Luke Sut Kipana Thupha

LUKE SUT KIPANA THUPHA

Thupatna

Luke sut Kipana Thupha sunga hin Jesu hi Israelte kitepeh Huhhingpu le mitin Huhhingpun akiseiye. Luke-in Jesu hi, “Vaichate henga Kipana Thupa seipeh ding,” Pakaiya kon Lhagaovin aseiye. Hiche Kipana Thupa hin mipi ngaichat tin tang aseiye. Luke lekhabua hin kipana jeng adim’e, abul lam a Jesu hung ding aksieiyin, achaina lama ama vana akaltou akiseiye. Hiche Luke sunpa hin vana akaltou nunga Christian tahsan kithejao le akhantou thudol Acts lekhabua aseiye.
Noiya kikhendol hin anina le agupnaa hiche Luke lekhabu mai maiya kimu thu aumin, hiche ho chu- Vantilte lasah le kelngoi ching hon Jesu pen agavet’u, Houin a Jesu chapang, Samaria miphapa thulem le chapa jam mangpa thulem hiti ho hi ahi. Hiche Kipana Thupha sunga hin taona thu Lhagao Theng thu, Jesu kinbolna numei lhacha ho, chule Pathenin chonset angaidam thudol akihaseiye.

Asung thu hopkhen

Thupatna 1:1-4
John Baptist le Jesu pen le achapang lai lhon 1:5-2:52
John Baptist natoh 3:1-20
Jesu baptize chan le lhep patena 3:21-4:13
Galilee gama Jesu japi kin abol 4:14-9:50
Galilee a pat Jerusalem gei 9:51-19:27
Jerusalem vel’a hapta nukhah sung thilsoh 19:28-23:56
Thoudohsa Pakai miho henga akilah le akaltou 24:1-53

Luke Bung 1

Theophilus henga pehdoh

1 I-lah-uva hung guilhung chengse sutdohna mi tamtah-in abol pan banguvin,
2 athilsoh kipat’a pat amit tah a mua athu lhachaa pang hon eihil bangun,
3 michungnung Theophilus, thilsoh ho hi ken jong kahet themsa banga ban neicha le kitoh tah a hinsut doh peh ding kaseiye;
4 chutileh nakiseipehsa thilsoh ho hi nahet chet thei ding ahi.

John Baptist so ding kisei masah

5 Judea gama Herod lengpa vaipoh laiyin Abijah themput dol’a thempu, Zechariah kiti khat aume. Ajinu chu Aaron chilhah ahin, amin Elizabeth akiti.
6 Anupa lhonin Pathen vet dia midih gel, nolnabeiya Pakai thupeh jouse le chondan chengse nit bukimsoh ahilhone.
7 Elizabeth achinjeh-in cha vang anei lhonpon, teh la atehse lheh lhontai.
8 Thempu chon ngaiya Zechariah loiho panna ding nikhon, Pakai Houin thenga lut’a gimnamtui lhutnam na dia
9 vang kisan chu Zechariah chunga achuh khah jeh-in aman Pathen angsunga themput kin anabol’in ahi.
10 Gimnamtui kilhutnam laisen mipi polama adingun ataovui.
11 Hichun Zechariah henga Vantil khat ahung kilah-in, gimnamtui kilhut namna maicham jet lama chun ahung dinge.
12 Vantil amu phat’in Zechariah alungkhamin kijong akichai.
13 Ahinla Vantil chun ajah a, Zechariah, kicha hih-in, nataona akisangin, najinu Elizabeth in chapa khat ahin’a, amin John nasah ding ahi;
14 kipah thanom lheh in natin, chule ama penjal’a mitampi kipah diu ahi.
15 Ajeh chu ama hi Pakai mitmua nasatah hiya, lengpitwi hihen khamna thei ju hijong leh adon louhel ding, apenlhah a pat Lhagao Theng dimset ding ahi.
16 Chule Israelte tamtah Pakai a-Pathenu henga alepui lut kit ding ahi.
17 Elijah Themgao Lhagao le thahat aken’a, Pathen sol lea panga, mipate lunggel chate lama aheidoh a, thua nung loute chihna thudih agelsah-a Pakai dia miho kigosadema akoipeh ding ahi,” ati.
18 Zechariah chun Vantil jah a, “Keila kateh lheh tan, kajinu jong tehsesa ahitan, cha kanei mong lhon ding chu iti kahet thei ding ham? atileh;
19 Vantil’in, “Keima hi Pathen angsunga ding jing Gabriel kahin, hiche thupha hi najah a seipeh dia eihinsol ahi.
20 Ven, hichengse hi akitep phat cha hung guilhung tei ding ahin, kaseipeh natahsan loujeh a aguilhun nikho geiya paomoa naum ding ahitai,” ati.
21 Mipin Zechariah chu a-ngah jingun, munthenga achuti sotden adatmo lheh jengui.
22 Ahungdoh phat’in apaomo tan, muntheng sunga mu nei ahi mihon aheuvin, aman jong thilsoh umchan chu akhut’in athon, paomon aumtai.
23 Chuin thempu kin abol chaisoh phat’in Zechariah in lama ahung kile kittai.
24 Nikho phabep nungin ajinu Elizabeth chun nao avop tan, lha nga sungin akiselgun, hiti hin,
25 “Teh nunga Pakaiyin nao eivopsah a, japi maiya kajachatna lahmang peh eigot ahi,” ati.

Jesu pen ding kisei masah

26 Elizabeth gai kal lhagup lhin nan Vantil Gabriel chu Pathena konin Galilee gam Nazareth khoa
27 David chilhah Joseph toh kicheng dia kitepsa nu-ngah Mary henga akisol’e.
28 Vantil chu alut’in ajah a, “Nun nomin sah chungnung nu, Pakaiyin naumpi jinge!” ati.
29 Mary chu alung kichi-ah lah jengin, ipi thudol’a kilemna ahiding giltah-in agel’e.
30 Hichun Vantil’in ajah a, Mary kicha hih-in, Pathen lungdei namui.
31 Na gaiya chapa khat nahin ding, amin Jesu nasah ding ahi.
32 Ama thupi tah hiya Chungnungpen Chapa kitia, Pakai Pathenin apu David laltounaa atousah ding ahi.
33 Jacob chihlhah te chunga lengvai pontin, alenggam chun beitih neita lou ding ahi,” ati.
34 Ahinla Maryn Vantil jah a chun, “Iti cha kanei thei ding ham, keila pasalto kakitimat khapon?” atileh;
35 Vantil’in ajah a, Lhagao Theng nachunga hung chun tin, Chungnungpen tha neinan nahinlekhu ding, hijeh a hi apeng ding naosen theng chu Pathen Chapa kiti ding ahi.
36 Nanulamnu Elizabeth-in jong teh nungin chapa khat avop’in, achinga kiseinu agaiyin lhagup alhingtai;
37 ajeh chu Pathen dingin imacha ahimopoi,” ati.
38 Chuphat-‘in Mary, “Ven, Pakai nalhachanu kei, nasei bangin kachunga guilhung hen,” ati. Hichun Vantil’in Mary adalhatai.

Maryn Elizabeth agavil

39 Hichelai hin Mary akipat paiyin Judea thinglhang gam khopi khat’ah thanom tah-in achei.
40 Zechariah in’a alut’in Elizabeth salam agabol’e.
41 Mary salam chu Elizabeth-in ajah pet tah-in aoisunga naocha akichomin, Elizabeth chu Lhagao Theng adimtai.
42 Chuin Elizabeth chun othongin asamin, Numei jouse lah a nunnom nu, nanaobu sunga um jong anun nome!
43 I-atile ka-Pakai hungnu lomlom kahenga hung jeng hitam!
44 Ajeh chu salam thu nasei kajah jah chun ka-oisunga naocha kipah-in akichom jenge.
45 Ahenga Pakai thusei guilhung ding tahsan nu anun nome,” ati.

Maryn vahchoi la asah

46 Hichun Maryn aseiyin: “Kahinkhon Pakai kachoi an’in,
47 Eihuhhing Pakai Pathen chunga Kalhagao akipah-e.
48 Ajeh chu alhacha nu lhasam tah eigeldoh-in, Ven, tua pat akhang khanga miten Nun Nom nua eisei diu ahitai.
49 Ijeh-inem itile Hatchungnungin thil nasatah eibolpeh-in, Amin jong athenge.
50 Ama gingte chu akhang khangin alungset jinge.
51 Aban thahat ajesal’in thanei tah-in thil abol’in, Alunggel’uva kiletsah hoithote athecheh soh tai.
52 Vaihom thanei tah ho alaltouna konin aloilhan Tahlel chagate achoisangtai.
53 Agilkelte antui tuiyin avah van, Mihaote khutgoh keovin asolmang’e.
54 Alhacha Israel henga akitepna, I-pu i-paute Abraham le achilhahte henga aseisa,
55 Tonsot kumkhoa alungset long lou chu Ageldoh jing jenge,” ati.
56 Mary chu Elizabeth koma lha thum jen anichongin, chuin in lama akile kittai.

John baptist pen

57 Elizabeth naoso phat alhingin chapa khat ahingtai.
58 Aheng akom ho leh aphung gol hon Pakaiyin nasatah a Elizbeth alungset hi ajauvin akipapi cheh-uve.
59 Niget lhin nin naosen chep tan din ahungun, apa min putsah a Zechariah hisah ding agouve.
60 Ahinla anun ajadan, “Amin John kiti ding ahibouve,” ati.
61 Amahon Elizabeth jah a, “Naphung sunguva chutobang minneikha bon um louva,” atiuve.
62 Chuphat’in mihon apan ipi asah nom chu mit heiyin adongui.
63 Zechariah chun asutna ding pheng khat athumin, “Amin John ahi,” tia ajih leh abonchan adatmo soh hel’uve.
64 Hichepet tah chun Zechariah apaodoh jeng theiyin, Pathen avahchoiye.
65 Aheng akom jouse akichauvin, hiche thusoh hi Judea thinglhang gamsung athangsoh tai.
66 Athusoh japha chanin alungthim’ah, “Hiche naosen khu ipi hungsoh ding ham?” ati cheh-ui. Ajeh chu Pakai ban thahat’in naosen chu aumpi jinge.

Zechariah gaothusei

67 Naosen Pa Zechariah Lhagao Theng adimin gaothu aseitai:
68 “Pakai, Israel Pathen vahchoiyute, Aman amite akithopin jalenna amusah tai.
69 Alhacha David insunga konin Huhhing hattah khat saki bangin atungdoh tai.
70 Hiche hi masang laiya Athemgao theng ho kama aseisa ahi.
71 Imelmateu le eihot bolteu khut’a kona Eihuhdoh jing diuva thu atepsa ahin;
72 I-Pu i-Pateu alungset tei tei ding, Akitepna theng suhmil lou dia aseisa ahi.
73 I-Pu luiyu Abraham henga kihahsel’a, Imelmateu khut’a kona eihuhdoh diu,
74 Gin neilouva Ama kin ibol theiyuva,
75 Ihinkho lhumkeiyuva dih tah a akin ibol diu ati ahi.
76 Naosen nang jong Chungnungpen Pa Themgao nakitia, Pakai masanga chea alampi nasempeh ding;
77 Amite hi achonsetnau ki-ngaidama Huhhingna chang dia naseipeh ding ahi.
78 I-Pathenu hi lung nemtah lungset them ahin, Thina muthim jing lah a touho chunga
79 Nisa loupi tah avahsah a, chamna lampi jon’a akijotsah diu ahi,” ati.
80 Naosen chu ahung khang khangin tahsa le lhagaova hattah ahitai. Israelte henga lhang phonga akilah masangsen gamthip lah jenga apansai.

Bung 2
(Mt 1:18-25)

Jesu pen

1 Hiche lai chun Caesar Augustus in leiset chung cheng mijouse simtoh a min sutdoh din thu apei.
2 Hiche hi min kisim masah pen ahin, hichepet hin Quirinius Syria gamvaipon apange.
3 Mihem jouse ama ama khopi cheh a min kisut din acheuve.
4 Joseph jong David insung chilhah ahijeh-in Galilee gam Nazareth khoa konin Judea gam David khopi, Bethlehema achetouve.
5 Min kisut dia ache hin ajihol Mary gai hamset chutoh alhon’e.
6 Chukoma aum pet lhonin Mary navah phat alhing’in,
7 achapa masapen ahingtai. Jin lhun in’a amani ding mun onlou jeh-in Maryn naosen chu ponin ajel’in gan ankong-ah alupsah-e.

Kelngao ching ho le Vantilte

8 Hiche gama chun kelngoi ching phabep loujaova ageh-un, janin kelngoi hon ngah akilha lhauve.
9 Chuin Pakaiya kon Vantil khat akom’uva ahung dingin, Pakai loupi nan akimvel’u asalvah soh jenge; amaho akicha behseh jengun ahi.
10 Vantil chun ajah-uvah, “Kicha hih-un, ajeh chu ve, nang ho dia hachangpa kipana Thupha kahinpoh peh nahiuvin, mi jouse kipana hi ding ahi.
11 Ijeh-inem itile tunin nang ho din David khopia huhhingpa Pakai Messiah chu apengtai.
12 Naphot chetna diu chu: naosen pon’a kijel’a gan ankong sunga lum nagamu diu ahi,” ati.
13 Phot lot louvin Vantil chutoh vanmi janelten Pathen avahchoiyun hiti hin,
14 “Chungnungpena Pathen loupi hen, Leiset’a alungdei mite chunga cham leng hen,” atiuve.
15 Vantilte chu van lam jona akile kit phat’un kelngoi ching ho khat le khat akihouvun, “Bethlehema cheu hitin Pakaiyin eihetsah-u hiche thilsoh hi gaveu hite,” akitiuvin ahi.
16 Kinloi tah a acheu le Mary le Joseph toh naosen gan ankonga lum chu agamu’ve.
17 Amu phat’uvin naosen chung chang thudol ajah-uva kisei chengse chu miho aseipeh tauve.
18 Ajah-uva kelngoi ching ho thusei japha chanin kidang asa lheh jengun,
19 Maryn vang hichengse chu achingin alung gil’in agel jinge.
20 Kelngoi ching hon akiseipeh banguva thil amu jeh-un Pathen choiat le thangvah thon akile kittauve.

Jesu min asah-u

21 Niget lhin nin naosen chep tan phat ahitan, naobua akijil masanga Vantil’in amin asahsa Jesu asah tauve.

Houin’a Jesu apuiyu

22 Mose Danthu dungjuiya kisuh theng phat alhinin Jesu chu Pakai henga din Jerusalema ahinpui touvui.
23 Pakai Danthua, “Naobu tumkeh masa pasal tapou Pakaiya atheng ding ahi,” tia kisei bangin,
24 chule Pakai Danthua kisei, “Vakhu kop khat ahiloule vapal nou ni ham,” kiti dungjuiyin kilhaina bol din agouve.
25 Ven, Jerusalema chun amin Simeon kiti pasal khat, midih le hougut tah, Israel kilhatdoh ding ngah jinga um ahin; Lhagao Theng vop,
26 Pakaiya kon Messiah amu kahsea thilou dia Lhagao Thengin aphondoh mi khat aume.
27 Simeon chu Lhagaovin Houin’a ahinpui lut’in, Danthua kisei banga naosen Jesu kin abolpeh lou khoh ho bolpeh dia anu le apan ahinpui lut lhon phat’in
28 Simeonin naocha chu akipomin, Pathen vahchoiyin aseiye:
29 “Pakai* tua hi nasei banga Nalhachapa lung monga neilhadoh ahitai;
30 Ijeh-inem itile kamit tah-in Nahuhhingna kamutai.
31 Hiche hi namtin mitmua Gontohsa nakoi,
32 Chidang namdangte henga nadei chu vah a kiphongdoha Namite Israel loupina dia nabol ahi,” ati.
33 Naosen chung changa Simeon thusei chu anu le apan adatmo lheh jeng lhone.
34 Simeonin amaho phatthei aboh-in, anu Mary jah a, “Ven, hiche naosen hi Israel sunga mi tamtah kipal lhuhna ding le hindohna dia kitung, nahsah moa kikoiji ho khel’a melchihna pang ding,
35 nang jeng jong nalung chang chemjama kidotpai abahsah a, mi tamtah lunggil selguh geiya aphondoh ding ahi,” ati.
36 Asher phunga Phanuel chanu Anna themgaonu chu aji nei nunga ajipa toh kum sagi seh bou cheng khom lhona, tehse lheh jeng,
37 kum som get le li meithaiya um, Houin dalha kholou, sun le jan’a Pathen kinbol’a pang anngol’a tao jing jeng ahi.
38 Hichepet tah hin ahungin Pathen athangvah-in, Jerusalem lhatdoh ding kat jingte jah a naosen thudol hi aseipeh tai.

Jesu Nazareth khoa ahung kile kit

39 Pakai Danthua kisei kinkhoh jouse abol chai phat’un Galilee gama akhou Nazareth a ahung kile kittauve.
40 Naosen chu akhang khangin ahatdoh tan aching lheh jengin, Pathen phattheinan aumpi jinge.

Jerusalem Houin’a chapang Jesu

41 Jesu nunle pa kumseh leh kalchuh kut’a din Jerusalema acheji lhone.
42 Jesu kum som le ni alhinin angaiya kal chuh kut mang din achetou kit’uve.
43 Kut kichaiua in lam ahinjot phat’un chapang Jesu chu Jerusalema aumdenin, anu le apanla ahedoh lhonpoi.
44 Amanin mihon lah a chedanin agel lhonin nikhat nilhum keiyin ahung tauve; chuin aheng akomte leh akihetpi ho lah a Jesu ahol lhon leh
45 amudoh jou lhon tapoi. Hijeh chun Jerusalema ahung hol lhontai.
46 Nithum nungin Houin sunga agamudoh lhonin, houhite lah a anatouvin, athuseiyu angaiyin dong jong adongjie.
47 Athusei japhan chanin achih dan le athu donbut themdol chu kidang asalheh jenguve.
48 Anu le apan amudoh lhon chun adatmo lheh jeng lhonin, anun ajah a, “Naosen, idia neihitibol jeng lhon ham? Veta, napa le ken lung dong tahin kahol hol lhone,” ati.
49 Aman ajah lhona, “Idia neihol khoh lhon ham? Ka-Pa insunga kaumtei ding nahet lhon lou ham?” atipeh-e.
50 Ajah lhona asei chu ahedoh thei lhonpoi.
51 Chuin amani toh lhonin Nazareth khoa ahungin athu thu lhonin anunge. Anun thilsoh chengse hi alung gil’in aching jinge.
52 Jesu chu tahsa le chih nan akhang tou touvin, Pathen le mihem deiyin aumtai.

