America Gam (1) Vei Khol Zinna

America gama doctorate leve zil dinga hi 1995 B. Th 1 year ka kai kum a pat a chu ka na tup ahi tai. Ka na tup na a 2008 teng leh America gama doctorate zil ding, kum 2010 teng leh Myanmar gam a hung ki nungle ding tin ka nitin kimanchahna lekha bu (Diary) bu sunga ka na sun e.

A tah bah in Pathen in America gama doctorate zil thei na ding in alampi ei hon peh in, March 29, 2007 kum chun America gam Lincoln Christian University a Doctor of Ministry ka zil pan in ka hi. Pathen in kei gon sanga kum khat ma jep a ei lhut ahi.

Chubana ka lekha sim (course jouse) chu 2009 kum chun ka chai jin December 9, 2009 kum chun Myanmar gamsung ka ji (Vahneikim) leh kachapa (Seiminlun) toh ka hung ki le kit uve. Ka na kigon na (2008) sanga kum khat (2007) majep a Pathen in ei lhut toh kilhon in, hung ki le dinga ka gon (2010) sanga kum khat majep (2009) in ka hung ki len ka hi.

America gam a them ka jil sung in Pathen thu sei leh kihet pi ho vil in State chomchom ka na jin in ka hi. Kum 2007-2009 kum thum (lha 33) sunga State 20 kitohchat ka khol doh in ka hi. America gam sunga hi State 50 um ahin alang deh tabang ka khol doh e. Ka kholdoh na State ho chu ahi leh: 1. California, 2. Florida, 3. Idaho, 4. Illinois, 5. Indiana, 6. Iowa, 7. Kansas, 8. Kentucky, 9. Michigan, 10. Minnesota, 11. Missouri, 12. Montana, 13. Nebraska, 14. Ohio, 15. Oklahoma, 16. Oregon, 17. Tennessee, 18. Texas, 19. Washington leh 20. Wisconsin ahiuve.

Pathen in ka gel khel lam a mun chom chom jong ei lhun sah uva, ei man chah nao chunga kipa um ka sa lheh e. Summer sung in Khangdong Camp mun 2 a “Camp Missionary Family” tin kum khat leh lha 3, kum 2 sung in America chapang leh khangdong mi 1500 vel henga Pathen thuseina ka nei uve. Ei pui ho u Ama ahin Ama loupi na chang jing ta hen. Amen.

Pakai Lhacha

Nehkholal

December 7, 2010 (Tuesday)