ROME MITE HENGA PAUL LEKHA THOT

THUPATNA

Rome mite henga Paul lekha thot hi Paul’in Rome a Houbung gavil agot thudol’a kisun ahi. Paul thilgon dol’a, Rome a Christian ho lah a chom khat na toh a, Christian ho panhu jal’a Spain gama chepai agot ahi. Alekha hin Paul’in Christian tahsan ahetdol leh Christiante hin ding thu ahilchen’e. Hiche lekhaa hin Paul seiphong nom chengse akimsoh-e.

Rome khoa Christiante henga akipana thu asei chaiyin, adiuva ataopehna aseiyin, hiche lekhabua thupi chu Paul’in, “Kipana Thupha asei chu mihemte Pathenin them achansah hi-akipatna pat akhonna geiya tahsan anga bou ahidol aseiye (1:7).

Adoile atup hi ahilchenin: Chitin namtin, Juda mi hihen chidang namdang hijongle chonset’a kihen cheh ahiuvin, Pathen koma them chan ding angaichat nau akibange. Jesu Christa to hinkho thah a akijop mat teng thah beh a Pathento kijopmatna dol Paul’in aseiye, Christa tahsan chan chu Pathen to kicham a, Pathen Lhagaovin chonset tha neina le thinaa kona alhadoh ahitai. Bung 5-8 sunga Paul’in Pathen Danthu umdol le atahsan miho hinkhoa Pathen Lhagao thaneije aseiye.

Abanin mitin dia Pathen thilgon a hi Judate le chidang namdang kigopkhom ding aseiye, Judaten Jesu asandau hi mitinin Jesu Christa lungsetna amu thei cheh na dia Pathen thilgonin aseiyin, chule Judaten Jesu hi asan lou diuvin atahsan’e.

Achai nan Paul’in Christiante hindan ding aseiyin, midangto ki-ngailut ding aseiye, Pathen kinbol ding, gam vaipote thua nun ding le khat le khat kilungsetoa, lungthim cheh a het themna nei ding aseiye. Alekha thot’a hin tahsa thudol’a khohsahna le Pathen thangvahnan achaitai.

Asung thu hopkhen

Thupatna le doi le tup 1:1-17

Mihemin Huhhingna angaichat 1:18-3:20

Pathen Huhhingna lampi 3:21-4:25

Christa jal’a hinkho thah 5:1-8:39

Pathen thilgon a Israel din mun 9:1-11:36

Christian nun le khan 12:1-15:13

Thuchaina le tahsa kilemna 15:14-16:27

ROME BUNG 1

Salam thu

1 Christa Jesu lhacha, Pathen Kipana Thupha seiphong dia solchah dinga lhentum Paul,

2 hiche Thupha chu masanga athemgaoho’a atepsa Lekhabu Thenga kisun,

3 tahsaphe dol’a David chilhah a peng achapa thudol,

4 Lhagao Theng vanga thinna kona athodoh chun tha neitah a Pathen ahina akisep khenin, I-Pakaiyu Jesu Christa ahitai;

5 ama min vanga chitin namtin lah a tahsan vanga thua nunsahna dinga lung setna ikisan’uva solchah a pang kahin,

6 hichea hin Jesu Christa dinga kikou nang ho jong napang cheh-ui;

7 Rome a um Pathen lungsetna chang, mitheng dinga akou chengse henga I-Pau Pathen le Pakai Jesu Christaa konin lungset le chamna hung lhung hen!

Paul’in Rome khopi aphah nom

8 Vannnoi pumpia natahsan’u akiseiphong tah jeh-in amasan Jesu Christa jal’in nang ho jouse din ka-Pathen kathangvah-e.

9 Kahinkhoa achapa Thupha seiphongnaa akin kabol jing Pathen chu tang louhel’a nang ho kaminphah jing hetoh a pang ahin,

10 katao chanin alungdei lam khat ahiya akhonna beh le nang ho kahungvil thei teina dia Pathen henga kathum jing ahi.

11 Ijeh-inem itile nahatdoh theina diuva Lhagaova thilpeh phabep beh kahompeh thei le tin nang ho mukal ka-ngah lel lheh jengin ahi;

12 hichu eiho khat le khat, nang hon jong kei tahsan’a kona, keijong natahsan’uva kona ikitil khouto chehna diu kati ahi.

13 Sopite, chiding namdangte lah a katohgim ga kamu banga nang ho lah a jong kamu theina dinga, eisumo ding anaum jing jongle ijat vei nahenguva hung ding kigo kahim tihi helouva naum diu kanompoi.

14 Greek mite heng hihen koimato kisamkai loulai miho heng hileh miching ho hihen mimol ho heng hile abonchauva henga bat kaneiye.

15 Hitobang chun Rome a cheng nang ho chengse henga Kipana Thupha seiphong ding jong kigosadema um jing kahi.

Kipana Thupha thaneidol

16 Keiman Kipana Thupha hi kajumpipoi, ijeh-inem itile hiche hi atahsan jouse huhhingna dinga Pathen thahat ahibouve, amasa Judate henga chuteng Greek mite henga hiding ahi.

17 Ajeh chu hichea hin tahsan theina din tahsan vangin Pathen dihna akiphong doh tan, “Tahsan vanga them changpa chu huhhinga um ding ahi,” tia Pathen lekhabua kisun bang chun aumtai.

Namtin vaipi themmo

18 Agit louna jal’uva thudih sumanga mihon Pathen asuhmilnau jouse le achonset chengseu chunga van’a konin Pathen lungsatna ahung kiphong dohtan ahi;

19 ajeh chu Pathen thudol’a het ding lom chu amaho dia kichen veng vung ahinai, ijeh-inem itile Pathenin ahenguva aphondoh ahitai.

20 Ajeh chu Pathenin vannoi leiset asemdoh a pat Athahat kemlou le Pathen ahije alim muthei lou chengse chu asemsa thil chengsea hin kichentah-in akimudoh theiyin, hijeh chun mihon kilepna ding imacha aneipouve.

21 Hitia Pathen ahet vangun Pathen vahchoiyin avahchoi pouvin, thang jong athangvah pouve; alung sunguva ngol thubuh jeng agel’uvin, alung thim’uva ima hekhen theilouvin athimjo gamtai,

22 Akichihsah vangun a-ngol gamtauve;

23 thi tih neilou Pathen loupina chu thithei mihem le vachate, ganhing lim pouvin akhel’un ahi.

24 Hichejeh a chu amaho lah jenga jong atahsau geiya jamo tah a bol ding le alungthim’uva chon thanhoi adeichat banguva chondia Pathenin alhathau ahitai;

25 ajeh chu Pathen kitahna chu jouvin akheldoh-un, thilsem joh ahouvun, akinbol’in apangun, Asempa adondauvin, Ama chu tonsot’in nun nom jinghen! Amen

26 Hiche jeh a chu Pathen in amaho hi jahmotah huhna lama alhathau ahin, anumei ho’uvin jong ahinpiu angaidol’a manchah sangin chonna ngailouvin amangun,

27 chutobangma chun pasal hon chonna ngaidol’a numeito kitimat bol louvin, pasal le pasal huh mit’in akiveuvin jachat umtah tah-in achon thanghoiyuvin, hichenga achon gitlou man’u hi atahsauva achan lomu talen akimu cheh nauve.

28 Mihon Pathen het ding imacha akhohsah lou dungjuiyun Pathenin amaho chu lung neona lama alhathau len chon chatvaina lama chugam ahitauve.

29 Git louna tin cheng dimsoh, engset, papset, suhsetna, thangset dimset, toltha, kinah, kidohabol, doulungpoh, guhthima miseiset,

30 khat le khat kihouset, Pathen hotbol, chonval, hoitho, kiletsah, thil gilou semdoh ho, mi nu le mipa thua nung lou,

31 mi-ngol, kitahna bei, lungthim bei, hepina bei ahiuve.

32 Hitobanga chonho chu thi dinga lom ahiu Pathen thutansa ahenasauvin hitobang thil ho hi abol keovu ahitapon, abol ho geiyin pha asauve.

ROME BUNG 2

Pathen thutan dihje

1 Hichejeh chun mi thutanna pang vo mihem nang koi hile chun kilepna ding naneipoi; ajeh chu michung thu natannaa nangma thu kitan nahibouve, ijeh-inem itile mithu tan’a pang nangin mibol bol naboljin ahi.

2 Hitobang thilbol bolte chunga Pathenin thu atan hi adih-e ti iheuve.

3 Vo mihem, nangin hitobang thil ho bolte thu natanjia chule nangma tah-in jong nabol’a ahile Pathen thutan naa hoidoh nange ti nagel em?

4 Pathen mi khotona hin nangma lung heisah nagot ahilam helouva akhoto thalhinje le akho ngaisot na chule athoh hatna hi moh ngansea um nahim?

5 Hichea hin nalung tah jeh le lung heilouva naum jeh-in Pathenin lungsat nikhoa thutan dihna ahinphondoh tenga din talen nakikholjo tai.

