JUDGES KITI THUTAN VAIHOMHO LEKHABU

Thupatna

Thutan vaihomho lekhabua hi Israel thusim Danbei ahiuva pat, Canaan gam gal abol’ule mi khatseh lengvaipohna kiphudoh kah gei thusim kisun ahi. Athusimho hi “Thutan vaihom” kiti ho nam lah a mihang ho thusim jeng, atamjo hi thutan tah tah sanga sepai lamkaijo ahiuve. Alah-uva hetdoh pen khat chu Samson ahin, ama natoh thilbol hi Bung 13-16 sunga akisun’e.
Kihilna dia thupipen chu Israel hindohna ding hi Pathen koma kitahnaa ki-ngam ahin, Pathen dia kitah lou teng manthahna hung lhungjia kisei ahi. Hiche kalval’in jong akiseibei: Pathen dia mipi kitah loujeh a manthahna hung lhun teng jongle, lung heiya aheng ahinjot tengu, Pathen chu amite huhdoh dia kigosa jing ahi.

Asung thu hopkhen
Joshua thi geiya thilsoh ho 1:1-2:10
Israelte thutan vaihom ho 2:11-16:31
Thilsoh chom chom ho 17:1-21:25


THUTAN VAIHOMHO BUNG 1

Judah phungle Simeon phungin Adonibezek amat’u
1 Joshua thi nungin Israelten Pakai henga, “Canaan mite sat dia kalah-uva koi phung kon masapen ding ham?” tin adongui.
2 Pakaiyin “Judah phung kon masa diu ahi. Judah phung hi hiche gama thaneina kapeh ahitai,” ahinti.
3 Judah phungin Simeon phung jah a, “Eikipeu gamsunga konbomu hitin, Canaan mite gasat khomu hite. Chuteng nangho kipe gamsunga jong keiho to konkhom naute,” atiuve. Hijeh chun Simeon phung le
4 Judah phung gal akonkhom’un, Pakaiyin Canaan mite le Periz mite, pasal sangsom jen, Bezek mun a ajosah-un ahi.
5 Hikoma chun Adonibezek amudoh-un, akisat piule,
6 ajamin, adel’un agamatdoh phat’un akhut le akeng khopi jung jouse atanpeh tauve.
7 Adonibezek-in, “Khut le keng khopi tansa cheh leng som sagin kadokhang noiya animal akilo jiuvin, tun mi kabolna bangin Pathenin eiboltai,” ati. Jerusalema ahin kailut’in hikoma chun athidentai.

Judah phungin Jerusalem le Hebron ajo’u
8 Judah miten Jerusalem adelkhum’un alatauve. Khosung mite athat’un, kho ahaltauve.
9 Hiche nung hin thinglhang gamsung le thinglhangbul dunga chule lhanglam gamgo lah a cheng, Canaan mite asat sat jengui.
10 Kiriath Arba kitiji, Hebron khopi a cheng Canaan mite sat din akitol tauve. Chukoma cheng Sheshai le Ahiman chule Talmai phung kailhah chengse ahinjouvui.
11 Hebron a pat Judah miten chupet a Kiriath Sepher kiti, Debir khopi adelkhumtauve.
12 Alah-uva Caleb-in, “Kiriath Sepher khopi lajoupen pen kachanu Achsah to kichensah inge,” ati.
13 Caleb naopa Kenaz chapa Othniel’in khopi chu ajouvin, hijeh chun Caleb-in achanu Achsah to akichensah tai.
14 Akigop ni lhonin Othniel’in ajinu chu apa koma loumun thum din asol’e. Amanu touna sa-ngan chunga kona ahung kumlhah le, ipi deicha ahi ding Caleb-in anadonge.
15 Amanun, “Twikhul phabep kadeiye. Gam neipeh khu gamgo lah jeng ahi,” ati. Hijeh chun Caleb-in twinah chungnung le noinung apetai.

Judah phungle Benjamin phung galjo
16 Mose nupapa, Ken mipa chilhah ho chu, lusulei khopi, Jerichoa pat Judah phung mite to lhonin Judah gamsung Arad lhanglam, gamgo lah ajontauve. Hikoma hin Amalek mite lah a achengui.
17 Judah phung mite le Simeon phung mite akonun Zephath khopia cheng Canaan mite agajou tauve. Khopi agaosap’un, asumanguvin, amin jong Hormah asah tauve.
18 Pakaiyin Judahte apanpin, hijeh chun thinglhang gamsung alatauve. Gaza le Ashkelon ahiloule Ekron khopi te ni le akimvel dung gam ho alajou pouve.
19 Twikhanglen pang dunga chengte hin thih kangtalai jeng aneiyun, hijeh chun Judahten adeldoh jou pouve.
20 Mose thupeh dungjuiyin Hebron khopi chu, Anak chilhah phung khai thumjen khopia kona nodoh, Caleb apetauve.
21 Benjamin phung sung miten vang Jerusalema cheng Jebus mite anodoh dauvin, hichea pat chun Jebus mite jong Benjamin miho to achenghal tauve.

Ephraim phungle Manasseh phungin Bethel ajou
22 Ephraim phungle Manasseh phung chu, chuche pet’a Luz kiti, Bethel khopi delkhum din akontauve.
23 Pakayin apanpiuvin, amazon jong khopi sung ve-lhi ding mi alha lut’un,
24 hichea chun khosunga hung potdoh khat amu’vin, “Khopi sunga lutje neihil leu chun suse pouvinge,” atiuve.
25 Hijeh chun Ephraim phung mite le Manasseh phung miten khosunga mihem jouse athat’un, hichepa chule a-insung mite bou ahoiyui.
26 Khonungin hichepa hi Hit mite gamsunga achen, khopi khat aphutdoh-in amin Luz asah-in, tuni geiyin hiti chun akiminvoi.


Israelite deldoh lou miho
27 Manasseh phung miten Beth Shan, Taanach, Dor, Ibleam, Megiddo, chule naivel khoneo dunga cheng miho anodoh pouvin, hikom dunga hin Canaan mite acheng jinguve.
28 Israelte athanei cheh cheh phat’un, Canaan mite chu natongin agoiyun, ahivangin adeldoh deh pouve.
29 Gezer khopia cheng Canaan mite jong chu Ephraim phung miten adeldoh pouvin, hijeh hin hikoma hih Canaan mite amaho to achengkhom jingui.
30 Kitron le Nahalal khopite nia cheng miho chu Zebulun phungin jong adeldoh pouvin, hijeh chun Canaan mite alah-uva acheng jingun, amavang elbolna na atohsah tauve.
31 Asher phungin jong Acco le Sidon, Ahlab, Achzib, Helbah, Aphek chule Rehob khopi hoa cheng mite chu anodoh pouve.
32 Anodoh loujeh-un, Asher phung chu akonei Canaan mite to achengkhom tauve.
33 Beth Shemesh le Bethanath khopite nia cheng miho chu Naphtali phungin jong adeldoh pouve. Naphtali phungin khosunga cheng Canaan mite achenkhom piuvin, elbolna na vang atohsah-ui.
34 Amor miten Dan phung sung mite thinglhang gamsunga adel lut’un, phaicham aphahsah tapouve.
35 Amor mite chu Aijalon le Shaalbim chule Heres molsanga acheng jingun, ahivangin Ephraim phungle Manasseh phungin achunguva vai ahom’un, elbolna na atohsah-uve.
36 Sela sahlam, Edom mite gamgin Akrabbim lhanglam ajot’e.


THUTAN VAIHOM HO BUNG 2

Bochim a Pakai Vantil
1 Gilgal a pat Bochim geiyin Pakai Vantil achen Israelte jah a, “Egypt gama pat kahin puidoh-uva, napu napateu kateppehna gamsung kahinlhut nahitauve. Keiman, ‘Nangho to kakitepna sukeh hih hel inge.
2 Hiche gamsung mite to kitepna nasme thei louhel diu ahi. Amaicham jouseu naphet lhah diu ahi,’ tin kaseiye. Ahinla kasei nabol pouve. Akaleh beh-in thil naboltauve!
3 Hijeh a chu nakitol tengu jongle hiche mite hi nodoh peh pouvinge. Nagal’uva pang diu, a-pathen houvu khu kipal lhuh lona nanei diu ahi,” ati.
4 Vantil’in hitia thu aseiphat hin Israelte akap pantauve.
5 Hijeh a chu hichelai hi Bochim kisah lo ahitai. Hikoma hin Pakai henga kilhaina tampi abol’uve.

Joshua thi
6 Joshuan Israelte asolpai paiyin, amichang cheh-in achan diu gamsung akilah cheh tauve.
7 Joshua hinlai damsungin Israelten Pakai kin abol’un, Joshua thi nungin jong Israelte dia Pakai thilbol nasa tah tah musa lamkai ho hinlaisen Pakai kin abol jom jing nauve.
8 Nun chapa, Pakai lhachapu Joshua chu kum jakhat le som khat alhinin athitai.
9 Along chu ama gamsungma ma, Gaash molsang sahlam, Ephraim thinglhang gamsung, Timnath Serah a avuitauve.
10 Chuche khang mite athisoh tauvin, aban kit khangin Israelte dia Pakai thilbol asumil tauve.

Israelten Pakai ahoudau
11 Pakai dounan Israelte achonseuvin, Baal doi kinbol’in apangtauve.
12 Pakai, apu apateu Pathen, Egypt a kona hinpuidoh a Pathen hou atangun, akimvel’uva chengte pathen ho pou ahoutauve. Hicheho pou koma abohkhup’un, Pakai aphin lung hangui.
13 Pakai hou haiyin, Baal doiho le Astarte doiho pou ahouvui.
14 Hijeh chun Israel chunga Pakai alung hangtan, achomgam diuvin min adelkhum’ui. Pakaiyin akimvel’uva chengte ajothosah-in, hijeh chun Israelte akiventup jou tapouve.
15 Gal akon chan’un, akitepna sa bangin, Pakai adouvun apangtan, Israelite alung hesoh lheh jengtauve.
16 Hijong chun adelkhumteuva kona huhdoh din Israelte lamkai ding Pakaiyin apei.
17 Ahivangin Israelten lamkaite thu angaipouve. Pakai tahsan louvin, pathen chom chom ahouvui. Apu apateu vangin Pakai thupeh anit nauvin, hiche khangthahte hin chutin abol pouve.
18 Pakaiyin Israelte lamkai ding apeh laisen, lamkai khang sungin amelmateuva kon huhdoh din Pakaiyin akithopi jinge. Mi bol gentheina le thoh hahsa kap le maova aum tengu Pakaiyin ahepiji.
19 Lamkai thitih tih le mipi achon ngaiyin achon jiuvin, khang masa sangin akhoh cheh jiuve. Chonset bolle thilse lamjot tang louvin, pathen chom houvin, akin aboljiuve.
20 Chuteng Israel chunga Pakai alung hangin, “Anit cheh diuva apu apateu kapeh kitepna chu hiche nam miten anit pouve. Kathu angai loujeh-un
21 Joshua thigeiya gamsunga cheng, nodoh lou nam mite chu nodoh taponge.
22 Hiche namdang ho hi Israelten, apu apateu banga kasei anit le nit lou kholtohna kamanchah ding ahi,”
23 Hijeh chun hiche nam mite chu Pakaiyin gamsunga achensah tai; Joshua jeng jong ajosah pon, Joshua thi nungin jong amaho chu adeldoh poi.


THUTAN VAIHOMHO BUNG 3

Gamsunga chengdu nam mite
1 Hitobang hin Canaan gamsung gal bolchaisoh loulai Israelte kohl tohna din Pakaiyin gamsunga namdang phabep akhendentai.
2 Hitia abol hi Israelte galbolna pang khalouhel ho galbolje hil themna dia jong akoi ahi.
3 Gamsunga gal kichuhna dia kihoi chu Philistinete khopi nga le Canaan mite abonchau, Sidon mite, Lebanon lhang, Baal molsanga pat Hamath lhanglam geiya cheng Hiv mite jouse ahiuve.
4 Pakaiyin apu apateu dia Mose aseipeh thupeh chengse Israelten anit le anit louvu photchetna dia nam hicheng chu Israel patepna kikhenden ahi.
5 Hiti hin Canaan mite, Hite mite, Amor mite, Periz mite, Hiv mite chule Jebus mite lah a Israelte acheng thangtauve.
6 Amaho chutoh akijongtouvin, ahouvu doiho geiyin ahoutauve.

Othniel
7 Israelten Pakai a-Pathenu asumil tauve; Pathen dounan achonseuvin, Baal doi le Asherah doi ahouvui.
8 Hijeh chun Israel chunga Pakai alung hangin, hijeh chun Mesopotamia leng Cushan Rishathaim chun Israel ajouvin, kumget sungin achunguva vai ahomtai.
9 Chutah chun Pakai henga Israelte othongin ataovun, Aman pasal khat mangchan amaho ajalensah tai. Hichepa hi Caleb naopa Kenaz chapa Othniel ahi.
10 Othniel chunga Pakai Lhagao apansan, Israel lamkaiyin apangtai. Othniel gal akonle, Pakaiyin Mesopotamia lengpa geiyin ajosah-e.
11 Kum somli jen gamsunga cham alengin, chuin Othniel athitai.

