Galatia Mite Henga Paul Lekha Thot

Thupatna

Juda mi hilou henga Kipana Thupha akiseiphonga, amahon jong akisan phat’un, mihem khat’in Christian hina dia Mose Danthu anit leh anit lou ding kinelna aumdoh lotai. Paul’in vang Mose Danthu nit lou khoh asapoi, Christa to hinkho kijopna ding tahsan bou ahisah-e, chule tahsan jal’a mihem Pathen to kicham theiyin aseiye. Ahin Asia minor gam, Galatia gamsunga Houbung lah a mi phabep ahungun, Paul ataitom’un, Christian dih hiya, Pathento kijopna ding a Mose Danthu nit din aseiyui.

Thuhil dih louva kipui mang miho tahsan dih le chonchan lamjanga lepui kitna dinga Galatia mite henga Paul’in lekha anathot ahi, Paul’in Jesu Christa Solchah ahi kisonna aseiye. Solchah ahi chu Pathena kona kouna amu, mihem thuneina hilou, Juda hilouho henga dia kisol ahina aseiye. Hiche ahin Pathen koma mihem them channa ding tahsan bou ahidol aseiye. Achaina Bung hoa hin Christa tahsanna jal’a ngailutna hi Christian nun le khan a acham a hung kondoh ahije ahil chen’e.

Asung Thu Hopkhen

Thupatna 1:1-10

Solchah khat hinaa Paul thaneina 1:11-2:21

Pathen Ngailut jal’a Kipana Thupha 3:1-4:31

Christian jalen le mopohna 5:1-6 :10

Thu chaina 6:11-18

Galatia Bung 1

Salam

1Mihema konle mihem vanga hilou, Jesu Christa jeh le athilah akona Jesu kaithouva Pa Pathen jal’a solchah keima Paul

2le ka-umpi sopite chengsen Galatia gam Houbung ho henga,

3i-Pau Pathen le Pakai Jesu Christaa konin lungset le chamna hung lhung hen,

4i-Pau Pathen lungdeiya hiche khang gilouva eiho huhdoh din Jesu Christa chu eiho chonset jal’in Ama akitoh doh jengin ahi;

5i-Pau Pathen chu tonsot geiyin loupina chang jing hen: Amen.

Kipana Thupha dang aumpoi

6Christa lungset jal’a nakoupauva kona tukah seha thupha chom khat’a nakihei jengu chu kadatmolheh-e;

7Thupha dang chula aum sampon; mi phabeh vang aum’un, amaho hin nang ho suh ling laova Christa Kipana Thupha chu akaleh ahei ding agot’u ahibouve.

8Hichea hin keiho hiuving lang van’a Vantil khat hijeng jongle nakiseipehsau Thupha tilou thupha chom seiphong aumle ama chu gaosap chang hen.

9Kasei masah sau banga tua jong kaseikit ahi, “Natahsansau hilouva thupha chom dang khattouvin nahung seipeh khah-u le ama chu gaosap chang jeng hen.”

10Tua hi mihemte lung lhaisah goa kahi, Pathen lung lhaisah go kahim? O-le mihemte lungdei hol mong kahim? Mihemte lungdei holna lai kahile Christa soh kahilou ding ahi.

Paul solchah a apanlona

11Sopite, keiman kaseiphongle Kipana Thupha chu mihema kon ahilouje kahilchen nahiuve.

12Mi hema kona kalah jong ahipon, koi man eihil jong ahipoi; Jesu Christa hung kiphondoh a konjoh ahibouve.

13Malai Juda hou gut kahilaiye kachon nam lhah najauvin, Pathen Houbung chu tepte na kalval’a bolsea suhmang ding go kahin,

14chu jongle kapu kapateu Houdan thua katom panjeh-in Juda hou thudol’a kakhang golpi tamtah kakho khelsoh keiye.

15Ahinla ka-nu oisunga ka-um laiya pat eisepkhensa Pathen chun alungset jeh-in eikouvin,

16chidang namdangte henga Achapa kaseiphong theina din kahenga aphongdoh tan, hichea hin katoh ding dol tahsaphe le thisan pu mihem kadongpai jengpoi,

17kei sanga solchah hi masa Jerusalema umhohenga jong kachedehpoi, Arabia gama kaga chen, chuin Damascus khoa kahung kilekit bouve.