6 Ajeh chu Pathenin mi atoh dungjui cheh a tohman apeh ding ahi;

7 thoh hattah a thilpha bol’a loupina le jabolna chule thi thei louna holte chu tonsot hinna apeh ding ahin;

8 kichang chunaa thudih nit lou gitlouna thua nungte vang chu achunguva lungsat le lhunghan chu ding,

9 thilse bol mihing jouse amasa Juda mi chule Greek mi geiya achunguva thoh genthei hesohna hung lhung ding ahi;

10 thilpha bol ho vang Juda mi masatin Greek miho geiya loupina jabolna chule chamna chang diu ahi.

11 Ijeh-inem itile Pathenin midat aneipoi.

12 Danthu neilouva chonsete chu dan beiya mangthah diu, Danthu neiya chonsete jong Danthua athuu kitan ding ahi;

13 ajeh chu Pathen ang’a midih a kisima chu Danthu jah tho ho ahipouvin, Danthu dungjuiya chonho joh chu them chang ding ahiuve.

14 Chidang namdangten Danthu aneilou vang un, amaho le amaho danthu bangin akigel’un, mihing ahinauva danthun asei bangin achonjiuve.

15 Aum chan’u hin alungthim sunguva Danthu akisutdol avetsah-in, ahet thei nauvin jong phot chetna aneiye, ajeh chu alung gel’uva them chansah le themmo chansah aum sah theiyui.

16 Kathupha seiphong dungjuiyin Pathenin Jesu Christa jal’a mihemte lungthim guh jouse thu atan nikho le kichen ding ahi.

Judate chule Danthu

17 Nangma Juda mi nahiya Danthua kisong, Pathena ki-thangat nahileh

18 Danthua kihil themsa nahijeh-in Pathen lungdei hea thilpha phochen nahitan,

19 mitcho lamkai theiya, muthima chengte salvah thei,

20 mi-ngol hil ching theiya khangdongte hil’a pang theiya kigingcha nahin,

21 chutia midang hil’a pang thei mi chu nang le nang kihilji lou nahim? Guh chatlou dia thu seiphonga nangin naguhji ong?

22 Mito jon louna ding thuseipa nang mito najonji ong? Milim hou hotbol nangman doiphung nachomji nga nem?

23 Danthua ki-thangat nangman Danthu nasuhkeh a Pathen najumso hijah ong?

24 Pathen lekhabua kisun, “Nang ho jeh-in chidang namdangte lah a Pathen min taitomin aum’e,” kiti chu adih-e.

25 Nangman Danthu nanit le cheptan aphachomin, Danthu napalkeh vang le nacheptan jong cheptan lou tobang ahitai.

26 Hitobangma chun cheptan lou min Danthu chondanho nit le acheptan lou chu cheptan’a kisim jeng lou ding ham?

27 Hijeh a chu tahsaphea cheptan lou ahivangun Danthu nit ho chun lekhabua kijih tho cheptan Dan neiya Danthu sukehpa nangma thu atan diu ahi.

28 Ijeh-inem itile polam mitvet’a Juda mi hichu atah ahipon, polam mitvet tahsaphea cheptan jong atah ahipoi;

29 sung gil’a hiya chu Juda mi tah ahin, cheptan dih jong lekhajema kisun Danthu vang ahipoi; lunggil’a lhagaova hijoh chu ahibouve, hitobang mi hin mihem pachat alopon, Pathen pachat bou aloi.

ROME BUNG 3

1 Juda mi hi hi ipi phachoma cheptan jong ipi aphatna um ham?

2 Imalam jousea phachomtah ahinai. Amasapena amaho chu Pathen thusei jouse kichinsah ahiuve.

3 Mi abang bangin tahsan da leu itin tem? Amaho tahsan lou chun Pathen tahsan aumje chu ahatmo sah thei chomem?

4 Ahinai saipoi; “Nathusei hon them nachan hen lang, nachung thu akitan teng le nangin jong jouteiyin,” tia kisun banga mihing jouse ajousoh vangin Pathen chu atah hijing hen.

5 Eiho git lounan Pathen dihna chu aphondoh le ipi isei diu ham? Pathenin lunghanna talen apehji hi dih lou ham? (Mihem dol’a kasei ahi).

6 Ahinai saipoi, achutile Pathenin vannoi thu iti atan ding ham?

7 Aman vang keima jousei jeh a Pathen kitahna chu aloupina dinga akiha phon doh cheh le iti chonse tia themmo changa ka-um nah lai ding ham?

8 Keiho themmona dinga mi abangin, “Thilpha aso theina din thilse bol’u hite,” tin aseiyui, atibangu chun Pathen taitompou hite; hitobang miho thu kitan hi adih mong ahiye.

Mihem khatcha adih aumpoi

9 Ipiba isei diu ham? Aphachomjo ium mum? Aumnai saipoi, Judate chengse themmo ichan masah diu chutengle Greek mite geiya ibonchauva chonset noiya um cheh ihiuve,

10 Pathen lekhabua kisun: “Midih khat’a khatcha jong aumpon,

11 Ahekhen thema le Pathen hol’a khatcha aumpoi;

12 Abonchan akihei mangsoh tauvin, Lam hilouva achesoh keitauve; Thildih bol’a la aumtapon, Khat’a khatcha jong aumpoi.

13 Alol hom’u la lhankot kihongjah abangin, Aleiyu jong lhep lhahna thujeng seiyin apange; Anegei noiyuvah gulse gu tobang aumin,

14 Akamsungu la gaosapna le kase jeng adim’e;

15 Thisan sona ding lam’ah akengu asep jangkhaiyun,

16 Alampiuva manthahna hesohna aum’e;

17 Chamna lampi ahepouve

18 Amit mu’vin Pathen ginna aumtapoi,” kiti bang chun.

19 Mi jouse kambinna ding le vannoi pumpi hi Pathen henga athu kitan theina dinga Danthun asei chan chu Danthu noiya umte ding asei ahi ihetauve.

20 Hijeh a chu Danthun asei bol vanga tahsa hing mihem koima them chang jou lou ding ahi, ijeh-inem itile Danthua kona chonset hetdohna um ahibouve.

Tahsan jal’a themchan

21 Tun vang Danthu le Themgaohon ahettohsah Pathen dihna chu Danthu vang hilouvin ahung kiphongdoh tai;

22 hiche Pathen dihna chu Jesu Christa tahsan vanga atahsante jouse ding ahin, koima imachom aumpoi;

23 ajeh chu mihem jouse chonsea Pathen loupina changlel ahitauve;

24 Jesu Christaa lhatdamna jal’a lugset vanga manbeiya them changkha ahibouve;

25 Pathenin Jesu chu athisan jal’a tahsan vanga kithoidamna dia miho chonset chesa asuh bei photchetnaa Ama adihje phondohna dinga atun doh ahin,

26 tulaiya jong hi Pathen chu adih ahin, Jesu tansan chan chu them achansah-in, hitobang hin Pathen Amatah adihje avetsah-in ahi.

27 Chuti ahile hoithoa kisonpi thei ipi ham? Imacha aumpoi! Danthu juijeh a hithei ham? Natoh vanga hithei ham? Khatcha ahipoi, itahsan jeh joh ahibouve.

28 Hijeh a chu Danthu dungjuiya natoh vang hilouva tahsan vanga mihem them kichansah ahi tia kaseiyu ahiye.

29 Ahiloule Pathen chu Judate chungseh a ham? Chidang namdangte Pathen jong hilou ham? Chidang namdangte Pathen jong ahi.

30 Pathen khatseh ahijeh a chu cheptan ho jong tahsan vanga them achansah a cheptan louho jong tahsan vangma them achansah ding ahi.     

31 Chuti ahile tahsan jeh a Danthu isuh mangu hitam? Ahinai saipoi, Danthu iphudet joh-u ahibouve.

ROME BUNG 4

Abraham vetkah a nei ding

1 Tahsaphe dol’a ipuluiyu Abrahamin amu chu itidol’a ba isei diu ham?

2 Abraham chu natoh vanga them kichansah hile kisonna anei ding ahin, Pathen koma vang anei theipoi.

3 Ajeh chu Pathen lekhabun ipi aseiyem? “Abrahamin Pathen atahsanin, hichu ama din themchannan akisimpeh tai,” akiti.

4 Natongpa tohman chu lungsetman kitilouvin asan dia batjoh ahi.

5 Natohvang hi  louva Pathen hephaloute them chansah Pathen moh tahsan jeng vang chu, atahsan chu ama dia adih a kisimpeh ahitai.

6 Natoh vang hilouva Pathenin them achansah ding mi nun nop dingje David’in aseiyin:

7 “Asuh khel nau ki-ngaidama, Achonset’u kichulnam ho chu anun nom’ui;

8 Pakaiyin achonsetna asimlou dingpa Anun nom ahiye,” ati.

9 Hiche nopna hi cheptan ho chunga bou ha, cheptan louho chunga ding jong ham? Tahsan chu Abraham din them channan akisimpeh tai,’ tia vang iseiyu ahitai.

