “Loule lengpilei kaiya peh dia sumpa kalah diu ahi.
5 Keiho jong Juda nam ma ma kahiuve. Kachateu jong amaho chate tobangma hilou ham? Ahinla kachateu soh a kalhahsoh diu ahitai. Kachau numei phabep jong soh a kajoh-u ahitai. Kalouvu le lengpilei jouse eilahpeh phat’un atinaje kimah kahitauve,” atiuvin ahi.
6 Akiphinu kajah chun kalung hang lheh-in,
7 thil khat bol kagotai. Mipi Lamkaite le vaibol ho ka-oimon ajah-uva, “Nasopi na-u nanao nabolseuve!” kati.
8 ajah-uva, “Vaichat jal’a acham cham a midangte khut’a kijohdohsa Juda mi isopi chengseu chohdoh loi ding gel’uhite. Nanghon nasopi chanpi Juda mi ma ma chu nakom’u le anam chanpi Judate koma soh a kijoh din naboldoh tauve!” kati. Lamkaite athip chet’un sei ding ahepouve.
9 Chuin keiman, “Nathilbol’u adihpoi! Pathen ging a thildih nabol diu dol ahi. Chutile imelmateu, namdangten dai chatvaiya einei lo diu ahi.
10 Ken miho hi sum le pai katon, chang le mim kapei, chule kanatong loile golten jong chuti man abol’ui. Tun ipehsau chu bet kit da jengu hite.
11 Sum hihen chang hile, lengpitwi le olive thao hijeng jongle, abat chengseu le lengpilei jouse, chule olive lei le in jouse lepeh kit jengu hite!” tin kaseiye.
12 Lamkaihon eidonbut’un, “Nasei bang bangin bol nauvinge. Athil alo jouseu lekit ung ting, abat chengseu supovinge,” atiuve. Thempuho kakou lut’in, tutah a mipin akitepnau chu anitna diuvin a-angsung laitah-uva kakihahsel sah tai.
13 Chuin kaseldip kasut lhan, sum jouse kathing lhan, “Nakitepnau nit lou jouse hitobanga hi Pathenin nathin lhah diu ahi,” kait. Chujongle, “Pathenin na-in nalou, nanei nagou chengseu lahpeh-un tin, ahomkeova nakoi diu ahi,” tin kaseiye. Chukoma um jousen, “Amen!” ati cheh-un Pakai avahchoiyui. Hiti hin lamkai chengsen akitepnau anit cheh-ui.

Nehemiah ki-ngaitom
14 Judah gam vaipoa kapan sung kum som le ni, Artaxerxes kumpipa ahina kum som ni a pat kum somthum le kum ni geiyin, kei le kaheng kakom chengsen, gamvaipo hijal’a neh dia lom neh le chah kajong pouve.
15 Kei masanga gamvaipo jousen ni khat neh le chah din dangka som li li a-ngeh jiuvin, japi din doulel ahi cheh-ui. Asohte geiyun mipi asugim’un ahi. Kenvang Pathen kagin jal’in lamchom beh-in kabol’e.
16 Kanei kagou jouse kulpi pal kaiphatnan kamangin, neile nga, thil le lo imacha kalamdoh poi. Kei natong jouse jong kulpi pal kaiphan apanlo tauve.
17 Jet le veiya hungkon, namdang miho sim louvin, niseh le Judah mi ho le alamkaiteu ja khat le som nga ngan ka-ankong aum jinguve.
18 Niseh-in bongchal khat le kelngoi thao cheh gup, ahcha tampi kathapeh jin, nisom lhinseh le lengpitwi thah kape jinge. Japi hahsat kahet jeh-in, gamvaipo khat mu ding lom thil chu ka-ngeh deh poi.
19 O Pathen, hiche mite dia kabol chengse hi neisimpeh dia tao kahi.

NEHEMIAH LEKHABU BUNG 6

Nehemiah tha agot’u
1 Kelkot lampi dunga kelkot katundoh soh loulai vangun, pal vang beihel’a kakoiyu le kulpi pal kagetsoh keiyu hi kamelmateu le Sanballat, Tobiah chule Geshemin ajadoh tauve.
2 Sanballat le Geshemin thu eihin thot lhonin, Ono phaicham khosung dung khat pen pen a kimuto din asei lhon’e. Hiche hi dohaa bol’a sunset eigotna lhon ahibouve.
3 Ajah lhona gaseipeh din mi kasol’in, “Katoh akhoh-in, hungsuh thei ponge. Tohban sep lhan nangni to kimuton hung ponge,” kati.
4 Asei bang bang lhonin livei jen thu eihin thot lhonin, kenjong kale bang bangin kale jinge.
5 Chuin Sanballat chun thu thot nga na chu solle khat ahinpohsah-in, alekha thot chu sinlou, mohor namkhum lou ahin,
6 hitin aseiye: “Geshemin thuthang khat eiseipeh-in, nangle Judaten galbol nagot jeh-uva kulpi pal nakaiphat dol’un gamkol’a kithangin aseiye. Nangtah jong leng chang kigon naseiyin.
7 Themgao phabep’in nang hi Jerusalem khosunga Judahte lengpa nahi ding seiphong dia nagonin jong aseiyui. Kumpipan hiche ajahdoh tei ding ahin, hijeh chun nang le kei ikimutoa athudol kihoutoh din kagel’e,” ati.
8 Adonbut nan kenjong, “Naseiho khat cha jong adih poi. Nasemthu jeng thu nasei ahibouve,” kati.
9 Hoh kichat’a katoh ban’u haisah tei din agouvin, ahivangin Pathen henga kataovin, “Vo Pathen neihatsah-in!” . tin kathum’e.
10 Hiche don hin in dalhamoa um, Mehetabel tupa, Delaiah chapa Shemaiah vil din kachei. Aman kajah a, “Nangle kei ichea Houin muntheng phunga ikisel ding, kotpi ikikamden lhon ding ahi, ajeh chu nang that dia hungkon ding ahiuve. Tua lhah itih pen jan hijongle hunguva natha jeng theiyu ahi,” ati.
11 Ken ajah a, “Kei jamlea kiselle mihem kahipoi. Kihinsona dia Houin a kiselle dia neigel ham? Chuti chon hih hel inge,” kati.
12 Asei hi kagel gel leh, Shemaiah koma Pathenin thu asei hilouva, Tobiah le Sanballat chun hitobanga eigihsal dia sumguh apeh ahi kahedohtai.
13 Hitobanga hi kichatsah a, chonset sah ding, suhjum a mindset sah dia ama hi sumguh pea agoi lhon ahi.
14 Keijong kataovin, “Vo Pathen, Tobiah le Sanballat thilbol hi geldoh in lang talen matsah teiyin. Numei Themgao Nodiah le Themgao dang, hoh kicha dia eigo chengse hi talen peh ding sumil hih-in,” kati.


