Khhamnathei muchi kitu be jing!
Thinglhang langa imite chen nao gamlei mun ho hi muchi chi vo aphat a pha thei ahi. Gamlei set jong ahing dil del e. Chang, Kolbu, Mai, Um, Thing, Anjang, melchapom, coffee, komla, champada leh adang dang tampi ahing hoi lheh e. Hiche Pathen phatthei boh gamlei mun ho a chun, tun khhamnathei muchi ahung kit u tam cheh cheh tai. Hiche khhamna thei muchi a kona alo doh u sum leh amasa ana tu u muchi (achunga hung kisei muchi leh theiga) a kon a alo doh u sum hi van le lei ka kah banga ki kah ahi. Changhum tang khat Kyats 3000 ($ 3.00) vel bep ahin, khhamna thei muchi choikhat Kyats 30,00,000 ($ 3,000) val lang peh ahi. Hoi che joh itoh diu ham ki ti leh mijouse a dinga gel hahsa tah khat ahi. A gammun a um atam jon chol le nanga kitong tin sum tam mu na chu atong kha tau ve.
Hiche khhamnathei muchi hi guhthim jong hi ta lou, inkon, khomite leh houbung mite hon abol u ahi tai. Gamsung vaipo hon jong ahet mo u hi lou, alou vat pat, atupat a koima sorkal lamkai ho gache lou. Lho lhunphat ahi tai ti tom leh ga cheuva khhamnathei bol na langa lamkai ho chu aga mat jiuva, ama ho chu sum tampi pi a aki le lhetdohsah uva, kum lhunga khhamnatheiya kon a alo doh u chu a lah peh jiu ahi.
Chuti keo hi lou vin, atoh til u chun khhamnathei ahi jeh in ching thei tah in ana tong naove. Khonung in ol ol in ahin tep kha un, tun pilhing pasal sim lou nupi, nu ngah gol lhang leh chapang hon jong hiche khhamnathei muchi hi amang tau vin ahi. In sung a mi nu leh mipa, chate hon mihem lhohbu tong kha thei leh su se thei khhamna thei muchih ahin tu khah uva, ahin neh neh uhi mihem khat hina ki su se ahi tai. Jat le nam khat hi naa jong lainat um tah ahi tai.
Hiche gamlanga cheng isopiu, ijat inam teu hi kon hil leh pha ding ham ti hi mun tin a jat le nam ngailu hon asei jing un, ahi thei pen ding chu hiche khomite ho umna houbung lamkai ho hin sei leh hi pen ding in aki mui. A jeh chu tudin mun a hi jatlenam lamkai ki nei lou ahin, ama ama houbung lamkai ho thusei chu ki la pen ahi. Hiche khomite ho houbung kiloikhomna (church organizations) a lamkai len hon ga houlim piu leh hi thei pen ding ahi. Kim khat houbung ho ma chun houbung dinga sum ato thei u leh tin hiche lang hi asei nom kit pouve. Hi ta jong leh hinkho i-ki huhdoh diu angai ma ma tai!
Nehkholal
USA (Kholjinpat)
December 6, 2010
Pu nehkholal in lhang ahinsap hi pohnat a umlheh jeng e. I-gam leiso hoilai jouse hunggo ding in aumtan, phatkhat leh kel,puhsui kiti ho eihin phah diuvin aumtai. Hiche khamnathei tu jeh a kinedoh hin jong Innsung, houbung le gamsung boina nasatah a ahin belap ding ahin, boina hi eihon i-ki kou thu dan in aumdoh tai. Negative impact of globalisation ahin, hiche jal a nam hung mangam nathei khat jong chu hidin tahsan aum in ahi. Hithei leh Nam lamkai hon pan hatah in laleh tu le tua dia phading ahi. Chule mipi te hi awareness habol ngaijin te.
Comment na hin bol kipa aum e.