Israel Gamsung Kakholnao

Pathen thilgon jal in USA gam-a tahsan chate leh houbung ho vil ding leh Israel gamsung khol din October 7, 2014 ni, jankim in Yangon International Airport pan in ka vai kon doh in, Incheon International Airport (Korea) a van leng ka khel in, October 8, 2014 ni jing kah lam pung 9:30 am vel chun damsel in America gam Chicago khopi ka lhung e.

Nilhah lam a hi Chicago pan Springfield, IL hi United Airline a che ding ka hin, nilhun keiyin ka ngah hin, ka len diu phat ahung lhin hin, Flight cancel ahi thu ahin phong un ahi.

Flight cancel ahi thu USA gama loi te ho ka het sah in, April 2014 kum a Yangon a hung Mr Luke in Chicago a jan pung 9:30 pm in ei hung lamdot in ahi. Chicago pan in 9:30 pm in ka kon doh lhon in, Springfield, IL chu jingkah lam 1:30 am vel in damsel in ka lhung e.

October 9, 2014 ni jing kah in Chicago pana ka pot ho United Airline in Springfield chan ahin poh chu Pinu Mary Ann toh ka ga la lhon in, West Side houin a ka ki bang pa lhon in, chujouvin, Luke leh Laura te in a ka lut pa lhon in, hia chun Missy toh jong chom khat ka tou khom uvin, natoh thu ka sei khom uve.

October 10, 2014 nin USA gampan a Israel gam che ding in ka ki gong kit tan ka hi. Nilhah lam in Chuck leh Mary Ann in Chatham, IL pan in St. Charles, MO chan ei hung thah lhon in, hia chun jankhat ka geh uve.

October 11, 2014 ni jing kah pung 8:00 am in St Charles pan in St Louis International Airport ka lhung un, Israel ka ki lhon pi ding ho toh Airport a ka ki muto uve.

Myanmar gama kona ka lhunna sot nai louva Israel gam lang ka jot pai ding thu leh ka airticket chunga ka min ana le tun u leh chule ka min spelling jong akhel jeh un St Louis International Airport a Security hon ei ging mo un ahi.

Hia kon chun Security mopo mi leh mi 5 lang sang in, ka von poh ho jouse pha te chan akhol uve. Machine toh ani akah akhol uvin, hiche ei khol kah sung u hi minute 35 asot e. Chujouvin asung a ei lut sah bep uve.

St Louis International Airport pan in Newark Airpot ka jon un, hia kon chun Israel gam Tel Aviv International Airport ka jong pai un, October 12, 2014 jing kah lam pung 9:30 am in Israel gam ka lhung uve.

Tel Aviv International Airport a kon in Mediterranean Sea lam ka jon pai un, hia chun sun an ka neuvin, lim jong tampi ka ki la uve. Chujouvin Ceasarea khomun ka ga che kit uve. Roman te khang laiya Theater leh mun chom chom ho ka ve le uve.

Chujouvin Mt Carmel chunga ka che kit uve. Hiche Carmel mol chunga hi Prophet Elijah leh Baal prophets ho ana ki tet uva, Prophet Elijah in ana jo ahi. Hiche mol hi Pathen galjona mun ahi.

Carmel mol ka khol chai uvin, Nazareth ka jon pai un nilhah lam kho jin chip chip in Nazareth ka lhunguve.

Banjop ding…..

Dr Nehkholal
Jerusalem, Israel

1 comment to Israel Gamsung Kakholnao

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>