DEUTERONOMY KITI DANBU NINA

Thupatna

Deuteronomy kiti lekhabua hi Israelten gamthip lai ajot galkaiyu, Canaan gam alut ding kon’u, Moab gamsung aumpet’uva, Mose’n ahilnau thu tampi kijih khom ahi.
Niche lekhabua kijihlut akhoh domse chu hiti ahi-
(1) Mose’n achesa kum somli thusoh ageldoh, Japi jah dia Pathen ageldoh jinguva, gamthip laiya apuihoi dol’u le kitah jing ding, Pathen thu nit jing ding ahil’e.
(2) Thupeh som avel’a geldoh kit, thupeh masah pen suhmil lou dingle Pakai bou hou ding thu aseiye. Chujongle Tepna gam lut teng nit ding chondan jatchom chom kiseipeh chengse avel’in ageldoh sah-e.
(3) Pathento akitepnau jeh asuhmil dauva, hiche nit jing dia akitepnau chu ageldohsah kit’e.
(4) Japi Pathen mite lamkai dia Joshua kithenso, Pathen kitahdol’a la asah joule, Israel phung jouse vang boh abol jouvin, Jordan lui nisolam, Moab gamsunga, Mose athitai.
Hiche lekhabu doi lenpen chu: alhenchomte Pathenin ahuhhinga phatthei aboh, angailut dol hi ahi. Amiten jong niche hi agel jing diu, ahintheiyuva vangboh achan jingna diuva Pathen angailut diule athu anit diu ahi.
Athugopna chang chu 6:4-6 lai ahin, Jesun thupeh lenpen ahisah-in, “Pakai na-Pathen chu nalungthim pumpi, nalhagao pumpi chule nathaneina jousen ngailun,” kiti hi ahi.

Asung thu hopkhen

Mose houlim masapen 1:1-4:49
Mose houlim nina 5:1-26:19
Thupeh som 5:1-10:22
Danthuho, chondanho, gihsalnaho 11:1-26:19
Canaan gam lutna dia hilchahnaho 27:1-28:68
Kitepna kisemthah kit 29:1-30:20
Mose lhahna thuseiho 31:1-33:29
Mose thi 34:1-12

DANBU NINA BUNG 1

Thupatna
1 Hiche lekhabua hi Jordan luigal nisolam gamthip laiya aumpet’uva Israelte koma Mose thusei jouse kisundoh ahi. Hiche pet hin Israelte chu Jordan phaicham, Suph kom, lang khat’a Paran ahin, alang khat a Tophel, Laban, Hazeroth chule Dizahabkhopi kigol, hiche kah a hin aum’uve.
2 Thinglhang lampi akijuile, Sinai molsanga pat Kadesh Barnea gei nisom le nikhat alut’e.
3 Lha somle khatna, nikho masapen ni, Egypt adalhah kal’u kum somli lhin nin, Mose’n mipi chu Pakaiyin seipeh dia ahil jouse aseipeh tai.
4 Pakaiyin Heshbon khopia vaihom, Amorte lengpa Sihon le Ashtaroth khopi le Edrei khopia vaihom, Bashan lengpa Og ajo nunga hiche hi Mose’n asei ahi.
5 Mose’n Pathen Danthuho le thuhil ho aseipatna mun hi Jordan luigal nisolam Moab gamsunga mipi umpet ahinalaiye. Mose’n,
6 “Sinai molvuma chun Pakaiyin ijah-uva aseiyin, ‘Hiche molsanga nathamsot behseh tauve.
7 Ngahmun phelhauvin kitolpai tauvin. Amorte thinglhang gamsungle akimvel sungse lhahuvin, Jordan phaicham jon’un, thinglhang gam le phaigam, lhanglam gam, Mediterranea Twikhanglen manouvin. Canaan gam jon’un lang, Lebanon molsang lam jot paiyun, Euphrates luipi dung geiyin kitol’uvin.
8 Gam hichengsepi hi Kei-Pakaiyin napu napateu Abraham, Isaac chule Jacob le achilhahte peh dia katepsa ahitai. Cheuvin lang galotauvin,’ tin aseiye,” ati.

Mose’n Thutan vaihomte alhendoh
(Ex 18:13-27)
9 Mose’n mipi jah a, “Sinai mol’a i-umpet’un jong kaseipeh tauvin, ‘Nangho lamkai ding hi keidin ahahsa behseh-e. Kachangseh a johoi ahipoi.
10 Pakai na-Pathen’un van a ahsi jat naphahsah tauve.
11 Napu napateu Pakai Pathenin asang sangin punbe sah hen, athutepsa bangin khantousah-u hen!
12 Nakitomonau thu hahsa hitobangpi hi iti kachangseh a katanpeh jou diu hitam?
13 Aphung phunga konin miching, thu hethem, ima hetohsa mi lhengdoh-un, nachung thu kholtoh din pansah inge,’ kati.
14 Hiche hi thilphan nagel’un pha nasauve.
15 Hijeh chun aphung phunga konin michingle thu hethem nalhengdoh-un, nachung thuu kholtoh din kapansah-e. Abang bang sang khat chunga thu neiyin apangun, abang jakhat, abang som nga, kon khat jong som khat chunga thu neiyin apangui. Phung jouse chunga phabep jong vaibol’in kakoiye.
16 “Hichepet hin amaho kahilchah-in, ‘Namiteu kinahna ho chu kholtoh-un. Kibaona jouse kitoh chet chet’in thu tempeh-uvin, namiteu hihen nalah-uva cheng gamchom mi hileh.
17 Langneiyin thu tan hih hel’un; koi chung thu hile kitoh cheh-in thu tanpehuvin. Pathen phatsah a thutan nahijeh-un, gintumle jatum nei dauvin. Hahsa nasah behseh-u thu chu kahenga hin lhut’un, ken tan nange,’ kati.
18 Hiche pat hin thildang nabol diu jouse kahilchah nauve.

Kadesh Barnea kona gamve-lhi kisoldoh
(Num 13:1-33)
19 “Pakai i-Pathen’un eihilchan i-bol’uve. Sinai mol idalhauvin, kichat tijat umrah gamthip chutejen ijot’un, Amorte thinglhang gam ijon’uve. Kadesh Barnea i-lhun phat’un,
20 najah-uva, ‘I-pu ipateu Pathen, Pakai i-Pathen’un eipeh-u, Amorte thinglhang gam nahung geitauve.
21 Veuvin agam chu hiche khu ahi. Pakai thupeh bangin cheuvin galo’uvin. Lung sa-ih dauvin, kijong kicha hih-un,’ kat.
22 “Hichun nahungun kajah a, ‘Gam ve-lhi din mi sol masaute, gamve hon jot lutna ding lampha pen le agamsung khopi pha liaise se eiseipeh thei diu ahi,’ natiuve.
23 “Pha kasan, aphung phunga konin mi somle ni kalhengdoh-in,
24 amahon thinglhang gamsung agakhol’un, Eshcol phai geiyin akholtoh soh keiyui.
25 Gamsunga gamga phabep jong eihinpoh peh-un, Pakai i-Pathen’un eipeh-u gamsung phatdol eiseipeh tauve.
26 “Ahinla Pakai na-Pathenu thupeh nadoudal’un, gamsunga nalut tapouve.
27 Khatle khat nakiphun’un, ‘Pakaiyin eihot bol’un, Amorte thagamsah din Egypt a konin eipuidoh-uve.
28 Canaan gama ipi igabol diu ham? Kichat aum’e. Gamvea isol ho’uvin agamsung mite eiho sanga hatjoa sangjo thubou eiseipeh-un, vanthamjol geiya sang kulpi kaikhumsa kopi jenga cheng ahiu aseiyuvin. Milentah tah amu’ve,’ natiuvin ahi.
29 “Hijongle ken, ‘Hiche mite chu kichat dauvin.
30 Pakai na-Pathen’un lamkaiyintin, Egypt gama manusau banga gal nasatpeh diu,
31 gamthip laiya napanhu banguva nahu diu ahi. Hichan geiya damsel’a nahin puipeh-u namutauve, mipan cha apoh banga napoh-u ahi,’ kati.
32 Ipi kasei vangin Pakai natahsan deh pouvin,
33 Pakaiyin nalamkaiyuva ngahmun ding geiya naholpeh vangun natahsan pouve. Lam hil din namasanguva achen, janle meikouvin, sun teng meilomin napuiyuve.

Pakaiyin Israel alen amatsah
(Num 14:20-45)
34 “Nakiphin’u Pakaiyin ajan alung hangtan, hijeh chun lung giltah-in aphongdoh-in,
35 ‘Napu napateu peh dia katepsa hiche gam phatah khu, hiche khang gilouva mite khatcha jong pepouvinge.
36 Jephunneh chapa Caleb bou agamsung lut ding ahi. Keidia kitah jing ahijeh a, khol tohsa gamsung khu amale achilhahte kapeh ding ahi,’ ati.
37 Nangho jal’in keisan jong Pakaiyin eilunghan khumin, ‘Mose, nang jeng jong agamsung khu lupon nate.
38 Hijongle nahu jing, Nun chapa, Joshua lung lutna khu tilkhouvin. Agamsung lo dia Israelte hi aman apuilut ding ahi,’ ati.
39 “Chujouvin Pakaiyin ijah-uvah, ‘Galle tol thagam dia nagin mou sele pha helou lai nachateu hi Canaan gamsung lut diu ahi. Amaho agamsung hi pen tin achenpha diu ahi.
40 Nangho vang kile tol’un, gamthip jotpeh-un, Aqaba twikol lam jontauvin,’ eitiuve.
41 “Nanghon, ‘Vo Mose, Pakai douna chonse kahitauve. Pakaiyin eiseipeh bangun galbol tauvinge,’ natiuve. Hiti hin galsat din nakigo cheh-un, thinglhang gam mite sat’a jobai din nagel’uve.
42 “Ahinla Pakaiyin kajah a, ‘Gal bolsah dan, kenla lhonpi pong ting, amelmateuvin ajo diu ahibouve,’ eiti.
43 Pakai seibanga kaseipeh vangun, nagaisah-in nei neipouve. Pakai doumah bol’in, hoitho tah-in thinglhang gam nadel khum’ui.
44 Hichun chugama cheng Amor mite nakisatpi diuvin khoilhah honte kitol bangin ahung kitoldoh jengui. Hormah geiyin nadeljam’un, Edom thinglhang gamsunga amahon najoutauve.
45 Hichun Pakai panpi ngaiyin napengjah-un, Aman i-yin nagel pouvin, khohsah din nagel pouve.

DANBU NINA BUNG 2

Gamthip laiya kohl tham kum
46 “Kadesh Barnea i-thamsot val phat’un,
1 Akhon nan gamthip langa jon din ikihei tauvin, Aqaba twikol lam jonin icheuvin, Pakai seisa bangin, Edom thinglhang gamsunga chun phat sottah ivah thang leuvin ahi.
2 “Hichun Pakaiyin kajah a
3 chuche thinglhang gamsunga sotpi ivathaileu aseiyin, sahlam gam imano diuvin eihil’e.
4 Nangho seipeh din hitin aseiyin: ‘Nasopiteu, Esau chilhahte gamsung, Edom thinglhang gam najot diu ahitai. Amahon nakichat diu,
5 hijongle nakisatpi lou diu ahi; ajeh chu agam leiset’u kengpeh tholcha jong pe pouvinge, Edom gamsung hi Esau chilhahte dia kapehsa ahi.
6 Neh le chah nakichoh thei diu ahi,’ ati.
7 “Nabol jouseuva Pakai na-Pathen’un vang naboh-u chu geldoh-un. Gamthip lai hitejen najot laiyun jong nachinguvin, kum somli sung hin na-umpiuvin, nadei nangai jouseu napeuve.
8 “Hijeh chun Elath le Eziongeber khote nia kipan lamlen dalhan Twimang lam ijon’un, sahlam niso lam jonin Moab lam inotauve.
9 Hichun Pakaiyin kajah a, ‘Moab mite phin dan, Lot chilhahte chu, sat din jong gel hih-un, Ar kopi hi amaho kapeh ahitan, agamsungu themcha jong kapeh lou ding nahiuve,’ eiti.”
10 Ar khopia hi mihat, jat lentah Emim kiti ho chu ananchengji ahi. Jat len loi khat ma, Anakim kitiloi san a sangma ahiuve.
11 Anakimho bangin amaho jong Rephaim tin aheuve; Moab mite amaho hi Emim atiuve.
12 Edom gam a hin Hor mite jong anacheng jin, Esau chilhahten anadel mangun, khonunga Pakaiyin apehnau gamsunga kona Israelten amelmateu adelmang banguva, hiche nam mite hi asuhmanguva, chenpha aneiyu ahitai.
13 Mose’n, “Chuin Pakai thusah-in Zered lui igalkaiyuve.
14 Tu hi Kadesh Barnea idalhah kal’u kum somthumle get ahitai. Pakaiyin asei masah bangin hiche khanga galsat thei pasal jouse athisoh tauve.
15 Asuhgam soh hel kahsen Pakaiyin amaho chu adou jinge.
16 “Amaho thisoh phat’in,
17 Pakaiyin ijah-uvah,
18 ‘Tunia hi Ar lamlen najuiyuva Moab gamsung nagalkai diu ahi.
19 Lot chilhahte, Ammon mite gam komcha gei ding nahiuvin, naphin da diu, sat jong nasat thei lou diu ahi; ajeh chu agamu halsi cha jong kapeh lou ding nahiuve,’ ati.
20 Hiche gam chu anachengte minpun, Rephaim gam tin jong akihei; Ammon miten amaho chu Zamzummim atiuve.
21 Hiche mite chu Anakimte san a sang ahiuve. Mihem jat tamtah ahiuvin, hat jong hattah ahiuve. Ahivangin Pakaiyin asugamin, hijeh chun Ammon miten agamu alon, achenpha tauve.
22 Edom thinglhang gamsunga cheng, Esau chilhah ho, Edom mite dia jong Pakaiyin chutobanga abolpeh ahi. Pakaiyin Hor mite asuhgama, Edom miten agamsungu alo’uva, tu geiya achenphau ahitai.
23 Crete twikol gam miten Mediterranea Twikanglen pang dung atouphatauve. Agam mi, Avvimte asugam’un, lhanglam Gaza khopi geiyin alauvin ahi.
24 “Moab gamsung ijotdoh jouvun Pakaiyin ijah-uva, ‘Kipat’un Arnon lui galkai tauvin. Heshbon a Amor lengpa Sihon le agamsung nakhut’uva kapehdoh ahitai. Delkhum’un lang agamsung touphauvin.
25 Tunia pat muntin gamtin a miten nagin pat diu ahi. Naminu kiphahna chan a miho tija kihot lhul diu ahi,’ ati.

Israelten Sihon lengpa ajo’u
(Num 21:21-30)
26 “Hichun Heshbon a lengpa Sihon koma din Kedemoth gamthip a konin chamna thusei din mi kasol’in:
27 “Nagamsung neijot paisah-un. Lam pam pot louvin paljang jeng nauvinge.
28 Neh le chah man jong penau vinge. Nagamsung neijot paisah diu chubou kadeiyun,
29 Jordan galkaiya, Pakai ka-Pathen’un eipeh-u gamsung kalut kahseuva dia ka-ngeh-u ahi. Edom a cheng Esau chilhahte le Ar a cheng Moab miten jong agamsungu eijotsah-uve,’ katisah-in ahi.
30 “Hichea hin lengpa Sihonin agamsung eijotsah pouve. Pakai na-Pathen’un lung asuhtah peh-in, doumah bol’in apansah tan, hichea chu eijosah-uva hitia hi tu geiya agamsung itouphau ahi.
31 “Chuin Pakaiyin kajah a, ‘Vetan, leng Sihon le agamsung mite namasanguva panpi ngaichan kalhan, lahpeh-un lang agamsung khu lo jengun,’ eiti.
32 Eiho sat din Sihonin amite abonchan puiyin ahung kondoh-un, Jahaz khopi koma kisat din sultan,
33 ahinla Pakai i-Pathen’un Sihon chu eipedoh tauvin, amale achapate, chule asepai jouse i-that tauve.
34 Hichun khopi jouse ilauvin, isugam’uvin, numei pasal, chapang khen beihel’in ithat gamtauve. Hinghoi ineipouve.
35 Gancha jouse iman’un, khopi ho la ichomsoh tauve.
36 Pakai i-Pathen’un Aroer a pat Arnon phaicham geiya khopi jouse eilosah-un, phaicham lailungtah a khopi geiyin eitouphasah-uvin, Gilead geiyin ilotauve. Khopi kulpi pal hochimlel ineipouve.
37 Ahivangin Pakai i-Pathen’un chelou dia eigahnau Ammon mite gamsung naile Jabbok luidung pang, thinglhang gamsung khopiho chule mundang dang khat cha jong ichepouve.

DANBU NINA BUNG 3

Israelten lengpa Og ajo’u
(Num 21:31-35)
1 “Abanin sahlam, Bashan gamkaiya ikitol’un, Edrei khopi koma eiho sat din lengpa Og asepaite to ahung kontai.
2 Ahivangin Pakaiyin kajah a, ‘Og khu kicha hih-in. Ama jong, asepaite le amite chule agmsung jouse kapeh ding nahi. Heshbon a leng chang, Amorte leng Sihon nabol bang bangin bol’in,’ eiti.
3 “Hiti chun Pakaiyin lengpa Og le asepaite eipeuvin, i-thatgamtauve.
4 Akhopi jouse jong ilauvin, lah khel khatcha jong ineipouve. Aboncha khopi somgup-Argob gamkai pumpi, Bashan a leng Og vaihomna jouse ilasoh hel’uve.
5 Khopi hijat hi kulpi sangtah kikaikhum, kelkot kihonga, kelkotgol kikam cheh ahin, kulpi kaikhumlou khote tamtah jong ahithai.
6 Heshbon a leng Sihon khopiho i-bolna bangun, khopi jouse isumangun, mihem numei pasal, chapang khen beiyin i-that gamtuave.
7 Khopiho ichom’uvin, gancha jouse iman’ui.
8 “Hichepet hin hiche Amor mite lengte nia kon hin Jordan lui niso lam gamkai, Arnon luidunga pat Hermon molsang gei ilauve.
9 Hermon molsang hi Sidon miten Sirion atiuvein, Amore miten Senir atiuve.
10 Bashan lengpa Og gamsung pumpi molcham pheiya khopi jouse, Gilead lhang jouse le Bashan jouse, niso lam Salecah le Edrei khopi geiyin ilasoh hel’ui” ati.
11 Lengpa Og hi Rephaim mite lah a anunungpen ahitai. Akong, songa kisem chu, thiltena ngaiya akite le, adung metre li alhingin, availam metre ni alhingdeh-e. Hiche hi tuni geiyin Ammon mite khopi Rabbah a aum nalaiye.

Jordan gal niso lam a Cheng Israel phung
(Num 32:1-42)
12 Mose’n, “Gamsung ilo phat’un, Reuben phung le Gad phung chu Aroer khopi sahlam gamkai, Arnon luidung kom, chule Gilead thinglhang gam phabep le akhopi chengse kapei.
13 Manasseh phung keh khat chu,, Gilead gamsung avalse le Bashan gam, Argob gamkai pumpi, Og lengvaipohna jouse kapen ahi,” ati. Bashan jong hi Rephaim gamin bou akihei.
14 Manasseh phunga Jair chun Argob gamkai pumpi, Bashan a pat Gashur le Maacah gamgi gei alai. Akhote jouse ama min aputsah-in, hijeh chun tun Jair khote hon bou akiseiye.
15 Mose’n, “Gilead chu Manasseh phunga Machir insung mite kapei.
16 Reuben le Gad phung vang chu Gilead gama pat Arnon luidung gei kapei. Vadung kimlaitah chu lhanglam gamgin jong apang’e.
17 Lhumlam a agamgiu Jordan vadung ageiyin, Galilee dillen a pat sahlam gamgi ahung lhungsuh-in, lhanglam twimang dung geiyin ahungin, nisolam Pisgah molsang geiyin alhunge.
18 “Hichepet hin amaho hitin kahilchah-e: ‘Pakai i-Pathen’un Jordan luigal nisolam khu nalo diuvin napetauve. Tun pasalse sen manchah choiyin Jordan galkaisah-un, Israel phung dang hon agamsungu alo theina diuvin gapanhu tauvin.
19 Naji nachateu le ganchaho, gancha tampi nei nahiuvin, nalo diuva kapehsa khopi dunga dalhauvin.
20 Hikoma nangho napeh banguva, Pakaiyin amaho apeh ding Jordan luigal lhumlam gamsung alosah a, chamle lung monga achensah kahsen, nasopiu Israelte khu gakithopiuvin. Alosah jou teng vangle kapehnau gamsunga hung kile kit thei tauvin nate,’ ati.
21 “Hichun Joshua kahildim demin, ‘Pakai na-Pathen’un hiche leng te ni: Sihon le Og abolna khu manutauve; koi gam hijongle nakisatpi jouseu hitia khu abol cheh ding ahi.
22 Koimacha kicha hih-un, ajeh chu Pakai na-Pathen’un gal nasatpeh nauvinte,’ ati.

