Matthew sut Kipana Thupha

Matthew sut Kipana Thupha

Thupatna

Kitepna luiya Pathenin amite Huhhing ding khat peng dia ateppeh chu Jesu ahidol Kipana Thupha hi Matthew sut Kipana Thupha bua akiseiye. Judate lah a apen a alah-uva achen vangin, hiche Kipana Thupha hi amaho seh ding ahipon, vannoi pumpi ding ahi.

Matthew lekhabu hi akigol hoisel’e. Jesu pen thun akipanin, baptize achan leh Satan lhep patep thun akibanjomin, chujouvin Galilee gam a Thupha aseiphong, amihil chule veise te adamsah thuhon akijop’e. Abanin Galilee gama pat Jerusalem ajot le atha kon’uva thusoh cheng akiseiyin, thingpel a akhet beh-u le athodoh thun akichaiye.

Matthew sut Kipana Thupha bua hin Jesu hi Mihil pipen, Pathen Dantoh le doh theipa, Pathen Lenggam um dol hilchen theiyin akiseiye. Athuhil atamjo hi athupi dol’in akilakhomin, hopngan akikhen’e:

(1) Molchunga athuhil hin-mihem nun le khan, toh ding kin ho, chan ding lom chu le Pathen Lenggam mite lhunna ding aseiyin (5-7);

(2) Seijui so, le ni akisolnau thu dol’a hilchahna ho (Bung10);

(3) van a Lenggam thu tekahna ho (Bung13);

(4) Seijui hi dol hilchetna ho (Bung18); chule

(5) tulai leiset khang kichai ding le van a Lenggam hung lhun ding dol (Bung24-25)

Asung thu hopkhen

Jesu Christa pen le akhanggui 1:1-2:23

John Baptize natoh 3:1-12

Jesu baptize chan le patepna 3:13-4:11

Galilee a Jesun japi kin abol 4:12-18:35

Galilee a pat Jerusalem 21:1-27:66

Pakai thodoh le akilahna 28:1-20

Matthew sut Kipana Thupha Bung 1

Jesu Christa pendol

(Luke 3:23-38)

1 Abraham chilhah David guiya peng Jesu Christa khanggui thusim hitia kisun ahi.

2 Abrahamin Isaac ahingin, Isaac chun Jacob ahinge; Jacob hin Judah le asopi pasal dang ho ahinge.

3 Judah hin Tamara konin Perez le Zerah ahingin, Perez hin Hezron ahinge; Hezron chun Ram ahingin,

4 Ramin Aminadab ahinge; Aminadab chun Nahshon ahingin, Nahshonin Salmon ahinge;

5 Salmonnin Rahab’a konin Boaz ahingin, Boaz hin Ruth a kon in Obed ahinge; Obed hin Jesse ahingin,

6 Jessen David lengpa ahinge. David hin Uriah jinua kon in Solomon ahingin,

7 Solomonin Rehoboam ahinge; Rehoboamin Abijah ahingin, Abijah chun Asa ahinge;

8 Asan Jehoshaphat ahingin, Jehoshaphat’in Joram ahinge; Joramin Uzziah ahingin,

9 Uzziah chun Jotham ahinge; Jothamin Ahaz ahingin, Ahaz chun Hezekiah ahinge;

10 Hezekiah hin Manasseh ahingin, Manasseh chun Amon ahinge; Amonin Josiah ahingin, Babylon lama gal-hinga akai laiyun Josiah chun Jechoniah le asopi pasal dang ho ahinge.

12 Babylon lama gal-hinga akai nungun Jechoniah chun Shealtiel ahingin, Shealtiel chun Zerubbabel ahinge;

13 Zerubbabel hin Abiud ahingin, Abiud chun Eliakim ahinge; Eliakimin Azor ahingin,

14 Azor chun Zadok ahinge; Zadok hin Achim ahingin, Achimin Eliud ahinge;

15 Eliud chun Eleazar ahingin, Eleazarin Matthan ahinge; Matthanin Jacob ahingin,

16 Jacob chun Joseph ahinge; hiche Joseph hi Messiah kiti Jesu hingnu Mary jipa ahi.

17 Hiti hin Abraham a pat Davin gei khang som le khang li ahin, David a pat Babylon lama gal-hinga akai mang geiyu chu khang som le khang li ma ahi kite’e; chule Babylon lama gal-hinga akai manguva pat Messiah pen gei chu khang som le li ahi.

Jesu Christa pen

(Lk 2:1-7)

18 Jesu Christa pen um chan chu hiti ahi. Anu Mary chu Joseph to kicheng dinga kitepsa  ahin ahinla akigop masang lhonin Lhagao Thenga kona agai chu Mary hin akihet doh tai.

19 Ahin ajipa Joseph hi midih tah ahijeh-in Mary hi lhangphonga mipi seithanga umsah ding a nompon, guh thim cha akitepna lhon suh keh a kikhenpi din agoi.

20 Joseph-in hitobang lung agel laitah hin Pakaiya kon Vantil khat’in mangin akimusah-in, “David chilhah Joseph, Mary khu kipuiya jia nei ding tija hih hel’in; ijeh-inem itile Lhagao Thenga kona gai ahibouve.

21 Chapa khat ahinding, amin Jesu nasah ding ahi; ajeh chu amatah hin amite achonset’uva kona ahuhhing ding ahi,” tin aseipeh-e.

22 Thil hicheng hi Pakaiyin Themgao kama aseisa gui lhun theina dinga soh ahin, asei chun,

23 “Ven, nu-ngah chu gaiyin tin chapa khat ahin ding, amin ‘Emmanuel’ kiti ding ahi, Amin hi, ‘Pathenin eiumpiuve,’tina ahi,” ati.

24 Joseph a-imut khah phat’in Pakaiya kon Vantil’in ahil bang bangin abol’in, Mary chu ji dingin akipuitai;

25 ahin Maryn chapa ahin masangsen nupaa kitimatpina vang aneipi khah hih hel’e. Naosen ahung pen phat’in amin chu Jesu asah tai.

1.11: 2K 24:14-15; 2 Ch36:10; Jr. 27:20; 1.18 Lk 1:27; 1.21 Lk1:31; 1.23 Is 7:14; 1.25 Lk 2:21

Matthew sut Kipana Thupha Bung 2

Niso lama naosen Jesu vea hung ho

1 Judah gama Herod lengpa lal laiyin Bethlehem khopia Jesu ahung pengin, niso lama ahsi umdol hethem mihoJerusalem khopia ahungun,

2 “Judate chunga leng chang dia hung peng naosen chu hoiya um tam? Ama pen jeh a niso lama ahsi hung kilah kamu-va naosen chu chibai boh dinga hung kahiuve, “ tin aseiyui.

3 Athudoh-u ajah phat’un Herod lengpa ti Jerusalem mite ti along jing lheh tauve.

4 Hejeh chun Herod’in Thempu pipu ho leh mipi lah a Danthu lekha them ho akoukhom loiyin, “Messiah chu hoiya hung peng ding ham?” tin adonge.

5 Amahon, “Judea gamsung Bethlehem khopia peng ding ahi; ajeh chu Themgaopan hitin asun’e”

6 ‘Vo Judea gama Bethlehem! Judah vaipote lah a itina ma jongleh aneopen nahipoi; Nanga kona kamite Israel lamkai ding khat Hung peng doh dong ahi,’ ati.” Atiuve.

7 Chuphat’in Herod chun ahsi umdol hethem miho chu atimin akimupinm itih phat tah a ahsi hung kilah chu aphochentai.

8 Chujouvin amaho chu Bethlehem lama asol’in, “Cheuvin lang naosen che phat chan gahol doh-un, keijong ka chea chibai kagabohna dinginm namudoh tenguleh neihung seipeh tauvin,” tin athu lhah-e.

9 Lengpa thsei ajah pha’un akipatdoh paiyun, ahin mupeh sau niso lama ahsi chu amasanguva achepeh-in, naosen umna chung aphah phat’in aki-ngai.

10 Ahsi amudoh kit phat’un akipah behseh jenguve!

11 Chuin insunga agalut’u leh naosen chu anu Mary toh agamu thauvinm boh khip cheh-in chiabi aboh tauve. Chujongle agoubomu hongin thil manlu cheh-sana, bego chule myrrh atoh-un, thilpeh hicheng hi apetauve.

12 Herod henglam ahopa kit louhelna diuva Pathenin amanguva ahilchah phat’ in lamchom khat ajuiyun agam languva akile kit tauve.

Egypt’a Jesu ajampiu

13 Ahsi umdol hethem miho che nungin, Pakaiya kon Vantil khat Joseph manga akilah-in, “Thouvin, naosen le anu puiyin lang Egypt langa jampinm kahinkou masangsen ta-umpi tan; ajeh chu herod’in naosen hi suhmang din angaiton ahol’e,” ati.

14 Joseph jong athouvin naosen le anu apuiyin janlaiyin Egypt langa ajampin,

15 Herod thi kahsen aga-umpitai. Hitobang thil hi Pakaiyin themgao kama aseisa, “Egypt’a konin kachapa kakoudoh tai,” ati chu guilhunna dinga soh ahi.

Herod’in naosente athagam

16 Ahsi umdol hethem mihon alhim lhah ahetdoh phat’inHerod along hang behseh jeenginm mi asol’in ahsi umdol hethem  mihoa kona naosen pen ahetdoh phat chutoh kitoh chet’in asimin, Bethlehem  khopi le khovel dunga naosen pasal kum nia lhah noi lames se athagam sah tai.

17 Hechea hin Jeremiah Themgao kama kiseia-

18 “Ramah koa lhaset lunghem Ka le mao ogin nasatah akijan, Rachel in achate aka ka jengin, Athigam tah jeh-un lhepbi jou ahita poi,” kiti chu agui lhung tai.

Egypt gama kona Jesu ahinle puiyu

19 Herod thi nungin Pakaiya kon Vantil khat’in, Egypt gama aumna a Joseph chu amangin kimusah-in,

20 “Thouvin, naosen le anu puiyin lang Israel gam jontan, naosen tha dinga hol ho athigam tauve,” ati.

21 Joseph athoupaiyin, naosen le anu apuiyin Israel gamsung jonin ahung kile kit tai.

22 Ahin Judea gama apa Herod  khel’a Archelaus leng chan ajah doh phat’in Judea gama chenden ding Joseph akichanm amang ma akihil chah jeh chun Galilee gamsung joh ajonin,

23 Nazareth khopia achengtai. Hiche hi Themgao hon, “Nazareth mi kiti ding ahi,” atiu gui lhunna dia chuti ahi.

2.6: Mic 5:2;

2.15: Ho11:1;

2.18: Jr 31:15;

2.23: Mk 1:24; Lk 2.39: Jn 1:45.

Matthe sut Kipana Thupha Bung 3

John Baptist thuhil lhangsap

(Mk 1:1-8; Lk 3:1-18; Jn 1:19-28)

1 Hiche lai hin John Baptist thu ahil lhang len,

2 “Nachonset lung khel’unm ajeh chu van a lenggam chun hikom ahinpha tai!” tin asam’e.

3 John hi Isaiah Themgaovin anaseisa; “Gamthip laiya khosam ogin khat’in, “Pakai lampi semtoh-un lang, Alamlen semjangsan koiyinm tin aseiye,” ati chu ahitai.

4 John pon-ah chu sa-ngongsao mul ahin, akonggah savunm a-anneh khaokhote le gam khoiju ahi.

5 Jerusalem khomite leh Judea gam pumpia mi, chule Jordan gamkol sung pimpia konin miho John henga acheuvin,

6 achonset nau aphong cheh-un, Jordan vadunga john khut’in baptize achangtauve.

7 Pharisee ho leh Saducee ho tamtah ama khut’a baptize chang dia hung amu phat;in Johnin ajahuva, “Vo gulse son ho, kho nunga hung lhung ding Pathen lungsatnaa kona jamdoh dia thu namop’u koi peh ham?

8 Nalung khel’u natohgan phongdoh-un;

9 ‘Abraham son kihina chu,’ tin nalah-uva kiholim nan neidauvin; kaseipeh nahiuve, Pathenin hiche song ho geiya Abraham chilhah a asemthei ahi.

10 Thingphung bul tin’a heicha aki phutsoh tai, aga pholou chengse kiphuh lhua meilhum sunga kileh lut ding ahi.

11 Nalung khel’u phot chetna twiya baptize kachansah nahiuvinm kei bana hungpa vang khu keisanga gamchenga chungnung jo ahinm kei hi akengchot te I sut dinga kilom jong kahipoi; ama chun Lhagao Teng le meikonga baptize nachasah diu ahi.

12 Akhut a chang japna achoiyin, phola chang jap ngimsel;in tin, chuteng achangtah ho changsal’a akhum tip ding, asi chengse vang mit thie lou meilhim sunga agovam ding ahitae,” ati.

Jesu Baptize chan thu

(Mk 1:9-11; Lk 3:21-22)

13 Hichepet hin Glilee gama konin Jesun Jordan lui ahin jonin, John khut’a bapize chang din ahung tai.

14 Ahivangin John anathu phan, ‘Keijoh nang khut’a baptize kachan dingsih a kei henga nahung tan’e!” anati.

15 Jesun adonbut paiyin, “tun hit hin molso pou pouvinm ajeh chu hitobanga hi Pathen dei chan ibol bulhingsoh ding ahi,” ati, Hichen John jong anomtai.

16 baptize achan jouva Jesu twiya kona apotdoh chunm ama din van akihongin Pathen Lhagao vakhu bang a hung kumlha achunga chu amui.

17 Chuin van a konin o-khat ahung ginginm “Ama hi kachapa deitah ahinm achugna kalung alhai ta ngeiye,” ati.

3.4: 2K 1:8

3.7: Mt 12:34, 23:33;

3.9: Jn 8:33;

3.10: Mt 7:19;

3.17: Gn 22:2: Ps 2:7; Is 42:1: Mt 12:18:17:5; Mk 1:11;Lk 9:35.

Matthew sut Kipana Thupha Bung 4

Satanin Jesu alhep patep

(Mk. 1:12-13; Lk 4:1-13)

1 Hiche jou hin Diabol lhep patep dingin Jesu chu Lhagaovin gamthip’ah apui toutai.

2 Nisom li le jan som li geiya an ngol’a aum jouvin Jesu agilkeltai.

3 Hichun alhempatep chu ahungin ajah a, “Pathen chapa nahileh hiche song ho hi changlhah so na dingin seipeh-in,” ati.

4 Jesun adonbut’in “Pathen lekhabua kisun chun Mihem hi changlhah keova hing theilou ding, Pathen kamsoh thuhoa bou hing dinga kisei ahi,” ati.

5 Hichun Diabol’in Jesu khopi thenga apui yin, Houin tingvum asang laiya adinsahin,

6 “Pathen chapa nahileh keleh lha jengin, ‘songa nakisuh khah louna dingin Pathenin a-Vantilte thu pentin akhut’uvin nadom nauvinte,’ tin Pathen lekhabua akisun nai,” ati.

7 Jesun aseipeh paiyin, “Hitin jong, ‘Pakai na-Pathen patep a na -lhep chatvai louhel ding ahi,’ tin akisun’e,” ati.

8 Chujouvin diabol chunmolsang tah khat chunga Jesu apui touvin vannoi leiset lenggam jouse le aloupina chengseu avetsah soh keiyin

9 ajah a, “Kahenga naboh khup’a chibai neiboh le hichengpi hi peng kate.” ati.

10 chutah chun Jesun ajah a, “Chedohin Satan! ‘Pakai na-Pathen chu chibai naboh a, ama jeng bou nahou ding ahi,’ tin Pathen lekhabua akisun bouve!” atitai.

11 Chuphat’in Diabol chun adalhatai. Hichun Vantilte ahungun Jesun angaichatna jouse ahung jenle tauve.

Galilee gama Jesun na atoh pat

(Mk 1:14-15; Lk 4:14-15)

12 John songkul a akhum’u ajah phat’in Jesu jong Galilee gam langa akikhindoh tai.

13 Amavang Nazareth kho dalhan achen, Zebulun le Naphtali gamsung, Galilee dillen pang, Capernaum khoa apansai.

14 Hitia aum hi Isaih Themgao kama kiseisa;

15 “Zebulun gam le Naphtali gam, Jordan gal’a Twikhanglen lampi; Namtin vaipi chenna Galilee,

16 Muthim lah a chengten Khovah vah tah amutauvin; Thina muthim gama chengte chunga Kho ahung vah tai,” kiti chu gui lhunna dinga chuti ahi.

17 Hichelaiya pat chun Jesun thu ahil lhanglen, “Van a Lenggam chun ahinphatai, nachonset lung khel’uvin,” ati.

Jesun nga man pasal li akou

(Mk 1:16-20; Lk 5:1-11)

18 Galilee dillen panga Jesu ava le le pet’in nga man mi ni Peter kitipa Simon le anaopa Andrew Twikhanglen a lensep pet amui.

19 Chuin ajah lhona, “Neijui lhonin mihem matje hil lhon inge,” atileh;

20 alen lhon dalhan Jesu ajui pai lhontai.

21 Ache kit  leh ucha chom dang ni, Jacob le anaopa John kiti Zebedee to len anakhui phat pet’u amun, amani jong akouve.

22 Jacob le Johnin kong le apa Zebedee dalhan nung ajui lhontai.

Jesun jai kin abolpeh

(Lk 6:17-19)

23 Galilee gam pumpia Jesu ache le len japi houkhomna in tin ah thu ahil len, Lenggam Kipana Thupha aseiphong len, mipilah a nat jat chom choma na ho aboldamin ahi.

24 Chutah chun Syria gam pumpia achung chang thu athangsoh tan, nat jat chom choma naa, natthoh lel, thilhavop, buh thi chule langthi ho jouse Jesu henga ahinpuiyun aman aboldamsoh keitai.

25 Chutjongle Galilee, Decapolis, Jerusalem, Judea gam le Jordan gal langa konin mipi tamtah-in Jesu nung ajuitauve.

4.1: Heb 2:18;4:15.

4.4: Dt 8:3.

4.6: Ps 91:11-12.

4.7: Dt 6:16.

4.10: Dt 6:13.

4.12: Mt 14:3; Mk 6:17; Lk 3:19-20.

4.13: Jn 2:12.

4.15-16: Is 9:1-2.

Metthew sut Kipana Thupha Bung 5

 

Molvuma Jesu thuhil

1 Mipi amu phat’in Jesu molvuma akaltouvin atou leh aseijuite ahenga ahung kikhomtauve.

2 Hichun Jesu apaodoh-in mipi thu ahil’in hitin aseiye:

Nopna tahbeh

(Lk 6:20-23)

3 “Lhagaova chimthih neilou ho anun nom’ui, Van a Lenggam chu amahoa ahi!

4 Lung lengvai ho anun nom’ui, Pathenin alhamon diu ahi!

5 Milung neng ho anun nom’ui, Amahon leiset alo diu ahi!

6 Pathen dei holna gilkel dangchah thoh ho anun nom’ui, Pathen deiya lung nachim diu ahi.

7 Mi hebol ho anun nom’ui, Pathenin amaho ahebol ding ahi.

8 Milung theng ho anun nom’ui, Amahon Pathen amu diu ahi.

9 Mi sucham ho anun nom’ui, Pathen chate kiti diu ahi.

10 Pathen dei boljeh a bolset thoh ho anun nom’ui, Van a Lenggam amahoa ahi.

11 “Keima jal’a min nabolset, nahouset’uva chule nang ho douna jouthu le thu gilou ijakai naseikhum tengu leh anun nom nahiuve.

12 Hitobang tah a hi nang ho sanga masajo Themgao ho jong anabol setsau ahitai! Kipah-un tha nom’un, van a nasan diu kipaman tampi akikoiye.

 

Chi le meivah

(Mk 9:50; Lk 14:34-35)

13 “Nang ho leiset chi nahiuve. Chi khu tamtah le ipia ki-alsah kit ding ham? A-al lou teng panna bei ahitan, akipai mang jin, min keng chotphan aneijitai.

14″Nang ho vannoi salvah nahiuve. Molchunga khopi kisem chu akisel theipoi.

15 Koiman thaomei avah-in lo akhu khum ngaipoi, thaomei khom chunga atungin insunga um jouse asalvahsoh keijie.

16 Hitobang chun navah-u miho masanga kilang hen, chutileh min natoh phat nau muntin, van a um na-pau avahchoi diu ahi.

Jesun Danthu umdol ahilna

17 “Kei hi Mose Danthu l eThemgao ho thuhil sumang dia hungin neigel hih hel’un, asumang ding hilouva amolso ding joh a hung kahibouve.

18 Dih tah a kaseipeh nahiuve, van l eleiset man kahse le thil jouse bei kah sea Danthu kisun lekhajem neopen le ahalsi khat jeng jong mang lou ding ahibouve.

19 Hijeh a chu hiche thupeh lah a aneopen khat susea, midang jong chu tibol dinga hilchan chu van a Lenggama aneopen a pang ding, chu tobangma a anit them le midangin anit themna dinga hilchan chu van a Lenggama alen a kisei ding ahi.

20 Chuti ahijeh a kaseipeh nahiuve, Danthu them ho le Phrisee ho sanga nathem chan nau achung nun joh loule van  aLenggamma nalut louhel diu ahi.

Lunghan thudol’a Jesu thuhil

(Lk 12:57-59)

21 ” ‘Tol natah lou diu ahi, koi hijongle tol that chu achung thu kitan ding kicha jing ding ahi,’ tia malai mite jah a kiseisa chu najtauve.

22 Kenvang kaseipeh nahiuve, koi hijongle asopi chunga lung hang chan chu achung thu kitan ding kicha jing ding ahi; chu jongle koi ahi asopi jah a, ‘Pananbei’ tia house jouse chu hou vaipoloi kikhopnaa athu kitan ding kipha lam jinga, chule asopi jah a, ‘Panabei mi-ngol’ tia house chan jong damun neidil’a lut ding kicha geova um ding ahi.

23 Hijeh chun maicham phunga thiltoh din hung t ajongle chun, chua chu nasopi nachunga lung himona nageldoh leh,

24 maicham maiya nathilto ding dalhan, nasopi chutoh gakicham masan, chujou teng hung kit’in lang thil chu Pathen koma toh-in.

25 “Naheh pan thutanpu heng nalhut masangin lampia kichampin, achuti loule thutanpa koma nakai lut’in tin, thutan pan songkul ngah pa pehdoh-in natin, aman songkul’a nakhum lo ding ahi.

26 Tahbeh a kaseipeh nahi, paisa nongnai geiya napeh theng hel masangin songkul’a koin potdoh thei pon nate.

Numei le pasal kijonbol thua Jesu thuhil

27 “‘Mito najon lou ding ahi,’ tia kisei chu najatauve.

28 Ken vang kichentah a kaseipeh nahiuve, koi hijongle numei jon lung gul’a vea chun alungthima ajonpi ahitai.

29 Hijeh chun namit jelamin nachon setah l ekaldoh-in lan gpai mang jengin; tahsa pumpia damun a nakile lut sangin, natibah khat lhin lel ding aphajoi.