10 Ahile itobanga kisimpeh ham? Chep atan jou hitai, atan masang ham? Achep tan nung ahipon, atan masangjoh ahi.

11 Cheptan louva aum laiya tahsan vanga amu them channa chu melchihna dinga cheptan hi alah ahin, hitia chu cheptan louva tahsan chengse pa ahitheiya, amaho jong them achan theiyuva,

12 chule cheptansa ho pa jong ahiya, amaho chu cheptan vangseh hilouva ipuluiya Abraham cheptan masanga tahsan anei chu ajom theina diuva jong ahi.

Tahsan jalin thutep akihedoh theiye

13 Abraham le achilhahte henga leiset alo diuva kitepna thutep chu Danthu nit jeh a ahipon, tahsan vanga them chansah jal’a ahibouve.

14 Alo ding chu Danthu juithemho ahi diu le tahsan chu kinoimanga thutep jong pannabei hiding ahi.

15 Ajeh chu Danthun lungsatna apensah ahin, Danthu beinaa chu suh khel jong umlou ahi.

16 Thutep chu lungset vanga ahiya, achilhahte jouse chunga phudet ahi theina dia tahsan’a ki-ngamjo ahin, Abraham chu ibonchauva i-pau ahijeh-in Danthu juithem mai mai ho keo hilouvin, Abraham tahsan banga tahsan chengse pa jong ahi thai;

17 thil aumlouho koudoh a umsah thei, mithiho hinsah thei, Abrahamin atahsan Pathen angsunga, “Keiman nang hi chitin namtin paa kasem nahitai,” tin akisun’e.

18 Athua kinepsah bou ahivangin ajah a kiseipeh, “Nachilhahte hitobang hiding ahi,” tia chitin namtin pa ahiding chu atahsanin;

19 kum ja khat lhing ding kon ahiya, athisa tobang atahsa le achinjeh a voi lhohsa Sarah naobu khankho ding angaito jong chun atahsan adoidehpoi;

20 Pathen thutep chu tahsanda le sonlel’in aneipon, tahsanin ahat cheh-in Pathen joh loupina apei.

21 Pathenin athutepsa chu boljong abol thei ding anom’e.

22 Hichejeh a chu atahsan chu themchanna kisimpeh ahitai.

23 ‘Ama din akisimpeh tai’ kiti hi ama dingseh a kisun ahipon,

24 thinaa kona i-Pakaiyu Jesu kaithoupa tahsan eiho chengse dinga jong kisimpeh ahi;

25 Jesu chu eiho suh khel jeh a thi dia apehdoh-u ahin, them ichanna diuva Pathenin akaithou ahi.

ROME BUNG 5

Themchan ga

 1 Tahsan jal’a them chang ihiphat’un i-Pakaiyu Jesu Christa vanga Pathen to kicham ihitauvin,

2 Amajal’a idin nau lungsetnaa hi lut theiya, kipah thanom’a Pathen loupina chang dia kinem jing ihiuve.

3 Chuti jengseh hilouvin hesoh gentheinaa jong ikipah thanom’ui; ijeh-inem itile eihon iheuve, genthei hesoh nan thoh hat asohsah-in,

4 thohhat chun chonphat asemdoh-in chonphat nan kinepna sodohjie;

5 hiche kinepna hin eijumso pouve, ajeh chu eipeh-u Lhagao Theng jal’a Pathen mi-ngailutna chu ilung sunguva long lut ahi tan,

6 ihatmo laitah-un aphat chan Christa chu Pathen hephaloute din athitai.

7 Midih khel din khattou thi ngam jeng jongle, mipha khel’a thi ding jong thil hahsa ahi;

8 hichea hin Pathenin eingailut nau photchenna eimusah-un, chonse ihi laitah-uvin Christa eiho khel din athitai!

9 Tua Ama thisan jal’a them chang ihitauvin, achung chon’a Ama vanga Pathen lunghannaa kona huhhinga iumtei diu ahiye.

10 Ijeh-inem itile adouva ipan laiyuva achapa thi chun Pathen to eisuh cham’u ahitah leh, kichamna chung chon’a Ama hinkhoa huhhinga iumtei diu ahi.

11 Hiche keo hi ahipon, i-Pakaiyu Jesu Christa vanga Pathena kipah jinga um ihuvin, Ama jal’a kichamna hi ikisan’u ahitai.

Adam chule Christa

12 Mihem khat jeh a vannoiya chonset hung lut’a chonset jeh a thina hung lut, hitia chu mitin achonset jeh a mihem jouse chunga thina hung lhung kha ahi.

13 Danthu kipeh masanga pat vannoiya chonset umsa ahitan, ahinla Danthu umlounaa chu chonset kisimlou ahi;

14 Adam a pat Mose geiyin Adam chun Danthu apalkeh a suh khel anei banga suh khel neilouho chunga jong thi nan vai anahomin hiche Adam hi ahung dingpa lim’a um’ah anahi.

15 Manbei thilpeh vang chu suh khelna to kibang ahipoi; ajeh chu mi khat suh kheljeh a mitinin athilo le, Pathen thilpeh le mi khat Jesu Christa lungset chu achung chon’a japi dia bulhing cheh jo ahi.

16 Manbei thilpeh chu mi khat chonsetna tobang ahipoi; ijeh-inem itile mi khat suh khel jeh a thutanna chu themmo chan hi ahin, manbei thilpeh vang chu suh khel jouse a kona them channa ahijoi.

17 Mi khat suh khelna jeh, hiche mi khat jeh a chu thi nan vai alotah le, achung chon cheh a Jesu Christa kiti mi khat jeh a lungsetna bulhingset le them channa dia manbei thilpeh kisan chengse chun hinkhoa vai ahom diu ahi.

18 Hita hi mi khat suh khelnan mihem jouse themmo achan le, hitobanga chu mi khatma natoh dihna chun mi jouse them achan sah a hinna apeh ahitai.

19 Ajeh chu mihem khat thu palkeh jeh a mi jouse chonse aso leh, mi khatman thu anit jeh a mi jouse them kichansah ding ahiye.

20 Suh khel akihaphon chehna dia Danthu hung lut ahin, ahivangin chonset apunbe cheh leh lungsetna apunbe cheh kit’e;

21 hitia chu chonset nan thinaa vai ahom le, hitobangmaa chu i-Pakaiyu Jesu Christa vanga themchan jal’a lungsetnan tonsot hinna vai ahom theina ding ahi.

ROME BUNG 6

Chonset’a thia Christaa hinna

1 Ipi isei diu ham? Lungsetna apunbe na dia ichonset jing diu ham?

2 Chutinai saiponte; chonset boldia thisa eiho iti chonset bol’a ihin diu ham?

3 Christa Jesua baptize ichan’uva chu Amato thinaa baptize changkhom ihiu nahet louvu ham?

4 Pa loupinan thinaa kona Christa akaithou banga eiho hinkho thah a ihin theina diuva, baptize ichan’uva chu amatoh thinaa kivui khom ihitauve.

5 Ijeh-inem itile athi banga Amatoh ithi khom’uva ahile athokit banga jong ithokit diu ahi.

6 Chonset lhacha ipan kit louna diuva chonset po tahsapheh suhmangna dia imihem luiyu chu Amato thingpel’a kikhet beh tha ahi iheuve.

7 Ajeh chu mi athi teng chonsetna ding akiletai.

8 Christa to ithi khom’u le Amato ihin khom diuva itahsanu ahi;

9 Christa chu thinaa kona kaithouva uma thi kit louhel ding, thinan achunga thu aneilou ahi iheuve.

10 Ajeh chu athia chu chonset’a khat vei thia thichai ahitan, ahin vang chu Pathena hing ahi.

11 Hitia chu nang ho tah chonset boldia athisa nakigel’uva, Jesu Christa to Pathena hinkhoma nakigel diu ahi.

12 Hichejeh chun tahsaphe lung gul thua nuna natahsau thi thei chunga chonset vaipohsah din got dauvin,

13 natibah chengseu chu chonset bolna dinga mang louvin, thinaa kona kichohing nahijeh-un Pathena kipeuvin langa, chule natibah chengseu chu adih bolna dingin Pathen din manguvin.

14 Danthu noiya um louva lungsetna noiya um nahijeh-un chonsetnan nachunguva thu anei lou ding ahi.

Dihna sohte

15 Iti dingba ham? Danthu noiya umlouva lungsetna noiya i-umjehuva ichonset diu ham? Hithei louhel ding ahi!

16 Thi lo theina chonsetna ding hihen, themchanna dia thua nun na ding hi jongle, athua nung dinga nakikhumlut napau hijongle hiche athua na nunpau sohte nahiu chu nahet louvu ham?

17 Pathen thangvah aume, ajeh chu masanga chonset soh a pangsa nang ho hi nakipeu kihilna lhongpi to kitoh-in lung giltah-in nanungtauve;

18 chonset’a kona nakilhadoh phat’un adih din sohin napangtauve.

19 Natahsapheu hatmo jeh a mihem thusei mong monga kasei ahi. Phat khat’a thilse bolna dinga thil theng loule thilse jenga soh a napumlut lhum’uva natibah changse namanchah bangun, tun jong thil bol din natibah chengseu chu adih a din pumpeh lut’un lang soh-in pansahdauvin.