18Kumthum nungin Cephas henga imahetoh din Jerusalema kaga chetouvin, amato nisom le ninga ka-um’e;

19hichepet chun Pakai sopipa Jacob tilou solchah dang kamupoi.

20Nahenguva lekha kahinsut hi, ven Pathen maikoh a jou kaseipoi.

21Hiche nung chun Syria le Cilicia gamkol sunga kahungtai.

22Hiche geiya hi Judea gama Christa Houbungte mitmua het lou lai kahi,

23“Masanga suhmang dia eigopau chun tun khatvei suhmang ding agot tahsan chu kipah tah-in asei phonglei,” tibou ajah-u ahin,

24chu le keima jeh a Pathen avahchoi choi jengu ahi.

Galatia Bung 2

Solchah danghon Paul solchah dia asan’u

1Kum som le li jouvin Titus kapui lhonin Barnabas to Jerusalema kaga chetou kitlhon’e.

2Hichea chu Pathen thuphondoh jal’a chetou kahin miho jah a chun chidang namdang ho lah a Kipana Thupha kaseiphong thudol kahil chenin, lamkai dom dom ho vang chu atumbeh in kaseipeh-in, katoh masah le tulai katoh ho manlou aso lou nading ka-ngaitoi.

3Chukoma ka-umpi Titus chu Greek mi ahivangin cheptansah tei ding agopouve.

4Athudol hi alhema sopia kisemthu, Jesu Christa to ineikhomu jalena sumang dia mi ve-lhi dinga ilah-uva hunglut khaa, eiho sohchansah ding go ho hinpoh lut ahibouve.

5Kipana Thupha tah ahidol hi nang ho chunga aum jingna din nidan khat jeng jong amaho noiya hi kikhumlut kha lou kahiuve.

6Lamkai dom doma kiseihoa konin jong, ipi kihisah-u jongle ka-i aloudeh poi, Pathenin mihem maijan avepoi, ginle ja umdol’a kiseiho chun ima eibolpeh chompouve.

7Chuti tah sangin cheptan ho henga Kipana Thupha seiphong dinga Peter kinganse banga chidang namdangte lah a Kipana Thupha seiphong dinga eikinganse amu’uve.

8Ijeh-inem itile cheptan ho dinga Peter solchah a akisemdoh banga chidang namdang ho dinga keima solchah a eikisemdoh ahi.

9Lungsetna eikipe aheuvin, Cephas le Jacob chule Johnin kapan khom’uva, kei le Branabas chidang namdang lah a chule amaho cheptan ho lah a natong dingin khut jetlamin eina sanguve.

10Kageldoh jing ding adeiyu chule ken jong katoh nom jeh a hatah akagel jing vaicha gentheite ahiuve.

Antioch khoa Paul in Peter apho

11Antioch khoa Cephas ahung chun kichentah a themmona anei jeh-in amaichangtah a kaphoh jenge.

12Ajeh chu Jacob henga kona miphabeh hung masangin chidang namdangte to an anekhomin, amaho hung phat’in cheptan ho akichat jeh-in aki- nung khinin akitumsah tai.

13Judate mi adang hon jong ama ajop thol’un, aphat lhem nauva chun Barnabas geiyin apui manglo tauve.

14Ahinla Kipana Thupha kitah dungjuiya achon louvu kamudoh phat’in japi maikoh tah a Cephas kasosal’in, “Judate chilhah apeng nangbon Judate chondan banga um lou ibol’a chidang namdang te chu Juda te chondan thosah ham gao nahim?” kati.

Juda hihen Namdang hile tahsan jal’a huhhinga um

15Eiho pendol’a Juda mi ihiuvin, chidang namdang chonse hoa kon ihipouve.

16Ahinla Jeu Christa tahsan tilouva Danthu dungjuiya natoh vanga mihem them achanlouje iheuve; hijeh a chu eihon Danthu dungjuiya natoh vang hilouva Christa tahsan jal’a them ichan theina diuva Jesu Christa chu itahsanu ahi; Ijeh-inem itile tahsa a mihing koima Danthu dungjuiya natoh vanga them chang lou ding ahi.

