JOSHUA LEKHABU

JOSHUA LEKHABU

Thupatna
Joshua lekhabua hi Mose thakhel Joshua lamkainaa Israelten Canaan gam asat’u thusim kisun ahi. Hiche lekhabua melchih thei kijih lut ho chu: Jordan galkai thusim, Jericho khopi lhuh, Ai khopi gal, Pathen le amite kah a kitepna semphat thusim ahi. Hiche lekhabua japi het simmun chu: “Koipen nahou diu ham tunin kilhen’un… Keile ka-insung miten vang Pakaibou kahou diu ahi,” (24:15) kiti lai hi ahi.

Asung thu hopken
Canaan gam ajo’u 1:1-12:24
Gam kihop 13:1-21:45
Jordan gal nisolam gam 13:1-33
Jordan gal nilhum lam gam 14:1-19:51
Hoidohna khopi ho 20:1-9
Levite khopi ho 21:1-45
Jordan solam cheng phungho gama ahung kile kit 22:1-34
Joshua lhahna thusei 23:1-16
Shechem a kitepna kisemphat 24:1-33
———————————————————————————————


Joshua lekhabu Bung 1

Canaan gam jou dia Pathenin Joshua asol
1 Pakai lhacha Mose thi nungin, Mose kithopipa, Nun chapa, Joshua koma Pakaiyin,
2 “Kalhacha Mose athitai. Tun kigon, nangle Israelte mite nabonchauva, kapeh diu gamsung jon a Jordan nagalkai diu ahi.
3 Mose kaseipeh banga, nangle kamite hi nakitol lutna diu gamsung pumpi khu kapeh nahiuve.
4 Nagamgiu chu lhang lam nelgama pat sahlam Lebanon molsang dung gei hi ding; niso lam luipi len Euphrates a pat Hit mite gam ajotpaiya, nilhum lam Mediterranea Twikhanglen gei ding ahi.
5 Vo Joshua, nahinkho lhumkeiya koiman najotho louhel ding ahi. Mose kalhonpi banga kalhonpi jing ding nahi. Umpi jing ing ting, dalha ponge.
6 Ding det’in, lung ngamin, apu apateu kateppehsa gamsung alo tengule hiche mite lamkai ding nahi.
7 Pangdet’in, lung ngam pou pouvin; chule kalha cha Mose’n napeh-u Danthu jouse nitsoh keiyin. Ahalsi cha jong nahsah louvin boldan, nachena chan a lolhing ding nahi.
8 Pathen nahou tengu Danthu lekhajol kisimdoh tei tei ding ahi. Danthu chu sunle janin simon, asunga kisun jouse nitsoh keiyin Chutile phatheiya lolhing ding nahi.
9 Pangdet’a lung ngam dia kaseipeh chu geldoh jengin! Kichat dan, lung thoidan, Pakai na-Pathen Ken nachena chan a kalhonpi nai,” ati.

Joshua japi toh ding aseipeh
10 Joshuan lamkai hoi aseipeh-in,
11 ngahmun gakholsoh keiya japi jah a, “Neh le chah gonsan koiyun, Pakai na-Pathen’un napeh diu gamsung lo dia, nithum jou teng Jordan luipi galkai ding nahiuve,” agatisah-e.
12 Reuben le Gad chule Manasseh phung keh khat jah a Joshuan,
13 Pakai lhachapu Mose’n naseipeh-u, Pakai na-Pathen’u Jordan gal nisolam gam napeh diuva asei chu geldoh jingun.
14 Hikoma chu naji nachateu le naganchau nadalhah-uva, sepai chengse vang galvon kivon a, Israel chanpi ho kithopi dia, Jordan galkaiya amaho sanga namaste joh diu,
15 Pakai na-Pathen’un apeh-u, Jordan gal lhumlam gamsung alo kahseuva napanhu diu ahi. Pakaiyin Israel phung jouse lung monga achensah teng, Pakai lhacha Mose’n napehnau, Jordan niso lam, nagamsunguva hung kile kit thei tauvin nate,” ati.
16 Amahon Joshua jah a, “Neihil chan bol ung ting, neisolna chan’uva cheuvinge.
17 Mose sei ka-ngai bangun, nasei ngayung ting, Mose aumpi bangin, nang jong Pakai na-Pathenin umpi jingin!
18 Nathuneina isah louva, nasei ngailou jouse tha ding ahi. Pangdet’in lung ngamin!” atiuve.

Joshua lekhabu Bung 2
Joshuan Jericho ve-lhi asol
1 Thinggi ngahmun a konin Joshuan Canaan gam khol dingle Jericho khopi ve-lhi din mi ni asol’e. Jericho khopia ahung lhon phat’in numei noti Rahab inna ajan geh lhon’e.
2 Jericho lengpan Israel mite Canaan gam khol’a hung kisei thu ajan,
3 Rahab henga mi asol’in, “Na-in a lhung ho chu Canaan gam pumpi ve-lhia hung ahiuve! Hinkaidoh loiyin!” agatisah tai.
4 Rahab-in, “Mi phabep ka-ina ahung nauvin, hoilama hung kon hiuvam kahepoi.
5 Nilhum lhum, khopi kelkot kha masangin apotdoh lhontan, hoilam ajot lhon kahepoi, del leu chun manpa theiyun nate,” ati.
6 Rahab hin gam ve-lhite ni chu inchung changpol lom kise lah a asel ahibouve.
7 Lengpa misol ho khopia konin apotdoh-un, khopi kelkot akamtauve. Israel gam ve-lhite ni agahol peh-un, Jordan palmun geiyin agahol’ui.
8 Gam ve-lhite ni lup masangin, Rahab inchunga akaltouvin
9 ajah lhona, “Hiche gam Pakaiyin napeh-u kahei. Gamsung miten nakichat cheh-u ahitai.
10 Egypt dalha nahung kitol’uva, na masanguva Pakaiyin Twikhanglensan akansah thu jong kajatauve. Jordan luigal niso lam a, Amor lengte ni, Sihon le Og nathau jong kajauve.
11 Hiche kajah jah-uva pat kicha kahitauve; nangho jal’a meidoi gam kahiu ahitai. Pakai na-Pathenu hi chung van le hi leiset’a Pathen ahi.
12 Nangni kabolna banga ka-insung mite khoto tah a nabolna diuvin, Pathen min chun kihahsel lhonin, chule katahsan thei na din melchihna khat neipe lhonin.
13 Kanule kapa, kasopite numei le pasal, ka-insung mite aboncha nahinghoina diuvin kitep lhonin. Neithat hih beh-un!” ati.
14 Mite nin ajah a, “Kasei lhon banga kabolda lhon le Pathenin eithat jeng lhon hen! Kathilbol lhon naseidoh loule, Pakaiyin hiche gamsung eipeh tengu phate chan nabolnau vinge, tia kitep kahi lhontai!” ati lhone.
15 Rahab hi khopi kulpi pal a cheng ahin, hijeh chun mite ni chu bangkot a khaovin akhai lhai.
16 Ajah lhon e, “Thinglhang gam jon lhonin, ajole lengpa sepaiten mudoh khauvinte. Ahung kile kit kahseuvin, nithum bang gakisel lhonin. Nithum jou teng nachena lhon dia che lhontan,” ati.
17 Mite nin amanu jah a, “Neikitepsahna lhon chu kanit jing lhon ding ahi.
18 Nagamsungu kahindel khum tengule, tua neikhai lhahna lhon bangkot’a hin khaosan hi anaveiyin. Nanule napa, nasopite le na-insung mite jouse, na-in a hin anakikhom’un.
19 Hiche ina kona potdoh pen pen chu thijongle ama themmo ding ahin, keihon mo po pouvinge; amavang insunga naumpi khattou akita le keiho mo hiding ahi.
20 Chujongle kathilbol lhon hi naseidoh vangle, neikitep sahna lhon hi kanit lou diu ahi,” ati lhontai.
21 Amanu jong nomin amani asol mangtai. Apotdoh lhon chun bangkok’a khaosan chu aveidentai.
22 Gam ve-lhite ni thinglhang gama akisel lhontai. Lengpa seipaten nithum gamsung pumpi ahol’uvin, mula amupouve; chuphat’in Jericho ahung kile kittauve.
23 Thinglhanga konin gam ve-lhite ni ahung kumsuh-in, Jordan galkaiyin, Joshua koma ahung lhung lhontai. Thilsoh jouse aseipeh lhonin,
24 “Agam pumpi khu Pakaiyin eipeh mong mongu ahi kahe lhontai. Agamsung miten eiging thei lheh jenguve,” tin asei lhon’e.

Joshua lekhabu Bung 3

Israelte Jordan galkai
1 Ajing jingkah-in Joshua le Israelte jingpi tah-in athouvun, thinggi ngahmun dalhan, Jordan pang ajon’un, galkai ding nga nan ngahmun asem’ui.
2 Nithum jouvin lamkaiten ngahmun akholsoh keiyun
3 mipi jah a, “Thempuhon Pakai na-Pathenu kitepna thingkong aput’u namuteng, ngahmun pheuvin, anungu juiyun.
4 Hikoma hung kha louhel nahiuvin, amahon lampi nahil diu ahi. Kitepna thingkong vang nailut hih-un; anunga kilometre khat bang kilat’in dingun,” atiuve.
5 Joshuan mipi jah a, “Jing teng nalah-uva Pakaiyin thil kidang abol ding ahi, kisuthenguvin,” ati.
6 Chuin kitepna thingkong pua japi masanga che din Thempuho aseipeh-in, amaho jong asei bangin achetauve.
7 Pakaiyin Joshua jah a, “Tunia kabolgot hin mi nasa nahije chu Israelten najabol pat diu, Mose kalhonpi banga kalhonpi ahetdoh sah diu ahi.
8 Kitepna thingkong pu Thempuhon Jordan lui aphah teng, luipanga dingden din seipeh-in,” ati.
9 Hijeh chun Joshuan mipi jah a, “Hungun Pakai na-Pathenu thusei hung ngaiyun.
10 Nakitol tengu Pakaiyin Canaan mite, Hit mite, Hiv mite, Periz mite, Girgash mite, Amor mite chule Jebus mite nadeldoh peh tei tei diu ahi. Chuteng hing jing Pathenin naumpiu heuvin natin,
11 namasanguva leiset pumpi Pakai kitepna thingkong Jordan agalkai teng hetauvin nate.
12 Tun Israel phung somle nia kon, pasal somle ni lhengdoh-uvin.
13 Leiset pumpi Pakai kitepna thingkong pua Thempuhon twilah achot lut tengu, Jordan twi kangin tin, chunglama hung longse se alhuh a kihuisang ding ahi,” ati.
14 Aphat hi chang mongsan twiso lai anahi. Jordan galkai dia mipin ngahmun dalhaa akitol’u chun Thempuho amasauvin, kitepna thingkong apu’ve.
15 Thempuhong vadung lai achot lut lut’uvin,
16 twilon ban atangin, vadung nahlam, Zarethan khopi kom, Adam muna chun akidil dentai. Twimang lam a longsuh twi jouse jong akangtai, mipi Jericho khopi komcha chun agalkai theitauve.
17 Mipi tolgo lah a akitol’uva, agalkaisoh hel kahseuvin, Pakai kitepna thingkong pua Thempuho Jordan lai lung, tolgo lah a ading ding jengui.

Joshua lekhabu Bung 4

Melchihna song kiphut
1 Israel nam pumpi Jordan agalkai phat’in, Pakaiyin Joshua jah a,
2 “Aphung khai khaiya konin pasal somle ni lhengdoh-in,
3 Jordan lailungtah a song khat cheh la din seipeh-in, Thempuho dinna laitah a kano alahdoh diu ahi. Song ho chu apoh-uva, tujan nagenau ngahmuna akoi diuvin seiyin,” ati.
4 Mi somle ni alhendohsa chu Joshuan akouvin,
5 “Pakai na-Pathenu kitepna thingkong masang, Jordan lailunga khun cheuvin. Israel phung khat cheh chan din, song khat cheh hinpudoh tem’un.
6 Hiche song ho hin Pakai thilbol chu mipi ageldohsah jing ding ahi. Khonung teng hiche song ho ipi dia kitung ahi nachateuvin adoh teng,
7 Pakai kitepna thingkong Jordan galkai pet a luidung twilon akan jeng chu naseipeh diu ahi. Hikoma thilsoh jouse chu niche song ho hin Israelte ageldohsah jing ding ahi,” ati.
8 Mihon Joshua sei bangin aboltauve. Pakaiyin Joshua ahil bangin, mihon Jordan lailunga konin, Israel phung khai jat’in, song somle ni alauvin, ngahmun geiyin apo’uvin, hikoma chun aphut tauve.
9 Pakai tepna thingkong pu Thempuho dinna mun, Jordan lailunga jong chun Joshuan song somle ni ma aphutdoh-in, hiche ho chu tuni geiyin aum nalaiye.
10 Mipi bol dia Pakaiyin Joshua aseipeh chengse abolsoh kahseuvin Thempuho Jordan lailunga ading jinguve. Niche Mose thupeh ahi. Japi chu kinloiyin luidung agalkaitauve.
11 Luigal lang khat ageisoh phat’un, Pakai kitepna thingkong pua Thempuho japi masanga achieve.
12 Reuben le Gad chule Manasseh phung keh khat, galsat dia gotsa chengse jong Mose thupeh bangin, mipi sangin Jordan agalkai masauve.
13 Pakai angsunga galbol ding pasal sang somali bangin Jericho phaiya Jordan apal galkaiyui.
14 Chuche nikho a Pakai thilbol chun Israelte mitmun Joshua chu mi nasa khat ahisah tai. Mose ajabol bangun, Joshua jong ahinkho lhumkeiyin ajabol tauve.
15 Hichun Pakaiyin Joshua chu,
16 kitepna thingkong pua Thempuho Jordan luiya kona hung potdoh dia seipeh din asol’e.
17 Asei bangin Joshuan abol’in,
18 Thempuho vadung pan ahung gei phat’un, luidung twi ahung long pai kittan, akom alet pai kittai.
19 Lha masa, nisom nin Israelte Jordan agalkaiyun, Jericho gal niso lam, Gilgal a ngahmun asem’ui.
20 Hiche ngahmun a chun, Jordan luiya akhodoh-u, song somle ni chu Joshuan aphut’e.
21 Joshuan Israelte jah a, “Khonung teng nachateuvin hiche song ho hi ipi dia kiphut ahi nadoh teng,
22 Israelten Jordan lui tolgoa ajot galkaiyu chu naseipeh diu ahi.
23 Nachateu jah a, Keiho dia Twikhanglensan akansah bang banga, Jordan lui najot galkai kahseuva, Pakai na-Pathen’un Jordan twipi akansahh chu seipeh-un.
24 Hichejeh a hi leiset mitinin Pakai thaneije ahet doh diu, nanghon tonsot’a Pakai na-Pathenu najabol diu ahi,” ati.
Joshua lekhabu Bung 5

1 Jordan nilhum lam a Amor lengte le Mediterranea Twikhanglen jon a Canaan lengthen, Israelten Jordan ajot galkai kahseuva, Pakaiyin twi akansah thu ajatauve. Akichauvin, Israelite gin nan ameidoi gamtauve.