20 Chonset soh nahilaiyun adih chun nahenkha pouve.

21 Tua najumpiu hiche thil hoa kona chu aga ipi nana muvem? Akichaina ga chu thina ahi.

22 Tua vang chonset’a kona kilhadoh nahitah jeh-un Pathen sohte nahitauvin, aga chu kisuh thengna hi ahin, chule achaina tonsot hinna ahi.

23 Ajeh chu chonset man thina ahin, Pathenin manbeiya apeh vang chu tonsot’a i-Pakaiyu Jesu Chrsita to hinkhomna ahi.

ROME BUNG 7

Kichen thudol’a kihilna

1 Sopi ho, Danthu hethemho kaseipeh ahi, mihem ahin laisea bou Danthun achunga thu anei nahet louvu ham?

2 Ji neisa numei chu ajipa hinlaisea Danthun akan gom ahin, pasalpa thi teng vang le ama to kigahna Danthua ongthol ahitai.

3 Hijeh chun pasalpa hinlaiyin pasal dangto chengkhom leh numei jongnu kiti ding ahi; pasal thi phat vang le Danthua kona ongthol ahitan, pasal dang to chengkhom jong leh numei jongnu kiti lou ding ahitai.

4 Hitobang chun sopite, Pathen Kinbolna naphatchom thei nadiule, thina kona ki-kaithou Christa to nahinkhom theina diuva Danthua chu Christa to thikhom nahitauve.

5 Tahsaphe dungjuiya ihin laiyun thina asodohna din Danthu Choloh jeh-in chonsetna din tahsa lunggul ahung pong jin itibah chengseu kitim mon aumjie.

6 Tua vang sut tho Danlui dungjuiya hilouva, Lha-gao hinkho thah dungjuiya lhacha natong dia, soh a eihen jiu Danthua kon kilhadoh ihitauve.

Tahsa sunga chonset khohje

7 Ipi isei diu ham? Danthu chu chonsetna ham? Ahinai saipoi, Danthua konlou hileh chonset hi kanahet lou ding ahi; ijeh-inem itile, “Papset nabol lou ding ahi,” tin Danthun sei hih leh kahetdohlou ding ahibouve.

8 Chonset’in thupeh chengse chu pansatna aneiya kasunga tahsaphe lunggul chengse atildohji ahi; hijeh a chu Danthu aum loule chonset athisa ahibouve.

9 Phat khat’a chu Danthu beiya hing kahin, thupeh ahung lhun phat’in chonset achohingin,

10 keiman kathi loi; hinna dia kipe thupeh chu ken kathiloitai.

11 Ijeh-inem itile chonset chun thupeh chu pansatna aneiya eilhep lhah a hichea chu eitha ahitai.

12 Hichea hin Danthu chu athengin, thupeh jong atheng nan adih-in aphanai.

13 Itia thilpha chu kei dia thina soh ham? Soh louhel ding ahi; hiche thupeh a kona hi chonset melsetje akichet cheh a, chonset chu thilpha pansaa keima thina boldoh chonset ahije phondohna ding joh ahibouve.

14 Hijeh chun Danthu chu lhagao lamdol ahi iheuvin, keivang hi ngaichat dimset tahsavou kahijeh a chonset soh natong dia kijohdoh kahitai.

15 Ijeh-inem itile ipibol kahi kahepoi, ajeh chu kalunggot bol louvin kahot lamjoh kaboljin ahi.

16 Kalungto lou lam kabol le Danthu chu aphai, tia nom kahi.

17 Ahinla tun hiche bolji chu kei kahipon, kasunga cheng chonset chun aboljoh ahibouve.

18 Ajeh chu hiche katahsa sunga hi thilpha achenlou kahenai, ijeh-inem itile thilpha kadei vangin aphaloujoh kaboljin ahi.

19 Hiti hin thilpha kalunggot bol louvin, kadeimo thilse joh kaboljie.

20 Kalunggot lou kabol le abol’a kei kahipon, kasunga cheng chonsetnan aboljoh ahibouve.

21 Thilpha bol ding kalunggot teng thilsen eihinphah jeng hi Danthu umdol khat’in kamudoh-e.

22 Ka-mi hina laigil’in Pathen Danthua kakipah lheh jin,

23 ahivangin kalunggot Danthu toh kidouva, katibah chengsea pansa chonset Danthua eisoh chansahji, katibah hoa hin Danthu chom khat kamui.

24 O-he, migenthei tah kahi! Hiche thina tahsaa konhin kon eihuhdoh tan tem?

25 I-Pakaiyu Jesu Christa jal’in Pathen thangvah chang hen! Ahiti bep hi kahin, kalung laigil’a Pathen Danthu lhachaa pang, tahsaphea chonset Danthu lhacha pang kahibep’e!

ROME BUNG 8

Lhagaova Hinkho

1 Hiti ahijeh chun tun vang Jesu Christa to hingkhom ho din themmona aumtapoi;

2 ijeh-inem itile Christa Jesu to eihinkhomsah-u lhagaova hinna Danthun chonset le thina Danthua kona eilhadoh ahitai.

3 Tahsaphe hatmo jeh a Danthun abol joulou chu, Pathenin chonset suhmangna din chonsetpo tahsaphe lim bang pun Achapa ahinsol’in, tahsaphea chun chonset athemmosah-in,

4 tahsaphe deibang hilouvin lhagaova chon eiho chunga Danthu deikhoh adih chu bulhitna dingin aboltai.

5 Hijeh chun tahsaphe dol’a hing hon tahsaphe lungdei agel’un lhagao dol’a hing hon lhagao dei lung agel’ui.

6 Tahsphe dei lung gel chu thina ahin, lhagao dei lung gel vang hinna le chamna ahi.

7 Hijeh chun tahsa dei lung gel chu Pathen douna ahin, Pathen Danthu noiya alut pon, hijong ahitheipoi.

8 Hijeh chun tahsaphe lung deiya hing hon Pathen alung lhaisah theipoi.

9 Pathen lhagao nasunguva achen le tahsaphe dei banga hilouva lhagao deijoh a hing nahiuve. Christa lhagao neilou mi vang chu Christa mi ahipoi.

10 Christa nasunguva achen leh, chonset jeh a tahsa thisa jong chu them channa jal’a Lhagaova hing’ah ahiye.

11 Thinaa kona Jesu kaithoupa lhagao chu nasunguva achen le thinaa kona Christa kaithoupa tah chun nasunguva cheng a-lhagao jal’a natahsau thi thei jong chu ahinsah ding ahi.

12 Hijeh chun sopite, tahsa dei, tahsaa hinna ding hilouvin, eihon hindol khoh tah ineiyui.

13 Ajeh chu tahsaphe deiya nahin’u le nathiu diu ahin, tahsa natoh chengse lhagaova nathau vangle nahin diu ahiye.

14 Ijeh-inem itile Pathen lhagao kaiho chengse chu Pathen chate ahiuve.

15 Ajeh chu kichat kitna dia soh hina lhagao nakisian’u ahipon, chamlhatthu hina lhagao nakisan’uva, hichea chu, “Abba hepa,” (Hepa! Hepa!) tia ikoujiu ahi.

16 Hiche lhagao chun eiho lhagao to kithoa Pathen chate ihiu ahetsahji ahi.

17 Chate ihiu leh gou ilo diu, Pathen gou lo ding ihiuvin, choiat’a iumkhom theina diuva ithoh khompiu leh Christa to goulo khom ding ihiuve.

Ahung lhung ding loupina

18 Tulaiya ithoh genthei nau hi khonung teng ihenguva hung kiphongdoh ding loupina chutoh tekah theiyin kagelpoi.

19 Ijeh-inem itile thilsem pumpi hin Pathen chate hung kilahdoh ding chu kinem ngui nguiya angau ahi.

20 Ajeh chu thilsem chengse ahomkeova aum hi acham’a um ahipon, Asempan aumsah ahibouve; kinepna khat ahile,

21 thilsem chengse hi mon mangthei akihenna kona akilhadoh a Pathen chate loupi tah a jalen nauva lut diu ahi.

22 Ijeh-inem itile tu chan geiya thilsem chengse hi naoso nat thoh banga pengkhom kap khom ahiu iheuve.

23 Chuti keo ahipoi, Lhagao ga chang masa eiho jong chalamthu ihiu kipohondohna ding le itahsau lhatdamna ding ngah leh’a isung cheh a peng peng ihiuve.

24 Ajeh chu hiche kinepnaa hi sohcha ihiuve; musa kinepna chu kinepna ahipoi, kon mutaa kineppi ding ham?

25 Imu loulai ikineppiu vang le thoh hattah-in i-ngah jiuve.

26 Hitobang chun ilhahsam nauva lhagaovin eikithopiuvin; ajeh chu eihon adoltah a taoje ihepouvin, sei thei louhel’in lhagaovin peng pengin eitaopeh jiuvin ahi.