Canaan a Mose lut ding phallou
23 “Hichepet chun giltah-in kataovin,
24 ‘Thaneipen Pakai, thil loupi tah le datmo um nabolgot apatna neimusah ahi kahei, Van a hihen leiya hile nabol tobang thil nasa bol thei pathen dang aumpoi!
25 Jordan neigalkaisah-in Pakai, gal lang gampha tah, thinglhang gamhoi lai, Lebanon molsang ho neimusah teiyin,’ tin kataove.
26 “Ahinla nangho jal’in Pakaiyin eilung hantan, kataona asangtapoi. Sanpeh tahsangin, ‘Hai jengin, seikit datan!
27 Pisgah molvuma kaldoh-in, sahle lhang, so le lhum gaven. Namu chengse chu phaten melchih jon, ajeh chu Jordan nagalkai louhel ding ahi,
28 Hil dia lom jouse Joshua hil’in. Alung lutna chu tilkhouvin, ajeh chu hi che gamsung khu lo dia mipi apui galkai ding ahi,’ ati.
29 “Hijeh a chu Bethpeor khopi gal phaicham a umden kahitauve,” ati.

DANBU NINA BUNG 4

Mose’n Israelte thu nit dia atil
1 Hichun Mose’n mipi jah a, “Pakai, napu napateu Pathenin napeh got’u gam chu lut’a chenpha ding nanop’u le kahil’u danthu jouse hi nit’uvin.
2 Kathupeh hi belap dauvin, pai jong nei hih-un. Kapeh-u Pakai na-Pathenu thupeh chengse nitsoh keiyun.
3 Peor molsanga Pakai thilbol namu cheh-u ahi. Chukoma Baal doi hou jouse asugamin,
4 Pakai na-Pathen diuva kitah jing nang ho vang tuni geiyin nahing nalaiyui.
5 “Pakai ka-Pathenin eiseipeh bangin Danthu jouse kahilsoh tauve. Gal bolkhuma chenpha nagot konchau gamsunga chun hiche Danthuho chu nit’uvin.
6 Danthuho chu kitah tah-in nit leu chun, nachih jeu chu namdong hon mudoh tauvinte. Amahon hiche Danthuho hi ajahdoh tengu, ‘Hiche nam loupi tah khun itobang chihna le thil het themna aneiyu hitam!’ tiuvinte.
7 “Pakai i-Pathen’un eiumpi jing bangun, len hen neo le, koimacha nam, angaichat komle umpi jing thei pathen nei aumpoi. Pathenin panpi ithum teng eipeuve.
8 Tunia kahil banguva Danthuho dih hi, len hen neo le, namdang koima anei aumpoi.
9 Kiging phauvin! Namit tah a namusau hi, nahin laiseuvin sumil hih hel’un. Aban banin nachate natute geiyin seipeh son son’un,
10 Sinai molsang, Pakai na-Pathenu angsunga nadin niu thilsoh, Aman kajah a, ‘Mipi gakhomin. Kasei ajah diu kadeiye, chutile ahin laiseuva kasei ngaije kihil’uva, achateu jong Kei ginje ahil diu ahi,’ ati chu.
11 “Meilhang jinglei loi, meikhu thimlet lut, vanlaijol geiya meikou pah lah lah molsang bul’a iti nagadin’u chu nachate seipeh-un.
12 I-atile meikou lah a Pakai thusei najah-u, chule mel mulouva um nahiu chu nachateu seipeh-uvin.
13 Pakaiyin kitepna nasempiu nanit tei tei diu chule songphengte nia asutdoh thupeh chengse najui diuvin aseiye.
14 Tua nokhum jenga toupha ding nagot’u gamsunga nanit diu Danthu jouse kahil diuvin eiseipeh-e.

Milimdoi hou louna dia gihsalna
15 “Sinai molvum meikou lah a Pakayin thu naseipeh peh pet’un, alim amel umdol namupouve. Naphatna diuvin kichentah-in kihet’un,
16 nachonset lo na diuvin hou din doilim kitipou pou, pasal lim ham numei ham,
17 gancha lim hihen vacha lim hile,
18 tol’a kithol ho lim le nga lim ham nasemthu thei lou diu ahi.
19 Vanthamjol’a namuho’u, nisa hihen lhathah hile, ahsi geiyin jong chibai boh dauvin. Pakai na-Pathen’un hicheng hi vannoi mite dia apeh thilsem ahibouvui.
20 Tuni geiya amite nahi banguva, Pakaiyin nang ho hi meilhum sung tobanga Egypt a kona amite hisah dia nahin puidoh-u ahi.
21 Nangho jeh a Pakaiyin eilung han a, napeh got’u gampha tah lut lou dia, Jordan galkai lou dinga eiseipeh lo ahitai.
22 Hiche gamsunga thiden ding, itih a jong Jordan galkai lou ding kahitan, nangho vang galkaiya hiche gampha tah khu lo ding koncha nahituave.
23 Pakai na-Pathen’un nakiteppi nau thu chu gel jingun. Milimdoi houdan Pakai thupeh jeng juiyun;
24 ajeh chu Pakai na-Pathenu hi mi leolih jeng thei meikou tobang ahin, koiman adou theihoi ahipoi.
25 “Agamsunga chun sotpi chengin, tule cha nei jongleu chun, houdia ima milimdoi semthun chonset bol hih beh-un. Milimdoi semthu hi Pakai vetdia thilse, alung hansah jeng ahi.
26 Hettohsah a pang dia tunia van le leiset kouva kasei hih na-ngaidaule, agamsunga kona chu namanthah loi diu, nalogot tah vanguva, hiche Jordan gal’a khu cheng louhel ding nahiuve, Pakaiyin nasuhgam hel diu ahi.
27 Pakaiyin namtin vaipi jalah a thecheh-un natin, lhomcha bou hing doh-un nate.
28 Mite gamsunga chu mihem semthu doilim ho, thinga kisui, songa kisem, kho jathei loule kho muthei lou, i-netheilou i-chathei lou ho chu nahou diu ahi.
29 Hikoma chun Pakai na-Pathenu, lung giltah a hol’a nahiule, namu diu ahi.
30 Gim hesoh nathoh-uva, thil ijakaiyin nalhunden tengu, Pakai hin jon’un natin, athua nung tauvin nate.
31 Mi hepi them Pathen ahi. Donda pouvin tin, sumang pouvin nate; napu napateu to akitepna jong sumil ponte.
32 “Khanglui lai geldoh-un, napen masangu ngaitouvin-leiset’a Pathenin mihem asemtil laipeh ngaitouvin. Hitobang thil nasa hi anasoh kha mong am? Hitobang thilsoh jakha mihem um tam?
33 Nangho banga meikou lah a Pathen thusei jakha nam mite um kham?
34 Pakai na-Pathen’un Egypt gama nangho nabolpeh banguva, nam mite khat gapuidoh jenga amite dia kisem pahtne khattou um kham? Namitmu changtah-un thaneitah-in gamna hise le gal amang chan, thil kidang le datmo tampi bol’in, tijat jat um thil asosah-e.
35 Amabou Pathen hiya adang umlou phot chetna Pakaiyin hicheng hi abol ahi.
36 Nangho hilchah nan van a konin aogin najahsah-un, leiset chunga ameikou theng namusah-un, meikou lah a konin nakihoupiuve.
37 Ajeh chu napu napateu alungset’in, nangho nalhengdoh-un, athahat’in Egypt a kon nahin puidoh tauve.
38 Tugeiya nanei jingu hiche gamsunga napuilut theina diuvin agam neite adel mangin, nasanguva thaneijo le huhamjo nam mite nanojampeh tauve.
39 Hijeh chung tunin geldoh-un, sumil loujen’un, Pakai hi van a jong leiset’a jong Pathen ahin, pathen dang aumpoi.
40 Tunia kapeh-u a-Danthu jouse hi juisoh keileu chun nangho le nachilhahteu dia pha ding, Pakai na-Pathen’un napeh-u gamsunga nachen chen jeng diu ahi,” ati.

Jordan gal nisolam a hoidohna khopiho
41 Jordan luigal niso lam a Mose’n khopi thum alhengdoh-in
42 hichenga hi kidoupi jeh hilouva, khutsoiya kithat ho jamlut’a hoidoh din abol’e. Hiche khopi khat pen pen a mithat chu jamlut thei, chule hingdoh thei ahi.
43 Reuben phung din, nelgam cham lai, Bezer khopi ahin, Gad phung din, Gilead gamsunga Ramoth khopi ahin, Manasseh phung dia Bashan gamsunga Golan khopi ahi.

Pathen Danthu pehdol thupatna
44 Israelte chu Mose’n Pathen Danthuho le kihilna ho apei.
45 Hiche pet’a hi Israelte Egypt a kona ahungdoh jouvu, Jordan luigal nisolam phaicahm, Bethpeor khopi gal’a Danthuho hi Mose’n anapeh ahi,
46 amun tah chu Heshbon khopia vaipo, lengpa Sihon gamsung ahi. Egypt a ahung potdoh-u chun Mose le Israelten lengpa Sihon anajouvui.
47 Israelten Sihon gam le Jordan luigal nisolam a cheng, Amorte leng chom khat Bashan khoa leng Og gamsunga alotauve.
48 Hiche gam hi Aroer khopia pat Arnon luipang ajuiyin, Hermon molsanga, Sirion molsang kiti lai geiyin akigoltouve.
49 Agam hin Jordan nisolam gamkaisese le noilam twimang dung gei, chule Pisgah molsang bul gei ahop’e.

DANBU NINA BUNG 5

Thupeh som khat
(Ex 20:1-17)
1 Mose’n Israelte akoukhomsoh keiyin ajah-uva, “Vo Israelte, tunia kapeh-u Danthu jouse hi ngaiphauvin, kihil them’un lang, aboncha nitsoh hel din gel’uvin.
2 Sinai molsanga Pakai i-Pathen’un kitepna anasemin,
3 i-pu ipateu keotoh asempon, tuni geiya hingna lai eihoto jong asem ahibouve.
4 Molvuma chun meikou lah a konin Pakaiyin kimaiton nakihoupiuve.
5 Hichepet chun meikou kicha a molvuma nakaltou ngamlou jeh-un, aseidoh chengse seipehson din Pakai le nangho kah a kadinge. “Pakaiyin aseiyin,
6 ‘Nasohchan nau Egypt a kona nahuhdoh-uva Pakai na-Pathenu chu Kei kahi.
7 “ ‘Kei tilou pathen dang hou dauvin.
8 “ ‘Van a hihen leiset’a hile, leinoi twilah a hijongle, imacha limin doi semdauvin.
9 Milimdoi kisem khatcha koma bohkhup’in chibai boh dauvin, ajeh chu Kei hi Pakai na-Pathenu kahin, kibahpi bei kahi. Eihotbolte chu atu acha, khangli geiya talen matsahji kahi.
10 Kasei ngaiya Kadanthu ho nitte vang chu khang asang sang geiya ngailu jing kahi.
11 “ ‘Thilse bolnan Kei min phapoh hih-un; ajeh chu ajeh beiya kamin pan josue Pakai na-Pathenu Ken talen kamatsah ding ahi.
12 “ ‘Pakai na-Pathenu Ken kaseipeh bangun, Choldo nikho nit’un lang suboh hih-un.
13 Natohna ding nigup naneiyun,
14 ni sagi ni vang choldo nikho dia Kei dia thensosa ahitai. Hiche nikhoa hi koiman na atoh lou ding, nangho jong, nachateu jong, nasohteu hihen, naganchau hile, nagamsunguva cheng gamchom mi hijongle, nangho choldo banga nasohteu jong choldo diu ahi.
15 Egypt a sohchangsa nahiu geldoh-un, Pakai na-Pathenu Ken thahatsan a kahuhdoh nahiuve. Hijeh a chu Choldo nikho nitdia kaseipeh nahiuve.
16 “ ‘Pakai na-Pathenu Ken kaseipeh bangun, kapehna gamsunga damtheiya nahinkho sotna diuvin, nanule napa jabol’un.
17 “ ‘Tol that hih-un.
18 “ ‘Mito jong hih-un.
19 “ ‘Gucha hih-un.
20 “ ‘Jouvin mi heh dauvin.
21 “ ‘Pasal dang ji deichat dauvin; a-in, agam, asohte, agancha ho, asa-ngante, aneipou pou ipi hile deichat dauvin,’ tin aseiye.
22 “Molsanga nakikhop pet’uva Pakaiyin nabonchau jah a asei chu hicheng hi ahi. Meikou lah le meilhing jinglei loi lah a othong leuva thu asei chun, thildang sei louvin Thupeh hicheng joh hi aseiye. Thupeh chengse chu songpheng nia ajih-in eipei.

Japi kichat
(Ex 20:18-21)
23 “Mol pumpi meiya akou jenga, muthim lah a kona ogin najah phat’un, naphung lamkaiteu ahungun
24 ‘Pakai i-Pathen’un alal loupina eimusah-un, meikou lah a kona athusei kajatauve! Tunin mihem chu Pathenin kihoupi jongle athilo loudol kamudoh tauve.
25 Thilona ding bep ikhoh a ibol diu ham? Chubang kichat um meikou chun eileogep soh dingu ahi. Pakai i-Pathen’un eihou kit pou pouvule ithilo tei diu ahibouve.
26 Meikou lah a kona Pathen thusei ja a hingdoh mihem um mong nam?
27 Vo Mose, kile kit’in, Pakai i-Pathenu thusei jouse ga-ngaitan, chule aseichan neihung seipeh tho jouvin, ngaiyung ting jui jeng tauvinge,’ atiuve.
28 “Aseiyu hi Pakaiyin ajan, kajah a, ‘Hiche ho thusei hi kajatai, chule aseiyu adih-e.
29 Hitin gel jingu le pha lheh-inte! Thil ijakai amaho le atu achateu dia aphat theina din itih-in jong eijau hen kasei jouse nit leu phante.
30 Chen lang aponbuh chenguva sol kit tan.
31 Mose, nang vang hikoma Keito i-umkhom ding, Kadanthu jouse le kathupeh chengse kapeh ding nahi. Kapehgot gamsunga ajui jingna diuva Danthuho le thupeh chengse hi mipi nahil ding ahi,’ ati.
32 “Vo Israelte, Pakai na-Pathen’un naseipeh chan nitsoh keiyun, Adanthu khatcha jong nitda hih-un.
33 Chenpha dia najot’u gamsunga chu nachen jinguva, ijakai aphatsohna din Pakai sei jouse nit’un.

DANBU NINA BUNG 6

Thupeh nasa
1 “Pakai na-Pathen’un nangho hil dia eipeh Danthu chu aboncha hichengse hi ahitai. Chenpha dia lut nakigotnau gamsunga aboncha hin nitsoh keiyun.
2 Hiche gamsunga chu nachensot theina diuvin, nahin laiseuva, nangho le natu nachatenuvin, Pakai na-Pathenu najauva, kapeh-u A-danthu jouse hi nanit diu ahi.
3 Vo Israelte, hiche kisei jouse hi ngaiphauvin lang nit jingun! Chutile nadiuva ijakai pha ding, nam loupitah nahiuva, Pakai i-pu i-pateu Pathenin atepsa banga, hiche gamsung phatah a chu nachen thei diu ahi.
4 “Hiche hi geldoh-un Israel! Pakai: hiche Pakai bou hi ahi i-Pathenu chu!
5 Pakai na-Pathen chu nalungthim pumpi, nalhagao pumpi chule nathaneina pumpkin ngailu’vin.
6 Tunia kapeh hiche thupeh chengse sumil hih hel’un.
7 Nachate hil jingun, in umom hihen, kohl chepet hihen, choldo pet hihen, natoh pet hijongle, avel vel’in hil’uvin.
8 Nakhutchong dunga kibun, nachalpang dunga jong khaiyun, suhmil louhelna dingin.
9 Nakotphung dungule nakelkot dung jouseuva jong jih cheh-uvin.

Thu ngailoujeh a gihsalna
10 “Napu napateu Abraham, Isaac chule Jacob kom Pakai na-Pathenu akitepsa banga, nasem louhel’u ninglhing tah le lentah khopi dimset, gam khat napeh diu ahi.
11 In jouse jong nakhol khah louhel’u thilpha dimsa, chule nalai khah louvu twikul tampi, natu louvu lengpilei le pahcha dimset gam ahi. Pakaiyin hiche gamsung hi nalhut tengu, naduchan naneikim diu,
12 chutengle nasohchan nau Egypt a kona nahuhdoh-u Pakai chu sumil loujen’un.
13 Pakai na-Pathenu gingun, Amabou houvun, Ama minin bou kitepna neiyuvin.
14 Nakimvel’uva miten pathen ahisah-u, pathen dang him him hou dauvin.
15 Ijemtin pathen dang houleu chun, Pakai lunghan meikou banga deojah ding, nasuhgam hel theiyu ahi, ajeh chu naumpi jingu Pakai na-Pathenu hin kibahpi aneipoi.
16 “Massah muna bang chun Pakai na-Pathenu patep hih-un.
17 Napeh-u Danthu jouse nitsoh tei teiyun.
18 Pakai sei chu thilpha le a dih ahi. Chuteng Pakaiyin napu napateu atepsa gampha tah chu nalojou diu,
19 nateppehsa banguva, namelmateu nadeljam jou diu ahi.
20 “Khonung teng nachateuvin, ‘I-bol’a Pakai i-Pathen’un Danthu hijatpi nit dia eipeh-u ham?’ tia nadoh-ule,
21 ‘Egypt lengpa soh a kihensa ihiuvin, Pakaiyin athahat changa eihuhdoh-u ahi.
22 Egyptte le alengpau, chule avaipote chunga thil kidang datmole tijat jat um thil abol, kamit tah-in kamu’ve.
23 Ipu ipateu henga peh dia akitepna bangin, hiche gamsung hi peh din, Egypt gama eihuhdoh-un hikoma eihin puilut tauve.
24 Hijeh chun Pakai i-Pathen’un nit din Danthu hijat hi eipeuvin, Ama igin diuvin aseiye. Aseiya ichon’ule, inam pumpiu ching jing intin, phat theisah-inte.
25 Pathenin eithupeh chan bulhinga ijuiyule, ichunguva lung lhaiyinte.

