Yangon-Tamu Kholchena

Pathen mapuina jal in Myanmar gamsunga Kuki Christian Houbung ho jong amachal jing e. Tukum 2014 sung hi hou in phachom pi akisa pan tan, tukum sung ngeiya chai theina din akitaovin, nasatah in pan aki la khom in ahi.
Houin kisa ho chu ahi le Khampat Christian Church, Tingkaya Christian Church, Namihan Christian Church chule Valpabung Christian Church ho ahiuve.

Tingkaya, Khampat leh Namihan houin ho hi America gama tahsan chate ho pan huna a kisan ahin, Valpabung Christian Church houin hi Korea a tahsan chate hon ahin pan huuva kona kisa ahi.

Pathen in munchom leh gamchom cheng Christian te ho mang chaa igamsunguva Pathen houna ding houin loupi tah leh nom tah eisah peh u ahin, ei ho dia tahsan nalama kalsang se be theina khop ahi tai.

Pathen in houbung mipi te, lamkai ho leh gamchoma cheng tahsan chate jouse lungmon leh kipana pe jing ta hen!

Tuchung Yangon pana Tamu lam ka khol jin hi hou insah thu, Holkom insah thu leh Bokkana hospital honmun thu ahi. Chubana Pathen in KCCM amapui geldoh jing na ding in “Geldohjingna” song ho tun ding jong aki gong e.

Israel phung 12 din songtum 12 aki chom khom in, achunga Israel phung 12 min cheh akikhen in ahi. Chubana song len tah khat chunga “Hiche song ho hin Pakai thilbol, Mipite ageldoh sah ding ahi” Joshua 4:6 chu Kuki pao, Burmese pao leh English pao thum in neltah in aki khen in ahi.

July 21, 2014 nia Yangon pana Myanmar Airways toh ana kon doh ka hin, August 6, 2014 Wednesday nin Myanamr Airways ma man, damsel chan Yangon ka hung le lhun kit te.

Kalay Myo leh Mandalay hi minute 40 vel asot e. Van chung feet 18000 sang in aleng e. Mandalay leh Yangon ka hung lennao hi vanleng alen thim in, vanchung lang feet 27,000 sang in aleng in ahi. Van leng hi alen nem leh leng hat lou, a lensang leh leng hat cheh ahi. Nem cha (18000 ft) alen leh pung 1:30 vel sot ji ahi. Tuchung ka hung len u hin Mandalay leh Yangon hi phung (1) bou asot e.

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>