27 Pathen lungdei dungjuiya mithengte dia taopehji Lhagao lunggot chu mitin lungthim kholtoh a hesoh Pathenin ahenai.

28 Thil ijakaiya Pathenin Ama ngailua alunggot bangtah a kikou ho phatna dia na atohkhom ihiuve.

29 Sopi tamtah lah a Achapa masapen ahina dinga Chapa lima agontohsa ho chu Pathenin ahetsa jong ahiuve.

30 Hitia agontohsa ho chu koujong akouva, chule akouho chu them achansah a, chule them achansah ho chu achoiat ahiye.

31 Hicheng thua hi ipi isei diuba ham? Pathenin eipanpiu leh kon eidou thei diu ham?

32 Achapa geiya khen louhel’a eiho chengse dinga pedoh jenga chun iti Ama chutoh ijakai manbeiya eipeh khomda diu ham?

33 Pathen lhenchomte chu kon ahehset thei ding ham? Them chansah chu Pathen ahibouve,

34 themmo chansah ding koi ham? Christa Jesu chu athin, achung chonin thinaa konin kaithouvin aumin, Pathen jetlama atouvin eiho din eitaopeh jingui.

35 Christa ngailut naa kona kon eiloikhen jou diu ham? Hesoh genthei le lungdonna, bolsetna le gilkel, ponbeiya um le settona chule chemjam hicheng chun kikhen thei diu ham?

36 Athudol Pathen lekhabua hitin akisun’e: “Nangma jal’in nilhum keiyin thi din ka-umun; Tha ding a gonsa kelngoi bangin eikisimtauve,” akiti.

37 Ahinla hichengsea hin eingailupau vanga eiho galjou sanga galjou ihitauve.

38 Ijeh-inem itile thi le hin, Vantilte, che-na lhongpi ho hihen, tulai thil ho le khonung thilsoh ding hijongle, thahatna ho hihen,

39 leichung le leinoi ahin, thilsem ipi hijongleh i-Pakaiyu Christa Jesua cheng Pathen ngailutnaa kona chu imachan eikhen thei louhel diu kaphochentai.

ROME BUNG 9

Pathenin Israel alhendoh

1 Christaa pansa thudih kasei ahin, thujou kaseipoi; Lhagao Thenga pansa kahet theina lunggil to kithoa eihettohsah lhon chu,

2 kalungthim’a lungdon hesoh tang louva kathoh hi ahi.

3 Ijeh-inem itile tahsaa ka-nam chanpi ho kasopite khohsah jal’a Christaa kona paidoh a uma gaosap chang jeng dia anaum kahi;

4 amaho lhentum Israel ahin, chalamthu le loupina, kitepna jouse le Danthu kipe ho gei, Pathen houdol le thutep chengse geiya amahoa ahin,

5 pului chengsea peng, tahsa dol’a Christa jong amaho guiya ahipeh-e.

6 Ahinla Pathen thu chu aguilhunda poi. Ijeh-inem itile Isreal’a peng tapou Israel ahideh pon;

7 Abraham chilhah ahijeh-uva chu aboncha achate hideh ahipouve, “Isaac a kona bou nachilhah kisim ding ahi,” tin akisei bouve.

8 Hichea hin tahsaphea chate chu Pathen chate hilouva, thutep jeh a chate chubou chilhah a kisim ahiuve.

9 Ajeh chu thutep chu hitia, “Hiche phat tah hileh kahung kit’a Sarah-in chapa khat ahin ding ahi,” kiti ahiye.

10 Chutiseh ahipoi, pasal khatseh ipuluiyu Isaac a kona Rebecca agaiyin jong,

11 Pathen lungdeiya lhenchom thudol akijopson theina din, pengkop ding achate ni apen masang, thilpha thilse abol masang lhonin,

12 atoh man hilouva akoupa jeh joh a ahina din, Rebecca jah a, “A-upajoh anaopa lhacha pang ding ahi,” tin akiseipeh-in,

13 athudol hi Pathen lekhabua jong; “Keiman Jacob ka-ngailun, Esau kahoi,” tin akisun’e.

14 Ipi isei diuba ham? Pathen chu dih lou isah diu ham? Adihmo nai saipoi.

15 Ajeh chu Mose jah a; “Keiman kalungset nompa kalungset’a, Kahepi nompa kahepi ding ahi,” tin aseiye.

16 Hichejeh chun hiche hi lungtup man le deichat man ahipon, Pathen hepina joha ahibouve.

17 Ijeh-inem itile Pharaoh jah a Pathen lekhabun, “Kathahat kiphonna ding le leiset pumpia ka-min kihetdohna dinga keiman nang hi katun nahi,” tin aseiye.

18 Hijeh chun Pathenin alungset nompa alungset’a, agot chana lung tahsah ahi.

Pathen lungsat chule ahepina

19 Hichea hin nangin kajah a, “Ahile ibol’a Pathenin mi athemmosah ham?” tin nate. Ajeh chu koiham alunggot phal lha thei ding?

20 Vo mihem, nang koi nahiya Pathen nakinahpi ding ham? Thilsem chun Asempa jah a, “Ibol’a hitia neisem ham?” atijim?

21 Belleiset lhang khat’a kona bel khat lutah aden a, khat manbaiya den ding belleiset chu beldengpa thu thu hilou ham?

22 Pathenin alungsat phondohna ding le athilbol theina hetsahna din, mangthah dingsa lungsatna bol ho chunga thoh hat lheh jeng hen,

23 loupina dinga gonsa akoi hepina bel ho chunga abulhinje thupina toh kihetdohsah nom hen hile,

24 eiho keo jeng kou louva Judate lah hihen chidang namdangte lah hijongle akoumo ham?

25 Pathenin Hosea lekhabua aseiyin; “Kamite hilouho chu Kamite tia kakouva, Kadeimonu chu Kadeinu kati ding ahi.

26 Ajah-uva, ‘Kamite nahipouve,’ akiti nalai tah-uva ‘Pathen hing chate’ kiti diu ahi,” ati.

27 Israel thudol’a Isaiah-in kho asamin, “Israel chate Twikhanglen panga neldi jat phajong leu amoh themchabou sohcha diu ahi.

28 Ijeh-inem itile Pakaiyin leiset chung thu asuh choma atanchai ding ahitai,” ati.

29 Isaiah-in anasei masah: “Hatchungnung Pakaiyin chikhai louva eikoiyu hileh Sodom dung isun’uva, Gomorrah bep ihi diu ahi,” ati.

Israelte chule Kipana Thupha

30 Ipi isei diuba ham? Ajeh chu dihna dinga themchan gut louhel chidang namdangten dihna amu hi, tahsan vanga themchang ahiuvin,

31 ahinla Danthu dungjuiya dihdoh ding deina themchan goa Israelten la amudoh joupoi.

32 Ipijeh ham? Tahsan’a hilouva natoh a mu agot jeh-uva ahi. Amaho chu kipana song chunga kipal lhu ahitauvin,

33 Pathen lekhabua hiti hin: “Ven, keiman Zion’a Song kadon, Hichun miho akipalsah a, Songpi hin miho akipalsah ding ahin; Amavang atahsanpa chu kijumso lou ding ahin,” akiti.

ROME BUNG 10

1 Sopite ho, kalhungthima kadeipen tah Pathen henga kataona chu amaho huhhinga aum diu hi ahiye.

2 Amaho hi Pathen lama tom ngaitah ahiu keima tah ahetoh kahin, ahivangin hetna to kitoh a abol’u ahipoi.

3 Pathen dihna ahet loujeh-un, achamtah-uva dihna ding ahol’un, Pathen dihnaa chun alut pouve.

4 Ijeh-inem itile Christa chu atahsan jouse themchanna dinga Danthu khumkhana ahitai.

Huhhingna mi jouse ding

5 Danthu dungjuiya adih thudol’a chun Mose’n, “Hiche dung juiya chon mihem chun hinna anei ding ahin,” tin akisun’e.

6 Ahinla tahsana kona dihna chun aseiyin, “Nalungthimin, ‘Koiham van’a kal ding?’ tidan (Christa puisuh din).

7 Ahiloule, “Leiset noiya kumlha ding koiham?” ti hih-in (athi lah a kon Christa puidoh ding chu),” ati.

8 Ahinla ipi aseiyem? “Hiche thu chu nakomcha aumin, Nakamsung le nalungthima aum’e,” atin; hiche thu hi kasei phongleu tahsan thu chu ahi.

9 Ijeh-inem itile nangman kamsunga Jesu chu Pakai tia naphondoh a chule Pathenin thinaa kona Ama akaithou chu nalung thima natahsan le nasochat ding ahi.

10 Ajeh chu themchanna dia lungthima tahsan ding sochatna dinga kama phondoh ding ahi.

11 Ajeh pen chu Pathen lekhabun, “Ama tahsan chan chu kijumso lou ding ahi,” tin aseiye.

12 Ijeh-inem itile Judate le Greekte kah a kikhenna aum chompoi; Pakai chu mi jouse Pakai ahin, ahenga tao jouse dinga phatna bulhingset ahi.

