1 SAMUEL LEKHABU MASA

Thupatna

Samuel lekhabu masa hin Israelte lah a Thutan vaihomhoa kona mi khatseh vaipohna kikheldoh thusim akisun’e. Israel nampi hinkhoa hiche kikhel thudol hi mi thum chunga aki-ngamin, amaho chu, thutan vaihom minthang ho lah a nukhah pen Samuel, Israel leng masapen Saul, chule leng ahi masang thusim jouse Samuel le Saul to kimat jing David, hicheng hi ahiuve.
Kitepna luiya thusimbu bangin, Samuel lekhabu masa doi jong hi, Pathena kitahnan mihem alolhinsah-in, thu ngai louvin manthahna alhutji dol ahi. Hiche thudol Pakaiyin Eli Thempu henga asei 2:30 laiya kisun, “Eijabolte jabol ing ting, einahsah louho nasah mon bol inge,” ati hin kichentah-in aseidoh-e.
Samuel lekhabu masa hin mihem khatseh vaipoh thudol’a lunggel akihal chet’e. Israelte leng tahbeh chu Pakai amatah-in akiseiyin ahivangin mipi ngeh dungjuiyin, Pakaiyin leng khat alhendoh peh tai. Thupipen vang chu Israelte leng le mipi abonchauva Pathen thutan hunei tah noiya kun cheh-in akiseiye (2:7-10). Mihao le vaichate chandol chu Pathen Danthu dungjuiya kibang cheh’a bol jing din akiseiye.

Asung thu hopkhen
Samuel Israelte thutan khat ahi 1:1-7:17
Saul leng chan 8:1-10:27
Saul lengvaipoh kipat til thusimho 11:1-15:35
David le Saul 16:1-30:31
Saul le achapate thi 31:1-13

1 SAMUEL LEKHABU MASA BUNG 1

Shiloh a Elkanah le a-insung mite
1 Ephraim thinglhang gamsung, Ramah khopia Ephraim phunga mi Elkanah chu anachenge. Elkanah hi Jeroham chapa, Elihu tupa ahin, Tohu insung kon, Zuph phungkhai lhah ahi.
2 Elkanah-n ji ni, Hannah le Penninah akop’e. Penninah hin cha ahing nan, Hannah vang achangtai.
3 Kumseh le Elkanah hi Ramah khoa konin Shiloh a Hatchungnung Pakai koma kilhaiya gahou din ache jin, Shiloh a hi Eli Thempu chapate ni, Hophni le Phinehas chu Pakai Thempua pang lhon ahi.
4 Elkanah hin kilhaina abol chanin Peninnah le achate ni sa chan khat cheh apejin,
5 adei lheh vangin Hannah chu Pakaiyin achinsah a acha aneiloujeh-in, Elkanah-in sa chan khat bou apeji.
6 Pakaiyin cha neilouva akoi Hannah hi adou jing Peninnah-in thohda dan aboljin, ajumso jin ahi.
7 Kumseh le hitia hi um jingpeh ahitai; Pakai Houin a cheu jongle, Peninnah-in Hannah lung nom mon alha jin, aka lon an angoljitai.
8 Ajipa Elkanah-in, “Ibol’a kap nahim, Hannah? Idia an ngol nahim? Ibol’a lung lhai louhel nahim? Chapa som sanga ka-ngailut joh nahilou ham?” ati.

Hannah chule Eli
9 Nikhat Shiloh a Pakai Houin a an neh jouvin Hannah adingdoh tai. Alungna behseh jengin Pakaiya ataole chase tah-in akaptai.
10 Hichepet hin Eli Thempu chu atouna ngai kotphunga atouve.
11 Hannah giltah-in akitep’in, “Vo Hatchungnung Pakai, nasohnu neivetemin! Kagentheina neihet peh-in, neisumil hih-in! Chapa neihinsah pou poule, ahinkho lhumkei din napedoh ing ting, sam jong vosah ponge,” ati.
12 Hannah chu sottah Pakai henga atouvin, amuh phun phun chu Elin amelchih-e.
13 Oging louva tao ahin, muh aphunsah vangin, a-ogin akijapoi. Hijeh chun Elin jukhamin agel lon,
14 ajah a, “Najukham motpao chu ngan! Ju dondan, lim geh chan umin!” ati.
15 Hannah-in, “Jukham kahipoi kapu! Genthei behseh a, kagimna jouse Pakai henga phongdoh a jouse Pakai henga phongdoh a taova kahibouve.
16 Numei chavaiyin neigel dan, kahesoh gentheival phat’a hiti tao kahi,” ati.
17 Elin, “Lung mongin chetan, Israel Pathenin nathum chu napetei tei hen,” ati.
18 Hannah-in jong, “Phat tinin neikhoto jingin,” ati. Hichun Hannah achen an anen, alung gimtapoi.

Samuel pen chule Pathena akatdoh-u
19 Ajing jingkah-in Elkanah le a-insung mite matah-in athouvun, Pakai ahou chai phat’un a-inlamu Ramah kho ajontauve. Elkanah-in ajinu Hannah akitimat pin, Pakaiyin Hannah taona asangtai.
20 Hijeh chun Hannah agaiyin chapa khat ahingtai. “Pakaiya kathumdoh ahi,” tin amin Samuel asah-e.
21 Elkanah le a-insung mite dia Shiloh a chea Pakai henga kumseh a kilhai phat le atepsa deichom a kilhaina phat ahung lhung kittai.
22 Tuchung hin Hannah achepoi. Ajipa jah a, “Naovin noi aban banleh, Pakai Houin a puiying ting, hikoma chu ahinkho lhumkeiya umden ding ahitai,” ati.
23 Elkanah-in, “Aphai phapen tah dia nagel chu bol tan; nao noi ban kahsen in a umtan. Nakitepna chu Pakaiyin guilhunsah tei hen,” ati. Hijeh chun Hannah in a aumtan, nao akijentai.
24 Anoi ban phat’in Hannah-in Shiloh a apuiyin, kumthum lhingsa bongchal khat jong akaithai; changbong neldisel kilogram som le savun peng dimset lengpitwi jong apoi. Chapang cha Samuel chu Hannah-in Pakai Houin, Shiloh a apuitai.
25 Bongchal atha jouvun nao chu Eli henga apuitauve.
26 Hannah-in Eli jah a, “Nei kho ngai tadin kapu! Neigeldoh-em? Hikoma dinga Pakaiya tao numei namu nu chu kahi.
27 Pakai henga niche naosen hi thuma kahin, kathum chu eipetai.
28 Hiche naosen hi Pakai dia kakatdoh ahitai. Ahinkho lhumkeiya Pakaiya ding ahitai,” ati. Chuin hikoma chun Pakai ahoutauve.

1 SAMUEL LEKHABU MASA BUNG 2

Hannah Taona
1 Hannah ataovin: “Pakaiyin kalungsung akipasah-in, Eithilbolpeh itijong kakipa hitam! Eidou jingho kanuisat tan, Parthenon eipanpi jal’a iti kipa kahim!
2 “Pakai banga theng dang aumpoi, Akibahpi abeihel’e, I-Pathen’u banga mihoidam aumpoi.
3 Kiletsah ham hoitho ngauvin, Ham hoitho thip tauvin, Ahesoh a Pakai Pathen ahin, Mite natoh dungjuiya thutanpehji ahi.
4 Gal-hang sepaite thalpi abongtan, Mi lhasamte ahatdoh tauve.
5 Neh le chah neng jeng jungle chu Neh pan akitungdoh tauvin, Gilkelte avatauve. Numei chabeiyin cha sagi aneitan, cha tampi hingnu cha beiyin aumtai.
6 Pakaiyin thajong athaa, hinjong ahinsah, Mithigama mi asol jin, anungkou kitjie.
7 Konkhat avaisah-in, konkhat ahaosah-e; Konkhat asunemin, konkhat achoisange.
8 Vaichate tol’a konin adomsangin, Neilelte agenthei nauva aphong dinge. Lengle lalte to akijolsah-in, Jatheidol tah-in akoijie. Leiset bulpi jong Pakaiya ahin, Leiset bulpi chunga vannoi atundoh ahi.
9 “Kitahtah amite ahoidamin, Migiloute vang muthima amangthah jiuve; Mihem hi athaht vanga Gal jou ahipoi.
10 Pakai melmate kisumang diu; Amaho dou nan van akithinsah jie. Pakaiyin vannoi thu atan ding; Alengpa tha pentin, Alhendoh lengpa gal josah-inte,” ati.
11 Elkanah chu inlam, Ramha khoa akile kit’in, chapang Samuel vang Shiloh a aumdenin, Eli Thempu noiya Pakai kinbol’in apangtai.

Eli chapate ni
12 Eli chapate ni chu pannabei gel, Pakaila ging lou,
13 mipi lah a Thempun a-ngeh ding dol kisem chondan jouse jong khohsah lou ahi phone. Hiche ho sangin, min kilhaina gan ahung tha teng, sa kihon phul laipi chu thihkhe kaa koidoh din Thempupa sohpa ahung jin,
14 athihkhe kan belsoulai asoh-in, akoidoh doh chu Thempu achangjitai. Shiloh a kilhaina gan that’a hung Israelte hitia chu abol cheh-u ahi.
15 Hicheng kalval’in, sathao atdoh a govam masangin jong, Thempupa sohpa ahung jin, kilhaina gan that pa jah a, “Thempupa kigo ding sa neipen; hon minsa hinchoi jongle chun sang pontin, sahing bou adeiye,” ahungtiji.
16 Kilhaina gan that pan, “Adih-in bol’u hitin, sathaose halvam masaute; chuteng nadei dei kilahnan nate,” atile; Thempupa sohpan. “Ahipoi, tun neipe jengin! Neipeh loule nam nah a kalah ding ahi!” atijie.
17 Eli chapate chonset hitobangpi hi Pakaiyin avetda lheh-e, ajeh chu Pakai dia kitohdoh thilto nahsah mo tah-in abol’uva.

Shiloh a Samuel
18 Chapang Samuel chun Pakai kin abol jingin, tupat ponnem theng khat omphon aneiye.
19 Kumseh le ajipa kilhaina gan that’a ahung teng Samuel nun ajuiyin, Samuel din sangkhol chol khat ahinpoh peh jie.
20 Ahung lhon teng Elin Elkanah le ajinu vang aboh jin, Elkanah koma, “Pakai dia nakatdoh chapangpa khel din Pakaiyin hiche nu hi chadang jong hinsah hen,” atijie. Chujoule amani inlama akile kitji lhontai.
21 Pakaiyin Hannah vang aboh tah tah-in, chapa thum le chanu ni aneibei. Chapang Samuel chu Pakai kinbol’a apan na a akhangtou touve.

Eli le achapate ni
22 Eli atehse lheh tai. Achapate nin Israelte abolna lhon, Pakai chenna ponbuh kotphunga lhacha numeiho geiya aluppi jeng lhon kisei jouse Elin ajai.
23 Hijeh chun achapate ni jah a, “Ibol’a thil hitobang bang hi bol nahi lhon ham? Mi jousen nabol jouse lhon eisepeh tauve.
24 Hai lhonin kachate ni! Pakai miten kihouna nanei jeng lhon hi thoh hahsa behseh ahitai!
25 Mihem chu mihem chunga achonset le Pathenin apanpi theiyin, Pakai douna chonse chu kon apanpi jou ding ham?” ati. Ahinla Pakaiyin tha dia agot tah jeh-in, amanin apa sei angai lhonpoi.
26 Chapang Samuel vang akhangtou touvin, Pakai le mihem seiphat achangtai.

Eli insung douna gaothusei
27 Pakaiya kon sei ding nei Themgao khat Eli henga ahungin, “Napu lui Aaron le a-insung mite Egypt lengpa soh ahi laiyun Aaron henga kakiphonge.
28 Israel phung chujat lah a Aaron insung chu ka-Thempu din kalhengin, maicham phung lhacha ding, gimnamtui halnam ding, kei dongtoh dia lengban ki-o din kakoiye. Chule maicham phunga kigou kilhaina sa chan khat chang dia thu neina kapeh ahi.
29 Chuti ahile ibol’a kamite kilhaina sa le thilto ho ducha geova um nahiuvam? Eli, ibol’a Kei sanga nachapate ni naja joh a, kamite kilhaina satha tui lai lai nanehsah a nakivah thaosah ham?
30 Kei-Pakai Israel Pathen hin masanga chu na-insung mite le naphung mite hi a-itih a ka-Thempua pang dia kanatep ahi. Tua vang chutia bol lou dia kasei ahitai! Chusangin eijabolte jabol ing ting, einahsah mote nahsahmoa kabol ding ahi.
31 Ngaiyin, phat khat le na-insung gollhang jouse le naphung sung gollhang ho kathagam a, na-insung mi teh thi umlou ding ahi.
32 Israel vang kabob teng thangsea, lung natah a navet diu ahin, na-insung mi vang khatcha teh thi ponte.
33 Nachilhahte khat vang hing hoiying ting, ka-Thempun pang nante. Amavang mitchoa kinem lel ding, nachilhah dang jouse vang tolthi cheh diu ahi.
34 Nachapate ni Hophni le Phinehas nikhat’a athi lhon teng, najah a kasei jouse guilhun ding kiphotna ahitai.
35 Kadia kitah ding Thempu khat lheng ing ting, kadei jouse eibolpeh ding ahi. Chile bo neisah-ing ting, amazon kalhen tum tum lengpa angsunga a-itih a jong lhacha kin abol diu ahitai.
36 Nachilhah ahingdoh khat um jongle, hiche Thempupa henga hi sumle pai, neh le chah agakithum ding, neh lo na hiche Thempuho chu kithopi dia tao diu ahi,” ati.

1 SAMUEL LEKHABU MASA BUNG 3

Samuel koma Pakai kilah
1 Eli noiya Samuel chapangin Pakai kin abol laiyin, Pakaiyin ima behseh aseitapoi, mu neina jong aum behseh tapon ahi.
2 Jan khat teh a mit thim panta Eli chu a-indan a alumin,
3 Samuel jong Kitepna Theng Thingkong kikoina muntheng phunga alum’e. Khovah masang, thaomei jong akou nalaiyin,
4 Pakaiyin Samuel ahinkouve. Samuel’in, “Hoi, hepu!” tin adonbut’in,
5 Eli koma alhaijel’in, “Neikouvin kahungtai,” agati. Ahinla Elin, “Kakoupoi, galum kittan,” ati. Samuel agalum kittai.
6 Pakaiyin Samuel akou kit’in, ahivangin chapang chun Pakai ahilam ahepoi, ajeh chun Pakaiyin anakihoupi khah loulai hel ahi.
7 Hijeh chun akipatdoh kit’in Eli henga achen, “Neikou chu kahungtai,” ati kit’e. Elin la, “Kakoupoi kacha, galum kittan,” ati.
8 Pakaiyin Samuel thumvei nan ahinkouvin, ama athouvin Eli henga achen, “Neikouvin kahungtai,” agati. Hichun Samuel kouva chu Pakai ahi, Elin ahetai;
9 hijeh chun ajah a, “Galum tan, nahinkou kit le, ‘Seiyin Pakai, nalhachan ka-ngai nai,’ tin donbut’in,” ati. Hiti hin Samuel agalum kittai.
10 Hikoma chun Pakai ahung dingin, amasaa bangin, “Samuel! Samuel!” tin ahinkouve. Samuel’in jong, “Seiyin Pakai, nalhachan ka-ngai nai,” ati.
11 Pakaiyin ajah a, “Nikhat le ajapha chan mengden leo ding tijat umrah thil khat Israelte chunga kabol ding ahi.
12 Hiche nikho chule Eli insung douna kasei jouse apatna pat achaina geiya kabolsoh hel ding ahi.
13 Achapate nin Kei douna asei lhonjeh a a-itih chan a dia a-insung mite talen kamatsah dia Eli kaseipehsa ahitai. Achapate ni thilbol ahenasa san aphoh tangpoi.
14 Hijeh a chu hitobang tijat um chonsetna hi kilhaina le thilto itobang hijongle asuh theng louhel dia giltah a kaphondohsan ahitai,” ati.
15 Samuel jalkhuna alum khovah-in, jingkah-in’athouvin Pakai Houin kotpi jouse ahongdoh-e. Mu anei chu Eli seipeh ding atijai.
16 Elin akouvin, “Kachapa Samuel!” ati. Samuel’in, “Hoi hepu,” ati.
17 Elin, “Pakaiyin ipi naseipeh chu nei-impeh hih beh-in. Aboncha neiseipeh loule Pakaiyin engse tah-in engbol hen,” ati.
18 Samuel’in abonchan aseipeh soh hel’in, khen aneitapoi. Elin, “Ama Pakai hiya chu, adia phapen tah abol ding ahijenge,” ati.
19 Samuel akhang khagin, Pakaiyin aumpi jingin, chule Samuel jah a asei jouse aguilhunsah cheh-e.
20 Israel pumpi, gamsung lang khat’a pat alang khat geiya cheng jousen Samuel chu Pakai Themgao mong mong ahi ahedoh cheh tauve.
21 Samuel henga ahung kilah a akihoupina Shiloh a chun Pakai ahung kilah jing jengtai. Samuel’in asei teng Israel pumpin angaiyuve.

1 SAMUEL LEKHABU MASA BUNG 4

Kitepna thingkong min amat
1 Hiche lai hin Israelte sat din Philistinete akigouvin, Israelite jong asat thuh din akontauve. Israelten Ebenezer a ngahmun asem’un, Philistineten Aphek a ngahmun asem’ui.
2 Philistineten ahindel khum’un, hatah a akisat jouvun, Israelten alel tauve.
3 Ahingdoh cheng ngahmun ahung gei phat’un, Israel lamkaiten, “Itia tunia Pakaiyin Philistinete eijosah del’u hitam? Pakaiyin eilhonpiuva melmatea kona eihuhdohna diuvin, Shiloh a Pakai thingkong gapoutin konthaute,” atiuve.
4 Hijeh chun Pakai Hatchungnung laltouna loupi tah melchihna kikoi, Pakai thingkong Shiloh a kikoi podin mi asol tauve. Eli chapate ni-Hophni le Phinehas jong Kitepna thingkong to ahung lhon lhontai.
5 Kitepna thingkong hung lhun phat’in, Israelte akipah behseh jengun a-ao cheh-ule, leithong akinim leove.
6 A-aoginu Philistineten ajauvin, “Ipijeh ham, Hebrewte ngahmuna ogin kithongpi khu ngaiyun!” akitiuve. Pakai Kitepna thingkong Hebrewte ngahmun hung lhung ahetdoh phat’un,
7 Philistinete akicha lheh jengun, “A-ngahmun’uva pathen khat hung lung ahitai! Akichaiya ihitauve! Hitobang hi ichunguva soh kha loulaihel ahi!
8 Khutobang pathen hat tah hoa kona kon eihuhdoh diu ham? Nelgam a Egypt mite thatgam a chu niche pathenho khu ahiuve!
9 Hangtah-in pangun Philistinete! Pasal panin pangun, achutiloule isoh-uva apan banguva eiho Hebrewte soh a ipanlo diu ahi. Hijeh chun pasal pan thon sat’uvin!” akitiuve.
10 Philistineten hasat sat’in asat’un, Israelte ajouvun, Israelte inlam jonin ahung jamtauve. Mihem tamtah athat’un-Israelte sepai sang somthum jen athat’uve.
11 Pathen Kitepna thingkong aman’un, Eli chapate ni Hophni le Phinehas jong anin athat tauve.

