THU (Pathen) leh Thu-bahkai

Thudoh:

1. Pathen hi i-pi tabang ham?
2. Pathen hi abai lamtah a i-ti kihe thei ding ham?
3. Pathen i-tiu leh THU kiti hi i-ti kisam kaiyem?
4. Pathen i-hou dan u leh thu’a i-kilam kai dan u kitoh nam?

Thupatna:

Pathen akihou vang in hechen louva hou akitam-e. Hetcheh lou jong chu hilchetna alhahsam jeh ahin, hilchetna alhahsam jeh jong chu Bible’a Pathen umdol khol doh lou jeh jong hinte. Achung’a thudoh ho adonbutna (answer) i-het teng u leh Pathen hi-na kihechen theiyinte. Bible chang phabep’a kon hetdoh thei ahiye.

Thulhun lui (OT) leh Thulhun thah (NT) sunga kon in Pathen hi-na, a-lunggel, leh a-natoh ho akihe doh theiye.

Pathen =THU 

John 1:1 sung’a, “Semtil chun THU ana um tan, THU chu Pathen to umkhom ahin, THU chu Pathen masap (kibang) ahi,” akitin ahi. Pathen i-tiu leh THU i-tiu hi achom chom’a khan thei ahipoiye.

Genesis 1:1 sung akisim leh Pathen thilsem kipat thu akisim doh theiye. Pathen in thil i-yakai iti ahinsem thu lhing sel in akisun e. Thilsem jouse hi Pathen in athu neina’a asem doh ngen ahiye.

Pathen in athilsemna-a, “…hung vah hen, …kidal hen, …keh doh hen, …kigol u hen, …hinsal vah-u hen, …a dung avaiyin hung leng u hen,” huham nei tah in thupehna aneiyin ahi.

Hebrews 4:12 sunga, “…Pathen THU hi, hing jing le natong hat jing, hemto chamjam sanga jong hem jo, ….” tin akisei ye. Pathen THU hi huham nei tah, thilbol theitah leh thahat tah ahiye.

Achunga hung kisei banga Pathen thu hi natong hat jing ahi toh lhon’a, Pathen in semtila chu Thu leh Kamchang ngena thil i-yakai anasemdoh ahi.

THU leh Thu-bahkai

Pathen i-tiu hi THU tina jong ahi. THU (Pathen) hi tonsot’a um jing ahin, vannoi ya mihem te jouse jong THU noiya kivai po ahi. Mihem te dan sem jouse jong THU (Pathen) a kon (BAH KAI) ngen ahi.

Thu bahkai

Tuni vannoi mite i-kivai homnao, i-kilamkainao leh i-kiboi nao hi thu bahkai ngen a boi i-hiuve. Hiche Thu-bahkai chu THU bulpi toh akito masang se’a boi jing ding ahi. THU bulpi leh Thu bahkai aki kaijop teng leh bou hia chu sochatna um ahi.

Thu khumkhana

Pathen hou ten i-khohsah diu chu i-hinkho mannao leh i-natohnaova THU umdol ahilou leh Pathen dei toh kitoh hi nam ti hi ahi. I-kiloikhomnao leh i-um khomnao jong hi THU sunga hi nam ti hetchet angai ye.

Pathen ti’a i-minvo’uva, i-kou jing’u THU chu i-sunguva ahung chenna, THU chun vai ahin hom teng hia chu Pathen lungdeina, Pathen lunglhaina, Pathen phattheibohna leh tahsa-lhagaova sochatna chu i-chan jing diu ahi.