Bible leh Leadership Training

September 14-30, 2012 sung in Tamu Christian Church a Bible leh Kilamkaidan kihilna ana ki mang e. Training kipatni September 17, 2012 nin kho chom chom leh houbung chom chom a kon in mi 43 ahung pang in ahi. Hah sat na leh boi na chom chom jeh in mi 3 akai jom jou ta pon, mi 40 hin akipat nia pat akichai ni chan in pon tho tah in akai lhum kei jun ahi.
Tu chunga kihilna a hin Bible abul a pat ki hilna aki nei je. Bible sunga thusoh ho hi ei ho gam sung a thil soh ahi lou jeh in het ahahsan, het chet na dia Bible Map hi thu pi tah ahi jeh in ahung kai jouse Bible Map ahet chet na diu vin, Map phate chan aki sun doh in, Gam min, Khomin ho mel chih na chan in aki hil ma sai. Hiche Map het a kon in akisim Bible ho het chet thei ahi.
Chubana Bible Thulhun lui (OT) sunga “Pentateuch” ti kimin vo bu ho: Genesis, Exodus, Leviticus, Numbers, Deuteronomy hiche bu 5 hi alhangpin aki hil chen e. Hiche bu ho hi Isreal te hon akhang akhanga kihilna leh kivaipohna a Danbu a ana man u ahin, Pakai Jesu khanga jong hiche Danbu thuana ki sei jom jing ahi.

Chu le Bible Thulhun Thahsunga (NT) Matthew, Mark, Luke, John hiche bu 4 jong hi alhangpin aki hil chene. Hiche bu ho hin Pakai Jesu hinkho, thuhil leh ana toh ho asut doh u ahi. A sun ho hi mi chom chom ahi vang un, Mi khat natoh asut u ahi. Hiche bu 4 hi English ten “Synoptic Gospels” atiuve. A lam doh chu ahi leh “Thukhat kisun khom/ Thu kitoh ho” tia le doh thei ahi. Khat sunga kisun thusim chu khat sunga alhing jep in aki sun aki mu doh thei je.
Pakai Jesu thuhil ho het chet nom leh bu khat bou sim louva, a bu 4 sunga aki sut na ho hi holdoh a sim khom angai thu aki sei khom e. Training a hung lha ho ama ho tah in bu 4 sunga thulu kibang ho ahol doh un, aban ban in asim un, hia kon in athu sim gil je dan ahe doh un, akipah thei lheh uve.
Chule Kuki te Khankho Thusim leh Bible Thuhil jong akisei khom e. Bible in jong kingailuta kipum khat ding thu asei ahin, Kuki te khan kho sunga jong kingailutna leh kipumkhat na thu ana kisei peh ahi. Hiche te ni: Bible Thuhil leh Kuki te thupom hi aki kal pon, aki bang joh ahi. Hiche te ni aki bah dan hi het chet a kon in Christian ihi nao det in tin, khat le khat ki kah a jong kijana, ki ngailutna leh kipun khomna um in te.

Hiche Training sunga jong tu lai Myanmar gamsung kikhel dung juiya het dia pha thu gil ho jong aki hil e. Chule jat le nam sunga tu din mun a boi na ho jong aki sei khom e. Tu lai nikho um dan hi Bible thu bou kihil ahi lou leh Leiset thu bou kihil ding ti ahi thei ta poi. A ni gel a ahina dol het chet theina dia kihil jong angai ma ma tai. Bible thu leh Leiset thu ahina ding dol ihet doh cheh diu athu pi lheh e. Chuti lou leh iki nohuva, iki boi jing diu, kimang thah ding ahi.

September 30, 2012 nin Namihan Christian Church muna Training khum khana aki nei jin ahi. Hiche a jong hin Training kai ho leh insung mite chule houbung mite leh khosunga nu le pai te ho ahung lha khom uvin, Training chai het pehna Certificate jong aki pen kikhopna alou pi lheh jeng e.
Pathen in lhing lel tah hi jong leu hen, i-jo kham cheh uva itoh nao chunga phatthei aboh jing ding ahi.

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>