30 Nakhut jetlamin nachonset sah jong le sat lhan pai mang jengin, tahsa pumpia damun a nakile lut sangin natibah khat lhin lel ding aphakoi.

Kida thudol’a Jesu thuhil

(Mt 19:9; Mk 10:11-12; Lk 16:18)

31 ” ‘Koi hileh ajinu daa chun jida na lekha pehen,’ kitisa ahi.

32 Kenvang kaseipeh nahiuve, mito ajonjeh tilouva jida chan chun ajinu ajonso ahin, dasa numei kichenpi jong chu mito jong-ah ahi.

Kihahsel thudol’a Jesu thuhil

33 “Chukit leh, ‘Nakitepna sukeh hih-in, nakitepna jat chu Pakai koma molson,’ tia malai mite kiseipeh chu najatauve.

34 Kenvang nahihahsel louhel diuva kaseipeh nahiuve; van panin kihahsel dauvin, Pathen laltouna mun ahi,

35 Leiset panin jong kihahsel hih-un Pathen kengto ngapna ahi, Jerusalem panin kihahsel dauvin, Leng loupi khopi ahi,

36 naluchang jong panin kihahsel dauvin, nasamjang khat jeng jong nakansah navomsah theipouve.

37 Naseiyu chu ahile hijeng hen, ahida l ehida jeng hen; hiche kalval vang hcu Agiloupaa kon ahibouve.

Phulah thudol’a Jesu thuhil

(Lk 6:29-30)

38 ” ‘Mit khel’a mit, ha khel’a ha,’ tia kiseisa chu najatauve.

39 Kenvang kaseipeh nahiuve, Agiloupa chu lethuh hih-un, chusangin nangeiphe jet lem benga chu naveilam jong dopeh-in.

40 Hehset’a nasongkhol sung nung lah peh ding gopa chu nasangkhol ponungalenpa geiyin peh than.

41 Koi hile nada nacham louva mile khat napuigoa chu mile ni geiyin kilhonpin.

42 Nahenga thil thuma chu pen, bat ding deiya jong peh louvin koidan.

Melmate ngaitlut ding

(Lk 6:27-28, 32-36)

43 ” ‘Naheng nakom ngailut’a melma vang nahot ding ahi,’ tia kiseisa chu najatauve.

44 Kenvang kaseipeh nahiuve, Namelmateu ngailu’vin, nabolse jouseu taopehun;

45 chutilh van a um na-Pau chate nahi theidiu ahi. Ajeh chu Aman migilou le mipha chunga kibangin nisa asat sah gel’in, midih le midih lou chunga go ajuhsah gel’e.

46 Ahimonga jong na-ngailute bou na-ngailut’u leh ipi kipaman namu diu ham? Kaidong chonse hon jong chutia abol’u hi louham?

47 Chule nasopi bou nasalam’u leh midang sanga nachungnun nau ipi um am? Pathen heloute jengin jong chutia abol’u hilouham?

48 Hichejeh chun vana um na-Pau chamkimsoh banga naphat chamkimsoh diu ahi.

5.16: 1P 2:12. 5.18: Lk 16:17. 5.21: Ex 20:13; Dt 5:17.

5.27: Ex 20:14; Dt 5:18. 5.29: Mt 18:9. Mk 9:47.

5.30: Mt 18:8; Mk 9:43. 5.31: Dt 24:1-4; Mt 19:7; Mk 10:4,

5.32: Mt 19:9; Mk 10:11-12; Lk 16:18; 1Co 7:10-11.

5.33: Lv 19:12; Nu 30:2; Dt 23:21.5.34: Jas 5:12; Is 66:1; Mt 23:22

5.35: Is 66:1; Ps 48:2.

5.38: Ex 21:24; Lv 24:20; Dt 19:21. 5.43: Lv 19:18.

5.48: Lv 19:2 Dt 18:13.

Matthew sut Kipana Thupha Bung 6

Pathen thilto thua Jesu thuhil

1 “Houva nakitah nau miho mu ding deina nabol louna diuvin ching theiyun. Chutia nabol vangu leh van a um na-Pava kona kipaman nanei lou diu ahi.

2 “Mi thil napeh teng, mipha lhem hon pachat deinaa Hou thua kikhopna in tin le lam lhong tin’a abol bangun, namasang sanga sumkon kimut bahsah hih hel’in. Dihtah a kaseipeh nahiuve, amahon kipaman akisanu ahitai.

3 Mi thil napeh tengleh, nathilpeh chu guh thim ahi theina din nakhut jetlama napeh chu veilam jeng jong hetsah dan.

4 Chutileh guh thima vejing na-Pan kipaman napeh tei ding ahi.

Taona thudol’a Jesu thuhil

(Lk 11:2-4)

5 “Natao tengu leh mipha lhem ho toh bang hih-un, amahon mi mu ding deinan Hou thua kikhopna in tin a dindoh a tao le kholai lamkon dunga din a tao ding bou adeiyui. Dih tah a kaseipeh nahiuve, amahon kipaman akisanu ahitai.

6 Nang vang natao teng, na-indan sunga lut’in, kotpi kikam khumin, mit’a mu thei lou na-Pa hengah guh thimin taojon; chutileh guh thima vejing na-Pan kipaman pejon nate.

7 “Natao tengu le chidang namdang ho bangin tampi kisei chu ajah chom ding ngaiton thu hom keo tamtah seidauvin.

8 Amaho umchan tho hih-un; ajeh chu nathum masanguva jong na-pauvin na-ngai chat jouseu ahetsa ahitai.

9 Hijeh chun hiti hin taovun: ‘Van’a um ka-Pau, namintheng kijabol jing hen,

10 Nalenggam hung lhung hen, Van’a bangin leiset’a nalungdei kim soh hen;

11 Tunia kaneh khop diu an neh neipeuvin,

12 Eibolseteu ka-ngaidam bangun, Kasuh khelnau ngaidamin;

13 Chonset lona thei patepna neilhut dauvin, Agiloupaa konin neihuhdoh jo’uvin,’ tin.

14 “Ajeh chu mi suhkhel na-ngaidamu leh van a um naPauvin jong nasuh khel nau ngaidamin te.

15 Mi suh khel na-ngaidam lou vanguleh, na-pauvin jong nasuh khel’u ngaidam ponte.

 

An ngol thudol’a Jesu thuhil

16 “An na-ngol tengu mipha lhem ho bangin ki-nguisah dauvin. Mipha lhem hon vang an angol’uvin, mi het ding deinan amaisou achom sah jiuve. Tahbeh a kaseipeh nahiuve, amahon kipaman akisanu ahitai.

17 Nangin vang an na-ngol teng nalu thao kinujol’in, namai kiphet ngimjon;

18 na-anngol chu miho hetsah louvin, guh thima um, na-Pa hetsah in; chutileh guh thima vejing na-Pan kipaman pejon nate.

Van gama goukhol

(Lk 12:33-34)

19 “Nget le thih-eh suhmang theina, guchan aphet vanga aguh mang theina leiset chunga gou khol hih-in;

20 chusangin nget le thih-eh suhmang thei louna, guchan jong aphet vanga aguh mang thei louna van a gou khol jo’uvin.

21 Ijeh-inem itile nagou umnaa chu nalung cheng jing ding ahi.

Mihem tahsa meivah

(Lk 11:34-36)

22 “Mit hi tahsan meivah ahin, namit chim leh natahsa pumpi vahsoh ding ahi.

23 Namit aphat lou vang leh natahsa pumpi thim jeng ding ahi. Hijeh chun nasunga vah thim taleh iti khoh ding hitam!

 

Pathen chule nei le gou

(Lk 16:12-31)

24 “Soh koiman Pakai ni kin abolkop joupoi, kop taleh khat hotbol’in tin, khat joh alungset ding, ahiloule khat’a hakaiya khat joh anahsahmo lo ding ahi. Hijeh chun Pathen kinbol le sum hol kop thei pouvin nate.

25 “Hichejeh a chu kaseipeh nahiuve, hinkhoa neh le chah chunga lungkham bol dauvin, tahsa sille chen dingin jong lungkham hih-un; anneh twidon sanga hinkho thupi joa, nihchen ponsil sanga tah sa khoh jo hilou ham?

26 Vanlai jol’a akhol sampouvin, hijongle changsal’a akhol sampouvin, hijongle van a um na-Pauvin avah nauve. Vachate sanga khu nang ho manlu jo nahi louvu ham?

27 Nalah-uva lungkham hat’a ahinkho tong khat jopbe thei koi nahiuvam?

28 I-bol’a nihchen ponsil jal’a lungkham nahiuvam? Gamlah apahcha ho khu iti khandoh ham gel phauvin, na la atong pouvin, sil ding patse bol’a ponkhong jong ahipouve;

29 ahinla kaseipeh nahiuve, Solomon jeng jong ahao dungjui tah akijep vangin hiche pahcha ho khat hoi bangin ahoi joupoi.

30 Gamlah hampa tunia kimu, jing teng gop’a meilhum sunga kileh lut ta ding bon Pathenin achuti jep hoi leh, Aman hiche ho sanga najep hoijoh lou diu ham? Vo tahsan lhomho!

31 Hijeh chun, ‘Ipi kanehuva ipi kadon diu, ipi kasil’uva akchen diu ham?’ tin lungkham dauvin.

32 Hicheng hi Pathen hepha louten ahol’un, Nang hon na-ngai chat’u jong van a um na-Pauvin ahesoh keiye.

33 Hijongle amasan Pathen dei le alenggam hol masauvin, chuteng adang ho chengse hi nakipehbe dingu ahinai.

34 Jing dingin lungkham hih-un, jing chun anikhoa ding hinkigel nan e. Nikho khat cheh-in agimpi khop cheh anei nai.

6.5: Lk 18:10-14;

6.14-15: Mk 11:25-26;

6.19: Jas 5:2-3;

6.29: 1K 10:4-7; 2ch 9:36.

Matthew sut Kipana Thupha Bung 7

Midang oimoa athu khol

(Lk 6:37-38, 41-42)

1 “Oimo nachan louna diuvin midang oimo dauvin;

2mithu nakhol bang banga nathu kikhol cheh ding ahin, midang nabol nau dan dungjuiya kibol ding nahiuve.

3 Ipi dinga nasopi mit’a bohsi chu namelchih keova, nang mit’a thing long tejen chu mulouva um nahin?

4 Iti jong nasopi jah a, ‘Namit’a bohsi chu neilahdoh sah-in,’ tia nasei ngam a, nang mit’a thing long tejen chu don louva um nahim?

5 Vo mipha lhem, namit’a thinglong tejen chu kilahdoh masah l echun nasopi mit’a bohsi chu muchenin natin, ladoh thei tan nate.

6 Thil theng chu uichate peh dauvin, hung kiheiya nape lou diu ahi; vohchate masanga jong natwikoh chang sep lha hih-un, akengtoa achil thang bep diu ahi.

Thumin, hol’in, kiuvin

(Lk 11:9-13; 6:31)

7 “Thum’un kipauvin nate, hol’un namudiu ahi; kiuvun nakihonpeh diu ahi.

8 Ijeh-inem itile athum chan kipe ding, ahol’an amuding akiuva kihonpeh ding ahi.

9 Nalah-uva achapan neh ding changlhah athum l esong pea,

10 nga athum leh gul peding koiham?

11 Migiloutah nang hon bon nachateu thilpha pehje nahet’uleh, van a um na-Pauvin ahenga thumte chu itobang tah a thilpha apeh ding hitam!

12 Hijeh chun min iti nabol le nadeiyum, nang hon jong hitobnagma chun bolpeh-uvin, hitia bolding hi Danthule themgaote thuhil to kitoh ahi.

 

Kotjim

(Lk 13:24)

13 “Kot jim a lut’un, ajeh chu manna lam chu akot lentah ahin, alampi alenin, mitamtah hichea chun alut’ui.

14 Hinna lam chu akot jong akichin, alampi ahah-in, hijeh chun alut’a mi lhomcha ahiuve.

Thingphung agan akihei

(Lk 6:43-44)

15 “Kelngoi phat’a kiphatsah, asung lam ngeihang tah tobang Themgao lhem nahenguva hungji ho koma kichih theiyun.

16 Itobang ahiu atohgauva nahet diu ahi.Ling phunga lengpi theiga kilouva, meithai seltho linga theichang ga ikilou ngaiyam?

17 Hitobang hin thing phung phalou ga aphapoi.

18 Thingphung phaa ga pha lou ga ngai lou, thing phung phalouva jong ga pha ga ngai lou ahi.

19 Aga phalou thingphung jouse chu akiphuh lhun meilhum sunga akileh lutjitai.

20 Hijeh a chu mi atohgauva nahetdoh diu ahi.

Ken kahekhapouve

(Lk 6:46; 13:25-27)

21 “Pakai, Pakai eiti chan chu van a lenggam lut lou ding, van a um ka-Pa deilam bol’a bou lut ding ahi.

22 Hiche Nikho chuleh mi tamtah hunguva, ‘Pakai, Pakai, keiho namin a gaothu seisa, thilha nodohsa chule thil kidang bolsa kahilouuvu ham? ati diu ahi.

23 Chuteng ajah-uva phong tah a, ‘Vo Dan dih lou bolte, kakoma konin potdoh louyun, nang ho kahe kha hih hel’ui,’ kati ding ahi.

Bul kiphu gotni

(Lk 6:47-49)

24″ Chuti ahijeh chun kathusei hiche hi ja a bol’a chu mi lungthim pha, song chunga in kisah to kitekah ding ahi.

25 Gon ajuh khuma, vadung in aso den a, huipin ahin mut vangin, hiche in chu aluden poi; ajeh chu a-inbul khom songpi chunga kiphut det chet ahi.

26 Kathusei hicheng hi ja abol lou vang chu milungthimbei, nellei chunga in kisah toh kitekah ding ahi.

27 Gon ajuh khuma, vadungin aso den a, huipin amut tengleh in chu alhujitan, alhuh chu melse tah ahi,” ati.

Jesu thanei dol

(Mk 1:22)

28 Jesun chujat asei chai chaiyin mipin athuhil chu kidang asa lheh jenguvin ahi.

29 Ijeh-inem itile aman Danthu themho hil banga hil louva thunei tah banga ahil jeng thei ahi.

7.2: Mk 4:24;

7.12: Lk 6:31.

7.19: Mt 3:10; Lk 3:9.

7.20: Mt 12:33;

7.23: Ps 6:8.

7.28-29: Mk 1:22; Lk 4:32.

Matthew sut Kipana Thupha Bung 8

 

Jesun miphah khat asuh theng

(Mk 1:40-45; Lk 5:12-16)

1 Jesu molvuma ahung kumsuh chun mihonpin ahin juiyui.

2 Hichun miphah khat ahungin akoma bohkhup’in, “Pakai, nalung ahileh neidam theng sah thei ahi,” ati.

3 Jesun athamin, “Kalung ahinai damthengtan,” ati leh, apettah chun aphahnat adamthengtai.

4 Chuphat’in Jesun ajah a, “Koimacha henga seidoh hih hel’in, amavang chen lang Thempu gakivetsah-in, nadamtheng hi phot chetna din Mose thu peh dungjuiyin nathilto ding lom gatoh tan,” tin ahil’e.

Jesun sepai jalamkaipa lhachapa adamsah

(Lk 7:1-10)

5 Jesu Capernaum khoa alut chun sepai jalamkai khat ahenga ahungtaovin,

6 “Pakai, in a um kalhacha chapang khat langthin agen thei lheh jenge,” ati.

7 Jesun, ajah a, “Hung damsah nang e,” atileh;

8 jalamkaipan adonbut’in, “Pakai, nang hi kei in sunga lut dinga kilom nahipoi, thu mai mai sei jong le chun kalhacha chapang chu dam jeng thei ahinai.

9 Ajeh chu kei jong thunei ho noiya um kahin, kei noiya jong sepaite aum’uvin, khat pen pen jah a, ‘Chen,’ katile achen; achom dang khat jah a, ‘Hungin,’ katil eahunge; chule kalhacha jah a, ‘Hiche hi bol’in,’ katileh, abolji nai,” ati.

10 Athujah hi Jesun kidang asa behseh jengin, anunga hung ho jah a, “Dih tah a  kaseipeh nahiuve, Israelte lah jenga jong hitobnag tahsan len kamudoh hih laiye.

11 Hi jeh a chu kaseipeh nahiuve, niso lam le nilhum lama kon a mitamtah hung kikhom’uva van a Lenggam a Abraham le Isaac chule Jacob toh ankong aumkhom diu ahi.

12 Ahin lenggam chate dia kigel ho joh chu polam muthim lah a kileh lut diu, hikoma chu ka le hagel um ding ahi,” ati.

13 Chuin Jesun jalamkaipa jah a, “Chetan, natahsan banga lhung ding ahinai,” atipeh-e.

Jesun Peter nupanu adamsah

(Mk 1:29-31; Lk 4:38-41)

14 Jesu Peter insunga alut leh, Peter nupanu nat lhut’a na a lum agatoh khai.

15 Jesun akhut agah tham leh anat lhut chun alhan, amanu ahung thoudoh paiyin ajen len apangtai.

16 Nilhah lamin thillhavop mi tampi Jesu henga ahin puiyun, Aman thu cheng khatseh seiyin thilhaho anodoh-in, damloute adamsah soh keitai.

17 Hitobang kiseisa, “Aman inatna jouseu le iveiset chengseu akilah-in apomangtai'” kiti chu guilhunna dinga chutiso ahi.

Jesu seijui lom

(Lk 9:57-62)

18 Akimvel’a mipi kikhom amudoh phat’in Jesun dil gal lang khat’a galkai ding asomtai.

19 Hichun Danthu lekha them khat ahungin ajah a, “Houhil, nache che naa juiyinge,” ati.

20 Jesun ajah a, “Gam-uiten ko aneiyun, chunga leng vachaten bu aneiyui; mihem Chapan mun aneipoi,” ati.

21 Seijuiho lah a khat’in, “Pakai amasan kapa vui din neisol tadin,” ati.

22 Jesun ajah a , “Neijui jengin, mithi hon athilongu kivui nauvinte,” ati.

Jesun dil kinonglai aphothip

(Mk 4:35-41; Lk 8:22-25)

23 Jesu kong sunga alut’in aseijuiten akilhonpiuve.

24 Hetman louva dilpi chu khopihui hattah-in ahin nuh leh, twi kinongin kong chu achup pai ding ahitai. Jesu vang aihmu nalaiye.

25 SEijuiten agasukhang loiyun, “Pakai neihuhhing loiyun twiyin eichup lih diu ahitai!” atiuve.

26 Jesun ajah-uvah, “Vo tahsan lhom ho idia chuti kichat nahiuvem?” atin, athoudoh-in khopihui le dillen chu haphoa apho leh athip del jenge!

27 Mihon adatmo soh keiyun, “Ipi mi bep hiya hui l edillen geiyin athu angai jeng hitam!” atiuve.

Jesun thilhavop mi ni adamsah

(Mk 5:1-20; Lk 8:26-39)

28 Jesu agalkaiya Gadara gamsung alhunin, lhankhuh lah a hung kon thilhavop mi nin akimutopi lhon’e. Thilhavop te ni chu kichat aum behseh jeh-in aumna lhon lampi chu koiman ahopa ngampoi.

29 Amani apengjah lhonin, “Vo Pathen Chapa, ilo ding neitiu ham? Akitep Phat lhin masanga keiho bolgentheiya hung nahim?” ati lhon’e.

30 Akom’uva kon chun muphah don khat’a hin vohcha tampi hon khat alhai.

31 Thilhahon ahenga, “Neikaidoh tei diu leh hiche vohchate sunga khun neisol’uvin,” tin ataovui.

32 Jesun “Lut tauvin,” ati phat’in, ahung potdoh-un vohchate sunga aluttauve. Chutah chun Vohhonpi chu ha-lhaiyin alhaiyun, kol’ah a alhai lhauvin, dil sunga achomlut soh hel’auvin, twi lah a athidentauve.

33 Chuphat’in vohcha ching ho kho sunga ajamlut’un, thilhavop te ni chunga thusoh le athilmu jouseu agaseisoh tauve.

34 Chutah chun kho sung mite abonchan Jesu henga ahungun, Ama chu agamsunguva kona potdoh din ajoltauve.

8.4: Lv 14:1-32;

8.11: Lk 13:29.

8.12: Mt 22:13; 25:30; Lk 13:28;

8.17: Is 53:4.

 

Matthew sut Kipana Thupha Bung 9

 

Jesun pasal langthi khat aboldam

(Mk 2:1-12; Lk 5:17-26)

1 Jesu konga alut’in, ahung kile tol galkaiyin khopi sung ahung lhungtai.

2 Hichea hin mihon pasal langthi khat alupna pumin Jesu henga ahinpuiyui. Jesun atahsanu amuchet phat’in langthipa jah a, “Kihol lel hih-in chapa, nachonset jouse ki-ngaidam ahitai,” ati.

3 Hichun Danthu lekha them phabep’in, “Hichepan Pathen ataitom’e,” tin agel’ui.

4 Alung gel’u Jesun ahen, “Idia hitobang thilse nagel’u ham?

5 ‘Nachonset aki-ngaidamsoh tai,’ ti leh “Thouvin lam jottan,’ ti hoijoh seibai jom?

6 Leiset chunga Mihem Chapan chonset ngaidamna tha anei kavetsah nahiuve,” atin, lang thipa jah a, “Thouvin, nalupna kilah-in na-inlam jontan,” ati.

7 Langthipa akipatdoh paiyin inlam ajontai.

8 Mipin hiche hi amu phat’un akichauvin, ahinvangin mihemte chunga hitobang thaneina pea Pathen avahchoitauve.

Jesun Matthew akou

(Mk 2:13-17; Lk 5:27-32)

9 Jesun hikom chu dalhan ache leh Matthew kiti mi khat a kaidonna mun a tou amun, ajah a,”Neijuiyin,” atileh; Matthew akipatdoh-in ajuitai.

10 Matthew in a Jesun ankong aum phat’in kaidong ho tamtah l ethet umtah tah miho ahungun Jesu le aseijuite toh ankong aumkhom’uve.

11 Pharisee hon hichu amuphat’un aseijuite jah a, “I-bol’a na Houhil pauvin kaidong ho le thet um tah tah ho to an aneh khom ham?” tin adongui.

12 Jesun aseiyu ajan, “Midamin louthem angaipon, adam louvin bou angaiye.

13 Keiman hepina bou kangeh-in, kilhaina ka-ngeh poi,’ kiti hi ipi kiseina ham gakhiltoh-un. Ajeh chu midohho kouva hung kahipon, chonset kouva hung joh kahibouve,” ati.

 

An-ngol thudol’a kidohna

(Mk 2:18-22; Lk 5:33-39)

14 John seijuite Jesu henga ahungun, “I-atileh keiho le Pharisee hon an-ka-ngol mat chet juva, nang seijuiten an ngol khah louvu ham?” tin ahung dongui.

15 Jesun adon but’in, “Kichen golvahna hung lha ho chu aji neipan alenkhomi laisea lunhham ngaiyam? Amavang aji neipa akom’uva kona akipui mang nikho hung lhung ding ahin, chutengleh kichen golvah a hung lha hon an ngol diu ahinai.