DANBU NINA BUNG 7

Pakai dia amite
(Ex 34:11-16)
1 “Pakai na-Pathen’un losah dia nagot’u gamsunga khun puilut’un natin, namtin vaipi khujat khu nodoh-inte. Hitia nakitolnauva, nasanguva tamjo le hatjo nam sagi jen, Hit mite, Girgash mite, Amor mite, Canaan mite, Periz mite, Hiv mite chule Jebus mite, Pakayin nodoh peh-unte.
2 Hiche mite hi Pakai na-Pathen’un nakhut’uva apehdoh a najo tengu, nathagam jeng diu ahi. Hepi dan, kijolpi dauvin.
3 Chen jong kichenpi dan, nachateu jong khatcha to kichensah hih-un,
4 ajeh chu Pakai kom kona nachateu akai mang diu, pathen chom chom ahousah diu ahi. Hiti chun hung umkha taleh, Pakaiyin nalunghan’untin, nasuh mang jeng diu ahi.
5 Hijeh chun amaicham phung jouseu phelhauvin, doisong phung jouse vobongun, Asherah pathen-nu lima asem jouseu tulhu’uvin, amilimdoi jouseu halvam’un.
6 Hiche hi bol’un, ajeh chu nangho Pakai na-Pathenu mite nahibouvui. Leiset chunga chitin namtin lah a adeitum mite dia alhendohsa nahiuve.
7 “Namdang sanga natamjoh jal’uva Pakaiyin ngailut’a nalhendoh-u ahipoi; leiset’a lhompen nam nahibouvui.
8 Napu napateu henga akitepna molso nom jal’a Pakaiyin nangailut’u ahibouve. Hijeh a chu nasohchan nau Egypt lengpa kom kona aban thahat’a nahuhhingu ahi.
9 Gel jingun Pakai na-Pathenu hibou Pathen ahin, akita jinge. Ama ngailua athupeh chan nitte chu long louvin ngailuntin, akitepna molsonte.
10 Ahotbolte vang talen matzah jenginte.
11 Hijeh chun nakihilsau chu juiyun, tunia kapeh-u Danthu chengse hi nitsoh keiyun.

Thu nunjeh a vangboh
(Deut 28:1-14)
12 “Thupeh hicheng hi ngaiya tahsan tah a jui nahiule, napu napateu atepsa banga, Pakai na-Pathen’un nateppehsau nit’in tin, long louvin lungset’unte.
13 Chale nao tampi neiya napunbe chehna diuvin, ngailu’vintin, vang boh-un nate. Nalougau phat theisah-intin, changle mim, lengpitwi, olive thaotwi nengjel’a napeh diu; vang boh-untin, bongle kelngoi tampi nanei diu ahi. Nangho peh dia napu napateu kom akitepnasa gamsunga vangbohna hijat hi napeh diu ahi.
14 Nangho banga vangboh chang, vannoiya koimacha nam aumpoi. Nangho le naganchateu khatcha beh chabeiya ching umpouvin nate.
15 Pakaiyin damsah-untin, nahetsau Egypt gama tijat umrah tah veisetna ho khatcha phahsah pouvin nate; amavang namelmateu hitobang natna ho hi alhun khumsah ding ahi.
16 Nakhut’uva Pakai na-Pathen’un apeh lut chan nam mite chu sugam’un, hebol dauvin. Amaho pathente khat cha hou hih hel’un, namanthah lo diu ahi.
17 “Hiche mite hi nasanguva tamjo, nanodoh lel diuvin gel dauvin.
18 Kijong kichat dauvin, Pakai na-Pathen’un Egypt lengpa le amite abolna chu geldoh jingun.
19 Namit tah a namuu, gamna hise tijat umtah, thil kidangle datmo um, Pakai na-Pathen’un najalensah nau thahat loupi tah chu geldoh jingun. Egypt mite asuhgam banga, tua nakichatteu jong hi asuhgam thou ding ahi.
20 Alah-uva tijat kichatna lutsah-intin, jamdoh a kisel mang ho geiya asuhgam ding ahi.
21 Hijeh chun hiche mite hi ging hih-un. Pakai na-Pathen’un napanpi nauve; Pathen loupipen, ginpen ding Amabou ahi.
22 Nakitol machal dungjuiyuva hiche nam mite hi aban bana adelmang ding ahi. Khatveiseh a nasuh gamhel thei lou diu ahi, sugamhel leu chun gamsa hung hat’a, nadoulel lo diu ahi.
23 Melmate chu Pakaiyin nakhut’a pedoh-intin, amanthah geiyuva meidoiya akoi ding ahiuve.
24 Alengteu nakhut’uva pedoh-intin, natha gam’uva kilulah kit lou ding ahiuve. Naphaltan theiyu koima um lou ding, aboncha nasuhgam hel diu ahi.
25 Adoibom jouseu halvam’un. Doiya kisem dangka le sana jeng jong deicha hih-un, kilah dauvin. Kilah leu chun manthah lo get’un nate; ajeh chu Pakaiyin doilim semthu ahoi.
26 Hiche doilim semthu ho khat cha jong insunga choilut dauvin, achutiloule doilim gaosapna chu nachunguva chuh lonte. Pakai gaosap changsha ahijeh-un, hiche milimdoiho hi kidah le hot’a nanei diu ahi.

DANBU NINA BUNG 8

Chenpha ding gampha
1 “Napu napateu peh dia Pakaiyin atepsa gamsung nalo’uva, damthei le pung theiya naumna diuvin, tunia kapeh-u Danthu jouse hi nit bulhingkeiyun.
2 Kum somali sunga Pakai na-Pathen’un itobanga gamthip lai nahin pui galkaiyu geldoh jingun, ipi ngaito le athupehho nit ding nahiu hetdohna dia patepna hahsa tah tah nathoh jouseu sumil hih-un.
3 Kel nathohsah-un, chuin nangho le napu napateu neh khah louhel, Manna nanehsah-ui. Hiche abol lona chu mihem neh le chah maiya hing lou ding, Pakai thuseiya bou hing ding vetsahna ahi.
4 Hiche kum somli sung chun navon’u jong aspen, nakengu jong apompoi.
5 Mipan chate agahchah banga, Pakai na-Pathen’un nasuhdih-uva talen namatsah jiu ahi geldoh-un.
6 Hijeh chun Pakai thupeh bangin chon’un, a-Danthu sei bangin kimang chauvin, Ama ging jingun.
7 Pakai na-Pathen’un gampha tah a napuilut got’u ahin, agamsung hi luidungle twinah phung tampi um, leinoiya luidung long, mol le phaiya kikhodoh doh jeng gam,
8 suhlou changle sakol chang, lenpiga tamna, theichang le kolbuthei, olive le khoiju tamna gam ahi.
9 Agama chun kelle chah thoh kit pouvin, natin, songho jong thih kiso thei cheh, thinglhang dunga jong dah-thih nalaidoh diu ahi.
10 Nadu chan nanei diu, hitobang gampha, neh konna gam napeh jal’uva, Pakai na-Pathenu nathangvah diu ahi.

Pakai suhmil louna dia gihsalna
11 “Pakai na-Pathenu sumil loujen’un; tunia kapeh-u a-Danthu ho hi khat cha jong nitda hih hel’un.
12 Nadu chan naneiyuva, chenna ding inpha pha sadoh a,
13 bongle kelngoi, dangka le sana, neile you dang dang nahaodoh tengu,
14 kiletsah hoithon, Egypt a nasoh chan nauva nahuhdoh-uva Pakai na-Pathenu chu sumil khauvin nate.
15 Aman chutobang gamthip noi, tijat kichatna mun, gulse le aipi lah a nahin puidoh-u ahi. Gamgo lai, twi beina muna jong nadiuvin songpia konin twi aputdohsah jenge.
16 Gamnoiya chun napu napateu neh khah louhel Manna neh ding napeuve. Akhonna thilpha pea vang naboh theina diuvin, thil hahsa tampin napatep’ui.
17 Hijeh a chu nathahat’a haodoh a nakigel louhel diu ahi.
18 Hao theina thahat napeuva chu Pakai na-Pathenu ahibouve. Napu napateu to akitepna tuni geiya agel khoh jeh a hitobanga abol ahi.
19 Itih-in jong Pakai na-Pathenu sumil’in, pathen dang hou din kihei mang loujen’un. Nachuti chon diule, tunia kagihsal nahiuve, thon louhel’a nasuhmang diu ahi.
20 Aban bana nakitol tengu suhgam dia agot nam mite banga, Pakai thu na-ngai louvule, nasuhgam diu ahi.

DANBU NINA BUNG 9

Japi thu nunlou
1 “Vo Israelte, ngaiyuvin! Tunia hi Jordan lui galkaiya, nasanguva tamjo le hatjo nam mite gamsung toupha go nahiuve. Akhopiu jong alen theiyin, akulpi pal hon vanlaijol aphadeh deh-e.
2 Agamsung mite khu asangin ahat theiyui; milen jeng ahiuvin, koima douthei louva kisei najahsau ahi.
3 Ahinla tua hi Pakai na-Pathenu namasanguva meikou banga deuce jua che namu diu ahi. Nateppehsau banga, nakitol tengu hiche ho chu najopeh diu, nanojam’uva, nasuh mang diu ahi.
4 “Hiche mite chu Pakai na-Pathen’un nanodoh peh tengu, alo dia kilom nahijeh-uva hiche gamsunga nahin puilut danin sei hih hel’un. Ahipoi, amaho gitlou jeh a Pakaiyin hiche mite hi nanodoh peh-u ahibouve.
5 Naphat jeh le nadih jal’uva Pakaiyin hiche gamsung hi nalasah-u ahipoi. Agam mite gitlou jeh le napu napateu Abraham, Isaac chule Jacob koma akitepna anit nom jeh a Pakaiyin amaho anodoh ahibouve.
6 Alo dia kilom nahijeh-uva hiche gampha tah hi Pakaiyin napeh-u ahilou kichentah a nahet diu ahi. Kilom tah sanga milung khohte nahibouvui.
7 “Gamthip noiya Pakai na-Pathenu nalung hansah-u chu sumil hih-un. Egypt dalhaa hikom nahinphah geiyu hin, Pakai douna jeng nabol’ui.
8 Sinai molsang jenga jong Pakai nasu lung hangun, nasuh gamlo thei geiyin nalung hansah-ui.
9 Nangho to kitepna asemdoh kijihna songphengte ni la din molvuma kakaltouve. Molvum a chun an nelou twidon louvin, nisomli jan som li katham’e.
10 Molsang bul’a nakikhop niuva meikou lah a kona najah-uva asei thucheng ho akhut tah a ajih dohna songphengte ni chu Pakaiyin eipei.
11 Ahiye, nisomli le jan somali jouvin, kitepna thu asutna songphengte ni chu Pakaiyin eipei.
12 “Hichun Pakaiyin kajah a, ‘Tutah-in molvuma konin kumsuh loiyin, Egypt a kona nahin puidoh mite khu chavaiyin achon thangun, thilse abolgamtauve. Abol diuva kaseipeh joh dalhan, milimdoi akisemjotauve,’ ati.
13 “Pakaiyin hitin jong aseiyin, ‘Hiche mite lungtah dan kahetai.
14 Neijada hih-in, akilulah louhelna diuva suhgam ding kagot ahitai. Chuteng amaho sanga tam jo le thaneijo nam khat lamkaiya kasemdoh ding nahinai,’ ati.
15 “Hijeh chun molvuma konin kahung kumlhan, kitepna thu kijihna songphengte ni chu kahin choice. Hichun molsanga konin meikou akitung leng lunge.
16 Kahungle Pakai na-Pathenu thupeh palkah a, bongchal lim sum-eng nasem’uva, nahouvu kamudoh tai.
17 Hijeh chun na angsung laitah-uva songphengte ni kasep lhan ahalsi sin akithecheh-e.
18 Chujouvin nisomli jan somli sungin nelou chalouvin, bohkhup’in kataove. Pakai douna nachonset’uva, nasuh lung hang jeh-uva chutia tao kahi.
19 Pakai lunghan tijat umtah chu kakichan, ajeh chu nasuhgam helna theiyuva lung hang ahitai; hijongle kataona asang kit’in ahi.
20 Aaron chunga jong thadoh jeng theina khop’in Pakai alung hange. Hijeh chun amam din jong kataopeh-in ahi.
21 Chonsetna dia nakisemu bongchal lim chu kalan, meilhum sunga ka sep lut’in, kachon chip soh hel’in, tol’a kagoi disel’in, molsanga kon hung longsuh lui dunga chun kasung lhai.
22 “Pakai na-Pathenu chu Taberah, Massah chule Kibroth Hattaavah hicheng muna hin naphin lung hangui.
23 Napeh got’u gamsung lo dia Kadesh Barnea kona che dia nasol’uvin jong, Amajoh nadoulo tauve; tah jong tahsan lou, asei jeng jong ngailouvin naum’ui.
24 Hichea pat’a chu Pakai douna thilbol jing nahiu kahetai.
25 “Pakaiyin suhmang hel dia nagot’u kahet phat’in, nisomli jan somli sungin, Pakai angsunga bohkhup’in kataove.
26 Katao chun, ‘Vo thaneipen Pakai, namite nah nah, nathahat thuneina nasatah a, Egypt a kona nahin puidoh namite hi sumang hih-in.
27 Nalhachate, Abraham, Isaac chule Jacob geldoh-in, hiche mite lungtahna le gitlouna chule chonsetna hi khohsah datan.
28 Achutiloule namite hi peh dia natepsa gamsung nalhut lel danin Egypt miten seiget’unte. Navetda jeh a gamthip noiya thagam dia namite napuidoh-in seilo get’unte.
29 A-ihitajongle, amaho hi namite dia nalhendohsa, nathahat thuneina nasatah a Egypt a kona nahin puidoh mite ahiuve,’ kati.

DANBU NINA BUNG 10

Mose’n thupeh agalah kit
(Ex 34:1-10)
1 “Hichun Pakiayin kajah a, ‘Amasa tobang songpheng ni kheng kit’in, akoina din thingkong khat semin, Keikom, Molvuma hung kaltouvin;
2 nasekehsa songphengte ni chunga kajihsa chu, songphengte ni chunga chun jih kit ing ting, nangin thingkong sunga nakhum ding ahi,’ eiti.
3 “Hijeh chun thinggi thingin thingkong khat kasemin, songpheng ni amasa bang chun kakhengin, molvuma kapotoutai.
4 Hichun molsanga nakikhop niuva meikou lah a naseipeh-u, chule napeh-u thusom, songphengte ni chunga ajih kit’e.
5 Chuin molvuma konin kahung kumlhatai. Hichea hin Pakaiyin eihil bangin, thingkong kasem sunga chun songphengte ni kakoiyin, hichea pat chun aum den jingtai,” ati.
6 Jaakan mite twikul’a pat Israelte akitol’un, Moserah ajon’ui. Hikoma chun Aaron athin, avuitauve; akhel’in achapa Eleazar Thempun apangtai.
7 Hichea pat Gudgodah ajon’un, twine na mun, Jotbathah ajon paitauve.
8 Hiche molsanga chun Levi phung mite chu Kitepna thingkong vetup dingle, Thempua pang ding chule Ama min a vangboh thu sei din, Pakaiyin apansah tauve. Tugeiya hicheng hi amaho kin hijah ahi.
9 Hijeh a chu phung dang bang a Levi phungin lo ding gam akilah dau ahi; Pakai na-Pathenu thutepsa banga, Pakai Thempua apan’u hi amaho chanpha ahijenge.
10 Mose’n, “Amasaa bangin, molvuma chun nisomli, jan somli katham’e. Pakaiyin kataona asang kit’in, nangho suhmang ding adai.
11 Hichun napu napateu atepsa gamsung nalo theina diuva nangho lamkai din eiseiye. Pathen thildei chu
12 “Vo, Israelte, ngaiyun Pakai na-Pathen’un nahenguva angeh chu: Pakai chu houvun lang, asei chan bol’un. Ngailu’vin, lung giltah-in akin bol’un,
13 a-Danthu jouse nitsoh keiyuvin. Naphat chompi diuva hicheng chu tunia kapeh nahiuve.
14 Van chung sangpen ho geiya Pakaiya ahin, leiset le asunga um jouse jong Amaa ahi.
15 Pakaiyin napu napateu alungset behseh jeh a, midang sanga nangho nakilhenu ahin, tugeiya alhenchom mite nahiu ahi.
16 Hijeh chun tun Pakai thu nit’un lang, lungtah datauvin.
17 Pakai na-Pathenu hi pathen jouse sanga lalpen, thanei jouse sanga hatjo ahi. Anasan athaneiye, kichat ding ahi. Langkaina aneipon, nehguh aneipoi.
18 Meithaiho le chagate bol phat ding akhohsah-in, imiteu lah a cheng khopemho angailun, neh le chah nihchen ponsil apei.
19 Hiti ahijeh chun, nangho jong khatvei Egypt a khopemsa nahiuvin, khopemte ngailu’vin.
20 Pakai na-Pathenu thubou ngaiyun, Amabou chibai boh-un. Ama din kitah jingun, Ama minseh-in bou kitepna neiyuvin.
21 Ama na-Pathenu ahikhah chu thangvah-un, nadiuva thil nasatah le datmo umtah aboldoh namit tah a namusau ahi.
22 Napu napateuvin Egypt gam ajot’u chun mihing som sagi ahiuve. Tunvang Pakai na-Pathen’un van a ahsite jat naphahsah tauve.

DANBU NINA BUNG 11

Pakai loupije
1 “A-itih-in Pakai na-Pathenu ngailu’vin, a-Danthu jouse nit’un.
2 Amato nalhat khom nauva Pakai umdol chu tunin geldoh-uvin. Pakai umdol hea chu nachateu ahipoi, nangho tah nahiuve. Pakai lal loupina, athahat thuneina,
3 datmo abol jouse namutauve. Egypt lengpa le agamsung pumpi abolna namuu ahitai.
4 Nahin nungdel pet’uva, Egypt sepaite le asakolteu chule kangtalai ho geiya, twimang dunga alelut jenga asuhgam hel jong namu ahitai.
5 Hikom nahinphah masanguva, gamthip noiya Pakaiyin nabolpeh jouseu namu’ve.
6 Reuben phunga Eliab chapati ni Dathan le Abiram abolna jong namu’vin ahi. Japi mitmun leiset apoh keh-in, amani le a-insung mite lhon, aponbuh-ule asohte chule agancha jouse geiyin aval lhumtai.
7 Hichume, Pakaiyin hitobang thil nasatah tah abol mua chu nangho nahiuve.

Tepna gamsunga vangbohna
8 “Tunia kapeh Danthu jouse hi nit’uvin. Chuteng Jordan galkaiya, lut dia nakigotnu gamsung khu nalo thei diu ahi.
9 Chule napu napateu le achilhahte peh dia Pakaiyin atepsa gampha tah le hoitah khu nalo’uva sotpi nachen thei diu ahi.
10 Tua nalogot’u gamsung khu, nachenna sau Egypt a chu muchi natu tengu hahsa tah a twilam nalaipeh diu angaiyin,
11 tua nalutgot’u gamsung vang khu molsang le phaicham kihal, gotwi nen na gam ahi.
12 Kum lhung keiya hiche gamsung hi Pakai na-Pathen’un khohsah a avettup jing ahi.
13 “Hijeh chun tunia kapeh thupeh chengse hi nit’un; Pakai na-Pathen chu ngailu’vin, lung giltah-in akin bol’un.
14 Chutile na ngaichat chan’uva gotwi napeh-uva, chuh le khal’a chang le lengpitwi, olive thaotwi nanei diu,
15 ganchate dia hamhing don jing ding ahi. Chule naduchan nanei diu ahi.
16 Kilhem chavaiyin pathen dang hou din Pakai dondan kipui mang hih hel’uvin.
17 Chuti chonleu chun Pakaiyin nalunghan khum diu ahi. Gotwi kansah le nagam leiset’u gontin, muchi keh thei louva umlo ding ahi. Chuteng gampha tah napeh-u hijongle nathi denlo diu ahi.
18 “Thupeh hicheng hi gel jingun, kolchah jingun. Suhmil louna din banjanga kibu’vin, chalpanga kikhaiyun.
19 Nachateu hil’un lang, in a umkom hihen, napotdoh pet’u hile, choldo pet hihen natoh pet jeng hijongle, kihou lim nan neiyuvin.
20 Kotpi khom dongle kelkot dunga jih-un.
21 Chutile Pakai na-Pathen’un napu napateu peh dia atepsa gamsunga chu nangho peh dia atepsa gamsunga chu nangho le nachateu sotpi nachen thei diu ahi. Hiche gamsunga chu van le leiset beikahsea nachen thei diu ahi.
22 “Kapeh-u Danthu jouse nitsoh keiyun: Pakai na-Pathen ngail’uvin, asei chan bol’un, akom kitah jinguvin.
23 Chutile nakitolnauva namtin vaipi nodoh peh-untin, nasanguva tamjo le thaneijo namtin vaipi ho gamsung nalo thei dingu ahi.
24 Chule nachotpha na chan’u nagamu hiding ahi. Nagamgiu chu lhanglam gamthip laiya pat sahlam Lebanon molsang geiya, nisolam Euphrates luipi dunga phat lhumlam Mediterranea Twikhanglen gei ding ahi.
25 Hiche gamsung chu nalut phat phat’ule, atepsa banga, Pakai na-Pathen’un mite naginsah diu, koiman natin tang thei lou din ahi.
26 “Tunia hi vangboh nakilhen diu ha, gaosap nalhenjoh diu ham?
27 Tunia kaseipeh-u Pakai na-Pathenu thupeh chengse nanit’ule vangboh nachan diu,
28 thupeh hicheng nitdaa, nahou khah louhel’u pathen dang ho hou dia nakihei mangule, gaosap nachan diu ahi.
29 Lo dia nagot’u gamsunga Pakaiyin napuilut tengu, Gerizim molsanga vangbohna le Ebal molsanga gaosapna naphonjal diu ahi.
30 Hiche molsangte ni hi, Jordan phaiya cheng, Canaan mite gamsung, Jordan lhumlam ahi. Avadungte ni hi lhumlam ahin, Gilgal khopi kom, Moreh thing theng phung ho komcha ahibouve.
31 Pakai na-Pathen’un napeh got’u gamsung lo dia Jordan lui galkai ding kon nahitauve. Agam chu laa nachenpha tengu,
32 tunia kapeh Danthuho hi nitsoh keiyun.

