Sermon on Church Dedication

HOU IN THAH LHANDOHNAA HOULIMNA
July 9, 2017                                                                                                Dr Nehkholal

Valpabung Kuki Christian Church hou in thah lhandohna kinthenga hunglha tahsan chate jouse chunga ngailutna salam kahin bol e. Hitabang’a hou in loupi tah ahung kisah doh theina leh lhandohna kin i-man thei u hi Pathen thilbol theina leh tahsan chate ho panlah khom jeh ahi.

Christian te dia Pathen leh mimal khat cheh thutah leh lhagaova kivop ding hi thupi pen ahi. Chuban kit’a Jesu Christa tahsan ho chu khat le khat kidou louva kivop (fellowship bol ding) jing ding ahijoi. Pathen toh kivop’a chubana tahsan chate toh lung khat le thakhat a kivop ding hi Pathen i-hou lo-nao ahi.

Kuki Christian Church of Myanmar in achung’a kisei thulu ni hi akigel khoh in akho akho’a tahsan chate ho jong Pathen toh kivop’a chule khat le khat, lung khat le thakhat’a tahsan na pilhinna ding adoi cheh diu dei um pen ahi.

Christian te ho chu Pathen toh ahung kivop jing’a, lung khat le thakhat’a pan ahin lah khom teng u leh bol-lel anei ngai pouve. Thahat chung nung Pathen lhakang louva i-tuh chah uva, tahsan chaten taona leh natoh’a pan i-lah khom teng u leh Pathen dei ahi pou pou le, alo lhing jeng ahi. Tunia i-toh i-bol u hi Pathen lung lhaina leh Ama lung deilam i-bol khah diu athu pen ahi.

Proverbs19:21 sung’a “Mihem in thilgon tampi nei jong leh Pakai lung deibou kibol doh ding ahi” ati. I-yakai Pathen thilgon sung’a i-che teng lung nop aum in, natoh akimol so theiyin ahi. Pathen panlouna’a lolhinna aum ngai poi. Pathen lungdei ahi jeh in hou in 64’ x 27’ aki tung doh tai!

Pathen in athilsem ganhing le mihem te ho semthah na ding in Noah kong sui din angen sen ahi. Vannoi ganhing jouse huikhom theina ding kong sui ding chu thil bai ahi poi. Kong in chu adung tong 300, avai tong 50, atun tong 30 chule dan 3 hi ding ahi (Gen. 6:15).

Hiche thilsem huhing na dia kong chu asui dia Pathen in Noah angense ahi. Noah in Pathen angailun, Pathen toh akivop in, hiche khang laiya dia nolnabei mi, chule midih ana hiye. Noah in kong innei chu aji, achate leh amou-te toh lung khat le thakhat’a anasui u ahi. Pathen solna chu Noah te inkon atohuva Pathen tohgon lolhing jeng ahi.

Hiche Noah thusim kichai nung hin mihem te akihou toh un, ama ho cham in khopi semding tohgon agong uvin ahi. Mihon “Khopi khat semu hitin, in-sang, atingvum vanto kibang khat sau hitin i-min kithansah-u hite, achu tiloule leiset chunga i-kimoh thethang gam diu ahi” atiuve (Gen.11:4).

Hiche khopi khat, atingvum vanto kibang khat sahding tohgon hi Pathen loupina dia kigong ahi pon, Pathen tohgon jong ahi poi. Mihemten ama ho lung gel ngaito ase khomuva, ama ho min thanna dia agon’u ahi.

Pathen dei ahi lou jeh in, Pakai Ama tah in miho chu leiset chung’a athecheh soh phat’in akhopi sah ban ahai tauve (Gen. 11:8).

Achunga Noah kong sui leh Mihemte khopisem thusim teni akivet leh kicheh taha kihedoh thei phachompi aum e;
1. Noah kong sui ding hi Pathen tohgon ahin, khopi sem ding chu mihemte ho tohgon ahi,
2. Noah kong sui chu inkon khat bou ahin, khopi sem ho mitampi ahiuve,
3. Noah kong chu thilsem ho huhhing na ding ahin, khopi kisem chu mihem te ho minthanna ding ahi,
4. Noah kong sui chu Pathen in apanpin, khopi semna achun Pathen apang poi,
5. Noah kong chu Pathen in asui chai sah in, khopi tohgon chu Pathen in asuh cheh peh e,
6. Noah kong chu thilsem huhhingna ahin, khopi sem chu cheh chaona joh asoh tai,
7. Noah kong sui chu Pathen’a kon tohgon ahin, khopi sem chu mihem’a tohgon ahi.

Psalm 127:1-2, sunga “Insaa Pakai apan lou leh Insa hon panna beiya asah-u ahin, Pakaiyin kho a-nga louleh kho-ngah ho mohseh a janhah ahiuve! Jingpi tah a nathouva, jan khangkima nalup’uva hitobanga nahatoh-u hi pannabei ahibouve! Ajeh chu Pakaiyin aphatcha Amite acholdosah nom ahi!

Psalm 127:1-2 sung kisei dol hi “Pathen in amite ho asu genthei nom pon, ama ho leh ama ho akisuh genthei ding jong adei poi” ti akimu doh in ahi. Pathen in amite alungset in, ahepin, athachol diu jong adei poi. Ahin ami te hin lunggim leh cholna akihol jiu ve.