17Themchan teina dia kihabolnaa jong Christa sunga chonse ihiu akimudoh le Christa chu chonset lhacha ham? Ahinai saipoi.

18Ajeh chu ken kaphetsa kasah phat kit le kasuh khel photchetna jo ahibouve.

19Ijeh-inem itile Pathen lama kahin theina dinga Danthu jeh a Danthua thisa kahitai. Christa to kikhetbeh tha kahitan,

20Keima chu hinga ahipon, Christa joh keisunga hing ahibouve, tua tahsaphea kahin hi keima eingailua keijal’a kipedohjeng Pathen Chapa tahsan jeh a hing kahiye.

21Pathen lungset hi moh kahisah poi, ajeh chu Danthu jal’a them kichang hile Christa thi chu pannabeiahi.

Galatia Bung 3

Danthu natahsan ham?

1Vo khopolou Galatia miho Jesu Christa thingpel’a kikhetbeh dol namitmu changtah-uva kichentah a kisundoh taa, kon najol lhah-u ham?

2‘Lhagao nakisanu chu Danthu dungjuiya natoh vang ha tahsan thu najah-uva kon ham?’ nanghoa konin kahet nom’e.

3Iti chuti lungthimbei nahiuvem? Lhagao thua kipan’uva tua tahsaphea chaidoh ding nagot’u ham?

4Hi chengpi hi mohjen seh a thoh gim nahiuvem? Tah ahile mohjen seh ahi-ngut’e.

5Lhagao napeuva, nalahuva thil kidang ho boljipa chun Danthu dungjuiya na natoh jeh-uva abol ha, tahsan thu najah-uva kona abol ham?

6Hichea hin, Abraham in Pathen atahsan in hichu ama din themchansah nan akisikpehtai,” tin akiseiye.

7Chuti ahijeh chun mi atahsan chengse chu Abraham chatea kisimjoh ahidol nahet diu ahi.

8Pathen lekhabun tahsan jal’a chidang namdangte themchan ding ahet masah dol chu Pathenin Abraham jah a Kipana Thupha anaseiphong masan “Nang jal’a chidang namdang jouse jong vangboh chang diu ahi,” anati.

9Hijeh a chu tahsan nei chengse chu tahsan neipa Abraham vangbohchang khom ahiuve.

10“Koi hile Danthubua kisun chengse nitjom jing lou chu gaosap chang ahi, “tia akisut jeh-in, Danthu dungjuiya natong chengse chu gaosap chang ahiuve.

11Ijeh-inem itile Danthu dungjuiya chonjeh a koima Pathen anga them chang lou hel ding ahi; ajeh chu, “Tahsan jal’a them changpa bou hing ding ahi,” akiti.

12Achujongle Danthu chu tahsan’a tobang ahipoi, “Danthu ho nitpa chun Danthu ho hinna anei ding ahi,” kiti ahibouve.

13Danthua kisun chu, “Thinga kikhai sang tapou chu gaosap chang ahi,” kiti ahijeh-in, Christa chu eiho jal’in gaosap achangin, Danthu gaosapnaa koin eihung lhatdamtauve.

14Hiche hi Abraham vang kiboh chu Jesu Christa jal’a chidang namdangte jong achan theiya tahsan vanga tepsa Lhagao chu ikisan theina diu ahi.

Danthu chule Thutep

15Sopite, mihem ngaidol’a kasei ahi, mihem ngaidol mongin jong suhdetsa kitepna chu koiman isah louvin abolpon, koijong akoibe ngaipoi.

16Thutep chengse chu Abraham le achilhah kipea ahi. Mi tampi kiseina banga, “Chule nachihlhah ho din,” kiti louvin, khatseh seina bangin, “Chule nachilhahpa din,” akitin, Ama chu Christa ahi.

17Hiche hi kisei ahi: Pathenin asuhdet’a aphondohsa kitepna chu kum ja li le somthum nunga umdoh Danthun thutep chu man mo asosah a ason amang thei ahipoi.

18Goulo ding chu Danthu jal’a ahile thutep jal’a hilou ahin, ahinla Pathenin thutepsa jeh a Abraham apeh ahibouve.

