2 CHRONICLES KITI THUSIMBU NINA

Thupatna

Thusimbu nina hi Thusimbu masa kichaina kipan pai, lengpa Solomon lengvaipoh a pat athi gei thusim ahi. Lengpa Solomon khel achapa Rehoboam douna Jeroboamin sahlam gamkai phung mite apuiya gal abol’uva pat, thusim kisei hi lhanglam Judah lenggam thusim jeng, Christa pen masang kum 586 kuma Jerusalem khopi chim gei thusim kisei ahi.

Asung thu hopkhen
Solomon lengvaipoh 1:1-9:31
Kipattil kum ho 1:1-17
Houin kisah 2:1-7:10
Kum nukhah cheng 7:11-9:31
Sahlam phung mite galbol 10:1-19
Judah lengte ho 11:1-36:12
Jerusalem khopi chim 36:13-23

THUSIMBU NINA BUNG 1

Lengpa Solomonin chihna athum
(1 Kgs 3:1-15)
1 Leng David chapa Solomonin Israel lenggam atuh chah-in, Pakai a-Pathen vangboh jal’in athanei lheh jengtai.
2 Lengpa Solomonin sepai aloi loi, sang khat cheng, ja khat cheng lamkaiho le vaipo thuneiho, insung upa chengse chule mipi dang jouse jong thu apen,
3 Gibeon mun a Pathen houna muna amato kilhon cheh din aseiye. Pakai lhacha Mose’n gamthip noiya asemdoh Pakai chenna Kitepna thingkong chu hikoma akoijeh-uva, hikoma chu cheuvah ahi.
4 Ahivanga hiche Kitepna thingkong hi lengpa David-in Kiriath Jearim khoa pat ahinpoh doh a akoina dia asem ponbuh sunga chu Jerusalem khopia akoiyu ahitai.
5 Hur tupa, Uri chapa Bezalel semdoh sum-eng maicham jong chu Gibeon kho, Pakai chenna ponbuh masanga chu anakoiyu ahiye. Hikoma chun lengpa Solomon le mipin Pakai agahouvui. .
6 Ponbuh maiya chun lengpan sum-eng maicham chunga kilhaina gantha abol’in Pakai ahouve; gancha sang khat jen athat’in apumin agouvamsoh hel’e.
7 Hiche jan chun Solomon henga Pathen ahung kilah-in, “Ipi peleng nadeiyam?” tin adonge.
8 Solomonin, “Itih-in jong kapa David nalungset jingin, tun ama khel’in leng neichansah tai.
9 Vo Pakai Pathen, kapa henga natepsa chu molson. Sim joujai lou mihem hijatte chunga leng neihisah-in,
10 hijeh chun amaho kavaihom theina din ka-ngaichat khohpen chihna le hetna neipen. Achutilou le namite hijatpi hi iti kavaihom jou ding ham?” ati.
11 Pathenin Solomon jah a, “Nadeilhen hi thildih tah ahi. Neile gou, minthan le namelmate thi ding ham ahiloule nahinsotna ding ham kithumjo louvin, aleng diuva kapansah kamite chunga navaihom themna dinga chihnale hetna nathumjoi.
12 Chihna le hetna peng ting, achung chon a haona le minthanna, leng dang koiman anei khah louhel, khonung jongle hung um kha louhel ding, jong kapeh tha ding nahi,” ati.

Lengpa Solomon thaneina le haona
(1 Kgs 10:26-29)
13 Solomonin Gibeon a Pakai chenna ponbuh dalhan Jerusalem a ahung kilen, Israelite lengin apangtai.
14 Kangtalai sang le ja li asemin, sakol sepai sang som le sang ni aphutdoh-e. Niche ho abang bang in Jerusalem a akoiyin, adangse vang khopi dang hoa ahomkhensoh keiye.
15 Solomon lengvaipoh laiyin Jerusalem khopia dangka le sana song tamin atam jengin, cedar thing jong theipi thing jat aphai.
16 Lengpa thalhenga pang hon Musri le Cilicia gama sakol hung kitol ho athu thun abol’un,
17 Egypt gama kangtalai hung kitol ho jong avetoh dim dem’ui. Syria lengte le Hit lengte henga sakolte le kangtalai ho ajoh-un, kangtalai khat dangka jagup’in chule sakol khat dangka jakhat le som ngan ajoh-ui.

THUSIMBU NINA BUNG 2

Houin sahna dia kigotna
(1 Kgs 5:1-18)
1 Pakai houna ding Houin khat lengpa Solomonin sah agon, ama chenna ding leng inpi khat jong sah agoi.
2 Inthil lhoh gunset din mihem sang som sagi agoiyin, song kheng din mihem sang som get agoiye. Natoh vetup din mi sang thum le jagup apangui.
3 Tyre lengpa Hiram henga Solomonin thu athot’in, “A-leng inpia pang ding kapa lengpa David cedar thing ho nachohsah bangin, keijong neichohsah-in lang thil kilato hite.
4 Pakai ka-Pathen jabolna din Houin khat kasai. Hiche Houin chu muntheng hiya, kamite to Pakai houna gimnamtui kalhutnamna diu, tantih beiya changlhah theng katouva, jingle nilhah a pumgo thilto kapehna diu, choldo nikhole lhathah kutni, nitheng dang danga jong Pakai ka-Pathenu houna kaneina diu mun hinante. A-itih geiya hitia bol dia chu Israel thu apeh ahi.
5 Ka-Pathenu hi pathen dang sanga nasajo ahijeh a Houin nasa tah khat sah kagot ahi.
6 Amavang koiman Pathen din Houin sajou ponte, ajeh chu van pumpkin jong dolponte. Pathen dia gimnamtui lhutnamna ding tilou ija pang dia Houin kasah ding ham?
7 Hijeh chun thil jemthemtah, sana, dangka, sum-eng le thih kheng them, pondum le asandup, chule asan khong them mi jong neipen. Ama chun kapa David lhendohsa Judah le Jerusalem a khut them ho to tongkhom nante.
8 Nathingthembolte khut thep kahei, hijeh chun Lebanon lhanga cedar thing, thinggi, chule juniper thing tum neihintol peh-in. Thil tol’a namite kithopi din kamite gonsan koiying ting,
9 thing tampi ahintol got tengule kithopisah nange, ajeh chu kasah got Houin hi lentah le loupi tah hi ding ahi.
10 Thingbol a pang namite neh din, suhlou chang atena dim sang som ni, sakol chang atena sang som ni, lengpitwi litre sang jali, olive thao litre sang jali hinthot nange,” ati.
11 Solomon donbutnan lengpa Hiramin lekha athot’in, “Amite angailut jal’in Pakaiyin alengun napansah tai.
12 Pakai Israel Pathen, Van le Leiset Sempa vahchoiyin umta hen! Aman lengpa David chu chapa chingtah, ima hethem, thilbol them, tua Pakai ding Houin le achenna ding leng inpi kisagoa hi apei.
13 Miching le khut themtah Huram kahinsol peh-e.
14 Anu hi Dan phunga mi ahin, apa vang Tyre gamsung mi ahi. Huram hi sana le dangka, sum-eng, thih, song khen le thing thembolje themtah ahi. Pondum le ponsandup, ponsan chule tupat ponnem geiyin akhong theiye. Ipi hijongle asem theiyin, ipi lim hile akivetsah chan asem theiye. Namite khut themho to chule napa, David lengpa natong ho to tohkhomsah-in.
15 Hijeh chun natepsa suhlou chang, sakolchang, lengpitwi le olive thaotwi ho chu hinthot tan.
16 Lebanon molsanga cedar ho nadeijat jat phuh ung ting, pumin hintol’ung ting, Joppa geiyin hinthah nauvinge. Joppaa konin Jerusalem langa kilhoh tan nate,” ati.

Houin sah kipat
(1 Kgs 6:1-38)
17 Apa David mijat sim tobangin, lengpa Solomonin jong Israel gamsunga cheng gamchom mite asimle, sang ja khat le sang som nga le sangthum to jagup alhinguve.
18 Hijat lah a hin sang som sagi inthil lhoh din apansah-in, sang somget molsang, songkol dunga song kheng din apansah-in, sangthum le jagup chu natoh vaipon apansah-e.

THUSIMBU NINA BUNG 3

1 Lengpa David, Solomon pan Houin mun ding agonsa ahitai. Jerusalem khopi, Moriah molvum, Jebus mi Araunah changphol chu ahi. Lengpa Solomonin in asapanin
2 akipatna chu leng achanjou kum li lhin, lha nina ahi.
3 Lengpa Solomon Houin sah chu adung metre somni le sagi, avai metre ko alhinge.
4 Hongcha chu Houin vai lhunga kihoi ahin, metre ko ahi; asan vang metre som nga le li ahi. Indian sunglamse vang sana aloijol’un,
5 indian lenpa chu cedar thingin akitomin, thingpeh chunga tumthing lim le sumgui lim akisem’e.
6 Lengpan Houin chu song mantam hoisel sel’in ajemin, Parvaim gama hung kitol sanan jong ajem’e.
7 Houin bang, insunho, lhong dung chule kotpi jouse sanan atomjolsoh keiye. Bang dunga chun khut themhon Vantil lhanei lim ajem’ui.
8 Muntheng chungnung kiti, indan sungnung chu metre ko sao, metre ko ma len, Houin vai tebep chu ahi. Muntheng chungnung bang dung loijol nan sana talent jagup jen alut’e,
9 thingkil dia kisem sana jeng jong shekel som nga alhingin, indian chungnung bang dung jong sana jengin aloijol’ui.
10 Lengpa natong ho chu Vantil lhanei ni lim thih-in akhensah-in, sanan atomsah-in, Muntheng chungnunga chun akoisah-e,
11 hikoma chun kotphung jetle veiya atungin akivettosah-e.
12 Lhaving ni cheh aneiyin, lhaving khat sao chu tong nga ahin, lha ajaldoh chun indan kimlai tah akisuton,
13 alang khat lhaving cheh-in bang asun, metre ko sung chu akhah khong lhon’e.
14 Muntheng chungnung daltanna din pondal tupat ponnem le pat dangin akikhongin, adumle asandup, chule asanin akibumin, Vantil lhanei lim akijempolsoh keiye.

Sum-eng khomte ni
(1 Kgs 7:15-22)
15 Lengpan khom ni asemin, khat chu metre som le nga to akeh sang ahin, Houin maiya atung’e. Khom khat lujum lai chu tong nga asangin ahi.
16 Khomte ni lubuh a chun sumkol akikhaiyin, kolbuthei lim jakhat jen akisem’e.
17 Khomte ni chu Houin lutna jetle veiya akitungin, kot-lhang lam a chu Jachin akisah-in, kot sahlam a chu Boaz akisah-e.

THUSIMBU NINA BUNG 4

Houin a manchah ho
(1 Kgs 7:23-51)
1 Lengpa Solomonin sum-eng maicham khat asemin, ningli nei, alhunga metre li sao, metre keh sang ahi.
2 Sum-eng twikong bempel khat asemin, tong nga thuh, akam tong som, akimvel geigol lhungkei tong somthum ahi.
3 Twikong geigol lhungkei chu apolam golnin kiphehchet’in akijemin, bongchalte limin akimun, ajem ho jong hi twikong chutoh kilhahjol tha cheh ahi.
4 Twikong chu sum-eng bongchal lim somle ni chunga akitungin, bongchal ho hin polam angauvin, thum thumin sahle lhang, simle mal angat cheh-ui.
5 Twikong sadan chu khutpeh tejen ahin, agei jong khon gei tobang, pahcha lim banga kisem ahi. Twikong hin twi litre sang som gup tobang adol’e.
6 Mai phetna kong som asem’un, Houin sahlam a nga, lhang lam a nga ma akoiyun hiche hoa hi kilhaina gan kithat ho sa kisopji ahi. Twikong len a twi vang chu Thempuho kisilna ding ahi.
7 Akisem dingdol bangin sana thaomei khom som asem’un, dokhang nga nga le thaomei khom nga nga akoiyui.
8 Sana kong ja khat jen jong asem’uve.
9 Thempuho din sunglam a hongcha khat ahoiyun, polam a jong hongcha khat ahoipeh-ui. Hongchate ni kah a kelkot dung kotpite ni chu sum-enga kitomjol cheh ahiuve.
10 Twikong chu lhanglam le solam kisuhtona Houin ninga akidoi.
11 Huramin bel ho le vutlo na khon ho chule kong ho jong asemin, lengpa Solomon Houin sahna dia kithopina dia akitepna jouse abolsoh tai.
12 Khomte ni, luvum a khon tobanga kisem alujumte ni, aluvum a sumgui kibang,
13 khom luvum golni nia kisem, sum-eng kolbuthei lim ja li jen,
14 kangtalai som, mai phetna kong som,
15 twikong, twikong douna bongchal somle ni lim,
16 bel ho, vutlouna khe ho, khe ka ho ahin, Pakai Houin a manchah dia lengpa Solomon thupeh dungjuiyin, sum-eng notval leh a konin mi khut themtah Huramin hichengse hi asemdohtai.
17 Aboncha hi Jordan phai Sukkoth le Zeredah kikah, sum-eng lhahna phunga lengpan alhahsoh hel ahi.
18 Thil kisem atam behseh phat’in sum-eng ijat mong kimang chu koiman atejou tapoi.
19 Lengpa Solomonin Houin a din sanan jong thil asemin: maicham le Pathen a kitoh changlhah ho koina ding dokhang ho;
20 akigon dungjuiya Muntheng chungnung maiya van ding sana thengsel’a kisem thaomei ho le thaomei kikoina ahin,
21 ajepna pahcha ho, thaomeiho, chaiche ho,
22 thaomeidon chetanna bahche ho, khon ho, gimnamtui halna lheng ho, meiam lo na khangbel ho, hicheng hi asemdoh ahi. Houin kotpi polam ho le Muntheng chungnung jotna kotpi chengse chu sanaa kitomjol cheh ahiuve.

THUSIMBU NINA BUNG 5

1 Lengpa Solomonin Houin dia ijakai ajosoh hel phat’in Houin thil kholnaa chun apa David-in Pakaiya akatdohsa thil jouse dangka, sana chule adang dang akoiluttai.

Houin a kitepna thingkong kipohlut
(1 Kgs 8:1-9)
2 Lengpa Solomonin Jerusalem khopia kikhom din Israel phung ho lamkai chengse le phungkhat lamkai jouse akouvin, David khopi Zion a pat Houin geiya Pakai Kitepna thingkong tol lut din agoi.
3 Akouho chu abonchauvin lhambuh kut laiyin ahung kikhom’ui.
4 Lamkaise se kikhop kimsoh phat’in Leviten Kitepna thingkong chu apu’vin,
5 Houin a apolut tauve. Thempuho le Leviten Pakai chenna ponbuh le amanchah jouse Houin sunga alhoh lut tauve.
6 Lengpa Solomon le Israel mipi abonchauvin Kitepna thingkong maiya abonchauvin Kitepna thingkong maiya akikhom’un, bong le kelngoi simsen lou that’in kilhaina abol’ui.
7 Hichun Thempuhon Pakai Kitepna thingkong chu Houin sunga apolut’un, muntheng chungnung, Vantil lhaneite ni noiya chun atungtauve.
8 Vantil te ni lhaving kijaldoh chun Kitepna thingkong le aputna jolte ni akhujolsel’e.
9 Muntheng chungnung maiya ding min moljolte ni mong kichenin amun, mundanga vang akimuchenpoi. Niche moljolte ni chu tuni geiyina aum nalaiye.
10 Kitepna thingkong sunga hin thil dang aumpon, Egypt a kona Israelte ahung kitoldoh-uva Pakaiyin akiteppinau, Sinai molsanga Mose’n akoi songphengte ni bou um ahi.
Pakai loupina
11 Ahung kikhom Thempuho chu, ipi phungkaiya hijongleu, akisutheng cheh-ui.
12 Levite lathem ho Asaph, Heman, chule Jeduthun, aphungkaiyuva miho pumin tupat ponnem asil’ui. Maicham nisolam a adingun, khutbeh le semjang sai atho’uvin, amaho to Thempu jakhat le som nin sumkon amut’uve.
13 Lathem hon summon gin le khutbeh gin chule tumgingthei dang gin to kitoh chet’in Pakai vahchoi la asauvin: “Vahchoiyun Pakai nun nem chu, Alungset long lou ahi,” atiuve. Thempuho Houin adalhah lhah-un photlot louvin
14 Pakai um hetna meibang vamleo louvin Houin ahintomin, Pathen houkin aboljom theitapouve.

THUSIMBU NINA BUNG 6

Mipi jah a Solomon thusei
(1 Kgs 8:12-21)
1 Hichun lengpa Solomon ataovin, “Vo Pakai, muthim lhangkhal laiya chen nanomin,
2 Tun Houin loupitah kasahpeh-in, Tonsot’a napansatna ding Kasempeh tai,” ati.
3 Mipi ading chah khen-un, lengpan mipi lang ngan Pathen vangboh athumpeh tai.
4 Lengpan, “Pakai, Israel Pathen vahchoiyin um hen! Kapa David koma akitepna anit’in, ajah a,
5 ‘Egypt a kona kamite kahinpuidoh nia pat tugeiyin eihouna diu Houin sahna din Israel lamkai din jong midang kalhengpoi.
6 Tun eikihouna din Jerusalem khopi kalhengin, chule David nang hi kamite chunga vaihom din kalhenge,’ tin anaseiye.
7 “Kapa David chun Pakai Israel Pathen houna ding Houin khat sah anagoi,
8 ahivangin Pakaiyin ajah a, ‘Houin khat neisah peh nom hi adih nai,
9 ahivangin sadoh jou pon nate, Kahouin sa ding nahinsa nachapa joh ahibouve,’ ati.
10 “Pakaiyin athutepsa amolson, kapa khel’in Israel leng kachangtan, Pakai Israel Pathen houna ding Houin khat kasadoh tai.
11 Pakaiyin Israelte to kitepna anei kisutna songphengte ni koina Kitepna thingkong jong Houin sunga kakoitai,” ati.

