Philemon Henga Paul Lekha Thot

PHILEMON HENGA PAUL LEKHA THOT

Thupatna

Philemon hi japi het Christian khat, Colossae houbung member, Onesimus soh khat’a neipa chu ahi. Onesimus hi apu Philemon a konin ajamin, Paul to akimu khan, songkul a aumkhom lhone’e. Paul thuseiya konin Onesimus hi Christian ahitai. Paul’in Philemon lekha athotna jeh chu- Philemon sohpa Onesimus hi anung sol peh a, akichampi ding, asoh mai maiya gel talouva Christian sopi khat a alah dia angeh ahi.

Asung thu kihopkhen

Thupatna 1-3
Philemon pachatna thu 4-7
Onesimus dia ngehna 8-22
Thu chaina 23-25

Philemon Bung 1

Salam

1 Chrita Jesu Jal’a sohchang Paul le sopi Timothyn, ingailut tah-u le itoh khompiu Philemon,
2 isopi nuu Apphia, i-sepai pankhom piu Archippus le na-insunga kikhomji Houbung henga,
3 i-Pau Pathen le Pakai Jesu Christaa konin lungsetna le chamna nachunguva um hen.

Philemon lungsetna le tahsan

4 Katao chanin phat jousen nangma kageldoh jingin ka-Pathen kathang vah jinge;
5 ajeh chu Pakai Jesu lam  le mithengte chunga ngai lutna le thasan nanei thu kajai;
6 natahsan jeh a kikhop khomna hin Christa jal’a ei ho sunga um thilpha jouse hi hetchetna aumdoh teina dinga kataoji ahi.
7 Na-ngailut thu dol’a hin hapan kakipah-in kakitil khou lhehjenge, ipijeh-inem itile nangma jeh-in mithengte lunggil jeng jong akisuhal lheh jengin ahi sopi.

Oneaimus dia Paul taona

8 Christa jal’in angaidol’a nangma thupeh jeng ding ngam jongleng,
9 ngailutna jeh a ka-ngeh tho joh ahi; hiche hi palaiya pang tu jenga jong Christa Jesu jal’a sohchang Paul kahi.
10 Kasoh chan naa kahinsa, kachapa Onesimus dinga kangeh ahi.
11 Phat khat’a chu nang dinga amahi phachom lou ahin, tua vang nang le kei dinga pha chomtah ahitai.
12 Ama hi nahenga kahinsol’in, hichepa hi kakhotona lung laigil’a hung ahi.
13 Kipana Thupha jal’a kasoh chan na muna hi nangma khel’a lhacha kinbol’a eipanpeh dinga kakihen den nom lheh jeng ahin,
14 ahinla nangma lung hilounaa ima nacham louvin kabolsah nompoi, chutia chu nathilpha bol chu chamlouva hilouva, nachamtah a naboljoh ding aphai.
15 Ama hi tonsot geiya nanei theina dinga chomkhat dia nakoidoh jong hithei ahi;
16 soh maimai ahitapon, keidin soh sanga chung nung jo sopi deitah ahin, nang din vang Pakai jal le tahsa jal’a hahi deh ahiye.
17 Hitia chu nangin kei hi chan khopia neigel le kei khel’in ama hi analemin.
18 Aman na chunga suh khel anei ham, bat anei ham ahijongle, hijong chu kei chunga del din sim jengin.
19 Keima Paul’in kakhut tah a kasut ahi, keiman le peh kit nange; nangma tah-in kei neibat chu nasahna dinga kasei ahipoi.
20 Hiti chu ahi sopi, Pakai jal’in nangin keima neilung lhaisah jon, Christa jal chun kalung laigil suhal jingin.
21 Nasei ngai jing jeh a kahinsut ahin, Kasei kalval’a jong nabol ding kahei.
22 Chule kalhunna ding indan eina gonpeh-in, ajeh chu nataonau jeh a nang hodia eikipehdoh tei ding kakinem lheh jenge.

Salam chaina

23 Christa Jesu jeh a kasoh chanpi Epaphras-in nahinsalam’e;
24 katoh khompi cheng Mark, Aristarchus, Demas chule Luke hite hon jong nasalam’ui.
25 Pakai Jesu Christa milungset nan nalhagaovu umpihen.

© Biblical material is used with the prior permission of the Bible Society of India, the copyright holders.

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>