Natoh kichaina
15 Ni som nga le ni ni katoh jouvun, Elul lha nisom ni le ni nga nin kulpi pal apumpin akijousoh tai.
16 Kajet kaveiyuva namdang mi melmaten ajahdoh phat’un, Pathen panpi jal’a na kitong jou ahila aheuvin, mitjum maijuma um ahiu ahedoh tauve.
17 Hiche sungse hin Judah lamkai chengse le Tobiah chu lekha akithot to jingui.
18 Anupa pa, Shecaniah, Arah chapa jal’in, Judah gamsung mi tampin apanpi. Achapa Jehohananin ma Berechiah chapa, Meshullam chanu akichenpi ahikit nalaiye.
19 Mihon kamasang sanga Tobiah thilpha bol jouse aseiyun, chutengle kasei jouse ama agaseipeh kit jiuve. Aman jong kaginna din lekha eihin thot thot jeng’e.

NEHEMIAH LEKHABU BUNG 7

1 Tunvang pal akikaiphasoh tan, kelkot jouse akisemphan, Houin ngah ho le munthenga labung sa ho le Levite atoh ding dol cheh-u nganse ahisohtai.
2 Jerusalem khopi sung vaipo din mi ni ka-ngansei: amani chu-kasopipa Hanani le kulpi ngahho lamkaipu Hananiah ahi lhone. Hananiah hi mi kitah le Pathen ging, kibalpi bei khat ahi.
3 Jerusalem kelkot jouse chu jingkah nisa so masangsea ahon lou diu, nilhah lam teng kotngah ho kikhen masang, nisa lhum masanga akha diuvin kaseipeh-e. Chujongle alah-uva kona kho ngah ding alhendoh-uva, hitia chu Jerusalem kho mi ho chu tohmun le panmun kicheh apeh diu adangsen jong a-inkimvel dungu akikhol tup jing diuvin kaseipeh-in ahi.

Sohchang hungkile kit ho
(Ezra 2:1-70)
4 Jerusalem hi khopi lentah ahin, mihem tampi vang achengpoi; in jong tampi akisadoh pon ahi.
5 Mipi le alamkaiteu, avaipoteu khop a a-insung khat lhah-u kijih dol kholtup din Pathenin eihil’e. Amasan sohchang hungkile kit ho minbu kaholdoh-in, hichea kimudoh chu hiti ahi:
6 Babylon gamsunga konin sohchang tampi Jerusalem khopi le Judah gamsung a ahung kileuvin, ama ama khopi cheh akijot tauve. Amaho hi a-insung khai lhah-uva, Nebuchadnezzar lengpan sohchanga akaimanguva pat Babylon gama sohchanga ahiuve.
7 Alamkaiyu chu-Zerubbabel, Joshua, Nehemiah, Azariah, Raamiah, Nahamani, Mordecai, Bilshan, Mispereth, Bigvai, Nehum chule Baanah ahiuve. Israelite mijat mong mong chu
8 Parosh chilhah mihem sangni le ja khat le som sagi le ni,
9 Shephatiah chilhah mihem jathum le som sagi le ni
10 Arab chilhah mihem jagup le som nga le ni,
11 Pahath-moab kiti Jeshua le Joab chilhah mihem sangni le jaget to somle get,
12 Elam chilhah mihem sang khat le ja ni to som nga le li,
13 Zattu chilhah mihem jaget le som li le nga,
14 Zaccai chilhah mihem ja sagi le somgup,
15 Binnui chilhah mihem jagup le som li le get,
16 Bebai chilhah mihem jagup le somni le get,
17 Azgad chilhah mihem sangni le jathum to somni le ni,
18 Adonikam chilhah mihem jagup le somgup le sagi,
19 Bigvai chilhah mihem sangni le somgup le sagi,
20 Adin chilhah mihem jagup le som nga le nga,
21 Hezekiah jong kiti Ater chilhah mihem somko le get,
22 Hashum chilhah mihem jathum le somni le get,
23 Bezai chilhah mihem jathumle somni le li,
24 Hariph chilhah mihem jakhat le som le ni,
25 Gibeon chilhah mihem somko le nga,
26 Bethelehem kho mite le Netophah kho mi jakhat le somget le get,
27 Anathoth kho mi jakhat le som ni le get,
28 Bethazmaveth kho mi somli le ni,
29 Kiriathjerarim kho le Chepharah kho, chule Beeroth kho mi ja sagi le somli le thum,
30 Ramah le Geba kho mi jagup le somni le khat,
31 Michmash kho mi jakhat le somni le ni,
32 Bethel le Ai kho mi jakhat le somni le thum,
33 Nebo khatjopa kho mi som nga le ni,
34 Elam khatjopa kho mi sang khat le jani to som nga le li,
35 Harim kho mi jathum le somni,
36 Jericho kho mi jathum le somli le nga,
37 Lod le Hadid chule Ono kho mi ja sagi le somni le khat,
38 Senaah kho mi sangthum le jako to somthum ahiuve.
39 Thempu sohchang hung kile kit ho: Jeshua chilhah Jedaiah chate jako le som sagi le thum,
40 Immer chilhah mihem sang khat to som nga le ni,
41 Pashhur chilhah mihem sang khat to jani le somli le sagi,
42 Harim chilhah mihem sangkhat to som le sagi ahiuve.
43 Levite sohchang hung kile kit chu: Hadaviah chilhah-Jeshua le Kadmiel chate mihem som sagi le li,
44 Asaph chilhah Houin a lathemte mihem jakhat le somli le get,
45 Shallum, Ater, Talmon, Akkub, Hatita chule Shobai chilhah Houin kotngah ho jakhat le somthumle get ahiuve.
46 Houin lhacha sohchang hung kit ho chu-Ziha, Hasupha, Tabbaoth,
47 Keros, Sia, Padon,
48 Lebana, Hagaba, Shalmi,
49 Hanan, Giddel, Gahar,
50 Reaiah, Rezin, Nekoda,
51 Gazzam, Uzza, Paseah,
52 Besai, Meunim, Nephushesim,
53 Bakbuk, Hakupha, Harhur,
54 Bazlith, Mehida, Harsha,
55 Barkos, Sisera, Temah,
56 Neziah, Hatipha ahiuve.
57 Solomon lhacha sohchang hung kile kit ho chu: Sotai, Sophereth, Perida,
58 Jaalah, Darkon, Giddel,
59 Shephatiah, Hattil, Pochereth, Hazzebaim, chule Amon ahiuve.
60 Houin lhachate chilhah ho le Solomon lhachate chilhah, sohchang hung kile kit ho abonchauvin jathumle somko le ni alhingui.
61 Aban a kisei ho hi Telmelah, Telharsha, Cherub, Addon, chule Immer khoa hungkon ahiuvin, apu apauva pat Israel chilhah ahi ahilouvu akikholtoh thei tapoi.
62 Alah-uva Delaiah le Tobiah chule Nekoda chilhah abonchauvin jagup le somli le ni ahiuve.
63 Thempuho lah a Hobaiah, Hakkoz, Gilead khoa Barzillai phunga numei akichenpi jeh a anupa pa min kiputsah a Thempua pang Barzillai hicheng chilhah ho jong bulle bal kichenlou ahiuve.
64 Khanggui simna minbua aphungu ahol vangun amudoh jou pouvin, hijeh chun milham lah a akisimthan, Themputnaa konin ahaisah tauve.
65 Thempu khat pen penin Urim le Thummin manga athenso masangseuva Pathena kikatsa thil theng aneh lou diuvin gamvaipopan aseipeh tai.
66 Sohchang hung kile kit mihing jat sang somli le sangni to, jathum le somgup alhingui.
67 Asohteu numei pasal agomin sang sagi le jathum to somthum le sagi, lathem numei le pasal jani le somli le nga,
68 sakol ja sagi le somthum le gup, asakolpol’u jani le somli le nga,
69 asangongsaovu jali le somthum le nga, asangan’u sang gup to ja sagi le som ni ahi.
70 Phung upa chengsen Houin sahphatna din thil atoh-ui. Gamvaipo pan jong sana daric sang khat le kisilna kong som nga to, Thempuvon ja nga le somthum atoh-in, thil kolna in a akoiye.
71 Phungkaiya upa chengsen jong natohna dia thil khol ho khut’a sana daric sang som ni le dangka mina sangni le ja ni jen apeuve.
72 Mipin jong sana daric sang som ni le dangka mina sang ni, chule Thempuvon somgup le sagi atoh-ui.
73 Hiti hin Thempuho, Leviho, kotngahho, lathemho, mi abang bang, Houin lhacha ho chule Israel jouse ama ama khosung cheh a achengtauve. Lha sagi lhinin vang Israelte akhosung cheh a achengsoh tauve.