Luke Bung 3

John Baptist thuhil lhangsap
(Mt 3:1-12; Mk 1:1-8; Jn 1:19-28)

1 Tiberius Caesar lengchan kal kum som le nga lhin chun Pontius Pilate’n Judea gam vai apon, Herod-in Galilee gambih vai apon, asopips Philip’in Iturea le Trachonnitis gambih vai apon, Lysanias chun Abilene gambih vai apon,
2 Annas le Caiaphas them pulenin apang lhone. Hichepat hin gamthip’a um Zechariah chapa John henga Pathenin thu ahinseitai.
3 John Jordan luipang gamkol’a achelen, mihon lung aheiyuva batize chang diu, chuteng achonset’u ki-ngaidam ding thu alhangsam lei.
4 Isaiah themgao lekhabua chun akisunin: “Gamthip’a khosam ogin khat’in, Pakai lampi semtoh-un lang, Alamlen semjangsen koiyun.
5 Damkom jouse kidip chama, Mol le lhang jouse kilai cham ding, Lamkon jouse kisujanga aboh laise jong kisunam ding ahi.
6 Chutengle tahsa mihing jousen Pathen huhhingna amudoh cheh diu ahi,” akiti.
7 Ahenga baptize chang dia hung ho jah a chun Johnin, “Vogulse son ho, ahung lhung ding lunghanna jamdohna ding thu namop’u chu koiham?
8 Nachonset lung nakhel’u phot chet nan nachon nauvin phongun; ‘Abraham chilhah kihina chu,’ tin kisonghih-un; ajeh chu Pathenin hiche song ho hi alah a Abraham chilhah a asemdoh thei ahi.
9 Thingphungbul tin’a heicha kiphutsoh ahitan, aga phalou thingphung jouse kiphuh lhua meilhum sunga kileh lutsoh ding ahi,” ati.
10 Mipin John chu adongun, “Achutile ipi kabol diu hitam?” atiuleh;
11 aman ajah-uvah, “Sangkhol chol ni neiyan aneilou hophen anneh neiyan jong chutiman bol hen,” ati.
12 Kaidong ho geiyin ahenga baptize chang din ahungun ajah a, “Houhil iti kachon diu ham?” tia adoh-u leh,
13 Johnin ajah-uvah, “Nakiteppeh kalval’un lah dauvin,” ati.
14 Sepaihon jong, “Iti kachon diu ham?” tin adongun, aman ajah-uva, “Sum hihen ipi hi jongle alam louvin koima ima lahpeh dauvin, nasandoh jat jat’in lung lhaiyuvin,” ati.
15 Mipin alungthimuva John akatjingu Messiah hitheiya agel laith-un,
16 Johin adonbut’in ajah-uvah, “Ken twiya baptize kachansah bou nahiuvin, keisanga hatjo khat ahunge, kei hi akengchot khao sut lham dia kilom jong kahipoi, aman Lhagao Theng le meikonga baptize nachansah diu ahi.
17 Akhut’a chang japna achoiyin, phol’a chang jap ngimsel’in tin, chuteng achangtah ho changsal’a akhum tup ding, asi chengse vang mit theilou meilhum sunga agovam ding ahitai,” ati.
18 Johnin tilkhouna tamtah toh thon mipi chu Kipana Thupha aseiphongpeh-e.
19 Gambih vaipoa pang Herod jong chu asopipa Philip jinu Herodias akichenpi jeh le thilse dang tampi aboljeh-in aphoh-e.
20 Hichea hin Herod chun John hi songkul’a akhumin thilse khoh cheh khat abolbe kit’e.

Jesu baptize chan
(Mt 3:13-17; Mk 1:9-11)

21 Miho baptize achansah phat’un Jesu jong baptize achange. Chuin atao leh van akihongin,
22 Lhagao Theng tahsa vouvin vakhu bangin achunga ahung leng lhan, van’a konin ogin khat’in, “Kadeitah kachapa nahin, Nachunga kalung alhai ta-ngeiye,” ati.

Jesu penna khanggui
(Mt 1:1-17)

23 Anatoh kipat chun Jesu kum som thum bang alhintan, mingaiton ama chu Joseph chapa ahi. Joseph chu Eli chapa ahi;
24 Eli chu Matthat chapa ahin, Matthat chu Levi chapa ahi; Levi chu Melchi chapa ahin; Melchi chu Jannai chapa ahin, Jannai chu Joseph chapa ahin,
25 Joseph chu Mattathias chapa ahi; Mattathias chu Amos chapa ahin; Amos chu Nahum chapa ahi; Nahum chu Esli chapa ahin, Esli chu Naggai chapa ahi;
26 Naggai chu Maath chapa ahin, Maath chu Mattathias chapa ahi; Mattathias chu Semein chapa ahin, Semein chu Josech chapa ahi; Josech chu Joda chapa ahin,
27 Joda chu Joanan chapa ahin; Joanan chu Rhesa chapa ahin, Rhesa chu Zerubbabel chapa ahi; Zerubbabel chu Shealtiel chapa ahin, Shealtiel chu Neri chapa ahi;
28 Neri chu Melchi chapa ahin; Melchi chu Addi chapa ahi; Addi chu Cosam chapa ahin; Cosam chu Elmadam chapa ahi; Elmadam chu Er chapa ahin,
29 Er chu Joshua chapa ahi: Joshua chu Eliezar chapa ahin, Eliezar chu Jorim chapa ahi; Jorim chu Matthat chapa ahin, Matthat chu Levi chapa ahi;
30 Levi chu Simeon chapa ahin, Simeon chu Judah chapa ahi; Judah chu Joseph chapa ahin, Joseph chu Jonam chapa ahin, Jonam chu Elaikim chapa ahin,
31 Eliakim chu Melea chapa ahi; Melea chu Menna chapa ahin, Menna chu Mattatha chapa ahin, Mattatha chu Nathan chapa ahin; Nathan chu David chapa ahi;
32 David chu Jesse chapa ahin, Jesse chu Obed chapa ahi; Obed chu Boaz chapa ahin; Boaz chu Salmon chapa ahi; Salmon chu Nahshon chapa ahin;
33Nahshon chu Amminadab chapa ahi; Amminadab chu Admin chapa ahin, Admin chu Arni chapa ahi, Arni chu Hezron chapa ahin, Hezron chu Perez chapa ahi; Perez chu Judah chapa ahin;
34 Judah chu Jacob chapa ahi; Jacob chu Isaac chapa ahin, Issac chu Abraham chapa ahi; Abraham chu Terah chapa ahin,Terah chu Nahor chapa ahi;
35 Nahor chu Serug chapa ahin, Serug chu Reu chapa ahi; Reu chu Peleg chapa ahin, Peleg chu Eber chapa ahi; Eber chu Shelah chapa ahin,
36 Shelah chu Caina chapa ahi; Cainan chu Arphaxad chapa ahin, Arphaxad chu Shem chapa ahi; Shem chu Noah chapa ahin, Noah chu Lamech chapa ahi;
37 Lamech chu Methuselah chapa ahin, Methuselah chu Enoch chapa ahi; Enoch chu Jared chapa ahin, Jared chu Mahalaleel chapa ahi; Mahalaleel chu Kenan chapa ahin,
38 Kennan chu Enosh chapa ahi; Enosh chu Seth chapa ahin, Seth chu Adam chapa ahi; Adam chuPathen chapa ahi.

Luke Bung 4

Diabol’in Jesu alhep patep

1 Jordan luiya konin Jesu Lhagao Theng dimset’in ahung kile kit’in, lhagaovin gamthip’a apuilut’in,
2 nisom li sungin Diabol lhep patep’in aga-ume. Nisom li sunga imacha nelou ahin, akhonnan agilkeltai.
3 Hichun Diabol’in ajah a, “Pathen Chapa nahileh hiche song hi changlhah sosah-in.” ati.
4 Jesun adonbut’in, “Pathen lekhabua kisun chu, ‘Mihem hi changlhah keova hing theilou ding,’ kiti ahi,” ati.
5 Diabol’in Jesu apuitouvin mitphet kah louvin vannoi mihemchenna lenggam jouse avetsah-in,
6 “Hicheng chunga thu neina le aloupina abonchan napenge, ajeh chu kapeh nom nom kapeh dia eikipe-ah ahitai.
7 Hijeh a chu naboh khup’a chibai neiboh leh aboncha nanga hi ding ahi,” ati.
8 Jesun adonbut’in “Pathen lekhabua, Pakai na-Pathen chibai naboh a Ama kinbou nabol ding ahi,” tin akisune,” ati.
9 Jerusalema apui kit’in Houin tingvuma adinsah-in ajah a “Pathen Chapa nahi leh hikoma kon hin chomlha jengin;
10 ajeh chu Pathen lekhabua, ‘Pathenin Avantilte hinsol peh-in tin Amahon nachang nauvinte,
11 Chule akhut’uvin nadom nauvinte; Achutiloule songa nakeng kisuh khah get’in nate,’ tin akisune,” ati.
12 Jesun adonbut’in, “Pathen lekhabua,’Pakai na-Pathen nalhep patep lou ding ahi,’ tin akiseiye,” ati.
13 Diabol’in Jesu alhep patepna ding achaisoh phat’in phat khat’a din adalhatai.

Jesu Galilee gama Pathenna atohpat
(Mt 4:12-17; Mk 1:14-15)

14 Jesu Lhagao thahat kengin Galilee lama ahung kile kittai. Chuin Ama thudol gamsunga akithangsoh tai.
15 Houthua kikhopna in tina miho ahil len, mihon Ama aseipha soh keiyui.

Nazareth khoa Jesu asandau
(Mt 13:53-58; Mk 6:1-6)

16 Ahung seiletna Nazareth khoa Jesu ahungin, achon na ngai bangin Choldo nin houthua kikhopna in’a achen, Pathen lekhabu sim dingin adingdoh tai.
17 Hichun Isaiah Themgao lekhajol apeuvin, lekhajol alhap lhah a amudohna laiya chun,
18 “Pakaiya kon Lhagao kachunga aumin, Tahlelte henga Kipana Thupha seipeh ding, Sohchangte lhadohna thu seipeh a, Mitcho ho khomuna ding seipeh ding, Nehchintoa um ho lha-ong ding seipeh a,
19 Pakai deilhen kum seipeh dinga thao einu ahitai,” tin akisun’e.
20 Jesun lekhajol chu ajeldoh-in lhachapa apen atoutai. Hichun houthua kikhopna insunga um mi jousen Ama avesoh keiyui.
21 Jesun ajah-uva, “Hiche najah-u Pathen lekhabua thu hi tunia guilhung ahitai,” tin aseipantai.
22 Mihon Ama aseipha soh keiyun, akamsungsoh thu ngai ngai ho jeh chun kidang asalheh jengui. “Hichepa hi Joseph chapa hilou haimo?’ atiuve.
23 Jesun ajah-uva, “Thuchih a kisei, ‘Louthem nangma kiboldam’in, kiti hi naseiyuva, “Nakhosunga jong Capernauma thil kidang kibol kajah ho’u tobang bol tangem,’ neiti khum diu hina hi,” ati.
24 Aman, “Dih tah a kaseipeh nahiuve, Themgao chu akhosunga i-kisahji lou mong ahinai.
25 “Ahinla dihtah a kaseipeh nahiuve, Elijah nikho laiya vankot akikhaa kumthum le lhagup gotwi kanjeha gamsung pumpia kel laiyin Israelte lah a meithai numei tamtah aum vangun
26 Elijah chu amaho khat cha henga akisolpoi, Sidon gama Zarephath khoa meithainu koma akisoljo bouve.
27 Elisha themgao khangin jong Israelte lah a miphah tampi aum nan, Khat cha jong suh thengin aumpoi, Syria mi Naaman suh thengin aume,” ati.
28 Jesu thusei ajah-u chun houthua kikhopna in’a um chengse alung hang behseh jengun,
29 akipatdoh-un khosunga koin Jesu alhoh doh-uvin, achen nau molvum, koldeh a sot lhah dingin agouve.
30 Ahinla Jesu akah lah-uva akiheh doh-in ache mangtai.

Mi lhagaoboh voppa
(Mt 1:21-28)

31 Jesu Galilee gama Capernaum khoa ahung suh-in, Choldo nin miho thu ahil leh,
32 athuhil tha neije chu mihon kidang asa lheh jengui.
33 Houthua kikhopna in’a chun lhagaoboh vop pasal khat aumin, amahin oging tah-in ahinsamin,
34 “Vo Nazareth Jesu, I-lo ding neigot ham? Eisu manguva hung nahim? Koi nahi kahenai, Pathen solchah theng chu nahi,” ati.
35 Jesun haphon aphoh-in, “Thip’in! Mipaa kon chun hung doh-in!” atileh; thilhan mipa chu a-angsung laitah-uva aheh lhun ima suse louvin asunga konin ahung potdohtai.
36 Mihon adatmo soh keiyun, “Ipipen asei khum hitam? Thu neitah le thahat tah a lhagao boh ho thu apeh le ahungdoh doh jengui,” tin akihouvui.
37 Hiti hin akimvel gamkol’ah Jesu thudol akithangsohtai.

Jesun mi tampi aboldam
(Mt 8:14-17; Mk 1:29-34)

38 Jesun houthua kikhopna in dalhan Simon in-ah aluttai. Simon nupanu hatah-in khosih nat’in ana nan, mihon Jesu henga aseipeh-ui.
39 Jesu amanu jalkhun panga adingin khosih nat chu haphoa apho leh, akhosih chun alhan, amanu athou paiyin amaho jenlen apangtai.
40 Nisa lhumin hivei chom chom veiya damlou neihon Jesu henga ahinpuiyun, Aman achung cheh-uva khut angamin aboldamsoh keiye.
41 Mi tamtah sunga konin thilha ho apotdoh-uvin, “Pathen Chapa nahi,” tin asamui. Jesun amaho chu haphon aphoh-in apaopoh sahpoi, ijeh-inem itile amahon Messiah ahi ahe cheh-ui.

Jesu thuhil lhang dia avaikon
(Mk 1:35-39)

42 Khovah phat’in Jesu apotdohin munthip lai khat’ah achetai; ahinla mipin Ama ahol hol jengui. Hiti hin ahenga ahunguvin adalhah louna dingun alhotauve.
43 Ahinla Jesun ajah-uvah, “Kho dang danga jong Pathen lenggam Thupha hi kaseiphong tei tei ding ahi. Hiche dia chu hung kisol kahi,” ati.
44 Hijeh chun Judea gam Houthua kikhopna in hoa jong ahil lhanglei.

Luke Bung 5
Jesun seijui akou masah ho
(Mt 4:18-22; Mk 1:16-20)

1 Jesu Gennesaret dil panga adin pet’in Pathen thu ngai nom hon akimvel’a aneh chinto jengui.
2 Jesun twipam chin’a kong ni kihen amui; ngaman kong neiho chu potdoh a len asoppet’u ahiye.
3 Jesu Simon kong’a alut’in twipam chin’a kona kong chu tol lut jep din asol’in, chuin atouvin kong’a pansan mipi chu thu ahiltai.
4 Athusei jouvin Simon jah a, “Twithuh laiya tol lut’in nga matna din len sep lhauvin,” atileh;
5 Simonin adonbut’in, “Pu, jan khovah hel’a imacha man lou kahiuvin, nang thupeh-in len septem unge,” atin,
6 len aseu leh nga tampi aman khauvin alen jouseu a-ehpai ding ahitai.
7 Hichun kong danga pang aloiten ahung kithopi diuvin agah jap’ui. Amaho ahungun kong te ni chu nga akhol dimset’un ahileh alhalut deh deh jenguve.
8 Athilsoh hi Simon Peterin amuchet phat’in Jesu khomuh a aboh khup’in, “Pakai, neidalha jengin, michonse kahibouve,” atitai.
9 Peter le akiloipi chengsen nga chujat amat jengu chu kidang asabehseh jenguve.
10 Simon loite ni, Zebedee chpa te ni Jacob le John jong chutima chu ahilhone. Jesun Simon jah a , “Tija hih-in, tua lhah mi man’a napan ding ahi,” ati.
11 Amahon kong te ni chu vaokama ahintoldoh-un ijakai adalhauvin Jesu ajuitauve.

Jesun miphah khat asuh theng
(Mt 8:1-4; Mk 1:40-45)

12 Jesu khopi khat’a aumpet’in akhosunga chun apum changa phah pasal khat aumin, Jesu amudoh phat’in a-angsunga aboh khup’in amaitol’a asulut’in, “Pakai, nalung ahileh eisutheng thei nahi,” tin atao tai.
13 Jesun athamin ajah a, “Kalung ahinai, damtheng tan,” atileh; apet tah chun aphah atheng jenge.
14 Koima jah a asei louna din Jesun akham chah-in, “Chen, Thempu gakivetsah-in, nadam theng hettohsah nan Mose thupeh banga thilto ding gatoh tan,” tin asol’e.
15 Ahinla aumchan thudol akihathanjal cheh jengin athu ngai ding le aveiset kiboldamsah din mipi ahungbe cheh cheh jenguve.
16 Ahinla Jesu gamthip’a achangin achedoh jin agataojie.

Jesu langthi mi khat aboldam
(Mt 9:1-8; Mk 2:1-12)

17 Nikhat Jesun thu ahilpet’in Galilee gam le Judea gam khotin’a kon le Jerusalema hung kon Pharisee ho leh Danthu hil ho hikoma chun atouvui. Hichea chun Jesun mi adamsah theina din Pakai thahat’in aumpi.
18 Hichepet tah hin mihon pasal langthi khat alupna pumin ahinpu’vin, put lut paiya Jesu angsunga jam din ago’uve.
19 Japi jeh a aput lut thei louhel phat’un inchunga akaldoh-uvin cheh pheng vang kah a alupna pumin, mipi lailung, Jesu angsung dontah a agah khai lhauve.
20 Atahsanu amu phat’in Jesun mipa jah a chun, “Golpa, nachonset jouse ngaidam ahitai,” ati.
21 Athuseijeh chun Pharisee ho le Danthu themhon, “Hichepa hi koibeh hiya Pathen taitomna thu asei hi nga na? Pathen tilou koidangin chonset angaidam jou ding ham?” tin agel pantauve.
22 Agel’u hi Jesun ahedoh paiyin ajah-uva “Ibol’a chutobang nagel’u ham?
23 ‘Nachonset jouse ngaidam ahitai,’ ti leh, ‘Thouvin lamjot tan,’ ti hojoh baijom?
24 Hoi hileh leiset chunga mihem Chapan chonset jouse ngaidamna thahat anei nahetna diuvin,” atin, langthipna jah a, “Kaseipeh nahi, thouvin, nalupna kilah-in inlama chetan,” ati.
25 Langthipna mipi maiya ahung dingdoh paiyin, alupna akilah-in inlam jonin achen Pathen athangvah peh-e.
26 Mihon adatmo soh keiyuvin Pathen thangvah to thon, atija thei lheh jengun, “Tunin thil kidang datmo umtah imutauve,” tin aseiyui.