13 Ajeh chu koihile Pakai min’a tao chan chu huhhinga um ding ahiye.

14 Ahile atahsan lou miho ahenga iti tao diu ham? Achule jah khah lou thu chu iti atahsan diuba ham? Chujongle aseiphongle beiya itiba atahsan diu ham?

15 Chuma le aseiphong ding kisol louva iti aseiphong diu ham? Pathen lekhabun, “Kipana Thupha seiphongle ho keng iti hoitam!” ati.

16 Ahivangin mi jousen Kipana Thupha chu angaideh pouve; hijeh chun Isaiah-in, “Pakai, kaseiyu jaa tahsan a koiham?” ati.

17 Thujah a kona tahsan umdoh a, Christa thudol seiphonga kona thu kijadoh ahi.

18 Amahon ajah lou mongu ham? kati ahi. Aja nauve. “A-oginu leiset chung akithongsoh tan, Athuseiyu kolkimvel alhungsoh tai,” akiti.

19 Israelten ahet lou mongu ham? Katile; Mose’n asei masan: “Keiman nam mi hitah tah lou khat chunga kathangset sah-uva, Nam mi-ngol khat chunga kalunghansah diu nahi,” ati.

20 Isaiah-in ngam cheh-in aseiyin: “Eihol louten eimudoh-uvin, Eidong loute henga kakilah tai,” ati.

21 Israel chung changa vang, “Thu nung loute le nel hat nam mite chunga kakhut kalam nilum keiye,” tin aseiye.

ROME BUNG 11

Israel avaldoh amoh cheng

1 Pathenin amite chu apaisa hita lou ham? katile, ahinai saipoi; ijeh-inem itile keima tah jong Abraham chilhah, Israel mi, Benjamin phunga mi kahi.

2 Pathenin ahet masah amite chu apaideh poi. Pathen lekhabun itobang taha Elijah-in Israel douna Pathen henga thu asei nahet louvu ham?

3 “Pakai, amahon nathemgao jouse that gam’un, namaicham chengse jong asuchim tauvin, keichang seh bou eikhenu ahin, keijong tha din eihol hol’uve,” ati.

4 Athusei donbutna hin Pathenin ajah a ipi aseiyem? “Keiman Baal masanga dilsu loulai cheh sang sagi kakikhen nalaiye,” atibouve.

5 Hitobang chun tua hiche thudol’a jong hin lungset jal’a lhendoh amoh aum nalaiye.

6 Lungset jal’a ahile natoh vang hilou ding ahi; achuti loule lungsetna chu lungsetna hithei louding ahitai.

7 Iti tan tem? Israel’in vang ahol chu amujou tapon, lhenchomin vang amu nai; adangse vang alungtah cheh jengun,

8 Pathen lekhabua kisei, “Pathenin amaho hi lungmohna lhagao, Mumo na mit le khojahmo na nakhang apeh jeh a Tuni phat geiya hiti ahiuve,” ati bangin aum nalaiyui.

9 David-in jong aseiyin: “Aneh nau dokhang chu amaho din Thang le pel soh hen, Akipal lhuh nau le talen amatnau hihen;

10 Amit jouse thimhen, kho mu mon um jengu  henlang, chule a-itih-in ating bongin kithol’u hen,” ati.

Chidang namdangte sochatna

11 Keiman alhuhna diuva kipalsa hitalou hiuvam? katile, ahinai saipoi; Israelte thangset sahna dinga asuh khel jeh-uva chidang namdangte sochatna changkha ahiuve.

12 Hichea hi amaho suh khel vannoiyin haona aneiya, alolhin lounau chidang namdangten ahaolo le alhing keiya apan nauva ichan geiya bulhing ding hitam!

13 Nang ho chidang namdangte henga kasei ahi. Keima chidang namdangte dia solchah kahijeh a kanatoh hi kachoi-at nom ahi;

14 chutile tahsaa kajat chanpi ho kathangset sah theiya phabep kasochatsah ahiuve.

15 Amaho kipaidoh chu vannoi le Pathen kichamna ahidoh le, akilah lut kit’u chu thinaa kona hinna hijeng lou ding ham?

16 Changlhah halsi khat athenle apheng pumpia theng ahin, thingjung athen leh aphung pumpi athenge.

17 Olive thingbah abang bang akiheboh a, gamlah olive thing tobang nang ho, olive thingphung tah phatna changkha dinga akiheh bong ho mun’a kijopmat nahiuve,

18 hiche abah ho chunga chun kiletsah hihin, kithang-at jongle chun athing jung vah nang nahipon, ajung joh chun navahjoh ahibouve.

19 Nangin vang, “Keima kijopmatna thei dia abahho kiheh bong ahi,” tin nate.

20 Aphai. Tahsan loujeh a kiheh bong ahiuvin nangma tahsan jal’a pansa nahin, hoitho hih-in kichajon.

21 Ajeh chu Pathenin abah tah behho bon akhen loule nang jong nakhen lou ding ahi.

22 Hichejeh chun Pathen mikhoto themna le alungkhohje hi ven, akipal lhu ho chunga lungkhoh tah ahin, khoto na a naum jingle Pathen mi khotonaa um nang dia vang khoto them ahi, naum loule nakisat lha ding ahi.

23 Judate jong chu tahsan louva aumda theivu le kinungjop mat kit diu ahi; ajeh chu Pathenin amaho anung jopmat kit thei ahiye.

24 Athing monga gamlah olive thinga kisat lha nang bon, adanto kikal hel’a, hon’a keh olive phunga nakijopmat thei le, abahlui ho olive thinga akijopmat kit ding chu iti baicheh ding hitam!

Mitin dia Pathen hepina

25 Sopite ho, nakichihsah louna diuva hiche thuguh hi helouva naum diu kanompoi, ajeh chu chidang namdangte lhingkeiya ahung lutsoh masangsen Israelte phabep chunga lungtahna hung lhung ahin,

26 hitia chu Israel jouse jong huhhinga um cheh diu ahi, athudol hi Pathen lekhabua akisunin: “Zion’a kona mihuhdohpa hung ding, Jacob phunga Pathen nahsahmona jouse kasuhbei ding;

27 Achonsetnau chengse kasuhmang teng le Hiche hi amaho to kakitepna hi ding ahi,” akiti.

28 Nang ho khohsahna Kipana Thupha dol’a Judate chu melma soh ahiuvin, apu apateu jal’a lhenchom thudol’a vang deitah ahiuve.

29 Ajeh chu Pathen manbei thilpeh le akouna hi khel kit thei ahipoi.

30 Chidang namdang nang ho hi khatvei chu Pathen thua nung lou nahiuva, Judate thu ngai  loujeha tua hepina nakisan banguva,

31 nang ho nakihoppeh-u hepina chu amaho jong tu tua achankhah theina diuva tua hi amaho thu ngai louva um ahiuve.

32 Ijeh-nem itile mi jouse ahepi theina dinga Pathenin mi jouse hi thu ngai lounaa akhumchah ahiye.

33 Pathen haona iti thuh a, achihna le ahetna i-chan’a thuh, athutan ho kon akholtoh jouva, alamlhah ho iti kihet jou ding ham!

34 Ajeh chu: “Plakai lungthim hea koi hiya, Athumop’a pang’a koi ham?

35 Ahiloule lepeh kit dinga Ama thilpeh anapea koipen ham?” akiti.

36 Ipijeh-inem itile Amaa konle Ama jal chule Ama dinga thil jouse um ahin, Amaa chun tonsot geiyin loupina jouse um jing hen! Amen.

ROME BUNG 12

Christaa hinkhothah

1 Hichejeh chun sopite, Pathen hepina chengse jal’in nati pumpiu chu gan kihinglha theng le lah thei dol’in Pathen henga kipeuvin, tia katem nahiuve; hiche lunggil’a nahou nau ahi.

2 Nang hon hiche leiset chon hi jop dauvin, Pathen lungdei, apha le santhei dol chule chamkimna chu naphot chen theina diuvin nalunggil’in kisemthahsah-un, kikhelsoh sahuvin.

3 Eikipe lungsetna jal’a nalahuva koiya kai jah a kasei ahiye, koiman agel ding dol kalval’in alenin kigelda hen, amavang Pathenin atetoh peh tahsanna dungjuiyin min lung nemheo chan ngaito hen lang geltohjo hen.

4 Ijeh-inem itile tipum khat jenga jong tibah tampi ineiyun, ahivangin tibah chengse apan nau akibangpoi;

5 hitobangchun eiho tampi ihiuvangun Christa to kigopnaa tipum khat ihiuvin, khat chu khat tibah ihi cheh-ui.

6 Lungsetna jatchom cheh eipeh dungjuiyun thilpeh ineiyun, gaotheina changpan tahsan dungjuiya aseiya,

7 lhacha panna neiyan lhacha na atoh ding, mihil ding changpan mi ahil’a,

8 mi tilkhouna changpan mi atil khou ding, mihoppeh thei thil chang chun hongphal tah a ahop ding, lamkaina chang’an gun chutah-in kai hen, mi hepi ding chang chun lung lhaisel’in hepi hen.