NEHEMIAH LEKHABU BUNG 8

Ezran Danthu mipi asimpeh
1 Lha sagi na ni masa nin Jerusalem khopi, twi kelkot phung, inningkoi laiya Israelte akikhom kim dep’ui. Mihon Thempu le Danthu them Ezra chu Pathenin Mose khut’a Israelte apeh Danthu ladin asol’ui.
2 Ezran Danthu chu numei pasal, ahetheidol chapang nunao geiya kikhomho henga ahinchoitai.
3 Akikhopnau inning koi laiya hin jingkah a pat sung geiyin Ezran Danthu asimpeh-in, amahon lung lut tah-in angaiyui.
4 Thuseina dia doson kisema chun Ezra adingin, ajet lam a Mattithiah, Shema, Anaiah, Uriah, Hilkiah chule Maaseiah adingun; aveilam a Pedaiah, Mishael, Malchijah, Hashum, Hashbaddanah, Zechariah chule Meshullam adingui.
5 Doson chung, mipi vuma Ezra adingin, japan ave changmel’ui. Ezran Danthu lekhajol alhap lhap’in mipi adingdoh-uve.
6 Ezran, “Loupi pen Pathen, Pakai chu vahchoiyun!” ati. Japin vanlam asang cheh-un, “Amen! Amen!” atiuve. Pathen janan bohkhup’in tol’a mai asuhlut cheh-ui.
7 Chuin mipi athouvun aumna cheh a adingun, Levi mi-Jeshua, Bani, Sherebiah, Jamin, Akkub, Shabbethai, Hodiah, Maaseiah, Kelita, Azariah, Jozabad, Hanan chule Peliah chun japi chu Danthu ahilchen tauve.
8 Japi het theina din Pathen Danthu chu kamchengin alethu’vin mipi ahilchen’uve.
9 Danthua kisei boltei ding dol ajah doh phat’un, alungna behseh jengun akap pantauve. Hichun Gamvaipo Nehemiah le Thempu le danthu them Ezra, chule Danthu hilchen a pang Levi mihon japi jah a, “Tuni hi Pakai na-Pathenu Nitheng ni ahin, lunghem le ka nabolda diu ahi.
10 In a cheuvin golnop gaboljo’uvin. Neh le chah lengpitwi neilelte gahom’un. Tuni hi i-Pakai diuva Nitheng ni ahin, lung gimdauvin, Pakaiyin napeh-u kipanan nasulip nauvinte,” atiuve.
11 Hitobang Nitheng nia japi kalouna din Levite acheleuvin alhem lung monguve.
12 Danthu kisimpeh ajahdoh phat’un mipin inlam jonin, neh le chah le lengpitwi thon kipa nopna abol’un, aneiloute jong ahop’uve.

Lhambuh kut
13 Ajing nikhon phung upa chengse le Thempuho chule Levi ho Danthu thuhil simtoh din Ezra henga achieve.
14 Hichea hin Pakaiyin Mose apeh Danthua konin lhambuh kut kibol sungsea Israelte lhambuh sunga pansa din asimdoh tauve.
15 Hijeh chun japi hilchahna asem loiyun, Jerusalem pumpi le khopi khote jousea thot din abol’un, “Danthua kihilna bangin chahthing do le olive thing do, theimivom do, tumthing do le thing do dang dang galouvun,” tin aseiyui.
16 Japin thingdo tintang agalouvun, lhambuh limdol’in ain chunguva ajaovun, hongcha dung le Houin leitol dung, japi kititna dung le twikelkot dung, Ephraim kelkot dunga lhambuh-in asongtauve.
17 Sohchang hung kile kit chengsen lhambuh asongun chen nan aneiyuve. Nun chapa Joshua khanga pat hiche kibol hi amasapen ahin, mitin kipah thanomin aumsoh keiyui.
18 Kut kipat nia pat achaini geiyin niseh le Pathen Danthu mun khat asim jingui. Danthua kisei bangin, ni sagi sungin kut abol’un, niget nin kut chai golnop abol’uve.