Jesun Levi akou
(Mt 9:9-13; Mk 2:13-17)

27 Hiche nung hin Jesu apotdoh leh kaidonna muna tou Levi, kaidongpa, chu amudoh-in ajah a, “Neijuiyin,” ati.
28 Levin ijakai dalhan akipat’in Jesu ajuitai.
29 Levin a-in’a Jesu vah nan golvah lentah abol’in kaidong ho tampi le midang hon ankong aumpiuve.
30 Hichun Pharisee ho leh danthu them ho Jesu seijuite chunga aphun’un, “Ibol’a kaidong ho le chonsete toh naneh khomu ham?” atiuve.
31 Jesun amaho hi adonbut’in, “Adamin louthem angaipoi, adamlouvin bou angaiye.
32 Keijong midihsa kouva hung kahipoi, chonsete lungheisah dinga hung kahibouve,” ati.

An ngol thudol Jesu adoh-u
(Mt 9:14-17; Mk 2:18-22)

33 Mihon Jesu jah a, “John seijuihon an angol matchet’un taojong atao jiuvin, Pharisee seijuihon jong chutiman abol’ui; nang seijui hon vang aneuvin adon’ui” tin aseiyui.
34 Jesun ajah-uvah, “Kichen golvahnaa hung lha ho chu aji nei pan aumpi pet’a an na-ngolsah theiyum?
35 Amavang alah-uva kona aji neipa kipui mang phat hung lhung ding ahin, hiche sungsea chu an angol diu ahinai,” ati.
36 Jesun amaho chu thulem khat jong aseipeh-in, “Koiman pon thah abot-eh jin ponlui behnan anei ngaipoi; behna taleh ponthah jong abo-eh ding ahin, chule ponthah hal jong chu ponlui chutoh alhoukitoh ponte.
37 Koiman lengpitwi thah jong savunpeng luiya akhum ngaipoi; khum taleh lengpitwi thah chun savunpeng atumkehding, lengpitwi moh lon kanga, savunpeng jong kisuh manglo ding ahi.
38 Hijeh a chu lengpitwi thah savunpeng thah a khum ding ahi.
39 Koiman lengpitwi lui adon nungin lengpitwi thah adon nompoi; ajeh chu, “Lengpitwi lui bou alhume,’ tin aseijie,” ati.

Luke Bung 6

Choldo nia Jesu seijuiten changvui asiu
(Mt 12:1-18; Mk 2:23-28)

1 Choldo nia Jesun buleijao ajotnaa aseijuiten changvui asih-un, akinoiyun abah pantauve.
2 Hichun Pharisee ho phabep’in “Ibol’a Choldo nia bol ngailou abol’u ham?” atiuve.
3 Jesun amaho chu adonbut’in, “David le aloite agilkel’uva chu ipi abol’u nasim khah louvu ham?
4 David chu Pathen insunga alut’in Pathen umjing hetna changlhah kitoh, Thempu tilouvin aneh ngailou chu anen aloite jong apei,” ati.
5 Ajah-uvah, “Mihem Chapa hi Choldo ni Pakai ahi,” ati.

Khutlang ngoipa
(Mt 12:9-14; Mk 3:1-6)

6 Choldo nidang khat man Jesu Houthua kikhopna in’a alut’in thu agahil’e. Hikoma chun pasal khut jetlam ngoi khat ana umkhai.
7 Danthu them ho le Pharisee hon ahehset theina diuvin, Choldo nia mi aboldam aboldam lou achang lhiuve.
8 Jesun alungthimu ahen khutlang ngoipa jah a chun, “Kipatdoh-in alailunga hung dingin,” atileh; ama akipatdoh-in ading tai.
9 Hichun Jesun ajah-uva, “Kadoh nahiuve, choldo nia apha le ase hoijoh bol ngai ham? Huhhing ding ha suhmang ding ham? ati.
10 Jesun abonchauvin avegolsoh keiyin khutlang ngoipa jah a, “Nakhut lhangdoh-in,” atileh; alhandoh phat’in akhut adamhel’e.
11 Chutah chun amaho athangtom behseh jengun Jesu i-lo ding thu akihousom tauve.

Jesun seijui som le mi alhendoh
(Mt 10:1-4; Mk 3:13-19a)

12 Hichelai hin Jesu tao dingin molchunga achen, jan khovah geiyin Pathen’ah ataove.
13 Khovah lhah phat’in aseijuite akouvin, alah-uva konin mi som le ni alhengdoh-in amaho chu amin’u solchah asah-e.
14 Amaho chun Peter asahpa Simon, asopipa Andrew, Jacob le John, Philip le Bartholomew,
1 Matthew leh Thomas, Alphaeus cha Jacob, gam ngailu atiu Simon,
16 Jacob chapa Judas, chule amatsah apangpa Iscariot Judas ahiuve.

Jesun japi kin abol
(Mt 4:23-25)

17 Jesu amaho hitoh ahung kumsuh-in jangcham lai khat’a adinge; hia chun seijui tamtah le Judea gama kon, Jerusalema kon, chule Tyre le Sidon twikol pang dunga hung mipi nasatah toh ahiuvin,
18 abonchauva Jesu thuhil ngai nom le adammo veiset nau kibol damsah dia hung ahiuve. Chule Lhagaoboh suh genthei ho jong aboldam soh keiye.
19 Jesu tahsaa kona thahat hungpot’a amaho adamsah theijeh chun japin Ama tham khah tei din ago’uve.

Phattheina le Da na
(Mt 5:1-12)

20 Jesu akhodah-in aseijuite aven aseiye: “Vaichate anun nom nahiuve, Ijeh-inem itile Pathenlenggam nang hoa ahi.
21 Tulaiya gilkelte anun nom nahiuve, Ijeh-inem itile nakivahva diu ahi. Tulaiya kapte anun nom nahiuve. Ijeh-inem itile nui ding nahiuve.
22 Mihem Chapa jal’a min nahot bol’uva, Migilouva nahouset, nadonda tengu leh anun nom nahiuve.
23 Hitia nahou niu chuleh kipah thanomin lam’un, ven, vana nasan diu tohman alen’e. Apu apateuvin jong Themgao ho hitobanga chu anabolsau ahi.
24 Ohe mihaoho ada nahiuve, Ijeh-inem itile hinkho nom naneitauve.
25 Ohe tulaiya oivaho ada nahiuve, Ijeh-inem itile gilkel nahin thoh diu ahi. Ohe tulaiya nuihi ada nahiuve. Ijeh-inem itile lunghema nakadiu ahi.
26 Ohe mi jouse seiphat chang ho ada nahiuve. Apu apateuvin jong Themgao lhem ho chutia anaseiyu ahi.

Melma lungset ding
(Mt 5:38-48; 7:12a)

27 “Kathu ngaiho kaseipeh nahiuve, namelmau ngailu’vin, nahot bolteu thilpha bolpeh-un,
28 nagaosapteu phatthei boh-un lang, nabolseteu taopeh-uvin.
29 Nangeiphe lang khat beng chu lang khatjong dopeh-in, nasangkhol len lahpeh a chu nasangkhol sung nung jong peh than.
30 Nahenga thil thum chan pen, mi lahsa nathil ipi hijongle nung thum kit hih-in.
31 Min iti bol le chun nadeiyam chutobang chun miho bol’in.
32 Na-ngailuteu bou na-ngailut’u le ipi pachat nachan diu ham? Chonsete jengin jong angailuteu angailu’ve.
33 Nabolphateu jeng nabolphat’u leh ipi pachat nachan diu ham? Chonsete jengin jong chutia abol’u ahi.
34 Mukit ding nakinep nau miho bou napeh-u leh ipi pachat nachan diu ham? Chonsete jengin jong apeh jat amukitna diu chonseho henga apejiuve.
35 Amavang namelmateu ngailu’vin, thilpha bolpeh-un, mukit ding imacha gel louvin thil homun; chutile kipaman nasatah nasan diu, Chungnungpen chate nahi diu ahi; ajehchu Ama chu khohsahna heloute le Migiloute khoto them ahi.
36 Napau mi khoto them bangin mi khoto them’uvin.

Midang thu tanpeh
(Mt 7:1-5)

37 “Mi oimo hih-un, chutile oimo nachan lou diu ahi; mi them mosah hih-un, chutile themmo nakichansah lou diu ahi; ngaidamun, chutile ngaidam nachan diu ahi.
38 Peuvin chutile nakipe diu ahi; atena dimset, hongphal tah a kipea kiloh det kheh-a kison chah kheh alet lha hel’a kipe ding nahive; ijeh-inem itile mi natepehna ma maa nakitepeh diu ahi,” ati.
39 Jesun miho chu hiche thulem hi aseipeh-in: “Mitchon mitcho alamkai theiyem? Anilhona kokhuh alha lut lhonlou ding ham?
40 Ahilpa sangin seijui achungnung ngaipoi, akihil themsoh teng vang leh seijui tapou ahilpa tobang bang ahiji nai.
41 “Ibol’a nasopi mit’a bohsi chu namelchih keova, nang mit’a inkam tejen chu mulouva um naham?
42 Namit’a inkam tejen mudoh louva nasopi jah a, ‘Sopi, namit’a bohsi chu neilahdoh sah-in,’ nati theiham? Vo mipha lhem! Namit’a inkam tejen chu kilahdoh masah le chun nasopi mit’a bohsi chu kichentah a namutheiding ahi.

Thingphung agan akihei
(Mt 7:16-20; 12:33-35)

43 “Thingphung phan gaphalou asep ngaipon, thingphung phalouvin jong gapha asep ngaipoi.
44 Hijeh chun thingphung agan akihei. Min lingphunga theichang ga aloupon, lingboh lah a jong lengpithei ga aloujipoi.
45 Miphan thilpha akholna alung gil’a konin thilpha asosah jin, misen thilse akholnaa konin thilse asodoh jie. Ajeh chu mihem lung gil’a kikhol chu athusei naa hung potdohji ahi.

Bul kiphu gotni
(Mt 7:24-27)

46 “Kaseibon bol louva ibol’a, ‘Pakai, Pakai,’ neitiu ham?
47 Ka henga hunga kasei ngaiya bol’a michu itobang ham vetsah unge.
48 Ama chu lei thuh tah laiya abul songpi chunga tunga insapa tobang ahi. Twisang alet’a vadungin asokhum vangin phatah a kisadet ahijeh-in hiche in chu asulong jou tapoi.
49 Koi hileh ja la ja naa bol lou chu abulpi bei leiset’a insapa tobang ahi. Vadungin asokhum teng hiche in chu alhupai jin, ain setdol chu amelse lheh jenge,” ati.

Luke Bung 7
Jesun sepai jalamkaipa sohpa aboldam
(Mt 8:5-13)

1 Jesun mipi aseipeh nom jouse aseisoh phat’in Capernaum khoa aluttai.
2 Sepai jalamkai khat hin sahtah soh khat aneiyin, asohpa hi ana lel lheh jengin athi pai ding ahitai.
3 Jesu thudol ajah phat’in sepai jalamkaipan Jesu chu hunga asohpa boldam din akouding Juda mi upaho asol’e.
4 UPaho hi Jesu henga ahungun khohsah tah-in ataovun, “Hichepa hi nabolpeh dia kilom mong ahi;
5 ajeh chu ijat’u alungset’in Houthua kikhopna in jong eisah peh-ui,” atiuve.
6 Hijeh chun Jesu amaho toh ahung kilhontai. In kom ahung gei phat’in sepai jalamkaipan aloite asol’in ajah a, “Pakai, hung kigimbol datan, ajeh chu ka-insung nahung lut ding hi kakilompoi.
7 Hijeh a chu katahsa tah a nahenga hung dia jong kilom kisalou kahi; thun seitho jongle chun kasohpa chu dam jeng nante.
8 Keijong mi thu noiya natong kahin, kanoiya natong sepaiho aum kit’e. Khat jaha, ‘Chen,’ katileh achen, achom khat jah a, ‘Hungin,’ katileh ahungjin; kasohpa jah a jong, ‘Hiche bol’in,’ katileh aboljin ahi,” agatisah-e.
9 Jesun hiche hi ajah phat’in amapa chu kidang asa behseh jengin, anung jui mipi lama akiheiyin, “Kaseipeh nahiuve, Israel lah a jong hitobang tahsan len kamudoh poi,” ati.
10 Ahung kisol ho in lama ahung kile kit’u leh sohpa chu adamsan agatoh tauve.

Jesun Nain khoa meithainu chapa thisa ahinsah

11 Hiche nung hin Jesu Nain khoa alut’in, aseijuite leh mi tampin akilhonpiuve.
12 Khopi dongkot phung agah phah konchan ven, mithilong khat ahung kipudoh-in, athipa chu anun chapa chang khatseh a anei ahin, anu jong meithaisa ahitai. Khopi sunga pat mipin meithainu chu ahin lhonpiuvin ahi.
13 Pakaiyin meithainu hi amudoh phat’in alai natpin ajah a, “Kap hih-in,” ati.
14 Anai lut’in thilong kong atham leh alongpu ho ading tauve. Aman, “Vo golhang, kaseipeh nahi, thoudoh tan,” atileh;
15 mithipa chu atoudoh paiyin thu aseiyin, chuin Jesun ama chu anu apetai.
16 Mi jouse atija behseh jengun Pathen avahchoiyun, “Pathenin amite ahung vil’in, i-lah-uva Themgoa nasatah khat asohdoh tai,” atiuvin ahi.
17 Hiche Jesu chung chang thudol hi Judea gam pumpi le akimvel gamkol dunga akithangsoh heltan ahi.

John baptist misol ho
(Mt 11:2-19)

18 Aseijuiten John jah a thilsoh hicheng hi aseipeh uleh Johnin aseijuite mi ni akouvin
19 Pakai henga asol’in, “Ahung ding chu Nang nahi hitam, ahilouleh achom dang khat ka-nga nah lai diu ham?” tin agadohsah-e.
20 Solle teni Jesu henga ahung lhonin, “John baptist chun, ‘Ahung ding chu Nang nahi hitam, ahiloule achomdang khat ka-nga nah lai diu ham?’ tia dong dinga nahenga eihinsol lhon ahi,” ati lhone.
21 Hichepet tah a hi Jesun amaho, hivei chom chom veiho, lhagao gilou vop ho aboldama mitcho jong kho amusah ahi.
22 Hijeh chun Jesun solle te ni adonbut’in, “Kile kit’in John jah a chun nathilmu le najah lhon, mitchon kho amu’uva, elbaiin lam ajot’u, miphah ho suh thenga auma, na-ngongin kho ajah, mithisa kaithouva auma tahlelte Kipana Thupha akiseipeh hi gaseipeh lhonin;
23 chule keiya kipal lhuhna neilou mi chu-anunnom ahi,” ati.
24 John solle te ni che nungin Jesun John thudol aseiyin, “Gamthip’a ipi vedia cheji nahiuvem’? Huiyin peng amut ling ham?
25 Ipi vedia ba chadoh ji nahiuvem? Ponnem sil mi ham? Ven, von hoitah a kivona nom satah a um ho chu leng inpi dunga aumbouvui.
26 Achutile ipi vetnoma ba chedohji nahiuvem? Themgao ham? Ahi, najah-uva kasei ahi, Themgao sanga thupijo ahiye.
27 Ama thudol hi, ‘Ven, kasolle Nang sangin kasol masai, Aman nachena lampi semsa anakoi ding ahi,’ tia kisun chu ahitai.
28 Kaseipeh nahiuve, numei sung peng cheh ahivangin John pen geiyin ama sanga lenjo aumpoi, ahinla Pathen lenggama aneopen ama sangin alenjo nalaiye.
29 Mipi le kaidong hon asei ajah phat’un, John baptist chansah dol’a baptize changsa ahijeh-un, Pathen apah chauve.
30 Pharisee ho le Danthu them hon vang John baptist khut’a baptize achan lou jeh-un adiuva Pathen thilgon chu apaituve.
31 “Tukhang miho hi ipi to kitekah ding hi tam? Itobang mi hiuvem?
32 Amaho hi kailhanga tou chapang ho khat’in achom khat jah a, ‘Kuli kamutpeh-u le la nalam pouvin, Lapi kasah-u jongle nakap deh pouve,’ tia kihou ho bep ahiuve.
33 Ijeh-inem itile John baptist chu ahungin changlhah la nelou leng pitwi jong don louvin aum nan, ‘Thilhavop ahi,’ atiuvin;
34 Mihem Chapa ahungin changlhah anen lengpitwi adon leh, ‘Ven, neh hat le lengpi twi loppa, kaidong ho jolpa hi,’ atiuve.
35 Ahinla chihna chu achaten adihna aphot chet ahibouve,” ati.

Simon Pharisee pa in a Jesu

36 Pharisee khat’in Jesu chu nehkhompi din akouvin, Ama Phariseepa in’a alut’in atoutai.
37 Hiche khopi sunga hin chonse numei khat aumin, Jesu Phariseepa in’a anne dia tou ahen songval bom khat’a thao namtui choiyin ahungin,
38 Jesu nung, akhotaljum koma dingin, akap’in akengphang chu amitlhin asop’in, chuin asamin atheh ngimin, achop’in thao namtui chu anui.
39 Neh khompi dia kou Phariseepan hiche hi amu phat’in alung sunga, “Hichepa hi Themgao ahinah le ahung thama numei khu itobang mi ahi hentin, chonse ahijong he nah ta,” tin gel’e.
40 Jesun ajah a, “Simon nahenga seinom khat kaneiye,” atileh; aman, “Seijengin Houhil,” ati.
41 Aman, “Mi nin sumpa hom mikhat sum abat lhone. Khat’in denarii ja nga aban, khat pan som nga abai.
42 Asah lel lhon phat’in aman abat lhon angaidam tai. Hiche te ni koijoh hin ama chu hangailut jon tem?” atileh;
43 Simon in adonbut’in, “Atamjo angaidam peh pa hin te kati,” ati. Jesun ajah a, “Naseidih lheh-e,” ati.
44 Numei nu lam angan Simon jah a, “Hichenu hi ven! Na-ina kahung lut tan, kakeng silna din twibon neipe poi; hiche nu hin kakengphang te ni amit lhia asop’a asama atheh ngim ahi.
45 Nangin chop jong neichop pon, hichenu vang kahung lut’a pat tang louhel’in kakeng phang te ni achop chop jenge.
46 Nangin kalu jengbon thao nu louva, hichenun kakengphang te ni geiyin thao namtui anui.
47 Hijeha chu najah a kasei ahi, hichenun hibanga angailutna hi achonset tampi ki-ngaidam phot chenna ahin, lhomcha ki-ngaidampeh chun angailu lhome,” ati.
48 Jesun amanu jah a, “Nachonset chengse ki-ngaidam ahitai,” atipeh-e.
49 A ankong umpihon, “Chonset geiya ngaidam thei Ama hi koibep ham?” akitiuve.
50 Jesun numeinu jah a, “Natahsanin nahuhhing ahitai, lung monin chetan,” ati.