16 “Koiman sopnem loulai ponhal’in ponlui abeh ngaipoi, beh leh abehnan pon lui chu bot-eh jontin, haset cheh lo ding ahi.

17 Chujongle min savun peng lui sunga jong lengpitwi thah akhum ngaipoi, khum ta leh alengpitwi pen gchu tumkeh intin, lengpitwi long jal’a apeng jong mang lo ding ahi. Hijeh chun lengpitwi thah chu savun peng thah  a akikhum jin, lengpitwi le apeng anigel’in ahoidoh theiye,” ati.

Vaihompa chanu le jesu pon thamkha numei

(Mk 5:21-43; Lk 8:40-56)

18 jesun hiche hi asei nalaiyin, vaihom pasal khat akom’a ahung bohkhup’in, “Tutah chun kachanu athitai, hinla hungin achunga na khut ngamle chun hingkit teiyinte,” tin ataove.

19 Jesu akipatdoh paiyin vaihompa to akilhon phat’in aseijuiten jong ajuitauve.

20 Lampia chun kum som-le kum ni thi longa dammi numei khat hi Jesu nunga ahungin apon mong kai atham’e.

21 Amanu kigel’a chu, “Apon mong jeng jong thamkha len gdam inge,” ati ahi.

22 Jesu agah kihei leh numei nu chu amun, “Kihol lel hih-in chanu, natahsanin nadamsah ahitai,” ati. Hiche pet tah chun ama nu adamsel tai.

23 Jesu vaihompa in a alut leh thi-opna akuli mut h leh mipi poh chei choiya um amun,

24 “Nabonchan potdoh-un, chapangnu hi athi-ah ahipoi, a-ihmu ahibouve,” atileh amahon amoh nuisat atauve.

25 Hinla mipi adeldoh phat’in Jesu insunga alut’in, chapangnu chu akhut’a akaileh chapangnu athudoh tai.

26 Hiche thusoh hi chuche gamsungse sea akithangsoh tai.

Jesun mitcho ni kho amusah

 

27 Chukom dalha a Jesu acheleh, mitcho mi nin ajui lhon’in, “Vo David chapa neilungset’in,” tin asam lhontai.

28 Insung khat’a agalut phat’in mitcho tenin jong ajuilut lhontai. Hichun Jesun ajah lhon’a, “Namit lhon hahsah thei ding monga neitahsan lhon ham?” atileh; amanin jong, “Henge Pakai!” ati lhon’e.

29 Chuphat’in Jesun amit lhon athampeh-in, “Natahsan lhon bang in mit hah lhontan,” atileh;

30 hichun amitlhon ahah paitai. Jesun amani akham chah kheh-in, “Koima hetsah-lhon hih beh-in,” ati.

31 Mitchote ni chula apotdoh lhonin chuche gamkol sungse seah Jesu thudol athechansoh lhontai.

Jesun paomo khat apaosah thei

32 Agah potdoh-u leh thilhavop mi paomo khat Jesu henga ahinpuiyui.

33 Jesun thilha anodoh peh phat’in paomopa apaothei paitai. Chutah chun mipin kidang asauvin, “Israelte lah jenga jong, hitobang thil akimu kha hih laiye,” atiuve.

34 Pharisee hon vang, “Thilha lengpa vanga thilhate adeldoh hichume,” atiuvin ahi.

Jesun mipi akhoto

35 Jesun khopi jouse l ekhoneo jouse achonsoh keiyin, Houthua kikhopna intin a thu ahil len, Lenggam Kipana Thupha ahil lhangin, veise dammo jouse aboldamin ahi.

36 Jesun mipi avet leh alainatpi lheh-e. Ajeh chu achingbei kelngoite bangin gim le da athoh-un, apan hu diu aumpoi.

37 Hijeh chun Jesun aseijuite jah a , “Chang-at ding atam lheh nan, natonga alhom’e,

38 chang-at ding mi ahinsol be na din chang-at thunei Pakai henga taovun,” ati.

9.10:11: Lk 15:1-2;

9.34: Mt 10:25; 12:24: Mk 3:22; Lk 11:15;

9.35: Mt 4:23: Mk 1:29; Lk 4:44;

9.36: Nu 27:17:1K 22:17; Ch 18:16; Ez 24:5; Mk 6:34;

9.37-38: Lk 10:2.

Matthew sut Kipana Thupha Bung 10

 

Solchah som le ni

(Mk 3:13-19; Lk 6:12-16)

1 Jesun aseijui som le ni chu akoukhomin, lhagaoboh ho deldohna ding le dammo veiset jouse boldam theina tha aei.

2 Solchah som le ni ho min chu: amasapenin Peter kisah Simon le asopipa Andrew ahin, adang Zebedee chapa t eni Jacob l easopipa John,

3 Philip l eBartholomew, Thomas, kaidongpa Matthew, Alpheus chapa Jacob, Thaddaeus,

4 Canaan mi Simon, chule Jesu matsah a pang Judas Iscariot-hicheng hi ahiuve.

 

Seijui som le ni kisol lo na

(Mk 6:7-13; Lk 9:1-6)

5 Som le ni asoldoh chun Jesun hitin ahilchah-e: “Chidang nam dangte gamsung le Samaria mite khoi ho jot dauvin.

6 Kelngoi mang sa tobang Israel insung mite  henga chejo’uvin.

7 Nache pum pum’un, ‘Van a Lenggam chun hikom ahin phatai,’ tin samleuvin.

8 Ana damsah-un, mithi kaithouvun, aphah suthengun, thilha nodoh-un, manbeiya nakisanu ahi, manbeiyin homjal’un.

9 Nasum dip sunga sana, dangka sumsan kipoh sauvin;

10 cholam ding sum thumna din sakhao jen gjong kendauvin, sangkhol tho ni ah hih-un, kengchot hihen tenggol hileh kendauvin. Ajeh chu natong’an aneh ding amu lom ahi.

11 “Khopi hihen khoneo hileh naphah phah nauva nalhunsah nom miu holdoh-un, chukom nadalhah kahseuvin umpiuvin.

12 Nalut lut nau insung jah a , ‘Lungmon leng hen,’ tin salam cheh-uvin.

13 Insung khattaouvin lamtoa nalhunsah-u leh salam’un lang, nalhunsah nom lou vangu leh salam datauvin.

14 Insung khattou le khopi khattouvin lamto loule lhunsah da akop’uva, nathu seiyu jong angaidau leh, nakengphanguva leivui geiyin thin lhah khum’un dalhauvin.

15 Tahbeh a kaseipeh nahiuve, Thupi tan nikho leh chuche mun mite thoh ding sanga Sodom le Gomorrah khopi thoh baijjo ding ahi.

 

Bolsetna hung lhung ding

(Mk 13:9-13; Lk 21:12-17)

16 “Veuvin, ngeihon lah a kelngoi kilha lut banga kasol nahiuve. Hijeh chun gul bangin ching theiyun, vakhu bangin lung nem’un.

17 Chingtheiyun, mihon man’uvin natin Hou vaipoloi kikhopna nakai lut diu, Houthua kikhopna in dunga najep diu ahi.

18 Keima jal’in vaipote le leng ho anga kailut’un tin, hinla amaho le chidang namdangte henga kathupha hettohsah a napan diu ahi.

19 Hitia nakailut tengu leh nasei diu le nasei ding dol’un lung kham hih-un, apettah leh kipenauvin nate.

20 Ajeh chu nalunggel mai mai nasei diu ahipon, nasunguva cheng na-Pau Lhagao chun naman chah-uva asei ding ahibouve.

21 “Pasal’in asopite aheh lih a, mipaten achate chutima abol diu, chaten jong anu apa adouva athiso cheh diu ahi.

22 Keima jal’a mitin hot le paiya na-um diu, hinla akhon ni geiya thoh lhumpa bou huhhinga um ding ahi.

23 Khopi khat’a nabolset tengu khopi chom khat’a jam lut’in, tahbeh a kaseipeh nahiuve. Mihem Chapa hung kah a Israelte khopi jouse nachotsoh louhel diu ahi.

24 “Seijui chu ahilpa sangin achungnungjo pon, soh jong apu sangin achungnung ngaipoi.

25 Seijui chu ahilpa tobang bep ahiya, soh apu toh abah joule aphaset ahi. Ainneipa bon Beelzebul ahisah ngamu leh a-insung mite ipi ahisah da diu ham?

Gin ding pen koiham

(Lk 12:2-7)

26 “Mihem kichah hih-un. Ajeh chu phondoh louva sel mang ding aumpon, hetdoh louva im-mang ding jong aumpoi.

27 Muthima kaseipeh-u hi khovah a naphonjal diu, guh thima kahil’u hi intingvuma naphonjal diu ahi.

28 Tahsa sunmang thei jongle lhagao that thei lou chu kichat dauvin, chusangin tahsa le lhagao akop’a damun a sol a sumang thei Pathen joh ginguvin.

29 Vasah ni paisa khatseh man a kijoh ji lou ham? Ahivangin na Pau phatsah louva khat jeng cha jong tol’a kimoh selhah lou ding ahi.

30 Nang ho jong nalujang sam jouseu geiya simtohsa kikoi ahitai.

31 Hijeh chun kicha hih-un, vahsah ho sanga manlujo nahiuve.

 

Mihem maiya Christa phondoh

(Lk 12:8-9)

32 “Koi hile japi lah a Christa mi ahi kiphongdoh chan chu Ken jong van a um ka-Pa angsunga kaphondoh ding ahi.

33 Koi hi leh Christa mi ahina japi lah a immang chan chu Ken jong van a um ka-Pa angsunga kaseilep ding ahi.

 

Chamna thu hilouva chemjama kidouna

(Lk 12:51-53; 14:26-27)

34 “Leiset chunga chambol’a hungin neigel dauvin, chambolma lah chemjama kidouna dinga hung kahibouve.

35 Ajeh chu pa le chapa kidohsah a, nu le chanu kidohsah ding, tehpi leh mounu kidohsah dinga hung kahibouve.

36 Mihem dia amelma khohpen tahchu a-insung mi ma ma hiding ahi.

37 “Koi hile Kei sanga anu apa lungset jo jong kaseijui lom ahipoi.

38 Athingpel kiput’a kanung jui lou chu kaseijui lom ahipoi.

39 Koi hile kihinso nom chun athilo ding, keijal’a thilo chanin kihinsona anei ding ahi.

Kipa man ho

(MK 9:41)

40 “Koi hileh nang ho lem a lhunsah chanin Kei eilem a lhunsah a kila ding, Kei eilem a lhunsah jouse chu Eisolpa lema lhunsah a ahi.

41 Pathen Themgao lem a lhunsah chun Themgao kipaman akihoppi ding ahin, mipha lem a lhunsah jong chu mipha kipaman amuding ahi.

42 Dihtah a kaseipeh nahiuve, kaseijuite lah a aneopen khat hijong leh seijui ahina jeh a twidap khon khat pejeng jong chu kipaman akisan tei ding ahi,” ati.

10.14: ac 13:51;

10.15: Mt 11:34; Gn 19:24-28;

10.16: Lk 10:3;

10.17-20: Mk 13:9-11; Lk 12:11-12; 21:12-15;

10.21: Mk.13:12; Lk 21:16;

10.22: Mt. 24:9, 13; Mk 13:13; Lk 21:17.

10.24: Lk 6:40; Jn 13:16; 15:20.

10.25: Mt 9:34; 12:24; Mk 3:22; Lk 11:15.

10.26: Mk 4:22; Lk 8:17.

10.33: 2Ti 2:12.

10.39: Mt 16:25; Mk 8:35; Lk 9:24; 17:33; Jn 12:25.

10.40: Mk 9:37; Lk 9:48; 10:16; Jn 13:20.

Matthew sut Kipana Thupha Bung 11

John Baptist misol-ho

1 Jesun aseijuite som le ni ahilchahsoh phat’in chukom dalhan, naivel khopi dunga thuhil’a seiphong le din achetai.

2 Akihenna songkul’ah Messiah natoh thilbol kithang ajan, John chun aseijui phabep Jesu henga asol’e.

3 Amahon Jesu jah a, “Hung dia kisei chu nahim, achom dang khat ka-nga nah lai diu ham” atiuve.

4 Jesun ajah-uvah, “Kile kit’un lang najah chengseu le namu chengseu hi gaseipeh tauvin;

5 mitchon kho amun, elbaiyin lam a jot tan, miphah suhthengin aumin, na-ngongin kho ajan, mithi kaithouvin aumtai, chule vaichate Kipana Thupha akiseipeh tai.

6 Kachunga lung opkaina neilou chu anun nom’e,” ati.

7 John seijuite kile phat’in, John thudol mipi jah a Jesun aseiyin; “Gamthip laiya ipi vetnom’a che nahiuvem? Hui mut ling peng venom nahiuvam?

8 Ipi vedia che mong nahiuvem? Kile lah ponsil mi ham? Pon kikhel sil miho leng inpia achengbouvui!

9 Ipi vetnoma cheba nahiuvem? Themgao ham? Ahinai, Themgao mai mai ahi poi, thupitah Themgao ahi.

10 Pathen Lekhabua Pathenin, ‘Nalampi sem toh din namasanga kasolle kasol masai,’ tia asei chu John hi ahitai.

11 Tahbeh a  kaseipeh nahiuve, numei sung peng cheh ahivangin John Baptist sanga lenjo mihem apeng kha hih laiye; hinla van a lenggama neopen jong ama sangin alenjo nalaiye.

12 John Baptist thuseiphong nikhoa pat tuni geiyin van a lenggam hi min pumhat jengin anon, mi huseten pumhat’a lah din agouve.

13 John khang geiya Themgao jouse le Mose Danthun Lenggam thudol aseiyu ahin,

14 nakisan nom’u leh John hi hung dia kisei Elijah chu ahitai.

15 Nakhang neiyan ngai hen!

16 “Hiche khang mite hi ipi to kitekah theiyin tem? Kailhang dunga tou chapang ho loikhat’in adang ho jah a,

17 Kipana kuli kamut vangun nalam pouvin, thi lhah la kasah-u jongle nakap pouve,’ tia kihouho tobang ahiuve.

18 Ajeh chu John hi muhem neloule midon don louva aumle ‘THilhavop ahi,’ atiu vin;

19 mihem Chapan mineh ngai aneh a midon ngai adon vangin, Neh het le lengpitwi lop, kaidong ho le chonsete jol le gol,’ tin asei kit’ui. Hoi hileh chihna chu atohgan them achan ahibouve,” ati.

Atahsan lou khopi ho da na

(Lk 10:13-15)

20 Jesun thil kidang ahabol dehna mihon lung ahei loujeh-un aphohsal’in,

21 “Ohe Chorazin khopi nada ahi! Ohe Bethsaida khopi nada ahi! Nakhosunga thil kidang kibol chengse hi Tyre le Sidon kho sunga kibol hileh, khomiten kisihin khaopon sil’a vut kinu’vintin achonset lung heisoh tauvinte.

22 Tahbeh a akseipeh nahiuve, thupi tan nikho le nang ho thoh sanga Tyre le Sidon kho mite thoht oljo ding ahi!

23 Chule Capernaum nang hi! Van geiya kichoisang go nahim? Noimigam a nasot lhah diu ahibouve. Nakho sunga thil kidang kibol sengse hi Sodom kho sunga kibol leh mangthth hih laiyinte.

24 Tahbeh a kaseipeh nahi, thupi tan nikho leh nang thoh sanga Sodom thoh oljo ding ahi,” ati.

 

Kahenga hungin choldo’uvin

(Lk 10:21-22)

25 Hichepat hin Jesun, “Pa van le leiset Pakai! Michingte le mi themte dia na-impeh chengse mimol ho naseipeh jeh-in kathangvah-e!

26 hiti dinga hi nadeimong hinte he-Pa!

27 “Ka-Pan thil ijakai eippedoh tai. Pa tilou koiman Chapa ahepon, Chapa le aman aphondoh peh nom ho tilou koima dangin Pa ahepouve.

28 “Tong gimte leh pohgihte kahenga hungun, Keiman choldoh sah unge!

29 Kanamkoljon kilah-un pouvin, Keiya kihil’un, Keima lung nengtah le nun nemtah kahi, Keiya hinjouna nanei diu ahi.

30 Ijeh-inem itile kanamkoljon apoh anop’in, kapoh jong ajang’e,” ati.

11.5: Is 35:5-6;61:1.

11.10: Ml 3:1.

11.12-13 Lk16:16,

11.14: Ml 4:5; Mt 17:10-13; Mk 9:11-13.

11.21: Is 14:13-15; Gn 19:24-28.

11.24: Mt 10:15 Lk 10:12.

11.27: Jn3:35; 1:18; 10:15.

11.29: Jer 6:16.

Matthew sut Kipana Thupha Bung 12

Choldo Nikho thudol’a thudoh

(Mk 2:23-28; Lk 6:1-5)

1 Chom khat jouvin Choldo nin Jesun bulei lai ajotpai. Aseijuiten gilkel jeh-in changvui asih pantauve.

2 Athilbol’u hi Pharisee hon amu’uvin Jesu jah a, “Ven, naseijuiten Choldo nin dan ngailou abol’ui!” atiuve.

3 Jesun adonbut’in, “David l ealoite agilkel’uva chu ipi abol’u nasim khah louvu ham?

4 I-atileh Pathen Houin a lut’a, Thempu tilou neh ngai louhel, Pathen um jing hetna kitohsa changlhah aloite toh aneh jengu ham?

5 Ole Choldo niseh leh Houin sunga lutji Thempu hon Choldo nikho asuhkeh vanguva themmo achanda diu Danthu chu nasim khah louvu ham?

6 Kaseipeh nahiuve, Houin sanga thupijo khat hikoma aum’e!

7 Pathen lekhabua, ‘Gan alhai ka-ngeh poi, hepina bou kadeiye,’ kiti chu heleu chun monabei miho themmo nachan lou diu ahi.

8 Ijeh-inem itile Mihem Chapa hi Choldo nikho Pakai ahi,” ati.

 

Khut lang ngoipa damdoh

(Mk 3:1-6; Lk 6:6-11)

9 Hikom chu dalhan Houthua kikhopna in khat’a Jesu aluttai.

10 Kikhopn ain a chun pasal khut lang ngoi khat ana umin, alah-uva chun Jesu thilbol dihsah lou jeh a hehse nom mi phabep jong aum’e. Amaho hin, “Choldo nikhoa damlou boldam hi Danthu to kikal hilou ham?” tin adongui.

11 Jesun adonbut’in,  “Choldo nikhon nalah-uva koiham khat kelngoi kokhuuh a lahlut taleh aneipan agakaidoh lou ding ham?

12 Mihem hi Kelngoi sanga gam chenga mantamjo ahi! Hijeh chun i-Danthuu hin Choldo nikhoa mi kithopi ding aphal’e,” ati.

13 Hijeh chun Jesun khut lang ngoipa jah a, “Nakhut langin,” ati. Khut ngoipan alhandoh jen gleh adamtan, adamlang bep bep ahitai.

14 Chuphat’in Pharisee h apotdohun Jesu thana ding akihousomtauve.

 

Pathen lhentum Lhachapa

15 Ama than ding akihousomu ahet doh phat’in Jesu chukom dalhan apotdoh le japin ajuitauve. ana jouse aboldamin

16 Ama thusim chu midang aseipeh da diuvin ahilchah-e.

17 Hitobang thil hi Isaiah Themgao kama kiseisa:

18 “Ven, kalhentum lhacha deitah, Kadeitah le kalung lhaina pen! Achunga ka-Lhagao chensah ingting, Chitin namtin lah a kathutan aphondoh ding ahi!

19 O-sanga mi anelkal lou ding, Kholai dunga jong lhang asap lou ding;

20 Tahlelte dia nun nem ding, Panpibeite akhoto ding ahi! Dan dihtah a thu akitan kahsea Adou dou jeng ding ahi!

21 Chule namtin vaipin akineppi diu,” kiti chu guilhunna dia soh ahi.

 

Jesu chule Beelzebul

(Mk 3:20-30; Lk 11:14-23)

22 Hichepet hin thilhavop mitcho paomo mi khat hi Jesu henga ahin puiyun, Jesun aboldam phat’in apao theiyin kho amutai.

23 Jesu thil kidang bol hi japin adatmo behseh jengun, “Hichepa hi David Chapa hi-ngap ding hitam?” akitiuve.

24 Pharisee hon ajahdoh phat’un, “Thilha lengpa Beelzebul thahat’a thilahte anodoh hichu me!” atiuve.

25 Alunggel’u ahet phat’in Jesun ajah-uvah, “Kilang khen a kidouto lenggam tapou mangthah ding, ki lang khen a kidouto khopi hihen insung hi jong le mangthah vah ding ahi.

26 Satanin Satan anodoh leh akilangkhen ahitauvin, alenggam beivah ding ahitai.

27 Thilha lengpa Beezebl thahat vanga thilhate nodoh a neiseiyu leh naseijui  teuvin koi thahat vanga anodoh-u ba ham? Namo nau phongdoh a naseijuiteu pang diu ahi.

28 Pathen Lhagao vanga thilhate nodoh kahi vang leh Pathen Lenggam chu nalah-u lhung ahitai.

29 “Mihat insunga lut chun ama somkon masa louva kon anei achom thei ngaiyam? Inneipa asomkon jou tengle bou anei achompeh ding ahi.

30 “Koi hileh eipanpi lou chu eidou mong ahin, eilhoh khomhu lou mi chu athecheh a pang ahibouve.

31 Hijeh a chu kaseipeh nahiuve, mihemte chonsetna le Pathen ataitom nai itobang hijongl eki-ngaidam thieyin tin, Lhagao Theng taitom vang ngaidam chang louhel ding ahi.

32 Mihem Chapa douna thusei jong ki-ngaidam thieyin tin, Lhagao Theng taitom vang hcu itih chan a jong ngaidam chang louhel ding ahi!

 

Thingphung chule Aga

(Lk 6:43-45)

33 “Thingga pha deiyan thing phung pha nei angaiye, nathing phung aphat loule thingga phalou nanei ding ahi. Ajeh chu thingphung hi agan akihei.

34 Gulse guiya peng ho, gitlou puma iti thupha nasei theidiu ham? Ajeh chu lungsung alet teng kamsunga hungpotdoh ahibouve.

35 Miphan athilpha kholna lung sunga konin thipha asodoh jin, misen athilse kholna lungsunga konin thilse asodoh jie.

36 “Kaseipeh masah nahiuve, thupi tan Nikho leh mintinin manlou thu asei jouseu geiya asuhto soh kei diu ahi.

37 Naseisau thu hoa chu nathem namo nahcung thu kitan diu ahi,” ati.

 

Khang gilouten melchihna ahol’u

(Mk 8:11-12; Lk 11:29-32)

38 Danthu them phabep le Pharisee phabep’in Jesu jah a, “Houhil, thil kidang nabol kavetnom’ui,” atiuve.

39 Jesu a-eojah-in, “Pathen hephaloute leh khang gilouva miten melchihna nahol’um? Jonah Themgao melchihna itlou melchihna dang kipelou ding nahiuve.