Ehud
12 Pakai dounan Israelte achonse kittauve. Hijeh chun Moab lengpa Eglon chu Pakaiyin Israel sangin ahatsahjo tai.
13 Eglon chu Ammon mite le Amalek mite to akithon, Israel ajouvin, Jericho, tumphai khopi chu atouphatauve.
14 Kum somle get sungin Eglon noiya Israelte asoh changtauve.
15 Pakai henga Israelte othonga ataovule, jalensah din Aman pasal khat a solpeh-e. Hichepa hi Ehud khut veilongpa, Benjamin phunga Gera chapa ahi. Israelten Ehud hi peh ding thil tampi pumin, Moab lengpa Eglon henga asol’ui.
16 Ehud hin hemto chemjam tong chan bep khat akikhenin, akhel jetlam, pon noiya akoi.
17 Ehud-in peh ding thil ho chu, mithaotah Eglon chu apei.
18 Peh dingdol thil apeh jouvin, Ehud hin thilpo ho in lam a kile kit din asoltai.
19 Ehud vang chu Gilgal kom, song kijempol laiya chun Eglon heng ajonkit’in, “Vo Lalchungnung, seipeh ding thuguh khat kaneiye,” agati. Hijeh chun lengpa Eglonin asohte jah a, “Keini bou dalhan potdoh cheh-un!” atile, abonchan apotdoh tauve.
20 Lengpa chu inchung dap lai, indan a achangseh-in atouvin, Ehud-in anailut’in, “Pathena kon seipeh ding khat kaneiye,” atile; lengpa adingdoh tai.
21 Akhel jetlama akoi chemjam hemto chu Ehud-in asatdoh-in, lengpa oipoh adotlut jenge.
22 Chemjam chu akung geiyin alut lhumin, athaovin atomjol dentai. Chemjam chu Ehud-in dodoh louva akoiden le, atungtun lam, akengte ni kah a apaiye.
23 Ehud apotdoh-in, kot alekamdenin, kanglong aheh denim
24 adalhai. Lengpa sohten kot kikama kanglong hehsa ahung mu’vin, insunga lengpa choldo danin agel bep’ui.
25 Nga thei chanin a-ngah-un, kot ahondoh louhel phat’in, kanglong laa aheh hong jengule, apupau la lhonglaiya longdamsan akijamtai.
26 Sohhon apupau anga kah-un Ehud akithol mangtai. Song kijempol kho kal’in, Seirah geiyin ajamtai.
27 Ephraim thinglhang gam aphah chun, galsat’in Israelte chu thinglhang gama konin apuisuh-in,
28 ajah-uva, “Neihin juiyun, nagalteu Moab mite chu Pakayin najosah diu ahitai,” ati. Israelten Ehud ajuisah-un, Moab miten Jordan lui apalna diu mun atouphauvin, mihem khatcha jong agalkaisah pouve.
29 Hiche nikho hin Israelten Moab sepai phalai cheh sang som tobang athat’un, khatcha ajamdohsah pouve.
30 Hiche ni hin Israelten Moab miho ajouvun, chukal kum somget sungin gamsunga cham alengtai.


Shamgar
31 Aban a lamkai chu Anath chapa Shamgar ahi. Amahin bongchal khagu mangin Philistine mite jagup jen athat’e.


THUTAN VAIHOMHO BUNG 4

Deborah le Barak
1 Ehud thi nungin Pakai dounan Israelte achonse kit tauve.
2 Hijeh chun Hazor khopia vaipo, Canaan lengpa, Jabin chu Pakaiyin Israel ajosah tai. Jabin sepai lamkaipipu chu Sisera ahin, chidang namdangte khopi, Harosheth a cheng ahi.
3 Jabinin sakol kangtalai jako jen aneiyin, engse tah le gilou tah-in, kum somni sungin Israelte chunga vai ahom’e. Hichun panpi ngai chan Israelte Pakai henga othongin ataovui.
4 Lappidoth jinu Deborah chu Themgao ahin, hiche lai hin Israelte thutanin apangin ahi.
5 Deborah hi Ephraim thinglhang gamsung, Ramah le Bethel kah, tumphung noi khat’a atou jin, athuu tansah din Israelte Deborah henga achejiuve.
6 Nikhat chu Deborah hin, Naphtali gamsung, Kedesh khopia Abinoam chapa Barak agakousah-in, “Pakai, Israel Pathen chun hita naseipeh ahi: ‘Naphtali le Zebulun phung sung pasal sangsom puiyin Tabor molsang cheuvin.
7 Jabin sepai lamkai pipu Sisera hinpui ying ting, Kishon luidunga kasat sah diu ahi. Sakol kangtalai jouse le sepai chengse to hung kon ding, ahivanga nangho kajosah diu ahibouve,’ tin aseiye,” ati.
8 Barak-in, “Neilhonpi dingle kon ing ting, neilhonpi lou ding vangle kon ponge,” ati
9 Deborah-in, “Ahile lhonpi ngange, amavang galjo chu min phatpi pon nate, ajeh chu Pakaiyin Sisera chu numei khat athasah ding ahi,” ati. Hiti hin Deborah chu Kedesh jonin Barak to alhontai.
10 Kedesh khopi nokhum din, Zebulun le Naphtali phung mi sangsom puiyin Barak akontai. Deborah-in alhonpi.
11 Ken mi Heberin Kedesh kho kom, Zanannim kiti lai, gangpi phung koma ponbuh songin ngahmun asem’e. Mose nung pa Hobab chilhah Ken mite adang hoa konin Heber hi akitumseptai.
12 Barak-in Tabor molsang lam ajottou ahet phat’in,
13 Siseran jong sakol kangtalai jako le asepaite abonchan akouvin, chidang namdangte khopi Harosheth a pat Kishon luidung lama asoltai.
14 Chutah chun Deborah-in Barak jah a, “Chetan! Pakaiyin nalamkaiye! Tunia Sisera najosah ding ahitai,” ati. Hijeh hin Barak-in asepaite pasal sangsom puiyin Tabor molsanga konin ahung kitolsuh tauve.
15 Barak le asepaiten anokhum phat’un, Pakaiyin Sisera le akangtalai jouse chule amite asuhnoh phah peh tan, Sisera jeng jong kangtalaiya konin achomlhan, kengin ajamtai.
16 Barak-in kangtalai ho le melma sepaite chu chidang namdangte khopi, Harosheth geiyin adel’in, Sisera sepaite athatgamtai. Pasal khatcha jong ahinghoi poi.
17 Hazor lengpa Jabin le Heber insung mite kihou thei jeh-in, Sisera chu Ken mi Heber jinu Jael ponbuh sunga alhailut’e.
18 Sisera lamton Jael apotdoh-in, “Hungin kapu, kaponboh sunga hung lut’in, kicha hih-in,” ati. Hijeh chun Sisera alut’in, Jael’in pondal sunga aseltai.
19 Siseran Jael jah a, “Kidang achah-e, twi neipen,” ati. Amanun savun peng khat ahongdoh-in, bongnoi don din apen, asel kittai.
20 Siseran Jael koma, “Ponbuh kotbul’a gadingin, khattou hung vah lut kham tia dong aumle, ahungpoi tin,” ati.
21 Achol behseh jeh-in Sisera a-ihmudentai. Hichun Jael’in sehcha kaht le koilupon khaina thingkil khat alan, kang chan anailut’in, thingkil chu angeisip lang khat’a akhenlut’in tol to akilmat’in athattai.
22 Barak-in Sisera ahung hol phat’in, Jael apotdoh-in, “Hungin, naholpa chu vetsah inge,” agati. Barak-in ajuilut le, Sisera chu athisan tol’a akijamin, thingkil chun aluchang adotpaiye.
23 Hiche nikho hin Pathenin Canaan lengpa Jabin chunga Israelte gal ajosah-e.
24 Israelten aha nocheh ahanocheh jengun, asuhmang soh geiyun anouve.


THUTAN VAIHOMHO BUNG 5

Deborah le Barak labol
1 Hiche nikho hin Deborah le Abinoam chapa Barak-in hitin la asa lhon’e:
2 Pakai thangvah-un! Galsat ding Israelte a-ngamtauve, Japi acham chamin akipedoh jengui.
3 Ngaiyuvin leng hon! Gelkhoh-un vaibolten! Tumging to thon la sange, Pakai Israel Pathen vahchoi nan!
4 Vo Pakai, Seir molsang ho nadlhah a, Edom gamkaiya napotdoh chun; Leiset kilingin go aju jenge. Ahi, meilom lah a konin gotwi alhai.
5 Molsang jouse akilingtai Sinai Pakai, Pakai, Israel Pathen angsunga!
6 Anath chapa Shamgar le Jael hat laiyin, Kholjin nom jouse atangin, Kohl lamlengle jong Lampel a acheuve.
7 Vo Deborah, Israel nua nahung pan masangin, Israel khopi jouse min ajamsanin, Ahomkeo jengin akijamtauve.
8 Israelten pathen chom chom ahoujeh-un Gamsunga gal alangtan; Israel pasal sang somli jen, Lum neiya le teng choiya koi ham?
9 Kalung gil’in Israel gal lamkaite panpin, Acham chama kipedoh jengho kahui. Thangvah-un Pakai!
10 Seichoi leuvin sa-ngan kang chung, Toupha hoitah tah chunga tou ho! Lamlhah dunga vahle jousen jong.
11 Twikul vel dunga kikhom japin ngaiyun, Pakai galjo seichoile ho, Israelite galjo seile ho! Akhopiuva konin Pakai mite akitolsuh tauve.
12 Lamkaiyin Deborah, lamkaiyin! Lamkaiyin, la san, lamkaiyin! Manon, Abinoam chapa Barak, Gal-hing nakaiho kaimangin!
13 Tahsan um miten lamkaite ni ahin jonsuh-un, Pakai mite galsat din Ahenga ahung kikhom’ui.
14 Ephraim gama pat phaicham a ahungun, Benjamin phung, amite nunga ahung kitol’ui. Machir a pat gal lamkaite akitolsuh-un, Zebulun a konin vaipote ahungui.
15 Issachar lamkaite Deborah to ahung lhonun, Issachar le Barak jong ahung lhon’e; Phaicham geiyin ahin juisuh peh-ui. Reuben phung vang akikehsouvin, Hoilamjoh jot ding ahethei tapouve.
16 Ibol’a kelngoite to umden hiuva, Kelngoi chingte kelngoi kougin ngai hiuvam? Reuben phung akihom khen’un, Hoilam jot ding ahetapouve.
17 Gad phung Jordan luigal solam a aumden’un, Dan phung kong inneihoa aumtauve. Asher phung Twikhanglen panga aum den’un, Twikhanglen panga akigotauve.
18 Zebulun le Naphtali phung mite vang Thi ngamin galmuna apangui.
19 Taanach mun, Megiddo luipanga Leng jouse akisat’un; Canaan lengthen gal asat’un, Dangka khatcha jong alajou pouve.
20 Vanthamjol’a ahsiten gal abol’un, Sisera dounan vanlaijol’a kon gal asat’uve.
21 Kishon lui twipin alhoh mangun, Kishon vadung twi kinongin apomangtauve. Huham tah a kitol tol jeng ding kahitai!
22 Sakolte leithong nimin ahung lhaiyun, Atin’un tol atat nimdep dup’uve.
23 Pakai Vantil’in, “Meroz kho gaosap’un, Akhoa cheng jouse gaosap chang hen. Pakai panpin ahung kondauvin, Gal satpeh sepai kon atho pouve,” ati.
24 Nunnompen numei Jael, Ken mi Heber jinu! Ponbuh song numei lah a Nunnompen numei!
25 Siseran twi athumle bongnoi apei; Khon hoitah a bongnoi lhum apei.
26 Khoilupon khaina thih hem khut khat’a choiyin, Khut lang khat’in sehcha achoiye; Sisera akhen beh-in lubuh akhenvange; Aluchang akhenvang hel’e.
27 Sisera akidil denin, Jael kengbul’a akijamtai. Jael kengbul a kidil’in alumin, Tol’a kileh lhan athitai.
28 Anun bangkot’a Sisera akailhit jingin, Bang vangkah a ave-lhi jinge. “Idia akangtalai hitigei hiya, Asakolte hung kilevah lou hitam?” ati.
29 Numei lal chingthem hon anu adonbut’un, Aman avel vel’in aseiyin;
30 “Kihom hom ding thil chom kichu’va, Sepai khat nu-ngah khat le ni gei chan ding, Sisera ding ponsil tampi, Lengnun ngongveiya anei ding kijempah leh ho,” atiuve.
31 O Pakai, namelmate hitobang chun thi cheh hen, Nagol napaite vang ninou soh bangin vahsel hen! Kum somli sungin gamsunga cham aleng’e.


