RUTH LEKHABU

Thupatna
Lungmon umtah Ruth lekhabu hi thuboi laitah, Thutan vaihomho lekhabu kijih laiya kisun ahi. Moab numei Ruth hi Israel pasal to kitchen ahi. Ajipa thi nungin Ruth hin seithei louhel’in atehpi Israel numei koma kitahna aneiyin, Israel Pathen henga giltah-in akipei. Akhon nan ajipa inkote lah a jithah khat akimun, hichepa to akichenjah hin Israel leng loupipen David piluiyin apan khai.
Thutan vaihomho lekhabua hin Pathen miten Ama adalhah tengu achunguva chuji manthahna aseiyin, Ruth lekhabua vang Israel Pathen heng hinjon gamchom mi khat vangboh chandol aseiyin, chule kitahtah amite lah a simtha ahidol aphonge.

Asung thu hopken
Ruth puiya Naomi Bethlehema hung kite kit 1:1-22
Ruth-in Boaz akimupi 2:1-3:18
Boaz-in Ruth akichenpi
———————————————————————————————

RUTH LEKHA BUNG 1

Elimelech li ainsung min Moab ajot’u
1 Masanglai, Israelten leng anei masangun, gamsung kel alhai. Judah gam, Bethlehem khopia cheng, Ephrath phunga mi, Elimelech chun ajinu le achapate ni, Mahlon le Chilion puiyin, Moab gama chom khat khopem din achei.
2 Moab gama chen laiyun
3 Elimelech athin, ajinu Naomi meithaiyin aumin, achapate ni toh aumtauve.
4 Acha te nin Moab nu-ngah kitchen pi lhonin, amin lhon Orpah le Ruth ahi. Kumsom nungin
5 Mahlon le Chilion jeng athitan, Naomi chu ajipa le achapte nin athisantauve.

Naomi le Ruth Bethlehem jot
6 Chom khat jouvin Pakaiyin amite vang boh a neh le chah apeh thu Naomi ajatai; hijeh chun amoute ni puiya Moab gam dalhah agotai.
7 Judah gam jon din ahung kipatdoh tauvin, lampia chun
8 Naomin amoute ni jah, “Inlam jon kit lhonin nanute ni dia naphatna lhon bangin Pakaiyin khoto lhonta hen,
9 Pakaiyin ji neisah kit lhon hen lang, in chensah lhon hen,” ati. Kikhepi din Naomin amoute ni beng achoptai. Ahinla amani akap lhonin,
10 Naomi jah a, “Kanompoi! Lhonu hitin namite lah a kahungjoh ding ahi,” ati lhone.
11 Naominla, “Kile kit tei lhonin kachate ni; india neilhonpi nom lhon ham? Nangni ji ding chapa neikit dia neigel lhon ham?
12 Inlama kile kit lhonin, jithah neidin kateh behseh tai. Kinepna neiyin, ji neikit’a tujan tah a chapte hing ding hijong leng,
13 akhan lhit geiyuva ngah ding mong nahi lhon ham? Ahipoi kachate ni, ahithei louhel ding nahet lhon ahi. Pakaiyin eidoujal’in, nangni din kalung gim’e,” tin aseitai.
14 Amoute ni akap kit lhontai. Orpah-in kikhenpi din atehpi beng achop-in, inlama akile kit’in, Ruth-in vang akolchah tai.
15 Hijeh chun Naomin Ruth jah a, “Nasopinu jong akile kit’in, amite le a-pathen heng ajontai. Ama khuto lhontan,” ati.
16 Ahinla Ruth-in, “Nang dalha din neisol hih beh-in! Neilhonpin. Nache chenaa cheng ting, nachen chenna kachen ding ahi. Namite kamite hiya, na-Pathen ka-Pathen hiding ahi.
17 Nathi thina kathia, nakivui vuina kivui ding kahibouve. Thinan eikhen tilouva kakikhenpi khah le, Pathen lunghan nasapenin eilhun khum jeng hen!” ati.
18 Ruth-in lhonpi tei agot amudoh phat’in, Naomin ima aseitapoi.
19 Bethlehem geiyin ache lhonin, alhun lhon phat’in, khothing akiloh jengun, numeihon, “Hichenu Naomi himon mong haimon? Atiuve.
20 Namoin, “Naomi neiti dauvin, Marah neitijo tauvin; ajeh chu Hatchungnung Pathenin hin genthei tah-in eihinsah tai.
21 Ning lhengset a hikom dalha kahin, Pakaiyin khut goh keovin eihinle puitai. Hatchungnung Pakaiyin eipaiya gim hesoh eithohsah ta, idia Naomi neiti neh laiyu ham?” ati.
22 Hita hi Naomi, amounu Moab numei Ruth puiya, hung kile kit ahi. Bethlehem ahung lhun lhon hin sakolchang at akipantai.