40 Ngapi oisunga Jonah nithum le janthum athamden banga Mihem Chapa jong leiset Lailunga nithum le janthum thamden ding ahi.

41 Thupi tan nikho leh Nineveh kho mite chu hiche khang mite toh hung ding khom’uva themmo achan diu ahi; ijeh-inem itile Nineveh kho miten Jonah thuseu ajah phat’un chonset lung aheiyui; hinla veuvin Jonah sanga lenjo khat hikoma aum’e!

42 Thupi tan nikho leh Sheba lengnu chu hiche khang mite toh idng khoma themmo achan ding ahi; ajeh chu leiset kolmang lang peh a konin Sheba lengnun Solomon chih thusei ahung ngai gunset theiye; tunla veuvin Solomon sanga lenjo khat hikoma aum’e!

Lhagaoboh hung kilekit

(Lk 11:24-26)

43 “Lhagaoboh hi mihem sunga apotdoh teng gamgo lah a avah len choldo mun ahol lelen, mu la amuji poi.

44 Chutengleh, ‘Kahung potdoh namun ma ma a lut kit tange,’ atin, ahung kile kit leh, mihem chu sagoh keova kithen ngimsel’a um amun,

45 ache kit’in ama sanga khohjo lhagaoboh sagi ma agapui ben, mihem sunga chun alut’un achenpha tauve; chutah chun mipa umchan hi amasa sangin akhoh cheh tai. Hiche khanga migiloute jong hung chuiti diu ahi,” ati.

 

Jesu nu le Jesu sopite

(Mk 3:31-35; Lk 8:19-21)

46 Jesun mipi jah  athu asei nalaiyin anu le asopite ama to kihou nomin ahungun inpo-ah angah-ui.

47 Hijeh chun mi khat hin Jesu jah  a, “Ven, nanu le nasopite nang to kihou nomin ahungun inpo-ah na-ngah-ui,” atipeh-e.

48 Ajah a thuseipa jah a Jesun, “Kanu koi hiya, kasopite koi koi hiuvam?” atin,

49 aseijuite akoh-in, “Ven kanu l ekasopite hi!

50 Ajeh chu koi hileh van a ka-pa lungdei bol’a chu kasopipa, kasopinu chule kanu ahiuve,” ati.

12.1: Dt 23:25,

12.3-4: Is 21:1-6.

12.4: Lv 24:9.

12.5: Nu 28:9-10.

12.7: Mt 9:13; Ho 6:6.

12.11: Lk 14;5.

12.18-21: Is 42:1-4.

12.24: Mt 9:34;10:25,

12.31- Mk 9:40.

12.32: Lk 12:10.

12.33;15:18; Lk 3:7;6:45.

12.38: Mt 16:1: Mk8:11; Lk 11:16.

12.39: Mt 16:4; Mk 8:12.

12.40 : Jn1:17.

12.41: Jn 3:5.

12.42: iK 10:1-10; 2Ch 9:1-12.

Matthew sut Kipana Thupha Bung 13

 

Muchi thepa thulem

(Mk 4:1-9; Lk 8:4-8)

1 Hiche nikhoa hi Jesun in dalha dil pang lama chea atou phat’in

2 mipi ahung kikhom’un, Ama kong sunga alut’in atouve. Mipi vang va0kam a adingui.

3 Hichun Jesun mipi ajah a thu tampi thulemin aseiye: “Pasal khat muchi the din akontai.

4 Muchi athephat’in abang lamsih a achun, vachaten akilogam tauve.

5 Muchi phabep jong song lheo chung, lepatnaa achun, aleiphat jeh-in ahung keh doh loiye.

6 Hinla nisan asah phat’in leipat jeh a ajungkho thuh loujeh chun asang gop jitai.

7 Muchi phabep ma ling lah a achukhan, ling ho akhandoh phat’in adep lih jin ahi.

8 Muchi phabeppi vang leipha laiya achun, akhangdoh-in agatan, abang jakhat cheng, abang somgup cheng chule abang som thum chengin apunge,

9 “Nakhang neiyan ngai hen.” ati.

Thulem kiseilona

(Mk 4:10-12; Lk 8:9-10)

10 Seijuiten anailut’un Jesu jah a, “I-bol’a mipi koma thulem jenga thu nasei ham?” atiuve.

11 Jesun adonbut’in “Nang ho hi van a lenggam thuguh hetna kiseipeh nahitauvin, amaho vang kisepeh nailou lai ahi.

12 Aneiya chu anei let setna dia kipeh be ding, aneilou vang themcha nei jongle kilahpeh ding ahi.

13 Ijeh-inem itile amaho hin veu jongle muthei lou ding, ngai jongle ajah thei lou diu ahi jeh a thulema kisei ahi.

14 Hichea hin Isaiah Themgao seisa: ‘Ja jong leu nahet khen thei lou diu, Ve jong leu chun namu chet thei lou diu;

15 Ijeh-inem itile hiche nam mite hi alungthimu amoh-in, Akolseh gam’un, amit’u achosoh tai; Chutilou leh mit’in mu’vin tin naa ajah diu, kadamsah diu ahi,’ ati chu guilhung ahitai.

16 “Nanghon vang namu’va najah tah jeh-un hampha tah nahiuve!

17 Tahbeh a kaseipeh nahiuve, namu chengseu hi Themgao tampi le midih tam tah-in amu nom vangun amupouvin, ajah nom lheh vangun ajapha pouve.

 

Jesun muchi thepa thulem ahilchet

(Mk 4:13-20; Lk 8 11-15)

18 “Hijeh chun muchi thepa thulem hi ngaiyuvin.

19 Lenggam thu kiseipeh la ja a hekhen thei lou miho chu lamsih a chu muchi tobang chu ahiuve. Alung sunguva kikhum lutsa jong Agiloupan ahung lah mangpeh jitai.

20 Lenggam thu kisei ajah teng kipah tah a kisan pai jeng ho chu songlheo chung leipatna a chu muchi tobang ahiuve.

21 Asunguva alut gil loujeh-in chom khat aum jin, akisansau thu jeh a bolsetna ahung teng adonda paijitauve.

22  Ling lah a chu muchi hi lenggam thu ja a, ahivanga leiset khan khoa lungkhamna l ehaova nopsah ding deinan adep lihji miho ahiuvin, galouvin aumjitauve.

23 Leipha laiya chu muchi hi lenggam thu ja a hetthem miho ahiuvin, ahung gaphan, abang ja khat cheng, abang somgup cheng chule abang somthum chengin apungjie,” ati.

Changlhem thulem

24 Jesun ajah-uva thulem khat aseikit’in: ” Van a Lenggam chu mi khat loulaiya muchi pha thea to bang ahi.

25 Jan khat mi ihmut thip nungin melma khat ahungin chang lah achun changlhem athen ache mangtai.

26 Chang kung kikhan lhit’a changpah do phat’in changlhem ho jong akilangdoh tai.

27 Hichun in neipa sohte ahungun ajah a, “Kapu, lolaiya muchi pha jeng nahte me, hoilam kona changlhem ho keh ham?” atiu leh,

28 aman, ‘Melma khat touvin abol hinte,’ ati. Hichun asohten, ‘Changlhem ho khu kagabo doh diu nadeiyem?” atiuve.

29 Aman ajah-uva, ‘Gabodoh datauvin, changlhem nabodoh nauva changtah jong bodoh tha khauvin nate,

30 Chang-at phat kah-in changtah le changlhem keh khom tante, chang-at phat tneg keiman chang-at ho chu changlhem chengse meiya govam di akankhom’uva chule changtah chengse kachangpang sunga akhum diuvin seipeh nange,’ tin aseiye,” ati.

 

Ankam mu thulem

(Mk 4:30-32; Lk 13:18-19)

31 Jesun thulem khatma aseipeh kit’in, “Van a Lenggam chu mi khat’in loulaiya ankam mu athe to bang ahi.

32 Ankam mu hi muchi lah a aneo pen ahivangin akhandoh phat’in thingphung tejen aphan, chunga leng vacha ten jong bu sahna le ge nan aneitauve,” ati.

 

Cholsosa thulem

(Lk 13:20-21)

33 Jesun thulem khat asei kit’in, “Van a Lenggam chu numei khat’in changbong danthum leh a chol avuiya, apomsoh kahsea abil tobang ahi,” ati.

Jesu thulem seiho

(Mk 4:33-34)

34 Jesun mipi jah a thulem hijat hi aseiyin, thulem louvin thucheng khat cha aseipoi.

35 Thulem asei hi, “Thulem seinan pao ving ting, Lei set bul kiphu til’a pat kisei thuguh chengse phongdoh inge,” kiti Themgao seisa chu gui lhunna dia asei ahi.

Jesun changlhem thu ahilchet

36 Mipi dalhaa Jesu insung agalut leh aseijuite ahungun, “Lou laiya changlhem chu ipi kiseina ham neihil chen’un,” atiuve.

37 Jesun adonbut’in, “Muchi pha thea chu Mihem Chapa ahin,

38 loulai chu vannoi leiset ahi; muchipha chu Lenggama lut chate ahiuvin, changlhem chu Agiloupa mite ahiuve;

39 chule changlhem thepa chu Agiloupa ahiye. Chang-at phat chu Vannoi khang kichaina ahitan, chang-at ho chu Vantilte ahiuve.

40 Changlhem chengse akhop khom’uva meiya ahalvam banguva vannoi leiset khang kichai nikho jong hiding ahi.

41 Mihem Chapan avantilte sol’in tin Alenggam sunga kisuhmo na bolte leh akhangse jouse akhop khomsah a,

42 meilhum deuje ju sunga alelut diu, hikoma chu kap le hagel gel’a um diu ahi.

43 Midih chengse vang a-Pau lenggama nisa banga vah emsel diu ahi. Nakhang neiyan ngai hen!

Gou kisel

44 “Van a lenggam chu loulaiya gou kiselguh, mi khat’in amudoh a, ima akhu khuma kipah tah a chea anei jouse joh a hiche lou chu kichoh jeng tobang ahi.

 

Twikohchang manlu tah thulem

45 “Van a Lenggam chu sumkolvei min twikohchang manlu tah ahol tobnag ahi.

46 Twikohchang chu amudoh phat’in acheloiyin anei jouse ajoh-in twikohchang chu achotai.

 

Len thulem

47 “Van a LEnggam chu min Twikhanglen lai lunga len aseuva nga tin nga tang amat khomu tobang ahi.

48 Len chu nga adim phat’in akaidoh-un, atoupin nga pha jouse paipeh sunga akhol’un, manmo chengse apaitauve.

49 Vannoi khang kichai nikho jong chutobang ding, Vantilte kon’un tin midih lah a migiloute alhendoh diu,

50 meilhum deuje ju sunga alelut’uva, hikoma chu kap l ehagel gel’a um diu ahi.

 

Thudih thah le alui

51 Jesun, “Hicheng hi nahet chet tah-um?” atileh; Mihon, “Henge,” atiuve.

52 Hichun Jesun ajah-uvah, “Hijeh a chu Danthu them mi Van a Lenggam dia seijuiya pang chu akholna in a kona thil thah le alui hinpo doh doh jeng in neipa to bang ahi,” ati.

Nazareht khoa Jesu asandau

(Mk 6:1-6; Lk 4:16-30)

53 Thulem hijat asei jou phat’in chukom dalhan

54 Jesun akho ajonin, Houthua kikhopna in dunga thu ahil le leh, mihon kidang asauvin, “Hitobang chihna l ethaneina hi houya akilah ham?

55 Ama hi thingthem bolpa chapa hilou haimo? Anu min jong Mary kitia, asopite Jacob, Joseph, chule Simon l eJudas hilou ham?

56 Asopi numei ho jong ilah-uva cheng ahimeu? Hijat chihna le thaneina hi houya akilah hintem?” atiuvin,

57 asanda gam tauve. Hijeh chun Jesun ajah-uva, “Themgao chu akho sung le a-insung tilou mundanga vang akija bol tei nai,” ati.

58 Atah san loujeh-un hikoma chun Jesun thil kidang tampi abolpoi.

13.2: Lk 5:1-3.

13.12: Mt 25:29; Mk 4:25; Lk 8:18; 19:26.

13.14-15: Is 6:9-10.

13.16-17: Lk 10:23-24.

13.33: Ps 78:2.

13.57: Jn 4.44.

Matthew sut Kipana Thupha Bung 14

 

John Baptist thi

(Mk 6:14-29; Lk 9:7-9)

1 Hiche lai hin gambih vaipo Herod-in Jesu thudol kithang ajan,

2 alhachate jah a, “Hichepa hi athisa John Baptist chu thoukit hitei ding ahitai; hijeh a chu hitobang thil kidang ho hi abol thei ahi,” ati.

3 Herod hin anaopa Philip jinu Herodias thumop jal’a John chu songkul’a anakhum ahi.

4 Ajeh chu John hin Herod jah a, “Herodias nakichenpi hi Dan ngai ahipoi,” tia anaphosa ahi.

5 Herod-in John anatha nom vangin mipin John hi Themgaova agel jeh-un tha jeng ding akichai.

6 Herod pen nikhon Herodias chanu japi lah a ahung lamin, Herod alung lhaisah lheh-e.

7 Hijeh chun Herod-in, “Ipi hijongle nadeipen pen kapeh jeng ding nahi,” tin aki hahselin akiteptai.

8 Anu thumop dungjuiyin Herodias chanun, “Tutah-in John baptist luchang chu kongin hindomin neipen,” tin athumtai.

9 Lengpa alung kham lheh jeng nan, ankong phunga atoupi ho angsunga akitepna jeh chun John luchang apeh tei din anomtai.

10 Mi asol’in Songkul’a John luchang agatansah-in,

11 John luchang chu ahindop’uva nu-ngah chu agapeh-u leh, aman anu agapetai.

12 John seijuite hunguva John long chu agavuiyu ahi; chujouva hunguva Jesu ahung hetsah-u ahiye.

Jesun mi sang nga avahva

(Mk 6:30-44; Lk 9:10-17; Jn 6:1-14)

13 John kibolna thusim ajah phat’in Jesun chukom dalhan achangseh-in gamthip laiya din kongin akitol tai. Mipin achedoh ahet phat’in akhopi chenguva konin ahungun Jesu nung ajuitauve.

14 Jesu konga kona vaokama ahung potdoh leh mipi atoh paiyin, avet leh alainatpi lheh kengin, adamlou ho chu aboldamtai.

15 Nilhah phat’in aseijuite Jesu henga ahungun, “Hikom la gam thip lai ahin, nisa ma lhum pai ding ahitan, akho khoa acheuva neh ding agakichoh na diuvin mipi hi sol ngap tan,” atiuve.

16 Jesun ajah-uva, ‘Ache louvu akhoh poi, nang hon neh ding peuvin,” ati.

17 Seijuiten ajah a, “Changlhah pheng nga le nga ni seh bou kanei yui,” atiuve.

18 Jesun, “Changlhah le nga chu hinchoiyun,” atin;

19 chule japi chu hampa dum lah a tou din asol’e. Chuin changlhah pheng nga le nga ni chu alan, van lam ven Pathen athangvah-in, changlhah ho chu aheh bal bal’in seijuite apen seijuiten mipi ahoppeh tauve.

20 Japin anevaset cheh-un, anehval chengseu paipeh som le paipeh ni dimset alohdoh-ui.

21 Anea chu numei chapang sim louvin pasal sang nga jen ahiuve.

 

Jesun twichunga lam ajot

(Mk 6:45-52;Jn 6:15-21)

22 Jesun Mipi alhah doh phat’in aeijuite chu masaa gal lang khat kai masa din kong kha tsunga alut sah-in asoltai.

23 Mipi asoldoh nung in achangseh a mol chunga tao din akaltouve. Nilhah geiyin mol chunga Jesu achangseh-in aum’e.

24 Hiche don hin kong chu dil lailung ageitai. Huiyin ale lama anuh jehin twi kinongin kong chu aleh le jengin ahi.

25 Jingkah lam nidan thum le nidan gup kikah-in seijuite heng jonin dil’a twi chunga Jesun lam ahinjot’e.

26 Twichunga lam ahinjot chu seijuiten amudoh phat’un, “Lhadam ahi,” tin kichan a-aosot jengui.

27 Jesun ahin houpaiyin, “Lung linglao hih-un Kei kahibouve, kicha hih-un,” ati.

28 Peterin ahin houvin, “Pakai nang nahi nah leh twi chunga naheng kahinjotna din neiseipeh in,” ati.

29 Jesun, “Hungin,” atileh; Peter jong konga akumlhan, twi chunga achen Jesu heng ajontai.

30 Hinla huiyin twi anon amuphat’in akichan alha lut pantan, apeng jah jengin, “Pakai, neihuhhingin!” tin asam tai.

31 Jesun akhut’in agah manloiyin, “Vo tahsan lhom! I-bol’a natahsan lel ham?” tin aphoh-e.

32 Jesu le Peter kong sunga alut lhon phat’in hui jong athip tai.

33 Chuphat’in kong sunga um seijuiten Jesu chu chibai aboh-un, “Pathen Chapa mong mong nahibouve,” tin aphongtauve.

 

Gennesaret gama Jesun damloute aboldam

(Mk 6:53-56)

34 Akitol gal kaiyun Gennesaret gamsunga akum lhauve.

35 Agam miten Jesu anahe masauvin, mi asol’un gamsunga ana damlou jouse jesu henga ahin puikhom’un,

36 apon mongkai beh atham diuvin ataovui. Apon mong jeng tham kha a jong adamhel hel’uve.

14.3-4: Lk 3:19-20.

14.4 Lv 18:16;20:21.

Matthew sut Kipana Thupha Bung 15

 

Puchon Pachon

(Mk 7:1-13)

1 Jerusalema konin Pharise ho le Danthu them ho Jesu henga ahungun,

2 “Ipi dia nasei juiten an aneh tengu khut sil louva puchon pachon apal keh-u ham?” tin adongui.

3 Jesun adonbut’in, “I-bol’a ba nang hon jong puchon pachon khohsah jal’a Pathen Danthu napal keh-u ham?

4 Ajeh chu Pathenin, ‘Nanu napa jabol’un,’ chule, Koi hile anu le apa house jousen, athilo diu ahi,’ ati ahi.

5 Nang hon la, ‘Koi hile anu ham apa ham jah a, “Kavanga naphat chomna thei thil ho chu Pathen thilto ding ahitai,” atileh,

6 ama hin anu apa aja bol khoh angaipoi,’ natiuvin; hiti hin puchon pachon khohsah nan Pathen thujoh nathai mil jiuve.

7 Mipha lhem ho! Isaiah-in nachung changu gaothua asei:

8 ‘Hiche nam mite hin kamsungin jabol thu aseiyun, Alunghtimu la Keiya konin agamla lheh-e!

9 Thujong mihem thupeh jeng ahil jeh-un Eihouvu jong mohseh ahi,’ ati chu adih lheh jenge,” ati.

Mihem suhboh thei thil ho

(Mk 7: 14-23)

10 Jesun mipi akoulut’in ajahuvah, “Phaten ngaiyun hechen’un.

11 Mihem suboh thei chu akamsunga lutjoh ahipon, akamsunga hung potdoh joh chun asuhboh ahibouve,” ati.

12 Jesun seijuite ahungun, “Nathusei jeh  a Pharisee ho lung himo khu nahet’em?” atiuve.

13 jesun adonbut’in, “Van a um ka-Pa phu hilou changphung jouse chu kibotdoh ding ahi.

14 Hite ho khu limsah hih-un, mitcho ahiuvin, mitcho ma man alamkaiyu ahi. Mitchom mitcho alamkai leh kokhuh a lhalut tei ding ahi,” ati.

15 Peterin Jesu jah a, “Ipi thu lema nasei ham neihil chen’un,” ati.

16 Jesun, Tugeiya nahet khen thei louvu ham?

17 Ipi hijongle kamsunga lut jousen gilpi ahopaa chujou teng kithadohji ahi helou nahiuvam?

18 Lunggil’a kona kamsunga hung potdoh vang chun mihem asuboh theiye.

19 Ijeh-inam itile lunggil’a konin lung gilou, thilse, mi thana, mito jon na, huhna, guhchatna-hicheng hi ahungpot jie.

20 Hicheng hin mihem asuhboh thieyin, khut sil louva an neh vang in koima aboh theipoi,” ati.

 

Canaan numei khat tahsan

(Mk 7:24-30)

21 Jesun chukom dalhan Tyre le Sidon gamkol alhah tai.

22 Chu che gamsunga cheng Canaan numei khat ahungin, “David chapa kapu, neilungset’in kachanu thilha gilou tah khat ti akivop’in akhoh lheh tai!” tin ahinsam’e.

23 Jesun la kamcheng khat’in jong adonbutpoi. Aseijuite ahung un, “Hichenu hi kanung nunguva ahungin apen gpeng jenge, sol mang loiyin,” atiuve.

24 Jesun agah houvin, “Israel insung kelngoi mangsa ho henga bou eikisol’a kahi,” ati.

25 Chutah chun numeinu akeng bul’a aboh khup’in, “Kapu, neikithopi tei teiyin!” tin ataotai.

26 Jesun adonbut’in, “Chate neh ban lahpeh a uichate peh ding aphapoi,” ati.

27 Numei nun, “Ahinai kapu, hijongle uichaten jong dokang chunga apu anmal lhathang anehji khu me!” ati.

28 Chutah chun Jesun adonbut’in, “Numei natahsan alen’e! Nadei banga kibolpeh ding nahi,” ati. Hichepet tah chun achanu adamtai.

 

Jesun mi tamtah aboldam

29 Jesun chukom dalhan Galilee dillen pang alhah-in, molvum khat’a akaldoh-in atouve.

30 Ahenga mipi ahungun, ana damlou elbai, mitcho, paomo, ;hemvei, chule adang dang hivei tampi vei mihem ahinpuiyun, Jesun aboldamsoh hel’e.

31 Paomo paothei, lhemvei damhel, elbai lamjot, mitcho khomu,-mipin amudoh phat’un Israel Pathen avahchoi choi jenguve.

Jesun mi sangli avahva

(Mk 8:1-10)

32 Jesun aseijuite akoulut’in, “Kakoma mipi nelou chalouva aum nau hi nithum alhingtan, kalung asei; mohsol ding la nelou chalouva lampia lha lhoppa diu ahin kasol nompoi,” ati.

33 Aseijuiten, “Gamthip laiya japi hijat neh ding hoiya kalah diu ham?” tin adongui.

34 Jesun, “Changlhah ijat nanei yum?” ati. Amahon, “Changlhah phengsagi le nga them khat kaneiyui,” atiuve.

35 Jesun mipichu tol’a tousah din aseiyin,

36 chuin changlhah pheng sagi l enga them khat chu alan, Pathen athangvah jouvin aheh bal bal’in aseijuite apeh leh, seijuiten mipi ahoppeh tauve.

37 Mipin vaset cheh-in aneuvin, aneh noh-u anong nai longkai sagi dimset aloh doh-ui.

38 An nea chu numei cha pang sim louvin pasal cheh sangli alhinge.

39 Mipi alhah doh phat’in Jesu kong khat’a alut’in Magadan gam kol ajontai.

15.4: Ex 20:12; 21:17; Dt 5:16; Lev 20:9.