THUTAN VAIHOMHO BUNG 6

Gideon
1 Pakai dounan Israelte achonse kit tauvin, hijeh chun Aman kum sagi sungin achunguva Midian mite vai apohsah tai.
2 Israelte sanga MIdiante ahatjoh phat’in, Israelte songko dongle thinglhang gamsung alhavang lai laiya akisel tauve.
3 Israelten muchi atujongle, Midiante le Amalekte chule nelgam a chengte ahung kon’un adelkhumji tauve.
4 Ahung kon’un ngahmun asemden’un, gasmsunga anche louhing, changle mim jouse asugam’un, lhanglam Gaza geiyin asuhgam peh jiuve. Kelngoite le bongho, chule sa-ngan jouse akai mangun, Israelite kihinsona thei imacha akhenpehji pouve.
5 Abongteu le ponbuh chengse pumpkin, khaokhote kitol thon ahunjiuve. Mihem le sangongsang ho simsen ahipouve. Gamsung ahung nechaihel jiuvin,
6 Israelten alonaje him him ahetapouve.
7 Midian mite dounaa apanpi diuvin Israelte othongin Pakai henga ataovun,
8 Pakaiyin adiuvin Themgao ahinsol’in, amahin Pakai Israel Pathena kon thu ahinpon: “Nasohchan nau Egypt a kahinpuidoh-un,
9 Egypt mitea konin kachu lhauvin, chule hiche gamsung mite nadouvuva pangtea konin jong kahuhdoh-ui. Namasanguva kadeljamsoh keiyin, agamsungu nangho kapei.
10 Kei Pakai na-Pathenu kahi, nachen nau gampute, Amor mite pathen semthuho hou lou dia kaseipehsa nahiuve. Ahivangin kasei nangaipouve,” ati.
11 Pakai Vantil chu Ophrah khoa ahungin, Abiezer phunga mi Joash gangpi phung noiya atouve. Achapa Gideon hin Midian miho mu louna din guh thim chan changphol’a suhlou chang achil’e.
12 Gideon henga Pakai Vantil chu akilah-in, “Vo mihang mithahat, Pakaiyin naumpi!” agati.
13 Gideonin Vantil jah a, “Pu, Pakaiyin eiumpiu le thilse hijat pin iti eilhunden thei diu ham kati thei den? Kapu kapteuvin Pakai thilbol kidang datmo chujat aseiyu chu hoilam hita, itobang tah a Egypt a kona ahinpuidoh-u aseiyu chu hoiba hitam? Pakaiyin eidondauva, Midianho kichepna dia eikoiyu ahitai,” ati.
14 Hichun Pakaiyin, “Nathahat laiyin konin, Midiante khut’a kon chun Israelte gahuhdoh tang-em. Ken kasol nahichu me,” ati.
15 Gideonin, “Ken iti Israel kahuhdoh jou ding ham? Ka-insung la Manasseh phunga alhachompen, keila ka-insunga imacha hilou pen kahi,” ati.
16 Pakaiyin, “ Kapanpi dingjeh a najotei ding ahi. Midiante chu pasal khatseh bol’a nabol’a nasuhgep jeng ding ahi,” ati.
17 Gideonin, “Neinoppeh le, Pakai tahbeh nahi photchetna neimusah-in.
18 Chule neh le chah thilto kapeh masangin neidalha hih-in,” ati. Pakaiyin, “Nahung kile kit kah-in ngah nange,” ati.
19 Gideon ina acheloiyin, kelgol khat athat’in, changbong neldisel kilogram som, cholsolouvin changlhah asemin, kelsa le changlhah chu pochan ahindomin, satwi jong bel khat’in ahindomin, gangpi phung noiya Pakai Vantil chu apei.
20 Vantil chun, “Sa le changlhah chu hiche songpi chunga hin koiyin, chule satwi chap khumin,” ati. Gideonin chutin aboltai.
21 Hichun Pakai Vantil’in sa le changlhah chu tenggol mongin athaiye. Chutah-in songpia konin mei ahung kouvin sa le changlhah chu ahalvamtai. Chujouvin Vantil amangtai.
22 Amu chu Pakai Vantil ahi ahedoh-in, atija behseh jengin Gideonin, “Vo thanei chungnungpen Pakai, Na-Vantil to kimaiton kakihou lhontai!” ati.
23 Pakaiyin ajah a, “Kicha hih-in, lung mongin, thipon nate,” ati.
24 Hikoma hin Gideonin Pakai minin maicham khat asemin, “Pakai chu lungmonna Pakai ahi,” tin aminvoi. Hiche maicham chu tuni geiyin Abiezer insung mite gamsung, Ophrah a aum nalaiye.
25 Hiche jan hin Pakaiyin Gideon jah a, “Napa bongchal le kum sagi lhingsa bongchal chom khat kaiyin, napan Baal houna maicham asem chu vochimin, maicham koma Asherah pathennu lim kisem jong chu sat lhun.
26 Hiche vuma hin Pakai na-Pathen din maicham hoisel’in semin. Chutengle nasat lhuhsa Asherah pathennu lim chu thingin mangin, bongchal nina chu pumgo thilto din apumin gouvamin,” ati.
27 Alhacha mi som khat apuiyin, Pakai hil bang bangin Gideonin agaboltai. A-insung mite le khosung mite mitmua sun laiya bol ding kichatjeh-in, jan laiyin abol’e.
28 Kho mite jingpitah a athoule, Baal maicham kivochimle Asherah lim kisem kiphuh lhu amu’vin, maicham kisemthah a bongchal nina pumgo thiltoa kigouvam amudoh-uve.
29 Akihouvun, “Koiham hiche bol’a hi?” akitiuve. Akhol toh-ule, Joash chapa Gideon bol anahi.
30 Kho miten Joash jah a, “Nachapa hinkai doh-in katha diu ahi! Baal maicham avochimin, akoma kitung Asherah lim jong asat lhui,” atiuve.
31 Ahindel khumho jah a Joash chun, “Baal huh a ama kithopia pang nahiuvem? Baal dinga pang jouse chu jingkah masanga tha ding ahi. Baal chu Pathen ahinah le amale ama kihuh tah ta! Min avohchim chu ama maicham hichu me,” ati.
32 Joash chun, “Baal chu amale ama kihuh tah ta, min avohchim chu ama maicham hichume,” atia pat Gideon chu Jerubbaal akitilo tai.
33 Chuphat’in Midiante le Amalekte chule nelgama chengte jouse kikou khomin, Jordan lui galkaiyin, Jezreel phaichama ngahmun asem’ui.
34 Gideon chunga Pakai Lhagao apansan, ama nungjui din Abiezer insung mite koukhomna din Gideonin sumkon amuttai.
35 Manassehte gamsunge sea jong anungjui din mi akousah-e. Asher le Zebulun chule Naphtali phungse sea jong mi akousah le, anungjui din ahungtauve.
36 Hichun Gideonin Pathen henga, “Israel huhdohna dia nei manchah din naseiye.
37 Aphai suhlou changphol a khun samulpon kaphai. Jingkah teng gaveng tin, tol kot louhel’a samulpon chung mai maiya daitwi akotle, Israel huhdohna manchah neigot phochen tange,” ati.
38 Aseibang bangin asoh tah bah-e. Ajing jingkah matah-in Gideon athouvin, samulpon a daitwi aheh lhah le khon khat adimset’e.
39 Hichun Gideonin Pathen koma, “Lung hang hih-in, khatvei seikit tadinge. Hiche samulpon hin phun san kit tadinge. Tuvang samulpon hi gotsah-in lang, tol joh kotsah-in,” ati.
40 Hichun jan chun Pathenin hiti mong chun anabol’e. Ajing jingkah-in samulpon agoset’in, tol chu daitwi akotsoh hel’e.


THUTAN VAIHOMHO BUNG 7

Gideonin Midiante ajo
1 Nikhat Gideonle amite jingpi tah-in athouvun Harod twinah koma ngahmun asem’ui. Midiante ngahmun chu asah lamu phaicham Moreh thinglhangbul ahi.
2 Pakaiyin Gideon jah a, “Midiante chunga gal josah din nalhonpi mihem atam behseh-e. Ajole athahat’uva galjouvin kiseiyuntin, Kei josah a aseida lo diu ahi.
3 Mipi jah din, ‘Gal a kicha chan inlama kile kit hen, adangse Gilead molsanga geh-u hite,’ tin seiyin,” ati. Hichea hin mihem sang somni akile kit’un, sangsom seh bou adalhauve.
4 Pakaiyin Gideon jah a asei kit’in, “Namite atam behseh nalaiye. Luidunga puilhan, hikoma chun lhengkhen tange. Nalhonpi dia kasei sei chu kon diu, nakonpi dia kaseilou chu kon lou ding ahi,” ati.
5 Miho chu Gideonin luidunga apuilhah le, Pakaiyin ajah a, “Uicha twile banga leiya twi lethose se le bohkhup’a twi chip those se sepkhenin,” ati.
6 Asekhenle khut’a twi sohdoh a letho mihem jathum bou ahiuvin, adangsen vang bohkhup’in achip thouve.
7 Pakaiyin Gideon jah a, “Hiche twi letho mihem jathumle nang huhdoh in ting, Midiante chunga gal kajosah ding nahiuve,” ati.
8 Hijeh chun hiche jathum tilou Israel dang ho chu Gideonin inlama asoltai, jathum vang hin neh le chah chule sumkon achoiyui. Midiante ngahmun chu anoiyu phaicham lai ahi.
9 Hiche jan chun Pakaiyin Gideon jah a, “Thouvun Midiante ngahmun delkhumin; kajosah ding nahitai.
10 Na-ngamjep loule nalhacha Purah puiyin ngahmun khu gave-lhi lhonin.
11 Hichea chun Midiante kihou jan natin, hansanlo na nei ding, delkhum ding nangap ding ahi,” ati. Hiti hin Gideon le alhacha Purah chu melmate ngahmun pamchin chin geiyin agakumsuh lhon’e.
12 Midiante le Amalekte chule nelgama chengte phaichama chun khaokhote jat aphauvin, sangongsang jeng jong Twikhanglen panga neldi jat ahi.
13 Gideon ahung chun Midian mi khat’in agolpa mang aseipeh ajai. Aman, “Kamangin sakolchanga kisem changlhah tum khat i-ngahmun sunguva ahung kilih lut’in, ponbuh khat aseleh akiphamatsah jenge,” ati.
14 Agolpan ma, “Hichu Israelte chemjam hemhat ding, Joash chapa Gideon hatna ding ahibouve! Imacha ding hi hih hel’inte! Midiante chung, chule sepai hijatpi chunga Pathenin Gideon gal ajosah ding ahitai!” ati.
15 Hichepa mang chule ipi kiseina ahi ding hilchetna ajahdoh hin Gideon bohkhup’in Pathen alhaitai. Israelte ngahmuna ahung kile kit’in, “Thouvun! Pakaiyin Midian sepaite chunga gal najosah diu ahitai!” tin aseiye.
16 Amite jathum chu hop thumin ahomin, mi khat cheh chu sumkon khat le meisel long khat cheh apen, asunga sallom athilpeh-in ahi.
17 Amite jah a, “Ngahmun pamchin kaphah teng neiveuvin, kabol bol bol’un.
18 Keile kalhonpi chengin sumkon kamut tengu, nanghon jong mut’un, ngahmun kimvel thongsoh hel’in ginsah-uvin, ‘Pakai le Gideon din sat’uvin!’tin sam’un,” ati.
19 Phat chom khat nung, jan khangkim masangin, Gideon le aloite ngahmun pamchin ageitauvin, ngahmun ngah ho kikheljou tilcha ahi. Chutah-in Gideon le aloiten sumkon amut’un, achoiyu meisallong avokeh-un
20 chule loidang nin jong chutiman abol’ui. Khut veilamin meisel adeuvin, jetlama sumkon achoiyun, “Pakai le Gideon din chemjam pan’un!” tin asamtauve.
21 Ngahmun kimvel’a chun ama ma panmun cheh a apangun, melmate sepaiho vang kale mao thon ajam jam jengui.
22 Gideon sepaiten sumkon amut mut laiseuvin, Pakaiyin melma sepaite chu khat le khat akisatto sah-in, Zarethan lam jonin ajam’un, Beth Shittah gei, Tabbath kom, Abel Meholah geiyin ajam’uve.
23 Hichun Naphtali le Asher phung, chule Manasseh phung bahte nia miho akoudoh-un, Midiante adelpeh-uve.
24 Ephraim gamsung thinglhanga cheng jouse Gideonin agakousah-in, “Hung kitolsuh-un, Midiante hungsat’un. Jordan luile Bethbarah geiya vadung jouse ting tan’un, Midiante galkaisah dauvin,” ati. Ephraim mite akoukhom’un, Jordan lui atingun, Bethbarah geiya vadung jouse ating tantauve.
25 Midian haosate ni, Oreb le Zeeb aman’un, Oreb songpi phunga Oreb athat’n, Zeeb changphol a Zeeb athat tauve. Midiante nung adelpeh-un, ahung kile kit phat’un Jordan gal nisolam a Gideon kom geiyin Oreb le Zeeb luchangte ni ahinpolut’ui.


THUTAN VAIHOMHO BUNG 8

Midiante apumjo hel’u
1 Ephraim miten Gideon jah a, “Midiante sat dia nakon a chu idia neitem dau ham? Idia hitia neibol’u ham?” atiuve. Hiti hin melse tah-in akiphin’uve.
2 Gideon, “Kei thilbol le nangho tilbol tekah thei ahinaisaipoi. Ephraim miten themcha nabol’u jong chu kaphung pumpiuva kabolsangun anasajoi.
3 Ihitale Pathen thahat vanga Midiante haosa ni, Oreb le Zeeb geiya nathau chume. Chutobangto tepi thei ken ipi kaboljouvam?” ati. Hiche asei phat hin alung hang behseh tapouve.
4 Hichepet hin Gideonle amite jathum chu Jordan lui ahung lhungun, gal jong agalkai tauve. Alcohol lheh tauvin, hijongle melmate nung adel del nalaiyui.
5 Sukkoth ahung geiyun khomiho jah a Gideonin, “Lungset’in kamite neh ding changlhah phabep neipeuvin; achol behseh-un, ahivangin Midian lengte ni, Zebah le Zalmunna kadel del jeng ding ahinalaiye,” ati.
6 Ahinla Sukkoth khosung lamkaiten, “Ibolpen a nasepaite neh le chah kapeh diu ham? Zebah le Zalmunna bon man lou laiya,” atiuve.
7 Hijeh chun Gideonin, “Aphajenge! Pakaiyin Zebah le Zalmunna eimatsah teng, gammang lah a keh lingle khaova kajep diu nahi!” ati.
8 Penuel kho geiyin Gideon achen, akhomite koma asei bang chun aseikit’e. Ahinla Penuel kho miten jong Sukkoth kho mite seibang bangin aseiyuve.
9 Hichun Gideon jong, “Hingle dama hung kile kit tei ding kahin, kahung teng nakhouva intingvum sang kavoh lhuh ding ahi!” ati.
10 Zebah le Zalmunna chu asepaite to Karkor a aum lhon’e. Nelgam cheng sepai pumpi lah a sang somle sang nga tobang bou aumtan, sang jakhat le sang som ni tobang Israelten athat tauve.
11 Gideon Nobah le Jogbehah solam, nelgamgi chin a lamlen ajuiyin, Midian sepaite chu phulou helouvin adelkhumtai.
12 Midiante lengte ni, Zebah le Zalmunna ajam lhonin, ahivangin Gideonin adel paiyin amatdoh phat’in asepai jouse lhon akicha lih paitauve.
13 Galmuna pat Gideon ahung kile kit chun Heres lampi ahin hon,
14 Sukkoth khoa gollhang khat amanin thil umdol adonge. Gollhangpa hin Sukkoth khosunga lamkai cheh pasal som sagi le sagi min jih thon Gideon apei.
15 Hichun Sukkoth kho mite henga Gideon achen, “Neikithopi nomlouvu chu nageldoh-um? Zebah le Zalmunna kamatdoh lou laijeh a kelthi dingkon kasepaite neh le chah pehda dia naseiyu chu nageldoh jingum? Veuvin kagamanin hikom kahin lhuttai!” ati.
16 Chuttah chun gammang lah a lingle khao achomkhomin, Sukkoth khosung lamkaiho jepnan aneitai.
17 Penuel khopi intingvum jong avo lhun, khosung mite athattai.
18 Chuin Gideonin Zebah le Zalmunna jah a, “Tabor a namitha lhon hoilama nakoi lhon ham?” ati. Amanin, “Nang bep bep ahiuvin, leng chapa cheh tobang ahiuve,” tin asei lhontai.
19 Gideonin, “Nukhat lhah, kasopi jeng hiuva chu, amaho chu natha lhon lou hile that lhon hih hel inge,” ati.
20 Chuin achapa lenpen Jether jah a, “Hichete ni khu gathat’in,” atile; achapanla chemjam alam ngamtapoi. Achapan behseh jeh-in akinomsot dentai.
21 Chupat’in Zebah le Zalmunnan jong, “Nangtah-in neithat lhonin. Pasal’in pasal kin bol ding ahi,” ati lhone. Hijeh chun Gideonin athat’in, sa-ngan ajepna lhon sum-eng ho geiyin akilah-e.
22 Chojouvin Israelten Gideon jah a, “Nangle natu nachate kachunguva leng changtauvin. Midian mite khut’a kona neihuhdoh-u ahitai,” atiuve.
23 Gideonin, “Kei hing kachapa hile nachunguva leng chang lhon ponge. Naleng diu Pakaibou ahi,” ati.
24 Gideonin aseiben, “Thil khat dong unge. Nachomdoh-u sana bilba chengse chu neipeuvin,” ati. Ajeh chu nelgam cheng ho chonna dol’a Midianten jong sana bilba aba cheh-u ahi.
25 Israelten, “Kipah tah-in peuvinge,” atiuve. Hiti chun pon aphauvin, sana bilba chomdoh jousen asep lhauve.
26 Hichea sana bilba Gideon kilahse se chu kilogram som ni tobang leo agih-e, chule hiche lah a hin kijepna dangle khiho, Midiante von ponsandup ho, sa-ngongsaote ngongkol a kivei ho apang hih laiye.
27 Sana bilba chengse hin Gideon ompho khat asemin, akhopi, Ophrah a akoiye. Ahinla Israelten Pathen joh don talouvin, hiche sana ompho chu ahoulou tauvin, Gideonle ainsung mite din kipalna asoh tai.
28 Hiti hin Israelten Midiante ajouvun, kichat ding ahetapouve. Kum somli sung, Gideon thi kahsen, gamsunga cham alenge.


