Thangtom manna thilpha lou bol lou ding

Tishbe a cheng Pathen manchah Elijah in Israel lengpa Ahaziah lhacha ho henga “Israel gamsung a Pathen um lou ham?” (2 Lengte 1:3) tia aga sei khum chu lengpa nasa tah in alung hang in Elijah chu mat ding in agong tan ahi.

Israel lengpan Elijah man ding in asei pai mi 50 asol in ahi. Elijah chu molchunga aga mu un, “Pathen mipa, lengpan thu peh anei je, hung kum lhan” atiu ve (2 Lengte 1:9). Elijah in jong “Pathen mipa ka hi leh vana kon in mei hung kong hen lang na bon chau vin na kavam u hen” ati pei je (2 Lengte 1:10). Van a kon in mei ahung kong in sepai mi 50 chu aka lih hel e (2 Lengte 1:10). Lengpan hiche chunga Pathen natoh dan gel doh louvin, thang tomna anei be cheh in, asei pai mi 50 ma ma asol kit e. Ama sa bang chun aga sei kit un, abon un athi gam hel kit uve (2 Lengte 1:11-12). Chuin Lengpan thumvei channan seipai 50 ma ma asol kit e. A thumchan na seipai lamkai pa hin Pathen thilbol thei chu ahen, Elijah henga kineo sah tah in aga tao thon ahi. Hitia atao chun Pathen leh Elijah a lung lhaisah in, ahing doh uve (2 Lengte 1:13-14).

Hiche thusim a kon a thugil tah gel doh ding jat ni aum in ahi. Ama sa lengpa hinkho leh lung put um dan ahi. Lengpa hin a leng hina aki letsah pia, thuneina aki hisah pi, chuleh thilsoh chunga kisih na sanga thangtomna anei be cheh ahi. Hia kon in akisonpi tah aseipai mi 100 athi lo in ahi. Anina a chu ahi leh athumchanna seipai lamkaipa hin kho ahi. Ama hin amasa thilsoh chu ageldoh a, Pathen thilbol chu agin ahi. Hiche a kon chun ama hinkho keu hi louvin, akilhonpi seipai 50 hinkho jong ahuh doh in, chuleh lengpan asolna kin jong asu bu lhite.

Sopte ho, ihinkhouva ipi iki letsah nao um em? Gel doh thei chan gel doh u te. Pathen mit mua idih lou khah a, khat in ei hinhil u leh thangtomna a la louva, thilpha lama kisan thei ding athupin ahi. Pathen in aman chah alhacha ho hi ja na peh ding ti jong eihil uve. Pathen lhacha ho ja-a, phatea ngehna nei ho chunga Pathen lung lhai na aum jing e. Thangtomman na thilpha lou bol hi manthah na ahi.

November 13, 2010

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>