TAMU KHOLJINNA July 21-August 6, 2014

Thupatna

Tuchung Tamu lam ka khol jin hi July 21 pan August 6, 2014 chan ahin, nikho agom in ni (17) asot e. Ka ga khol jin lo na ajeh chu Namihan, Khampat, Tingkaya leh Valpabung houin sah thu, chule Holkom khoa in kisah thu ho ahi.

July 21, 2014 ni sun lam in Yangon International Airport a kon in Myanmar Airways van leng in ka leng tou un, minute 45 vel asot jouvin Mandalay International Airport ka lhung un, van leng chunga minute 15 vel ka tou den un, Kalay Myo Airport ka jon pai uve. Mandalay leh Kalay Myo hi minute 50 vel bep asot e.

Pu KipkhawlianPu Kip Kaw Lian Tawh Kilhonna: Germany gama cheng Chin National Front (CNF) Chairman pu Kip Khaw Lian toh ka ki lhon khom lhon in, Yangon leh Manday ka len sung un, ka ki houlim lhung kei lhon e. Pu Kip Kaw Lian hi Siyang minam ahin, politics lama lung luta, politics natong mi ahi. Tun ajinu toh Germany gama acheng lhon e.

Ama hung kalson na hi “Chin Forum” mina Kalay Myo, Majesty Hotela “Federal Consultation” a dia hung ahi. Myanmar gamsung kivaipohna hi Federal dihtah ahina dia mipi te ho hilchetna anei got u ahi. Hiche kimutona hin gamchoma kona mihil them ho jong ahung pang uve. Kei jong hiche consultation a pang pai din ei tem in, ahin hiche kina hung aki hi lou jeh in, ka pang poi je.

Kalay Airport ka lhun un, Saya Enoch, Chin National Conference: Hakha, a ka kihet pi pa leh aloi pan Tamu bus parking chan ama ni gari in ei hung thah lhung lhon e. Hia chun bus ticket ka cho paiyin, Tamu a kona Saya Kam Len Thang leh Tingkaya a kona Pa Tongpao toh ka ki muto un, cha ka don khom uve.

Sy Kam Len Thang Toh Kilhonna: Nilhah lam in bus neo in ka hung kon doh un, 56 miles muna Restaurant a Saya Kam Len Thang toh nilhah an ka ne khom lhon e. Phat chom khat jouvin, ka hung kon doh pai kit un, lam dung lhung in ka ki houlim lhon in, thu pha chompi ka sei doh lhon e.

Mile 56 muna ka ki choldo nao vah “mom lhum” dip thum ka chon, Kanana chapang ho neh din dipkhat ka pen, dip ni ka po paiye. Nilhah lam kho jin kon in damsel chan Bokkan ka lhung uvin, Bokkan a jan khat ka geh pan ka hi.

Rev Lun Kho Thang Toh Kilhonna: BKTKJ Area (Bokkan, Kanan, Tingkaya, Khampat, Jonglon houbung ho) pastor Rev Lunkhothang jong houbung ho ahung vil lai tah ahin, Bokkan kho mun a ana lhung in, kho sung mite ho toh ka leng khom uve.

July 22, 2014 ni jing kah in Bokkan khosung office muna Hospital leh mun kilheh ding thun meeting ka neiuve. A hung kikhom haosa upa ho leh kho sung mite ho toh hospital tohgon thu akisei khom in, hiche thu hi July 26, 2104 ni teng leh Khangdong Hall muna kimuto khoma thahsei kit din thulhuh aki bol e.

July 22, 2014 sun lam in Rev Lun Kho Thang toh motor cycle khat cheh in Tamu lam ka hin jon lhon e. Katouna motor cycle hi lui deh ahin, hol ahah sa ma man, Tuidimjang a khat vei bou ka kai ngan, chu kalse lam dung lhung in, ki nga lou hel in, ka hung lhai lhung keiye.
Namihan Houin sah thu

Tamu lang ka hung lona ajeh pha chom pi aum in, adeha ka hung lona pen chu “Namihan houin sah jom thei lou” thu ahi. Hou in foundation kichai, khom jouse kitPr Nehkholal Sermon ung doh ta, achung thihkang jong ki khu doh ahitan, hichan aki chai nunga Municipal lamkai ho heng ana kilhut lou jeha houin sah kho ngai dia thu ahung peh u ahi.