Solomon taona
(1 Kgs 8:22-53)
12 Japi masanga Solomon chu maicham maiya agadingin, van lam sangin ataove.
13 Solomonin thusei phung din sum-eng dosang khat semin lhong kim lailung tah a atunge. Seimun dosang chu ningli nei, tong nga lhingset, tong thum sang ahi. Seimun dosang lai, mipi mu theina laiya akaldoh-in, dilsun, van lam sangin ataove.
14 “Pakai Israel Pathen, Van le leiya Nang tobang pathen dang aumpoi. Namite to kitepna nanit jingin, lungthim pumpia nathu anit sungsen nalungset jinge.
15 Kapa David henga nakitepna nanit’in; tunin nasei aguilhungsoh heltai.
16 Tunjong Pakai Israel Pathen, kapan anit banga namiten chingthei tah a na-Danthu anit jingle achilhah khat’in Israel lengmun alo jing dia kapa nateppeh chu gulhunsah-in.
17 Hiche chun Pakai Israel Pathen, nalhacha David nateppeh jouse guilhunsah soh keiyin.
18 “Ahivanginla vo Pathen, leiset chung mihemte lah a nachen thei mong ding hinam? Vanin jong nadolpon, hiche ka-Houin sah hin nadol ding hinam?
19 Vo Pakai ka-Pathen, nalhacha kahi. Kataona ngaiyin, kathum ho neipen.
20 Hiche Houin hi sunle janin ngah jingin. Hikom hi nakihouna mun dia natepsa ahi, hijeh chun hiche Houin lam nga katao teng hin ngaiyin.
21 Nami Israelten hilam nga atao naule kataona ngaiyin. Na-Van in a konin ngaiyin, neingaidam’un.
22 “Khat’in achom khat dih louva bol’a ki-ngoh thu tanpeh dia kihahselna dia hikom Houin maicham phunga monabei ahidol photchetna ahung kikailut teng jongle,
23 O Pakai, van a konin hin ngaiyin, nalhachate thu tanpeh-in. Mona nei chu achanlom talen pen, monabei chu suthengin.
24 “Nang douna achonset jal’uva nami Israelten gal alel tengu, naheng lam jon a hiche Houina ahunguva, lungnem heova nahenga ngaidam athumule,
25 Van a konin hin ngaiyin, namite chonset ngaidamin, apu apateu le amaho napeh gamsunga hin nungpui kit tan.
26 “Nang douna namite chonset jeh a gotwi nakansah teng, lungheiya hiche Houin lam nga lungnem heova nahenga ataovule,
27 Vo Pakai, Van a konin hin ngaiyin, nalhacha, Israelte chonset chu ngaidamin, thildih bolje hiljon. Vo Pakai, chuteng nagamsunga gotwi lonsah-in, namite tonsot goulo dia napeh hiche gamsung hi.
28 “Gamsunga kel lhah ham, natgol lan ham, khaokhote nehgam ham aum teng, ahiloule namite gal’in asat ham, alah-uva dammo veiset aum teng
29 ataonau ngaiyin. Namite Israel khattou lung gim behseh jal’a hiche Houin lam sanga atao teng,
30 na-Van in a konin ngaiyin, ngaidamin. Mihem lungthim hethem Nangbou nahi. Mihem chu achanlom cheh-in bolpeh-in,
31 chutile kapu kapateu napeh gamsunga achen laiseuvin gingun tin nathu ngaiyunte.
32 “Gamla tah a cheng gamchom min naletna le natha neina ja a, mi kithopi jing nahi hea, hiche Houin a tao dia ahung teng,
33 sanpeh-in ataona. Nachenna van in a konin ngaiyin, athum bolpeh le chun, vannoi mitin vaipin jong, Israelten abol bangun, naheuvin tin nathu ngaiyunte. Chuteng Nang houna dia hiche Houin a nachen hi hedoh tauvinte.
34 “Namite melmate sat dia galmuna nasol teng, nahenga ataovule, hoikoma umu jongle, nalhentum hiche khopi le kasahpeh hiche Houin lang nga atao nau chu
35 sanpeh-in. Van a konin ngaipeh-in, amelmateu chunga gal josah-in.
36 “Nang douna namite achonset’a, chonselou abeihel teng, lung hanga amelmateu khut’a napehdoh teng, min sohchang dia gamchoma akai mang tengu, ichan gam la hijongle,
37 namite taona chu sanpeh-in. Hiche gamsunga chu lung heiya chonset gilou tah le gitlouna melse tah phonga nahenga ataovule, o Pakai, ataonau sanpeh-in.
38 Hiche gamsunga chu lunghei tah beh le lung thengsel’a, kapu kapateu napeh hiche gamsung, nalhentum hiche khopi, chule kasahpeh hiche Houin lam sanga ataovule,
39 ataonau sanpeh-in. Na-Van ina konin ngaiyin, hepi tah-in namite chonset jouse ngaidamin.
40 “Vo ka-Pathen, tun neihin veuvin chule hikoma taona kinei chengse sangin.
41 Hung kipattan Pakai Pathen, nathahat melchihna Kitepna thingkong pumin, tonsot’a cheng din hiche Houin sunga hung luttan, Nathempute hi abol jouseu phatthei boh-in, adiuva naphat jal’in namite kipahsoh keiyu hen.
42 Pakai Pathen, nalhensa lengpa pai hih beh-in! Nalhacha David na-ngailutna chu geldoh jingin,” tin aseiye.

THUSIMBU NINA BUNG 7

Houin katdoh kinbol
(1 Kgs 8:62-66)
1 Lengpa Solomon atao chai chaile, van a konin meikou ahung leng khan, kilhainaa kithat gancha sa jouse akavamin, chule Pakai um hetna vah emlai lai chu Houin adimsettai.
2 Houin sung avah emsel soh phat’in Thempuho jong alut ngam tapouve.
3 Van a kona meikou hung lenglha le Houin sung vah emsel hi Israelten amu phat’un leitol songnal chunga bohkhup’in Pathen alhaiyun, aphat jal le alungset long lou jal’in avahchoitauve.
4 Hichun Solomon le mipin Pakaiya kilhaina gan athat tauve.
5 Solomonin bong sang somni le sang ni kilhainan athat’in, kelngoi sang jakhat le sang som ni kiloikhom thilto din athat’e. Hiti hin Solomon le mipin Houin akatdoh tauve.
6 Thempuho chu adinna diuva kisempeh mun cheh a adingun, amaho to kimaiton Levite adingun, David lengpan agonpeh-u tumgingthei mang chan Pakai avahchoiyun, la asauvin, “Alungset longlou ahi!” tin, David ngansena bangin abol’uve. Thempuhon summon amut laiseuvin mipi ading chah kheh-ui.
7 Solomonin leitol lai lung, Houin mai geiyin athensoi, chujouvin pumgo thilto kilhaina gan athat’in, chang thilto atoh-in, kiloikhom thilto kilhaina gan kithat sathao jouse jong atoh-e. Thiltona dia asem sum-eng maicham aneo behseh phat’a hicheng hi leitol’a abol lo ahi.
8 Solomon le Israel japan lhambuh kut chu ni sagi sungin abol’ui. Hiche ni hin sahlam Hamath lhanglam a pat chule lhanglam Egypt gamgi dung geiya pat mihem hung kikhom chu atam lheh jenguve.
9 Mipin ni sagi sungin maicham thenso kin amangun, ni sagi sungma kut amangui. Akichai nikhon kikhen na kut loupi tah amanguve.
10 Ajing nikhoa, lha sagi na, nisom ni le thum nin, Solomonin japi inlam cheh a asoltai. Japi chu Pakaiyin amite Israel le David, chule Solomon apeh vangboh chengse jal’in akipah cheh-uve.

Solomon henga Pathen kilah kit
(1 Kgs 9:1-9)
11 Solomonin Houin le leng inpi phate cha ajosah a, agon banga lolhingtah a amolso soh phat’in,
12 janin ahenga Pakai ahung kilah-in, ajah a, “Nataona kajan, hiche Houin kahenga kilhaina gan tha na din pha kasatai.
13 Gotwi kakansah ham, anche laughing negam dia khaokhote kahin lha lut ham, kamite chunga natgol kalansah ham teng
14 thilse bol ahaiyuva, lungheiya kahenga ahung taovule, van a konin ngaiyin ting, achonsetnau ngaidam a agamsungu kabolphat kit ding ahi.
15 Hiche Houin lam veijing ing ting, taona jouse sang dia gotsa um ding kahi;
16 ajeh chu tonsot’a eikihouna ding mun dia hikom hi lhengdoh a suthenga kahi. A-itih a kavet lhih jinga kahuh jing ding ahi.
17 Napa David banga kitah tah a neijen a, Kadanthu chengse nit’a kaseipeh jouse nabolle,
18 napa David jah a achilhah khat Israel chunga leng chang jing dia kateppeh chu molsong’e.
19 Ama vang nangle namiten Kadanthu ho nit lou, kaseipeh mang louva, pathen chom chom nahouvule,
20 kapehsau gamsunga kona kanodoh-uva, eikihouna dia kathensosa hiche Houin jeng jong hi donlouva kakoi ding ahi. Muntina min kidaina aneiyuva, imacha louhel’a agel diu ahi.
21 “Tua vang Houin hi ja tah a kinei ahin, chuteng vangle ajotpa jousen datmon tin, “Idia Pakaiyin hiche Houin le gamsung hi hiti loma abol ham?’ tiuvinte.
22 Chuteng mihon, ‘Apu apateu Egypt a kona hinpuidoh a Pakai a-Pathenu anahsah loujeh-uva hitilo ahiuve. Amahon pathen chom chom ahouvuva, hijeh a chu Pakaiyin hitia hi asuhmang ahitauve,’ tin seiyunte,” ati.

THUSIMBU NINA BUNG 8

Solomon thilboldoh ho
(1 Kgs 9:10-28)
1 Solomonin Houin le a-leng inpi chu kum somni jen lut’in asai.
2 Lengpa Hiramin apeh khopi ho jong asaphan, achenpha din Israelte asol’e.
3 Hamath le Zobah gamsung alan,
4 nelgam sunga Palmyra khopi jong kulpi akaikhumtai. Hamath gamsung neh kholna khopi jouse jong asaphasoh hel’e.
5 Solomonin asah phat khopi dang ho chu: Chungnung Beth Horon le noinung Beth Horon, (Kulpi kaikhumsa, tunpi kisun khum a pal kaikhumsa cheh ahi).
6 Baalath khopi, neh le chah kolna anei khopi chengse, sakolte le kangtalai jouse akoina khopi ho jong ahi. Jerusalem khosung sah dia agot bangin amolson, Lebanon gamsunga, chule avaipohna gamsung pumpi hiti chun abolsoh keiye.
7 Canaan gamsung alo’uva Israelten tha louva akoiyu Canaan mite chilhah jouse Solomonin engbolna soh na atohsah-e.
8 Hiche ho chu, Hit mite, Amor mite, Periz mite, Hiv mite, chule Jebus mite ahiuve. Hiche mite son ho hi tuni geiyin soh ahijing nalaiyui.
9 Israelte vang engbolna natongin apang ngai pouvin, sepai le vaipo, kangtalai tol le sakol sepaiyin apangui.
10 In chom chom sahna engbolna soh natong ho vetup din vaipo ja ni le som nga jen aum’ui.
11 Solomonin ajinu, Egypt lengpa chanu chu, David khopia konin inchom asah pehna a chun achonlut tai. Solomonin, “Hichenu hi Israel lengpa David leng inpia cheng theiponte, ajeh chu Kitepna thingkong umna pou pou muntheng ahi,” ati.
12 Solomonin Houin maiya maicham asemna phunga chun Pakai henga ding kilhaina gan athat jinge.
13 Mose Danthua kisei dungjuiyin Solomonin nitheng ni jouse: Choldo nikho, lhathah kut ni, kum vanlhah kut ni, cholsolou changlhah kut, lholhun kut, chule lhambuh kut jousen pumgo thilto kilhaina gan athat jinge.
14 Apa David dan sem dungjuiyin, Thempuho toh dingle akithopiu Levite toh ding lasah ding le atoh diu kin agoltoh peh-e. Pathen mi David thupeh dungjuiyin niseh a Houin kelkot phung jouse ngah ding mi jong agoltoh-e.
15 Thil kholna in thudol le thil dang danga David-in Thempuho le Levite ahil chahna jouse chu akip akoiyin aboldoh soh keiyui.
16 Hiche hin Solomon thilgon akichaisoh tai. Pakai Houin bul phudoh a pat akijo chan geiyin, na kitong jouse alolhingsoh hel’e.
17 Hichun Solomon jong Edom gamsung Aqaba twikol kongkaimun Eziongeber le Elath a achei.
18 Lengpa Hiramin Solomon din kong innei le ama kong lamkaite, chule kongtol themtah tah amite asolpeh-e. Amaho hi Solomon sepai lamkaite to Ophir gam geiyin akitol’un, Solomon din sana kilogram sang som le sang nga val jen ahinpolut’ui.

THUSIMBU NINA BUNG 9

Sheba lengnun Solomon ahungvet
(1 Kgs 10:1-13)
1 Sheba lengnun Solomon lengpa minthan ajan, thu hahsa sa doh a, Solomon patep din Jerusalem geiyin ahungtai. Lhacha tampi ahinpuiyin, gimnamtui le sanapahjem, chule sana tampi sa-ngongsaote ahinpohsah-e. Sheba lengnu le Solomon akimuto lhon chun, lengnun ageldoh thei chan thudoh adongtai.
2 Solomonin adonbutsoh hel’in, hilchet hahsa aumsahpoi.
3 Sheba lengnun Solomon chih thusei ajan, leng inpi asahdoh amui.
4 Solomon ankong phunga kilui neh le chah, avaipote chenna in ho, leng inpi vaipote kigoltoh dol, akivon nau, lhachate von ho, ankong phunga lhachate von ho, ankong phunga lhachate von, Houin a kilhaina gan kithat jat amusoh keiye. Adatmo behseh jengin ahaisam deh chet’e.
5 Sheba lengnun Solomon lengpa jah a, “Kagamsung a ka-umpet a nachih thusim kajah hi adih ta-ngeiye!
6 Kahung muchet masangsen aseiyu kanatahsanpoi. Nachih thusim kajah chu akeh jong lhinglou ahi. Miho sei sangin nachingjo nalaiye.
7 Nalhachate, nakoma um jing, nasei thuchih ngai jingte anun nom’ui!
8 Pakai na-Pathen vahchoiyin um hen! Nadeiyin, leng nachansah-in, aminin vai napohsah-e. Amite Israel angailut’a, itih a honbit adeijeh-in, thudih le dandih a navaihom jing theina din nang hi alengpau nahisahtai,” ati.
9 Sheba lengnun lengpa Solomon ahinpoh peh thilpeh chu: sana kilogram sangli val, gimnamtai tampi le sanajem tampi jong ahi. Sheba lengnun lengpa Solomon apeh tobanga pha gimnamtui dang aumkhapoi.
10 Lengpa Hiram sepaite le lengpa Solomon sepaite Ophir gama sana hinpo loiyin jong juniper thing le sanajem tampi ahinpouve.
11 Thingho chu Solomonin Houin le leng inpi kalbi leiyin asemin, lathemte din semjang le selangdah-in asemtai. Judah gamsunga hitobang hi masanga kimukha louhel anahi.
12 Lengpa Solomonin Sheba lengnu thum jouse apei. Hiche ho chu Sheba lengnu thilpoh to akilhat chungvuma apehson ahi. Chujouvin Sheba lengnu le alhacha chengse Sheba gam a ahung kile kittauve.

Lengpa Solomon neile gou
(1 Kgs 10:14-25)
13 Kumseh le lengpa Solomon chun sana kilogram sang somni le sangthum tobang amu jingin,
14 hicheng hi kivei mite le sumkai peho todoh chungvuma ahinalaiye. Arabia lengte le Israel gamkai vaipoten jong sana le dangka ahinpoh peh jingui.
15 Solomonin lum lentah tah jani jen asemin, khat chu phatah a kikhengjol sana kilogram sagi chengin atomjol’e.
16 Lum neojep jong jathum jen asemin, khat chu sana kikhengjol kilogram thum chengin atom’e. Lum chengse chu Lebanon gammang thinga kisa insunga akoisoh keiye.
17 Lengpan laltouna lentah khat asemin, phabep khat saihan atomin, adangse vang sana thengsel’in atomsoh keiye.
18 Laltouna geiyin kalbi gup akidon, laltouna noiya kengto ngap akidoi, hiche jong chu sanaa kitom ahi. Laltouna jet le veiya ban ngap aum gel’in, Sakei lim khat cheh alang langa adinge.
19 Kalbia chun sakei lim somle ni akisemin, sakei lim khat cheh kalbi mongte nia chun akisemin ahi. Hitobang laltouna hi koima lenggam sunga anaum kha hih laiye.
20 Lengpa Solomon khon jouse sana kisem ahin, chule Lebanon gammang thinga kisa insunga manchah jouse jong sana thengsel’a kisem jeng ahi. Solomon damlai sungin dangka jeng jong man neiyin akigelpoi.
21 Solomonin Twikhanglen a lamlengle ding kong innei tampi aneiyin, lengpa Hiram kong inneite to akitol khom jiuve. Kumthum seh le kong inneiho ahung kile jiuvin, sana, dangka, saiha, guldute le jongte ahintol jiuve.
22 Lengpa Solomon hi leiset leng jouse jong ahaovin achingjoi.
23 Leng dang jousen Solomon adongun, Pathenin apeh chihna thusei angaiyui.
24 Leng hon Solomon ding thil ahinpouvin, dangka le sana, ponsandup, gal manchahho, gimnamtui, sakolte, chule sakolpolte apeuve.
25 Lengpa Solomonin kangtalaiho le sakolte koina ding sakol-in sang li jen aneiyin, chule sakol sepai sangsom le sang ni aneiye. Phabep chu Jerusalema akoiyin, adang chu khopi mun dang danga akoiye.
26 Solomon chu Euphrates luipi dunga pat Philistia le Egypt gamgi geiya vaihom thunei chungnung penin apangtai.
27 Alengvaipoh sungsen Jerusalem khopi sunga dangka songhum jat ahin, cedar thing jong theipi thing mai mai tamin atamin,
28 chule Musri gamle gamdang danga konin Solomonin sakolte ahintol lut lut jenge.

Solomon lengvaipoh kaigop
(1 Kgs 11:41-43)
29 Solomon thusim akipatna pat achai gei Nathan Themgao thusimbu, Shiloh khoa Ahijah gao thusei kijihna, chule Themgao Iddo mu neina lekhabua akijih lut cheh-in, hichea chun Israel lengpa Jeroboam lengvaipoh thusim to akijih thai.
30 Solomon hin Jerusalem khopia Israel pumpi chunga kum somli sungin lengvai apoi.
31 Solomon athin David khopia avuiyun, akhel’in achapa Rehoboam leng achangtai.

THUSIMBU NINA BUNG 10

Sahlam Israel phung ho galguh bol
(1 Kgs 12:1-20)
1 Sahlam Israel phung hon Rehoboam leng chansah dia akikhopnau Shechem khoa Rehoboam achei.
2 Athu hi Solomon ginna Egypt a jamlut, Nebat chapa Jeroboamin ajahdoh phat’in in lama ahung kile kittai.
3 Sahlam Israel phung hon Jeroboam agakousah-un, abonchan Rehoboam henga acheuvin,
4 “Napan gihsa tah-in einabol’ui. Neisuh jangkhai dom’uva, nomdoma neihinsah theiyule, nadin kitah tah-in nagamsung mi hiuvinge,” atiuve.
5 Rehoboamin adonbut’in, “Naseiyu geltohna din nithum nei ngah-un, nithum jou teng hung kittauvin,” ati. Mipi jong achetauve.
6 Lengpa Rehoboamin apa Solomon thumop a anapang upaloi adongtoh-in, “Hiche mite donbutna dia itobang thu neimop diu ham?” ati.
7 Amahon, “Amaho hi nakhoto thema, santheidol naseiya lung lhaisah ding nagel le, a-itih a jong nakinbol’a pang diu ahi,” atiuve.
8 Rehoboamin la upaho sei ngaisah louvin, agolpi tua thumop a pang ho joh agadongin,
9 “Iti neithumop diu ham? Apohgih-u jansah jep dia sei ho hi ipi kaseipeh ding ham?” ati.
10 Amahon, “Hitin seipeh-in: ‘Kamecha hi kapa kongbuh sanga lenjo ahi,’ tin.
11 Chule ajah-uva, ‘Nachungu kagihsah cheh ding, kapan molkanga najep’u ahin, ken sakoljepna kajep diu nahi,’ tin seipeh-in,” atiuve.
12 Nithum nungin Jeroboam le mipi Rehoboam lengpa henga ahung kit’un, aseibangin aumtauve.
13 Ahinla lengpan upaho thumop la louvin, japi ahohsal’in,
14 gollhang hon ahil bangin aboltai. “Kapan pohgih hahsa napohsah-un: ken gihsa cheh a kabolpeh ding nahiuve. Aman molkang mai maiya najep’u ahin, kenvang sakoljepna kajep diu nahi!” ati.
15 Hiche hi Shiloh khoa Themgao Ahijah-in Nebat chapa Jeroboam thudol’a Pakai Pathen lungdei asei chu guilhunna ding ahi. Hijeh a chu lengpan mipi sei ija aselou ahitai.
16 Lengpan aseiyu isah louva abol phat’in japin asam’un, “David insung mite mangthah hen! Hichenten ipi eibolpeh khah beh-um? Vo Israelte, inlam kijot taute! Rehoboam achangin kivaipoh hen!” atiuve. Hiti hin Israel’in galguh abol’un.
17 Judah gamsung chengte seh leng din Rehoboam chu adalhah peh tauve.
18 Hichun Rehoboam lengpan engbolna soh natong ho vetup Adoniram chu Israelte henga asolle, songin aseplih tauve. Chuphat’in Rehoboam jong kinloi tah-in kangtalaiya akaldoh-in, Jerusalem langa ajamluttai.
19 Hichea pat hin sahlam Israel lenggam chu David leng vai neina douvin galguh abol bol jengui.

