Chamna Thudol (Palm Sunday Message)

April lhasung’a Sunday masa pen, tuni Sunday nikho (April 4, 2020) hi Christian ten nikho loupi khat’a i-nit niu ahi. Pathen in vannoi mihem te galkisat tansah’a chamna thu ako-mu thu dol ahiye. Hiche thudol hi Themgao Zechariah (Zech 9:9-10) leh Psalms 118:25-26 sunga vannoi Leng Jerusalem khopi’a ahung lut ding anasei masat ahi tai.

Themgao Thuphon Guilhunna
Zechariah hi Themgao ahin chule Thempu jong ahi. Ama hin khonung’a Jerusalem’a Leng chang ding thu kichen tah in ana phong e.

VO Zion chate, hachangpan kipah-un! Kipah-in khosam’un, Jerusalem mite! Ven, nalengpau ahunge! Galjo minthangin ahungin; Nun nemtah-in sa-ngan chunga touvin, Sa-ngan nou lagol chunga touvin ahung!
Pakaiyin aseiyin: “Israelte galsatna kangtalai jouse sumang ing ting, Jerusalema sakolte kakai mang ding; Galmuna manchah thalpi kaheboh doh ding ahi. Nalengpauvin namtin vaipia chamna semintin, Twikhanglen lang khat’a pat langkhat geiya vai ahoma, Euphrates luipia pat leiset mong geiya vai ahom ding ahi,” ati. Zechariah 9:9-10

OT bu sunga Psalms sunga jong huhhing na dia taona leh Pakai min’a hungpa nunnom tah ahi thu anasei masan ahi.
Neihuhhingun Pakai, neihuhhingun! Neilo lhinsah-un O Pakai! Pakai min a hungpa anun nom’e! Pakai Houin akon vang kaboh-ui! Psalms 118:25-26.

Sakol hi lou, Sa-ngan: Jesu Jerusalem khopi ahung lut hin Themgao sei masat bang in Sa-ngan chunga touvin Jerusalem khopi sung ahung lut-e. Jesu Sa-ngan chunga ahung touna ajeh um ahi. Sakol hi galsat teng kimang ji ahi. Koiman Sa-nga hi galsatnan amang ngai poi. Sa-ngan hin lung nenna leh chamna avet sah ahi.

Lusuna leh Theoboh: Jesu Jerusalem a ahung lut’a chu mipi ten lusuna ho achoiyuva, lampi tol’a jong aphauva, galjona lhang anasap u ahi. Lusu na hi galsatna’a kon galjouva ahung kile teng u leh galjo kipana vetsahna’a alap jiu ahi. Jesu Christa jong chu setna gal jouva hung kon ahi vetsahnaa lusuna lam’a chule theoboh ho ana phau ahi.

Gal subei leh galjoupa: Jesu Christa leiya ahung’a Pa Lungdeilam le solna atoh ho hi hiche khang laiya houlamkai ho leh mipi kon khat in ana he them joupou vin, Jesu thuhil leh natoh ho chu nasa tah in, ana dem jing un ahi. Kon khat in Israel nampi pui mang ding leh Israel insung suse ding khop in ana gel un ahi. Vannoi gal subei dinga hung jo ahi.

Thu khumkhana: Bible in asei dung juiya vannoi mihemte ho hi Pathen a kon i-hiuve. Mihemte ho chunga chamlen ding hi Pathen lungdei pipen ahi.
Christian ten thah beh’a i-gel diuva dei um chu Christian insung, houbung sung leh khosung’a “Chamna thu um hi nam?” ti ahi.

Sa-ngan chunga touva Jerusalem khopi sunga hunglut Jesu chun chamna thu aphon doh ahi. Sa-ngan chunga tou louva Sa-kol chung’a tou i-hiu le chamna thu sohdoh jou lou ding ahi. Chamna thun i-lung sung u lo dim jing ta hen.