19Danthu hi ipi ding ba ham? Suhkhel phondohna dia kikoibe, thutep kipe chilhahpa hung kah a ding ahin, Vantilte kimanga palaipa khut’a kitungdoh ahi.

20Khatseh dinga thupo le ngailou ahin, Pathen chu khat ahi.

Danthu umdohna jeh

21Achutile Danthu hi Pathen thutep to kikal ham? Ahinai saipoi; micho hing theina thaneiya Danthu kipe hile hiche Danthua chu them chan na um ding ahi.

22Ahinla Jesu Christa tahsan jal’a atahsan chengse thutep chu akipeh theina diuva Pathen lekhabua thun ijakai chon set noiya akhumchah ahitai.

23Tahsan thu hung lhun kah, ahung lhung ding tahsan kiphondoh kah a chu Danthu noiya ki hen kikhakhum ihiuve.

24Hitia chu tahsan vanga them ichan theina diuva Danthun eina kaihoiyuva Christa henga eipui naiyu ahi.

25Tahsan thu hung lhun kalvang eikaihoi nau noiya chu ihitapouve.

26Ijeh-inem itile Jesu Christa tahsan jal’a Pathen chate nahiu ahitai.

27Ajeh chu Christa sunggil’a baptize changsa nang hon Christa chu nakivon’u ahi.

28Hiche a hin Juda mi le Greek mi kidatna, soh le chamlhat kikhena, pasal le numei kibahlouna aum tapoi, ajeh chu Christa sung gil’a nabonchauva pumkhat nahiu ahitai.

29Hitia chu Christa mi nahijeh-un, Abraham chilhah nahiuvin, thutep goulo jong chu nang hon chan ding ahitai.

Galatia Bung 4

1Goulo dingpa chu thil ijakai neipa ahivangin aneo laisen soh to imachom ahipoi kati ahi.

2Apan atep phat lhin kahsen akaihoi ho le in-ngah ho thu noiya bou aume.

3Hitobanga chu eiho jong ipilhin masanguva vannoi leiset lekhajembul noiya soh chang inahiuve.

4Ahinla phat alhinset phat’in Pathenin a-Chapa ahinsol lhan, Danthu dungjuiyin numei sunga ahungpengin,

5Danthu noiya umho lhatdoh a eiho chalam thu ihina diuvin ahung’e.

6Chate nahiu kichetna dinga Pathenin a-Chapa Lhagao chu i-lung sunguva ahinlha lut’a, “Abba hepa,” tia ikoujiu ahi.

7Hiti ahijeh chun soh nahitapon, chapa nahitan, chapa nahijeh chun Pathen jal’a gouloa pang ding jong nahitai.

Paul’in Galatia mite akhohsah

8Pathen nahet masnguvin aumdol monga Pathen hilou ho lhachan napangui;

9tun vang Pathen nahetauvin, lamkhat’a Pathen het jong nahituvin, i-atile sonlel um lhasam tah Danthu lekha jembul lam’a kihei kit’a, abul lama sohna toh nom kit nahiuvem?

10Nang hon nikho phabep le lha phabep chule kum kiheichin ho pou nanit jiuve.

11Nang ho dinga katoh gimna jouse moh nahisah diu kati ajai.

12Sopite, keitobang hiuvin, keijong nang ho tobanga um kahi; nang hon adih louvin neibol pouve.

13Katahsa dammo jeh a Kipana Thupha kahung seipeh masah lo’u nahetsau ahi;

14katahsa veiset chu nang ho dinga patepna ahijeng vangin thei le hot’in neibol pouvin, Pathen Vantil bang tah le Jesu Christa bang tah-in neisang jo’uve.

15Chubanga nakipa nau hoilamba hitam? Hithei le namit chang te ni geiya kaldoh a neipeh nom leu jengu kichentah a kahettoh jing ahi!

16Thutah kaseipeh jeh-uva nagal’u kahi ngap hitam?

17Miho chun thilpha dinga natom ngaipiu ahipoi, pamse dinga bou nadeiyu ahin, hiti ho dinga chu natompanpi bol’u ahibouve.

18Keiman ka-umpi pet maiya hilouvin thil ijakaiya thilpha ding jenga tompan ding aphai.

19Kachate, nasunguva Christa lim le mel akigondohsoh masangsea numei naoso nat thoh banga kathohgimpi kit nahiuve.