Gideon thi
29 Gideon a-in lama achen chukoma apansatai.
30 Ji tampi aneijeh-in, Gideon hin chapa som sagi aneiye.
31 Shechem khoa jong thaikem khat aneiyin, hichenu hin chapa khat ahinpeh-in, Abimelech asah-e.
32 Joash chapa Gideon hi ateh kembet’in athin, Abiezer phung mite khopi, Ophrah a apa Joash lhana avuitauve.
33 Gideon thinungin Israelten Pathen dalhan Baal doiho pou ahouvun, pathena anei diuvin, kitepna-Baal akisem’ui.
34 Hiti hin akimvel’uva cheng melmatea kona huhdoh a Pakai a-Pathenu ahouda tauve.
35 Israelte dia thilpha chujat bolpeh a Gideon insung mite chunga akipah pouve.


THUTAN VAIHOMHO BUNG 9

Abimelech
1 Gideon chapa Abimelech hi apute chenna Shechem khopi a achen, apute koma hi,
2 Shechem kho mite jah a, “Gideon chapa som sagi noiya um ding nadeiyui, khatseh noiya um ding nadeiyun? Abimelech vang hi naphe navouvu ahi,” tisah din aseiye.
3 Aputen Shechem kho mite koma hiti chun aseipeh-un, athisan’uva peng ahijeh-in, Shechem kho miten Abimelech joh jui din agotauve.
4 Kitepna-Baal houina dangka som sagi Abimelech apeuvin, hiche sum hin aman apanpi ding mi duhdah bei tampi athalah-e.
5 Abimelech chu Ophrah khoa, apa ina achen, Gideon chapa som sagi, asopite ho chu song chung khat’a aluu atansoh hel’e. Ahivangin Gideon chapa lhumpen, Jotham chu akisel’in athat kheltai.
6 Chutah chun Shechem kho mitese le Bethmillo kho mite jouse akikhom’un, Shechem khoa gangpi ai nei phunga ahungun, Abimelech leng achansah tauve.
7 Hiche thu hi Jothamin ajahdoh phat’in, Gerizim molsanga akaldoh-in ajah-uvah, “Vo Shechem kho mite ngaiyun, chutile Pathenin naseiyu ngaiyinte!
8 Phat khat’in thingphung jouse akikhom’un alenguva pang ding lhen agouve. Olive thing jah a, ‘Kalengun pangin,’ atiule;
9 Olive thingin, ‘Nalengu hileng, mihemte le pathen jousen eijabolna thaotwi kapensah thei lou ding ahi,’ ati.
10 Chuin thinphung hon theichang phung jah a, ‘Kalengun pangin,’ atiule;
11 theichang phungin jong, ‘Nalengu hileng, kaga lhumtah heo ding ahi,’ ati.
12 Hijeh chun thingphung ho chun lengpigui jah a, ‘Kalengun hung pangin,’ atiule;
13 lengpiguiyin jong, ‘Nalengun pang leng, mihemte le pathen jouse kipana, kalengpitwi kang ding ahi,’ atikit’e.
14 Akhon nan thingphung ho hin naolhai phung jah a, ‘Kalengun hung pangin,’ atiule;
15 naolhai phugin, ‘Lenga neipansah nom mongule, kalim noiya hung keh khom’un. Naboldaule kabahnang lah a mei hung koudoh a Lebanon cedar phung ho geiya akah vam ding ahi,’ ati.
16 “Lung thengsel le lungdih pua Abimelech hi leng chansah nahinah um? Atoh phat dungjuiya Gideon geldoh jingle a-insung mite phat bol nahiu hinam?
17 Kapan gal nasatpeh-u chu sumil hih-un. Midiante khut’a nangho huhdohna dia hinkho phalngama pang anahi.
18 Tunla kapa insung mite nadoutauve. Achapa som sagi jen, song khatseh chunga nathat gamtauve. Hiche hi Abimelech, asohnu chapa natupau ahijeh a, Shechem a leng chansah ding deina nabol’u ahibouve.
19 Tunia Gideon le a-insung mite nabolnau hi thildih ahile kipah-un lang, Abimelech chunga jong kipah-un, aman jong kipapiu hen.
20 Thildih lou ahivangle Abimelech a pat mei hung koujah hen, Shechem kho le Bethmillo kho mi jouse kavamhel hen. Shechem kho le Bethmillo kho mitea konin jong mei hung koudoh hen lang Abimelech kavam jeng hen,” ati.
21 Asopipa Abimelech ginjeh-in, Jotham ajamin Beer a achengtai.
22 Abimelech chu kumthum sungin Israel chunga avaihom’e.
23 Pathenin Abimelech le Shechem kho mite akidousah-in, Shechem miten Abimelech gal abol khumtauve.
24 Hitia thilsoh hi Abimelech chungle ama tildoh a Gideon chapa som sagi thasah Shechem kho mite chunga chonset man phu lahna ding ahi.
25 Shechem kho miten molsang vum’a Abimelech achanlhihsah-un, ahinjotpa chan achom’un ahi. Aum chanu hi Abimelech aseipeh tauve.
26 Gaal chapa Ebed asopite to Shechem khoa ahungle, akho miten atahsan tauve.
27 Lengpiga agalouvun, achil lhauvin, lengpitwi asouvin, golvah abol’uve. A-pathenu houina acheuvin, aneuvin adon’un, Abimelech demna thu jeng aseiyui.
28 Gaal chun, “Shechem khosunga moh mai mi ihiuvam? Idia Abimelech kinbol’a ipan pan diu ham? Abimelech chu ija kibol ham? Gideon chapa hibou chume! Zebul akamsangin apangin, ikhoh a alhacha ipan diu ham? Naphung bulpiu, pului Hamor bou jabol’un!
29 Hiche mite hi lamkaiying lang, Abimelech that leng kati tave! Ken ajah a, ‘Sepai goiben lang hung konin kisat hite!’ tileng,” ati.
30 Khopi sung vaipo Zebul’in Gaal thusei ajah chun alung hangtai.
31 Arumah khoa Abimelech henga mi asol’in, “Ebed chapa Gaal, asopite to Shechem khoa ahungun, khopi sunga nalutsah lou diu ahitai.
32 Tun namite to jan kah-in kitoldoh-un, loujaova kisel’un.
33 Jingkah niso son kipat’un, photlot louvin khopi hindel khum’un. Gaal le amiten nahinleno tengu najo chanin bol jengun!” atisah-e.
34 Hijeh chun Abimelech le amite janlaiyin akitol’un, Shechem khopi pama loili jenin akisel’uve.
35 Abimelech le amiten Gaal hung potdoh a khopi kotphunga ding amu’vin, akiselna mun cheh-uva ahung kipadoh tauve.
36 Hichun Gaal’in Zebul jah a, “Ven, molsang vum lama konin mihem ahung kitolsuh-uve!” ati. Zebul’in la, “Mihem hiloupi, molsang le hibou khu,” atipeh-e.
37 Gaal’in aseikit’in, “Vemong mongin, molsang lailunga konin mihem ahung kitolsuh-in, loi khat jong phunsante touna ji gangpi phung lamlen a kon khun ahung’e!” ati.
38 Hichun Zebul’in ajah a, “Nanop paona hoilamba hitam? Hiche Abimelech kitipa lhacha panlou khohsah lou chu nang nahilou ham? Naning nanopma nahouho chu hung hitauva khu. Konin lang gakisatpi tang,” ati.
39 Gaal’in Shechem kho mite lamkaiyin Abimelech agakisatpi.
40 Galmuna konin Gaal ajamtan, Abimelech chun adeltai. Mihem tampi amapun, khopi kotphung geiyin anolut tauve.
41 Abimelech Arumah khoa apansan, Zebul’in Gaal le asopite Shechem khoa konin anomangin, Shechem a achengthei tapouve.
42 Ajingin Shechem kho mite lou kon kigo chu Abimelech hin ahedoh-in,
43 amite apuiyin, hop thumin akhenin, loulaiya kisel’in achang pansahtai. Khopia kona mipi hung kitoldoh amu phat’in, amaho that din akiselnauva konin ahung potdoh tai.
44 Abimelech le aloiten khopi kotphung tintan loi ding agot pet’un loi ni man loulaiya mipite akisat piuvin, athat gamhel’ui.
45 Akisat nilhum keiyun, Abimelech chun khopi alan, amite athat’in, kulpi avochimin, khopi sung chigum bangin meivam abansah tai.
46 Shechem khopi kulpi lamkaiten niche ajahdoh phat’un, kitepna-Baal houin kulpia kisel din agouve.
47 Chukoma akikhop’u chu Abimelech aseipeh-un,
48 hijeh chun Abimelech le amite Zalmon molsang lama akontoutauve. Abimelech-in heichan thingbah khat atulhan, alengkouva akhaiyin ahi. Ama bol bang bang bol loi din amite jong aseipeh-e.
49 Amichan cheh-in thingbah alham’un, Abimelech nung juiyin, thingbah chengse chu houin kulpi maiya asechap jengui. Hiti hin kulsunga mi um pum pumin thingbah ho chu ahalden’un, kulpi sunga kisel numei pasal agom a sang khat hel tobangpi chu athigam hel’ui.
50 Abimelech akonin Thebez khopi aga-umin, chule alatai.
51 Intingvum dettah khat anaumin, khopi sunga numei pasal jouse, lamkaiho gei geiyin intingvum chu adel’ui. Kot akikamden’un, inchung lama akaltouvui.
52 Intingvum ahindel khum phat’in Abimelech chun, mei halden kit din intingvum kotpi lam ajontai.
53 Ahinla numei khat’in sumhei song ahinlhah khumsah le, aluchang asep khan, alugu achiptai.
54 Chuphat’in Abimelech chun agalvonpo gollhangpa akou loiyin, “Numei thaa kakithan ding kadeipoi, chemjam satdoh-in neithat loiyin,” ati. Hijeh chun gollhangpan Abimelech avaotan jengle, athideltai.
55 Abimelech thi amudoh phat’un, Israelten inlam akijot cheh tauve.
56 Apa douna achapate som sagi athapeh themmona chu Pathenin Abimelech chunga hitobang hin alethuh tai.
57 Gideon chapa Jotham gaosapna bangin, Shechem kho mite jong athoh diuva asei chengse, agit lou manu athoh-uve.


THUTAN VAIHOMHO BUNG 10

Tola
1 Abimelech thi nungin Dodo tupa, Puah chapa Tola chu Israel jalensah din ahunge. Amahi Issachar phunga mi, Ephraim thinglhang gamsung, Shamir khoa cheng ahi.
2 Amahi kum somle ni sungin Israel lamkaiyin apange. Athi phat’in Shamir khoa avuitauve.

Jair
3 Tola thi nungin Gilead a konin Jair ahung kisepdoh-e. Amahi kum somni Israel lamkaiyin apange.
4 Jarin chapa somthum aneiyin, sangan somthum ma atouphauve. Gilead gamsunga khopi somthum aneiyun, abonchan tugeiyin Jair khote on akiseiye.
5 Jair athi phat’in Kamon khoa avuitauve.

Jephthah
6 Pakai dounan Israelte achonse kit’un, Baal doiho ahouvun, Astarte ho pou, Syria mite le Sidon mite, Moab mite Ammon mite chule Philistia mite doiho pou ahouvui. Pakai adalhauvin, houjong ahouda tauve.
7 Hijeh chun Pakai Israel chunga alung hangin, Philistine ho le Ammon mite ajosahtai.
8 Philistinete le Ammonten kum somle get sungin Israelte, Amorte gam, Jordan gal nisolam, Gilead gamsunga cheng ho, genthei hesoh-in abol’uve.
9 Ammon mite chu Judah le Benjamin chule Ephraim phungho to kisat din, Jordan san ahung galkaiyui. Hiti hin Israelte analung gim lheh jengui.
10 Israelte Pakai henga othongin ataovun, “Nang douna chosen, ka-Pathenu Nang dalhan Baalte kahoutauve,” atiuve.
11 Pakaiyin adonbut’in, “Egyptte, Philistinete,
12 Sidon mite, Amalek mite, chule Maon miten masangin nabolgim’un kahenga nataovui. Hiche hao kona kahuhdohda khah am?
13 Huhdoh jong leng neidalhauvin pathen chom chom nahouvui; hijeh chun huhdoh kit tapouvinge.
14 Nadeilhen pathente henga chun gataovun. Nagenthei tengu hiche ho chu kihuhdohsah tauvin,” ati.
15 Ahivangin Israelten Pakai henga, “Kachonseuve, nadei deiyin neibol tauvin, amavang tunin neihuhdoh tei teiyun,” atiuve.
16 Hiti hin namdangte doilim semthu jouse apaiyun, Pakai ahouvun, hichun Israelte gimna chunga Pakai alung natai.
17 Ammon sepaite ahung kon’un, Gilead a ngahmun asemtauve. Israelte jong akikhom’un, Gilead gamsung Mizpah a ngahmun asem’ui.
18 Mizpah muna hin Israel phung lamkai jouse le mipi akidong touvin, “Ammonte to kisatna koipen ilamkai diu ham? Lamkaipen pen chu Gilead gamsunga lamkaiya pangden ding ahi,” akitiuve.