15.8-9: Is 29:13.

15.14: Lk 6:39,

15.18: Mt 12:34.

Matthew sut Kipana Thupha Bung 16

Mihon melchihna a-ngeh-u

(Mk 8:11-13; Lk 12:54-56)

1 Pharisee ho le Sadducee ho Jesu henga ahungun, akipal sah nom jeh-un, van a kona melchihna khat avetsah diu a-ngeh ui.

2 Jesun adonbut’in, “Nilhah teng, ‘Vansan asoh-e, kho pha ding ahi,’ natiuvin;

3 jingkah leh, ‘Vansan asoh-in, van anim’e, kho phalou ding ahi,’ natiuve. Vandang gongso bon nasuhto theiyu leh phat kiheichin melchihna ho nasuhto thei louuham?

4 Agilou le Pathen helou khang miten melchihna ahol ‘un, Jonah melchihna tilou adang kipe louhel ding ahi,” ati. Chuin amaho dalhan achemangtai.

 

Pharisee ho le Sadducee ho phatlou chol

(MK 8:14-21)

5 Dil gal lang khat akaidoh-un Seijuiten changlhah anapo haitauve.

6 Jesun ajah-uva, “Chang theiyun; Pharisee ho le Sadducee ho chol phalou lah a kihong phauvin,” ati.

7 Seijuite akihou lhiuvin, “Changlhah ihai jeh-uva asei hinte,” akitiuve.

8 Aseiyu ahe-lhin jesun ajahuvah, “Changlhah nanei loujehuva idia kihou khohten nahiuvem-tahsan lhom ho!

9 Nahet thei lou mongu ham? Pasal sang nga lah a changlhah pheng nga nahop’uva chu amoh paipeh ijet nalo doh-uva,

10 chule pasa sang li lah a changlhah pheng sagi nahop’uva chu amoh long kai ijat nalodoh uvam?

11 Najh-uva changlhah thu bon kisei lou iti nahet khen thei louvuham? Pharisee ho le Sadducee ho gu phalou lah a kichih thie dia kaseipeh nahibouvui,” ati.

12 Hichun changlhah lah a kisoji chol asei hilouva’ Pharisee ho l eSedducee ho thuhil gu phalou lah a kichih thei dia asei joh ahi Seijuiten ahedoh tauve.

Peterin Jesu koi ahi aphondoh

(Mk 8:27-30; Lk 9:18-21)

13 Jesu chu Caesarea Philippi gamkol ageiyin, “Mihem Chapa hi mihon koi ahisah-um?” tin asei juite adonge.

14 Amahon, “Mi kim khat’in John Baptist ahisah-un, adangin ma Jeremiah ahiloule Themgao dang khat hiei din aseiyui,” atiuve.

15 Amahon jah a, “Nang hon koiba neihisah-uvam?” tin adonge.

16 Simon Peterin, “Pathen hing jing Chapa, Messiah chu nahi!” tin adonbut’e.

17 Jesun adonbut’in, “John chapa Simon nanun nom’e! Hiche thudih hi tahsa mihema kon ahipon, vana um ka-Pan naphondohsah ahibouve!

18 Hijeh a hi kaseipeh nahi Peter: nangma songpi nahin, hiche songpi inbul’a hi ka-Houbung kasah doh a, mithi kul kotpin jong anan joulou ding ahi.

19 Keiman van a Lenggam kot-heh kapeh ding, leiset’a nakha chan van’a jong kikhah ding, leiset’a nahon chan van a jong kihong ding ahi,” ati.

20 Chujouvin Jesun ama Messiah ahi chu mikoma aseidoh louna diuvin aseijuite akham chah kheh-in ahi.

Athoh ding le athi ding Jesun asei masah

(Mk 8:31- 9:1; Lk 9:22-27)

21 Hichea pat hin Jesun aseijuite jah a kichentah-in aseiyin, “Jerusalem a kachetei ding, upate le Thempu pipu ho chule Danthu them hon eibol gentheiyuva, eitha diu, hijongle nithum lhin nia Pathenin eikaithou ding ahi,” ati.

22 Hichun Peterin achangseh-in apuidoh-in, akihan lhon, “Pathen lungset’a hitobang hi nachunga chulou hel ding ahi Pakai!” tin aseiye.

23 Hitah chun Jesu akiheiyin Peter jah a, “Kinung che jengin Satan! Neikipalsah lo ding ahi, Pathen deibanga lung gel louvin mihem deilam joh nagel’e,” ati.

24 Hichea hin Jesun aseijuite jah a, “Koi hi le eijui nom chu ama ki-ngaitom a, athingpel kiput’a eijui ding ahi.

25 Ijeh-inem itile kihinso nom chun athiloa, amavang Keima jal’a thi loa chun hinna anei ding ahi.

26 Ajeh chu min vannoi leiset pumpi nei jongle ahinkho akisuh mang teng ipi phat chompi tem? Ahiloule min ahinkho lhenga ipi apeh ding ham?

27 Ijeh-inem itile Mihem Chapa chu a-Pa loupinaa a-Vantilte toh hung ding, mitin atoh dungjui cheh tohman apeh ding ahi!

28 Tahbeh a kaseipeh nahiuve, hikoma ding ho lah a mi phabep hi Mihem Chapa leng loupia ahung amu masang seuva thina tep kha lou ding aum’uve,” ati.

16:1: Mt 12:38; Lk 11:16.

16.4: Mt 12:39; Lk 11:29.

16.6: Lk 12:1.

16.9: Mt 14:17-21.

16.10: Mt 15:34-38.

16.14: Mt 14:1-2; Mk 6:14-15; Lk 9:7-8.

16.16: Jn 6:68-69.

16. 19: Mt 18:18; Jn 20:23.

16.24: Mt 10:38; Lk 14:27

16.25: Mt 19:39; Lk 17:33; Jn 12:25.

16.27: Mt 25:31; Ps 62:12; Ro 2:6.

 

Matthew sut Kipana Thupha Bung 17

 

Jesu vou kikhel

(Mk 9:2-13; Lk 9:28-36)

1 Nigup jouvin Jesun Peter le Jacob chule Jacob naopa John toh apuiyin amaho seh molchunga akal toupi.

2 Amaho thum angsunga Jesu vou akikheltan, amai nisah vah bangin avah-in, avon jouse jong avah emsel jenge.

3 Mose le Elijah Jesu henga ahung kilah lhonin akihou lim’uve.

4 Hichea hin Peterin Jesu agah houvin, “Pakai, hikoma i-umu anom lheh jenge, pha nasah le nang ding khat, Mose ding khat chule Elijah ding khat-lhumbuh thum song inge,” ati.

5 Pater thusei pettah hin meibang lhang khat’in amaho chu alekhun, meibang lah a konin ogin khat hin, “Hiche hi ka-Chapa deitah ahi, achunga kalung alhai ta-ngeiye, athu ngaiyun,” ati.

6 Ogin ajah phat’un seijuiho akicha behseh jengun, tol’a mai asulut gamtauve.

7 Jesu ahungin agah thamin “Dah doh-un, kicha hih-un!” ati.

8 Agah dadoh phat’un Jesu changseh bou aumin koima dang amupouve.

9 Molchunga kona ahung kumsuh phat’un Jesun amaho hi ahilchah masan, “Mihem Chapa thinaa kona kaithouva aum masangsen nathilmuu hi koima seipeh hih hel’un,” ati.

10 Hichun seijuiten, “I-bol’a ba Danthu them hon Elija hung masa tei dia aseiyu ham?” atiuve.

11 Jesun, “Elijah chu hung masa ahinai, aman thil ijakai agontoh masah ding ahi.

12 Kaseipeh nahiuvee, Elijah ahung tan, mihon ahettoh loujeh-un anop aningin aboltauve. Mihem Chapa jong chutobangma abol tei diu ahi,” ati.

13 John Baptist thudol aseipeh-u ahi seijuiten ahedohtauve.

Jesun lhagaoboh vop chapang khat aboldam

(Mk 9:14-29; Lk 9:37-43a)

14 Mipi lah ahung geiphat’un pasal kha tJesu masanga ahung boh khup’in,

15 “Kapu, kachapa lung set’in! Abuh thi ahin, abang le meilhum sung’ah, abang kom l etwilah a aleh lut jin, athoh gim behseh tai.

16 Naseijuite henga kahin pui vangin aboldam theipouve,” tin ataove.

17 Jesun, “Vo tahsan bei khang lamvai mite! Itih chan ka-umpia kakho ngaiding nahiuvem? Chapang pa chu hinpuiyun!” ati.

18 Lhagaoboh chu Jesun haphoa apho leh, hichepet tah chun chapang a konin ahung potdoh paiyin chapang pa adamtai.

19 Seijuite guh thim chan Jesu henga ahungun, “I-ati leh keihon kanodoh jou louvu ham?” tin adongui.

20 Jesun, “Natahsan lhom je-u ahi, tahbeh a kaseipeh nahiuve, tah sanna ankam mu te neijong leu chun hiche molsang jah a hin, ‘Hikoma konin khukoma kichonin,’ tijongleu chun kichon jeng ding ahin, imacha bolmo nanei lou diu ahi.

(21 hitobnag hi an ngol’a taona beiyin asoh doh theipoi,)” ati.

 

Jesun athi idng avelsei kit

(Mk 9:30-32; Lk 9:43b-45)

22 Seijui chengse le Jesu Galilee gamsunga akilhon khom pet’un Jesun ajah-uva, “Mihem Chapa hi mite khut’a kipedoh ding ahin,

23 amahon atha diu, amavang nithum lhin ni le kikaithou kit ding ahi,” ati. Seijuite alung kham lheh jengui.

Houin kai peh dol

24 Jesu le aseijuite Capernaum a ahungu leh Houin kaidong ho ahungun Peter jah a , “Nahouhil pau hin Houin kai apehji lou ham?” tin adongui.

25 Peterin, “Apeji nai,” ati. Peter insung agalut leh Jesun ahin hou masan, “Simon iti nagel’em? Leiset lengte hin kai hihen sumlam man hijongle koi lah a don jiuvem? Gamsung mite lah a adon’um?” tin anadonge.

26 Peterin, “Gamchom mite lah a,” ati. Jesun, “Achutile gamsung mite ongthol’a hita chula.

27 Hijongle kaidong ho lung himo louna din Twikhanglen achen nga gakoi le chun, nakoi doh masah pen chu akamsung kel le chun itokham bep sum namu ding ahin, hichu choiyin gapetan,” ati.

17.1-5: 2Pet 1:17-18.

17.5: Gn22:2; Dt 18:15; Ps 2:7; Is 42:1; Mt 3:17:12:18; Mk 1:11; Lk 3:22.

17.10: Mt 4:5.

17.12: Mt 11:14.

17.20: Mt 21:21; Mk 11:23; 1Cor 13:2.

17.24: Ex 30: 13; 38:26.

Matthew sut Kipa na Thupha Bung 18

 

Alenpen chu koiham

(Mk 9:33-37; Lk 9:46-48)

1 Hichepet hin seijuite Jesu henga ahungun, “Van a lenggama lenpen chu koi ham?” tin adongui.

2 Jesun chapang khat akoulut’in, alai lunguva adinsah-in,

3 “Dihtah a kaseipeh nahiuve, nakikhel hel’uva chapang ho toh nabah louvu leh van a Lenggama lut pouvin nate.

4 Hiche chapang te bep a kigel’a kineosah a ki-ngaitom chan chu van a Lenggama alen a pang ding ahi.

5 Chule kamin a hitobnag chapang khohsah chun Keima eisan ahi.

 

Chonset lo na thei lhepna

(Mk 9:42-48; Lk 17:1-2)

6 “Koi hile aneocha hokhat tansan sudoiya chu angonga sumhei song lentah kikhai hen Twikhanglen akileh lut le ama din aphajoi.

7 Ohe vannoi mite nadau ahi! Ajeh chu mihemte tansan suhoi thei thil tampi aum’e. Kipalna chu hung umtei ding van gahin, hichea kipal lhuhna bol’a chu ada na-e!

8 “Nakhut ham nakeng hamin naahsan aduh doi leh tan bong in paimang jengin. Khut l ekeng kim a tonsot mitmo meidil’a nakile lut sangin khut lan gle keng lang beiya hin naa lut ding aphajoi.

9 Namit’in nakipalsah jong lekaldoh in pai mangin! Mit ni neiya damun meidil’a nakile lut sangin mit lang chon hin naa lut le chun aphajoi.

Kelngoi mansah thulem

(Lk 15:3-7)

10 “Hiche aneocha ho khat nahsahmoa nabol louna diuvin vhing theiyun; kaseipeh nahiuve, van a um avantilteuvin ka-Pa mai amu jingui.

(11 Ijeh-inam itile Mihem Chapa chu amangsa huhing dia ahi.)

12 “Iti nagel’um? Mi khat’in kelngoi ja khat neihen, khat pen pen che mang taleh, somko le ko chu molvuma dalha a che mang khatseh chu aahol lou ding ham?

13 Kaseipeh nahiuve, agamudoh teng ache mang lou somko le ko sangin amukit khatseh chunga akipah joi.

14 Hiche bangchun hiche aneocha ho khat man ding hi van a um naPau lungdei ahipoi.

Chonset bol sopi

(Lk 17:3)

15 “Nasopi nachunga achonset tah leh, chen lang achangseh a aumpet’in athemmona gaphoh-in. Napho  angai leh sopi neikit nahitan;

16 angai lou vang leh, Pathen lekhabua, ‘Mi ni le thum hettohsah a kichai thei ding,’ kiti dungjuiyin michom khat le ni puiyin chen.

17 napuiho thu geiya angai loule Houbung henga thulhut’in. Houbung thu geiya angai lou vang leh chidang namdang  le kaidong ho bolna bangin bol tan.

 

Gah chah le phalpeh

18 “Dihtah  akaseipeh nahiuve, ipi hijongle leiset’a nakhau chu van a jong kikhah ding, leiset’a nahon’u chu van a jong kihong ding ahi.

19 “Kaseipeh kit nahiuve, leiset’a mini lung kitoh tah a nataovu leh van a um ka-Pan nabolpeh tei diu ahi.

20 Ajeh chu hoikom hileh kamin a ni le thum nakikhopna chan’uva ka-umpi jingui,” ati.

 

Mi ngaidam theilou lhachapa

21Peter Jesu henga ahungin, “Pakai, kasopi kachunga chonse se jeng tahleh ijat vei ka-ngaidam ding ham? Sagi vei gei ham?” tin adonge.

22 Jesun adonbut’in, “Ken, ‘Sagi vei gei’ katipoi, sagi mun som sagi geiyin katibouve.

23 Ijeh-inem itile van aLenggam chu asohte sum chin suhto ding goa lengpa to tekah thei ahi.

24 Sum asuto pantan, talent sangsom bat soh khat ahinkai lut’un,

25 soh pan sum sahna ding aneilou hel phat’in ama jong ajinu le achate, anei jouse jong joh a abat sah doh sah tei din apupan thu alhuhsah tai.

26 Chutah chunsohpa jong akoma aboh khup’in adilsun, ‘Nei ngah ta din abonchan sadoh kit nange,’ tin ataotai.

27 Chuphat’in apupan sohpa chu alungsen abat jouse angaidamin, alhadoh tai.

28 “Hiche sohpa hi apotdoh doh-in asoh chanpi ama denarii ja khat bat’a chu atoh khan, atuh chah denin, alol ameh peh-in, Nabat chu neipen,’ tin anotai.

29 Asoh chanpi pa jong boh khup’in adil sun, ‘Nei ngah ta din sadoh kit nange,’ tin ataove.

30 Ahivangin aman anop peh pon, abat chengse asahdoh kahsea din songkul’a agakhumtai.

31 Aumchan hi soh dang hon amu phat’un alung himo lheh jengun, athilsoh ho chu apu pau aseipeh tauve.

32 Apupan hiche sohpa chu akoulut’in ajah a, ‘Soh gilou, kahenga natao tao jeh a nabat chengse kamoh ngaidam nahita me!

33 Ken kalai natpi banga nang in jong nasoh chanpi chu nalai natpi ding hilo ham?’ tin aphoh tai.

34 HIti hin apupa alung hang jah-in abat chengse asahdoh kahsea din mi bol genthei ho khut’a apedoh tai.

35 “Nang hon jong lung giltah a nasopi na-ngaidam louvu leh van a um ka-Pan hitobanga chu nabol diu ahi,” tin Jesun aseiye.

18.1: Lk 22:24

18.3: Mk 10:15; Lk 18:17,

18.8: Mt 5:30.

18.9: Mt 5:29.

18.11: Lk 19:10.

18.15: Lk17:3.

18.16: Dt 19:15.

18.18: Mt 16:19; Jn 20:23,

18.21-22: Lk 17:3-4.           *Denarii= Sum

Matthew sut Kipa na Thupha Bung 19

(Mk 10:1-12; Lk 16:18)

1 Jesun thu hicheng asei jouvin Galille gam dalhan Jordan luigal Judea gamsung alhungtai.

2 Mi tamtah-in ajuiyun, hikoma chun Aman ana jouse aboldamtai.

3 Pharisee mi phabep ahungun apatep nan thu khat adongun, “I-lou them a min ji ada jeng ding hi Dan ngai hinam?” atiuve.

4 Jesun adonbut’in,  “Hiche thua hi ‘Semtil’a pat Asempan pasal le numeiya asemsa ahi,’ kiti Pathen lekhabu nasim khah louvu ham?

5 Chule “Hijeh a hi min anu le apa dalha a ajito kigom ding ahin, amani tikhat hilhon ding ahi,’ kiti ahi.

6 Hichea hi amani pum ni hita louva pumkhat hilhon ding ahi. Hijeh chun Pathen gopsa chu mihemin sukhen hih hen,” ati.

7 Pharisee hon, “Ahile i-bol’a Mose’n, ‘Min ajinu ada leh da na lekha pehen sol hen.’ atiham?” atiuve.

8 Jesun adonbut’in, “Nalungtah jeh-uva Mose’n jida ding naphal peh-u ahibouve, semtil’a chuti ahipoi.

9 Kaseipeh nahiuve, mito ajon jeh tilouva aji daa numei dang kichenpi chan chu mito jong ahi bouve,” ati.

10 Jesu seijuiten ajah a, “Pasal le ajinu chung changa chuti ahi vang leh jinei da phajoi,” atiuve.

11 Jesun adonbut’in, “Mi jouse jop thei ahipoi, Pathenin chuti dia agon hon bou ajop theiye.

12 Ajeh chu apen a thaidepsa peng aumin, mihem semthua nukiso loi aumin, chule van a Lenggam jal’a ama kibol aumin, koi hile ajop thei dol’in jop hen,” ati.

Jesun chapang neoho phatthei aboh

(Mk 10:13-16; Lk 18:15-17)

13 Achunga khut ngap’a taopeh din mihon chapang phabep Jesu henga ahin puiyui. Chapang hinpui ho chu seijuiten haphon anaphoh ui.

14 Hinla Jesun, “Chapang ho chu kahenga hinsol’un jada hih-un, ijeh-inem itile van a Lenggamchu amaho tobangte bou chang diu ahi,” ati.

15 Jesun chapang ho chunga khut angamin apotdoh tai.

Khangdong mihaopa

(Mk 10:17-31; Lk 18:18-30)

16 Veuvin pasal khat Jesu henga ahungin, “Houhil tonsot hin na kanei theina dia thilpha itobang kabol ngaiyam?” tin adonge.

17 jesun, “Itobnag thilpha nei doh ham? Apha Khatseh bou aum’e! Tonsot’a nahin nom le Thupeh chengse nit’in,” ati.

18 Aman Jesu jah a, “Hoipen chu am?” ati. jesun adonbut’in, “tol that hihin, mito jong hih-in, gucha hih-in jouvin hettohsah dan,

19 nanu napa jabol’in, chule nang naki-ngailut bangin naheng nakom ngailun,” ati.

20 Khangdongpan adonbut’in, “Hichengse chu kahin nit jing nai, ipi kabol lou um nalaiyam?” tin adonge.

21 Jesun ajah-ah, “Chamkimsoh ding nadeileh chen lang nanei jouse gajoh-in, sum chu vaicha gentheite to nan neiyin, chutileh van a gou nanei ding ahi; chujo tneg neihin juitan,” ati.

22 Khangdongpan athusei ajah phat’in, gou haotah ahijeh-in lung himo tah-in ache mangtai.

23 hijeh chun Jesun aseijuite jah a seiyin, “Tahbeh a kaseipeh nahiuve, mihoa dia van a Lenggam alut hah sa lheh ding ahi.

24 Kaseipeh kit nahiuve, mihao Pathen Lenggam a lut sangin heobil hom a sa-ngongsao lut ding abaijoi,” ati.

25 Seujuiten athu chu adatmo behseh jengun, “Achutile koi huhhinga umjou ding hitam!” atiuve.

26 Jesun avechang mel’in ajahuvah, “Mihem bol dia vang hithei louhel ahin, Pathen din ijakai ahithei doh keiye,” ati.

27 Peter apotdoh-in, “Ven, keihon ima jouse dalhan nanung kahin juiyun, achutile keiho i-kati diu ham?” tin adonge.

28 Jesun ajah-uva, “Dahtah a kaseipeh nahiuve, ahug lhung khangthah a chu Mihem Chapa loupitah  aLaltouna atou teng, nang ho kanung jui chengse laltouna som le nia touva, Israel phung som le ni thu natan diu ahi.

29 hitia chu koi hijongle kamin jal ‘a in le lou, sopi ule nao, nu le pa, cha le nao chule gam leiset geiya dalha jousen ajat ja khat cheng amubea, tonsot hin na aneitei ding ahi.

30 Amavang amasa tamtah nkhah ding, anukhah tamtah masa ding ahi.

19.4: Gn 1:27, 52.

19.5: Gn 2:24.

19.7: Dt24:1-4; Mt 5:31.

17.9: Mt 5:32; 1Co 7:10-11.

19.18: Ex 20:13-16; Dt 5:17-20.

19.19: Ex 20:12; Dt 5:16; Lv 19:18.

19.28: Mt 25:31; Lk 22:30

19.30: Mt 20:16; Lk 13:30.

 

Matthew sut Kipana Thupha Bung 20

 

Lengpi leiya natong ho

1 “Van a Lenggam chu mihao khat jingpi tah a kondoh a alengpi leiya natong dia tha hol’a chepa tobang ahi.

2 Thahol pa chu natong ding ho to, nikhat tohman Denarii* khat din akinop touvin, alengpi leiya natong din asoltai.

3 Vai nunga apotdoh kit leh kailhang dunga mohseh a ding ho amun,

4 ‘Nang ho jong lengpi leiya kon’uvin natoh man diuva kilombep pe nang’e tin asol kit’e.

5 Amaho akontauve. Sunkim don le nilhangkai donin jong apotdoh kit leuvin hito bangma chun agabol kit’in ahi.

6 Vaiche kontah a jong apotdoh leh midang hitobanga ding ho agamudoh kit’in, amaho jah a jong, I-bol’a nilhum keiya hikoma mohjeh seh  a ding nahiuvem?’ atileh;

7 amahon, ‘Koima eigoi diu um louva,’ atiuve. HIche ho jah a jong, ‘Nang ho jong lengpi leiya kon’uvin,’ ati.