THUSIMBU NINA BUNG 11

Shemaiah gao thusei
(1 Kgs 12:21-24)
1 Lengpa Rehoboam Jerusalem ahung lhun chun Benjamin le Judah phunga lhentum cheh sepai sang ja khat le sang som get akhomin, sahlam Israel gamsung gal bol khum’a toupha kit din agoi.
2 Ahivangin Pakaiyin Shemaiah Themgao asol’in,
3 lengpa Rehoboam le Benjamin le Judah phunga mite jah a,
4 “Nasopiteu Israelte kisatpi dauvin. Nabonchan na-inlam cheh a kile tauvin. Thilsoh jouse hi Kei deiya soh ahibouve,” tin aseisah tai. Pakai sei angaiyun, Jeroboam to kisat din akonda tauve.

Rehoboamin khopi jouse kulpi akaikhum
5 Rehoboam Jerusalem khopia achengin, hichea kon hin Judah le Benjamin gamsunga khopi phabep kulpi akaikhumin, hiche ho chu:
6 Bethlehem, Etam, Tekoa,
7 Bethzur, Soco, Adullam,
8 Gath, Mareshah, Ziph,
9 Adoraim, Lachish, Azekah,
10 Zorah, Aijalon, chule Hebron ahi.
11 Khopi hicheng hi dettah-in kulpi akaikhumin, sepai lamkai khat cheh akoiyin, akho khoa neh le chah, olive thaotwi, lengpitwi akhol’in,
12 chule lumle tengcha ho jong akoiye. Hiti hin Judah le Benjamin phungte ni vang athu nun’e.

Thempuho le Levite Judah gama ahungu
13 Israelte gamsunga Thempuho le Levite jouse lhanglam Judah gama ahungtauve.
14 Leviten hamhing gam le gam leiset dang anei jouseu dalhan, Judah gamsungle Jerusalema ahung kitol’ui, ajeh chu Israel lengpa Jeroboam le abanjop a pang hon amaho chu Pakai Thempua apansah da ahitauve.
15 Jeroboamin doiphunga Thempu dingle thilha houna ding, doilim semthu bongchal lim asemdoh ho houna pang din atumbeh-in Thempu akilhentai.
16 Israel phungtina mi, Pakai Israel Pathen hou nom hon vang, Pakai apu apateu Pathen henga kilhaina gan thaa hou theina din, Jerusalem geiyin Levite nung ajuitauve.
17 Hiche hin Judah lenggam ahatsah-in, kumthum sungin, masanga lengpa David le lengpa Solomon vaipohna noiya aum bangun, Rehoboam apanhutauve.

Rehoboam insung
18 Rehoboamin Mahalath akichenpin, Mahalath pa chu David chapa Jerimoth ahin, anu Jesse tunu, Eliab chanu Abihail ahi.
19 Rehoboam le Mahalath chapate chu Jeush, Shemariah chule Zaham ahiuve.
20 Khonungin Absalom chanu Maacah akichenpin, chapa Abijah, Attai, Ziza chule Shelomith, li anei lhon’e.
21 Abonchan Rehoboamin ji som le get aneiyin, thaikem somgup aneiye; chule chapa somni le get ahingin, chanu somgup ahinge. Ajite le athaikem jouse lah a Maacah adeipenin,
22 achate jouse lah a Abijah alungset penin, akhel’a leng chang din alheng’e.
23 Rehoboamin achapate chu chingthei tah-in toh ding kin ahoppeh-in, Judah le Benjamin gamsung pumpia kulpi kaisa khopi tin a atousah soh keiye. Abonchauvin neh le chah neng jeng jungin apen, ji tampi pi apuipeh-e.

THUSIMBU NINA BUNG 12

Judah gama Egyptte galbol
(1 Kgs 14:25-28)
1 Rehoboamin leng thaneina aphudet phat’in, ama ti amite tin Pakai Danthu adon tapouve.
2 Rehoboam lengvaipoh kal kum nga nan Pakai dia akita lou nau chu talen amantauve. Egypt lengpa Shishak chun Jerusalem ahung sat’in,
3 sepai kangtalai sangle ja ni, sakol sepai sang somgup, sepaite simsen lou, Libya mite, Sukk mite, chule Sudan mite sepaiho geiyin ahinpuiye.
4 Shishak hin Judah gamsung kulpi kaisa jouse ahinlan, Jerusalem geiyin ahin notai.
5 Shishak masanga jamdoh ding goa Jerusalem khopia kikhom lengpa Rehoboam le Judahte lamkaiho henga Themgao Shemaiah achen, “Nahenguva Pakaiyin thu hitin aseiye: ‘Neidon lou jeh-uva, ken jong Shishak koma kadalhah ding nahitauve,’ tin aseiye,” ati.
6 Hichun lengpa le lamkai chengin achonset akihetdoh-un, “Pakaiyin eibolnau adih-e,” atiuve.
7 Lengpa le lamkaite umchan Pakaiyin amudoh phat’in Shemaiah koma aseikit’in, “Achonset akihetdoh phat’un sumang taponge. Shishak-in ahung sat teng vangle thigamlo deh chet diu ahi. Jerusalem kalunghan hu lhingset’a athoh lou diu,
8 Shishak-in vang jouvuntin, chule Kei lhacha panle leiset vaihomte lhacha kinbol kibah lou hedoh-unte,” ati.
9 Lengpa Shishak ahung konin Houin thil kolna gou jouse le leng inpi gou alatai. Thil ijakai achomsoh hel’in, Solomon semdoh sana lum ho geiyin alah thai.
10 Hiche ho khel’in Rehoboamin sum-eng lum asemin, leng inpi kelkot ngah ho vaipote khut’a apedoh-in angasah tai.
11 Lengpa Houin akaiseh le lum ngah sepaiten lum chengse achoiyun, chuteng akikoina mun a alekoi kit jiuve.
12 Pakai anga alut kit jeh chun Pakaiyin Rehoboam asubeihel tapoi, chule Judah gamsunga jong ima apha pheh phuh nai.

Rehoboam lengvaipoh achomlam
13 Rehoboam Jerusalem khopia lengvaipon apangin, leng hina tha ajekhongsoh-e. Leng achan chun akum somli le khat alhingin, Israel gamsunga Ama houna dia Pakaiyin alhendoh Jerusalem khopia chun kum somle sagi sungin lengvai apoi. Rehoboam nu hi Ammon gamsung mi Naamah ahi.
14 Pakai lunglam ahol loujeh-in Rehoboam hin thilse jeng anabol’e.
15 Rehoboam natoh apatna pat achai gei, chule a-insung thusim jouse Themgao Shemaiah thusimbu le Themgao Iddo thusimbua akimui. Rehoboam le Jeroboam akigal jing jeng lhon’e.
16 Rehoboam athin David khopi, lengte khan a avuiyun, achapa Abijah ama khel’in leng achangtai.

THUSIMBU NINA BUNG 13

Abijah le Jeroboam kisat
(1 Kgs 15:1-8)
1 Israel lengpa Jeroboam leng chankal kum som le get kumin Abijah Judah leng ahin,
2 Jerusalem khopi a kum thum sungin lengvai apoi. Anu chu Gibeah khopia Uriel chanu, Micaiah ahi. Abijah le Jeroboam akisat lhontai.
3 Abijah-in sepai sang ja li akhomin, Jeroboam sepai sang ja get to ahung kon’e.
4 Sepaite chu Ephraim thinglhang gamsunga aki suto tauve. Lengpa Abijah chu Zemaraim molvuma akaldoh-in Jeroboam le Israelte akouvin, “Ngaiyuvin!
5 Pakai Israel Pathen chun suhkeh louhel dia David to kitepna aneiya, ama le achilhahte a-itih a Israel leng chang dia aseipeh helou nahiuvam?
6 Nebat chapa Jeroboamin alengpa Solomon dounan galguh abol’in,
7 khonungin pannabei miho akhomin, hiche ho hin Solomon chapa Rehoboam, ima hekhen loulai chapang, aseiyu nel theilou chu adei dei aseikhum’ui.
8 Tunma nang hon hiche leng tha neina, Pakaiyin David chilhahte apehsa chu nan a gal bol nagouve. Sepai tampi naneiyun, napathen diuva Jeroboam semdoh sana bongchal limho to naneiyui.
9 Pakai Thempute, Aaron chilhah jouse nanodoh-un, Levite geiyin nadeldoh tauve. Akhel diuvin namdangte chonna bangin Thempu tampi napansah-ui. Koi hile bongchal khat hin kaiya kelngoi sagi hin hoilut chan napathenteu Thempu din nathenso thei jengui.
10 “Keihon vang Pakai i-Pathenu kahou jingun, don louvin kakoipouve. Aaron guiya peng Thempuhon akindol abol jingun, Leviten akithopi jingui.
11 Nilhahseh jingkah seh-in gimnamtui le pumgo thilto Pakai henga atoh jingun ahi. Hou thudol’a theng dokhang chunga changlhah thilto akoiyun, nilhahseh le sana thaomeikhom chunga thaomei avah cheh-uve. Pakaiyin thu eipeh cheng kabol’un, nanghon vang don louvin nakoiyui.
12 Pathen Amatah kalamkaiyun apangin, Athemputen sumkon choiyin, nangho to kisatna dia mutging din gonsa ahitauve. Vo Israelte, Pakai napu napateu Pathen douna galbol din kigo hih-un! Jou pouvin nate!” ati.
13 Hiche kah hin Jeroboamin Judah sepaite anung lam a anachang din sepai asolgun, adangse kinotopi dingin akhen’e.
14 Judahten avet’ule agalteuvin aumkimsoh heltauve. Hijeh chun panpi ngaiyin Pakai henga ataovui, chule Themputen summon amuttauve.
15 Judahten hasap sap’in asam’un, Abijah lamkai nan gal ahinno tauve; chutah-in Pathenin Jeroboam le Israel sepaite ajoutai.
16 Judate gin nan Israelte ajam’un, hichun Pathenin Judate chu Israel sangin ahatsah-in ajosah tai.
17 Abijah le asepaiten Israelte asugep set jengun, Israel sepai phalai cheh sang ja nga jen athat tauve.
18 Hiti hin Judaten apu apateu Pakai Pathen akisonpi jal’un Israelte ajoutauve.
19 Abijah hin Jeroboam sepaite adelpeh-in, akhopi phabep: Bethel, Jeshanah le Ephron, chule hiche khopi ho vel dung khote jouse geiyin atouphai.
20 Abijah lengvaipoh laisen Jeroboam akiledoh kit tapoi. Akhon nan Pakaiyin ajep lhun athitai.
21 Abijah vang ahat cheh cheh jenge. Ji somle li aneiyin, chapa somni le ni ahingin, chanu somle gup ahinge.
22 Abijah thusim dang, aseile abol jouse Themgao Iddo thusimbua akijih soh keiye.

THUSIMBU NINA BUNG 14

Lengpa Asan Sudan mite ajo
1 Lengpa Abijah athin David khopi, lengte lhan a avuitauve. Achapa Asa alkhel’in leng achangin, chule Asa vaipohna noiya gamsungin kum som jen cham lenna aneiyui.
2 Thildihle pha aboljeh-in Asan Pakai a-Pathen alung lhaiye.
3 Asan namdangte maicham ho le doiphung jouse asumangin, doikhom song jouse avobongin, Asherah pathennu lim kisem jouse aphuh lhui.
4 Judah miten Pakai, apu apateu Pathen dei bol’a amihilna le athupeh nit din aseipeh-e.
5 Ajeh chu namdangte doiphung jouse le gimnamtui lhutnam na jouse, Judah gamsung khopi tin a asubeiye. Avaipohnaa hin lenggam sunga cham aleng’e.
6 Hiche sung hin Judah gamsung khopi ho kulpi akaikhumin, kum sotpi sungin gal aumtapoi, ajeh chu Pakaiyin chamna apei.
7 Asan Judate jah a, “Khopi ho hi pal kaikhumu hitin, kho nga na insang sautin, honle khale thei kelkotpi semkhumu hite. Pakai i-Pathenu lungdei iboljeh-un gamsung thuneiyin ipangtauve. Aman eihoidam’un, jetle vei, sahle lhang ei-ngapeh tauve,” ati. Hiti hin khopi asauvin ahaodoh tauve.
8 Lengpa Asan Judah gamsunga sepai sang jathum aneiyin, lumle teng athosah-in, Benjamin phunga konin sepai sang ja ni le sang som get aneiyin, lumle thalpi athosah-e. Abonchauva hil themsa, mihang jeng ahiuve.
9 Sudan mi Zerah chun sepai nel khat le kangtalai jathum ahin puiyin Judah gamsung gal ahinbol’in, Mareshah geiyin ahinnotai.
10 Zerah to kisat din Asa akonin, Mareshah komcha, Zephathah phaicham a chun alang langa apangto tauve.
11 Asa hi Pakai a-Pathen henga ataovin, “Vo Pakai, sepai lhasamte hihen tha neite hijongle kithopi thei Nangbou nahi. O Pakai ka-Pathenu, tun neihu’vin, Nanga kisong, hiche sepai hon jamah sat dia Nang min pan a hungkon kahiuve. Vo Pakai, ka-Pathenu nahi; Nang jou ding koimacha akinempoi,” ati.
12 Asa le Judate sepaihon asat phat’un, Pakaiyin Sudan mite ajoutai. Sudan mite ajam’un,
13 Asa le asepaiten Gerar geiyin adelpeh-ui. Sudan mi tamtah athajeh-un, sepaite kigoltoh a galsat theiyin aumtapouve. Pakaile asepaiten ajo thotauvin, chule Pakai sepaiten neile gou tampi achomdohlo tauve.
14 Hichun Gerar vel’a khopi jouse asu mang theiyun ahi, ajeh chu chukom dung miten Pakai akicha behseh jengui. Pakai sepaiten khopi jouse achom’un, neile gou tamtah achomdoh-ui.
15 Kelngoi chingte ngahmun phabep jong adelkhum’un, kelngoi tampi le sa-ngongsao tamtah aman’ui. Hichun Jerusalem a ahung kile kittauve.

THUSIMBU NINA BUNG 15

Asa thil semphat
1 Oded chapa Azariah chunga Pathen lhagao ahung pansan,
2 ama achen lengpa Asa akimupi. Akouvin, “Kasei ngaiyun, lengpa Asa le Judah gamsung, Benjamin gamsung mipin! Akom nanai laiseuva Pakaiyin naumpi jing diu, nahol’u le kimusah ding nahiuve, dalha vangleu chun nadon pouvinte.
3 Ajeh chu phat sotpi sunga Israel hi Pathen dih bei, ahil diu Thempu bei chule Danthu beiya um ahitauve.
4 Ahivangin gim hesoh hung lhun teng Pakai Israel Pathen henga akiheitauve. Ahol’un amudoh tauvin ahi.
5 Chulaiya gamtin a kitomona le gim hesoh atamjeh chun koimacha jong lung monga chele vah le aumpoi.
6 Nam khat’in namchom khat bolgim’a, khopi khat chun khopi khatma sugenthei ahiuvin, ajeh chu Pathenin gim hesoh le thoh hahsa alhut khumu jong ahi.
7 Hijongle hat’un lang lung lha loujen’un. Nathilbol kipaman nasantei diu ahi,” ati.
8 Obed chapa Azariah Themgao gao thusei ajah chun Asa jong akitilkhouve. Hijeh chun Judah le Benjamin gamsunga milim doi kisemthu jouse le Ephraim thinglhang gamsunga khopi atoupha jousea milimdoi jouse apaidohtai. Chule Houin lhonga Pakai maicham jong asemphai.
9 Pakaiyin apanpi amu phat’un mipi tamtah, Ephraim phunga, Manasseh phunga, chule Simeon phunga konin Asa henga ahungun, alenggam sunga achengtauve. Asan abonchauvin akouvin, Judate le Benjaminte jong akouve.
10 Abonchauvin Asa leng chankal kum somle nga lhin kum, lha thum nan Jerusalem khopia akikhom’un ahi.
11 Hiche nikho hin athil chomdoh-u bong ja sagi le kelngoi sang sagi jen athat’un, Pakai henga akilhaiyui.
12 Hichea hin kitepna khat asemdoh-un, alungthim pumpiu le a-lhagao pumpiuva Pakai, apu apateu Pathen hou din anomtauve.
13 Koi hile, ateh akhang, numei pasal, Pakai hou lou chan tha din akoitauve.
14 Othong leuvin asam’un Pakai min panin akihahsel’uvin, kitepna chu nit tei din aseiyui, chule a-ao cheh-un sumkon amuttauve.
15 Lungthim pumpia hitobang kitepna asemdoh jeh-un Judate abonchan akipah soh keiyui. Kipah tah-in Pakai ahouvun, Pakaiyin asanpeh-in, jetle vei sah le lhanga konin lung mongin achensah tai.
16 Muchi chivo phattheina pathennu Asherah lim thet umrah asem jeh-in apinu, lengnu Maacah chu Asan ahaisah tai. Asan milim chu asat lhun, atupan panin, Kidron phaiya ahalvamtai.
17 Gamsunga namdangte doiphung jouse asuhmangsoh lou vangin Asa ahinkho lhumkeiyin Pakai din akitah jinge.
18 Houin sunga apa Abijah-in Pathen dia akatdohsa thil jouse le aman sana le dangka akatdohsa chengse chu akoiye.
19 Alengvaipoh kum somthumle nga geiyin gal aumtapoi.

THUSIMBU NINA BUNG 16

Israelto kigal
(1 Kgs 15:17-22)
1 Judah lengpa Asa leng chankal kum somthumle gupnan Israel lengpa Baashan Judah gamsung gal ahinbol’in, Judah gamsung lutle potle tintanna din Ramah khopi kulpi akaikhumtai.
2 Hijeh chun Asan Houin le leng inpi sunga dangka sana jouse alan, Damascus khopia Syria lengpa Benhadad henga athot’in hitin aseiye,
3 “Ipu ipate bangin pangkhom hite. Hiche dangka le sana nang dia kahin thot ahi. Kagamsunga asepaite atoldoh theina din Israel lengpa Baasha to napankhom chu haitan,” ati.
4 Asa thilgon hi Benhadah anomin, sepai vaipote le asepaite asol’in Israel khopi ho agasat tauve. Ijon, Dan, Abel Beth Maacah le neh le chah kholna Naphtali khopi jouse alatauve.
5 Thilsoh hi lengpa Baashan ajah phat’in Ramah khopi kul kaiban adalhatai.
6 Hichun lengpa Asan Judah gam pumpia mi akhomin, Ramah khopia Baasha manchah inthil, thing le song jouse tolmang din aseiyin, amazon Geba le Mizpah khopite ni kulpi kainan amangui.

Hanami Themgao
7 Hiche pet hin Hanami Themgao chu lengpa Asa henga achen, “Pakai na-Pathen kisonpi louva Syria lengpa nakisonpi jeh-in, Israel sepaite najamdoh sah tai.
8 Sudan mite le Libya miten jong sepai tampi le kangtalai tamtah chule sakol touthem sepai tampi aneilou ham? Pakaiya nakison jeh-in hijat chunga jong gal jo na napei.
9 Lungthim gil’a Ama holte hatsah dia Pakaiyin vannoi pumpi avet lhih jing ahi.
Ngol chon nahitan, tua pat gal nadou jing jeng ding ahitai,” ati.
10 Hichea hin Asa jong Themgaopa chunga alung hang behseh jengin thih khaovin akanin songkul a ahentai. Hiche pet pet a hi Asan mipi phabep jong engse tah a abolpan ahitai.

Asa lengvaipoh kichai
(1 Kgs 15:23-24)
11 Asa lengvaipoh apatna pat achai geiyin Judah le Israel lengte thusimbua akijihsoh keiye.
12 Asa leng achankal kum somthumle ko kumin kengphang nat jeh-in elbaiyin aumlotai; hiche jeng jong hin Pakaiya kihei louvin louthemte akijensah-e.
13 Kumni nungin athin
14 David khopi sunga akisemsa songlhan a avuitauve. Along chu vui din gimnamtui le thao namtui anu’vin, athi lunghempi nan lhumpi adenguve.