Gilgal a cheptan
2 Pakaiyin Joshua jah a, “Meituh songhem lan, Israelte chep tanpeh-in,” ati.
3 Pakai thupeh bangin Joshuan abol’in, cheptanna lhang kiti laiya chun Israelte chep atanpeh-e.
4 Egypt ahinda lhah-uva chu pasal jouse chep tansa ahiuvin, kum somali akhol tham sungu, gamthip lai ajot sungseuva pasal peng jouse khat chabeh chep tanlou ahi.
5 Chujongle Egypt ahung kondoh-uva gal sat thei pasal jouse Pakai thu angai loujeh-uva thigam ahitauve.
6 Apu apateu ateppehna gampha le hookah gamsung chonlut lou dia Pakaiyin ahahsel banguva thigam ahiuve.
7 Hiche mite chapa se se chu chep tanlou ahiuvin, Joshuan chep atanpeh ahiuve.
8 Chep atan jouvun, amaha dandoh kahsem, Israel nam pumpi ngahmun a achamtauve.
9 Pakaiyin Joshua jah a, “Tunin Egypt a sohchan vettomna kaladohtai,” ati. Hijeh a chu niche mun hi Gilgal kisah ahin, kisah jing ding ahitai.
10 Jericho kom, phaicham, Gilgal muna Israelte ki-ngah pet chun, chuche lha nisomle ni li nin, nilhah lamin, kalchuhkut amanguve.
11 Ajing nikhon Canaan gamsoh an ane masapen’ui: chang kanpoh le cholsolou changlhah ahi.
12 Hiche nikhoa pat Manna ahung lha tapoi, Israelten Manna aneitapouve. Hichea pat hin Canaan gamsoh an bou anetauve.

Joshua chule Chemjam choipa
13 Jericho ahin nai chun Joshuan amasanga mi khat chemjam choiya ding amui. Anailut’in, “Keiho sepaiho khattou nahi, melma nahim?” agati.
14 Chemjam choipan, “Hoijoh jong kahipoi, Pakai sepaite lamkaiya um kahi,” ati. Joshua tol’a bohkhup’in alhun, chibai boh-in, “Kapu, nalhacha kahi, iham neibolsah nom chu?” ati.
15 Hichun Pakai sepaite lamkaipun, “Kengchot sut khan, madonna chu muntheng ahi,” ati. Aseipeh bangin Joshuan aboltai.

Joshua lekhabu Bung 6

Jericho khopi chim
1 Israelte lut louna dia Jericho khopi kelkot jouse kikam a sepaiten a-ngau ahi. Khopi sunga lutle potle um thei lou ahi.
2 Pakaiyin Joshua koma, “Jericho khopi le alengpa chule asepai gal-hang tah tah jouse nakhut’a kapetai.
3 Nigup sunga nangle nasepaite, niseh le khatvei vei khopi kimvel’a nakijot diu ahi.
4 Sumkon choi cheh, Thempu sagi Kitepna thingkong masanga che diu ahi. Ni sagi lhin ni le nangle sepaite khopi kimvel’a vel sagi vei nakijot’uva, Thempuhon summon amut cheh diu ahi.
5 Sumkon ging lhum jen jen a amut tengu, pasal jousen na-ao cheh diu, chutah le khopi pal jouse chimsoh ding ahitai. Chutah le sepai jouse khopi sunga nakitoll lut jeng diu ahi,” ati.
6 Joshuan Thempuho akouvin ajah-uva, “Kitepna thingkong pu’vin, Thempu sagin, sumkon choiyin, amasanga cheuvin,” ati.
7 Hichun sepaiten khopi kimvel din aseiyin, Pakai kitepna thingkong masanga mahong ding loikhat to asol thai.
8 Joshua thupeh bang bangin, sumkon mut Thempuho mahong ding loi akipat’un, aban a kitepna thingkong pu Thempuho akitol’un,
9 nunglam ngah sepaiten ajuiyun ahi. Aphat tin a summon amut mut jengu ahi.
10 Ama thupeh lousea asepaite uhpoh eosa umlouhel din Joshuan akhah-e.
11 Mi hicheng hin khopi kimvel’a Pakai kitepna thingkong chu vel khat’a aput lhung diuvin aseipeh-e. Apt kimvelsoh phat’un ngahmuna ahung kile kit’un ageh khovah-ui.
12 Jingpi tah-in Joshua athouvin, anivei nan jong ni masa nia bangin, Thempuho le sepaiten khopi agavel’un,
13 amasan mahong loi, abanin sumkon mut Thempu sagi, chuin Pakai kitepna thingkong pu Thempuho, achaina nunglam ngah sepaite acheuve. Hiche sungse sea jong sumkon amut jingu ahi.
14 Hiche nikho ni lhin nin jong khopi vel khatman agavel’un, ngahmun ahinjontauve. Hiti hin nigup sungin abol’ui.
15 Ni sagi nin niso phat’in athouvun, nidanga bangin, khopi chu sagivei avel’un, niche nikhoa bou hi khopi chu sagivei avel’u ahi.
16 Vel sagi vei avel’jouvu, Thempuhon summon amut ding kon’un, Joshua asepaite jah a, “Pakaiyin niche khopi napehdoh-u ahitai!
17 Pakaiya kilhaina dinga, khopi le asunga um jouse suhmang hel ding ahi. Gam ve-lhi ho aseldoh jeh a Rahab notinu le a-insung mite bou hinghoi ding ahi.
18 Suhmang ding thil ho chu imacha nalah thei louhel diu; akilah naumule, Israelte ngahmun a hahsatna le boina napoh lut lo diu ahi.
19 Ipi hile dangka le sana, sum-eng chule thih a kisem thil ho chu Pakai dia katdohsa ahitai. Pakai gou kholna in a pohlut ding ahi,” ati.
20 Hiti hin Thempuhon sumkon amuttauve. Summon gin ajah tah-un pasal jouse a-ao jengule, khopi kulpi achimtai. Chutah chun sepai jouse khopi sunga akitol lut’un, atoupha tauve.
21 Khosung mite chemjamin asat lih soh hel’un, numei pasal, teh le khang dat louvin athat gamtauve. Bongle kelngoi chule sa-ngan jouse jong athat’uve.
22 Gam ve-lhite ni jah a Joshuan, “Nakitepna lhon bangin, Rahab notinu in lut’in, amale a-insung mite gapuidoh lhontan,” ati.
23 Ache lhonin Rahab le anu apa, asopite le a-insung mite abonchan agapuidoh lhontai. Abonchauvin, a-insung mile soh ho geiyin, apuiyin, Iraelte ngahmun kom, akitup lai khat’a akoiyui.
24 Chuin khopi meiyin ahal’un, dangka le sana, sum-eng le thih, Pakai gou kholna koi dia alah-u tilou, khopi sunga um thilkeo jouse pumin ahalvam tha tauve.
25 Gam ve-lhi dia Jericho khopia anasolte ni aseldoh jeh-in, Rahab notinu le a-insung mite abonchauvin, Joshuan ahinghoitai. Hichenu chilhah mite hi tuni geiyin Israelte lah a acheng nalaiyuve.
26 Hichepet hin Joshuan giltah a gihsalna khat anabol’in, “Jericho khopi semphat kit ding gopen pen Pathen gaosap chang hen. Khopi bul phut kit chun achapa tahpen achan ding, Akelkot ho kampha kit chun chapa lhumpen achan ding,” ati.
27 Pakaiyin Joshua aumpin, gamsung pumpia aminthangsoh tai.

Joshua lekhabu Bung 7

Achan chonset
1 Jericho khosunga suhmang ding thil ho lah louhel dia Joshuan Israelte aseipeh chu anit pouve. Achan kiti mi khat hin anitpon, hijeh chun Israelte chunga Pakai alung hangjah tai. Achan hi Judah phung khat khat’a Zerah sunga Zabdi chapa Carmi cha ahi.
2 Jerichoa pat Bathaven kom, Bethel niso lama khopi, Ai gavea, agamsung kholtoh din, Joshua mi asol’e. Amisol hon agavetsoh phat’un,
3 Joshua ahung seipeh tauve: “Ai khopi delkhum din japi kon ngaiponte, pasal sangni sang thum bang bou sol’in. Aepai jouse soldan, khopi neocha bou ahi,” atiuve.
4 Hijeh chun Israelte sang thum bou akon’ule, alel’un ahung kile kittauve.
5 Ai kho miten khopi kelkot phunga pat songkol phung geiyin ahindel’nu, lhanglam suh laiya mi somthum le gup athattauve. Hichun Israelte akichauvin, ameidoilo tauve.
6 Hichun Joshua le Israel lamkaite lunghemin ponsil abottel jengun, Pakai kitepna thingkong maiya nilhah geiyin aboh khup’un, lung gim hetsah nan lujanga leivui akita khum’uve.
7 Joshuan, “Vo Pakai Pathen! I-bol’a Jordan neipui galkaiyu ham? Amor mite pehdoh a thagamsah neigot’u ham? Jordan gal lang khat’a umden mo kahiuvam?
8 Vo Pakai ipi kasei ding ham, Israel agalten ahindel jamtai!
9 Canaan mite le agamsung miten jadoh-untin, eium kimsoh-uva thagam bep ding kahitauve! Chutengle naloupina iti umrah tan natem?” ati.
10 Pakaiyin Joshua jah, “Thouvun! India tol a chuti lup nahiuvam?
11 Israel achonsei! Anit diuva Keito kakinopto nau apalkeh tauve. Suhmang dia um thil phabep akilah tauve. Akiselguh-un, aseilep’un, amala athil lah-uva akoi nauve.
12 Hijeh a chu Israelte amelmateu masanga pang jou lou ahiuve. Amelmateuva kona ahung jamlo nau chu amaho jeng jong suhgam dia umdoh ahitauve! Lah lou dia kisei chu nasuhmang louvule, Ken jong umpi tapouvinge!
13 Thouvin! Mipi khu suthengin, kahenga hung din kigou hen. Jing teng kigo cheh din seipeh-in, ajeh chu Kei-Pakai Israel Pathenin sei ding kaneiye: ‘Vo Israel, suhmang dia kaseipeh thil khat nakikoiye! Hiche thil chu napaidoh kahsen namelmate masanga pang jou pon nate!’ kati ding ahi.
14 Hijeh chun jingkah teng aphung phunga kahenga nahinpui ding ahiuve. Ken kakoudoh phung chu hung nailut’a, phung khai khaiya khendoh ding ahi. Chuteng kalhendoh phungkhai chu a-insung sunga hung nailut jep kit ding, a-insung sunga kalhendoh chu ami mia kalhen kit ding ahi.
15 Hichea kalhendoh a, suhmang dia kisei thilto kimatdoh tha pa vang chu athil aloto, ainsung pumpia govam hel ding ahi, ajeh chu Israelte jumle ja athohsah a, kakitepna asuhkeh ahi,” ati.
16 Ajingkah matah-in, Joshuan Israelten aphung phungin ahinpuiyin, chuin Judah phung lhendoh ahitai.
17 Judah phung apuilut’in, akhai lhah cheh apuile, Zerah khai lhendoh-in aumlotai. Hichen Zerah khai sung, ainsung cheh a apuilut le, Zabdi insung akilhengdoh tai.
18 Zabdi insung apuilut pai le, amichang cheh a kilhennaa Zabdi cha Carmi chapa Achan alhengdoh tai.
19 Joshuan Achan jah a, “Kachapa, Pakai Israel Pathen maiya thudih seiyin, phongdoh jengin. Seiyin ipi nabol ham? Nei impeach hih beh-in,” ati.
20 Achanin, “Pakai Israel Pathen dounan kachonsetai, niche chu kabol ahi.
21 Thil kichomdoh lah a chun Babylon gam ponsil hoitah khat le dangka kilogram ni tobang, sanajol kilogram keh valjeo khat kamun, kadei behseh jeh-in kalatai. Kaponbuh sung laileu chun dangka noi nungpenin tin nalaidoh diu ahi,” ati.
22 Joshuan mi phabep asolle, Achan ponbuh lama alhi touvin, asuhmang ding thil ho, dangka noi nungpen a kivui amudoh tah bah tauve.
23 Ponbuh sunga konin Joshua le Israel pumpi masanga ahinchoiyun, Pakai angsung laitah a akoitauve.
24 Joshua le Israelten Achanle dangka, ponsil, sanjol to, Achan chate numei le pasal jouse, bongle sa-ngan ho, kelngoi chengse le ponbuh gei, adang anei jouse pumin aman’un, lung gimna phaicham alhut tauve.
25 Hichun Joshuan, “I-bol’a lung gimna hitobang neibolpeh-u ham? Tua hi Pakaiyin lung gimna nalhut khum ding ahitai!” ati. Mipin Achan songin asep lih-un, ainsung mite jong asep lih-un, anei jouse pumin ahalvam tauve.
26 Hichun song lhuh sangtah-in aset khum’un, tuni geiyin jong aum nalaiye. Hijeh a chu hiche mun chu lun gimna phaicham kisah lo ahitai. Chuphat’in Pakai alung damtai.