RUTH LEKHA BUNG 2

Boaz louva Ruth natoh
1 Naomin ajipa Elimelech inkote Boaz kiti, haotah le neitah, kinaipi khat aneiye.
2 Nikhat Ruth-in Naomi jah a, “Lou laiya chang-at ho dalhah changkhai gachom tange. Eigoi nom khat mudoh tei ding kakinem’e,” ati, Naomin, “Konin kanao,” ati.
3 Ruth jong louva akonin, chang-at ho nunga achen, changkhai ho achomtai. Changkhai achom chun Boaz loulai ahung cah lut khai.
4 Chom khat jouvin Bethlehem khoa konin Boaz jong ahung lhungin, natongho alemin, “Pakaiyin umpiuvin,” ati. Natong hon, “Pakaiyin vang boh-in,” atiuve.
5 Toh lamkaipu jah a Boaz-in, “Hiche nu-ngah khu koiham?” ati.
6 Toh lamkaipun, “Naomi to hung lhon gamchom nu-ngah khat ahi.
7 Natongho nunga changkhai kichom din athumin, jingkah a pat tang louhel’in na atongin, tubep a chu thinglim a choldo ahi,” ati.
8 Hichun Boaz-in jong Ruth jah a, “Thu khat seipeh inge. Hiche loulai tilou mun danga changkhai gachomdan. Hikoma numeiho la a na tongin;
9 achang-at melchih-in, kikhen kangpi dan. Pasal hon nadaichatvai louna diuvin kaseipeh tai. Nadangchah teng atwibel’uva khun gadon jengin,” ati.
10 Ruth chun tol’a mai sulut hel’in akunin, Boaz henga, “I-bol’a neihiti khohsah a, gamchom mi kei hibanga neikhoto hitam?” tin adonge.
11 Boaz-in, “Najipa thia pat natehpi nabolna jouse kajatai. Hahsa tah a nu le pa, nagam leiset dalha, nahet khah louhel mite lah a cheng dia nahung jeng jong kahetai.
12 Natohman Pakaiyin petei hen. Alim bel’a nahung, Pakai Israel Pathen koma mu ding tohman lhingset naneiye!” ati.
13 Ruth-in, “Neikhoto lheh jenge, kapu! Nasohte khat beh tojong kibang kahilou vangin, nemheova neihoule nom kasa chom lheh jenge,” ati.
14 An neh phat’in Boaz chun Ruth jah a, “Hugin changlhah hal khat beh hung nen, kongphal’a hin kidekot’in,” ati. Ruth jong natongho lah a atoule, Boaz chun bu minsa phabep agah pei. Ruth-in oivaset’in anen, neh moh anei nalaiye.
15 Changkhai chom dia akipatdoh kit nungin, natongho jah a Boaz hin, “Changphal alhuh lhuh a kise jong dalhah peh-un, phoh hih-un.
16 Hiche keo hilouvin, changpal pha lai lai jong dodoh peh-un, kichomsah tauvin,” ati.
17 Hiche loulaiya hin Ruth-in changkhai achom nilhumin, achil lhah le, kilogram som jen achomdoh-e.
18 Ruth-in chang chu khosunga apolut’in, achomdoh jat chu atehpi avetsahtai. Aneh moh an jong atehpi apei.
19 Naomin, “Chang hijatpi hoiya nagachomdoh ham? Koi louva kon nahim? Nathanoppi pa chu Pathenin vang boh hen!” ati. Ruth-in Naomi koma, Boaz louva na agatoh aseipeh tai.
20 Naomi akichomjah jengin, “Boaz chu Pakaiyin vang boh hen! Pakaiyin thile hing chunga athutep anit jing monge. Boaz hi ikinaipiu, inko ahin, eikhohsah lhon lah a khat ahi,” ati.
21 Ruth-in, “Aphapen khat chu, chang-at kichai geiya anatong ho changkhai kachom chom jeng din aseiye,” ati.
22 Ruth jah a Naomi, “Ahinai kanao, Boaz louva numei ho lah a na natoh ding aphajoi. Midang louva konle chun nadai thang get’unte,” ati.
23 Hiti hin sakolchang le suhlou chang at jou kahsen, Ruth-in Boaz louva numeiho koma na atongden tai. Ruth chu atehpi to acheng jinge.