DANBU NINA BUNG 12

Pathen houna mun khat
1 “Pakai napu napateu Pathenin napeh nau gamsung nachen laiseuva nanit diu Danthuho hicheng hi ahi. Hiche ho ngaiyun!
2 Nalo diu gamsunga miho kithoina molsang dongle thinglhang dung, chule thingna dum noi dunga doiphung jouse sumanguvin.
3 Amaicham jouseu phe lhauvin, doisong jouse vochip soh hel’un. A-pathen nu Asherah lim kisemthu jouse gouvam’un, hikom dunga chu milimdoi min ahou kit louhelna din, milimdoi jouse tubongsoh keiyun.
4 “Hiche miten a-pathen’u ahou bangun, Pakai na-Pathenu hou dauvin.
5 Naphung pumpiuva konin, mipi hung kikhoma Ama ahouna diu mun khat, Pakaiyin gam hin lhengdoh nante.
6 Hikoma chu pumgo thilto le kilhaina natouva, hopsoma khat le thilto dang napeh diu, Pakai peh dia natepsau thil, deichom thilto le bongnou soh masa le kelngoinou soh masa napeh diu ahi.
7 Hikom, Pakai na-Pathenu vang naboh pau angsunga chu, nangho le na-insung miteuvin nalhodoh-u thilpha chu nea nom nasah diu ahi.
8 “Phat ahung lhun teng, tuchan a nahinbol banguva nabol da diu ahi. Tugeiya hi nadeilam lam a Pathen nahouvu ahi;
9 ajeh chu lung monga nachenna diu,, Pakai na-Pathen’un napeh diu gamsung lut lou lai nahiuve.
10 Jordan lui nagalkai tengu, Pakaiyin gamsung chu losah-un tin, nachensah diu ahi. Namelmateu hohdal peh-intin, lung monga cheng ding nahitauve.
11 Ama kihouna ding Pakaiyin mun khat bou lhengdoh-intin, hikoma chu to dia kaseipeh jouseu nahin choi diu: pumgo thilto ho le kilhaina dang dang, hopsoma khat le nathilto diu, deichoma to dia Pakaiya nakitepnau thilto ding ho.
12 Pakai angsunga chun nachateu, nasohteu, nakhopi dunguva cheng Levite toh kipah khom’un, Leviten gamtum anei lou diu chu sumil hih-un.
13 Nadei deina mun a kilhaina thil nato thei lou diu ahi.
14 Naphung lah-uva Pakaiyin alhendoh gamsung mun khatseh a chubou thilto napeh diu ahi. Hikomseh seh a chu pumgo thilto ding ho natouva, chule kaseipeh-u thupeh dang dang ho jong nabol diu ahi.
15 “Naganchau vang nachen chen nauva kitha naneh theiyu ahinai. Pakaiyin naphalpeh jat jat kitha nethei nahiuve. Sakhi le sapengsa banga, hou thudol’a theng hen boh leu chun naboncha naneh theiyu ahi.
16 Athisanu vang naneh thei louhel diu ahi; tol’a twi kisung banga nasun lhah diu ahi.
17 Pakai dia kitoh doh thil ipi hile, chang hopsom a khat ham, nalengpitwiyu ham, na-olive thaotwiyu ham, nabongu hihen kelngoinou soh masa ham, Pakai dia peh dia nakitepnau thilto ding ho, deichom thilto ding hihen thilto dang napeh diu hijongle, nachen chen nauva naneh thei lou diu ahi.
18 Pakai na-Pathen’un Ama houna dia alhendoh lai, Pakai na-Pathenu ansunga bou, nangho le nachateu, nasohteu le nakhopi dunguva cheng Levite to nanehkhom diu ahi. Hikoma chu ijakai nabol jouseu nakipapi diu ahi.
19 Nagamsunguva nachen laiseuvin Levite khohsah dan nei khauvin nate.
20 “Atepsa banga Pakai na-Pathen’un gam nakeh letbe peh tengu, hoikom hile nadei dei nauva sa naneh thei diu ahi.
21 Pathen houna munkhat agamlat behseh le, nadei phat phat’a, Pakaiyin napeh bong ham kelngoi ham nakitha thei diu, kaseisa banga in a asa naneh thei diu ahi.
22 Hou thudol’a theng hihen boh hijongleu chun, asa chu sakhi le sapeng sa neh a aneh thei jeng diu ahi.
23 Athisan pumin vang neh tha dauvin, ajeh chu thisan a hi hinna um ahin, hinna chu sa to naneh tha lou diu ahi.
24 Thisan ne hih hel’un, tol’a twisunin sunglha jengun.
25 Hiche thupeh hi nanit’ule Pakai kipah ding, nangho le nachilhah teu dia ijakai phasoh ding ahi.
26 Pakai peh dia natepsa thilto dingle thipeh ding jouse chu Pathen houna mun khatseh a bou choiyin.
27 Hikoma chun Pakai maicham phunga pumgo vam jeng ding thilto jouse peruvian. Chujongle maicham thisan sunlhah a asa neh ding kilhaina jouse chu hikoma ma chun tohdoh-un.
28 Kaseipeh jouseu hi kitah tah-in juiyun, chutile nangho le nachilhahteu dia thil ijakai phasoh hel ding ahi, ajeh chu thildih le Pakai na-Pathenu lungdei bol’a nahi diu ahi.

Milimdoi hou lou dia gihsalna
29 “Agamsungu nadel khum teng, Pakai na-Pathen’un namtin vaipi chu nasuhgam peh diu, agamu nalo’uva nachenpha diu ahitai.
30 Hiche namtin vaipi chu Pakaiyin asuhgam teng, amaho doihou nung juidauvin, ahiloule nathilo del dingu ahi. Amaho hou bang nahou theina diuvin jong a-pathen houdol’u hetdoh din jong hol dauvin.
31 Amahon a-pathenu ahou bangun Pakai na-Pathenu hou din geldauvin, ajeh chu pathen ahou nauva Pakai hotmah kidah um thil jeng abol’uve. Achate geiyun maicham phung meikouva kilhainan aneiyun, agouvui.
32 “Kaseipeh jouse bolsoh keiyun, koibe le lahdoh neidauvin.

DANBU NINA BUNG 13

1 “Themgao ham mang ledoh them ham chun thil kidangle datmo musah din kitepna neiyin tin,
2 hitia kona hi masanga nahou khah louhel’u pathente houva, kinbolsah dia napui mang diu ahi. Athutep chu hung dih jeng jongle;
3 donin neidauvin. Pakai na-Pathen’un ama amanchah a napatep’u ahin, nalungthim pumpiuva Pakai ngailut jeu phot chetna abol ahi.
4 Pakai nung juiyun, gingun; asei ngaiyun, athupeh chengse nit’uvin; Ama houvun lang, adin kitah jingun.
5 Amavang nasoh chan nau Egypt a kona huhdoh Pakai douna dia mang ledoh them ham, Themgao ham chu thatdoh jengun. Hitobang mihin Pakaiyin nahin diu dol’a asei hinkhoa kon napui mang got’u ahin, miphalou ahi. Thilsea kon nathendohna diuva, hitobang mihem chu thadoh ding ahi.
6 “Nasopi ham, nachapa ham nachanu ham, nadeitah najinu ham, ahiloule nangaitah gol’in jong, napu napateu hou khah louhel pathen, hitobang pathen dang ho hou dia guh thima natil theiyu ahi.
7 Khattouvin nakom’uva cheng mite pathente hou dia natildoh theiyu ahiloule gamlaa chengte pathenho geiya hou dia natil theiyu ahi.
8 Hijongle hitobang mi thun nung hih-un; asei ngaisah-in jong neidauvin. Hepi dan, khoto dauvin, panpi din jong gotda jenguvin.
9 That’un! Songa sep masa ding kichuvin, amitakip’in sep soh kei hen.
10 Sep lih jengun! Ama chun Egypt a nasoh chan nauva kona huhdoh, Pakai na-Pathen’uva kona puimang nagot’u ahibouve.
11 Chutibol leu chun athusoh hi Israelten jason-un tin, kicha diu, koiman hitobang thilse hi abol kit lou diu ahi.
12 “Pakai na-Pathen’un napeh diu khopi dunga nachen tengu,
13 pannabei mihon nahou khah louhel’u pathen dang ho hou dia akho miteu apuimang thuthang jong jauvin nate.
14 Hitobang thuthang najah-u le, phaten kholtoh-un, tahbeh a hitobang thilse hi soh mong ahile,
15 akhosung mite le gancha jouse that gam’un, akhopi chu sugam hel’uvin.
16 Khosung mite neile you jose lhoh khom’un lang kholai sunga sekhom’uvin. Chutahle khopi le asunga um jouse Pakai na-Pathen kom kilhaina din halvam jengun. A-itih a sah phat kit louhel dia, khopi chu khogem a kijam ding ahijenge.
17 Suhmang dia koisa thil khat cha jong kikoiden dauvin, chutile Pakai lung damon tin, nahepi diu ahi. Napu napateu atepsa banga, nakho touva, napunsah diu,
18 tunia kaseipeh-u athupeh chengse nanit’uva, adeichan nabol’ule chuti ding ahi.

DANBU NINA BUNG 14

Puldou pet’a bol lou ding
1 “Nangho hi Pakai na-Pathenu mite nahiuve. Hijeh chun thipul nadou tengu, ki-atchen chen le chalsam votol, midang ho bol banga, nabolda diu ahi.
2 Pakai na-Pathenu mite nahiuvin, leiset chung chengte lah a Amite dia nakilhen dohsau ahi.

Gantheng le aboh
(Lev 11:1-47)
3 “Ipi hile Pakaiyin boh a aseisa chu neh dauvin.
4 Naneh thei diu gancha ho chu: bong, kelngoi, kelcha
5 gamsa lah a sakhi, gamkelngoi, gamkel, ahiloule sapeng,
6 ipi sa hile tin kika, nuloh lhai jouse naneh thei diu ahi.
7 Tin kika loule nuloh lhai lou sa vang naneh lou diu ahi. Sa-ngongsang le telep, ailai, hicheng hi nuloh lhai ahivangun, tin kika lou ahiuvin, boh a gel ding, neh lou ding ahiuve.
8 Vohsa ne hih-un. Tin kika ahivangin, nuloh lhai lou ahin, boh a asa neh louhel ding, athikam jong toh khah lou ding ahi.
9 “Nga lhaphe le lip nei jouse naneh thei diu ahin,
10 twi lah a um ganhing lhaphe le lip bei jouse nehda ding ahi; boh a gel ding ahiuve.
11 “Vacha theng jouse naneh thei diu ahi.
12 Chunga leng nehda ding chu: muvanlai, simbu, mu-ahgal,
13 mubong, mu pou pou, muthong
14 va-ah
15 va-ngongsao, vabah, twivakhu, muvanlai-lhem,
16 vakengsang,
17 simbuchanglit,
18 vatot muhkon, twilungva, sel-ehva le bah hicheng hi ahi.
19 “Lhavingnei ganhing jouse aboh ahi; hiche ho chu neh dauvin.
20 Ganhing theng jouse vang neh thei ahinai.
21 “Gan thikamsa neh dauvin. Khopem ho neh dia napeh theiyu, ahiloule gamchom mite koma najoh theiyu ahi. Nangho vang Pakai na-Pathenu mite nahiuvin, Amaa nahiuve. ‘Kelngoinousa le kelchanou sa chu api noitwiyin hon hih-un.

Hopsom a khat peh dan
22 “Kumseh a lhosoh ga, hopsom a khat chomkoiyun.
23 Pakai na-Pathen’un Ama houna dia alhendoh mun a cheuvin, A-angsunga changle lengpitwi, olive thaotwi, bongnou soh masa le kelngoinou soh masa gatoh-un. A-itih a jong Pakai na-Pathenu naja jing theina diuvin hiche hi bol’uvin.
24 Pakaiyin vang napeh ga hopsom a khat chengse pohna dia na-in a pat Pathen houna mun agamlat behseh leh, hitin bol’un:
25 lhosoh ga chengse joh-in, aman jat sum chu Pathen houna ding muna gathah thon.
26 Hikoma chun nadei deiyin gamangun, selsa ham, kelngoi ham, lengpitwi ham, lengpitwi chih tah, ipi hijongle kichoh nan, Pakai na-Pathenu angsunga na-insung miteu toh neuvin don’un nom sauvin.
27 “Nakhouva cheng Levite chu don louvin koikhauvin nate; amahon gou tum aneipouve.
28 Kumthumseh le changle mim lhoga hopsom a khat hinpouvin, nakhopi dunguva khol’uvin.
29 Nakholdoh chengseu hi gou bei ahijeh-uva Levite le khopem ho, chagate, chule meithaiho, nalah-uva cheng ho napeh diu ahi. Hunguva angaichat jat akilah theiyu ahi. Hiti chun bol’un, Pakai na-Pathen’un natohna chan vang naboh diu ahi.

DANBU NINA BUNG 15

Kum sagi lhin kum
(Lev 25:1-7)
1 “Kum sagi lhin kumseh le nasum ba jouseu na-ngaidam diu ahi.
2 Abol ding dol chu: Israel min Israel mi ma sum abatsah chu ngaidam ding, sum abat, asuh kit lou ding ahi; Pakai Amatah-in jong bat chu beiya aphondohsa ahitai.
3 Gamdang min nabat’uvang nasuh theiyu ahinan, namiteuvin nabat vang nasuh thei lou diu ahi.
4 “Pakai na-Pathen’un napeh diu gamsunga chu vang naboh diu ahi. Namiteu khatcha jong vaicha lou ding ahi,
5 tunia kaseipeh jouseu hi chingthei tah a juiya nanitsoh keiyule.
6 Atepsa banga Pakaiyin vang naboh diu ahi. Namtin vaipi sum batsah-un natin, bat a nalah louhel diu, namtin vaipi chung a thu naneiyuva, namdangin vang nachunguva thu neiponte.
7 “Pakai na-Pathen’un napeh diu gamsung khopi dunga chu Israel chanpi khattou vaicha kha aumle, chipsen khattou vaicha kha aumle, chipsen kithopi da khauvin nate.
8 Hongphal tah-in adei jat jat peuvin.
9 Bat jouse ngaidamna ding kum anaijeh chun ima bat a peh ding da hih-un. Hitobang thilse hi geljong gel dauvin. Bat dih pehda leu chun Pakai henga kap’intin nahehset diu, themmo nachan lo diu ahi.
10 Chip louhel, hongphal tah-in peuvin, natohna chan a Pakaiyin vang boh nauvinte.
11 Israel lah a jong vaicha le thil ngaicha um jing ding ahin, hongphal a napeh diuva kaseipeh nahiuve.

Sohte bolna ding
(Ex 21:1-11)
12 “Israelte chanpi, numei ham pasal ham nakoma soh a kitungdoh aumkhah le, kumgup sung nagoi jou teng najalensah diu ahi. Kum sagi lhin kum le nasoldoh a nachamlhatsah diu ahitai.
13 Nasoldoh tengu jongle, khutgoh keova nasol lou diu ahi.
14 Pakaiyin vang nabohna thil, kelngoi ham, chang ham, lengpitwi ham, hongphal tah a napeh diu ahi.
15 Egypt a sohchangsa, Pakai na-Pathen’un nalhadoh-u sumil hih-un; hijeh a chu thupeh hijat hi tua kaseipeh nahiuve.
16 “Nasoh-u chu chenom lou thei ahi; nangle na-insung ngaiya, chengden nom ding ahi.
17 Achutile nakotphunga bil vupeh-in lang, ahinkho lhumkeiya nasoh a pang den ding ahitai. Soh numei jong chutima nabol diu ahi.
18 Soh najalensah tengu thangset dauvin; kumgup sunga soh thalah man keh a bou nakinbol’a pang jou ahitai. Hitin bol leu chun Pakai na-Pathen’un nabol chan a vang naboh diu ahi.

Bongle kelngoi peng masa
19 “Nabongule kelngoi peng masa jouse Pakai na-Pathen diuvin koidoh jengun; bong peng masa khatcha loukai nan man dauvin, kelngoi peng masa jong mul navopeh louhel diu ahi.
20 Gancha peng masa ho chu kumseh le Pathen houna mun, Pakai angsunga, na-insung mite to naneh diu ai.
21 Gancha peng masa chu nolna nei, elbai ham, mitcho ham, ti bukimlou ahile, Pakai na-Pathen diuva nato thei louhel diu ahi.
22 Hitobang gancha chu insunga nakitha theiyu ahinai. Hou thudol’in theng hen boh jong leu chun, gancha jouse naneh theiyu ahin, sakhi le sapengsa neh a naneh diu ahi.
23 Athisanu vang naneh thei louhel diu ahi; tol’a twisun a nasunlhah joh diu ahibouve.

DANBU NINA BUNG 16

Kalchuh kut
(Ex 12:1-20)
1 “Pakai na-Pathenu janan Abib lha sungin Kalchuh kut mangun; hiche lha sung jan khat kah a Pakaiyin Egypt a kona nahuhdoh-u ahi.
2 Pathen houna ding mun khat kisem a chun cheuvin, Pakai na-Pathenu jabolnan, kalchuh kut an ding, bong ham kelngoi ham khat gathat’uvin.
3 Kalchuh kut an naneh tengu, changlhah cholsosa to medauvin. Kino tah a Egypt nadalhah ding kon’uva banga, ni sagi sung cholsolou changlhah naneh diu ahi. Genthei hesoh thohna Egypt a nahung potdoh niu hinlai sunga nagel jingna diuva, niche hi genthei hesohna changlhah kiti ding ahi, hiche hi neuvin.
4 Nagamsunguva ni sagi sungsea hi, koima insunga chol kikoi thei lou ding ahin; chule kalchuh kut ni masa nilhah a kithat kelngoisa chu ajan jan a neh jou ding ahi.
5 “Pakai na-Pathen’un napeh diu gamsung mun dang hilouvin, Pathen houna ding mun khatseh a bou kalchuh kut gancha that’uvin.
6 Nichang choplut phat, Egypt nadalhah don tah-uvin that’un.
7 Pathen houna ding mun khatseh a chun sa honin neuvin; ajing jingkah le inlama hungtauvin.
8 Akal nigup sunga cholsolou changlhah naneh-uva, ni sagi lhin ni le Pakai na-Pathenu hou din kikhom’un, na toh dauvin.

Lho lhun kut
(Ex 34:22; Lev 23:15-21)
9 “Chang-at pat nia pat hapta sagi simdoh-un,
10 llho lhun kut, Pakai na-Pathenu janan bol’un lang, vang naboh nau jat dungjuiyin, deichom thilto Pakai din hinchoi cheh-un.
11 Pakai angsunga natu nachateu le nasohteu, nakhosunguva cheng Levite le khopemho, chagate le meithaiho to kipah khom’uvin. Pathen houna mun khatseh a chun hiti chun bol’un.
12 Thupeh hicheng hi bol tei teiyun, Egypt a sohchangsa nahiu sumil loujen’un.

