Ngailutna (Love)

“Kathupeh chu ken ka-ngailut banguva nang ho khat le khat naki-ngailutto cheh diu hi ahi” (John 15:12).

Ngailutna thu hi mitampin akisei jinge. Nu-pa kingailut ding, u-cha kingailut ding, gol le pai kingai lut ding, heng le kom toh kingailut ding, kho le veng toh jong kingailut ding, chule houbung sunga jong khat le khat kingailut ding ti thu hi mi jousen akisei jing in, phat tin in akija jinge.

Ngailut thu avel vela kisei ho i-jah jing vangun, ngailutna lim le mel chu akimu doh jouji poi. Ngailut thu hi seitho leh bil’a jah mai maiya kichai louva, ngailutna lim chu mihem te mit’a mudoh theina dinga hinkho’a toh doh angaiye.

Khat pohgih ngaijang peh chu ngailutna’a kon ahi. Neh le chah, sil le chen bei ho kithopi jong chu ngailutna hung kon ma ahi. Dam lou vil’a taopeh chu ngailut jal ahi. Hesoh genthei ho panpi jong chu ngailut jal ahi. Nalung sung’a ngailutna dih tah nanei leh, hichun mite ho mudoh theiya na atoh ahi.

Ngailutna dih tah chu Pathen’a kon bou ahi. Mitem lunggela, kingailutna hi asot poi. Pathen’a kon ngailutna hi tonsot’a um jing ahi. Mihem ngailutnan adan bikhen leh teptena khat aneiyin, Pathen ngailutna hin akhonbei hel’a, chule tepte bei hel’a um jing ahi. Pathen mi ngailutna hi ilung sunguva acham teng, mihem te leh asemsa thil jouse chunga ngailutna anei thei ahi.

Ngailutna hi i-lungsung-u, i-insungu, i-kho le veng sung leh houbung sunga chamsah jingu te. Hia chu chamna, lungmonna, kito-delna leh phattheina um ahi.