RUTH LEKHA BUNG 3

Ruth-in jipa akimu
1 Chom khat jouvin Naomin Ruth jah a, “Ki-innei theiya naumna dia ji kaholpeh tei ding nahi.
2 Anumeiho to na natohkhom jing Boaz kitipa hi i-inkou ahi, sumil hih-in. Tu nilhah le sakolchang aden ding ahi,
3 Kisil’in, lou namtui kunin, von hoipen kivonin; achangphol a gachen, neh le chah achaisoh masangin na-umlam kihetsah dan.
4 Alupna melchih jingin, a-ihmut teng, aponsil hohdoh-in akengtoa galumin. Chuteng ipi nabol ding nahiltante,” ati.
5 Ruth-in, “Nasei jouse gabol nange,” ati.
6 Ruth chu changphol’a achen, atehpi sei bang bangin agaboltai.
7 Boaz hin neh le chah achaisoh phat’in nomtah-in aum’e. Sakolchang lhuh lah a chun agalumtai. Ruth jong guhthim chan akithol lut jel’in, pon hohdoh-in, akengto dop’a agalumtai.
8 Janin Boaz akinkhangin, akiheile akoma numei khat lum amun adatmo lheh jenge.
9 Boaz-in, “Koi nahim?” ati. Ruth-in, “Ruth kahi kapu! Kinaipi tah inko nahijeh a neikhohsah ding dol kahi. Lungset’in neikichenpin,” ati.
10 Boaz-in, “Pakaiyin phatthei boh hen! Natehpi nagimpi sangin, insungdol’a thil nasa cheh nabol kittai. Hao hen vaile, gollhang nakihol thei ahin, naholpoi.
11 Chuti ahile lungkham hih-in Ruth. Naseichan bol nange; numei pha nahi, kho mite ahesoh tauve.
12 Kinaipi tah le nang khohsah dingdol kahinai, ahinla kei sanga kinaipi cheh khat naneiye.
13 Tujan geh khovah denim, jingkah teng ama chun nang khohsahna kin abol ding abol lou ding phochen nate. Nakhoh sahnah dingle aphai; nakhohsah lou ding bangle, Pathen hing jing min kitep kahi, nang khohsahna kin kaboltei tei ding ahi. Tun lumin jingkah geiyin umtan,” ati.
14 Ruth jong Boaz khoto dop a ageh khovah-in, chukoma agache chu Boaz-in midang khatcha ahetsah nom loujeh-in, Ruth jong koiman amu thei louna din khovah lhah masangin athoutai.
15 Boaz-in Ruth jah a, “Hikoma napon phan,” atin; apha leh, Boaz-in sakolchang kilogram somni jen asunlhah peh-in, achun jouvin alengkouva adop doh pehtai. Sakolchang pon Ruth chu khosunga ahung kile kittai.
16 In ahung lhun phat’in atehpin Ruth jah a, “Kanao, ito nagabah hinam?” ati. Ruth-in Boaz-in abolpeh jouse aseipeh tai.
17 “Nahenga khutkeova kahung ding adan, sakolchang hijatpi hi eihinpohsah ahi,” ati.
18 Naomin Ruth jah a, “Ruth, hiche hi itobanga hung umdoh ding hi ngah hat tan. Boaz hin hiche thu hi achai kahsea tunia choldo louhel ding ahi,” tin aseiye.