Eli thi
12 Galmuna pat Benjamin phunga mi khat ahung jamin, nikhat sungin Shiloh ahung lhungtai. Alung nat hetsah nan aponsil abottel’in, alujanga leiset akinui.
13 Kitepna thingkong gelkhoh jing, Eli chu lamlen kom touna khat’a touvin agaldot jinge. Hichun ahungpa hin khopi sung hong leuvin thilsoh chu aphongdoh tan, mitin tijat kichat thon akaptauve.
14 Mihem kagin husa ajah chun Elin, “Ibol’a mi hiti husat ham?” tin adonge. Thupopa ahung lhai loiyin Eli seipeh agoi.
15 Eli hi kum somko le get lhing ahitan, kho apum mulou tobang ahitai.
16 Thupopan, “Galmuna hung jamdoh, tuni ma ma a lampi hichan a hung lhai lhung kahi,” ati. Elin, “Iti ti hitam kachapa?” tin adonge.
17 Thupopan, “Philistinete masanga Israelte ajamin, melse tah a eijou ahitai! Nachapate ni Hophni le Phinehas jong athat’un, Pathen Kitepna thingkong jong amantauve!” ati.
18 Kitepna thingkong aphah poh chun, kelkot phung kom atouna konin Eli anung lhuhtai. Atehse behseh tan, thaoma athaole, alhuhna angong akivoh boh-in athitai. Eli hi kum somli Israelte lamkaiyin anapange.

Phinehas jinu thi
19 Eli mounu, Phinehas jinu hi naovop ahin, navah ding koncha ahitai. Pathen Kitepna thingkong min amat, atehpu thi le ajipa thi ajah le phot lot louvin asonat’in nao aneitai.
20 Athiden ding phat’in naodom nun, “Lung lenin, chapa khat naneiye!” ati. Amanla angaipeh tapon, houjong ahoutapoi.
21 Naodom nun, “Pathen loupinan Israel adalhatai,” tinan nao min chu Ichabod asah-e. Hichu Kitepna thingkong min amat le atehpu le ajipa thi seimatna asah peh ahi.
22 Naodom nun, “Pathen Kitepna thingkong min amatdoh phat’in, Pathen loupinan Israel adalhatai,” ati.

1 SAMUEL LEKHABU MASA BUNG 5

Philistinete lah a Kitepna thingkong
1 Kitepna thingkong amat jouvun, Ebenezer a pat Philistineten akhopiu Ashdod geiyin ahinpouvin,
2 a-pathenu Dagon houin a apolut’un, Dagon lim kitung koma atungtauve.
3 Jingpi tah-in Ashdod kho miten, Dagon lim chu Pakai Kitepna thingkong maiya, mai tol’a sulut akijam agamudoh tauve. Aphongdoh-un akitunna ngaiya atung kit’ui.
4 Ajing jingkah matah-in Dagon lim chu Kitepna thingkong maiya lhu agamudoh kit’ui. Hichea hin alu abongin, abante ni jong atanin, kotpiphung koma akijam’e; along keoseh anaumin ahi.
5 Hijeh a chu tuni geiya Ashdod khoa Dagon Thempuho le ahou jousen kotpiphung akal lhah thouva, chonpa louhel ahiuve.
6 Ashdod kho mite chu Pakaiyin talen amatsah-in, akicha behseh jengtauve. Khosung mite le akimvel dunga mite jouse tina pomchet chut’in aveiyui.
7 Hiti thilsoh amudoh phat’un, “Israel Pathenin eiho le i-pathenu Dagon talen eimatsah-u ahitai. Kitepna thingkong hikoma hin koida hel’ute,” atiuve.
8 Hijeh chun Philistinete leng nga agakoukhomsah-un, “Israel Pathen Kitepna thingkong hi ilo ding ham?” atiuve. Leng ho chun, “Gath khopia polut tauvin,” atiuvin, hijeh chun Philistinete khopi Gath a chun apolut tauve.
9 Gath a apoh lut’un jong Pakaiyin hiche kho john chu talen amatsah-in, miho tija lih gam ding ahitauve. Khopi sung mi, teh le khang abonchauvin tina aveiyun apom chet chut jenguve.
10 Hijeh hin Kitepna thingkong chu, Philistine khopi khatma, Ekron a apotauve. Ahinla Ekron agalhut’ule, khosung mite a-eojah jengun, “Eiho thatgam din Israel Pathen Kitepna thingkong hikoma ahinpo lut tauve!” tin asam’ui.
11 Chuphat’in Philistine leng nga agakoukhom kit’un, “Israelte Kitepna thingkong hi aumna muna koi din letol kit tauvin, chuti le keiho jong ka-insung miu jong eithada diu ahi,” atiuve. Pathenin melse tah a talen amatsah jeh-un, khopi sung mipi akicha lheh jengui.
12 Athi louho jong tina pomchet chut’in aveiyun, a-pathenteu henga atao tao jeng tauve.

1 SAMUEL LEKHABU MASA BUNG 6

Kitepna thingkong hung kitetol
1 Pakai kitepna thingkong, lha sagi jen Philistia gamsunga atham nungin,
2 Philistineten Thempuho le mitpheldoi themho akoukhomun, “Pakai Kitepna thingkong hi ilo ding ham? Alumna mun a letol go leu veng, ipi pi to kathah tha diu ham?” tin adongui.
3 Thempuho le mitpheldoi themhon, “Israel Pathen Kitepna thingkong letol ding nagot’ule, nachonset’u thoidamna dia thilpeh khat beh to natol tha diu ahi. Thilpeh beiya Kitepna thingkong chu kiletol thei louhel ding ahi. Hiti chun bol leu chun nadamlo diu, chule talen namatsah sah jengu jong hedoh tauvin nate,” atiuve.
4 Mipin, “Itobang thilpeh to kasol tha dingu ham?” atiuve. Thempuho le mitpheldoi them hon, “Philistinete leng nga min a sana tum nga le naichim lima kisem sana nga ma hitha ding ahi. Natset kibang cheh nangho chungle leng nga chunga chu cheh ahi.
5 Ngamsunguva lang uilut tobang tina pom lim le naichim lim sana nasemuva, Israel Pathen najabol diu ahi. Chutile nabol hesohnau le na-pathenteu abolset chule nagamsungu asuh genthei hi haimai thei ahi.
6 Egypt lengpa le Egypt mite banga india lungtah goa nahiuvam? Israelte alhadoh kahseuva Pathenin Egyptte asuhngol chu hai hih beh-un.
7 Hijeh chun bongkang thahleh khat ngaitouvin, loukaina khah louhel bongpi ni hol’un, bongkang chu kaisah-un, anoute ni bongkul’a lehoilut kit’uvin.
8 Pakai Kitepna thingkong chu gapu’vin, bongkang chunga koiyun, chule nachonset thiltou sana nasem hou chu thingkong khat’a koiyun lang, Kitepna thingkong koma chun tungun. Bongkang chu ajotna ding lampia hoiyun lang, achangseh-in lha jenguvin.
9 Hiti hin ache chu veuvin; Beth Shemesh khopi lang ajot le, manthahna hijat eilha khumu hi Israel Pathen ahi kipho chen ding ahi. Beth Shemesh khopi ajot lou vangle, hiche natset hi Ama sol ahilou kihetante; natgol lanphat’a hung lang bou hiding ahi,” atiuve.
10 Ahilnau bangin abol tauve; bongpi ni aman’un, bongkang chu akaisah-un, anoute ni bongkul’a kot akamkhumtauve.
11 Kitepna thingkong chu bongkang sunga atungun, uilut lim le naichim lim a kisem sana kikoina thingkong chu akoma atunguve.
12 Bongpite ni chun Beth Shemesh khopi lam ajon lhontai, lamlen jet le veiya kiheidoh louhel’in, jangpet’in ajon lhonin ahi. Ache pumin abujun jun lhon’e. Philistine leng ngan Beth Shemesh gamgi geiyin ajuipeh-ui.
13 Beth Shemesh kho miten phaichama suhlou chang ana-at’un, phot lot changa adadoh-ule, Kitepna thingkong chu amutauve, Amu phat’in akipah behseh jengun ahi.
14 Bongkang chu Beth Shemesh kho mi, Joshua loulaiya ahung ki-ngan, songpi kom khat’a aumdentai. Mihon bongkang chu achenpan’un, chule bongpite ni athat’uvin, Pakaiya pumgo kilhaina din agou vamtauve.
15 Pakai Kitepna thingkong chu Leviten adom lhauvin, sana uilut lim le naichim lim kikoina thingkong jong chu adom lhauvin, anin songpi chunga chun akoitauve. Hichun Beth Shemesh kho miten Pakiaya pumgo thilto kilhaina le thilto dang atoh tauve.
16 Athilbol’u hi Philistine leng ngan aveuvin, chuche nikho ma man Ekron kho langa akile kittauve.
17 Philistineten uilut lima kisem sana tum nga chu achonset man diuva, khat cheh chu khopi khat cheh, Ashdod, Gaza Ashkelon, Gath chule Ekron min a apeh-u ahi.
18 Chujongle naichim lim a kisem sana nga jong chu Philistine leng nga vaipohna khopi nga, kulpi kaisa le kailoukhopi khote abonchauva dia athot thau ahitai. Pakai Kitepna thingkong akoinau, Beth Shemesh kho mi, Joshua loulaiya songpi lentah chu athilsoh phot chet nan tuni geiyin hettohsah nan aum jing nailaiye.
19 Kitepna thingkong sung avet jeh-un Beth Shemesh khosung mi som sagi jen Pakaiyin athattai. Pakaiyin mi chujat athajeh-un kho miten puldou lunghem abol’ui.

Kiriath Jearim khoa Kitepna thingkong
20 Beth Shemesh kho mite akihouvun, “Hitobang Pathen theng, Pakai masanga koi pang jou ding ham? Eidalhah kang theina diuva hoilama isoldoh diu hitam?” atiuve.
21 Kiriath Jearim khoa mi asol’un, “Pakai Kitepna thingkong chu Philistineten ahung thah tauve, hungsuh-un lang kipoh touvun,” agatisah-ui.

1 SAMUEL LEKHABU MASA BUNG 7

1 Hijeh chun Kiriath Jearim kho miten Pakai Kitepna thingkong chu ahung pouvin, lhangvuma cheng, Abinadab kitipa ina chun akoitauve. Abinadab chapa Eleazar chu akinbol din athensotauve.

Samuel’in Israel vai apoh
2 Kiriath Jearim khoa hin phat sotpi, kum somni tobang jen Pakai Kitepna thingkong anaum’e. Hiche sungse hin Israelte panpi ngaichan Pakai henga ataovui.
3 Samuel’in Israelte jah a, “Lungthim pumpia Pakaiya kihei go nahiule nahouvu doichom chom napaiyuva, pathenu Astarte lim jong napai diu ahi. Pakai henga lhingset’a nakipehdoh-uva, Ama jeng nahou diu, chuteng Aman Philistinete thaneina kona nahuhdoh diu ahi,” ati.
4 Hijeh chun Israelten Baal le Astarte doi lim asemthu jouseu apaiyun, Pakaiseh seh ahoutauve.
5 Hichun Samuel’in Israelte abonchauva Mizpah a hung kikhom din agakousah-in, “Hikoma chu Pakai henga kataopeh diu ahi,” atisah-e.
6 Hijeh chun Mizpah a Israelte ahung kikhomtauve. Hikoma chun twi athal’un Pakaiya thilto dol’in asung lhauvin nilhum keiyin an angol’ui. Israelten “Pakai dounan kachonseuve,” atiuve. Mizpah muna hi Israelte lah a kibaona jouse Samuel’in asuhcham ji ahi.
7 Mizpah a Israelte kikhop hi Philistineten ajauvin, adelkhum diuvin Philistine leng ngan sepai puiyin Mizpah ahinjon tauve. Ahung kon jengu Israelten ajauvin, akichat phat’un
8 Samuel jah a, “Philistinetea kona eihuhdohna diuvin Pakai i-Pathenu henga tao tao jengin,” atiuve.
9 Samuel’in kelngoi gol khat athat’in, Pakaiya pumgo thilto din agouvamtai. Hichun Israel apanpina din Pakai henga ataovin, Pakaiyin ataona asangtai.
10 Samuel’in kilhaina abolpet’in adelkhum diuvin Philistinete ahung kitol tauve; ahivangin apettah hin Philistinete deljam din Pakaiyin van akithinsah tai. Philistinete akisudong gam’un, kichan ajamtauve.
11 Israelte Mizpah a konin akitoldoh-un, Bethzar geiyin Philistinete adel’un, lampia athat peh-uve.
12 Mizpah le Shen kah a Samuel’in song khat aphut’in, “Pakaiyin lam dung lhung keiyin eihu’ve,” ati.
13 Hiti hin Israelten Philistinete ajouvun, Samuel hin laisen Pakaiyin Philistinete chu Israel gamsunga gal abolsah tapoi.
14 Gath le Ekron khote ni kah a Philistineten alah-u khopi jouse Israelte apekit’un, Israelte le Canaan mite kah a jong cham alengtai.
15 Ahin laisen Samuel chu Israel vaipon apange.
16 Kumseh le Bethel, Gilgal chule Mizpah a ajin jin, hiche munhoa hin kinahna jouse aseitoh jie.
17 Chujou teng ainlam, Ramah khoa akile kit jin, hikoma jong chun thutanin apange. Ramah khoa hin Pakai din maicham khat asem’e.

1 SAMUEL LEKHABU MASA BUNG 8

Japin leng athum’u
1 Samuel ateh phat’in achapate Israelte thutan din apansah-e.
2 Samuel chapa upajo chu Joel ahin, anaopa Abijah ahi; anilhonin Beersheba khoa thutanin apang lhone.
3 Ahinla apa umchan ajop lhon pon, sum muna ding jeng agel lhonin, sumguh kilah-in, thu dihtah-in atan lhontapoi.
4 Israel lamkai jouse akikhom’un, Ramah khoa Samuel henga acheuvin,
5 ajah a, “Ven, nangla nateh behseh tan, nachapate nin la naum chan ajop lhon poi. Hijeh chun gamdang dang banga leng ineina diuvin, kachunguva vaipo din leng ding khat lhengdoh jengin,” atiuve.
6 Leng khat athumu hi Samuel lung alhai tapoi; hijeh chun Pakai henga ataole,
7 Pakaiyin, “Japin najah a asei sei chu ngaitan. Nang napaiyu ahipoi, Keijoh leng dia eideimou ahi.
8 Egypt a kahin puidoh a pat Israelten eidalhah jiuva, pathen chom chom ahouji mongu ahi; Kei chunga abol’u ahi.
9 Hijeh chun aseiyu bolpeh-in, amavang kikheltah-in hilchah masan, alengteuvin abolna diu jouse hilchenin,” ati.
10 Leng deicha mipi chu Samuel’in Pakai thusei abonchan aseipeh tai.
11 Samuel’in ahilchenin, “Nalengpauvin hitia nabol diu, nachapa jouseu sepaiya anei ding, abang bang kangtalaiya galsat dia apansah a, kon khat tol sepai hi diu, adangse akangtalai masanga kijot diu ahi.
12 Abang bang mihem sang khat cheng chunga vai apohsah a, kon khat jong som nga cheng chunga vai apohsah ding ahi. Nachapa teuvin lou kaipeh-intin, chang a-atpeh diu, akangtalai ho dia gal manchah le manchah dang sema jong pang diu ahi.
13 Nachanu jouseu gimnamtui sempeh le anhon chule changlhah kanpeh a pang diu ahi.
14 Nalou mau le lengpilei chule olive lei pha lai jouse kilah-intin, avaipote pente.
15 Athutanna phunga vaipole vaihomle ho dia chang le lengpiga hopsom a hop khat alah ding ahi.
16 Nasohteu thapha laise le nabongu hat lai chule sa-ngan pha lai jouse natongin goitante.
17 Nakelngoiyu hopsom a hop khat jong akilah ding ahi. Nangho jeng jong asoh a pang ding nahitauve.
18 Hitobang hi ahung hiteng, nangho tah-in nakilhenu lengpa chunga melse tah a nakiphin diu, hijongle nakiphin nau Pakaiyin ngaipeh taponte,” ati.
19 Mipin Samuel sei ngaisah a nei louvin, “Ahipoi! Leng kanei nom’ui;
20 namdang ho banga, kalengpauvin eilamkaiyuva, galmun jenga jong eilamkai diu ahi,” atiuve.
21 Asei jouseu Samuel chun angai lhumkeiyin, chuin Pakai agaseipeh tai.
22 Pakaiyin, “Aseiyu bolpeh-in lang, leng khat koipeh tan,” ati. Samuel’in Israel pasal jouse chu inlama asoltai.