Joshua lekhabu Bung 8

Ai lonvuh a suhmang
1 Pakaiyin Joshua jah a, “Sepaite abonchan puiyin Ai khopi lama kontouvin. Kichat dan, lungthoi dauvin. Ai lengpa kajosah ding, amite, akhopi chule agamsung nachan ding ahi.
2 Jericho khopi le alengpa nabol banga Ai le alengpa nabol ding, tuchunga vang thilkeo jouse le ganchate nakilah thei diu ahi. Atom langa konin akigin loupet tah-un khopi khu del khum jengun,” ati.
3 Joshua chu asepai jouse to Ai khopi del khum din akigotai. Asepai lhentum cheh sang somthum alhengdoh-in, jan laiyin asol’in
4 “Khopi gal lang khat’a ana kisel guh-un, gamla behseh-in vang um dauvin; chule khopi nokhum din kigosan um’uvin.
5 Keile kamipui chengsen khopi hin nouving ting, Ai kho mite keiho sat dia ahung kitoldoh tengu, amasa bang chun jang ung katin,
6 khopia kona kapui manghel kahseuvin jam’uvinge, amasaa banga ajamtah tah a eigel diu ahi.
7 Chutah le kipat’un lang khopi lonvuh jengun. Pakai na-Pathen’un napenauvinte.
8 Khopi natoupha tengu, Pakai thupeh dungjuiyin, halvam jenguvin. Hitia chu nabol diu ahi,” tin ahil’e.
9 Hiti hin Joshuan asoldoh-in, acheuvin akiselna diu mun, Ai nilhum lam, Ai le Bethel kah a, achang pangtauve. Joshua vang ngahmun a ageh khovah-e.
10 Joshua jingpi tah-in athouvin, sepaite akoukhomtai. Joshua le Israel lamkaiten sepai ho chu Ai lam jonin apuitauve.
11 Joshua to lhon sepaiten Ai khopi kulpi kotpi phung lutna dontah, sahlam a chun ngahmun asem’ui, Ai to akah-uva phaicham khat bou aum’e.
12 Joshuan pasal sang nga apuiyin, khopi lhum lam, Ai le Bethel kah a aseltai.
13 Ngahmun lenpen, khopi sah lam a sepaite galsat ding salhemin goltohsan akoiyin, amoh chengse khopi lhum lama agoltoh-e. Joshua phaichama ageh khovah tai.
14 Joshua sepaite amudoh phat’in, Ai lengpan kinotah-in thil aboltai. Nunglam a kona min adelkhum dinglam helouvin, akisat masah nau Jordan phaiya Israelte to kisat din, asepaite apuiyin akitoltauve.
15 Hichun Joshua le asepaite jam beh akisauvin, gamchang noi del’in alhaitauve.
16 Amaho nung del din khopi sung pasal jouse akikoukhomun, Joshuate ho adelna lam’uva khopia konin agamla cheh cheh jengui.
17 Ai khopia pasal jouse Israelte nung del din acheuvin, khopi ahomkeovin adalhauvin, ahuh ding beiyin aumtai.
18 Hichun Pakaiyin Joshua jah a, “Natengchan Ai khopi lam koh-in, kapehdoh nahitai,” ati. Pakai sei bangin Joshuan abol’in,
19 khut agah dopsang sang chun, akiselsa sepaite ahung dingdoh loiyun, khopi sunga alhailut’un atoupha tauve. Apet’in khopi chu ahalvam’un ahi.
20 Ai khopia potdoh pasal hon anung vet’ule, meikhua meikhu chu van a akitungdoh leutai. Jamdohna ding him him aneitapouve, gamchangnoi lam nga lhai Israelte ahung kileheiyun Ai kho mite athat pantauve.
22 Khopi sung lutsa Israelte ahung kongsuh kit’in ahinsat hu kit’uvin ahi. Hiti hin Ai kho miten Israelten aumchah kheh-u ahedoh tauvin, Israelten abonchan athatgamtauve. Ajmdoh, ahingdoh khatcha aumpouve.
23 Ai lengpa seh seh ahingdoh-in, ama jong aman’un Joshua koma akailuttauve.
24 Agalteu chu Israelten gamchangnoi, ahindelnauva chun athatgam tauve. Ai khopia alut kit’un, khosung mi jouse athatsoh hel’uve.
25 Kho mite atha gamhel kahseuvin, Joshuan tengcha leh lha louhel’in, Ai khopi lam akoh koh jenge.
26 Hiche nikho hin Ai kho mite athatgam hel’un, numei pasal sang somle sang ni jen alhinguve.
27 Pakaiyin Joshua aseipeh bangin, khopi sunga thilkeo le ganchate chu Israelten akilah tauve.
28 Joshuan Ai khopi ahalvamin, khogemin adalhai. Tuni geiyin jong chutobangin aum nalaiye.
29 Ai lengpa chu thinga akhailih-in, adalhah le, nilhah geiyin akikhaidentai. Nilhum phat’in along chu Joshuan agadop lhahsah-in, khopi lutna kelkot phunga asep lhauvin ahi. Songtum tamtah aset khum’uvin, tuni geiyin aum nalaiye.

Ebal molsanga Danthu kisimdoh
30 Ebal molvuma Pakai Israel Pathen din, Joshuan maicham khat asem’e,
31 Maicham chu Pakai lhacha, Mose’n Israelte ahil dungjuiyin asemin, asem ding dol chu Mose Danthubua hitia kisei ahi: “Thihseh a vohpop lou songa kisem maicham,” kiti ahi. Niche maicham chunga hin Pakai din pumgo thilto apeuvin, kiloikhomna thilto jong atoh-uve.
32 Maichama chun Israelten avet pet’un, Mose jihsa Danthu chu Joshuan ajihdoh son’e.
33 Israelte chu alamkaiteu to, vaibol ho le thutan ho, chule alah-uva khopem ho geiyin, Pakai kitepna thingkong jet le veiya dingin, thingkong pua Levi Thempuo lam anga cheh-ui. Mipi keh khatsem Gerizim molsang anung ngat’un, akeh khatsen ma Ebal molsang anung ngat’uve. Pakai lhacha Mose’n vangboh kisan phat hung lhun teng hitia bol dia hi thu apehsau ahi.
34 Hichun Joshuan Danthu pumpi asim khumin, Danthu lekhajol a kijih bang bangin, vangbohna le gaosapna geiyin asimdoh thai.
35 Mose thupeh chengse chu mipi kikhom ho, numei chapang, alah-uva cheng khopem gei pannan, Joshuan asimpeh tauve.

Joshua lekhabu Bung 9

Gibeon miten Joshua alhep lhah-u
1 Israelte galjo jo jeng thu chu Jordan gal nilhum gamkaiya akithang soh tan, thinglhang gamsung, thinglhang bul dung, Mediterranea Twikhanglen pan dunga pat sahlam Lebanon geiyin akithangtai; amaho hi Hit lengte, Amor lengte, Canaan miho, Periz mite, Hiv miho, chule Jebus mite ahiuve.
2 Amaho hi Joshua le Israelte sat din apangkhomtauve.
3 Hiche hin Hiv mi, Gibeon kho mite Jericho le Ai khopite ni Joshuan abolna thu ajauvin,
4 lhep chatvai din thil agongtauve. Khaodip pon sesa jenga neh le chah ahengun, savunpeng sesa kibeh thom thomsan lengpitwi akhumun, sa-ngante apohsah-un achieve.
5 Amahon jong kengchot sesa le ponsil kibeh thomas jeng avon’un, neh dia apoh-u changlhah jong gobet but jeng, a-apsa ahibouve.
6 Gilgal ngahmun a acheuvin, Joshua le Israelte jah a, “Keiho kholgam la tah a hungkon kahiuvin, nangho to kitepna sem ding kadeiyui,” agatiuve.
7 Ahivangin Israelten, “I-khoh a nangho to kitepna kasem diu ham? Akhonna le naivel’a cheng jong hamiyun nate,” atiuve.
8 Amahon Joshua jah a, “Nakin bol dia um kahi jengui,” atiuve. Joshuan jong, “Hoilam kon, koi nahiuvam?” ati.
9 Amahon hitin aseiyui, “Pu, gamla tah a kona hung kahiuve, ajeh chu Pakai na-Pathenu thusim le, Egypt gama athilbol kithang jouse kajauvin,
10 Jordan gal niso lam a Amor lengte ni, Heshbon khoa Sihon lengpa le Ashtaroth khoa cheng, Bashan gam leng Og abolna jouse kajauvin ahi.
11 Kagamsung lamkaiteu le mipin, neh le chah kipoh a nangho kimupi dia ei-ngeh-u ahi. Nakin bol’a panga, keiho to kitepna sem dia eihinsol’u ahi.
12 Kachanglhah poh-u jong veuvin, nangho heng jon a in kahin dalhah-uva kikangthah, lumna lai ahin, tun vang agon, a-apsoh tai!
13 Lengpitwi kakhumtil’un savun peng ho hi athah jeng ahin, tua segam ahitauve! Kahung nau gamla behseh jenga, kengchot le ponsil jouse jong segam ahitai,” atiuve.
14 Neh le chah apoh-u chu Israelten, Pakai dong louvin, phabep akilah-ui.
15 Joshuan jolle gol hinan Gibeon kho mite to kitpna asemin, ahing haiti. Israel khoppi lamkaiten jong kitepna nitna din giltah a kitepna aneitauvin ahi.
16 Kitepna asem nungu nithum sungin, Gibeon khomite chu naivel’a cheng ahiu Israelten ahedoh tauve.
17 Hijeh chun Israelte akipatdoh-un, nithum jouvin niche mite chenna khopi, Gibeon, Chephirah, Beeroth chule Kiriath-Jearim alhungtauve.
18 Ahivangin Israel lamkaiten Pakai Israel Pathen min a kitepna aneijeh-un, amiho chu athat thei tapouve. Israel mite alamkaiteu henga hiche thudol’a hin akiphin’un,
19 ahinla amahon, “Pakai Israel Pathen min a keiho giltah a kitepsa kihita chu, tun suse theipoute.
20 Ikitepna jeh-uva ihinghoi tei tei diu ahi; ihinghoi daule Pathenin talen eimatsah diu ahi.
21 Kihinghoiyin tin, thingpole twi khaiyin pangtauvinte,” atiuve. Lamkaiten hitia chu agel’u ahi.
22 Joshuan Gibeon mite agamat khomsah-in aheng ahin lhut phat’un ajah-uva, “Hikomcha chenguva, ibol’a gamla tah a chenga kiseiya neijou lhep-u ham?
23 Hitobang naboljeh-uva Pathenin themmo nachanu ahitai. Itih chan hijonngle namiteu soh chang diu, ka-Pathen munthenga man ding thingpo le twi khaiya pang diu ahitai,” ati.
24 Gibeon mihon, “Ahinai kapu, Pakai na-Pathen’un alhacha Mose aseipeh a, agam pumpi napeh-u, chule nakitol lut tengu, agamsung mite nathagam diuva thu apeh chu kajah phat’uva chutia kaseiyu ahi. Nangho kagin behseh phat’a kaseiyu ahi; athingam umlou kahiuve.
25 Tua vang nakhut’uva um kahitauvin, dih nasah lam lamin neibol jenguvin,” atiuve.
26 Chuphat’in Joshuan amaho hi ahuh-in, Israelte athasah tapoi.
27 Gibeon mite chu soh-in asemin, Israelte dingle Pakai maichama manchah ding thingpo le twi khai din akoitai. Tuni geiyin amahon Ama kihouna dia Pakaiyin alhendoh mun a hiche na hi atoh jingu ahi.

Joshua lekhabu Bung 10

Israelten Amor mite ajo’u
1 Jericho alah a alengpa atha bang bangin, Joshuan Ai khopi alah a alengpa atha’a kho mite asuhgam thuthang Jerusalem lengpa Adonizedek chun ajatai. Gibeon miten Israelte to kichamna asem a, lung monga achenkhomu jong ajadoh tai.
2 Hichea hin Jerusalem mite akicha lheh jengui, ajeh chu Gibeon khopi chu khopi lentah, leng nei jou khat ahin; Ai khopi sanga lenjo, chule sepai jong galsat themjo jo nei ahi.
3 Hijeh chun Adonizedek hin Hebron lengpa Hoham, Jarmuth lengpa Piram, Lachish lengpa Japhia, Eglon lengpa Debir henga mi asol’in,
4 “Gibeon kho miten Joshua le Israelte to kichamna asemtauve, hugun gasat gam’u hite,” agatisah-e.
5 Hiche Amorte leng nga: Jerusalem, Hebron, Jarmuth, Lachish chule Eglon lengte hi apangkhomun, Gibeon khopi aum’un alonvuh tauve.
6 Gilgal ngahmuna Joshua henga Gibeon miten thu athot’un, “Neidonda hih hel’un kapu! Hung jengin neikithopiuvin, neihuhhingun! Thinglhang gamsung Amor lengte akigomkhom’un eilonvuh jengtauve!” agatisah-ui.
7 Hijeh chun Joshua le asepaite abonchauvin, galsat themtah tah ho geiyin, Gilgal a konin akitoltauve.
8 Pakaiyin Joshua jah a, “Amor lengte khu kicha hih-in. Najo dia kakoisa ahitauve. Khat chan jong nating jou pouvinte,” ati.
9 Jan khovah hel’in Joshua le asepaite Gibeon lam jonin akitol’un, Amor mite chu het lou kah-in adelkhum jengui.
10 Israel sepaite amudoh phat’un Pakaiyin Amor mite ameidoisahtai. Gibeon khosunga jong Israelten Amorte athat that jengun, lhang lampi lama adelsuh peh-un, Beth Horon geiyin adel’un, Azekah le Makkedah geiyin asat suh peh jengui.
11 Israel sepaite ginna lhang lampia Amorte ajam’u chun, Azekah geiyin, lam dung lhungkeiyin, Pakaiyin gellen alhah densah tai. Israelte tha sangin, gellen selih atamjoi.
12 Pakaiyin Amor miho Israelte ajosah nin, Joshuan Pakai koma, Israelte masang laitah a aseiyin,
“Vo nichang, Gibeon kho chunga ding denim, Aijalon phaicham chunga ding denin lhachang,” ati.
13 Israelten amelmateu ajosoh hel kahseuvin nichang la ading dentan, lha jon akitolchon tapoi. Hiche thusim hi Jashar lekhabua akijih-e. Nichang vanlaijol’a nikhat lhingset ading den’e.
14 Hitobanga Pathenin mihem thupeh anitna hi masanin jong kho nungin jong asoh khapoi. Pakaiyin Israel din gal asatpeh-e.
15 Gal kichaiyin Joshua le asepaite Gilgal ngahmun a akile kittauve.

