Pathen na tong leh Houthua kiloikhomna na tong

Pathen na tong leh Houthua kiloikhomna na tong

Mitam pin Pathen na tong leh houthua kiloikhomna a natong ti hi ahe chen pouve. Houthua kiloikhomna a natong jouse hi Pathen natong tin mi atam jon asei un ahi. Hou leh Pawl khata lamkai ya pang ho hi Pathen natong akiti un, mi hon jong Pathen antong tin agel ui. Ahia hiche te ni paochang kiman dan hi mitin in phate a het chet angai je.

Pathen natong leh houthua kilamkai naa natong kiti te ni hi aki bang toh aki lou vin, lou jong aki lou hel hul lhon e. Ahin hiche te ni a aphat tin in aki bang thei poi. Pathen natong chun mi det khen tum nei louva aki kop pi ahin houthua kiloikhomna a natong chun ama kiloikhomna kol kahsung a bou atoh ahi.

Ka school kai bom pi khat leh ka na kikopi pi jing khat aum e. Ama toh hin school ka kai khom lai hon a chu khat leh khat kipan hu to a um ka na hi lhon e. Ama hi houthua kiloikhomna khata lamkai len khat in ahung kal doh e. Khat vei ka chen na khopi a a hung jin in, ni kho phabep khat aum nung in akilen, in alhun in phone in ei hin houpin “Ka ki loikhomnao thu jeh in ka hung ta poi” ahin tin ahi.

Ken jong apat tah chun sei ding dang ka he pon, ki ging lou hel a ka sei doh khat chu “Nang Pathen natong na him ka ti, kiloikhomna na tong johna hi ta chu la” ka ti leh aman jong “ka hi ngut tah hi o” atin ahi. Aman jong chutia ka ki houna lhon chu lung han na anei pon dih asah lheh thou ve.

Mitam pi Pathen na tong a kisei ya, Pathen antoh ipi pen ham ti jong he chen lou atam e. Houthua kiloikhomna a kum sot tah lamkaiya panga ahia Pathen lung dei leh natoh tong doh lou tampi aum e. Pathen natoh kiti hi misol thu hi lou, Pathen a dia alung thim leh atha hat na kipeh doh ho ahi. Misol thua na tong ho chu mi na tong ahin lung sunga kon a Pathen sol a na tong ho chu Pathen natong ahiuve.

Pathen natong leh houthua kiloikhomna natong iti ahi akibah loudan het chet angai tai. Ana tong ho hi hen lang, asol leh apan hu ho hi jong leh Pathen natong ka hi hinam tia kigel doh angai je. Kum leh lha bei tul tul, ahia Pathen natohna a kipana leh lo lhinna um lou chu Pathen natong hi lou ahi. Pathen natong ten kipa leh thanom tah in tong jing u te.

Nehkholal

April 18, 2011

 

Leave a Reply

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>