Holkom Kho Meikah

Phatche sa April 23, 2014 ni kho, nilhah lam pung 1 vel chun Holkom kho in (9) leh school in (1) mei yin ana kavam hel e. Holkom kho mite ho hi abon uva in (10) pha ahiuve. Mi sim agom in mi (55) aphauve. Mihem athi amang vang aki ja poi.

Holkom kho hi Myanmar gam, upper Chin State, Tonzang Township hop sunga um ahi. Khampat kho kom, Kanan leh Kanmahgyi kho a kona mile (13) gam la ahi je.

A kho lam piu hi Kanan leh Kanmaygyi pana Thingpel leh Hengjang lam len a kijuiya, Thingpel kho phah ma, jetlama ki hei doh ahi. Kanmahgyia kon in jong keng lam in akiche thei ye.

April 23, 2014 ni chun gammei in akho kim vel u ahin ka pan in, Thing lhang lei leh Kho ki kaha achang khol nao, chang sal jouse jong akah vam hel a, chujouva Kho sung lang ahin kah jom kit ahi.

Kho haosa pu Pa On Kho Thong sei na a “Khopam meiyin ahin kan, ken jong khosung lang hin ka khan te tin meilam ka ga sem in, ahin mei lam sem jou ahi pon, ka hung jam naa, mei yin ka khut leh kamai lah ei kah khah peh e” atin tun Kanan khoa lou le ai jin aki jen e.

Kho sunga hi in (10), school in (1) leh hou in (1) ki song ahi. Hiche laha chu in 10 mei yin akah vam hela, meithai nu in khat leh hou in chu mei yin aka pon ahi. Meithai nu leh Houin meiyin akakha louva, indang akah jou hel chu aja sun in lam dang asa in ahi.

Holkom khoa cheng ho chu 1. Pa On Kho Thong, 2. Thang Kho Sem, 3. Thang Mang, 4. Ngul Kap Thang, 5. Thang Kho Let, 6. Thang Khan Dal, 7. Tong Min Lal, 8. On Ngam, 9. Zam Kho Son, 10. Nu Cing Hat (mei thainu, in ka lou) ahiuve.

Holkom kho in kaha hi April 23, 2014 lam ana hi tahvang in, meikah dan leh khomi te umdol aki het gang lou jeha hung kitah doh gang thei lou ahi.
Holkom kho mite ho hi iyakaiya pan pi angai chat lai tah u ahi.

Koi tabang genthei hahsa kho toa, mimal hi hen, kiloi khomna min hi hen, insung din mun hi jong leh kithopina pe thei cheh leu hen, kho mite din pha chom lheh in te.

Koitabang panpi penom aum leh kihet pi ho henga kona peh thei ahi. Pathen min a, amun tah a gachea, lhamon na thu ga sei peh thei aum jong leh pha cheh ahije.