NEHEMIAH LEKHABU BUNG 9

Mipin chonset aphondoh
1 Chuche lha nisom ni le ni li nin, chonset kisih vetsah nan khaodip pon sil’a, lujanga leivui kinun, an ngol din Israelte akikhom tauve.
2 Gamchom mitea konin akichomseuvin, apu apateuva pat achonset jouseu aphongdoh tauve.
3 Nidan thum bang Pakai a-Pathenu Danthu asimpeh-un, nidan thum tobangma chonset chengse aphongun, chuin Pakai a-Pathenu chibai boh-in ahoutauve.
4 Levite thusei nading mun doson a chun Jeshua, Bani, Kadmiel, Shebaniah, Bunni, Sherebiah, Bani, chule Chenani adingui. Abonchauvin Pakai a-Pathenu henga othong leuvin ataovui.
5 Pathen hou din Jeshua le Kadmiel, Bani, Hashabneiah, Sherebiah, Hodiah, Shebaniah chule Pethahiah chun japi atem’un: “Dingun, Pakai na-Pathen vahchoiyun; Vahchoiyun tonsot tonsot’in! Mitinin amin loupi vahchoi hen, Mihem vahchoina lhing hih jongleh!” atiuve.

Chonset phondohna tao
6 Israelte chu hitin ataovui: “Vo Pakai, Nangbou Pakai nahi; Vanle vanthamjola, ahsite jong Nangsem ahi. Leiset le Twikhanglen, asunga um jouse nasemin, Abonchan hintheina nape cheh-e. Vanlaijol’a thaneina jouse Akun’un chibai naboh tauve.
7 Vo Pakai, Abram nalhengdoh-in, Babylon gam Ur a konin nahin puidoh-in; Amin jeng jong Abraham tin nakhelpeh tai.
8 Nadia akitahje hen, kitepna nasempi; Ason allah chenna din Canaan mite, Hit mite le Amor mite, Periz mite le Jebus mite Girgash mite gam peh din nateppeh tai. Nakitah jal’in nathutep nanit’e.
9”Egypt a kapu kapateu gim hesoh namun, Pumpeng kena Twikhanglen a panpi ngaiya nakouvu nanoppeh-e.
10 Lengpa dounan datmo kidang thil nabol’in, Namite abolgimu nahet jal’in Avaibolte le aleiset dounan Thil kidangtah nabol’e. Chunia gal najo jal’in Tuni geiyin naminthang’e!
11 Twikhanglen lailunga namite lampi nasempeh-in, Twilah pi tolgon najotdoh sah tai. Anung delta vang chu songtum twiya lhalut bangin Twipi nachup mangsah soh tai.
12 Sun teng meilom noiya napuiyin, Janteng meikouvin napuiye.
13 Van a konin Sinai molvuma nahung kum khan, Namite nahouvin, Danthu pha le kihilna dih napei.
14 Nacholdo ni thenga anit diuvin naseiyin, Adiuvin Nadanthu Mose napei.
15 “Akel phat’un van a konin an napen, Adangchah phat’un songpia twi naputsah-e. Peh dia natepsa gamsung chu Atoupha diuvin naseipeh tai.
16 Ahivangin kapu kapateu kiletsah-in alungtah-un, Nathupeh ho nit ding adauve.
17 Nathu nit dan, nabol jouse asumil’un, Thil kidang nabol ho ahaitauve. Hoitho nan lamkai khat akilhen’un. Sohchanna Egypt’a akilepuisah go’uve. Hijongle mi-ngaidam Pathen nahijeh-in, Lungset le khoton nalung hangvah poi. Nahepi giljeh-in Amaho dalha louvin navop’e
18 Doi bongchal limin asem’un, Egypt a ahinpuidoh pau ahisah-ui! Vo Pakai, itobanga naphinu hitam!
19 Ahivangin nahepi giljeh-in Gamthip laiya nadalha dehpoi. Aleuva mei lomla natolmangpon, Asalvah-u meikou la namut mitpoi. Sun le janin napui jinge.
20 Naphat jal’in abol diu nahil’in, Neh ding manna napen, don ding twi napei.
21 Gamthip laiya kum somli sungin Angaichat jouseu napejinge. Avon chengseu la a-eh pon, Akengu jong anadeh poi.
22 “Agamgiuva cheng namtin vaipi le Lenggam jouse najosah-in; Sihon vaihomna Heshbon gam, Og leng channa Bashan gam najosah tai.
23 Vanthamjol’a ahsi jat cha le nao nahinsah-in, Apu apateu peh dia natepsa gamsung Josah-in nachenphasah tai.
24 Canaan gamsung ajouvun, Achengte najopeh tai. Canaan lengte le amite chu Adei deiya bol din namite tha napei.
25 Namiten kulpi kikaikhum khopi jouse alauvin, Gampha pha achangun, gou dimset set in alo’uvin; Twikul laisa achangun, olive thing le Thing gathei, lengpilei alosoh tauve. Adu du nen athao chet chut’un, Napeh thilpha jouse nopsahnan aneiyui.
26 “Ahinla namiten nadouvun nasei anit tapouve; Nadanthu donlouvin akoiyun! Agihsal’uva, naheng jon dia hil Themgaote athat’un, Nangma naphin phin jenguve.
27 Hijeh chun amelmateu josah-in Achunguva vai nahomsah tai. Agenthei phat’un napanpi a-ngeh-un, Van a konin ataonau nasange. Nahepi giljeh-in amelmateuva kona Huhdoh ding lamkai nahinsol peh-e.
28 Cham len phat’in achonse kit’un; Amelmateu najosah kit’e. Lung heiya nahuhhing dia atao tengu Van a konin nasanpeh-in hepi tah-in nahuhdoh jitai.
29 Nahil ho juitei din nagihsal jin, Nadanthu nit hinna ahivangin, Kiletsah jal’in adonda jiuvin, Lungtah le louchal’in anitji pouve.
30 Kumseh le thoh hat’in nahil jingin, Seiphong din nathemgaote nathumop jin; Namite kolseh jal’in Namdangte najosah jitai
31 Hijongle nahepi gil jeh-in Nadonda pon, nasumangpoi. Nangma lungset them, Mi hepi them Pathen nahi!
32 “Vo Pathen, ka-Pathenu, naloupi ngeiye! Tijat kichat um, thaneipen! Lha louhel’in nakitepna nanit jinge. Assyria lengthen eibolgim niuva pat Tuchan iti genthei kahitah-um! Kalengteu, kalamkaiteu, kathemputeu le Themgaote, Kapu kapateu le kamiteu ahesoh cheh-ui. Geldoh-in iti kathoh gimu hitam!
33 Dihtah a talen neimatsah-u ahi; Keiho chonse jongleu veng nakitah jinge.
34 Kapu kapateu le kalengteu, lamkaite chule Thempuhon Nadanthu anit pouve. Nathupeh chengsela anit pouvin, Nagihsal jong angaipouve.
35 Napehsa gam lentah le phatah a achen tengu, Navangboh jal’a lenghon namite vai ahom ahi. Ahinla chonset lung heiya Nakin bol ding ahaitauve.
36 Tun neipehnau gampha, neh le chah lhinna Hiche gamsunga hin kasohchangtauve.
37 Kachonset jal’un, gamgasoh jouse Kachunguva vaihoma nakoi lengte achangtauve. Keiho le kaganchau anop nop’in abol’un, Kagenthei behseh jeng tauve!” atiuve.