THUSIMBU NINA BUNG 17

Jehoshaphat leng chan
1 Jehoshaphat apa khel’in leng achangin Israel dounan panmun akisem det be cheh tai.
2 Judah gamsung khopi kulpi kaisa jousea sepai atousah-in, Judah muntin a sepai akoiyin, Ephraim gamsunga Asan alahsa khopi jousea jong akoiye.
3 Apa kipat til lai banga Baal hou louva aumjeh-in Pakaiyin Jehoshaphat vang aboh-e.
4 Apa Pathen lhachan apangin, Pathen thupeh chengse anit’in, Israel lengte umchan ajompoi.
5 Pakaiyin Jehoshaphat chu Judah lenggam sunga hunei tah-in akoiyin, japin thilpeh tampi ahinpoh jeh-un hao jong ahaovin, mipi jana jong achangtai.
6 Pakai kinbol hi akithang-atpi lheh jengin, Judah gamsunga doiphung jouse le Asherah pathennu houna lim semthu jouse asumangsoh hel’e.
7 Leng achankal kum thum nan Jehoshaphat hin Judah gamsung khopi tin a mihil din: Benhail, Obadiah, Zechariah, Nethanel, chule Micaiah asol’e.
8 Amaho hi Levi mi ko le Thempu ni to alhon’ui. Levite chu, Shemaiah, Nethaniah, Zebadiah, Asahel, Shemiramoth, Jehonathan, Adonijah, Tobijah, chule Tobadonijah ahiuvin; Thempute ni chu Elishama le Jehoram ahil lhon’e.
9 Pakai Danthu bu achoiyun Judah gamsung khotin achon’un japi ahilsoh keiyui.

Jehoshaphat thupina
10 Judah gam kimvel a leng ho chu lengpa Jehoshaphat sat ding Pakaiyin akichatsah tai.
11 Philistine mi phabep-in jong dangka tampi le thilpeh tamtah Jehoshaphat din ahinchoiyun, Arab miten jong kelngoi sang sagi le ja sagi to kelcha sang sagi le ja sagi ma ahinkaipeh-ui.
12 Hiti hin Jehoshaphat athahat tel tul jenge. Judah gam pumpia kulpi akaiyin, khopi tampi asadoh-e;
13 chule hiche dunga chun neh le chah tampi pi akhol’in ahi. Jerusalem khopia chun vaihom them akoiyin,
14 aphungkhai cheh-in akoiye. Adnah chu Judah phunga sepaite lamkai ahin, sepai sang jathum chunga lamkai ahi.
15 Aban a Jehohanan ahin, sepai sang ja ni le sang som get chunga lamkai ahi;
16 chule thumna chu Zichri chapa Amasiah ahin, sepai sang ja ni chunga lamkai ahi. Amasiah hi achamtah a Pakai kinbol dia kipehdoh jeng ahi.
17 Benjamin phungkhaiya sepai lamkai chu, sepai minthangtah, Eliada ahin, lumle thalpi tho, sepai sang ja ni chunga lamkai ahi.
18 Ama ban a chu Jehozabad ahin, gal manchah lhingset’a choi, sepai sang ja khat le sang som get chunga lamkai ahi.
19 Sepai hijat chun Jerusalem khopia lengpa kin abol’un, hicheng kalval’in jong Judah gamsung kulpi kaisa khopi danga jong sepai dang atousah-e.

THUSIMBU NINA BUNG 18

Themgao Micaiah-in Ahab agih
(1 Kgs 22:1-28)
1 Judah lengpa Jehoshaphat ahaova aminthan phat’in a-insung mi khat le Israel lengpa Ahab insung mi khat kichensah din agoi.
2 Kum phabeppi nungin Jehoshaphat hi Samaria khopia achen Ahab agavil’e. Jehoshaphat le aloite jabolnan Ahab-in golvah abol’in, kelngoi tampi le bong tampi athat’e. Ahab hin Gilead gamsunga Ramoth khopi asat hu din Jehoshaphat ajol’e.
3 Ajah a, “Ramoth khopi neisat hu ding ham?” ati. Jehoshaphat’in, “Nakigotsoh poule keile kasepaite gotsa kahiuve; sat hu nauvinge.
4 Amavang amasan Pakai dong tadiute,” ati.
5 Hijeh chun Ahab-in Themgao ja li jen tobang akoulut’in, “Ramoth khopi kasat di ha kasat da ding ham?” ati. Themgaohon, “Gasat’in, Parthenon josah nante,” atiuve.
6 Ahivangin Jehoshaphat’in, “Pakai idohbe na diu Themgao dang umlou hitam?” tin ahol’e.
7 Ahab-in, “Imlah chapa Micaiah kiti khat vang aum nai. Thilpha khatcha jong eigaopeh khah loujeh-in kavetnompoi; thilse jeng bou agaove,” ati. Jehoshaphat’in, “Chutisei hih-in,” ati.
8 Hijeh chun Ahab-in thutanna phunga vaibol khat asol’in, Micaiah agaholdoh loi din ahil’e.
9 Lengte ni chun leng pon loupi sil’in, Samaria khopi kelkot polam, tollhang kidengjol laiya laltouna gel’in atou lhonin, amasang lhona Themgaoten gaothu aseiyui.
10 Alah-uva Zedekiah, Chenaanah chapa, chun thih sel-ki akisemin Ahab jah a, “Pakaiyin hitin aseiye, ‘Hichea hi Syriate nasat’a nasuh gamhel ding ahi,’ tin aseiye,” ati.
11 Themgao dangsen jong chutiman aseiyun, “Ramoth khopi lonvuh jengin, najotei ding ahi; Pakaiyin najosah ding ahi,” atiuve.
12 Hichepet hin Micaiah hol’a che vaibolpan ajah a, “Themgao dangsen jong lengpa galjona dia aseiyu ahin, nangin jong chutin gaole chun phajonte,” tin aseiye.
13 Micaiah-in, “Pakai hing jing ahi, ka-Pathenin sei dia eihil bou kasei ding ahi!” ati.
14 Lengpa Ahab angsung ahung geiyin lengpan, “Micaiah, lengpa Jehoshaphat to Ramoth khopi kasat lhon ding ha kasatda lhon ding ham?” ati. Micaiah-in, “Gasat lhon tang-em, jouna ding chu! Pakaiyin najosah ding-an,” ati.
15 Ahab-in, “Pakai min a thu nasei teng, adih bou seiyin! Ijat veibeh kaseipeh ding nahim!” ati.
16 Micaiah-in, “Thinglhangvum a Israel sepaite achingbei kelngoite jamcheh abah-u kamui. Chule Pakaiyin, ‘Hiche mite hin lamkai aneipouvin, lung mongin inlam kijot tau hen,’ tin aseiye” ati.
17 Ahab-in Jehoshaphat jah a, “Keidia thilpha imacha agao ngailou kaseipehsa ahi; thilse jeng bou aseiji ahibouve!” ati.
18 Micaiah-in aseiben, “Ngaiyin tun Pakai thusei: Van laltouna Pakai tou kamun, akoma a-Vantilte adingui.
19 Pakaiyin, ‘Ahab-in Ramoth khopi agasat’a athilo na dia joulhep thei koi nahiuvam?’ ati. Vantil abangin thu khat aseiyun, achomdang ho man achom aseiyui.
20 Chuin lhagao khat masang lama ahungin, Pakai ajonlut’in, ‘Ken gajou lhep inge,’ ati. Pakaiyin, ‘Iti nalhep ding ham?’ atile;
21 lhagao chun, ‘Cheng ting Ahab Themgaote jouthu jeng gaseisah inge,’ ati. Chuphat’in Pakaiyin, ‘Chen gajoulhep tan, jojong najo ding ahi,’ tin aseiye,” ati.
22 Hichun Micaiah-in, “Hitia chu um ahin, Pakaiyin na-Themgaote hi jou aseisah a, atahbeh a chu Pakaiyin nathina dia agon ahibouve!” ati.
23 Hichun Themgao Zedekiah chun Micaiah ajontouvin, amaichang abengin, “Itih a Pakai Lhagaovin eidalhah a nahenga thu asei khah ham?” ati.
24 Micaiah-in, “Insung dan sungnunga kisel dia najamlut teng hedoh tan nate,” ati.
25 Hichun Ahab-in avaibolte khat jah a, “Micaiah khu manin lang khopi sung vaipo Amon le leng chapa Joash henga kailut’in,
26 damsel’a kahung kile kit kahsea an le twi lhomcha cha nehsah a donsah din seipeh-in,” ati.
27 Micaiah apengjah jengin, “Damsel’a nahung kile kit pou poule, Pakaiyin kei kama thu aseilou hinte! Japin kasei ngai cheh-un!” ati.

Ahab thi
(1 Kgs 22:29-35)
28 Hichun Israel lengpa Ahab le Judah lengpa Jehoshaphat chu Gilead gamsunga Ramoth khopi sat din akon lhontai.
29 Jehoshaphat jah a Ahab-in, “Galmun ilut teng, ken von khel ing ting, nang vang lengvonin kivon jingin,” tin aseiye. Hiti hin Israel lengpan von akhel’in galmuna aluttai.
30 Syria lengpan kangtalai sepai lamkaite chu midang sat louva Israel lengpa bou asat diuvin aseiye.
31 Hiti hin lengpa Jehoshaphat amu phat’un Israel lengpa danin agel cheh-un, kisatpi din ajon cheh tauve. Ahivangin Jehoshaphat apengjah jengin, Pakai Pathenin ahuhdoh-in, asat ding hon adalhatauve.
32 Kangtalai sepai lamkaiten Israel lengpa ahilou amudoh phat’un adel tapouve.
33 Ahinla Syria sepai khat’in thalpi adon kap kap le lengpa Ahab galvon chin kah a aleng lut’in, “Eikap khatauve!” tin akangtalai tolpa jah a aseiyin, “Kile heiyin galmun dalha loiyin!” ati.
34 Gal kisat hah lai tah chun lengpa Ahab akangtalaiya aki-ngaiyin, Syriate avei. Ni lhum lhumin athipaitai.

THUSIMBU NINA BUNG 19

Themgao khat’in Jehoshaphat ahungpho
1 Judah lengpa Jehoshaphat damsel’in aleng inpi Jerusalema ahung kile kittai.
2 Hanani chapa, Themgao Jehu chun lengpa akimupin ajah a, “Migiloute kithopia Pakai hotbolte panpi chu thildih a gel nahim? Nathilbol chu Pakai alunghanlo tai.
3 Ahivangin naphatna vang aum nai. Mipin ahouvu Sherah pathenu lim kisemthu jouse nasumangin, Pathen deiya chon ding nagoi,” ati.

Jehoshaphat thil semphat
4 Lengpa Jehoshaphat Jerusalem a achen jeng vangin, lhanglam Beersheba a pat sahlam Ephriam thinglhang gamgi chin geiyin, aphat phat chan mipi avil jingin, Pakai apu apateu Pathen lama hung kihei kit din mipi akou jinge.
5 Judah gamsung kulpi kaisa khopi tin a thutan vaihom akoiyin,
6 amazon chu hilchah-in, “Chingtheiyin mi chungthu tan’un; mihem thaneina natong nahiuve; mi chungthu natan tengu Aman naumpiuve.
7 Pakai gingin chingtheiyin na tongun, ajeh chu Pakai i-Pathen’un thudih loule langnei, nehguh bolmi anop lensahjipoi,” ati.
8 Jerusalem khopi sunga Pakai Danthu palkeh hole kho mite kinah kibao thua thutan din Jehoshaphat’in Levite le Thempuho chule khosung lamkaite apansah tai.
9 Amaho hi Jehoshaphat’in ahilchah-in, “Nakin’u chu Pakai ginga nabol diu, nabol chan’uva kitah tah a Pakai thu nanit diu ahi.
10 Gamsung mi nahipiu koi hile khopi dang danga kona tolthi thu hihen Danthu le thupeh palkeh thu ham nahenguva ahung lhut teng, Pakai douna chengsea themmo achan louna diuvin, athu kikhol teng aumchan nam lhah diu phate chan hil masauvin. Chutia naboldaule, nang hon jong gamsung mi nahipiuvin jong Pakai lunghan husa najah tei diu ahi. Natoh diu kin nabol’u vangle themmo pouvin nate.
11 Houthua thu tanna jousea Thempu chungnung Amariah thu chai ding ahin, thudanga kinah kibaona thu chai ding chu Judah gamsung vaipo, Zebadiah, Ishmael chapa hi ding ahi. Thutanna phunga thu kitan bang banga tohdoh ahitheina dia Leviten avet tup diu ahi. Hangtah-in hiche kihilna chengse hi tongdoh-un, Pakaiyin adih chu panpi jing ta hen!” ati.

THUSIMBU NINA BUNG 20

Edom douna gal
1 Phat chom khat jouvin Moab le Ammon sepaiten, apanpiu Meun mite to Judah gamsung ahung sat tauve.
2 Thupole phabep ahungun lengpa Jehoshaphat henga, “Nang sat din twimang gal lang khat’a khun Edom a pat sepai hon tamtah ahung kitol’ui. Chule amin chom Engedi kiti Hazazon Tamar jong alatauve,” atiuve.
3 Jehoshaphat akichan, Pakaiyin lampi ahilna din ataove. Chujongle gamsung pumpkin an ngol din thu apetai.
4 Judah gamsung khopi tin a konin Pakai lampi hil ding dongtoh din Judate Jerusalem khopia ahung lhai lhai jengui,
5 chujongle Jerusalem khosung mite pumin Houin lhongthah laiya chun akikhomtauve. Lengpa Jehoshaphat mipi angsunga agadingin
6 ogingtah-in ataovin, “Vo Pakai kapu kapateu Pathen, van a konin vannoi namtin vaipi chunga vai nahom’e. Thahat thu neitah, nadou thei umlou ahi.
7 Nang ka-Pathenu nahi. Namite hiche gamsung ahung lut’u chun, hiche gama chengte nadeljamin, tonsot goulo din agamsung hi najolpa Abraham chilhahte napetai.
8 Amaho achengun, Nang jabolnan Houin khat sauvin,
9 ijemtia alen amat diuva gal ham, natgol ham, kel hamin ahin lhunden tengu, hiche Houin maiya hung dinguva nahenga tao diu ahi. Agenthei teng nahenga ataovule nasanpeh a nahuhdoh theina dia abol’u ahi.
10 “Tun Ammon, Moab chule Edom miten eihung sat tauve. Kapu kapateu Egypt a kona ahung kitoldoh-u chun hiche gamsung hoa chun nalutsah pon, hijeh chun kapu kapateuvin apeldoh peh-un asumangpouve.
11 Hitipia hi lethuh eigot’u ahi, neipehsau gamsunga kona nodoh dia eihung got’u ahitai.
12 Nang ka-Pathen’u nahi! Talen matsah-in, ajeh chu eihung del khum’uva sepai hijat masanga hi panpibei kahitauve. Bol ding kahetapouve, eipanpi diuva Nangbou kakat cheh-u ahitai,” ati.
13 Judah mi pasal jouse, aji achateu pumin Houin maiya chun ading cheh-uve.
14 Japi lah a ding Levi mi khat chunga Pakai Lhagao ahung chui. Levipa chu amin Jahaziel ahin, Zechariah chapa ahi; Asaph insung kon ahin, Asaph a kon Mattaniah, Jeiel chule Benaiah, hitia chu kiguijop ahiuve.
15 Jahaziel hin, “Vo lengpa le Judah gamsung chule Jerusalem mite, hiche galmi sepai hon tamtah khu nagin louhel diuvin Pakaiyin aseiye. Hiche gal hi Pakai sat ding ahin, nangho gal’in gel dauvin.
16 Jing teng Ziz lhanglam a ahung kitol tengu delkhum jengun. Phaicham chin, gammang lam jotna, Jeruel koma khu nakisatpi diu ahi.
17 Gal chu nasat diu ahipoi; chang pangun veuvin; Pakaiyin gal najosah diu ahi. Judah gamsung le Jerusalem mite, lung opkai le kichat boldauvin. Galsat din kon’un, Pakaiyin panpi nauvinte!” ati.
18 Hichun lengpa Jehoshaphat akunin tol’a mai asulut’in, mipi abonchauvin kunin Pakia chibai aboh tauve.
19 Kohath le Korah phung sunga Levite adingdoh-un othong leuvin Pakai Israel Pathen avahchoiyui.
20 Ajing jingkah matah-in mipi chu Tekoa kom gammang jonin akitol tauve. Akitoldoh doh-un Jehoshaphat’in mipi jah a, “Vo Judah gam le Jerusalem mite! Pakai na-Pathenu tahsan’un, ding det cheh-uvin. Themgaopan naseipeh-u tahsahn’un, nalo lhin tei diu ahi,” at.
21 Japi to akihoutoh jouvin lengpan lathemho phabep chu, phat bihnei nikhoa akivon jiu poncho sil’a sepaite masanga kitol’a la sa a, “Vahchoiyun Pakai! Alungset longlou ahi!” ti din asoltai.
22 Lathem ho lasah chun Pakaiyin ahung galkonte sepaite lungsunga meidoina akhumtai.
23 Ammon mite le Moab miten Edom sepaite adelkhum’un asugam hel tauve, chuin Ammon mite le Moab mite ma akisat kit’uvin ahi.
24 Judah sepaite nelgam sunga intingvum khat ahung kaldoh phat’un akidoupiteu sepaite thisa kijam chap jeng amu’vin, ajamdoh beihel a athisoh hel’u amudoh tauve.
25 Jehoshaphat le asepaite thil kichom din alut’un, gancha tampi le neh le chah, sille chen chule thildang manlu tah tah tampi akilah-ui. Thil chom nan nithum jen asulut’uve, ahivangin thilkeo atam behseh-in akilah jou hih laiyui.
26 Ni li lhin nin Beracah phaiya akikhom’un, athilbol natsat jal’in Pakai avahchoitauve. Hijeh a chu hiche phaicham hi “Beracah” kitilo ahi.
27 Jehoshaphat’in asepaite kipah tah-in Jerusalema ahinpui kit tai, ajeh chu Pakaiyin amelmate ajopeh-in ahi.
28 Khopi ahung lhun phat’un semjang asaiyun, summon amut’un, Houin lam ajontauve.
29 Pakaiyin Israel melmate ajo thusim japha namtin vaipi akichatauve.
30 Hiti hin Jehoshaphat chun lung mongin vai apon, jet le vei sah le lhanga konin Pathenin lung monna apei.

Jehoshaphat lengvaipoh kichai
(1 Kgs 22:41-50)
31 Judah leng achan hin Jehoshaphat kum somthumle nga ahitan, kum somni le nga sungin Jerusalem khopia lengvai apoi. Anu chu Azubah ahin, Shilhi chanu ahi.
32 Amasanga apa Asa bangin Pakai mit mun thildih jeng abol’e;
33 namdangte doiphung ho vang asumangsoh poi. Mipin jong apu apateu Pathen lungthim pumpkin ahoudeh pouve.
34 Jehoshaphat thilbol abonchan, lengvai apoh til’a pat achai geiyin Israel lengte thusim lah a Hanani chapa Jehu thusimbua akijih soh keiye.
35 Phat khat’in Jehoshaphat chu thilse jeng bol Israel lengpa Ahaziah to anapangkhom’e.
36 Eziongeber kong kaimun a Twikhanglen a kitol kong innei anasemkhom’ui.
37 Ahivangin Mareshah khoa Dodavahu chapa Eliezer chun Jehoshaphat agihsal’in, “Ahaziah to napankhom jeh a nasemdohsa kong innei jong Pakaiyin asuhmang ding ahi,” ati. Hiti hin kong innei ho chu akitatkeh-in, Twikhanglen a itih-in jong akitolpoi.