Luke Bung 8

1 Phatchom khat nungin Jesun khopi jouse le khote jouse aban banin achonlen, Pathen lenggam Kipana Thupha ahil lhang len, seijui som le nin jong alhonpiuve.
2 Numei phabep, lhagao gilouvop’a kona adamsa ho le natna chom chom kona adamsah hon jong alhonpiuvin, hiche ho lah a hin Magdalene kiti Mary, asunga kona thilha sagi anodoh pehnu,
3 Herod neichingpa Chuza jinu Joanna, Susanna le adang ho tampi ahiuve. Numeiho hin Jesu le aseijuite chu amaho neiya konin ajenjiuve.

Muchi thepa thulem
(Mt. 13:1-9; Mk. 4:1-9)

4 Khopi jousea konin mi ahung hung jengun Jesu koma mi tamtah akikhomun ahile Jesun thulemin thu khat aseiyin;
5 “Muchi thepa alouva muchi then akonin athe leh muchi phabep lamsih a achun, min achonlih-in, chunga leng vachaten akilodoh tauve.
6 Phabepma songlheo chunga achun, ahintheina ding leithao aum loujeh-in ahung kedoh vangin agop paijitan ahi.
7 Phabep jong ling lah a achun, ling hon adep lihji tauve.
8 Phabep vang leipha leiya achukhan, ahung khangdoh in ajat jakhat chengin agai,” ati. Hicheng asei hin asamin, “A-ngaina ding nakhang neiyan ngai hen!” ati.

Thulem kiseilona
(Mt 13:10-17; Mk 4:10-12)

9 Hiche thulem hi ipi kiseina ham, tin aseijuiten Jesu adongui.
10 Hijeh chun Aman, “Nang ho hi Pathen lenggam thuguh chengse het dia kipea nahitauvin, adang ho vangin vejong leu amuchet thei lou diu jajong leu ahet khen thei lou diu jeh a a thulem jenga kiseipeh ahiuve,” ati.

Jesun muchi the thulem ahilchen
(Mt 13:18-23; Mk 4:13-20)

11 “Thulem chu hiche kiseina ahi; muchi chu Pathen thupha ahi.
12 Lamsih a chu kitiho chu Pathen thupha jataa, ahivanga atahsan dauva huhhinga aum louna diuva, Diabol hunga alung gil’a Thupha chu alahmang pehji miho ahiuve.
13 Songlheo chung leipatnaa chu kitiho chu thupha ajah tenguleh kipah tah a kisanpai jenga, ahivanga jungbei ahijeh-uva chomkhat tahsan jong le patepna phat ahung lhun phat le pul lhaji miho ahiuve.
14 Linglah a chu kitiho chu thupha ajatauvin, ahinla hinkhoa lungkhamna tin cheng, haona le leiset nopsahna chengsen alonvuh a, aga pilhing thei louva um miho ahiuve.
15 Leipha laiya chu kitiho vang chu thupha ajah tengu leh lungthim phatah le dih tah akolchahkheh a aga pilhin kahsea pangdet jing miho ahiuve.

Bel kikhuden meivah
(Mk 4:21-25)

16 “Koiman mei avah-in bel akhu ngaipon, jalkhun noiya jong atung ngaipoi. Ahung lut chanin meivah chu amusoh din thaomei akikhu khum jong ima aumpoi.
17 Ajeh chu khovah a kiphong doh lou ding ima akiselguh aumpon, phondoh a hetdoh lou ding akikhu khum jong ima aumpoi.
18 Iti najah-um ching theiyun; ajeh chu aneiya kipah bea, aneilou chu aneiya agel chengse jong kilahpeh ding ahi,” ati.

Jesu nu le Jesu sopite
(Mt 12:46-50; Mk 3:31-35)
19 Jesu nu le Jesu sopi pasal ho ahenga ahungu leh mipi jeh chun akom alut theipouve.
20 Mihon, “Nanu le nasopi pasal hon namu nomun pama adingui,” tin Jesu jah a aseipeh-ui.
21 Aman ajah-uva, “Kanu le kasopite chu Pathen thu jop’a bol ho chu ahiuve,” tin adonbut’e.

Jesun twipi ki-nonglai aphothip
(Mt 8:23-27; Mk 4:35-41)

22 Nikhat Jesu aseijuite toh kong sunga alut’in, chuin ajah-uva, “Dil gallang khat’a galkaiyu hite,” atijeh chun akitol tauve.
23 Akitolnauva Jesu a-ihmutai. Hichun huipi hatah-in dil chu anuh leh kong sung twi dimpai ding ahitan, seijuite akicha lheh tauve.
24 Seijuite ahungun Jesu athou khangun, “Kapu, kapu, amangthah kahitauve!” atiuvin ahi. Jesu athouvin huipi le twi kinonglai chu haphoa apho leh, huisepi chu athip’in, abeihel jenge.
25 Jesun ajah-uva, “Natahsanu hoilam ba hitam?” atileh; amahon kidang asauvin atijauvin, khat’in khat jah a, “Hichepa pi hi hoi koi hitam, huipi leh twikinong jeng jong apho leh athun anung jenge,” atiuve.
Jesun Gerasa a thilhavop aboldam
(Mt 8:28-34; Mk 5:1-20)

26 Jesu le seijuite chu Galilee to kigalsai Gerasa agamkol’a akitol lut tauve,
27 Konga ahung kumlhah lhah-in khopia hungkon pasal khat’in akimupin, ama chu phat sotpi thilhavop ahitan, pon pona sil lou, in’a cheng jong hilou lhan lah jenga cheng ahitai.
28 Amahin Jesu amudoh phat’in oging tah-in ahinsamin, “Pathen chungnungpen Chapa Jesu, itile nati ham? Nahenga katao ahi, neibol gim hih-in!” ati.
29 Ajeh chu Jesun lhagaoboh hi mipaa kona hung potdoh dia asol ahi. Tamtah vei lhagaoboh hin mipa chu amatjia, bul atuh-uva thih khaova ahen vangun, bul atumkeh-in akihenna abot tanjin, lhagaoboh chun gam thip laiya anolutji tai.
30 Jesun, “Namin ipi ham?” ati leh, asunga thilha tampi lut ahijeh-in, “Janel kahi,” tin adonbut’e.
31 Hichun noimigama asol louna diuvin Jesu henga atao tauve.
32 Vohcha tampi hon khat lhang chunga chu lha ahiuvin, vohcha ho sunga chu alutsahna diuvin thilha ho chu Jesu henga ataovu leh, anoppeh tai.
33 Thilha ho chu mipaa koin ahung potdoh-un, vohchate sunga alut’u leh, vohchate chu songkol’a alhai lhauvin twikhanglena alha lut’un athigamtauve.
34 Vohcha ching hon thilsoh hi amuphat’un ajam’uvin khopi sung le loujao dunga thu alhutsoh tauve.
35 Mipi athilsoh vedia Jesu henga ahungu leh, asunga kona thilha potdohna mipa chun pon kisil’a lung lima Jesu kengbul’a tou amu’vin, atijatauve.
36 Thilha voppa kidamsah amittah a muhon aseipehui.
37 Akimvel Gerasa gamkol’a cheng jouse atija behseh jengun Jesu chu akom’uva kona potdoh din angeh-uvin ahi. Hijeh chun Jesu konga alut’in akile kittai.
38 Thilhaho potdohnapa chun Jesu koma aum jingna dia athumleh, aman asol’in ajah a,
39 “Na-in lama kile kit’in, Pathenin nabolpeh thil chu gaseijon,” ati. Hijeh chun ama achen, Jesun abolpeh thil chu khopi sung thongsoh-in agaphongjal tai.

Jairus chanu le Jesu ponsil thamkha numeinu
(Mt 9:18-26; Mk 5:21-43)

40 Jesu hung kile kit chu mipin ana ngah jingun alamtouve.
41 Hichun ven, Houthua kikhopna in vaipo Jairus kitipa chu ahungin, Jesu kengbul’a aboh khup’in a-in’a hungpeh din a-ngeh tai.
42 Ajeh chu achanu khatseh, kum som le ni lhing bep chu alaichat chat’in ahi. Jesu achephat’in mipin aneh chinto jengui.
43 Numei khat hi kum som le ni athia long, anei chasuna louthem ho akijensah vanga koimachan ajen dam joulou ahitai.
44 Hichenu hi Jesu nung lama ahungin apon mongkai atham leh athi lon atang hel’e.
45 Hichun Jesun, “Koiham ei tham’ah?” atileh; Koimachan kahi atipon, Peterin, “Pipu, mipin toma neh chinto jinga,” ati.
46 Ahivangin Jesun, “Mi khat’in eitham monge, ajeh chu keiya kona thilbol theina thahat apotdoh kahei,” atichang mel’e.
47 Numeinun aki-imthei louhel ding ahet phat’in kihot pum pumin ahungin Jesu angsung laitah a Jesu athamkhahna jeh ahil chenin, chule apettah a damhel thu aphongdoh tai.
48 Hichun Jesun ajaha a, “Chanu, natahsanin nadamsah ahitai, lung mongin chetan,” ati.
49 Jesun thu asei nalaiyin Houthua kikhopna in vaipopa in’ a hungkon mi khat’in, “Nachanu athitai, Houhil chu sulung gim ta hih-in,” ati.
50 Asei hi Jesun ajan, “Olmo hih-in, tahsan poutan, chutile kihinsah tei nante,” atipeh-e.
51 Jesu vaipopa in alhunin Peter le John chule Jacob, chapangnu nu le pa tilou midangin ajui lut ding anompoi.
52 Mipin chapangnu akauvin, adip abeng beng jenguvin ahi. Jesun, “Kap hih-un, athi ahipoi, a-ihmu ahibouve,” ati.
53 Ahinla athi ahetjeh-un amoh nuisat tauve.
54 Jesun akhut’in abanin, “Boinu, thouvin,” tin akoutai.
55 Hichun alhagao ahung kile kit’in ahileh chapangnu athoudoh pai jenge. Chuin Jesun neh ding apeh diuvin aseiye.
56 Anu le pan kidang asa behseh jeng lhonin, ahivangin athilsoh chu koimacha jah a aseipoh louna diuvin Jesun akham chah kheh-e.

Luke Bung 9

Som le ni kisol na

1 Jesun som le ni chu akoukhomin thilhaho nodohna ding thu nei na le hivei chom chom boldam na thei thahat apei;
2 chuin amaho chu Pathen lenggam phongjal ding le adammo boldam din asoltai.
3 Ajah-uvah, “Lampi dunga din thil imacha, tenggol hihen, sakhao hileh, changlhah le sum jeng jong kiken dauvin, sangkhol jong tho ni ah dauvin.
4 Itobang in hojongle nalut nauva chun pansauvin,
5 Nalhunsah lou ho vang chu khosung nadalhah tengule gihsal hetsah nan nakengphanguva leivui thing lha dentauvin,’ ati.
6 Amaho akipatdoh-un akho khoa Kipana Thupha ahil lhang leuvin muntina ana aboldam’uve.

Herod lungjin

7 Gambih vaipo Herod chun nakitong thil kibol chengse ajan, mi kimkhat’in John athia kona thoudoh kit a aseijeh-un Herod alung gimin,
8 abangman Elijah hung kilah kit’in aseiyun, kon khat’in jong gol luilai Themgao ho khat pen thoudoh kit bangin aseiyui.
9 Herod chun, “John la alukatan tan, athudol kajah pahi koiba hintam?” tin aseiyin mujong amunom lheh-e.

Jesun mi sang nga avahva

10 Solchah ho ahung kile kit-un athilbol anatoh jouseu Jesu aseipeh tauve. Jesun amaho chu Bethsaida khopia atumin apuidoh tai.
11 Ahinla mipin amudoh-uvin anung ajuitauve. Jesun amaho jong hi alamdot cheh-in ajah-uvah Pathen lenggam thudol aseipeh-in, dam ding ngaicha chan aboldamin ahi.
12 Nisa lhumtel tul phat’in som le ni chu ahungun ajah a, “Eiho gamthip laiya um ihiuvin, akimvel kho dung le loujao dunga acheuva ge-na ding le neh le chah akiholna diuvin mipi hi solmang tan,” atiuve.
13 Jesun ajah-uvah, “Nanag hon nah ding peuvin,” atileh; amahon, “Keihon changlhah pheng nga le nga ni val kinei louva, kacheuva mi hijatpi neh khop ding kaga choh diu ham?” atiuve.
14 Miho chu sang nga jen ahiuve. Jesun aseijuite jah a, “Miho hi som nga chengin aloi aloiyin tousahun,” atileh;
15 amahon hiti chun abonchan atousah tauve.
16 Chuin changlhah pheng nga le nga ni chu alan, van lam aven, phatthei aboh jouvin ahehbal bal’in mi ang sunga luipeh din seijuite apetai.
17 Mihon avaset geiyin aneuvin, aneh moh alokhomu leh paipeh som le ni adimset’e.

Peterin Jesu thudol aphondoh

18 Phat khat hi Jesu atuma ataopeh’in seijuite ahung kikhomun, Aman ajah-uva, “Mipin Kei hi koi ahi, eitiuvem?” tin adonge.
19 Amohon, “John baptist,’ tiloi aumin, abangin, ‘Elijah ahi,’ atin, konkhatsen vang, ‘Gollui laiya Themgao hokhatpen thoudoh kit hiya chu,’ tin aseiyui,” atiuve.
20 Amaho jah a, “Nang hon koiba ahi neitiuvem?” atileh; Peterin, “Pathen hungkon Messiah nahi,” ati.

Jesun athi le athodoh ding asei Masah

21 Hiche thu hi koima jah a asei louna diuva Jesun seijuite ahil chah-in
22 “Mihem Chapan genthei tintang athoh a, upate le Thempu ho chule Danthu themhon apaidohuva atha diu, hijongleh nithum ni leh kaithouva um ding ahi,” tin aseiye.
23 Jesun miho jah a, “Keima eijui nom chu ama ka-ngaitoma niseh a thingpel kiput’a eijui ding ahi.
24 Ijeh-inem itile ama kihuhhing nom chun athilto ding, Keima jal’a thilto chun kihinsona aneiding ahi.
25 Ajeh chu min vannoi leiset pumpi neihen lang ahinkho kisuh mang leh ipi phatchompin tem?
26 Mi khattouvin Kei le kathu ajachatpi leh Mihem Chapan jong Ama loupina le Pa le Vantil Thengte loupina ahung teng ama chu ajumso sing ahi.
27 Dihtah akaseipeh nahiuve, hikoma ding ho lah a miphabep hi Pathen lenggam amu kahseuva thina tep kha lou ding aum’uve,” ati.

Jesu vou kikhel

28 Thu hicheng aseijou niget nungin Jesun Peter le John chule Jacob apuiyin tao din molchunga akaltouve.
29 Ataopet chun amaiso vou akikhel’in aponsil abanlot lot’in alhe lah lah jenge.
30 Ven, mi ni toh akihou linm’in, amani hi Mose le Elijah ahin,
31 loupi tah-in ahung kilah lhonin, Jerusalema Jesu athia Pathen thilgon asuh bulhit ding thu akihouvui.
32 Peter le aloite ni chu a-ihmut soh ngui ngui jengun; ahung lipdoh phat’un Jesu loupina le akoma ding te ni chu amu’ve.
33 Mose le Elijah chun Jesu adalhah pet lhonin Peterin Jesu jah a, “Pipu. hikoma i-umu hi anom’e, Nanag ding khat, Mose ding khat chule ELijah ding khat lhambuh thumsong ung kate,” tin ipi aseilam helouvin aseiye.
34 Aman hiche aseipet chun meilhang khat’in ahinle khu’vin, meilhang lah a akitol lut jengu chun akichauve.
35 Meilhang lah a konin ogin khat hin, “Hiche hi kadei lhen Ka-chapa ahi, asei ngaiyun,” ati.
36 Ogin kichai phat’in Jesu chu achangseh ahitai. Seijuiten athilmi hi hichepet hin koimacha seipeh louvin a-im chah kheh-uve.

Jesun lhagaoboh vop chapang khat aboldam

37 Ajing nikhoa molchunga kona ahung kumsuh leh mi tamtah-in analamdot’uve.
38 Mipi lah a konin mi khat ahung pengjah-in, “Houhil, lungset’in kachapa neivetpeh-in, chapa chang khatseh a kanei ahin,
39 lhagao khat’in amatji teng phot lot louvin apengjah jin, aveilhuh teng chilphon alhan, lhalel lel’in alha jin, ama la abeipai ding ahijitai.
40 Naseijuiten eideldoh peh diuva ka-ngeh vangin anodoh joupouve,” ati.
41 Jesun adonbut’in, “Vo, tahsanan bei khang lamvai mite!Itih chan ka-umpia kakho ngai ding nahiuvem? Nachapa chu hikom’ah ahinpuiyin,” ati.
42 Ahungpet tah-in thilhan aheh lhun avei ngoi jenge. Hichun Jesun lhagaoboh chu haphon aphoh-in, chapangpa chu aboldamin, apa koma anungsol pehtai.
43 Mihon Pathen Thahat chungnung chu kidang asalheh jenguve.

Jesun athi ding asei masah kit

Mihon athilbol kidang asah laitahun Jesun aseijuite jah a,
44 “Hicheng thu ho hi nang ho dia kisei ahi, lung nachangin ngaiyun; Mihem chapa hi mihemte khut’a pehdoh aum ding ahi,” ati.
45 Seijuiten asei chu ahechenpouve, ipi kiseina ahi ahetdoh louna diuva kiselpeh ahin; athusei doh chet ding la akichauvin ahi.

Alenpan koiham
Mt 18:1-5, Mk 9: 33-37)

46 Seijuite lah a alenpen ding thua kinelna asohtai.
47 Jesun alung gil’uva akikal nau chu ahen, chapang khat akaiyin akoma atousah-e.
48 Chuin seijuite jah a, “Koi hijngle Keima min’a hiche chapang kisan chan chun Keima eisan ahin, Keima eisanga chun Eihinsolpa asan ah; ajeh chu nalha-uva aneopen chu alenpana pang ding ahi,” ati.

Nadou lou chu nang lama pang ahi
(Mk 9:38-40)
49 Johnin adonbut’in, “Pipu, mikhat namin a thilha nodoh kamu’vin, keoho toh lhona nang najui loujeh-in kakhamtauve,” ati.
50 Jesun ajah a, “Kham dauvin, nadou lou pouvu chu nang ho lama pan gahi,” ati.

