KCC in Rev ki mang lou:

Kuki Christian Church in Lhacha natong ho min masang’a Rev kiti min aki mang pon ahi. Akiman louna ajeh pipen tah hi Lhacha’a pang ho leh mipi ten i-hetchet theina diuvin hilchetna kahin neiye.

Rev (Reverend) kiti pao chang hi Bible sunga mun khat bouva aum in, Pathen Thenna, Pathen Hatna leh Pathen Ja-umna phon dohna bouva ki mang ahin, gil tah’a aki gel leh mihem te min masang’a put ngam jat ahi pon ahi. Ajeh chu “Atheng le ahat Pakai ahi,” tin akisun in ahi (Labu 111:9).

English version chom chom hon aman dang jong vetkah thei ahi. King James Version (KJV) in Bible alenan’a “…holy and reverend is his (God) name” atin ahi. American Standard Version (ASV) leh 21st Century KJV in “…holy and reverend is His (God) name” tin ale lhon in, New King James Version (NKJV), New International Version (NIV) leh English Standard Version (ESV) te nin, “…holy and awesome is his (God) name” tin ale gel lhon in ahi. Contemporary English Version (CEV) in, “He (God) is fearsome and holy” tin ale doh in ahi.

Achung’a hung kihil chet bang’a Reverend (Rev) kiti paochang hi “Pathen Thenna, Pathen Hatna leh Pathen Ja-umna” ho bouva ki mang ahi jeh in Kuki Christian Church hon lhacha natong ho min masang’a Rev kiti Reverend hi aki mang cha pon ahi.