THUTAN VAIHOMHO BUNG 11

1 Gilead gamsung cheng, noti chapa Jephthah chu apa Gilead ahin,
2 Gilead hin ajinu to chapa dang jong anei lhonin, ahung khandoh phat’un Jephthah hi ina konin adelmangtauve. Gilead chapati Jephthah jah a, “Ipau gou nalo thei louhel ding ahi; nuchom hin nahibouve,” atiuve.
3 Jephthah asopitea kona jamdoh a Tob gamsunga gacheng ahi. Tob gamsung pannabei mihon angaiyun, akilhonpi lel luljiuve.
4 Phat phabep nunga Ammon miten Israelte ahinsat’u ahi.
5 Ammon mite hung gallon phat’a, Gilead gamsung Israel lamkaiho cheuva, Tob gama Jephthah agapuiyu ahi.
6 Amahon, “Ammon mite to kisatna din neihung lamkaiyun,” atiuve.
7 Jephthah-in, “Neihot behseh-uva kapa insunga kona kacham louva neideldoh-u hilou ham? Nagenthei phat’uva ibol’a neihung kouvu-ham?” ati.
8 Amahon Jephthah jah a, “Gilead gama cheng jouse neilamkaiyuva, Ammon mite to ikisat theina diuva kadei phat’uva kahung kouvu hichume,” atiuve.
9 Jephthah-in ajah-uva, “Ammon mite to kisat dia in a neipui kit’uva, Pakaiyin gal eijosah-ule, nachunguva vai kapoh ding ahi,” ati.
10 Amahon, “Kanom’uve, Pakai isakhiu ahijenge,” atiuve.
11 Hijeh chun Jephthah chu Gilead gamsung lamkaite to alhonin, mipin vaipole lamkaiyin asemtauve. Avaipoh dingdol chu Jephthah-in Mizpah khoa Pakai angsunga aphongdoh-e.
12 Hichun Jephthah-in Ammon lengpa koma mi asol’in, “Ibol’a neikinah piuva, kagamsunguva gal hung bol nahim?” agatisah-e.
13 Jephthah misol ho jah a Ammon lengpan, “Egypt a ahung kitoldoh-u chun Israelten Arnon luidunga pat Jabbok le Jordan luidung gam einalahpeh-un, hichu lung lhaisel’a neipeh kit diu ahi,” ati.
14 Ammon lengpa henga Jephthah-in mi alesol kit’in,
15 aseidiu thu hilsan, “Israelte Moab ahiloule Ammon gam lamanga neingoh-u adihpoi.
16 Hitijoh anahi: Egypt a ahung kitoldoh-u chun Israelten nelgam ajot’un, Aqaba twikol paltanin, Kadeh a ahung bouvui.
17 Hikoma hin mi asol’un, agamsung apaltanna diuvin Edom lengpa phalna agathumsah-ui. Edom lengpan aphalpehpoi. Moab lengpa henga athumu jong le, aman jong agamsung ajotsah deh poi. Hijeh chun Israelte Kadesh a apansauve.
18 Hichun Israelten nelgam ajotpeh-un, Edom le Moab gamsung avelkol peh-uvin, Arnon luigal lang khat, Moab nisolam geiyin ahung kitol’ui. Hikoma hin ngahmun asem’un, Moab gamgi ahijeh-in Arnon lui jong agalkai pouve.
19 Chuin Heshbon khoa Amor lengpa, Sihon hengpa Israelten mi asol’un, agamsungu lutna dia ama gamsung paltanna din phalna agathumsah-ui.
20 Sihonin jong Israelte apaltansah deh poi. Asepaite akhom loiyin, Jahaz mun a ngahmun asemin, Israelte adelkhumtai.
21 Ahinla Pakai Israel Pathenin Sihon le asepaite chu Israelte ajosahtai. Hijeh chun chugama cheng Amor mite gamsung jouse Israelten alatauve.
22 Israelten Amorte gam atouphau chu, lhanglam Arnon luiya pat sahlam Jabbok luidung gei, nisolam nelgama pat lhumlam Jordan lui gei ahi.
23 Hitia chu amite Israelte dia Amor mite delmanga chu Pakai Israel Pathen ahibouve.
24 Hiche gam nunglah kit nagot’u ham? Na-pathenu Chemosah chun napeh gamsung chubou kikoiyin, keihon jong Pakai ka-Pathen’un eipeh chengseu kakoi diu ahi.
25 Moab lengpa, Zippor chapa, Balak sanga phajoa kigel nahim? Aman Israel aphin khapoi, aphin am?
26 Israelten kum jathum sunga Heshbon le Aroer hi alou ahitan, akimvel’a khopi chengse le Arnon luipanga khopi jouse jong alothau ahi. Ahile ibol’a phat hichan sunga nakinunglah dau ham?
27 Ima dih louva kabolnau aumpoi. Gal neibol khum jengu adihpoi. Thutan a Pakai ahi. Israelte le Ammon mite kah a Aman thu tan nante,” ati.
28 Ahivangin Jephthah thu thot chu Ammon lengpan iman agelpoi.
29 Pakai Lhagao Jephthah chunga apansan, Gilead le Manasseh gamsung akholsoh-in, Gilead gamsung Mizpah ahung lhungin, chuin Ammon ageiyin achei.
30 Pakai henga Jephthah akitep’in: “Ammon mite neijosah le,
31 gal kajoa inlam kahung kile kit teng eilamto dia hung potdoh masapen pen nahenga pumgo thiltoa kapeh ding nahi. Hiche mihem chu nahenga kilhaina kapeh ding nahi,” ati.
32 Hiti hin Ammon mite to kisat din, Jephthah chu luigal akaiyin, chule Pakaiyin gal ajosahtai.
33 Jephtah-in Ammon mite chu Aroer a pat Minnith kimvel gamkol sung, khopi somni jen chu Abel Keramin geiyin adelkhumtai. Mihem simsenlou athat’un, Israelten Ammon mite ajoutauve.
Jephthah chanu
34 Jephthah chu ain lam, Mizpah kho jona ahungle, alamdot din achanu ahung potdoh-in, lamle khutbeh thon ahung’e. Cha jong hichenu seh bou anei ahi.
35 Achanu amu phat’in alung na behseh jengin aponsil abottel’in, “Vo kanao, kalung nasuna behseh jenge! Nangpen tah-in neithoh gimsah lou ikhoh ham? Pakaiya giltah a kitep kahin, haitheihoi kahitapoi!” ati.
36 Achanun ajah a, “Pakaiya kitepsa nahile, Pakaiyin namelma, Ammon mite chunga phu lahsahta chu, keibolna dia naseina chu bol jengin,” ati.
37 Hichea hin achanun, “Thil khat vang neiphal peh-in; lha ni sungin neidondan lang, nu-ngah thenga kathi ding pul dounan kaloi kagolte toh molsang dunga gavah leuvinge,” ati.
38 Jephthah-in anoppeh-in, lha ni din asoldoh tai. Amanu le aloi agolte molsang dunga akaltouvun, ji neilou lai, cha beiya athi ding pul adouvui.
39 Lha ni nungin apa koma ahung kile kit’in, Pakaiya akitepnasa chu Jephthah-in abol’in, achanu khangdong laicha hiti hin athi. Hichea pat hin Israelte chondan khat akisemdoh lon,
40 nu-ngah khangdong jouse kumseh le Gilead gamsunga Jephthah chanu pul dou din ni li lli pama achemang jiuve.


THUTAN VAIHOMHO BUNG 12

Jephthah le Ephraim mite
1 Ephraim mite galsat din akigouvin, Jordan lui galkaiyin Zaphon a ahungun Jephthah jah a, “Gamgi khokal’a Ammon mite sat dia chea, nalhonpi dia keiho neihil louvu ham? Na-in kahalkhum diu ahi!” atitauve.
2 Ahinla Jephthah-in ajah-uva, “Keile kamite Ammon mite to kakitomo laiyun kakou vangun neihuhdoh pouvin,
3 neihu lou diu kahet phat’in, hinkho phal ngamin gamgi kalpeh a Ammonte kagasat’in, Pakaiyin eijosah tai. India tua kei sat dia hung nahiuvam?” ati.
4 Jephthah-in jong Gilead gam mite akoukhomin, Ephraim mite to akisat’ule, ajoutauve. Ephraim miten ajah-uva, “Ephraim le Manasseh gamsung, Gilead a chengte hi Ephraima kona jamdoh loi nahiuve!” atiu ahi.
5 Ephraim mite jamdoh louna din, Jordan palmun jouse Gilead miten atingtan tauve. Ephraim mi galkai nom hon galkai ding aseiyule, Gilead miten, “Ephraim mi nahim?” tin adongun, “Kahipoi,” atile;
6 ahile, “Shibboleth,” atisah-un, aleile theilou jeh a, “Sibboleth” atileh; aman paiyun, Jordan palmun khatpen pena athat paiji tauve. Hichea hin Ephraim mi sang som li le sang ni athat’uve.
7 Jephthah hin kum gup sungin Israelte alamkaiye. Athi phat’in akho sung, Gilead gamsunga avuitauve.
Ibzan, Elon, chule Abdon
8 Jephthah thi nungin Bethlehem khoa Ibzanin Israelte alamkaiye.
9 Ibzanin chapa somthumle chanu somthum ma aneiye. Achanu somthum chu phung danga ajineisah-in, achapate ji din phung dang chanu somthumma apuilut’e. Ibzanin kum sagi sungin Israelte alamkaiye.
10 Athi phat’in Bethlehem khoa avuitauve.
11 Ibzan thi nungin Zebulun phunga mi Elon chun kum som sungin Israelte alamkaiye.
12 Elon athi phat’in Zebulun gamsung, Aijalon khao avuitauve.
13 Elon thi nungin Pirathon khoa Hillel chapa Abdonin Israel alamkaiye.
14 Abdonin chapa somali le tupa somthum aneiyin, abonchauva sa-ngan touthei ahiuvin, kum get sungin Abdonin Israel alamkaiye.
15 Abdon athin, Amalekte thinglhang gamsung, Ephraim gam, Pirathon khoa avuitauve.


THUTAN VAIHOMHO BUNG 13

Samson pen
1 Israelte Pakai dounan achonse kit’un, hijeh chun Pakaiyin Israelte chunga kum somli jen Philistinete avaihomsahtai.
2 Hichelai hin Manoah kitipa hi Zorah khoa anachengse. Ama hi Dan phunga mi ahi. Ajinun cha ahing thei hih hel’e.
3 Ajinu henga Pakai Vantil akilah-in, “Cha neithei louhel nahin, tua vang gaiya chapa khat naneivah ding ahitai.
4 Chingtheiyin jukha hihen vaiju hile don hih hel’in, chule neh lou ding dol ne hih hel’in;
5 nachapa apen tengle sam navopeh lou ding ahi, ajeh chu apen nikhoa pat Pathen koma Nazir dia katdoh ding ahitai. Amahin Philistinete khut’a Israelte sut lhamna ding na atoh pat ding ahi,” ati.
6 Amanun ajipa agaseipeh-in, “Pathen mi khat ahungin, Pathen Vantil lheh lheh ahin, kichat aum’e. Hoilam kon ahijong kadongpon, amin jeng cha jong eihilpoi.
7 Kagaiya chapa khat kanei din aseiye. Jukha hihen vaiju hile kadondaa, neh ngailou ima kaneh louhel din aseiyin,
8 Hichun Manoah jong Pakai henga ataovin, “Vo Pakai, nahinsol Pathen mipa hung kit hen lang chapa chu apen teng ikalo lhon ding eiseipeh lhon hen,” ati.
9 Manoah ngeh bangin Pathenin asol’in, Manoah jinu loulaiya atoupet’in Vantil chu ahung kit’e. Hichepet hin ajipa Manaoh akoma anaumpi,
10 ajinu apet pet’in alhaijel’in, “Hungven! Nikhat’a hung pa ahung kilah kit’e,” agati.
11 Manoah kipatdoh-in ajinu ajutai. Vantil henga chun, “Kajinu koma thuseipa chu nahim?” ati. Aman jong, “Henge,” ati.
12 Hichun Manoah-in, “Nasei hi agui lhun teng, apeng dingpa chun ipi bol’intem? Itobang hinkhoa kimang ding ham?” ati.
13 Vantil’in jong, “Kaseipeh jouse chu najinun abol tei tei ding ahi.
14 Lengpiguiya kilou tapou anehda ding, jukha hihen vaiju hile adon louhel ding ahi. Kaseipeh jouse abol tei tei ding ahi,” ati.
15 Pakai Vantil ahilam helouvin Manaoh hin ajah a, “Che hih laiyin, kelgol khat thapeh lhon tadinge,” ati.
16 Ahivangin Vantil chun, “Kho ngai jong lenga na-an neponge. Nabol nom mongle Pakai henga din pumgo hilton gouvam jengin,” ati.
17 Manoah-in, “Nasei gui lhun teng kaseiphat thei lhonna din, namin neiseipeh lhonin,” ati.
18 Vantil chun, “Ibol’a neidoh ham, kamin hi min guh ahibouve,” ati.
19 Hichun Manoah-in jong kelgol khat athat’in, chang them khat to songpi maicham phunga chun, thil kidang dang bol Pakai henga din atohdoh tai.
20 Maicham phung meikhu kitundoh pet chun, Vantil jong meikhu lah a chu van lam jona akitoldoh, Manoah le ajinun amu lhon’e. Hichun Manoah hin mipa chu Pakai Vantil ahi ahedoh-in, ajinuto tol’a bohkhup’in chibai aboh lhontai.
21 Vantil chu amukit lhontapoi.
22 Manoah hin ajinu jah a, “Pathen imu lhontan, thitei ding vang ihitai,” ati.
23 Ahinla ajinun, “Pakaiyin eitha nom lhonle ithilto jong sangponte; thil hijat jong eimusah pontin, hitobang bang hi eiseipeh lhon louhel ding ahi,” ati.
24 Manoah jinun chapa khat ahingin, Samson asah-e. Naosen ahung khangdoh-in, Pakaiyin phatthei aboh-e.
25 Dan phung ngahmun Zorah le Eshtaol kah a aumpet’in, Pakaiyin thahat apepantai.