Tunia tahsan chate ho mitampi i-kikhop khom’uva, Valpabung khopi sunga tahsan chate phabep in, Pathen thangvahna ding leh houkhomna ding hiche in kilam hi Pathen lungdei ahi tihi mipi ten i-het cheh diu vin dei aum in ahi. Ajeh chu Pathen dei lou leh Pathen panlouna hi leh ei ho tha le jung’a sah doh jou chi hi lou ahi. Pathen lungdei hiya chule Ama tah apan jeh’a bou tunia hiche hou in thah lhandohna kintheng i-man khom thei u joh ahi bouve.

Tunia hiche In-lou pi tah hi sahchaiya aum’a, Pathen henga kilhan doh ahi tah leh, hiche In tohgon’a kon lungmit leh tahsamit’a i-pi pi i-mu doh thei u um em? I-lung sunguva i-pi pen geldoh a pham?

Mitheng Paul in, “I-sunguva natong jing athahat dungjuiya i-thum sangule i-gel saunguva thil i-jakai thahat tah a bolthei Pa, Ama henga chun Houbung sung le Jesu Christa hong sunga akhang khangin tonsot geiyin loupina um jing tahen: Amen” tin ana phong e (Ephesians 3:20).

Chule Solchah bu (Acts) sunga Pathen chenna indol thu akisim dohthei yin ahi. “I-pu i-pa teuvin gamthip laiya, Alim kigong namu bang bangin ponbuhsan tia Mose jah’a thusei, Pathen in avetsah hettohsah na Houbuh chu aneiyun, Joshua lamkainaa Pathenin i-pu i-pateu masanga chiding namdangte anodoh a amahon gam alo lai geiyun ahinpo lut’uvin, David nikho lai geiyin aume; David chu Pathen angsunga lungset achanjeh-in Jacob Pathen Inmun amudoh din athume. Ahinla in chu Solomon in asahpeh bouve. Ahivangin Chungnungpen chu khut’a kisa in’a achengpoi” (Acts 7:44-48).

Pakaiyin Themgao Isaiah henga aseina a “Pakaiyin aseiyin, “Van kalaltouna, leiset kakengto nagap na ahi. I-tobang in neisah peh theiyuva, kachenna ding i-tobang mun neisempeh thei diu ham? Thilsem pumpi sem Keima kahi! Lung heiya nun nem, eiginga kathu ngaite chunga kalung lhaiye” ana tin ahi (Isaiah 66:1-2).

Gamchom mi, Pakai mite jop, Pakai ngailua akinbol, Choldo nikho nit a, kitah tah a Akitepna nit jing ho jaha Pakaiyin “Ka-lhang theng Zion a puiying ting, Ka-in taona phunga kipa sah ing ting, kamaicham kilhaina thil nato chu sanpeh inge. Ka-in chu namtin vaipi dia taona a kisei ding ahi,” ati (Isaiah 56:6-7).

Jesu Houin a alut’in, asunga thiljoh ho leh thil cho ho anodoh soh keiyin, sum lheng ho dokhang jouse alekhup peh-in, vapal joh ho touna jong alekhup peh soh keiye. Chule miho jah a aseiyin, “Ka-in chu taona inkiti ding ahi, tia kisun ahin, nang hon michom ho gebuh-in nasemtauve,” ati (Matthew 21:12-13; Mark 11:17).

Christian te hon kicheh tah’a i-het diuva dei um pen chu hiche Pathen thilsem leh mihem khut’a kisemson thing khom le thing jol, song chang ho, neldi ho, cheh lhang ho, cement, thihkang ho, thihkil ho chule thilsem adang dang kisu khom’a kitung doh in hi Pathen chenna in ahi poi ti hi ahi. Hiche mun hi “TAO-NA” in joh ahi bouve.

Paul in jong tahsan chate dia thukhoh pena agel thu hi Colossae kho’a tahsan chate ho ana thot in ahi;

Hijeh chun Pathen lhentum mitheng, angailute nahijeh-un lainatna, khotona, kineosah nunnem, thohhat hicheng chu kivonjo’uvin. Khat le khat kidemdaito cheh-uvin, khat’in khat chunga kiphinna anei jongle ki-ngaidamto jengun; Christan nang ho na-ngaidam bangun nang ho ki-ngaidam’uvin. Hicheng jouse chunga hin kikhankhomna chamkimpen ngailutna neiyun.

Christaa hungkon cham nan nalung sunguva vai hom hen, hiche dinga chu tipumkhat’a kikou nahiuve, chule thangvah jinguvin. Christa thu nasunguva dimset’in cheng jing hen, chihna tin chengin kihilto kithumop to’uvin, tumging to thon, houlan, thangvah to thon Lhagao lan nalung sunguva Pathen din sauvin.

Chule i-jakai nabol jouseu thu lam ahin natoh lam ahin abonchan Pakai Jesu minin bol’uvin, Ama jal’in Pa Pathen thangvah jing un (Colossae 3:12-17).

Tuni Valpabung Kuki Christian Church hou in thah lhandohnaa thupi pena kisei doh nompen chu:
1. Pathen tohgon hi mihem ten jui ding,
2. Hou in hi Taona in ahi dol leh
3. Tahsan chate ho kitil kho tou ding

PATHEN IN TAHSAN CHATE JOUSE EILAM HIL JING TAU HEN!