Samaria miho kho khat’in Jesu asandau

51 Jesu lah touva aumna ding phat anai jep jep phat’in Jerusalema che din akiheitai.
52 Jesun solle ho asol masan, aamho chu acheuvin alhunna ding gonsa koipeh din Samaria miho kho khat’a alut’uve.
53 Samaria mihon Jesu chu Jerusalema jon a chego ahijeh-in asang tapouve.
54 Aseijuite ni Jacob le Johnin asandau hi amudoh lhon phat’in, “Pakai, vana kona meikou kakou lhah lhona kakahvamsah diu nadeiyem?” ati lhone.
55 Jesu akiheiyin amani chu haphon aphoh-e.
56 Chuin khodanga achetauve.

Jesu seijui dia kilomho
(Mt 8:19-22)

57 Alamjot laiyun pasal khat’in Jesu jah a, “Nache na chan a jui ing kate,” ati.
58 Jesun ajah a, “Gam-ui hon koaneiyun, chunga leng vachaten jong bu aneiyui, Mihem Chapan vang alu ngapna ding mun jeng jong aneipoi,” ati.
59 Michom khat jah a jong, “Neijuiyin,” ati. Ahinla aman, “Pakai, amasan cheng ting kapa gavui ta dinge,” ati.
60 Jesun ajah a, “Mithi chu mithi kivui din dalhan lang, chen Pathen leng gam thu seiphongjon,” ati.
61 Midang khat’in jong, “Kenvang najui jeng inge Pakai, ahin amasan ina umho ga-lha tadinge,” ati.
62 Jesun ajah a, “Loukai dia langkon tuhsa haidia kihei kit chu Pathen lenggam din aphachompoi,” ati.

Luke Bung 10

Som sagi le ni kisol lo na

1 Hiche nung hin Pakaiyin misom sagi le ni alhengdoh-in, chedia agotna khopi jouse le muntin’a ni nin asol masai.
2 Amisol ho jah a,”Chang-at ding atam lheh jengin, natong’ah alhome; chang-at ding mi ahinsol na din chang-at na Pakai henga taovun.
3 Cheuvin, ven, ngeihon lah a kelngoinoute kilhalut banga kasol nahiuve.
4 Sumbom hihen sakhao hileh kengchot ho geiyin kiken dauvin, lampi dunga jong koima salam bol dauvin.
5 Nalut nau in tin’a amasan, “Hiche in’a hin lung mon leng hen,” tiuvin.
6 Hikoma chu chamna dei mi aum leh ama chunga chu nalungmonu chun tin, aumlou vangleh nahenguva hung kile kit ding ahi.
7 Hiche in’a chun pansauvin, amahon napeh peh-u chu neuvin don’un ajeh chu natong’an atohman asan lom ahi. In khat’a konin inchoma kichon dauvin.
8 Khopi sung nalut’uva mihon nalamdot’u jong leh, na-anga aluiyu chu ne jengun;
9 chukoma adamlou ho boldamun, ajah-uvah, “Pathen lenggam chun nakomu ahinphatai,’ tin seiph-un.
10 Khopi sung nalut’uva mihon nalamdot lou vangu leh akhosung lamlen dunga potdoh-un lang,
11’Imacha kitimatna inei louvu ahitai, nakhopi sunguva leivui kakengphanguva beh geiya kathin lhah khum nahiuve; hijongleh Pathen lenggamin hilai ahinphatai, ti nahet diu ahi,’ tin seipeh-uvin.
12 Najah-uva kasei ahi, thupitan nikhoa chuche khopi thoh sanga Sodom khopi thoh oljo ding ahi.

Lunghei lou khopi adajeu
(Mt 11:20-24)

13 “Ohe Chorazin khopi nada ahin, ohe Bethsaida khopi nada ah! Ajeh chu nakhosunga na kitong thil kibol thahatna ho hi Tyre le Sidon a kibol hileh sot’a lungaheiyuva, vutvam kinu’va khaodip pon kisil’a tou diu ahitai.
14 Thupi tan ni leh nathoh diu sanga Tyre le Sidon thoh oljo ding ahi.
15 Capernaum nangma van geiya choisanga um ding nahim? Noimigama kikai lhading nahiubouve.
16 Koi hileh naseiyu ngaiya chun Kei seijong angai ahin, nang ho pamsea chun Keijong eipamse ahi; Keima eipamsea chun Eihinsolpa geiya apai ahitai,” ati.

Som sagi le ni hung kile kit

17 Som sagi le ni ho chu kipah thanom tah-in ahung kile kit’uvin, “Pakai, Nangma min jal’in thilha ho geiyin kathu’uva anung jenguve,” atiuve.
18 Jesun ajah-uvah, “Vana kona Satam kolpha banga hung lhasuh kamui.
19 Ven, gul ho le aipi ho chotphana thei, chule melmapa chunga thahat kapeh nahiuvin, imachan nasuhset lou diu ahi.
20 Chule lhagao ho nathu’va anunjeh seh chun kipah hih-un, vana naminu akisutjeh-in joh kipahuvin,” ati.

Jesu kipa
(Mk 11:25-27;13:16-17)

21 Hichepet chun Lhagao Thengin Jesu kipana adimin hijeh chun aman, “Hepa, van le lei Pkai; thil hicheng hi michingte le lungthim themte na-impeh a, milham ho hengjoh a naphondoh jeh-in kapah chai. Henge, Hepa hitia bol hi nadeilam ahiye.
22 “Thil ijakai ka-pan eipehdoh ahitai; Pa tilouvin Chapa aheon, Chapa le Chapan aphodoh peh mi tilou koiman Pa ahepoi,” ati.
23 jesun seijuite lama akiheiyin atumbeh-in, “Nang ho thilmu hi amu jouse vangpha ahiuve.
24 Kaseipeh nahiuve, nathilmun hi Themgao tamtah le leng tamtah-in mu atup lheh vangun amupha tapouvin, jehding adei lheh vangun najah tobangu ajapha tapouve,” ati.

Samaria mi miphapa

25 Jesu patepna din Danthu themho khat adingdoh-in, “Houhil, tonsot kmelou hinna kanei theina dia ipi kabol ding ham?” atileh;
26 Jesun ajah a, “Danthua ipi kisun nasimdoh-em?” ati.
27 Aman adonbut’in, “Nangman nalungthim pumpi le nahinkho pumpi, nathahat pumpi le nalung gil pumpia Pakai na-Pathen na ngailut’a chle nangma nakingailut ding ahi akiti,” ati.
28 Jesun ajah a, “Nadonbut dih lheh-e, hiti chun bol le chun nahin ding ahi,” ati.
29 Ama them akichan nomjehin Jesu jah a, “Kaheng kakom chu koipen ham?” tin adonge.
30 Adonbutnan Jesun,’Pasal khat Jerusalema konin Jericho lama avah lut’in, amahon aponsil ahoh lhauvin, avouvin athibang bangin adalha tauve.
31 Hichepet tah hin Thempu khat’in hiche lampi chu ahokhan, mipa chu amudoh phat’in lamchom langa apeldoh tai.
32 Hitobang hin Levi mi khat man hikom chu ahinjot pan, mipa chu amudoh phat’in lamchom lang khatma apeldoh kittai.
33 Ahin Samaria mi kholjin vah le khat’in ahintoh khan, amudoh phat’in alainatpi lheh jenge.
34 Mipa chu anailut’n amaha chengse atompeh-in, thaotwi lw lengpitwi anun, atouna gancha chunga adomtoh-in, jinlhunin’a ahinpo lut’in ajentai.
35 Ajing nikhon denarii ni alan, jinlhun inngahpa apen, ‘Hichepa hi analimbol’in, sum nasuh mangbe leh kahung kit teng sa-nange,’ ati.
36 Hicheng mi thum lah a hi gucha michomho lah a vah lutpa heng le kom chu koipen hinte natim?” atileh,
37 aman, “Ama hepi tah a bolpa chu,” ati. Jesun ajah a, “Nang jong chen lang chutin gabol tan,” ati.

Jesun Martha le Mary agavet

38 Jesu le aseijuite akholjin nauva kho khat’a alut tauvin, Martha kiti numei khat’in a-in’ah alhunsah-e.
39 Ama hin sopi numei Mary kiti khat aneiyin, ama chu Pakai kengbul’a atouvin aseichan angai ngai jenge.
40 Martha vang atoh idng tamjeh-in thu ngai manin aumpon, ahungin, “Pakai, kasopiun kachangseh a na eitohsah hi khoh nasah lou ngap ham? eikithopi din seipeh tang-em,” ati.
41 Pakaiyin Martha adonbut’in, “Martha, Martha, thil tampi ngaitoa lung gim nahi.
42 Khohsah ding thil khatseh bou ahin, Maryn aphalai akilhentan, kilahpeh kit louhel ding ahitai,” ati.

Luke Bung 11

Jesun taoje ahil
(Mt 6:9-15; 7:7-11)

1 Munkhat’a Jesu ataovin, atao jouvin aseijuite khat’in ajah a, “Pakai, JOhn aseijuite taoje aahil bangin taoje neihil’un,” ati.
2 Jesun ajah-uvah, “Natao teng hitin seiyun: ‘Pa namin theng kijabol jing hen, Nalenggam hung lhung hen;
3 Niseh a kaneh diu anneh neipeuvin,
4 Eiba jouseu ka-ngaidam bangun Kachonsetnau jouse ngaidamin; Chonset lo na thei petepnaa neilhut hih-un,’ tiuvin,” ati.
5 Jesun ajah-uva, “Nang ho khatpenin jol neihan, ama chu jan khangkimin ahenga chehen lang ajah a, ‘Kajol, bat din changlhah pheng thum neipen.
6 Kajol kholjin khat ahun lhungin aneh dia a-ang a luipeh ding ima kaneipoi, ti hen;
7 aman insunga konin, ‘Neisu gim hih-in kot akikhah tan, kachate jong kei jong jalkhuna aklumtauve, hung thouva nang ima pethei kahipoi,’ ati.
8 Kaseipeh nahiuve, ajol ahijeh chun thova ima peh ding go hih jeng jong leh, khatpan jummo tah a athum tun tun jeh chun thouvintin angaichat jat chu apeh tei ding ahi.
9 “Kaseipeh nahiuve, thumun namu diu ahi, kiuvin kihonpeh ding ahiuve;
10 ijeh-inem itile athum chan achangin, ahol’an amun, akiuva akihonpehji.
11 Nalah-uva mipa koipen nahiuvem achapan nga athum leh akhel’a gul pea;
12 ahtui athum teng aipi peding’ah?
13 Migiloutah nang hon bon thilpha pehji nahet’u leh ichan geiya phajoa vana Pa Pathenin ahenga thumte Lhagao Theng apeh ding hitam!” ati.

Jesu chule Beelzebul
(Mt 12:22-30; Mk 3:19b-27)

14 Jesun thilhavop paomo khat anodoh leh, thilha apotdoh phat’in paomopa chu apao theiyin, mipin kidang asalheh jengui.
15 Mi phabep’in vang, “Thilha ho nodohna dinga thilha lengpa Beelzebul’in tha apeh hibouva hi,” atiuve.
16 Konkhat man apatepnan vana kona melchihna avetsah diuvin a-ngeh-ui.
17 Alung gel’u ahen Jesun ajah-uvah, “Lenggam kikhentel’a ama le ama kidouva chu amangthah jin, insung kkhen tel jong alhujin ahi.
18 Satan jong kikhentel hen kidouto leh alenggam iti dinjou ding ham? Beelzebul kamanchah a thilha ho nodoh a neisei jeh-uva kasei ahi.
19 Ken thilha ho nodohna dia Beelzebul kamanchah leh nachateuvin koiba amanchah hiu ham? Hijeh a chu nachatauvin thammo nachan diu ahi.
20 Thilha ho nodohna dinga Pathen khutjung kaman ahivangleh Pathen lenggam nalah-uva hung lhung ahitai.
21 Mihat’in manchah akipat’a a-in aki-nga laisen anei chengse ahoiye;
22 mihatjon abulna ajotho teng vangleh akisonna galvon alahpeh jin, athil ho chompeh-in ahomjaljitai.
23 Koi hile Keilama pang lou chu eidouvah ahin, eikhop khompi lou chu athecheh ahiye.

Lhagaoboh hung kile kit
(Mt 12:43-45)

24 “Lhagaoboh chu mihem sunga kona apotdoh tengleh twibeina muntin’a avah len, choldo mun aholjie. Mun amu lou teng leh, “Kahung potdohna ka-in’a chun kile kit tange,’ atiji.
25 Ahung leh akitheh ngima akigontoh amui.
26 Chuin achen ama sanga gilou cheh lhagao sagi agapuiyin, mipa sunga chun alut’un achengtauve; chutah chun mipa um chan hi amasaa sangin akhoh cheh jon ahi,” ati.

Nopna tahbeh

27 Jesun hiche hi asei nalaiyin, mipi lah a pangin numei khat’in ahinsamin, “Navop’a noitwiya navahdoh numei chu anun nom’e,” ati.
28 Jesun vang, “Pathen Thupha ngaiya nit ho chu anun nomjoi,” ati.

Khang gilou miten melchihna ahol
(Mt 128-42;Mk 8:12)

29 Mipi ahung kikhopsoh phat’un Jesun, “Hiche khang hi khang gilou ahi, melchihna ahol vangun Jonah melchihna tilou adang kipe louhel ding ahi.
30 Jonah Nineveh kho mite dia melchihna ahibanga, Mihem Chapa hiche khanga dia melchihna pang ding ahi.
31 Lhang gam lengnu chu hiche khang mite toh hung thoudoh khoma thupi tannaa amaho themmo achansah ding ahi; ijeh-inem itile ama chu leiset kolmonga konin Solomon chih thu ngai din ahungin, ahinla ven, Solomon sanga loupijo khat hikoma aume.
32 Nineveh kho mite toh chu hiche khang mite toh hung thoudoh khoma thupi tannaa hiche khang mite hi themmo achansah diu ahi; ajeh chu amahn Jonah thusei phongin lung aheiyuve; ahinla ven, Jonah sanga loupijo khat hikoma aume.

Tahsa dinga meivah
(Mt 5:15;6:22-23)

33 “Koiman mei avah-in ningchong muthim’ah akoi ngaipon, lo jong akhu khum ngaipoi; ahung lut chan muthei din meivah khom chunga atungji bouve.
34 Namit hi natahsa meivah ahin, namit achim laisen natahsa pumpi avah-in, achim lou teng natipumpi athimjitai.
35 Nasunga um vah chu thim am avephan.
36 Athimkom beihel’a natahsa pumpi avah leh meivah vah tah-in nasalvah banga apumpia vah jeng ding ahi.

Jesun Pharisee ho le Danthu them ho ahousal
(Mt 23:1-36;Mk 12:38-40;Lk 20:45-47)

37″Jesun thu asei chai phat’in Pharisee khat hin an nehpi din akouve; ama achen ankong aumtai.
38 Ahin an neh kona akisil lou chu Phariseepan adatmo lheh-e.
39 Pakayin ajah a, “Tun ahile Pharisee nang hon khon le lheng apolam nasil ngim’un, nasungu la hunamalah le gitlou dimset ahi.
40 Lungthimbei ho, apolam sempan asung lam jong asem hilou ham?
41 hijeh chun asunga thil ho chu vaichate peuvin, chuteng ven, nang ho dia thil jouse theng ding ahi.
42 “Ohe, tun vang Pharisee nadau ahi! Nang hon pudina le louna kha geiyin, anche louhing jousea soma khat napeuvin, thu adih-in natanpouvin, Pathen ngailut ding nadonpouve. Adang ho nabol’u toh kitoh a hiche te ni jong nabol diu ahi.
43 “Ohe Pharisee ho ada nahiuve! Nang hon Houthua kikhop na indunga touna pha pha nalhengun, kailhanga min nasalam diu nadeiyui.
44 Ohe ada nahoiuve! Heshen louva mihon achotpeh peh buikhuh ho tobang nahitauve,” ati.
45 “Danthu them ho khat’in adonbut’in, “Houhil, hiche naseiho hin keiho nei-engkal’uve,” ati.
46 Jesun, “Ohe, Danthu them nang ho jong ada nahiuve; Poh jouhoi hilou pohgih hahsa mi nagonpeh-un, nang hon nakhut muh jenga jong khoiloh din nagopouve.
47 Ohe nadau ahi! Napu napateuvin Themgao ho athat’un, nang hon alhanu nasempeh-ui.
48 Napu napateu thilbol chengse chu phatsah a ahettohsah nahiuvin, amaho athat’a pang’a nang hon alhan nasempeh-u ahi.
49 Hijeh chun Pathen chihnan aseiyin, ‘Keinan nalha-uva Themgao ho le solle ho kasol ding, hiche ho chu abang bang athauva, adang abol hesoh diu ahi,’ ati.
50 Hichu vannoi kisemtil’a pat Themgao ho thisan kiso jouse hiche khang mite chunga hi,
51 Abel thisana pat, maicham le muntheng kah a Zechariah thisan kiso geiya phu lahna ding ahi. Henge, kaseipeh nahiuve, hiche khanga hi aphu kila ding ahi.
52 “Ohe Danthu themho nadau ahi! Hetna kot-heh nala mangun, nang ho geiyin nalut pouvin, lutkigo ho jong nalutsah pouve,” ati.
53 Jesu chukoma kona apotdoh phat’in Danthu them ho le Pharisee ho alung himo lheh jengun thu tampi adong lhoiyun,
54 athuseiya mat din achang lhigeh jenguvin ahi.

Luke Bung 12

Phat lhem louna dia Jesun mi agihsal
(Mt 10:26-27)

1 Mi asang sang akikhop’a khat’in khat chunga lam ajot leu phat’un amasan Jesun aseijuite jah a aseiyin, “Pharisee ho phat lhemna chol lah a kiging phauvin.
2 Hodoh lou dia kikhu khum aumpon, hetdoh lou dia kiselguh jong aumpoi;
3 ajeh chu muthima naseiyu khovah akija ding, indan sung nunga mi nabenga naseiyu chu intingvuma kisap tho ding ahi.
4 “Kagol kapai nang ho jah a kasei ahi, tahsa thah theiya abana ima bol thei louho kicha hih hel’un.
5 Gin ding pentah vetsah unge: mithat’a da muna lelutna tah neiya Pathen bou gingun. Henge, kaseipeh nahiuve, Amabou ginguvin!
6 “Vasah nga khu Paisa ni man a kijohji lou ham? Ahin alah-uva khat jeng cha jong Pathen ang’ah suhmil’in aumpoi.
7 Nalu chunguva nasamjang jouseu geiya simtohsa kikoi ahi; kicha hih-un, vasah tampi sanga jong nang ho manlujo nahiuve.