1 SAMUEL LEKHABU MASA BUNG 9

Saul’in Samuel akimupi
1 Benjamin phunga mihao tah le thu chetah, Kish kiti khat aum, amahi Zeror tupa, Abiel chapa ahin, Aphiah phungkhaiya Becorath insung kon ahi.
2 Chapa khat aneiyin, ahinkho hoilai, gollhang hookah ahin, amin Saul ahi. Saul hi Israelte lah a alol sang penin, mel-hoipen jong ahi.
3 Kish sa-ngan phabep amangin, hijeh chun achap Saul jah a, “Soh ho khat puiyin sa-ngante gahol lhonin,” ati.
4 Ephraim thinglhang gamsungse le Shalish lhangse se agahol lhon vangin amudoh lhonpon, hijeh chun Shaalim lhang lang agahol pai lhonin, ahinla sa-ngante anaumdeh kit pouve. Chuin Benjamin gamsungse sea ahol lhonle, amudoh kit deh lhonpoi.
5 Zuph lhang aphah lhon phat’in Saul’n asohpa jah a, “Inlam jonta te, kapan sa-ngante sangin eini joh lung gimpi jo khat tante,” ati.
6 Asohpan, “Kho-ngaiyin! Hiche khopi sunga hin asei jouse guilhun jingjeh a japin ajabol tah mitheng khat aum’e. Gadongle heh sa-ngante umna eiseipeh thei lhon mai thei ahi,” ati.
7 Saul’in, “Chele hen ipi pen ipeh ding ham? Neh ding chah ding abeitan, peh ding imachabon kinei talouva, ole ineiyam?” ati.
8 Sohpan, “Dangka lhomcha kaneinai. Hiche hi peleng, sa-ngante umna eiseipeh thei lhon ding,” ati.
9 Saul’in, “Nagel chu aphabouve! Chejeng hite!” ati. Hiti hin mithengpu chenna khopi ajon lhontai.
10 Khopi jon a thinglhang akaltou lhonle, twithal dia hung nu-ngah phabep atoh lhon’e.
11 Nu-ngah ho jah a, “Mitvaneipa khosunga um nam?” ati lhone. Hiche laiya hi Themgao hi Mitvanei kiti ahi. Koi tobangin Pathen henga dohnom anei teng, “Mitvaneipa koma cheute,” atiji ahi.
12 Nu-ngahhon, “Aumnai, namasang lhoncha chubou ahitai. Cheloile chun lap lhon nan nate.
13 Khopi nalut lutle mu jeng lhonin nate. Tunia hi mipi lhangvum maicham phunga kilhaina anei diu jeh a janhia hung lhung ahi. Kilhaina sa chu aman vang aboh masah dingjeh a, ama hung lhun lousea akikouhon kamheiya um thei lou diu ahi. Tun chenjeng lhonle chun lhangvuma an ne dia akaltou masangin lap lhonin nate,” atiuve.
14 Hijeh chun Saul le asohpa khopi sunga alut lhontai. Agalut lut lhonle, Pathen houna mun jon dia, amani lam nga a Samuel hungdoh amupai lhontai.
15 Ni masa nia chu Pakaiyin Samuel jah a,
16 “Jingle tuphat don a Benjamin phung a pasal khat nahenga kahinsol ding ahi; Israelte vaipo din thao nun, amahin Philistinete khut’a kona Israelte ahuhdoh ding ahi. Kamite thoh gamna kamun, panpi ngaiya ataonau kajatai,” anatisa ahi.
17 Samuel’in Saul agah mu mun Pakaiyin ajah a, “Hung dia kaseipeh chu hichepa khu ahi. Aman kamite avaipoh ding ahi,” ati.
18 Kelkot phung koma Samuel chu Saul’in ajonpheiyin, “Mitvaneipa chu hoiya cheng ham?” tin adonge.
19 Samuel’in, “Kei hi mitvaneipa chu kahi. Chen, Pathen houna phung jon hite. Tunia nani lhon a an kaneh khompi ding ahi. Jing teng neidoh chan lhon seipeh ing ting sol tange.
20 Nithum masanga mangsa sa-ngante chu gelkhoh da lhon tadin; musa ahitauve. Akhohjo chu Israelten a-ngah khoh-u hi koi ham? Nang nahi, nangle na-insung mite nahiuve,” ati.
21 Saul’in, “Kei hi Israel lah a phung lhumpen, Benjamin phunga mi kahin, ka-insung jong kaphung sunguva imacha loupen kahiuve. Iti hitia chu neiseipeh jeng ham?” ati.
22 Samuel’in Saul le asohpa chu indian lentah khat, dokhang lubuh lam, jin kikou somthum jen lah a thupi pen touna chu atousah tai.
23 Anhonpa jah a Samuel’in, “Nakoidoh dia kahilsa, sa hal chu tun hinchoiyin,” ati.
24 Deilhen pen sakeng chu anhonpan ahinchoiyin, Saul angsunga aluitai. Samuel’in, “Hiche sa hi nang dia kikoiyah ahi. Nen, akikou chengse to tua naneh khom dia kakhendoh ahi,” ati. Hiti hin hiche nikho hin Saul’in Samuel to an anekhomtai.
25 Pathen houna phunga pat khosung ahinjotsuh-u chun, inchunga Saul lupna ding jalkhun ado’uvin,
26 hikoma hin Saul alumtai.

Samuel’in Saul vaipo dia thao anu
Khovah phat’in inchunga Saul chu Samuel’in akouvin, “Thouvin, inlama sol tange,” ati. Saul athouvin, Samuel to kholai lam ajon lhontai.
27 Khopam chin agei lhonin, Samuel’in Saul jah a, “Sohpa khu sol masan,” ati. Sofa chedoh phat’in Samuel’in seiban jop’in, “Kho-ngai tadin, Pathen thusei seipeh inge,” ati.

1 SAMUEL LEKHABU MASA BUNG 10

1 Samuel’in olive thaotwi hai khat asatdoh-in, Saul lujanga asungin abengchop’in ajah a, “Amite Israel chunga vaipo dia Pakaiyin thao nanu ahitai. Amite navaipoh a, amelmateuva kona nahonbit ding ahi. Pakaiyin amite vaipo dia nalhen melchihna chu:
2 tunia neidalhah lhah le, Benjamin gamsung, Zelzah kho, Rachel khan koma pasal ni nato ding ahi. Amanin nahol sa-ngante kimudoh, napan sa-ngante joh lung gimpi talouvin, ‘Kachapa hoilam kahol ding hitam?’ tia nangjoh nalung gimpi thu seipeh lhoninte.
3 Chekit le chun Tabor mun a thing theng phunga chun, Bethel a Pathen henga kilhai dia che, pasal thum toh kit’in nate. Pasal khat’in kelgol thum kaiyintin, khatman changlhah lhon thuum pontin, chule khat chun lengpitwi dimset savun peng khat ponte.
4 Amaho hin salam’untin changlhah lhon ni napeh diu, nakilah ding ahi.
5 Chuteng Pathen lhangsang Gibeah geiya nache ding, hiche lhanga chu Philistinete ngahmun um ahi. Khopi kelkot phunga hi, lhangvum maicham phunga kona hung kijotsuh, Themgao, semjang sai, khong beng, theile mut chule selangdah saiya nato ding ahi. Amaho hin aovun tin lam diu ahi.
6 Chutah le Pathen Lhagaovin phot lot louvin tomin natin, houthua aova alamu chu najom ding, michomhel soh ding nahi.
7 Hitia thil aso teng Pathenin napuina lam lam chu bol jengin,
8 keisangin Gilgal a ana masan natin, chukoma ikimua, pumgo thilto le kiloikhom thilto kilhaina gan itha ding ahi. Hikoma chun ni sagi neina ngah-in lang, boldia kaseipeh ding kat jingin,” ati.
9 Saul’in Samuel adalhah got hin, Parthenon Saul mel thah-in avontai. Ijakai Samuel seipeh bang bangin hiche nikho hin ahung umdoh tai.
10 Saul le asohpa Gibeah alhun lhonle, Themgao hon khat’in akimupiuve. Phot lot louvin Saul chu Pathen Lhagaovin atomin, aman jong Themgao ho lam le ao chu ajomtai.
11 Masanga Saul musahon achuti chon jeng amu phat’un, “Kish chapa khu iti ham? Saul khu Themgao soh ngap hitam?” akitiuve.
12 Chukoma cheng pasal khat’in, “Themgao dang ho khula, apateu itobang bang mia nahet-um?” ati. Hichea kona hi, “Saul jeng jong Themgao soh ngap hitam?” tia kiseipan ahi.
13 Saul’in ao le lam achaisoh phat’in, lhangvuma maicham phung ajontai.
14 Asohpa le Saul chu agangin amudoh phat’in, “Hoiya iti nahi lhon ham?” tin adonge. Saul’in, “Sa-ngante hol kihiya, akimu lou phat’a Samuel henga chepai kahi lhon’e,” ati.
15 Saul gangpan, “Samuel’in ipi naseipeh lhon em?” ati.
16 Saul’in, “Sa-ngante amudoh tauve,” tin bou adonbut’in, ama leng chang dia Samuel’in aseipeh chu agang ahil tapoi.

Saul leng achansah-u
17 Hou thudol’a Mizpah khoa japi kikhom din Samuel’in akouvin,
18 ajah-uva, “Pakai Israel Pathenin, ‘Egypt a kona kahin puidoh-uva, Egypt le midang nabol gentheiteu khut’a kona kahuhdoh nahiuve.
19 Na-Pathenu kahin, nagenthei nau le nahahsatna chengseuva kona huhdoh Pa kahin, ahinla neidei mouvin leng khat kapeh diuvin nathum’ui. Apha lheh jenge, Pakai angsunga naphung phung, naphungkhai khaiyin hung kigoldoh tem’un,’ tin aseiye,” ati.
20 Samuel’in aphung phunga malam ajotsah cheh le, Pakaiyin Benjamin phung alhengtai.
21 Hichun Samuel’in Benjamin phung insung mite amachonsah be kit le, insung chujat lah a Matri insung akilhengdoh tai. Hichun Matri insung amachon jep’ule, alah-uva Kish chapa Saul akilhengdoh tai. Saul ahol’ule amu tapouvin,
22 hijeh chun Pakai henga, “Adang khat kahol nah lai diu ham?” atiuve. Pakaiyin, “Saul hikom, neh le chah kikholna khun akisel’e,” ati.
23 Lhaijel’in Saul agakaidoh-un, mipi lah ahinlhut tauve; mipin avet’ule japi chujat sangin luvum dohvel vol’in akimui.
24 Samuel’in mipi jah a, “Pakaiyin alhendoh chu hichepa hi ahi! Ilah-uva ama tobang khat cha iumpouve,” ati. Japin lhang asam’un, “Lengpa hingsot hen!” atiuve.
25 Lengpa thaneina le atoh ding kin jouse Samuel’in japi ahilchenin, lekhabun ajihdoh-in muntheng laiya akoitai. Chujouvin japi inlama asol kittai.
26 Saul jong ainlam Gibeah khoa akile kittai. Parthenon lungthim asuh halsa gal-hang pasal phabep’in Saul alhonpiuve.
27 Pannabei mi phabep’in, “Hichepan ipi thilpha eiboldoh peh nah beh diu ham?” atiuve. Saul nahsahmon abol’un, thilpeh ding imacha jong ahinchoipeh pouve.

1 SAMUEL LEKHABU MASA BUNG 11

Saul’in Ammon mite ajo
1 Lha khat nungin Ammon lengpa Nahash-in Gilead gamsunga Jabesh khopi delkhum din sepai ahinpuiyin ahung konin, khopi chu aumtauve. Khosung miten Nahash jah a, “Kitepna semu hitin, kachunguva navaipoh ding nom unge,” atiuve.
2 Nahash-in, “Namitchangu jet lam cheh kakaldoh a, Israel pumpi kajumso thei dingle kitepna sem naute,” ati.
3 Jabesh kho miten, “Achutile ni sagi nei ngah-un, Israel gamsunga mi sol ung ting, koiman eikithopi lou diule nahenga lut tauvinge,” atiuve.
4 Jabesh kho mite misol hon Saul chenna Gibeah kho ahin phauvin, thilsoh umchan asei phat’un japi lungna tah-in akap jengui.
5 Hichepet cha hin Saul louva konin bongchalte ni to ahung vailhungui. Aman, “Ipi thu hiya naboncha kap nahiuvam?” ati. Mihon Jabesh kho mite hinsol ho thusei chu aseipeh tauve.
6 Saul’in ajahdoh phat’in Pathen Lhagaovin ahintom paiyin, alung hang lheh jengtai.
7 Bongchalte ni amanin, athat’in sampan panin, sahal ho hi Israel gamsung pumpia agahomsah-in, “Samuel le Saul jui louva galkonda chan abongchal jouse hitia hi kichepan ding ahi!” tin agih-e.
8 Saul’in abonchauva Bezek muna akhop le, Israel gam a mi sang jathum alhingun, Judah gam a kon sang somthum alhingui.
9 Amaho hin Jabesh khoa solle ho jah a, “Jing teng sunkim masanga kahuhdoh diu hi namiteu anaseipeh-un,” atiuve. Hiche thu ajah phat’un Jabesh kho mite akipah behseh jengun
10 Nahash jah a, “Jing teng nahenga lut ding kahitauve, chuteng nanop nop neilo theiyu ahi,” atiuve.
11 Jing nikho matah-in Saul’in amite hop thumin ahomin, khovah vah-in melmate ngahmun adelkhum’un, Ammon mite chu anokhumtauve. Sunkim donin athat chap jengun, ahingdoh chasun akithecheh-uvin, achang changin ajam mangtauve.
12 Hichun Israelten Samuel jah a, “Saul lenga neilou dia seiho chu hoilam hitauvam? Neipedoh-un that gam’uvinge!” tin angeh-ui.
13 Ahinla Saul’in, “Tunin koima kithat thei ponte, Pakaiyin Israel ahuhdoh nikho ahibouve,” ati.
14 Chule Samuel’in ajah-uva, “Ibonchan Gilgal jonu hitin, Saul ilengu ahi phongdoh kit’u hite,” ati.
15 Hijeh chun Gilgal ajon cheh-un, muntheng phunga chun Saul leng din aphongdoh tauve. Kiloikhom thilto kilhaina abol’un, Saul le Israel jousen lopna aneitauve.

1 SAMUEL LEKHABU MASA BUNG 12

Samuel lhahna thusei
1 Samuel’in Israelte jah a, “Bolpeh dia nei-ngeh nau kaboltai. Nalah-uva vaipo leng kapetauve,
2 lamkai din ama naneiyu ahitai. Keivang tehse samkang ka hitan, kachapate to nakiloi diu ahi. Kakhangdon laiya pat tugeiya nalamkaiyuva pang kahi.
3 Tun hikoma ka-ume, dih louva kabolnau aumle Pakai le alhendoh lengpa angsunga neiseipeh-un, khattou bongpi ahiloule sa-ngan kalah khah am? Lhep chavaile hesoh gentheiya kabol um kham? Khattou koma nehguh kalah-em? Hitobang khattou kabol khah le kalekit ding ahi,” ati.
4 Mipin adonbut’un, “Neilhem pouvin, gentheiyin jong neibol pouve; koima ima jong nalapoi,” atiuve.
5 Samuel’in, “Ijakaiya monabeiya neiseiyu hi tunia hetoh a Pakai le alhendoh lengpa ahi lhontai,” ati. Mipin jong, “Adih-e, Pakai chu ikah-uva sakhi ahijenge,” atiuve.
6 Samuel’in aseijomin, “Napu napateu Egypt a kona hinpuidoh Mose le Aaron lhengdoh jong Pakai ahi.
7 Tun madonna muna pang det cheh-un, nangho le napu napateu huhdohna dia Pakaiyin thil kidang nasa tah tah abol chengse geldoh sah ung ting, Pakai angsunga kahehset diu nahi.
8 Jacob le a-insung mite Egypt a acheuva, Egypt miten abolset’u chun, panpi ngaiyin napu napateu Pakai henga ataovun, Aman Egypt’a kona hinpuidoh a hiche gamsunga chensah din Mose le Aaron asolpeh-e.
9 Ahinla mipin Pakai a-Pathenu asumil’un, hijeh chun Aman Philistinete, Moab lengpa le Sisera, Hazor khopia sepai lamkaipu, hicheng hi napu napateu asat sah-in, napu napateuvin alel tauve.
10 Hichun panpi ngaiyin Pakai henga ataovun, ‘Vo Pakai, Nang douna chonsea, kiheimanga Baal doilimho le Astarte doilim pou houvah kahitauve. Kamelmateuva konin neihuhdoh-in, Nang houtauvinge!’ atiuve.
11 Hijeh chun Pakaiyin Gideon, Barak, Jephthat, ajonan keima eisol’uve. Namelmateuva konin kahuhdoh cheh-un, lung mongin nachengtauve.
12 Amavang Ammon lengpa Nahash-in nanokhum ding konun, naleng diuvin neideimouvin kajah a, ‘Eivaihom diuvin leng kadeiyui,’ native.
13 “Nakilhenu lengpa chu hikoma aum’e; ama hi thuma nahiuvin, Pakaiyin napeh-u ahitai.
14 Pakai na-Pathen najauva, akin nabol’uva asei ngaiya athupeh chengse nit’a, nangho le nalengpauvin anung najuiyule ijakai phasoh kei ding ahinai.
15 Pakai sei ngai louva, athupeh chengse nit lou nahiule, Aman nangho le nalengpau adou ding ahi.
16 Hijeh chun ding det jingun, chutile Pakaiyin abolgotthil nasa tah namu diu ahi.
17 Tu hi gamgot lai ahi, hilou ham? Hijongle tao leng Pakaiyin van kithinsah-intin go ju ding ahi. Hitobang thil aso teng, Pakai koma leng nathumu chun Ama douna melse tah a chonse nahiu kihet tauvin nate,” ati.
18 Samuel ataole, hiche nikhole le chun Pakaiyin van akithinsah-in go ajuhsah tai. Chuphat’in mipin Pakai le Samuel aging tauvin,
19 Samuel koma, “Lungset tah-in kapu, kathi louna diuvin Pakai na-Pathen henga neitaopeh-un. Chonset hijat chungvuma leng kathum jeh-uva jong chonsetbe son kit kahiu kahedoh tauve,” atiuve.
20 Samuel’in, “Kicha hih-un, hitobang thilse bol jong leu chun Pakaiya konin kihei mang louvin, nalungthim pumpi Akin boljo’uvin,
21 Itijongle Pathen lhemho jui dauvin, napanpi jou lou diu, nahuhhing jou lou diu, ajeh chu alhem jeng ahibouvui.
22 Pakai giltah-in akitep’in, dalha pouvinte, amite dia nagot’u ahitai.
23 Keivang chu nangho taipei khel’a kachonset louna din Pakaiyin eipanpijo hen. Chutitah sanga thilpha le thildih nabol diu hil jing nange.
24 Pakai thun nung’un lang, nalungthim pumpin akin bol jingun. Thil loupi tah tah nabolpeh ho’u chu gel jingun.
25 Nachonset jingu vangle nangho nalengpau nasuh mang diu ahi,” ati.