Lhambuh kut
(Lev 23:33-43)
13 “Chang naden chaiyuva, lengpithei nachilsoh tengu, ni sagi sungin lhambuh kut mangun.
14 Natu nachateu le nasohteu chule nakhosunguva cheng Levite le khopem ho, chagate le meithaiho to kipah khom’uvin.
15 Pathen houna mun khatseh a chun Pakai na-Pathenu janan, ni sagi sungin hiche kut hi mangun. Tohga pha napeh jal’un Pakaiya kipah thanom’un.
16 “Hiche Pathen houna ding mun a chu kum khat sunga namite lah a pasal jouse thumvei cheh Pathen hou dia hung diu ahi; kalchuh kut, lho lhun kut chule lhambah kut, hichenga chu Pasal jousen,
17 Pakai na-Pathen’un vang aboh dungjui, ajokham cheh a thilto ding achoi cheh diu ahi.

Adih a kivaipoh
18 “Pakai na-Pathen’un napeh-u khopi tin a thutan vaihom pansah-un. Amaho hin langkaina beihel’a thu atan din ahi.
19 Thu tan teng adih loule langkaina neiya abol lou diu, nehguh alah da diu ahi; ajeh chu nehguh hin michingte le kitahte mit geiyin asing jin, thu atan khelsah lo jie.
20 Pakai na-Pathen’un napeh diu gamsung nalo theiyuva, a-itih a jong nachenden theina diuvin, ahoile adih jeng bol’un.
21 “Pakai na-Pathen diuva maicham nasem tengu, Asherah pathennu lim a kisui thing akoma koidauvin.
22 Milimdoi houna din jong doisong tung hih-un; hiche ho hi Pakai doumah ahot ahi.

DANBU NINA BUNG 17

1 “Nolna um gancha, bong ham kelngoi hamin Pakai na-Pathenu kom kilhai hih-un; hiche ho hi Pakai doumah ahot ahi.
2 “Ijem tia nakhopi dunguva numei ham pasal ham khat’in Pakai doumah bol’a akitepna apalkeh a,
3 pathen chom chom, nisa ham, lhathah ham, ahsite ham, Pakai thupeh to kikal’a hou aum teng,
4 athu najah jah-un phate chan kholtoh-un, tahbeh a hitobang thilse hi Israel sunga kiboldoh ahile,
5 abolpen pen chu khopama kaidoh-un lang songin sep lih jengun.
6 Hijongle hettohsah ni ahiloule nival seiya kona bou tha ding ahin, hettohsah khat jehseh a tha lou ding ahi.
7 Hettohsah a pang hon ase masah diu, mipin aban a ase diu ahin; hitobanga chu thilse nasuh bei diu ahi.
8 “Thusoh abang bang khosungseh a seichai dia hahsa, thille lo thu, tahsa kisuh khahna ham, tolthat le mithat mai sekhen ding dol ham, hung soh thei ahi. Hitobang thu hahsa aso teng, Pakai na-Pathen’un Pathen houna ding muna alhendohnaa chun cheuvin,
9 athusoh hi hiche pet’a thuneiya pang thutanho le Levi Thempuho kom lhut’un thu tansah-un.
10 Athu seichaiyuntin, nahil bang banguva nabol diu ahi.
11 Athu chainau sangun, nahil bang bangun, achet achaiyin, asei bangun bol jengun.
12 Thutanho thutan le Thempuho thu china isah louva chu tha ding ahi; hitobanga hi Israel lah a thilse napaidoh thei diu ahi.
13 Athilsoh hi mi jousen jantin, kichauva, koima chutobanga chon ngam lou ding ahiuve.

Leng ding deichatna hilchahna
14 “Pakai na-Pathen’un napeh diu gamsung nalo’uva nachenpha tengu, navel’uva namdang ho banga leng nadeichat diu ahi.
15 Nalhen tengu, Pakai lhensa bou lenga nalhen diu ahi. Nangho mibou hi ding, khopem ho lenga napansah lou diu ahi.
16 Lengpa chun asepaite dia sakol tampi nei angaipon, Egypt gama sakol cho dia mi asol angaipoi; ajeh chu Pakaiyin amite Egypt a kile kit louhel dia aseisa ahitai.
17 Lengpan ji tampi nei angaipoi, nei taleh ajiten Pakaiya kona apuimang lo diu ahi; chule dangka le sana khom’a hao ding jong agel lou ding ahi.
18 Leng achan teng Pathen Danthu bu khat aneiya, Levi Thempute koi, kihilna bulpi mong bu khat anei ding ahi.
19 Pakai jaje athem’a, alekhabua kisei thupeh jouse kitah tah a anit theina dia, lengpan lekhabu hi akoma akoi jinga, ahinkho lhumkeiya asim jing ding ahi.
20 Hitia asim jing hin Israel chanpi dang sanga phajao akigelda sah a, ipi hijongle Pakai thupeh nit khel aneilou ding ahi. Chutile kum sotpi vaihom a, ason apah-in jong Israel chunga khang sotpi lengvai apoh diu ahi.

DANBU NINA BUNG 18

Thempuho chan ding
1 “Thempu phung Levite hin Israel gamsunga gou anei thei lou diu, Pakai henga thilto ho le kilhaina thil hoa kivah diu ahi.
2 Phung dang banga gam anei thei lou diu, Pakaiyin atepsa banga, Pakai Thempua apan’u hi achan’u ahitai.
3 “Bongle kelngoiya kilhaina nei aum teng, adah le akha chule agilpi, Thempuho chang diu ahi.
4 Chang lhung masa le lengpitwi lhoh masah, olive thao heh lhah masah chule samuel kivou masa, Thempuho chang diu ahi.
5 Naphung lah-uva tonsot Thempu dia Levi phung hi Pakaiyin alhendoh ahi.
6 “Israel lah a hoilai khopen hijongle Levite athanom nom Pathen houna mun a hung diu,
7 chukoma Thempua pang Levi dang ho banga, Pakai a-Pathen Thempua pang thei, kinbol’a natong thei ahi.
8 Thempu dang sanjat jat neh le chah akisan a, insung min apeh jat akikoiden thei ahi.

Doihouho umchan tho lou ding
9 “Pakai na-Pathen’un napeh diu gamsung nahung lut tengu, chuche gam a cheng nam mite thilbol kidah um ho jop dauvin.
10 Namaicham phunguva cha le nao kilhainan nei hih-un; namiteu doithua gao theina bol, bumble theina,
11 ailhim them, lhadamto kihou theina bol um thei louhel diu ahi.
12 Hitobang thilbolte hi Pakai na-Pathen’un ahon, hijeh a chu namasanguva hitobang bol mite chu gamsunga kona adel mang ahi.
13 Pakai din tahsan lhingset’in um’uvin,” ati.

Themgao khat solpeh dia thutep
14 Hichun Mose’n aseiyin, “Nalo got’u gamsunga khun miten doithua gaothemho le phunsan themho angaiyun, nangho vang Pakai na-Pathen’un hitobang nabol diu ajadai.
15 Hiche khel’a chu kei tobang Themgao khat namiteu lah a kona nasemdoh peh diu, ama sei chu na-ngai diu ahi.
16 “Sinai molsanga nakikhop niuvin, thilo hel dia nakichat phat’un, najah-uva Pakaiyin thu asei kit louna dingle, tijat umtah mel namu kit louna diuvin na-ngeh-ui.
17 Hijeh chun Pakaiyin kajah a, ‘Ataonau hi adih-e,
18 alah-uva konin amite ma mau, nang tobang Themgao kaht solpeh nange; asei ding hilji jing ting, kaseipeh peh chu mipi aseipehson ding ahi.
19 Kamin pan a asei ding, athu ngailou talen kamatsah ding ahi.
20 Amavang kathupeh louhel khattou Themgao khat’in jou asei ngamle, athilo ding, chutobangma chu pathen chom min pan a gaothusei jong thi ding ahi,’ ati.
21 “Themgao khat chun Pakaiya hilou thu iti asei thei ding chu datmouvin nate.
22 Pakai min pan a Themgao gaothusei chu, asei banga aguilhun loule, hichu Pakai thusei ahipoi. Niche Themgao chun acham cham a asei ahin, nagin lou diu ahi.

DANBU NINA BUNG 19

Hoidohna khopi ho
(Num 35:9-28; Josh 20:1-9)
1 “Pakai na-Pathen’un agamu napeh got’u mite khu asuhgam jou, akhopi jouseu natouphauva, a-in ho nalo jou tengu,
2 agam pumpi khu hop thumin homin, hop khat cheh chun baikhen cha jamlutna thei khopi anei cheh diu ahi.
3 Mithat chu hoidohna thei dia niche khopi ho khatpen a jamlut ding ahi.
4 Khattouvin kidoupi lou, khutsoiya atha khah le, hiche khopi ho khat pen a lhailut ding, hoidoh thei ding ahi.
5 Tekah-in pasal ni gamlah a thingtun kon hen, khatjoh-in thingphuh pet’in heichang lhong hen khatpa chu sep lih del taleh, hiche khopi thum ho khat pen a jamlut’a hoidoh thei ahi.
6 Hoidohna khopi khatseh kisemle, jamlut vahna din gamlantin, akah a chu athipa inkote, phula nom chun amatdoh a lunghan man a monabei mi chu atha thei ahi. Adih tah a kidoupi hilou, khutsoiya atha ahibouve.
7 Hiche dinga hi khopi thum nalhendoh diuva kasei ahi.
8 “Napu napateu aseipeh banga, Pakai na-Pathen’un gamgi nakeh let peh uva, chule atepsa gamsung pumpi napehsoh tengu,
9 khopi thum ma nalhendoh be kit diu ahi. Tunia kaseipeh chengse nanit’uva, Pakai na-Pathenu ngailua ahil bang banga nachon’ule, hiche gamsung khu napeh diu ahi.
10 Hitin bolleu chun monabei mi ho moh thi lou ding, Pakaiyin napeh diu gamsunga mitha jal’a themmo nachan lou diu ahi.
11 “Ijemtin khattouvin kidoupi mong mi, akho het loupet’in that hen, hoidoh theina din hiche khopi ho khat’a jamlut le,
12 achenna khosung upa hon mi asol ding, amahon amapa chu thutan ding lom ho khut’a apehdoh-uva, atoltha jeh a phulah a tha ding ahi.
13 Khoto dauvin, Japi dia aphat johna din, tolthat’a chu Israel lah a sumang jenguvin.

Gamgi luiho
14 “Kigamgit pi, Pakai na-Pathen’un napeh-u gamsunga gamgi song, sot a pat kiphutsa chu botdoh hih-un.
Hettohsah umdol
15 “Miphalou themmo sahna din hettohsah mi khatseh alhingpoi, athemmo photchetnan hettohsah mi ni beh angaiye.
16 Khattouvin achom khat, suh minsetna dia themmo dol’a ahehset le,
17 anigel’a Pathen houna mun khatseh a chu che lhon a, chukoma Thempuho le vaihom thutanten thu atanpeh diu ahi.
18 Thutanten thu chu phatecha akholtoh-uva, khattou chun Israel chanpi jouva hehse ahile,
19 ahehsetpa bolsetna ding talen chu aman amat lo ding ahi. Hitobang dol’a hi hiche thilse hi nasuh bei diu ahi.
20 Chuteng aumdol mitinin jan tin, kicha diu, koiman hitobang thilse chu abol kit louhel ding ahitai.
21 Hitobang thudol’a hin koima khoto dauvin. Mat dia lom talen chu, hinkho khel’a hinkho, mit khel’a mit, ha khat khel’a ha, khut khel’a khut, kengphang khel’a kengphang lah ding ahi.

DANBU NINA BUNG 20

Galbol thudol
1 “Melmate to kisat dia nakon’uva, sakol kangtalai le sepaite, nasanguva tamjo namu tengu, kicha hih hel’un. Egypt a kona nahuhdoh-uva, Pakai na-Pathen’un panpi nauvinte.
2 Gal nasatpat masanguva, Thempu khat hunga sepaite jah a,
3 ‘Vo Israelte, ngaiyuvin! Tunia hi galsat nahitauve. Tijat meidoi bol’in nagalteu kicha hih hel’un.
4 Pakai na-Pathen’un nalhonpiuva, najosah tei diu ahinai,’ ati ding ahi.
5 “Chuteng gal vaipoten miho jah a, ‘In sathah, lut loulai na-um mum? Na-um khah-ule kile ta hen. Galmun a thiden taleh, midangin inthah alo lo ding ahi.
6 Lengpilei kibol thah, ga lou kha loulai na-umum? Aumle in a kile kit hen. Galmun a thiden tale, midangin lengpiga anom neh peh ding ahi.
7 Ji nei dia mito kitepsa na-um um? Aumle in a kile kit ta hen. Ajo galmuna thiden le, akiteppi nu midangin akichenpi lo ding ahi,’ tia adoh diu ahi.
8 “Sepai vaipoten mipi jah a hitia jong hi, ‘Mi meidoi, kichase um am? Aumle in lama kile kit jeng hen. Midang asuh meidoilo ding ahi,’ tia sei diu ahi.
9 Sepai vaipoten sepaite jah a seilom aseisoh tengu, aloi loi lamkai lhendoh ding ahi.
10 “Khopi khat nalonvuh ding konu le amasan kho mite loiya lut din tem masauvin.
11 Tunpi kelkot honga loiya lut akigo’ule, abonchauva nasoh-uva pang diu, elbolna kinbol’a pang ding ahiuve.
12 Akho mite loiya lut kigo louva, kisat ding adeijoh le, nasepaiteu umkimsah jengun.
13 Ijemtia Pakai na-Pathen’un nalahsah jouvule, khosunga pasal jouse thatgam’un.
14 Khosunga numeiho le chapangte, ganhing ho le thil ijakai nakilah theiyu ahi. Nagalteu thilkeo jouse namanchah thei cheh-u ahi. Pakaiyin napehdoh-u ahitai.
15 Nachenphau gamsunga kon gamla tah tah a um khopi jouse hitia chu nabol diu ahi.
16 “Pakai na-Pathen’un napeh diu gamsunga khopi ho natoupha tengule, khosung mi jouse thatgam’un.
17 Pakaiyin naseipeh bangun, mihem jouse: Hit mite, Amor mite, Canaan mite, Periz mite, chule Jebus mite abonchauvin sugam hel’uvin.
18 Amaho hin a-pathenu houna kidah umtah tah thil abol’u nahil’uva, Pakai douna nachonset sah louna diuvin, that gam jengun.
19 “Khopi khat toupha nagot tengu, sotpi tah umkim jongleu chun, thingphung ho phuh dauvin. Aga neuvin, aphung vang phuh hih-un, thingphung ho to kigal nahipouve.
20 Khopi nalah kahseuva thingphung ho chu khopi umna kem a nado theiyu vang ahinai.

DANBU NINA BUNG 21

Thu chailou toltha
1 “Pakai na-Pathen’un napeh diu gamsunga mithilong kimudoh, athat lam kihelou aumle,
2 lamkaise le thutan vaihomsen thilong lupna pat akimvel kho jouse kah asao achom natetoh diu ahi.
3 Chuteng thilong lupna to kinaipen khon, natohna khah louhel lai bongnou khat ato diu ahi.
4 Bongnou chu twi kang khalou hel luipang khat’a akaisuh-uva, kaijal loule muchi tukhah louhelna mun khat’a alol aheboh diu ahi.
5 Pumhat’a thilbol thudol jouse thutan ding ahijeh-uva, Levi Thempuho jong hikoma chu che diu ahi. Pakai na-Pathen’un Levite hi akin bol dingle, Amin a vangboh thu sei dia alhendoh ahiuve.
6 Chuteng thilong lupna to kinaipen khosung miten bongnou long chunga khut asil diu,
7 ‘Hichepa hi keiho tha ahipon, athat a jong kahepouve.
8 Vo Pakai, Egypt a kona nahuhdoh namite Israelte hi ngaidamin. Nei ngaidam’un, themmonabei hiche mihem kithajeh hin mo neichan dauvin,’ atidiu ahi.
9 Hitia Pakai dei nabol jal’uva tol kithat chunga mo nachan lou diu ahi.

Numei gal-hinga kikai thudol
10 “Pakai na-Pathen’un gal najosah-uva, gal-hing nakai tengu,
11 numei hoi, kichenpi dia dei kilhen’un lang,
12 in a puiyun, sam kivo hen, tin kitan hen,
13 von khel hen. Na-insunga lha khat sungse sea anule apa pul adou ding; chujou teng kichenpi thei tauvin nate.
14 Kho nung teng nadeimou le najalen sah theiyu ahi. Acham louva nakitimatpisa ahitan, soh bol’a nabol thei lou diu, joh jong najoh thei lou diu ahi.

Cha masa goulo thudol
15 “Pasal khat chun ji ni neihen, chapa hinpeh gel hen, amavang apeng masa chu adeijo nu cha hi ta hih le,
16 neile gou chate ahoppeh ding teng, adeijo chapa dia langkaiya, acha masapa chen ding dol apeh thei lou ding ahi.
17 Acha masapa chu adeijo nu cha hi hih jongle, gou hopna lah a chan ni apeh pom ding ahi. Min acha masa aphondoh tei ding, dan dungjuiya chan lom chu apeh tei tei ding ahi.

Thu ngailou chapa thudol
18 “Khattouvin milungtah, doubol, bolgim jongleu, nule pa thu ngailou chapa neile,
19 anule apan achenna khosung lamkaite angsunga akailut lhon’a, aangsunguva thutan dia adinsah lhon ding ahi.
20 Lamkaite jah a, ‘Kachapa lhon hi milungtah, doumah bol, thu nunglou ahi; sum sumang beple julop ahi,’ tia asei lhon ding ahi.
21 Chuteng khosung lamkaiten aselih diu, hitia chu thilse nasuhmang diu ahi. Israelten ja cheh-untin, kicha diu ahi.

Dan chom chom
22 “Chonset jeh khat ham a mihem khat nathauva, atahsa khoma nakhai tah-ule,
23 jan khovah a nakaiden lou diu ahi. Akita niko ma ma vuidoh tei tei ding ahi, ajeh chu khoma thilong kikhaiden hin gamsunga Pathen gaosapna apolut theiye. Pakai na-Pathen’un napeh diu gam nasuhboh louna diuvin, thilong chu vuidoh-un.

DANBU NINA BUNG 22

1 “Israel chanpi bong ham kelngoi ham kitoldoh namu’le, donlouvin koi hih-un, lekaipeh kit’uvin.
2 Aneipa chenna agamlat behseh ham ahiloule, koi nei ahi helou nahiule, na-inlam a kailut tauvin. Aneipan ahung hol teng peuvin.
3 Hitobang hin Israel chanpin amansah ipi hile, sa-ngan ham, ponsil hal ham, hiti chun bolpeh-un.
4 “Israel chanpi bong ham, sa-ngan ham kiseplhua aumle, don louvin koi hih-un, phong dingin dinsah-uvin.
5 “Numeiyin pasal pon sildaa, pasal’in numei von von lou ding ahi; hitia bol loute chu Pakai na-Pathen’un ahoi.
6 “Thing chung ham, tol ham a vabu nato khah-uva, vapi tui-op pet ahiloule nou-op pet namu’le, vapi chu namat louhel diu ahi.
7 Vanou chu nalotheiyu ahinan, vapi vang nalhadoh tei tei diu ahi, chutile nahinsot’uva nahao thei diu ahi.
8 “Inthah nasah tengu, among geigol tho nakai tei diu ahi; chutile lha manga thia um jongle mo napoh lou diu ahi.
9 “Lengpigui le muchi dang tukhom dauvin, tukhom leu chun lengpiga jong, muchi dang ga jong neh ding phal lou ahitai.
10 “Loukaina din bong le sa-ngan tho dauvin.
11 “Tupat le samul kihal pon jong sil hih-un.
12 “Naponsil mong ning lia chun pat-hol batsoh keiyin.