RUTH LEKHA BUNG 4

Boaz-in Ruth akichenpi
1 Boaz chu khopi kelkotphung, kikhopna muna agatoutai. Hichepet tah hin Elimelech kinaipipen tah, Boaz chu ahung khel khel’in, Boaz-in “Golpa, hikoma hung toutemin,” ati. Ama jong agatouve.
2 Boaz chun khopi sung lamkai som agakouvin, amaho jong you din a-ngeh tai. Atousoh phat’un,
3 Boaz-in, a-inkopa jah a, “Moab gama konin Naomi ahung kile kittan, i-inkopau Elimelech loumun chu ajoh nomtai;
4 nangin jong vang heteiyin nate tin kagel’e. Hiche loumun khu nachoh nomle, hikoma toucheng angsunga hin cho jengin. Nachoh lou dingle seiyin, ajeh chu chohna thei nei chu amasa nang nahin, kei naban a kahi,” ati. A-inkopan, “Kachoh ding ahi,” ati.
5 Boaz-in, “Apha lheh jenge; amavang Naomi loumun nacho le, loumun chu mitipa insung mina aum jing theina dia, Moab numei meithai Ruth jong nachoh tha ding ahi,” ati.
6 A-inkopan, “Chuti ahiding vangle kachoh theina chu lha tange, ajeh chu kachaten niche loumun chu alothei deh lou diu ahi. Kichoh tan, kenvang chohda tange,” ati.
7 Chulaiya thille lo jordan le kilheh ding dan chu, thil joh chun kengchot sut’a achopa apeh ding dan kisem ahi. Hitobanga chu Israelten thu anachaijiu ahi.
8 Hijeh chun a-inkopan Boaz jah a, “Kichoh tan,” ati chun kengchot asut lhan Boaz apei.
9 Hichun Boaz hin lamkaite le adang ho jouse jah a, “ Tunia nabonchauvia hettohsah a pang nahiuve. Elimelech le achate ni Mahlon le Chilion neile gou jouse Naomia kona kachoh ahitai.
10 Hicheng chungvuma hi Moab numei Ruth, Mahlon dalhah meithainu jong kaji ahitai. Niche hin neile gou jouse mithipa insung mina koiya, chule niche khosung mite lah a a-insung gui kijopmat ding ahi. Hiche thua hi nangho tunia hettohsah nahiuve,” ati.
11 Lamkai chengse le adang hon jong, “Adih-e, keiho hettohsah a pang kahiuva, Pakaiyin najinu chu Jacob dia chapa le nao tampi hinpeh Rachel le Leah to bahsah hen. Nang jong Ephrath phung sunga hao theiyin lang, Bethlehem khopia jong min thangin.
12 Hiche numei khangdong cha kona Pakaiyin napeh ding chate jong chun na-insung hi, Judah le Tamar chapa Perez insung bahsah-u hen,” ati.

Boaz chule achilhahte
13 Boaz-in Ruth chu ji din inlama apuitai. Pakaiyin Ruth phatthei aboh-in, amanu gaiyin chapa khat ahingtai.
14 Numeihon Naomi jah a, “Pakai vahchoiyin! Pakaiyin tunin nakhoto thei tupa khat napetai. Hiche naosen chapang hi Israel lah a minthang hen!
15 Namou nun nalungset’in, chapa pasal sagi sangin aphachomtai. Tupa khat nahinpeh-in, amahin hinjousah-in natin, nateh teng jongle lungmon sah tante,” atiuve.
16 Naomi naosen akilah-in, akolchah jingin, adonin apangtai.
17 Aheng akom hon naosen min chu Obed ahisah-ui. Miho jouse henga, “Naomin chapa khat ahingtai!” atiuve. Obed hi Jesse pa ahin, Jessi David pa ahi.
18 Perez a pat David gei insung hitia kijopmat ahi: Perez hi Hezron pa ahin,
19 Hezron chu Ram pa, Ram chu Amminadab pa,
20 Amminadab chu Nahshon pa, Nahshon chu Salmon pa,
21 Salmon chu Boaz pa, Boaz chu Obed pa,
22 Obed chu Jesse pa, chule Jesse chu David pa ahi.