1 SAMUEL LEKHABU MASA BUNG 13

Philistine douna gal
1 Lengvai apoh pat hin Saul kum…lhingsa ahitan, Israelte chunga kumni sungin lengvai apoi.
2 Sepai sangthum alhengdoh-in, sangni chu Michmash khopi le Bethel thinglhang gamsunga aumpin, sang khat chu Gibeah khopi, Benjamin thinglhang gamsunga achapa Jonathan to asol thai. Adangse vang Saul’in inlama asoltai.
3 Jonathanin Philistinegal lamkaipu Geba muna athatin, Philistineten ajasoh tauve. Saul’in gamsung pumpia mi asol’in sumkon mut’in galbol ding Hebrewte akousah tai.
4 Jonathanin Philistine gal lamkaipu athaa, Philistineten ahot lo’u thu Israel mite aseipeh soh tauve. Saul kou banga Gilgal a kikhop soh kei ding mipi anomtauve.
5 Israelte sat din Philistinete jong akikhomtauve; galsatna kangtalai sang somthum aneiyun, sakol touthem san gup aneiyun, keng sepaila Twikhanglen pang neldi jat alhinguve. Amaho hin Michmash khopi, Bethaven nisolam ajon’un, ngahmun asemtauve.
6 Israelte alonvuh den jengun, atinaje beihel’in alhatauve. Israelte abang bang songko dungle song khikah dung, songpi lah le khuhsung dung chule twikul dunga akisel’ui;
7 abang bang Gad le Gilead gamsung jonin Jordan lui agalkaitauve. Saul vang Gilgal a aumdenin, aumpi chengse akicha behseh-un akithing thingui.
8 Samuel’in ngah jing dia aseipeh jeh-in Saul chun Samuel ni sagi jen a-ngah-in, hichan geiyin jong Samuel Gilgal a ahungtapoi. Mipin Saul adalha pantauve.
9 Hichun Saul’in ajah-uva, “Pumgo thilto le kiloikhom thilto kilhaina gantha ding ho hinkai jengun,” ati. Hitia chu pumgo thilto kilhaina gantha anachaisoh bep le
10 Samuel ahung lhungtai. Samuel lamto din Saul apotdoh-in salam agabol vangin,
11 Samuel’in, “Ipi nanabol hitam?” tin adongtai. Saul’in, “Natep phat’in la nahung tapon, mipin eidalha pan tauvin, chuma leh Philistinete ma Michmash khoa akikhomtauve.
12 ‘Philistineten Gilgal mun geiya eihin nokhum ngap diuva kagel le, Pakai deichom holna bon kibolgap lou,’ tia kagel ahi. Hitia hi kilhaina thilto kabol ding loma ngaitoa kahi,” ati.
13 Samuel’in, “Ngolkai thilbol nahitah chu. Pakai na-Pathenin napeh thu nit lou nahitai. Athu nitle chun nangle nachilhahte tonsot’a Israelte chunga vai nahomsah diu ahi.
14 Tunvang vaihomjom tapon nate. Pakai thu nanit loujeh-in, amite chunga vaihom ding adei mihem kimu nante,” ati.
15 Gilgal dalhan Samuel chu ajotna dinga akichetai. Adang hon vang asepaite panhu dia che Saul nung ajuitauve. Gilgal a pat Benjamin gamsunga Gibeah kho ajontauve. Saul chun sepaite avetoh-in, abon’un jagup tobang ahiuve.
16 Saul le achapa Jonathan chule asepaiten Benjamin gamsung Geba khoa ngahmun asem’ui. Philistineten Michmash khoa ngahmun asem’ui.
17 Philistinete chu ngahmuna konin hop thum kison, michom din akontauve: hop khat’in Shual gamsunga Orphrah kho ajonun,
18 hop khat man Beth Horon kho ajon’un, chule hop khat chun Zeboiim phaicham le nelgam gah kitouvetna gamgi lang ajontauve.
19 Philistineten Hebrewte chemjam le tengcha akhensah nom loujeh-un, Israelte lah a thihkhengthem aumpouve.
20 Israelte chu bong tupeh ham, tupheng ham, heicha ham chule koite ham hijongle kinol-hem goa jong Philistinete henga cheuvah ahi.
21 Heicha nol-hem man le tupeh nol-hem man paise khat tobang bep ahin, bongtu le tupeh nolman vang paise ni tobang ahi.
22 Hiti hin galbol nikhon Saul le achapa Jonathan tilou sepaite khat beh-in jong chemjam ham tengcha ham choiya abeihel’ui.
23 Philistineten Michmash lampi chang din sepai phabep asol’ui.

1 SAMUEL LEKHABU MASA BUNG 14

Jonathan hansan
1 Nikhat hi gal manchah poa gollhangpa jah a Jonathanin, “Gal lang Philistinete ngahmun khu gakhol hite,” ati. Athilbol ding hi Jonathanin apa Saul jong ahilpoi,
2 Saul chula Gibeah a kon gamla behseh lou, Migron a chu kolbuthei phung noiya ngahmun kisem’a um ahin, sepai jagup aneiye.
3 Thempu lengbang kikhaiya chu Ahijah chu ahin, Ichabod sopipa Ahitub chapa ahin, Ahitub chu Phinehas chapa, Shiloh a Pakai Thempu Eli tupa ahi. Jonathan potdoh lam mihon ahepouve.
4 Philistinete ngahmun lutna dia Jonathanin ajot tei ding Michmash khopi lampi jet le veiya songpi kochet chut khat gel aumin, songpi khat chu Bozez akitin, khatjoh chu Seneh akiti.
5 Songpi khat sahlama um, khatjoh lhanglam a um, Geba lam ngat gel ahi lhone.
6 Jonathanin gollhangpa jah a, “Hiche cheptan louho ngahmun a khun che hite. Parthenon eipanpi tei ahi; eipanpi thei ahi; eipanpiu le Aman gal eijosah tei diu ahi, lhomcha hijongleu hen ijotei diu ahi,” ati.
7 Gollhangpan, “Ipi hile nabolnom chan panpi nange,” ati.
8 Jonathanin, “Aphai, ngahmuna khun galut hitin, Philistinete kimusah hite.
9 I-henga hung agot’ule, ngah hitin;
10 eikouvu jongle che hite; ajeh chu hiche hi Pakaiyin eiho gal eijosah diu melchihna hi ding ahi,” ati.
11 Hiti hin Philistinete akimusah lhonle, Philistineten, “Veuvin! Akiselnau songko dunga konin Hebrewte ahungdoh-uve!” akitiuvin ahi.
12 Philistineten Jonathan le gollhangpa chu akouvun, “Hung kaltou lhonin ikhat khat seipeh unge!” atiuve. Jonathanin gollhangpa jah a, “Hungin, Pakaiyin Israelte ajosah ding ahitai!” ati.
13 Jonathan jong khut le keng thon akaltouvin, gollhangpan jong ajuiye. Jonathanin Philistinete chu abokhuma asot lhah jengle, gollhangpan atha thu thui.
14 Akisat masah pen’uva Jonathan le gollhangpa thase se chu pasal somni tobang ahin, athana mun jong honlei tebep sunga tupeh lam khat sung bou ahi.
15 Tollhanga um Philistinete akicha gamtauve; ngahmun a chun akihot lhulsoh tauve. Ahusau leithong akinim leuvin, nasa tah-in alinglaosoh tauve.

Philistinete gal lel
16 Benjamin gamsung Gibeah khopia mi ve-lhia pang Saul sepaiten Philistinete kisudong gama jam amu’ve.
17 Saul’in asepaite jah a, “Sepaiho gasim toh loiyun, aumlou khat um kham,” ati. Agasim’ule, Jonathan le agal manchah po gollhangpa aum lhonpoi.
18 Ahijah Thempu jah a chun Saul’in, “Pathen thingkong chu hikoma hinchoiyin,” ati. Niche nikhoa hi Ahijah-in Pathen thingkong chu Israelte masanga aput ahi.
19 Saul’in Thempupa ahoupet chun Philistinete ngahmun aboi cheh cheh jengun, hijeh chun Saul’in Ahijah koma, “Pakai dohna phat aumtapoi!” ati.
20 Hijeh chun asepaite to, kisunoh den a amaho le amaho kisat sat jeng, Philistinete chu adelkhumtauve.
21 Philistinete lama anapang Philistinete ngahmuna anaum Hebrewte jong chun panmun khel’in Saul le Jonathan ahutauve.
22 Adang Ephraim thinglhang gama kisel hon ma Philistine galjam ajauvin, Israelite hunan Philistine adelkhumtauve;
23 hiti hin Bethaven kalpeh a akisat piuvin, hiche nikho hin Pakaiyin Israel ahuhhinge.

Galnung thusohho
24 Saul’in, “Kamelmate chunga phu kalah masanga tunia an nepen pen gaosap chang hen,” tia ahahsel jeh-in, hiche nikho hin Israelte akel lel lheh-ui. Nilhum keiyin koima neh le chah bol aumpouve.
25 Gammang lah ajot paule muntin a khoiju atoh khauve.
26 Thingphung jouse khoiju umna jeng ahin, Saul’in asei gaosapna agin jeh-in khoiju donpa aum pouve.
27 Apan mipi gaosap chang dia agihsal hepha louvin, Jonathanin tenggol’in khoiphang khat asunin, khoiju phabep achoptai. Hichun atha aikido hut jenge.
28 Ahinla miho khat chun, “Keiho kel lel ho hi napan eigihsal’uva, ‘Tunia an nepen pen gaosap chang hen,’ eiti jeh-uva an ngol kahiuve,” ahinti.
29 Jonathanin, “Idia kapan hitobang loma hahsa imiteu abolgim ham! Kenla khoiju phabep kachop le kalip hut jengin!
30 Melma ajo phat’un imiteuvin tuni buchun kineh leu iti phat ding hitam. Chutile Philistinete ijat atha be diu gah gel tem’un!” ati.
31 Hiche nikho hin Michmash khopia pat Aijalon geiyin Philistinete asatpeh-un, Israelten Philistinete ajoutauve. Hichepet hin Israelte akel lel lheh jengu,
32 hijeh chun melmate thil achomdoh chengseu adel lut’un, kelngoite le bong jouse amun a athat den’un, asa chu thisan lhoh kang louvin anetauve.
33 Saul jah a, “Mihon sa thisan pumin aneuvin Pakai dounan achonsetauve,” tin aseitauve. Saul a-eojah jengin, “Vo mi sumang ding ho! Kakoma hin songtum len khat hin tanglut’un,” ati.
34 Saul’in aseibe kit’in, “Mipin hikoma bong jouse le kelngoiho ahinkailut diuvin gaseipeh-un. Hikoma akithauva aneh diu, thisan puma nea Pakai doumah aboll louhel diu ahi,” ati. Hiche nilhah hin abong jouseu ahinkailut’un hikoma chun athat tauve.
35 Hikoma hin Saul’in Pakai din maicham kat asemin, niche hi asem masah pen Maicham ahi.
36 Saul’in amite koma, “Jan teng kitolsuh-u hitin Philistinete, khovah kah-in thatgamu hitin anei jouseu chomgamu hite,” ati. Mipin, “Pha nasah sah chu bol jengin,” atiuve. Ahivangin Thempupan, “Pathen dong masaute,” ati.
37 Saul’in Pathen adongin, “Philistinete gadel khum leuveng neijosah diu hinam?” ati. Hiche nikho hin Pathenin adonbut poi.
38 Hichun japi lamkai chengse jah a Saul’in, “Tunia ipi chonsetna kibol kha hitam holdoh tem’un.
39 Israel gal josah ji, hing jing Pakai min a kasei ahi, themmo chang pen pen, kachapa Jonathan hijongle tha ding ahi,” ati. Ahinla koiman imacha aseipouve.
40 Chuphat’in Saul’in ajah-uva, “Nabonchan khuva khun gadingun, keile Jonathan hikoma ding lhon inge,” ati. Mipin, “Pha nasah sah chu bol jengin,” atiuve.
41 Saul’in Pakai Israel Pathen koma, “Vo Pakai, ibol’a tunia neihou lou ham? Pakai Israel Pathen, song theng san ing ting neidonbut’in. Jonathan le kei themmo jeh ahile Urim kisan teng neiseipeh-un, japi themmo jeh ahile Thummin kisan teng neihil’un,” ati. Asandoh-u chun Saul le Jonathan themmon akiphongtai. Mipi vang them achangtauve.
42 Hichun Saul’in, “Kachapa Jonathan le kei koijoh kahi lhon am?” atile; Jonathan themmon akiseitai.
43 Hichun Saul’in Jonathan jah a, “Ipi nabol hitam?” tin adonge. Jonathanin, “Khoiju phabep kanachop khan, thi dinga hikoma ding kahi,” ati.
44 Saul’in ajah a, “Nathi lou pou poule Pathenin eithat hen!” atitai.
45 Ahivangin mipin Saul jah a, “Israelte dia masa tah a gal eijopeh-u Jonathan tha ding hita ong? Ahipoi! Asamjang khat cha jong pulsar louna dia hing jing Pakai min a kitep kahiuve. Tunia aboldoh hi Pathen panpi jal’a kiboldoh ahi,” atiuve. Hiti hin mipin Jonathan thi dingsa ahuhdoh tauve.
46 Chujouvin Saul’in Philistinete del ahaiyin, mipi agam lamuva ahung kile kittauve.

Saul lengvaipoh le a-insung
47 Leng achan nungin Saul’in muntina melma jouse akisat pi: Moab mite, Ammon mite, Edom mite, Zobah le Philistine lengte akisatpi cheh-e. Akisatpi jouse ajousoh keiye.
48 Hangtah-in Amalek mite geiyin akisatpin ajouve. Akidoupi jousea konin Israel ahoidohsah tai.
49 Saul chapate chu, Jonathan, Ishvi, chule Malchishua ahiuve. Achanu lenjo chu Merab ahin, anaonu Michal ahi.
50 Saul jinu min Ahinoam, Ahimaaz chanu ahin; agal lamkaipa chu a-inkopa Abner, apa-ngah Ner chapa ahi.
51 Saul pa Kish le Abner pa Ner chu Abiel cha ahi.
52 Ahin laisen Saul’in Philistinete hasat sat’in asat’e. Hijeh hin mihat gal hang tapou sepaiyin apansah sah jenge.

1 SAMUEL LEKHABU MASA BUNG 15

Amalekte to kidou
1 Samuel’in Saul henga, “Amite Israelte leng dia nang thaonu dia Pakaiyin ahinsol chu Kei kahi. Tun Hatchungnung Pakai sei ngaiyin.
2 Egypt a kona ahung kitoldoh-uva Israelte apu apateuvin anadoujeh-uva Pakaiyin Amalek mite talen matzah agot ahi.
3 Amalek gasat’in, anei agou jouseu hindu mang hel’in. Imacha khen beihel’in, numei pasal, chapang le naosen jouse bong ho le kelngoite, sa-ngongsaote le sa-ngan jouse that gamhel’in,” ati.
4 Saul’in asepaite akoukhomsoh keiyin Telem muna asimtoh tai; hichea chun Israelte lah a sepai sang jani ahung konin, Judah gama konin sang som ahung kondoh-ui.
5 Saul le asepaite akon’un, Amalekte khopi ajon’uvin, twi kangsa vadung khat’a hin achang pangtauve.
6 Egypt a kona Israelte hung kitoldoh laiya apu apateu mi khoto themtah Ken mite chu Saul’in agahil masan, “Amalekte to kathagam tha louna diuvin, Amalekte dalhan chedoh tauvin,” agati sah-e. Hijeh chun Ken mite akitol mangtauve.
7 Saul’in Amalekte chu Egypt niso lam, Havilah khopia pat Shur kho geiyin asat’in ajoutai;
8 Amalek lengpa Agag amanin, amite vang athat gamtai.
9 Saul le amiten Agag ahing hoiyun, bong le kelngoi pha liaise jong chule bongnou le kelngoinou hoi liaise, thildang apha pha jong akhen’un, manmo ho le pannabei ho bou asumang tauve.

Saul leng kihaisah
10 Pakaiyin Samuel jah a,
11 “Saul leng kachansah kakisih tai; eidondan kathupeh anit tapoi,” ati. Samuel lung hang pumin, jan khovah hel’in Pakai henga ataove.
12 Ajing jingkah matah-in Saul kimupi din achetai. Carmel khopia Saul ama kichoi-atna khat thil mangmo sema chele, Gilgal lam ajotpai thu Samuel’in ajatai.
13 Samuel’in Saul ajot tulle, Saul’in salam anabol’in, “Pakaiyin vang boh hen Samuel! Pakai thupeh kanitsoh keiye,” anati.
14 Samuel’in, “Achutile iti bong hamgin le kelngoite hamgin kajah ham?” ati.
15 Saul’in, “Kasepaiten Amalaktea ahinkaiyuva, kelngoi pha laise le bong pha liaise chu Pakai na-Pathen henga kilhaina tha ding atiuvin, adangse vang kasugam hel tauve,” ati.
16 Samuel’in, “Thip’in! Jan nilhah a Pakaiyin kajah a asei chu seipeh inge,” ati. Saul’in, “Seiyin,” ati.
17 Samuel’in, “Nang ima nakigel lou vangin, Israel phung hijatpi lamkai nahi. Pakaiyin Israel leng dia thao nanusa ahin,
18 migiloute Amalek ho sugam dia nasol ahi. Nathagam hel kahsea sat dia nahil ahi.
19 I-bol’a asei ngailou nahim? Ipipen tah thilkeo choma, Pakai hotlam bol’a nahim?” ati.
20 Saul’in, “Pakai sei nit’a kachea, lengpa Agag kahin kaiya, Amalekte kathagam chume.
21 Kasepaiten vang kelngoile bong phalai, amatdoh hou that louvin, Pakai na-Pathen henga kilhaina tha din hikoma Gilgal geiyin ahinkai nauve,” ati.
22 Samuel’in, “Asei ngai le pumgo thilto hoijoh Pakaiyin adeiyam? Kelngoi phapen kilhaina thapeh sangin asei ngai aphajoi.
23 Pakai doumah bol hi kithoi phunsan banga ahin, kiletsah jong doilim houva chonset tobangma ahi. Pakai thupeh napai jeh a Aman leng nahinaa kona napai ahitai,” ati.
24 Saul’in, “Ahinai, chonsea kahitai; Pakai thupeh kanitpon, neihilna jong ka-ngaipoi. Kasepaite kagin jeh a adeiyu kabolpeh ahitai.
25 Nahenga taova kahi. Kachonset ngaidamin, Gilgal a neipuiyin lang Pakai neihousah-in,” ati.
26 Samuel’in, “Nang kilhonpin kile kit ponge. Pakai thupeh napalkeh tan, Aman jong Israel leng nahaisah ahitai,” ati.
27 Che dia Samuel akiheile, Saul’in aponsil’in denin, pon a-eh lotai.
28 Samuel’in Saul jah a, “Pakaiyin tunia hi Israel lenggam nalahpeh a nasanga phajo khat apeh ahitai.
29 Israel Pathen lal loupi tah chun jou sei lou, lung khel ngailou ahi. Mihem ahipon, lung akhelji poi,” ati.
30 Saul’in, “Chonse kahitai. Hijongle kamite lamkaiho le Israelte angsung beh a neijumso dan. Pakai Na-Pathen kahou theina din kile lhon kitta te,” tin ataove.
31 Hijeh chun Samuel’in Gilgal geiyin Saul alepui kit’in, Saul’in jong Pakaiya taona aneiye.
32 Samuel’in, “Lengpa Agag chu kahenga hinpuiyin,” atile; Agag kithing thingin akoma ahungin, “Thi ding chu iti hahsat hitam!” tin agel’e.
33 Samuel’in, “Nachemjam a pasal jouse thatgam a numei jouse cha neilouva nakoi bangin, nanu jong cha neilouva um ding ahi,” atin Agag chu Gilgal maicham maiya chun abantel jenge.
34 Samuel’in Ramah kho ajonin, Saul lengpa jong ainlam Gibeah khoa achetai.
35 Samuel ahin laisen lengpa akimupi kit tapoi: pul vang adoupeh nai. Israel lenga Saul apansah chu Pakai akisih-e.