Hinpi suhboh louna Dan ho
13 “Khattouvin nu-ngah kichenpi hen, ajon deimon da ding gon
14 jou thun akichenpet lhon chun nu-ngah theng lou ahi tia hehse um thei ahi.
15 “Hitobang thu hi aso le, nu-ngah nule pan nu-ngah chu athen phot chetna dia, ajipa to alupkhom masah jan a ponpha, thisan be-na chu achoi lhon a khosung lamkaite thutanna phung alhut lhon ding, avetsah lhon ding ahi.
16 Nu-ngahnu pan lamkaite jah a, ‘Hichepa hi ji dia kachanu kapeh ahin, tun kachanu hi adeimotai.
17 Hijeh chun danom manin jouthun ahehsen, akichentil lhon chun nu-ngah theng louvin aseiye. Ahivangin kachanu nu-ngah theng ahina photchetna hiche ponpha, thisan be-na, alupkhom masah lhon jan a akipha lhon chu ahi!’ tia asei ding ahi.
18 Chuteng khosung lamkaiten joubolpa chu amat’uva avoh diu,
19 dangka ja khat aleosah-uva, sum chu apa apeh diu ahi; ajeh chu Israel nu-ngah khat ajumso ahitai. Aleona chunga numei chu jia anei kit nah lai ding, ahinkho sungsea ada thei louhel ding ahi.
20 “Ahinla ahehna hi thudih ahiya, nu-ngah chu athenna kicheh a mudoh thei ahiloule,
21 lamkaiten apa inpo lam, kotphunga akaidoh diu, khosung miten aselih den diu ahi. Hichenu hin jinei masanga midangto kitimat’a, imiteu lah a jachat umtah thil aboldoh ahin, apa insung suboh a hitia chu chon anahi. Hitia chu hitobang thilse hi nasuhmang diu ahi.
22 “Pasal khat’in midang ji akitimatpi akimatdoh le, anigel lhon a tha ding ahi. Hitia chu hiche thilse hi nasuhmang diu ahi.
23 “Khosung khat’a pasal dangto kitepsa nu-ngah chu adang khat’in akitimatpi akimatdoh le,
24 ani-lhon a khopam a nakaidoh-uva, naselih den diu ahi. Khosunga peng jongle min ajah a akithopina thei mun a apenjah loujeh a nu-ngah chu tha ding ahi. Mito kitepsa nu-ngah akitimatpi jeh a pasal chu thi ding ahi. Hitobang thilse chu hitia hi nasuhmang diu ahi.
25 “Pasal chun gamlah a mito kitepsa nu-ngah chu akitimatpi vangle, pasal bou tha ding ahin,
26 nu-ngah chu ima lo lou ding ahi, ajeh chu thina khop a chonse ahipoi. Hiche thu hi pasal khat’in achom khat adel khum a atha thu to kibang bang ahi.
27 Nu-ngah chu gamlah a akitimatpi ahijeh chun, panpi ngaiya apen jongle, koiman ajapon apanpi ding abeitai.
28 “Mito kitep loulai nu-ngah kitimatpi akimatdoh le,
29 nu-ngahnu pa kom a dangka som nga leosah a, nu-ngah chu jia aneipai ding ahi; ajeh chu aman ada achamlouva akitimatpi ahi. Ahinkhoa hiche nu chu ada thei louhel ding ahi.
30 “Koimachan anute khat kitimatpia pa noisea abol thei louhel ding ahi.

DANBU NINA 23

Pakai mite lah a paidohna
1 “Til lahsa le hinpi tansa pasal koima Pakai Houbung lah a pang thei ponte.
2 “Noti cha le ason apah, khangsom geiya jong, Pakai Houbunga pang thei louhel ding ahi.
3 “Ammon mi ahiloule Moab mi, ason apah-u, khangsom geiya jong Pakai Houbunga pang thei louhel diu ahi.
4 Egypt a nahung kitoldoh-u chun neh le chah nape nom pouvin, nangho gaosap din, Mesopotamia gam Pethor khopi konin, Beor chapa Balaam athalah-ui.
5 Ahivangin Pakai na-Pathen’un Balaam sei angaipon, nalungset jeh-un, nagaosap nau thu cheng chu vangbohnan aheidoh joi.
6 Nampi khat’a nadin thei laiseuvin, Ammon le Moab mite phattouna ding imacha cha bol dauvin.
7 “Edom mite vang nahsah mon boldauvin, na-inkou ahibouvui. Egypt mite jong nahsah mo khauvin nate; phat khat agamsunguva thamsa nahiuve.
8 Egypt te vang khang thum tengle Pakai Houbung a lah lut thei ahitauve.

Sepaite ngahmun suh theng ding
9 “Gal laiya sepai ngahmuna napansah tengu, hou thudol’a theng lou thil pou pou nabolda diu ahi.
10 Ijemtia ihmut lan a botwi chedoh aumle, boh a ahitan, ngahmun polam a ga um jeng ding ahi.
11 Nilhah lam teng kisil thenga, nilhum teng ngahmun hung lut kit thei ahi.
12 “Ngahmun pam a popotna mun khat nasem’uva, posoh nom jouse hikoma chu nache diu ahi.
13 Napotnom tengu mol-hem khat nachoi diu, poso jou teng lei nathihom’uva navui mang diu ahi.
14 Ngahmun thengsel’in koi jingun, ajeh chu napanpi diule melmate chunga gal josah dia Pakai na-Pathen’un ngahmun a nachenpiu ahi. Pakaiyin nadalhah lo na theiyu thil theng lou imacha bol dauvin.

Dan chom chom
15 “Apu dalha hung jam, nahinbel soh chu lesol kit dauvin.
16 Achenna nom nom nakhouva cheng thei ahin, hutot le bolset din gel dauvin.
17 “Israel mi numei hihen pasal hile doiphunga notia pang um thei louhel ding ahi.
18 Chujongle hitobanga kimu sum jong kitepna molsona dia Pakai na-Pathenu Houin a kichoilut thei louhel ding ahi. Doiphunga notia pang ho Pakaiyin ahoi.
19 “Neh le chah, sumle pai, ipi thil hijongle Israel chanpi nabatsah tengu, akan nalah thei lou diu ahi.
20 Gamchom mi bat vang akan nalah theiyu ahinan, Israel chanpi bat akan lathe pouvin nate. Hiche chondan hi mang leu chun, Pakai na-Pathen’un nalo got’u gamsunga jong vang naboh diu ahi.
21 “Pakai na-Pathen diuva kitepna nanei tengu, natepsau chu vochon hih-un; natepsau chu Pakaiyin adel tei ding, molso lou chu chonset ahi.
22 Kitep lou chu chonset ahipon,
23 amavang nachamtah a kitepna nasemtah le nit tei din gel’uvin.
24 “Midang lengpilei saopi najot tengu, nadu du netheiyun natin, sakhaova vang nakikhol thei lou diu ahi.
25 Midang bulei saopi najot tengu jongle, khut a noihaa jochan nabah theiyu ahin, koite vang na-at thei louhel diu ahi.

DANBU NINA BUNG 24

Kida le jinei kit
1 “Pasal khattou ji neiya, khonungle ajinu chunga deimona mudoh jeh a da agot leh, dana lekha ajih peh a, hiche lekha chutoh ajinu hi asoldoh ding ahi.
2 Ijemtin hichenu hin pasal chom khat kichenpi hen,
3 hichepa jong hin deimo kit hen lang, dana lekha jihpeh hen ina konin soldoh kit taleh; ahiloule aji nina pa thi ham khat hile,
4 ada ham athi ham, hoijoh ahin, hiche nu aji masapan akichenpi kit thei lou ding, abohsa agel ding ahi. Kichenpi kit taleh, Pakai doumah ahi. Pakai na-Pathen’un napeh diu gamsunga chutobang chonset melse chu nabol louhel diu ahi.

Dan chom chom
5 “Ji neithah pasal chu sepaiya pansah lou ding, japi kinbol’a jong pansah lou ding, kum khat sunga ima kinlen bolsah daa, in a uma, ajinu akipasah ding ahi.
6 “Mi thil khat nabatsah teng, khamgah man a asumhei song nalahpeh lou diu ahi. La leu chun insung pumpi kihinsona ding neh le chah semna nalahpeh-u ahi.
7 “Koi hile Israel chanpi lhohmanga soh a vul, ahiloule soh dia johmang chan tha ding ahi. Hiche thilse chu hitia hi nasuhmang diu ahi.
8 “Tiphah navei tengu, Levi Themputen nahil bang banguva nabol tei tei diu; ken kahilsa banguva nabol diu ahi.
9 Egypt dalha nahunguva Pakai na-Pathen’un Miriam tiphah abolna chu geldoh jingun.
10 “Mi thil bat’a napeh tengu, a-insunga lut’in khamgahna napeh got’u ponsil chu lah dauvin;
11 polam a ngah-un, nahin choidoh peh ngah-jo’uvin.
12 Mivaicha ahile ponsil chu koi khovah dauvin,
13 jan teng asil theina din, nilhah lam teng lepeh kit tauvin. Chutile ama kipah-intin, Pakai na-Pathenin lung lhaipeh-un nate.
14 “Nakhosunguva chenga Israel hihen khopem hile, vaicha genthei lhacha natong chu joubol dauvin.
15 Niseh-in nilhum man tohman asan lom peuvin; alodoh sum ngaicha agel jing ahi. Pehda leu chun nangho dounan Pakaiya taovin tin, themmo nachanlo diu ahi.
16 “Chate chonset jeh a nule pa tha lou ding, nule pa chonset jeh a jong chate tha lou ding ahi; mi ama chonset jeh a bou tha ding ahi.
17 “Khopem ho le chagate chanlom thil sumang hih-un; meithai von jong bat khamgah manin lah dauvin.
18 Egypt a sohchangsa, Pakai na-Pathen’un nalhadoh-u chu sumil hih-un; hijeh a chu hiche thupeh hi kaseipeh nahiuve.
19 “Chang-at teng, chomkhel changphal nunglah kit dauvin, nabol chanu Pakai na-Pathen’un phatthei naboh theina diuvin, khopem ho le chagate, chule meitheiho din koipeh tauvin.
20 Olive ga nalo tengu, lomoh chengse loukit hih-un, khopem ho le chagate chule meithaite ding ahitai.
21 Lengpiga nalo tengu jongle lomoh chengse vello kit dauvin, khopem ho le chagate chule meithaite ding ahitai.
22 Egypt a sohchangsa nahiu sumil loujen’un, hijeh a chu hiche thupeh hi kaseipeh nahiuve.

DANBU NINA BUNG 25

1 “Israel mi ni thutamna phunga kiheh lhon hen, khat them chang hen, khatjoh mota leh;
2 voh dia lha themmo changjoh chu thutanpan boh khup a alupsah a ajep ding ahi. Ijatvei den ding chu atoh kheljat jat hi ding ahi.
3 Hijongle somli vei gei vang voh thei ahinan, aval’a kijep thei lou ding ahi; aval’in kivole, japi maiya jum behseh ding ahi.
4 “Chang nachilsah-u bongchal muh kandauvin.

Sopi thiteng boldol
5 “Gam neikhom sopite ni kah a khatjoh chi khailouva athileh, athipa jinu chu athipa phung sung tilou, adanga jineidoh thei lou ding ahi; asopipan aji avetpeh ding dan ahi.
6 Asopi ji avetpeh to ahin masah lhon chapa chu athipa chapaa kisim ding, hitia chu Israel sunga ingap lou ding ahi.
7 Athipa sopipan ajinu avetpeh loule, meithainun khosung lamkaite jah a, ‘Kajipa sopipan eivet ding lom eivetapoi, Israel sunga asopipa chi akhaisah nompoi,’ tia aheh ding ahi.
8 Chuteng khosung lamkaiten akouvuva akihoupi diu ahi. Hichea hi akichenpi nomlou tah bah le,
9 asopipa jinun anailut ding, lamkaite angsunga ajipa sopipa kengchot khat asut lhah a, amaiya chil aset khum ding, ‘Asopi chi khaisah nomlou jouse hitia hi bol ding ahi,’ ati ding ahi.
10 Hiche kalsea hi hiche insung mite chu, ‘Kengchot kisutpeh pa insung,’ kitilo diu ahitai.

Danthu dang ho
11 “Pasal ni kinaa akibot lhon teng, khatjo pa jinun ajipa hunan adang khatpa hinpi aloipeh jengle,
12 dipdam louhel’in hichenu khut chu sat tanpeh jengun.
13-14 “Thiltena dih mangin, lepthol dauvin.
15 Pakai na-Pathen’un napeh diu gamsunga nachensot theina diuvin thiltena dih le kitoh manguvin.
16 Lepthol bolmi chu Pakaiyin ahoi.
Amalekte thana dia thupeh
17 “Egypt’a kon nahunguva Amalekten nabolnau chu gel jingun.
18 Nacholdeh pet tah-un, Pathen ging louhel’in, nunglama nahindel khum’un, minung phalel jouse athatgam’uve.
19 Hijeh chun Pakai na-Pathen’un napehnau gamsung natouphauva, lung monga nachensah tengu, akihetdoh kit louhelna diuvin, Amalek mite that gamhel’un. Sumil loujen’un!

DANBU NINA BUNG 26

Lhosoh thilto
1 “Pakai na-Pathen’un napeh diu gamsung nalo’uva nachenpha tengu,
2 lhosoh ga masa jouse le chang-at masa chengse pochan loh khom’un, Pathen houna ding mun khatseh a chun domlut’un.
3 Chupet’a vaihom Thempupa jah a, ‘Tua hi keiman Pakai ka-Pathen koma, eiho peh dia ipu ipateu ateppeh gamsung lut kahi phongdoh-a kahitai,’ nati diu ahi.
4 “Chuteng Thempupan nadop’u pocha domlhan tin, Pakai na-Pathenu maicham maiya agatun ding ahi.
5 Chuteng Pakai angsunga hitia nasei diu, ‘Aram mi khopemle pa chilhah kahin, inle lou bei, khopemle, Egypt gam a a-insung mite to khopemsa ahi. Egypt gam ajot’un lhomcha ahiuvin, ahivangin nam lentah le hattah ahilotauve.
6 Egypt miten eibolseuvin, engbolna soh na eitohsah-ui.
7 Hichun kapu kapateu Pakai Pathen henga panpi ngaichan kataovui. Aman kataonau asangin, genthei hesoh le hahsa kathoh-u eimupeh tauve.
8 Atha hangsanin Egypt’a kon eihuhdoh-un, thil kidang datmo tampi bol’in, tijat jat um thil asosah-e.
9 Hikoma eihin lhut’un, gampha tah le hoitah hi eipeuve.
10 Hijeh a chu Aman eipeh hiche lhosoh ga masapen hi Pakai henga hinchoiya kahi,’ nati diu ahi. “Chuteng Pakai angsunga pocha luiyun lang hikomma chun Pakai chibai boh-uvin.
11 Pakai na-Pathen’un nangle na-insung mite thilpha pha napeh jal’un kipah-un; chule nalah-uva cheng Levite le khopemho to kipah khom’uvin.
12 “Kumthumseh le lhosoh ga hopsom a khat chu tohdoh-un, Levite le khopem ho, chagate le meithaiho, aveng venga nengchet’a angaichat jouseu aneina din peuvin. Hiche hi nabol tengu
13 Pakai koma, ‘Hopsom a khat thil theng peh lom ka-insunga aumtapoi; neihil bangin Levite le khopemho, chagate le meithaiho kapetai. Hopsom a khat thudol’a neihilna khatcha jong bol khel kaneipoi.
14 Kalunghem pet jengin jong khatcha kanepon, hou thudol’a kathen loupet’in jong ka-insunga khatcha kachoidoh poi; khatcha beh jong lhadam lhahnan kaneipoi. Vo Pakai nathu kanit’e; hopsom a khat peh dol’a neihil jouse kabolsoh tai.
15 Navanchung thenga pat neihin veuvin, namite Israel phatthei boh-in; kapu kapateu natepsa bangin, hiche gampha le hoitah, neipeh-u jong hi vang hinboh-in,’ tiuvin.

Pakai mite mong mong
16 “Athupeh chengse nit dia Pakai na-Pathen’un tunia thu napeh-u ahi; nalungthim pumpin juiyuvin.
17 Tunia hi Pakai chu na-Pathen dia naphondoh-u ahitan; asei ngai dia kitep a, a-Danthu jouse nit ding, athupeh chengse bol ding natiu ahitai.
18 Nateppeh banguva, tunia Pakaiyin amite mong mong dia nakisanu ahitai. Hijeh a chu a-Danthu jouse nit dia nahil’u ahi.
19 Asemsa mite jouse sanga nam len naso diu, Amin vahchoile thangvah natho diu ahi. Atepsa banga amite mong mong nahi diu ahitai,” ati.

DANBU NINA BUNG 27

Songphenghoa kisun Pathen Danthuho
1 Hichun Mose’n Israel lamkaite to mipi jah a, “Tunia kapeh-u kihilna chengse nitsoh keiyun.
2 Jordan galkaiya, Pakai na-Pathen’un napeh diu gamsung nalut niu le, song lentah tah natundoh-uva, naloi jolsel diu,
3 Danthu chengse le kihilna ho hi najihdoh diu ahi. Pakai napu napateu Pathenin natepsau gampha le hoi nalut tengu,
4 tunia kahil bangun, Jordan gal lang khat, Ebal molsanga chun song lentah tah phut’un lang, loijol’uvin.
5 Thih a kikheng lou, songin maicham khat sem’un,
6 ajeh chu Pakai na-Pathen diuva maicham nasem jouseu vohkeh lou songa nasem diu ahi. Hiche maicham a chu kilhaina le pumgo thilto nato diu,
7 hikoma chu kilhaina thil natouva, kiloikhomna thilto naneh diu, Pakai na-Pathenu angsunga nakipa thanop diu ahi.
8 Hiche song kiloi jolsel chunga chun Pathen Danthua kisei thucheng jouse jihdoh soh keiyun,” ati.
9 Mose le Levi Themputen Israelte jah a chun, “Vo Israelte, phate chan ngaiyuvin, kasei ngaitouvin. Tunia hi Pakai na-Pathenu mite hidoh nahitauve.
10 Hijeh chun tunia kaseipeh-u Danthu chengse hi nitsoh keiyuvin,” atiuve.

Thu nitda jeh a gaosapna
11 Mose’n Israelte jah a,
12 “Jordan galkaiya, vangboh thu akisei teng aban a kigol phung ho hi Gezirim molsanga ding diu ahi: Simeon, Levi, Judah, Issachar, Joseph chule Benjamin.
13 Chule gaosap thu akisei teng Ebal molsanga ding ding ho chu: Reuben, Gad, Asher, Zebulun, Dan, chule Naphtali phung hijat chu ahiuve.
14 Levite chun othong leuva asap-uva,
15 “ ‘Songle thing, chule thih a milimdoi sem a guh thim cha hou jouse Pathen gaosap chang hen; milim hou hi Pakaiyin ahoi,’ tiu hen. “Chutah le mipin adonbut’uva, ‘Amen!’ ati diu ahi.
16 “ ‘Nule pa jabol lou chu Pathen gaosap chang hen,’ atiuva; “Mipin jong, ‘Amen!’ ati diu ahi.
17 “ ‘Kigamgit pi gamgi song botdoh chu Pathen gaosap chang hen,’ atiuva; “Mipin jong, ‘Amen!’ ati diu ahi.
18 “ ‘Mitcho lam hilouva puiya chu Pathen gaosap chang hen,’ atiuva; “Mipin jong, ‘Amen!’ ati diu ahi.
19 “ ‘Khopemho le chagate chule meithaiho chan ding sumo chan Pathen gaosap chang hen,’ atiuva; “Mipin jong, ‘Amen!’ ati diu ahi.
20 “ ‘Anute kitimatpia apa jumso chan Pathen gaosap chang hen,’ atiuva; “Mipin jong, ‘Amen!’ ati diu ahi.
21 “ ‘Gancha kitimatpi chan Pathen gaosap chang hen,’ atiuva; “Mipin jong, ‘Amen!’ ati diu ahi.
22 “ ‘Asopinu ahiloule apate chanu kitimatpi chan Pathen gaosap chang hen,’ atiuva; “Mipin jong, ‘Amen!’ ati diu ahi.
23 “ ‘Anupanu kitimatpi chan Pathen gaosap chang hen,’ atiuva; “Mipin jong, ‘Amen!’ ati diu ahi.
24 “ ‘Guhthima mphil chu Pathen gaosap chang hen,’ atiuva; “Mipin jong, ‘Amen!’ ati diu ahi.
25 “ ‘Monabei thana dia sumguh kilah chan Pathen gaosap chang hen,’ atiuva, “Mipin jong, ‘Amen!’ ati diu ahi.
26 “ ‘Danthu ho le thuhil chengse nit lou jouse Pathen gaosap chang hen,’ atiuva; “Mipin jong, ‘Amen!’ ati diu ahi.