Japi kinoptoa kikhut-hen
38 Thilsoh hicheng jeh hin, Israelte keihon hikoma hin, giltah a kitepna neiyin, jih thon, kalamkaiteu le Levite, chule kathemputeuvin mohor anamkhumtauve.

NEHEMIAH LEKHABU BUNG 10

1 Kikhut-hen bol masapen chu-Hacaliah chapa, gamvaipo, Nehemiah ahin, abanin Zedekiah ahi.
2 Chuin aban banin, Thempuho lah a Seraiah, Azariah, Jeremiah,
3 Pashhur, Amariah, Malchijah,
4 Hattush, Shebaniah, Malluch,
5 Harim, Meremoth, Obadiah,
6 Daniel, Ginnethon, Baruch,
7 Meshullam, Abijah, Mijamin,
8 Maaziah, Bilgai, Shemaiah, hicheng hin aboltauve.
9 Levite lah a Azaniah chapa Jeshua, Henadad phunga, Binnui, Kadmiel,
10 Shebaniah, Hodiah, Kelita, Pelaiah, Hanan,
11 Mica, Rehob, Hashabiah,
12 Zaccur, Sherebiah, Shebaniah,
13 Hodiah, Bani, Beninu ahiuve.
14 Japi lamkai lah a Parosh, Pahathmoab, Elam, Zattu, Bani,
15 Bunni, Azgad, Bebai,
16 Adoniah, Bigvai, Adin,
17 Ater, Hezekiah, Azzur,
18 Hodiah, Hashum, Bezai,
19 Hariph, Anathoth, Nebai.
20 Magpiash, Meshullam, Hezir,
21 Meshezabel, Zadok, Jaddua,
22 Pelatiah, Hanan, Anaiah,
23 Hoshea, Hananiah, Hasshub,
24 Hallohesh, Pilha, Shobek,
25 Rehum, Hashabnah, Maaseiah,
26 Ahiah, Hanan, Anan,
27 Malluch, Harim, Baanah ahiuve.

Japi kinoptona
28 Keiho Israelte, Thempuho, Levite, Houin ngahho, lathemho, Houin lhachaho, Pathen Danthu nitnan igamsunguva cheng gamchom mitea konin kakikangseuvin, kajiteu le se le pha hethei kachateu pumpkin,
29 kalamkaiteu to pangkhomin, suhkehna akineile gaosap chang thei leu din, Parthenon Mose apeh Danthu dungjuiya chon ding, Pakai i-Pakaiyun eipeh-u thupeh chengse nit’a, Adanthu le Danthun khoh asah chengse juisoh hel din kitepna kanei tauve.
30 Kagamsunguva cheng gamdang numei kichenpi pouvinge.
31 Choldo ni ham, adang nitheng ni ham le gamchom miten changle mim, thil dang dang hungjoh jongleu cho pouvinge. Kum sagi seh le gamsung louva kaboldauva, bat le tham jouse ka-ngaidam diu ahi.
32 Kumseh le Houin kinbolna nei din dangka gram nga nga toh jing nauvinge.
33 Houin a houkhom teng-changlhah theng, niseh a chang thilto, pumgo thilto dia niseh a gancha tolom, choldo nikhoa thilto theng, lhathah kut a thilto, chule kut dang dang a tolom, thil kitoh dang ho Israel chonset thoidamna thilto, Houin a ngaicha chan pe din kakitep’ui.
34 Danthu dungjuiya, Pakai ka-Pathenu houna thilto govamna ding thingchom dia pang ding phung lhendohna dia phunsan tho din keiho Israel mipi le Thempuho, chule Levite hi kakitep’ui.
35 Kumseh le lho lhung masapen le thing ga masapen Houin a kachoi jing diu ahi.
36 Kachapau peng masapen pen chu, Danthu dungjuiya, Houin a Thempupa koma kapui diu, Pathen a katdohna kanei diu ahi. Bongchal peng masa le kelngoi peng masa, kelngoile kelcha peng masa jouse jong kakatdoh jing diu ahi.
37 Kumseh a chang lhung masa le lengpitwi lhung masa, olive thao masa, chule thingga dang dang amasa jouse Houin kinbol Thempuho kapeh diu ahi. Levite hi loubol khosung dunga som a khat, chang som a khat, gamga som a khat kapeh diu ahi.
38 Som a khat kidonkhom teng, Aaron son Thempuhon Levite alhonpi diu, adonsau Houin kinbolna dia Levihon som a khat aman diu ahi.
39 Israel mipi le Leviten chang thilto le lengpitwi kitoh, olive thaotwi, Houin manchahho kikoina, lhachaa pang Thempuho umna, Houin ngahho chenna, Houin labung sathem ho injon a, Houin thil kholnaa kona alah diu ahi. Ka-Pathenu Houin chu nahsah mon bol pouvinge.