1 SAMUEL LEKHABU MASA BUNG 16

Leng chang dia David thao kinu
1 Pakaiyin Samuel jah a, “Itih chan gei Saul pul dou ding nahim? Israel leng dia kadeilou ahitai. Kipat’in olive thaotwi choiyin, Bethlehem khoa Jesse kitipa henga chen, achapa khat chu leng chang dia kalhendoh ahitai,” ati.
2 Samuel’in, “Saul’in jadoh le eithalo ta ding, iti chuche pi kabol thei jeng ding ham?” ati. Pakaiyin, “Bongnou khat kaiyin lang, hikoma chu Pakaiya kilhaina gan that din kiseiyin.
3 Kilhainaa chun Jesse kouvin, nabol ding seipeh nange. Hichea hi kelhendoh pen pen chu leng dia thao nanu ding ahi,” ati.
4 Pakaiyin aseipeh bangin Samuel’un abol’in, Bethlehem a achele, khosung lamkaite ama to kimuto din kichan kithing thingin ahungun, “Vo mitvaneipu, neihungvil’u hi thilpha hinam?” tin adongui.
5 Samuel’in, “Aphanai, Pakaiya kilhaina gan that dia hung kahi. Kisuthengun lang lhonu hite,” ati. Jesse le achapate jong kisutheng din aseipeh-in, chule kilhainaa hung din akouve.
6 Ahung phat’un Samuel’in Jesse chapa Eliab chu alungthimin, “Pakai angsunga ding hichepa hi Pakaiyin alhendohpa hiteiyinte,” tin agel’e
7 Ahinla Pakaiyin Samuel jah a, “Adung san le mel-hoi hi thupin geldan. Amahi kadeipoi, ajeh chu mihem vet banga vea kahipoi. Mihemin polam melput aven, Kenvang lungthimput kavet ahibouve,” ati.
8 Jesse’n achapa Abinadab akouvin Samuel koma ahinpuilut’e. Ahivangin Samuel’in, “Ahipoi, ama jong Pakaiyin alhengdeh poi,” ati.
9 Jesse’n Shammah ahinpui kit vangin, Samuel’in, “Ahipoi, Pakaiyin ama jong alhengdeh poi,” ati.
10 Hiti hin achapa sagi jen chu Jesse’n Samuel koma ahin puilut’in, ahivangin Samuel chun, “Ahipoi, Pakaiyin hiche ho khat cha jong alhengpoi,” ati.
11 Samuel chun Jesse jah a, “Chapa dang nanei nah laiyam?” ati. Jesse’n, “Alhumpen pa vang aum nan, kelngoi chingin apotdoh tai,” ati. Samuel’in, “Gakousah loiyin, ama hung lhun masangin kilhaina gan kithat theiponte,” ati.
12 Jesse’n mi akousah tai. Mihoitah, gollhang damthei, mit kouleu jeng ahi. Pakaiyin Samuel jah a, “Hichepa hi ahi, thao nun!” ati.
13 Samuel’in olive thaotwi alan, asopite angsung laitah a David thao anutai. Apet pet’in Pathen Lhagaovin David atompai jengin, hiche nikhoa pat chun aumpi jingtai. Chujouvin Samuel jong Ramah khoa ahung kile kittai.
Saul thutannaa David
14 Pakai Lhagaovin Saul adalhan, Pakai hinsol lhagao engse khat’in Saul abolgim lheh jenge.
15 Asohten Saul jah a, “Pathen hinsol lhagao engsen nabolgim kaheuve.
16 Pu, neisol’un lang semjang saithem khat gahol unge. Hitia lhagao engsen nahinphah tih tih le ama chun semjang saiyin tin, chuteng damdoh kitji tan nate,” atiuve.
17 Saul’in asol’in, “Semjang saithem tah gahol’un, kahenga hinpuiyin,” ati.
18 Alhachaho khat’in, “Bethlehem khoa Jesse chapa khat tumging thei them tah aum’e. Mihangtah le mel-hoi tah, sepai pha le thusei them jong ahi. Ama hi Pakaiyin aumpi,” ati.
19 Jesse henga din Saul’in mi asol’in, “Nachapa David, kelngoi chingpa chu neihinsol peh tei teiyin,” agatisah-e.
20 Jesse’n David chu Saul henga din kelgol khat le sa-ngan khat, changlhah le lengpitwi dimset savun peng khat apoh sah-in asoltai.
21 Saul henga David ahungin, akinbol’in apangtai. Saul’in adei lheh jengin, agal manchah po din alhengtai.
22 Saul’in Jesse henga thu athot’in, “David hi kadeiye. Kakin a pang din hikoma umsah tan,” ati.
23 Hichea pat hin Pathen hinsol lhagao engsen Saul ahinphah tih tih, David chun semjang asaipehjie. Chuteng lhagao engsen adalhan, Saul adamdoh jitai.

1 SAMUEL LEKHABU MASA BUNG 17

Goliath-in Israelte achou
1 Judah gamsung Socoh khopia chun Philistinete galbol din akikhom’un, Socoh le Azekah kikah a Ephes Dammim a chun ngahmun asemtauve.
2 Saul le Israelte jong akikhom’un Elah phaiya ngahmun asem’un, Philistinete to kisat din gotsah aumtauve.
3 Philistinete lhang khat’a akigol’un, Israelte lhang chom khatma akigol’un, akah-uva phaicham khat’in akhentan’ui.
4 Israelte chou din, Gath khopia hung kon, Goliath kitipa chu Philistinete ngahmun a pat ahung kontai. Goliath hi tong gup le khap khat jen asangin,
5 sum-enga kisem ompho aki-ah chu kilogram sagi jen agih-in, chule sum-enga kisemma lukhuh akhuh-e.
6 Akengte ni jong sum-enga kitomjol ahin, ateng lung jong sum-eng ahin, alengkouva kitungdoh peh ahi.
7 Atengcha lung tumbi tejen ahin, atengpeh jong thih jeng, kilogram sagi jen gih ahi. Alum chu sepai khat’in amasang sanga apoh peh tho ahi.
8 Goliath dingin Israelte ahinsamin, “Chukoma ipi bol dia galsat dia kigol nahiuvam? Vo Saul sohte, kei hi Philistine kahi! Kakisatpi ding khat hung kilhengdoh-un.
9 Aman eijoa eitha le, keiho nasoh-un pang ung ting, ken kajoa katha le, keiho soh a napan diu ahi.
10 Tutah a hikoma hi Israel sepaite kachou nahiuve. Kakisatpi ding khat ding khat lhengdoh dia ngam tah a kachou nahiuve!” ati.
11 Saul le amiten ajah phat’un akicha behseh jengui.
12 David hi Judah gamsung Bethlehem khopia, Ephrath phunga mi Jesse chapa ahi. Jesse’n chapa get aneiyin, Saul leng chan lai hin Jesse ateh lheh tai.
13 Jesse chapa amasa thum ho chu Saul to gal asat khom jingui. Aupapen Eliab, aban a Abinadab, thum channa Shammah ahi.
14 David hi alhumpen ahin, aute thum Saul to aumkhon phat’un,
15 David-in amaho dalhan, apa kelngoite vetup din, kahvah vah le Bethlehem agaphaji.
16 Nisom li sungin Goliath hin niseh le jingkah nilhah-in Israelte achou chou jenge.
17 Nikhat hi Jesse’n David jah a, “Bu honsa kilogram som le changlhah lhon som hi pon, ngahmuna na-ute gathah loiyin.
18 Chujongle bongnoiha som khat jen jong hi gal lamkaipu din choiyin. Na-ute itobanguva, pha phaa hi nauvam, phot chet nan, nakimutou kahetna dingin, thil khat hinpo kit’in.
19 Saul lengpa le na-ute, chule Israel dang khu jatpi khu Elah phaiya Philistinete to kisat ahiuve,” ati.
20 Ajing jingkah matah-in David athouvin, kelngoite midang khat a-ngansen, neh ding pon, Jesse’n ahil bangin achetai. Israelite galmuna akigol doh-uva, galsat ding lhang asap pet tah-un David ngahmun agalhunge.
21 Philistinete le Israelte kisat din panmun alo cheh-un, akiveto tauve.
22 David-in neh ding apoh chengse chu neh le chah vaipopa henga adalhan galmun lang adel’in, a-ute koma achen, iti tinauvam tin adonge.
23 A-ute to akioupet tah hin Goliath-in ahin jon pheiyin, anabolji bangin, Israelite achoutai. Amichou hi David-in ajatai.
24 Goliath amu phat’un Israel kichan ajamtauve.
25 Israelten, “Veuvin hichepa khu! Ngaiyun amichoupi khu! Hichepa that that chu Saul lengpan kipaman lentah peh dia atepsa ahitai; lengpan achanuto akichensah a, ainsung mite jong kai adonda ding ahi,” akitiuve.
26 David-in akoma umho adongin, “Hiche Philistinepa that a Israelte vettomna huhdoh mi chun ipi amu ding ham? Ipi hile iti hiche chaptan lou Philistine pan hing jing Pathen sepaite ajumso ding ham?” ati.
27 Akoma umhon Goliath thatpen pen dia bolpeh ding chu aseipeh tauve.
28 David le miho kihou chu David upa Eliab-in ajan, David chunga alung hangin, “Hikoma ipi nahungbol ham? Gamthip noiya nakelngoite kon nachinpeh ham? Mi kamtam, gal kisat vea hung nahi chu!” ati.
29 David-in, “Ipi kabol ong? Thudoh jong kanei mo ham?” ati.
30 Khatpa jah a adoh bang bang adongin, adoh jousen adonbutnau akibang cheh-e.
31 Mi phabep’in David thusei ajauvin, Saul aseipe-ule, David ahung kousah tai.
32 David-in Saul jah a, “Vo lal loupi, koiman hiche Philistinepa khu gin louhel ding ahi! Ken gathat nange,” ati.
33 Saul’in, “Ahipoi, iti sat jouving natim? Nang chapang chabou hiya, ama ahinkho sunga sepai hung hipeh ta chu!” ati.
34 David’in, “Vo lal loupi, kapa kelngoite kaching jin, sakeite ham savomte hamin kelngoite aloha teng,
35 anung kadel jin, kabokhum jeng jin, kelngoite kalahpeh jitai. Sakei ham savom ham chun eidel teng, alol’in kamanin kajep lih jitai.
36 Sakei le savombon katha joule, hiche cheptan lou Philistinepa, Pathen hing jing sepaite taitompa khu, katha jeng ding ahi.
37 Sakeite le savomtea kona Pakaiyin eihuhhingle, hiche Philistinepaa kona jong eihuhhing tei ding ahi,” ati. Saul’in, “Aphai, chen, Pakaiyin lhonpi hen,” atin;
38 agalvon: sum-eng lukhuh chu David apeh, David akhuhpeh-in, chule agalvon sangkhol chol to apei.
39 David-in Saul galvon avon chunga chun achemjam chu akon che agotle, akivon khah loujeh-in achetheipoi. Hijeh chun Saul jah a, “Hicheng pumin gal sat thei ponge, kamang theipoi,” ati. Hiti hin asut lhatai.
40 Chuin akelngoi chinna tenggol choiyin, vadung song jolsel nga alan, songboma akikhumtai. Song sena bom gontohsan, Goliath to kitoh din apotdoh tai.

David-in Goliath ajo
41 Philistinepa chu amasanga agalvon popa ahungin, David lam ahin jontai. Ahin naijep jep’in,
42 David chu phatah a avettoh phat’in, chapang mel-hoi chabou ahinah laijeh-in, asit’in alung hang behseh jenge.
43 David jah a, “Ipi bolna dia tenggol choi nahim? Uicha neigel ham?” ati. Hiti hin a-pathen akouvin David agaosap khumtai.
44 David achouvin, “Hungin, nalong chu jule va, ganhingho kahoppeh ding ahi,” ati.
45 David-in, “Keito kisat dia chemjam le tengcha chule tenglung thoa hung kon nahin, keivang nataitom tom jeng Hatchungnung Pakai, Israel sepaite Pathen min a nangto kisat dia hungkon kahi.
46 Tuni mong monga Pakaiyin nang kajona ding tha eipeh a, kajo teng nalu katan ding ahi. Chuteng Philistine sepaite thilong ho chu jule va, ganhing jouse vahna kanei ding ahi. Chutah le Israelten Pathen aneiyu hi vannoiyin ahet ding.
47 chule hikoma um jousen amite huhhingna dia Pakaiyin chemjam le tengcha angailou mu cheh-unte. Pakai chu galjou jou jeng ahin, nabonchauva keiho tha noiya eipeh doh diu ahi,” ti.
48 Goliath-in David ahinjot phei kit phat’in, akisatpi din David jong Philistinete kigolna galmun langa alhaijel’e.
49 Asakhaova song chang khat asohdoh loiyin, Goliath ase jeng le, achalpang laitah asep khan, alugun asep vangin, Goliath abohkhupset’in akital deltai.
50 Hiti hin chemjam mang louhel’in songbom le song chang khatseh-in, David-in Goliath ajoutai !
51 David-in adel lut paiyin, achunga pansan, Goliath chemjam chu apaiya konin asatdoh-in, alu atanin athat tai. Amihatpau thi amu phat’un Philistinete ajamtauve.
52 Israelte le Judahten lhang asam’un adeltauve; Gath lam lhung keiyin adel’un, Ekron kelkot phung geiyin adel lut’ui. Philistinete machang ho chu Shaaraim geiyin lam lhon lhungin akijam thangun, Gath le Ekron geiyin alum thangsoh keiyui.
53 Philistinete adelnauva kona ahung kile kit phat’un, Israelten Philistinete ngahmun achomtauve.
54 David-in Goliath lu ahinpon, Jerusalem alhut’in, Goliath gal manchah ho vang aponbuh a akoidentai.

Saul henga David apuiyu
55 Goliath to kisat dia David kondoh jeng amu phat’in Saul chun asepai lamkai Abner jah a, “Abner, ama khu koi cha ham?” tin adonge. Aberin, “Kahe hih beh-e, lengpa!” ati.
56 Saul’in, “Gahedoh tan,” tin thu apei.
57 Goliath atha jou phat’in David ngahmun a ahung kile kit le, Abnerin Saul henga apuitai. Hichun David-in Goliath lu apu jing nalaiye.
58 Saul’in “Gollhang, koi cha nahim?” tin adonge. David-in, “Bethlehem khoa nalhacha Jesse chapa kahi,” ati.

1 SAMUEL LEKHABU MASA BUNG 18

1 Saul le David akihouchai lhontai. Chujouvin Saul chapa Jonathanin David adei lheh jengin, ama ki-ngailut bangin angailui.
2 Hiche nikhoa pat hin Saul’in David akoma aumsah-in, a-in lam a asol tapoi.
3 Adei behseh jeh-in a-itih a kikhenpi kit louhel din Jonathanin David koma kihahselna aneitai.
4 Jonathanin asilpet poncho ahoh khan David asilpeh-in, agalvonle achemjam, thalpi chule konggah geiyin apeh thai.
5 Saul’in asolna chan a David alolhingsah keiyin, hijeh chun Saul’in sepai lamkaiyin apansah tai. Hiche hi Saul vaipote le midang jousen adei cheh-ui.

David chunga Saul thangthip
6 Goliath atha jouva David inlam ahung chun, sepai jouse jong inlama ahungun, hichun Israel sunga khopi jouse numeite Saul lengpa lamto din ahunguve. Numeihon kipa la asauvin, alam’un, khutbeh abengun, selangdah asaiyui.
7 Vailhun abolnauva numeihon la asauvin, “Saul’in asang sang athat’in, David-in sangsom som athat’e,” tin alachoiyui.
8 Saul’in lacheng adeimon, alung hang lheh jengtai. Saul’in, “Itia David sangsom som that a aseiyuva, kei asang sang that mai maiya eiseiyu ham? Kakhel’a leng achansah lo diu ahi!” ati.
9 Hiti hin hichea pat hin athangthip’in David agingmo pantai.
10 Ajingin Pathena kon lhagao engse khat’in Saul atomtan, a-insunga mi-ngolpenin apengtai. Niseh a abol ngai bangin, David chun semjang asaiyin, Saul’in tengcha achoiye.
11 Saul’in, “Bang khutoh kilbeh den jeng tange,” tin, David chu nivei kijomthel’a akhole, David-in a-otdohji jie.
12 Pakaiyin ama dalha David aumpi phat’in Saul’in David akichatai.
13 Hijeh chun Saul’in David chu sepai sang khat lamkaiyin apansah-in, asoldoh tai. David-in asepaite chu gal akonpin,
14 Pakaiyin aumpi jing jeh-in, abolchan alolhing jinge.
15 David lolhin jing amudoh kit le Saul’in ahagin cheh kittai.
16 Lamkai lolhingtah ahiphat’in David chu Israel le Judah gamsunga mi jousen alungset cheh tauve.

David-in Saul chanu akichenpi
17 Saul’in David jah a, “Sepai hangtah le kitah tah banga Pakai gal nasat jing dingle kachanu tah pen Merab to kichensah inge,” ati. Saul chun ama tha ding sanga, hiti lam hin bolle Philistineten David atha theijoh diuva agel ahi.
18 David-in, “Keijong ka-insung jong imachabon hilouva iti lengpa tupa kahijeng thei ding ham?” ati.
10 Achuma le Merab chu David peh ding phat’in Meholah khoa Adriel joh apetauve.
20 Saul chanu Michal ma David to akidei lhonin, Saul’in jong ajah doh phat’in akipah thouve.
21 Saul’in akigeldol’in, “Michal hi David to kichensah ing ting, ama mangcha kakipalsah ding ahi, chuteng Philistineten that tauvinte,” ati. Hiti hin anivei nan Saul’in David jah a, “Katupa hiding nahi,” ati.
22 Saul’in avaipote chu guh thimin akihoupin David henga, “Lengpan nadeiyin, avaipoten jong nadeiyui; tupet pet hin achanu kichen lhontan,” tia seipeh din ahil’e.
23 Amahon David hitia chu aseipeh-ule, aman, “Lengpa tupa hi ding hi kijabolna tah ahin, kei tobang vaicha imacha lou din athupi val’e,” ati.
24 David thusei hi vaipoten Saul aseipeh-ule,
25 Saul’in David seipeh din ahil’in, “Lengpan moulah man dia adei chu amelmate chunga phulahna dia, Philistinete jakhat thasa chep tanpeh ding bou ahi,” ati. Hitia chu Philistineten David atha theina dia Saul’in agon ahi.
26 Saul thusei hi vaipoten David aseipeh-ule, lengpa tupa hiding hi David-in agel le thanom’e. Kichenna ding nikho kitep masangin,
27 David le asepaiten Philistinete jani agathat’ui. David-in athasa chengse chep atanin, atupa ahitheina dingin, lengpa koma asim khumtai. Hiti chun Saul’in achanu Michal hi David to akichensah tei angaitai.
28 David hi Pakaiyin aumpi, chule achanu Michal’in adei chu Saul’in kichentah-in ahei.
29 Hijeh chun Saul’in David ahagin cheh kittan, ahinkho lhumkeiyin akidoupitai.
30 Philistine sepaiten ahung kisatpi jiuvin, galmun jousea Saul vaipo dangse sangin David alolhing jinge. Hijeh chun David aminthang lheh tai.