DANBU NINA BUNG 28

Thu ngaijeh a vangbohna
(Lev 26:3-13; Deut 7:12-24)
1 “Tunia kapeh Pakai na-Pathenu thupeh chengse hi nanit’uva, kitah tah a najuiyule, leiset chung namdang jouse sanga loupijoa nasem diu ahi.
2 Pakai na-Pathenu sei ngaileu chun vangbohna jouse nachan diu ahi.
3 “Nakhosung jouse le loulai tin Pakaiyin vang boh-inte.
4 “Pakaiyin chale nao punsah-intin, lhoga apunsah a, bongle kelngoi tampi napeh diu ahi.
5 “Pakaiyin changle mim punsah-intin, neh le chah neng ding ahi.
6 “Pakaiyin nabolchanu vang boh-inte.
7 “Gal’in nalonvuh tengu le Pakaiyin jopeh-un tin, lam khat’a hung kitol lut galte chu jamchehsoh hel diu ahi.
8 “Pakai na-Pathen’un natohnau vang boh-intin, nachang pangu dimsoh ding, napehnau gamsunga vang naboh diu ahi.
9 “Pakai na-Pathen’un naseipeh jouseu nanit’ule, atepsa banga amite nahisah diu ahi.
10 Chuteng Pakaiyin amite dia nalhenu hi leiset miten mu’vin tin, nakichat diu ahi.
11 Pakaiyin chale nao tampi hinsah-untin, bong tampi napeh diu, napu napateu peh dia atepsa gamsunga chu changle mim nahao diu ahi.
12 Aphat cha, akholna van a kona gotwi napeh-uva, natohnau phatthei aboh a, namtin vaipi tojouva naumsah diu, nanghon koima thil nabat lou diu ahitai.
13 Pakai na-Pathen’un minungjui hilouva, namtin vaipi lamkaiya napansah diu, tunia kapeh-u athupeh chengse tahsan tah a nanit jingle, lhasam louhel’a nakhan tou jing diu ahi.
14 Itijongle thupeh chengse hi nanitda lou diu, pathen dang jong nahou louhel diu ahi.

Thu ngailou phatmoje
(Lev 26:14-46)
15 “Pakai na-Pathenu thu nanit dauva, tunia kapeh thupeh ho le Danthu chengse hi tahsan tah a najui louvule, aban a kisei thilse chengse hin nalhun khum diu ahi:
16 “Pakaiyin nakhosung jouseu le naloumau agaosap ding ahi.
17 “Pakaiyin changle mim chule neh le chah gaosap peh-unte.
18 “Pakaiyin chale nao punsah pontin, changle mim jong alhomsah a, bongle kelngoi jong lhomcha bou naneisah diu ahi.
19 “Nabol chanu Pakaiyin gaosap-inte.
20 “Pakai donda thilse nabol’ule, namanthah hel kahseuva, Pakaiyin nalah-uva gamna le nohphahna chule hahsa nalhut khum diu ahi.
21 Natgol aban banin lansah-intin, nalogut’u gamsunga chu khatcha jong hingdoh a naum lou diu ahi.
22 Pakaiyin kilason son thei nat nalhun khumsah-untin, atipom a le nat lhut vei nadimset diu, gotwi akansah a, huise alansah a namuchi chivo jouseu manghel ding ahi. Nathigam kahseuva thilse hijat hin nalha lou diu ahi.
23 Go la jupontin, naleiset’u jong thih tah a tah ding ahi.
24 Gotwi sanga, nasugam diu leivuile neldi huiya alansah ding ahi.
25 “Pakaiyin gal nalelsah diu, lam khat a nadelvuh sah diu, kithe cheh a najamcheh sah diu ahin, nachunguva thilsoh amu teng, leiset mite kinlih deh diu ahi.
26 Nathi teng nalongu vachate le gamsaten aneh diu, adeljam ding beihel ding ahi.
27 Egyptte abolna banga, Pakaiyin nalah-uva uilut alansah ding ahi. Natichungu pomchet chut ding, tinakhem dimset’a, thah a nakikhot khot jeng diu, damna la namu lou diu ahi.
28 Pakaiyin lung chavaiya nakoi diu, mitcho le kisudonga naumsah diu ahi.
29 Sunchang laiya mitcho maiya nakimai diu, lampi holmoa naumlo diu ahi. Nabol’u khantouna nanei lou diu, bol genthei thoh le chomgam bep nahiuva, nakithopi diu khatcha um lou ding ahi.
30 “Nu-ngah kiteppi jongleu chun, michomin akichenpi ding ahi. In sauvin natin, chennan neipouvin nate. Lengpilei nabol diu, aga la nekha lou ding nahiuve.
31 Namitmu changtah-uva naganchau lol kibantan ding, asa la nekha lou ding nahiuve. Namitmu’va na-sanganu min akaimang ding, nachan kit lou diu ahi. Nakelngoi jouseu nagalteu kipentin, nakithopi diula umponte.
32 Namitmu’va nachateu numei pasal gamchom mite kom soh a kipedoh ding, hung kile kit ding kinem ngui nguiya, niseh a navet vet jeng diu ahi.
33 Cholle nanga natusau chang jouse gamchom miten akilah diu, bolsetna le thoh genthei tilou adang imacha nachan lou diu ahi.
34 Genthei behseh a na-ngollo pai diu ahi.
35 Pakaiyin nakeng jouseu dammo hel, uilut aveisah ding; kenga pat lubuh a dulchet chut ding nahiuve.
36 “Pakaiyin nangho le nalengpau migama nakai mang diu, nangho le napu napateu chenna khah louhel gam nalhut diu, hikoma chu lim semthu, thingle song pathente nahou diu ahi.
37 Pakaiyin nathe cheh gotnau gamsunga dunga chu, nachunguva thilsoh ho agam miten atijatpi diu; kitotna aneiyuva, nadaithangle diu ahi.
38 “Muchi tampi natu’va, lhosoh lhomcha nalo diu, khaokhopiten naneh joupeh diu ahi.
39 Lengpilei bol’a kisalel ding nahiuvin, agala loupouvin natin, lengpitwi la donpouvin nate, lengpigui jouse lungin nechaisoh tante.
40 Nagamsungu dimset’a olive thing keh a, olive thaotwi la neilou ding, olive thing jouse lhugam diu ahi.
41 Chanu chapa tampi nei jongleu chun nangho chang kha louva, min gal-hinga akaimangsoh diu ahi.
42 Nathingna louna jouseu le changle mim aboncha ganhingten anehgam ding ahi.
43 “Nagamsunguva cheng khopemte hat cheh cheh diu, nangho lhasam jep jep ding nahiuve.
44 Amahon sum batsah jouvuntin, nanghon tona ding sum neipouvin nate; akhonna le nachunguva vaihom diu ahitai.
45 “Thilse hijatpi hin nalhun khumuva, namanthah kah-uva dalha talou ding ahi; ajeh chu Pakai na-Pathen’un napeh-u Danthuho nanit pouvin, asei nangaipouve.
46 Hiche thilse ho hi a-itih a jong thu ngai lou hetna, nangho le natu nachateu chunga um ding ahi.
47 Ima lam jousea Pakaiyin vang naboh-un, kipah thanomin akin nabol pouve.
48 Chuti ahile nadou diuva Pakaiyin ahinsol got nagalteu kin nabol diu ahinai. Kel le chah thoh, sille chen beiya, ijakai lhasam a naum diu ahi. Namanlo kahseuva Pakaiyin engbol bol’a nabolset diu ahi.
49 Nadou diuva aham apao nahet louhel’u nam, leiset mong langpeh a kona, Pakaiyin ahinpui ding ahi. Nachunguva muvanlai banga hung lenglut jeng diu ahi.
50 Aning anop a chon a, teh le khang, koima ahepi louhel diu ahi.
51 Changle mim ne jouvuntin, gancha jouse nathagam peh diu, nangho kel a nathi diu ahi. Changle mim, lengpitwi, olive thaotwi, bong le kelngoi nakhenpeh lou diu, thigam ding nahiuve.
52 Pakai na-Pathen’un napeh diu gamsunga khotin bulu’uvintin, kisonpi insang ho le kulpi sanglai lai jouse lhusoh ding ahi.
53 “Melmaten nakhou aumteng, kel behseh jengun natin, Pakai na-Pathenin napeh-u chale nao nanei hou geiya naneh diu ahi.
54 Lung lentah a kigel jeng jong kel behseh jenga, khopi min aum sunga hi, achate kitha aneh ding ahi.
55 Angai tah asopile adeipen ajinu jeng jong neh din achate peponte.
56-57 Numei minthangle haotah, kenga lamjot ngailou jong hitia chu chon diu ahi. Galten khopi aumkhum teng, hitobang numei ho jong kel behseh-uva, achasen guthima kitha aneh jeng diu ahi. Achadang jong angaipen ajipato neh khom ding jong phalponte.
58 “Hiche lekhajol’a kijih Pathen mihilna ho hi tahsan tah a najui daule, ginle ja umrah Pakai na-Pathenu min najabol daule,
59 nangho nachilhahteu chunga boldammo hel natset alansah a, natgol hung lhung ding, suhtangmo hel’a um ding ahi.
60 Egypt gama nahetsau kichat umtah natset ho nalhut khum’uva, damdoh kit louhel’a naumlo diu ahi.
61 Hiche Pathen Danthu bua kiseidoh louhel, hivei jatchom chomle natgol tampi nalhaden diu, nathagam diu ahi.
62 Van a ahsite jat phajongleu chun, lhomcha bou hingdoh-un nate; ajeh chu Pakai na-Pathenu sei na-ngaipouve.
63 Pakaiyin nahaosah nom, napunsah nom banguva, nasuhmang nom’uva, naman thahsah nom diu ahi. Lo nagut’u gamsunga kona natoldoh diu ahi.
64 “Leiset kolkimvel namtin vaipi lah a Pakaiyin nathecheh diu, thingle songa kisem pathente, nangho le napu napateuvin ahou khah louhel lhacha napan diu ahi.
65 Hikoma jong lungmonna nanei lou diu, mun jong nanei lou diu, Pakaiyin lung gimle kinepna bei, lung lhadaiya nalha diu ahi.
66 Kicha jinga naum diu, sunle jan a tija jinga naum’uva, thi ding ginga naum jing diu ahi.
67 Namuphah chan kichan kithingun natin, jingkah seh le nilhum kal ngah lel’a, nilhah seh le khovah ngah lel’a naum diu ahi.
68 Egypt a nache kit louhel diuva asei vangin, Pakaiyin Egypt lama dia kong inneiya natol diu ahi. Hikoma chu namelmateu kom soh dia nakijoh diu, ahivanga koiman nacho nom lou diu ahi,” ati.

DANBU NINA BUNG 29

Moab gama Pakaiyin Israel akiteppi
1 Moab gamsunga Israelte to kitepna dia Pakaiyin Mose thu apeh hicheng hi ahin; aboncha hi Sinai molsanga Pakaiyin kitepna asempi belap ding chu ahi.
2 Mose’n Israelte abonchauvin akoukhomin ajah-uva, “Egypt lengpa le avaipote, agamsung pumpi Pakaiyin abolna namu cheh tauve.
3 Hise alansah le thil kidang abol ho, datmo mo Pakaiyin abol chu namutauve.
4 Ahivangin tuni geiyin nathilmu ho’u het theina napepouve.
5 Kum somli sung gamthip laiya napuileuvin, naponsil ho’ule nakengchot jouseu asepoi.
6 Neh le chah don ding ima naneipouvin, ahivangin na-Pathenu ahi hetsahna din, Pakaiyin na-ngaichat jouseu napeuve.
7 Hikom iphah phat’un Heshbon leng Sihon le Bashan leng Og eiho sat din ahung kon lhontai. Ahinla eihon ijouvun,
8 agamu ilauvin, Reuben phungle Gad phung chule Manasseh phung keh khat ihoppeh tauve.
9 Nabol natoh chanu lolhin theina din, tahsan tah-in hiche kitepna thudol hi abonchan nit’uvin.
10 “Tunia hi nangho nabonchauva, Pakai na-Pathenu angsunga ding nahiuvin, nalamkaiteu le navaipoteu, pasal le
11 numei, chale nao, thing napoh peh-uva twi nakhaipeh-u, nalah-uva cheng khopem jouse jong nahiuve.
12 Tunia hikoma hi Pakai na-Pathenu to kitepna semgoa chule kitepna chu kisan goa hung kikhom nahiuvin,
13 hitia chu napu napateu, Abraham, Isaac chule Jacob ateppeh banga amite nahiuva, Ama na-Pathenu ahina phudet goa nahiuve.
14 Hiche kitepna le aumdol hi Pakaiyin nangho keoseh to sem agot ahipoi.
15 Tunia a-Angsunga ding eiho chengse le apeng loulai icha inaote to jong kitepna hi asem ahi.
16 “Egypt a hinkho le namtin vaipi gamsung jotpa hahsat dol naheuve.
17 Vetda da um milimdoi asemthu thingle song, dangka le sana kisemho chu namu’ve.
18 Kichentah-in heuvin, tunia hikoma ding pasal, numei, insung hihen phung hile, Pakai i-Pathenu dalhaa namdangte pathenho ahou thei louhel ding ahi. Ahouvah aumle, ama chu namtuljung kitulut banga ilah-uva kha ding ahi.
19 Tunia hikoma ding ho lah a hiche giltah a ngehna kinei japha jouse din, alung chamin ningle nop’in chon jongle pha thou dia kilhem lha um thei louhel ding ahi. Chutia chon umkha le nabonchauva, apha ase kidat louva namanthah lo hel diu ahi.
20 Hitobanga chon mi chu Pakaiyin sumil ponte. Suhmil tah sanga Pakai lunghan nan meikou banga aleogep jeng ding, hiche lekhajol sunga kijih manthahna jouse achunga lhunga, Pakaiyin asuhmang hel ding ahi.
21 Israel phungtin masanga Pakaiyin vetchah dia abol’a, Pakai thuhil kijihna lekhajol sunga kijih lut kitepnaa kisei gaosapna chengse alhun khumsah ding ahi.
22 “Khang nukhah lam a mite le gamla tah a miten jong, nagamsunguva manthahna le thoh hahsa Pakaiyin apohlut jeng chu ahin mudoh diu ahi.
23 Loulai jouse akeova kijam ding, katsong le chihang banga, muchi chivo tukehna theilou, hamhing jeng jong pou lou ding ahi. Nagamsungu chu Sodom le Gomorrah, Adamah le Zeboiim, alunghan behseh jeh a Pakaiyin asuhmang chutoh bang ding ahi.
24 Chuteng vannoi pumpin, ‘Idia Pakaiyin agamu hitia abol hitam? Ibol’a hibang loma lung hang hitam?’ ati diu ahi.
25 Adonbutna chu, ‘Egypt a kona ahinpuidoh pet’uva, Pakai apu apateu Pathento akitepnau amiten asuhkeh jeh-uva hitia ahi.
26 Ahou diuva Pakai jahda, masang a ahou khah louhel’u pathen dangho kin aboltauve.
27 Hijeh a chu Pakai amite chunga lung hanga, hiche lekhajol’a kijihsa manthahna jouse agamsunguva alhut khum ahitai.
28 Pakai alung hang behseh tan, alungnat behseh phat’a agamsunguva adeldoh a, migam a anolut, tuni geiya umden ahitauve,’ kiti ding ahi.
29 “Pakai i-Pathen’un seidoh louva aselguh thil phabep aum’e; amavang a Danthu eiphondoh peh-un, eiho le ison ipahteuvin tonsot’a init diu ahi.

DANBU NINA BUNG 30

Semphat’a vangboh chandol
1 “Tua kapeh kah nahiuve, vangboh nadeiyum, gaosap nadeiyum? Thil hijat hin nalhun khum’uva, Pakai na-Pathen’un nathecheh nau gamsung, namtin vaipi lah nachen nauva, lhen kah dia kaseipeh-u hi hin geldoh-un nate.
2 Nangho le nachilhahteu Pakai koma nahung kihei kit’uva, lungthim pumpia tunia kaseipeh-u thupeh chengse hi nanit’ule,
3 Pakai na-Pathen’un hepiuvin nate. Nathechehnau namtin vaipi lah a konin hinlepui kit’untin, khantousah kit’unte.
4 Leiset kolning kolkah geiya kithecheh ta jongleu chun, Pakai na-Pathen’un hin chomkhom kit’untin, nahinlepui diu,
5 napu napateu chenna gamsung nalo kit thei diu ahi. Chuteng napu napateu sanga haojong nahaosah0uva napunsah cheh diu ahi.
6 Pakai na-Pathen’un nangho le nachilhahteu thu nun theina lungthim peuvin natin, nalungthim pumpiuva na-ngailut’uva, hiche gamsunga chu nachen den jing diu ahi.
7 Nabolseule nadou jing, namelnateu chunga hicheng gaosapna ho hi alebuh lhah ding,
8 nanghon vang tunia kapeh thupeh chengse nanit’uva asei nangai diu ahi.
9 Natoh lam lam’uva Pakaiyin phattousah-intin, chale nao nahaovuva, gancha tampi navul diu, nalouma jouseu gasoh thei ding ahi. Napu napateu akhantousah banga, nakhantousah diu kipah-inte,
10 nanghon vang hiche amihilna lekhajol’a kijihsa a-Danthu jouse nanit’uva, asei na-ngai diu ahi. Nalungthim pumpiuva ama na-ngailut diu ahi.
11 “Tunia kaseipeh-u thupeh hi hahval’a najuiphah lou diu ahipoi.
12 Van san phah ahipoi. ‘Ijah-uva ijui theina diuva koipen kaldoh a agapoh lhah ding ham?’ nati diu ahipoi.
13 Twikhanglen gal a um jong ahipoi. ‘Ijah-uva ijui theina diuva koipen Twikhanglen galkaiya igalahpeh diu ham?’ nati diu jong ahidehpoi.
14 Ahipoi, nakom chauva um ahibouve. Naheuvin, vet louva nasei theiyu ahi, hijeh chun tua pat jui jengun.
15 “Tunia nalhenkah diuva thilpha le thilse, hinle thi kapeh kah nahiuve
16 Tunia kapeh-u Pakai na-Pathenu thupeh chengse nanit’uva, Ama na-ngailut’ule, nakhantouvuva, mihem tamtah nam nahidiu ahi. Chutile nalogot’u gamsunga chu Pakai na-Pathen’un vang naboh diu ahi.
17 Amavang thu nung louva asei na-ngaidauva, pathen dang ho nahouvule,
18 kagihsal nahiuve, nasuhgam diu ahi.
19 Tua hi lhenkah dia hinle thi, Pathen vangboh le gaosap naseipeh-uva, nalhenpen penu hetoh dia van le leiset kakou ahi. Hinna kilhen’un.
20 Pakai na-Pathen ngailu’vin, athu nit’un, adin tahsan um hiuvin, athu nit’un, adin tahsan um hiuvin, chutile napu napateu Abraham, Isaac chule Jacob peh dia atepsa gamsunga chu nangho le nachilhahteu chengsot ding nahiuve,” ati.