THUTAN VAIHOMHO BUNG 14

Samson le Timnah a nu-ngah
1 Nikhat Samson Timnah kho achesuh-in, hikoma chun Philistine nu-ngah khat amudoh tai.
2 Ina achen anule apa jah a, “Lhanglam Timnah khoa Philistine nu-ngah khat kamudoh-in, kamit’a achangten’e. Neipuipeh lhonin kichenpi ding kanom’e,” ati.
3 Anule apanla, “Chep tanlou Philistinete lah a khu ji nagahol lou ipi akhohna um ham? Imiteu lah, iphung sunguva nu-ngah mulel hel nahim?” atilhon’e. Ahivangin Samsonin apa jah a, “Neipuipeh tei dia kadei ama khubou ahi,” ati.
4 Pakaiyin Philistinete sat ding phat pha avet lhih jing molsona dia Pakaiyin Samson hiche bol dia agot lam chu anule apan ahelhonpoi. Hiche laiya hi Israelte chunga Philistinete vaihom ahiuve.
5 Samson chu anule apa to Timnah a achesuh-un, lengpilei lah ajotnauva sakei bahkai nou ham ajan ahi.
6 Photlot louvin Pakaiyin Samson tha apen, akhut keoseh-in, kelgol kibolna bangin, sakei chu abottel jengin ahi. Athilbol chu anule apa aseipeh poi.
7 Nu-ngahnu chu akihoupile adei lheh jenge.
8 Ni phabep jouvin hichenu chu kichenpi din Samson achetai. Lampi dunga apotdoh-in asakei thasa chu agavei. Kidangtah-in sakei longhorn sunga chun khoilhah anakaiyin, khoiju anaumtai.
9 Khoiphang akhoh lhan, ache pum pumin achoppeh-e. Anule apa jong khoiju phabep agapei. Anule apan anelhon nan, Samsonin la khoiju chu sakei long sunga alahdoh ahi aseipeh poi.
10 Apa chu nu-ngahnu ina achen, Samsonin jong golvah abol’e. Hichu chulai khanga gollhang chondan ahi.
11 Philistineten amudoh phat’un aumpi din gollhang somthum asol’uve.
12 Samsonin golhangho jah a, “Thulem khat dongung ting, moulop golvah kichaikah, ni sagi sunga ipi kiseina ahi neiseipeh joulouvu le tupat ponnem somthum le golvah von somthum neipeh diu ahi,” ati.
13 Philistine gollhanghon jong, “Nathulem chu seiyin, ngaiyunge,” atiuve.
14 Samsonin, “Mi nepaa konin neh thei ahungdoh-in, Athahat’a konin alhumkei ahungdoh-e,” ati. Nithum geiyin jong Philistine gollhanghon thulem chu alham thei hih laiyui.
15 Nili lhin nin Philistine gollhanghon Samson jinu henga, “Thulem chu ipi kiseina ahi eiseipeh theina diuvin najipa khu lungthim bol’in. Nabolda le napa in le nang kahalvamtha diu ahi. Nangin hin keiho chomgamsih seh dia neikouvu hilou ham?” atiuve.
16 Mit lhi pumin Samson jinun ajah a, “Neideipoi! Neihot ahibouve! Kagolte thulem khat naseipeh-in, ipi kiseina ahijongla neiseipeh poi,” ati. Samsonin, “Ken kanule kapabon kiseipeh lou, iti nang kaseipeh ding ham?” ati.
17 Golvah kibol ni sagi sungin Samson jinu jong akap kap jenge. Hijeh chun ni sagi lhin nin Samsonin thulem chu ipi kiseina ahi ajinu ahiltai. Ajeh chu amanun asei sei jeng phat’a ahil ahi. Hichun Samson jinun Philistine gollhangho aseipeh tai.
18 Hiti hin ni sagi lhin ni, Samson jan ihmut masangin, khopi sung mihon ajah a: “Khoiju sanga lhumjo ipi hiya, Sakei sanga hatjo ipi ham?” atiuve. Samsonin: “Kabongpi manga loukai lou hileu chun, Kathulemsei hedoh pouvin nate,” ati.
19 Photlot louvin Pakaiyin thahat apen, Ashkelon kho anokhumin, pasal somthum athat’in, avonu ahoh lhan, thulem seidoh ho chu ahoppeh tai. Hiche nung hin lung nommo tah-in Samson inlama ahung kile kittai,
20 ajinu ma chu akichenni lhon a agolpa apetauve.
THUTAN VAIHOMHO BUNG 15

1 Phat chom khat nung, suhlou chang bol laiyin, Samsonin ajinu agavil’in, kelgol khat akaipeh-e. Samsonin ajinu pa jah a, “Kajinu indan a kalut nom’e” ati. Ahivangin ajinu pan alutsah poi.
2 Samson jah a, “Nahot mong dan a kagel jeh-in nagolpa kapetai. Anaonu hi hoichenjo ahi. Amahi nakichenpi thei ahi,” ati.
3 Samsonin, “Tuchunga vang Philistinete ilo jong leng mo kapoh lou ding ahi!” ati.
4 Hijeh chun Si-al jathum jen agamanin, Sial ni nin ameiyin akhitmat’in, akhimatna laiya meisal asomlhopsoh keiye.
5 Chuin Si-alte meiya asomlhop meisal jouse chu ahal’in, abonchauvin Philistinete changleiya alhalut’e. Hiti hin pol lah keo kalouvin, changkhung ding lai jouse geiyin, olive thingpah ho pumin akachaitai.
6 Athilsoh hi Philistineten ajahdoh phat’un akhol’ule Samson bol anahi. Ajeh chu Timnah khoa mi pasal, Samsonin nupa aneipan, Samson jinu, achanu chu Samson golpa anapehdoh jeh a Samson hita chu chon jeng ahi. Philistinete akon’un hichenu chule apa in ahalvam tha tauve.
7 Samsonin ajah-uva, “Hitipia hi chon nahiuve ong! Aphai, kalethuh masangseuvin nga ponge,” atin,
8 akonin nasatah-in akisat pin, Philistinete tampi athat’e. Chujouvin Samson Etam mun a songpikoa akiseltai.

Samsonin Philistinete ajo
9 Philistinete ahung kon’un Judah gamsunga ngahmun asem’un, Lehi khopi adelkhumtauve.
10 Judah miten anadongun, “Ibol’a neidel khum jengu ham?” atiuve. Philistinete, “Samson match a sohchansah ding, aman eibolna banguva ama bol ding katiu ahi,” atiuve.
11 Judahte mihem sangthum jen akon’un Etam songpikoa Samson jah a, “Philistinete ichunguva vaihom ahiu helou nahim?” atiuve. Samsonin, “Eibolna banguva kabol hichume,” ati.
12 Judahten, “Nang kan a Philistinete pedoh dia hungkon kahiuve,” atiuve. Samsonin, “Neitha louna diuvin nachemjamu neipeuvin,” ati.
13 Amahon, “Kan a Philistinete pehdoh mai mai ding katiu ahin, nathat pouvinge,” atiuve. Hiti hin khaothah leh nin akan’un, songpikoa konin inlama ahinkaitauve.
14 Samson Lehi ahinlhut lhut’un Philistineten ahindel’un, lhang asap khum jengule; hetman louhel’in Pakaiyin thahat apen, akhut le abanjang akan nau khao jouse chu patjang bep’in abottan soh tai.
15 Hichun Samsonin sa-ngan thikam khagu khat amaikhan, Philistinete sang khat aveilih nai.
16 Hichea hin Samsonin hanla asah khumin: “Sa-ngan khagun pasal sang khat kathat’in, Sa-ngan khagun mihem long kajamchap’e,” ati.
17 Hichun sa-ngan khagu apaiyin, hitobang thilsona mn chu Ramath Lehi asah tauve.
18 Samson adangchah behseh jengin, Pakaiya ataovin, “Vo Pakai nasatah-in gal neijosah nan, dangchah a thi dingkon, hiche cheptan louho khut luma lou ding ngap kahitah-em?” ati.
19 Pathenin komtong, Lehi kho koma ahongdoh-in, twi aputdoh chu Samsonin adon leh tha akidotai. Hijeh chun hiche twinah chu Hakkore akisah-in, tugeiyin Lehi khoa aum jing nalaiye.
20 Gamsunga Philistinete vaipoh sung, kum somni sungin Samsonin Israelte alamkaiye.


THUTAN VAIHOM HO BUNG 16

Gaza kho Samson
1 Nikhat hi Philistinete khopi Gaza Samson achele numei noti khat amun, aluppi.
2 Gaza khosung miten Samson hung ahetdoh phat’un, alumna mun aumkim’un, jan khovah hel’in khopi kelkot phunga achang khovah hel’ui. Jan khovah hel’in athip beh-un, ageldoh’un, “Jingkah geiyin ngah-utin, khovah teng that naute,” atiuvin ahi.
3 Samson la jankim geibou a-ihmun, chuin athouvin khopi kelkot phung abodoh-in, akhom ho le agol ho, akanglong geiyin apumangtai. Abonchan apun, Hebron khopi gah noivetna lhang geiyin apodoh peh-e.

Samson le Delilah
4 Hiche nung hin Samsonin, Sorek phaiya cheng, Delilah kiti numei khat adeichai.
5 Philistine lengte nga jen acheuvin Delilah jah a, “Samson hi lungthim bol’in, athahat hoiya um, i-lo leuveng katuh ngoiyuva, kantum a chatmoa kalha thei diu ham. Najole leng khat cheh-in dangka sang khat le ja khat cheh peuvinge,” tin ajoltauve.
6 Hijeh chun Delilah hin Samson jah a, “Ibol’a hiti hat nahim, lungset tah-in neihil’in. Khattouvin kantum a chamosah din nadeile itibol’in natem?” tin adonge.
7 Samsonin, “Thalpi khao nou chet, jang sagin eikanleu, midang bang banga chat thei lou ding kahitai,” ati.
8 Philistine lengten thalpi khao nouchet, jang sagi ahinchoiyun, Delilah-in Samson chu akantai.
9 Indan chom khat’a Delilah hin mi achangpansah-in, hijeh chun, “Vo Samson! Philistinete ahungtauve!” tin asamtai. Ahinla Samsonin thalpi khao jouse chu patjang mei kahtan bangin atumtansoh tai. Hiti hin amahon athahat konna ahedoh thei deh pouve.
10 Delilah hin Samson jah a, “Nei ngol bol’in, thudih neiseipehpoi. Min iti nakanjou mong mong ding ham neiseipeh tei teiyin,” ati.
11 Samsonin, “Man khah louhel khao thah-in eikan’ule, midang bang banga chatmo jeng ding kahi,” ati.
12 Delilah-in khao thah alan Samson akantai. Hichun, “Vo Samson, Philistinete ahungtauve!” tia asap le; Philistineten indan chom khat’a angau ahin, Samsonin la aban akanna khao ho chu patjang bon abottan kittai.
13 Delilah-in Samson jal a, “Neingol bolna laiyin, thudih neihilpoi. Mi iti nakanthei ding ham neihil’in,” atikit’e. Samsonin, “Kasam ba sagi hi lomkhat’in pheh-in lang, samkil’in kil matsoh keile chun midang bang bangin chatmo tange,” ati.
14 Delilah-in Samson chu alhim ihmun, asam ba sagi chu ba khatseh-in apheh gomin, samkil’in akilmatsoh keiyin, “Vo Samson, Philistineten nadelkhum tauve!” tia asap le; Samson ahung thouvin, asam kilmatsa chu athing lhan akilham soh tai.
15 Hichea hin Delilah-in, “Nalungthimbon neipe lou ibol’a neideiya kisei nahim? Thumvei neingol bol’in, ipin thahat napeh neiseipeh hih laiye,” ati.
16 Hitia hi niseh a adoh doh jengle, ahenga angih jing chu Samsonin atheichim behseh tan,
17 akhon nan aseidoh peh tah bah tan, “Kapen a pat Pathen dia katdohsa, kasam vokhah louhel ahin, kasam kivouchai le katha beiya midang bep bep kahi ding ahitai,” atidohtai.
18 Adihtah aseidoh ahet phat’in Delilah-in Philistine lengte agakousah-in, “Hung kit’un, adih tah aseidoh tai,” atisah-e. Hichun ahungun sum jong ahinchoiyui.
19 Delilah-in Samson chu apheichunga a-ihmutsah-in, asam ba sagi chu pasal khat achetansahtai. Chule hichea pat hin kichepnan aneiyin, thabei cheetah jeh-in aning anop’in aboltai.
20 Chujouvin, “Vo Samson, Philistineten nadelkhumtauve!” tia asap le; Samsonin amasahoa bangin kithing lhang ting tin agel’in, Pakaiyin adalhah lam ahepoi.
21 Philistineten aman’un amitchangte hi akaldoh-un, Gaza khopia akailut’un, sum-eng khaovin akan’un, songkul sunga sumhei goiyin apansah-uve.
22 Ahinla asam ahung khangpan kittai.