20Tugeiya na kom’uva um’a ka-oso chombeh a hou ding kadei lheh jeng ahi, ajeh chu nachung thu’u kalung agim’e.

Hagar le Sarah tekaha kihilna

21Vo Danthu noiya um nom ho na seipeh-un, Danthu najah khah louvu ham?

22“Abrahamin chapa ni aneiyin, khat sohnu sunga peng ahin, khat jalen nu sunga peng ahi,” tin akisun’e.

23Sohnu sunga peng vang chu tahsaphe pen ngaidol’a peng ahin, jalen nu sunga peng vang thutep guiya peng ahi.

24Hiche hi tekah a kihilna thei ahi; Numei te ni hi kitepna ni vetsahna ahin, khat nu hi Sinai molsanga hung kon ahin, hiche nu chate chu soh natong ding ahiuve, hiche nu chu Hagar ahi.

25Hagar hi Arabia gama Sinai molsang lim’a um ahin, tuali Jerusalem vetsah apang, achate to soh chang ahitauve.

26Jalen nu vang chu chunga Jerusalem lim’a um ahin, ama chu inu’u ahiye.

27Ijeh-inem itile “Vo ching-a cha neilou nu kipah-in, Naoso nat thoh khalou nu kipa othongin kho samin; Ijeh-inem itile jipa luppi sangin, Don lou dailouva kikoinu chate atamjoi,” tin akisun’e.

28Sopite, nang ho jong Isaac banga thutep chate nahiuve.

29Chulaiya tahsaphe dol’a pengpan Lhagao lama pengpa asumang got banga tua jong chuti ahi.

30Ahinla hichea hi Pathen lekhabun ipi aseiyem? “Sohnu chu achapato kaidoh than, ajeh chu sohnu chapan jalen nu chapa to gou lokhom theiponte,” ati.

31Sopite, hichea hin eiho sohnu chate ihi pouvin jalen nua joh ihibouvui.

Galatia Bung 5

Nacham lhat tuhchah jingun

1Jalenna inei theina diuva Christan eilhatdoh-u ahitai. Hijeh chun dingdet jingun, soh namkol jona chun kihen oh kit tahih-un.

2Ven, nahenguva thusei hi keima Paul kahi, nanghon chaptan thu najop’u le Christan imacha naphat chomsah lou diu ahi.

3Cheptan thu jop chengse kahettohsah nahiuve, hitobang mi chun Danthua kisei chengse atohdoh ding abat nalaiye.

4Danthu juiya themchan go ho chu Christaa kona kisat lhaa, lungsetnaa pul lha nahitauve.

5Keiho vang Lhagao chun tahsan jal’a them chang dia kinem’a ei ngasah-u ahi.

6Ijeh-inem itile Jesu Christa to hinkhomnaa hin chaptan le tan lou imachom ahipoi, ngailutnaa tong hat jing tahsan thupi ahi.

7Nalhai toh lheh meu! Thutah na-ngai nauva koiham nasu tanguvah?

8Hiche kijol lhahna hi nakoupauva kon ahipoi.

9Chol themchan changlhah lhon pumpi achansohji ahi.

10Pakaito hinkhomnaa imachan nasuhmo lou diuva nang ho hi kason lheh jeng nahiuvin, koi hijong le akhohpoi, nasumo pen penu chu athu kitantei ding ahi.

11Sopite, keiman chaptan thu kaseiphong lai hile ibol’a eikibolse se ding ham? Kaseiphong tahbah hile Thingpel thudol hi kipal lhuhna hilou ding ahi.

12Nang ho suling lao ho chu amaho kisumangsih seh leu kadei lheh-e.

13Sopite, nang ho jalen dia kikou nahiuvin, hiche jalenna hi tahsaphe lama jaothauna mai din mang hih-un, khat le khat ngailut’a kijento nan mang jo’uvin.

14Ijeh-inem itile Danthu jouse jong hi thugol khat, “Nangma naki-ngailut bangin naheng nakom ngailun,” kitia hi bukimsoh ahibouve.

15Amavang khat le khat kiketto sao sao le kibahgamto sao sao nahi khah-u jong le nakisuhmang hel louna diuvin ching theiyun.