Joshuan Amor leng nga amat
16 Amor leng nga chu ajamdoh nah nah-un.
17 Mi khat’in agamudoh-in, akiselnau chu Joshua aseipeh tai.
18 Joshuan, “Songko kot’a chun songtum lentah tah tanglut’un, sepai phabep ngasah-uvin,
19 nangho hikoma chun pandauvin. Melmate chu del jingun lang, chuin anunglama konin lonvuh jengun; akhopiu phahsah hih hel’un! Pakai na-Pathen’un hiche ho josa nakoipeh-u ahitai,” ati.
20 Mi phabep khopi kulpi sunga kiseldoh a atha khel vangun, Joshua le Israelten Amor mite athatgam hel’ui.
21 Hichun Joshua sepaite damsel’in Makkedah ngahmuna ahung lhungtauve. Gamsung mite koimacha Israel douna thusei ngam a jong aumtapoi.
22 Hichun Joshuan, “Songko kot hongdoh-un, leng nga chu gakaidoh-un,” ati.
23 Hijeh chun songko alhongdoh-un, Jerusalem, Hebron, Jarmuth, Lachish chule Eglon lengte agakaidoh-un,
24 Joshua heng ahinlhut tauve. Hichun Joshuan Israel mite akoukhomin, alhonpi vaipote chu hunga Amor leng nga lolchang chotpha din aseipeh-e. Amahon achotphatauve.
25 Joshuan avaipote jah a, “Kicha hih-un, lung thoidauvin. Pangdet’un, lung ngam’un, Pakaiyin namelmateu hitia abolsoh kei ding ahi,” ati.
26 Leng nga chu Joshuan athat’in, thingphung nga chunga nilhah geiyin akhaiye.
27 Nilhum phat’in alongu chu Joshuan adop lhah sah-in, anakiselnau songko sunga chun asep luttauve. Songko kot chu songtum lentah tah atanglut’un, tuni geiyin aum nalaiye.

Joshuan Amorte gamsung alahbe
28 Hiche ni hin Joshuan Makkedah khopi alan, alengpa amantai. Khosung mite athatgamin, khatcha ahing hoipoi. Jericho lengpa abolna bang bangin, Makkedah lengpa jong abol’e.
29 Hiche nung hin Joshua le asepaite Makkedah a pat Libnah khopi ajon’un adelkhumtauve.
30 Hiche khopi jong hi Pakaiyin Israelte ajosah-in, alengpa geiyin amantauve. Khen beihel’in kho mite athat gam’uve. Alengpa jong Jericho lengpa abolna bangun aboltauve.
31 Hiche nung hin Joshua le asepaite Libnah a pat Lachish khopi jonin akitol’un, khopi chu aum’un, adelkhumtauve.
32 Akisatna ni ni lhinin Pakaiyin Lachish khopi chu Israelte ajosah-in, khosung mi khatcha hinghoi louvin athattauve.
33 Gezer lengpa Horam chu Lachish khopi panhun ahungin, ahivangin ama jong hi Joshuan ajo’uvin, asepaite le ama, hinghoi bethel’in athatgamtai.
34 Abanin Joshua le asepaite Lachish khopia konin Eglon khopi ajon’un, aumsoh phat’un adelkhum jengui.
35 Asat patniuvin ajoupaiyun, Lachish khopi abolna bangun, mihem jouse athatgamtauve.
36 Abanin Joshua le asepaite Eglon khopia pat, thinglhang lam alhah touvun Hebron khopi ajontauve. Akhopi adel khumun, alatauve.
37 alatauve. Khopi sung lengpa le mihem jouse, chule anaivel’a mihem jouse athattauve. Eglon khopi abolna bangin, Joshuan Hebron khopi suhmang hel din aseiyin, khosung mi khat cha jong ahing hoipouve.
38 Joshua le asepaiten Debir khopi lam adel kit’un, anokhum’un,
39 khopi alauvin, lengpa jong aman’un, akimvel khoneo jouse jong alah thauve. Hebron le Libnah chule alengte abolna bangin, Joshuan abol’in, mihing jouse athatgamtauve.
40 Joshuan Canaan gam pumpi ajoutai. Thinglhang gamsung leng ho, niso lam gamken sungsea le, nilhum lam thinglhangbul sungsea le, nilhum lam thinglhangbul dungse jong, lhanglam gamgo sunga cheng leng jouse jong ajousoh tai. Khen bethel’in, mihem jouse athat gamtai. Hitia hi bol dia Pakai Israel Pathenin thu apehsa ahi.
41 Joshua galbolna gam chu, lhanglam Kadesh Barnea pat Twikhanglen pang kom a Gaza chan, Goshen gamsung pum chule sahlam Gibeon chan gei ahi.
42 Pakai Israel Pathenin gal asatpeh tah jeh-un, leng hijatpi le agamsung jouseu hi Joshuan khatvei gallon a alahsoh hel ahi.
43 Asat chai phat’un Joshua le asepaite Gilgal ngahmuna ahung kile kittauve.

Joshua lekhabu Bung 11

Joshuan Jabin le apanpiho ajo
1 Hazor lengpa Jabin koma Israelte galjo akithang luttan, aman jong Madon lengpa Jobab le, Achshaph le Shimron lengte le
2 sahlam thinglhang gamsungle, Galilee dillen lhanglam gam, Jordan phaiya lengte le thinglhang bul dunga le Dor kom dung, Twikhanglen panga leng ho henga mi asol’in agatemsah-e.
3 Jabin hin, Jordan luipang jetle veiya Canaan mite, Amor mite, Hit mite, Periz mite, thinglhang gamsunga Jebus mite le Mizpah gamsung Hermon molsang bul’a cheng Hiv mite geiyin agatemsah-e.
4 Amaho chengse hi asepaiteu to ahung kontha cheh le, schema mihem chu Twikhanglen panga neldi jat aphauve. Hiche leng ho hin sakol le kangtalai tamtah jong aneiyui.
5 Leng hijatpi hi pangkhomin, Israelto kisat din Merom vadunga ngahmun asemtauve.
6 Pakaiyin Joshua jah a, “Hiche lengho khu kicha hih-in. Jing teng tuphat don hile, amaho khu, Israelte dia kathapeh ding ahitauve. Asakolteu keng navohbai peh-uva, kangtalai jouse nahalvam peh-uva, kangtalai jouse nahalvam peh diu ahi,” ati.
7 Hijeh chun Joshua le amiten, Merom vadung ngahmuna chun, het lou kah-in adelkhumtauve.
8 Pakaiyin hiche lengte chu Israelte ajosah-in, Israelten anokhum’un, sahlam Misrephoth Maim le Sidon gei, niso lam Mizpah phaicham geiyin anojampeh tauve. Israelten amelmateu athagam kahseuvin akisat piuve.
9 Pakai thupeh bangin Joshuan abol’in; asakolteu keng avobaiyun, kangtalai jouse ahalvamtauve.
10 Joshua akile heiyin, Hazor khopi alan, alengpa athattai. Hiche lenggam ho lah a, Hazor khopi chu athaneipen ahipet ahi.
11 Hazor khosung mihing jouse athatsoh keiyui. Khatcha ahinghoi pouvin, khopi geiyin ahalvamtauve.
12 Joshuan khopi hijat hi alan, alengteu amanin, Pakai lhacha Mose thupeh bangin, mihing jouse athat gamtai.
13 Amavang Joshua halvam Hazor tilou, molvuma kisa khopi khatcha, Israelten ahalvam pouve.
14 Hiche khopi sunga thil manlu jouse le ganchate chu Israelten akilah-uve. Mihem vang khat cha ahinghoi pouvin, ahinga dalhah jong aneipouve.
15 Pakaiyin alhacha Mose thu apehsa, Mose’n Joshua apehson, chule Joshuan hiche ho chu amolso ahibouve. Pakaiyin Mose aseipeh jouse Joshuan abolsoh keiye.

Joshuan alah gamsung
16 Joshuan gam pumpi alan: thinglhang gamsung jouse le thinglhangbul se se, sahlam jong lhanglam jong, Goshen gamsungse le chuche lhanglam, gamgo sungse le Jordan phaicham jong alatai.
17 Agamlah chu Edom kom, lhanglam Halak molsanga pat, sahlam Baalgad chan gei, Lebanon phaicham, Hermon molsang noilam gei ahithai.
18 Hiche gamsunga lengte to Joshua sotpi akisat’uvin, akhon nan abonchauvin amanin athattai.
19 Israelte to kichamna sem, Hiv mi phabep chenna khopi chu, Gibeon seh seh ahi. Khopi dangse se chu gal’a alah-u ahi.
20 Khopi dang ho hi Pakaiyin Israelte sat nomna lungthim apen, hitia chu abonchauva voujang natpi louhel’a thagam dia aboljoh ahi. Hiti dia chu Pakaiyin Mose thu apehsa ahi.
21 Hichepet hin Joshua jong akonin, Judah le Israel thinglhang gamsung, thinglhang khopi, Hebron, Debir chule Anab dunga cheng, milen gal-hat, Anakim kitiloi chu asugamtai. Joshuan amaho hi achen nau khopi jouse pumpkin asumang heltai.
22 Israel gamsunga Anakim mi khatcha jong akhenpoi; Gaza gam le Gath chule Ashdod gamsung dunga vang phabep bep aum nauve.
23 Pakaiyin Mose aseipeh bangin Joshuan Canaan gam pumpi alatai. Amaho gam din Israelte chu Joshuan apen, abih bih-in, aphung phungin ahompehtai. Hiti hin Israelte galbol haiyin acholdo tauve.

Joshua lekhabu Bung 12
Mose’n anajo lengho
1 Arnon phaiya pat Jordan phai, sahlam Hermon molsang gei, Jordan luigal, solam gamsungse hi, Israelten ajouva atouphasau ahitai. Leng ni anajouvun,
2 khat chu, Amorte lengpa Heshbon a vaipo Sihon ahi. Ama lenggam hi Gilead gam keh khatse jong ahithai: Arnon phaicham chin Aroer a pat, chuche phaicham kima khopi kom, Ammon gamgi, Jabbok vadung gei ahin:
3 Galilee dillen a pat twimang dung niso lam Beth Jeshimoth gei Jordan phaicham jouse le Pisgah molsang bul geipeh ahi.
4 Rephaim mite lah a anukhah pen, Ashtaroth le Edrei khopite nia vaipo, Bashan lengpa Og jong Israelten ajouvui.
5 Ama lenggam hin Hermon molsangle Salecah gam chule Geshur le Maacah gamgi geiya, Bashan gamsung jouse jong, Gilead gamsung keh khat le Heshbon lengpa Sihon gamgi chan geipeh ahi.
6 Hiche lengte ni hi Mose le Israelten anajosau ahitai. Pakai lhachapu Mose’n ahitai. Pakai lhachapu Mose’n hiche gamsungse se hi agoulo gam diuva, Reuben phung le Gad phung chule Manasseh phung keh khat dia anapehsa ahitai.

Joshua jo leng ho
7 Joshua le Israelten Jordan luigal nilhum lam gamsung, Lebanon phai Baalgad a pat, lhanglam Edoma Halak molsang gei sungse leng ho ajousoh keiyui. Hiche gamsungse hi Joshuan Israelte aphung phungin, a-itih a goulo din, ahompeh tai.
8 Agamsung hin thinglhang gamsungse, lhumlam thinglhangbul jouse, Jordan phaichamle thinglhang ching dungse, niso lam gamkense se pum, lhanglam gamgo sungse ahopsoh keiye. Hiche gamsung hi Hit mite, Amor mite, Canaan mite, Periz mite, Hiv mite le Jebus mite chenna gam anahi.
9 Israelten ajou leng ho chu, Jericho, Bethel koma Ai,
10 Jerusalem, Hebron,
11 Jarmuth, Lachish,
12 Eglon, Gezer,
13 Debir, Geser,
14 Hormah, Arad,
15 Libnah, Adullam,
16 Makkedah, Bethel,
17 Tappush, Hepher,
18 Aphek, Lasharon,
19 Madon, Hazor,
20 Shimron, Meron, Achshaph,
21 Taanach, Megiddo,
23 Twikhanglen panga Dor, Galilee gam a Goiim,
24 chule Tirzah, khopi somthum le khat’a leng somthum le khat ajou ahi.

Joshua lekhabu Bung 13

Lahkit ding gam
1 Joshua ateh lheh tan, Pakaiyin ajah a, “Nangla nateh lheh tan, lahbe ding gamla alen lheh nalaiye;
2 Philistia te gamsungse le Geshur,
3 lhanglama Avvim gamsungse se jong ahi.
4 Egypt gamgi, Shihor luidunga pat sahlam Ekron gamgi chan hi Canaan mite gam a kigel anahi; Philistia lengteng Gaza, Adhdod, Ashkelon, Gath chule Ekron, khopi hijat hi atouphauve.
4 Tun jong Canaan gam pumpi aum nalaiyin, Sidonte khopi Mearah a pat Amorte gamgi chin a aphek khopi geil
5 Gebal ho gam, Lebanon gam pumpi niso lamse se, Hermon molsang lhanglam Baalgad a pat Hamath lhanglam gei aum nalaiye.
6 Hichenga hi Lebanon lhangle Misrephoth Maim kah, thinglhang gamsungse sea cheng, Sidon mite gam ahopsoh ahitai. Israelte ahung kitol tenu hiche miho jong kadel doh peh diu ahi. Kahil banga agam hi Israelte nahoppeh ding ahi.
7 Hijeh chun tun agam hi Israel phungko le Manasseh phungkeh goulo din hopper temin,” ati.