NEHEMIAH LEKHABU BUNG 11

Jerusalema cheng ho
1 Lamkai chengse Jerusalema achengun, adangse vang insung som lah a kon a insung khat khat khopi Jerusalem theng a chensah din, acheng ding holdohna din vang asantauve. Adangse se vang khopi dang dang le khote danga cheng diu ahitai.
2 Acham cham a Jerusalem a cheng dia kipedoh thei pen pen chu japan apah chauve.
3 Khote dangho le khopi dang hoa vang Israel mipi le Thempuho, Leviho, Houin natong ho, chule Solomon lhachate chilhah ho chu agamsung cheh le akhosung cheh a cheng ahiuve.
4 Judah gamsunga kon Jerusalem khopia cheng dia lhendoh miho chu Judah phunga-Zechariah tupa, Uzziah chapa Athaiah ahi. Apu luite ho Ameriah, Shephatiah, Mahalalel, Judah chapa Perez son jeng ahiuve.
5 Colhozah tupa, Baruch chapa Maaseiah ahin, apuluite Hazaiah, Adaiah, Joiaribe, Zechariah ahiuvin, Judah chapa Shelah son jeng ahiuve.
6 Jerusalema cheng, Perez son, gal-hang mihat ho ja li le somgup le get alhinguve.
7 Benjamin phunga-Joed tupa, Meshullam chapa Sallu ahin, apuluite Pedaiah, Kolaiah, Maaseiah, Ithiel chule Jeshaiah ahiuve.
8 Gabbai le Sallai jong ahin, Sallu to kinaitah inko ahiuve. Abonchauvin Benjamin phung sung Jerusalema cheng jako le somni le get alhinguve.
9 Alamkaiyu Zichri chapa Joel ahin, Hassenuah chapa Judah chu khopi sunga vaipo lui pen ni na ahi.
10 Thempuho lah a-Joiarib chapa Jedaiah le Jachin ahi.
11 Meshullam tupa, Hilkiah chapa Seraiah ahin, apu luite chu Zadok, Meraioth, chule Ahitub, Thempu chungnungpa jong ahi.
12 Hiche phung sung mi Houin lhachaa pang jaget le somni le ni alhingui. Pelaiah tupa, Jeroboam chapa Adaiah ahin, apu luite Amzi, Zechariah Pashhur chule Malchijah ahiuve.
13 Hiche phung sunga phung upa cheh ja ni le somli le ni alhinguve. Ahzai tupa, Azarel chapa Amashsai ahin, apu luite Meshillemoth le Immer ahi lhon’e.
14 Hiche phung sunga sepai minthang cheh ja khat le somni le get alhingui. Alamkaipau jong insung kiti thei tah a hung seilen, Zabdiel ahi.
15 Levite lah a-Azrikam tupa, Hasshub chapa Shemaiah ahin, apu luite lah a Hashabiah le Bunni apange.
16 Houin kinbol hilou, natoh danga lamkai minche dom chu Shabbethai le Jozabad ahi lhon’e.
17 Asaph chilhah, Zabdi tupa, Mica chapa Mattaniah ahin, thangvah tao phat teng Houin a labung sa ding ho lamkaiyin apange. Bakbukiah chu Mattaniah kithopin apange, Jeduthun chilhah, Galal tupa, Shammua chapa Abda jong ahi.
18 Jerusalem khopi thenga cheng Levite ja ni le somget le li alhinguve.
19 Houin ngah ho lah a-Akkub, Talmon chule ainkoteu to ja khat le som sagi le ni alhinguve.
20 Israel mi adangse le aval Thempuho chule Levite chu Judah gam, khote dung le khopi dung, agamsung cheh a achengtauve.
21 Houin natong ho chu Jerusalem veng ningkoi, Ophel a achengun, Ziha le Gishpa lamkai nan na atongui.
22 Levite natoh lamkai Jerusalema chengpa chu, Uzzi, Bani chapa, Hasahbiah tupa ahi. Apu luite lah a Mattaniah le Mica apangin, ama hi Asaph phunga mi ahin, hiche phung hin Houin sunga lasah lam kin apoh-u ahi.
23 Niseh a Houin kai lasah lamkai ding phung lhendohsa kikoi, leng inpi dan umsa ahi.
24 Persia thupi phunga Israelte thalheng din Judah phunga Zerah khai lhah, Meshezabel chapa, Pethahiah apange.

Mundang khote le khopi dunga chengte
25 Midang tamtah jong alouma nailam, khote dunga achengui. Judah phung mite chu Kiriath Arba, Dibon, chule Jekabzeel khopi ho le anaivel khote dunga achenguve.
26 Jeshua le Moladah, Bethpelet,
27 chule Hazarshual kiti-Beersheba gamsung geiyin achengun, anaivel khote dunga jong achengui.
28 Meconah gam Ziklag khopi le khote dunga jong achengun,
29 Enrimmon le Zorah, Jarmuth,
30 Zanoah, Adullam, chule hiche khoho naivel khote dunga jong achenguve. Lachish le anaivel loumun dunga achenguvin, Azekah le khote dunga jong achenguve. Hichea hin Judahte chu lhanglam Beersheba le sahlam Hinnom phai kah a achenguve.
31 Benjaminte chu Geba, Michmash, Ai, Bethel, chule naivel khote dunga achengui.
32 Anathoth le Nob, Ananiah,
33 Hazor, Ramah, Gittaim,
34 Hadid, Zeboiim, Neballat,
35 Lod, chule khut theme phaicham Ono kho dunga jong achenguve.
36 Judah gamsunga cheng Leviho phabep chu Benjaminte to chengkom din akoitauve.

NEHEMIAH LEKHABU BUNG 12

Thempuho le Levite jat
1 Shealtiel chapa Zerubbabel le Thempu chungnung Joshua to lhona sohchang hung kile kit Thempuho le Levite chu aban a kiseiho hi ahiuve: Thempuho lah a-Seraiah, Jeremiah, Ezra,
2 Amariah, Malluch, Hattush,
3 Shecaniah, Rehum, Meremoth,
4 Iddo, Ginnethoi, Abijah,
5 Mijamin, Maadiah, Bilgah,
6 Shemaiah, Joiarib, Jedadiah,
7 Sallu, Amok, Hilkiah, Jedaiah ahiuve. Amaho hi Joshua nikho laiya athemputpiteu lah a hung lamkaipeh ahiuve.
8 Levite lah a-Jeshua, Binnui, Kadmiel, Sherebiah, Judah chule Mattaniah ahiuve. Mattaniah hi thangvahna lasah teng asopite la lamkaiyin apang jie.
9 Bakkukiah le Unno, chule asopi Levite to thangvah lasah letoa phalse din Houin kinbol sungsen la lamkaipa to kimaiton ading jinguve.