Hou in muna ima natoh thei ahi tah lou jeh in, houin kot len leh kot neo ding thing ho chu KCCM office lama houbung hon alhoh un, thingthem (carpenters) hon office muna chu atoh u ahi. Thingthem ho jong athem lheh un, chom khat kah in ana tong chai uve.

Yangon ka um sung in jong houbung lamkai, khosung lamkai leh lamkai chom chom hi chu gal a kon in, office lama ho toh kihou ding dan akisei yin, amah on jong pon tho tah in pan ala un hi.

Namihan houin banjom a sah thei kit ahi ding thu chu July 21, 2014 (Yangon a kona ka kon doh ni) chun houbung lamkai leh khosung haosa pa henga Sorkal lamkai hon asei peh un ahi.

Pathen thil gon jong hin tin, ka lhun lhun chu phalpehna thu lam a boi ta louvin, houin sah jop pai ding tohgon aki gong paiyin ahi. Pathen in iyakai eigon toh peh u hi ti aki lang in, Pathen thang vah in um jing ta hen!

Insahna lama cheh (bricks) gol them U Khin Mg Lwin toh kihou tohna aki neiyin, ama leh aloi hon jong pon tho tah leh thanom tahin ahung kon pai un, hou in bang cheh lhang ho aki golpaiye.

Namihan Christian ChurchNi ni, nithum sung in hou in bang te ni cheh aki gol chai jin, natoh ama chal hut hut jeng e. Hiche laitah hi Namihan houbung mite ho louna toh khoh laitah ahi jeh in, koima ahung doh pouve.

Houbung mite ho louna toh leh changkho aboi lai tah u ahin, sol le ding jong aum jou pon, Pa Holmang leh Pa Demlun in avatna chan in, thih kil cho, thingat sah, ti ho leh adang dang ho a alhai le lhon in, natoh pha chompi ama chal lheh e.

Hou ajet avei, anung lam leh ama lam jouse cheh aki gol lhung soh kei tai. Amai lam jong phate chan cheh aki loi nam tai. Ajet le avei lam jong pha chompi aki jol nam tai. Hou in lut na kot jong houbung lamkai ho deina bang tah in kot len 2 aki hon peh e.

Tuna toh ding ho chu: 1. Abang jouse cement loi nam ding, 2. Windows ho man (glasses) to ding, 3. Kot len 4 jong sem ding, 4. alhong cement pha ding, chule 5. Mailam achung khu khu ding ti ho ahi.

Namihan houin sah chaina dia hi sum pha chompi lut nalai ding ahi. Sunday ni ni (July 27 leh August 3, 2014) sung in jing kahlam houkai khomna Pathen thuseina phat ei pe un, houbung mite ho tilkhouna thu ka seiye.

KCCM Lhacha ho Taokhom leh Uniform Thu

Ministers' Prayer MeetingJuly 25, 2014 nin Tamu khopi kimvel hopsunga um, Kuki Christian Church of Myanmar (KCCM) houbung lhacha ho toh KCCM office a kimutona, Pathen vahchoila sahkhomna, taokhomna leh phatthei (love gift) kihopna akineiye. Hiche nin ahsa changnoiya kihon an tuitah aki ne khom e.

KCCM lhacha ho sang khol (uniform) nei ding thu akisei khom pai yin, neidin pha akisan, mikhat in dang ka Ks. 5,000 cheh akitoh ding, Dr Nehkholal in mikhata dia sum Ks. 3,000 ato peh din aki sei khom e. Apet pet in lhacha khat cheh-in sum Ks. 5,000 cheh akitoh doh paiyin, Dr Nehkholal in jong atoh doh paiyin ahi.

Sangkhol pon jat lheng ding in Saya Thengkhomang leh Saya Ngamzathang mopohna aki pen ahi. Taokhom kichai chai yin, lhacha hon sangkhol khuina muna jon pai-un, sang khol khui ding pa henga aga kite pai un ahi. Lhacha hon sang khol kibang phat sot louva ahin nei pai diu ahi tai.

Homalin gam kai langa lhacha ho jong lhacha sangkhol anei theicheh na diuva tohgon nei din akigong e. Homalin a khuiya pham, Tamu langa khuiya pham, lamkai hon ahin ngaito kit diuvin, aki gel tai.

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>