1 SAMUEL LEKHABU MASA BUNG 19

Saul’in David abolset
1 David tha agot hi Saul’in achapa Jonathan le avaipote aseipehtai. Ahinla Jonathanin David angai behseh jeh-in.
2 ajah a, “Kapan tha din nagoi. Jing jingkah teng ching theiyin: munthip lai khat’a kisel’in, umdenin.
3 Nakiselna loulaiya chun kapa koma gading ing ting, nachung thu gaseiyinge. Hetdoh kaneile hinhetsah nange,” ati.
4 Saul koma Jonathanin David aseiphan, “Pa, nalhacha David hi dih louvin kabolpon, aman jong dih louvin nabol khapoi; chuti malah-in abolchan nangdia phachom jeng ahi.
5 Goliath atha jong thi ngamhel’a pang ahin, Pakaiyin loupi tah-in Israel din gal eijopeh tauve. Namu chun nang jong nakipah-e. I-bol’a monebei mi, David hi ajeh beihel’a dih louva bol’a tha goa nahim?” ati.
6 Jonathan thusei hi Saul jong anomtan, David tha louna din Pakai minin akihahseltai.
7 Hijeh chun Jonathanin David akouvin, ijakai aseipeh soh keitai; chujongle Saul henga ahinpuiyin, aman jong masanga bangin lengpa kin abol kittai.
8 Philistinete ahung galsoh kittauve. David-in akisatpin, ajotho behseh jal’in Philistinete ajam gamtauve.
9 Nikhat hi Pakaiya kon lhagao engse khat’in Saul atom kittai. Insunga touvin, tengcha achoiyin, David jong aumin semjang asaiye.
10 Saul’in David hi tengchaa bang to dotbeh den jeng dia agot le, David akiheidoh-in, tengcha chu banga akibut lut jenge. David ajamdoh tai.
11 Hiche jan hin Saul’in David in a ve-lhi din mi phabep asol’in. David jinu Michal’in ahil masan, “Tujan najamdoh lou le jing teng nathi ding ahitai,” ati.
12 Michal’in David hi bangkok’a akhai lhan, ama ajamin alhaidoh tai.
13 Hichun Michal’in indoi milim alan, jalkhuna alupsah-in, aluchang din kelmul’a kisem lukhap khat akoiyin, pon asilpeh-e.
14 David man dia Saul sepaite hung phat’in, Michal’in naa lum bangin aseiye.
15 Saul’in amaho tah chea avetchet diuvin asepaite asol kittai. Sepaite jah a Saul’in, “Ajalkhun pumin hikoma hinpu’vin, kei tah-in katha ding ahi,” ati.
16 Sepaite insung alut’ule, indoilim jalkhun a lum, kelmul’a kisem lukhap ki-khap amu’ve.
17 Saul’in Michal jap a, “Ipi dia neihiti lungthimbol’a kamelma najamdohsah ham?” tin adonge. Michal’in, “Aman kajamdohsah loule eitha dia seiya chu,” ati.
18 David ajamdoh-in, Ramah khoa Samuel henga achen, ijakai Saul thilbol aseipeh soh keiye. Chuin Samuel to Naioth a ache lhonin, hikoma chun aum lhontai.
19 Ramah kho, Naioth a David um chu Saul aseipeh phat’un,
20 aman din Saul’in mi asoltai. Acheho hin Samuel lamkainaa Themgao phabep lam a ao ao jeng agamu’ve. Chutah chun Pathen Lhagaovin Saul sepaite atompaiyin, amaho geiyin alam’un a-ao pantauve.
21 Saul’in ajahdoh phat’in, mi asolbe kit le, amaho jong lamin a-ao pan kittauve. Thumveinan Saul’in mi asol kit le, amaho jong chutiman aumlo tauve.
22 Chuphat’in Saul tah jong Ramah kho jonin achetai. Secu twikul lentah ahinphah-in Saul’in, David le Samuel aholle, Naioth a um ahilhon aseipeh tauve.
23 Naioth ajot chun Saul jong Pathen Lhagaovin atomtan, alamin Naioth geiyin a-ao lhung keitai.
24 Saul’in aponsil jouse paiyin, ao jengin, nilhum hel le jan khovah hel’in keosanin akijamtai. Hichea kona hi, “Saul geiya Themgao hita ong?” tia kiseipan ahi.


1 SAMUEL LEKHABU MASA BUNG 20

Jonathanin David apanpi
1 Ramah kho, Naioth a pat David ajamin, Jonathan kom ajonin, “Ipi kabol’a, itobang thilse kabol khah ham? Napan ipi thildih lou kabol mong monga tha dia eigot ham?” ati.
2 Jonathanin, “Nathi louhel ding ahi! Kapan abol ding jouse eiseipeh jing ahin, thupi hihen thucha hile, kei din a-im ngaipoi. A-im ngai louhel ahi!” ati.
3 Ahivangin David-in, “Nei ngai lheh jeng hi napan ahen, ilo eigot hi naseipeh poi, na nasah behseh ding ahijeh-in. Hing jing Pakai mina kihahsel kahi, kathina ding kal khatseh bou aum’e!” ati.
4 Jonathanin, “Ipi hile nadei dei kabol ding ahim,” ati.
5 David-in, “Jing nikho hi lha thah kut ahin, lengpa to ankong umkhom ding dol kahi. Phamo nasah loule thaini nilhah geiyin loulaiya gakisel tange.
6 Ankonga ka-umlou hi napan eihol khat le, ka-insung pumpiuva kumseh kilhaina gantha phat alhinjeh a Bethlehem lama kache ding neiphal peh-in seipeh tan.
7 Ijemtia, ‘Aphai,’ atile kahin ding; alunghan bangle, suhset tei eigot kahet ding ahi.
8 Lungset tah-in hiti chun neibolpeh-in, thengsel’a kahenga nakitepna nit’in. Aamvang themmo kahijongle nangtah-in neithat jengin! Tha ding bep’a idia napa heng neilhut khoh ding ham?” ati.
9 Jonathanin, “Hitobang chu agel jeng jong geldan! Kapan sunset tei tei nagot kahet pou poule kaseipeh tei tei lou ding ham?” ati.
10 David-in, “Napan nalunghan den tale, kon eiseipeh ding ham?” ati.
11 Jonathanin, “Loujaova chete,” atin ache lhontai.
12 Jonathanin David jah a, “Pakai Israel Pathen ikah lhona sakhin pang hen! Jingle thaini tuphat don don le kapa dong ing ting, nachunga alungdam nah le thu kahin thot ding,
13 suhset tei tei nagot a, kaseipeh da, dam heocha kasoldoh loule Pakaiyin eithat jeng hen. Kapa aumpi bangin Pakaiyin umpi jing tahen!
14 Keijong kahin hin nah le, thengsel’a nakitepna chu nit jingin lang, keidin kitah jingin; kathi tah jongle
15 ka-insung mite din hitobang kitahna chu umsah jingin. Pakaiyin namelmate asuhgamsoh teng,
16 ikitepto chehna lhon chu gui tan louvin um jing hen. Ake khah le, Pakaiyin talen namatsah hen,” ati.
17 Jonathanin ama akingailut bang banga David angailut jeh chun, David-in jong angailut din akitepsah kittai.
18 Jonathanin David jah a, “Jing khu lhathah kut nikho ahijeh-in, ankong umin panda le chun, naumlou kihe jeng ding ahi.
19 Thaini le naumlou kiha het cheh ding ahin; hijeh chun nakisel naji muna chun gakisel’in, songlhuh kisesang lea chun kiseltan.
20 Keiman hilam chu bidoi banga thalchang thum kahin kap ding ahi.
21 Kasohpa chu thalchang holdoh dia kahinsol ding ahi. Ken ajah a, ‘Ven, thalchang ho chu nakoma aum’e, hinlan,’ katile, nadia thilse bei, hungdoh thei nahitai. Hing jing Pakai min a kihahsel kahi, imacha tipon nate.
22 Amavang kasohpa jah a, ‘Thalchangho nagal langa achutai,’ katile, jamtan; Pakaiyin nasolmang ahitai.
23 Khatle khat ikitepna vang chu, Pakaiyin tonsot geiya einitsah tei tei lhon ding ahi,” ati.
24 Hiti hin David loujaova akiseltan, lhathah kut chun Saul lengpa an nen ahungin,
25 atouna ngai bangkoma atoutai. Aban a Abner atouvin, Jonathan to akimai ngat’e. David touna akeotan,
26 hiche nikho hin Saul’in ima aseipoi, “Achunga ikhat khat soh, hou thudol ham a theng lou jong hithei,” tia anagel ahi.
27 Ajingkit, lhathah kut jingin, David toumun a ong nalaiye. Chuphat’in Saul chun Jonathan adongin, “Ibol’a David janhia la hung louva, tuni beh a jong ankonga hung lou ham?” ati.
28 Jonathanin, “Bethlehem a chena ding kahenga athumin,
29 ‘Lungset tah-in neisol’in, khosunga k-insung miten kilhaina gan atha diu ahin, kasopiten kapantei din eikouvui. Kagol nahile, ka-inkote to kimuto din nahile, ka-inkote to kimuto din neisol’in,’ tin aseiye. Hijeh a chu na-ankong phunga panglou ahi,” ati.
30 Jonathan chunga Saul alung hang behseh jengin, “Numei chavainu chapa! David panpia nang jumna boldoh, nanu mitmona tah langpa!
31 David hinlaisea hiche gamsunga leng nahilou ding heloulai nahim? Chen lang gakai lut’in, tha tei tei ding ahi!” atitai.
32 Jonathanin, “Ipi athipi ding ham? Ipi abolset ham?” ati.
33 Hichepet hin Saul’in Jonathan tengchan akho jeng le, apan David tha tei tei ding agot chu Jonathanin ahedoh tai.
34 Jonathan alung hang behseh-in, lhathan kut ni ni lhin nin, an nelouvin ankong phunga akipatdoh tai. David alung gimpi lheh jenge, ajeh chu Saul’in aphin mong mong ahetai.
35 Akinopto lhon bangin ajing jingkah-in David to kimuto din Jonathan loujaova achetai. Pasal chapang khat apuiyin,
36 ajah a, “Kakapgot thalchang ho galan,” ati. Chapangpa alhaijel’in, Jonathanin akal langpeh a thalchang akap’in ahi.
37 Chapangpa thalchang chuhna agei phat’in jong Jonathanin, “Thalchang kal langpeh a achubouve!
38 Hikoma chun ding den hih-in! Hinchoi loiyin!” ati. Chapangpan thalchang agalan, apu henga ahungkile kittai;
39 ipi bolna ham ti helouvin; Jonathan le David-in bou ahei.
40 Jonathanin agal manchah jouse chapangpa chu khopi sunga choilut din apen asoltai.
41 Chapangpa che nungin songlhuh panga konin David ahung dingdoh-in, thumvei bohkhup’in amaiyin tol asui. Jonathan le David kichop pum pumin akap lhontai; David chu Jonathan sangin alung nacheh jenge.
42 Jonathanin David jah, “Pathenin umpin. Nangle kei, nachilhahte le keiya din, thengsel’a ikitepna chu tonsot geiyin Pakaiyin eikoipeh jing hen,” ati. Hichun David achetan, Jonathanin khosung ajontai.

1 SAMUEL LEKHABU MASA BUNG 21

David Saul koma ajamdoh
1 David-in Nob khoa Thempu Ahimelech kom ajontai. Ahimelech hi David kimupi din, kithing thingin ahungdoh-in, “I-bol’a nachangseh a hikoma hung nahim?” tin adonge.
2 David-in, “Lengpa kinbol’a hung kahi. Ipi bol dia eihinsol chu koimacha hetsah lou dia eihil ahi. Kasepaite chun mun chom, katepna mun khat’a eikimupi diuva kaseipeh ahi.
3 Neh le chah ipi pi naneiyam? Changlhah lhon nga neipen, adang dang naneisun neipen,” ati.
4 Thempupan, “Changlhah mai mai kaneipon, changlhah theng bou kaneiye; nasepaite chu numeito akitimatnau agamlat tah le nakilah thei ahi,” ati.
5 David’in, “Kitimat lou ahinauve. Gamkhol mai maiya kachepi teng jongle sepaite hou thudol’a kisuboh ngailou ahiuvin, hiche khohsah tum neiya kholjinnaa iti thenda diu ham!” ati.
6 Hijeh chun Thempupan changlhah theng chu David apetai; ajeh chu Pathena tosa chubou changlhah a anei ahin, hichu athah akito teng dokhang thenga kona kiladohji ahi.
7 Saul gancha ching lamkaipu, Edom a kon, Doeg chu, hou thudol’a bol lhing ding kin aneijeh-in, hiche nikho hin Nob khoa anaum khai.
8 David-in Ahimelech jah a, “Peh thei chemjam ham tengcha ham khat beh nanei louham? Lengpan eisol loi jeng jeh-in, kakinoval’in, kachemjam hihen galmanchah dang hijongle khat chabeh kalamanpoi,” ati.
9 Ahimelech-in, “Elah phaiya nathapa, Philistine mi Goliath chemjam chu kaneiye; ompho nunga khun akikhaiyin, ponin akijel’e. Nadeile lan, hikoma um galmanchah hiche khubou ahi,” ati. David-in, “Neipen, chusanga photo chemjam pha hoikoma jong kimu jouponte!” ati.
10 Hiti hin Saul koma konin David ajamin, Gath khopi lengpa Achish heng ajontai.
11 Lengpa Achish vaipoten Achish koma, “Ama hi agamsunga leng David chu hilou ham? Numeihon lachoiya lamuva, Saul’in asang sang athat’in, David-in sangsom som athat’e,’ atipau chu ahi,” atiuve.
12 Athuseiyu hi David lung sunga alut jel’in, Achish lengpa akicha lheh jengtai.
13 Hijeh chun lengpa le aloite amutih tih David aki-ngolsah-in, suhtang agot’u jong le angol chonjin, khopi kelkot phung dung pou ajihpol’in, akhamul dunga chilche kaidel dul’in aum’e.
14 Hijeh chun Achish chun avaipote koma, “Ven, hichepa mingol ahibouve! India kakoma hinpui nahiuvam?
15 Mingol tampi neisa kahilou ham? Ipi dinga motchon chon a eisuboi ding bep’a ka-insunglai tah a, kamsanga hichepa hinpuilut nahiuvam?” tin a-eojah tai.


1 SAMUEL LEKHABU MASA BUNG 22

Thempuho athagamu
1 Gath khopia konin David ajamin Adullam khopi kom, songko khat ajontai. Asopite le a-insung miten aumna ahetdoh phat’un agapanpi tauve.
2 Bol hesoh thoh, leiba chule lung lhai lou jousen David abel’un, pasal ja li bang alhinguvin, David lamkaiyin apangtai.
3 Hichea pat David jong Moab gamsung, Mizpah khopia achen, Moab lengpa jah a, “Lungset tah-in, Pathenin ipi eibolpeh ding kahetdoh masangsen, kanule kapa kouvin nakoma umsah-in,” tin ataove.
4 Hiti hin David-in anule apa Moab lengpa koma adalhan, David songkoa akisel lai sungsen, anule apa jong Moab lengpa koma aum jing phone.
5 Hichun Gad Themgao David henga ahungin, “Hikoma umdan, tu tun Judah gamsung jon loiyin,” ati. Hijeh chun David akipat paiyin Hereth gammang ajontai.
6 Nikhat hi Gibeah gamsung, lhangvum huisum phung noi khat’a hin, Saul chu tengcha choiyin atouvin, avaipoten adinkimpiuve. David le aloite umna kihetdoh chu Saul aseipeh-ule,
7 Saul’in avaipote jah a, “Ngaiyun, Benjamin insung mite! David khun nabonchauva loule lengpilei peuva, asepaite lamkaiya pansah dia nagel-um?
8 Kachapa tah to David kijol jong koimachan neihil pouve. Kamite lah a David hin tuphat hin tha dia eigot, kachapa atilkhou jing thu hi khohsah a eiseipeh jong naumpouve!” ti.
9 Saul vaipote lah a Doeg jong adingin, “David-in Nob khoa Ahitub chapa Ahimelech kom ajot kamui.
10 Ahimelech hin David bol ding dol Pakai adoh peh-in, David chu neh le chah chule Philistine mi Goliath chemjam chu apetai,” ati.
11 Hijeh chun Saul lengpan Ahimelech Thempu le Nob khoa Thempu a-inkote jouse agakousah-in, amaho ahungtauve.
12 Ahimelech jah a Saul’in, “Ahimelech ngaiyin!” ati. Ahimelech-in, “Nalhacha kahi, kapu!” ati.
13 Saul’in, “Idia nangle David-in suhmang neigot lhon? I-bol’a David chu neh le chah chule chemjam pea, Pathen doh peh nahim? Tua eidouva, kei that dia chang pang jing ahi!” ati.
14 Ahimelech-in, “David chu vaipo kitah pen a nanei, natupa, navengtup lah a lamkai, leng inpi sunga mitinin ajapen tah ahi.
15 Ahi, Pathen kadohpen-e; ahinla hichu apatna jong ahipoi. Nang douva naseinah vangin vo lal loupi, kei le ka-insung mi khatcha themmo chansah thei pon nate. Athudol hi ken kahe hih hel’e!” ati.
16 Lengpan, “Ahimelech nangle na-inkote nathi tei tei diu ahi,” ati.
17 Hichun akoma ding a-ngah sepaiho jah a, “Pakai Thempuho chu that’un! David to kithon eidouvun, phatecha ahet vanun, David jammang jong eihilpouve,” ati. Ahinla a-ngah a pang sepaihon Pakai Thempuho thana din khut alam pouve.
18 Hijeh chun Saul’in Doeg jah a, “Nangin gathat’in!” atile; Doeg chun athatgamtai. Hiche nikho hin Doeg chun lengban bat thei cheh Thempu somget le nga athat’e.
19 Nob khosunga cheng jouse, khopi Thempupa geiya thagam din Saul’in thu apen: numei pasal, naosen chapang jouse bong ho le sangante chule kelngoi ho geiyin athat gamtauve.
20 Amavang Ahimelech chate lah a Abiathar ajamdoh-in, David jop din achetai.
21 Saul’in Pakai Thempute athagam chu Abiatharin David aseipeh tai.
22 David-in Abiathar jah a, “Chuche nia chukoma Doeg kamua pat, Saul aseipeh tei ding kahet ahitai. Tua chu ken ka-inkote kathisah gam hita chu!
23 Kakoma umin lang kicha hih-in. Saul’in nangle kei eitha nom gel lhon ahin, kakoma umle chun hoidohjon nate,” ati.