8 “Nilhah phat’in lengpi lei nei pan natoh vaibolpa jah a, ‘Natong ho koukhomin, akon nukhah pen a pat akon masa pen geiyin atoh man’u petan,’ ati.

9 Vaiche phat’a kon ho ahungun Denarii khat cheh akisantauve.

10 Akon masa pen hon asan tam tei diu gingcha ahunguleh, amahon jong Denarii khat cheh akisan bouvui.

11 Akilah vangun mihaopa chunga aphun cheh-un,

12 “Keihon sun nilhum keiya na kitonga nisa hah lai kithoh lhum keiya, hiche nidan khat seh tongho toh kibangin tohman neipeuve,” tin aseiyui.

13 “Mihaopan adonbut’in alahuva mi khat jah a, ‘Golapa, ken adih lou kabolpoi, Denarii* khat bou lo dinga ikinopto lhon hilouham?

14 Natohman kilah-in chetan. Akon nukhah pen pa jong nang kapeh jat jat kapeh nom ahin,

15 kanei chu kadei dei ya kabol thei lou ding ham? Kaphat jeh a hi neimit thip ngap hitam?’ ati.

16 “Hitobanga chu amasa tamtah nukhah ding, anukhah tamtah masa ding ahi,” ati.

 

 

Jesun athi ding asei masah thumna

(Mk 10:32-34; Lk 18:31-34)

17 Jesun Jerusalem ajonin lampi dunga seijuite chu achomin apuidoh-in achepum pum’un ajah-uva,

18 “Veuvin, Jerusalema icheuvin, hikoma chu hihon Mihem Chapa hi Thempu pipu ho le Danthu them ho apeh doh diu, amahon tha ding pha asah-uva,

19 kichepna anei diu, ajep’uva thingpel’a khetbeh dia chi dang namdangt eapeh doh diu ahin, hijongle nithum nia ama kaithouva umtei ding ahi,” ati.

 

Jacob le John nu thil ngeh

(Mk 10:35-45)

20 Zebedee chapate ni anun apuiyin Jesu henga aboh khup’in ngeh khat neiyin ataove.

21 Jesun, “Ipi nadeiyem?” tin adonge. Amannun, “Leng nahi tneg hiche kachapate ni najet naveiya tou sah idn teppeh-in,” ati.

22 Jesun, “Nathumu hi nahet louvu ahi. Nangin kadon ding khon a hi nadon ngam lhon idng hinam?” ati. Amanin, “Ka-ngam’e” ati lhon’e.

23 Jesun kakhon a hi nadon tei lhon ding vang  ahinan, hijongle kajet kaveiya tousah ding vang hi Kei peh thei ahipoi; hiche touna hi ka-Pan gonsa akoipeh miho tou ding ahibouve,” ati.

24 Seijui somni hichu ajah doh phat’un ucha te ni chugna alung himotauve.

25 Ahivangin Jesun amaho akouvin, “Chidang namdangte lah a vaipoten amite chunga thu aneiyuva, alamkaiteuvin atha neinau ajedoh jing naheuve.

26 Nang ho lah avang chuti lou ding ahi,  koi hileh nalah-uva alenpen hinom chu nalha chauva panga,

27 achungnung pen hinom chu nasohuva pang ding ahi.

28 Hitobanga chu Mihem Chapa jeng jong jen dinga hung ahipon, ajen ding le mitamtah lhatdamna a ahinkho toh doh dia hung ahibouve,” ati.

 

Jesun mitcho ni kho amusah

(Mk 10:46-52; Lk 18:35-43)

29 Jesu le aseijuiten Jericho khopi agah dalhah-u leh mi tamtah in ajuiye.

30 Mitcho ni lampama anatouvin, Jesun ahin hopa chu aja lhonin, “Vo David Chapa kapu, neilungset’in,” tin asam lhon’e.

31 Amani chu mipin pho thip din agouve. Amanin la ahasap cheh kit lhonin, “David Chapa neilungset’in!” ati kit lhon’e.

32 Jesu adingin amani chu agah kouvin, “Ipi eibolpeh-in nati lhon ham?” ati.

33 Amanin, “Kho neimusah lhonin kapu!” atilhone.

34 Jesun alainat pin, amit lhon akhoipeh leh, kho amu thei pai jeng lhonin, Jesu nung ajui lhontai.

20.8: Lev 19:13; Dt 24:15.

20.16: Mt 19:30; Mk 10:31; Lk 13:30.

20.25-26: Lk 22:25-26,

20.26-27: Mt 23:11; Mk 9:35; Lk 22:26.

Matthew sut Kipana Thupha Bung 21

Jesu loupi tah a Jerusalem alut
(Mk 11:1-11; Lk 19:28-40; Jn 12:12-12-19)

1 Jesu le aseijuiten Jerusalem anai lam tauvin, Olive lhanga Bethphage kho ahung geitauve. Hichea hin Jesun seijui ni asol masan,
2 “Namasang khoa khun lut lhon le chun sa-ngan khat anouto kihen tha mupai lhonin nate; hinsut’in hinkai lhonin.
3 Mi khat touvin i-khat asei leh, ‘Aneipan angaichat ahi,’ ti lhon le chun, aman hinlhah peh lhontannate,” ati.
4 Hiche hi Themgao kama kiseisa:
5 “Zion khopi seipeh-un, Ven, na -Lengpan na hinjon’e! Lung nengtah-in sa-ngan chunga atouvin, Sa-ngan nou chunga atouve,” kiti chu guilhung ahitai.
6 Seijuite ni achen, Jesun ahil bang bangin agabol lhon’e.
7 Sangan le anou ahinkai lhonin, achunga pon aphauvin Jesu atouve.
8 Mitamtah-in lampi dunga pon aphauvin, abangin theoboh alham’un, lam dunga aphauve.
9 Jesu nung le maa kijot mipin, “Pakai min a hung pa anun nom’e! David Chapan huhing hen!” atiuve.
10 Jesu Jerusalem khopi sung alut phat’in, “Hiche Pa hi hoi, koi hitam!” atiuvin, khopi sung akiloh soh jengui.
11 Japin, “Galilee gam Nazareth khoa hung kon Themgao Jesu ahi,” atiuve.

Jesun Houin asuh theng
(Mk 11:15-19; Lk 19:45-48; Jn 2:3-22)

12 Jesu Houin a alut’in, asunga thiljoh ho leh thil cho ho anodoh soh keiyin, sum lheng ho dokhang jouse alekhup peh-in, vapal joh ho touna jong alekhup peh soh keiye.
13 Chule miho jah a aseiyin, “Ka-in chu taona in kiti ding ahi, tia kisun ahin, nang hon michom ho gebuhin nasemtauve,” ati.
14 Jesu Houin a aumpet chun mitcho ho le elbai ho ahenga ahungun, Aman abonchan aboldam soh keiye.
15 Thempu pipu ho le Danthu them hon thil kidang aboldoh chengse chu amu’vin, chule Houin sunga chapang hon kho asap’uva, “David Chapan huhing hen” atiu chu ajah phat’un alung hangun,
16 Jesu jah a, “Hite ho hin ipi aseiyu najah nah em?” atiuve. Jesun, “Kaja nai, ‘Naosen ho le noi chep lai ho kamsunga konin vahchoina nachamkimsah tai,’ kiti Pathen lekhabu chu nasim khah louhel’u ham?” ati.
17 Jesun mipi adalhan, khopia konin apotdoh-in Bethany kho ajonin, aga jan geh tai.

Jesun theichang phung agaosap
(Mk 11:12-14, 20-24)

18 Jingkah a Jesun khopi lam ahinjot leh agilkel pantai.
19 Hichun lampam a theichang phung khat amun, agavet leh ana tilou aga amupoi. Hijeh chun theichang phung jah a, “Imatih chanin ga kit hih beh-in,” tia agaosap leh, hichepet tah chun agop jenge.
20 Seijuiten amudoh phat’un kidang asa behseh jengun, “I-atileh theichang phung gop jeng hintem?” atiuve.
21 Jesun ajah-uva, “Dih tah a kaseipeh nahiuve, lung opkai louhel’a natahsanu leh theichang phung kibolna tobang keo hilouva hiche molsang jah a khun, ‘Kichon doh-in lang Twikhanglen a kileh lut tan,’ tijongleu chun hithei jeng ding ahi.
22 Hitia chu tahsan tah a nathum chan namu jeng diu ahi,” ati.

Jesu thanei dol’a thudoh

23 Jesu Houin a alut’a thu ahil pet’in Thempu pipu ho le upate ahungun, “Ipi tha neina a hiti ho hi nabol’a, hiche thuneina hi koipenin napeh ham?” tin adongui.
24 Jesun adonbut’in, “Kenjong thu khat dong ung ting naseidoh theiyu leh ipi tha neina kaneiye hiti ho hi kabol seipeh nau ivnge.
25 John baptize bolji pa hin bol theina van a kon alah ha mihem a kona alah ham?” ati. Chuphat’in amaho le amaho akinel’un, ‘Van a kon ahi,’ tileu hen la, ‘Achutile i-bol’a natahsan dau am?’ tin tin!
26 ‘Mihem a kon ahi,’ ti ding la japi kichat aumin, ajeh chu mi jousen John chu Themgaova agel cheh ahi,” atiuve.
27 Hijeh chun Jesu jah a, “Kahepoi,” atitauve. Jesun ajah-uvah, “Kahepoi,” atitauve. Jesun ajah-uvah, “Kenjong ipi thaneina jeh a hiche ho kabol sei peh deh pou vinge.
Chapa ni thulem

28 “Iti nagel’um? Pasal khat’in chapa ni aneiyin, apeng masa pa jah a, ‘Chapa, tunin lengpi leiya konin lang na gatongin,’ ati.
29 Achapan, ‘Kon ponge,’ ati. Ahinla chom khat jouvin lung aheiyin akontai.
30 Mipa chu achapa khat joh henga achen hitobangma a chu agaseileh, ‘Kon nange hepa,’ atin, konla akonpoi.
31 Amani koi joh hin apa dei abol ham?” ati. Amahon, “Apeng masapan,” atiuve. Jesun ajah-uvah, “Tahbeh a kaseipeh nahiuve. nang ho sangin kaidong ho le noti ho Pathen Lenggama alutmasajo tauve.
32 Ijeh-inem itile John chun adih a hinje lampi nahil’u ahitan, natahsan pouve; hichea hin kaidong ho le noti hon anatahsan’ui. Ama namutah vangun lungheiyin natahsan deh pouve.


Lengpi leiya natong ho

(Mk 12:1-12;Lk 20:9-19)

33 “Thulem khat ngai kit’uvin: mihaotah khat’in lengpi lei khat abol’in, akimvel’a tho akaiyin, lengpiga chilna leiko alaiyin, loubuh asan, kemsang adoi. Chuin lengpilei chu aleibol ho ngansen kholgama achetai.
34 Theiga lo phat’in lengpiga po din aleibol ho ngansen kholgama achetai.
35 Lengpilei bol hon asoh te chu aman’un abang avouvin, abang athat’un chule abnag songin asep’ui.
36 Chuin asol masah sohte sanga tamjo asol kit vangin, amahon abol ngai bang bangin anabol’ui.
37 Akhon na keiyin, ‘Kachapa beh jabol teiyunte,’ tin lengpilei bol ho henga achapa asoltai.
38 Ahinla lengpilei bol hon achapa amudoh phat’un, ‘Hichepa hi agoulo dingpa ahi,’ that’u hitin agou eiho changute,’ akitiuvin,
39 aman’un lengpilei polama akaidoh-un athat tauve.
40 “Lengpilei neipa  chu ahung teng aleibel ho chu i-lotan tem?” ati.
41 Amahon, “lengpilei neipan hiche migilou ho chu engbol’in tin asuhgam ding, lengpilei chu aphat cha aga pethei lengpilei bol thei dang khat petante,” atiuve.
42 Jesun ajah-uva,” Pathen lakhabua: ‘Insa hon deimoa apaiyu song chu. In-ning songkhom det penin apangtai! Hiche hi Pakai thilbol ahi, Imit mu’vin thil kidangtah ahi,’ kiti lai chu nasim khah louvu ham?
43 “Hijeh a chu kaseipeh nahiuve, Pathen Lenggam chu nakilah peh-uva apunbe sah thei nam mite kipedoh ding ahitai.
44 Koi hile hiche song chunga kitat kha chan chu kisep chip jeng ding ahin, alhah khah pen pen jong atagep jeng idng ahi,” ati.
45 Thempu pipu ho le Pharisee hon Jesu thulem sei ajah phat’un, amaho gotna asei chu ahedoh tauve.
46 Ahinla mat dia agot vangun mipi akichauve. Ajeh chu mipin Jesu chu Themgaova angaito cheh u ahi.
21.5: Zec 9:9.

21.9: Ps 118:25-26,

21.13: Is 56:7; Jes 7:11.

21.16: Ps 8:2.

21.21: Mt 17:20; ICo 13:2.

21.32: Lk 3:12; 7:29-30.

21.33: Is 5:1-2,

21.42: Ps 118:22-23.

 

Matthew sut Kipana Thupha Bung 22

Mou kipui golvah thulem
(Lk 4:15-24)

1 Jesun mipi henga thulemin aseikit’in,
2 “Van a Lenggam chu achapa dinga jinei golvah bol ding goa lengpa khat tobang ahi.
3 Golvahna lha dia ki-ngeh chengse koukhom dia lengpan asohte asol vangin koima ahung pouve.
4 Soh dang phabep asol kit’in, ‘Akikou ho jah a, “Bongchal ho le gancha thaotah tah kathat’in golvah ankong akigong tupsoh tai, golvahnaa hung lha cheh-un,” ati gatiuvin,’ ati.
5 Ahinla akikouhon imachan agelpouve, abang louva akonin, abang ma kinchom choma achen,
6 adangin ma asohte chu aman’un, melse tah-in avouvin athat tauve.
7 Lengpa alung hang behseh tan, asepaite asol’in mithat ho asugamin, akhopiu ahalvamtai.
8 Hichun asohte jah, ‘Kichen golvah akigong soh tai, ane dia kikouho la ahungpon,
9 cheuvin lan gkhopi kelkot phunga namuphah chanu koi hileh golvah an ne din hinkhom’un, ati.
10 Sohte chu lamlen dunga acheuvin, amu phah chan, mise mipha ahinpuiyule kichen golvahna ami adimset tai.
11″Lengpan akikou jin ho ahung vet leh moupui golvah vonbei khat amudoh-e.
12 Ajah a, ‘Jol, moupui golvah vonbeiya iti hung lut nahim?’ ati vangin, ama la athip beh jenge.
13 Hichun lengpan lhacha ho jah a, “Akhut akeng kan’un lang polam muthim lah a paidoh-un, hikoma chu kap le hagel gel’a um ding ahi,’ ati.
14 “Akikou atam lheh nan lhen doh vang lhomcha ahi,” ati.

Kaipeh thudol’a thudoh

(Lk 12:13-17; Lk 20:20-26)

15 Pharisee ho apotdoh-un Jesu chu alona je khat het’a kinelpia kipalsah din akihou lhiuve.

16 Pharisee hon aseijuiteu phabep le Herodia loi phabep asol thauvin, “Houhil, nang hi midih nahin, Pathen lampi dih tah nahil’in, mile mi kah a dat naneipoi, chule mihem polam maiput gin nanei lou kaheuve.

17 Ahile Caesar henga mikai kipe hi dih hai dih lou ham? Iti nagel’em?” tin adongui.

18 Athilse gonu chu Jesun ahen, “Mipha lhem ho! Ibol’a kipalsah ding neigot’u ham!

19 Mikaiya napeh-u sum chu neivetsah-un!” ati.

Sum chu ahinchoi phat’un,

20 Jesun “Hiche suma hi koi lim le koi min chong-am?” ati.

21 Amahon, “Caesar lim le min,” atiuve.

Hijeh chun Jesun “Ceasar a chu Caesar peuvin, Pathen a chu Pathen petau,” ati.

22 Hiche hi ajah phat’un kidang asa lheh jengun, Jesu dalhan achetauve.

 

Mithi thokit thudol’a thudoh

(Mk 12:18-27; Lk 20:27-40)

23 Hiche ni ma ma chun mithi thokit tahsan lou Sadducee loi Jesu henga ahungun,

24 “Houhil, ‘Pasal khat cha neilouva athi leh asopipan ajinu avetpeh a chi akhaipeh ding,’ tin Mose’n aseiye.

25 Kalah-uva sopi pasal sagia peng aum’un, a-upapen ajine leh cha neilouvin athin, ajinu anaopa vet din adalhatai.

26 Asopite chu nina pa, thumna pa, aban bain sagina geiyin athisoh hel tauvin ahi.

27 Achaina keiyin numei nu jong athitai.

28 Hichea hin thokit nil eh numeinu hi koipen ji hitan tem? Ajeh chu aboncha jia anei cheh-u ahi,” atiuve.

29 Jesun adonbut’in, Pathen lekhabua thu hihen, Pathen thahat hijongle nahet pen’u aum loujeh a nakhel del’u ahitai.

30 Ijeh-inem itile thokitnaa chu nu le pa kichen jong umlou, chen jong akichensahlouvu ahitan, van a Vantilte tobang ahitauve.

31 Hiti hin mithi thokit thudol ahileh Pathenin naseipeh sau chu nasim khah louvu ham?

32 ‘Keima Abraham Pathen, Isaac Pathen, chule Jacob Pathen kahi,’ atilou ham? Pathen chu mithi ho Pathen ahipon, miheng ho Pathen joh ahi,” ati.

33 Mipin hiche hi ajah phat’un athuhil kidang asa behseh jengui.

Thupeh lenpen

(Mk 12:28-34; Lk 10:25-28)

34 Jesun Sadducee ho anel khup del jeng phat’in Pharisee ho akikhom’un,

35 alah-uva Danthu them khat’in apatep nan,

36 “Houhil Danthu lah a thupeh lenpen hoiche ham?” atin adonge.

37 Jesun adonbut’in, “Nangman Pakai na-Pathen chu nalungthim pum pia, nahinkho pumpia chule nahet theina pumpia na-ngailutding,’ kiti ahi.

38 Hiche hi thupeh lenpen leh amasapen ahin,

39 thupeh lenpen nina chu: ‘Nang naki-ngailutbanga naheng nakom na-ngailut ding,’ kiti ahi.

40 Thupeh hiche te nia hi Danthu pumpi le Themgaote thuhil ki-ngamsoh kei ahi,” ati.

 

David Chapa hidoh’a thudoh

(Mk 12:35-37; Lk 20:41-44

41 Pharisee ho ahung kikhop phat’un Jesun amaho chu adongin,

42 “Messiah thudol iti nagel’um? Koi chilhah ham?” ati.

Amahon, “David chilhah ahi,” atiuve

43 Jesun “Iti hinte ahile, Lhagao haikhum jal’in David jengin jong Ama chu, ‘Pakai,’ asah-in;

44 ‘Pakai chun ka-Pakai jah a, namelmate nakeng chotpha kakoisoh masangsen Kajet lama tou jingin,’ atin;

45 David-in Ama chu ‘Pakai atileh, Messiah chu achilhah a iti pen thei ding ham?” ati.

46 Jesu thudoh chu koman cheng khat chan jong adonbut thei pon hiche nia pat chun koiman jong ima adong ngam tapouve.

22.13: Mt 8:12; 25:30: Lk 13:28.

22.23: Ac 23:1.

22.24. Dt 25:5.

22.32:Ex3:6.

22.35-40: Lk 10:25-28.

22.37: Dt 6:5.

22.39: Lv 19:18.

22.44: Ps 110:1.

 

Matthew sut Kipana Thupah Bung 23

Jesun Danthu them ho le Pharisee ho aphosal

(Mk 12: 38-39; Lk 11:43, 46; 20:45-46)

1 Jesun mipi le aseijuite jah a,

2 “Danthu themho le Pharisee ho hi Mose Danthu hilchen a pang ahiuvin,

3 ipi hijongle naseipeh-u nit’un bol jong bol’un, amaho chon bangin vang chondauvin.

4 Amahon pohgih hahsa akan’un milengkouva aputsah-uvin, akhut jung jeng chan jong akhoiloh dong agoupouve.

5 Abol atoh chanu mi mitmu din bou abol’un ahi. Danthuchih bom akibuu le akibeh chengseu chu apeh aletsah-ui.

6 Golvahna le Houthua kikhopna in dunga touna pipen adeiyun,

7 kailhangdunga min salam abol’a, ‘Rabbi,’ ati diu bou adeiyui.

8 Nang hon vang mi, ‘Rabbi,’ kitisah hih-un, ajeh chu Houhil khat bou naneiyun, naboncha sopi cheh nahiuve.

9 Leiset chunga koima, ‘Pa,’ sah hih-un, van a na-Pau khat bou aum’e.

10 Miho, ‘Lamkai,’ kitisah dauvin, lamkai khatseh, Messiah chu nanei nauve.

11 Nalah –uva alenpen chu nalhachauva pang ding ahi.

12 Mi ama kichoi sang chu kisunem ding, ama kineosah chu kichoi sang ding ahi.

 

Jesun phat lhemna adeimo

(Mk 12:40; Lk 11:39-42, 44, 52, 20:47)

13 “Ohe, danthu them ho le Pharisee mipha lhem ho nadau ahi! Mipha lhem ho! Miho din van a Lenggam kot nakhah tan’un, nang ho la nalut thei deh pouvin, lut dia kigo ho geiyin nalutsah pouve!

(14 Ohe Danthu them ho le Pharisee mipha lhem ho nadau ahi! Meithai ho in dunga sottah tah nataovun nabahgam jiuve. Hijeh a chu genthei hesoh chungnung nathoh diu ahi.)

15 “Ohe, Danthu them ho le Pharisee mipha lhem ho nadau ahi! Mi khatseh jong Juda hou housah din Twikhanglen jousea nakitol’un, gamkai jouose nachonsoh-un, nahousah tengule nangho sanga ajat nijen khoh jon Damun jon din nasemdoh jiuve.

16 “Ohe nadau ahi, ‘Koi hile Houin pan a kihahsel chu ajeh pon, Houin a kikoi sana pan a kihahsel vang ajeh theiye,’ tia mihil lamkai mitcho ho!

17 Mitcho mi-ngol ho! Houin jeh a sana athenga kisimpi chu hoijoh thupi jom sana ham Houin ham?

18 Chuma leh, ‘Maicham pan a kihahsel vangin akijeh pon, maicham chunga kitoh thil-ho pat jeh-in je na aum theiye,’ na tiuve.