Thempu chungnung Joshua chilhah
10 Joshua chapa Joiakim, Joiakim chapa Eliashib, Eliashib chapa Joiada;
11 Joiada chapa Jonathan, chule Jonathan chapa Jaddua ahi.


Thempu phunga phung upaho
12 Joiakim Thempu chungnung hilaiyin, Thempu phung sunga aban a cheng hi phung upa cheh ahiuve. Seraiah phunga Meraiah, Jeremiah phunga Hananiah,
13 Ezra phunga Meshullam, Amariah phunga Jehohanan,
14 Malluchi phunga Jonathan, Shebaniah phunga Joseph,
15 Harim phunga Adna, Meraioth phunga Helkai,
16 Iddo phunga Zechariah, Ginnethon phunga Meshullam;
17 Abijah phunga Zichri, Miniamin le Moadiah phungte nia Piltai,
18 Bilgah phunga Shammua, Shemaiah phunga Jehonathan,
19 Joiarib phunga Mattenai, Jedaiah phunga Uzzi,
20 Sallai phunga Kallai, Amok phunga Eber,
21 Hilkiah phunga Hashbiah, Jedaiah phunga Nethanel ahi.

Thempuho le Levite insung
22 Levite le Thempuho insunga upa chengse chu aban a kisei Thempu chungnung ho khanglaiyin minbua akijih soh keiye: Eliashib, Joaida, Jonathan chule Jaddua. Persia kumpipa Darius khangin minbu hi akijih chaiye.
23 Levite insung upaho minbu vang Eliashib tupa Jonathan khang geiyin bou leng minbua akijih-e.

Houin kinbol kihoppeh
24 Hashbiah le Sherebiah, Jeshua, Binnui chule Kadmiel lamkaiyin Levite aloi loiyin agom’ui. Pathen mi, David lengpa mihilna dungjiyin, Pathen vahchoinaa kiphalsea thangvah din loi ni nin apang jiuve.
25 Houin kelkot ngah jing ho chu-Mattaniah, Babukiah, Meshullam, Talmon, chule Akkub ahiuve.
26 Amaho hi Joiakim, Joshua chapa, Jehozadak tupa le gamvaipo Nehemiah, Danthu them, Thempu Ezra khanglai mi jeng ahiuve.

Nehemiah-in khopi pal athens
27 Jerusalem khopi pal thenso nin, thenso kin a thangvah lasah le tumgingthei, khutbeh le semjang saiya pang din, achenna jouseuva konin Levite akousoh keiyui.
28 Levi insung lathem jouse achen nau muntin-Jerusalem kimvel, Netophah khopi vel achen nau,
29 Bethgilgal, Geba chule Azmaveth a konin ahung kikhomsoh hel’ui.
30 Thempuho le Levite chun amaho hihen mipi hile, kelkot jouse le khopi pal jouse thensona kin abol’uve.
31 Palvuma chun Judah lamkai jouse kakhomin, khopi kimvel’a kitol din mipi loini lamkaiyin kasemdohin, Pathen thangvah abol diuvin ka-ngansei. Loi masa chu palvum jetlam, thilnen boh lhahna lam jonin akijot’ui.
32 La saho nunga Hoshaiah achen, Judah lamkaite keh khat’in ajuiyui.
33 Hikoma pang chu Azariah, Ezra, Meshullam,
34 Judah, Benjamin, Shemaiah, Jeremiah ahiuve.
35 Abanin Zechariah, Jonathan chapa, Shemaiah tupa ahin, apu luite jong Mattaniah, Micaiah chule Asaph phunga Zaccur ahi.
36 Ama nunga hin aphung sung mi-Shemaiah, Azarel, Milalai, Gilalai, Maai, Nethanel, Judah chule Hanani akita’un, abonchan, Pathen mi, David lengpa manchah tobang tumgingthei manchah achoi cheh-ui. Hiche ho loi kijotnaa lekha them Ezran alamkaiye.
37 Twinah kelkot phunga pat David khopia, David leng inpi jotna kalbi dunga akijot touvun, khopi niso lam, twi-kelkot phung pal lama akile jot kit’uve.
38 Thangvahna kinbol ho chu palvum veilam a akijot’uvin, kenjong mipi keh khat nung kajuiye. Meikhu sodohna intingvum jot paiyin Pallen kajon’un,
39 Ephraim kelkot kajot paiyun, Jeshanah kelkot, nga-kelkot, Hanalel insang le jakhat insang kahopauvin, kelngoi-kot kajon’ui. Hiti hin Houin kelkot koma kakitol ngauve.
40 Hiti hin loini kisoa Pathen thangvahna kinbol cheh chu Houin kom alhung cheh tauve. Kalhonpi lamkai cheng tilouvin,
41 kei loi lah a sumkon mut Thempu-Eliakim, Maaseiah, Miniamin, Micaiah, Elionai, Zechariah, chule Hananiah jong apangun,
42 amaho hi Maaseiah le Shemaiah, Eleazar, Uzzi, Jehohanan, Malchijah, Elam chule Ezerin ajuiyui, Jezrahiah puihoi lathemhon o-bem bemin la asauve.
43 Pathenin lung nomsel’a alhajeh-un, hiche nikho hin mipi akipah lheh jengun, kilhaina tampi abol’uve. Numei chapang tampi golvahna apangun, a-oginu gamle lei athong leuve.

Houin a Pathen houna ding gonpeh
44 Hichepet hin Houin dia thil kidongkhom ho le soma khat, kumseh a lhosoh masa kikholna in ngah din mi akoiyui. Hiche ho hin Danthua kisei dungjuiya Thempuho le Levite ding, chule khopi jouse naivel’a lhosoh jouse khoptup kin jong apouve. Judahte abonchauvin Thempuho le Levite chunga alung lhaiyui.
45 Ajeh chu Pathen thupeh banga kisuh theng kin le kithoina dang dang abolpeh-u ahi. Houin a tumgingthei bol ho le Houin a tumgingthei bol ho le Houin ngahhon jong, David lengpa le achapa Solomon semtoh dungjuiyin akin abol cheh-uve.
46 David leng le lathem Asaph khanglaiya pat lathem loi hin Pathen vahchoina le thangvahna la alamkaiji mongu ahi.
47 Zerubbabel khang le Nehemiah khang laiya jong Israel mipin lathemho le Houin ngahho kithopina dia niseh le thilpehho apeh jingu ahi. Mipin Levite chu thilpeh theng apeh-uva, Leviten Thempuho chandol chu apehsonu ahi.

