Kuki Cultural Committee in Homalin

Photos with Kuki Cultural Committee in Homalin

A Photo with Kuki Cultural Committee in Homalin

Kum 2011 summer chun Kuki te chena Myenigone khopi ka ga phan kho sung a khan tou na chom chom aki mu ben ahi. A deh in kho sung mite damtheina din tui kul khat aki sem peh in ahi. Hiche tuikul semna a khosung miten Haosapu lamkainan tha le jung aseng un, gamdanga loi leh gol hon sum le pai in pan ahin la un, pha te chan aki sem doh in ahi.

Hiche tui kul kisem na mun hi achuh akhal a tui kang ngai lou ahi. Hiche tui put na mun hi kho sung miten kisilna, don tui, vonsop na a anei sim lou, gancha: vohcha, uicha, ahcha, loi leh bong in jong adon a, jun leh eh athah u ahi. Hiti ho jeh in khosung mite adeh in chapang ho adammo jing un ahi. Hiche potna na ahung ki nei jin tun alei tham khat aki lai thuhin, cheh bang akisen tun thengsel in aki mang cha thei tai.

Kim le pam a cheng mite hon nitin in amang cha jing un ahi. Kum 2011 khal sung chun khosung a um tuikul kang atam jeh in tua aki lai thah na mun ngen a chapang, khangdong, nupi leh upa jousen kisilnan, vonsopnan amang un aphat chom pi lheh uve. Ni lhah seh a hung kisil hi mi 20 vel apha jing uve.

Myenigone kho sung mi hi Kuki te ngen ahiuvin houthua kikhenthangna aum vang in, khankho lampanga vang aki kan khom jing un, kipa um tah khat ahi. HCC lamkainan pawl chom chom ho kikan khomna aum in hiche jong hi thilpha khat ahi.

Pawl chom chom a um ta jong leu, khankho thu ahung hi teng leh sei khom louva hi thei lou leh tohkhom louva hithei lou thupi tahtah aum jing jeh in khosung upa hon “Phung gun chu nan chang tumbu ka poi” ti pao cham tuh bang in, jat le nam ding in pan ala un, kum 2010 jong chu “Chang Vang Kut” ana bol un ahi.┬áHiche Kum 2010 “Chang Vang Kut” hin khosung mite keo hi lou aja pha chan lung sung, ahin choh thouvin, amitin lung sunga “Ban jom a ipi itiuva, ipi ibol diu ham” ti hi aging cheh e.

Homalin a ka um sung in Kuki Cultural Committee hon kihoulimna a, ei hin tem un, 2 vei jen kihoulimna ka nei un ahi. Hiche a Kuki Cultural Committee hon alung gel u leh atoh gon u asei khom nauva:

1. Kuki te Chondan leh Ngaina khan jing na dia kiloikhomna det leh inpi khat sah doh ding,

2. Hiche leimun ding solkar ho henga thum ding,

3. Inpi sah doh theina dia pan hu na adeh a sum hol ding ti ho leh thu chom chom ahi.

A Kuki Cultural House

A Kuki Cultural House

A chunga tohgon dung juiyin committee hon pon tho tah in pan ala un aleimun ding hi asem doh u ahi tai. In sah ding hi maban ahi. In kisah ding dan jong anoiya lim banga sah dia agon u ahi. Hiche insah na dia hi akisam pen sum le pai ahin, Myanmar gamsunga Kuki chate koi tabong jat le nam Pathen min a, ngailu a, pan la nom aum leh lo lhing lheh in te.

A chunga lim hi lung gel leh lungsunga kisa ahi na laiyin, atahbeh a mu thei leh man chah theiya ahung so doh theina ding in tha peh jing u te. Koitobang hiche tohgon a lung lut aum leh kihet to thei ahi.

Dr. Neh Kho Lal

 

 

5 comments to Kuki Cultural Committee in Homalin

  • Rev.Dr.P.Kipgen

    Hiche tobang nahin bol thei jeh in Kipa pina kahin thot nin nahin bol doh sah pa Pathen thangvah aumme.

  • kamgougin khongsai

    kipa aum lheh e. Hung machal jing un. Pathen in phathei na boh jing u hen.

  • Culture, Tradition kiti hi jat le nam khat hi a chun aneicheh un, koima hetphah lou, ahin lungthasetpi louhiel a tunichan ihin kichintup uva, maban a amanthah lou nading leh ahoicheh ding gelna a hitobang committee nahin semdoh uva tohgon chomchom nahin nei uhi Ka hin kithang-atpi lheh jeng uve. Zalaiya loyang I thannau hung hi hen!

  • Lun Neh

    Kuki Cultural Committee in Homalin a Mi Pa te ho min chu,
    Pa Thang Kho Lun, Pa Doumang, Pa Hel Ja Pao ho ahi ve.

  • Mangcha Haokip

    Homalin a mipa hon cultural leh traditional a mang thah lou na ding a nathil gon nao chunga kipa thu ka hin seije.Kei jong Manipur langa Kukite Cultural ho ama thah ding dei lou nan Cultural team khat kabol in Doordarshan Imphal a jong phat khat khat le ka lam uve.
    Ha pan in hung pang uvin.

Leave a Reply

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>