THUSIMBU NINA BUNG 21

1 Jehoshaphat athin, David khopia lengte lhan a avuiyun, achapa Jehoram chu akhel’in leng achangtai.

Judah lengpa Jehoram
(2 Kgs 8:17-24)
2 Judah lengpa Jehoshaphat chapa Jehoram hin sopi pasal gup aneiyin: Azariah, Jehiel, Zechariah, Azariahu, Michael chule Shephatiah ahiuve.
3 Apauvin sana dangka chule gou manlu tah tah tampi pin ahoppeh-in, khat cheh chu Judah gamsunga kulpi kaisa khopi khat cheh angasah-e. Jehoram hi aupapen ahijeh-in Jehoshaphat’in akhel’in leng achansah-e.
4 Jehoram hin lenggam sung athu nunsoh hel phat’in asopite chengse le Israel vaipote phabep athatsoh hel’e.
5 Leng achan hin Jehoram kum somthum le ni ahin, kum get sungin Jerusalem khopia lengvai apoi.
6 Ahab chanu akichenpi jeh-in Jehoramin lengpa Ahab gitlou jouse le Israel leng dang ho umchan phalou ajom’e. Pakai dounan achonsen,
7 ahivangin Pakaiyin David lenggam asuhmang nompoi, ajeh chu David to kitepna asem a, achilhah khat leng chang jing dia ateppeh ahi.
8 Jehoram lengvaipoh sung hin Edom gamin Judah gama gal ahungbol’un, jalenna neiya lenggam khat’in aumdoh tai.
9 Hijeh chun Jehoramle avaipote kangtalai pumin akonun Edom agasat tauve. Jan kah-in Edom sepaiten anaumchah tauvin, ahivangin atumkeh-un ajamdoh nah nah-ui.
10 Hichea pat hin Judatea konin Edom hi ongthol’in jalenna aneitai. Hiche sungma hin, Jehoramin Pakai, apu apate Pathen adonda jeh-in, Libnah chopin jong gal ahinbol’e.
11 Jehoram hin Judah gamsung thinglhang dunga jong namdangte doiphung asemdoh-in, Judate le Jerusalem kho mite Pakai dounan achonsetsah-e.
12 Eijah Themgaovin Jehoram hi lekha athot’in hitin aseiye, “Pakai napu David Pathenin themmo nachantai; ajeh chu napa lengpa Jehoshaphat umchan jong najompon, napu lengpa Asa umchan jong najompoi.
13 Ahab le akhel’a leng chang hon Israel kitah louna ageisah bangun, Israel lengte umchan najomin, Judate le Jerusalem kho mite Pathen dia kitah louvin naumsah tai. Nasanga miphajo nasopite geiyin nathat jenge.
14 Hijeh a chu Pakaiyin namite, nachate, najite talen gihsa tah amatsah a, nanei nagou jouse asuhmang ding ahi.
15 Nangtah jong nagiljang nan tin, niseh a khoh cheh cheh ding ahi,” ati.
16 Philistinete phabep le Arab mi phabep jong Twikhanglen pang, Sudan mi phabep chenna vel dunga achengui. Hiche ho jong hi Pakaiyin Jehoram sat din atildoh-e.
17 Judah gam gal agabol’un, leng inpia gou achom’un, lengpa jite le achapa lhumpen Ahaziah tilou adangse gal-hingin akaitauve.
18 Hiche nung hin Pakaiyin Jehoram lengpa giljang anatsahtai.
19 Kum ni sung tobangin akhoh cheh cheh jengin, akhon khon nan gim genthei chungnung thoh-in lengpa Jehoramin athilotai. Apu apateu lunghempina kibol bangin amiten Jehoram lunghempi nan lhumpi adengpouve.
20 Jehoram hi kum somthum le ni ahin leng achangin, kum get sungin Jerusalem khopia lengvai apoi. Athi chun koiman ahoh poi. David khopia avui nauvin, lengte lhan a vang avuipouve.

THUSIMBU NINA BUNG 22

Judah lengpa Ahaziah
(2 Kgs 8:25-29; 9:21-28)
1 Arab mi phabep lamkai nan lengpa Jehoram chapate agathat gam’un, alhumpen Ahaziah bou ahoiyui. Hijeh chun Jerusalem kho miten apa khel’in Ahaziah leng achansah tauve.
2 Ahaziah hi kum somni le ni ahin leng achangin, kum khat sungin Jerusalem khopia lengvai apoi.
3 Anu Athaliah, Israel lengpa Ahab chanu, lengpa Omri tunun ahilsen Ahaziah-in jong Ahab insung thilse bol ajoptai.
4 Pakai douna achonsetna jeh chu, apa thi nunga Ahab insung mite thumop a apanjeh-un akipal lhuhsah lotauve.
5 Athumop’u ajuijeh-in Israel lengpa Joram to Syria lengpa Hazael dounan gal abol khom lhon’e. Gilead gamsung Ramoth khopia akisat’un, Joram amavotauve.
6 Amaha damdoh kah a din Jezreel khopia ahungin, hikoma chun Ahaziah-in agavil’e.
7 Joram vil’a ache hi Pathenin Ahaziah kipal lhuh nan amangtai. Jezreel khopia Ahaziah nichon sung hin Pakaiyin Ahab leng vaineina sumang dia alhendoh, Nimshi chapa Jehun Ahaziah le Joram akidintepi.
8 Hiche leng vai neina suhmangna dia Pathen thutansa molso dia Jehu akigotna hin, Joram vil’a ahungna a Ahaziah lhonpi atute le Judate lamkai ho to akitoh khauve. Abonchauvin Jehun athat gamtai.
9 Ahaziah ahol’ule Samaria khopia akisel’e. Jehu henga ahinkai lut’un athat tauve. Along vang chu, ajo chan a Pakai kinbol’a apu Jehoshaphat jabolnan, phaten avui nauve. Lenggam sunga vaipo thei Ahaziah insung mi khat cha jong aumtapoi.

Judah lengnu Athaliah
(2 Kgs 11:1-3)
10 Lengpa Ahaziah nu Athaliah chun achapa kitha ajah jah chun Judah gam lengte insung mi abonchauva thagam din thu apetai.
11 Ahaziah sopinu Jehosheba chu Jehoiada Thempupa to kicheng ahi. Hichenu hin tha dia umsa chapati lah a konin Joash chu guh thim chan adom mangin Houin sunga jalkhun khat’a alimbol’in avah-e. Hitia aseldoh jeh hin Athaliah khut’a athina dia konin ahuhdoh-e.
12 Kumgup sung, Athaliah lengnu hinsungsen, Joash chu akisel’e.

THUSIMBU NINA BUNG 23

Athaliah douna galguh
(2 Kgs 11:4-16)
1 Kumgup jen anga nungin Jehoiada Thempu pan kipat phat ahisahtai. Sepai lamkai nga to kitepna aneiyun; amaho chu Jeroham chapa Azariah, Jehohanan chapa Ishmael, Obed chapa Azariah, Adaiah chapa Maaseiah, chule Zichri chapa Elishaphat ahiuve.
2 Amaho hi Judah gamsung khopi tin a akoljin’un, Levite le phungkhai upa chengse Jerusalem a ahinpui tauve.
3 Abonchan Houin sunga akikhom’un, lengpa chapa Joash chutoh kitepna khat asemtauve. Jehoiadan ajah-uva, “Veuvin lengpa chapa hi! Pakaiyin David chilhah khat leng chang jing dia atepsa banga, tua ama hi leng chang ding ahi!
4 Tua hitia ibol diu ahi: Choldo nikho le Levite le Thempuho kinbol’a ahung tengu, hop thum a hop khat’in Houin kelkot jouse a-nga diu,
5 hop khatman leng inpi a-ngauva, chule adangsen kulpi bul kelkot phung anga diu ahi. Mipi Houin lhong sung dimset’a kikhom diu ahi.
6 Lhachale Thempuho le Levite tilou midang Houin kong-op’a lut thei louhel ding ahi. Thempuho le Levite vang chu thensosa ahijeh-uva lut thei diu ahin, midangsen vang Pakai thuhil nit’a polam a um ding ahiuve.
7 Leviten chemjam sadohsa choiya lengpa kimvel’a ding diu, ache na chan a lengpa alhonpiuva, Houin a hung lut go chan atha diu ahi,” ati.
8 Levite le Judaten Jehoiada thuhil bangin amolso tauve. Choldo nikhoa kinbol chaisa ho chu asoldoh pouvin, hiti hin lamkaiten kinbolda ho le kinbol dia hung ho akop’in angaichat bangin akou theiyuve.
9 Lengpa David gou Houin a kikoi tengcha ho le lumho chu Jehoiadan sepai lamkaite apetai.
10 Lengpa huh din Jehoiadan Houin mai kimvel lhungin chemjam sadohsa choiya mi apansah soh keiye.
11 Hichun Jehoiadan Joash ahinpuidoh-in, lallukhuh akhuhpeh-in, leng hidol kisutna Danthu jol khat apei. Hiti hin Joash chu leng achansah tauve. Thempu Jehoiada le achapaten Joash chu thao anu’vin, amilip’in asamu’vin, “Lengpa hingsot hen!” atiuve.
12 Lengpa akipapiu husa hi Athaliah-in ajan, japi kikhopna Houin lama a alhaijeltai.
13 Hikoma chun Houin kotphunga lengthah pa amui, lengho dinna kisem laiya adingin, sepai lamkaite le summon mut themten aumchah-ui. Japan kipah thanom tah-in kho asam’un, summon amut’ui, chule Houin a lathemten tumgingthei achoiyun, golvah kibol chu alamkaiyui. Athaliah chun ponsil abottel’in, lung natah-in asamin, “Lengmun chupa! lengmun chupa!” ati.
14 Houin hopsunga Athaliah thaden ding hi Jehoiadan adeipon, sepai lamkaite akouvin, “Sepai kigol kah a chun kaiyun lang, huhdoh ding gopen pen that jengun,” ati.
15 Sepaiten aman’un, leng inpia akailut’uvin, sakol kelkot phunga chun athat tauve.

Jehoiada thil semphat
(2 Kgs 11:17-20)
16 Pakai mite ahitheina diuvin Thempu Jehoiadan lengpa Joash le mipi akouvin kitepna khat asemtauve.
17 Chuin abonchan Baal houin a acheuvin aphe lhatauve. Maicham le chukoma milimdoi chu avobongun, maicham masanga Baal Thempupa Mattan athat tauve.
18 Jehoiadan Thempuho le Levite chu Houin kinbol’in angansei. Mose Danthu dungjuiya Pakai henga kilhaina gantha kinbol, pumgo natoh jousea pang dia lengpa David-in anganse nau kin jouse atohdoh diu ahi. Golvahna tumgingthei tum dinga jong pang diu ahi.
19 Jehoiadan hou thudol’a aboh ho lutsah da na din Houin kelkot phunga mi adinsah-e.
20 Jehoiada lamkainaa Houin a pat leng inpi geiya hung kijot, lengpa hinpui lah a chun sepai vaipote le khosung lamkaiho chule mipi jong apangsoh tauve. Leng inpi kelkotpia alut’uvin, lengpa laltounaa atoutai.
21 Mipi akipahsoh keiyun, Athaliah kitha phat’in khopi jong chamdel’in athip tai.

THUSIMBU NINA BUNG 24

Judah lengpa Joash
(2 Kgs 12:1-16)
1 Kum sagi bou ahin Joash chu leng achangin, kum somli sungin Jerusalem khopia lengvai apoi, anu chu Beersheba khoa Zibiah ahi.
2 Jehoiada Thempu damlai sungsen Joash hin Pakai lunglam jeng abol’e.
3 Jehoiadan lengpa Joash din ji ni apuipeh-in, chapa chanu tampi ahinpeh lhon’e.
4 Leng achan jou phabep’in Joash hin Houin semphat agotai.
5 Judah khopi tin a Thempuho le Levite asol’in, kumseh a Houin semphatna ding sum lhingset’a mipia kona agadon diuvin aseipeh-e. Tohdoh loi dia aseipeh le, Levite akinomsot leuvin,
6 hijeh chun alamkaipu Jehoiada akouvin, “Pakai chenna ponbuh kinbolna dia Pakai lhacha Mose’n mipi peh dia aseisa kai chu Judah gamsung le Jerusalem khosunga Levite ebola nadonsah da ham?” ati.
7 Numei thanghoi nu Athaliah seijuihon Houin anasuseuvin, manchah theng ho jong Baal hounan anamangui.
8 Leviten sum kholna ding thingkong asem’uva Houin kelkot phunga akoi diuvin lengpan aseipeh tai.
9 Apatna Pathen lhacha Mose’n gamthip laiya anadon banga milip’in Pakai henga kai ahinchoi cheh na diuvin Jerusalem pumpi le Judah gamsung pumpia thu athot tauve.
10 Hiche hi mipi le alamkaiteu deilam ahin, kai ahinchoiyun thingkong chu adipset tauve.
11 Niseh le Leviten thingkong chu leng inpia vaipoa nganse ho henga achoijiuve. Thingkong adim phat phat le leng inpia lekhasunpa le Thempu chungnung thalheng chun sum chu aladoh-in, thingkong chu akikoina ahin nungthah jiuve. Hiti hin sum tamtah adongdoh-uve.
12 Lengpa le Jehoiadan sum chu Houin sempha dia nganse ho ape lhonin, amahon song khengthemho le thingthembolte, chule thih khengthemho chu Houin semphatna din apeuve.
13 Natong hon hatah-in abol’un, Houin chu akisahdoh til lim bangin asemphauvin, det chet’in asem’uve.
14 Houin semphat kin achaiyun sana dangka valdoh chengse chu lengpa le Jehoiada apeuvin, Houin sung manchah thildang dangle khon hon asem lhontai.

Jehoiada thilgon kikhel
Jehoiada hinlaiyin Houin a aphat phat chan kilhaina gantha ima kibol jinge.
15 Jehoiada ateh kembet’in kum ja khat le kum somthum ahin athi.
16 Israelte ding le Pathen ding chule Houin dia thil abol ho jeh-in Jehoiada chu David khopi lengte lhan a avuiyui.
17 Jehoiada thi thin Judah gamsung lamkaiten amaho thujoh alahna din Joash lengpa athu nuntauve.
18 Hijeh chun mipin Houin a Pakai, apu apateu Pathen hou angauvin, milimdoi poule Asherah pathennu lim pou ahou pantauve. Hitobang chonset jeh a themmo nan Judah gamsungle Jerusalem chunga Pakai alung hansah tai.
19 Ahung kile kitna diuvin Pakaiyin Themgaote agagihsal sah-in, mipin la ngaisah-in aneipouve.
20 Hichun Pathen Lhagaovin Thempu Jehoiada chapa Zechariah amang chan, Zechariah japan amusoh theina mun khat’a adingin, “Pakai Pathenin ipi dia athupeh chengse nit louva manthahna kilhut khum nahiu hi ahetnom’e. Ama nadonda jeh-uva Aman jong nadondau ahitai!” tin asamtai.
21 Lengpa Joash jong Zechariah douho to akithon, lengpa thusah-in Zechariah chu Houin leitol’a songin asep tauve.
22 Zechariah pa Jehoiadan lengte akithopi chu lengpan asumil’in, Zechariah athattai. Zechariah athi konin apengjah-in, “Pakaiyin nathilbol’u hinve hen talen matsah tei tei hen!” ati.

Joash lengvaipoh kichai
23 Chuche kum chavang laiyin Syria sepaiten Judah gamsungle Jerusalem ahung sat’un, lamkai jouse athat’un, thil tamtah achomdoh-un Damascus khopia apolut tauve.
24 Syriate sepai lhomcha ahiuvin, ahivangin Pakai apu apateu Pathen adonda phat’uva Pakaiyin Judate sepai tamtah chu Syria gal alelsah ahi. Hitia hi lengpa Joash chu Pakaiyin talen amatsah ahi.
25 Joash jong melse tah-in amavo’uvin, melmaten adalhah nungin jong avaipoa pang mi nin adou lhonin, Thempu Jehoiada chapa atha phulah nan, ajalkhuna athatden lhontai. Joash chu David khopia avuiyun, ahivangin lengte lhan a avuipouve.
26 Joash doute ni chu Shimeath kiti Ammon numeinu chapa Zabad le Shimrith kiti Moab numeinu chapa Jehozabad ahilhon’e.
27 Lengte lekhabu hilchetnaa chun Joash chapate thusim jouse le Joash douna gaothu kiseiho chule Houin asah phat thusim jouse akijihsoh keiye. Joash khel’in achapa Amaziah leng achangtai.

THUSIMBU NINA BUNG 25

Judah lengpa Amaziah
(2 Kgs 14:2-6)
1 Kum somni le nga alhinin Amaziah leng achangin, Jerusalem khopia kum somni le ko sungin lengvai apoi. Anu chu Jerusalem khoa Jehoaddin ahi.
2 Amaziah hin Pakai lungdei abol’in, ahivangin lung thaseket’in abol’e.
3 Panmun akisemdet soh phat’in apa that vaipo chengse athattai.
4 Achateu vang athatpoi, hijongle Mose Danthua Pakai thupeh chengse anit’in: “Chate themmo jal’a nule pate tha lou ding, nule pate themmo jal’a jong chate tha lou ding; mihem chu ama thilse boljeh a bou tha ding ahi,” kiti chu ajuiye.

Edom douna gal
(2 Kgs 14:7)
5 Lengpa Amaziah hin Judah phungle Benjamin phung sunga pasal jouse sepai din agoltoh-in, aphung phungin akiloisah-in, sang khat cheng ja khat cheng lamkai ding jong akoipeh-e. Hiche hin pasal kum somnia lhah chung lamse apangun, sang jathum alhinguve. Hicheng hi kilheng chilset sepai ahiuvin, galsat dia gonsa, tengle lum tho thei cheh ahiuve.
6 Hicheng kalval’in jong Israel sepai sang ja khat jong dangka kilogram sang thule ja lin athalah bei.
7 Ahinla lengpa henga Themgao khat achen, “Hiche Israel sepaite hi lhonpi dan. Sahlam lenggama hungkon mite hi Pakaiyin aumpipoi.
8 Amaho hin galsatna nahatsah dom diuvin gel khan natin, najosah thei le nalelsah thei thanei chu Pakaijoh ahi, Pakaiyin gal nalelsah ding ahibouve,” ati.
9 Themgaopa jah a Amaziah-in, “Dangka chujat kapeh chu iti dingba hitam?” ati. Themgaopan, “Pakaiyin asanga tamjo jong petheiyinte!” ati.
10 Hijeh chun Amaziah-in athalah sepaite alesol’in, inlam jon dingin aseipeh tai. Hichun inlam ajon’uvin, Judah gamsung mite chunga alung hang lheh jenguve.
11 Amaziah akihansah-in chikhuh phai geiyin asepaite lamkaiyin achei. Chikhuh phaiya chun Edomte asat’uvin, Edom sepai sangsom jen athat’un,
12 sepai sangsom ma aman’uve. Gal-hing amatse seu chu Sela khopia songpi tingvuma akaidoh-un asonlha lha jengun, hiti hin anoiya songpi dunga akitat lih gamtauve.
13 Hiche kah hin Amaziah-in gal’a akonpi nomlou Israel sepaiten Samaria le Beth Horon khopite ni kah a Judate khopi jouse gal abol pauvin, pasal sang thum jen athat’un, thil tamtah achomdoh-uve.
14 Edom mite agajao ahung kile kit chun Amaziah-in milimdoi semthu ahinpon, atungdoh-in chule ahouvin, kithoi nan gimnamtui alhut khum’e.
15 Athilbol hin Pakai asulung hangin, hijeh chun Pakaiyin Amaziah henga Themgao khat asol’e. Themgaopa hin, “Nang khut’a kona amite bon huhdoh joulou namdangte semthu pathenho chu houva nahim?” tin Amaziah adonge.
16 Amaziah-in, “Itih a pat kon lengpa thumop dia napansah ham? Paodan! Napaole kathalo ding nahi!” tin ahoh lhai. Themgaopa chu ahaiyin, ahivangin, “Kathumop don louva hichengpi naboljeh a hi Pathenin nasuhmang got ahi kahetai,” ati jouvin bou athip’e.

