Tahsa le lhagaova ngainom umpen leh kikhen thei lou thucheng hi ngailut leh kipum khat thucheng teni ahijinge. Hiche thucheng teni hi nupa kitho theijin Vompi nou aloh lhonne kiti tobang ahije. Khat umlouna a chu khat lhasam, hat jou lou ahije.
Ngailut thucheng hi vetsahna in Nule pate hin chate angailutna alungset ding hi angaina dan nin akigelle. Hijong hiding mong ahi ajeh chu athisanna peng ahijeh chun kipana amu jong leh anule pa kipana asangin vangset, toset, atoteng jong leh nulepa lunggim asangin, dammo veiset ato teng jong leh dam doh theina dinga ngaito khohna leh khohsahna alenne. Nule Paten achate angailutna sanga chungnungjo leh lenjo, seijou lou seichim umthei lou chu Pathen mingailutna hi ahi.
Pathen nin mihem chunga thil moh peh-a apeh hi ngailutna ahi. Pathen mingailutna thucheng hi Greek paovin Agape akitin sappaova charitable divine love jong akiti. Pathen nin achapa Jesu Christa-a thina channa eiho jouse leh vannoija mihem jouse dinga along lhengnga ngailutna sangpenna cross chunga thina channa eihung lhat dohnao ami ngailutna sangpen ahi.
Hiche ngailut sang pen chu tuni channa eiho lah a akoijing nah lai jeh hin Pathen chu thangvah vah dinga lom ahi. Tahsa lung ngai chatna, dei chatna hohi phileo akiti. Agape leh phileo chu ngailut kitina hicheh jong leh akimanna lhon achom chom ahije.
Hiche article in asei nom pen chu ngailutna hi ima jouse cham kimna ahin phulahna pen chu ngaidam ahi. Ngaidamna hi ngailutna a konna ahin, ngailutna ga ahije. Chule ngailutna a kon chun kipum khatna le kithu khatna ahung umdoh jin, kipum khatna le kilung khatna a chun lolhinna jong aumdoh teije. Hiche ngailutna-a hin Pathen mingailutna apan masat angaijin, ngailutna umna a chun thoh hatna leh tomngaina jong ahung umdoh teije.
Pathen chate ihi doh theina diova eingailutnao hi iti loupi hitam! Chule hichu hijong ihitaove. Semtil’a agiloupa-a kon, asopi that’a pang Cain to ibah lou dio ahije. Ipijeh pen tah-a aman asopipa atha ham? Ajeh chu ama natoh chengse agitlou jeh-a, asopipa- thil bol jouse adih jeng aboljeh ahipenne.
Chuti-a chu tuni-a eiho lah jenga jong phat khat khatleh kivet dana, hot bolna ho tampi ahung pot doh jin hijong leh hicheng jouse jeh chun kidangsa lou hella Pathen thu gui lhunna ahichu geldoh thah kit jing angaije. Midang hengle kom hohi ngailutna inei thei jing uva ahileh thina-a kona hinna galkai ihi taove. Amachang kingailu jing midang ngailu thei lou vang chu thina-a um jing nalai ahiove. Bible in asei dungjui jin amaho chu themmo chang ding ahiove (I John 3:1).
Christa sopite ho eiho khat le khat ki-ngailu jingo hite, ajeh chu ngailut hi Pathen’a kon ahi. Hijeh chun ngailut neija chu Pathen’a kona peng ahin, Pathen ahei. Ngailut neilouvin Pathen ahepoi, ajeh chu Pathen hi ngailut ahi. I Pakai Jesu Christa Chapa Pathen jalla eihon hinna inei theina diova Pathenin Achapa chang khatseh vannoija ahinsol, hiche-a hi eiho sunga Pathen ngailutna chu kiphongdoh ahitai.
Chuti-a chu eihon jong Pathen ngailutna a Pathen min loupina iphon doh theina diova umma ahi. Bible in eihon Pathen ingailut’u ahipon, amajoh-in eina ngailut jeh uva, eiho chonset thoina dinga Achapa ahinsol ahibouve. Christa jalla sopite ho Pathenin eiho chutia eingailut’u le eiho jong khat le khat iki-ngailut dio dol ahi. Eiho khat le khat iki-ngailut’ uleh Pathen eiho sunga uma chule Amingailut chu eiho sunga chamkim sohji ahin Aloupina chu kichen tah a imu dingu ahi (I John 4:7-12).
Pathen thangvah in umhen.
Pathenin eiho sunga ngailutna anei hi eihon iheovin itahsan uve. Tahsan, Kinep, Ngailutthucheng thum lah a ngailut hi achung nung penne ati (l Cor.13:1-13). Ngailut sunga um michu Pathen sunga um ahin, chule ama sunga Pathen um’a ahi.
Thupi tan nikho-a lungngamna inei theina diova hiche-a hi eiho chunga ngailutna kisuchamkim ahi. Ngailut sunga kichat aumpoi, ngailut chamkim chun kichat anodohji; kichat hin talend mat ding aneijeh ahin hijeh chun kichajing mi chu ngailut sunga achamkim theipoi. Aman eingailut masah jeh a eihon ingailut’u ahibouve.
Khat touvin, “Pathen ka-ngailui,” ti hen, asopi hotbol le, mijou ahi. Ijeh-inem itile amusa asopi bon angailut loule, amulou Pathen chu angailut thei lou ding ahi. Koi hijongle Pathen ngailut na-a chun asopi, aheng akom midang ho jong angailut tei ding Christa-a kona thupeh khoh tah aumhi gel doh jing ngaija ahi (I John 4:16-21).
Masang laijin Ahab lengpa lal laijin Judah chate chun lengdang ho chun gaal jona loupi tah chu ana nei jingun ahi. Ipijeh hintem ? Judah te akilung khatnu, akipum khat jeh-u ahi. Kipum khat hi Pathen nin asemsa mihem ten anei dinga adei pen tah khat chu ahi.
Kipum khat hin thahatna leh gaal jona leh toh molsona pen khat chu ahi. Chule Pathen nin mihem ten abol dinga adei pipen khat chu nangma naki ngailut bangin naheng nakom ngailun ati ahi.
Tulaija tahsa le lhagao hinkho-a ngaichat umpen tah khat chu kilung khat tah-a chenkhom ding chule kipum khat tah-a Pathen hou khom’a Ana toh khom ding Ama hetna pumma Amingailutna hong sunga khang tou jing jeng ding ahi (ll Peter 3:18).
Ngailutna le kipumkhatna a chun Pathen aummin, Pathen umna a chun adang imacha ngaita lou ahije. Ngailutna leh kipum khatna umlouna a chun khan tou machalna leh lolhinna ima aumtheipoi.
Pao Sei
Leave a Reply