Jordan luigal nisolam gam kihop
8 Reuben phung le Gad phung chule Manasseh phungkeh chun, Pakai lhachapu Mose’n apeh-u gam akilahsau ahitai; hichu Jordan luigal niso lam ahi.
9 Amaho gamkai hop hi Arnon phaicham chin a Aroer khopi le phaicham lailunga khopi, chule Medeba a pat dibon gei, gamkense se gei ahi.
10 Ammon gamgi geiyin achen, Heshbon a Amor lengpa vaipohna khopi jouse ahopsoh keiye.
11 Gilead le Geshur chule Maacah lhangse se, Hermon molsang pumpi to, Bashan gamsung jouse Salecah gei ahi.
12 Ashtaroth le Edrei khopite nia vaipo, Rephaimte lah a leng nukhah pen Og lenggam pumpi jong ahithai. Hiche miho hi Mose’n ajoa, adelmang ahiuve.
13 Ahivangin Israelten Geshur le Maacah kho mite adelmang dauvin, tu geiyin Israelte lah a achengtauve.
14 Mose’n Levite hi gam apepoi. Pakaiyin Mose aseipeh banga, Leviten gou dia Pakai Israel Pathen maichama kilhaina pumgo thilto kipe ho chue akilah diu ahi.

Reuben phung kipe gam
15 Agou diuvin, Mose’n Reuben phunga insung mite chu gam bih khat apei.
16 Agam hop’u chu Arnon phaicham chin a Aroer khopi le phaicham lailunga khopi, chule Medaba gamkense se ahi.
17 Heshbon khopi le gamken sunga khopi ho: Dibon, Bamoth Baal, Beth Baalmeon,
18 Jahaz, Kedemoth, Mephaath,
19 Kiriathaim, Sibmah, Zerethshahar, phaicham sunga thinglhanga kigol khopise se ahin,
20 Pisgah molpanga Bethpeor khopi le Beth Jeshimoth to ahi.
21 Hiche hin Heshbon a vaipo, Amor lengpa Sihon lenggam jouse le gamken sungsea khopi jouse ahopsoh tai. Mose’n Sihon ajouvin, Midia vaipote, Evi, Rekem, Zur, Hur, chule Reba, hicheng jong ajouve. Abonchauva hi lengpa Sihon gamsunga vaipo cheh ahiuve.
22 Israelten atha lah-uva, phunsan them, Beor chapa, Balaam jong apangtai.
23 Lhumlama Reuben phung gamgi chu Jordan lui ahi. Hiche khopi ho hile khoneo ho hi Reuben phung goulou dia kipe ho chu ahi.

Gad phung kipe gam
24 Agou diuvin, Mose’n Gad phung sung ainko keiyuvin gambih khat apei.
25 Agamhop’u chu Jazer khopi le Gilead gamsung khopi jouse, Rabbah niso lama Aroer geiya Ammon gam keh khat gei ahin;
26 Heshbon khopia pat Ramath Mizpeh chule Betonim gei, Mahanaim a pat Lodebar gamgi chan ahi.
27 Jordan phaiya chun Beth Haram, Bethnimrah, Sukkoth chule Saphon to, Heshbon lengpa Sihon lenggam dangse se to ahithai. Lhumlama agamgiu chu Jordan vadung, Galilee Dillen geiya kigoltoupeh ahi.
28 Khopi hicheng hile khoneo hicheng chu Gad phung sung, a-inko keiyu gou dia kipe ahiuve.

Nisolam Manasseh phungkeh gam kipe
29 Agou diuvin, Mose’n Manaaseh phungkeh a-inko keiyuva din gambia khat apei.
30 Agam hop’u chu Mahanaim le Bashan gam keh khat pum, Basham lengpa Og lenggam pumpi, Bashan gamsunga Jair khote somgup ho pum ahithai.
31 Gilead keh khat le Bashan gamsunga Og lenggam khopite ni, Ashtaroth le Edrei jong apange. Hichengse hi Manasseh chapa Machir phung sung inko keh khatse kipe ahi.
32 Jericho le Jordan gal niso lam, Moab phaiya aumpet’a, Mose’n hitia chu gam anahoppeh ahi.
33 Mose’n Levi phung chu gam apepoi. Agou diu chu Pakai Israel Pathen henga kilhaina thilto ho chang diuva aseipeh ahi.

Joshua lekhabu Bung 14
Jordan luigal lhumlam gam kikhop
1 Aban a kisei ding hi Joradan luigal lhumlam gamsung, Canaan gam Israelte kihoppeh thusim ahi. Eleazar Thempule Nun chapa Joshua, chule Israel phung lamkaiten Canaan gam chu insung tamle lhom dungjuiyin ahomtauve. 2 Pakaiyin Mose aseipeh bangin, Jordan luigal lhumlam gamsung chu Israel phungko le phungkeh din vang santhon akihom’uve.
3 Jordan luigal niso lam gam chu Mose’n phung ni le phungkeh anapehsa ahitai. Joseph chilhahte chu phung nin akikhen’un: Manasseh le Ephraim ahiuve.
4 Levite vang chu Mose’n gambih apepoi. Achenna diu khopi ho le bongle kelngoite vahna ding gam phabep to apeh thai. Pakaiyin Mose aseipeh bangin Israelte gam chu akihomtauve. Hebron khopi Caleb kipe
6 Nikhat Judah phunga mi phabep, Gilgal a Joshua henga ahungui. Alah-uva Keniz mi Jephunneh chapa Caleb chun, “Kadehs Barnea muna Pathen mi Mose koma nangle kei thudol pakaiyin asei chu nahei.
7 Pakai lhachapu Mose’n Kadesh Barnea kona gam ve-lhi dia eisol chun kum somli kalhingtai. Thudih tah kahin nung lhut peh-e.
8 Kalhonpihon vang imiteu akichatsah-uve. Kenvang kitah tah-in Pakai ka-Pathen thu ka-ngaiye.
9 Chutia kachonjeh-in, kagakholna gamsung chu keile katu kachate gou din Mose’n eiteppeh-e.
10 Tun vetemin,Pakaiyin Mose jah a aseikal tu hi kum somil le nga alhingtai. Aseipeh pet chu Israelte gamthip lai ajot pet’u ahitan,Pakaiyin atepsa bangin kei jong eihing hoi nalaiye.Neiven! Kum somget le nga kalhingtan,
11 ahivangin Mose’n eisol lai bangin kahat jing nalaiye. Galsat thei jong, nadang tong thei jong kahi nalaiye.
12 Keile kamiten thu kalhut niuva Pakaiyin eiteppeshsau Thinglhang gam chu tun neipetauvin. Hichepet chun khopi dunga kulpi kikaikhum sunga, Anakim kitiloi,milentah tah jat chu chengin kaseiyuve. Pakaiyin aseisa banga, Aman eilhonpin tin,hiche ho jong chu kadeldoh jeng thei ahiuve,” ati. 13 Joshuan Jephunneh chapa Caleb chu phatthei aboh-in, gou din Hebron khopi apetai.
14 Pakai Israel Pathen thu kitah tah a anit jeh-in, Keniz mi, Jephunneh chapa Caleb chilhahte tuni geiyin Hebron khopi achang dantauve.
15 Hiche masang hin Hebron chu Arba khopi akiti. Arba hi Anakim lah a alenpen ahi. Tun vang gamsunga cham alengtai.

Joshua lekhabu Bung 15

Judah phung kipe gam
1 A-inson cheh a Judah phung kipe gamsungse chu: Zin gammang noilampen, Edom gamgi gei ahi.
2 Hiche lhanglam gamgi hi Twimang dung lhanglam kichaina pat
3 Akrabbim lhang lam a kona lhanglam ajot suh a Zin geipeh ahi. Kadesh Barnea lhanglam ahopan, Hezron ajot paiyin, Addar lama akaltouvin, Karka lama akiheiyin,
4 Azmon lang ajonin, Egypt gamgi luidung ajuiyin Mediterranea Twikhanglena alut’in, hikoma hin gamgi akichaiye. Hichu Judah phung lhanglam gamgi ahi.
5 Niso lam gamgi chu Twimang dung ahin, akun geiya ajuitou peh a, Jordan lui lonlutna gei ahi. Sahlam gamgi hikoma hi kipan a,
6 Beth Hoglah geiya kilhungtou, sahlam lhang, Jordan phaicham kigalmuna chu alhah toupeh ahi. Chua kona Reuben chapa Bohan songphung geiya kigoltou ahi.
7 Lung gimna phaichama pat Debir lang ajot touva, kitou hei kit nalaiya Gilgal lang ajot, phaicham lhanglama Adummim lhang lam to kigalsaiya chu kilhungdoh ahi. Hichea kona hi Enshemesh twinah lam ajot’a, Enrogel a kilhungdoh,
8 Jebus mite khopi Jerusalem kisahdohna thinglhang noilam pang, Hinnom phaicham geiya kilhungdoh peh ahi. Chuin gamgi chu Hinnom phaicham lhumlam lhangvuma akilhungdoh-in, Rephaim phaicham sahlam atopna geiyin achei.
9 Hiche kon hin Nephtoah twinah phung lama achen, Ephron molsang koma khopihoa akigoldoh-e. Hia kon chun, Kiriath Jearim jong kiti, Baalah lam ajonin,
10 chuin Baalah lhumlam ahinlhah kolvel’in Seir thinglhang ajonin, Chesalon jong kitiji, Jearim molsang sahlam ajontouvin, chuin Beth Shemesh lang a aki-golsuh-in, Timnah lang ajotpaiye.
11 Chuin Ekron sahlam thinglhang lang ajottouvin, Shikkeron lam ajonin, Balaah molsang ajot pan, Kamnia langa achepaiye. Gamgi chu Mediterranea Twikhanglena akichaiyin,
12 hicheng hi lhumlam gamgi ahitai. Hiche gamkol sunga hi Judah phung sung mi a-inko kouva cheng ahiuve.

Caleb-in Hebron le Debir alah
(Judg 1:11-15)
13 Pakaiyin Joshua aseipeh bangin, Judah phunga mima ma, Jephunneh chapa Caleb chu Judah gambih khat kipesa ahitai. Caleb hi Anak pa Arba khopi Hebron achang’e.
14 Caleb hin khopi sunga konin Anak chilhah, Sheshai le Ahiman chule Talmi phung ho anodoh tai.
15 Hebron a pat Debir khopia chengte nokhum din achetai. Debir khopi hi Kiriath Sepher tinjong akiseiye.
16 Caleb-in, “Kiriath Sepher lajoupen pen kachanu Achsah to kichensah inge,” ati.
17 Caleb sopipa Kenaz chapa Othniel chun Kiriath Sepher khopi ajouvin, Caleb-in jong achanu Achsah to akichensah tai.
18 Achsah to akichen nin Othniel hin apa koma loumun khat thum din aloinu asol’e. Achsah chu sa-ngan chunga kona ahung chop lhah le, Caleb chun ipi deicha hung kum ahi adonge.
19 Achsah-in, “Twikul phabep neipen, neipeh gamsung khu gamgo lah jeng ahi,” ati.
Caleb-in achanu chu twinah phung chungnungle anoinungpa apetai.

Judah khopiho
20 Judah phungsung mite a-inko cheh-uva gou dia kipe gam chu,
21 lhanglam gamkai sung, agamlapen tah a khopi ho gei, Edom gamgi naivel dunga khopiho Kabzeel, Eder, Jagur,
22 Kinah, Dimonah, Adadah,
23 Kedesh, Hazor, Ithnan,
24 Ziph, Telem, Bealoth,
25 Hazor, Hadattah, Kerioth Hezron ahiloule Hazor,
26 Amam, Shema, Moladah,
27 Hazar, Gaddah, Heshmon, Bethpelet,
28 Hazar Shual, Beershaba, Bigiothiah,
29 Baalah, Iim, Ezem,
30 Eltolad, Chesil, Horman,
31 Ziklag, Madmanaah, Sansannah,
32 Lebaoth, Shilhim, Ain, chule Rimmon ahin, abonchan akimvel dunga chengse puma akisimtha le, khopi somni lie ko alhinge.
33 Thinglhangbul’a khopiho chu, Eshtoal, Zorah, Ashnah,
34 Zanoah, Engannim, Tappuah, Enam,
35 Jarmuth, Adullam, Soch, Azekah,
36 Shaaraim, Adithaim, Gederah chule Gederothaim ahin, aboncha, akimvel dung khoneo dom pumin khopi somle li alhinge.
37 Khopi dang jong chu Zenan, Hadashah, Migdalgad,
38 Dilean, Mizpah, Joktheel,
39 Lachish, Bozkath, Eglon,
40 Cabbon, Lahmam, Chitlish,
41 Gederoth, Bethdagon, Naamah chule Makkedah ahin, akimvel’a khoneo ho pumin kho somle gup alhinge.
42 Libnah, Ether, Ashan,
43 Iphtah, Ashnah, Nezib,
44 Keilah, Achzib chule Mareshah jong ahin, akimvel’a khoneo ho pumpkin khopi ho alhinge.
45 Ekron khopi le akhoneo ho chule khote ho,
46 chule Ekrona pat Mediterranea Twikhanglen geiya Ashdod vel’a khopi ho le khoneo jouse jong ahithai.
47 Ashdod le Gaza chule akhoneo jouse le khote chengse to Egypt gamgi luidung le Mediterranea Twikhanglen pang dung geiya kho jouse ahi.
48 Thinglhang gamsunga khopi ho chu Shamir, Jattir, Socoh,
49 Dannah, Kiriath Sepher, ahiloule Debir,
50 Anab, Eshtemoa, Anim,
51 Goshen, Holon, chule Giloh ahin, akimvel’a khoneo jouse pumpkin khopi somle khat ahi.
52 Arab, Dumah, Eshan,
53 Janim, Beth Tappuah, Aphekah,
54 Humtah, Hebron chule Zior ahin, akimvel dunga khoneoho pumpkin khopi ko alhinguve.
55 Maon, Carmel, Ziph, Juttah,
56 Jezreel, Jokdeam, Zanoah,
57 Kain, Gibeah chule Timnah ahin, akimvel’a khoneo ho pumin khopi som alhinge.
58 Halhul, Bethzur, Gedor,
59 Maarath, Bethanoth, chule Eltekon ahin, akimvel dunga khoneo ho pumpkin khopi gup alhinge.
60 Kiriath Baal ahiloule Kiriath Jearim le Rabbah ahin, akimvel lhona khoneo ho pumin khopi ni alhinge.
61 Nelgam suna jong Beth Arabah, Middin, Secacah,
62 Nibshan, Chikhuh khopi chule Engedi ahin, akimvel dunga khoneo ho pumpkin khopi gup alhinge.
63 Jerusalema cheng Jebus mite vang Judah mihon anodoh jou pouve. Tu geiyin Jebus mite jong Judahte lah a, Jerusalem khopia acheng jingui.

