Socrates leh Crito Kihouna

Socrates: Crito! Jing kah ma tah a, hiche va ipi na hung bol ham? Ma na lai hi lou ham?

Crito: Heng-e, a-ma na lai je.

Socrates: I-tih phat hi tam?
Crito: Kho a-vah chip chep e.

Socrates: Jail kot ngah hon na hin lut sah u lam dang ka sai! Tua na hung lhun ham?
Crito: Tua ka hung lhun ahi poi, ka hung lhun na asot tai.
Socrates: Chutia na hung lhuna asot leh i-dia ima sei louva thip beh cha-a na um ham? Ipi sei dia jing kah ma taha hung ngah na him?
Crito: Ka jol, Socrates! Na henga avel in sei kit ing ka te. Hiche jail a kon ki lha doh tei na din ka thu sei ngai jin. Na thi leh, ka gol pha tah um ta lou ding, chule nang tabang jol le gol pha hung um doh ta pon te. Mi kim khat in gel leh, ken nang ka huh doh thei ja agel ding, ken ka huh doh nom louva asei diu ahi.
Socrates: Ka gol ngai tah Crito! Chutia mi ho lung gel ding dan chunga na gel leh ka chunga na dei sah na chun man anei poi. Chu ti ahi kit lou le jong, na dei sahna chu thilse dei sahna toh kibang ahi. Kei ma hi “lung-gel” khohsah jing mi ka hi. Kei man ka lung sunga adiha ka gel a, ka phondoh ho thu hi ka din pi jing ding ahi. Ima tih in ka lung gela adiha ka gel ho hi kon ipi sei jong leh nung sun pong e. Mi te ho mu dan leh lung gel ding dan, na gelna chunga iki hou limding ham? Hin sei tem in. Phat sot tah pi ina gel khom u hi lou ham? Mi tam ho lung gel dan ho jouse chu abon cha adih-e tia, i-gel diu ham? Lhai tet golseh a kichuh ho khu gel tem in. Mijouse sei sei dana ki them chuh uvem, a hil pa sei sei ya ki them chuh em?
Crito: Ahil pa sei banga ki them chuh ding ahi.
Socrates: Thu he chen lou mi tam pi ho sei sei ajui sang-a, a-jil nom thu he chen set, mi hil them tah khat henga ki chuh ding joh hi lou ham?
Crito: Ahi nai, adih e.
Socrates: Tua ka thu din pi jong hi chutabang hi lou ham? Hoi che dih a, hoiche dih lou ti thu ahi. Hiche thu toh ki lhona, mi tam pi sei sei ijui ding ham, ahi lou leh ahetchen khat sei chu ijui ding ham? Mi toh kidel ding khat chun ahil them pa sei ngai louvin, mipi te ho sei sei jin bol leh, kitetna lel-a, atahsa jeng jong nat lo ding ahi. Hi na sah lou ham?
Crito: Ahi nai je.
Socrates: Chule tahsa (body) hi, se le pha chule adih leh adih lou he toh thei lungsung (soul) sang a thupia na gel jo em?
Crito: Chuti vang ka gel poi.
Socrates: Chuti ahi leh Crito, mi te ho sei sei na chunga thulhuh na bol leh na khel ding ahi. Thu khat adih leh adih lou thua mi tampi sei sei chunga igel ding ham? Kei lhat dohna dinga manchah ding sum le pai aguh a peh ding, chule minset ding dei lou jeh leh, chate ho chaga aso diu dei lou jeha na sei chu mi te ho gel dan chunga na sei ahi. Mi te ho hin ipi hi thudih hiya, ipi hi thudih lou ahi agel khoh pouve. Thu khat adih leh dih lou chu Athen kho mi te ho gel dan leh sei dan chunga bou ken jong ka pom jeng ding ham? Hijeh chun ka thudoh hi giltah in gel in lang, ka nung jui jin.
Crito: Heng-e, Soctates! Ka hetchan leh ka jo chan in mang nang e.
Socrates: Adih lou he na sa, bol tei ding got lou ding ti hi dih na sah na em?
Crito: Heng-e, dih ka sai.
Socrates: Chuti ahi leh adih lou khat adih louva le thuh ding ti hi mi tam pi lung gel ahin, hiche dih na sah em, dih lou nasah em?
Crito: Hiche chu dih ka sa poi.
Socrates: Chuti ahi leh Athen khomite ho lung gel dih lou demna jeha, ei mat uva, jail’a ei hen u leh ei kitha ding hi mi chunga thil se bol ka him?
Crito: Ka sei thei poi, Socrates!
Socrates: Chutia na sei thei lou jong leh aphai.

Ban jop kit ding……….

Ale-doh: Mr Nehkholal

Reference: Philosophy: A Text With Readings Ninth Edition Manuel Velasquez.

2 comments to Socrates leh Crito Kihouna

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>