Samson thi
23 Philistine lengte chu a-pathenu Dagon koma kilhaina nasa tah bol din akikhom’un, “I-Pathen’un melma Samson eijosah tauve!” tin la asauve.
24 Akipah behseh jengun, “Samson gakoudoh-un, golnop bolnan neiyu hite!” tin asamtauve.
25 Songkul’a konin Samson agakaidoh-un, golnop bol nan amangun, inkhom ni kah a adinsah-ui. Mipin amutah-un a-pathenu vahchoi la asauvin, “Mi tamtah that gam a, gamsung sugamhel, melmapa chu i-Pathen’un eijosah tauve!” atiuve.
26 Akhut’a kaile chapangpa jah a chun Samsonin, “Inpi ki-ngapna khomte ni chu neithamsah-in, kakingai nom’e,” ati.
27 Insung mihem, numei pasal, dimset ahi. Philistine lengte nga jong um, abonchauva inchunga um chu numei pasal sang thum jen tobangin Samson umchan golnop’a avet’uva, nopsahna aneiyu ahi.
28 Hichun Samson ataovin, “Vo thaneipen Pakai, neihin geldoh-in; kamitchangte ni akaldoh jeh-uva, hiche Philistinete chunga phu kalah theina din, O Pathen, lungset tah-in, chom khatseh ding hijongle thahat neipe kit tei teiyin!” tin athum’e.
29 Hichun inpi douva pang khompi lailungte ni chu Samsonin atuh chah kheh tai. Khompi khat cheh chun akhut jetle veiyin asonton, hanuh nuh a anuh jenga,
30 “Hiche Philistinete hito thiden jeng tange!” tia asap a; atha neichasun a anuh leh, inpi achimtan, Philistinete leng nga le mipi chujat chu adel lihsoh tai. Ahin laiya atha sangin Samsonin athia atha atamjoi.
31 Asopite le a-insung mite ahung konsuh-un Samson long apotauve. Along chu apouvin Zorah le Eshtaol kah, apa Manoah lhan ma maa avuitauve. Samson chu kum somni sungin Israel lamkaiyin anapange.


THUTAN VAIHOMHO BUNG 17

Micah doi
1 Phat khat’in Ephraim thinglhang gamsunga Micah kitipa chu anachenge.
2 Micah-in anu jah a, “Nasum dangka sang khat le ja khat akiguh mang chun, agupa nagaosap’e. Nagaosap chu kajai; ven sum kakoiye, agua chu kei kahi,” ati. Anun jong, “Kanao Pakaiyin vang boh hen!” ati.
3 Micah-in sum chu anu apen, anun jong, “Ka kase nachunga chuh louna din, hiche sum hi Pakai henga giltah a kakatdoh ahitai. Thingin milimdoi kisui hen, hiche dangka hin kitomjol hen. Hijeh chun dangka hi hiche ding chun lepeh kit inge,” ati.
4 Micah-in sum chu anu apeh le, dangka ja ni achoiyin dangka kheng ho apen, amahon milimdoi thingin asuiyin, dangkan atomjol tauve. Hiche doi chu Micah in a akoiyui.
5 Micah hin doiphung tum khat aneiye. Milimdoi phabep asemin. Thempu lenga ban ding jong asemin, achapate lah a khat Thempun apansah-e.
6 Hiche lai hin Israelte lah a leng anaumpoi; mi jouse aning anop a chon cheh ahiuve.
7 Hiche lai hin Judah gamsung Bethlehem khopia Levi gollhang khat anachenge.
8 Bethlehem khoa konin achaovin, chenna ding khochom akiholtai. Chenna ding aholle naa hin Ephraim thinglhang gamsung, Micah ina ahung khai.
9 Micah-in, “Hoiya hung kon nahim?” ati. Levi gollhangpan, “Judah gamsung Bethlehem khoa hungkon, Levi mi kahin, chenna ding kho holle kahi,” ati.
10 Micah-in, “Kei koma chengin lang, thumop dingle Thempun pangin, kum khat sunga tohman din neh le chah, sille chen, chule dangka som khat penang,” ati.
11 Levi gollhangpa chu anomin, Micah chapa bangin achengkhom lhontai.
12 Micah-in Thempun apansah-in, Levipa jong Micah in a achenge.
13 Micah-in, “Levi khat Thempua kineita, ijakai Pakaiyin kadia abol phat ding kahetai,” ati.


THUTAN VAIHOMHO BUNG 18

Micah le Dan phung mite
1 Hiche lai hin Israelte din leng anaumpoi. Israel phung lah a achan diu gam akilah lou laijeh-un, hiche lai hin Dan phung miten achan diu gam akilah lou laijeh-un, hiche lai hin Dan phung miten achan diu gam akihol tauve.
2 Hiti hin Dan phunga miten aphung sunguva mi pasal nga alhengdoh-un amaho hi Zorah le Eshtaol khopi te nia konin achan diu gamsung kholtoh-in asoltauve. Amisolteu Ephraim thinglhang gamsung agei phat’un Micah ina ageh pauve.
3 Micah ina aumpet’un Levi gollhangpa chu akason ahedoh-uvin, anailut’un, “Hikoma ibol, kon hikom nalhut ham?” tin adongtauve.
4 Levipan, “Athempua panga, tohman eipeh dia Micah to kihoutoh kahitai,” tin aseiye.
5 Dan miten, “Kajin nau lolhing ding hinam, Pathen neidoh peh tem’un,” tin asol’uve.
6 Thempupan, “Lung gim dauvin, nakholjinna chan’uva Pakaiyin lhonpi nauvinte,” ati
7 Hijeh chun Dan mite pasal nga chun Laish khopi ajontauve. Akho mite Sidon mite banga lung mongtah a cheng amu’ve. Lung mongtah a um mi, uhpoh eosa bei, kinah kibao neiloute ahiuvin, angaichat jouseu kimsoh ahi. Sidon mite to kigamlat tah, koima dangto kijongto kila to louhel ahiuve.
8 Pasal nga chu Zorah le Eshtaol ahung lhun kit phat’un mihon athilmudoh-u adongui.
9 Amahon, “Hungun, Laish khopi delkhum jengu hite. Gampha tah ahi kamudoh tauve. Mohseh seh-in hikoma umdauvin, kino loiyun! Del lut’in toupha jengu hite.
10 Amun nalhun tengu amiten koimacha gizmo aneilou dol mudoh tauvin nate. Gam lentah, dei le ngai kimsoh, Parthenon napeh-u ahitai,” atiuve.
11 Zorah le Eshtoal khopite nia konin Dan phung mite jagup, galbol din akipandoh tauve.
12 Akitol touvun, Judah gamsung, Kiriath Jearim gal lhum lam a ngahmun asemtauve. Hijeh a chu tuni geiya Dan ngahmun kisahlo ahi.
13 Chukoma kon akitol’un, Ephraim thinglhang gamsung, Micah in ahinphatauve.
14 Hichun Laish khopi kimvel gam ve-lhi pasal nga chun aloiteu jah a, “Hiche in ho lah a in khat sunga khu thing milimdoi kisuiya dangka kitomjol kikoi hea nahitah-um? Doi chom chom le Thempu lengban jong kikoitha ahi. I-lo dia nagel’um?” atiuve.
15 Hiti hin Levi gollhangpa chenna, Micah insunga alut’un, Levipa damle damlou thu adongui.
16 Hichepet hin Dan phung mite sepai jagup, galbol dia gotsa chengse chu kelkot phunga adingui.
17 Gam ve-lhia cheho chu insunga jang jel’in alut’un, thinga kisem milimdoi dangka kitomjolle, doilim chom chomho, chule Thempu lengban chu, Thempupa le sepai jagup kelkot phunga akihou pet’un achomdoh tauve.
18 Micha insunga lut’a hiche thil theng ho agalah-u hin Thempupan ajah-uva, “Ipi bol nahiuvem?” ati.
19 Amahon, “Thip-in, paopoh dan. Hungin Thempu le thumop’in neipanpeh jo’uvin. Pasal khatseh insunga Thempua pan sanga Israel phung khat dia Thempua napanjoh lou ding ham?” tin adongui.
20 Aseiyu hin Thempupa akipasah lheh jengin, thil theng ho chu choiyin amaho to akilhontai.
21 Hiti hin ajite achateu to, anei anga jouse pumpkin, ganchate amahoiyun akitol tauve.
22 Micah in chu gamla tah adalhatauvin, hichun Micah-in aheng akom jouse galbol din akoukhomtai. Ahinla Dan phunga hung galkonte chuto akisutouvin,
23 lhang asap khum jenguve. Ahinla Dan miten Micah jah a, “Ipi hiya mihon hijatpi hung kitol nahiuvam?” atiuve.
24 Micah-in jong, “Isei beh kisa nahiuva, ‘Ipi ham’ natiu ham? Kathempu pui manga, kasemsa doilim jouse pomanga kitol jeng nahilouvu ham? Ipi neikhenpeh beh-um?” ati.
25 Dan phunga miten, “Imacha cha seidan, cajole miho hi naphindoh a nalonvuh lo diu ahi. Chutile nangle na-insung mite nathagamlo diu ahi,” atiuve.
26 Amaho akitol paiyun, Micah-in jong ama thuh jou hoi ahilouje amudoh phat’in akile heiyin inlam ajontai.
27 Dan phung miten Thempupa apuiyuva Micah semsa thil ho apoh mang nungun, akitol’un, Bethrehob to phaicham khat’a umtha, chamle lung mong tah a um Laish khopi adelkhumtauve. Akhosung mite athat’un, khopi ahalvamtauve.
28 Sidon to kigamlat tah, chule midangto kijongto kila to lou ahijeh-un, Laish khopi hu ding koimacha aumpoi. Dan phunga miten khopi chu asemphauvin achenpha tauve.
29 Akhomin jong akehl’un, apu luiyu Jacob chapa, apen nau Dan min aputsah-un, Laish khel’in Dan asah tauve.
30 Dan phung miten hou din milimdoi chu atungdoh-un, Mose tupa, Gershom chapa, Jonathan chu Dan phung din Thempun apangin, achilhahte jong chu sohchan khang geiyin Thempun apangin, achilhahte jong chu sohchan khang geiyin Thempun apangpeh tauve.
31 Pathen houna ponbuh Shiloh a akison laisen, Micah milimdoi jong chukoma chun akitung jing jenge.


THUTAN VAIHOMHO BUNG 19

Levipa le athaikemnu
1 Israelten leng anei masangun, Ephraim thinglhang gamsung lampeh a Levi mi khat anachenge. Amahin Judah gamsung, Bethlehem khoa thaikem din nu-ngah khat akipuiye.
2 Athaikemnu to akitohmon, anumeinu hi apa in lam, Bethlehem khoa ajamin, lha li jen agathamtai.
3 Levipan gajol kit’a hin kipui din athaikemnu henga achei. Alhachapa akipuiyin, sa-ngan ni akaiye. Athaikemnun Levipa hi insunga apuilut’in, anupa pan amu phat’in kipah-in analem’e.
4 Athaikemnu pan nichong dia alho lhojeh-in Levipa hi nithum jen achamtai. Anupa lhonin nekhom le chakhomin, chule ageh khom jing lhontai.
5 Nili lhin nin jingpin athou lhonin che din akigo lhontai. Ahivangin numeinu pan Levipa jah a, “Ol che lhon nan nate, ikhat khat beh nelhonle chun phante,” ati.
6 Apu cha lhonin toukhomin anekhom lhontai. Numeinu pan Levipa jah a, “Tujan jong hikoma nomsel’in choldo kit tadin,” ati.
7 Levipa chu chetei dia adindoh vangin, numeinu pan alho khoh ten phat’in jan khat ageh kittai.
8 Ni nga lhin ni jingpi tah-in che din akigotai; ahinla numeinu pan, “Ikhat khat beh netadin, nilhah lam teng chetan nate,” atin; anekhom kit lhon’e.
9 Levipa le athaikemnu chule alhacha kipatdoh agot’ule, numeinu pan, “Ni lhum pai ding hita, geh kit jengun; kho jing loi ding ahitai; nomin geh khovah jengun, jing teng matah-in thouvun natin, inlam jontauvin nate,” ati.
10 Ahivangin Levipan jan khat ge kit ding adatmon, athaikemnu to, lhacha pa le sa-ngante ni chunga toupha phasan akipatdoh tauve.
11 Jebus (Jerusalem) khopi kom ahung geiyu chu nisa lhum kon cha ahitai; hijeh chun alhachapan, “Hiche Jebus mite khopia hi igepa jenguva itim?” tin apupa adonge.
12 Apupan, “Israelte kho tilouva ki-nga poute,
13 chepaiyu hitin Gibeah ahiloule Ramah kho khatjoh sanga gehpa naute,” ati.
14 Hijeh chun Jebus khopi dalhan akitol paiyun, Benjamin mite gamsung, Gibeah khopi ahinpah-un nisa alhumtai.
15 Gibeah khopi lamka akiheidoh-un, jan geh ding akigouve. Khopi sung lut’in, kholaiya atouvule, koiman jong jan gesah dia in pui agopouve.
16 Kholaiya atoupet’un tehsepu khat loukon ahung vailhungin, masanga Ephraim thinglhang gamsunga chengsa ahin, tua vang Gibeah khopia cheng ahitai. Khosung mi adangse vang Benjamin phunga mi jeng ahiuve.
17 Hiche tehsepu hin maljinpa kholaiya you amun ajah a, “Hoilam kon, hoiche go nahim?” ati.
18 Levipan, “Judah gamsung Bethlehem khoa jin kahiuvin, tua vang Ephraim thinglhang gamsung lampeh in jon kahiuve. Koiman tujan beh eigesah nomlou danu ahin,
19 sa-ngante ni neh le chah, kei le kathaikemnu chule lhachapu neh le chah lhingset’a kipoh kahinauve. Ijakai ngaichat dolse kaneikim’ui,” ati.
20 Tehsepun, “Oh, kei ina hung lhung jengun! Ken gesah nauvinge; kholaiya nageu angaipoi,” ati.
21 Tesepun in lama apuiyin, sa-ngante ni an apei. Ajin hon keng asop’un, an anetauve.
22 Nom asah pet tah-un phot lot louvin khopi sunga mihuh hon in chu ahin umkim’un, kotpi ahinsutauve. Tehsepu jah a chun, “In a nahinpuilut pa chu hinkaidoh-in numei bol’a kabol diu ahi!” atiuve.
23 Tehsepu apotdoh-in ajah-uva, “Ahipoi ule nao! Hitobang chonthanghoi pi hi boldauvin! Ama hi kajinpa ahibouve.
24 Vetau, ama thaikemnu le kachanu pasalto kitimat louhel khat um khu me, amani khu hinpuidoh ing ting, amani khu nanop nop’in boltauvin. Hitobang thilse vang hichepa chunga bol hih beh-un!” ati.
25 Mihuhhon la angaipeh deh pouve. Levipan athaikemnu akaidoh-in ahenguva asondohtai. Jan khovah hel’in kichepnan aneiyun, athang adol’in abol’un, jingkah khovah geiyin atangpouve.
26 Khovah lhah-in thaikemnu ahungin, ajipa ge na tehsepu in kotpibul’a alhutai. Nisa so geiyin hikoma chun akijamdentai.
27 Jingkah chun ajipa thouvin, chepai gon kot ahonleh, athaikemnun kotpibul tuh a, in maiya kijam amudoh-e.
28 Aman jong, “Thouvin chetaute,” atile’ adonbut tapoi. Chuphat’in aman jong along chu sa-ngan chunga avaijamin inlam ahinjontai.
29 In ahung lhunphat’in chemcha alan, athaikemnu tahsa chu hal somle ni a-at lhan, hal khat cheh chu Israel phung som le ni ho khat cheh athot’e.
30 Levipa thaikemnu tahsaphe mu jousen, “Hitobang thilsoh akija khapoi! Israelten Egypt adalhah-uva pat hitobang thil hi asoh kha hih laiye! Ikhat khat ibol tei diu angaiye! Ipi ibol diu ham?” atiuve.