Israel douna gal
(2 Kgs 14:8-20)
17 Judah lengpa Amaziah le athumop a apang hon Israel abulutauve. Amaziah hin Israel lengpa Jehoash, Jehoahaz chapa, Jehu tupa, henga mi asol masan kisatpi din agachouve.
18 Amaziah donbutnan Jehoash-in, “Phat khat’in Lebanon lhanga lingphung khat’in Cedar phung jah a, ‘Kachapa ji din nachanu neipen,’ tia agahno leh; gamsa khat’in ahinho pan lingphung chu achonbongtai.
19 Vo Amaziah, Edomte najojeh a hoitho nahim, in a ki-umthim dia kahilguh nahijoi. Nangle namite manthahlo bep dia kitomona bolgoa nahim?” ati.
20 Amaziah-in la angaipeh poi. Edom mite milimdoi ahoujeh a Amaziah gal’in ajo ding chu Pathen lung lamjoh ahitai.
21 Hiti hin Israel lengpa Jehoash chu Judah lengpa Amaziah to kisat din akontai. Judah gamsung Beth Shemesh a akitoh lhonin,
22 Judate sepaihon alel tauvin, sepaite a-inlam cheh a ajamtauve.
23 Jehoash chun Amaziah amanin Jerusalem a akaiyin, khopi pal chu Ephraim kelkot phunga pat palning kelkot phung gei, metre jani deh jen avochimtai.
24 Houin sunga sana dangka jouse le Obed Edom chilhahten a-ngau Houin manchah jouse, chule leng inpia gou kikhol jouse chu Samaria khopi geiyin akipoh-e. Numei geiyin gal-hingin ahinkaiye.
25 Judah lengpa Amaziah chu Israel lengpa Jehoash sangin kum somle nga ahingsot joi.
26 Amaziah thilbol adangse jong, alengvaipoh til’a pat achai geiyin Judah le Israel lengte thusimbua akijih lut cheh-e.
27 Pakai doumah abol’a pat Jerusalem khosunga Amaziah dou ding mihem aum jinge. Akhon nan Lachish khopia ajamlut’in, ahivangin amelmaten ajuipeh-un agathat tauve.
28 Along chu Jerusalem geiyin sakol apohsah-un, David khopia lengte lhana avuitauve.

THUSIMBU NINA BUNG 26

Judah lengpa Uzziah
(2 Kgs 14:21-22; 15:1-7)
1 Judah mipin Amaziah chapa kum somle gup bep Uzziah chu apa khel’a leng din alhengtauve.
2 Uzziah-in Elath khopi alah kit’a khopi asemphatna chu Amaziah thinung ahitai.
3 Kum somle gup ahin Uzziah leng achangin, kum som nga le ni sungin Jerusalem khopia lengvai apoi. Anu chu Jerusalem khosung mi Jecoliah ahi.
4 Apa umchan ajomin Pakai deilam bou abol’e.
5 Hou thudol’a athumopji Zechariah hin laisen kitah tah-in Pakai kin abol’in, Pathenin jong vang aboh-e.
6 Uzziah hin Philistinete asat’in, akhopiu, Gath, Jamnia, chule Ashdod, hicheng kulpi pal jouse avochimin, Ashdod khopi komle Philistia gamsung adangse sea khopi asemin kulpi akaikhumtai.
7 Uzziah chu Philistinete le Gurbaal koma cheng Arab miho, chujongle Meun mite ajona din Pathenin apanpi.
8 Ammon miten Uzziah kai apeuve, hiti hin Uzziah athahat lheh jengin Egypt gam geiyin aminthangtai.
9 Uzziah hin Jerusalem kulpi akaiphan, palning kelkot phung le phaicham kelkot phung chule pal ningkoi laiya kho-nga na intingvum asemdoh-e.
10 Gamchang noiya jong kulpi akaiyin lhumlam thinglhang bul dungle phaicham dunga gancha tampi akoijeh-in twikai phung tampi jong alaiye. Loubol thanom mi ahijeh-in, thinglhang gamsunga lengpilei bol din mipi atil’in, leipha jouse louva bol din aseipeh-e.
11 Galbol ding gotsan sepai tampi akoiye. Chin ding thu jouse alekhasun te ni Jeiel le Maaseiah chun lengpa lhacha ho lah a mi Hananiah hil bangin ajih lut jing lhon’e.
12 Sepai lamkai jeng jong sangni le jagup jen aneiye.
13 Hiche sepai lamkaite noiya hin lengpa melmate phate keiya sat thei ding, sepai sang jathumle sang sagi le ja nga aum’uve.
14 Uzziah hin sepaite chu lumle teng, thih lukhuh, thih sangkhol, thalpi le thalchang, chule songboma se ding song geiyin asempeh-e.
15 Jerusalem khopia chun thil sem a agoihon intingvum dungle palning dunga kona thalpi kapna dingle song lentah tah se na ding asem’uve. Muntina aminthangin, Pathena kona panpina amu jeh-in athahat lheh jengtai.

Hoitho jeh a Uzziah talen mat
16 Uzziah ahung hatdoh phat hin akiletsah hoithon akipal lhuh lotai. Gimnamtui maicham a gimnamtui halnam din Houin a alut jengin, Pakai a-Pathen jalou tah-in aboltai.
17 Hichea hin Thempu Azariah hi Thempu hat tah le hangtah som get to alhonin lengpa ajuiyun,
18 suh tang ago’uve. Thempuhon, “Vo Uzziah! Pakai henga gimnamtui lhutnamna ding thu naneipoi. Aaron chilhah Thempu thensosa hon bou hiche hi abol diu ahi. Munthenga konin potdoh-in. Pakai Pathen doumah naboltai, avangboh chang tapon nate,” atiuve.
19 Uzziah chu Houin sunga gimnamtui maicham koma adingin, gimnamtui lhutna lheng achoiye. Thempuho chunga alung hangin, ahinla apet tah chun achalpang vun jouse apatsoh jengtai.
20 Azariah le Thempu dang hon lengpa chalpang chu timul thou leuvin aveuvin, ada acham louvin Houin a akaidoh tauve. Pathen talen amatsah phat chun ama jong kinloi tah-in apotdoh tai.
21 Hiche aphahna jeh hin lengpa Uzziah chu ahinkho lhumkeiyin hou thudol a abohlo tai. Houin a alut kit thei loujeh-in, a-ina aki-umin, imacha jong abolpon, achapa Jotham gam vaipon apangtai.
22 Alengvaipoh laiya lengpa Uzziah thilbol adang jouse jong Amoz chapa Isaiah-in ajihsoh keiye.
23 Uzziah athin, lengte lhanmol’a avuiyun, aphah jeh-in lengte lhan a vang avuipouve. Akhel’in achapa Jotham leng achangtai.

THUSIMBU NINA BUNG 27

Judah lengpa Jotham
(2 Kgs 15:32-38)
1 Kum somni le nga ahin Jotham leng achangin, kum somle sagi sungin Jerusalem a lengvai apoi. Anu chu Jerushah ahin, Zadok chanu ahi.
2 Apa bangin Pakai deilam abol’in, amavang apa bangin Houin a gimnamtui lhutnamin chonset abolpoi. Ahinla mipi chu achonse se jengui.
3 Houin sahlam kelkot sem a chu Jotham ahin, Obed kiti lai Jerusalem khosunga khopi pal saotah agenin ahi.
4 Judah gam molsang dunga khopi asemdoh doh-in, gammang lah a jong kulpi akaiyin, kho-nga na intingvum asemdoh-e.
5 Ammon lengpa le asepaite asat’in ajouve. Ada acham louvin Ammon mite chu kum thum sungin kai anen, kaiho chu: dangka kilogram sang thum le ja li, suhlou chang ate-na sang som le sakol chang ate-na sangsom ma ahi.
6 Pakai a-Pathen thu kitah tah a anit jing jeh-in Jotham ahat cheh cheh jenge.
7 Jotham lengvaipohna thilsoh dangle agalsat ho, chule anatoh dan jouse Israel le Judah lengte thusimbua akijih soh keiye.
8 Leng achan chun Jotham kum somni le nga alhingtan, kum somle gup sungin Jerusalem a lengvai apoi.
9 Jotham athin David khopia avuiyun, akhel’in achapa Ahaz leng achangtai.

THUSIMBU NINA BUNG 28

Judah lengpa Ahaz
(2 Kgs 16:1-4)
1 Kum somni ahin Ahaz leng achangin, kum somle gup sungin Jerusalem a lengvai apoi. Apului David umchan pha ho chu ajompoi; Pakai deimo lam lam abol jon,
2 Israel lengte umchanjoh ajomtai. Baal doilim pou akilhahjol’in,
3 Hinnom phaiya gimnamtui alhut namin, Israelite ahung kitol lut til laiyuva Pakaiyin anodoh miho chonna thet umtah tah ajomin, milimdoi hounan achapate geiyin aneiyin, kilhainan athat’e.
4 Namdangte doiphung dung, lhangvum dungle thinglim noi dunga Ahaz hin kilhaina gan athat’in, gimnamtui alhut nam’e.

Syria le Israelte kigal
(2 Kgs 16:5)
5 Lengpa Ahaz chonset jal’in Pakaiyin Syria lengpa ajosah-in, Judate tamtah Damascus khopi lang geiyin sohchangin akaisah tai. Pakaiyin Israel lengpa, Remaliah chapa Pekah jong Ahaz ajosah-in, nikhat sungseh-in Judate mihang jeng sepai sang jakhat le sang som nin athasah-e.
6 Judaten Pakai adonda jeh-uva, Pakai apu apateu Pathenin hiche thil hi asosah ahi.
7 Israel sepai Zichri chun lengpa Ahaz chapa Maaseiah le leng inpi vaipo Azrikam, chule lengpa sepaite lamkai len nina Elkanah athat’e.
8 Judate chu ajat chanpiu ahinah vangin, Israelten numei chapang sang jani jen gal-hingin akaiyun, thil tamtah to Samaria khopi geiyin atol thauve.

Obed Themgao
9 Obed kiti Pakai Themgao khat Samaria khopia anachenge. Amahin Judate gal-hinga hinkaiya khopi sung hung lut go, Israel sepaite akimupin, “Pakai napu napateu Pathen Judate chunga lung hanga nangho nahatsah-u ahin, tunvang kichepna changa neiya nathau chu ajatai.
10 Tun Judah le Jerusalem mite numei pasal soh a vul din nago’uve. Nangho jong Pakai na-Pathenu douna chonse nahiu helou nahiuvam?
11 Kasei ngaiyun! Hiche gal-hinga hung kikaiho hi nasopiu ahibouvui. Lhadoh tauvin, achutiloule Pakai lung hanga talen namatsahlo diu ahi,” ati.
12 Sahlam lenggam a lamkai cheh li, Jehohanan chapa Azariah, Meshillemoth chapa Berechiah, Shallum chapa Jehizkiah chule Hadlai chapa Amasan jong sepaiho thilbol chu ajadauve.
13 Amahon, “Hiche gal-hing nahinkaihou chu hikoma hinpuilut hih-un! Pakai douna chelsea talen eimatsah thei khopset’uva phinglung hang ihituave. Tua hi ithemmo nau punbesah gao nahibouvui,” atiuvin ahi.
14 Chuphat’in sepaihon gal-hingho le thil kichomdoh ho chu alamkaiteu apeuvin,
15 lamkai li chu thil kichomdoh lah a kona gal-hing ho chu sille chen hoppeh din anganseuvin, amahon jong pon sil le kise ding kengchot apeuvin, neh le chah lhingin ahom’un, tina dunga nu din olive thao apeuve. Ache lel behseh ho sa-ngante chunga atousah-un, gal-hing kikai jouse chu Judah gamsung, Jericho, tumthing khopi, geiyin alepui kittauve. Hichun Israelte Samaria khopi a-in geiyun ahung kiletauve.

Ahaz-in Assyriate panpi athum
(2 Kgs 16:7-9)
16 Edom miten Judah gam gal ahung bol kit’un, mi tamtah jong gal-hingin akaiyui.
17 Hijeh chun lengpa Ahaz-in Assyria kumpipa, Tiglath Pileser henga panpina athumtai.
18 Hichepet ma hin Philistineten jong lhanglam Judah gamsungle lhumlam thinglhangbul dunga khopi ho ahung chom chom jengtauve. Beth Shemesh, Aijalon, chule Gederoth khopiho, Soco, Timnah, chule Gimzo khopi ho le akimvel khoneo jouse alauvin, atoupha dentauve.
19 Judah lengpa Ahaz-in amite thuneina asuhset peh a, Pakai asuh minset jeh a, Pakaiyin Judah gamsung asuhgim ahi.
20 Assyria kumpipan panhu tah sangin Ahaz adouvin, asugim cheh-e.
21 Hijeh chun Ahaz hin Houin le leng inpi, mipi lamkaiho in dunga sana jouse alan kumpipa apeh vangin, imacha jong aphachompoi.

Ahaz chonsetna ho
22 Agim hesoh behseh phat’in Ahaz kitipa hi khoh cheh-in Pakai dounan achonsei.
23 Ama anajouva Syriate pathenho pou henga akilhaiye. Aman, “Syria mite pathenten Syria lengte akithopiule, keijong kakilhai teng eikithopi thei diu ahi,” ati. Hiche abol hin amale amite chunga manthahna ahinlhut tai.
24 Hiche kalval’in jong Houin manchah jouse alan avogoisah hel’e. Houin kot akhah-in, Jerusalem muntin a maicham asemdoh-e.
25 Judah gamsung khopi le khote jousea namdangte doiphung aphutdoh doh jengin, gamchom mite pathen henga gimnamtui lhutnamna din anabol’e. Hiti hin Pakai apu apateu Pathen lunghan akilhut khumtai.
26 Ahaz lengvaipoh sunga thilsoh, akipatna pat achai geiyin, Judah le Israel lengte thusimbua akijih lut cheh-e.
27 Lengpa Ahaz athin Jerusalema avuiyun, lengte lhana vang avui pouve. Akhel’in achapa Hezekiah leng achange.

THUSIMBU NINA BUNG 29

Judah lengpa Hezekiah
(2 Kgs 18:1-3)
1 Kum somni le nga ahin Hezekiah leng achangin, kum somni le ko sungin Jerusalem a lengvai apoi. Anu chu Zechariah chanu Abijah ahi.
2 Apului David umchan ajomin Pakai deilam bou abol’e.

Houin kisuh theng
3 Hezekiah leng chan jou kum sunga lha masapenin Houin kelkot jouse ahongin, asemphai.
4 Houin nisolam leitol’a chun Thempuho le Levite akhomin,
5 ajah-uva, “Levite kisuthengun lang Pakai napu napateu Pathen Houin khu suthengun. Houin suboh thil jouse Houina konin paidoh-uvin.
6 Ipu ipateu Pakai Pathen henga akita pouvin, ahot lam jeng anabol’ui. Adondauvin, achenna jeng jong anung ngattauve.
7 Houin kotpi jouse akhah-un, thaomei jouse athisah-un, Pakai Israel Pathen Houin sunga gimnamtui la ahalnam pouvin, pumgo thilto kilhaina gan jong athat tapouve.
8 Hijeh a chu Judate abolna chu mitin kinleo jeng ahi. Hiche hi phatecha nahet’u ahi.
9 I-pu ipateu gal’a athiuvin, iji ichateu gal-hingin min akaimangtauve.
10 “Eilunghan louna diuva, Pakai Israel Pathen to kitepna khat sem ding kagot ahitai.
11 Chate ho ngongkai hih-un. Nangho hi Pakaiyin gimnamtui lhutnam dingle Ama houna japi lamkai dia nalhendoh-u ahi,” ati.
12 Hikoma Levite chu: Kohath phunga Amasai chapa Mahath, Azariah chapa Joel; Merari phunga Abdi chapa Kish, Jehallelel chapa Azariah; Gershon phunga Zimnah chapa Joah, chule Joah chapa Eden ahiuve.
13 Elizaphan phunga Shimri le Jeuel; Asaph phunga Zechariah le Mattaniah ahi.
14 Heman phunga Jehuel le Shimei; Jeduthun phunga Shemaiah le Uzziel ahi.
15 Hicheng hin amiteu Leviho akhom’un abonchan hou thudol’in akisuthengtauve. Lengpan thu apeh-uva bol dia aseipeh bangun, Houin jong ho thudol’in asuthenguvin, Pakai Danthu dungjuiyin abol’uve.
16 Thempuho chu Houin sutheng din asunga alut’un, hou thudol’a boh thil jouse Houin leitol’a ahinpodoh tauve. Houin leitol’a pat thilboh ho chu Leviten khopi polam, Kidron phai geiyin achoidoh tauve.
17 Houin suh theng kinbol chu lha masapen nikho masa nin apan’un, niget lhin nin Houin lutna indan geiyin abonchan toh ding achaitauve. Chuin niget ma atong kit’un, chuche lha nisom le gup geiyin, Houin chu Pathen houna thei din agonguve.

Avel’a Houin katdoh
18 Lengpa Hezekiah henga Leviten, “Houin pumpi, pumgo thiltona maicham, changlhah theng koina dokhang chule manchah jouse pumpkin kathenso soh tauve.
19 Chule Pathen dia akita loupet kum sungsea lengpa Ahaz-in apohmangsa manchah jouse kahinlepoh kit’un, kathensouve. Abonchan Pakai maicham maiya aumtai,” atiuve.
20 Ngongkai louhel’in lengpa Hezekiah-in khosung lamkaite akhomin, abonchan Houin lang ajontauve.
21 Leng insung mite chung chule Judate chunga chonset suhmangna dingle Houin suh thengna dingin bongchal sagi, kelngoi chal sagi, kelngoi sagi chule kelcha sagi jen ahinkaiyui. Lengpan Aaron chilhah Thempuho jah a gancha jouse chu maicham phunga kilhainaa tha din aseipeh-e.
22 Thempuhon bongchal ho athat masauvin, abanin kelngoichal ho, kelngoiho athat’un, gancha khat cheh thisan chu maicham phunga atheuve.
23 Achainan kelchate chu lengpa le Pathen houva midang ho henga akailut’un, amazon kelchate chunga khut angam’ui.
24 Hichun Thempuhon kelchate chu athat’un, mipi chonset suhbeina din thisan chu maicham phunga asung lhauve: ajeh chu Israel pumpi dia pumgo thilto le chonset thilto bolpeh dia lengpan aseipehsa ahi.
25 Lengpan lengpa David khang laiya lengpa Themgao Gad le Nathan kama anaseisa Pakai thuhil chengse ajuiyin, Levite Houina akoiyin, semjang le khutbeh,
26 lengpa David manchah tumgingthei tobang ho chutoh apei. Thempuho jong sumkon choiyin ading jinguve.
27 Hezekiah-in pumgo thilto topat ding aseiyin; thilto kibolpat pat’in mipin Pakai vahchoi la asauvin, tumging themten summon mut le tumgingthei dang atho’uve.
28 Chukoma chun mitinin Pathen ahou cheh-un, pumgo vamsoh hel kahsen la le tumgingthei atho lhumkeiyuve.
29 Chutah-in lengpa Hezekiah le mipi bohkhup’in Pathen chibai aboh tauve.
30 Chuin lengpa le nampi lamkaiten David le Asaph Themgao sutsa vahchoi la chu Pakai koma sa din Levite asol’uve. Hiti hin mitinin dilsua Pathen lhai pumpkin kipah tah-in la asauve.
31 Hezekiah-in mipi jah a, “Tua vang hou thudol’a theng nahitauvin, Pakai henga thangvah thilto din kilhaina gan hinthat tauvin,” ati. Mipin pha asauvin, abang abangin jong acham cham’un pumgo thilto din gancha kilhaina ding ahintohdoh doh jengui.
32 Ahintodoh-u gancha chu bongchal som sagi, kelngoi ja ni ahin, Pakai henga pumgo thiltoa pang ding ahi;
33 japi neh din jong bongchal jagup le kelngoi sangthum jen kilhaina gantha din atohdoh-ui.
34 Gancha hijatpi that kham Thempu alhin lou phat’in, sa bol jou kahsen Leviten akithopiuve. Hichea hi hou thudol’a Thempu dang jong kisuhtheng beuvah ahitai. Thempuho sangin Levite joh chu hou thudol’a thengin aumthei jo’uve.
35 Pumgo thilto kilhaina gantha ho sabol ding tilouvin jong Thempuhon mipi neh dia kilhaina gantha sathao jouse lhutvam ding le pumgo thilto to kilhon a lengpitwi kitohdoh sunlhah ding kin jong abol thauve. Hiti hin Houin a Pathen hou akipan kittai.
36 Thil hijat kinloi tah a abolna diuva Pathenin akithopi jal’un lengpa Hezekiah le mipi akipah-ui.