Christa hinkho hindol

9 Ngailutna alem bei hihen. Ase thet bol’un, apha kolchah jo’uvin!

10 Kisopi deiyin khat le khat kideito kisato cheh-un, kijabolna dol’a abol masa ding kichu’vin,

11 gunchu lam’ah thase hih-un, lhagaova hal jingun, Pakai lhachan pangun,

12 kinepna thanom’un, genthei hesohnaa thoh hat’un, taona pontho jingun,

13 mitheng ho lhahsam kithopiuvin, ja-lhaiyin jindot them’uvin.

14 Nabolseteu phatthei boh-un, gaosap louvin phatthei bohjou’uvin.

15 Akipahte kipapiuvin, akapte kahu’uvin.

16 Khat le khat lung ngaito tha khat hiuvin, kiletsah louvin, tohmun neo neo chu’vin, kichihsah hih-uvin.

17 Thilse chu thilsea thuh louvin, japi maiya thilpha ho joh bol ding gel masauvin;

18 nang ho vang ahitheileh mi jouse toh kichamdel’in um’un;

19 ngaite, kiphulah hih-un, Pathen lungsatnaa din pedoh jou’uvin, ajeh chu Pathen lekhabua, “Phulah chu Kei kin ahin, Keiman lethuh nange,” tin Pakaiyin aseiye.

20 Chusangin “Namelma agilkel leh an nehsah-in, adangchah leh don ding pen, ajeh chu hiti bolle chun aluchunguva mei-am setkhumpeh nahi ding ahi,’ akiti.

21 Setna kijosah louvin setna chu phatnan jo’uvin.

ROME BUNG 13

Gamvaipote thua nun ding

1 Mitakip gamvaipote thu thun nung cheh hen. Ijeh-inem itile Pathen thusah louva thunei vaipohna umlou ahi; aum chengse hi Pathen umsah cheh ahibovui;

2 hichejeh chun vaipote douvan Pathen tundoh chu adou ahin, hijeh a chu adouva chun achunga thutanna akiloikhum ding ahi.

3 Ajeh chu vaipote hi thilpha bolpa dia kichat um ahipon, thilse bolpa dinga kichat um ahiuve. Vaipo kicha louva naum nom em? Thilpha bol’in, chutile apachat changing nate.

4 Ajeh chu ama khu nang phatna dia Pathen lhacha ahibouve. Thilse nabol vangle gingin, ajeh chu chemjam khu moh a adop ahipoi; thilse bol ho chunga phu la dinga ama khu Pathen lhacha natong ahi.

5 Hijeh a chu lungsat ginna maiya hilouva lunggil’a het themna jal’a thua nunjoh ding ahibouve.

6 Hijeh tah a chu kai geiya napeh-u ahi, ajeh chu vaipoho hi Pathen lhacha ahiuvin, hiti ho hi ahiljiu ahi.

7 Peh ding dol jouse peuvin, kai peh lom kai peuvin; leilo man peh lom peuvin, gin le jading dol jouse gingun jabol’un.

Kisopi ngailut

8 Khat le khat ki-ngailut tilou koima ima bat hih hel’uvin; ajeh chu midang ngailua chun Danthu abulhit ahitai.

9 Ijeh-inem itile, “Mito najon lou ding, tol natha lou ding, naguh chat lou ding, papset nabol lou ding,” kiti le thupeh dang jouse chu , “Nangma nakingailut banga naheng nakoma nangailut ding ahi,” kiti hin akaigom soh tai.

10 Ngailut hin heng le kom setna bol louvin Danthu abulhit joi.

Christa nikho naije

11 Hiche phat hi itobang ahi naheuve, hiche nidan hi ihmut’a kona khah phat ahitai; ajeh chu itahsan til laiyuva sangin tun isochatna diu anai cheh tai.

12 Jan asotjo achetan, kho vah lha pai ding ahitai. Hichejeh chun muthim natoh pai lhau hitin, khovah vonin kivon’u hite;

13 june motchon le jukham, huh le jonthanhoi, kinah le kithangset bol louvin, khovah noiya bangin chon’u hite.

14 Hiti chun Pakai Jesu Christa kivonjoh-un lang, tahsa lung nachimna din tahsa lunggul imacha suh bulhit ding got dauvin.

ROME BUNG 14

Nasopi them le mo kholdan

1 Tahsan’a hat loulai mi chu nalah-uva lalut’un lang kihouna dia lom thudol ho jong kinelpi dauvin.

2 Mi khat tahsan chun ijakai aneh thei din ageljin, tahsan’a hat lou min vang anche jeng bou anei.

3 Anea chun anelou chu oimo da hen lang, anelouvan jong anea chu achung thu tandin got da hen, ajeh chu Pathenin ama jong asang thouve.

4 Nang koi nahiya mi insung soh natong na-oimo ham? Adinsah thei leh alhuhsah thei chu apupa bou ahin, adindetsah tei ding ahi; ajeh chu Pakaiyin ama adindetsah ding ahiye.

5 Mi khat’in nikho dang dang sangin nikho chom khat thupin ageljin, abang khatman nikho jouse kibang soh keiyin angaitoi. Mijousen ama lung gel cheh kihet cheh hen.

6 Nikho khat thupi chom’a gelpan jong Pakai jabolna abol ahin, thil khat nea jong chun Pathen thangvah a aneh jeh chun Pakai jabolna ahithouve; thil khat nehda pan jong Pathen athangvah jeh chun Pakai jabolnaa aneh da ma ahi.

7 Ijeh-nem itile koima ama chang tum dia hinga jong aumpon, athia jong chu ama chang tum dingseh a thia ahipoi; ihin’u jong le Pakai dinga hing ihiuvin,

8 ithiu jong leh Pakai dinga thi ahiuve. Hichejeh chun hingu hen thi jongleu hen Pakaiya dia ihiuvin ahi.

9 Ajeh chu athi le ahing ho Pakai ahikop theina dinga Christa thia chua hingdoh kit ahiye.

10 Hichea hi ibol’a nasopi chung thu natan ham? Chujongle ibol’a nasopi nahsahmoa bol nahim? Ajeh chu ibonchauva Pathen thutanna maiya idin cheh diu ahinalaiye.

11 Ijeh-inem itile Pathen lekhabua akisunin; “Pakaiyin, ‘Keima hing jing kahin, Namtin ka-anga dilsu cheh diu, Namtin lei jousen Pathen aphonjal cheh diu ahi,’ ati,” akiti.

12 Hichejeh a chu ibonchauva ichon chan cheh Pathen henga ikisei doh diu ahi.

Nasopi kipal lhuhsah hih-un

13 Hichejeh chun khat’in khat chung thu kitanpeh pou hite; hisang chun hiche hi nageltoh diu, sopi kisuhmona ding le kipal lhuhna ding bol lou ding ahi.

14 Pakai Jesu to kahin khomnaa hin thil imacha achama thenglou aumlouje kahe chenin kanomtai; amavang thil khat chu mi khattouvin aboh a agel le ama dia boh jeng ahi.

15 Neh le chah jeh a nasopi alung hi mo le ngailut-na neiya chon nahipoi, ama dinga jong Christa thia chu naneh le na-chah-in kisuhmo sah dauvin.

16 Aphai natiu chu seiset’in umda hen.

17 Ijeh-inem itile Pathen lenggam chu neh le chah thu ahipon, adih le chamna chule Lhagao Thenga kipana ahi-joi.

18 Hijeh chun hitobanga Christa lhacha panga chu Pathen lungdei ahin, milhem jousen jong pha asai.

19 Hichejeh a chu cham lenna ding le khantouna dinga khat le khat ikitilkhouto jing diu ahiye.

20 Neh le chah jeh-in Pathen thilbolsa suse hih hel’un. Thil jouse athen vangin, min aneh achah a midang akipalsah ding aphapoi.

21 Nasopi sumang thei chu sa jong nehdaa lengpitwi jong donda chule ipi hijongle boldaa pha ahi.

22 Hiti thudol’a natahsan dol chu nang leh Pathen kah a thubou ahiye. Aman pha asah thua ama le ama ki-oimo kit lou mi chu anun nom’e.

23 Ahinla lung opkai puma ikhat nea chu athu kitan ahitai, ajeh chu tahsan’a kisong ahipoi; tahsan’a kisonna lou pou chu aboncha chonset ahibouve.

ROME BUNG 15

Nangjoh hilou naheng nakom lung lhaiyin

1 Ahatdom eihon lung lhaina mai bol louva, ahatmo pohgih ipoh hujoh diu ahi.

2 Eiho khat khat hin aheng akom chu aphat’a akhantouna dinga lung lhaisah ding i-ngaito diu ahi.

3 Ajeh chu Christan jong Ama lung lhaina hol louva, “Nakallah hon nahouset nau chu Kei chunga achuhlo tai,” tia Pathen lekhabua kisun bangin aumjoi.

4 Ijeh-inem itile thoh hat vang le Pathen lekhabua tilkhouna kisun chengse jal’a kinepna inei theina diuva ipi hile akisun jouse chu eiho kihilna dinga kisun ahi cheh-e.

