Pathen Kouna: Mose

Pathen Kouna: Mose

Pathen in amite laha natong ding in amite ngailu mi akou jin ahi. Bible sunga amite ngailu leh khoto ho tampi aki mu doh thei je. Ama ho hinkho a kon a Pathen in eikouna jong mudoh thei tampi aum e. Hiche ho laha Mose hinkho a kona kitil khou thei ahi.

Mose hi Egypt gama Egypt ten Israel te soha ana man uva, misim apun be cheh cheh phat uva akichat uva, Israel naosen pasal peng jouse suh lhah a tha dia thupeh ana um lai tah a hung peng ahi. Gamsunga pasal chapang kimat lungset na leh hepina bel hela a ki tha tha lai tah ahi.

Mose hi mel hoi taha hung peng ahin, chapang pasal kimat kitha jeh in anu leh apan lha thum jen (Exod. 2:2) ana sel le le lhon e. Achainan sel na je ahet lhon lou phat in sinkhup sunga akoi lhon in lui dung alhohsah lhon tai.

Egypt lengpa chanu amun, naosen ahi nah lai jeh in anu avah sah in ahi. A hung let phat in Egypt leng inpi sunga ahung cheng in leng le lal chate jil ding jouse ahin jil in ahi. Egypte leng a pang ding chan in dop sang in ana um in ahi.

Ahung sei let phat in Hebrew mi ahi ama ahung ki he doh in, Egypt ten soh a aman u Israel te chu ahin lai nat pin ahi. Ami te gentheina ave lel lheh jing in ahi. Kho nung in Egypt a kon in Midian gam langa ana jam doh e.

Midian gama ajam doh chun Jethro chenna mun a aga pem in ahi. Jethro in chanu sagi jen anei jin, achanu Zipporah (Exod. 2:21) toh aki chen sah e. Chapa ahing lhon in amin “Gershom” (Exod. 2:22) asah e.

Mosen amite agel doh jing in, agenthei nao asu mil thei poi. Midian gama akel ngoi achinna a Pathen in “Mose, Mose” (Exod. 3:4) tin ni vei jen akouve. Pathen in Mose akou hi amoh kou ahi pon, akin tong dia akou ahi. Pathen in Mose asolna kin chu “Egypt gamsunga kona a Israel mite puidoh dia Egypt lengpa heng a solna” (Exod. 3:10) kin ahi.

Mosen asol pa chu koi ahi adong in, Pakai jin ahina “KEIMA” (Exod. 3:14) tin aki phong in, atahsanna ding in thilkidang ni (tenggol-gul a aso sah, Exod. 4:3; leh akhut aphahsah, Exod. 4:6) aso sah in ahi. Hichena Pathen in thilkidang ni amusah vang in Mosen Pathen kouna leh ngensena chu ana nel in ahi.

Amite lungtah jeh leh lunggel ahet jeh in amite thudoh ding ho chu Pathen adong in, ama pao mo jong chu apao men, ahin Pathen in akithopi din asopi pa Aaron asol peh din asei peh e. Pathen kou na Mosen ana nel joudeh poi. Pathen in amite thoh gentheina asu mil pon, atao nao asang jing e.

Tunia nang leh kei jong suh gentheiya um Pathen mite pan hu dia kou na ichan u leh Pathen solna banga jui ding in iki tem un ahi. Pathen kouna chu khat leh khat chung a kibang mai lou ding ahi.

Pathen kouna hi ineova pat, khandon chu leh pilhin chan a ei hin pui dan leh ei hin manchah dana kon a het doh thei ahi. Pathen in eikounao hi hahsa mai thei nom mai thei, mihem lung gela toh jou lou hi mai thei ding ahi. Ahia Pathen kouna leh solna chang hon Mose banga itoh cheh u angai tai.

Mosen Pathen kouna leh solna ahin khutsana, aji leh achate toh ami Isrealte Egypt gama Egypt te soha kon a pui doh dia ga cheu ahi. Pathen kouna leh solna a iche teng leh Pathen Ama tah in ei um pi diu, ei hatsah diu ahi. Ama kin a kimangcha te Pathen in adon da poi.

Nehkholal

April 13, 2011

 

 

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>