Joshua lekhabu Bung 16

Lhumlam Manasseh le Ephraim kipe gam
1 Joseph son ho kipe lhanglam gamgi chu Jericho khopi kom, Jordan lui, Jericho twinah phung niso lama pat nelgam geiya kilhung lut ahi. Jericho pat thinglhang gam alhah touva Bethel a lut ahi.
2 Bethel a pat Luz khopi ajonin, Arch mite chenna khopi Ataroth Addar geiyin achepaiye.
3 Chuin Japhlete ho gamsung ajot’in, noinung Beth Horon geiyin achei. Chuin gamgi chu achepaiyin hichea kon hin Gezer geiyin akilhungin chujouvin Mediterranea Twikhanglena atange.
4 Agou diuvin Joseph chilhahte, Ephraim phungle lhumlam Manasseh ten hiche gamsungse hi akilah-ui.

Ephraim
5 Ephraim insung miho gamsung chu: agamgiu Ataroth Addar khopia pat niso lam ajonin chungnung Beth Horon khopia alut’e.
6 Hichea pat hin Mediterranean Twikhanglena aki-ngai. Michmethath khopi hi agamgi sahlamu ahi. Hikom niso lama hin gamgi akihei konin Taanath Shiloh lam ajonin, Taanath Shiloh ajot paiyin Janoah niso lama alut’e.
7 Janoah a konin lhanglam ajonin, Ataroth le Naarah lam ajonin, Jericho alut’in, Jordan luiya aki-ngai.
8 Tappuah a konin nilhum lam ajonin, Kanah vadung lang ajonkit’in, Mediterranea Twikhanglen a akichaiye. Ephraim phung a-inko kouva guava kipe gam chu hicheng hi ahin,
9 Manasseh gamsunga khoneo phabep le khote phabeo jong Ephraim mite kipeh tha ahiuve.
10 Gezer a chang Canaan mite adeldoh pouve. Hijeh chun tuni geiyin Ephraim mite lah a Canaan miho acheng jingun, amavang soh ahiuvin, elbolna soh na atongui.

Joshua lekhabu Bung 17

Lhumlam Manasseh
1 Joseph cha a-upa jo Manasseh guiya peng insung mi phabep chu Jordan luigal lhum lam gam phabep akipei . Gilead pa Machir hi Manasseh chapa upapen, gal-hangtah sepai ahin, hijeh a chu Jordan luigal nisolama Gilead le Bashan khopite ni chu ama kipea ahi.
2 Manasseh insung amoh chengse, Jordan luigal lhumlam gam kipe ho chu: Abiezer, Helek, Asriel, Shechem, Hepher, chule Shemida ahi. Hicheng hi Joseph chapa Manasseh chilhah pasal jeng, insung upa cheh ahiuve.
3 Manassseh chapa Machir, Machir chapa Gilead, Gilead chapa Hepher, Herpher chapa Zelophehad hin chapa aneipoi, chanu jeng aneiye. Amin Mahlah, Noah, Hoglah, Milcah, chule Tirzah ahi,
4 Zekiohe had chanute hi Eleazar Thempule Nun chapa Joshua, chule lamkaite heng a acheuvin, “Pakaiyin Mose jah a keiho le kasopiteu pasal ho hi lo ding gambih peh din aseipeh-e,” agatiuvin ahi. Hijeh chun asopiu pasal ho le amaho hi Pakai thupeh dungjuiyin gam akipei.
5 Hijeh a chu Manasseh hin Gilead le Bashan achan chunga jong Jordan luigal lam gam chansom jong changa,
6 hitia chu achate numei le pasal gam kipe cheh ahiuve. Gilead gam chu Manasseh chate amoh chengse kipea ahi.
7 Manasseh gam chu Asher a pat Shechem nisolam, Michmethath gei ahi. Gamgi chu Entappuah mite hopdoh dia lhanglam a kilhungsoh ahi.
8 Tappuah kimvel gam jouse chu Manasseh gam ahin, gamgi chin a Tappuah khoneo vang chu Ephraim chilhahte achangui.
9 Chuin gamgi chu Kanah vandunga alhung lhai. Manasseh gamsung ahivangin, vadung lhanglama achangui. Manasseh gamgi chu vadung sahlama akilhungin, Mediterranea twikhanglena akichaiye.
10 Ephraim lhanglam achangin, Manasseh sahlam achange; lhumlam Mediterranea Twikhanglen a kigi ahilhon’e. Asher chu sah-lhumlam achangin, Issachar sah-nisolam achangin ahi.
11 Issachar le Asher gamsunga Manasseh hin Beth Shan le Ibleam to, akimvel’a khoneo chengse le twipanga Dor kho geiyin alon, Endor, Taanach, Megiddo, chule akimvel dunga khoneo ho jong alon ahi.
12 Ahivangin Manasseh miten hicheng khopia anachengte chu anodoh pouvin, hijeh chun Canaan mite hikom dunga hin acheng jing nalayui.
13 Israelte ahung hatdoh nungun jong, Canaan mite adeldoh soh hel deh pouve, amavang engbolna kin bol’in apansah-uve.

Ephraimle Lhumlam Manasseh gam thumbe
14 Joseph chilhahten Joshua jah a, “I-bol’a keiho chan dia gamsung chan khat seh neipeh-u ham? Pakai vangboh jal’a keiho jong tampi kilhinta,” atiuve.
15 Joshuan, “Natambehseh-uva, Ephraim thinglhang gam naneh khop louvule, gamtah lah a lut’un, Periz mite le Rephaim mite gamsung gakivat jengtau,” ati.
16 Joseph chilhahten, “Thinglhang gamsungla kanekhop pouvin, achumale phai gama cheng Canaan mite, Beth Shal le akimvel khoneo dunga chengte, chule Jezreel phaiya chengte khu, thih kangtalai nei, mihat jeng ahiuve,” tin aseiyui.
17 Ephraim le lhumlam Manasseh jah a Joshuan, “Natam nauve, chule hat jong nahat lheh naive. Chan khat val chang thei nahinauve.
18 Thinglhang gamsung chu nanghoa ahijeng. Gamtah thim lah hijongle kivat ngim’un lang, kho khongsoh hel’in lo jengun. Thih kangtalai neiyu hen lang mihattte hijongleu Canaan mite chu nanodoh jeng diu ahibouvui.” ati.

Joshua lekhabu Bung 18
Agam amoh cheng kihop
1 Canaan gam pumpi alahsoh phat’un Israel khoppi pumpi Shiloh a akhikhom’un Pakai chenna ponbuh atungdoh-uve.
2 Achan diu gam peh loulai Israel phung sagi jen aum nalaiye.
3 Hijeh chun Joshuan Israelte jah a, “Pakai napu napateu Pathenin napeh-u gamsung itihle lut dia kigoa ngah ngah jeng nahiuvam?
4 Phung khat cheh a konin mi thum thum lhengdoh tem’un. Amaho chu sol ing ting, gamsung pumpi gakhol’u hen, alonom nau mun cheh gajihdoh hen, lang hinchoi leu phante.
5 Chuteng gamsung chu hop sagin kihomu hen, Judah phungin achenna lhanglam gamsung lo hen, Joseph phungin sahlam gamsung lo hen.
6 Hop sagia nahop nau chu jihdoh-un hinchoiyuvin. Chuteng hoi chu koi chang ding ahile Pakai i-Pathenu doh nan vang san inge.
7 Levi phung vang nalah-uva gam kihopna pang thei lou diu, amaho chan ding chu Thempua panga, Pakai kinbol ding chubou ahi. Chujongle Gad phung le Reuben phung, Manasseh phung chun Jordan luigal niso lam, Pakai lhachapu Mose’n apeh nau gam alosau ahitai,” ati.
8 Joshuan ahilsoh phat’in gam tedoh ding ho akondoh tauve. Joshuan, “Gam gatedohsoh keiyun hung kit’uvin. Chuteng hikom Shiloh muna hin vang san ing ting Pakai na-Pathenu kadoh ding ahi,” ati.
9 Mihon gamsung pumpi agakhol’un, chuin hop sagia ahopnau chu ajihdoh-un, khopi min jouse jong ajih thauvin, Shiloh ngahmun Joshua henga ahung kile kittauve.
10 Pakai lungdei hetna din Joshuan vang asanin, gam chang loulai Israel phung ho chu gambih khat cheh apetai.

Benjamin phung kipe gam
11 Gam kipe masapen chu Benjamin phunga insung mite ahiuve. Agamu chu Judah phung le Joseph phung kikah achang khauve.
12 Agamu sahlam gamgi chu Jordan luiya pat Jericho khopi panglam gamken lang ngan akilhungtaouvin, lhumlam thinglhang gamkai allah-in Bethaven nelgam geiyin achei.
13 Chuin Bethel jong kitiji Luz khopi lhanglam gamken alhahsuh suh-in, Ataroth Addar chopin, noinung Beth Horon molsang ajuiye.
14 Gamgi chu noinung Beth Horon lhanglam molsang lhumlam a konin akiheiyin, Kiriath Jearim jong kiti, Kiriath Baal kiti Judah gamsung lam ajon’e. Akisei chengse hi lhumlam gamgi ahi.
15 Kiriath Jearim a pat lhanglam gamgi akipanin, Nephtoah twinah a akilhung lut’e.
16 Rephaim phai sahlam chin, Hinnom phaicham gah kitouvetna molsangbul jonin akigolsuh-in, Hinnom phaicham jotpaiyin lhanglam ajonsuh-in, Jebus lhang chin chin ajot’in, Enrogel’a alut’e.
17 Chuin sahlam ajonin, Enshemesh ajotpam, Geliloth ajonin, Adummim lhanglam gal’a achei. Chujouvin Reubun chapa Bohan songphung lam ajonsuh-in,
18 chuin Jordan phaicham gah touvetna lhangchin chin ajontouve. Chujouvin phaicham ahopan,
19 Beth Hoglah lhangchin sahlam ngan achen, twimang sahlam chin, Jordan lui lonlutna akichiaye.
20 Niso lam gamgi chu Jordan luidung ahi. Hichengse hi Benjamin phung sunga insung mite gamlo gamgi chu ahi.
21 Benjamin phung, insung mite khopiho chu: Jericho, Beth Hoglah, Emek Keziz,
22 Beth Arabah, Zemaraim, Bethel,
23 Avvim, Parah, Ophrah,
24 Chepharammoni, Ophni, chule Geba ahin, akimvel dunga khoneo chengse to, khopi somle ni alhinge.
25 Khopi dang jon Gibeon, Ramah, Beeroth,
26 Mizpah, Chephirah, Mozah,
27 Rekem, Irpeel, Taralah,
28 Zela, Haeleph, Jebus ahiloule Jerusalem, Gibeah, chule Kiriath Jearim ahin, khopi somle li to akimvel dung khoneo chengse to ahi. Hichengse hi Benjamin phung sung isung mite goulo gam ahi.

Joshua lekhabu Bung 19

Simeon phung kipe gam
1 Aninaa gam kipe chu Simeo phung sung insung mite ahiuve. Agamgiu hi Judah gamsung geiyin akilhung lut’e.
2 Khopi chu Beersheba, Sheba, Moladah,
3 Hazar, Shual, Balah, Ezem,
4 Eltolad, Bethul, Hormah,
5 Ziklag, Beth Macaboth, Hazar Susah,
6 Beth Lebaoth chule Sharuhen ahin, khopi somle thum, akimvel dung khoneo chengse to ahi.
7 Khopi dang jong, Ain, Rimmon, Ether chule Ashan ahin, khopi li le akimvel dung khoneo chengse to ahi.
8 Hicheng lah a hin Baalath Beer ahiloule Ramah kiti geiya lhang sanga akimvel khopi jouse apangtai. Hicheng hi Simeon phung insung mite goulo gam chu ahi.
9 Judah phung kipe chu anehval jeh-un agamsung bih khat chu Simeon phung akipeh thatai.

Zebulun phung kipe gam
10 Thum channa gam kipe chu Zebulun phung insung mite ahiuve. Agamu Sarid ahi.
11 Sarid a pat gamgi chu Mareal lhumlam a achen, Dabbesheth hopan Jokneam niso lam vadunga alut’e.
12 Sarid a pat lang khat lam Chisloth Tabor gamgi nisolama achen, Daberath hopan Japhia geiyin achetouve.
13 Chua konin solam Gath Hepher le Ethkazin geiyin achen, Neah lampi lang ngan akiheiyin, Rimmon jotna lampia alut’e.
14 Sahlam gamgi chu Hannathon lam ngan akiheiyin, Iphtahel phaiya akichaiye.
15 Agamhop sung khopi ho chu: Kattath, Nahalal, Shimron, Idalah, chule Bethlehem ahin, akimvel dung khoneo ho pumin khopi somle ni alhinge.
16 Hiche khopi chengse le khoneo ho hi Zebulun phung insung mite gamlo sunga um cheh ahiuve.