19 Mitcho ho! Maicham jeh a a thilto thenga kisimpi chu hoijoh thupijom-maicham ham thilto ham?

20 Ajeh chu maicham pan a kihahsel chanin maicham chunga kitoh thil geiya apat tha a kihalsel ahitai.

21 Hitobanga chu Houin pan a kihahsel jong chun Houin sunga Chenga Pathen apat’a kihahsel ahi.

22 Chule van pan a kihahsel’an jong Pathen laltouna min le achunga Toupa pan a kihahsel ahi.

23 “Ohe, Danthu them ho le Pharisee mipha lhem ho nadau ahi! Nang hon pudina le pa-thikhom chule jira-hicheng hi som a khat na toh jiuvin, Danthua thil khoh cheh, adih a thu tan ding, mi hepi ding le tahsan ding hicheng hi don louvin nakoi jiuve. Adang nabol’u chutoh kilhon a hicheng jong hi nabol diu ahi.

24 Lamkai mitcho ho! Nang hon thou vaisi nalhiuvin, sa-ngongsao napum val’ui.

25 “Ohe, Danthu them ho le Pharisee mipha lhem ho nadau ahi! Khon le lheng polam nasil ngim’un, asunga la phumhat’a nathil lah-u le papsetna adimset’e!

26 Pharisee mitcho ho! Khon chu asung silngim leu chun apolam jong ngim ding ahi!

27 “Ohe, Danthu them ho le Pharisee mipha lhem ho nadau ahi! Nang ho hi lhan kiloi bang, polam vet dia hoi, asung la mithigu le aboh anen ijakai dimset tobang nahiuve.

28 Hitobang hin polam vet din dihtah bangin na-um’un, nasungu vang phat lhemna le chonsetna dimse nahiuve.

Jesun mipha lhemho talen mat ding asei

(Lk 11:47-51)

29 ‘Ohe, Danthu them ho le Pharisee mipha lhem ho nadau ahi! Nang hon Themgaote lhan nasem’un, midih ho lhan khuh najem jem’un,

30 ‘Kapu kapateu khang laiya hing lileu vang Themgaote atha nauva pang kha pou vinge,’ tin na seiyui.

31 Hitobang hin Themgaote that’a pang ho chihlhah nahi nau nang hon naphongdoh tauve.

32 Napu napateu toh ban chu tong molso ngal’un!

33 Vo gulse son, gulsete! Damun a talen namat diu chu iti otdoh theiying natiu ham?

34 Veuvin Themgaote le miching ho chule Danthu them ho kahinsol peh-e, abang nathauva, abang thingpel’a nakhet beh diu, abangma Houthua kikhopna in dunga najep’uva, khotin a nadel le diu ahi.

35 Hiche naboljeh-uva hi monabei Abel thisan kisoa pat, muntheng le maicham kah a nathau Berechiah chapa, monabei Zechariah thisan kiso geiya themmona bei miho thisan, tol’a long lha ho jeh a themmona chengse nachunguva chuh lo ding ahi.

36 Kichentah a kaseipeh nahiuve, hicheng jeh a themmona chu hiche khang mite chunga chu ding ahi.

Jesun Jerusalem akacham

(Lk 13: 34-35)

37 “O Jerusalem, Jerusalem! Themgao ho that’a, akisolpeh jouse songa a sep lih-ah! Ahpin anoute ahuikhom banga ijatvei nachate huikhom ding kagot hitam! Hinla neinoppeh poi!

38 Hijeh a chu na-in kamdel’a kidalhah peh ding nahi!

39 Kaseipeh nahiuve, tua pat, ‘Pakai min a Hungpa anun nom’e,’ nati masangseuva neimukit lou diu ahitai,” ati.

23.5: Mt 6:1; Nu 15:38; Dt 6:8.

23.11: Mt 20:26-27: Mk 9:35; 10:43-44; Lk 22:26.23.12: Lk 14:11:18:14.

23.22: Is 6:1; Mt 5:34.

23.23: Lv 27:30.

23.27: Ac 23:3.

23.33. Mt 3:7: 12:34; Lk 3:7.

23.35: Gn 4:8; 2Ch 24:20-21.

23.39: Ps 118:26.

 

Matthew sut Kipana Thupha Bung 24

Jesun Houin kisuhmang ding asei masah

(Mk 13:1-2; Lk 21:5-6)

1 Houin dalha apotdoh chun Jesu henga aseijuite ahungun, Houin kisah loupije vetsah agouve.

2 Jesun ajah-uva, “Ahinai, aloupije hi vesoh keiyun, amavang kaseipeh nahiuve, song khat chunga khat kisethom hung umlou hel ding, kipehsoh kei ding ahi,” ati.

Gim genthei le bolsetna

(Mk 13:3-13; Lk 21:7-19)

3 Olive molchinga Jesu atoupeh’in guh thim chan aseijute ahungun, “Hitobang thilse ho chu ith hung lhunga, nahung kit ding phat leh lseiset kichai ding chu ipia kimel chih ding ham?” tin adongui.

4 Jesun adonbut’in, “Ching theiyun koima kilhep lhahsah dauvin.

5 Mihem tamtah kamin a hunguva, Keima Messiah kahi,’ atiuva mitampi alhep lhah diu ahi.

6 Gal kisat husa le gal kisat thukithang najah tdiu, hi jongle kicha hih-un; hitobang ho hi soh tei ding, amavang achaina hilou lai ding ahi.

7 Gam khat le gam khat kidouva, lenggam khat le lenggam chom khat kisat ding, muntin a kel lhantin, ling kihot ding ahi.

8 Hicheng hi naoso nat bang da kipatna ahi nalaiye.

9 Min namat’uva midang ho khut’a napeh diu, talen namatsah uva natha diu ahi. Keima jal’a namtinin nahotlo diu ahi.

10 Chutah le mi tampi tahsan a pull ha a, khat le khat kipedoh toa kihoto diu;

11 Themgao lhem tampi sohdoh-in tin, mi tamtah alhep lhah diu ahi.

12 Chon chatvaina pung cheh cheh-in tin, mi tamtah ngailutna dailha diu ahi.

13 Hinla akhon ni geiya thoh lhumkeiya chu huhhinga umtei ding ahinai.

14 Chule hiche Lenggam Kipana Thupha hi vannoi pumpia kiseiphonga kihettohsah ding, chu jou tengleh kichai ding ahibouve.

Thoh hahsa nasatah

(Mk 13:14-23; Lk 21:20-24)

15 “Hichejeh chun mi sumang thet umtah, Daniel Themgao kama kiseisa chu muntheng phunga adin namu tenguleh! (asim sim an he hen)

16 ‘Judea gama um chengse molsang sanga jam’u hen.

17 Inting vuma um jong insunga thilkeo kilah din kumlhah da hen.

18 Loukon jong ponsil kilah din kile da hen.

19 Ohe, chulai ta a numei agaiya le nao noi chepsah nalai ho chu ada na-e!

20 Najam cheh nau phat chu phalpi lai le Choldo nikho ahilouna din taovun!

21 Chutengle hesoh genthei chungnung hung um ding, hitobang hi vannoi kisemtil’a pat tulai geiya soh kha louhel lai ahin, hung jong hungsoh kit lou ding ahi.

22 Hiche niho chu Pathenin asuhchom lou hileh tahsa mihing khat cha jong soh cha lou ding ahi, hijeh a chu lhenchomte jal’a hiche nikho hi kisuchom ding ahi.

23 “Hichepet hileh min najahuva, ‘Ven, hiche hi Messiah ahi,’ ati ham, ahiloule ‘Hiche hi Ama ahi,’ ati ham hijongle tahsan hihuvin.

24 Ajeh chu Messiah lhem le Themgao lhem tampi hung kisem doh-un tin, ahithei le bon thenchomte geiya pui mangna dia melchihna le thil kidang nasa tah tah ahinbol diu ahi.

25 Veuvin, ahung lhun masanga kahil masah dem nahiuve.

26 “Ahilouva, ‘Veuvin, Messiah gamthip laiya aum’e,’ atiu jongle chedoh a vet din gel dauvin; ‘Veuvin indan sung nunga aum’e’ tijongleu tahsan hih-un.

27 Ajeh chu kolphe nisolama ahung phet leh nilhom lam geiya asalvah banga Mihem Chapa hung kit ding chuti ding ahi.

28 “Hoikom hileh thilong phunga muthong kikhom tei ding ahi.

Mihem Chapa hungkit ding

(Mk 13:24-27; Lk 21: 25-28)

29 “Thoh genthei hesoh nikho kichaisohtengleh nisa thim a, lha jong vah talou ding, vanlaijol’a kona ahsite pul lhan tin, van a thaneina jouse kihot lingsoh ding ahi.

30 Chutah le vanlaijol’a Mihem Chapa melchihna hung kilang ding ahin vannoi leiset phungtin a min dip le lai kidoh’uva, van meilhang lah a Mihem Chapa thanei tah le loupe tah a hung amu dingu ahi.

31 Mihem Chapa sumkon gin nasatah ho thoa Avantilte’asol ding, lhenchomte chengse van mong lang khat’a pat among lang khat geiya, kolkimvel ning lia akhop khom diu ahi.

Theichang phunga kihil ding

(Mk 13: 28-31; Lk 21: 29-33)

32 “Theichang phung hin thulem kihil’un. Ajih adot’a ana anou teng nipi naidol naheuve.

33 Hihe chun hichengse hi namu tengu leh naiya hung ding koncha ahi heuvin.

34 Tahbeh a kaseipeh nahiuve, thil hicheng hi aguilhun masangsea hiche khang hi kichai lou ding ahi.

35 Van le leiset mang ding ahin, kathusei ho vang mang lou ding ahi.

Mihemin aniho le anidan ahepoi

(Mk 13: 32-37; Lk 17: 26-30, 34-36)

36 “Hiche Nikho hi Pa tilou van a Vantilte le Chapan jong chule koimachan ahepoi.

37 Mihem Chapa hungkit hi Noah nikho lai thilsoh banga hungsoh ding ahi.

38 Noah nikho lai twisang let masang, Noah kong alut ni geiyin, mihon aneuvin adon’un, akichengun, chen jong akichensah-ui;

39 twisang lenin achup mang kahseuvin, kho helouvin aum’uve. Mihem Chapa hungkit jong chute ding ahi.

40 Chuteng mi ni louva umkhom jong khat kila khat kida lha ding,

41 numei ni sumhei khat’a chang goikhom te ni jong khat kila khat kida lha ding ahi.

42 Hijeh chun na-Pakaiyu hung ding nikho nahet loujeh-un kiging phauvin.

43 Gucha itih a hung ding inneipan heleh kiging jinga um ding, a-in aphet vangsah lou ding naheuve.

44 Hichejeh chun kiging jingin um’un, nakigin loupet tah-uva Mihem Chapa hung ding ahi.

Lhacha kitah le kitah lou

(Lk 12: 41-48)

45 “Soh tahsan um le chingtah, a-insung mite aphat cha neh le choh hoppeh dia, insung vaipoa apun anganse chu koi ham?

46 Apu hung teng hitobanga anatoh atokhah soh chu anun nom’e!

47 Tahbeh a kaseipeh nahiuve, ama chu apun anei jouse chunga vaipoa akoi ding ahi.

48 Soh gilou chun alung gel’in, ‘Kapu hungvah ponte,’ tin

49 asoh chanpi chengse deng panta hen, anop nop nehen don taleh,

50 hiche sohpa chun agel lou nikho le ahet loupet tah a apu hung ding,

51 asohpa chu tum ni asoa, mipha lhem ho talen amatsah ding, hikoma chu kap le hagel gel’a um ding ahi

24.9: Mt 10:22.

24.13: Mt 10:22.

24.15: Dn 9:27:11:31: 12:11.

24.17-18: Lk 17:31.

24.21:Dn 12:1; Rv 7:14.

24.26-27: Lk 17:23-24.

24.28: Lk 17:37.

24.39: Is 13:10; 34:4; Ek 32:7; Jo 2:10, 31; 3: 15; Rev 6:12-13.

24.30: Dn 7:13: Zech 12:10-14; Rev 1:7.

24.37: Gen 6:5-8.

24.39: Gn 7:6-24.

24.43-14: Lk 12:39-40.

 

Matthew sut Kipana Thupha Bung 25

Nu-ngah som thulem

1 “Hiche phat hileh van a Lenggam chu athaomeiyu kichoi cheh a ji nei dingpa lamto goah nu-ngah som tobang ding ahi.

2 Nu-ngah nga chu lungthimbei ahiuvin, nga chu lungthim pha ahiuve.

3 Lungthimbei hon thaomei aken vangun thaotwi akeng pouve;

4 lungthim pha hon vang athaomeiyuva det kham thaotwiya akenthauve.

5 Ji nei dingpa ahung geibehseh phat’in nu-ngah ho alu lhu’uvin, a-ihmusoh tauve.

6 “Jan khangkim laiyin ji nei dingpa ahungtai! Hungun galam touvin” akiti.

7 Chutah-in nu-ngah ho athouvun thaomei akigot tauve.

8 Hichun lungthimbei hon lungthim pha ho jah a, ‘Kathaomeiyu thaotwi aumtapoi, thaotwi them khat beh neipeuvin,’ tin athum tauve.

9 Ahinla lungthim pha hon adonbut’un, ‘Igom’uva din lhing ponte, chusangin cheuvin lang ajoh ho koma gakichoh vah tauvin,’ atiuve.

10 Lungthimbei ho thaotwi choa ache lan’un ji nei dingpa ahung paiyin, kigingsa um chengsen kichen golvahna mun’ah akijot lut piuvin, kot kikhah tai.

11 “Chom khat jouvin lungthim bei nu-ngah ho ahungun, ‘Kapu, kapu, kot neihon’un!’ tin asamtauve.

12 Ji nei dingpan, ‘Tahbeh a kaseipeh nahiuve, nang ho kahe khapoi,’ ati tai.

13 “Anikho le anidan tah nahet loujeh-un kigingun.

Lhacha thum thulem

(Lk 19: 11-27)

14 “Hiche phat hileh van a Lenggam chu khol gamla tah chedoh goa, asohte koukhoma, anei jouse asohte ngansepa thusim tobang ding ahi.

15 Soh khat chu talent nga apen, khat talent ni apen, khatma chu talent khat apen, athan ajokhop cheh-in ahoppeh-in khol’a achetai.

16 Talent nga sangpa akipat’a kiveina aneileh talent nga ma aveikan bei.

17 Talent ni sangpa akipat’a kiveina aneileh talent ni ma aveikan bei.

18 Talent khat sangpan vang lei alaiyin apupa sum chu asel tai.

19 “Phat sotpi nungin hiche soh ho pupa hi ahung kile kit tan, asohte toh som asutouve.

20 Talent nga sangpan talent nga ma ahinchoi ben, ‘Kapu, talent nga neipen, talent nga ma kavei kan bei,’ tin apetai.

21 Apun, ‘Tahsan umtah soh pha, nabol pha lheh jenge! Thil themcha chunga kitah nahin, tampi chunga vai kahomsah ding nahi. Hungin napu kipana a hung kipah-in,’ ati.

22 Talent ni sangpan, ‘Kapu, talent ni neipen, talent ni ma kaveikan bei,’ tin apetai.

23 Apun, ‘Tahsan um soh pha, nabol pha lheh jeng! Nang jong thil themcha chunga kitah nahin, tampi chunga vai kahomsah ding nahi. Hungin napu kipana a hung kipah-in,’ ati.

24 Talent khat sangpa jong ahungin, ‘Kapu, mi kikhel nahikahen, natuna louva at theiya, nathe na louva jong chomkhom thei nahin,

25 nang kagin jeh-in kachen natalent chu lei noiya kaseltai. Hiche hi nasum ma ma nakilah kit ahi,’ tin apetai.

26 Apun jong, ‘Vo soh gilou le thase! Katuna louva ka-atjia kathe na louva kachomkham ji nahet ahiye ong!

27 Kasum chu sumkolvei ho koma apung dia nanakoi leh itim? Chutileh kahung phat’a kasumpi le akan kilah that a ding!

28 Hichepa talent chu lahpeh-un lang taleng som neipa chu petauvin,

29 ijeh-inem itile aneiya kipehbea anei letset ding, anei lou vang aneisun jong kilahpeh ding ahi.

30 Chule hiche soh phachomlou hi polam muthim lah a gapai mangun, hikoma chu kap le hagel gel’a um ding ahi,’ ati.

 

Thutan khumkhana

31 “Mihem Chapa aloupinaa Vantilte toh ahung teng leh alaltouna loupe tah a tou ding,

32 namtin vaipi a-angasunga kikhom kimsoh keiya, kelngaoi chingpan keltah lah a kelngoi chengse alhendoh bang, Ama jong miho alhen khen a, achom khen ding,

33 kelngoi chengse ajet lama akhindoh a, keltah chengse aveilama akhindoh ding ahi.

34 Chutha le lengpan ajet lama umte jah a, ‘Hungun ka-Pa phatthei boh change, vannoi kisemtil’a pat nang ho dia gonsa kikoi Lenggam chu hung lo’uvin,

35 ajeh chu kakel pet’in neh ding neipeuvin, kadangchah pet’in don ding neipeuve; Kakholjin naa nei lhunsah-un,

36 ponbeiya ka-umin jong pon neisilpeh-ui. Kadammon nei hung veuvin, songkul kalut’in jong neihung vil’ui,’ ati ding ahi.

37 “Chuteng midih hon, ‘Pakai, itih a nakel pet toh khan eh ding kapeh-uva, chule nadangchah toh kha don ding kapeh khah-uvam?

38 Hoikom nakholjin na kalhunsah khah-uva, itih a ponbeiya naum kamu’va pon kasilpeh khah-u ham?

39 Itih nadammo veiset pet’a kahung vet’uva, itih a nasongkul lutpet kahung vil’uvam?’ ati diu ahi.

40 Lungpen adonbut’a, ‘Kichentah a kaseipeh nahiuve, hiche kasopite lah a aneopen khat nabol nau chu kei neibol nau ahi,’ tinte.

41 “Chuteng aveilama umho jah a, ‘Gaosap chang ho, kakoma konin potdoh’un lang Satan le avantilte dia gonsa kikoi tonsot mitmo meilhum sunga lut tauvin,

42 ijeh-inem itile kakelpet’in neh ding neipepouvin, kadangchah-in don ding neipepouvin,

43 kakholjin na a neilhunsah dauvin, ponbeiya ka-um jong pon neisilpeh pouve; kadammo la neihung ve pouvin, songkul kalut’in la neivil pouve,’ ati ding ahi.

44 “Chutah le amahon donbut’un tin, ‘Pakai, itih a keihon nagilkel, nadangchah, nakholjin, ponbeiya naum, nadammo chule songkul’a na-um kamu’va don louva kakoi khah-um?’ tin sei yunte.

45 Lengpan ajah-uva, itobang ijase  loupen hijongle hiche ho lah a khat nabol lou nau chu Keima neibol louvu ahi,’ ati ding ahi.

46 Chuteng amaho hi tantih neilou talen man dia cheuva, midih ho vang tonsot hin naalut diu ahi,” ati.

25.1: Lk 12:35.

25.11-12: Lk 13:25.

25.14-30 Lk 19:11-27.

25.29: Mt 13:12: Mk 4:25; Lk 8:18.

25.30: Mt 8:12; 22:13; Lk 13:28.

25.31: Mt 16:27; 19:28.

25.46: Dn 12:2.

 

Matthew sut Kipana Thupha Bung 26

 

Jesu thana dia thilgon

(Mk 14: 1-2; Lk 22: 1-2: Jn 11:45-53)

1 Hicheng hi ahilchaisoh phat’in Jesun aseijuite jah a,

2 “Nahet banguva ni ni jou teng Kalchuh kut hi ding, Mihem Chapa hi thingpel a khetbeh dia min apehdoh ding ahitai,” ati.

3 Hichepet hin Thempu pipu ho le upate Thempulen Caiaphas inpia akikhom’un,

4 Jesu chu doha bol’a mat ding, chule tha theina ding akihou somtauve.

5 Ahivangin, “Kut lai hida le phante, ajo le japi lah a boina um khante,” atiuve.

Bethany khoa Jesu thao anu’u

(Mk 14: 3-9; Jn 12: 1-8)

6 Jesu chu Bethany khoa Simon mipha pa ina aum pet’in,

7 numei khat’in songval hai khat’ah thao namtui manlu tah ahinchoiyin, Jesun ankong aum pet’in aluchanga asun khum’e.

8 Athilbol hi seijuiten amu phat’un alung hanguvin, “I-bol’a thao namtui hi amoh suh mang ham?

9 Sum tampi man a joh a vaicha gentheite peh khamset hi la ahin,” atiuve.

10 Jesun akihou nau ahen ajahuvah, “Idia numei nu chu nasuh lung gim’u ham? Aman thilpha tah eibolpeh ahi,

11 ajeh chu mivaicha gentheite chu nakom’uva um jing ding ahin, Keivang nakomu’va um jing ding kahi poi.

12 Aman thao namtui eisun khum hi vui ding lima eisem ahitai.

13 Tahbeh a kaseipeh nahiuve, hoikom hijongle vannoiya hiche Kipana Thupha kiseiphongna chan a athilbol jong hi amanu het jingna dia kiseitha jing ding ahi,” ati.

 

Jesu mat ding Judas anop

(Mk 14: 10-11; Lk 22: 3-6)

14 Seijui som le nil ah a khat Judas Iscariot kitipa chu Thempu pipu ho henga achen,

15 “Jesu khu matsah leu veng ipi neipe nom’un natem,” atileh, amahon, dangka somthum apeuve.

16 Hichea pat hin Judas-in Jesu matsahna thei phat kitup kom ave-lhi jingtai.

 

Jesu le seijuiten Kalchuh kut anneh

(Mk 14:12-21; Lk 22: 7-14, 21-23; Jn 13: 21-30)

17 Cholsolou changlhah kut ni masa nin seijuite Jesu henga ahungun, “Kalchuh kut an nanehna ding hoikom gago leu veng nadeivem?” tin adongui.

18 Jesun, “Khopi sunga lut’uvin pasal khatpen jah a, “Houhil’in Keidia phat kiteppeh ahung naitai, kaseijuite toh na-in a kalchuh kut an kaneh diu ahi,’ tin aseiye gatiuvin,” ati.

19 Jesun ahil bangun seijuiten abol’un kalchuh kut an chu agagong tauve.

20 Nilhah phat’in Jesun seijui som le nit oh ankong aumtai.

21 Aan neh laitah-un aman, “Tahbeh kaseipeh nahiuve, nalah-uva khat’in mi eimatsah ding ahi,” ati.

22 Seijuite alung dong lheh jengun, khat khat’in, “Keivang kahilou ahina ong Pakai?” atiuve.

23 Jesun adonbut’in, “Lheng sunga changlhah kadekotpi pa tah hin eimatsah ding ahi,.

24 Mihem Chapa aumchan ding Pathen lekhabua kisun banga soh tei ding ahin, hinla Mihem Chapa matsahna dia manchah a pangpa chu ohe adana-e! Ama chu apen a peng lou hileh ama dia phajo ta dinga!” ati.

25 Jesu pehdoh a matsah dingpa Judas chun adonbut’in, “Kei neisei ahipoi ong Houhil?” ati. Jesun adonbut’in, “Chutia nasei ahi,” ati.