DANBU NINA BUNG 31

Joshuan Mose akhel
1 Israelte kom Mose’n thu asei jingin,
2 “Kum ja khat le somni kalhingtai, nalamkhaiyuvin kapang joutapoi. Hiche tilouvin jong Jordan galkai lou din Pakaiyin aseitai.
3 Pakai na-Pathen’un lamkaiyintin, namasanguva cheng namtin vaipi sugam intin, agamsungu nalo diu ahi; Pakai seisa banga Joshua hin nalamkai diu ahi.
4 Amor lengte ni Sihon le Og asuhmang banga, Pakaiyin hiche miho khu asuhmanga, agamsungu jong asuhmang ding ahinai.
5 Pakaiyin amaho khu najosah-untin, chuteng kahil bang banga nabol diu ahi.
6 Pangdet’un lang lung ngam’uvin. Miho kicha hih-un. Na-Pathenu, Pakai Amatah chun umpi nauvinte. Nathonsah pouvintin, dajong dalha pouvinte,” ati.
7 Mose’n Joshua akouvin, Israel mipi masanga chun, “Pangdet’in, lung ngamin; apu apateu peh dia Pakaiyin atepsa gamsung losah dia hiche mite lamkai ding nang nahi.
8 Pakai Amatah-in lamkaiyintin, naumpi ding ahi. Nathonsah lou ding, dajong dalhaponte, meidoiyin kicha hih beh-in,” ati

Kum sagi seh le simdoh ding Danthu
9 Mose’n Pathen Danthu ajihdoh-in, Pakai Kitepna thingkong vetup Levi Thempuho le Israel lamkaite apetai.
10 Ajah-uva, “Kum sagi seh, bat le tham ho suhbei kum alhin teng, lhambuh kut phatle hiche hi othong leuvin simdoh-un.
11 Pathen houna ding mun khatseh a Pathen hou dia ahung tengu, Israelte simpeh ji jiuvin.
12 Mitinin ajah cheh a Pakai na-Pathenu ginje akichuh them’uva chule amihilna ho tahsan tah a ajui theina diuvin, pasal, numei, chapangte chule nakho sunguva cheng khopem jouse jong koukhomsoh keiyun.
13 Hitobanga hi Pakai na-Pathenu Danthu ngai kha louhel, nachilhah teuvin ajah diu ahi. Jordan gal, lo dia nagot’u gamsung achen laiseuva, hitia chu Pakai thu ngaije kihil them diu ahi.

Pakaiyin Mose ahilna nukhah
14 Pakaiyin Mose jah a, “Hingsot tapon nate. Kahilchah theina din, Joshua gakouvin ponbuh a hinpuitan,” ati. Mose le Joshua ponbuh a ahung lhontai.
15 Hichun akom lhona Pakai meilomin ahung kilah-in, ponbuh kotpi phunga akitung dentai.
16 Pakaiyin Mose jah a, “Thiloi ding nahitai, nathi jungle Israelte hi kei dia lepche diu, kakiteppina hi asuhkeh diu ahi. Lut dia akigotnau gamsunga mite doi houvuntin, Kei eidon tapouvinte.
17 Hitia achon tengu, kalunghan khum ding, donlouva kakoi teng min asuhgam diu ahi. Melse tah tah manthahnan alhun khum’uva, chuteng a-Pathenu Ken kaumpi lou ahetdoh diu ahi.
18 Chuteng kapanpi lou ding ahiuve, ajeh chu thilse jeng abol’un, pathen chom ahoutauve.
19 “Tun hiche la hi sundoh-in, amaho douna kibol ahi hettohsah nan Israelte hil themin.
20 Apu apateu kateppeh dungjuiya amaho hi gampha tah le hoi tah a kapuilut diu ahi. Hiche gamsunga chu adeichan neh le chah aneiyuva, lung mongsel’a cheng diu ahi. Ahinla kihei mang untin pathen dang ahou diu ahi. Eidondauva kakitepna asuh keh diu ahi.
21 Chuteng achunguva manthahna tijat kichat chat um hung chu ding ahi. Hiteng jongle chun hiche la hi kisa jing ding, adou nauva hettohsah a pang ding ahi. Peh dia katepsa gamsung kapuilut masang, tu jenga jong alung gel’u kahenai,” ati.
22 Hiche nikho le le chun Mose’n la chu ajihdoh-in Israelte ahiltai.
23 Pakaiyin Nun chapa Joshua kom, “Lung ngamin pangdet’in. Pehdia katepsa gamsunga khu Israelte napuilut ding ahi, Ken lhonpi nange,” ati.
24 Mose’n Pathen Danthu chu lekhajol khat’a ajihdoh-in, mukhel um louna din, ching thei tah-in ajihsoh keiye.
25 Ajih chai phat’in, Pakai Kitepna thingkong lhacha pang Levi Thempuho jah a,
26 “Hiche Pathen Danthu lekhajol hi japi douna hettohsah ahijing theina din, Pakai na-Pathenu kitepna thingkong panga khun koitauvin.
27 Israelte lungtah le doumah mi ahiu kahei. Keima damlai sung jengin jong Pakai doumah abol’un, kathi nung bangle khoh cheh a adou diu ahi.
28 Thil hichengse hi kaseipeh theina din, naphung lamkai jouseu le vaipote kahenga hinkhom’un; adounau hettohsah a pang dia van le leiset kakou ding ahi.
29 Kathi nungle hung gilou vuntin, kahilsa jouse apaigam diu ahi. Chutengle manthahna ato diu, ajah da da abol’uva, Pakai aphin lung hang diu ahi,” ati.

Mose la
30 Hichun Israel miten angai cheh-un, Mose’n la chu abonchan chinphan aseiye

DANBU NINA BUNG 32

1 “Van le leiset’in kathu jauvin, Kasei lung lut’in ngaiyun.
2 Kahilna hi gomal valha bang ding, Leichunga daitwi kai bang ding; Kaseiho hi loudong chunga daitwi phin banga, Hampa nem chunga gotwinel phin lha bang ding ahi.
3 Pakai min vahchoiying ting, Aloupina amiten phongdoh-unte.
4 “Long louva napanpi Pakai ahin, Achamkimin, athu adih cheh-e; Na-Pathenu kitah jingle dihtah, Thildih le kitoh bol ahi.
5 Nangho vang tahsanbei, amite dia kilomlou, Chonset dimle lhep lhah dim nam nahiuve.
6 Hitobang hi Pakai nabolgot monguham? Vo mi-ngol lungthimbeite! Pathen chu na-Pau, Nasempau ahin, Aman nam khat nasou ahibouve.
7 “Khang chesa, malai thu gel tem’un, Itobang thil soh tam napateu dongun, Thu chesa ho seipeh din Tehse ho dong tem’uvin.
8 Chungnungpen Pan namtin gam ahoppeh-in, Achenna diu gamgi alhepeh-e. Mihem nam khat cheh chu Pathen lhacha khat cheh angasah-in;
9 Jacob chilhahte vang Ama ding tuma akilhendoh ahiuve.
10 “Gamthip lai, nelgam huise lanna gama Vahle Israelte amudoh-in, Amale ama kikhohsah bang bangin Israelte khohsah-in ahuhdoh-e.
11 Muvanlaiyin anoute lenje ahil bang le, Alhavingte nia ahuidoh bangin, Pakaiyin Israelte lhu louhel’in Adinsah jing theiye.
12 Gamdang pathen pang louhel’in, Pakaiyin amite apple theiye.
13 “Thinglhang sang jouse apen, Lhosoh lhoga akinehsahjie. Songkol dunga gam koiju akimu’vin, Hollei lah a jong olive apha theiye.
14 Bongpi le kelpi noitwi alhing theiyin, Kelngoi hoipen, kelcha phapen, bong hoipen Suhlou chang phapen le Lengpitwi lhumpen jong amahoa ahi.
15 “Pakai mite ahao theiyun, ahivangin doumah bol’in apangui; Neh le chah tui tui nen athao theiyui. Asempau Pathen dalhan, Ahuhhingpau thaneipen adonpouve.
16 Milim houvin Pakai aphin lung hangun, Thilse bol’in alung hansah tauve.
17 Pathen hilouho kom akilhaiyun, Apu apateu het khah lou pathen thah, Israelte jui khah lou pathen thah, Israelte jui khah louhel Semthu pathen ho chu houvin;
18 A-Pathenu, huhhingpu thaneitah, Ahinsah Pau chu asumil tauve.
19 “Pakaiyin amudoh phat’in alung hangin, Acha anaote apaidoh gamtai.
20 ‘Kithopi kit taponge,’ atin, ‘Itobang mongum veng’e, Milungtah, tahsanbei mite.
21 Milimdoi semthun eiphin hangun, Atah hilou Pathen ahisah ho’u jeh-in Eithangtomsah tauve. Aphin lung hang diuva nam khat kamanchah a, Athangtomna diuva nam ngol khat kamanchah ding ahi.
22 Kalunghan meibang deojah ding, Leiset thil jouse kavam ding ahi. Leinoi geiya kasuh ding, Molsang bul jouse akahvam ding ahi.
23 “ ‘Manthahna kalhutkhum khum ding, Thalpia kakap kap jeng ding ahi.
24 Gilkel le khosih a thiuva, Natset’a thigam diu ahi. Sahang kadel khumsah a, Gulsete kalha khum diu ahi.
25 Kholai lamlen dunga gal’in athauva, Insung tin kichatna dimsoh ding; Nu-ngah gollhang thigam’uva, Naosenho le tehseho geiya kihinghoi lou ding ahi.
26 Koiman ageldoh kit louhelna diuva Israelte kasuhgam hel thei ahiuve.
27 Hijongle Keima suhgampi chu amelmateuvin Amaho suhgam’a seiya kahoithosah lou ding ahi,’ ati.
28 “Israel hi lungthimbei nam ahiuve; Aching hih hel’ui.
29 Agal lelnau ahedoh pouvin; Thilsoh hi ahetheipouve.
30 Idia Israel sang khat chu mi khat’in ajo a, Sangsom jen mi ninbou ajo ham? Pakai a-Pathen’un adalhatan, A-Pathen thaneipen chun adontapoi.
31 Amelmateuvin a-pathenteu lhahsam aheuvin, Israel Pathen banga thahat ahilou akihet’ui.
32 Amelmateu chu Sodom le Gomorrah banga chonse, Khamna theile akha jeng ga lengpigui tobang ahiuve.
33 Gulgu lah a kisemdoh Lengpitwi tobang ahibouvui.
34 “Israel melmate thilbol Pakaiyin ageldoh jingin; Talen matsah phat ngah jing ahi.
35 Pakaiyin phu lantin, melmate talen matsah-inte; Alhuhna diu phat ahung lhungin, amanna diu nikho anaiye.
36 Pakaiyin amite huhdoh-intin, Athabeiyu amu teng panpinte. Panpi ngaicha aum tengu, Alhachate hepi tante.
37 Chuteng Pakaiyin amite dong intin, ‘Nakisonpiu pathen thaneiho hoiba hitam?
38 Sathao thaovin nalhaiyun, Lengpitwiyin naphit phit meu! Tua nahung panpiuva, Nahuhdoh jengule itim!
39 “ ‘Keiseh seh bou Pathen kahin, Adang Pathen aumpoi. Ken kathat theiyin kahinsah theiye, Kamavon kaboldamin, koiman einel theipoi.
40 Pathen hing jing jeng Ken Vanlam sangin kakihahsel’e.
41 Chemjam nolval leh-ing tin, Adih a thu katan ding ahi. Kamelmate chunga phu lang tin, Eihotbolte talen matsah inge.
42 Kathalchang jouse thisan matsoh a, Eidou jouse chemjamin sat lih inge. Eisat tapou hinghoi ponge; Mapu le gal-hinga kikai jong hoideh ponge.
43 “Vo namtin vaipi, Pakai mite pahchauvin, Athatteu chu Pakaiyin talen amatsah tai. Amelmate chunga phu alan, Amite chonset angaidamtai,” ati.
44 Israel mipi jah din, Mose le Nun chapa Joshuan hiche la hi chinphan asei lhon’e.

Mose mihil china
45 Mose’n Pathen mihilna thu mipi ahilsoh phat’in,
46 “Tunia kaseipeh-u thupeh chengse nit tei tei din gel’uvin. Pathen thuhil chengse tahsan tah a anit theina diuvin, nachate kom avel vel’in seipeh-un.
47 Kihilna hicheng hi thu homkeo ahipoi; nahin theina diu ahibouve. Hicheng hi nit leu chun, nalogot’u Jordan luigal gamsunga khu nachensot diu ahi,” ati.
48 Hiche nikhoma hin Pakaiyin Mose jah a aseiyin,
49 “Jericho khogal, Moab gamsung, Abarim molsang jonin, Nebo molvuma kaldoh-in lang, Israelite kapeh got Canaan gamsung gaven.
50 Hor molvuma na-upa Aaron thi banga, nang jong Nebo molvuma thiden ding nahitai.
51 Ajeh chu nani lhonin Israelte masanga Keidin nakitah lhonpoi. Zin gamthip lai, Kadesh kho kom, Meribah twiphunga chun, Israelite masang laitah a neijumso lhon’e. 52 Canaan gam chu nagalmu ding, Israelite kapeh ding gamsung khu nalut lou ding ahitai,” ati.

DANBU NINA BUNG 33

Mose’n Israel phung jouse vang aboh
1 Athi masanga Pathen mi Mose’n Israel mite vang abohna thucheng ho chu hicheng hi ahi:
2 Sinai molsanga kon Pakai ahungin, Edom gamsunga nisa bangin ahungdoh-in, Paran molsanga amite chunga avah-e. Vantil sangsom to lhonin, Khut jetlama meisel adei!
3 Pakaiyin amite angailun, Amite chu ahuh jinge. Akhomuh a kunin athupeh chengse nit’u hite.
4 Kanampiu gou lupen tah, Mose’n eipeh-u Danthu kanit’ui.
5 Phung jouse le lamkai cheng kikhop teng Pakai chu amite Israel Leng ahi.
6 Reuben phung thudol’a Mose’n: “Lhomcha hijongleu, Reuben chilhah bei hih hel hen,” ati.
7 Judah phung thudol’a Mose’n: “Vo Pakai, panpi din atao nau ngaiyin; Phungdang ho to gomkit’in. Agal’u satpeh-in Pakai, Amelmateu dounan kithopin,” ati.
8 Levi phung thudol’a Mose’in: “Vo Pakai, nadei chu Urimle Thummin a seidoh-in; Nadia kitah lhacha Levite seidoh sah-in; Massah a napatep tan, Meribah twiphunga akitahnau naphochentai.
9 Anu apa, asopi, acha anao sangun Nang din akitah jo’uve. Nathupeh chengse anit’un, Nakitepna thudol’a tahsan um ahiuve.
10 Nadanthu nit din achateu hil’un tin, Namaicham phunga kilhaina ato diu ahi.
11 Vo Pakai, Levite phung khantousah-in; Abol jouse lung lhaipeh-in. Kithou kit louhel din Amelmateu sugam jengin,” ati.
12 Benjamin phung thudol’a Mose’n: “Pakaiyin deitah a ahuhjing phung, Nilhum lhuma ahon jing, Alah-uva achenpi ahi,” ati.
13 Joseph phung thudol’a Mose’n: “Agamsungu Pakaiyin vangboh hen gotwi nensah hen, Vanthamjol’a gotwiyin chapnou jing hen.
14 Agamsunguva nisa hua theiga pha jouse ga hen, Kum kiheichina thingga pha lai jouse dim hen,
15 Molle lhang lui jouse theiga dimsoh hen,
16 Thilpha agamsungu dimsoh hen, Hamboh meikouva thu hinseiya Pakai Phatnan vang boh jing hen. Vangbohna hijatpi hi Joseph phunga lhung hen, Asopite lamkaiya amabou ahi.
17 Joseph bongchal thahat’in ahat’in, Gambong kihem abange. Akitne ni chu Manassehte asang sang, Ephraimte sangsom jat ahiuve. Amahon namtin vaipi athechavaiyun, Leiset mong geiyin adelmangtuave,” ati.
18 Zebulun le Issachar phungte ni thudol’a Mose’n: “Twikhanglena akiveina Zebulun khang tou hen, Inmuna Issachar gou pung hen.
19 Amolsang lai laiya gamdang mi apuidoh-un, Adih dol’a kilhaina abol jingui. Twikhanglena gou agatol’un, Twipam neldi lah a ahintol’ui,” ati.
20 Gad phung thudol’a Mose’n: “Gamsung hitejen semdoh Pathen thangvah-in um hen, Gad sakei bangin akoljin, Mi banjang thahat aloilhaji’e.
21 Gampha laitah alo’uvin, Lamkai chanlomtah achangui. Israel lamkaite kikhop khom teng, Pakai tupeh chengse le Danthu ho anitsoh keiyui,” ati.
22 Dan phung thudol’a Mose’n: “Dan hi sakei nou tobang ahin, Bashan khoa konin ahung chomdoh ji’e,” ati.
23 Naphtali phung thudol’a Mose’n: “Naphtali Pakai phatna lhingset vang achangin, Agamsungu jong Galilee dillen a pat lhanglam gei ahi,” ati.
24 Asher phung thudol’a Mose’n: “Phung dang sangin Asher vangboh achangjoi. Asopiten lungset’u hen; Agamsunga olive thing phathei hen.
25 Akhopi jouse thih kelkot kisem hen; Itih-in jong lung mogin khosa hen,” ati.
26 Vo Israelte, pathen dang na-Pathenu tobang aumpoi, Vanlaijol meilom chunga tou thei, Nakithopi diuva meiloma chunga tou thei, Nakithopi diuva meiloma hungki tol lha jeng Pathen!
27 Pathen nakulpiuvin apang jingin, Abanjangte nin natuh chah jingui. Nakitol tolnauva melmate nadeljampeh-un, Nasuhgam diuvin naseipeh jingui.
28 Vo Jacob chilhahte lung mongun, Changle mim, lengpithei lhinna, Van daitwiyin lei achapnou jingna gama Mongtah-in chenguvin.
29 Vo Israel, nanun nom’ui! Nangho banga Pakaiyin ahuhhing nam dang aumpoi. Pakai nalumule nachemjam’un apangin, Nahuh-uva gal josah din apange. Namelmateu ngaidam thuma hunga, Kengchotpha nanei diu ahi.

DANBU NINA BUNG 34

Mose thi
1 Mose Moab phaiya konin Nebo molsang, Jericho khogal niso lam, Pisgah molsanga akaltouvin; hikoma hin Pakaiyin Canaan gam pumpi avetsah-e: Gilead gamsungse se Dan khopi gei,
2 Naphtali gamsung pumpi, Ephraim le Manasseh gamsung jouse, Judah gamsung pumpi, lhumlam Mediterranea Twikanglen gei;
3 Judah gam lhanglam gamkaisese; Zoar a pat tumthing kena, Jericho khopi gei phaicham jouse ahi.
4 Hichun Pakaiyin Mose jah a, “Achilhahteu peh dia, Abraham, Isaac chule Jacob kateppeh gam chu hiche hi ahi. Kamusah mai mai nahin, lut vang lutsah ponge,” ati.
5 Hiti hin Pakai seisa bangin, Pakai lhacha Mose chu Moab gamsunga athitai.
6 Along chu Pakaiyin Moab phaicham, Bethpeor khogal’a avuitai, ahinla tuni geiyin avuikhuh laitah hea koima aumpoi.
7 Athi chun Mose kum ja khat le somni alhingtai; ahat jingin, amit jong apha lheh nalaiye.
8 Moab phaichama Israelten Mose pul nisom thum sungin adou gunset’ui.
9 Mose’n akhel dia alhendoh jeh-in, Nun chapa Joshua chu aching lheh-e. Israelten Joshua thu angaiyun, Pakaiyin Mose khut’a apeh thupeh chengse anit’ui.
10 Israelte lah a Mose tobang Themgao apeng khapoi; Mose vang Pakaiyin kimaiton akihoupi.
11 Egypt lengpa le avaipote, chule agamsung pumpi douna Pakaiyin Mose abolsah thil kidang ho le datmo thil ho, Themgao dangin abol theipoi.
12 Israelte mitmua Mose bol datmo le tijat um thil ho Themgao dangin abol theipouve.