5 Christa Jesu umchan jomin, thoh hat le tilkhou konna Pathenin lung khat le ngaito khat nahisah-u hen lang,

6 hiti chun nabonchauvin, ogin khatseh-in Pathen Jesu Christa Pa chu choi-an cheh-uvin.

Chidang namdangte henga Kipana Thupha

7 Pathen loupina dinga Christan nang ho nasan banguvin khat le khat kisangto cheh-un.

8 Kaseilo pen chu pute athutep phutdet dinga Pathen kitahna phongdoh dia Chrsita chu cheptan ho lhachaa hung panga,

9 amihepi jal’a chidang namdangten Pathen achoi-at theina dinga um ahin, Pathen lekhabua hitobanga hi kisun ahi; “Chidang namdangte lah a nathangvah ing ting, Namin vahchoi la kasah ding ahi,” akiti.

10 Chule avel’in aseiyin; “Vo chidang namdangte, Amite toh kipah khom’uvin,” akiti.

11 Chukit leh: “Chidang namdangte jouse Pakai vahchoiyun, Mipi abonchan Ama vahchoi cheh-uvin,” akiti.

12 Chuma le Isaiah chun aseiyin; “Jesse bul’a hung dondoh chidang namdangte chunga vaihom dia kipanpa Ama chunga hi chidang namdangte kinem diu ahi” ati.

13 Kinepna Pathen chun tahsan jal’in kipana le cham nan nadip’u hen lang, Lhagao Theng thahat nan kinepnaa nakhantousah jingu hen.

Paul’in hangtah a lekha asutlo

14 Kasopite, keima mong mongin thilpha dimset nahiuva, hetna tincheng neibukip’a khat le khat kitilkhou thei nahiu kahechentai.

15 Ahinla nang ho geldohsah kitna dinga kah lah lah leh hakat tah a lekha kahinjihji na hi Pathenin eipeh lugnsetna jeh a kabol ahin,

16 chidang namdangte henga Pathen Kipana Thupha kinbol Thempu natoh banga Christa Jesu lhachaa kapan’a, hitia chu chidang namdangte chu Pathena thilto banga santhei ahiuva, Lhagao Thengin asuh theng theina dingu kati ahi.

17 Hichejeh chun Christa Jesu to hingkhomin hiche natohho jeh hin Pathen lama kisonna kaneiye.

18 Ijeh-inem itile Christan chidang namdangte thua anunsah tilou ima kasei ngampoi;

19 Lhagao Theng thahat vanga thanei tah a melchihna tampi le thil kidang tampi aboldoh a, hijeh a chu Jerusalema pat akimvel dung Illyricum gei dimsoh hel’a Christaa Kipana Thupha eiseiphongsah lea,

20 midang khat bul phusaa insa kahilouna dinga Christa min kiseipoh khah louna chan’a Thupha seiphong ding hi ken jong katup lheh jengin,

21 athudol hi Pathen lekhabua jong hitin akisun’e; “Ama thudol kaseipeh khah louhel hon amu’vin, Athu jakha louhel hon jong ahetchet diu ahi,” ati.

Paul’in Rome phah ding agon

22 Hichejeh a hi hijat vei nahenguva hung ding kagot chu eisuhmoji ahi.

23 Tun vang hiche gamkai sunga natoh ding kachaitai chujongle kum hijat sung hi nahenguva hung ding katup jing ahi.

24 Spain lama kache teng nang ho mupajap ing ting amasaa nang ho to kivopkhamset tengu le neihung thah pai kit diu kakinem lheh jeng’e.

25 Tu’a vang mithengte lhacha kina kimang din Jerusalema kachei.

26 Ajeh chu Macedonia le Achaia gam miten Jerusalema mithengte lah a vaicha genthei ho kithopina ding sum donkhompeh ding pha asauve.

27 Ijeh-inem itile amaho acham’uva kinopto ahiuve, ajeh chu, bol dia abat’u ahi; ipi din em itile Judaten amaho chu Lhagaova chan akikop piuva ahile, amahon jong leiset thil beh a akithopiuva lom mong ahi.

28 Hiche kin hi kachaisoh a, akidongkhom chengse amaho kapeh jou teng, nang ho hinjot pang ting Spain kajot ding ahi;

29 nahenguva kahung teng le Christaa kona phattheina lhingset’a poa kahung ding kahei.

30 I-Pakaiyu Jesu Christa le lhagaova kona ngailutna jal’a katilkhou nahiuve sopite; keima dingin Pathen henga neitaokop’uvin;

31 chutile Judea gama thu-ngailoutea konin hoidoh theiying ting, kanatoh jong hi Jerusalema mithengte dia santheidol hiding,

32 chutia chu Pathen deilama nahenguva kipah thanom’a kahunga, nang ho to kacholdo khom thei ding ahi.

33 Cham konna Pathenin nabonchauvin umpiuvin: Amen.

ROME BUNG 16

1 Isopi nu’u Phoebe, Cenchrea Houbung lhacha nu hi na henguva kahinsei phat ahi,

2 ama hin mitamtah ahun, kei jeng jong eihujeh-in Pakaiya mithengte kilemto ngaidol tah-in anasangun lang, nahenguva panpi a-ngaina jousea panpiuvin kati ahi.

3 Christa Jesu dia katoh khompi Priscilla le Aquila anasalam’uvin,

4 kei hinna dinga ama ni hi lol kitan ngam’a pang lhon ahin, aseipha kei changseh kahipon, chidang namdang Houbung jouse jong ahiuve,

5 a-in lhon’a kikhom Houbung jong anasalam’un. Asia gama Christa henga lut masapen, kasahtah Epaenetus jong ansalam’uvin.

6 Nadinguva na hatoh a tong Mary chu anasalam’uvin,

7 ka-inko le kasoh chanpite ni Andronius le Junia chu anasalam’uvin, ama ni hi solchah ho lah a minthang ahi lhonin, kei sanga Christa dia lut masa jong ahi lhon’e.

8 Pakaito hinkhomnaa kasahtah Ampliatus jong anasalam’un.

9 Christa dia itoh khompiu Urbanus le kangaitah Stachys anasalam’uvin.

10 Christa dia kitahna kicheh tah Apelles jong anasalam’un, Aristobulus insung mi jouse anasalamsoh keiyuvin.

11 Kanamchanpi Herodion anasalam’un, Pakaiya luts Narcisus insung mi jouse jong anasalam’uvin.

12 Pakai dia natongte ni Tryphaena leh Tryphosa jong anasalam’un, Pakai di ana hatoh a tong satah Peris jong ansalam’uvin.

13 Pakaiy deilhen Rufus le ka-nu tobang anu chu anasalam’un.

14 Asyncritus, Phlegon, Hermes, Patrobus, Hermas chule aumpiu sopi jouse jong anasalam’uvin.

15 Philologus, Julia, Nereus le asopinu, Olympas le aumpi mithengte jouse anasalam’un. Christa Houbung jousen nasalamui.

16 Khat le khat kisalamto cheh un, kichop thengin kichop to’uvin.

17 Sopite ho, kikhen chehna ding le kipal lhuhna ding semdoh a, nakisansau kihilna toh kikal thu hil ho chu melgel’un lang, hitobang mihoa kon chun kikhindoh-uvin, tia ka-ngeh nahiuve.

18 Ijeh-inem itile hitobang miho hi i-Pakaiyu Christa lhacha kinbol ahipouvin, a-oisung va na ding bol ahibouvui; kamthem le o-ngeiyin i-hetohlou miho lungthim alhem lhauvin ahi.

19 Ajeh chu nathu nunjeu mitin henga akithangsoh tan, hichejeh chun kakipah lheh jenge; thilpha thudol’a nachih theiyuva thilse chunga monabei nahi diu kadeiye.

20 Chutia chu chamna Pathenin Satan chu nakengto noiyuva achilngem ding ahi. Pakai Jesu Christa lungset nan umpi jingun.

21 Katoh khompi Timothyn nasalam’ui, ka-inko ho Lucius le Jason chule Sosipaterin jong nasalamui.

22 Hiche lekha sun Tertius keiman jong Pakaiya kahinsalam’ui.

23 Kei le Houbung pumpi kikhopna ji Gaius chun nasalam’uve; khopi sunga neichinga Erastus le isopiu Quartus-in jong nasalam’ui.

(24 i-Pakaiyu Jesu Christa lungset nan nabonchauvin umpiuvin: Amen*

Tao khum kha na

25 Kalhangsap Kipana Thupha Jesu Christa thudol kaseiphong dungjui, akhang khanga kiselguh thuguh hung kiphongdoh dungjuiya nadindetsah jign theiyu,

26 tonsot Pathen thupeh jal’in tahsan vanga thua nunsahna dingin chitin namtin henga jong tun Themgao lekhabua kisun dungjuiyin ahung kiphongdoh tai.

27 Pathen ching khatseh chu Jesu Chrsita jal’in tonsot’in loupina chang jing hen: Amen.

*Abang in chang 24 hi akoiya.