 

Pakai Anjon kiphudoh

(Mk 14: 22-26; Lk 22: 15-20; 1 Cor 11:23-25)

26 An neh laitah-in Jesun changlhah alan, phatthei aboh jouvin aheh bal bal’in seijuite apen, “Kilah-un neuvin, hiche hi katahsa ahi,” ati.

27 Chuin khon chu alan, athangvah jouvin seijuite apen, “Nabonchan donsoh keiyun;

28 hiche hi chonset ngaidamna dia mi tamtah dinga kilhoh lha kathisan ahi.

29 Kaseipeh nahiuve, ka-Pa Lenggama nang ho to athah a kadon khom nikho hung lhun kit kahsea lengpiga twi hi kadon kit lou ding ahitai,” ati.

30 Chuin la khat asauvin Olive mol jonin achetauve.

 

Peterin Jesu aseilep ding kise masah

(Mk 14: 27-31; Lk 22: 31-34; Jn 13: 36-38)

31 Jesun aseijuite jah-a, “Tujan teng kachunga nakisuhmo soh hel diu ahi, ajeh chu, ‘Kelngoi chingpa kavoh lhuh teng kelngoite cheh soh diu ahi,’ tin Pathen lekhabua akisun’e.

32 Hijongle hinga eikikaithou teng Galilee gama nang ho sangin masajo tange,” ati.

33 Peterin Jesu jah a, “Midangin nadalhah soh hel jongle kenvang dalha hih hel inge,” ati.

34 Jesun Peter jah a, “Tahbeh a kaseipeh nahi, tujan ah khon masanga thumvei neiseilep ding ahi,” ati.

35 Peterin ajah a, “Nangto thitha ding hi jong leng naseilep hih hel inge,” ati. Seijui dangsen jong chutin asei cheh-ui.

 

Gethsemani hon sunga Jesu tao

(Mk 14: 32-42; Lk 22: 39-46)

36 Jesu le seijuite chu Gathsemani kiti laiya acheuvin, Jesun ajah-uvah, “Khu koma kachea kaga tao sungsen hikoma hin anatou jingun,” ati.

37 Jesun Peter le Zebedee chapa te ni akipuiyin, chuin lung gim hesoh nasa tah-in ahinphan,

38 ajah-uva, “Thina khop hel’in kalung hesoh behseh tai, hikoma hin um’un neikiginpi jngun,” ati.

39 Chuin themkhat ache chonin, tol’a mai asulut’in, “Hepa! Ahithei leh hiche khon hi Keiya konin tolmangin, hinla Kei dei hilouvin Nang lungdei joh hihen,” tin ataove.

40 Chujouvin seijui thum henga ahung leh ana-ihmut’u atoh khan, Peter jah a, “Iti nidan khat jeng jong neikiginpi jou louvu ham?

41 Lhepna nalhah louna din kigingin tao jingun, lhagaovin ago nan tahsa lahasam behseh jenge!” ati.

42 Anivei nan Jesu ache kit’in, “Hepa! Hiche khon hi kadon lousea kitol mang thei lou ahileh Nangma lung got got hita hen!” tin ataove.

43 Ahung kile kit leh, seijuite ihmutsoh behseh a ihmut mildel ahungtoh-e.

44 Seijuite dalhan athumvei chan nan agataovin, asei ngai ngai agaseiyin ahi.

45 Chuin aseijuite henga ahungin, “Ihmua kicholdo nalai nahiuvem? Veuvin phat alhingtan, Mihem Chapa hi mi chonsete khut’a apehdoh diu ahitai.

46 Kipat’un chetaute. Veuvin! Eipedoh pan kakom ahin phatai!” ati.

Jesu amat’u

(Mk 14: 43-50; Lk 22: 47-53; Jn 18: 3-12)

47 Jesun thu asei nalaiyin, seijui som le nil ah a Judas chu Thempu pipu ho le, Thempulen ho le upate hinsol, chemjam le moltum thoa hung kon, mipi toh lhonin ahung lhungtai.

48 Jesu pedoh a pangpan miho chu melchihna ahilmasah a, “Kachop pen pen chu Ama ahi, man jengun!” ati ahi.

49 Judas chun Jesu ajon jangkeiyin, “Chibai, Houhil!” tin achoptai.

50 Jesun ajah a, “Golpa, nahung lo na bol jengin,” ati. Chutah chun mipin ahindelvuhun Jesu man’un akantauve.

51 Jesu to umkhom ho khat’in chem.jam asatdoh-in Thempu pipu soh pa asat jengleh, abilkol lang khat asat lhai.

52 Jesun, “Nachemjam chu apaiya khum jengin, chemjam pan jouse chemjama lou ding ahi.

53 Tutah jenga jong ka-Pan Vantilte sang som sagi le sang ni val jen eihinsolpeh dia kathummo a nabol ham?

54 Chutin kibol leh Pathen thu hitobanga thilsoh dia asei chu iti guilhun thei ding ham?” ati.

55 Hichea hin Jesun mipi jah a, “Gucha michom man ding banga, chemjam le moltum thoa Kei man dia hungkon nahiuvam?” ati. Niseh-in Houin a katouvin mi kahil jin la nei man pouvin,” ati.

56 Hoi hileh Pathen lekhabua Themgaote sutsa jouse guilhunna dinga hicheng hi soh ahi,” ati. Chutah chun seijuiten adalhauvin ajam mang tauve.

 

Hou vaipoloi anga Jesu

(Mk 14: 53-65; Lk 22: 54-55, 63-71; Jn 18: 13-14, 19-24)

57 Jesu man hon Jesu chu Thempu chungnung Caiaphas in a akaiyu leh, hikoma chun Danthu them ho le upate anakikhom’ui.

58 Peterin Jesu chu galkangin ahinjuipeh-in, Thenpu chungnung inpi leitol geiyin ahunge; hichea hin, “Achaina munge,” tin alut’in lhacha ho lah a atouve.

59 Thempu len chengse le HOu vaipoloi chengsen Jesu tha theina din adou nan jouthu jeng hettohsah ahol’un,

60 mitampin jou thua hettohsah abol vangun athina thei lom khat cha aseidoh pouve. Akhon nan mi nin,

61 “Hiche Pa hin, ‘Pathen Houin kaphet lhah a nithum sunga kasahdoh thei ahi,’ tin aseiye,” atilhone.

62 Thempu Chungnung akipat doh paiyin, “Nahehset na cheng seu hi nadonbut lou ding ham?” tin Jesun adonge.

63 Jesu la athip beh jeng. Hichun Thempu chung nungin ajah a, “Hing jing Pathen min a kahahsel’a kasol nahi, Pathen Chapa Messiah chu nahi nahilou ham-seiyin?” tin anoi.

64 Jesun adonbut’in, “Chutia nasei ahi! Hinla kaseipeh nahi, tua pat Mihem Chapa hi Thaneipen jet’a touva, vanlaijol, meilom lah a hung namu diu ahi,: ati.

65 Chutah chun Thempu chungnungin aponsil akibo-eh paiyin, “Pathen ataitomtai. Hettohsah dang angai tapoi! Tutaha Pathen ataitom najah cheh tah-u chu me!

66 Iti nagel’um?” ati. Mihon, “Athemmoi, thi tei tei ding ahi,” atiuve.

67 Chutah chun mihon Jesu maiya chil asetkhum’un, achum’un, gaovin lang seitemin, koiham na denga chu?” tin ahouseuve.

68 “Messiah, gaovin lang seitemin, koiham nadenga chu?” tin ahouseuve.

Peterin Jesu aseilep

(Mk 14: 66-72; Lk 22: 56-62; Jn 18: 15-18, 25-27)

69 Peter chu polam leitol’a atouve. Soh nu-ngah khat ahungin, “Nang jong Galilee mi Jesu to kiloi nahibouve,” ati.

70 Hinla Peterin japi angsunga aseilep’in, “Ipi nasei ham kahepoi,” ati.

71 Kelkot polam a agapotdoh leh, soh nu-ngah khatman amudoh kit’in chukoma um ho ja a chun, “Hichepa jong hi Nazareth Jesu toh kivohsa ahi,” ati.

72 Peterin kihahsel to thon aseilep kit’in, “Hichepa khu kahe khapoi,” ati kit’e.

73 Chom khat jouvin chu koma ding miho ahungun Peter jah a, mong nahibouve, napao dan hin nakiphong doh tai,” atiuve.

74 Hiche phat vang hin Peter jong kigaosap le kihahsel thon, “Hiche pa him him kahe kha hih hel’e!” tia aseilep pet tah-in ah ahung khongtai.

75 Hichun, “Ah khon masanga thumvei neiseilep ding ahi,” tia Jesun asei chu Peterin ageldoh tan, polama apotdoh loiyin lhase tah-in akaptai.

26.2: Ex 12:1-27.

26.7: Lk 7:37-38.

26.15: Zech 11:12.

26.23: Ps 41:9.

26.28: Ex 24:8; Jer 31:37-34.

26.31 Zech 13:7.

26.32: Mt 28:16.

26.55: Lk 19:47 ; 21:37.

26.61: Jn. 2:19.

26.64: Dn 7:13.

26.65-66: Lv 24:16.

26.67: Is 50:6.

 

Matthew sut Kipana Thupha Bung 27

 

Pilate anga Jesu akailut’u

(Mk 15: 1; Lk 23: 1-2; Jn 18: 28-32)

1 Jingpi tah-in Thempulen ho le upate Jesu than a thei ding akihousom tauve.

2 Jesu chu thihkhaovin akan’un, akaiyun Rome gam vaipo Pilate apedoh tauve.

Judas thi

(Acts 1: 18-19)

3 Jesu matsah a pang Judas chun, Jesu tha dia thu kitan ahetdoh phat’in akisih behseh jengin, dangka somthum chu Thempu len ho le upaho alepeh kit’in,

4 “Themmonabei tha dinga kapehdoh chu kathemmotai!” ati. Amahon la, “Keiho i-kin hiya ong? Nangin kivet tange,” atiuve.

5 Judas-in sum chu Houin sunga aseplhan, apotdoh paiyin agakikhai lihtai.

6 Thempulen hon dangka chujat chu alauvin, “Hiche sum hi thisan man ahin, Houin sung sumkholnaa koi ngai ahipoi,” atiuve.

7 Akihoutoh phat’un gamdang miho lhan mol din, beldengpa lou mun achoh natauve.

8 Hijeh a chu tuni geiya hiche mu khu, “Thisan mun,” kiti ahi.

9 Hichea hin Jeremiah Themgao seisa, “Israel miten man tuh a atepsau dangka somthum chu mihon alauvin,

10 Pakaiyin eithupeh bangin beldingpa loumun choh nan anei tauve,” kiti chu aguilhunge.

 

Pilate’n Jesu thu adoh

(Mk 15: 2-5; Lk 23: 3-5; Jn 18: 33-38)

11 Jesu chu Rome gamvai popa angsunga adinsah tauvin, gamvaipon ajah a, “Judate lengpa nahim?” tin adonge. Jesun, “Chutia nasei ahi,” ati.

12 Thempulen ho le upaten ahehsetna thudol’a vang imacha adonbut poi.

13 Pilate’in Jesu jah a, “Mihon hijat’a nahehset nau hi najah lou ham?” ati.

14 Jesun thu cheng khat cha jong adonbut lou phat’in gamvaipopan kidang asa lheh jenge.

 

Pilate’n Jesu tha dia asei lhuh

(Mk 15: 6-15; Lk 23: 13-25; Jn 18: 39-19: 16)

15 Kalchuh kut sunga hi sohchang koi hileh japi dei pen pen khat Gamvaipon alhadoh peh ji ahi.

16 Hichepet hin sohchang minse tah Jesu Barabbas-khat akihen’e.

17 Mipi hung kikhop phat’in Pilate’n ajah uvah, “Jesu Barabbas kalhadoh peh diu ha, Messiah kiti Jesu joh kalhahdoh peh diu ham?” tin adonge.

18 Ijeh-inem itile Juda lamkaiten thangset suma Jesu apehdohu chu ahet ahi.

19 Thutanna muna Pilate atoupet man ajinun thu ahin thot’in, “Themmona bei hichepa chu limsah hih-in, ama jeh hin tunin kamangin kathoh gim lheh jenge,” ati.

20 Ahin Thempulen ho le upa ten Jesu asuhmanga Barabbas joh alha na din mipi atilseuvin, angeh sah tauve.

21 Gamvaipopan mipi adongin, “Hite ni kah a hoijoh kalhadoh peh ding nadeiyum?” ati. Mipin, “Barabbas!” atiuve.

22 Pilate’n, “Ahile Messiah kiti Jesu hi iba kalo ding hitam?” ati. Mipin, “Thingpel’a khenbehtan!” tin asamtauve.

23 Pilate’n, “Ipi suhset aneiyam?” tin adonge. Miho la a-olheh lheh-in apengun, “Thingpel’a khenbeh-in!” tin asam’ui.

24 Athilbol phat chomlou, boina asohjoh amu phat’in Pilate’in twi alan mipi angsunga khut asil’in, “Hichepa thina chung change mona po ponge, nang hon kivet tauvin,” ati.

25 Mipin adonbut’un, “Hichepa thisan phu chu keiho le katu kachateu chunga chu nante,” atiuve.

26 Pilate’n Barabbas alhadoh peh in, Jesu vang chu ajep’in thingpel’a khetbeh din apedoh tai.

 

Sepaihon Jesu Kichepna aneiyu

(Mk 15:16-20; Jn 19:2-3)

27 Gamvaipopa sepaiten Jesu chu gamvaipo inpi sunga apui lut’un, sepia hon lhingset’in akikhomui.

28 Jesu ponsil ahoh lhauvin, pon sandup asilpeh-un,

29 ling lukhuh apheh-un akhuh peh-uvin, akhut jet lama peng tenggol khat achoisah-un, tot nan aangsunga aboh khup’un, “Judate lengpa hingsot’in!” atiu ve.

30 Chil set khumun, atneggol’in aluchang ajep’un

31 tot nopna anei jou phat’un asilpeh-u ponsan chu ahoh lhauvin, ama pon asilpeh-un, thingpel’a khetbeh din apui mang tauve.

 

Jesu thingpel’a akhetbeh-u

(Mk 15:21-32; Lk 23:26-43; Jn 19:17-27)

32 Akijotdoh-u leh sepia hon, Cyrene gam mi Simon atoh khauvin, Jesu thingpel put hu did nada acham louvin aman’ui.

33 Golgotha, “lugu mun,” kiti lai ahung ge phat’un,

34 adon din cheikha toh kihal lengpitwi chu Jesu apeh-u leh, aman la atep’in adon nompoi.

35 Sepaihon Jesu chu thingpel’a akhenbeh-un, vang asan’un apon sil chengse akihomtauve.

36 Hikoma chun atouvun Jesu chu angah-ui.

37 Jesu luvuma ahehsetna, “Hichepa hi Jesu Judate lengpa ahi,” tia kisun chu atah-uve.

38 Gucha michom ni jong Jesu jet le veiya akhetbeh thauve.

39 Ache le avah le jouse Jesu chu ataitom nan akhasuh khum khum’ui.

40 “Houin phelha a nithum sunga sadoh ding Pa! Pathen Chapa nahileh Nangma kihuhhingin lang, thingpel’a konin hung kumlhan! Atiuve.

41 hitobangma chun Thempulen ho le Danthu them ho chule upaten jong a-eng houvun,

42 “Midang bon huhhinga, ama akihuhhing theipoi! Israel leng ahi-ong! Tutah-in thingpel’a konin hung kumlha hen tahsan unge!

43 Pathen a kisong ahi me, Pathen lungdei ahileh tutah-in huhdoh hen; ajeh chu, ‘Pathen chapa kahi,’ ati me,” atiuve.

44 Akikhetbeh pi gucha michom te geiyin jong chutobangma chun ahouse lhon’e.

Jesu thi

(Mk 15:35-41;Lk 23:44-49; Jn 19:28-30)

45 Nidan gup a pat nidan ko geiyin leiset pumpi chunga mu athimtai.

46 Nidan ko donin Jesu hapenin apengin, “Eli, Eli, lemasabachthni?” ati. Hichu “Ka-Pathen, i-bol’a neilha hitam?” tina ahi.

47 Chukoma ding mi phabeh’in apen gin ajauvin, “Hei, Elijah akouve,” atiuve.

48 Alah-uva mi khat alhaijel’in, twichop phon khat alan, lengpitwithuh adekot’in, tenggol leh a atah-in Jesu chu donsah ding agoi.

49 Midang hon, “Limsah hih-un, ahuhhing dia Elijah hung nam, veu hite,” atiuve.

50 Jesu hapenin apengin ahaitan paitan.

51 Chutah chun Houin pondal chu achunga pat anoi geiyin keh ni akison, ling akihot’in, songpi jouse apoh keh gamtai;

52 hijeh chun lhankot tampi akihongtan, mitheng thisa ho kaithouvin aum’ui.

53 Amahon lhan adalhauvin,Jesu thodoh nungin khopi thenga alut’un, mi tamtah henga akilah-ui.

54 Sepai jalamkai pa le aumpi sepia, Jesu ngah a pang hon, ling kihot le thilsoh chengse amu’vin, akicha behseh jengun, “hiche Pa hi Pathen Chapa tahbeh ahi,” atitauve.

55 Galilee gama pat Jesu nung hinjui, ajen lea pang numei ho chun galkanga konin Jesu ave-lhi jingui.

56 Alah-uva hin Magdalene khoa Mary toh, Jacob le Joseph nu Mary chule Zebedee chapate ni nu jong apanguve.

Jesu avuiyu

(Mk 15:42-47; Lk 23:50-56; Jn 19:38-42)

57 Nilhah phat’in, jesu seijuisa, Arimathea khoa amin Joseph kiti mihao tah khat ahungin,

58 Pilate henga achen Jesu long chu agathumtai. Pilate’n Jesu long chu Joseph din aphalpeh tai.

59 Joseph-in Jesu long chu adom lhan, tupat pon ngimseh-in atomin,

60 songpi akhet homa akisemsa, ama lhan thah beh sunga chun alupsah-in, lhankot’ah song lentah khat atnag lut’in asing chah-in achetai.

61 Magadalene khoa Mary le Mary khat joh chu hikoma chun lhan lam ngan atou lhone.

Lhan ngah ho

62 Ajing nikho, kigot ni kichai jouvin thempulen ho le Pharisee ho Pilate henga ahungun,

63 “Pu, hiche milhem chavai pa hin, ahinlaiyin, ‘Nithum jou le kaithouva ka-um ding ahi,’ ati kageldoh-uve.

64 Hijeh chun nithum geiya kitup tah a lhan ngah din mi koiyin, achutiloult aseijuite hunga atahsa longdamsa aguh mang diu, miho jah a, ‘Thina konin kaithouvin aumtai,’ atiuva, amasa eilhep chatvai sanguva anukhah tneg khoh cheh a eilhep diu ahi,” atiuve.

65 Pilate’n adonbut’in, “A-ngah ding naneiyu chu me, cheuvin lang pha nasah bangun lhan chu gaki-nga tup tau!” ati.

66 Amahon acheuvin. Lhankot song chu mohor anam khum’un, angah ding akoitauve.

27.3-8: Ac 1:18-19.

27.9-10: Zech 11: 12-13.

27.24: Dt 21:6-9.

27.34: Ps 69:21.

27.35: Ps 22:18.

27.39: Ps 22:109:25.

27.40: Mt 26:61; Jn 2:19.

27.43: Ps 22:8.

27.46: Ps 22:1.

27.48: Ps 69:21.

27.51: Ex 8:2-3.

27.63: Mt 16:21; 17: 23:20: 19; Mk 8:31; 10:33-34; Lk 9:22; 18: 31-33.

Matthew Sut Kipana Thupha Bung 28

 

Jesu thodoh

(Mk 16:1-10; Lk 24:1-12; jn 20:1-10)

1 Choldo nikho kichai, hapta kipatna ni masa jingkah khoovah thin thenin Magdalene khoa Mary le Mary khat nu chu lhan vedin ahung lhone.

2 Phulou helouvin ling hahon akihot’in, van a konin Pakaiya kon Vantil khat ahung kumlhan, lhankot sin song chu atangdohin, song chu kolphe vah-in avah-in, aponsil meibang banin abnage.

3 Vantil vouso chu kolpha vah-in avah-in, aponsil meibang banin abnage.

4 Lhan ngah hon akicha behseh jengun athisa abnag jengui.

5 Vantil chun numeiho ahin houvin, “Kicha hih-un, thingpel’a kikhetbwh Jesu chu nahol’u ahin, kahenai.

6 Ama hikoma aumtapoi, Aman aseisa bangin athoudoh tai. Hungin alupna hung veuvin.

7 Cheloiyun aseijuite jah a, ‘Ama thinaa konin athoudoh-in, Galilee gama nang ho sangin amasajotai, hikoma chu nakimupi diu ahi,’ tin gaseiyun. Ngai phauvin kaseipeh nahitauve,” ati.

8 Numeihon kichat le kipa thon lhan phung dalhan, seijuite gaseipehdin lhaijel tauve.

9 Phulou helouvin jesun numeiho chu akimupin, “Lung monguvin!” ati. Numeihon ahin nailut’un, akeng phang atuh-un aboh khup tauve.

10 Jesun ajah-uva, “Kicha hih-un, kile kit’uvin, kasopite chu Galilee gama che din gaseipeh-un, hikoma chu eimu diu ahi,” ati.

Lhan ngah ho thulhut

11 Numeho lamkai agei nalaiyun, lhan ngah sepia hokhopi sunga alut’un, thilsoh chengse abonchan Thempulen ho kom alhut tauve.

12 Thempulen ho le upaho akihou toh loiyun, sepia ho hi sum tampi apeuvin,

13 “Nang hon, ‘Jan ka-ihmut lan’un aseijuiten along ahung gu mang tauve,’ tia nasei tei tei diu ahi.

14 Hiche thu hi Gamvaipon ajah tah jongle keihon houjol’ung ting, nang ho lung olmosah pou vinge,” atiuve.

15 Lhan ngah sepaihon sum chu akilah un, ahil nau bangin abol tauve. Hitobang thujou

Jesun seijui som le khat tha apeh

(Mk 16:14-18; Lk 24:36-49; Jn 20:19-23; Acts 1:6-8)

16 Jesun che dia atepeh nau Galilee lhanga chun seijui somle khat chu anachetauve.

17 Abang bang along opkai vangun, seijuihon Jesu amu phat’un chibai aboh tauve.

18 Jesun ahin nailut’in ajah-uvah, “Van le leiset’a tha neina jouse eikipetai.

19 hijeh chun cheuvin lang muntin a mi jouse seijuiyin gasem tauvin, amaho chu a-Pa, a-Cha chule Lhagao Theng minin baptize galbol’un,

20 chule kathupeh chengse anitna diuvin hilun; veuvin leiset khang kichai ni geiyin Keiman nang ho ka-umpi jing nauve,” ati.

28.16: Mt 26:32; Mk 14:28.

28.19:Ac1:8.

Leave a Reply

 

 

 

You can use these HTML tags

<a href="" title=""> <abbr title=""> <acronym title=""> <b> <blockquote cite=""> <cite> <code> <del datetime=""> <em> <i> <q cite=""> <s> <strike> <strong>