1 SAMUEL LEKHABU MASA BUNG 23

David-in Keilah khopi ahuhdoh
1 Philistineten Keilah khopi adelkhum’uva, chang lhung tilcha aguh peh thuu David-in ajatai.
2 David-in Pakai adongin “Philistinete kaga sat din ham?” ati. Pakaiyin, “Gasat’in lang Keilah khopi huhhingin,” ati.
3 Ahivangin David sepaiten ajah a, “Hikom Judah gamsung jenga jong kichat ding ikhopset kineiya, Keilah khopia cheu hen Philistinete to kisat leu hen khoh cheh ding ahi!” atiuve.
4 Hijeh chun David-in Pakai adongkit’in, Pakaiyin ajah a, “Konin lang Keilah kho delkhum jengin, ajeh chu Philistinete chunga gal kajosah ding nahi,” ati.
5 Hijeh chun David le asepaiten Keilah khopi ajon’un, Philistinete agasat’un; tamtah athat’uvin, neh thei chah thei tampi alah peh-ui. Hitia hi David-in Keilah khopi ahuhdoh ahi.
6 Ahimelech chapa Abiathar ajamdoh a Keilah khopia David ajop chun, Thempu lengban anakipoh-e.
7 David Keilah khopia alut chu Saul aseipeh-ule, Saul’in, “Pathenin kakhut’a apehdoh ahitai. Hiche kulpi kaikhumsa, kulpi kikamkhum sunga David alut hi amale ama kilep boa ahitai,” ati.
8 Hiti hin Saul’in asepaite akhomin, Keilah khopi adelkhum’un, David le asepaite aumtauve.
9 Saul’in sat agot ahetdoh phat’in David chun Abiathar Thempu jah a, “Thempu lengban chu hinchoiyin,” ati.
10 Hichun David-in, “Vo Pakai, Israel Pathen, nalhacha keijal’a Saul Keilah khopia hunga asuhmang ding kajai.
11 Keilah kho miten Saul khut’a eipeh diu hitam? Kajah banga Saul hung mong ding ham? Vo Pakai, Israel Pathen kataove, neihouvin!” ati. Pakaiyin, “Saul hung ding ahi,” ati.
12 David-in adongkit’in, “Keilah kho miten keile kasepaite hi Saul khut’a eipeh doh diu ham?” ati. Pakaiyin, “Napedoh-unte,” ati.
13 Hijeh chun David le asepaite mihem jagup jen tobang chun apet pet’in, Keilah khosung dalhan akitoldoh tauve. David-in Keilah kho adalhah ajahdoh phat’in Saul’in athilgon ahailotai.

Thinglhang gama David
14 David chu thinglhang gamsung, Ziph kom, gammanga akisel’e. Saul’in David ahol hol jengin, Pathenin la David chu apedoh deh poi.
15 Ama that mong mong dia Saul hung kondoh hi David-in amu chentai. Ziph kom, gammang lah a Horesh a David aum’e.
16 Hikoma hin Jonathanin David akimipin, Pathenin ahoidam tei din agatil khouvin,
17 ajah a, “Kicha hih-in. Kapa Saul’in suse theipon nate. Israel leng nahi ding kichen tah-in ahen, chule nang ban a noidou ding kei kahi,” ati.
18 Ani lhonin kitepna theng anei lhonin, akijol lhontai. David Horesh a aumdenin, Jonathan inlama akile kittai.
19 Ziph a konin mi phabep Gibeah khoa Saul koma acheuvin ajah a, “Lhanglam Judah gammang lah, Hachilah molsang, kagamsungu Horesh a David akisel’e.
20 Vo lal loupi, ama namat nom lheh jeng kaheuvin, hijeh chun kagam’uva hungle chun keihon kamatsah tei tei diu ahi,” agatiuve.
21 Saul’in, “Hibanga neikhoto jal’un Pakaiyin vang boh-u hen!
22 Chekit’un lang phate chan gapho chen’un, hoiya um, kon amu ham. Mi doha thuh tah a kisei kajai.
23 Hoilai monga kisel, amun jouse gaholdoh-un, kahenga thu hinlhut tei teiyun. Chuteng kilhonu hitin, gamsunga aum nah laile sadel’a kadel’a, Judah gam pumpi chot ding hijongle kahol ding ahi,” ati.
24 Amahon Saul dalhan, Saul sangin Ziph ahung lhung masauve. David le asepaite chu Moan gamthip lai, mi chenna lou phaicham, Judah gam lhanglam gammang lah a aum’uve.
25 Saul le asepaite jong David hol din akon’un, David-in ajahdoh phat’in Moan gamthip lai, songkol lah khat ajonin, hikoma chun aumtai. Saul’in ajahdoh phat’in David nung ajuitai.
26 Saul le asepaite lhang pang lang khat’a aum’un, David le asepaite apang lang khatma aum’un, lhang chun akhen’ui. Saul le asepaitea konin ajam loiyun, amahon la anaitel tul’un amat pai diu ahitai.
27 Hichepet tah hin Saul henga thupoho ahungun, “Hung kile loi jengin, Philistineten gamsunga gal ahinbol tauve!” ahungti.
28 Hijeh chun Saul’in David delban dalhan Philistinete sat din achetai. Hiti hin hiche lhang hi Kikhenna Lhang kisahlo ahitai.
29 Chukom dalhan David chun Engedi gamkai ajonin, hikoma chun akiseltai.

1 SAMUEL LEKHABU MASA BUNG 24

David-in Saul athada
1 Saul chu Philistinete to kisat jouva ahung kile kit le, Engedi kom gamthip laiya David kisel thu aseipeh tauve.
2 Saul’in Israel sepai aphapen cheh sang thum puiyin, pelkai kol’a songpi lah a David le asepaite kisel hol din achieve.
3 Saul ahungle lampivel kelngoi hong lah pia hin songko aumin, hikoma chun chom khat choldo din aluttai. Hiche songko sung lampeh a chu David le asepaite kisel ahiuve.
4 Asepaiten David jah a, “Tupet cha hi ahi! Pakaiyin namelmate nakhut’a pedoh a, nadei deiya nabol dia naseipeh chu tuhi ahitai!” atiuve. David akithol jel’in, ahet lou kah-in Saul leng ban ponchol hal khat aga-at tanpeh-e.
5 Hichun David-in nommo asan
6 amite jah a, “Pakaiyin leng dia alhendohsa kapu suhset louna din Pakaiyin eihongbit hen! Pakaiyin leng dia alhendohsa ahijeh a, themcha jong kasuhset louhel ding ahi!” ati.
7 Saul adelkhum louna diuvin asepaite geiyin David-in athu nuntai. Saul athouvin, songko dalhan achekit tai.
8 David chun Saul nung juiyin agah kouvin, “Vo Lal loupi!” atile; Saul ahung kihei phat’in, ama jabolnan David tol’a abohkhuptai.
9 chule, “Nang suse ding dan a nahenga eihehse ho thu ibol’a nalah ham?
10 Phatecha navettoh ding chu, ajotah a chu songko sunga Pakaiyin kakhut’a eipehdoh nahitai. Kasepaite phabep in katha jeng dia aseisau ahin, kenvang nommo kasahpeh-in, Pakaiyin leng dia alhendoh pa nahijal’a themcha jong kasuhset lou din kaseipeh tai.
11 Ven kapa, naponchol hal khat kachoi hi! Katha thei nahitai, nakhel’in hiche ponhal joh hi ka-at lhai. Nang dou lou ding le suhset lou kagot kathilbol hin natahsansah ding ahi. Bolset tohset neilou kahivangin, tha din sadel’in neidel’e.
12 Amajo jo chunga Pakaiyin thu tan jeng hen! Ken nang suse louhel dia, neidou jeng jeh hin Pakaiyin talen namatsah hen!
13 Gollui thuchih nahetsa, ‘Migilouvin thilse abolji,’ kiti ahin, kenvang nasuse ponge.
14 Veuvin Israel lengpan ipi tha ding agot ham! Veuvin ipi suhdel yodel thoa ham! Ui thisa ha, uili ham!
15 Pakaiyin thu atan a, koijoh mo ihi aseidoh ding ahi. Athu kholtoh hen, eipanpi hen lang, nakhut’a eihuhdoh hen,” ati.
16 David-in asei chai phat’in Saul’in, “Vo kachapa David, nang nahi mong mong am?” tin asamin, akapjah tai.
17 Chuin David jah a, “Nadih-in, kei themmo kahitai. Hibanga neiphat bol’a, ken hibang thil dihlou kabolpeh nahi!
18 Pakaiyin nakhut’a eipehdoh a, nathu thu kahipet jenga jong neitha lou chun neiphatbol neivetsah ahitai.
19 Amelma mankhaa suse louva min ijatvei alha kimu kham? Tunia neibolna jal’in Pakaiyin vang hen!
20 Israel leng nahitei teiya, hiche lenggam chu navai neinaa um jing ding ahi.
21 Kei le ka-insung min man louna dia kachilhahte nasuhgam louna din Pakai minin kahenga kitep’in,” ati.
22 David-in asuhmang louna din akiteptai. Hichun Saul inlama akile kit’in, David le aloite akiselnau muna achetauve.

1 SAMUEL LEKHABU MASA BUNG 25

Samuel thi
1 Samuel athin, Israel pumpi kikhomin alunghem piuve. Lunghempi achaiphat’un ama kho Ramah a avuitauve.

David chule Abigail
Hiche nung hin David-in Paran gammang ajontai.
2 Caleb phunga mi Nebal kiti khat aumin, Moan khoa cheng, Carmel lhang koma gam aneiye. Mihao tah, kelngoi sangthum le kelcha sang khat nei ahin,
3 ajinu Abigail hi numei mel-hoi tah le chingtah ahin, Nabal vang milungneo le lung chomtah ahi. Nabal hin Carmel lhanga kelngoimul avoujie.
4 Gammanga um David-in Nabal thusim ajan,
5 gollhang som Carmel lhanga asol’in, Nabal holdoh a salam gabol din ahil’e.
6 Gollhangho chun Nabal jah a, “Golpa, David-in salam nabol’in, nangle na-insung mi, nanei jouse chunga akipah-e.
7 Kelngoimul vou nahi ahen, nakelngoi jouse kachin peh-uva iman asuhset lou nahet din adeiye. Carmel lhanga aum sungsea nanei jouse koiman aguh mang lou jong nahetsah nom’e.
8 Gollhangho hi dongle chun seipeh nauvinte. Golvah nikho khatle kahung diu ahin, kipah tah a neisan diu David-in adeiye. Napeh thei thei neipeuvin, nalhacha keiho le nagol ngaitah David chu,” tia seisah din ahilchah masai.
9 David misolten David minin hicheng chu Nabal heng alhut tauve. Gollhang angaule,
10 akhon nan Nabal’in, “David chu koi ham? Amincha jong kajakhapoi! Tulaiya soh hung jamlut gamsung dimsetna hi!
11 Hoilam konbon kihelou, kaneh ding le kadon ding kelngoimul vouho dinga kithat sa ho pi iti David le aloite kapeh jeng thei ding ham!” ati.
12 David misol ho ahung kile kit’un Nabal thusei chu alhut tauve.
13 David-in, “Chemjam kiko loiyun!” atile; amahon akikosoh tauve. David-in jong chemjam akikon, neh le chah ngah din sepai jani bou dalhan, sepai jali to akontai.
14 Athilsoh hi lhacha ho khat’in Nabal jinu Abigail koma aseitan, “Gammanga um David-in ipu pau salam bol dia mi phabep ahinsol ho, ipu’vin aphinset thu najah hitam?
15 David mite hi miphatah tah ahiuvin, ka-umkhom sung seuvin ithil’u amangle ase abal aumpoi.
16 Kelngoi chinga amaho to kaum khom sungseuvin, sunle janin ei-ngah-un, eihong jingui.
17 Phaten gel’in lang ikhat khat bol’in. Ajo le ipuu le a-insung mite dia manthah na kikha ding ahi. Amala aphoh bel bul’in koimacha to kihou thei ahipoi,” ati.
18 Man gangtah-in Abigail hin changlhah lhon ja ni, lengpitwi savun peng ja ni dimset, hon minsa kelngoi nga, bu minsa kilogram somle sagi, lengpithei changlhah boh ja khat, theichang changlhah a kisem gosa ja ni hicheng hi sa-ngante apohsah-in,
19 sohte jah a, “Chen, masauvin, ken hinjui nauvinge,” atin, ajipa vang ima aseipehpoi.
20 Abigail chu molkon pang khat’a sa-ngan a akitol kimvel lenaa David le aloiten ahin jotsuh-u amui.
21 David-in, “I-khoh tah a Nabal kitipa thil le lo gammang noiya kanahonpeh peh ham? Anei khatcha mansah louhel’a kakoi chu hitobang bep a hi eilethuh ahi ong!
22 Jing khovah kah a amite katha gamhel loule Pathnin eideng hen!” tin agel’e.
23 David amu phat’in Abigail sa-ngan chunga konin akum loiyin, tol a abohkhup atuh-in, “Kapu, lungset tah-in kasei ngaiyin!” Kei themmo ahijenge!
25 Lungset’in khuche pannabei Nabal khu imachan geldan! Amin mi-ngol ahibanga a-ngol mong ahibouve! Nasohte hung chu kei umlou pet anahi,
26 amelmate that loule phu lalouva koiya chu Pakai ahi. Pakai hing jing min a kihahsel kahi, namelmate le nausea nom jouse chu Nabal banga talen man cheh ding ahiuve.
27 Peh dia kathilpoh hi kapun kisanin nasepaite pen.
28 Kabol khel thil aumle kapun nei ngaidamin. Pakai dia galsat nahijeh a Pakaiyin nangle nachilhahte lenga natun diu ahi; nahinkho thilse bolda jengin.
29 Min you lutah ahon jing banga, khattouvin nokhum hen tha din gojongle chun, Pakai na-Pathenin huhhing nan nate. Namelmate vang min gophel boma song chang apeh mang bangin, Pakaiyin peh manginte.
30 Pakaiyin thilpha nateppehsa nabolpeh a, Israel leng nahisah teng,
31 ajeh beiya mitha jeh ham le nangin naphu nakilah jeh ham a nalung gimpi lou ding ahi. Chule Pakaiyin vang naboh teng neisumil hih beh-in, kapu,” ati.
32 David-in Abigal koma, “Tunia kei to kimuto dia nahinsol’a Pakai Israel Pathen vahchoiyin um hen!
33 Hitobang lungthim pha napea, tolthat a kaphu eilahdasah, hitobang thil naboldohsah Pathen chu thangvah-in um hen.
34 Pakaiyin nangho eisuhsetda sah ahitai. Israel Pathen hing jing min a kasei ahi, neihung kimupi loi hih le chun, jing khovah masanga Nabal mite kathagam hel diu ahitai!” ati.
35 Hichun Abigail thilpoh chengse David-in alan, ajah a, “Inlama kile kit’in, lung gimdatan. Nadei chu bol nange,” ati.
36 Abigail inlama ahung kile kit le, Nabal hin leng neh dia lom leo golvah anabol’e. Ju khamin nom satah-in ana um’e. Hijeh hin Abigail’in jingkah geiyin imacha aseipeh poi.
37 Alimdoh phat’in, ajinun ijakai aseipeh tai. Akin behseh jengin, atha angoilo del tai.
38 Nisom jouvin Pakaiyin Nabal adengin athipai paitai.
39 Nabal thi David-in ajahdoh phat’in, “Vahchoiyun Pakai! Nabal’in eiphinsetna phu eilahpeh tan, alhacha kei thil dihlou eibolda sah tai. Agit lou jeh-in Nabal chu Pakaiyin talen amatsah tai,” ati. Hichun David-in Abigail to kichenna ding thu agalhutsah tai.
40 Athu hi asohten Carmel lhanga Abigail henga agaseiyun, “David-in jia neidia, nang puiya eihinsol’u ahi,” agatiuve.
41 Abigail chu tol’a abohkhup’in, “Alhacha nu kei akeng soppeh dia gotsa kahi,” ati.
42 Abigal akipatdoh loiyin, sangan chunga touvin, asoh numei nga kipuiyin, David sohte to alhonin, David jin agaumtai.
43 David hin Jezreel khoa Ahinoam jong akichenpin, tun Abigail jong akichenpin, tun Abigail jong akichenpi.
44 Akah lah hin David jinu Michal hi Saul’in, Gallim khoa Laish chapa Palti to akichensah tai.

1 SAMUEL LEKHABU MASA BUNG 26

David-in Saul athada kit
1 Mi phabep ahungun Gibeah khoa Saul henga, Judah gamgi chin Hachilah gammang a David kisel thu aseiyui.
2 Apet pet hin David hol din Israel sepai phalai cheh sangthum puiyin, Saul’in Ziph gammang ajonin,
3 Hachilah lhang lampia ngahmun asemtauve. David chu gammang laiya aum jing nalaiyin, ama hol dia Saul hung ajahdohphat’in
4 mi asolgun, Saul chukoma aum mong mong chu ahechentai.
5 Amatah apet tah-in akipat’in, Saul le Saul sepaite lamkai pipu, Ner chapa Abner lupna agahe chentai. Ngahmun sunga Saul alumin, asepaite akimvel’a akigol’ui.
6 David-in Hit mi Ahimelech le Zeruiah chapa Joab sopipa Abishai jah a, “Nangni koipenin, Saul ngahmun geiya neilhonpi lhon ding ham?” ati. Abishaiyin, “Ken lhon pinge,” ati.
7 Hiche jan hin David le Abishai Saul ngahmuna alut lhonle, ngahmun lailunga Saul alumin, alulhun koma atengcha tol’a akiphut’e. Saul kimvel’a chun Abner le sepaite alum’ui.
8 Abishaiyin David jah a, “Pathenin namelma tujana nakhut’a apehdoh ahitai. Ama tengcha ma man tolto kilbeh den ing ting, velsut hih hel inge!” ati.
9 Ahinla David-in, “Ama hi nasuhset louhel ding ahi! Lhentum leng suse chan Pakaiyin talen amatsah tei tei ding ahi.
10 Hing jing Pakai min a kasei ahi. Athi phat ham ahiloule galmun ha a Pakaiyin Saul hi atha tei tei ding kahei.
11 Pakaiyin leng dia alhendohpa suhset kagot louna din Pakaiyin eituh tang hen! Atengcha le atwipai latin chetate,” ati.
12 Hiti hin David-in Saul lulhun komcha tengcha le twipai alan, Abishai to adalha lhontai. Amua le ahea aumpon, akhang cha jong aumpouvin, Pakaiyin alhim ngui jeh-un, abonchan a-ihmu ngil del’uve.
13 David chu phaicham gal lang khat, lhangvuma akaldoh-in, konin
14 Saul sepaite le Abner jah a asamin, “Vo Abner! Najah lou ham?” tin akouve. Abner chun, “Koi hiya penga lengpa hoh khang ham?” ati.
15 David-in, “Vo Abner, Israel sunga mi nasapen nahilou ham? Achutile idia napu, lengpa ngah tup lou nahim? Tutah chun napu that din mi khat ngahmuna alut’e.
16 Natoh ding kin nathontai, Abner! Pakaiyin Leng achansah napu na-ngatup loujeh-uva, hing jing Pakai min a kasei ahi, thi dia lom cheh nahiuve. Ven, lengpa tengcha hoilam hitam? Alulhun koma twipai hoiya umtam?” ati.
17 David ogin chu Saul’in ahepaiyin, “Vo kachapa David, nang nahim?” tin adonge. David-in, “Kahinai, lengpa!
18 Idia ba kapun nalhacha neidel jing nah laiham? Bolset ipi kaneiyam? Ipi thilse kabol ham?
19 Vo lengpa kasei ngaiyin. Kei eidousah hi Pakai ahile, ahenga kilhaina bolle chun lung hei theiyinte; mihemte bol ahivangle, Pathenin gaosap-u hen. Pakai houna gamsunga konin eidel mangun, namdangte pathente ho kihouna gamsunga mi neithasah dan. Uili tobang bep kei that dia Israel lengpa hung konkhoh ngaiyam? I-bol’a aman judel vadel’a eidel ding ham?” ati.
21 Saul’in, “Kabol kheltai. Hungkile kittan, kachapa David! Tujan neihinghoi jeh chun, nasuse kitta hih hel inge. Ngol’a hitobang tijat um thil pi hi bol’a kanahi!” ati.
22 David-in, “Vo lengpa, natengcha hikom aum nai; nasepaite khat hinsol’in hung lahen.
23 Midih le kitahho Pakaiyin kipaman pehen! Tunia Pakaiyin eipehdohsa nahitan, hijongle Pakaiyin leng achansahsa, nang chu kasusepoi.
24 Tunia kahinghoi bangin, keijong Pakaiyin eihinghoi hen, chule hitobang gim hesohna chengsea konin eilhadoh hen!” tin adonbut’e.
25 David jah a Saul’in, “Pathenin phatthei boh-in, kachapa! Nabol chan a lolhing tei ding nahi!” ati. David ajotna dia akichetan, Saul inlama ahung kiletai.