Issachar phung kipe gam
17 Li channa gam kipe chu Issachar phung insung mite ahiuve.
18 Agam hop sungu chu, Jezreel, Chesulloth, Shunem,
19 Hapharaim, Shion, Anaharath,
20 Rabbith, Kishion, Ebez,
21 Remeth, Engannim, Enhaddah chule Bethpazzez ahi.
22 Agamgiu jong chu Tabor, Shahazumah, chule Beth Shemesh ahin, Jordan luiya kichai ahi. Agamsunga khopi chu somle gup alhingin, akimvel dunga khoneo chengse to ahi.
23 Khopi hichengse le khoneo hicheng hi Issachar phung insung mite goulo gamsunga um cheh ahi.

Asher Phung kipe gam
24 Gam kipe nga na chu Asher phung insung mite ahiuve.
25 Agam hop sung chu, Helkath, Hali, Beten, Achshaph,
26 Allam, Melech, Amad chule Mishal ahi. Lhumlam gamgi Carmel le Shihor Libnath ahi.
27 Gamgin niso lam a Bethdagon ajonin, Bethemek le Neiel sahlam jonin Zebulun le Iphtahel phaicham ajotpai. Cabul lang ajontouvin,
28 Ebron, Rehob, Hammon chule Kanah hopan Sidon geiyin achei.
29 Chuin gamgi chu Ramah langa akiheiyin, Tyre khopi kulpi kikaikhum ageiyin, Hosah lama akiheiyin Mediterranea Twikhanglen a akichaiye. Agamsung khopiho chu, Mahalab, Achzib,
30 Ummah , Aphek chule Rehob ahin, akimvel dung khoneo ho pumin khopi somni le ni alhinge.
31 Khopi hichengle khoneo hicheng hi Asher phung insung goulo dia kipe gamsunga um cheh ahi.

Naphtali phung kipe gam
32 Gup lhinna gam kipe chu Naphtali phung insung mite ahiuve.
33 Agamgiu Heleph a pat Zaanannim gamsunga gangpi phung gei ahin Adminekeb le Jamnia lang ajonin, Lakkum a aleng lut’in, Jordan luiya atange.
34 Hichea hin gamgi chu lhumlam ngan akiheiyin Aznoth Tabor ajonin, chua pat Hukkok lama achen, lhanglam a Zebelun hopan, lhumlam a Asher ahopan, nisolam a Jordan luiya achei.
35 Agamsunga kulpi kaisa khopiho chu, Ziddim, Zer, Hammath, Rakkath, Chinnereth,
36 Adamah, Ramah, Hazor,
37 Kedesh, Edrei, Enhanazor,
38 Yiron, Migdalel, Horem, Bathanath chule Beth Shemesh ahin, akimvel dung khoneo chengse pumin khopi somle ko alhinge,

Dan phung kipe gam
40 Sagi lhinna gam kipe chu Dan phung insung mite ahiuve.
42 Agam’un Zorah, Eshtoal, Irshmesh,
42 Shaalbim, Aijalon, Ithlah,
43 Elon, Timnah, Ekron,
44 Eltekeh, Gibbethon,
45 Jehud, Beneberak, Gathrimmon,
46 Mejarkon, chule Rakkon, chujongle Joppa kimvel gamsungse jong ahopsoh keiye.
47 Dan phung miten gamsung alhaso phat’un Laish gam anokhumun, alauvin, amite athat’un amaho gamin akisemtauve. Hiche gamsunga hin achengun, Laish khopi min akhel’un, apuu Dan min aputsah-un, Dam ma ma asah tauve.
48 Khopi hichengle khoneo hicheng hi Dan phung insung goulo dia kipe gamsunga um cheh ahi.

Gam kipe nukhah pen
49 Israelten gam ahopsoh phat’un, Nun chapa Joshua chan din gambia khat apeuvin.
50 Pakai thupeh dungjuiyin Joshuan a-ngeh pen khopi, Ephraim thinglhang gamsunga Timnath Serah khopi apeuve. Joshuan akisah phat’in chukoma achengtai.
51 Eleazar Thempu le Nun chapa Joshua chule Israel phung ho insung lamkaiten Shiloh mun a Pakai chenna ponbuh kotphunga vang asan’un, gambih hijat hi ahomtauve. Hiti hin gam chu ahomsoh tauvin ahi.
Joshua lekhabu Bung 20
Hoidohna khopiho
1 Pakaiyin Joshua koma
2 Israelte seipeh din, “Nangkoma asei dia Mose’n naseipehsa hoidohna khopi ding ho chu lhengdoh-un.
3 Hikom dunga chu khutsoiya mithat jamlut’a, phula nompa khut’a ongthol thei ding ahi.
4 Mithat chu hiche khopi khat pen pen a jamlut ding, khopi kelkotphung thutanna mun a lut’a lamkaite koma thilsoh chu ahilchet ding ahi. Chuteng lamkaiten khopi sunga lhalut’untin, chenna ding mun apeh-uva aumsah diu ahi.
5 Phula nompan ahung hol teng kho miten apehdoh da diu ahi Lung hanga that ahiloujeh a, kho miten amaho chu ahuh tei tei diu ahi.
6 Hiche khosunga hi thu phatea akitan kah le, hichepet’a Thempupa thi kah a chengden ding ahi. Akiseite ni hi akichai teng ahung jamdohna kho akitjot kit thei ahitai,” tia hil din aseipeh-e.
7 Hiti hin Jordan luigal lhumlam a din Galilee gamsung Naphtali thinglhanga din Kedesh, Ephraim thinglhang gamsunga din Shechem; Judah thinglhang gamsung din Hebron alhengdoh-ui.
8 Jordan luigal niso lam, Jericho niso lam Nelgam gamken sunga din Reuben gamsunga Bezer alhengun; Gilead gamsung, Gad thinglhang gamsunga din Ramoth; Manasseh gamsung, Bashan gama din Golan alhengui.
9 Israel pumpi le alah-uva cheng khopem ho dia kilhengdoh hoidohna khopi ho chu hicheng hi ahi. Koi hile khutsoiya mithat chun phula nompaa kona jamdoh a hiche khopihoa hi hoidoh thei ding ahi; japan achungthu kholtohna anei masangsea ama chu koiman atha thei lou ding ahi.

Joshua lekhabu Bung 21
Levi khopiho
1 Levi phung insung miten Eleazar Thempule Nun chapa Joshua chule Israel phung dang ho insung upa chengse koma,
2 Canaan gamsung Shiloh a chun, “Kachenna diu khopi ho le gancha vahna ding khopiho kimvel’a hamhing gam peh dia Pakaiyin Mose asepehsa ahi,” tin aseiyui.
3 Pakai thupeh dungjuiyin Israelten agamsunguva konin khopi phabep le hamhing gam phabep Levite apetauve.
4 Levi phung insung lah a khopi chang masapen chu Kohath khailhah ahi. Aaron Thempu chilhah insung mite chu Judah le Simeon chule Bejamin gamsunga konin khopi somle thum akipei.
5 Kohath khailhah amoh chengse chu Ephraimle Dan chule Manasseh gamsunga konin khopi som akipei.
6 Gershon khailhah insung mi ho chu Issachar le Asher chule Naphtali, chujongle nisolam Manasseh gamsunga konin khopi somle thum akipei.
7 Merari khailhah insung miho chu Reuben le Gad chule Zebulun gamsunga konin khopi somle ni akipei.
8 Pakaiyin Mose koma aseisa bangin, Israelten vang asan’un khopi hicheng le akimvel hamhing gamse se to Levite apetauve.
9 Judah le Simeon gamsunga kona kiphaldoh,
10 Levi chilhah, Kohath khailhah, Aaron son ho kipea khopiho min chu aban a kisei ding ahin, amaho h peh masah pen dia phun pha ahi.
11 Amaho kipe khopi chu, Anak Arba min kiputsah Arba khopi, tua Hebron kiti, Judah thinglhang gamsunga chule akimvel’a hamhing gamsung chu ahi.
12 Khopi loujao jouse le akimvel dung khoneo jouse vang chu goulo gam dia Jephunneh chapa Caleb kipesa ahitai.
13 Hoidohna khopi lah a Hebron pumpkin aban a khopi chengse jong hi Aaron Thempu chilhahte akipeh bei: Libnah,
14 Jattir, Eshtemoa,
15 Holon, Debir,
16 Ain, Juttah chule Beth Shemesh le akimvel’uva hamhing gam chengse to ahin, Judah phungle Simeon phung gamsunga kipedoh khopi ko alhinge.
17 Benjamin gamsunga konin khopi li akipedoh-in: Gibeon, Geba,
18 Anathoth chule Almon ahin, hamhing gamse se to ahithai.
19 Abonchan khopi somle thum to hamhing gam ho chu Aaron Thempupa chilhahte Thempuho akiepi.
20 Kohath khailhah Levi insung mi adang ho chu Ephraim gamsung khopi phabep akipei.
21 Akipeuva chu khopi li ahin: Shechem, Ephraim thinglhang gamsunga hoidohna khopi khat le hamhing gamsungse se ahin, Gezer,
22 Kibzaim chule Beth Horon le hamhing gamsungse se ahi.
23 Dan gamsunga jong khopi li akipen: Eltekeh, Gibbethon,
24 Aijalon chule Gathrimmon le hamhing gam ho pum ahithai.
25 Lhumlam Manasseh ho gamsunga khopi ni akipen: Taanach chule Gathrimmon ahin, hamhing gam puma kipe ahi.
26 Kohath khailhah insung miten abonchan khopi som akilah-un, hamhing gamse se to ahithai.
27 Gershon khailhah, Levite loi khat’in jong nisolam Manasseh ho gamsunga khopi ni akilah-un: Bashan gamsunga hoidohna khopi Golan le Beeshterah ahin, ahamhing gam pum ahithai.
28 Issachar gamsunga khopi li akilah-un: Kishion, Daberath,
29 Jarmuth chule Engannim ahin, hamhing gamse se puma akilah-u ahi.
30 Asher gamsunga konin jong khopi li akilah-un: Mishal, Abdon,
31 Helkath chule Rehob ahin, hamhing gam ho pum ahi.
32 Naphtali gamsunga khopi thum akilah-un: Galilee gamsunga hoidohna khopi Kedesh le hamhing gamsung pum, Hammoth Dor le Kartan ahin, hamhing gamse to ahithai.
33 Gershon khailhah insung miten abonin khopi somle thum to ahamhing gamse se akilah-ui.
34 Merari khailhah Levi dang hon Zebulun gamsunga khopi li akilah-un: Bezer, Jahaz,
37 Kedemoth chule Mephaath le hamhing gam ho to ahi.
38 Gad gamsunga khop li akilah-un: Gilead gamsunga hoidohna khopi Ramoth le hamhing gam to ahin, Mahanaim,
39 Heshbon le Jazer chule ahamhing gamse seu to ahithai.
40 Hiti hin Merari khalhahse se khopi somali le get to
42 akimvel’uva hamhing gamse se Levite akipei.

Israelten Canaan gamsung alo’u

43 Apu apateu koma peh dia giltah a akitepnasa gamsung abonchan Pakaiyin Israelte apetai. Israelten gamsung chu alo’uvin achenphatauve.
44 Apu apateu ateppeh bang bangin gamsung pumpia Pakaiyin cham alensah tai. Akidoupiu melma jouse Pakaiyin Israelte noiya akoi phat’in, agalteu khatcha jong amasanguva ding jou aumtapoi.
45 Israelte henga akitepna thu jouse achangcha len Pakaiyin amolso soh keiye.

Joshua lekhabu Bung 22

Nisolam a chengho Joshuan asolkit
1 Reuben phungle Gad phung chule solam Manasseh to Joshuan akoukhomin,
2 “Pakai lhachapu Mose’n nahil bang bangun ijakai nabolsoh tauve, kei sei jong nanit cheh-ui.
3 Phat hitih chanpi hin Israel chanpi namiteu dalha louhel’in naum jingui. Pakai na-Pathenu thupeh chingthei tah-in namangui.
4 Tunvang ateppehsa bangin Pakai na-Pathen’u nasopiu Israelte chamle lungmon apetai. Pakai lhachapu Mose’n napeh nau, Jordan luigal nisolam, nalhensau gamsunga kile kittauvin.
5 Mose’n nahilsau: Pakai na-Pathenu ngail’uvin, Adei bol’un, Athupeh chengse nit’un, nahinkho lhumkeiyin nalungthim pumpkin akin abol jingun,” ati.
6 Joshuan vang aboh-in ajah-uva hitin aseiye: “Gancha tampi le dangka, sana, sum-eng, thih chule ponsil tampi pumpa nengtah a inlam jon ding nahiuve.
7 Melmate gou napoh chengseu hi naphung nachangte to kihom’un,” ati. Hiti chun inlam jonin achetauve.
8 Manasseh phung keh khat chu Mose’n Jordan luigal nisolam gam apen, phung keh khatma chu Joshuan Jordan luigal nilhum lam phung dangho lah a gam apei.
9 Hiti hin Reuben phungle Gad phung chule solam Manasseh phung chu in lam a akite kittauve. Israel dangse se Canaan gamsung, Shiloh mun dalhan Pakaiyin Mose jah a peh dia aseisa, amahon akilahsau, agamu, Gilead gamsung jonin akipatdoh tauve.