Lhagao ga le thasa natoh phabep

16Kenvang, “Lhagaovin chon’un chutile tahsaphe lunggul chu namolso lou diu ahi,” kati ahi.

17Ajeh chu tahsaphe lunggul chu Lhagao lama to kidouva, Lhagao lama chu tahsa phea to kidou ahin, nang hon nabolnom nom nabol louna diuva hicheng chu kidouto ahiuve.

18Hichea hi nang ho Lhagaovin napuiyu le Danthu noiya um nahipouve,

19tahsaphe lam natoh chengse chu kichentah a: jonthanhoi, thenlou, huh,

20limsemthu doi hou, doichoi, kidou, kinah, thangthip, lunghan, kiloset, loitumsem, kilangkhen,

21sumsel, jukham, eltol hitobang ho hi ahi. Kahilchah masah banguva kahilchah nahiuve, hitobanga chon ho chun Pathen lenggam alo lou dingu ahi.

22Lhagao ga vang chu ngailut, kipa, cham, thothat, mi khoto, phat, kitahna,

23nunnem, kitimthem hiti ho hi ahi. Hitobang ho doudal ding Danthu aumpoi.

24Christa Jesu to hinkhom chengsen tahsaphe chu alunggul le angaichat chengse pum a thingpel’a akhetbeh-u ahitai.

25Eiho Lhagaova hing ihiule Lhagaovin chon’u hite.

26Ikiletsah louhel diu, khat le khat kiphin lunghang ahiloule khat le khat kithang settoa ium louhel diu ahi.

Galatia Bung 6

Khat le khat pohgih kipohhu

1Sopite, mi khattou suhkhel nei, athemmona kimandoh aum jongle Lhagao mi nang hon Lhagaova nunnema nasemphat diu dol ahi; kivephan.

2Khat le khat pohgih kipoh hun, chuti chun Christa Danthu nit chamkimsoh-un.

3Khattou ikhat khat’a kigel’a, atahbeh a la imacha hilou chu ama le ama jeng jong kijoulhep ahibouve.

4Min ama ama natoh cheh kikholtoh hen, anatoh chu aphatnah le midang titah louva ama le ama jeng jong kipah chaa kichoi an thei ahi.

5Ajeh chu mitinin ama ama pohgih cheh akipoh ding ahibouve.

6Thua kihil’a mi chun ahilpa chu thilpha chengse chankhompi hen.

7Nang ho kilhem chavai hih-un, Pathen chu nelpeh dan ahipoi; ajeh chu mihemin atu tu a-at ding ahi.

8Ijeh-ienm itile tahsa dol’a tupan tahsaphea kona kemmang theiga alo ding, Lhagao dol’a tupan jong Lhagaova tonsot hina aloding ahi.

9Thilpha bolna lama chimtih neipouhite, i-lhah dah louvu le aphatcha tohga ilo diu ahi.

10Hijeh chun hungun aphat gomkom inei dungjuiyun mitin chunga thilpha bol’u hitin, ahideh-in eima insung mi atahsan ho chunga habol deh-u hite.

Achaina gihsalna le temna

11Veuvin, keima kakhut tah-in nahenguva lekha jemkhou tah-in kahin sun’e.

12Tahsa vet-hoisah ding go chengsen chaptan sah ding nagot hamu chu imacha ding ahi pon, Christa thingpel jal’a thoh hesohna apeldohna diuva abol’u ahibouve.

13Cheptan mong hon jong Danthu anit pouve, chep natansah nom nau chu tahsaa hiche melchihna naneisah jeh-uva chu hoithonom ahiuve.

14Kenvang I-Pakaiyu Jesu Christa thingpel ti lou thildang ima song hih inge; ajeh chu hichea chu vannoi kei dinga, keima vannoi dinga kikhetbeh kahitai.

15Ajeh chu cheptan le tan louvin koima ima asochompoi, thilsem thah hiding bou chu khoh ahi

16Hiche Dan mang jouse, Pathen Israelte chunga chamna le hepina um hen.

17Tukal vang koiman eisulunggim ta hih hen, ajeh chu kati chunga hi Jesu melchihna polea kahitai.

18I-Pakaiyu Jesu Christa lungset chun na-lhagaovu umpi hen, sopite: Amen.

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>