Gamsung Vaipo Toh Kimutona


Lamkai Ho

Nehkholal, Minister pu, leh Chief-engineer pu

July 25, 2011 Monday ni jing kah lam chun Thangkai lhang langa 16 miles gari lamlen sem ding thun Chin State pumpia Lamlensemna langa Minister pu leh Chief-engineer pu toh kimu to na aki nei je.

Chin State sahlam gam hi “Thangkai Lhang” tin jong aki kou ji e. Hiche lhangsunga hin isopiu Zo ho jong phabep acheng uve. Atam jo ei ho ihiuve. Kum 1998-1999 laichun kum khat leh hiche lhang hi vel ni ni ka ga khol jin, gamnom tah ahi.

Hiche lhang sunga cheng ho hi mipon tho ngen leh mikitah ngen ahiuve. Atam jo hi thinglhang lei lhouva kivah ahiuvin, sum kol vei na leh school kai na lam alha sam lheh e. Neh le chah hi kum khata dinga anah nah a aki mu jiu ahi.

Kho khat leh kho khat kikom to na ding jong lampi um jou lou ahi. Khat vei Balbil pan Khotei kho ka jot naova ka gam mang un, gamlah go boh noiya jan khat ka ge lou uve. Kho khat leh kho khat kikom to theina ding lampi sem ding hi athu pi lheh e.

Jangcham Kanmaygyi kho pan Thingpel leh Hengjang lam hi mile 16 agam lan ahi. Lampi sem sa jong aum nan, ahin phate cha car che theina vang ahi nai poi. Tun motor cycle in alam lha un ahin lampi semlou ahi jeh in kitoh khah thei na ngen ahi na lai je. Mortor cycle tou man mikhat a Ks. 3000 vel ahin koi ma jouse atou jou poi. A tam jo keng ngen in alam lha nalai uve.

Hiche lampi hi car phate chan che thei leh agamsunga cheng isopiu hon aphat chom pi lheh diu ahi. Keng a aki jot leh ajot ngai hon ni lang ajot u, ajot kha lou hon ni khat kijot ahi. Hiche lhang lamlen phate cha sem lou va khoh ahi dan lamkai te ni henga aki lhut in ahi. Ama ni jong ama ni pan thei na ho asei lhon in, gamsung a cheng ho langa kon a pan lah ding ho jong asei lhon e.

Agamsunga cheng hon ngaichat na anei uva ahi leh pankhoma sem thei ding din mun in akisei doh thei jin ahi.

Hiche lamlen semna dinga vat ho chu ahi leh:
1. Gamsung mite a kona ngaichat ahi leh hi lou het masat ding
2. Lamlen asao achom, abol ding dan Engineer ho goiya estimation bol sah ding
3. Phate cha natoh leh sumlepaiya son leh mon, mikitah tah khat nei ding
4. Isopi ho lamlhah na ding khohsah na jala sum le paiya pan la nom ho mudoh thei na ding ti ho ahi.

Koitabang hiche tohgon a lung lut aum leh kihe to u te.

Nehkholal

Leave a Reply

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>