THEMGAO HO THUSIM

Themgao Tah leh Themgao Lhem

Bible sunga Pathen in analhen doh’a, ana manchah mipha chompi aum e. Pathen Ama tahin Amite ahou limpi nom teng leh milung theng leh thudiha chonho ana mang cha jin ahi. Ama ho chu Themgao tin aki kouvin, English paovin Prophet akiti’e.

Themgao ho laha Themgao tah beh leh Themgao lhem tin aum e. Themgao lhem jong aja aja in ana um uve. Themgao lhem ho chun ama ho lung gel ngaito leh leng le lal ho lung holna thuphon asei jiuve. Themgao tah beh ho vang chun leng le lal, mihem koi ma aging pouvin, Pathen in asei sah thu chu thi ngam hel’a aphon doh jiu ahiye.

Themgao Hopni’a Kikhenna

Themgao lekha buho chu “Major Prophets” leh “Minor Prophets” tin hopnin akikhen uve. English paova Major akiti teng thupi chom’a, Minor akiti teng thupi behseh lou tin alam doh in ahi.

Ahin hiche Themgao ho kikhenna’a Major leh Minor kiman hi Themgao ho thupi chomna leh athupi lou tia khenna ahipon, Themgao ho thusei sao jep ahilou leh thukisun sao jep ho chu Major Prophet atiuva, Themgao ho thusei chom jep ahi lou leh thukisun chom jep ho chu Minor Prophet tia amin vou ahiye.

Themgao 17 Ho

Thulhunlui sunga Themgao ho lekha bu agom in bu some le sagi (17) aphan ahi. Hiche Themgao lekha bu ho chu Themgao Thusei Sao lekha bu leh Themgao Thusei Shom lekhabu ho tin khan ni in aki khen theiye.

Themgao Thusei Sao ho chu bu nga (5 books) aphan; Isaiah, Jeremiah, Lamentations, Ezekiel leh Daniel ahiye. Themgao Thusei Chom ho chu bu som le bu ni (12 books) aphan, Hosea, Joel, Amos, Obadiah, Jonah, Micah, Nahum, Habakkuk, Zephaniah, Haggai, Zechariah, leh Malachi ahiuve.

Themgao Khangthum’a Kikhenna

Themgao lekha bu ho hi achomlam in khang thum in akikhen kit’e. Israel te ho Babylon te khutnoiya Sohchan Masang (Preexilic Period: 850 B.C-586 B.C), Sohchan Sung (Exilic Period: 605 B.C-535 B.C) leh Sohchan Jou (Postexilic Period: 520 B.C-400 B.C) tin khang thum in akikhen e.

Sohchan Masang (850 B.C-586 B.C) khangsunga kisun themgao lekhabu ho chu, bu 12 (bus om le bu ni) aphan ahi. Obadiah, Joel, Jonah, Amos, Hosea, Micah, Isaiah, Nahum, Zephaniah, Habakkuk, Lamentations leh Jeremiah ahiuve.

Sohchhan Sung (605 B.C-535 B.C) khangsunga kisun themgao lekhabu ho chu, bu 2 (bu ni) bou ahin, hiho chu ahi leh Daniel leh Ezekiel ahiye.

Sohchan Jou (520 B.C-400 B.C) khangsunga kisun themgao lekhabu ho chu, bu 3 (bu thum) ahin, hiho chu Haggai, Zechariah leh Malachi ahiuve.

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>