1 SAMUEL LEKHABU MASA BUNG 27

Philistinete lah a David
1 David akigel’in, “Saul’in la eithatei ding ahin, Philistia gama jamlut leng phapenite. Chutile Saul’in Israel gamsung eihol dantin, kahoidoh pen ding ahi,” ati.
2 Hijeh chun David le aloite sepai jagup jen chu apet pet’in, Gath lengpa, Maoch chapa, Achish henga achepaitauve.
3 David le amite chu ainkoteu pumin Gath khoa achengtauve. David le ajite ni, Jezreel khoa Ahinoam le Carmel khoa Nabal meithainu, Abigail to ahiuve.
4 Gath khoa David jamlut ahetdoh phat’in, Saul chun holdoh khoh agotapoi.
5 Achish jah a David-in, “Kagol mong nahile, kachenna ding khoneo khat beh neipen. Nang to khopi munpia kachen khom lou akhohpoi, kapu!” ati.
6 Hijeh chun Achish-in Ziklag kho apen, hichea pat hin Ziklag kho hi Judah lengte achangtauve.
7 David chu Philistia gama lha somle gup achenge.
8 Hiche sung hin David le aloiten, chuche gamsunga khang sotpi chengsa Geshur mite, Girzite le Amalekte agasat’ui. Agamsungu chu Shur chan, Egypt gam geiyin anosuh peh-un,
9 numei pasal athat gam’un, kelngoite, bong ho sa-ngante, sangongsangte, chule nihchen ponsil geiyin alahpeh-ui. Chujoule David chu Achish henga ahung kit jin,
10 Achish chun, “Tuchunga hoilam gachom nahim?” tin adong jin; chuteng David chun, Judah gam lhanglam sang, Jerahmeel gamsung, Ken mite chenna gamsung dung pou chondol’in aseipeh jin ahi.
11 David chun koimacha, numei pasal khen beiyin athat jin, ama le amite natoh dol Gath khoa gaseidoh ding aumjipoi. Philistia gamsung achen aumjipoi. Philistia gamsung achen laisea David-in hitia chu na atohji ahi.
12 Ahinla Achish chun David atahsan jingnan hitin akigel’in, “Amite Israelten hibanga vetda chu ahikho lhumkeiyin kakinbol’in pang nante,” ati.

1 SAMUEL LEKHABU MASA BUNG 28

1 Phat chom khat jouvin, Israelte sat din Philistineten sepai akhomtauve, chule Achish chun David jah a, “Nangle namiten neipanhu diu nahet jing chume,” ati.
2 David-in, “Ahiloule, nalhacha kihiya, kathil bol thei dol natahsa tah a namu hih ding ham,” ati. Achish, “Aphai! A-itih a eivengtup din pansah inge,” ati.

Saul’in Gaochangnu phun asansah
3 Samuel athitan, Israel pumpin alunghem piuvin, ama kho ma ma Ramah a avuitauve. Phunsan ho le gaochang jouse Saul’in Israel gamsunga konin anodohsoh tai.
4 Philistine sepaite akikhom’un, Shunem koma ngahmun asem’ui; Saul’in Israelte akhomin Giboa molsanga ngahmun asem’ui.
5 Philistine sepaite amudoh phat’in Saul atija behseh-in,
6 ipi bol ding Pakai adongtai. Ahinla Pakaiyin adonbut tapoi. Mangin jong ahoupon, Urim le Thummim sanin jong chule Themgaote kamin jong imacha aseipeh tapoi.
7 Hichun Saul’in avaipote jah a, “Gaochang numei khat gahol’un, cheng ting gadong tange,” ati. Avaipoten, “Endor a khat aum nai,” atiuve.
8 Chuphat’in Saul’in von akhel’in, ponsil jatchom sil’in, khojin nungin sepai ni to numei chu kimupin achetai. Numei nu jah a Saul’in, “Ipi soh ding ahi, lhagaote neidoh peh temin. Chule kaminphah pen pen mipa lhagao chu koudoh-in,” ati.
9 Numeinun, “Saul lengpan phunsante le gaochang jouse Israel gama anodoh thusim nahet tei ding ahi. I-bol’a kipalsah a tha neigot ham?” ati
10 Hichun Saul giltah-in akitep’in, “Hing jing Pakai mina kasei ahi, hiche naboljeh a talen man louhel ding nahi,” ati.
11 Numei nun, “Koipen kakoupeh ding nahim?” atile; “Samuel,” ati.
12 Numeinun Samuel amuphat’in apengjah jengin, Saul jah a, “I-bol’a neilhep lhah ham? Saul lengpa nahibouvin!” ati.
13 Lengpan ajah a, “Kicha hih-in, ipi namun?” ati. Amanun, “Leiset’a kon hung kaltou lhagao khat kamui,” ati.
14 Aman, “Ipi to kilom?” atile; Amanun, “Tehsepu khat ahung kitol touvin, ponchol asil’e,” ati. Samuel ahiding Saul’in ahetai, chule jabolnan tol’a mai asuluttai.
15 Saul jah a Samuel’in, “I-bol’a neisuh boiya, neinung kou kit ham?” ati. Saul’in, “Kalung agim behseh tai! Philistineten gal eibol den’un, Pathenin eidalhatai. Eidonbut tapoi. Themgaoho kam hihen, mang hijongle imacha eiseipeh tapoi. Ipi kabol ding neiseipeh dia kahin koudoh nahi,” ati.
16 Samuel’in, “Pakaiyin dalhaa namelma soh ta, india kei neikou ham?
17 Pakaiyin kei kam a naseipeh chu abol ahitai: lenggam nalahpeh a David joh apeh ahitai.
18 Pakai thupeh palkeh-in, Amalekte le anei jouseu nasumang hel poi. Hijeh a chu tua Pakaiyin hitia nabol ding ahi.
19 Nangle Israelte Philistinete khut’a napehdoh diu ahitai. Jing teng nangle nachapa kahenga hung ding nahi lhontai. Israel sepaite jong Pakaiyin Philistinete khut’a pedohtante,” tin aseiye.
20 Apet tah chun Saul tolgoa akijam jenden jengin, Samuel thuseipi chu atija behseh tai. Nilhum hel le jan khovah a nelou chalou ahijeh-in ma alhasam lheh jengtai.
21 Numeinu chea agave le, atijat val chu amudoh-in, “Kapu, neilungset’in, kenbon long phalngam a neidoh kabolpeh le,
22 tun kei ngeh jong neibolpeh-in. Neh ding them khat gonpeh-inge. Lamjotna kham tha beh neina din an netei teiyin,” ati.
23 Saul adan, imacha neh louhel din aseiye. Ahivangin avaipote geiyin asol’un, nehsah tei agouve. Akhon khon nan anomin tol’a konin athouvin, jalkhuna atoudoh tai.
24 Numeinun avah thao chet bongnou athat’in, changbong neldisel phabep alan, changlhah akang loiyin, cholsolouvin abol’e.
25 An chu Saul le avaipote aluipeh-in, amahon anetauve. Hiche jan chun amaho achetauve.

1 SAMUEL LEKHABU MASA BUNG 29

Philistineten David apaidoh
1 Jezreel phaicham twinah phunga Israelten ngahmun asem laiyun, Philistineten asepai jouseu Aphek khoa akhomtauve.
2 Philistinete leng nga chu aloi loi jakhat cheng, sepai sang khat cheng to ahung kitoldoh cheh-in; David le asepaite jong anung lama Achish lengpa to akitol thauve.
3 Philistine gal lamkaiten amudoh phat’un, “Hiche Hebrewte hikoma ipibol hiuvam?” atiuve. Achish-in, “Hiche hi David, Israel lengpa Saul vaipo khat ahi. Kakoma aumna asot tai. Eihin jot lut nikhoa pat athemmona imacha kamudoh khapoi,” ati.
4 Ahinla Philistine gal lamkaite Achish chunga lung hangin ajah a, “Achenna dia napeh khosunga chun hichepa hi nungsol loiyin. Eiho to lhonin galmun jotsah hih beh-in; gal kisat teng eiho eilesat lo diu ahi. Imiteu atha chu ama dia apupa lungdei boldoh kitna ahibouve.
5 A-ipi kiseile numeiho lam a alachoiyuva, ‘Saul’in asang sang athat’in, David-in sangsom sangja athat’e,’ atiu David chu ama hi ahi,” atiuve.
6 Achish chun David akouvin ajah a, “Hing jing Israel Pathen min a kihahsel kahi, kei din nakitah lheh jengnai; ilhon a galmuna gal isat khom ding kadei lheh jeng ahi. Neihin jot lut nikhoa pat nathemmona kamudoh hih laiye. Ahinla leng dang hon ilhon diu pha asapouve.
7 Lung mongin inlama kile kittan, alung himonau imacha boldan,” ati.
8 David-in, “Kapu, thildih lou ipi kabolpeh am? Nasei banga nakin kabolpat nikhao pat kathemmona mudoh lou nahile, kapu le kalengpa nang to lhona namelmate sat hua iti kahungda ding ham?” ati.
9 Achish-in, “Adih nai, Pathen Vantil kitah banga kitah a kagel nahi. Ahivangin leng dangsen galmun a ilhon thei lou diuva aseiyu ahitai.
10 Hijeh chun David, jing jingkah teng Saul hindalhaa kahenga hung jouse chu matah-in thouvun lang, khovah vah le dalha jengun,” ati.
11 Hijeh chun David le aloite, ajing jingkah-in, Philistia gamsung jon din, jingpi tah-in akipatdoh tauve. Philistineten vang Jezreel lang ajontauve.

1 SAMUEL LEKHABU MASA BUNG 30

Amalekte douna gal
1 Ni ni jouvin David le aloite Ziklag ahung lhungtauve. Amalekte Judah gam lhanglam gamkai abulu’vin, Ziklag kho asattauve. Kho ahal lhauvin,
2 numei jouse akaimangtauve; koima vang athat pouvin, khen bethel’in mihem abonchan akaimangsoh hel’ui.
3 David le aloite ahungu chun kho kihalvam, aji achateu, numei pasal kikaimangsoh hel ahung toh tauve.
4 David le aloite hakan akap’un, acholdeh geiyun akap’uve.
5 David jite ni Ahinoam le Abigail geiyin anakaimangun ahi.
6 Aji acha chanlo hel’a um aloiten David chu selih jeng dia agel phat’un David alung gim behseh jengtai; ahivangin Pakai a-Pathenin atilkhouvin ahi.
7 David-in Ahimelech chapa Thempu Abiathar jah a, “Thempu lengban hinchoi loiyin,” atile; Abiatharin ahinchoitai.
8 David-in Pakai adongin, “Michomho del leng gaman jou nang em?” ati. Pakaiyin, “Del’in, manin natin, sohchang ho jong huhdoh nan nate,” atipeh tai.
9 Hijeh chun David le aloite mihem jagup jen akipatdoh paiyun, Besor luidung ageiyun, mi phabep aumden tauve.
10 David-in sepai ja li puiyin akitol paiyin, sepai ja ni vang chol behseh-uva luidung galkai lel ahitauvin, aumden tauve.
11 David sepaiten gamlah a Egypt mi chapang khat aman’un, David henga ahinpuiyui. An apeuvin, twi adonsah-un,
12 lengpiga gosa phabep le lengpi thei changlhah lom khat to apeuve. Anehva phat’in ahaldoh-in, nithum lhingset an ngol’a um anahi.
13 David-in, “Koi soh nahia, hoilam kon nahim?” tin adonge. Aman, “Egypt mi kahin, Amalek mi khat soh a pang kahi. Kadammo jeh a kapun nithum masanga chu einadalhah ahitai.
14 Judah gamsung lhanglam, Chereth mite gamsung, Caleb phung mite gamsung kachom’un, Ziklag kho kahal lhauve,” tin aseive.
15 David-in, “Hiche michom ho koma chu neipuilut thei ding ham?” tia adoh le; Aman, “Neitha louna dingle kapu khut’a neipeh doh louna dia Pathen min a nakitep le, puilut nange,” ati.
16 Hiti chun aman michomho koma David apuilut tai. Michomho chun Philistia gam le Judah gamsunga achomdoh-u thilkeo simsen lou ho kipapi nan golnop abol’un, muntin a akita thangun, aneuvin adon’un, nom satah-in anaum’ui.
17 Ajing khovah tah-in David-in anokhumin, nilhah geiyin akisatpi. Gollhang jali seh seh sangongsang chunga ajamdoh bep’un, adang khatcha jong ajamdoh poi.
18 Amalekte chomdoh jouse le ami mat jouseu, ajite ni geiyin, David-in akinung lah soh keiyin,
19 imacha jong amangden aumpoi. David-in asepaite jite le chate jouse le Amalekte chomdoh thilkeo jouse ahin nungpoh kit tai.
20 Kelngoi hon ho le bonghon jouse jong ahin nung kaiyin, asepaiten ganhing gancha jouse amasanguva ahin hoipeh-un, “Hiche ho hi David a ahi,” atiuve.
22 David chu chol behseh a Besor luidunga umden sepai ja ni henga achen, amaho jong David le sepaite lamto din ahungun, David achetouvin, kipah tah-in salam abol’e.
22 Ahinla milungneo le pannabei, David to gallon khom phabep’in, “Eiho to bon konkhom lou, akichomdoh thil khat cha kipeponte. Ajite achateu bou kipuiyin che jengtau hen,” atiuve.
23 David-in, “Kasopite, Pakaiyin eipeh-u thil ho chunga hitin bol thei pouvin nate! Aman eihoidam’uva, michomgamte chunga gal eijosah-u ahi.
24 Naseiyu hi koima nomponte! Mi jouse kihom cheh ding ahi; neh le chah ngah dia in um hon jong galkonte chan jat jat akilah diu ahi,” ati.
25 David-in hiche chondan hi anasemdoh-in, hichea pat Israel sunga akijui jingtai.
26 David Ziklag a ahung kile kit phat’in, athil chomdoh ho phabep chu Judah lamkai, aloite henga agah thot’in hitin aseiye, “Pakai melmatea kona kichomdoh thil phabep nang ho din kahin thot’ui,” ati.
27 Thil ho chu David-in, Bethel, Ramah, Judah lhanglam gamkai sunga mite heng, chule Jattir,
28 Aroer, Siphmoth, Eshtemoa,
29 Racal kho mite le Jerahmeel phung mite, Ken mite,
30 Hormah, Borashan, Athach,
31 chule Hebron kho mite athot’e. Asepaite to akilon le na kho jousea athotsoh keiye.

1 SAMUEL LEKHABU MASA BUNG 31

Saul le achapate thi
(1 Chr 10:1-12)
1 Gilboa molsanga Philistineten Israelte asat tauve. Hiche mol’a hin Israelte tamtah athat’un, amoh chengse, Saul lengpa le achapate pumin ajamtauve.
2 Ahivangin Philistineten ajamho jong aman’un, Saul chapate thum: Jonathan, Abinadab chule Malchishua jong athat tauve.
3 Saul panmun kimvel’a jong akihasat jengun, Saul jong melmate thalchangin akap khan, melse tah-in amavotauve.
4 Saul’in agal manchah poa gollhangpa jah a, “Hiche Pathen hepha louten kichepna neiya eitha louna diuvin, chemjam satdoh-in neisat lih tan,” ati. Ahinla gollhangpan chutibol ding akichan, hijeh chun Saul’in chemjam akido doh-in, amuh hem a akibah lut thoi.
5 Gollhangpan Saul thi amu phat’in ama jong achemjam akibah lut’in, Saul to ahithai.
6 Hitia hi Saul le achapate thum, chule gollhangpa chu thiuvah ahi; hiche nikho hin Saul sepaite athigamtauve.
7 Jezreel phai gal lang khat, Jordan luigal niso lam a Israelten, Israel sepaite galjam ajahdoh-uva, Saul le achapate thi ajahdoh phat’un, akhopi chengseu dalhan ajamtauve. Hichun Philistineten ahung lotauve.
8 Galpi ni jingin Philistineten thilong ho ahung kholtoh-ule, Gilboa molsanga Saul le achapate thum long amudoh tauve.
9 Saul lu atan’un, agalvon ahoh lhauvin, hiche kipana thupha seiphong din, Philistia gamsung pumpia amiteu le milimdoiho henga mi asol’uve.
10 Saul gal manchahho chu apathennu Astarte houin a akhaiyun, along chu Beth Shan khopi pal’a akhenbeh tauve.
11 Philistineten Saul abolnau hi Gilead gamsung, Jabesh kho miten ajah phat’un,
12 mihang galhat chungnung chengse akipan’un, jan khovah hel’in Beth Shan kho ajontauve. Khopi pal a Saul le achapate long ala lhauvin, Jabesh kho geiyin ahin polut’un, ahalvamtauve.
13 Chuin agubuh chengse achomkhom’un, Jabesh khoa tamarisk thingphung noiya avuiyun, ni sagi pul douvin an angol’ui.