THUTAN VAIHOMHO BUNG 20

Israel galbol got
1 Israel chate jouse, sahlam Dan a pat lhanglam Beersheba gei, niso lam Gilead gamsung geiyin galbol ding anomtauve. Mizpah mun a Pakai angsunga lung khat tah-in akikhomtauve.
2 Pathen mite kikhopna hin Israel phung lamkai jouse apangsoh keiyun, tolsepai jeng jong mihem sang jali alhinguve.
3 Mizpah a Israel phung dangse se kikhop hi Benjamin chaten ajatauve. Israelten, “Thilse hitobang hi itiso mong mong ham?” atiule;
4 athaikemnu asuh lihpeh-u Levipan, “Keile kathaikemnu Benjamin gamsung, Gibeah khopia jan geh din kalut lhon’e.
5 Janin Gibeah khoa pasal hon eihindel khum’un, in ahin umtauve. Kei tha eigot’u ahin, chuin kathaikemnu joh nam nah-in ajonpiuvin athilotai.
6 Along kahinpon, atahsa kasemtel’in, phe hal khat cheh Israel phung somle ni khat cheh a kahin thot ahi. Benjaminte hin ilah-uva thilse tah le jon thanhoi aboltauve.
7 Hikoma kikhom chengse Israel nahi cheh-ui. Hiche hi i-ilo diu hitam?” ati.
8 Japi adingdoh cheh-un, “Ponbuh a cheng hihen in kisajousa cheng hile, ibonchauva koimachan inlam ijot thei louhel diu ahi.
9 Hitia ibol diu ahi: vang san a Gibeah khopi del khum ding mi ilhendoh diu ahi.
10 Israel pasal som lah a khat khat chu sepaite anthah a panga, adangsen, Israel sunga hitobang jon thanhoi bol, Gibeah khopi agabol chah diu ahi,” atiuve.
11 Hiti hin Israel pasal jouse, Gibeah khopi delkhum din lung kitoh tah-in apangkhomtauve.
12 Israelten Benjamin gamsung pumpia mi asol’un, “Ipi dia hitobang melse thil bol nahiuvam?
13 Gibeah khopi sunga mihuhho thadoh a, Israel lah a thilse paidoh theina din, neipedoh-un,” atisah-ui. Ahinla Benjaminten Israel dangho thusei ngaisah-in aneipouve.
14 Israel dangho to kisat din Benjamin gamsung khopi jousea konin Gibeah khopia ahung kikhomtauve.
15 Hiche ni hin akhopi chengseuva konin sepai sang somnin le sang gup akoukhom’ui.
16 Hicheng tilouvin Gibeah khosunga, lhentum cheh, khut veilong, pasal ja sagi jong ahinalaiyui. Amaho hin songbom manga, thil samjangte jong sep khel louhel ahiuve.
17 Israel dang hon hilthemsa cheh sepai sang ja li akhomdoh-ui.

Benjaminte douna gal
18 Israelte chu Pathen houna mun Bethel’a acheuvin, Pathen henga, “Koiphung pen hin Benjaminte adelkhum masah ding ham?” tin adongui. Pakaiyin, “Judah phung kon masa hen,” ati.
19 Israelte ajing jingkah-in akipat’un Gibeah khopi koma ngahmun asemtauve.
20 Benjamin sepaite delkhum gon, sepaiho chu Gibeah khopi lam ngan agoltoh tauve.
21 Benjamin sepai ho jong khopia konin ahung kitoldoh-un, nisa lhum masangin Israel sepai sang somni le sang ni athat tauve.
22 Chuphat’in Israelte Pathen houna mun, Pakai angsunga acheuvin, nilhah geiyin pul adouvui. Pakai koma, “Kasopiteu Benjaminte sat dia kakon kit diu ham?” tin adongui. Pakaiyin, “Kon’un,” ati.
23 Hichea hin Israel sepaite akitildoh kit’un, ni masa nia apansahnau mun ma ma chun sepaite agol kit tauve.
24 Hiti hin anivei nan Benjamin sepaite adelkhum kittauve.
25 Anivei nan jong Gibeah khopia konin Benjamin sepaite ahung kitoldoh-un, Israel sepai hilthemsa cheh sang somle sang get athat’uve.
26 Israel pumpi Bethel muna akitol touvun alunghem tauve, Bethel a hin Pakai angsunga nelou chalouvin, nilhah geiyin atouvui. Pakai angsunga pumgo thilto kilhaina le kiloikhom thilto kilhaina agouvam’ui.
27 Hiche laiya hi Pathen kitepna thingkong chu Bethel a um, Aaron tupa, Eleazar chapa, Phinehas thingkong chinga pang ahi.
28 Mipin Pakai henga, “Kasopiteu Benjaminte kagasat kit diu ha, ka-ngah diu hitam?” atiuve. Pakaiyin, “Gasat’un. Jing teng nangho josah tauvinge,” ati.
29 Hichun Israelten sepai phabep Gibeah khopi vel’a asel’un,
30 abanjop’in, nithum lhin nin jong Benjamin sepaite delkhum din, masanga abol bangun, Gibeah khopi lam ngan sepaite agoltauve.
31 Benjamin sepaite amaho to kisat dia ahung kondoh phat’un khopia konin apui mangtauve. Masanga bangin gamvalai, Bethel lampi dungle Gibeah lampi dunga Israel sepai phabep athat kittauve. Hichea jong hin Israel sepai somthum tobang athat’ui.
32 Benjamin sepaihon, “Amasate nia banga ijokit thou thouvu hiya hi,” atiuve. Israelten la khopia kona pui manga, lamlhang dunga puidoh ding gontohsa akoiyu ahibouve.
33 Israel sepai honpi kiletol’a Baaltamar akikhop kah-uvin, Gibeah khopi kimvel’a pang Israelte chu phulou helouvin khopi kimvel, akiselnau songko dunga konin ahung lhaidoh tauve.
34 Israel lah a lhentum sepai sangsomin Gibeah khopi anokhum’un, akihasat lheh tauve. Israelten asuhgam diu lam Benjaminten ahedoh hih laiyui.
35 Pakaiyin Israelte chu Benjaminte sangin ahatsah tai. Hiche ni hin Israelten Benjaminte sang somni le sanga nga to ja khat athat’un,
36 hichun Benjaminten jong gal alel diu ahetauve.

Israelte galjo dol
Israel sepai honpi Benjaminte masanga akiletol’u chu, Gibeah khopi kimvel’a asel’u sepaite chunga kinem ahiuve.
37 Hiche asel’u sepaite hin Gibeah khopi adel lut loiyun, khopi sunga akithe thangun mai phah phah athat’uvin ahi.
38 Israel sepai honpi le asel’u sepaihon kihettona khat anasemsau ahi. Mipin khopi sunga kona meikhu kijel let lut amu tengu,
39 lamlhang dung, galmuna Israelte chu hung kilehei kit diu ahi. Hiche kah a hi Benjaminten Israelte chu hung kilehei kit diu ahi. Hiche kah a hi Benjaminten Israel sepai somthum jen anatha man’u ahi, Benjaminten, “Amasa banga ijo kit thou thouvu hiya hi,” atiu ahi.
40 Hichun kihettona, melchihna meikhu, khopia kon kitungdoh chu amutauve. Benjaminten nunglam avet’ule, khopi pumpi meikouva leng jeng chu adatmo lheh jengtauve.
41 Chutah-in Israelten alenoule, Benjaminten chu min athagam diu ahetdoh phat’un, kichan akisunoh dentauve.
42 Israeltea kona gamchang noi adel vangun ajamdoh thei tapouve. Israel sepai honpi le khopia hung kondoh sepaite kah a kinong den’un, Israelten asu gamhel tauve.
43 Amelmateu chu Israelten alhem lhauvin, tang louhel’in adel’un, Gibeah khopi niso lam geiyin, achepum pumin athatpeh-ui.
44 Benjamin sepai lhentum cheh, sang somle sang get athat’uve.
45 Adangse vang ajam’un, gamchang noi adel’un, Rimmon songko ajontauve. Lampia mi sang nga athat den’uvin, Israelten adel del jengun, Gidom geiyin sangni athat kit’uve.
46 Hiche nikho hin sepai hang lai cheh, Benjaminte sang somni le sang nga athat’uve.
47 Pasal jagup vang, gamchangnoi, Rimmon songko langa ajamdoh-un, songkoa chun lha li jen atham’ui.
48 Israelten Benjaminte adangse se, numei pasal, gancha ho geiyin athat gamtauve. Gamsunga khopi jouse jong ahalvamsoh hel’ui.


THUTAN VAIHOMHO BUNG 21

Benjamin mite ji ding
1 Mizpah a akikhop’un Israelten Pakaiya giltah-in kitepna aneiyun: “Benjaminte dinga ichanu’u ipeh louhel diu ahi,” anatiuve.
2 Tun Israelte Bethel’a acheuvin, hikoma hin nilhah geiyin Pakai angsunga atouvui. Othongje jun, laina tah-in lunghemin akap’ui,
3 “Vo Pakai, Israel Pathen! Ibol’a hitobang thil soh hitam? Israel lah a Benjamin phung mang ding hitam?” atiuve.
4 Ajingin jingpi tah-in mipin maicham khat asem’un, kiloikhom thilto le pumgo thilto kilhaina abol’un,
5 “Mizpah mun, Pakai angsunga kikhopnia panglou Israel phung lah a khattou um kham?” tin aholtauve. Hiche nia chu hiche kikhopna pang lou lou tha dia giltah a kihouna ananeiyu ahi.
6 Israelten asopiteu Benjaminte alung natpiuvin, “Tunin Israel phung lah a khat amangtai.
7 Benjamin pasal hingdoh ho ji ding iti iholpeh diu hitam? Ichanu’u peh louna dia Pakaiya giltah a kitepsa ihitauve,” atiuvin ahi.
8 Mizpah muna kikhopna panglou Israel phung lah a aholnauva Gilead gamsung, Jabesh khoa kona koima hung lou amudoh-ui;
9 sepaite min akou nauva Jabesh khoa mi hung lou anahi.
10 Israel khoppin pasal gal-hing cheh sangsom le sang ni asol’un, “Jabesh khoa mihem, numei pasal, chapang geiyin gathat gam’un,
11 pasal jouse le pasalto kitimatsa numeiho abonchan sugamhel’uvin,” atiuve.
12 Ama vang Jabesh khopi sunga hin pasalto kitimat loulai nu-ngah khangdong jeng ja li amandoh-un, Canaan gamsung, Shiloh ngahmuna ahinpui lut tauve.
13 Israel khoppi pumpin Rimmon songkoa um Benjaminte henga chamna ding thu athot tauve.
14 Benjaminte ahung kile kit’un, Israel dang hon Jabesh khopia ahing hoiyu nu-ngahho chu apeh-ule achang tapouve.
15 Israel phung sunga Pakaiyin Benjaminte akeh lhah jeh hin mipin avoujang natpi lheh jengui.
16 Khoppi lamkaihon, “Benjamin phunga la numei abeitan, ahing nalai pasal, numei chang louho ji hoilam ihol diu ham?
17 Israel phung khat manda le phante. Benjamin phunggui jopmat teina ding lampi ngaito ding ahin,
18 ichanuteu Benjaminte to kichensah pen pen gaosap chang dia giltah a ikitep jeh-unla ichanuteu to kichensah theipoutin,” atiuve.
19 Hichun, “Shiloh a kumseh le Pakai dia kut kibolji khut phat hivah ding ahitai,” atiuve. Shiloh hi Bethel sah lam, Lebonah lhanglam, Bethel le Shechem kah lampi niso lam ahi.
20 Benjaminte jah a, “Cheuvin lengpi leiya kisel’in,
21 ngah-un, Kut a lam dia Shiloh kho nu-ngah ho ahung tengle, lenpileiya konin hung potdoh-un lang, nu-ngahho lah a khat cheh chu thahatsanin, ji din, Benjamin gamsunga kilhoh lut jengun.
22 Apate auteuvin nahung jahdaule, ‘Neilahpeh dauvin, ji dia gal hatman a kalah-u ahipoi. Neipeh-u ahiloujeh chun nakitepnau sukeh a mochang thei nahipouve’ tin seiyuvin,” atiuve.
23 Benjaminten hiti chun abol’un; Shiloh a hung lam nu-ngah ho lah a chun ji ding khat cheh akilhoh mangtauve. Agamsungu akijot’un, khopiho akisem phat’un achengtauve.
24 Israelte adangse jong, ama ama phung cheh le a-insung cheh, chule agam leiset cheh a akile kit tauve.
25 Hiche lai hin Israelten leng aneipouve, mitin adei bangin achon cheh-uve.