THUSIMBU NINA BUNG 30

Kalchuhkut dia kigotna
1 Mipin aphat cha, lha masa sungin kalchuhkut aboljou pouve, ajeh chu hou thudol’a thengsa Thempu alhomin, Jerusalem khopia jong mipi tampi akikhom joupouve.
2 Hijeh chun lengpa Hezekiah le avaipote, chule Jerusalem mihon lha ni channa bol din pha asauvin, hiche ding hin lengpan Israelte le Judah gamsung mite henga thu athottai.
3 Lengpan hiche thudol’a hin atumbeh-in Ephraim le Manasseh phungte ni lekha athot’in, Pakai Israel Pathen jabolna a, Jerusalem Houina kalchuhkut mang din akouve.
4 Athilgonu hi lengpa le mipi alung lhaiyun,
5 hijeh chun sahlam Dan a pat lhanglam Beersheba geiya Israelte abonchan akouvun, masanga sanga tam cheh hunga, Danthu dungjuiya Jerusalema kalchuhkut mang din atem’uve.
6 Lengpa le avaipote thusah-in Judah gam pumpi le Israel sunga mi solle ho asol’un hitin akouvui: “Vo Israelte, Assyria miten gamsung alah-uva jong hingdoh nahitauve. Tun Pakai, Abraham, Isaac chule Jacob Pathen henga hung kile kit’un, Ama jong nahenguva hung kile kit ding ahi.
7 Pakai a-Pathen diuva kitahlou napu napateu le nasopiteu Israelte to bangin um hih-un. Namu bangun Pathenin talen amatsah-un gim tah-in abolloi.
8 Amaho bangin lungtah dauvin, Pakai sei ngaiyun. Pakai na-Pathen’un tonsot’a dia athensosa Jerusalem Houin a hungun, nachunguva alungdamna din hung houvun.
9 Pakai henga hung kile kit leu chun, nasopiteu gal-hinga kaimangten achunguva voujang natna neiyun tin, inlama ahinsol kit thei diu ahi. Pakai na-Pathenu hi khoto them ahin, hepina lhingset ahi, ahenga hung kile kit leu chun nasang nauvinte,” ati.
10 Solleho chu Ephraim le Manasseh phungte ni gamsunga khopi jousea acheuvin, sahlam Zebulun phung gamsung geiyin achieve; ahivangin mipin anuisat’uvin, adaithanguve.
11 Hijongle Asher phungle Manasseh chule Zebulun phunghoa konin mi phabepset Jerusalema ahung nom naive.
12 Judah gamsunga jong Pathenin na atongin Pathen dei bol’a lengpa le avaipote thupeh nit din mipi akipumkhatsah tai.

Kalchuhkut aman’u
13 Lha ni nan Jerusalem khopia cholsolou changlhah kut mang din japi tamtah ahung kikhom’uve.
14 Jerusalem khopia kilhaina gancha kilhutvamna maicham jouse le gimnamtui kihalnamna jouse chu Kidron phaiya agapai mangtauve.
15 Chuche lha nisomle li nin kalchuhkut’a kilhaina ding kelngoiho athat tauve. Hou thudol’a boh nalai Thempuho le Leviten Pakai dia kikatdohsa ahiu chu ajachatpiuve; ajeh chu Houin sunga kilhaina gantha kin abol thei tapouve.
16 Pathen mi Mose’n Danthua kisei dungjuiyin Houin sunga chun apanmun ding dol’uva vang apang nauve. Leviten kilhaina gantha thisan chu Thempuho apeuvin, amazon maicham chunga a theuve.
17 Mipi atamjo hou thudol’a boh aumjeh-un, kalchuhkut kelngoi akitha thei pouvin, Leviten athapeh-uvin, kelngoite chu Pakai henga atohdoh-uve.
18 Hiche tilouvin jong Ephraim, Manasseh, Issachar chule Zebulun phung hoa hung mi tamtah hou thudol a kisutheng lou lai aum’un, kalchuhkut chu kitoh louhel’in amanguve. Amaho din lengpa Hezekiah ataovin,
19 “Vo Pakai, kapu kapateu Pathen, hou thudol’in kisutheng hih laiyu jongle lungthim pumpia nahoute chu naphatna jal’in ngaidamin,” ati.
20 Hezekiah taona hi Pakaiyin asangin, suse talouvin mipi chu angaidamtai.
21 Jerusalema kikhom mipin ni sagi sungin cholsolou changlhah kut chu amanguve. Kipah tah-in changlhah aneuvin, niseh-in Levite le Thempuhon ajochanin Pakai avahchoiyui.
22 Athepnau bangtah a Pakai hounaa Levite lamkai chu Hezekiah-in apahchai.

Kalchuhkut niveina
Apu apateu Pakai Pathen vahchoina ni sagi sunga kilhaina gan atah jouvun,
23 ni sagi ma kutbe din mipi akithensouve. Hiti hin kipah tah-in kut abol’uve.
24 Mipin akithauva aneh diuvin, lengpa Hezekiah-in bongchal sang khat le kelngoi sang sagi atoh-e. Vaipoten jong bongchal sang khat le kelngoi sangsom jen apeh beuve. Thempu tamtah jong kisuhthengnaa apangui.
25 Hiti hin mitin, Judah gamsung mite, Thempuho, Levite sahlam a hungkon miho, Israel le Judah gamsunga chengdu gamchom geiyin akipahsoh keiyuve.
26 David chapa lengpa Solomon khanga pat hitobang hi soh kha talouhel ahijeh-in Jerusalem khopi kipana adim jenge.
27 Thempuhole Leviten mipi din Pakai vangboh athum’ui. A-Van in a konin Pathenin ataonau ajan, asanpehtai.

THUSIMBU NINA BUNG 31

Hezekiah-in hou asemphat
1 Kut kichai chaiyin Israel mi abonchauvin Judah gamsung khopi tin a acheuvin doikhom song jouse avobongun, Asherah pathennu henga katdohsa milimdoi jouse asat lhu’vin, maicham jouse le namdangte doiphung jouse asumangtauve. Hitobang hin Judah gamsung mundang jouse le Benjamin gamsung, Ephraim le Manasseh gamsunga jong abol’uve. Chujouvin inlam ajon cheh tauve.
2 Lengpa Hezekiah-in Thempuho le Levite kipohdol asemphan, hiche dungjuiyin amichang cheh-in toh ding kin aneiyui. Toh ding kin lah a hin pumgo thilto le kiloikhom thilto, Houin a Pathen houkhom, chule Houin sunga kin chom chom, vahchoina le thangvahna kin, hitobang bolna ho hi ahi.
3 Hezekiah hin akelngoite lah a konin jingkah nilhah seh a pumgo thilto ding le Choldo nikho seh a thilto, lhathah nikhoa ding, Pakai Danthua kisei dungjuiya kut dang danga thilto ding gancha jouse atohdoh-e.
4 Hicheng belapnan Thempuho le Leviten Pakai Danthua ki-ngeh khoh dungjuiya phat tin a apan jing theina diuvin, Thempuho le Levite chan dia lom jouse chu Jerusalem miten thilto ahinchoina diuvin lengpan aseiye.
5 Thupeh akinei jou jouvin Israelten chang phapen, lengpitwi tuipen, olive thao hoipen, khoiju lhumpen, chule lousoh dang aphalaise se ahinchoiyun, chule anei jouseuva hopsom a hop khat ahinchoitauve.
6 Judah gamsung khopi tin a cheng miten bong le kelngoi hopsom a hop khat geiyin ahinkaiyun, Pakai a-Pathenuva akatdohsau thil tamtah jong ahinchoiyui.
7 Thilto chu lha thumna ahinto pan’u ahin, akit lha li sungin akisethom thom jengtai.
8 Hezekiah le vaipoten thil chujatpi kitodoh jeng amu phat’un Pakai le amite Israelte achoi-an’ui.
9 Hiche thilto thudol’a hin lengpan Thempuho le Levite jah a aseiyin,
10 chuin Thempu chungnung Zadok chilhah a Azariah chun ajah a, “Mipin Houin a thilto ahinchoi pat tah jeh-un, neh le chah alhingsettan, chule aval jong aumdoh tai. Pakaiyin amite vang aboh jal’a niche thilpeh hijatpi hi ineiyu ahi,” ati.
11 Lengpa thusah-in Houin hopsunga thil kholna indan asem’un,
12 thilpeh chengse le som a khat kitohdoh chengse akoitup-uve. Levi mi Conaniah chu thil ngah-in akoiyun, akithopi din asopipa Shimei apansah-ui.
13 Amani noiya hin Levite som khat jen apansah-un: Jehiel, Azaziah, Nahath, Asahel, Jerimoth, Jozabad, Eliel, Ismachiah, Mahath, chule Benaiah ahiuve. Lengpa Hezekiah le Thempu chungnung Azariah thuneina thil hicheng hi kiboldoh ahi.
14 Houin solam kelkot ngah ho lamkaipipu Levi mi Imnah chapa Kore chu Pakaiya kitohdoh thil chengse lah dingle hopdoh ding kin a akisalel’e.
15 Khopi dang, Thempu umna dunga chun Leviten akithopiuvin, amaho chu: Eden, Miniamin, Jeshua, Shemaiah, Amariah, chule Shecaniah ahiuve. Amaho hin akin dungjui cheh-in asopiu Levite ding neh le chah kibangin ahoppeh-ui,
16 aphung phungin ahompouve. Apanmun cheh dungjui, niseh le Houin a toh ding kin neiho chu, pasal kum somthum a lhah a chung lamse chan khat cheh apeuve.
17 Thempuho chu atoh diu kin jousea aphung phungin ahu’vin, Levite vang kum somnia lhah chung lamse akin dol’uva aloi loiyin akithopiuve.
18 Itih hijongle atoh diu kinthenga pang dia gotsa um jing ding ahijeh-un, aji achateu chule achilhahteu adangse puma kisimkhom ahiuve.
19 Aaron chilhah ho chenna dia kipedoh khopi dunga cheng Thempuho, ahiloule hiche khopi dunga hamhing gam kihoitha chengsea jong Thempuho insung chengse le Levite lah a kisimtha jouse neh le chah hopper ding mi aum’uve.
20 Judah gamsungse sea vang lengpa Hezekiah hin thildih le Pakai a-Pathen lungdei jeng abol’e.
21 Houin thudol’a atohna hihen, Danthu nit ding thudol’a atohna hileh, kitahna neitah le a-Pathen dia kipehna mong monga abol jeh-in Hezekiah lengpa alolhingtai.

THUSIMBU NINA BUNG 32

Assyria miten Jerusalem agihsal’u
(2 Kgs 18:13-37; 19:14-19, 35-37; Is 36:1-22; 37:8-38)
1 Thilsoh hicheng nung, lengpa Hezekiah-in kitahna neitah a Pakai kin abol jou hin, Assyria kumpipa, Sennacherib chun Judah gamsung gal ahinbol tai. Kulpi kaisa khopi jouse alum, pal jouse tumjal din asepaite thu apetai.
2 Sennacherib hin Jerusalem geiya sat agot amudoh phat’in,
3 Hezekiah le avaihom ten, Assyria mite Jerusalem ahung nai tengu twi amu louna diuvin, Jerusalem khopam lam a twi longdoh jouse tintan din pha asauve.
4 Vaihomten mipi tampi apuiyun, twi londoh louhelna din twinah jouse asingtauve.
5 Lengpan khopi pan jouna din pal se lai jouse agenphan, kho-nga na insang asan, pal po-nung khat agenthom’e. Hiche kalval’in jong nisolam Jerusalem kholui lang, leiset kidip thuna tollhang dunga jong panmun asemphai. Tengle lum tampi jong asembei.
6 Khopi sunga pasal jouse sepai lamkaite noiya aumsah-in, khopi kelkot, tollhanga kikhom din akouve, Mipi jah a lengpan,
7 “Ngamtah-in pangdet’un, Assyria kumpipa hihen, ahinpui sepaite hijongle kicha hih-un. Ama thaneina sangin eihon tha ineijo’uve.
8 Aman mihem thahat akengin, galmuna eipanpi diuvin eihon Pakai i-Pathenu ineiyui,” ati. Alengpau thuseihoa hin mipi akitilkhou lheh jenguve.
9 Phat chom khat nung, Sennacherib le asepaite Lachish khopia apansat laiyun, Sennacherib-in Hezekiah le Jerusalem khopia aumpi mipi henga thu athot’in:
10 “Vo Jerusalem mite, ki-umchahta ipi kisonna nei mong monga um nahiu hi kei, Sennacherib, Assyria kumpipan kadoh nahiuve.
11 Hezekiah chun keiho khut’a Pakai na-Pathen’un nahuhdoh diuva asei ahin, nalhep chatvaiyuva gilkel le dangchah a thigamsah nagot’u ahibouve.
12 Pakai doiphung jouse le maicham ho sumanga, Judah gamsungle Jerusalem miten Pathen houva maicham khatseh a gimnamtui lhutnam dia seiya chu Hezekiah ahi.
13 Kapu kapate le ken namtin vaipi kabolnau helou nahiuvam? Koi nam pan pathenin amite Assyria kumpipa khut’a ahuhdoh khah am?
14 Hiche gamsung ho pathen hoipen chun kakhut’uva kona agamsung ahuhdoh ham? Ipipen a chu na-Pathen’un nahuhdoh jou diuva kigel nahiuvam?
15 Hitobang hin Hezekiah kilhep lhahsah dauvin, kipui mangsah dauvin. Tahsan dauvin! Koimacha pathenin amite Assyria kumpipa khut’a konin ahuhdoh khapoi. Hiche na-Pathenu jong hin nahuhdoh jou deh louhel diu ahi!” ati.
16 Assyria sepai lamkaiten Pakai Pathen le alhacha Hezekiah chung changa hisang sanga khohjo jo thu aseiyui.
17 Kumpipa lekha thot chun Pakai Israel Pathen ataitomin, “Namtin vaipite pathen hon kakhut’a konin amite ahuhdoh khapoi, Hezekiah Pathenin jong kakhut’a konin amite huhdoh jou deh ponte,” ati.
18 Khopi lah loi theina din, Assyria sepai lamkaiten hiche thu hi kulpi palvum dunga um Jerusalem khosung mite kichatsah a lungthoisahna din, Hebrew paovin asap tho jenguve.
19 Jerusalem Pathen chu, khut’a semthu, mitin mitangte pathen ho dan danin aseiyui.
20 Chutah-in lengpa Hezekiah le Amoz chapa Themgao Isaiah Pathen henga atao lhonin, panpi ngaiyin akap jeng lhontai.
21 Pakaiyin Vantil khat ahinsol’in Assyria sepaite le alamkai lai jouseu athat gamtai. Hijeh chun Assyria kumpipa jong jum tah-in agam lama akile kittai. Nikhat a-pathen houin a aum pet’in achapate phabep’in ama jong chemjamin asat lih tauve.
22 Hitobang hin Pakaiyin lengpa Hezekiah le Jerusalem khosung mite chu Assyria kumpipa Sennacherib khut’a konle amelmateuva konin anahuhdohtai. Chujongle akimvel dunga namdangte to jong chamdel’in achensah tai.
23 Jerusalema japi ahung kitol tol jengun, Pakaiya to ding thil tampi le Hezekiah peh ding thil ahinchoi choi jengun, hichea pat hin namtin vaipin Hezekiah ja tah-in aboltauve.

Hezekiah veiset chule akiletsah
(2 Kgs 20:1-3, 12-19; Is 38:1-3;39:1-8)
24 Hiche lai hin lengpa Hezekiah anan thipai ding ahitai. Ataole, adamdohna din Pakaiyin melchihna amusah-e.
25 Ahivangin Hezekiah chun Pakaiyin abolpeh, Jerusalem le Judah akhohsah chule athohgim peh chengse jal’a kipa dingsih-in ahoithopitai.
26 Akhon nan Hezekiah le Jerusalem mite jong vang akineosah-un, hijeh chun Hezekiah thi kahsen Pakaiyin mipi talen amatsah tapoi.

Hezekiah goule aloupije
27 Lengpa Hezekiah ahao lheh jengtan, mitin jana achangtai. Sana, dangka, song mantam, gimnamtui, lum ho le manlu tah tah thil dang dang kholna indan tampi asai.
28 Hicheng tilouvin jong changle lengpitwi, chule olive thaotwi kholna jong asemin; bongkul jong tampi asemin, kelngoi hong jong dan tamtah asempeh-e.
29 Hicheng kalval’in jong Pathenin kelngoite le bong tampi apen, hitobang gou chujatpi anei phat’in khopi dang dang jong aphutdoh-e.
30 Gihon twinah hubinga, Jerusalem kulpi sunga twi lonlutsahna dia lei noiya twilam lailut’a chu lengpa Hezekiah ahi. Abol chan a Hezekiah lengpa alolhingin,
31 Judah gamsung aphat achang louva thilsoh ho kholtoh dia Babylon gam palai hung ho geiyin jong aumchan vetchetnan Pathenin Hezekiah chu adei deiyin thil abolsahjoi.

Hezekiah lengvaipoh kichai
(2 Kgs 20:20-21)
32 Lengpa Hezekiah thilbol jouse, Pakai henga akitahna ho geiyin, Amoz chapa Themgao Isaiah mu neina lekhabu le Judah le Israel lengte thusimbua akijih lut cheh nai.
33 Hezekiah athin, lengte lhan, golchungnunga avuitauve. Athi hin Judah gamsung mite le Jerusalem khosung mihon jana ape cheh-ui. Achapa Manasseh akhel’in leng achangtai.

THUSIMBU NINA BUNG 33

Judah lengpa Manasseh
(2 Kgs 21:1-9)
1 Judah leng ahichun Manasseh kum somle ni bou ahin, Jerusalem khopia kum som nga le nga sungin lengvai apoi.
2 Amite ahung kitol lut laiyuva Pakaiyin ananodoh namtin vaipi ho chonna thet umtah ho banjop’in, Manasseh jong Pakai dounan achonsei.
3 Apa Hezekiah suhsetsa namdangte doiphung jouse Manasseh hin asempha kit’in, Baal houna maicham asemdoh-in, Asherah pathennu lim asemin, ahsite pou ahoutai.
4 Houin sung jenga jong namdangte maicham asemin, Pakaiyin Ama kihouna dia asei nalai tah a akoiye.
5 Houin lhongte nia chun ahsite houna ding maicham asem’e.
6 Hinnom phaiya chun achapate geiyin pumgo thilto kilhaina ganthan athat’e. Kilao abol’in, mitpheldoi achoiyin, phunsan ho adongin, doichoiho amangchai. Pakai dounan achonse behseh jengin aphin lung hang tai.
7 Houin sunga milimdoi atungdoh-in, hiche mun lai hi Pakaiyin David le achapa Solomon jah a, “Hikom Jerusalem, hilai Houin hi Israel phung somle ni gamsunga eikihouna dia kalhendoh ahi.
8 Israel chaten kalhacha Mose’n apeh-u Danthu pumpi anit’uva kathupeh chengse ajuiyule, apu apateu kapehna gamsunga konin deldoh kit tapouvinge,” anati ahi.
9 Manasseh hin Judate chu Pakaiyin amite hung kitol lut laiya anodoh namtin vaipite chonsetna sanga khohjon achonset sah tai.