Mihem maiya Christa phondoh
(Mt 10:32-33;12:32;10:19-20)

8 “Kaseipeh nahiuve, koi hi le mihem angsunga Keima eiphongdoh chan chu Mihem Chapan jong Pathen Vantilte angsunga aphondoh sing ahi.
9 Koi hi le mihem angsunga eiseileppa chu Pathen Vantilte angsunga seilep’a um ding ahi.
10 Koi hi le Mihem Chapa douna thusei chu ngaidam chang ding, Lhagao Theng taitom vang chu ngaidam chang louhel ding ahi.
11 Mihon Houthua kikhopna in dung le vaibol ho angsung, chule thunei ho angsunga nakailut tengu leh iti nakihon’a ipi nasei diu lungkham hih-un,
12 ipipen nasei diu apettah le Lhagao Thengin nahil nauvinte,” ati.

Hao-ngolpa thulem

13 Mipi lah a konin mi khat’in Jesu jah a, “Houhil, kasopipan gou eikihoppi din seipeh-in,” ati.
14 Jesun ajah a, “Jol, nangni chunga thutan ding le thil hoppeh dia kon eitun beh em?” ati.
15 Jesun ajah-uvah, “Chingtheiyun neipap kiloset’a konin kikangseuvin, ajeh chu nei le gou bulhin jeh a mihem hing’ah ahidehpoi,” ati.
16 Aman thulem khat aseiyin, “Mihao khat louva neh le chah apung lheh-in,
17 hijeh chun aman, “Ipi kabol ding ham? Kalhosoh kholna idng mun a-ong tapoi,’ atin,
18 Hitin bol inge, kachangsal ho phe lhang ting asanga lencheh sange; hikoma kasuhlou chang jouse leh thil dang jouse koitange;
19 chutengleh, “Kahinkho, kum tamtah nahding thil lhing set’in nakholsoh tai, choldon, nen, donin nomsa tah-in um tan,” tinge,’ ati.
20 Ahinla Pathenin ajah a, Mi-ngol, tujan teng nahinkho kisubei ding ahitai, hichea kholsa thil jouse hi koi chang ding hitam?’ ati.
21 “Hitobang mi hi ama chang dia gou khol’a Pathen lama hao lou ahi,” ati.

Lungkham lungjin
(Mt 6:25-34)

22 Jesun seijuite jah a, “Hichejeh a chu ipi naneh-uva chule ipinasil’uva nachen diu natahsa din lungkham hih-un kati ahi.
23 Hinkho hi neh le chah sanga thupijo ahin, tahsa jong nihchen ponsil sanga thupijo ahi.
24 va-ahte khu gel’un; muchi la atupouvin, atjong a-at pouvin, akholna ding in hihen changsal hijongle aneipouve; ahinla Pathenin avah nauve. Nang ho vachate sanga thupijo nahiuve.
25 Nang ho koipen hin lungkham hat vanga ahinkho tong chan ajopbe theiyem?
26 Chutia aneopen bon nabol thei louvu leh, thil dang dia iti lungkham nahiuvem?
27 Lily pah ho khu iti khan ham ngaitouvin; natong jong ahipovin, thilkhuijong ahipouve; ahinla kaseipeh nahiuve, Solomon jeng jong athil loupi chengsea akijep vangin hiche ho khat sangin akijemhoi joupoi.
28 Pathenin hitobanga tunia loujaova keh jing teng meilhum sunga kileh lut tading hampa bon achuti jep hoi leh, vo tahsan lhom ho, nang ho ichan geiya nakhohsah-uva nihchen ponsil napeh diu hitam!
29 Hijeh a chu neh le don ding gel’a nalunggim louhel diu ahi.
30 Vannoi namtinin hichengse hi abol’u ahin, nang ho ding vang napauvin ahesoh nai.
31 Alenggam joh hol masauvin, chuteng hichengse jong nakipehbe nauvinte.

Vana gou kikhol
(Mt 6:19-21)

32 “Kicha hih-un hon lhom ho, nang ho na-Pauvin lenggam napeh nom’ui.
33 Nanei chengse joh-un lang vaichate to nan neiyun, guchan anailutna thei lou, nget’in jong asuhset thei louna vana kemlouva akikholna din sum bei theilou sumbom kisemun.
34 Ajeh chu nagou umnaa chu nalungthimu jong cheng jing ding ahi.

Kiging jing lhacha

35 “Nakong kigah-un nathaomei devah jingun.
36 KIchen golvahna ahung kilea kot akiu leh honpeh dia apu hung ding kho the ngaigeh miho tobang hiuvin.
37 Apupa ahung kit teng kiging jinga um ahung tokhah lhacha ho chu anun nom’ui. Tahbeh a kaseipeh nahiuve, apun kong kigah-in tin, amaho ankong phunga atousah a, amatah ajenleuva pang ding ahi.
38 Jan khangkimin hung hen, jing lam nida thumin hung jong leh, kiging jinga um atokhah ho chu nun nom ahiuve.
39 Inneipan gucha hung ding phat heleh a-in chu aphetvang sah louhel ding kichentah-in naheuve.
40 Naginchat loupet tah-uva Mihem Chapa hung ding jeh-in nang ho jong kigingsa demin umun,”ati.

Soh kitah le kitah lou
(Mt 24:45-51)

41 Peterin, “Pakai, hiche thulem hi keiho dia naseiha, mipi jah dia naseiham?” tin adonge.
42 Pakaiyin, “Tahsan um lemiching, apun aphat cha soh dang ho neh le chah hopehji dia anganse ding neiching michu koi hitem?
43 Apu inlama ahung teng anatoh pet atolhah soh chu anun nom’e.
44 Dihtah akaseipeh nahiuve, ama chu apun anei jouse chunga vaipoa apansah ding ahi.
45 Ama vang sohpa khat hin, ‘Kapu ahung gei lheh tai,’ tihen lang soh pasal ho le numei ho vopan hen, aneh nom nehen adon nom don kham leh,
46 hiche soh chun agel loupet tah le ahet loupet tah a apu hunga ama chu tumin aso ding, tahsanbei ho toh kibanga abolding ahi.
47 “Apu dei chengse hea, ahivanga adei banga gonpeh lou, toh jong tohpeh loupa chu tamtah vei kijep ding ahi;
48 amavang apu dei helouva kivoh lo na thei boldohpa chu kivo lhomjo ding ahi. Tamtah kipea chu tampi kibeng ding, thil tamtah a ki-nganse paa kona jong tampi ki-ngeh ding ahiye.

Jesu kikhentelna
(Mt 10:34-36)

49 “Leiset’a mei hal’a hung kahi, hung kadoh jeng ta leh kati nave!
50 Keiman baptize chan ding khat kaneiyin, akimolso kah a iti kaning noh hitam!!
51 Leiset’a chambol’a hunga neigal’um? ahipoi, kaseipeh nahiuve, kikhenna boljoh kahibouve.
52 Ajeh chu tua pat mi nga chenna insung chu kikhentel’a, mithumin ni adouva, nin thum adou ding;
53 pan achapa adouva, chapan pa adou ding; nun chanu adouva, chanun nu adou ding; tehpin amou nu adouva, mou nun tehpi adou ding ahi,” ati.

Phat umdol dan hetna
(Mt 16:2-3)

54 Jesun mipi jah a, “Lhumlama meilom kikhom namu tengu ‘Go ju ding ahi,’ natipai jengun, jujong ajuji nai.
55 Lhang lam hui nun namu tengu ‘Sa ding ahi,’ natiuvin, sajong asai.
56 Vo vanthamjol um ehan bon nasuhto theiyu leh iti tulai thil um chan nasuhto thei louvu ham?

Nahehpa toh kichamin
(Mt 5:25-26)

57 “Ibol’a thildih bolje kihil lou nahiuvem?
58 Nahehpa toh thutanpa heng najot lhon teng le lampia kihouchampi din gel’in, ajo le thutanpan vaibol henga napehdoh a, vaibol pan songkul’a nakhum ding ahi.
59 Kaseipeh nahi, nabet jat nasah thenghel masanga nahung potdoh thei louhel ding ahi,” ati.

Luke Bung 13

Lunghei lou mi mangthah ding

1 Hichepet tah chun mi phabep ahungun Pilate’n Galilee miho athaa athisanu doihouna thil toh achopel thu Jesu jah a aseiyui.
2 Jesun ajah-uva, “Hitobang thi gentheiya athijeh-uva chu Galilee midang ho sanga chonsejoa nagel’uvem?
3 Ahipoi, najah-uva kasei ahi, lung nahei louvu leh ama ho banga namanthah soh hel diu ahiye.
4 Ahiloule Siloam intingvum achima adel lih mi som le get ho chu Jerusalema cheng midang jouse sanga chonsejoa nagel’uvem?
5 Ahidehpoi, kaseipeh nahiuve, lung nahei louvu leh amaho banga chu namanthah cheh diu ahiye,” ati.

Theichang gabei thulem

6 jesun miho chu hiche thulem hi aseipeh-in, “Mi khat’in alengpi leiya theichang phung khat aneiyin, aga ahung hol leh amupoi.
7 Aman honbolpa jah a, ‘Kumthum alhing tan, hiche theichang phung hi kahungvet le aga khat cha kamudohpoi, hijeh chun phuh lhu tan, leiset pamaisah a ikhoh a kihoi hoi ding ham?’ atileh;
8 honbolpan adonbut’in, ‘Pakai, tukum jong hoitadin keiman akimvel leiying ting leiphatna lou sung nange;
9 chujou teng ahung ga nah leh aphan, aga lou vang leh phuh lhu tan nate,’ tin aseiye,” ati.

Jesun Choldo nia numei tingbong khat aboldam

10 Choldo nin Jesun Houthua kikhopna in khat’a thu ahil’e.
11 Hichun ven, hikoma hin kum som le get lhagao boh vop’a chatmo numei khat aumin, amanu hi ating bong ahin, achama ding jang theilou ahi.
12 Jesun amudoh phat’in akoulut’in ajah a, “Numei, nachamonaa kona kilhadoh nahitai,” atin;
13 chunga khut a-ngap leh, apettah chun ading jang paiyin, Pathen athangvah tai.
14 Jesun Choldo nia mi aboldamjeh-in Houthua kikhopna invaihompa alung himon, mipi jah a,”Natohna ding nigup jen uma chu, hungun hiche sung chun kiboldamah tau, Choldo nin vang hung dauvin,” ati.
15 Amapa donbut nan Pakaiyin aseiyin, “Mi pha lhem ho, nang hon Choldo nia nabongchal’u hihen na-sa nganu hijongleh nalhadoh jiuva, twi donsah dia twikhuh geiya nakaijiu hilou ham?
16 Achutileh hiche Abraham chilhah numei, Satanin kum som le get ahen hi akihennaa kona Choldo nia lhadoh ding hilouham?” ati.
17 Jesun hiche asei hin ama douho ajah chauvin, mipi vang thil loupi tah tah abol ho jeh-in akipah cheh-uve.

Ankammu thulem
(Mt 13:31-32; Mk 4:30-32)

18 jesun, “Pathen lenggam chu ipi toh katakah ding ham?
19 Min honsunga atheji ankam mutobang vang ahi; ankam mu chu ahung khangin, thingphung te aphan, abah lah a chunga leng vachate geiyin ageh theiye,” ati.

Chol thulem
(Mt 13:33)

20 Jesun, “Pathen lenggam chu ipitoh katekah ding ba ham?
21 Pathen lenggam chu suhlou chang changbonga kisem chahlhah danthum noiya numeiyin avuiya achansoh kahsea akoi chol tobang ahi,” atikit’e.

Kotjim
(Mt 7:13-14,21-23)

22 Jesun khopi chengse le khote chengse ajotsoh keiyin, Jerusalemlam ajot pumin thu ahilpeh-e.
23 Mi khat’in ajah a, “Pakai, mithemcha bou huhhinga um ding hitam?” tin aseiye. Aman ajah-uva,
24 “Kotjima lutding gel khoh-un, ajeh chu kaseipeh nahiuve, mi tampin lut agot diu, lut thei lou ding ahiuve.
25 Inneipu akipatdoh a kotpi akha tengleh polama pansan kot kiuvun,’Pakai, kot neihonun,’ ti jong leu chun, aman, ‘Nang hi kahepouve, hoiya hungkon nahiuvem?’ tia asei ding,
26 chutengle nang hon, ‘Keihon na-angsunga an kinea twi kidona, nangin kakholai lamlen dunguva thuhil lea,’ nati diu ahi.
27 hijongleh aman najah-uva, ‘Nang ho kahe khapoi, hoiya hungkon nahiuvem? Thil gilou bolte, neidalha loiyun,’ ati ding ahi.
28 Abraham, Isaac chule Jacob chule Themgao dang jouse Pathen lenggama aum namu diu, nang ho vang polama na-um’uva hikoma chu ka le hagel um ding ahi.
29 Niso lam, nilhum lam, sah lelhang kona miho hung Pathen lenggama ankong aum diu ahi.
30 Chule ven, anukhah abang masan tin, amasa kon khat nukhah ding ahiuve,” ati.

Jesun Jerusalem akacham
(Mt 23:37-39)

31 hichepet hin Pharisee mi phabep Jesu henga anungun, “Hikoma konin potdoh-in nakholjin ban kijintan, Herod-in tha din nagoi,” atiuve.
32 Jesun ajah-uva, “Cheuvin hiche se-al chu gaseipeh-un, “Keiman tuni le jinga thlha ho kanodoh a, Mi kadamsah ahin, nithum lhin ni vang leh kanatoh molso tange,’ atitin.
33 Kakholjin vang tuni le jing chule thaini geiya kachepeh ding ahinai, ajeh chu Jerusalem khopama Themgao mah thah ngailou ahi.
34 “Vo Jerusalem, Jerusalem, themgao ho thatgama, ahenga kisol ho songa seplih, ahpin anoute lhaving noiya ahiukhom banga ijat vei nachate hiukhom dia kagot hitam, ahinla nangin nadeipoi.
35 Ven, na-in’u chu thip del’a kidalhah peh ding nahiuve. Kaseipeh nahiuve, ‘Pakai min a hungpa chu anun nom’e,’ nati phat’u hung lhun kahsea neimu kit lou diu ahitai,” ati.

Luke Bung 14

Jesun thongpohvei mi khat aboldam

1 Choldo nin Jesu Pharisee vaihom khat in’a an ne din achen, amahon ave lhi jingui.
2 Hichun ven, amasanga thongpoh veiya na mi khat aume.
3 Hichea hin Jesun Danthu hilthem ho le Pharisee ho jah a, “Choldo nia mi damsah ngai ham hilou ham?” atileh;
4 amaho athip beh-uve. Aman mipa chu atuh-in aboldam phat’in asolmangtai.
5 Jesun amaho jah a, “Choldo nin nachapau ha nabongchal’u ham twikul sunga lhalut taleh nagakaidoh jeng lou diu ham?” atileh;
6 amahon adonbut thei tapouve.

Jindot them le lungnem

7 Mi kikouhon touna pha pha akilhenu amu phat’in Jesun ajahuva thulem khat aseiyin,
8 “Mi khattouvin moupui golvahnaa nahung kouvu leh, toumun phapena tou dauvin. Inneipa chun nang sanga thupijo midang akou mai thei ahi,
9 nani lhona koupa chu hunga najah a, ‘Hichepa ji toumun ot’in,’ ati ding; chuteng nalungdon man’a toumun nu nungpenaa natou lo ding ahi.
10 Hijeh chun nakikou teng toumun nukhahpena touvin, chutileh nakoupa hunga, ‘jol, toumun sangjep’a kikhangdoh-in’ ati ding ahi. Chutengle natoupi chengse maiya jabolna anchan ding ahi;
11 ijeh-inem itile mi ama le ama kichoisang chan kisu nem’a, ama le ama kisunem chan chu choisanga um dingahi,” ati.
12 Aman inneipa jah a jong “Jan an neh khom hihen golvah hileh nabol teng najol nagol le nasopi,, naphung nachang le naheng nakom mihao ho jeng koudan, koule chun amahon lekou kit’un tin nasahsoh diu ahi.
13 Neh khm nabol teng vaichate le tikim loute chule mitcho elbai ho bou kouvin,
14 chutile anun nom nahi, ajeh chu amahon nalepeh lou diu ahin, midih thodoh kit ni leh nakilepeh ding ahi,” ati.

Golvah loupi thulem
(Mt 22:1-10)

15 A-ankong umpi ho khat’in hiche hi ajah phat’in Jesu jah a, “Pathen lenggama an neidingpa chu anun nom’e,” ati.
16 Jesun ajah a, “Pasal khat’in golvah loupitah abol’in mi tamtah akouve.
17 Golvah kipat phat’in akikousa ho henga asohpa asol’in, ‘Hung tauvin thil ijakai akigongtoh tai,’ agatisah-e.
18 Ahinla amahon ahilelnau khat cheh aseiyun, amasapan, ‘Lou khat kachom kagavet lou akhoh-e, kiphatlam thu kasei jeh-in neilha ongin,’ atin;
19 khat’in jong, ‘Bongchal to-nga kachon, hicheng chu gapatep kagoi, kiphatlam thu kasei jeh-in nei lha ongin,’ atin;
20 khatpa man, ‘Tu le lea jinei kahin, hung thei ponge,’ ati.
21 “Sohpa ahungin apu jah a hichengse hi aseitai. Hichun inneipu alung hangin sohpa jah a, ‘potdoh loiyin, kholai lamlen dung l ekhopi veng ningkoi dunga vaicha genthei le tikimlou, mitcho eibai ho gakoutan,’ ati.
22 Sohpan, ‘Kapu, nasei bangin kabol’in, ahivangin mun a-ong nalaiye,’ ati.
23 Inneipun sappa jah a, ‘Potdoh-in lang lamlhong dung l edaipama um ho ka-in dimset din gakoutan.
24 Kaseipeh nahi, aki kouho khat chan jong kagolvah an atep khah louhel diu ahi,’ gatin tin aseiye,” ati.

Jesu seijui manlutje
(Mt 10:37-38)

25 Mi tamtah-in akilhonpi pet’un Jesu akiheiyin ajah-uvah
26 Kahenga hunga anu apa, ajinu le achate, asopi pasal ho le numei ho chule ama hinkho geiya itcha louva bol lou mi chu kaseijui hithei lou ding ahi.
27 Athingpel kiput’a eijui lou chu kaseijui hithei louhel ding ahi.
28 Nang hi koipen hi insang sah ding go’a aman lut ding jat suto masa lou na-um um? Asa nom chun ajo na kham sum anei aneilou avet toh masah ding ahi,
29 chutilouvin abul phutdoh hen joulel taleh amupha chanin tot nopna aneiyuva,
30 ‘Hichepan in sah din apanin ajoulel ta ong,’ ati diu ahi.
31 “Ahiloule midangto kidou ding sepai sangsom seh neiya lengpan amasat dia sepai sang som ni toh hungkonpa chu atinjou atinlel ding touva ageltoh masah lou ding ham?
32 Ajo lou ding leh palai asol’a leng chompa gamla tah a aumpet’a kichamna thu agaseisah ding ahi.
33 Hitobanga chu nang ho lah a jong anei agou chengse dalha lou chu kaseijui hithei louhel ding ahi.