NEHEMIAH LEKHABU BUNG 13

Gamchom mite to kikhenna
1 Mose Danthu ogingtah a asimdoh phat’un, Ammon mi le Moab mi Pathen mite to kigop thei louna ding kisei lai chu mipin ajadoh tauve.
2 Kitimatpi lou dia kiseina chu-Israelte Egypt’a ahung kitoldoh laiyuva, Ammon mite le Moab miten lampia an le twi apeh loujeh-u, akhoh cheh a Israelte gaosap dia Balaam suma athalah jeh-u ahi. Ahinla ka-Pathen’un hiche gaosapna chu vangbohnan aheidoh tai.
3 Midang kitimatpi lou ding Danthu ajahdoh phat’un Israelten gamchom miho alah-uva konin akaidoh tauve.

Nehemiah thil semphat
4 Houin thil kholna chunga thunei Eliashib Thempu chu sottah Tobiah to akihou thei lhon nai.
5 Eliashib hin Tobiah hi, chang thilto le gimnamtui, Houin manchah ho, Thempuho dia thilto, chang som a khat kitoh ho, lengpitwi, Levite dia olive thaotwi, Houin lathem ho ding, chule Houin ngahho dia kigong indan lentah chu amansah-e.
6 Artaxerxes Babylon leng chankal kum somthum le ni lhin kum a ama henga thu lhut dia kache kit jeh-in, hitobang thilso lai hin Jerusalem a ka-umpoi. Phat chom khat nungin lengpa phalna kamun,
7 Jerusalema kahung kittai. Hichun Houin a indan khat Eliashib-in Tobiah amansah chu datmon kakin leuve.
8 Kalung na behseh-in alumna a Tobiah thille lo abonchan kapaidoh peh-e.
9 Houin manchah ho le chang thilto gimnamtui ho nungkoi kitna din, indan jouse thenso din kaseipeh tai.
10 Mipin neh le chah lhinga apeh loujeh-uva Houin lathemho le Levite alou mun’uva akile kit jong kahedoh tai.
11 Houin khohsah loujeh-in vaipote kaphoh-e. Levite le lathemho Houin a kagapui lut in na katohsah kit’e.
12 Chuphat’in Israel mipin Houin thil kholnaa din changle lengpitwi chule olive thao som a khat ahinchoi choi jenguve.
13 Thil kholna in vetup din-Thempu Shelemiah, Danthu them Zadok, Levi mi Pedaiah, chule amaho kithopi din Hanan, Zaccur, Mataniah tupa kapansah-e. Atohkhompi ho thil ho hoppeh dia amaho hi tahsan theidol cheh a kahet ahiuve.
14 Vo ka-Pathen, Na-Houin dingle asunga Pathen houna kin dia nicheng kabol hi geldoh jingin.
15 Hiche lai hin Judah gamsung miten choldo nikhoa lengpiga achil’u kamui. Midanghon ma chang le lengpitwi, lengpiga, theichangga, chule thil dang dang sangante pohsah a Jerusalema hung kamui. Choldo nikhoa thil joh lou din amaho hi kagihsal’e.
16 Tyre khopia cheng phabep, Jerusalema in neihon choldo nin nga le thil dang dang Jerusalem khopia joh din ahinpo jiuve.
17 Judate lamkaiho haphon kaphoh-in, “Ven, nathilse bol’u pi khu! Choldo ni nasuboh tauve.
18 Hitobangma hi napu napateuvin khopi manthahna aboldoh jeh-uva Pathenin talen amatsah-u ahi. Ahivangin Choldo ni suboh-in nanghon Israel chunga Pathen lunghanna nalhutbe jinguve,” kati.
19 Kenjong Choldo nikho kipatna dia kiginni nisa kihei heiyin, Choldo nikho kichai kahsea hondoh louhel din, khopi kelkot phung jouse kakhasah soh hel’e. Choldo nikhoa khopi sunga imacha poh lut louhelna din kelkot phung jouse mi ka-ngasah-e.
20 Khatvei ham nivei ham chu kiveimi thiljohho, kiginni jan khovah-in khopi pal kal’a ageh-uve.
21 Amaho kagihsaljan-in, “I-phatchomna hikoma chu geh khovah nahiuvem? Nagekhovah kit ngei ngeiyule, thahatsan a kanodoh ding nahiuve,” kati. Hichea pat chun Choldo ni le ahung kit tapouve.
22 Choldo ni thenga nitna din, kelkot ngah dia Levite kisutheng diuvin kaseipeh tai. Hicheng kaboljeh-in Vo Pathen neigeldoh-in, chule namingailut giljeh-in neihinghoiyin.
23 Hiche lai hin Juda mi tamtah-in Ashdod mi le Ammon mi chule Moab mi numei akichenpiu kamudoh-e.
24 Achateu akeh khat jenin Ashdoh pao ham pao dang ham athouvin, keiho pao athem pouve.
25 Pasal ho haphon kaphoh-in, kagaosap’in, kajep’in, ajangsamu kabotdoh-e. Chule amaho hihen achateu hijongle gamchom mi akichenpi louhelna diuvin Pathen min panin kitepna kabolsah tai.
26 Kenjong, “Lengpa Solomon chonset sah chu gamchom numei ho ahiuve. Solomon chu chidang namdang leng jouse sanga loupijo ahi. Pathenin lungset’a Israel pumpi chunga leng achansah ahin, ahinla ama achonsetai.
27 Keihon jong nangho chonban jom a gamchom numei kakichenpi diu hitam?” tin kadonge.
28 Thempu chungnung Eliashib chapa chu Joiada ahin, ahivangin Joiada chapa hin Beth Horon khoa Sanballat chanu akichenpin, hijeh chun Joiada chu Jerusalema konin kanodoh tai.
29 Vo Pathen, hiche hon Thempu panmun le Thempuho le Levite to nasemdoh kitepna asuhboh-u geldoh-in.
30 Gamchom mite thilboh a konin mipi kasuthengin, Thempuho le leviten akin cheh akihetna diu chena lhongpi kasempeh-e;
31 aphat phat’a thilto gona ding thing chom ding kagongtoh-in, mipin lhosoh ga masa le theiga min masa thilto apeh diu dol dan kasempeh tai. Vo Pathen hichengpi hi geldoh-in lang, kei min phatnan neikoipeh-in.