Manasseh lunghei
10 Pakaiyin Manasseh le amite agihsal vangin angaideh pouve.
11 Hijeh chun Pakaiyin Assyria sepaite Judah gamsunga gal ahinbolsah tai. Assyria sepaiten Manasseh aman’un, thihkol abupeh-un, Babylon lama thih khaovin akaitauve.
12 Agenthei behseh phat’in akinemsah-in, Pakai a-Pathen henga akiheiyin, panpina athumtai.
13 Pathenin Manasseh taona asangin, Jerusalem akilesah kit’in lengvai apohsah kittai. Hiche abolpeh hin Pakai Pathen ahije Manasseh-in atahsantai.
14 Hiche nung hin Manasseh-in David khopi niso lam pal po-nung chu, Gihon twinah kom phaicham a pat nga kelkot sahlam, Ophel kisah khopi mun geiyin aset sangbei. Judah gamsung kulpi kaisa khopi jousea sepai atousah-in, sepai lamkai khat cheh akoiye.
15 Houin sunga gamdangte pathen lim le milimdoi akoi ho apaidoh-in, Houin molvum thinglhanga namdangte maicham ho asumangin, Jerusalem khosung mundanga ho jong asumange; abonchan khopi polam a apodoh-in apaimangsoh hel’e.
16 Pakai kihounaji maicham asemphan, hiche maicham phunga hin kiloikhomna le thangvahna thilto kilhaina aboltai. Pakai Israel Pathen housoh kei din Judah gamsung mite thu apesoh keiye.
17 Mipin mundang danga jong kilhaina gan atha vangun, Pakai henga bou kilhaiya ahitauve.

Manasseh lengvaipoh china
(2 Kgs 21:17-18)
18 Manasseh thilbol jouse, a-Pathen henga ataona gei, chule ahenga Pakai Israel Pathen min pan a thusei Themgaopa thusei ho geiyin Israel lengte thusimbua akijih lut cheh nai.
19 Lengpa taona le Pathenin asanpehna, alunghei masanga achonset jouse thilse abol ho, namdangte doiphung asempehho, Asherah pathennu lim asemdoh, milimdoi ahou ho geiyin Themgaote lekhabua akijih lutsoh keiye.
20 Manasseh athin leng inpia avuiyun, akhel’in achapa Amon leng achangtai.

Judah lengpa Amon
(2 Kgs 21:19-26)
21 Judah leng ahichun Amon kum somni le ni alhingtan, Jerusalem khopia kumni sungin lengvai apoi.
22 Apa Manasseh bangin Pakai dounan achonsen, apa hou milimdoiho ahouve.
23 Apa bangin vang kineosah-in Pakai lam ajonpoi; apa sangin achonse chehjoi.
24 Amon vaibol a pang hon adouvun, leng inpia athatden tauve.
25 Judaten Amon that ho athatson’un, achapa Josiah chu leng achansah tauve.

THUSIMBU NINA BUNG 34

Judah lengpa Josiah
(2 Kgs 22:1-2)
1 Judah leng ahichun Josiah kum get bou ahina laiyin, Jerusalema kum somthumle khat sungin lengvai apoi.
2 Pakai dei jeng abol’in; apului David lengpa umchan ajomin, Pathen Danthu jouse kitup keiyin anit’e.

Josiah-in namdangte hou adou
3 Chapangcha ahinah lai vangin, leng achan kal kum get chun Josiah hin apului David lengpa Pathen ahoupantai. Kum li nungin namdangte doiphung ho, Asherah pathennu lim kisemthu, chule milimdoi dang dang kisem jouse asumang pantai.
4 Ama thusah-in amiten Baal houna maicham jouse asuseuvin, avel dunga gimnamtui lhutna maicham ho geiyin asumanguve. Asherah lim jouse agoibongun, milimdoi dang ho jong agoibongun, hitobang kithoina neiho lhankhuh a athe thanguve.
5 Namdangte Thempuho chu adoi hounau maicham phung dunga agu achangu agouvui. Hitia abol hin Judah gam le Jerusalem hou thudol’in asuthengtai.
6 Khopi dang danga jong chule Manasseh le Ephraim chule Simeon gam lheng lhol lah jong chutin abol’in, sahlam Naphtali gamsung geiyin abol’e.
7 Sahlam lenggam pumpi sunga maicham ho le Asherah doi lim jouse agoibongsel’in, gimnamtui maicham jouse avobongin, chuin Jerusalema ahung kile kittai.

Danthubu kimudoh
(2 Kgs 22:3-20)
8 Alengvaipoh kal kum somle get, namdangte doihou sumanga gamsungle Houin asuhtheng jouvin, lengpa Josiah-in Pakai Pathen Houin sempha din mi thum asol’in, amaho hi, Shaphan, Azaliah chapa, Jerusalem vaipo Maaseiah chule vaipo thupi tah Joah, Joahaz chapa, hicheng hi ahiuve.
9 In-ngah a pang Levite Houin a sum dondohsa chu Thempu chungnung Hilkiah apetauve. Sum hi sahlam lenggam sunga, ahideh a Ephraim miho le Manasseh ho lah a kidong, Judah gam mite lah a jong Benjamin phung le Jerusalem a kidongdoh ahi.
10 Hiche sum chu Houin sempha dia nganse mi thum chu apeuvin, amahon
11 thingthembolte le insaho chu, Judah lengten amoh mot lhahsah-u in semphatna din, songle thing chohna din apeuve.
12 Natong ho chu akitah lheh jenguve. Amaho chu Levite lin toh lam akaipeh-un, amaho chu, Merari phunga Jahath le Obadiah, chule Kohath phunga Zechariah le Meshullam ahiuve. Levite chu lathem, tumgingthei them cheh ahiuve.
13 Levite adangse chu inthil lhoh le leh, jatchom chom a natong ho toh lamkaiyin apangun, adangse jong lekhajih le in-ngah-in apanguve.
14 Sum kholna indan a sum agalah chun, Hilkiah hin Pakai Danthu bu, Parthenon Mose anapeh chu, amudohtai.
15 Hilkiah-in Shaphan jah a, “Hikom Houin sunga Danthubu chu kamudoh tai,” ati. Hilkiah-in Danthubu chu Shaphan apen,
16 Shaphanin lengpa henga ahinchoiyin, “Neihil jouseu kaboltauve.
17 Houin a kikoi sum chu kalauvin natongho le atoh lamkaiteu kapetauve,” ati.
18 Chuin aseibe kit’in, “Hilkiah-in eipeh lekhabu khat kahinchoiye,” atin; lengpa jah din othongin asimtai.
19 Lekhabua asimdoh peh ajah phat’in, kidang asaval’in lengpan aponsil abotel lon,
20 Hilkiah le Shaphan chapa Ahikam, Micaiah chapa Abdon, thutanna phunga lekhasun Shaphan chule lengpa solle Asaiah jah a,
21 “Kei le tugeiya um Israel le Judah gamsunga cheng nalai mipi din Pakai neigadoh peh tauvin. Hiche lekhabua kihilna jouse kholdoh-un. Ipu ipateuvin Pakai thu ngai louva, hiche lekhabun boltei dia asei abol loujeh-uva Pakaiyin eilunghanu ahi,” ati.
22 Lengpa thusah-in Hilkiah le adangsen Jerusalem vengthah langa cheng Huldah kiti Themgaonu chu agadongui. Ajipa Shallum, Tikvah chapa, Harhas tupa, hi Houin a sil ding ponchol ho vetup a pang ahi. Hilkiah le aloiten thilsoh chu Themgaonu aseipeh-un,
23 aman jong lengpa henga alesol kit’in, lengpa din
24 Pakaiyin ajah a thu seipeh ding ahi’in: “Lengpa jah a kisimpeh hiche lekhabua kisei gaosapna chengse chu Jerusalem chunga lung hang kahitan, lungdam ponge.
26 Lengpa tah din vang Pakai Israel Pathenin kaseipeh chu hiche hi ahi: hiche lekhabua kisun hi nit’in,
27 chule lungheiyin ka-angsunga nakineosah tan, kap pumin naponsil nabottel’in, Jerusalem mite talen matsah dia kigihsalna chu najatai. Nataona kasangin,
28 Jerusalem talen matsah kagot chu nadamlai sungin bolda tange. Lung mongin thisah nange,” ati. Hiche thu hi pon Hilkiah le aloite lengpa Josiah henga ahung kile kittauve.

Pakai thu nit dia Josiah kitepna
29 Lengpa Josiah-in Juda lamkai jouse le Jerusalem lamkai jouse akouvin,
30 abonchan Houin lam ajon’un, Thempuho le Levite, mipi, ahao avai dat louvin akilhonsoh keiyui. Abonchau masanga, Houina kimudoh kitepna lekhabu chu lengpan othong leuvin asimdoh-e.
31 Leng dinmun a adingin alungthim pumpile a-lhagao pumpia Pakai thu ngaiya a-Danthu jouse nit ding, chule hiche kitepnaa ngeh khoh, lekhabua kisun chu tohdoh teina din Pakaiya akiteptai.
32 Lengpan Benjamin phung sung mite le Jerusalema hung jouse chu Kitepna chu nit din akitepsah tai. Hiti hin Jerusalem miten Kitepna a ngeh khoh jouse, apu apateu Pathen to akitepnau chu anit tauve.
33 Lengpa Josiah hin ahinlai damsungsen Israel gamsunga thet umtah milimdoi jouse asumangin, apu apateu Pakai Pathen lhacha pang din mipi khoh tah-in angeh-e.

THUSIMBU NINA BUNG 35

Josiah-in kalchuhkut aman
(2 Kgs 23:21-23)
1 Pakai jabolnan Josiah-in Jerusalema kalchuhkut amangin; kut a golvahna din lha masa nisom le li nin gan athat’e.
2 Thempuho Houin sunga toh ding kindol’a a-ngansen, aphat cha abolna diuvin atilkhouve.
3 Pakaiya katdohsa Levite le mihilte chu, “David chapa lengpa Solomon sahsa Houin sunga Kitepna thingkong theng chu koiyun. Muntin a napohle le tah lou diu, Pakai na-Pathenule amite Israel kinbol’a napan diu ahi.
4 Naphung phungin Houin sunga napan mun cheh kijot’un, lengpa David le achapa lengpa Solomonin nanganse dungjuiyun nakin cheh tongun,
5 Israel insung khat cheh a nakithopi theina diuvin kigosan um’uvin.
6 Kalchuhkut a ding kelngoite le kelchaho natha diu ahi. Hou thudol’in kisuthengun, Pakaiyin Mose ahilna ho banga nasopiu Israelten abol theina diuvin kilhaina gan tha ding ho gouvin,” tin ahilchah-e.
7 Kalchuhkut a man din lengpa Josiah-in aganchate lah le akelngoite lah a konin chule kelchate lah a konin sang somthum le bongchal sangthum atoh-e.
8 Josiah vaipoten jong mipi dingle Thempuho ding chule Levite din thil atoh-ui. Houin vaipoa Hilkiah le Thempu chungnung, Zechariah, chule Jehiel’in jong kut sunga kilhaina gantha din kelngoi le kelnou sangni le jagup, bongchal jathum jen Thempuho apeuve.
9 Levite lamkaiho Conaniah, Shemaiah chule asopipa Nethanel, Hashabiah, Jeiel chule Jozabad hicheng hin kelngoile kelnou sang nga le bongchal ja nga jen Levite kilhaina gantha din atoh-ui.
10 Kalchuhkut a dia thil ijakai akigon jou phat’in, lengpa thupeh dungjuiyin, Thempuho le Leviten panmun cheh akilotauve.
11 Kelngoite le kelnouse akitha jou phat’in, Levite savun lip’in apangun, Thempuhon maicham phunga thisan atheuve.
12 Mose Danthua kisei dungjuiya gancha kithat ho chu a-insung cheh a pumgo thilto kilhaina anei theina diuvin mipi ahoppeh tauve.
13 Adan dungjuiyin Leviten kalchuhkut satha chu agouvun, satheng chu belpum le belpheng chule khangbel’in ahon’uvin, kino tah-in sa chu mipi ahoppeh-ui.
14 Hitia abol jou phat’un Leviten amaho dingle Thempuho Aaron chilhahse se ding, jankhang geiya kiseimoa, pumgo thilto le athao jouse gouvam a pang Thempuho din, sa akisem tauve.
15 Lengpa David thupeh banga Asaph phunga lathem, tumgingthem Levite Asaph, Heman, chule lengpa Themgaova pang Jeduthun chu apanmun cheh a apangui. Levi dang hon amaho ding kalchuhkut an agonpeh jeh-un, Houin kelkot ngah hon panmun adalhah-u angaipoi.
16 Hiti hin lengpa Josiah thupeh dungjuiyin chuche nikhoa Pakai houna ding, chule maicham phunga pumgo thilto kilhaina gantha thilto ding jouse aboltauve.
17 Ni sagi sungin chua um Israel pumpin kalchuhkut le cholsolou changlhah kut amanguve.
18 Samuel khanga pat hitobanga hi kalchuhkut kimang kha louhel ahitai. Leng masaho koiman jong lengpa Josiah le Thempuho, Levite chule Judate, Israelte chule Jerusalem mite man banga kalchuhkut hi aman khah louvu ahi.
19 Hiche hi Josiah lengvaipoh kal kum somle get kum a abol’u ahi.

Josiah lengvaipoh kichai
(2 Kgs 23:28-30)
20 Lengpa Josiah-in Houin kin hichengse abol jou hin, Egypt lengpa Neco chun Euphrates luipi pang, Carchemish a gal bol din, sepaite ahin puiyin ahung kontai. Josiah-in vohhai agon,
21 ahivangin Necon Josiah thu agah thot’in, “Vo Judah lengpa, kei galsat ding hi na-ikin ahipoi. Nang sat dia hung kahipon, kamelmate sat dia hung, Pathenin kinoloi dia eihil ahi. Pathenin eipanpi, neidou dan, ajo le Pathenin sumangin nate,” ati.
22 Ahinla Josiah chun sat tei agon, lengpa Neco kam a Pathen thusei ngai louvin, von khel’in Megiddo phaicham a kisatpi din akontai.
23 Akisat laitah-un lengpa Josiah hi Egyptte thalchangin akap khan, asohpa jah a, “Eilhoh mang loiyin, melse tah-in eimavotauve!” ati.
24 Atouna kangtalaiya konin akoisa kangtalai chom khat’a adomlut’un, Jerusalem a ahinpouve. Jerusalema athin lengte lhana avuitauve. Judah gamle Jerusalem miten athi hi alunghempi cheh-ui.
25 Themgao Jeremiah-in lengpa Josiah kana la abol’in, Israel lah a numei pasal lathem jousen hiche la hi thi-op teng ka lan a-oiyui. Ala hi Ka-la lah a akijih luttai.
26 Josiah thilbol Pakaiya akipeh lut dol, Danthu anitje,
27 apatna pat achai geiya athusim abonchan Israel le Judah lengte thusimbua akijih lut cheh nai.

THUSIMBU NINA BUNG 36

Judah lengpa Joahaz
(2 Kgs 23:30-35)
1 Judaten Josiah chapa Joahaz chu leng din alhengun, Jerusalema thao anutauve.
2 Judah leng ahichun Joahaz hi kum somni le thum ahichun Joahaz hi kum somni le thum ahin, Jerusalema lha thum lengvai apoi.
3 Egypt lengpa Necon Joahaz hi sohchangin akaiyin, Judah gamin kai dangka kilogram somthumle li apeh diuvin aboltai.
4 Necon Joahaz sopipa Eliakim chu Judah lengin apansah-in, amin jong Jehoiakim tin akhelpeh-e. Joahaz vang chu Necon Egypt langa sohchangin akaitai.

Judah lengpa Jehoiakim
(2 Kgs 23:36-24:7)
5 Judah leng achan hin Jehoiakim kum somni le nga ahin, Jerusalema kum somle khat lengvai apoi. Pakai a-Pathen dounan achonsei.
6 Babylon lengpa Nebuchadnezzarin Judah gam gal ahinbol’in, Jehoiakim amanin, Babylon langa thih khaovin akaitai.
7 Nebuchadnezzarin Jerusalema Houin a gou kikhol ho phabep apon Babylon a aleng inpia akoiye.
8 Jehoiakim thilbol jouse, athilbol thet umtah tah ho le thilse aboldoh jouse Israel le Judah lengte thusimbua akijih lut cheh-e. Achapa Jehoiachin akhel’in leng achangtai.

Judah lengpa Jehoiachin
(2 Kgs 24:8-17)
9 Judah leng achan hin Jehoiachin kum somle get alhingin, Jerusalema lha thumle nisom bo lengvai apoi. Ama jong hi Pakai dounan achonsei.
10 Chavang phat’in lengpa Nebuchadnezzarin Jehoiachin jong Babylon langa sohchangin akaiyin, Houin gou kikhol jong apoh thai. Nebuchadnezzarin Jehoiachin pa-ngah Zedekiah chu Judah le Jerusalem lengin apansah-e.

Judah lengpa Zedekiah
(2 Kgs 24:18-20; Jer 52:1-3a)
11 Judah leng achan hin Zedekiah kum somni le khat alhingin, Jerusalema kum somle khat lengvai apoi.
12 Pakai dounan achonsen, Pakai thuseiya pang Themgao Jeremiah thusei kineosah-in angaipoi.

Jerusalem khopi chim
(2 Kgs 25:1-21; Jer 52:3b-11)
13 Zedekiah hin Nebuchadnezzar douna gal abolle, Nebuchadnezzarin Zedekiah hi kitah tah a Pathen lam a pang din Pathen minin akihahselsah loi. Alungtah-in, lungheiya Pakai Israel Pathen henga kihei ding adai.
14 Hicheng kalval’in jong Judah gam lamkaite le Thempuho, chule mipin jong akimvel’uva namtin vaipi ho umchan ajom’un, milimdoi ahouvun, Pakai Amatah-in asuh thengsa Houin geiyin asuboh tauve.
15 Pakai apu apateu Pathenin ahinghoi nom’uva Houin ahoidohsah nomjeh-in agihsal diuvin Themgaote asolpeh jinge.
16 Amahonla Pathen thupole ho adaithangun, asei jouse nahsah louvin, Themgaote la anuisat’un, jamdohna thei louhel’a Pakaiyin amite alunghan geiyin abol’uve.
17 Hijeh chun asatgam diuvin Pakaiyin Babylon lengpan Juda gollhang jouse athat’in, Houin asusei. Koimacha hepi louvin, teh le khang, numei pasal, dam hen veise leh khen aneipoi. Pathenin miho abonchan Babylon lengpa khut’a apedohsoh hel’e.
18 Babylon lengpan Houin abulun, Houin gou jouse achomin, lengpa goule avaipote gou, abonchan Babylon langa apotai.
19 Houin le khopi, leng inpi chengse to, neile gou abonchan ahalvamin, khopi kulpi avochimsoh heltai.
20 Mihem hingdoh chasun Babylon langa akaiyin, Persia lenggam letdoh kahsen, Israelte chu soh-in aneitai.
21 Hiti hin Pakaiyin Jeremiah kama asei masah, “Choldo nikho nit louva kikoi ditdohna dia gamsung hi kum som sagi ahomkeova kijam ding ahi,” ati chu agui lhungtai.

Cyrus-in Judate kile kit dia asei
(Ezra 1:1-4)
22 Persia gam a Cyrus kumpipa ahi kum khatnan Pakaiyin Jeremiah Themgao kama aseisa chu aguilhunsah-e. Alenggam sung muntin a othongje jua simphong din Pakaiyin Cyrus chu lekha ajihsah-in ahi.
23 Alekha sut chu: “Hiche hi Persia kumpipa Cyrus thupeh ahi, Pakai Van Pathenin vannoi pumpi chunga lengvai eipohsah-in, Ama dia Judah gamsung, Jerusalem a Houin khat kasah din eingansei. Tun nangho Pathen mite nabonchan Jerusalem cheuvin, Pakai na-Pathen’un umpi jing tau hen,” ati.