Chi allou
(Mt 5:15;Mk 9:50)

34″Chi hi thilpha ahi, amavang a-al hi al ta hih leh iti ki-alsah kit ding ham?
35 Leining din jong leiset semphatna din jong pannabeiji tauve. A-ngaina ding nakhang neiyan ngai hen,” ati.

Luke Bung 15

Kelngoi mansah thulem
(Mt 18:12-14)

1 Kaidong ho le chonsehon athuhil ngai din Jesu ahin nailut’ui.
2 Pharisee ho le Danthu them ho aphun’un, “Hichepan michonse ho aloiyin aneh khompi,” atiuve.
3 Hichun Jesun ajah-uva thulem khat aseiyin:
4 “Nalah-uva khat’in kelngoi jakhat neihen lang khat mansah leh, aman som ko le ko chu gamthip’a adalhah a amangpa chu amu kahsea agahol lou ding ham?
5 Amudoh teng leng kouva apun kipah thanom tah a
6 in’a ahung teng jong leh agol apai, aheng akom akoukhomin ajah-uva, ‘Neikipa piuvin, kakelngoi mansah chu kamudoh tai,’ ati.
7 Kaseipeh nahiuve, hitobang hin lunghei ngai cha lou midih som ko le ko chunga sangin michonse khat lunghei jehin van’a kipa thanop um ding ahi,” ati.

Sum mansah thulem

8 “Numei khat’in dangka som neihen lang khat mansah leh, thoamei kidet’a, muntheh kipat’a amudoh kahsea in theh a ahol hol jeng lou ding ham?
9 Amudoh phat’in agol apai, aheng akom akoukhomin, ‘Kasum mansah chu kamudoh tai, neikipa piuvin,’ ati.
10 Kaseipeh nahiuve, hitobang hin michonse khat lunghei jeh-in Pathen Vantilte lah a kipa thanopna aume,” ati.

Chapa jammangpa thulem

11 Jesun “Pasal khat’in chapa ni aneiye.
12 Anaopan apa jah a, ‘Hepa, gou kachan ding chu neipetan, atin, hijeh chun apan agou chu achate ni ahopeh tai.
13 Ni phabep jouvin chapa neojopen anei jouse achomkhomin kholgam la tah a ache mangin, chukoma chun anei jouse aning anop’in agamange.
14 Anei jouse aneh jousoh hel tah-in hiche gamsunga chun kel nasatah ahung lhan, aman neh le chah angaicha pantai.
15 Hijeh chun achen agam miho khat agabel’in, mipa chun alouva vohchate vah din asoltai.
16 Hichea chun vohchate an neh chu neh jenga oiva ding ago lhehin, koiman la neh ding apepoi.
17 Chutah chun ahung khangdoh lap’in, ‘Kapa thalah sohten neh le chah khujat neng jeng junga neiyuva, kei hikoma kel thi dinga um kahim!
18 Kipatdoh ing ting kapa henga cheng ting ajah a, “Hepa, van houna le nangma dounan kachonsetai,
19 nachapa tidin jong kakilom tapoi, nasoh thalah ho khat bangin neisemtan,” gatinge,’ ati.
20 Akipatdoh-in apa heng jonin achetai. “Gamla tah ahung gei nalaiyin apan agalmun, alaina behseh jengin, alhaijel’in akoiyin achop chuh chuh tai.
21 Achapan ajah a,’Hepa, van douna le nangma dounan kachonsetai, nachapa tidin jong kakilom tapoi,’ atileh;
22 apan asohte jah a, ‘Von phapen tah galauvin vonpeh loiyun, khutjem bupeh-un, kengchot sepeh loiyuvin.
23 Bongnou thaotah chu gaman’un lang that loiyun, neu hitin kipa thanop bol’u hite,
24 ajeh chu hiche kachapa hi athisa hing kit’a amangsa kimudoh kit ahitai,’ ati. Hiti hin kipa thanop abol’uve.
25 “Ahin a chapa aupajo loukon pa chu ahung vailhunin inlam ahungnaijep jep leh tumging kitum leh mi lamgin ajan,
26 soh ho khat akouvin adonge.
27 Sohpan ajah a, ‘Nasopipa chu ahung lhungtai, hijeh a chu napan hing le dama amikit jeh a bongnou thaotah chu athapeh ahi,’ ati.
28 “Hichun apa ahung potdoh-in ajol jol jenge.
29 Aman apa adonbut’in, ‘Ven, kum hijat hin sohbangin na katohpeh-in, khatvei jeng cha jong nasei ngailouvin kaumpoi, ahinla kagol kapaite toh kakipa thanop khomna din kelnou khat jeng cha jong neithapeh khah poi.
30 Ahinla hiche nachapa, natiho toh nanei nagou chengse sumangpa, ahung phat’in bongnou thaopen nathapeh-e,’ ati.
31 Apan ajah a,’Chapa, nangma kakoma um jing nahin, kanei aboncha nanga ahi.
32 Hiche nanaopa hi athisa hing doh kit, amangsa kimudoh kit ahijeh a ikipa thanop diu mong ahibouve,’ tin ajol’e,” ati.

Luke Bung 16

Sumching kitahna beipa

1 Jesun seijuite jaha , “Mihao khat’in neiching khat aneiye. Neichingpan anei aman chatvai jeh-in min aheh-in ahi.
2 Mihaopan ama chu akouvin ajah a, ‘Nachung chang thu kajah hi ipi iti ham? Nanei chinjat sutohnloiyin tukal neichinga napan theilou ding ahi,’ ati.
3 Hichun neichingpa akigel’in, ‘Kapun kaneichin, eilahpeh dingla ahitan, ikati ding hitam? Loubol’a lei lai ding la kathan ajoupon, khutdo dingjong kajah achai.
4 “Kaneichin kahai teng mihon a-in’uva eilhunsahna diu bol ding khat kahetai,’ atin;
5 apupa sumba ho akouvin, amasapen pa jah a , ‘Kapu sum ijat nabat’em?’ atileh;
6 aman, ‘Thao tae-na dim jakhat,’ ati. Aman ajah a, ‘Nathil simna hinchoiyin, tou loiyin ate-na som nga bou aunin,’ ati.
7 Chuin achomdang khat jah a, ‘Nangin la ijat nabat nah laiyem?’ atileh; aman,’Suhlou chang ate-na jakhat,’ ati. Aman ajah a, ‘Nathilsimna hin lan, somget bou sunin,’ ati.
8 Hichun chondih lou neichingpan ching theitah a thil aboljeh-in apupan apahchai; ajeh chu hiche khang mite hi akibahpi houlah a khovah chate singin achingjo’uve.
9 “Kaseipeh nahiuve, leiset gouvin gol le pai semun, gou abeiteng mihon tonsot chenmuna nalhunsah diu ahi.
10 Thil neochaa kitah lou mi chu thil lenpia jong kitah lou ahiye.
11 Leiset gouva bon tahsan naum louvu leh goutahbeh chu kon nachinsah diu ham?
12 Midang gou neichinga ankitah louvu leh nang ho gou ding kon napeh diu ham?
13 “Insung lhacha khatseh-in pipu ni ajenkop theipoi; jenkop taleh khatjoh ahot’a khat jog angailut ding, ahiloule khat chu akolchah joa a khat chu donlouva akoiding ahi. Nang ho Pathen le sum soh a napankop thei lou diu ahi,” ati.

Jesu thusei phabep
(Mt 11:12-13;5:31-32;Mk 10:11-12)

14 Sum ngailu Pharisee hon Jesu thusei ho ajauvin anelpah khum’uve.
15 Jesun ajah-uva, “Nang ho hi mihem mitmua them kichan loi nahiuvin, Pathenin vang nalungthimu ahenai; ijeh-inem itile mihemte lah a sang tah a kijabol chu Pathen mitmue thet umtah ahibouve.
16 “John khang geiya chu Danthu l eThemgaoho th che ah ahi. Ama hung apat Pathen lenggam Thupha kiseiphong a ahin, amitakip’in asunga thahat lekhajem khat paidoh sangin van le lei kitolmang abaijoi.
18 “Koi hile ajinu daa achom khat kichenpi chan mito jong ahin, chule ajipan adasa numei kichenpi jong mito jong ahi.

Mihaopa le Lazarus

19 “Mihao khat hin, ponsandup le tupat ponenm jeng asil jin, niseh-in aning anop’in aum jin ahi.
20 Apum changa phah mivaicha Lazarus kiti chu akotbul’a alumin,
21 mihaopa ankong dokang chunga lhajah anmal chu aducha tun tun jenge; akhoh cheh kit chu, uichaten atipat laiho chu aleh-uvin ahi.
22 “Chujouvin mivaichapa chu athin, Vantilten Abraham jet lama din apotauve. Mihaopa jong athin avuitauve.
23 Aman Damuna gim genthei athohna konin chunglam avet leh gamla tah a Abraham amun, ajet lama Lazarus jong amui.
24 Akouvin jah a, ‘Kapa Abraham, neikhoton, Lazarus hin sol’in akhut jungin twi ga dekot han lang kalei beh eihung dedap peh hen, ajeh chu hitobang meikou leh a gim genthei thoh-in kaum tai,’ ati.
25 “Abrahamin, ‘Chapa, naleiset hinkhon thilpha chengse namun, Lazarus chun thilse amui, tun aman kikoma nom asan, nangma chukoma gim genthei thoh-in naume.
26 hiche kal jong chun i-kah-uva onghom lentah akikhangin, hikoma kona nang ho hin jon nom jong hung theilou ding, chukoma kona jongkoima hilama hung galkai theilou dinga kibol ahi,’ ati.
27 Aman, ‘Hepa achutileh Lazarus chu ka-inkote henga nasolna din kataove,
28 ajeh chu sopi pasa; nga kaneiyin, Lazarus chehen lang amaho chu gahil chah masa leh kati, achuti lou leh hiche danmuna hi hung kit diu ahitai,’ ati.
29 “Abrahamin, ‘Ahilchah diuvin Mose le Themgaoho aneiyui, amaho hil ngai tauvinte,’ ati.
30 Ahinla aman, ‘Ahipoi kapa Abraham, mithi lah a kona mi khat che le bou lung ahei diu ahi,’ ati.
31 Ahinla Abrahamin ajah a, ‘Amahon Mose le Themgaoho thu angailouvu leh mithi leh a konin mi khat thoudoh kit jong leh kithu nundeh pouvinte,’ tin aseiye,” ati.

Luke Bung 17

Chonset’a lhahna thei lhepna
(Mt 18:6-7;21-22:mk 9:42)

1 Jesun aseijuite jah a, “Kipal lhuhna thei thil chu soh thei ahinai, ahin kipalna bol chu ohe ada ahi!
2 Ama chun hitobang aneocha ho khat akipal lhuhsah sangin a-ngonga sumhei song lentah ki-opeh hen lang Twikhanglena kileh lut le phajo ding ahi.
3 Chingtheiyun! “Nasopi achonset leh phoh-in, lung ahei leh ngaidamin.
4 Ni khat sunga nachunga sagi vei, chonse hijongleh, nahenga ahunga sagi vei jen, ‘Kalung kaheiye,’ atileh na-ngaidam tei ding ahi,” ati.

Tahsan

5 Solchah hon pakai jah a, “Katahsanu khansah ben,” atiuve.
6 Pakaiyin, “Nang hon tahsan na ankam mu tebep neiyun lang, hiche thing theimi khu, ‘Kibotdohin lang Twikhanglen lailunga kiphut lut’in,’ tijong leu chun nathuu ngai jenginte.

Lhachapa toh ding kin

7 “Nalah-uva mi khat’in loubol’a pang ham, kelngao ching ham soh khat aneileh, ahung vailhun teng ajah a, ‘Hung loiyin ankong hung ki-um loiyin,’ ti nan tem?
8 Chusanga ajah a, ‘Kajan an neh ding gon, natai kigah-in lang kaneh kachah sungsen neijenin, chujou teng nangin nen natin don nannate,’ atijoh lou idng ham?
9 Hichepa chun asohpan asei sei abol peh jeh a chu apachat hinam?
10 Hitobanga hi nang hon jong nakiseipeh chengse nabol jou tengu jong leh, ‘Soh mai mai kahiuve, keihon katoh ding dol bep bou katoh-u ahi,’ tiuvin,” ati.

Jesun miphah som asuh theng

11 Jesu Jerusalema achen Samaria le Galilee kah ahopeh-e.
12 Kho khat’a alut leh miphah som khat’in analamtouve. Miphah ho chu gamla thima adingun,
13 “Pipu, Jesu neikhotouvin,” tin asamuve.
14 Jesun amaho amu phat’in ajah-uva, “Cheuvin lang Thempu ho gakivetsah tauvin,” ati. Acheu leh adamthengsoh tauve.
15 Alahuva khat chun adamtheng akihet phat’in ahung kile kit’in oging tah-in Pathen athangvah-in,
16 chule Jesu kengbul’a amai asult’in athangvah tai. Ama chu Samaria mi ahi.
17 Jesun adonbut’in, “Miphah som jen kisutheng hilou ham? Mi ko hoilamba hitam?
18 Hiche chidang namdangpa tilou khat chajong Pathen thangvah dia hung kile lou hiuvem?” ati.
19 chule khatpa jah a chun, “Thouvin lang chetan, natahsanin nadamsah ahitai,” ati.

Pathen lenggam hung lhun
(Mt 24:23-28, 37-41)

20 Pharisee hon Jesu jah a Pathen lenggam hung lhung ding phat adoh nauva aman, “Pathen lenggam chu melchih theiyin ahungpoi.
21 Koiman, ‘Ven, hikom’ah aume,’ ahiloule, ‘Khukoma aume,’ atilou ding ahi. Ijeh-inem itile ven, Pathen lenggam chu nalah-uva aumtai,” ati.
22 Jesun seijuite jah a, “Nikhatle Mihem Chapa nikho namu nom lheh diu, ahivanga namu thei lou diu ahi.
23 Mihon najah-uva, ‘Ven, khu koma aume,’ atiuva, ‘Ven, hikoma aume,’ atiu jongle chesauvin, anung del hih-in;
24 ajeh chu kolphen kolmong lang khat’a pat kolmong lang khat geiya vanthamjol asalvah jeng banga Mihem Chapa hung ni jong leh chuti ding ahi.
25 Amavang amasa hesoh genthei tampi athoh a, hiche khang mite not thap’a um tei ding ahi.
26 Noah nokholai bang a Mihem Chapa nikho ho jong chuti ding ahi.
27 Mihon aneuvin adonun, akichengun, Noah kong sunga alut ni geiyin kicheng din akipetouvin, chutah-in twisang ahung lenin abonchauvin asumangtai.
28 Hitobang hin Lot nikho laiyin jong mihon aneuvin adonun, thil achouvin, hon abol’uvin in asauvin,
29 Sodom khoa Lot apotdoh nikhon vang vana koin meikou l ekat ahung julhah abonchauvin asumangtai.
30 Mihem Chapa kiphondoh nikho jong chuti ding ahiye.
31 Hiche nikhoa chu inchunga uma inusunga thilkeo kilah din kumlhah da hen, chule loujaova um jong hung kile kit da hen.
32 Lot jinu chu geldoh-un.
33 Koi hile kihinso noma chun athilo ding, athiloa chun hinna aneiding ahi.
34 Kaseipeh nahiuve, hiche jan chuleh jalkhun khat’a lumkhom te ni jong khat kilaa khat kidalha ding ahi.
35 Numei chang goikhom teni jong khat kilaa khat kidalha ding…
(36 Loujaova bung pasal te ni jong khat kilaa khat kidalha ding ahi)” ati.
37 Amahon adonbut’un ajah a, “Hoikom hintem Pakai?” atiuleh; aman ajah-uva, “Thilong lupnaa chu muthong kikhom ding ahi,,” ati.

Luke Bung 18

Meithainu le thutanna thulem

1 Lhadah louhel’a tantih neilouva atao jing theina din Jesun aseijuite chu thulem khat ahil’e.
2″Khopi sung khat’ah Pathen ging lou mihem jong jalou thutan khat aume.
3 Hiche khopi sunga hin meithainu khat jong acheng’in, thutanpa henga ahung jin, ‘Kakihehpi sangin them neichanin,’ atijie.
4 Phat chom khat chun aman don louvin akoinan, chom khat jouvin, ‘Pathen kagin daa mihem kajabol lou vangin
5 hiche meithainun eisuhgim jing jeh hin athem channa ding gelpeh tange, achutilou le hung jingin tin eisuh lung gim jing ding ahi,’ tin aseiye,” ati.
6 Pakaiyin aseiben, “Midih lou thutanpan ipi aseiyem ngaiyun.
7 Sun le jan’a ahenga tao jing jeng alhenchomte chu Pathenin kithopi ding ngongkai louhel’a achunguva thu adih a atanpeh lou ding ham?
8 Najah-uva kasei ahi, aman ngongkai louhel’a amaho them achansah loi ding ahi. Hijongle Mihem Chapa ahung teng leiset chunga tahsan hung toh nantem?” ati.

Pharisee le Kaidong thulem

9 Jesun mi ama bou them kichana midang jouse isah lou ho din hiche thulem hi aseiyin:
10 “Mi ni Houin a tao dingin achetou lhonin, khat chu Pharisee ahin, khat chu Kaidong ahi.
11 Phariseepa adingin chamtahin hitin ataove, ‘Pathen keima midang banga milop, kitahna bei, chonthanghoi, chule hiche Kaidong pa tobang khu kahi loujeh-in Nangma kathangvah-e.
12 Hapta khat sungin nivei an ka-ngol jin, kalamdoh jat hopsom hop khat kape jingin ahi,’ ati.
13 “Kaidongpa vang chu gamla thimtaha adingin, dah a van lam jong ve-ngam louvin, adip alai akidop’in ‘Pathen neilungset’in keima michonse kahibouve,’ ati.
14 Kaseipeh nahiuve, Phariseepa sangin hichepa joh hi them achangin a-inlama achesuh tai; ajeh chu koi hileh ama kichoi sang chu kisunem ding, ama kisunem chu kichoi sang ding ahi,” ati.

Jesun chapang neocha ho phatthei

(Mt 19:13-15;Mk 10:13-16)
15 Miphabep’in achateu chunga Jesun khut angap din ahinpuiyui Seijuien amun aphoh-uve.
16 Ahinla Jesun chapang ho akouvin, “Chapang ho chu kahenga hungsahun, kham dauvin, Pathen lenggam chu hitobang ho ding bou ahi.
17 sumil hih-un, chapang thilsan banga Pathen lenggam sang lou chu lut lou ding ahi,” ati.