Jordan panga maicham
10 Reuben phungle Gad phung chule solam Manasseh phungin Jordan ahinphah phat’un, Jordan luigal lhumlam panga, alet a len, vetnom umrah maicham khat luipanga asem’ui.
11 Hichun mihon, “Veuvin, Reuben phungle Gad phung chule solam Manasseh phungin, Jordan gal eiho gamsung, Geliloth a maicham khat asem’ui!” tin Israel dang ho koma aseitauve.
12 Hiche hi Israelten ajah phat’unsolam phung ho sat din Shiloh a khoppi ahung kikhomtauve.
13 Israelten Gilead gam a Reuben phungle Gad phung chule solam Manasseh phung mite henga, Eleazar Thempu chapa Phinehas asol’ui.
14 Lamkai mi somin Phinehas alhonpin, niche lamkaiho hi, Jordan lhumlam a Israel phung som sunga phung upa cheh ahiuve.
15 Gilead gamsung, Reuben phungle Gad phung, chule solam Manasseh phung miho henga ahungun,
16 Pakai mite khoppi pumpi thalhengin ajah-uva, “I-dia hitobang thilse hi Israel Pathen douna bol nahiuvam? Nachangseh diuva hiche maicham nakisem jal’uva Pakai doumah bol nahitauve! Pakai sei ngailou nahiu ahitai!
17 Peor mun a inchonset’uva, Pakaiyin amite natgol’a athagam chu geldoh-un. Niche chonset jeh a chu tugeiya thoh jing ihiuve. Hiche chonset jong chu phaset lou ham?
18 Pakai sei juida nagot’u ham? Tunin Pakai doumah bol leu chun jing teng Israel mitin chunga lung hang ding ahi.
19 Nagamsungu Pathen houna thei ahiloule, a-ponbuh kisonna, Pakai gamsunga hung galkaiyun. Kagamu phabep kithum’un. Hiti hin Pakai doumah bol dauvin, aumsa Pakai i-Pathenu maicham val’a maicham semben keiho hi Pakai doumah bol neihisah dauvin.
20 Suhmang dia seisa thil ho chunga thupeh ngailou, Zerah chapa Achan thu ngailou chu geldoh-un; Israel khoppi pumpi talen amat lo ahi. Achonset jeh a Achan chu achangseh a thia ahipoi,” atiuve.
21 Reuben phung le Gad phung chule solam Manasseh phung miten, lhumlam gamsung phung insung upate jah a,
22 “Hatchungnung chu Pathen ahi! Ama chu Pakai ahi! Hatchungnung chu Pakai ahi! Niche kabollo nau Aman ahen, nanghon jong nahetnom’ui! Doumah bol’a Pakai dia kitah lou kahiule neihinghoida jengun!
23 Pakai thu nit louva, maicham, kisemtum a, pumgo thilto go na le lhosoh thilto kiloikhom thilto khol tumna dia bol kahiule, Pakaiyin talen eimatsah tauhen.
24 Chutima lah a khonung tengle natu nachateuvin katu kachateu jah a, ‘Pakai Israel Pathen iti nahou thei diu ham?
25 I-kah-uva, Reuben phungle Gad phung mite nangho to gamgi dia Jordan vadung lonsah ta, Pakai hou thei pouvin nate,’ hinti get’unte tia kiphalam a kibol’a chu! Hitia chu natu nachateuvin katu kachateu chu Pakai ahousahda mai theiyu ahi.
26 Hijeh a chu pumgo thilto go na dingle thilto na ding hi hih jongle maicham khat kasem’uva,
27 namiteu le kamiteu het jing dia, chule khang nukhahte het dia pumgo thilto le kilhaina thil, chule kiloikhom thil puma aponbuh theng maiya Pakai kahouvu hettohsahna dia niche maicham hi kasemu ahi. Netu nachateuvin katu kachateu jah a Pakai ahou thei louna ding aseida na diuva kibol
28 Kagel dol’uva aseitah-u jongle katu kachateuvin, ‘Veuvin! Kapu kapateuvin jong Pakai maicham tobang anasem’ui. Pumgo thilto go na le kilhaina thilto pehna mun ahipon, imiteu kah a hettohsahna ahi,’ ati diuva kibol ahi.
29 Pakai doumah bolna dingle nahsah louna dia pumgo thilto go na le lhosoh thilto le kilhaina thilto pehna dia maicham kasem louhel diu ahi. Achenna ponbuh maiya kitung, Pakai i-Pathenu maicham tilou, maicham dang sembe hih hel unge,” atiuve.
30 Thempu Phinehas le lhumlam gamsung phung insung mite khoppi thalheng upa somin Reuben phung le Gad phung chule solam Manasseh phung mite donbutna jahdol ajah phat’un alung lhaitauve.
31 Hichun Eleazar Thempu chapa Phinehas chun ajah-uva, “Pakaiyin eichin jingu kahetauve. Ama doumah bol nahipouvin, Pakaiyin talen eimatsah thei nauva konin neihoidohsah tauve,” ati.
32 Phinehas le lamkaiten Gilead gamsunga Reuben phung le Gad phung mite dalhan, Canaan gama Israelte henga ahung kile kit’un, thu ahin lhut tauve.
33 Israelte alung lhaiyun, Pathen athangvah-ui. Reuben phung le Gad phung mite chenna gamsung gal bol’a suhgam ding asei kit tapouve.
34 Reuben phungle Gad phung miten, “Pakai chu Pathen ahidol niche maicham hin eihettohsah-u ahi,” atiuve. Hijeh chun maicham min jong “Hettosah,” asah tauve.

Joshua lekhabu Bung 23

Joshua lhahna thu asei
1 Khonung nungin akimvel’u melmatea konin Pakaiyin Israelte lungmon apetai. Hiche phat hin Joshua ateh lheh tai.
2 Hijeh chun Joshua Israelte, upaho le lamkaite, thutanho le japi vaibolte jah a, “Kateh behseh tai.
3 Nang ho ding khohsahnaa Pakai na-Pathen’un namtin vaipi hijat abolna hi namutauve. Pakai na-Pathen’un gal nasatpeh jingui.
4 Solam Jordan luiya pat lhumlam Mediterranea Twikhanglen gei, kajosa namtin vaipi le lah loulai namtin vaipi gamsung jouse hi naphung phunguva kahoptoh pehsa nahitauve.
5 Pakai na-Pathen’un amaho khu jamsah sah-in tin, nakitol tengule delmang gamtante. Pakai na-Pathen’un nateppeh banguva, agamsungu nalah diu ahi.
6 Hijeh chun Mose Danthubua kijihdoh jouse ching theiyin nitsoh keiyun. Hoilai mun hijongle nahsahmo hih hel’un.
7 Hitia chu nalah-uva dalhah den miho chutoh kivop dauvin, kihahselna le hou ding ahiloule bohkhup a chibai bohna din amaho pathen minho pan hih-uvin.
8 Chuti tah sangin tuchana nachonna bangun Pakaiya kitah jingun.
9 Nakitolnauva Pakaiyin nam hattah tah ho nadeljam peh-un, namasanguva ding jou aumpoi.
10 Nangho pasal khatseh-in amaho sang khat cheng nadeljam’un, atepsa bangin Pakai na-Pathen’un gal nasatpeh-ui.
11 Hijeh chun chingtheiyin, Pakai na-Pathenu ngailu’vin.
12 Kitah louva, nalah-uva dalhah den nam mite najop’uva, nakichenpiule,
13 nano tengu hiche namtin vaipite hi Pakai na-Pathen’un deljampeh tapouvinte. Chutitah sanga nadiuva kiphatlamna jingle, kipalna thang, lhah lutna khuh, tungtuna kijepna mol le namit’uva kikam linghem tobanga hung pang diu ahi. Pakai na-Pathen’un napeh nau hiche gampha sunga nabeihel kahseuva chuti ti jeng ding ahi.
14 “Kadin thi phat alhingtai. Pakai na-Pathen’un thilpha atep jouse napeh soh hel’u lungthim gil’in nahesoh keiyui. Akitepna jouse anitsoh keiye; khatcha athonpoi.
15 Nahenguva akitepna jouse anitsoh hel banga, nagihsalna jouseu jong aboldoh cheh ding ahi.
16 Pakai na-Pathen’un nit dia thu napeh-u kitepna nanit dauva, pathen chom kin bol’a hou nahiule, lung hanga talen napeh diu, napehsau hiche gampha sunga hi khen nanei louhel diu ahi,” ati.

Joshua lekhabu Bung 24

Shechem a Joshuan japi jah a thu asei
1 Shechem a Joshuan Israel phung jouse akhom’e. Upaho le lamkaiho, thutan ho le Israel vaibol ho Pathen angsunga akoulut’e.
2 Hichun japi koma Joshuan, “Pakai Israel Pathenin naseipeh nomu chu hiche hi ahi: ‘Masang laiyin napu napateu Euphrate luipi gal lang khat a achengun, pathen chom chom ahouvui. Napu napateu lah a khat chu Terah ahin, chapa ni aneiyin, Abraham le Nahor ahi lhon’e.
3 Hichun napuluiyu Abraham chu Euphrate luipi gal’a pat kahin puiyin, Canaan gam kachot khongsah-e. Sonle pah tampi kaneisah-in, chapa Isaac kapen,
4 Isaac chun chapa Jacob le Esau ahinge. Esau goulo gam din Edom thinglhang gamsung kapen, napuluiyu Jacob le achate Egypt a akitolsuh-ui.
5 Khonungin Mose le Aaron kasol’in Egypt gamsung kabolgim’e. Nangho vang kahin puidoh-in;
6 napu napateu Egypt a kon kahin puidoh chun Egyot miten ahindel’un, kangtalai tampi le sakolte mangchan ahung kitol’ui. Napu napateuvin Twikhanglensan ahinphah phat’un
7 kapanpi ngeh-in ahung taovun, hijeh chun Egypt mite to akah-uva mu kathimsah tai. Hiti chun Egypt mite Twikhanglen kachupsah-in, Egypt mite kabolna chu naheuve. “Gamthip noiya sotpi nachengun,
8 chuin Amor mite gamsung, Jordan luigal nisolam a chengte gama kahin puilut’ui. Amahon nahinsat’uvin, ahivangin nangho kajosah tai. Nakitol tolnauva amaho kasugamin, agamu nalatauve.
9 Chuin Moab leng Zippor chapa Balak chun nasat kittauve. Nagaosap diuvin Beor chapa Balaam chu mi agakousah-e.
10 Hijongle Balaam sei ngailouvin, phatthei kabohsah jo’uvin, hiti hin Balak khut’a konin kahuhdoh-ui.
11 Jordan galkaiyin Jericho naphatauve. Jericho kho miten nahinsat’un, Amor mite le Periz mite, Canaan mite, Hit mite, Girgash mite, Hiv mite chule Jebus miten nabolnau bang bangin nabol’ui. Ahivangin abonchauvin nangho kajosah soh keiye.
12 Nakitol phat’un, Amor lengte ni nodohna din, miho chu kahh kichai. Hichu nachemhem hat’u le thalpi kap themjeh-u ahinaisaipoi.
13 Natuhchai khah louhel’u gam le nasahdoh louhel’u khopi tampi kapeuve. Tun nachen phauvin, natulut louvu lengpiga jong naneuvin, naphu louvu olive thingga jong nalou tauve,’ tin aseiye.
14 “Hijeh chun Pakai jabol’un, lung thengsel le tahsah tah-in akin bol’un. Napu napateuvin Mesopotamia gam le Egypt gam a ahouvu pathen chom chom chu pai mangun lang, Pakai kinbou bol’un.
15 Pakai kinbol ding nadaule, koipen kin bolgo nahiuvam tunin kilhen’un, Mesopotami gama napu napateu hou pathen ho ha, ahiloule tua nachen phau Amor mite pathen ho hougo nahiuvam? Keile ka-insung miten vang Pakai kin kabol diu ahi,” ati.
16 Japin, “Keihon vang itih hijongle Pakai dondan pathen chom hou pouvinge!
17 Pakai ka-Pathen’un kapu kapateule keiho sohchanna Egypt a kon eihin puidoh-un, thil kidang abol jouse jong kamu’ve. Kaphah phah nau natim vaipi lah jenga jong eihoidoh jingui.
18 Hiche gamsung kahinphah phat’un achenga Amor mite Pakaiyin adeldohsoh tai. Hijeh a chu keihon jong Pakai kinbou kabol diu ahi, ka-Pathenu Amabou ahi,” atiuve.
19 Japi jah a Joshuan, “Naseinah vangun Pakai kin bol thei pouvin nate. Pathen theng ahin, nachonset’u ngaidam ponte. Koima douthei ahipoi,
20 midang pathen ho chu hou din Ama dalha leu chun, nadouvuntin talen namatsah diu ahi. Masanga nadiuva aphat vangin nasumang jengunte,” ati.
21 Ahivangin Japin, “Ahipoi! Pakai kinbou kabol diu ahi,” atiuve.
22 Joshuan ajah-uva, “Pakai kin bol dia kiphaldoh nahinau hetoh nangho ma ma nahiuve,” ati. Amahon, “Ahinai, kathuu hettohsah a pang kahiuve,” tin aseiyui.
23 Hichun Joshuan, “Achuti dingle midangte pathen chom chom nakoiyu chu paidoh-un lang, Pakai Israel Pathen koma kitep tau,” ati.
24 Chuphat’in mipin Joshua jah a, “Pakai ka-Pathenu kin bol ung ting, athupeh chengse nit unge,” atiuve.
25 Hiche nikho hin Joshuan mipi din kitepna khat asemin, Shechem a chun ajui diu Danthu jouse le chondan ho apei.
26 Thupeh hicheng jong chu Pathen Danthu lekhajol sunga Joshuan ajih luttai. Chuin song lentah khat alan, gangpi phung noi, Pakai muntheng phunga atungoh-in,
27 mipi jah a, “Hiche song hi eiho dia hettohsah a pang ding ahi. Hiche song hin ijah-uva Pakai thusei ajasoh keiye. Na-Pathenu doumah nabol louna diuva, nadiuva hettohsah a pang ding ahi,” ati.
28 Joshuan miho chu asoldoh-in, amitakip agamsung cheh a akile kittauve.

Joshua le Eleazar thi
29 Hiche nung hin Pakai lhachapu Joshua, Nun chapa, chu kum ja khat le kum som alhinin athitai.
30 Along chu ama gamsung, Gaash molsang sahlam, Ephraim thinglhang gam, Timnath Serah a avuitauve.
31 Joshua hinlaisen Israelten Pakai kin abol naive, ama thi nung, amit tah-uva Israelte dia Pakai thilbol mua lamkaite damlai sungin jong, Pakai kin abol jing nauve.
32 Egypt gama kon Israelten ahinpohdoh-u Joseph gubuh ho chu, Jacob-in Shechem pa Hamor chate koma dangka ja khat a achohna gambia, Shechem a avuitauve. Hiche gamsung hi Joseph chilhah ho chenpha gamsung ahikhai.
33 Aaron chapa Eleazar jong athin, achapa Phinehas kipe, Ephraim thinglhang gamsung, Gibeah khoa avuitauve.