Pathen Kouna: Noah

Pathen Kouna: Noah

Leiset’a cheng mitin gitlou le niseh a thilse jeng agel’u Pakaiyin amu doh in (Gen. 6:5), asem sa jouse (Gen. 6:7) suh gam hel ding in Pakaiyin agel tai. Hiche kintong ding chun Pakaiyin Noah ana lheng doh e.

Noah hinkho um dol hi kichen tah in aki sim doh thei je. Ama hi hiche khanglaiya dia Pathen lung dei leh lung toh pen ana hi. Ahina hi jat thum in akisun e. Ama hina ho chu ahi leh 1. midih, 2. akhang sunga nolnabei, chule 3. Pathen toh kivop mi (Gen. 6:9) ana hi.

Pathen in akin tong dia ana kou Noah chun chapa thum anei je. Ama ho chu ahi le 1. Shem, Ham chule Japheth (Gen. 6:10) ahiuve. Ama ho thum leh aji teu hin Pathen in Noah ana solna kin ana toh hu un ahi.

Pathen in anatong dia Noah akou hin atoh ding kichet tah in asei peh e. Atoh ding chu “Kong in nei saha Asemsa ganhing chi khai ding huhhing ding” (Gen. 6:20) ti ahi. Kong let le neo ding jong kicheh tah in asei peh e (Gen. 6:14-16). Pakaiyin aseipeh chan abang bang in Noah-in aboltai (Gen. 7:5).

Pathen in abol dia asei chu ahung gui lhung tei jin ahi. Noah in Pathen solna kin achai chun leiset suh ngim na ding in ni som li le jansomli jen go ajun (Gen. 7:17) tuisang analen in (Gen. 7:18), leiset a da lhah a um cheng se chu athi soh tau ve (Gen. 7:21).

Noah hinkho hi tulai khanga pasal hon o-chat um tah ahi. Chon na lama jong midih, nolnabei chule Pathen toh kilhon mi ahi (Gen. 6:9). Aji nu, achate thum leh amoute jong ana thu nun dan jong aki mu doh e. Pathen agina chate leh amou te angailuta athunun jeh in abon un thina a kon in huhhing in ana um uve. Ama ho keu hilou vin chikhai ding ganhing ho jong huhdoh in ana um uve (Gen. 8:19). Noah leh a insung miten Pakai kouna leh ngense na chu anatong molso un ahi.

Hitia Pakaiyin Noah akouva akin tong dia ana sol ahi. Noah in Pakai kouna leh solna kin chu anel pon, ahi thei leh hi thei lou ding jong ana kinel pi pon ahi. Noah in Pathen chu ana pum tahsan jeng ahi. Ama lung gel in apan sa pon Pakai hil joh chu ana jui je.

Tulai khanga pasal ho leh pate hon jong Noah hinkho a kon a kihil ding dei aum lheh tai. Noah hin Pathen mit mu a lahthei doltah a hinkho ana man ahi. Pathen angailun, aji achate leh amou te athu nun in, Pathen kouna leh solna chu atong mol so e. Pathen kinpeh hi eima chang a toh jou lou tampi aum e. Insung mite jouse pankhoma toh khom angai je. Pathen kouna leh solna tong jou ding in Aman ei hatsah jing tau hen.

Nehkholal

April 13, 2011

 

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>