Mihaopa
(Mt 19:16-30;Mk 10:17-31)

18 Judate vaihom khat’in Jesu adingin, “Houhilpha, tonsot hinna kanei theina dia ipi kabol ding ham?” atileh;
19 Jesun ajah a, “Ibol’a ‘Apha’ neiti ham? Pathen tilou apha aumpoi.
20 Thupeh chengse nahet chu me. ‘Mito jong hih-in, tol that hih-in, gucha hih-in, jouthun hettphsah-in pandan, nanu napa jabol’in,’ kiti chu,” ati.
21 Aman, “Kakhangdong laiya pat hichenghi kanitsa ahitai,” ati.
22 Jesun hichu ajah phat’in, “Nalhah samna khat aum nalaiye, nanei chengse joh-in lang sum chu vaichate petan, chutile vana gou nanei ding ahi; chuteng hungin neijuiyin,” ati.
23 Hiche hi ajah phat’in mihao tah ahijeh-in alung nom mo lheh jenge.
24 Jesun alung himo natsatje amu phat’in, “Sum haoho dinga Pathen lenggama lut ding iti hah sat hitam!
25 Mihao Pathen lenggama lut sangin heobil homa sangonsang lut idng abaijoi,” ati.
26 Hiche thu ja hon, “Achutile koi huhhinga umjou ding ham?’ atiuve.
27 Jesun, “Mihem dinga himo thil jouse dalhaa nang kijuita,” ati.
28 Peterin, “Ven, keihon kanei jouseu dalhaa nang kijuita,” ati.
29 Jesun ajah-uva, “Tahbeh a kaseipeh nahiuve, koi hijongle Pathen lenggam jal’a in le lou ji le cha, sopi u le nao, nu le pa dalha jouse
30 koi ahin tukhanga ajat tamjo cheh mu lou ding le ahung lhung ding khanga tonsot hinna kimu lou idng aumpoi,” ati.

Jesun athi le athodoh ding asei masah thumveina
(Mt 20:17-19;Mk 10:32-34)

31 Jesun som le ni atumin apuidoh-in ajah-uva, “Ven, Jerusalem ijon touvun, chule Mihem Chapa thudol’a Themgao ho lekhabu kisun chengse guilhung ding ahi;
32 ajeh chu Ama chidang namdangte khut’a pehdoh a um ding, tot nopna aneiyuva, a-eng eng a abol diu, chule chil aset khum diu ahi;
33 avoh-uva atha diu, ahivanga nithum ni leh thoudoh kit ding ahi,” ati.
34 Seijuiten aseiho hi khat cha jong ahechen theipouve. Ajeh chu akisei ho hi amaho dia kiselguh ahin, hijeh chun ipi kiseipen ahiding ahedoh theipouve.

Jesun mitcho khutdo khat aboldam
(Mt 20:29-34; Mk 10 46-53)

35 Jesu Jericho khopi ahung naichun, lamlen panga mitcho khat touvin khut adoi.
36 Mitchopan lampia mipi kitol husa ajah phat’in ipithu ahi ding adonge.
37 Mihon Nazareth Jesun ahinjotpa ahi, aseipeh-uve.
38 Aman ahinsamin, “David Chapa jesu, keima neilungset’in,” ati.
39 Amasanga chehon umthip beh dia haphoa apho vangun aman ahasap cheh-in, “David Chapa, neikhoton,” ati kit’e.
40 Jesu ading denin mipa chu ahinpui diuvin aseiye. Mitchopan ahin naiphat’in ajah a,
41 “Ipi eibolpeh le nati ham?” atileh; aman, “Pakai, kho neimusah-in,” ati.
42 Hichun Jesun ajah a, “Mu tan. Natahsanin nadamsah ahitai,” ati.
43 Apettah chun mitchopan kho amutan, Jesu ajuiyin Pathen athangvah tai. Mipin hichu amuphat’un Pathen athangvah chehuve.
18.14: Mt 23:12:Lk 14:11.
18.20:Ex 20:14;Dt 5:18:Ex 20:13;Dt 5:17;Ex 20:15;Dt 5:19:Ex 20:16;Dt 5:20;Ex 20:12;Dt 5:16

Luke Bung 19

Jesu chule Zacchaeus

1 Jesu Jericho alut’in kho sung ajotpeh-e.
2 Khosunga hin Zacchaeus kiti kaidong pasal khat ahengin, ahaova hao ahiye.
3 Amahin Jesu chu amu nom lhehin, ahinla mi nem ahijeh-in mipin alen amupha poi.
4 Hijeh chun analhai masan, amuteina din ahung na ding lampia chun theiba chung khat’a anakaldoh-e.
5 Jesun hikom chu ahinphah phat’in agada doh leh amun, “Zacchaeus, hung kumlha loiyin, tunia na-in’a kalhun tei ding ahi,” ati.
6 Zacchaeus, chu kinloi tah-in ahung kumlhan kipah tah-in Jesu alamtoi.
7 Mipin amu’uvin, “Hiche michonsepa in’a khu lhung din ache teget’e,” tin aphuntauve.
8 Zacchaeus vang chu adingin Pakai jah a, “Ven, Pakai kanei chengse akeh khat vaichate peng ting, ada acham louva mi kalahpeh aum jong leh ajat lin leng’e,” ati.
9 Hichun Jesun ajah a, “Tunin hiche insunga huhingna ahung lhungtai, ama jong hi Abraham chilhah ahiye.
10 Ijeh-inem itile amangsa holdoh a huhing dia Mihem Chapa hung ahi,” ati.

Sum som khat thulem
(Mt 25:14-30)

11 Jesu Jerusalem ahung lhung deh deh tan, mihon ma Pathen lenggam hung lhung jeng dia agel jeh-uvin Aman thulem khat ahil’in,
12″Milun tah khat leng tha neina gakisana hung kile kit din kholgamla tah a cheding agon;
13 asohte som khat akouvin Mina khat cheh apen ajah-uvah, Kahung kile kit kah-in kivei nan anamangun,’ ati.
14 Ahinla agam miten ama ahot bol’in anunga palai asol’uvin, ‘hichepa hi kachunguva leng chang din kadeipouve,’ agati sah-ui.
15 “Aman leng tha neina kenga ahung kile kit phat’in kivei dinga apeh asohte chengse ijat cheng aveikan’u ahet nom jeh-in gakou khom din thu apei.
16 Ahung ma sapan,’Pakai, nang Mina khat chu Mina som kalhinsah-e,’ ati.
17 Aman ajah a, Nabolpha lheh-e, sohpha nahi! Themcha chunga tahsan thei nahijeh-in khopi som chunga tha neiyin pang tan,’ ati.
18 Anilhinnapa ahungin,’Pakai, nang Mina khat chu nga kasosah-e,’ ati .
19 Aman, ‘Nang jong khopi nga chunga vaipo ding nahi,’ ati.
20 “Thumnapa ahungin, ‘Pakai, nang Mina chu ponin kajel’in kakoi hen hiche hi ahi,
21 ajeh chu nakoin alouva loi doh theiya, natuna louva atdoh thei, acham louva milahpeh jeng nahijeh-in nangma kakichai,’ ati.
22 Aman, ‘Soh gilou! Nakamsoh a nathu katan ding ahi. Kakoina louva kalahdoh theiya, katunalouva ka-at theiya, acham louhel’a mi kalahpeh thie nahet ahiyeong?
23 chuti-an ibol’a kasum chu sumkholpungnaa nakoida ham? Koile chun kahung kile teng ken apung puma kilah thata dinga!’ ati.
24 “Akoma ding ho jah a chun, ‘Mina khat chu lahpeh-un lang, Mina som neipa chu gapeuvin, ati.
25 Mihon,’Pakai,aman Mina som khat jen neina chu,’ atiuleh;
26 aman,’Kaseipeh nahiuve, aneiya chu kipeh ben tin, aneilouva chu anei chasun jong kilahpeh ding ahi.
27 chule achunguva lengvaipo dinga eideimo hiche migilou melmate hi kakoma hinkai lut’uvin kamitmun that gam’uvin,’ tin aseiye,” ati.

Jesu loupitah a Jerusalem alut
(Mt 21:1-11;Mk 11:1-11;Jn 12:12-19)

28 jesun hiche aseijou hin amasan jerusalem ajon toutai.
29 Olive thinglah kiti mol’a Beth phage le Bethany aphah koin seijui ni asol’in,
30 “namasang jon lhona kho’a khun lut lhon le chun komacha tou khahna louhel sangan nou kihen khat namu lhon ding ahi; sut lhan hinkai lhonin;
31 mi khattouvin najah lhona, ‘Ibol’a nasut lhon ham?’ atileh; ‘Pakaiyin aman nom’e,’ ti lhontan,” ati.
32 Solle te ni ache lhon leh ijakai asei bangin agatoh lhone.
33 Sa-ngan nou chu asut lhon leh aneiten, “Ibol’a sa-ngan nou chu nasut lhon ham?” tin adongui.
34 Amanin, “Pakaiyin aman nom’e,” ati lhone.
35 Hichun Jesu henga ahinkai lu tlhonin, chiin sangan nou chunga aponsil jouseu aphasoh phat’un Jesu chu achunga adom doh tauve.
36 Jesu ahung chun lampi chunga aponsil jouseu aphauvin ahi.
37 Jesun khopi ahinphah ding kon, Olive mol’a kumlhahna huang geiin seiyui mipin abonchauvin tha neitah a thil kibol amu chengseu jeh chun ogin sang tah-in asamun kipah thanom tha-in Pathen vahchoinan
38 hitin aseiyui: “Pakai min a hung lengpa anun nom’e; Van’a cham leng hen, chung nungpena loupina hihen,” atiuve.
39 Mipi lah a Pharisee mi phabep chun Jesu jah a, “Houhil, naseijuite phoh-in,” atiuve.
40 Jesun adonbut’in, Najah-uva kasei ahi, hite ho thip leu song ho aojah jeng diu ahi,” ati.
41 Ahung naijep jep’a khopi amu phat’in Jesun akachamin,
42 “Ohe, nangin tunia hi lung monna thei ngaichat nakihet hitave leh! Tunla namuthei tapoi!
43 namelmaten nahin umkhuma, galpal nakai khum’uva, akimvel lhung keiya natin chah niu hung lhung ding;
44 huhhing dia nakivil nikho nahet loujeh a nangle nasunga nachate kisugam ding, song khat chunga khat kise-thom beihel’a alha diu ahi,” ati.

Jesun Jerusalem Houin asuh theng
(Mt 21:12-17;Mk 11:15-19; Jn 2:13-22)

45 Jesu Hoiin a alut’in thiljoh ho anodoh panin ajah-uvah,
46 “Hiti hin, ‘Ka-in chu taona in kiti ding ahi,’ tin akisun me, nang hon la gucha michomho kikholnan nasemdoh tauve,” ati.
47 Jesun niseh-in Houin a thu ahiljin, Thempu pipu ho le Danth themho, chule mipi lamkaihon vang ama suhmangna ding ahol jingui.
48 Ahivangin la angai lhihgeh jeh-un alonaje ding aholdoh thei pouve.
19.10: Mt 18:11. 19:13,16,18-Mina-Greekte sum dangka 18/- to kikot 19.26: Mt 13:12; Mk 4:25; Lk 8:18. 19.38: Pa 118:26. 19.11-27: Mt 25:14-30. 19.46: Is 56:7; Jr 7:11. 19.47:Lk 21:37.

Luke Bung 20
(Mt 21:23-27; Mk 11:27-33)

1 Nikhat jesun Houin a mipi thu ahila Kipana THupha aseiphong pet’in, Thempu pipu ho l eDanthu themho chule upaho ahungun,
2 ajah a, “Ipi thu neinaa hicheng hi nabol’a, kon hiche thu neina hi napeh ham, neiseipeh tem’un?” atiuve.
3 Jesun ajah-uva, “Kenjong thu khat dongunge, neiseipeh-uvin;
4 John Baptist chu van’a kon ha mihema kon ham?” atileh;
5 amaho akihouvun, “Eihon, ‘Van’a kon ahi,’ tileu hen la, ‘Chuti-an ibol’a natahsan louvu ham?’ tiget’in tin,
6 Mihema kon ahi,’ tijong leu hem, mipin John chu Themgao khat’a atahsan cheh jeh-un, songin eiselo bep’un tin,” atiuve.
7 Hijeh chun, “Hoiya hung kon ham kahepouve,” atiuve.
8 Hichun Jesun ajah-uva, “kenjong ipi thu neinaa thil hicheng kabol seipeh pouvinge,” atitai.

Lengpilei le aleilhouho thulem
(Mt 21:33-46; Mk 12:1-12)

9 Jesun mipi chu hiche thulem hi ahil panin, “Mi khat’in lengpilei abol’in, aleilhouho abolsah-in phat sotpi um din kholgama achetai.
10 Aga lhun phat donin lengpitga ahinpohsah diuvin aleilhouho henga soh khat asol’e; ahinla aleilhouhon sohpa chu avouvin khut gohkeuvin asolmang tauve.
11 Soh khatma asol kit leh; ama jong hi avouvin, noise tah-in abol’un khut goh keman asolmang kit tauve.
12 Soh thum lhinnapa asol kit leu leh, amahon amavouvin ahi nleh doh kit tauve.
13 Lengpilei neipan, ‘Ipi kalo ding hitam? Kachapa chang khat seh hi sol tange, amahi jabol teiyunte,’ ati.
14 aleilhouhon achapa amu phat’un akihou lhiuvin ‘Hichepa hi agoulo dingpa ahi, agou ichan theina diuvin ama hi thatdoh jengu hite,’ akitiuve.
15 Hijeh chun ama chu lengpilei polama alehdoh-un athat tauve. Hiche lengpilei neipa chun amaho hi i-lotan tem?
16 Ama hunga hiche lengpilei chu midang apeh ding ahi,” ati. Hichu ajauvin amahon, “Achuti louleh!” atiuve.
17 Jesun amaho chu aven, “Ahile, ‘Insa hon deimoa apaiyu song chu, In ning khomdet penin apangtai,’ tia Pathen lekhabua kisun chu ipikiseina ba ham?
18 Koi hileh hiche song chunga chukha chan chu kitah ngem’a chule songin alhah den jong chu adelngem ding ahi,” ati.

Kaipeh thudol Jesu adoh-u
(Mt 22:15-22;Mk 12:13-17)

19 Hiche thulem hi amaho gotna asei aheuvin Danthu themho le Thempu pipu hon hichepet tah a chu Jesu chunga khut lhah din agouvin, ahinla mipi akichauve.
20 Amahon Jesu chu athuseiya kipalsah a, mat ding gamvaipo tha neina le athu noiya peh thiena dingin phat kitup kom achang lhiuvin, chonpha lhemin changlhi phabep achinsah-ui.
21 Changlhi ho hin Jesu jah a, “Houhil, nathusei le namihilna hi adih-in, maipha velouvin Pathen lampi dihtah a nahil kaheuve;
22 Caesar kai kapeh-u hi dan ngai himong nam?” tin adongui.
23 Jesun alungthim bol’u ahen ajah-uvah,
24 “Denarii khat neivetsah temun, koi lim hiya koimin chong am?” atileh;
25 amahon, ‘Caeasar’a,” atiuve. Hichun Aman “Chuti ahile Caeasar’a chu Caesar peuvin, Pathena chu Pathen petau,” ati.
26 Mipi maiya athuseiyin man thei tapouve; adonbutna ma chu adatmo lheh jengun athip beh tauve.

Mithi thokit thudol Jesu adoh-u
(Mt 22:23-33; Mk 12:18-27)

27 Mithi thokit tansan lou Sadducee phabep ahungun Jesu jah a,
28 “Houhil, Mose’n ‘Pasal khattou ji neiya cha hing man louva athi leh, ajinu meithai chu asopipa akichenpia asopipa chi akhai peh idng ahi,’ tia eisutpeh-u ahi.
29 Pasal sagite aum’un, aupapenin ji aneileh cha hing louvin athitai.
30 Ani lhina pan jong,
31 thum lhinna pan jong, aban banin amanu chu jin anei cheh-un, asagiuvin cha hinglouvin athisoh tauve.
32 Achaina keiyin numeinu jong thu athitai.
33 Chuti ahijehchun mithi thokitnaa hiche nu chu koipen ji hiding hitam?” tin adongui.
34 Jesun amaho jah a, “Hiche khanga mite hi akichengun, kicheng din jong akipeuve,
35 thinaa kona thudoh, ahung lhung ding khang mu dia kilomho vang chu akicheng pouvin, kicheng din jong akipeto tapouve.
36 ahimongin amaho chu athi thei tapouvin, Vantilte tobang ahiuvin, thinaa kona thoudoh kit’a Pathen chate hiuva ahitai.
37 Chule mithiho thodoh tahbeh hi Mose,n lhambuh thua chun Pakai chu Abraham Pathen, Issac Pathen chule Jacob Pathen ahidol kichentah-in aphong.
38 Pathen chu mihtiho Pathen ahipon, mihing ho Pathen ahibouve; ijeh-inem itile ama koma mi jouse ahing cheh-e,” ati.
39 Danthu themho phabep’in, “Houhil nasei dih lheh jenge,” atiuve.
40 Ajeh chu thu dang adoh ngamlouvu ahitai.

Jesu David chapa ahidol thudol
(Mt 22:41-46; Mk 12:35-37)

41 Jesun ajah-uva, “I-atileh mihon Messiah chu David guiya pen gidng ahi, tia aseiyu ham?
42 David jengin jong labua chun, ‘Pakaiyin ka-Pakai jah a Kajet lama tou jingin
43 Namelmate chengse Nakeng chotpha kaneisah masangsen,’ tin aseibouve.
44 David amatah-in ‘Pakai’ asah leh iti aguiya peng hithei ding ham?” ati.

Jesun Danthu themho aphosal
(Mt. 23:1-36; Mk. 12:38-40; Lk. 11:37-54)

45 Jesun mijouse jah din aseijuite henga,
46 “Ching theiyun, Dan thepna sangkhol chol ki-ah a vah le nom, kailhang dunga mi salam ding deiya, Houthua kikhopna in dunga touna phapen, golvahna mun’a munpha pen lo nom,
47 meithaiho thil le lo bahgam, mimu dia sottah tah taoji hoa konin kihong phauvin; amaho hi themmona chungnung chang diu ahi,” ati.
References:
20.9: Is. 5:1. 20.17: Ps. 118:22.
20.27: Ac. 23:8. 20.28: Dt. 25:5.
20.37: Ex. 3:6.
20.42-43: Ps. 110:1

Bung 21-25 vatna lai.

 

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>